TOMINIKA TEKAU MA VAÙ O TE AVA MA TE ÈHUA
TATAUÌA O TE ÙA O TE HĀMANI A TE TAU HAKAÌKI 5, 14-17
14 Enā tītahi hakaìki vivini kape o te Henua Tiria,
o Naama to īa ikoa, he ènana mōhoi.
U peàu te peroheta Erihea ia īa no te kaukau i te vai Ioritane.
U kaukau Naama i te vai Ioritane, e hitu kaukauìa.
U haataìtaììa to īa kii, hakatu me te kii o te tama hou.
15 Ua tihe mai Naama io te peroheta Erihea,
o īa me to īa pūpū kape tiaki.
Ua uu īa io te pāpua o Erihea.
E tū aa i mua o te peroheta, u peàu :
« I tēnei, ua ìte au : aòè he Etua kē i te aomāàma vii pu.
O te Etua o Iraene anaè.
No èià, e ape nei au ia òe.
A haatià mai no te apuu e tahi mēmau kāòha
ta to òe tāvini e tuku atu ia òe. »
16 Atià, u peàu te peroheta Erihea :
« Tiàtohu nui, ma te ikoa o te Etua pohuè, e tāvini nei au,
koè nui au e too e tahi mēmau. »
U toutaki Naama ia Erihea no te too mai.
Atià, ua tohe īa : koè nui i haatià i te too.
17 A tahi a peàu Naama pēènei :
« Te mea atii, a haatià mai e kave to òe tāvini
i te èpo me io tēnei henua, te nuiìa èpo
e koàka i nā miura e ùa te amo atu.
Na te mea, i tēnei ananu, e tahi ùtuna hēaka anaè e ùtuna au :
te hēaka no te pakaihi i te Hatu Etua o Iraene. »
TARAMO 98 (97), 1, 2-3ab, 3c-4a.6b
I to Īa mataèinaa, u hakaìte te Hatu i to Īa mana nui.
cf. .98, 2
1 A hīmene i te Hatu i te hīmene hou.
U mahaò hoì to Īa tau hana.
U tuàki Īa i te mea haapākeka,
Na te mana o to Īa ìma peàto nui.
2 U hakaìte te Hatu i to Īa tuàkiìa,
U haapupuà i to Īa toitoi i mua o te poì êteni.
3 U haamaakau te Hatu i to Īa kāòha hakahae koè
I uē i te ati o Iraene, to Īa mataèinaa.
Ua ìte te henua vii pu i to te Etua tuàkiìa.
4 A hahi i te Hatu, e te henua vii pu,
6 A vānana i te Hatu, to ôtou Hakaìki.
TATAUÌA O TE ÙA O TE HĀMANI IA TIMOTEO 2, 8-13
8 E tu ù tama e, a haamaakau òe ia Ietu Kirito
te i tū hakaùa me i vāveka o te huaa mamate,
te i hānauìa me io te ati o Tavite.
Oia nei te ÈVANERIO e haamevaha au.
9 I uē i hua ÈVANERIO, u memae au nei,
ua humuìa au me te tuitui, hakatu me te ènana mākaka.
Atià, aòè te Tekao a te Etua e humuìa me te tuitui.
10 No èià, ua too au i te memae paotū
i uē i te mataèinaa a te Etua,
etià e koàka mai ia âtou te pohuè haakāìè mau ananu
te i òto o te Kirito Ietu.
11 He tekao tiàtohu nui tēnei :
Me he mea e mate nui tātou kātahi me Ietu Kirito,
e pohuè tātou kātahi me Īa.
12 Me he mea e tohe mau tātou,
e vivini tātou kātahi me Ietu Kirito.
Me he mea e titii tātou ia Īa, e titii me Ietu Kirito ia tātou.
13 Me he mea e haamāhaè tātou ia Īa,
aòè e haamāhaè Ietu Kirito ia tātou.
Aòè e koàka hoì ia Ietu te haakoè i to Īa kāòha.
ALLELUIA ALLELUIA
Ta. 107,8
A haahuaèkaèka i te Hatu mēìa i to Īa kāòha,
me to Īa tau hana mahaò paotū i uē i te tau ènana.
ÈVANERIO O IETU KIRITO VĀÀNA E RUKA 17, 11-19
11 I tēia mou pō, ohia ua hiti Ietu i Ierutaremi,
ua taha Īa ma te kotina
o te Henua Tamaria me te Henua Karirea.
12 Ia tata èka Īa me tītahi pāpuahaè,
ua hano tīònohuu ènana mōhoi e haatutuki me Īa.
13 Ua tū âtou i te vahi memao
me to âtou taaàu, e peàu aa :
« E Ietu e ! E te Tuhuka e ! A hakāòha mai. »
14 E ìte aa Ietu ia âtou u peàu :
« A hee atu me te hakaìte ia ôtou iho i te tau tāuà. »
Oi te hee atu, u haataìtaììa âtou.
15 E tahi me i vāveka o âtou, e ìte aa u pohuè meitaì īa,
ua hua mai, e haakāìè aa i te Etua ma he èo oko.
16 Ua moe haatona īa i aò te aò, pii o nā vaevae o Ietu,
u haahuaèkaèka ia Īa. O īa à he ènana Tamaria.
17 U haahua Ietu me te peàu :
« Aòè à i haataìtaììa te tīònohuu ? I hea te tooiva ?
18 Me i vāveka o âtou, ua hua mai no te haakāìè i te Etua
e tahi anaè, te hāoè nei ? »
19 U peàu Ietu ia īa : « A maô. A taha atu.
Mēìa i to òe haatià, u haapohuèìa òe. »
Comments est propulsé par CComment