TOMINIKA E TOÙ ÒNOHUU O TE AVA MA TE ÈHUA
TATAUÌA O TE TUHUKA TEKAO O PENETIRA 35, 12-14.16-18
12 U haatoitoi te Hatu Etua i te tekao vāàna i te tiàtohu.
I mua o te Hatu Etua, u tūtaììa te tau ènana paotū.
U hakaòko te Hatu i te pure vevaò
o te ènana òomimākakaìa.
14 Aòè te Hatu e titii i te pure vevaò
o te tama motua koè, kui koè.
Aòè te Hatu e haamee i te vehine pōpī, e haki aa i to īa uē.
16 E apuu meitaì ìa e te Etua
te ènana tāvini ia Īa ma te tiàtohu o to īa koekoe.
E hiti io he àki ta īa pure.
17 Epō e apuuìa ta īa pure io te Etua,
aòè e hakaēa te uē o te ènana haapāpaku.
18 Aòè e hakaēa te pure o hua ènana haapāpaku,
e tohe aa tihe te tiòhiìa mai e Etua Tiketike ia īa,
tihe ia haavā te Etua i uē i te ènana piò koè
ma te haatoitoi i te tekao.
TARAMO 34 (33), 2-3, 16.18, 19.23
Ua oko te Etua me te haapohuè atu.
2 E haameitaì au i te Hatu ma te tau â paotū.
E hahi au i te Hatu i te tau vahi ia ôtoa.
3 Io te Hatu anaè to ù haakāìè.
A òko mai te poì veve, a koakoa me âtou.
16 U tiòhi te Hatu i te tau ènana toitoi.
U hakaòko i to âtou èo vevaò ia Īa.
18 U hakaòko te Hatu i te ènana e vevaò ia Īa,
Me to Īa haapohuè me io to âtou pūpūkina.
19 U tata èka te Hatu me te ènana koekoe uē.
Ua toko Īa i te ènana kuhane koè
23 Te i haahaa me te hiiaki i te ènana toitoi.
E haapohuè te Hatu i te ènana haatià.
TATAUÌA E ÙA O TE HĀMANI IA TIMOTEO 4, 6-8.16-18
6 E tu ù tama tāhia e,
U ùtunaìa au me he hēaka.
Ua tihe mai te ava o to ù paekē.
7 Tihe i te paoìa, u tōua au no te tekao tiàtohu.
U tohuti au, pao meitaì to ù tīkakai.
Ua tohe mau i te haki atu i te haatià.
8 Oia nei te mea e toe : te koàka mai i te heipaè kāìè
ta te Hatu e tuku mai i te â o to Īa Tiheìa,
O Īa hoì te Haavā toitoi noa.
Aòè e tukuìa ia ù anaiho, atii me te tau ènana paotū
te i tetaì me te kāòha i te â o to Īa Tiheìa.
16 Ia tū au to mua i mua o te haavā,
u titii te tau ènana paotū ia ù :
aòè tītahi e toko mai. Umoì e hava âtou i hua teka.
17 Ua toko mai te Hatu. U vaièi mai i te ìi hou
etià e koàka ia ù te hakaìte atu i te Tekao
me te haamevaha i mua o te tau êteni ia ôtoa.
U haapohuè hoì te Hatu ia ù me io te niho o te reone.
18 E haapohuè mai te Hatu me io te tau ìno paotū
me to Īa aahi mai ia ù tihe io to Īa Patirēia o te àki.
Te kāìè ia Īa no te tau tai a tihe ananu. Àmene !
ALLELUIA ALLELUIA
. cf. 1Tam.16,7
Aòè te Etua e tiòhi te hakatu o te ènana,
u tiòhi te ènana i te hakatu ma vaho anaè.
Ua ìte te Hatu i te tiàtohu o te koekoe.
ÈVANERIO O IETU KIRITO VĀÀNA E RUKA 18, 9-14
I tēia mou pō,
9 u peàu hakaùa Ietu i tēnei tekao haapupuà
no tahipito e kaituto aa o âtou anaiho te poì toitoi.
Me he poì avai noa te tau ènana kē.
10 « Ua hiti io te Hiero hano i te pure nā ènana tokoùa.
He Fariteo tītahi, he pupurikano tītahi.
11 Ua maô te Fariteo, e heau aa, ua pure īa io he koekoe :
« E te Etua e, u haahuaèkaèka au ia òe,
mēìa aòè au hakatu me te tau ènana kē, he poì kamo âtou,
hana i te hana pē, haateka i te mātirimonio,
akoè à hakatu me tēnei ènana pupurikano.
12 O au à, u haaoke au e ùa â
ma tēia hepetoma, tēia hepetoma.
U ùtuna au e tahi hope o te pāio ònohuu
o te tau taetae paotū ta ù e koàka mai. »
13 Te pupurikano à, ua noho īa io te vahi memao.
Aòè īa e vaavō e heau io he àki.
Ua moto īa i te umauma e peàu aa :
« E tu ù Etua e, a hakāòha mai ia ù,
he ènana mīkeo au nei. »
14 U peàu au ia ôtou : Ua hua io to īa haè te pupurikano
me te koekoe toitoi. Aòè i haatoitoiìa to mua ènana.
Ia haatiketike hoì te ènana, e haapāpakuìa.
Ia haapāpaku te ènana ia īa anaiho, e haatiketikeìa. »
Comments est propulsé par CComment