Le site de partage de la langue marquisienne
Te tohua niutavavā hou mea àva atu àva mai i te èo ènana
The new site for sharing the Marquesan language

Vue de la plage Vainaho et du Fort Collet, Taiohae, Nuku Hiva. René Gillotin, 1844.

Tau pure no te tominika e hā o te Ava Tetaì, èhua A (18/12/2022)

4eme avent

« Enā, e kōpū tama te virikine. E hānau īa i te tamaòa.
E apa âtou i to īa ikoa o Emanuera. Oia hoì ma he èo ènana : O te Etua me tātou. »

TOMINIKA E O TE AVA TETAÌ

(Â tapu 18 no Mei 2022)

 

TOMOÌA :    G.9   ( e ono)

Haameitaì nei mātou i te Patirēia o te àki

Ta Òe, e Ietu, i haamevaha

No te poì nui hemo i te mate

Me te tau ènana i òto o te veve.

               Mōumu
Hāìu te koekoe ! Ua tata te Patirēia.
U peàu te Hatu : Hāìu te koekoe !
A hua mai tātou io Ietu.

         (Â tapu)  E.7       E Ietu, ta mātou e tiaki nei, Me mai, mave mai !

                 1
E tetaì nei mātou ia Òe,
A hee mai, to mātou Hatu !
A tiòhi meitaì ia mātou !
A matavaa, e hoa e !

              2
E vevaò nei mātou ia Òe,
A hee mai, e te Haapohuè !
Umoì e haamau
To mātou mikeo !

Penitenia

 

TARAMO 24 (23) : A tihe mai te Hatu, te Hakaìki i te kāìè.

 

Kio Vānana :      Enā, e kōpū tama te Virikine, e hānau ai i te tamaòa. E apaìa te ikoa o Emanuera.Oia hoì ma he èo ènana : O te Etua me tātou.

 

Pure a te poì haatià :  E te Hatu, a òko i ta mātou pure ; 

                ( e ono)    A òko mai ia mātou (bis).

                 (Â tapu)       Me he auahi kekaa, ua hiti ta mātou pure

                                      io Òe, e te Hatu e.

 

ÙTUNA :     E.7       E Ietu, ta mātou e tiaki nei,     ( e ono)

                                   Me mai, mave mai !

                 1
E tetaì nei mātou ia Òe,
A hee mai, to mātou Hatu !
A tiòhi meitaì ia mātou !
A matavaa, e hoa e !

              2
E vevaò nei mātou ia Òe,
A hee mai, e te Haapohuè !
Umoì e haamau
To mātou mikeo !

 

E.3      Mōumu : Mave, mave mai, e te Hatu e (bis)   (Â tapu)        

 

               1
O Òe te māàma Etua,
Vivini i te aomāàma.
A haaìte i te vaanui
O te pohuè mau ananu !
A mai, e te Hatu e !

             6
O Òe te Māàma tūìka
Paotū te tau mataèinaa.
A haapupuà i te poì nui
Taha io te vahi maù

O te pō !
A mai, e te Hatu e !

                  7 

O Òe, te Emanuera e,

E te Etua me mātou e.
A haatee mai i te vaanui,

Te tiàtohu me te pohuè !
A mai, e te Hatu e !

        

Peàto

 

Haamaakauìa :  Te kāìè ia Òe, e te Hatu e, te i mate nui, te pohuè ; a tihe mai, e Ietu ; a tihe mai, e Ietu.

 

To mātou Motua e                       /                               Arenio

 

KŌMŌNIŌ :   D.29   (Pō e ono)

             Mōumu
E Ietu e, Haapohuè mau,
U vevaò mai Òe ia ù nei
No te kaiìamau o te Eukaritia
Mea pohuèìa no ù.

E taha atu nei hoì au
Io Òe, e Ietu e ;
Ua too i to Òe nino,
Ua inu i to Òe toto ;
Òe tu ù Etua, tu ù Pohuè.

 

Ua noho mai Òe, e Ietu, / i òto o au nei.
Ua tahi tāua. / E hahi, e hīmene nei
Tu ù kuhane ia Òe, tu ù Pohuè.

 

D.40       (Â tapu)        

            Mōumu

E te Kirito e, i tēnei ananu,

He Etua Òe, e kāòha anaè

I te tau ènana ma te tai kōtoa.

U vevaò Òe ; eīa mātou nei.

              1
A meitaììa te Hatu Etua,
Haaènanaìa me i òto (o) Maria,
Pāokapekaìa, ua mate nui,
Ua hakaùa i ia tātou.

 

 

 

             2
A meitaììa Ietu te pōìti,
I peàuìa, i tetaììa.
E keàpa nei te Māàma nui
Me te iti noa i ia tātou.

                    3
A meitaììa te Tama Hāmua
E aotahi ana te motua kui.
Ua hana îìma, e ìte kāmuta.
E aahi Īa i ia tātou.

 

 

Hīmene haahuaèkaèka : C.12            (Â tapu)        

                  1
E aha ta mātou e hana
No te haahuaèkaèka,
No to Òe tau hana kāòha,
Ma io Ietu, to Tama tāhia.

E te Hatu Etua,
No Òe hoì mātou...  ananu ;
Ua tuku atu mātou ia Òe.

                  2
E tu ù Etua meitaì,
E kāòha ta ù nei ia Òe,
Io he koekoe, io he ate,
Io he hōupo, io he menava.

O Òe te Poèa,
O Òe te Meitaì ... ananu ;
I uē ai au ia Òe, te Hatu e.

 

3   A hahi, a kāìè ananu
    I te Etua mana, te Pēpena,
    Me ia Ietu, te Tama Tāhia,
    Me i te Kuhane Meitaì.

Te hahi, te kāìè
I to tātou Etua... Pohuè,
I tēnei ma te tau tai ananu.

       

 

PAHIÌA :   (Pō e ono)

(Tau moî)

Je te salue Marie,

Comblée de grâces,

Le Seigneur est avec toi.

Tu es bénie, Marie,

Entre toutes les femmes,

Et Jésus, le fruit de tes entrailles,

Est béni.

Mōumu : (Tau māhaì)

Sainte Marie, Mère de Dieu,

Oh, prie pour nous,

Pauvres pécheurs,

Et maintenant,

Et jusqu’à l’heure de notre mort,

Amen.

                   Ave Maria, Ave Maria / Ave Maria, Ave Maria (x 2) (Paotū)

 

Z.170         (Â tapu)        

               Mōumu

I hana mai te Hakaìki mana

I te mea mahaò nui.

A meitaì to Īa ikoa.

                  1

U , u tātakahiti tu ù kuhane

I te Hatu, tu ù pohuè.

 

                     2

O te poì mana te i haatopaìa ;

O te poì pāpaku te i anaè.

                     3

U tapavaù nui te poì oke,

U tiehiìa te tau òna veve nui.

 

TOMINIKA E O TE AVA TETAÌ

TATAUÌA O TE PEROHETA ITAIA     7, 10-16

10      U pōpahi te Etua ia Itaia te peroheta, io te hakaìki,

        o Akata to īa ikoa.

        U peàu Itaia i te hakaìki pēènei :

11      « A ape òe i tītahi hakatu io te Hatu : e aha à te hakatu,

        me io te havaiki oti, me io te àki i ùka oti. »

12      U haahua te hakaìki : « Aòè. U te e haamōtii atu au i te Etua »

13      A tahi a peàu Itaia, te peroheta :

        « A hakaòko mai, e te ati o Tavite.

        Aòè e àva ta ôtou haapaòpaò i te tau ènana ?

        E hano ôtou i tēnei e haapaòpaò i tu ù Etua ?

14      Na te Hatu iho e tuku atu ia ôtou i tītahi hakatu.

        U kōpū tama te vehine hou virikine, e hānau īa i te tamaòa.

        U apaìa to Īa ikoa o Emanuera.

        Oia hoì ma he èo ènana : O te Etua me tātou.

15      U hākaiìa me te mānini tikauè me te vaiū,

        tihe e ìte Īa i te titii i te mea , te hana i te mea meitaì.

16      Na te mea, ma mua e ìte hua tama te hana i te hana meitaì

        me te titii i te mea , e viviiō te henua o hakaìki tokoùa

        te i haametaù ia òe i tēnei. »

 

TARAMO 24 (23), 1-2, 3-4ab, 5-6

 A tihe mai te Hatu, te Hakaìki i te kāìè        cf. .24,7.10

 

1       Na te Etua te aomāàma me to īa taetae paotū,

        Te henua me te tau ènana e noho nei i òto.

2       Na Īa i haatū i te henua me io te tau vai.

        Na Īa i haamau keue koè ma ùka o te tai.

 

3       O ai te ènana e hiti i ùka o te tuaivi o te Hatu ?

        O ai te i koàka e noho io he vahi tapu ?

4       Te ènana koekoe taìtaì me te îima piò koè.

        Te ènana i vevaò teka koè i te ikoa o te Hatu.

 

5       Me io te Hatu, e ìò mai to īa meitaì.

        Me io te Etua, e ìò mai to īa toitoiìa.

6       Eīa nei te mataèinaa ùmihi i te Hatu.

        Oia te poì e ùmihi nei i te mata o te Etua.

 

TATAUÌA O TE HĀMANI A PAURO PEÀTO I TO ROMA

                                                                                                   1, 1-7

 

1       O au Pauro, te tāvini o Ietu Kirito, vaeìa no te hana Àpotoro,

        tāpaeìa mea haamevaha i te Evanerio a te Etua,

2       ta Īa i peàu òmua ma te haha o te tau peroheta,

        vāàna i te Hāmani tapu.

3       O hua Evanerio,

        he Tekao Meitaì Hou Mai o te Tama o te Etua,

        he ènana hānauìa me io te ati Tavite.

4       Vāàna e te Kuhane Meitaì te i haapeàto mai,

        u haatiketikeìa he Tama a te Etua me te mana,

       mēìa i to Īa tū hakaùa me i vāveka o te huaa mamate,

        o Ietu Kirito, to tātou Hatu.

5       Ma io Īa, ua vaièi mai te Etua i te karatia

        me te hana Àpotoro o te Kirito,

        no te vevaò ma to īa ikoa i te poì êteni paotū,

        e hakako ia âtou i te aotahi atu i te haatià.

6       O ôtou tahipito vaeìa e te Etua no te haatahi me Ietu Kirito.

7       E patu au i tēnei hāmani io ôtou, te i haataetaeìa e te Etua,

        te mataèinaa peàto e noho nei i Roma.

        Ia ôtou te karatia me te moû

        me io te Etua to tātou Motua, me io te Hatu Ietu Kirito.

 

ALLELUIA ALLELUIA

                                                                                      Mt.1,23

« Enā e kōpū tama te Virikine, e hānau ai i te tamaòa. E apaìa te ikoa o Emanuera. » Oia hoì ma he èo ènana : O te Etua me tātou.

 

EVANERIO O IETU KIRITO VĀÀNA E MATEO     1, 18-24

18      Oia nei te hānauìa o Ietu Kirito.

        U tuia te kui o Ietu, o Maria to īa ikoa,

        me tītahi vāhana, o Ioteve te ikoa.

        Ma mua to âua nohoìa, u kōpū tama Maria

        na te mana o te Kuhane Meitaì.

19      He ènana toitoi noa Ioteve, ta īa vāhana.

        Aòè īa e makimaki e pōtoho pu ia Maria.

        No èià, u kaituto īa e titii ia īa ma te ìte koè.

20      Ohia e auana atii Ioteve, ua ìte īa io he moemoeā,

        i te anera o te Hatu te i peàu mai :

        « E Ioteve e, te tama a Tavite, umoì òe e haametaù

        no te apuu io to òe haè ia Maria, ta òe vehine.

        U kōpū tama hoì īa na te mana o te Kuhane Meitaì.

21      E hānau īa i te tamaòa. E apa òe i to īa ikoa o Ietu.

        O Īa hoì te i haapohuè i to Īa mataèinaa

        me i to âtou tau mikeo. »

22      Ua pao tēia tau mea paotū no te haatiàtohu

        i te Tekao o te Hatu i peàuìa e te peroheta, pēènei :

23      « Enā, e kōpū tama te virikine. E hānau īa i te tamaòa.

        E apa âtou i to īa ikoa o Emanuera.

        Oia hoì ma he èo ènana : O te Etua me tātou.»

24      Ua vaa Ioteve. U aotahi īa i ta te anera o te Hatu i peàu atu

        me to īa apuu i ta īa vehine io to īa haè.

 

 

Comments est propulsé par CComment