« Na te Etua i pahi i ta Īa iho Tama te i hānauìa me i òto o te vehine. »

TE KOÌKA O MARIA PEÀTO, TE KUI O TE ETUA

(Â tapu, to mua â no Èhua 2023)

TOMOÌA :    V.20      (Pō e ono) 

V.7  (Â tapu)

TARAMO  67 (66) : A matavaièi mai te Hatu ia tātou, a haameitaì mai.

Kio Vānana :   Òmua ìka, u tekao mai te Etua ma te haha o to Īa tau Peroheta. I tēnei mou pō, u tekao te Etua me tātou ma to Īa Tama.

Pure a te poì haatià : A matavaièi mai, e te Motua e,

                     (Pō e ono)        i te pure ta mātou e haahiti nei. A apuu mai me te moû.

                      (Â tapu)            E te Hatu Etua, a òko ia mātou.

ÙTUNA :     F.10

Haamaakauìa : Te kāìè ia Òe, e te Hatu e, te i mate nui, te pohuè ; A tihe mai, e Ietu ; a tihe mai, e Ietu.

KŌMŌNIŌ :   F.5

Hīmene haahuaèkaèka a Maria Peàto :             Magnificat

         • U haatiketike tu ù kuhane i te Hatu.

     Ua û i te koakoa tu ù koekoe io te Etua haapohuè.

                     - U tiòhi mai i to Īa pahikaèo haapāpaku.

                       Mamau òe, e peàu mai te tau tai ènana paotū.

• I uē ia ù, ua hana i te hana mahaò te Mana nui.

  O Peàto to Īa ikoa.

                         - I tēia tai, i tēia tai, e mau à to Īa hakāòha

                           i uē i te tau ènana e pakaihi ia Īa.

  • U hakaìte mai i te ìi o to Īa mana

     ma te haatavavā i te poì kāìè pu.

                          - U haaiho Īa i te poì mana me io he nohoka kāìè

                                   me te haatiketike i te poì iti noa.

   • U haatapavaù i te tau ènana mate i te oke.

     U titii i te poì me te taetae, kiko koè nā îima.

             - Ua toko te Hatu ia Iraene, to Īa tāvini,

               E haamaakau aa i to Īa hakāòha nui.

   • Vāàna i to Īa tekao i to tātou tau tupuna,

      i uē ia Aparahamo me to īa ati i ùka aè,

      no te tau tai a tihe ananu.

A kāìè nui i te Motua me te Tama me te Kuhane Meitaì ma te tau tai a tihe ananu. Amene.

PAHIÌA : V.34

TE KOÌKA O MARIA PEÀTO, TE KUI O TE ETUA

TATAUÌA O TE HĀMANI A MOITE PEÀUÌA NŪMERA

                                                                                               6, 22-27

²²      U peàu te Etua ia Moite :

²³      « Oia nei te ponatekao ta Aarone e peàu ai,

        atii me to īa ati ma te tau tai i ùka aè,

        no te haameitaì i te tau tama o Iraene, pēènei à :

²⁴      A haameitaì me te tiaki meitaì te Hatu Etua ia òe.

²⁵      A matavaièi me te haakāòha mai te Hatu Etua ia òe.

²⁶      A tiòhi meitaì te Hatu Etua i ùka o òe.

        A tuku atu ia òe i to Īa moû. »

²⁷      Oia te hakatu e vevaòìa tu ù ikoa

        ma ùka o te tau tama Iraene.

        O au à, e haameitaì au ia âtou.

TARAMO  67 (66), 2b.3, 5abd, 7-8b

 A matavaièi mai te Hatu ia tātou, a haameitaì mai.

²       A pupuà to Īa mata i ùka o tātou nei.

³       E ìteìa to Òe vaanui io te aomāàma vii pu,

        To Òe haapohuèìa ma te tau henua paotū.

⁵       A koakoa te tau mataèinaa, a hīmene âtou.

        U vivini hoì Òe i te aomāàma me te toitoi.

        U haatee Òe i te tau mataèinaa ma he henua.

⁷       Ua hua te henua i to īa puku,

        U haameitaì mai te Etua ia tātou.

⁸       A pakaihi te henua vii pu i to īa Hatu.

TATAUÌA O TE HĀMANI A PAURO PEÀTO I TO KARATA

                                                                                                   4, 4-7

⁴       Ia tihe te ava i haaheiìa e te Etua,

        na Īa i pahi i ta Īa iho Tama

        te i hānauìa me i òto o te vehine, te i aotahi i te Ture a Moite,

⁵       mea haapohuè i te tau ènana aotahi ana i te Ture,

        me te haaìò ia tātou paotū he tau tama a te Etua.

⁶       Ohia he tau tama ôtou a te Etua,

        ua pahi Īa i te Kuhane Meitaì i òto o ôtou te i taaàu nei :

        « E Apa, e tu ù Motua e. »

⁷       Oia te tumu ua koè to òe hakatu o te ènana

        haamōèhuìa i te tau kuhane mana o te ao nei.

        Ua ìò òe he tama a te Etua. Me he mea e tama òe,

        e àva atu hoì i te tau taetae

        ta te Etua i tāpae no to Īa tau tama.

ALLELUIA ALLELUIA

                                                                                      cf. He.1,1-2

Òmua ìka, u tekao mai te Etua ma te haha o to Īa tau peroheta. I tēnei mou pō, u tekao te Etua me tātou ma to Īa Tama.

EVANERIO O IETU KIRITO VĀÀNA E RUKA     2, 16-21

        I tēia mou pō,

¹⁶      u titihe haakoi mai te tau ènana tiaki mutō.

        U koàka mai ia âtou o Maria, o Ioteve

        me te tama hou e moe ana i òto o te fatene.

¹⁷      Ia ìte meitaì âtou, ua haki atu i te mea

        i peàuìa ia âtou i ùka o hua pōìti.

¹⁸      Ua pē i te mahaò te tau ènana paotū

        te i òko i te tekao o te tau ènana tiaki mutō.

¹⁹      O Maria à, u haamau io he koekoe i tenā tau mea paotū

        me te kaituto hae ia âtou.

²⁰      Ua hua te tau ènana tiaki mutō.

        U haakāìè âtou me te hahi i te Etua

        no te tau mea paotū ta âtou i òko me ta âtou i ìte,

        vāàna i te tekao i peàuìa ia âtou.

²¹      Ia pao e vaù â, ua tihe te ava no te pātehe i te pōìti.

        U apaìa te ikoa o Ietu, vāàna i ta te anera i peàu

        ma mua atu i to Īa tupuìa.