TOMINIKA TEKAU MA HITU O TE AVA MA TE ÈHUA
TATAUÌA O TE PEROHETA HAPAKUKO 1, 2-3 ; 2, 2-4
2 E te Hatu e, e aha te òa o to ù vevaò ia òe ?
U te e hakaòko mai òe.
E aha te òa o to ù oonaki me te pekē
i te tau ènana mākaka mai ?
U te e haapohuè mai òe.
3 E aha te tumu ua ao òe e ìtemata au i te mākaka nui ?
O òe iho e tiòhi pu anaè i to mātou ìno ?
I mua o to ù mata te hao pu i te mēmau,
te kamo, te pipikièe, te tōtōua.
No èià, ua koè te ture, ua koè me te toitoi.
E tiaki anaiho au e aha ta te Hatu e peàu mai.
2,2 A tahi a peàu mai te Hatu : « A patu òe i te mea ta òe i ìte.
A patu toitoi. A haapuàha i ùka o te keâ patu hāmani,
etià e koàka i te tatau.
3 I te ava u haaheiìa, e pao meitaì hua mea paotū ta òe
i ìte atu. E hano hua mea ta òe i ìte i to īa haapao meitaì.
Aòè hua tekao he tekao hakahae.
U haatevee oti, e tihe to īa ava, epō anaè.
4 Enā e haahikaìa te ènana tekateka.
Atià, e pohuè te ènana toitoi mēìa i to īa haatià.
TARAMO 95 (94), 1-2, 6-7b, 7d-8a.9
I tēnei â, umoì tātou e taha kē te koekoe,
a hakaòko i te èo o te Hatu. 94, 8
1 A mai ! A hahi me te koakoa i te Hatu,
A haakāìè i to mātou motukeâ, te Haapohuè.
2 A haatata mai io Īa, e haahuaèkaèka,
E hīmene haakoìka no te hahi i te Hatu.
6 A tomo. A oha. A atoratio ia Īa.
A moe haatona i mua o te Hatu,
7 Na Īa hoì i pēpena ia mātou.
O Īa te Etua, o mātou à te mataèinaa
I tēnei â, aha e apuu ôtou i ta Īa tekao ?
8 Umoì ôtou e pūtuì me he mea i te henua ataha.
9 U haamōtii mai hoì to ôtou tau tupuna me te hakaki.
E aha à ua ìtemata âtou i to ù hana mana.
TATAUÌA O TE HĀMANI E ÙA IA TIMOTEO 1, 6-8.13-14
6 E tu ù tama tāhia e, u haamaakau au ia òe i te mea nei :
a ūo òe i te karatia o te Etua, vaièiìa e au ia òe,
ma te hapai i to ù nā îìma i ùka o òe.
7 Aòè i vaièi mai te Etua i te kuhane haametaù hae.
U makimaki te Etua e ìò tātou he tau ènana koekoe toa,
koekoe hakāòha, koekoe atenoho.
8 Umoì òe e hakaìka i te haatiàtohu i to tātou Hatu.
Atii hoì, umoì e hakaìka mēìa io he haèhumu au,
te tāvini o te Hatu. A àva òe i te memae e tahi me au nei
no te haatiàtohu i te ÈVANERIO,
e toko aa te mana o te Etua ia òe.
13 O te hakatu tumu no to òe hana, te tekao u hakako au ia òe,
i òto o te haatià me te kāòha,
te i ìò ia tātou me io Ietu Kirito.
14 A tiòhi meitaì me te haamau i te tekao tiàtohu tukuìa ia òe.
E toko ia òe te Kuhane Meitaì e noho nei i òto o tātou.
ALLELUIA ALLELUIA
cf. 1 P.1,23
U hānauhouìa ôtou e te Etua no te pohuè ananu,
E noho mau te Tekao Meitaì Hou Mai no te ava paona koè.
ÈVANERIO O IETU KIRITO VĀÀNA E RUKA 17, 5-10
5 I tēia mou pō, u peàu te tau Âpotoro i te Hatu :
« A haanui aè i to mātou haatià. »
6 U haahua te Hatu : « Me he mea e tūtū to ôtou haatià
me te kākāno terepota, e koàka ia ôtou
e peàu i te tumuâkau tiketike nei :
A takitumu òe, a nanu iho ia òe io he tai.
E aotahi atu te tumuâkau ia ôtou. »
7 « O ai i vāveka o ôtou me te tueni keì i te èpo
io to īa pāpua, akoè à e tiaki i to īa naho ânimara,
ia hua mai te tueni me io he vahi èitā,
aha, u peàu ôtou ia īa : « A mai ponihoo,
a noho òe io te tapukai ? »
8 He mea kē. U peàu ôtou ia īa :
« A nunu òe i te mea kai no ù. A taka i te kooi.
A tāvini mai etià e kai, e inu haamaòna au.
I muì iho, e kai, e inu me ia òe anaiho. »
9 Aha e haaèkaèka te vivini i hua tueni,
mēìa u aotahi īa i te mea ta īa i peàu atu ?
10 Atii me ôtou, ia hana ôtou i te hana paotū te i peàuìa,
a kaituto : « He tau tāvini anaiho tātou nei.
Ua hana anaè i to tātou hana tumu. »
Comments est propulsé par CComment