TOMINIKA TEKAU MA ONO O TE AVA MA TE ÈHUA
TATAUÌA O TE PEROHETA AMOTE 6, 1.4-7
1 He mea ìno te tau ènana e atenoho me te moû
i ùka o te tuaivi Tiona.
He mea ìno te tau ènana e māmaakau nei
e vahi haametaù koè te tuaivi Tamaria i èià e noho âtou.
4 U hiamoe âtou i ùka o te òki tāpīìa me te èi paaoa.
Ua moe pu âtou i ùka o te tau moeka kanahau oko.
Ua kai âtou i te punua mutō mōmona, te kaiū piha taùtaù.
5 U hīmene pu âtou me te kitā.
U haataki âtou i te pū me he mea ta te hakaìki Tavite.
6 Ua inu âtou i te vino me io he tau hue nunui anamai.
Ua paùìa âtou me te pani kakaa taetae oko.
Atià, aòè âtou e paòpaò i te àì nui
e topa anamai i ùka o te mataèinaa Iraene.
No èià, enā âtou e haamōèhuìa me te aahi atu
io he henua kē.
E ìò âtou te poì to mua e aahiìa io he henua memao.
E koè pu anamai te puke ènana moe aa
i ùka o te tau òki kaèkaè.
TARAMO 146 (145), 5a.6c.7ab, 7c-8, 9-10a
A hahi i te Hatu, u vaièi Īa i te poì veve.
5 Mamau te ènana e ìò te Hatu o Iakopo to īa toko.
6 E hana ananu te Hatu vāàna i ta Īa i hakaìte mai.
7 U haavā Īa me te toitoi i te poì mākakaìa.
U vaièi Īa i te oà i te poì mate i te oke.
U vevete atu Īa i te poì me io he haèhumu.
8 Na te Hatu i haatāhahaka i te tau matapō,
Na te Hatu i ūo i te poì kuhane koè.
Na te Hatu i haataetae i te poì toitoi noa.
9 O te Hatu te vevaò o te tau manihii.
O te Hatu te toko o te tama motua kui koè.
O te Hatu te motua o te tau vehine pōpī.
10 E vivini nei te Hatu ma te tau tai ananu.
E Tiona e, a pohuè paona koè to òe Etua.
TATAUÌA O TO MUA HĀMANI IA TIMOTEO 6, 11-16
11 Òe, e te ènana a te Etua, a titii pao i tēia mea.
A kōhoà òe i te koekoe toitoi, i te hana pure,
te haatià i te Etua, te kāòha,
te tohe mau i te meitaì, te koekoe moû.
12 Umoì e hakaēa i te tōua no te haaneke i te haatià.
A nui to òe hana meitaì etià e ìò ia òe te pohuè paona koè.
Ua vaeìa òe no hua pohuè ananu,
vāàna te kanahau o to òe tekao haatiàtohu
i mua o te nuiìa o te ènana.
13 I te aò o te Etua, te tumu o te pohuè no te tau mēmau ia ôtoa,
i te aò o te Kirito Ietu te i haki atu me te mahaò
i ta Īa tekao haatiàtohu i mua o Ponotio Pinato,
14 u toutaki mamate au ia òe :
A aotahi meitaì i te Tekao a te Hatu
teka koè, piò koè, tihe atu i te Tiheìa
o to tātou Hatu Ietu Kirito.
15 I te ava e hei hoì, e hakaìte te Etua ia Īa.
O Īa anaè te Tiketike nui, peàto,
te Hakaìki o te tau hakaìki, te Hatu o te tau hatu.
O Īa anaè te i pohuè mau ananu.
16 O Īa te i noho io te māàma ìtekoèìa.
Aòè e tahi ènana i ìte ia Īa,
aòè e koàka i tītahi ènana e ìte atu.
Ia Īa te hahi, te mana nui paona koè. Àmene.
ALLELUIA ALLELUIA
2 Ko .8, 9
U haaìò Ietu Kirito ia Īa me he ènana veve oko,
e aha à na Īa te tau taetae ia ôtoa,
etià e tapavaù nui ôtou mēìa i to Īa haaveveìa.
ÈVANERIO O IETU KIRITO VĀÀNA E RUKA 16, 19-31
I tēia mou pō, u peàu Ietu i tēnei tekao haapupuà :
19 « Enā te ènana taetae nui.
Ua uhiìa me te kahu kaèkaè oko nui.
Paotū te â, ua kai īa i te kaiìamau.
20 Enā i pataa he avaputa o to īa haè,
ua moe te ènana veve kikino,
to īa nino kaò i te tau maki, o Rataro te ikoa.
21 U kōhoà īa i te kai haamaòna i te tau ota
e topa me io te tapukai o te ènana taetae nui.
Tōtahi atu, ua miti te tau peto i to īa tau maki.
22 I tītahi â, ua mate te ènana veve.
Ua too te tau anera ia īa
me to âtou kave i pii o Aparahamo.
Ua mate nui me te ènana taetae : ua tomiìa.
23 I havaiki, ua nui oko te memae o hua ènana.
E heau aa, ua ìte īa me i te vahi memao
ia Aparahamo me Rataro ma to īa kaokao.
24 U taaàu hua ènana taetae me to īa peàu pēènei :
« E te motua Aparahamo e, a hakāòha mai.
A pahi mai ia Rataro,
a haatokū i te muamua o to īa makamakaìma io he vai
no te haamoû i to ù èo.
He mea oko to ù memae înei i òto o te ahi uà tāpupu. »
25 U haahua atu Aparahamo ia īa :
« E to ù tama e, a haamaakau òe : e pohuè ana,
ua tukuìa ia òe te tau taetae haakoakoa.
Ua tukuìa ia Rataro te mea haamemae ia īa.
I tēnei hoì, i te vahi nei, u èkaèka īa ; o òe à, u memae òe.
26 Eīa tītahi : e ōpata hōhonu i vāveka o ôtou me mātou nei.
Ia makimaki tahipito me i înei e hee atu io ôtou,
aòè e koàka ia âtou. Atii hoì, aòè e koàka
i tītahi me io ôtou e tihe mai io mātou. »
27 U peàu te ènana taetae :
« A hati mai òe, e te motua e,
a pahi atu ia Rataro io te haè o to ù motua.
28 Na te mea tokoìma to ù mou teina.
A oonaki Rataro ia âtou,
oa topa me âtou i Havaiki nei o te memae. »
29 U peàu Aparahamo ia īa : « Enā Moite me te tau Peroheta.
A hakaòko atu to òe tau teina i ta âtou tekao. »
30 U peàu īa : « Umoì, e te motua Aparahamo e.
E hāìu i te koekoe to ù tau teina me he mea e tihe io âtou
tītahi me i vāveka o te poì mamate i havaiki. »
31 U peàu Aparahamo ia īa :
« No to âtou pūtuì ia Moite me te tau peroheta,
aòè e hati to âtou koekoe,
e aha à e tū hakaùa tītahi me i vāveka o te huaa mamate. »
Comments est propulsé par CComment