TOMINIKA ÒNOHUU MA HĀ O TE AVA MA TE ÈHUA
TATAUÌA O TE HĀMANI A TE PEROHETA ITAIA
66, 10-14c
10 A koakoa ôtou e tahi me Ierutaremi.
A èkaèka ôtou mēìa ia Ierutaremi.
Ôtou paotū e haataetae ia īa.
A koakoa nui ôtou te i uē mēìa i to īa mateìa.
11 A àva atu ôtou i te kainamau o to Īa pohuè haaèkaèka.
A haamāòna ôtou, a inu ôtou tihe i te kūìa
me io te nuiìa o to Īa kāìè.
12 Oia nei ta te Etua i peàu :
« E aahi mai au i Ierutaremi i te moû me he vaitahe.
I Ierutaremi me he taitoko,
e haapuke au i te tau taetae o te tau mataèinaa.
E ìò ôtou me he tau tama hou hopuìa,
he tau tama tāhia haataetaeìa io he pūhāîìma.
13 Me he mea e haakoè te kui i te uē o ta īa tama,
atii tēnei, e haakoè au i to ôtou uē i òto o Ierutaremi.
14 E ìtemata ôtou : e pī ôtou i te koakoa.
Mēìa i te koakoa, e haahouìa to ôtou nino
me he èitā tupu hou.
E haapuàha te Hatu i to Īa mana nui
i mua o to Īa tau tāvini. »
TARAMO 65 (66), 1-3a, 4-5, 6-7a, 16.20
A hahi i te Etua, e te henua ia ôtoa. A hīmene no te Hatu.
65, 1
1 A hahi i te Etua, e te henua ia ôtoa.
A haakoìka no te haakāìè i to Īa ikoa.
2 A haahuaèkaèka me te hahi ia Īa.
3 A peàu ôtou i te Etua : « Auē ! To Òe hana mana. »
4 I to Òe aò, e moe haatona te tau mataèinaa paotū,
E hīmene aa ia Òe me te hahi i to Òe ikoa.
5 A mai. A ìte ôtou i te hana o te Etua,
To Īa tau hana mahaò i uē i te tau ènana.
6 Na te Hatu i haaìò i te tai me he papakeâ,
U te paìpaì te vaevae o to Īa mataèinaa.
Hua tau hana mahaò te tumu o to tātou koakoa.
7 E paona koè to Īa vivini me te mana.
16 A mai, e te poì pakaihi i te Etua,
A haaòko i to te Etua hana i uē ia ù.
20 A haameitaììa te Etua te i apuu i ta ù pure,
Te i tiòhi mai me te kāòha.
TATAUÌA O TE HĀMANI A PAURO PEÀTO I TO KARATA 6, 14-18
14 E tu ù tau tuàne tuehine.
O au à, koù e ìò te mateìa o te Kirito io he peka
he tumu o tu ù kāìè, tu ù kāìè anaè.
Ma hua peka hoì o te Kirito, me he mate nui no ù
te tau mēmau paotū o te ao nei.
Atii me au iho, me he ènana mate nui au no te ao nei.
15 He mea tupepaka te pātehe,
e mea tupepaka te pātehekoèìa.
Te mea taetae oko, e ìò tātou he pēpena hou.
16 I te tau ènana e pohuè vāàna i hua māàma,
te moû me te hakāòha mai me io te Etua.
Hua mea anaiho no te mataèinaa o te Etua,
te Iraene tiàtohu.
17 Oia nei ta ù tekao paoìa :
umoì e tahi ènana e hano mai haapaòpaò hakaùa.
Ua ìteìa i òto o to ù nino
te tau maki i mamae au i uē ia Ietu.
18 E tu ù tau tuàne tuehine, me to ôtou kuhane
te karatia o to tātou Hatu, Ietu Kirito. Àmene.
ALLELUIA. ALLELUIA Ta 19, 5
U mevaha te Tekao, te Tekao Meitaì Hou Mai
tihe atu io te tau kotina o te henua.
ÈVANERIO O IETU KIRITO VĀÀNA E RUKA
10, 1-12.17-20
Akoè à 10, 1-9
I tēia mou pō,
1 ua vae te Hatu e hitu ònohuu ma ùa kouâ kē.
Ua pahi atu ia âtou tokoùa, tokoùa i mua o Īa,
io te pāpuahaè paotū me te tau kākaavai
i èià u makimaki Īa e hee atu.
2 U peàu Ietu ia âtou :
« E mea nui te puku paa,
e mea iti te poì kohi i te puku.
A pure hoì ôtou i te hatu hei pāpua
etià e pahi īa i te poì hana no te kohi i ta īa tau puku.
3 A tataha atu. Enā, e pōpahi atu au ia ôtou
me he punua mutō i vāveka ahau o te tau rupo.
4 Umoì ôtou e too i te moni, te kete, te aihū,
aua ôtou e hakaēa ma he vaanui no te kāòha
i te ènana.
5 Ia uu ôtou io tītahi haè, a peàu òmua pēènei :
« I te huaahaè nei te moû ! »
6 Enā i òto o te haè te ènana e kōhoà nei i te moû,
e ihi to ôtou moû i òto o īa.
Akoè à, e hua mai te moû i òto o ôtou.
7 A noho ôtou io hua haè, a kai, a inu
i te mea i tukuìa ia ôtou. I te ènana hana hoì to īa tuki.
Umoì ôtou e hee me io tēnei haè i tēia haè.
8 Me he mea e tomo ôtou io tītahi pāpuahaè
te i apuu meitaì ia ôtou, a kai i te mea e tukuìa ia ôtou.
9 A haameitaì ôtou i to âtou poì hōpī
me te peàu ia âtou :
u tata èka me ôtou te Patirēia o te Etua.
10 Me he mea e tomo ôtou io tītahi pāpuahaè
aòè i apuu ia ôtou, a avai i to âtou haè,
a hee atu ma io he vaanui me te peàu :
11 « Te èpo o to ôtou pāpuahaè i pipii
ma aò o to mātou vaevae,
e tūtū mātou me te avai io ôtou.
Atià, a ìte ôtou : u tata èka te Patirēia o te Etua. »
12 Na ù e peàu ia ôtou : I te â o te haavā paoìa,
e mea pē atu te tuki o hua pāpuahaè
i te tuki pē o Totoma.
17 Ua hua mai te tau kouâ e hitu ònohuu ma ùa.
Ua pī âtou i te koakoa me to âtou peàpeàu pēènei :
« E te Hatu e, ma to Òe ikoa,
u aotahi mai me te tau tiaporo. »
18 U peàu Ietu ia âtou : « E tiòhi ana, ua ìte au ia Tatane
e haaihoìa aa me he uià e pohā io he àki.
19 Eīa, ua tuku atu au ia ôtou i te mana no te keàhi
i te tau puhihenua, i te tau koropio,
me te haahika i tēia e haapākeka ia ôtou.
Aòè e mea e haamākaka mai ia ôtou.
20 Atià, umoì ôtou e koakoa
mēìa u aotahi te tau kuhane ìno ia ôtou.
A koakoa mēìa ua patuìa to ôtou ikoa io he àki. »
Comments est propulsé par CComment