Le site de partage de la langue marquisienne
Te tohua niutavavā hou mea àva atu àva mai i te èo ènana
The new site for sharing the Marquesan language

Vue de la plage Vainaho et du Fort Collet, Taiohae, Nuku Hiva. René Gillotin, 1844.

Tau pure no te Koìka nui o te Pakate (30_31/03/2024)

« Aòè âua i vivini hoì i te Hāmani tapu e peàu aa : e tū hakaùa Ietu me i vāveka o te huaa mamate. » « Aòè âua i vivini hoì i te Hāmani tapu e peàu aa : e tū hakaùa Ietu me i vāveka o te huaa mamate. »

KOÌKA PAKATE

( e ono 30 no Pohe 2024)

 

NO TE AHI HOU ME TE ÀMA PAKATE      K.3b

1
O tātou te mataèinaa
O te Hatu Etua.
Haamevaha i te ao nei
To te Hatu kāòha.

        Mōumu

Èkaretia e tahi,

Èkaretia peàto

Èkaretia àpotoro,

A hahi i to òe Hatu.

3
I òto o te Kirito,
O tātou te keâ pohuè
Haatū i te haè tapu
No to Etua kāìè.

Te hahiìa i te àma :        -Te àma o te Kirito (x3)

                                           - Haahuaèkaèka i te Etua. (x3)

 

Te vānana i te Koìka Pakate :  A hahi haahuaèkaèka ia Ietu Kirito

                                                      hakaùa me te kāìè me te mana.

                                                     U pohuè ma te tau tai ananu.                                                

TATAUÌA O TE TEKAO A TE ETUA :        A hakaòko

1 -TENETE 1, 1 à 2,2 

Pakiu

TARAMO 33 (32) : Ua te aomāàma i to Òe tau hana kāòha,

                                   e te Hatu e.

2 - Ehoto 14, 15-15,1a             Hoata

HĪMENE A MOITE : A hahi tātou i te Hatu, u pupuà to Īa kāìè ;

                                       o te Hatu to tātou ìi.      

                                                     

3 - ITAIA 54, 5-14   

Hikoei   

           TARAMO 30 (29) : U haatiketike au ia Òe, e te Hatu e,

                                              te i haatū ia ù.   (bis)

4 - EHEKIERE 36, 16-28

Poì Hou

         TARAMO   51 (50) : E te Etua e, a pēpena i òto o au nei,

                                             i te koekoe hou.   

           TE KĀÌÈ I TE ETUA                                 (A te pere !)

    5 -Tatauìa a Pauro Peàto i to Roma       6, 3-11              Pakiu       

             Alleluia :     Alleluia Pakate me te Taramo 118 (117).

      Evanerio o Ietu Kirito vāàna e Mareko  16, 1-8

 

TE TŪTŪÌA ME TE VAI / ASPERSION AVEC L’EAU :    

 

1-Pure vevaò i te Huaa Peàto

 

 

2 - Penetitioìa i te àma me te vai

  

Èo taa : Paona koè   HUI

Paona koè to Īa kāòha mai ia tātou. HUIA

 

3 - No te haahou i te haatià

 E, u titii         - E, u haatià (x3)

 

4- Papatema

5 - Te tūtūìa

      me te vai

-A hahi i te Etua/ Ma to tātou taaàu koakoa

   O te Hatu te tiketike nui / Ia Īa te Kāìè (bis).

- Auē te koakoa/ Ia peàuìa mai

   E hiti tātou nui io te hae o te Etua.

- A haameitaì, a hahi i te Hatu/ Haahuaèkaèka, a hīmene ananu.

 

- O Ietu Kirito te keâ tumu / Ta te tau ènana i titii,
  Ta te Etua i vae / Mēìa i to Īa meitaì.

 

         

Pure a te poì haatià :  E te Hatu Etua, Alleluia,                

                                     a òko mai ta mātou pure, Alleluia.

ÙTUNA :       I.4    

E koìka koakoa tēnei

No te poì haatià ia Ietu.

Ua hika te mate ia Òe.

Alleluia, Alleluia, Alleluia.

Kāòha mai Òe, e Ietu tāhia e,

I tēnei â koìka koakoa nui.

U mai, u mai

To tātou Hatu Mana nui

I tēnei â koìka no te Pakate.

E Ietu (bis), hakāòha mai, (bis) / A hakāòha mai ia mātou, (e Ietu)

I tēnei â koìka, / I tēnei â koìka Pakate.

 

PAHU- MAVE   

 

I.11             1
U peàu Ietu ia tātou : 
« O Au te Pohuè ananu » ;
Ua hika tātou i te mateìa.
Ma io Īa, Alleluia,
U pupuhi te hānauìa hou.

        Mōumu
Alleluia, Alleluia
U pohuè Ietu.
Alleluia, Alleluia
U pohuè Ietu.

               2
U peàu Ietu ia tātou :
« O Au te Àma o te ao nei » ;
Ua vae tātou i te keevō.
Ma io Īa, Alleluia,
U keàpa to tātou àma hou.

  

Épiclèse 1 : E te Hatu e, a vaièi mai to Òe Kuhane

                    mea haatapu i te haraoa me te ipu nei.

 

Haatiketikeìa : E Ietu........Kirito e, haaìòìa no mātou.

 

Haamaakauìa : Te kāìè ia Òe, e te Hatu e, o Òe to mātou Haapohuè,

  te i mate nui me te tū hakaùa e pohuè nei à, e Ietu Kirito,

  O Òe (bis) to mātou Etua, a tihe mai, e Ietu, to mātou Hatu.

 

Épiclèse 2 :   E te Hatu e, a vaièi mai to Òe Kuhane

                      etià e ìò mātou he tāvini no to Òe kāìè.

 

KŌMŌNIŌ :      I.9

           1
Etue te ,
A koakoa à !
O ôtou te kouâ
No Ietu Kirito.

         2
Epō te pohuè,
Ua noho Ietu
Me Iona, e toù â,
I òto o te ùa.

           Mōumu
Ua tū hakaùa Ietu,

Ua tū hakaùa Ietu,

U tūàki i te mate,

Ua kaò te pōtako.

Alleluia (x5)

         3
Ua ìteìa mai
Te Haapohuè,
E mou vehine
Me àpotoro.

                4
Ua ìò to Ietu
Tūhakaùaìa
Mea tumu, i tēnei,
No te Haatià.

 

Hīmene Haahuaèkaèka : I.10

             1
I te maùteiao nui
I tū ai, e Ietu e. 
U keàpa te ao nei,
Noho mai Òe me mātou. (bis)

              2
Taha ana au ma he vaanui
Me to ù kuhane koè.
Maakau ana to ù tau veke,
Taha mai Òe me mātou. (bis)

 

3  U mevaha to Òe kāòha / Ma òto te poì veve.  
              A noho mai Òe me mātou, / Matavaa me mātou. (bis)

PAHIÌA :   I.8

1
U pohuè hakaùa
Te tama a te Etua
I mate io he peka
I ia tātou.

2
toù me noho Īa
I òto he ana keâ,
U pohuè hakaùa
No to Īa mana oko.

3
E Ietu, e Maria,
E ape aa mātou,
A titii te mikeo,
A hua mai te meitaì.

---------------------------------------------------------------------------------------

 

TARAMO  118 :       Alleluia, Alleluia, u pohuè te Hatu, Alleluia e.

                 Mōumu :  Paona koè to Īa kāòha, Alleluia.

                                  Alleluia, Alleluia, u pohuè te Hatu, Alleluia e (bis)

Haaoko nui te mataèinaa o te Etua e :

Pao koè to Īa kāòha, e mea hei au.

Haahuaèkaèka tātou ia ôtoa e :

Pao koè to Īa kāòha, e mea hei au.

                             

                           Mōumu : Ua ìò e keâtaa e, Alleluia

                                           Alleluia, Alleluia, u pohuè te Hatu, Alleluia e.

Te keâ titiiìa e te tuhuka ato haè : e mea hei au.

Ua ìò tēnei e keâtaa e : e mea hei au.

Oiana te hana mahaò a te Hatu e : e mea hei au.

Oiana te koìka haatoitoiìa e te Etua e : e mea hei au.

                          Mōumu : A koakoa, a èkaèka tātou e !

                                           Alleluia, Alleluia, u pohuè te Hatu, Alleluia e.

Oiana te koìka pēpenaìa e te Hatu e : e mea hei au.

Koìka èkaèka tātou ia ôtoa e : e mea hei nui.

Haahuaèkaèka i te Hatu e, pao koè to Īa kāòha.

 

TE PŌ PAKATE

1 - TATAUÌA O TE HĀMANI A MOITE PEÀUÌA TENETE   1, 1-31--2, 1-2

 

1       I te tumu, u pēpena te Etua i te àki me te henua.

2       O te henua à, e hakatu koè, kiko koè.

        Ma ùka o te peteò, he pō keevō,

        ma ùka o te tau vai, e ona nei te kuhane o te Etua.

3       U peàu te Etua : « A māàma ! »

        Me te māàma anamai.

4       Ua ìte te Etua u meitaì te māàma.

        Me te haapae o te Etua i te māàma me io he pō keevō.

5       Ua apa te Etua i te māàma, he â.

        Ua apa te Etua i te pōtako, he pō.

        Me te ahiahi me te pōpōuì anamai.

        Pō a tahi.

 

6       U peàu te Etua :

        « A papahenua ma vāveka o te tau vai,

        mea haapae i te tau vai me io te tau vai. »

7       Ua hana te Etua i te papahenua,

        me te haapae i te tau vai ma ùka o te papahenua

        me io te tau vai ma àò o te papahenua.

        Ua pao anamai atii.

8       Ua apa te Etua i te papahenua, he àki.

        Me te ahiahi me te pōpōuì anamai.

        Pō a ùa

 

9       U peàu te Etua :

        « A putu mai ma he ava e tahi,

        te tau vai ma àò o te àki,

        a ìteìa mai te vahi moô. »

        Ua pao anamai atii.

10      Ua apa te Etua i te vahi moô, he henua.

        Ua apa i te tau vai, he tai.

        Ua ìte te Etua he mea meitaì.

11      U peàu te Etua :

        « A tupu te henua i te mutiē,

        i te èitā e hua nei i te kākano,

        i te tumuâkau e hua nei i te puku

        e avai nei ma òto te kākano ma to īa hakatu. »

        Ua pao anamai atii.

12      Ua tupu te henua i te mutiē,

        i te èitā e hua nei i te kākano ma to īa hakatu,

        me te tumuâkau e hua nei i te puku

        e avai nei ma òto iho o te kākano ma to īa hakatu.

        Ua ìte te Etua he mea meitaì.

13      Me te ahiahi me te pōpōuì anamai.

        Pō a toù.

 

14      U peàu te Etua :

        « A tauèva mou àma ma àò o te papahenua o te àki,

        mea haapae i te â me i te pō.

        A ìò âtou he mou hakatu e tuhi i te tau ava koìka,

        te tau â me te tau èhua.

15      E ìò hua tau àma ma àò o te papahenua o te àki,

        mea tūìka i te henua. »  Ua pao anamai atii.

16      U kānea te Etua i àma kākaùoo e ùa.

        O te àma kaùoo oko mea vivini i te â,

        me te àma iti mea vivini i te pō, i muì iho te tau hetū.

17      U tauèva te Etua ia âtou io te papahenua o te àki

        mea tūìka i te henua,  

18      mea vivini i te â me i te pō,

        mea haapaekē i te māàma me io te pō keevō.

        Ua ìte te Etua he mea meitaì.

19      Me te ahiahi me te pōpōuì anamai.

        Pō a .

 

20      U peàu te Etua : « A nui te tau vai

        i te nuiìa o te mēmau pohuè.

        A ona te manu ma ùka o te henua,  

        i àò o te papahenua o te àki. »

21      U pēpena te Etua i te tau ika tai hakaìpaìpa

        me te ika pohuè hakatahi e nokenoke nei,

        e nei ma he tau vai, vāàna i to âtou hakatu,

        me te manu pekeheu hakatahi vāàna i to âtou hakatu.

        Me te ìte o te Etua he mea meitaì.

22      U haameitaì atu te Etua ia âtou e peàu aa :

        « A tuputupu, a nuinui, a haapī i te tau vai me te tai,

        a nuinui me te tau manu ona ma he henua. »

23      Me te ahiahi me te pōpōuì anamai :

        Pō a ìma.

 

24      U peàu te Etua :

        « A pī te henua i puaka pohuè vāàna i to âtou hakatu,

        te tau puaka kai, te tau puaka totoo,

        te tau puaka hae vāàna i to âtou hakatu.

        Ua pao anamai atii.

25      U kānea te Etua i te tau manu hae vāàna i to âtou hakatu,

        me te tau puaka kai vāàna i to âtou hakatu

        me te puaka paotū totoo ma ùka o te henua

        vāàna i to âtou hakatu.

        Ua ìte te Etua he mea meitaì.

26      U peàu te Etua : « A kānea tātou i te ènana

        he ata no tātou, e haahakatu me tātou anaiho.

        A vivini īa i te ika o te tai,

        i te puaka kai me te puaka hae paotū,

        i te tau puaka paotū e totoo nei ma ùka o te henua. »

27      U pēpena te Etua i te ènana e ata no Īa.

        He ata no te Etua i pēpena atu ai i te ènana.

        He vāhana, he vehine i pēpena atu ai ia âua.

28      U haameitaì atu te Etua ia âua.

        U peàu atu te Etua ia âua :

        « A tuputupu, a nuinui, a haapī i te henua, a tuàki atu :

        a vivini i te ika o te tai me te manu o te ataàki

        me te puaka hakatahi totoo ma ùka o te henua. »

29      U peàu te Etua :

       « Eīa, ua tuku au no ôtou i te èitā paotū e hua nei i te kākano,

       e avai nei ma ùka o te henua tiàtohu me te tumuâkau paotū

         e hua nei i te puku me te kākano i òto : a kai ôtou i tēia kai.

30      Atii i te puaka hae paotū me te manu paotū o te ataàki,

        i te mēmau paotū e totoo ma ùka o te henua,  

        i te mēmau paotū me te menava o te pohuèìa,

        ua tuku atu au i te èitā hakatu no te kai.

        Ua pao anamai atii.

31      Ua ìte te Etua i ta Īa mea paotū i hana, eīa he mea meitaì nui.

        Me te ahiahi me te pōpōuì anamai :

        Pō a ono.

 

2,1     Atii ua pao anamai te àki me te henua

        me to âua mēmau paotū i òto.

        I te pō e hitu, ua haapao te Etua i te hana ta Īa i hana.

2       U hakaēa ma te pō e hitu me i te hana paotū.

 

TARAMO 104 (103) 1-2a, 5-6, 10.12, 13-14b, 24.35c

 E te Hatu e, a pōpahi i to Òe Kuhane no te haahou i te hakatu o te henua.           cf. 104,30

 

1       A haameitaì i te Hatu, e tu ù kuhane e.

        E te Hatu e, tu ù Etua e, u tiketike Òe.

        Ua tāpīìa Òe me te kāìè

2       O te àma, te kahu e vāhī ia Òe.

 

5       E haamau Òe i te tūàka o te henua,  

        Etià e keue koè ma te tau tai a tihe nei.

6       Ua uhiìa hua henua me te tau tai.

        Òmua, u haakaò te vai i te tau tuaivi.

 

10      Io te vao nui, e haapihiti Òe i te punavai.

        E tahe te vai ma io he kaavai hōhonu o te tuaivi.

12      Ua noho pii o hua vai te nuiìa o te manu ;

        Ua òkoìa te takiìa o to âtou èo.

 

13      Me io to Òe nohoka, u hāinu Òe i te tau tuaivi,

        Ua kai haamaòna te mēmau pohuè i to Òe tau puku.

14      U haatupu Òe i te èitā no te tau naho ànimara,

        U haatapavaù i te pāpua o te ènana paòpaò i te hana.

 

24      He mea nui to Òe hana, e te Hatu e.

        Na to Òe māàma i pēpenaìa te tau mēmau paotū.

        Ua pī te henua i to Òe tau taetae.

        A haameitaì i te Hatu, e tu ù kuhane e !

 

Akoè à

TARAMO 33 (32) 4-5, 6-7, 12-13, 20.22,

 Ua pī te aomāàma i to Òe tau hana kāòha, e te Hatu e.

                                                                             33,5

4       He toitoi noa te Tekao a te Hatu.

        U tiàtohu anaè to Īa tau hana paotū.

5       U haataetae Īa i te hakatu toitoi, hakahae koè.

        Ua pī te aomāàma i to Īa tau hana kāòha.

       

        6       U pēpena te Etua i te àki na to Īa tekao.

        U kānea Īa i te aomāàma na te mana o to Īa ao.

7       U haapuke Īa i te tai me te haapākeka, oa neke īa.

        U tāpae Īa i te moana me te tau taetae i òto.

 

12      Mamau te mataèinaa ia ìò te Etua he Hatu no īa.

        Mamau te henua vaeìa me he pāpua no te Hatu.

13      Me io he àki, u tiòhi meitaì te Hatu

        E ìte aa i tēia ènana, i tēia ènana.

 

20      O te Hatu te tumu o to tātou pohuè.

        O Īa to tātou toko me te vavao.

22      E te Hatu e, a noho mau to Òe kāòha i ùka o mātou

        Atii me mātou e tetaì mau i to Òe vaièiìa.

 

2. - TATAUÌA O TE HĀMANI A MOITE PEÀUÌA TENETE  22, 1-2.9a.10-13.15      (22, 1-13.15-18)

 

1       U haahiiveke te Etua ia Aparahamo me te peàu ia īa :

        « E Aparahamo e ! » U haahua atu īa : « Eīa au nei. »

2       U peàu te Etua : « A too i ta òe tama, te tamaòa tootahi,

        te tama ta òe e haataetae nei, o Itaako.

        A hee atu io te Henua Moria ; i èià, a ùtuna mai ia īa

        i ùka o te tuaivi e hakaìte atu au ia òe. »

3       I te pōpōuì tika, ua vaa Aparahamo

        me ta īa haapei i te pūriki.

        U vavaò īa i nā pahikaèo e ùa me Itaako ta īa tama.

        U haapūpā i te vehie no te ahi tapu.

        Ua hiti īa i uta, io te tuaivi ta te Etua i peàu atu.

4       I te â e toù, u heau Aparahamo

        me to īa ìte mamao i te tuaivi peàuìa e te Etua.

5       U peàu Aparahamo i ta īa nā pahikaèo :

        « A noho ôùa înei me te pūriki.

        O au nei me te tama e hiti māua i èià.

        Ia pao to māua moe haatona me te pure, e hua mai māua. »

6       Ua too Aparahamo i te pūpā vehie

        me ta īa tuku ma ùka o te pauhihi o Itaako, ta īa tama.

        Ua tooìma īa i te ahi me te kohe.

        U hihiti âua amana tokoùa.

7       U peàu Itaako ia Aparahamo : « E to ù motua e. »

        U haahua atu : « Eīa au nei, e tu ù tama e. »

        U peàu Itaako :

        « Enā te ahi, enā me te vehie, i hea te hēaka ? »

8       U haahua atu Aparahamo :

        « Na te Etua e hakaìte mai i te hēaka, e tu ù tama e. »

        U hihiti âua amana tokoùa.

9       I te ava ua tihe âua i te vahi peàuìa e te Etua,

        u hakatū Aparahamo i te hātaapure

        me te tuku i te vehie ma ùka.

        U kitii Aparahamo i ta īa tama, ia Itaako,

        me te tuku atu ma ùka o te hātaa, io he puke vehie.

10      U hapai Aparahamo i te ìma,

        ua too i te kohe no te kukumi i ta īa tama.

11      A tahi a vavaò te anera o te Hatu Etua me io he àki

        me te peàu : « E Aparahamo, Aparahamo e. »

        U haahua atu īa : « Eīa au nei. »

12      U peàu te anera : « Umoì òe e i te māhaì.

        Umoì òe e haamamae ia īa.

        Ua ìte au i tēnei i te mea u pakaihi òe i te Etua.

        Aòè hoì òe i kaikino mai i te tama, ta òe tama tootahi. »

13      A tahi a heau Aparahamo me to īa ìte i te koimaa menē

        te i haavekeìa io he maaèitā keoho.

        Ua hano īa i te menē too,

        me to īa ùtuna atu i te hēaka io te kōava o ta īa tama.

        Ua apa Aparahamo i hua vahi : « Ua ìte te Hatu Etua. »

15      Na te anera o te Hatu Etua me io he àki

        i vavaò hakaùa ia Aparahamo me te peàu pēènei :

16      « He tekao a te Hatu Etua. E haatiàtohu au ma to ù iho ikoa :

        mēìa u aotahi mai, aòè òe i kaikino i te tama,

        ta òe tama tootahi, e haameitaì me te vaièi nui au ia òe.

17      E haanui au tini, tini i to òe ati i ùka ,

        me he nui o te hetū io he ataàki,

        me he nui o te one io te hiku o te tai.

        E haahika âtou i te pākeâ me te mōuka tōua

        o te mataèinaa e ahi me âtou.

18      Mēìa u aotahi mai òe, e haameitaì atu haameitaì mai

        te tau mataèinaa paotū ma te vavaò mai i to òe ikoa. »

 

TARAMO   16 (15), 5.8, 9-10, 1b.11

 E tu ù Etua e, a tiaki meitaì ia ù ; io Òe anaè tu ù tetaì.

                                                                       cf. 16,1

 

5       O te Hatu te hope taetae ua ìò ia ù.

        Io to Òe ìma, e te Hatu e, to ù pohuèìa.

8       I mua o to ù mata ananu te Hatu,

        Ma to ù kaokao to Īa noho, u haametaù koè au.

 

9       Ua û i te koakoa to ù kuhane.

        U èkaèka to ù nino, ua moe me te moû.

10      Aòè te Hatu e ao e hika au i te mateìa.

        Aòè Īa e avai i to Īa hoa e ai io he èpo.

 

1b      E tu ù Etua e, o to ù hīa, io Òe tu ù vahi maù.

11      U aahi mai Òe ma io he vaanui o te pohuè ;

        I mua o to Òe mata, te koakoa, te koakoa nui.

        Ma to Òe kaokao, te èkaèka paona koè.

 

3. - TATAUÌA O TE HĀMANI A MOITE PEÀUÌA EHOTO  14, 15-31 -- 15,1a.

 

        Ia ìte te poì o Iraene u tatai mai te pūpū kape Ekipito,

        ua pī âtou i te haametaù.

14,15   U peàu te Hatu Etua ia Moite : « No te aha te taaàu io ù ?

        A peàu i te tau tama Iraene a tataha atu.

16      O òe, a too i to òe tokotoko,

        a hapai i to ìma ma ùka o te tai, e vahiìa ma vāveka.

        A taha atu te poì Iraene io he tai,

        paìpaì koè nā vaevae.

17      O au à, e haaheò i te koekoe o te poì Ekipito.

        Ma hope o ôtou, e taha âtou io he tai.

        E haakāìèìa au e te hakaìki Faraone,

        to īa tau pūpū kape, to īa tau pāriri, to īa tau ihovare.

18      E ìte to Ekipito o au te Hatu Etua,

        ia pao i te tuàki te hakaìki Faraone me to īa tau pāriri

        me to īa tau pūpū kape piki ihovare.

19      Enā ma mua o te pāpua o te tau tama Iraene

        te anera o te Etua ; ua hee īa i hope atu.

        Hua mea te kohu keekee te i ūtaì i te pūpū tama Iraene ;

        ua hee īa i hope atu.

20      Ua tū te kohu keekee i vāveka o te pāpua

        o te tau kape Ekipito me te pāpua o to Iraene.

        I te tūmoe, e ùa hakatu hua kohu :

        he pō keevō i te kēkē Ekipito, he àma pupuà i te kēkē Iraene.

        I te pō, u te e haatata mai to Ekipito me to Iraene.

21      U hapai Moite i te ìma ma ùka o te tai.

        Ma te tiàtohu o te pō, ua puhi te Etua i te metaki oko

        me i te kēkē tiheìa òumati.

        Ua hee pororō nui te tai, vahiìa ma vāveka.

22      Ua taha atu to Iraene paìpaì koè te vaevae.

        Ua tū anaè te tai me he i te ìma oko,

        me he i te ìma aèaè.

23      U tatai i to Iraene i te poì Ekipito,

        te hakaìki Faraone me to īa tau ihovare,

        to īa tau pāriri, to īa tau pūpū kape.

        Ua tihe âtou paotū i vāveka o te tai.

24      I te hāhakateiao, me i vāveka anamai o te kohu,

        u tiòhi mai te Hatu i te tau pūpū kape Ekipito.

        U haahika te Hatu ia âtou.

25      U haakati Īa i to âtou pāriri, he mea hana nui te aahi atu.

        U peàu to Ekipito : « A hihiti tātou i mua o Iraene.

        U tōua te Hatu, e toko aa ia âtou. »

26      U peàu te Hatu Etua ia Moite :

        « A hapai i to òe ìma i ùka o te tai.

        A hua anamai te tai ma ùka o te tau kape Ekipito,

to âtou pāriri, to âtou poì piki ihovare. »

27      U hapai Moite i te ìma ma ùka o te tai.

        I te pōpōuì tika, ua hua te tai i to īa kōava.

        U hihiki to Ekipito.

        Ua tomi te Hatu ia âtou i te take o te tai.

28      Ua hiti te tai. U tomiìa te tau pāriri,

        te poì piki ihovare, te tau pūpū kape o Faraone

        te i tohuti ma hope o te tau tama Iraene.

        Aòè e tahi anaiho i toe atu.

29      Te tau tama Iraene à,

        ua taha atu âtou paìpaì koè nā vaevae ;

        me he pākeâ te tai i to âtou ìma oko me te ìma aèaè.

30      I hua â, u haapohuè te Hatu ia Iraene

         me i te îìma o te tau Ekipito.

        I te hiku o te tai, ua ìtemata Iraene

        i te puke nino tūpāpaù o te poì Ekipito.

31      A tahi nei a ìte Iraene i te hana mana o te Hatu Etua

        te i haahika i to Ekipito.

        U pakaihi me te haametaù te mataèinaa Iraene i te Hatu.

        U haatià âtou i te Hatu Etua, ia Moite, ta Īa tāvini.

15,1    Ua hahi Moite me te tau tama Iraene i te Hatu Etua,

        e hīmene ana pēènei :

 

HĪMENE A MOITE = Ehoto 15,         2, 3-4, 5-6, 10a-11, 17

A hahi tātou i te Hatu, u pupuà to Īa kāìè ;
o te Hatu to tātou ìi.  15,1a

 

2       O te Hatu tu ù ìi. No Īa tu ù hīmene hahi.

        O te Hatu tu ù Etua, te i haapohuè mai.

        Ua haki au i to Īa òko nui.

        U haatiketike au i te Etua o to ù tupuna.

 

3       O te Hatu te toa mana io he tōua,

        He Hatu Etua to Īa ikoa.

4       U tioà Īa io he tai i te pāriri o Faraone.

        Io he tai, u haakaò Īa i to Ekipito tau kape.

 

5       Ua tomiìa âtou io he peteò ;

        Ua kaò me he keâ io he take o te tai.

6       E te Hatu e, ua mana to Òe ìma,

        U haapaìha i te poì e tōtōua me Òe.

 

10      Ua puhi te Hatu : ua tomiìa âtou io he moana.

11      O ai te ètua e kiko me Òe, e te Hatu e ?

        O ai e tūtū me Òe, te Peàto nui,

        Te tumu o te mana haahopo i te ènana ?

 

17      U aahi mai Òe ia âtou me te nanu io he henua 

        I ùka o te tuaivi ta Òe i haataetae.

        E te Hatu e, oiana te vahi o to Òe noho,

        Te haè tapu ta Òe i hakatū, e te Hatu Etua e.

 

4. - TATAUÌA O TE PEROHETA ITAIA     54, 5-14

        Oia nei ta te Hatu Etua i peàu ia Ierutaremi :

5       He vāhana no òe te Etua te i pēpena ia òe.

        O te Hatu o te aomāàma, to Īa ikoa.

        He Haapohuè no òe te Etua peàto no Iraene.

        Te Etua o te henua ia ôtoa to Īa ikoa.

6       E Ierutaremi e, te vehine titiiìa, haameeìa,

        E vavaò hakaùa te Etua ia òe.

        U peàu te Hatu Etua pēènei :

        « E aha e titii te hoa mātiri

        i ta īa vehine vaeìa i te ava hou te nino ? »

7       U haamāhaè au ia òe no te ava poto.

        Ma òto o to ù kāòha nui ia òe, e haakātahi mai hakaùa.

8       Mēìa i tu ù pekē, u haapiko i tu ù mata me io òe.

        Ma òto o tu ù kāòha paona koè, u matavaièi mai hakaùa.

        Oia te tekao o to òe Haapohuè, te Hatu Etua.

9       Me he mea i te tai kākiu i mua o Noa,

        u haatiàtohu au i tu ù tekao pēènei :

        Umoì e haakaòìa te henua i te vaiā,

        atii tēnei u haamau i tu ù tekao :

        Aòè au e pekē ia òe.

        Aòè e oonaki ma te haametaù ia òe.

10      E aha à e takitumuìa te tau tuaivi,

        E aha à e heùu te tau pūkei,

        U te e huìkē to ù kāòha ia òe.

        U te e hakaēa tu ù Piimau o te moû me òe.

        Oia nei te Tekao a te Hatu Etua, te i kāòha ia òe.

11      E Ierutaremi e, òmua u haameeìa,

        u haapūpūkinaìa, u titiiìa òe.

        Enā e haakeàpa au i to òe me te tau keâ menia èreère.

        He tau keâ pūkiki te puke keâ o to òe tūàka.

12      E pupuà to òe pā i te tau keâ pīàma pōnionio i te òumati.

        He mea karahi to òe tau avaputa.

13      E haamāàma te Etua iho i ta òe tau tama.

        E noho ananu to te Etua moû i ùka o âtou.

14      E tohe mau òe i òto o te toitoi.

        E haamamaoìa me io òe te tau kōhii e òomi mākaka.

        Aòè òe e haametaù hakaùa,

        e koè ai te mea haahopo.

 

TARAMO 30 (29) 3-4, 5-6b, 6c.12, 13,

 E haatiketike au ia Òe, e te Hatu e, te i hakatū ia ù.    30,2

 

3       I te ava e taaàu to ù èo io Òe,

        E te Hatu, tu ù Etua e, u haameitaì mai.

4       Ua taki mai Òe me io he ōpata,

        U haapohuè mai me io te ana o te tūpāpaù.

 

5       A hahi i te Hatu, ôtou, e te poì haatià e.

        A haahuaèkaèka ma te haaòko nui i to Īa ikoa.

6       He ava poto to te Etua pekē,

        Ma te òa o te pohuè to Īa haameitaì.

 

        I te ahiahi, e tahe te vaimata,

        Ma te pōpōuì te taaàu koakoa.

12      U haaìò Òe i tu ù uēuē me he â koìka.

        Ua veti i to ù kahu pēpē no te uhi mai me te koakoa.

 

13      A taaàu i te koakoa, e tu ù kuhane.

        Umoì òe e mutu pu, a haakoìka no te Hatu.

        E hahi au hakaēa koè i te Hatu, tu ù Etua.

        U haahuaèkaèka au ia Òe, e te Hatu e.

 

5. - TATAUÌA O TE PEROHETA ITAIA     55, 1-11

1       Oia nei te Tekao a te Hatu Etua :

        E mate ôtou i te paka vai ? A mai. A inu.

        Moni koè ôtou ? A hoko pu.

        A kai. A inu i te vino, i te vaiū.

2       Umoì e haapao pu i ta ôtou moni hana

        no te kai i te înaì haamaòna koè.

3       A hakaòko mai. E maòna ôtou i te înaì mōmona.

        A hakaòko mai. Mave mai. E pohuè meitaì ôtou.

        E haatoitoi au me ôtou i te Piimau paona koè.

        E ìò hoì ia ôtou te taetae o Tavite.

4       Ua haamau au ia īa he ènana no ù i vāveka o te tau mataèinaa, te aahi, te vivini o te tau ati.

5       O òe à, e vavaò òe i tītahi ati aòè òe i ìte ;

        e tihe mai io òe tītahi ati mēìa i to òe Hatu Etua,

        te Peàto Nui o Iraene te i haakāìè ia òe.

6       A ùmihi ôtou i te Etua, oia te ava e tutuki me Īa.

        I te ava nei, a pure ôtou i te Etua,

        u tata èka me ôtou.

7       A hua mai te ènana mākaka me io to īa vaanui hukaka.

        A titii te ènana ìno i to īa maakau .

        A hua io te Etua te i hakāòha mai ia īa.

8       He mea hoì te makimaki o te Etua,

        mea kē to te tau ènana.

        He mea kē te hakatu o te Etua,

        mea kē to te tau ènana.

9       Atii te tiketike o te àki ma ùka o te henua,  

        atii te hōhonu atu o te maakau o te Etua

        ma ùka o te maakau ènana.

10      Ia topa te ūa me te nive me io he àki,

        u haakutaù me te haatapavaù i te henua.

        U haatupu âtou i te èitā, haahua i te puku

        no te hākai i te tau ènana me te tau manu e kai aa.

11      Atii hoì te tekao ta ù i hakaìte atu :

        E hana tēia tekao i te hana ta ù i makimaki.

        U te e hua io ù ta ù tekao puku koè.

 

HĪMENE ITAIA   12, 2, 4b-e, 5b-6a.c,

 

O te Hatu Etua te vaipuna o te pohuè ;
a èkaèka tātou, a taaàu i te koakoa !           12,3

 

2       O te Hatu Etua tu ù haapohuè.

        U haatià nei au, haametaù koè.

        O te Hatu Etua tu ù ìi. E hīmene au ia Īa.

        Io te Hatu te tumu o to ù pohuè.

 

4       A haahuaèkaèka i te Hatu. A hahi i to Īa ikoa

        A haki atu io te poì êteni i to Īa tau hana mana.

        A hakaìte atu : he Tiketike to Īa ikoa.

5       A haataki i te no te hahi i te Hatu.

 

        Ua hana hoì te Hatu i te hana mahaò.

        U mevaha to Īa òko nui ma nā henua vii pu.

6       E Tiona e, a èkaèka, a taaàu i te koakoa.

        U tiketike te Hatu Etua i vāveka o ôtou.

 

6. - TATAUÌA O TE PEROHETA PARUKO   3, 9-15.32-38 --4, 4

9       E te mataèinaa Iraene.

        A haaòko i te tekao haameitaì i te pohuè.

        A apuu i te tekao haamāàma ia òe.

10      E to Iraene, no te aha ua noho òe

        i te henua o te tau ènana e tōtōua me òe ?

        No te aha ua ìò òe he kooūa i te henua hāoè ?

11      Ua havaìa òe ma te haatukia me te nino tūpāpaù.

        U tatauìa i vāveka o te huaa mamate i Havaiki.

12      Oia nei te piò : u titii òe i te puna o te Māàma.

13      Anoa òe i taha òe ma io he vaanui o te Etua,

        ua noho òe me te moû i to òe henua.

14      A haamaakau òe i hea te māàma, te ìi, te ìteìa.

        Ma èià, e ìte òe i hea te tumu o te pohuè òa,

        i hea te àma e haatāhakahaka i to òe kikomata,

        i hea te moû.

15      E noho te Māàma i hea ? O ai te i ìte ?

        O ai te i uu io te pāòto o to te Māàma taetae ?

32      O te Etua te i tuhi i te vaanui o te Māàma.

        Ua ìte Īa i te tau mea ia ôtoa.

        Ua ùmihi Īa i te tau mea paotū.

        U kānea Īa i te aomāàma vii pu.

        U haapī Īa i te henua me te tau ànimara kē, ànimara kē.

33      Ua pahi Īa i te àma te i hee atu, hee atu paona koè.

        U vavaò Īa i hua àma, ua taha mai,

        e aotahi aa me te emièe.

34      U tāmiomio te tau hetū i te pō, me he mea u koakoa âtou.

35      U vavaò te Etua ia âtou,

        u haahua âtou e peàu aa : « Eīa au nei. »

        U keàpa âtou no te haaèka i te i pēpena ia âtou.

36      O Īa hoì to tātou Etua.

        Aòè te Etua kē i mua o Īa.

37      Ua ùmihi Īa i te vaanui o te Māàma.

        Ua tuku Īa i hua vaanui ia Iakopo, to Īa tāvini,

        ia Iraene ta Īa i haataetae.

38      Ma èià, u hakaìte ia Īa iho i te Māàma io he henua nei.

        Ua noho te Māàma i vāveka o te tau ènana.

4, 1    He Tekao o te Etua hua Māàma.

        Oia te Ture te i noho mau ma te tau tai ananu.

        E pohuè te tau ènana e aotahi i hua Tekao.

        E mate nui te tau ènana e titii i hua Tekao.

2       A hua mai, e Iakopo e.

        A apuu me te aotahi mau i te Tekao.

        A tūìka te Tekao i te vaanui e aahi ia òe

        io he pohuè kanahau.

3       Aua e too pu te mataèinaa kē i to òe kāìè.

        Aua e hao te ati kē i to òe iho taetae.

4       Oho te ìi, e Iraene ! A oko òe !

        Ua ìte tātou i te mea te i haaèka i te Etua.

 

TARAMO   19 (18) 8, 9, 10, 11,

E te Etua e, io Òe te tekao e aahi atu i te pohuè ananu.

   cf. In 6,69

8       U toitoi noa te ture o te Hatu,

        Na īa e haahou i to tātou ìi.

        U tiàtohu te Tekao a te Hatu,

        Te i haamāàma i te poì avai noa.

 

9       U toitoi te Tekao a te Hatu,

        E haakoakoa âtou i te koekoe.

        U hōata te makimaki o te Hatu,

        E haakeàpa i te mata o te ènana.

 

10      U taìtaì te pakaihiìa o te Etua,

        E noho mau ananu to īa tau puku.

        U toitoi te tekao paotū o te Hatu :

        He māàma âtou no te haavā i te ènana.

 

11      U taetae atu te makimaki o te Hatu

        I te puke moni kiki, te kuà o te moni kiki.

        He mānini atu te Tekao a te Etua

        I te mānini tikauè e tahe me io he tīpapa.

 

7. - TATAUÌA O TE PEROHETA EHEKIERE     36, 16-28

 

16      Ua òko au i te Tekao a te Hatu, pēènei à :

17      « E te ènana e, i nā pō e noho nei te mataèinaa Iraene

        io to âtou henua, u havaìa hua henua e âtou

        mēìa i to âtou hakatu hauhau me to âtou hana pē.

18      U haatopa au ma ùka o âtou i te tuki pē,

        mēìa i te toto ta âtou i kiini nei,

        mēìa i te tau ètua tīvava te i haameìe i hua henua.

19        I haatavavā ai au ia âtou i vāveka

          o te tau mataèinaa êteni

        i haahiki kē ia âtou ma he henua kē ananu.

        U haavā au ia âtou vāàna i to âtou hakatu me te hana.

20      I vāveka o hua tau mataèinaa êteni ta âtou i hee atu,

        u haameìe âtou i tu ù ikoa tapu.

        U peàu te tau ènana pēènei :

        « Oia nei te mataèinaa o te Hatu Etua,

        te i titiiìa me io to Īa henua. »

21      Atià, u makimaki au e haakāìè atu i tu ù ikoa tapu,

        ta te ati Iraene i haameìe

        io he tau henua i èià u tavavā âtou.

22      A peàu atu òe i te mataèinaa Iraene.

        Pēènei te Tekao a te Hatu Etua :

        « E to Iraene, a hakaòko mai.

        Aòè no ôtou te tau hana e hana atu au,

        atià no te haakāìè i tu ù ikoa,

        ta ôtou i haameìe io te tau henua i hee atu ai ôtou. »

 

23      Ua tihe mai te tekao a te Hatu Etua, pēènei :

        « E hakaìte au he mea tapu to ù ikoa tiketike

        te i haameeìa e te tau mataèinaa êteni mēìa ia ôtou.

        E vivini te tau mataèinaa i te mea : o au te Hatu Etua.

        Na ù anaiho e haatapu i to ù ikoa.

24      E vavaò au ia ôtou me i vāveka o te tau mataèinaa

        e haaputuputu au ia ôtou,

        te i takiìa me io te tau henua paotū.

        E haahua au ia ôtou i to ôtou henua tumu.

 

25      E kiini au ma ùka o ôtou i te vai , no te haamā ia ôtou.

        E haataìtaì au i to ôtou tau mikeo paotū,

        me to ôtou tau hana pakaihi teka i te tau ètua tīvava.

26      E vaièi atu au ia ôtou i te koekoe hou.

        E tuku au ia ôtou i te kuhane hou.

        E taki au i to ôtou hōupo keâ no te tuku atu i te hōupo kiko.

27      E haaihi au i òto o ôtou i to ù Kuhane

        etià e aotahi ôtou i to ù makimaki,

        me te haamau io he koekoe i to ù tau tekao.

28      E nonoho ôtou io te henua ta ù i tuku atu i to ôtou tau tupuna.

        E ìò ôtou e mataèinaa no ù. He Etua au no ôtou. »

 

- Me papatemaìa tau tama hou,

HĪMENE ITAIA  12,2, 4b-e, 5b-6a.c, (a tiòhi i te tatauìa 5)

 

Akoè à

 

TARAMO 51 (50) 12-13, 14-15, 18-19

 

E te Etua e, a pēpena i òto o au ne i te koekoe hou.    cf. 51,12

 

12      A pēpena i òto o au nei i te koekoe taìtaì.

        A haahou i to ù kuhane, a haamau i to īa meitaì.

13      Umoì e titii atu ia ù mamao me io Òe.

        Umoì e taki me i òto o au i to Òe Kuhane Meitaì.

 

14      A haakoakoa ia ù to Òe haapohuè mai.

        A haamau i te èkaèka io to ù koekoe.

15      E hakako au i to Òe vaanui i te poì mikeo.

        E hua mai io Òe te poì i hukaka nei.

 

 

18      No tu ù ùtuna atu i te hēaka, aòè e apuu mai.

        Me kānea au i te hēaka pūovo i te ahi, u titii Òe.

19      O te koekoe unu i te , oia te hēaka e kākī Òe.

        O te koekoe unu i te uē me te hopo mikeo,

        Te ùtuna hēaka e haatāvaè ia Òe, e te Hatu e.

 

- Me he mea aòè he papatema

TARAMO   42 (41) 2, 5bcd ; 43 (42) 3, 4,

Io te Etua to ù hīa, io te Etua haapohuè.
A hea e koàka ia ù te haatata me te tū i te o te Etua ?
                                                                        cf. 42,3

 

1       Me he mea te menē i paka i te vai pohuè,

2       Atii e ùmihi nei au ia Òe, e te Hatu, tu ù Etua e.

 

5       E taha au i vāveka o te haètoa nui,

        No te tomo io te haè o te Etua.

        Na ù e haatee ia âtou e hiti ana,

        E hahi me te taaàu koakoa i te Etua.

 

3       A pahi mai i to Òe māàma me te tiàtohu,

        Na âua e haatee i to ù tahaìa,

        E aahi ia ù i ùka o to Òe tuaivi,

        Tihe atu io te vahi tapu i èià e noho ai Òe.

 

4       E haatata au pii o te hātaapure o te Etua,

        Te Etua, te tumu o to ù koakoa.

        E haahuaèkaèka au me te hīmene kitā,

        Ia Òe, e te Etua, tu ù Etua e.

 

TATAUÌA A PAURO PEÀTO I TO ROMA     6, 3b-11

        E tu ù tau tuàne tuehine,

3       Ua ìte hoì ôtou u papatemaìa tātou 

        no te haatahi me te Kirito Ietu ;

        i òto o to Īa mateìa to tātou papatema.

4       Ua tomiìa tātou kātahi me Ietu Kirito,

        mēìa i te papatema te i haatahi ia tātou 

        me to Ietu Kirito mateìa.

        No èià, me he mea ua tū hakaùa Ietu Kirito

        me i vāveka o te huaa mamate ma te mana nui o te Motua,

        atii e pohuè ai me tātou no te hakatu pohuè hou.

5       Me haatahi tātou me Ietu ma te mateìa kātahi me Īa,

        e haatahi hoì tātou me Īa

        ma te pohuè hakaùa hakātahi me Īa.

6       Ua ìte meitaì tātou i te mea nei :

        u pāokapekaìa kātahi me Ietu

        to mua hakatu pohuè o tātou ènana mikeo,

        vāàna e haakoè te Etua i te hīa pē o te nino.

        Ma èià, u te e vivini mai hakaùa ia tātou te mana o te mikeo.

7       Me mate nui hoì te ènana, ua koè to īa tāvini atu i te mikeo.

8       Me mate tātou kātahi me te Kirito,

        e haatià mau tātou e pohuè hoì kātahi me Īa.

9       Ua ìte tātou i te mea nei :

        ua tū hakaùa te Kirito me i vāveka o te poì mamate,

        ua koè te mana o te mateìa i ùka o Īa.

        Koè nui e hika hakaùa te Kirito i te mateìa.

10      Ua mate nui Ietu, ua koè te mana o te mikeo i ùka o Īa.

        Ua àva to Īa mateìa no te tau tai hakatahi.

        I tēnei, o to Ietu pohuè, he pohuè no te Etua.

11      Atii me i ia ôtou. A kaituto ia ôtou iho,

        me he poì mamate ôtou :

        ua koè te mana o te mikeo i ùka o ôtou.

        Atià, he poì pohupohuè nei ôtou

        no te haaèka i te Etua kātahi me Ietu Kirito.

 

ALLELUIA ALLELUIA

 TARAMO 118 (117) 1.4, 16-17, 22-23,

 

1       A haahuaèkaèka i te Hatu : u matavaièi mai Īa.

        Paona koè to Īa kāòha.

4       A peàu te poì pakaihi i te Hatu :

        Paona koè to Īa kāòha.

 

16      U tuàki te ìma oko o te Hatu,

        Ua mana nui te pūhāìma o te Hatu.

17      Aòè e mate havaiki, e pohuè meitaì au

        No te hakaìte atu i te tau hana a te Hatu.

 

22      O te keâ i titiiìa e te poì hakatū haè,

        O hua keâ avai noa, ua ìò he keâtaa.

23      Oiana te hana a te Hatu,

        E hana mahaò haapekahi ia mātou.

 

No te Èhua B

EVANERIO O IETU KIRITO VĀÀNA E MAREKO     16, 1-8

1       Ma hope mai o te Tāpati, o Maria Matarena,

        o Maria te kui o Iakopo, o Tarome, ua hoko mai âtou

        i te mēmau kakaa no te haapaù i te nino tūpāpaù o Ietu.

2       I te pōpōuì tika nui mākehukehu, i te â to mua o te âtapu,

        ua tihe âtou io he ana tūpāpaù. U pōpōuì nui.

3       U peàpeàu atu peàpeàu mai âtou :

        « Na ai e huì atu i te keâ me i mua o te avaputa o te ana ? »

4       Atià, e heau aa, ua ìte âtou

        ua huììa hua keâ : he keâ kaùoo.

5       Ua uu âtou i òto o te ana tūpāpaù.

        Ua ìte âtou e tahi māhaì e noho aa i te kēkē ìma oko,

        he kahu òa, he kahu tavaìè to īa.

        U emièe âtou me te haametaù.

6       U peàu hua māhaì ia âtou : « Umoì ôtou e haametaù !

        Ua ùmihi ôtou ia Ietu no Natareti te i pāokapekaìa.

        Ua tū hakaùa Īa. Aòè Īa i înei.

        Oia nei te vahi i tuku âtou ia Īa.

7       A tataha atu.

        A peàu i to Īa tau kouâ atii me ia Petero,

        enā Īa i te Henua Karirea ma mua o ôtou.

        I èià, e ìte ai ôtou ia Īa,

        me he mea ta Īa i peàu atu ia ôtou. »

8       Ua uu âtou i vaho

        me te hiki anamai me io he ana tūpāpaù.

        U emièe hoì âtou, u pūpūkina to âtou koekoe.

        Aòè âtou i haki atu i te ènana e tahi,

        mēìa i te nui oko o to âtou haametaù.

 

NO TE KOÌKA NUI O TE PAKATE

(Â tapu 31 no Pohe 2024)

TOMOÌA : I.4  

E koìka koakoa tēnei

No te poì haatià ia Ietu.

Ua hika te mate ia Òe.

Alleluia, Alleluia, Alleluia.

Kāòha mai Òe, e Ietu tāhia e,

I tēnei â koìka koakoa nui.

U tū mai, u tū mai

To tātou Hatu Mana nui,

I tēnei â koìka no te Pakate.

 

 

E Ietu (bis), hakāòha mai, (bis) / A hakāòha mai ia mātou, (e Ietu)

I tēnei â koìka, / I tēnei â koìka Pakate.

 

       

 

E te Hatu e…                    /           Te Kāìè

- Maveìa i te Tekao : Èo Taa : A apuu…

                                   Kātahi : A apuu tātou i te Tekao Meitaì Hou Mai.

- Èo Taa : A apuu…

- Kātahi : A apuu tātou i te Tekao o te Pohuè.

 

- Hakavaa :               Èo Taa : A hakaòko…

                                   Kātahi : A hakaòko tātou i te Tekao a te Etua.

 

TATAUÌA O TE HĀMANI HANA A TE TAU ÀPOTORO 

                                                                                           10, 34a.37-43

Taramo : Alleluia, alleluia, u pohuè te Hatu, alleluia e (bis). 

  Haaòko nui te mataèinaa o te Etua e, 

  Pao koè to Īa kāòha, e mea hei au.

  Haahuaèkaèka tātou ia ôtoa e :

  Pao koè to Īa kāòha e, e mea hei au.

   Mōumu : Pao koè to Īa kāòha e,

                   Alleluia, alleluia, 

                   U pohuè te Hatu,

                  Alleluia e (bis).

 

 Te keâ titiiìa e te tuhuka ato haè : e mea hei au.

 Ua ìò tēnei e keâtaa e :  e mea hei au.

 Oiana te hana mahaò a te Hatu e : e mea hei au.

 Oiana te koìka haatoitoiìa e te Etua e :

 E mea hei au.

        Mōumu :

Ua ìò e keâtaa e,

Alleluia, alleluia,

U pohuè te Hatu,

Alleluia e (bis).

 

           

 Oiana te koìka pēpenaìa e te Hatu e :

 E mea hei au.

 Koìka èkaèka tātou ia ôtoa e :

 E mea hei nui.

 Haahuaèkaèka i te Hatu e,

 Pao koè to Īa kāòha.

Mōumu :

A koakoa, a èkaèka tātou e !

Alleluia, alleluia,

U pohuè te Hatu,

Alleluia e (bis).

           

 

TATAUÌA O TE HĀMANI A PAURO PEÀTO I TO KOROHA   

                                                                                                     3, 1-4

 

Kio Alleluia :    U ùtunaìa hoì to tātou Pakate, te Kirito.

                           Oia nei te kaiìamau o te Hatu.

                           Mave mai. A haamaòna tātou me te koakoa.

 

Pure a te poì haatià :  E te Hatu Etua, alleluia,

                                     a òko mai ia mātou, alleluia.

ÙTUNA :  I.5

           1
I tēnei â koakoa,
Na Ietu, te Pohuè
I haahika i te mate. Alleluia.

 

              2
I te pōpōuì Pakate,
Ua tū hakaùa
Te Hatu, te Kirito. Alleluia.

             8
Mamau o te i haatià
I te Tūhakaùaìa
O Ietu, te Haapohuè
Alleluia.

 

          9
I ùka te Kāòha,
Te Kāòha, te Hahi,
No tēnei koìka nui.
Alleluia.

               10
I to tātou Haapohuè,

Te Pakaihi, te Kāìè
No te tau tai ananu.
Alleluia.

 

. Haamaakauìa : Te kāìè ia Òe, e te Hatu e,

   te i mate nui, te pohuè ;

                a tihe mai, e Ietu ; a tihe mai, e Ietu.

 

KŌMŌNIŌ :     Mōumu : Ua nino, ua toto, / O Ietu te Kirito ;
                                            U tiòhi, u maohi, / Te ìteìa anaè.

           1
O te Eukaritia,
E takarameta nui,
Avaina tiàtohu
O Ietu te Kirito.

           2

Ia Eukaritia

Te haraoa me te vino ;

Koè nui te haraoa,

Koè nui me te vino.

         3
Ia kai te ènana
I te Eukaritia,
Ua kai te ènana
Ia Ietu te Kirito.

 

 Hīmene haahuaèkaèka/ : I.10

            1
I te maùteiao nui,
I tū ai, e Ietu e. 
U keàpa te ao nei,
Noho mai Òe me mātou. (bis)

                  2
Taha ana au ma he vaanui
Me to ù kuhane koè.
Maakau ana to ù tau veke,
Taha mai Òe me mātou. (bis)

            3
U mevaha to Òe kāòha
Ma òto te poì veve.
A noho mai Òe me mātou,
Matavaa me mātou. (bis)

 

                4
No te toko o te amoka
Hopee ai to ù nino.
Haatāvaè mai to kāìè !
A memae Òe me mātou !

       

Muì to memae nui, / U vevaò mai Òe ia mātou.
    Io he koakoa o to Motua, / Apuu mai Òe ia mātou.

 

PAHIÌA :           I.16    

                       Mōumu :     E ìte ôtou ia Ietu i Karirea.

                                           E ìte ôtou ia Ietu, ua tū hakaùa.

                 1

Umoì e ùmihi ma vāveka

O te poì mate ;

A ùmihi ia Īa io te poì pōhue.         

                          2

Umoì e ùmihi io he vahi mamao nui ;

E noho Īa me tātou i te tau â paotū.

 

TE KOÌKA NUI O TE PAKATE

TATAUÌA O TE HĀMANI HANA A TE TAU ÀPOTORO   10, 34a.37-43

        Io te haè o te kereturione Korenio,

34      U pohā te èo o Petero me to īa peàu pēènei à :

37      « Ua ìte ôtou i te mea i haapaoìa i te Henua Iutea vii pu,

        i te Henua Karirea te tīmataìa,

        ma muì o te papatema te i hakaìteìa atu e Ioane.

38      Ua ìte ôtou pēhea u haapaù te Etua ia Ietu no Natareti

        me te Kuhane Meitaì me te mana.

        Ua taha Ietu e hana i te hana meitaì,

        u haapohuè Īa i te tau ènana paotū

        te i haamōèhuìa e te tiaporo. O te Etua hoì me Ietu.

39      O mātou te tau ènana haatiàtohu i to Īa tau hana paotū

        io he henua ati Iuta atii me Ierutaremi.

        O hua Ietu ta âtou i haamate ma te tauèva ia Īa io he peka.

40      Atià, na te Etua e hakatū hakaùa mai ia Īa,

        ma te toù o te pō me te ao no te hakaìte atu ia Īa anaiho,

41      aòè i te mataèinaa paotū,

        atià i te tau ènana i vaeìa e te Etua,

        o mātou à te i kai me te inu me Īa,

        ma muì o to Īa Tūhakaùaìa

        me i vāveka o te huaa mamate.

42      U peàu mai no te hakaìte atu i te mataèinaa

        me te haatiàtohu i tēnei tekao : O Īa te i haatūìa e te Etua

        no te haavā i te poì pohuè me te huaa mamate.

43      U haatiàtohu te tau peroheta paotū ia Ietu, e peàu aa :

        ma to Īa ikoa, a veveteìa te tau mikeo

        o te ènana i haatià ia Īa. »

 

TARAMO 118 (117) 1.4, 16-17, 22-23

Oia nei te â haatoitoiìa e te Hatu.
He â koìka te â o te koakoa, alleluia.        cf. 118,24

 

1       A haahuaèkaèka i te Hatu : u matavaièi mai Īa.

        Paona koè to Īa kāòha.

4       A peàu te poì pakaihi i te Hatu :

        Paona koè to Īa kāòha.

 

16      U tuàki te ìma oko o te Hatu,

        Ua mana nui te pūhāìma o te Hatu. »

17      Aòè e mate havaiki, e pohuè meitaì au,

        No te hakaìte atu i te tau hana a te Hatu.

 

22      O te keâ i titiiìa e te poì hakatū haè,

        O hua keâ avai noa, ua ìò he keâtaa.

23      Oiana te hana a te Hatu,

        E hana mahaò haapekahi ia mātou.

 

TATAUÌA O TE HĀMANI A PAURO PEÀTO I TO KOROHA  3, 1-4

       

        E tu ù tau tuàne tuehine,

1       Mēìa u pohuè hakaùa ôtou kātahi me te Kirito,

        a ùmihi i te taetae te io he àki, i èià hoì te Kirito,

        e noho aa i te ìma oko o te Etua.

2       A kōhoà anaiho i te mea te io he àki,

        umoì i te mea te io he aomāàma nei.

3       Ua mate ôtou kātahi me te Kirito.

        To ôtou hakatu pohuè hou, u te e hakaìteìa atu nei,

        me he mea u te e hakaìteìa to te Kirito :

        u hakanāìa i òto o te Etua.

 

4       O to ôtou hakatu pohuè hou e tahi me to te Kirito.

        No èià, i te â e hakaìte te Kirito ia Īa iho,

        e tū ai ôtou me Īa i òto o te kāìè Etua.

 

Akoè à

 

TATAUÌA O TO MUA HĀMANI A PAURO PEÀTO I TO KORINETIA  5, 6b-8

 

        E tu ù tau tuàne tuehine,

6       ua ìte ôtou i te tekao haapupuà :

        A kāvohi i te maka o te mea haapupuhi me te haraoa tee,

        e pupuhi te haraoa paotū.

7       A haataìtaì hoì ia ôtou ma te taki me io ôtou

        i te mea haapupuhi pē, ma èià he haraoa tee hou ôtou.

        Na te mea, ôtou he haraoa tee hou haapupuhi koè ìa.

        U ùtunaìa hoì to tātou Pakate e te Kirito.

 

8       A haì tātou i te Koìka Pakate,

        umoì me te mēmau haapupuhi kākiu,

        haapupuhi pē, haapupuhi teka.

        Atià, a haì ôtou i te koìka me te haraoa tee

        o te Toitoi me te Tiàtohu,

        oia hoì te haraoa haapupuhi koè ìa.


ALLELUIA ALLELUIA

                                                                                          1 Ko .5,7-8

U ùtunaìa hoì to tātou Pakate, te Kirito.
Oia nei te kaiìamau o te Hatu.
Mave mai. A haamaòna tātou me te koakoa.

 

EVANERIO A IETU KIRITO VĀÀNA E IOANE     20, 1-9

1       I te â to mua o te âtapu, i te pōpōuì tika,

        hāhakateiao, ua tihe Maria Matarena io he ana tūpāpaù.

        Ua ìte i te keâ, takiìa me io he ana.

2       A tahi a tohuti īa io Timone Petero

        me tēia kouâ i haataetaeìa e Ietu.

        U peàu ia âtou :

        « U tooìa te nino o te Hatu me io he ana tūpāpaù.

        Aòè mātou i ìte i hea te tukuìa. »

3       Ua hee atu Petero me tītahi kouâ

        me to âua tihe io te ana tūpāpaù tiòhi.

4       U tohuti nātoa amana tokoùa âua.

        Atià, ua tihe te kouâ òmua ia Petero

        mēìa te koi o to īa vaevae.

5       Ua oha me to īa ìte i òto he ana

        i te tapa vāhī i te nino, tukuìa ma ùka o te tohua.

        Atià, aòè i uu i òto o te ana tūpāpaù.

6       Ua tihe Timone Petero ma muì o īa.

        Ua uu i òto o te ana me to īa ìte,

        ma ùka o te tohua, i te tapa vāhī i te nino

7       me te tapa tomi i to Ietu upoko.

        Aòè i tāpapaìa hua tapa me to mua tapa te i vāhī i te nino.

        U pikaoìa hoì i vahi kē.

8       A tahi a uu i òto te kouâ kē te i tihe òmua ìka.

        Ua ìte īa. U haatià.


9       Aòè âua i vivini hoì i te Hāmani tapu e peàu aa :

        e tū hakaùa Ietu me i vāveka o te huaa mamate.

 

Akoè à, i te pure meta ahiahi Pakate

EVANERIO O IETU KIRITO VĀÀNA E RUKA     24, 13-35

13      I hua â to mua o te âtapu, ua hee nā kouâ tokoùa o Ietu

        io he pāpuahaè, o Emau te ikoa.

        E ùa hora nehe te tahaìa vaevae me i Ierutaremi.

14      U tekatekao âua no tenā tau mea paotū i paoìa.

15      Ohia u tekao atu tekao mai âua,

        u haatata mai Ietu iho me to Īa taha atu me âua.

16      E aha à u tiòhi âua ia Īa, u haakekehuìa to âua mata

        oi ìte âua o Īa Ietu.

17      U peàu Ietu ia âua : « E aha te tumu

        o to ôùa tekao atu tekao mai, e taha ana ? »

        U hakaēa âua, u kekehu nui te mata.

18      U haahua tītahi, o Kereopata te ikoa, me te peàu ia Ietu :

        « O Òe anaè i vāveka o te tau ènana e noho nei i Ierutaremi,

        aòè i ìte i te tau mea i hanaìa i nā pō i pao atu nei. »

19      U peàu Ietu : « E aha òa ? »

        U peàu âua : « Te tekao i ùka o Ietu no Natareti.

        Ua tū Īa me he peroheta mana ma te hana, me te tekao,

        i mua o te Etua me te mataèinaa paotū.

20      Pēhea i haaìòìa no te haamate nui me te pāokapeka atu,

        e to mātou tau tāuà nui me te tau hakaìki.

21      O mātou à, u tetaì mātou

        e haapohuè Īa i te mataèinaa Iraene.

        Tōtahi atu, oia nei te toù o te pō

        me i te ava i te paoìa i tēia mea.

22      Atià à, u haaemièe mai te mou vehine kē me mātou.

        I te pōpōuì tika, ua hee âtou i te ana tūpāpaù.

23     

        Aòè i koàka ia âtou to Īa nino.

        Ua hua me to âtou peàu mai : ua ìte âua i nā anera

        te i peàu ia âtou u pohuè Ietu.

24      Ua hee io he ana tūpāpaù tahipito me i vāveka o mātou.

        Ua ìte âtou i te mea i peàuìa e te tau vehine.

        O Ietu à, aòè âtou i ìte ia Īa. »

25      U peàu Ietu ia âua : « E te poì pōtako !

        E te koekoe tevee i te haatià i te mea paotū

        ta te tau peroheta i peàu atu.

26      Aòè à tēia mamae e mamae ai te Kirito

        no te tomo io to Īa kāìè ? »

27      U haavivini Ietu i te tekao i patuìa i ùka o Īa,

        i òto o te Hāmani tapu, e tīmata aa

        ma te haatuhuka i nā hāmani vāàna e Moite,

        ma hope iho vāàna e te tau Perofeta hakatahi.

28      U haatata âtou me te pāpuahaè i èià to âtou tahaìa.

        Ua hano Ietu e hee mamao atu.

29      Ua ūtaì âua ia Īa e peàu aa : « A noho me māua.

        Ua èva te â. E kaò ai te òumati.

        Ua uu Ietu no te noho me âua.

30      Ohia io he tapukai me âua,

        ua too Ietu i te haraoa, u haahuaèkaèka,

        ua vahi me te tuku atu ia âua.

31      U pepeùìa to âua kikomata : ua ìte âua ia Ietu.

        Ua kaò anamai Ietu me i to âua .

32      U peàpeàu atu peàpeàu mai âua :

        « Aòè à u veàveà me he ahi to tāua koekoe,

        i te ava u tekao Īa me tāua ma io he vaanui ?

        I te ava o to Īa haatuhuka i te Hāmani tapu ? »

33      Ua tū ponihoo âua no te hua i Ierutaremi.

        U koàka mai ia âua te Tīònohuu ma tahi

        putuputuìa me te huaa e noho aa me âtou.


34      U peàu âtou ia âua : « Tiàtohu nui.

        Ua tū hakaùa te Hatu. U hakaìte ia Īa iho ia Petero. »

35      Ua haki atu me âua i te mea i pao ma io he vaanui,

        pēhea to âua ìte ia Ietu i te ava vahiìa o te haraoa.

 

Comments est propulsé par CComment