TE KOÌKA HAHI I TE EUKARITIA
TATAUÌA O TE HĀMANI A MOITE PEÀUÌA TENETE
14, 18-20
Ua hua mai hoì Aparahamo me io te tōua
e haahika ia Ketoramoere, te mou hakaìki kē me īa.
U tutuki me te hakaìki no te pāpuahaè Taremi.
18 O Meretiteka te i ùtuna i te haraoa me te vino.
O īa te hakaìki no Taremi.
E tāuà īa no te Etua Tiketike.
19 Ua pure īa pēènei : « A haameitaììa Aparahamo
ma te ikoa o te Etua Tiketike
te i pēpena i te henua me te àki.
20 A meitaììa te Etua Tiketike te i haaìò i to òe îìma
i te tau ènana i tōua atu ia òe. »
Ua tuku atu Aparahamo ia Meretiteka
i tītahi hope o te tau taetae paotū ta īa i koàka mai.
TARAMO 109 (110), 1, 2, 3, 4
O te Kirito te Hatu ; he tāuà Òe no te ava paona koè. 109, 4
1 Te Tekao a te Hatu i to ù hakaìki :
« A tānoho òe i to ù ìma oko.
E haaìò au i te tau ènana tōtōua me òe
He moeka ma aò o to òe tapuvae. »
2 Me io te tuaivi Tiona, e tuku te Hatu
Ia òe i te tōtoko o te hakaìkiìa.
E hakaìte Īa i to òe mana i te poì kōtoa,
Tihe atu i te mataèinaa tōtōua me òe.
3 I te ava ua ìteìa to òe mana,
He hakaìki òe, keàpa ana i te peàto nui.
« Me he mea te haupō i te pōpōuì tika,
Atii to òe hānauìa me i òto o au nei. »
4 U haatiàtohu te Hatu i ta Īa tekao :
Aòè e koè to Īa peàu mai :
« He tāuà òe no te ava paona koè,
Vāàna i te hakatu o Meretiteka, te hakaìki. »
TATAUÌA O TO MUA HĀMANI A PAURO PEÀTO I TO KORINETIA
11, 23-26
E tu ù tau tuàne tuehine.
23 O au nei o Pauro. U hakako au ia ôtou
i te tekao i tukuìa mai e te Hatu, pēènei :
24 I te pō i mākakaìa, ua too te Hatu i te haraoa,
u haahuaèkaèka, ua vahi me te peàu :
« O tu ù nino tēnei, haaìòìa no ôtou.
A hana ôtou atii no te haamaakau mai ia ù. »
25 Me hua hakatu, ma hope o te mau,
ua too Īa i te ipu, e peàu aa :
« O te ipu nei he Piimau hou, i òto o to ù toto.
I te ava hakatahi e inu ôtou me io hua ipu,
a hana ôtou no te haamaakau mai ia ù. »
26 Ma èià, i tēia ava, i tēia ava
ua kai ôtou i hua haraoa, ua inu ôtou me io hua ipu,
ua haki atu ôtou i te mateìa o te Hatu,
e tataì ana i to Īa huaìa mai.
PURE VEVAÒ
A tiòhi i te paka hāmani : p. 192ALLELUIA, ALLELUIA. In 6, 51-52
E te Hatu Ietu Kirito e, o Òe te Haraoa pohuè
te i iho mai me io he àki.
Te ènana e kai i hua haraoa,
e koàka ia īa te pohuè ananu.
ÈVANERIO O IETU KIRITO VĀÀNA E RUKA 9, 11-17
I tēia mou pō,
11 u vivini te haètoa me to âtou ūtaì ia Ietu.
Ua mave mai Ietu ia âtou nui.
U tekao atu Īa i ùka o te Patirēia o te Etua
me to Īa haameitaì i te poì hōpī te i ape mai ia Īa.
12 Ua èva te â. U haatata mai te Tīònohuu ma ùa
me to âtou peàu ia Ietu :
« A haahua atu Òe i te haètoa.
A hee âtou io he tau pāpuahaè tata nei
me te tau haè kē.
I èià, e koàka ia âtou te moe me te kai.
Enā tātou nei i te henua ataha. »
13 U peàu Ietu ia âtou : « A hākai ôtou anaiho ia âtou. »
U peàu te tau kouâ :
« E ìma haraoa anaè me nā ika e ùa ta mātou.
E aha, e hano mātou e hoko i te oà
no tēnei haètoa nui ? »
14 U kātahi mai i èià me he mea
e ìma tautini ènana vāhana.
U peàu Ietu i to Īa tau kouâ : « A haanoho ôtou ia âtou,
ma he tau pūpū e ìma ònohuu ènana. »
15 Ua hana âtou atii me te haanoho i te tau ènana paotū.
16 Ua too Ietu i te mou haraoa e ìma me nā ika e ùa.
U heau to Īa mata io he àki, u haahuaèkaèka Ietu,
ua vahi me te tuku i te tau kouâ,
na âtou te tuha atu i te haètoa.
17 Ua kai haamāòna âtou paotū.
Ua kohiìa te tau toeka : ua pī ònohuu ma ùa kete.
Comments est propulsé par CComment