Le site de partage de la langue marquisienne
Te tohua niutavavā hou mea àva atu àva mai i te èo ènana
The new site for sharing the Marquesan language

Vue de la plage Vainaho et du Fort Collet, Taiohae, Nuku Hiva. René Gillotin, 1844.

Tau pure no te Koìka o Maria Peàto, te Kui o te Etua, èhua A (01/01/2023)

marie mere de dieu

« Na te Etua i pahi i ta Īa iho Tama te i hānauìa me i òto o te vehine. »

 

TE KOÌKA O MARIA PEÀTO, TE KUI O TE ETUA

(Â tapu, to mua â no Èhua 2023)

TOMOÌA :    V.20      ( e ono

             1
E te Haatepēiù
To te àki koakoa,
E vevaò nei mātou
I to òe ikoa.

                Mōumu
E Maria peàto e, to mātou kui,
O to mātou kāòha ia òe, ia òe.
E Maria peàto e, to mātou kui,
O to mātou kāòha ia òe.

          2
E te kui virikine
To te henua taetae,
Ua pure mātou io òe
Me te peàu atu.

 

V.(Â tapu)

                      1
O ai tēnei, tēnei e tiòhi nei ?
E pootu me he pōpōuì, o Maria,
O Maria, te i hānau, te i tuku
I te hihi o te òumati tiketike.

       Mōumu
A hīmene ia Maria,
Te kui o te Etua,
To tātou òna kui,
I tupu mikeo koè.

              2 O Maria, te Haatepēiù / No te àki, no te henua,
                 A tiòhi i to Hatu tama / E to mātou pure rohario.

     

 

TARAMO  67 (66) : A matavaièi mai te Hatu ia tātou, a haameitaì mai.

Kio Vānana :   Òmua ìka, u tekao mai te Etua ma te haha o to Īa tau Peroheta. I tēnei mou , u tekao te Etua me tātou ma to Īa Tama.

 

Pure a te poì haatià : A matavaièi mai, e te Motua e,

                     ( e ono)        i te pure ta mātou e haahiti nei. A apuu mai me te moû.

 

                      (Â tapu)            E te Hatu Etua, a òko ia mātou.

ÙTUNA :     F.10

Kātahi mai tātou kōtoa

Mea hahi i te Tama hou,

Te Hatu Emanuera e !

A ìte tātou hoa e !

I te Henua Petereemi,

Hakaìki hānau hou,

Te Pohuè o te poì.

O Maria me Ioteve

I te tūmoe nui,

I te kaokao o te tama hou.

V.40:      1
Hahi tātou, (bis)
Hahi hoì (bis)
Ia Maria

Taìtaì .

         Mōumu
Hahi, hahi au,
Hahi, hahi ia òe,
Hahi, hahi au,
Hahi ia òe.

          2
A mahaò
No te hana
Kanahau
I haapaoìa.

          3
E vehine
Pakaihi (īa e)
E Ioteve (o te i noho)
Taìtaì.

                4 Me i ùka / O te hātaa,
                   A toko mai (bis) / A taha mai !

       

 

Haamaakauìa : Te kāìè ia Òe, e te Hatu e, te i mate nui, te pohuè ; A tihe mai, e Ietu ; a tihe mai, e Ietu.

 

KŌMŌNIŌ :   F.5

                    1
Ua mutu te àki me te henua,
Ua ìò te Tekao mea ènana.

                      Mōumu
E ìò nei o Īa he tama iti,
Te Haapohuè me te Tāvini.

 

             2
I te tūmoe nui, u hānau mai nei
Ietu, te Māàma nui no te ao nei.

                 3
Taioko te poì e memae nei
Te i haapāpaku to âtou koekoe.

 

                        4
A hee mai, e te tau tiaki mutō,
Me te koakoa i òto te fātene !

                        5
Atii me tātou, a hee io Ietu
Atoratio me te haameitaì atu.

 

Hīmene haahuaèkaèka a Maria Peàto :             Magnificat

 

         • U haatiketike tu ù kuhane i te Hatu.

     Ua û i te koakoa tu ù koekoe io te Etua haapohuè.

                     - U tiòhi mai i to Īa pahikaèo haapāpaku.

                       Mamau òe, e peàu mai te tau tai ènana paotū.

• I ia ù, ua hana i te hana mahaò te Mana nui.

  O Peàto to Īa ikoa.

                         - I tēia tai, i tēia tai, e mau à to Īa hakāòha

                           i i te tau ènana e pakaihi ia Īa.

  • U hakaìte mai i te ìi o to Īa mana

     ma te haatavavā i te poì kāìè pu.

                          - U haaiho Īa i te poì mana me io he nohoka kāìè

                                   me te haatiketike i te poì iti noa.

   • U haatapavaù i te tau ènana mate i te oke.

     U titii i te poì me te taetae, kiko koè îima.

             - Ua toko te Hatu ia Iraene, to Īa tāvini,

               E haamaakau aa i to Īa hakāòha nui.

   • Vāàna i to Īa tekao i to tātou tau tupuna,

      i ia Aparahamo me to īa ati i ùka ,

      no te tau tai a tihe ananu.

A kāìè nui i te Motua me te Tama me te Kuhane Meitaì ma te tau tai a tihe ananu. Amene.

 

PAHIÌA : V.34

                 1
A nui te mahaò e,
To Maria hānauìa e,
Mea kui no Ietu e,
A nui te mahaò e.

                Mōumu
Kāòha òe Maria e,
E te Haatepēiù e,
Kāòha òe Maria e,
E te Haatepēiù e,
E te kui no Ietu e
A pure òe no mātou nei e.

                     2
Koìka nui hoì no mātou e,
To òe hānauìa nei e.
A tiòhi mai òe Maria e
I ta òe tau tama e.

 

 

TE KOÌKA O MARIA PEÀTO, TE KUI O TE ETUA

TATAUÌA O TE HĀMANI A MOITE PEÀUÌA NŪMERA

                                                                                               6, 22-27

22      U peàu te Etua ia Moite :

23      « Oia nei te ponatekao ta Aarone e peàu ai,

        atii me to īa ati ma te tau tai i ùka ,

        no te haameitaì i te tau tama o Iraene, pēènei à :

24      A haameitaì me te tiaki meitaì te Hatu Etua ia òe.

25      A matavaièi me te haakāòha mai te Hatu Etua ia òe.

26      A tiòhi meitaì te Hatu Etua i ùka o òe.

        A tuku atu ia òe i to Īa moû. »

27      Oia te hakatu e vevaòìa tu ù ikoa

        ma ùka o te tau tama Iraene.

        O au à, e haameitaì au ia âtou.

 

TARAMO  67 (66), 2b.3, 5abd, 7-8b

 A matavaièi mai te Hatu ia tātou, a haameitaì mai.

 

2       A pupuà to Īa mata i ùka o tātou nei.

3       E ìteìa to Òe vaanui io te aomāàma vii pu,

        To Òe haapohuèìa ma te tau henua paotū.

 

5       A koakoa te tau mataèinaa, a hīmene âtou.

        U vivini hoì Òe i te aomāàma me te toitoi.

        U haatee Òe i te tau mataèinaa ma he henua.

 

7       Ua hua te henua i to īa puku,

        U haameitaì mai te Etua ia tātou.

8       A pakaihi te henua vii pu i to īa Hatu.

 

TATAUÌA O TE HĀMANI A PAURO PEÀTO I TO KARATA

                                                                                                   4, 4-7

4       Ia tihe te ava i haaheiìa e te Etua,

        na Īa i pahi i ta Īa iho Tama

        te i hānauìa me i òto o te vehine, te i aotahi i te Ture a Moite,

5       mea haapohuè i te tau ènana aotahi ana i te Ture,

        me te haaìò ia tātou paotū he tau tama a te Etua.

6       Ohia he tau tama ôtou a te Etua,

        ua pahi Īa i te Kuhane Meitaì i òto o ôtou te i taaàu nei :

        « E Apa, e tu ù Motua e. »

7       Oia te tumu ua koè to òe hakatu o te ènana

        haamōèhuìa i te tau kuhane mana o te ao nei.

        Ua ìò òe he tama a te Etua. Me he mea e tama òe,

        e àva atu hoì i te tau taetae

        ta te Etua i tāpae no to Īa tau tama.

 

ALLELUIA ALLELUIA

                                                                                      cf. He.1,1-2

Òmua ìka, u tekao mai te Etua ma te haha o to Īa tau peroheta. I tēnei mou pō, u tekao te Etua me tātou ma to Īa Tama.

 

EVANERIO O IETU KIRITO VĀÀNA E RUKA     2, 16-21

        I tēia mou pō,

16      u titihe haakoi mai te tau ènana tiaki mutō.

        U koàka mai ia âtou o Maria, o Ioteve

        me te tama hou e moe ana i òto o te fatene.

17      Ia ìte meitaì âtou, ua haki atu i te mea

        i peàuìa ia âtou i ùka o hua pōìti.

18      Ua i te mahaò te tau ènana paotū

        te i òko i te tekao o te tau ènana tiaki mutō.

19      O Maria à, u haamau io he koekoe i tenā tau mea paotū

        me te kaituto hae ia âtou.

20      Ua hua te tau ènana tiaki mutō.

        U haakāìè âtou me te hahi i te Etua

        no te tau mea paotū ta âtou i òko me ta âtou i ìte,

        vāàna i te tekao i peàuìa ia âtou.

21      Ia pao e vaù â, ua tihe te ava no te pātehe i te pōìti.

        U apaìa te ikoa o Ietu, vāàna i ta te anera i peàu

        ma mua atu i to Īa tupuìa.

 

Comments est propulsé par CComment