PŌ E TOÙ TE KOÌKA ÈHUAHI
TATAUÌA O TE HĀMANI A TE PEROHETA IOERE
2, 12-18
12 Oia nei te Tekao a te Hatu Etua.
A hua mai ôtou io ù me te koekoe tiàtohu,
ma òto o te haaoke, te vaimata me te kahu uē.
13 Aua e veti i te kahu.
A hāìu i to ôtou koekoe me te hua io to ôtou Etua.
He moû, he hakāòha nui te Hatu ;
u haatevee i te pekē, ua pī nui i te uē.
U haatūhaè Īa i te tuki pē.
14 O ai te i ìte ? E hua ùanei Īa i te moû
no te haakoè i te umu,
me te haapī ia ôtou i to Īa vaièi mai.
E koàka ia ôtou te ùtuna atu i te hēaka
io te Hatu, to ôtou Etua.
15 A haataki i te pū, e Ierutaremi e.
A haaìte i te ava haaoke tapu.
A haapei i te koìka pure.
A putuputu te motuhaka peàto.
A haakātahi mai i te papa hakaìki me te tau tuhuka.
A muimui mai te mataèinaa.
A haaputuputu mai te tau tama hou me te tau tōìki.
16 A uu i vaho me io to īa pāòto te vāhana hou,
me io to īa haè, te vehine hou.
A tomo io he haèpure te tau tāuà, tāvini o te Etua.
A pure âtou, a hīmene i te hīmene uē, e peàu aa :
« E te Hatu e, a hakāòha mai i to Òe mataèinaa.
17 Aua Òe e ao i te poì êteni
e haamee me te māio i to òe mataèinaa.
No te aha e peàu âtou : « I hea to âtou Etua ? »
18 A tahi a tāvaè te Hatu me te hakāòha
i to Īa mataèinaa.
TARAMO 50 (51), 3-4, 5-6ab, 12-13, 14.17
E te Etua e, a hakāòha mai, mēìa i to mātou mīkeo.
Ta 50, 3
3 E te Etua e, a hakāòha mai.
Mēìa i te nuiìa o to Òe uē,
4 A hooi mai me i to ù mīkeo.
A haamā i tu ù koekoe pē.
5 Ua ìte au i to ù mīkeo.
U maakau ananu au i to ù piò.
6 Ua teka au io Òe anaiho,
I to Òe aò, ua hana au i te mea pē.
12 A pēpena i òto o au nei i te koekoe taìtaì.
A haahou i to ù kuhane, a haamau i to īa meitaì.
13 Umoì e titii atu ia ù mamao me io Òe.
Umoì e taki me i òto o au i to Òe Kuhane Meitaì.
14 A haakoakoa ia ù to Òe haapohuè mai.
A haamau i te èkaèka io to ù koekoe.
17 E te Hatu, tu ù Etua e, a pepeù i to ù kiinutu,
A tahi a hahi to ù haha i to Òe kāìè.
TATAUÌA O TE HĀMANI E ÙA A PAURO PEÀTO I TO KORINETIA
5, 20 – 6, 2
E tu ù tau tuàne tuehine,
20 ua ìò mātou he tau keèe no te Kirito.
O te Etua iho te i oonaki ia ôtou
ma òto o to mātou haha.
Ma te ikoa o te Kirito, u toutaki mātou ia ôtou :
a ao ôtou e haatutuki te Etua ia ôtou me Īa.
21 Ua piò koè, mīkeo koè te Kirito.
Atià, i uē ia tātou, u haatopa te Etua i ùka o te Kirito
i te tuki pē o te mīkeo.
Ma èià, i òto o te Kirito,
u toitoi mātou nei i mua o te Etua.
6,1 Ohia ua hana mātou me he mou tautua o te Etua,
u toutaki mātou : « Umoì ôtou e avai pu anaè
i te karatia ta te Etua i vaièi mai.
2 Ua patuìa hoì ma òto o te Hāmani tapu :
« I te ava e hei, e hati au i to òe hīa ;
i te â haapohuè, e toko au ia òe.
Oia nei te ava e hei, oia hoì te â o te haapohuè. »
HĪMENE VĀNANA Mt 4, 17
U peàu te Hatu : « A hāìu i to ôtou koekoe,
u tata èka te Patirēia o te Etua. »
ÈVANERIO O IETU KIRITO VĀÀNA E MATEO 6, 1-6.16-18
I tēia mou pō, ohia u putuputu mai te tau kouâ
i ùka o te tuaivi vii pu o Ietu, u peàu ia âtou pēènei :
1 « Umoì ôtou e aotahi i to te Etua makimaki
i te ava enā te tau ènana
e tiòhi ia ôtou me te haakāìè mai.
Me he mea e hana ôtou atii, e koè ai to ôtou tuki
me io to ôtou Motua te io he àki.
2 Ia vaièi atu òe i te taetae kāòha,
umoì òe e hana me he mea ta te poì koekoe e ùa
te i haataki i te pū i òto o te tinakoka, io he tohua,
etià e haakāìè te tau ènana ia âtou.
Ma te tiàtohu to ù peàu ia ôtou,
u koàka mai ia âtou te tuki.
3 Ia vaièi atu òe i te taetae kāòha,
aua to òe ìma aèaè e ìte e aha ta te ìma oko i tuku.
4 Ma èià, e hana hakanā to òe vaièiìa.
Na to òe Motua te ìte i te mea hakanā,
e haahua mai ia òe. »
5 I te ava e pure ôtou,
aua e hana hakatu me te poì koekoe e ùa.
U koakoa âtou e pure tū aa i òto o te tau tinakoka,
akoè à, io te tau tohua, etià e ìte te tau ènana ia âtou.
Ma te tiàtohu to ù peàu ia ôtou :
u koàka mai ia âtou te tuki.
6 O òe à, i te ava e hano òe i te pure,
a uu i òto o te pāòto hakanā o te haè, a pā i te avaputa,
a pure io to òe Motua te i noho io he vahi hakanā.
Na to òe Motua te ìte i te mea hakanā,
e haahua mai ia òe.
16 Me he mea e haaoke ôtou,
umoì e haaìò i to ôtou mata me he mata uē,
hakatu me te tau ènana koekoe e ùa
te i haahuìkē i te mata
etià e mata haaoke to âtou i mua o te tau ènana.
Ma te tiàtohu to ù peàu ia ôtou :
u koàka mai ia âtou te tuki.
17 O òe à, ia haaoke òe, a paù i to òe upoko
me te kao kakaa, a hooi i to òe mata,
18 etià u te ìte te tau ènana e haaoke nei òe.
O to òe Motua anaè te i noho io he vahi hakanā te ìte.
Na to òe Motua te ìte i te mea hakanā,
e haahua mai ia òe. »
Comments est propulsé par CComment