TOMINIKA TEKAU MA IVA O TE AVA MA TE ÈHUA
TATAUÌA O TE HĀMANI A MOITE PEÀUÌA EHOTO 17, 8-13
I tēia mou pō, ua noho te mataèinaa Iraene
i te henua ataha,
8 io te kaavai peàuìa Rahitimi.
Ua tihe anamai te poì Amarekita
me to âtou hano pu e hao i to Iraene.
9 U peàu Moite ia Iotua : « A vae mai òe i te tau ènana toa
no te hano atu e tōtōua me to Amarekita.
Oìoì e tū au i ùka o te tuaivi
me te tootoo o te Etua io te ìma. »
10 Ua hana Iotua vāàna ta Moite i peàu atu ia īa,
me to īa tōua atu i te poì Amarekita.
Ua piki Aarone me Huri ma ùka o te kapua tuaivi o Moite.
11 Ia hapai Moite i to īa nā îìma, ua ìi te tau toa Iraene.
E mea à, ia topa i aò to Moite nā îìma, ua ìi to Amarekita.
12 Ua tihe te ava u momoû nā pūhāìma o Moite.
Ua tooìa tītahi keâ me te tuku atu ma to īa tua.
U kaapee Moite ma ùka o hua keâ.
U hapai Aarone me Huri i nā pūhāîìma o Moite,
tītahi i te ìma aèaè, tītahi i te ìma oko.
Ma èià, u hapai to Moite nā îìma
tihe te kaòìa o te òumati.
13 Ua hika to Amarekita ia Iotua me te kohetā o to īa tau toa.
TARAMO 121 (120), 1-2, 3-4, 5-6, 7-8
Me io te Hatu te tokoìa mai, O Īa te i pēpena i te àki me te henua. cf.121,
1 U heau me te tiòhi au i te tuaivi.
Me i hea mai te mana e toko mai ?
2 Me io te Hatu te tokoìa mai.
O Īa te i pēpena i te àki me te henua.
3 E haamau Īa i to òe vaevae, oi te vii.
E matavaa te Hatu, to òe Tiaki meitaì.
4 Aòè e hiamoe, aòè e matakau i te hiamoe,
Te tiaki o te mataèinaa Iraene.
5 O te Hatu to òe tiaki meitaì, to òe vahi maù.
Ua tū ananu nei te Hatu ma to òe kaokao.
6 I te oatea, u te e haaveàveà te òumati ia òe.
I te pō, aòè e haahika te meàma ia òe.
7 E haapāpua te Hatu ia òe me i te ìno,
E tiòhi meitaì Īa i to òe pohuèìa.
8 E aahi te Hatu i to òe hee atu me te hua mai,
I tēnei atii ma te tau tai a tihe ananu.
TATAUÌA E ÙA O TE HĀMANI IA TIMOTEO 3,14-17 ; 4,1-2
E Timoteo, tu ù tama e.
14 Umoì òe e māhaè i te tekao ta òe i hakako,
ta òe i apuu io he koekoe haatià.
Ua ìte hoì o ai te tau tuhuka te i haamāàma ia òe.
15 Me i te ava nino hou, ua òko òe
i te tatauìa o te Hāmani tapu.
Na hua Hāmani e koàka mai ia òe te māàma,
e aahi ia òe tihe io te pohuè o te àki,
mēìa i te haatià, te i òto o te Kirito Ietu.
16 Te tau Hāmani tapu ia ôtoa, ua patuìa e te tau ènana
ta te karatia o te Etua i haamāàma. E toko hua tau
Hāmani tapu i te hana hakaìte atu i te tekao, te oonaki,
te hakapahi i te hana meitaì, te hakaìte i te vaanui toitoi.
17 Ma èià, e àva to īa māàma me te ìi o te ènana tāvini
i te Etua, no te hana i te tau hana meitaì ia ôtoa.
4,1 I mua o te Etua me te Kirito Ietu te i haavā
i te tau ènana pohupohuè me i te tau ènana mamate,
ma te ikoa o to Īa Tiheìa me to Īa Hakaìkiìa,
u toutaki mamate au ia òe.
2 A haamevaha i te Tekao.
I te ava e hei me te ava hei koè, a tohe te hakako.
A oonaki. A hakapahi i te meitaì.
A peàu me te mata ìi, a haatuhuka,
atià me te koekoe moû, e hano ananu e hakako i te Tekao.
ALLELUIA ALLELUIA
Ta .145, 17.19.
U toitoi noa to te Hatu makimaki paotū.
U tata èka me te poì i vevaò ia Īa.
U hakaòko Īa i to âtou èo me te haapohuè ia âtou.
ÈVANERIO O IETU KIRITO VĀÀNA E RUKA 18, 1-8
I tēia mou pō,
1 u peàu Ietu i to Īa tau kouâ i te tekao haapupuà
no te hakako ia âtou e tohe mau i te pure,
umoì e kuhane koè.
2 U peàu Ietu pēènei : « Enā io tītahi pāpuahaè
te ènana haavā te i pakaihi koè i te Etua,
e haamee aa i te tau ènana.
3 Io hua pāpuahaè, enā me te vehine pōpī
te i tihe io hua ènana haavā me te peàu :
« A haatoitoi òe i te tekao i ùka o au nei
me te ènana e tōtōua mai. »
4 Aòè i ao vave te haavā i te haatoitoi i te tekao,
u haatevee, haatevee īa. I muì iho, e kaituto aa,
u peàu īa pēènei : « E aha à e pakaihi koè au i te Etua,
e haamee i te tau ènana,
5 mēìa u haapaòpaò mai hua vehine pōpī,
e haatoitoi au i te tekao vāàna i to īa ape mai,
oa tihe ananu īa e haaveveì mai. »
6 U peàu te Hatu : « A hakaòko meitaì ôtou
i te tekao o te ènana haavā toitoi koè.
7 Aha, u te e haatoitoi te Etua i te tekao
i uē i to Īa huaa vaeìa, te i vevaò ia Īa â te pō ?
Aha, e haatevee te Etua i te toko ia âtou ?
8 U peàu au ia ôtou :
« E haatoitoi ponihoo te Etua i te tekao i uē ia âtou.
Atià à, me tihe mai te Tama a te Ènana,
e aha, e koàka ia Īa te poì haatià io he henua ? »
Comments est propulsé par CComment