Le site de partage de la langue marquisienne
Te tohua niutavavā hou mea àva atu àva mai i te èo ènana
The new site for sharing the Marquesan language

Vue de la plage Vainaho et du Fort Collet, Taiohae, Nuku Hiva. René Gillotin, 1844.

Tau pure no te Tominika e ùa o te Ava ma te èhua, èhua A (15/01/2023)

agneaudieu0

« O Īa nei te Arenio o te Etua. »

 

TOMINIKA E ÙA O TE AVA MA TE ÈHUA

(Â tapu 15 no Èhua 2023)

 

TOMOÌA :     G.10 ( e ono)

              1
E kāòha ananu te Etua
I te poì veve,
I te poì iti noa,
I te poì mikeo.

             Mōumu
A , a tohe mau
I te haatià kiritiano.
A tiòhi te hana o Ietu,
To tātou Etua.

                 2
E pātoko ananu te Etua
I te poì e memae nei,
Te i hemo i te mate,
Te i òto o te àì nui.

 

A.22 (Â tapu)

             1
U vevaò te Etua
Ia tātou tikitahi.
Ua vae te Etua
Ia tātou tikitahi
No te hakaòko ia Īa
Me te noho me Īa.

Mōumu
A , e te motuhaka,
A ūtaì ia Ietu !
O Īa te Vaanui,
O te Tiàtohu
Me te Pohuè.

               2
U kāòha te Kirito
Tihe i te matena.
U tāvini te Kirito
Tihe i te paona,
No te vevaò ia tātou nui
Ia ūtaì me Īa.

                3
U hakako te Kirito
(I) te poì haatià.
U puàha te Tekao
I to tātou pōtako,
No te haaìò ia tātou
He tama no te Māàma.

               4
E tuku mai te Motua
(I) te Kuhane Meitaì.
O te tumu me te kuà
O te vaièiìa
No te haatapavaù
Te nino o te Kirito.

   

 

TARAMO 40 (39) : Io te Hatu tu ù tetaì me tu ù koakoa.

 

Kio Vānana : U haaènanaìa te Tekao me to Īa noho i vāveka o tātou.

           Ma io Īa, e ìò he tau tama no te Etua te tau ènana e haatià ia Īa.

 

Pure a te poì haatià : A matavaièi mai, e te Motua e,      ( e ono)

i te pure ta mātou e haahiti nei

A apuu mai me te moû.

            (Â tapu)    E te Motua e, a òko mai ia mātou, ta Òe tau tama.

 

ÙTUNA :     B.5  ( e ono)

           1
E aha ta ù e tuku atu
I te Hatu, to ù Pēpena?
Oia anaiho

O tu ù hōupo
Me tu ù pohuè.

             2
Ia ao mai Òe, e te Hatu,
I tēnei vaetukia.
A too mai Òe

I to ù kōhoà
I te kāòha ia Òe.

                3
To Òe nino, to Òe toto,

E mea taìtaì

To Òe mata
Ta mātou e haamaakau Ma òto o te ùtuna.

 

 B.2    1  (Â tapu)

A kave tātou nui

I to tātou ùtuna

I ùka o te hātaa

O tēnei haraoa.

He puku o te henua

I hana îìma ìa.

A ìò mai

Mea haraoa pohuè.

          2

A kave tātou nui

I to tātou ùtuna

I ùka o te hātaa

O tēnei vino.

He puku o te kāhui

I hana îìma ìa.

A ìò mai

Mea inu kuhane.

          3

Na hua ùtuna

I haakoàka mai      

I te meitaì

O te ùtunaìa

Ètereno nui noa

Ta Ietu io he peka ;

E hēaka i èià,

He tāuà nui.

 

Haamaakauìa : Te kāìè ia Òe, e te Hatu e,    (Pō e ono)

                           Te i mate nui, te pohuè ;

                           A tihe mai, e Ietu ; a tihe mai, e Ietu.

                           Te kāìè ia Òe, te i mate no mātou.    (Â tapu)

   Te kāìè ia Òe te pohuè nei ananu

   E to mātou Hatu e, e to mātou Etua,

   A tihe mai Òe, e Ietu, te Haapohuè.

 

KŌMŌNIŌ :   D.27  (Pō e ono)

           1
O te koekoe toitoi,
O to mua puku o te Māàma.
Me io te Etua mai
Te koekoe vaièi i te moû.


U apuu Ietu
I te tau ènana paotū.
Hakatu , hakatu ,
Hakatu , hakatu kē.

                2
O te koekoe pakaihi
Te hoa i te hoa i mua o te Etua.
Me io te Etua mai
Te koekoe pakaihi i te hoa.

 

                3
O te koekoe tāvini
I te tau ènana i òto te veve ;
Me io te Etua mai
Te koekoe tāvini i te veve.

                4

O te koekoe apuu
I te nino me te toto o Ietu Kirito ;
Me io te Etua mai
Te koekoe apuu i te Arenio.

 

 

D.29 Mōumu : E Ietu e, Haapohuè mau,
 (Â tapu)                  U vevaò mai Òe ia ù nei
                        No te kaiìa mau o te Eukaritia
                        Mea pohuèìa no ù.

 

E taha atu nei hoì au
Io Òe, e Ietu e ;
Ua too i to Òe nino,
Ua inu i to Òe toto ;
Òe tu ù Etua, tu ù Pohuè.

 

 

Ua noho mai Òe, e Ietu, / I òto o au nei.
Ua tahi tāua. / E hahi, e hīmene nei
Tu ù kuhane ia Òe, tu ù Pohuè.

 

 

Hīmene haahuaèkaèka :  C.1   Mōumu :   O te Hatu (bis) mana nui, (bis)                  

    (Â tapu)                                                         O te Hatu mana nui.

                 1
Te Etua Motua mana nui,
No Īa te tau mea ia ôtoa.

                 2
A noho muò, atoratio atu
Ma te ìi to òe kuhane.

                 3
E tueni e, kāòha atu ia Īa
Ma to kuhane,

Ma to ènana tiàtohu.

 

PAHIÌA :  V.83 (Pō e ono)

E Maria e,

Me io òe te punaìa mai,

Te kākano o te Pohuè.

Te Hatu Ietu, te Kirito,

Hakaìki nui, Tuhuka e,

Te Mana nui.

Maria, Maria, Maria e,

A apuu mai.

Maria, Maria, Maria e,

A pure mai.

 

V.12   (Â tapu)      

           1
E Maria peàto e,
E te kui kāìè koè,
A nui to òe pure
Io to Tama

Pinea o te Etua.

           Mōumu
A tui tātou nui, (nui e)
I te pua hei roti, (hei roti e)
No te haakanahau
I to īa òna hātaa.

           2
E pure nei tātou,
I te pure kāòha òe.
E Maria, u hōata
Pootu me he hihi òumati.

------------------------------------------------------------------------------------------

TOMINIKA E ÙA

TATAUÌA O TE PEROHETA ITAIA      49, 3.5-6

        Oia nei te tekao a te Tāvini o te Etua.

3       U peàu mai te Hatu :

        « E te mataèinaa Iraene, o òe tu ù tāvini. Io òe tu ù kāìè. »

5       I tēnei, u pohā te èo o te Hatu Etua te i kānea ia ù

        i òto o te kōpū o to ù kui, etià he tāvini au no Īa,

        me to ù haahua i te meitaì i te ati o Iakopo,

        me te haakātahi mai i te mataèinaa Iraene.

        U haataetae te Etua ia ù. O te Etua tu ù ìi.

6       Oia nei ta te Etua i peàu mai :

        « O òe tu ù tāvini no te haahua i te meitaì

        i te tau ati o Iakopo,

        no te haakātahi mai i te toeka o te mataèinaa Iraene.

        Tōtahi atu, e haaìò au ia òe he māàma o te poì êteni,

        etià e neke to ù haapohuè

        tihe atu io he kotina paona o te henua. »

 

TARAMO 40 (39), 2abc.4ab, 7-8a, 8b-9, 10cd.11cd

 Io te Hatu tu ù tetaì me tu ù koakoa.

 

2       U tetaì au, e tohe mau te tetaì i te Hatu.

        U tiòhi mai te Etua, ua òko Īa i tu ù vevaò.

4       U pepeù te Etua i to ù haha no te hīmene hou ;

        E taki to ù èo no te hahi i to tātou Etua.

 

7       Aòè Òe e makimaki i te tau ùtuna hēaka.

        U pepeù Òe i tu ù puaìka, e te Etua e.

        Aòè Òe i apuu mai i te hēaka pūovo i te ahi.

8       Oia te tumu o tu ù peàu atu : Eīa e tihe au nei.

 

        Ua patuìa no ù io he Hāmani tapu

9       Pēhea te haatae i to Òe makimaki.

        E tu ù Etua e, oia nei tu ù hīa :

        Te aotahi atu i to Òe tekao ma io he koekoe.

 

10      A haamaakau Òe u te e to ù haha.

        E te Hatu e, ua ìte meitaì Òe.

11      Ua haki au i to Òe toitoiìa me to Òe tiàtohu

        I mua o te motuhaka o te mataèinaa

 

TATAUÌA O TO MUA HĀMANI I TO KORINETIA     1, 1-3

1       O au tēnei o Pauro, vaeìa he àpotoro o Ietu Kirito,

        vāàna i to te Etua makimaki.

        Enā me au nei o Hotene, to tātou teina.

2       Kāòha ôtou, e te Èkaretia o te Etua

        e noho ana io te Henua Korinetia.

        Kāòha ôtou te i haapeàtoìa ma io te Kirito Ietu,

        vaeìa no te pohuè me he poì peàto.

        Kāòha ôtou e tahi me te nuiìa o te ènana

        e noho nei i te henua kē, henua kē,

        te i pakaihi i te ikoa o Ietu Kirito,

        to tātou Hatu : to âtou Hatu hoì atii me to mātou.

3       Ia ôtou te karatia me te moû

        me io te Etua, to tātou Motua, me io te Hatu Ietu Kirito.

 

ALLELUIA ALLELUIA

                                                                                      cf. In.1, 14.12

U haaènanaìa te Tekao me to Īa noho i vāveka o tātou. Ma io Īa, e ìò he tau tama no te Etua te tau ènana e haatià ia Īa.


EVANERIO O IETU KIRITO VĀÀNA E IOANE     1, 29-34

29      I tēia mou pō, ua ìte Ioane ia Ietu e tihe aa io īa.

        U peàu Ioane :

        « O Īa nei te Arenio o te Etua.

        O Īa te i too i te mikeo o te aomāàma nei.

30      No Īa to ù tekao pēènei :

        « E tihe mai ma muì o au nei te ènana.

        U meitaì Īa, na te mea òmua atu Īa, epō au nei.

31      Aòè au i ìte ia Īa. Atià, mea hakaìte ia Īa i to Iraene,

        i tihe ai au i te papatema vai tuku. »

32      U haatiàtohu hoì Ioane pēènei :

        « Ua ìtemata au i te Kuhane Meitaì e iho aa me io he àki

        me he manu tavaìè noho aa ma ùka o Īa.

33      Aòè au i ìte o ai Īa. Atià, o te Etua te i pahi mai ia ù

        no te papatema i òto o te vai, u peàu mai pēènei à :

        « E ìtemata òe i te Kuhane Meitaì e iho aa

        me te noho i ùka o te ènana.

        O Īa nei te i papatema i òto o te Kuhane Meitaì.

34      Ua ìtemata hoì au.

        U haatiàtohu au o Īa nei te Tama a te Etua. »

 

Comments est propulsé par CComment