TE TEKAO A TE ETUA NO TE ÈHUA KIRITIANO B - ÈO HIVA OA
TO MUA TOMINIKA O TE AVA TETAÌ
TETAUTINA O TE PEROFETA ITAIA 63, 16b-17.19b ; 64,2b-7
16 E te Fatu e, o Òe to mātou Motua me to mātou Haapohoè.
Oia nei to Òe inoa me i kiu mai.
17 E te Fatu e, no te aha u avai Òe ia mātou
e hukaka ana memao me io to Òe aanui ?
No te aha na Òe e haafeò i to mātou koekoe
te i pakaihi koè i to Òe inoa ?
A hua mai, e te Fatu e, i uē i to Òe tau tāvini,
i uē i te tau ati ta Òe e haataetae !
19 A pepeù i to Òe àni !
A iho mai io mātou ! I mua o Òe, e èhu ai te tau tuaivi.
64,2 Ua iho mai hoì Òe, e te Fatu e.
I to Òe aò, ua èhu te tau tuaivi.
3 I te tai tehito òmua naoti, aòè i òno te tau ènata.
Òmua atu, aòè i hakakotia.
Aòè e tahi ènata i ìte i te Etua te i hana
me he mea ta Òe i uē i te poì e pakaihi ia Òe.
O Òe anaè, e te Fatu e.
4 Ua pii Òe me te ènata e aotahi aa ia Òe me te koakoa,
te ènata e haamaakau ia Òe e taha aa io to Òe aanui.
5 Ua peê Òe mēìa i to mātou tohe i te mikeo.
E aha à e haapohoè Òe ia mātou,
he tau ènata havatia i te mikeo mātou nui ;
me he kahu tīèpo i to mātou tau hana meitaì.
O mātou nui me he kaù moô.
Ua puhi te mikeo ia mātou me he mea a te metani.
6 E te Fatu e, u te e vevaò e tahi ènata i to Òe inoa.
Aòè i matavaa e tahi ènata no te hahi ia Òe.
Mēìa i to Òe mata koè ia mātou,
u avai mai i te mana o to mātou tau mikeo.
7 Atià o Òe, e te Fatu e, to mātou Motua,
u hakatu Òe me te ènata kānea hue me te èpo pipii.
O mātou hua èpo.
O mātou nui te hana o to Òe îìma.
TARAMO 80 (79), 2.3bc, 15-16, 18-19
Te Etua e, a haahua ia mātou i te meitaì !
A matavaièi mai, e pohoè ai mātou ! 80, 4
2 E te Tiaì o Iraene, a hakaòno i ta mātou pure !
O Òe te i haatee mai me he mea i te naho muto.
3 A haapupuà i to Òe mana !
A mai ! A haapohoè ia mātou !
15 E te Etua mana nui e, a matavaièi mai !
A tiòhi Òe me io he àni, a ìte meitaì !
16 A toko i te tumuvino tanutia e to Òe ìma,
I te huì ta to Òe mana i haatupu !
18 A toko to Òe ìma i te ènata vaetia e Òe,
I te tama a te ènata ta Òe i haatū !
19 Koè nui e paekē mātou me io Òe !
A haapohoè mai, e hahi mātou i to Òe inoa !
TETAUTINA O TO MUA HĀMANI I TO KORINETIA 1, 3-9
E tu ù tau tunane tuehine.
3 Ia ôtou te karatia me te moû
me io te Etua, to tātou Motua, me io te Fatu Ietu Kirito.
4 U te e hakaēa au i te haahuaèkaèka i te Etua
e kaituto ana ia ôtou, mēìa i te karatia
ta te Etua i vaièi ia ôtou i òto o Ietu Kirito.
5 I òto o Īa hoì, u koàna mai ia ôtou te tau taetae ia ôtoa,
to te Teào a te Etua atii me to te ìte māàma i te Etua.
6 Na te mea, i vāvena o ôtou, ua noho mau
te teào haatiàtohu i te Kirito.
7 No èià, aòè e tahi taetae kāòha o te karatia
i toe no ôtou, ôtou te i tiaì nei
i te Tihena o to tātou Fatu Ietu Kirito,
i te ava o to Īa haaìtetina.
8 Na Īa e toko ia ôtou no te tohe mau
i òto o te haatià tihe i te paona, etià e piò koè ôtou,
i te â e tihe to tātou Fatu Ietu Kirito.
9 Aòè e hakahae te Etua ia ôtou, u tiàtohu ta Īa teào.
Na Īa aneiho i vevaò ia ôtou
no te haatahi me ta Īa Tama, Ietu Kirito to tātou Fatu.
ALLELUIA ALLELUIA
cf.Ta.85,8
E te Fatu e, a haaìte mai i to Òe kāòha.
A vaièi mai i to Òe haapohoètina.
EVANERIO O IETU KIRITO VĀÀNA E MAREKO 13, 33-37
I tēia mou pō, u peàu Ietu i to Īa tau kouâ :
33 « A tiòhi meitaì ia ôtou. A matavaa.
Aòè ôtou e ìte a hea te ava.
34 U hakatu me te ènata e hee atu i te fenua memao.
U avai īa i to īa faè.
Na te tau tāvini e tiòhi i te tau mēmau paotū.
U haatoitoi īa i te hana ta tēnei, ta tēia e hana atu.
U peàu i te tueni tiaì i te avaputa : a matavaa !
35 A matavaa hoì !
Aòè ôtou e ìte a hea e tihe mai ai te Fatu o te faè :
i te ahiahi oti ? I te tūmoe nui oti ?
Ia tani te moa oti ? I te pōpōuì tika oti ?
36 Oa tihe pu anamai te Fatu,
me te koàna mai ia Īa e hiamoe aa ôtou.
37 O ta ù e peàu nei ia ôtou,
e peàu au i te tau ènata paotū : a matavaa ! »
TOMINIKA E ÙA O TE AVA TETAÌ
TETAUTINA O TE PEROFETA ITAIA 40, 1-5.9-11
1 Oia nei te teào a to ôtou Etua :
« A haamaha te uē, a haamaha te uē, e to ù mataèinaa.
2 A kōnini ta òe teào no te peàu i Ierutaremi :
Ua pao nui to īa ava memae,
ua ìò i te hooi i to īa tau mikeo.
Na te ìma o te Fatu to īa tuki haamemae,
mēìa i to īa tau hana tekateka. »
3 U taaàu te èo : « I te fenua ataha,
a haapei ôtou i te tihena o te Fatu.
I te fenua ataha, a kānea te aanui no te Etua.
4 A haapī meitaì i te tau kākaavai paotū.
A haapāàhaaha i te tau tuaivi me te tau pūkei.
A haamenia i te aanui keâkeâ.
A pepeù te ava i ùna o te tau kapua tuaivi.
5 A tahi a pupuà te kāìè o te Fatu Etua.
E ìte ai te tau ènata paotū i te mea
me io te fafa o te Etua hua haafitipona i te teào.
9 A piki òe ma ùna o te tuaivi tiketike,
e te keèe te i àve atu i te teào i Tiona.
A taaàu òe me te èo oko,
e te keèe i àve i te teào haaìte i Ierutaremi.
A teào me te èo oko : umoì e haametaù.
A faì atu io te tau pāpuafaè o te Fenua Iutea :
« Eīa to ôtou Etua.
10 Eīa te Fatu Etua e tihe nei me te mana nui.
Ua ìò te vivini ia Īa. Me Īa te tau taetae
ta Īa i koàna mai ma òto o te tōtōua.
I mua o Īa te tuki kāìè i koàna mai.
11 U tāfai Īa i to Īa naho hakatu me te ènata tiaì muto.
Na to Īa ìma e haaputuputu i te tau muto kakaiū,
me to Īa hopu ia âtou.
TARAMO 85 (84), 9ac-10, 11-12, 13-14
E te Fatu e, a haaìte mai i to Òe kāòha !
A vaièi mai i to Òe haapohoètina ! 85,8
9 E hakaòno au : E aha òa ta te Fatu e peàu ?
Oīa nei ta te Fatu Etua i peàu :
te moû no to Īa mataèinaa.
10 U tata èka to Īa haapohoè no te ènata haatià.
E noho te kāìè o te Etua io to tātou fenua.
11 U âvei te kāòha me te tiàtohu.
U honi atu honi mai te toitoi me te moû.
12 E tupu te tiàtohu me io he fenua.
E tiòhi mai te toitoi me io he àni.
13 E vaièi mai te Etua i to Īa taetae kāòha.
E hua to mātou fenua i to īa puu.
Taha te toitoi ma mua o te Fatu.
14 E haaìte hua toitoitina i te aanui.
TETAUTINA O TE HĀMANI E ÙA A PETERO ÀPOTORO
3, 8-14
E tu ù tau tunane tuehine tāhia e,
8 Oia nei e tahi teào, umoì ôtou e tūhaa.
No te Fatu, u hakatu te â e tahi me te tautini, tini èhua.
Atii hoì no te Fatu, ua tūtū te tautini,
tini èhua me te â e tahi.
9 U te e haatevee te Fatu i te haapao
i te mea ta Īa i peàu mai,
me he mea e maakau nei tahipito.
U haaòa, òa te Etua i to tātou tetaìtina,
na te mea aòè Īa i maìmaì e naò e tahi ènata.
U maìmaì Īa e fāìu te tau ènata paotū i te koekoe
no te hua i te meitaì.
10 Atià, e tihe te â o te Fatu me he ènata kamo.
I hua â, e koè ai te ataàni ma òto o te pooìna nui.
E koè ai te tau mēmau ia ôtoa, e haaèhutia âtou me te ahi.
O te fenua atii me to īa tau mēmau paotū e haapūovotia.
11 Ohia e koè ai te tau mēmau paotū o te ao nei,
a pohoè ôtou me he tau ènata e tāvini i te Etua,
e aotahi mau i ta Īa teào.
12 A tetaì ôtou, a hana i te hana meitaì
etià e tihe mai ponihoo te â o te Fatu.
I hua â, e koè ai te ataàni na te ahi uàuà,
e èhu nui te tau mēmau i pūovo.
13 Atià, vāàna i te teào a te Fatu e tetaì nei tātou
i te àni hou me te fenua hou,
i èià, e tae toitoi noa te maìmaì o te Etua.
14 E tu ù tau teina tāhia e,
mēìa e tetaì tātou i hua mea i peàutia,
a hana tātou vāàna e koàna mai i te Kirito
ôtou nui, piò koè, teka koè, e noho aa me te moû.
ALLELUIA ALLELUIA
cf. Rk.3,4.6
A haapeipei i te putatina mai o te Fatu.
A haapāàhaaha i to Īa aanui.
E ìte te ènata paotū i te haapohoètina o te Etua.
EVANERIO O IETU KIRITO VĀÀNA E MAREKO 1, 1-8
1 Te tīmatatina o te Evanerio o Ietu Kirito, Tama a te Etua.
2 Vāàna i te mea i patutia i òto te hāmani o Itaia te perofeta ;
« Eīa e pōpahi au i to ù keèe i mua o òe.
Na īa e haapei i to òe aanui.
3 I te fenua ataha u taaàu e tahi èo, pēènei :
« A haapei ôtou i te putatina mai o te Fatu.
A haapāàhaaha i to Īa aanui. »
4 Ua tihe mai Ioane i te fenua ataha
me to īa haaìte atu i te papatema
no te fāìu i te koekoe, etià e haakoètia te tau mikeo.
5 U titihe mai io īa to Iutea fenua ia ôtoa
me to Ierutaremi paotū.
U koàna ia âtou te papatema ma io īa
i òto o te vaitahe Ioritane,
e faì aa i to âtou tau mikeo.
6 Ua uhitia Ioane i te kahu huu kamerō,
e taka kii puaa to īa taka kooi.
Ua kai īa i te tau manu kakaiū me te mānini tikauè fiō.
7 U hakako Ioane i te teào me to īa peàu :
« Enā a tihe mai tītahi ma hope o au nei :
he mana keî to Īa, he mana iti to ù nei.
Aòè e hei ia oha au pii to Īa nā vaevae
no te vevete i te aho o to Īa aihū.
8 O au à, u papatema au ia ôtou me te vai,
o Īa e papatema ia ôtou i òto o te Kuhane Meitaì. »
TOMINIKA E TOÙ O TE AVA TETAÌ
TETAUTINA O TE PEROFETA ITAIA 61, 1-2a 10-11
1 I ùna o au nei te Kuhane o te Fatu Etua,
na te mea u haapeàto mai ma te paùtina me te kao tapu.
U pōpahi mai te Fatu ia ù
no te àve atu i te Teào Meitaì Hou Mai i te poì veve,
no te haaūo i te koekoe o te poì kuhane koè,
no te haaìte atu i te poì humu to âtou vevetetina,
2 no te haamevaha i te teào o te èhua o te vaièitina
ta te Etua e tuu mai.
10 U haaèkaèka tu ù kuhane i te Fatu.
Ua û i te koakoa tu ù kuhane i òto o te Etua.
Na Īa i fāfī mai me te kahu naènaè o te ènata piò koè.
Na Īa i haauhi mai me te kahu māìta o te piò koè.
U hakatu au me he āhana mātiri hou tāpītia me te heipua,
hakatu me he vehine hou tāpītia
me te tapeà puaìna me te koro.
11 Me he mea u haatupu te tuaèpo i te kākano,
me te tiò o te tau kohoe hou,
atii ta te Fatu e vaièi mai i te hakatu pohoè toitoi.
E hahitia te Etua i mua o te tau mataèinaa ia ôtoa.
HĪMENE : RUKA 1,46-48, 49-50, 53-54
Ua û i te koakoa to ù koekoe
mēìa te Etua, to ù Haapohoè. cf. It.61,10
46 A tahi a peàu Maria pēènei :
« U haatiketike tu ù kuhane i te Fatu.
47 Ua û i te koakoa tu ù koekoe io te Etua Haapohoè.
48 U tiòhi mai i to Īa pahinaèo haapāpaù.
Mamau òe, e peàu mai te tau tai ènata paotū.
49 I uē ia ù, ua hana i te hana mahaò.
Te Mana nui, o Peàto to Īa inoa.
50 I tēia tai, i tēia tai, e mau à to Īa Hakāòha,
I uē i te tau ènata e pakaihi ia Īa.
53 U haatapavaù Īa i te tau ènata mate i te one.
U titii i te poì me te taetae, kiko koè nā îìma.
54 Ua toko te Fatu ia Iraene, to Īa tāvini,
E haamaakau ana i to Īa Hakāòha nui. »
TETAUTINA O TO MUA HĀMANI I TO TETARONIKA
5,16-24
E tu ù tau tunane tuehine.
16 A koakoa anatu ôtou.
17 A pure ma te hakaēa koè.
18 A haahuaèkaèka anatu, i tēia ava, i tēia ava.
Oiana ta te Etua e maìmaì nei no ôtou,
ma òto o te Kirito Ietu.
19 Aua ôtou e haapākeka i te Kuhane Meitaì.
20 Aua ôtou e haamee i te teào a te tau perofeta.
21 A tiòhi mau, a kaituto me te māàma i te tau teào ia ôtoa.
A apuu i te mea meitaì.
22 A tiehi i te mea paotū te i haatopa i to he ìno.
23 Koù e haapeàtotia ôtou e te Etua, te tumu o te moû.
Na Īa e pāpua i to ôtou ènata tiàtohu me i te ìno,
oia hoì to ôtou kuhane, to ôtou koekoe, to ôtou tino,
e tetaì aa i te tihena o to tātou Fatu Ietu Kirito.
24 He tiàtohu te Etua te i vevaò ia ôtou :
e hana Īa vāàna i te mea i peàutia.
ALLELUIA ALLELUIA
cf. Rk.1,76 ; In.1,7
He Perofeta o te Tiketike nui,
u tihe mai Ioane no te taha i mua o te Fatu,
no te kānea i to Īa aanui, me te haatiàtohu i te Māàma.
EVANERIO O IETU KIRITO VĀÀNA E IOANE 1, 6-8.19-28
6 Ua ìtetia te ènata ta te Etua i pōpahi atu. O Ioane to īa inoa.
7 Ua tihe īa no te haatiàtohu i te Māàma,
etià e haatià te tau ènata paotū.
8 Aòè o īa te Māàma. U haatiàtohu īa i te Māàma.
Oia nei to Ioane teào haatiàtohu
i te ava me i Ierutaremi i pahitia e te tau ati Iuta,
te mou tāuà, te mou revita
no te ūi atu ia īa pēènei à : « O ai òe ? »
20 U koutee pūnana Ioane. Ua faì atu īa pēènei :
« Aòè o au nei te Kirito. »
21 Ua ūiūi hakaùa âtou ia īa : « E aha òa ? O Eria òe ? »
U peàu Ioane : « Aòè o au nei. »
Ua ūi mai âtou : « Aha o òe te Perofeta ? »
U haahua Ioane : « Aòè o au nei. »
22 Ma hope, u peàu âtou ia īa : « O ai òe ? »
Etià e àve mātou i te òno io te huaa te i pahi ia mātou.
E aha ta òe teào no òe aneiho ? »
23 U faì atu Ioane : « O au nei te èo taaàu i te fenua ataha,
vāàna te i peàutia e te perofeta. »
24 He mou fariteo te tau keèe i pahitia.
Ua ūiūi âtou iho pēènei :
« Ohia aòè o òe te Kirito, aòè o Eria, aòè he Perofeta,
e aha te piò e tuu atu òe i te papatema ? »
26 Ua hua atu Ioane : « E papatema au io he vai,
i vāvena o ôtou, enā tītahi aòè ôtou i ìte :
27 O Īa te tihe mai ma muì o au nei. Òmua atu Īa, epō au nei.
U hei koè no ù te vevete i te aho tāmau i to Īa aihū. »
28 I haapaotia hua mea nei i Petania,
ma hiva o te kaavai Ioritane,
i èià i tuu ai Ioane i te papatema.
TOMINIKA E FĀ O TE AVA TETAÌ
TETAUTINA O TE ŪA O TE HĀMANI O TAMUERA
7, 1-5 8b-12.14a.16
1 Ua noho te hakaìki Tavite i òto o to īa iho faè, i Ierutaremi.
Na te Fatu i vaièi ia īa i te noho me te moû,
ma te haahina i te tau ènata tōtōua me īa.
2 Ma tītahi â, u peàu Tavite te hakaìki i te perofeta Natano :
« A tiòhi, e noho nei au i òto o te faèkā taetae nui.
Atià, io he faèkā te Àraka o te Piimau. »
3 U haahua atu te perofeta :
« E te Hakaìki e, a hana òe vāàna i to òe maìmaì.
Me òe hoì te Fatu. »
4 Atià, i te pō anamai, u teào te Fatu me Natano
5 pēènei à : « A taha atu io tu ù tāvini o Tavite.
A peàu ia īa : « Aha o òe te ènata e haatū i tu ù faè ?
8 O au iho te i vae ia òe he ènata tiaì muto,
vāàna e haaìò ia òe
te hakaìkitina i ùna o to ù mataèinaa Iraene.
9 O au me òe i tēia taha, i tēia taha ua hee òe.
Na ù i haahina me i mua o òe
i te tau mataèinaa e tōua me òe.
E haaìò au i to òe inoa e inoa òno nui,
ma ùna aè o te tau inoa o te poì mana,
e noho aa i no he fenua.
10 Na ù e haanoho mau ia Iraene io tēnei fenua.
O īa tu ù mataèinaa ta ù i tanu io tēnei vahi.
E tuputupu īa haametaù koè.
Aòè e tihe mai hakaùa te poì mākaka e haamee ia īa
me he mea ua hana âtou,
me i te â, u haatū au i te mou hakaìki Hofetima
no te vivini i tu ù mataèinaa Iraene.
11 E vaièi au ia òe i te tau èhua moû nui.
E haahina au i te poì tōtōua me òe.
O te Fatu te i peàu ia òe : na Īa e haatū i tītahi faè no òe iho.
12 Na Īa e haatū i to ù faè.
Na ù e haamau i to Īa nohona hakaìki no te ava paona koè.
14 E ìò au he motua no īa.
E ìò īa he tama na ù.
16 O te faè o to òe ati i ùna aè, e mau anatu i mua o au.
U te e koè to òe hakaìkitina ma te tau tai anatu.
O to òe nohona hakaìki e mau ai no te ava paona koè. »
TARAMO 89 (88), 4-5,27-28,29-30
E te Etua e, io Òe aneiho te teào
e aahi atu i te pohoè anatu.
4 U peàu te Fatu :
u haatoitoi au i te Piimau me to ù tāvini.
Ma tu ù inoa, u haatiàtohu au ia Tavite, ta ù i vae.
5 E haaeke au me te haamau i to òe ati i ùna aè.
E haatū au i to òe nohona hakaìki no te tau tai anatu.
27 E peàu mai īa : « O Òe tu ù Etua, tu ù Motua.
O Òe tu ù motukeâ, tu ù Haapohoè. »
28 E haaìò au ia īa he tama hāmua na ù,
Te tiketike nui o te tau hakaìki ia ôtoa.
29 I ùna o īa e noho mau to ù kāòha, hakahae koè.
Me īa tu ù Piimau no te tau tai hakatahi.
30 E haatū au i to īa vivinitina paona koè.
E mau to īa hakaìkitina ma te tau tai anatu.
TETAUTINA O TE HĀMANI A PAURO PEÀTO I TO ROMA
16, 25-27
25 A hahi tātou i te Etua.
Na to Īa mana e tohe mau ôtou
e haatià vāàna i te Evanerio e hakako au,
me te teào o Ietu Kirito,
atii hoì vāàna i te teào hakanātia
ma te òa o te nuitina o te tai ènata tini, tini.
26 I tēnei mou â, u haaìtetia hua teào,
u haamevahatia i vāvena o te tau mataèinaa êteni paotū,
ma te hāmani o te tau perofeta,
me he mea u maìmaì te Etua ètereno,
etià e aotahi i te haatià âtou paotū hua tau êteni.
27 Ma io Ietu Kirito, a kāìètia te Etua, o Īa anaè te Māàma,
no te tau tai a tihe anatu. Amene.
ALLELUIA ALLELUIA
U apuu Maria peàto i te Teào :
« O au nei te pahinaèo a te Fatu.
A tae to Òe maìmaì ta Òe i faì mai. »
EVANERIO O IETU KIRITO VĀÀNA E RUKA 1, 26-38
I tēia mou pō,
26 U pōpahi te Etua i te anera Kapiriere
io te pāpuafaè o te Fenua Karirea, o Natareti te inoa,
27 io tītahi pāhoè virikine, tuia me te āhana,
o Ioteve te inoa, no te ati Tavite.
O Maria te inoa o te virikine.
28 Ua uu te anera i òto o to īa faè me te peàu :
« Kāòha òe pī i te karatia, me òe te Fatu. »
29 Ia òno Maria i hua teào, u emièe īa,
e kaituto aa e aha òa te hakatu o hua kāòha mai ?
30 U peàu te anera ia īa :
« Umoì òe e haametaù, e Maria e.
U koàna mai hoì ia òe te karatia io te Etua.
31 Enā e tupu òe i te tama, e fānau òe i te tamaòa.
E apa òe i to Īa inoa : o Ietu.
32 E òno nui Īa. E vevaòtia te Tama a te Tiketike Nui.
E haaìò te Fatu Etua ia Īa i te nohona hakaìki o Tavite.
33 O Īa te hakaìki o te ati o Iakopo no te tau tai anatu.
He paona koè to Īa hakaìkitina. »
U peàu Maria i te anera :
« E pēhea tenā ? Aòè au i noho me te āhana. »
35 U haahua te anera me te peàu ia īa :
« E iho mai te Kuhane Meitaì i ùna o òe ;
E fāfītia òe e te ao tapu o te Tiketike Nui.
No èià e peàto te tama : e peàutia Tama a te Etua.
36 Eīa tītahi : O Eritapeta, kui teina no òe,
ua tupu īa i te tama e aha à e uehine īa.
O te māhina e ono i tēnei no tēia i peàutia vehine mahoi.
37 Aòè he mea aòè i koàna i te Etua. »
A tahi a peàu Maria : « O au nei te pahinaèo o te Fatu.
A tae to òe hīa, ta òe i faì nei. »
U titii te anera ia Maria.
___________________________________________
NO TE OÌOÌ O TE KOÌKA NOERE
TATAUÌA O TE PEROHETA ITAIA 62, 1-5
1 I uē ia Ierutaremi, aòè au e mutu.
I uē ia Tiona, aòè e mutu to ù fafa
tihe e ìteìa to īa toitoi me he pupuà o te atauà,
e keàpa to īa hakatu me he àma pūkohe i te pō.
2 E ìte te tau mataèinaa i to òe toitoi,
e ìte te tau hakaìki i to òe kāìè.
E apa te Fatu ia òe i te inoa hou ta Īa i ìte.
3 E ìò òe me he paèkuà io te ìma o te Etua,
me he heipua kekaa io te ìma o te Fatu.
U te e vevaòtia hakaùa òe « Tāhia titii »,
aòè to òe fenua e vevaòtia « Fenua ataha ».
4 Atià, e apatia to òe inoa « Māùi ».
E apatia to òe fenua « Tu ù hoa mātiri ».
Na te mea, e haataetae te Fatu ia òe.
E ìò te Fatu me he āhana no to òe fenua.
5 Me he mea e noho te māhaì me te vehine hou,
atii e noho me òe te tuhuna i haatū ia òe.
Me he mea o te vehine mātiri hou te koakoa o ta īa āhana,
atii e haaèka òe i to òe Fatu Etua.
TARAMO 89 (88), 20ab.21, 27-28, 29-30
E te Etua e, io Òe aneiho te Tekao
e aahi atu io te pohoè anatu.
20 E te Fatu e, òmua u peàu Òe i to Òe tau hoa,
I to he moemoeā, u haaìte atu Òe ia âtou :
21 « U koàna ia ù te tāvini, o Tavite te inoa.
U paù au ia īa me te kao tapu. »
27 E peàu mai īa : « O Òe tu ù Etua, tu ù Motua.
O Òe tu ù motukeâ, tu ù Haapohuè. »
28 E haaìò au ia īa he tama hāmua no ù,
Te tiketike nui o te tau hakaìki ia ôtoa.
29 I ùka o īa, e noho mau to ù kāòha, hakahae koè.
Me īa tu ù Piimau no te tau tai hakatahi.
30 E haatū au i to īa vivinitina paona koè.
E mau to īa hakaìkitina ma te tau tai anatu.
TETAUTINA O TE HĀMANI HANA A TE TAU ÀPOTORO
13, 16-17.22-25
16
E tū aa Pauro, u hapai i te ìma me te peàu pēènei à :
« E to Iraene atii me ôtou, e te tau ènana pakaihi i te Etua,
a hakaòko mai.
17 O te Etua o tēnei mataèinaa, te Etua o Iraene,
ua vae i to tātou tau tupuna.
U haanui aè Īa i te mataèinaa oi noho âtou i te Fenua Ekipito.
Ma te mana o to Īa ìma, u haauu i vaho ia âtou.
22 I muì iho, u titii te Etua ia Tauro
me te vae ia Tavite he hakaìki no âtou.
U haameitaì te Etua ia īa e peàu aa :
« U koàna ia ù Tavite, tama a Iete,
o īa te ènana vāàna i to ù hīa, te i aotahi atu i to ù maìmaì. »
23 Me i òto o to īa ati, u haatupu te Etua
ia Ietu, te Haapohoè o Iraene.
24 Òmua atu o to Īa tihena,
u haaìte Ioane i te mataèinaa Iraene i te papatema
no te fāìu i te koekoe me te hopo i te mikeo.
25 I te paona o ta īa hana perofeta, u peàu Ioane :
« Aòè o au tēia ta ôtou i māmaakau pu nei.
Enā e tihe ai tītahi ma muì o au ;
aòè e hei ia ù te vevete i to īa aihū. »
ALLELUIA ALLELUIA
Oìoì e hikatia te mikeo io te aomāàma nei.
Oìoì e vivini te Haapohoè i te fenua.
EVANERIO O IETU KIRITO VĀÀNA E MATEO 1, 1-25
(Tetau poto 1,18-25)
1 Te hāmani matatetau o Ietu Kirito,
te tama a Tavite, te tama a Aparahamo.
2 U fānau ta Aparahamo o Itaako.
U fānau ta Itaako o Iakopo.
U fānau ta Iakopo o Iuta me to īa tau teina.
3 U fānau ta Iuta o Farete me Fara no òto o Tamara.
U fānau ta Farete o Eteroma.
U fānau ta Eteroma o Arama.
4 U fānau ta Arama o Aminatape.
U fānau ta Aminatape o Naatona.
U fānau ta Naatona o Taremone.
5 U fānau ta Taremone o Poaha no òto o Rahapa.
U fānau ta Poaha o Opete no òto o Ruta.
U fānau ta Opete o Iete.
6 U fānau ta Iete o Tavite te hakaìki.
U fānau ta Tavite o Taromona no òto o te vehine a Uria.
7 U fānau ta Taromona o Ropoama.
U fānau ta Ropoama o Apia.
U fānau ta Apia o Ata.
8 U fānau ta Ata o Iehotafa.
U fānau ta Iehotafa o Iorama.
U fānau ta Iorama o Otia.
9 U fānau ta Otia o Iotane.
U fānau ta Iotane o Akata.
U fānau ta Akata o Etekiata.
10 U fānau ta Etekiata o Manate.
U fānau ta Manate o Amona.
U fānau ta Amona o Iotia.
11 U fānau ta Iotia o Iekoniata me to īa tau teina,
i te ava o te mōèhutina io he Fenua Papironia.
12 Ma muì o te ava i te mōèhutina io te Fenua Papironia,
u fānau ta Iekoniata o Taratiere.
U fānau ta Taratiere o Toropapere.
13 U fānau ta Toropapere o Apiuta.
U fānau ta Apiuta o Eriakimi.
U fānau ta Eriakimi o Atore.
14 U fānau ta Atore o Tatoka.
U fānau ta Tatoka o Akimi.
U fānau ta Akimi o Eriuta.
15 U fānau ta Eriuta o Ereatara.
U fānau ta Ereatara o Matana.
U fānau ta Matana o Iakopo.
16 U fānau ta Iakopo o Ioteve te āhana a Maria.
me i òto o īa i fānautia ai o Ietu te i peàutia te Kirito.
17 No èià e tetautia
ònohuu ma fā tai kē me io Aparahamo tihe atu io Tavite,
ònohuu ma fā tai kē me io Tavite
tihe atu i te ava o te mōèhutina i te Fenua Papironia,
ònohuu ma fā tai kē me i te mōèhutina i Papironia
tihe atu i te Kirito.
18 Oiana te hāmani matatetau o Ietu Kirito.
Oia nei te fānauna o Ietu Kirito.
U tuia te kui o Ietu, o Maria to īa inoa,
me tītahi āhana, o Ioteve te inoa.
Ma mua to âua nohotina, u ôpū tama Maria
na te mana o te Kuhane Meitaì.
19 He ènata toitoi noa Ioteve, ta īa āhana.
Aòè īa e maìmaì e pōtoho pu ia Maria.
No èià, u kaituto īa e titii ia īa ma te ìte koè.
Ohia e auana atii Ioteve, ua ìte īa i to he moemoeā,
i te anera o te Fatu te i peàu mai :
« E Ioteve e, tama a Tavite, umoì òe e haametaù
no te apuu io to òe haè ia Maria, ta òe vehine.
U ôpū tama hoì īa na te mana o te Kuhane Meitaì.
21 E fānau īa i te tamaòa. E apa òe i to īa inoa o Ietu.
Oia hoì "Te i haapohuè i to īa mataèinaa
me i to âtou tau mikeo." »
22 Ua pao tēia tau mea paotū no te haatiàtohu
i te Teào a te Fatu i peàuìa e te perofeta, pēènei :
23 « Enā e ôpū tama te virikine. E fānau īa i te tamaòa.
E apa âtou i to īa inoa o Emanuera. »
Oia hoì ma he èo ènana « O te Etua me tātou ».
24 Ua aa Ioteve. U aotahi īa i ta te anera o te Fatu i peàu atu
me to īa apuu i ta īa vehine io to īa haè.
25 Atià, aòè Ioteve i too ia Maria tihe atu i te hānauna o te tama.
Ua apa Ioteve i to īa inoa « O Ietu ».
TE KOÌNA NOERE
PURE META TŪMOE
TETAUTINA O TE PEROFETA ITAIA 9, 1-6
1 O te mataèinaa e taha aa io te ava pōtano,
ua ìte i te tihena o te māàma pupuà nui.
I ùna o te poì e noho aa io he vao maù nui, u pupuà te àma.
2 Na Òe, e te Etua e, i haanui i te èkaèka :
me he koakoa o te ènata e kohi aa i te puu fenua,
me he koakoa o te tau kape ia tuhatia te tau taetae
o te poì hina ma òto o te tōua.
3 Me he mea ta Òe i haahina i te poì Matiana,
na Òe i fafati te âkau te i òomi i te mataèinaa,
atii te âkau tā a te vivini o te poì hana.
4 Ua èhu nui i te ahi to te tau kape aihū
te i haaneuu i te papafenua,
atii me to âtou kahu pī i te toto.
5 U vaièitia mai tītahi tama hou, e tamaòa i tuutia mai.
Te hakatu hakaìki i ùna o to Īa paufifi.
U apatia to Īa inoa : « Tuhuna mahaò. Etua mana.
Motua paona koè. Hakaìki o te moû. »
6 No èià, e neketia to Īa mana :
Aòè e pao te moû no Tavite me to Īa Patirēia.
E tū mau Īa i òto o te tiàtohu me te toitoi, i tēnei, atii anatu.
Oiana te hana kāòha ta te Fatu o te aomāàma i uē ia mātou.
TARAMO 96 (95), 1-2a, 2b-3, 11-12a, 12b-13a.c
I tēnei pō, ua fānau to tātou Haapohoè.
O Īa te Kirito te Fatu. cf. Rk. 2,11
1 A hīmene no te Fatu i te hīmene hou.
A hīmene i te Fatu te fenua vii pu.
2 A hīmene no te Fatu, a hahi i to Īa inoa.
Ma tēia â, ma tēia â,
3 A haaòno nui i to Īa haapohoètina,
A hano a faì atu i te tau mataèinaa,
I te tau ènata paotū to Īa tau hana mahaò.
11 A koakoa te àni i ùna nui.
A èkaèka te fenua ia ôtoa.
A taaàu me te pooìna te moana.
12 A haakoìna, a neue te tau tuaivi.
A haka me te koakoa te maa tumuâkau,
I te aò o te Fatu e taha mai.
13 E tihe te Fatu no te haavā i te fenua.
E toitoi, e tiàtohu to Īa haavātina.
TETAUTINA O TE HĀMANI A PAURO PEÀTO IA TITO
2, 11-14
11
U haaìtetia mai hoì te vaièitina o te Etua.
Oia te tumu e koàna i te tau ènata paotū
te pohoè te io he àni.
12 Na hua karatia e hakako mai
no te titii i te mea haapākeka i te Etua,
te òomi i to tātou hīa kāìè ènata, te pohoè io te ao nei
me te koekoe atenoho, koekoe toitoi, koekoe pure hae.
13 U hakapahi hua karatia ia tātou
no te tetaì i te tetaìtina haakoakoa.
Oia hoì te tihena me te kāìè o Ietu Kirito,
to tātou Etua tiketike me te Haapohoè.
14 U ùtunahēanatia hoì Ietu Kirito i uē ia tātou,
no te hooi i to tātou mikeo me te haataìtaì,
etià e ìò tātou to Īa mataèinaa,
poì koekoe ūo i te hana meitaì.
ALLELUIA ALLELUIA
cf. Rk. 2,10-11
Ua faì atu nei au ia ôtou i te Teào Meitaì Hou haakoakoa :
I tēnei pō, u fānautia te Haapohoè. O Īa te Kirito, te Fatu.
EVANERIO O IETU KIRITO VĀÀNA E RUKA 2, 1-14
1 I tēia mou pō, ua tihe te teào me io Ketare Aukuto.
U hakapahi īa i te tau ènata o te aomāàma vii pu
no te patu i to âtou inoa.
2 Oia te patutina inoa to mua,
i te ava ua tū Kirino he kuvenea o te Fenua Ihiria.
3 Ua hee atu te tau ènata paotū no to âtou inoa patu
io to âtou kākaavai me te pāpuafaè tumu.
4 O Ioteve, me i Natareti o te Fenua Karirea,
ua fiti i te Fenua Iutea, io te pāpuafaè o Tavite,
o Petereemi te inoa.
Ua tupu hoì Ioteve me io te ati me te huaafaè o Tavite.
5 Ua hano Ioteve i te inoa patu me Maria, ta īa vehine,
he ôpū tama ta īa.
6 Ohia i èià âua, ua tihe te ava e fānau ai Maria.
7 U fānau Maria i ta īa tama, he tama hāmua.
Ua fāfī īa me te èpa me te haamoe ia īa i to he fātene,
mēìa aòè he vahi e hei no âtou io he faè apuu manihii.
8 Enā i te fenua vii pu mou ènata tiaì muto.
Ua noho âtou io he vahi teitā, e matavaa i te pō
no te tiòhi meitaì i to âtou naho muto.
9 U haatata mai io âtou te anera o te Fatu.
U pupuà vii pu o âtou i te kāìè o te Fatu,
ua hemo âtou i te hopo nui.
10 U peàu te anera ia âtou :
« Umoì ôtou e haametaù,
na te mea u faì atu au ia ôtou
i te Teào Meitaì Hou Mai
e haakoakoa nui i te mataèinaa ia ôtoa.
11 I tēnei pō, io te pāpuafaè o Tavite, no ôtou,
u fānautia te Haapohoè. O Īa te Kirito, te Fatu.
12 Eīa tītahi mea hakatu no ôtou :
e koàna ia ôtou te tama hou,
fāfītia me te èpa, e moe aa i òto o te fātene. »
13 Enā pu anamai me te anera
te nuitina o te faètoa te io he àni, tini tini âtou,
e hahi aa i te Etua me te peàu pēènei :
14 « Te kāìè i te Etua i ùna nui.
Te moû io he fenua i te ènata poì tāhia. »
TE KOÌNA NOERE
PURE META PŌPŌUÌ
TETAUTINA O TE PEROFETA ITAIA 62, 11-12
11 Oia nei te teào ta te Fatu
e haamevaha tihe atu i te kotiana o te aomāàma, pēènei :
« A peàu i te moî a Tiona :
Enā e tihe mai te Haapohoè, e àve aa me Īa
i te tau taetae o to Īa tuàkitina ;
vii pu o Īa te tau taetae haakāìè ia Īa.
12 E apatia ôtou i te inoa hou pēènei :
« Mataèinaa tapu. Poì hokotia e te Fatu. »
E apatia òe iho :
« Vaetia e te Fatu. Pāpuafaè titii koè. »
TARAMO 97 (96) 1.6,11-12
Enā te àma haapupuà i te ènata, ua fānau te Haapohoè.
1 O te Fatu te hakaìki nui. A koakoa te fenua.
A haaèkaèka te tau motu tini, tini.
6 U haamevaha te papafenua i to Īa toitoi noa.
Ua ìte me te mahaò te tau ènata i to Īa kāìè.
11 Enā te àma haapupuà i te ènata teka koè.
Enā me te koakoa i vāvena o te poì haatià.
12 A koakoa ôtou, e te poì aotahi i te Fatu.
A haahuaèkaèka i te inoa o te Fatu Etua.
TETAUTINA O TE HĀMANI A PAURO PEÀTO IA TITO
3, 4-7
4
Atià, u haaìte mai te Etua, to tātou Haapohoè
i to Īa vaièitina me to Īa kāòha nui no te tau ènata.
5 Na Īa i haapohoè ia tātou, mēìa i to Īa hakāòha mai,
aòè no te vaièi mai i te tuki o to tātou hana meitaì,
i hanatia na tātou ta tātou anaè.
Ma te vai, u haafānau hakaùa te Etua ia tātou nei.
I òto o te Kuhane Meitaì,
u haahou Īa i to tātou hakatu pohoè.
6 Na te Etua i haaneke ma te nuitina o hua Kuhane Meitaì
i òto o tātou, ma te inoa o Ietu Kirito, to tātou Haapohoè,
7 etià, ma to Īa karatia, e ìò tātou
he tau ènata toitoi i mua o te Etua,
no te koàna mai te pohoè anatu ta tātou e tetaì mau nei.
ALLELUIA ALLELUIA
Rk.2,14
Te kāìè i te Etua i ùna nui.
Te moû io he fenua i te ènata poì tāhia.
EVANERIO O IETU KIRITO VĀÀNA E RUKA 2, 15-20
15 Ohia ua pae te tau anera me to âtou hua io he àni,
u peàu atu peàu mai te tau ènata tiaì muto,
te hoa i te hoa :
« A pau. A fifiti tātou i Petereemi no te ìtemata
i te mea i haapaotia vāàna ta te Fatu i haaìte mai. »
16 U titihe haakoi te tau ènata tiaì muto.
U koàna mai ia âtou o Maria, o Ioteve
me te tama hou e moe aa i òto o te fātene.
17 Ia ìte meitaì âtou, ua faì atu i te mea
i peàutia ia âtou i ùna o hua pōìti.
18 Ua pē i te mahaò te tau ènata paotū
te i òno i te teào o te tau ènata tiaì muto.
19 O Maria à, u haamau io he koekoe i tenā tau mea paotū
me te kaituto hae.
20 Ua hua te tau ènata tiaì muto.
U haakāìè âtou me te hahi i te Etua
no te tau mea paotū ta âtou i òno me te ìte,
vāàna i te teào i peàutia ia âtou.
PURE META OATEA
TETAUTINA O TE PEROFETA ITAIA 52, 7-10
7 Auē te mea kanahau,
ia tiòhi atu i te keèe e tohuti aa ma he tuaivi
no te haaìte atu i te ava o te moû.
Auē, te mea kanahau
ia tiòhi atu i te keèe o te Teào Meitaì Hou Mai,
e haaìte aa i te pohoè.
E tihe nei īa no te peàu i te pāpuafaè tapu :
« E hakaìki to òe Fatu Etua.
8 A òno ôtou i te èo o te poì tiaì.
Ua tani to âtou vevaòtina. E tahi taa anaè : e taaàu koakoa.
Ua ìtemata âtou i te Fatu e tihe nei i Tiona. »
9 A tātakahiti i te koakoa ôtou,
e te toena o Ierutaremi te i vāvahitia.
Na te mea, u haakoè te Fatu i te uē o to Īa mataèinaa.
Na Īa i haapohoè ia Ierutaremi.
10 U haaìte mai te Fatu i te mana Etua o to Īa ìma
i te tau mataèinaa êteni paotū.
Me i tītahi kēkē tihe toitoi i tītahi kēkē o te fenua,
e ìte âtou i te haapohoètina o to tātou Etua.
TARAMO 98 (97), 1,2-3ab, 3c-4, 5-6
Ua ìte te fenua vii pu i te Haapohoè ta te Etua i tuu mai.
cf. .98,3
1 A hīmene i te Fatu i te hīmene hou.
U mahaò hoì to Īa tau hana.
U tuàki Īa i te mea haapākeka,
Na te mana o to Īa ìma peàto nui.
2 U haaìte te Fatu i to Īa tuàkitina,
U haapupuà i to Īa toitoi i mua o te poì êteni.
3 U haamaakau te Fatu i to Īa kāòha hakahae koè
I uē i te ati o Iraene, to Īa mataèinaa.
Ua ìte te fenua vii pu i to te Etua tuàkitina
4 A hahi i te Fatu, e te fenua vii pu,
A hīmene, a haka, a haakoìna.
5 A haatani i te pū, a vānana i te Fatu,
A ùtu te pahu, a òno nui te Fatu Etua.
6 A ònotia te kitā, te pū hakahau, te pūtona.
A vānana i te Fatu, to ôtou Hakaìki.
TETAUTINA O TE HĀMANI I TO HEPEREO 1, 1-6
1 I te tai kākiu, ma io te tau perofeta,
u teào mai te Etua ma te tau pona kē, te tau pona kē,
te tau hakatu kē, te tau hakatu kē.
2 I tēnei tau â paona o te aomāàma,
u teào mai te Etua ma io tītahi Tama.
U haaìò te Etua i hua Tama te Fatu o te tau mēmau ia ôtoa ;
ma io Īa, u pēpenatia te tau aomāàma.
3 O tēnei Tama te ata tokihi i te kāìè o te Etua,
te hakatu tiàtohu èka o te Etua Motua,
e haamau aa i te aomāàma vii pu ma te mana o ta Īa teào.
Ia pao to Īa hooi i te tau mikeo,
u tānoho Īa i te ìma oko o te Etua Tiketike,
i ùna nui o te àni.
4 Ua tū Īa ma ùna aè o te tau anera paotū,
mēìa ua apatia te inoa òno nui atu i te inoa o te tau anera.
5 Aòè hoì i peàu te Etua i tītahi anera :
« O Òe tu ù Tama ; i tēnei â, u haafānau au ia Òe. »
U peàu hakaùa :
« E ìò au e Motua no Īa, o Īa nei tu ù Tama. »
6 U peàu hakaùa te Etua
i te ava u pōpahi Īa i te Hāmua io te ao nei :
« A atoratio ia Īa te tau anera o te Etua paotū. »
ALLELUIA ALLELUIA
I tēnei â, u keàpa nui te māàma o te Etua.
E te tau mataèinaa e, a mai no te atoratio atu i te Fatu !
TE TĪMATATINA O TE EVANERIO O IETU KIRITO
VĀÀNA E IOANE 1, 1-18. (1, 1-5.9-14.)
1 I te tumu te Teào. Io te Etua te Teào.
He Etua te Teào.
2 I te tumu anamai io te Etua te Teào.
3 Ma io te Teào te tau mea paotū i pēpenatia.
Umoì īa, aòè he mea i pēpenatia to te i pēpenatia.
4 I òto o te Teào te pohoè.
He māàma no te tau ènata te pohoè.
5 U pupuà te māàma io he pōtano,
u haapākeka koè ta te pōtano i te māàma.
6 Ua ìtetia te ènata ta te Etua i pōpahi mai.
O Ioane to īa inoa.
7 Ua tihe īa no te haatiàtohu i te māàma
etià e haatià te tau ènata paotū.
8 Aòè o īa te māàma. U haatiàtohu īa i te māàma.
9 Enā te māàma tiàtohu mea tūìna i te tau ènata paotū,
te i tihe mai i te ao nei.
10 Io te aomāàma te Teào, na īa i pēpena i te aomāàma :
aòè i ìte to te ao nei ia īa.
11 Ua tihe mai io to īa toitoi. Aòè to īa i apuu mai.
12 I te poì hakatahi i apuu ia īa,
ua tuu atu īa i te mana no te haaìò he tau tama a te Etua.
Oia te poì i haatià ia īa.
13 O te poì koè na te toto,
koè na te maìmaì tino, koè na te maìmaì ènata,
atià à, na te maìmaì o te Etua i fānautia ai.
14 U haaènatatia te Teào me to īa noho i vāvena o tātou.
Ua ìte tātou i to īa kāìè,
he kāìè ta te Motua i vaièi atu i ta īa Tama tootahi,
pī i te karatia me te tiàtohu.
15 U haatiàtohu Ioane ia īa, e taaàu aa pēènei :
« O Īa nei te ènata ta ù i peàu atu :
u meitaì aè ia ù te i tihe ai ma muì o au.
Na te mea òmua atu Īa, epō au nei.
16 Me io to Īa meitaì nui, u koàna mai ia tātou kōtoa te taetae,
te tau karatia ma hope o te karatia.
17 Ma io Moite, ua tuu mai te Etua i te Ture.
Ma io Ietu Kirito, ua tihe mai te karatia me te tiàtohu.
18 Aòè te ènata e tahi i ìte i te Etua.
Na te Tama tootahi, he Etua aneiho Īa, pii me te Motua,
u haaìtetia mai te Etua. »
___________________________________________
TE HUAAFAÈ MEITAÌ NO NATARETI
TETAUTINA O TE HĀMANI A MOITE PEAUTIA TENETE
15, 1-6 ; 21,1-3
1 Ia pao tēia mea paotū, u teào te Fatu Etua
me Aparahamo ma te ìtea moemoeā.
U peàu te Fatu Etua pēènei :
« Umoì e haametaù, e Aparahamo e.
O au te i pāpua ia òe. E haanui au i ta òe moni utu. »
2 U haahua Aparahamo :
« E te Fatu Etua e, e aha ta òe e tuu mai ?
Enā, e naò au tama koè. E ìò ta ù tau taetae i te huaafaè,
ia Eriehere no Tamati, tu ù tāvini hāoè. »
3 U peàu Aparahamo : « Aòè òe i tuu mai i te tama.
O te ènata kē me i to ù huaafaè, te fatu o ta ù tau taetae. »
4 A tahi a peàu te Fatu Etua pēènei à :
« Aòè e ìò i hua ènata te fatu o ta òe tau taetae,
atià o tītahi tama ta òe e fānau mai. »
5 U aahi te Fatu ia Aparahamo i vaho o to īa faèkā
me to Īa peàu pēènei :
« A tiòhi i te ataàni.
A tetau i te nuitina o te fetū, me koàna ia òe.
Atii te nuitina o to òe ati i ùna aè. »
6 U haatià Aparahamo i te Fatu Etua.
Ma èià, u haaìòtia Aparahamo
he ènata toitoi noa i mua o te Fatu Etua.
1 U haameitaì te Fatu Etua ia Tara, vāàna i to Īa teào.
2 I te ava ta te Etua i peàu atu,
u ôpū tama Tara me to īa fānau i te tamaòa
no Aparahamo, e aha à u kooūa īa.
3 Ua apa Aparahamo i ta īa tama o Itaako,
te tama fānautia me i òto o Tara.
TARAMO 105 (104) 1-2, 3-4, 5-6, 8-9
U haamaakau anatu te Fatu i to Īa Piimau. 105,8
1 A haahuaèkaèka ôtou i te Fatu. A hahi i to Īa inoa.
A haaìte i te tau mataèinaa i to Īa tau hana mana.
2 A haka, a hīmene no te haameitaì ia Īa.
A vānana i te haakakai o to Īa tau hana mahaò.
3 A haakāìètia ôtou iho mēìa he huaa no Īa ôtou.
A koakoa te tau ènata e ìmi nei i te Etua.
4 A ìmi ôtou i te Fatu me to Īa mana,
A hano mai paòpaò koè i to Īa kāòha.
5 A haamaakau ôtou i to Īa tau hana mahaò.
Umoì e tūhaa i to Īa haatoitoi i te teào.
6 Ôtou nui, e te ati o Aparahamo to Īa tāvini,
Ôtou te tau tama o Iraene, ta Īa i vae.
8 U haamaakau anatu te Fatu i to Īa Piimau,
Teào haatiàtohutia no te tau tai tini tini :
9 He teào peàutia ia Aparahamo,
Teào haatiàtohutia i uē ia Itaako.
TETAUTINA O TE HĀMANI I TO HEPEREO 11, 8.11-12.17-19
8 Mēìa i te haatià, u aotahi Aparahamo i te Etua te i vevaò ia īa.
U titii Aparahamo i to īa fenua no te hee i te fenua kē.
Oia te fenua e ìò ia īa ma tītahi â.
Ua hee hoì Aparahamo ìte koè i hea e hee atu ai.
11 Mēìa i te haatià, ua tupu Tara i te tama, e aha à e uehine īa.
U maakau hoì Tara e haapao te Etua i te mea ta Īa i peàu.
12 Ma èià, me i òto mai o te ènata, e tahi anaè, kooūa pē,
mei mate nui īa, ua tupu te ati,
nui atu i te tau fetū o te ataàni,
nui atu i te one io te hiku o te tai.
17 I te ava u haaveke me te haamōtii te Etua ia Aparahamo,
mēìa i to īa haatià, u ùtuna Aparahamo ia Itaako.
18 E aha à u peàu te Etua ia Aparahamo
e haanui i to īa ati i ùna aè me i òto o Itaako,
ua ao Aparahamo e ùtuna i ta īa òna tama e tahi anaè.
19 U kaituto hoì Aparahamo e koàna i te Etua
te haapohoè hakaùa i te poì mamate.
No èià, ua hua ta īa tama ia īa,
me he mea u pohoè hakaùa me i vāvena o te poì mamate.
ALLELUIA ALLELUIA
Ta.118, 26.27
A meitaìtia te tihe nei ma te inoa o te Fatu,
O te Etua, te Fatu, te i haapupuà mai.
EVANERIO O IETU KIRITO VĀÀNA E RUKA 2, 22-40
akoè à 2,22.39-40
22 Ia pao te mou â
i haatoitoitia e te Ture a Moite, no to âtou haataìtaìtina,
ua fiti Maria me Ioteve i Ierutaremi
me to âua àve i te tama no te ùtuna io te Fatu.
23 Ua patutia hoì i òto o te Ture a te Fatu, pēènei :
Te tama hāmua, a haapeàtotia, a ùtunatia i te Fatu.
24 U maìmaì te motua me te kui e ùtuna i te hēana,
nā manu kuku e ùa, akoè à e ùa manu māìta,
vāàna i te Ture a te Fatu.
25 Enā i Ierutaremi te ènata, o Timeone te inoa.
He ènata toitoi me te ènata pure hae.
U tetaì īa i te ava e koè ai te uēuē o Iraene.
O te Kuhane Meitaì i ùna o īa.
26 Na te Kuhane Meitaì i haaìte ia īa i te mea
aòè e mate nui īa oi ìtemata i te Kirito o te Fatu.
27 Ua tihe Timeone io he Hiero.
U aahitia e te Kuhane Meitaì.
I te ava toitoi, ua àve te motua me te kui i te pōìti Ietu,
mea ùtuna vāàna i te i peàutia e te Ture.
28 Ua too Timeone i te tama io to īa pūhāîìma.
U haameitaì īa i te Etua me te peàu :
29 « I tēnei, e te Fatu e, a ao mai
e pae me te moû to òe tāvini, vāàna i ta Òe peàu mai.
30 Ua ìtemata hoì au i to Òe haapohoètina
31 i haaheitia e Òe i mua o te tau mataèinaa paotū.
32 He àma no te haamāàma i te tau êteni.
He kāìè o Iraene, to Òe mataèinaa. »
33 Ua pī i te mahaò te motua me te kui o te tama
mēìa i te teào peàutia i ùna o Īa.
34 U haameitaì Timeone ia âua.
Ma hope o ta īa peàu ia Maria, te kui :
« Enā te tama nei, ua vaetia no te haahina me te haatū
i te nuitina o te ènata Iraene.
E ìò ai te tama me he hakatu ta te tau ènata e haapākeka.
35 O to òe kuhane aneiho e tīputaèetia me te kohetā.
Ma èià, e haaìtetia
te kaituto pūnana o te nuitina o te ènata. »
36 Enā me te vehine perofeta, o Ana te inoa.
He moî a Fanuere, no te ati Atere. He paafio oko nui.
U mātiritia : e fitu èhua to īa noho me te āhana.
37 I muì iho, he vehine pōpī : e vaù ònohuu ma fā o īa èhua.
O te Hiero to īa faè nohona, e pakaihi aa i te Etua,
me i te â, me i te pō, ma te haaone me te pure.
38 I hua ava toitoi, ua tihe īa me to īa hahi i te Etua.
U teào īa i ùna o te tama i te poì paotū
te i tetaì nei i te haapohoètina o Ierutaremi.
39 Ia haapaotia ta te ture a te Fatu i haatoitoi,
ua hua âtou i te Fenua Karirea,
io to âtou kaavai, o Natareti te inoa.
40 O te pōìti à, u keî aè, keî aè Īa. Ua oko aè Īa.
Ua pī i te māàma. I ùna o Īa te karatia o te Etua.
__________________________________________
TE KOÌNA O MARIA PEÀTO
TE KUI O TE ETUA
TETAUTINA O TE HĀMANI A MOITE PEAUTIA NŪMERA
6, 22-27
22 U peàu te Etua ia Moite :
23 « Oia nei te ponateào ta Aarone e peàu ai,
atii me to īa ati ma te tau tai i ùna aè,
no te haameitaì i te tau tama o Iraene, pēènei à :
24 A haameitaì me te tiaì meitaì te Fatu Etua ia òe.
25 A matavaièi me te haakāòha mai te Fatu Etua ia òe.
26 A tiòhi meitaì te Fatu Etua i ùna o òe.
A tuu atu ia òe i to Īa moû. »
27 Oia te hakatu e vevaòtia tu ù inoa
ma ùna o te tau tama Iraene.
O au à, e haameitaì au ia âtou.
TARAMO 67 (66), 2b.3, 5abd, 7-8b
A matavaièi mai te Fatu ia tātou, a haameitaì mai.
2 A pupuà to Īa mata i ùna o tātou nei.
3 E ìtetia to Òe aanui io te aomāàma vii pu,
To Òe haapohoètina ma te tau fenua paotū.
5 A koakoa te tau mataèinaa, a hīmene âtou.
U vivini hoì Òe i te aomāàma me te toitoi.
U haatee Òe i te tau mataèinaa ma he fenua.
7 Ua hua te fenua i to īa puu,
U haameitaì mai te Etua ia tātou.
8 A pakaihi te fenua vii pu i to īa Fatu.
TETAUTINA O TE HĀMANI A PAURO PEÀTO I TO KARATA
4, 4-7
4 Ia tihe te ava i haaheitia e te Etua,
na Īa i pahi i ta Īa iho Tama,
te i fānautia me i òto o te vehine, te i aotahi i te Ture a Moite,
5 no te haapohoè i te tau ènata aotahi ana i te Ture,
me te haaìò ia tātou paotū he tau tama a te Etua.
6 Ohia he tau tama ôtou a te Etua,
ua pahi Īa i te Kuhane Meitaì i òto o ôtou, te i taaàu nei :
« E Apa, e tu ù Motua e. »
7 Oia te tumu ua koè to òe hakatu o te ènata
haamōèhutia i te tau kuhane mana o te ao nei.
Ua ìò òe he tama a te Etua. Me he mea e tama òe,
e àva atu hoì i te tau taetae
ta te Etua i tāpae no ta Īa tau tama.
ALLELUIA ALLELUIA
cf. He.1,1-2
Òmua ìka, u teào mai te Etua ma te fafa o to Īa tau perofeta.
I tēnei mou pō, u teào te Etua me tātou ma to Īa Tama.
EVANERIO O IETU KIRITO VĀÀNA E RUKA 2, 16-21
I tēia mou pō,
16 u titihe haakoi mai te tau ènata tiaì muto.
U koàna mai ia âtou o Maria, o Ioteve
me te tama hou e moe aa i òto o te fātene.
17 Ia ìte meitaì âtou, ua faì atu i te mea
i peàutia ia âtou i ùna o hua pōìti.
18 Ua pē i te mahaò te tau ènata paotū
te i òno i te teào o te tau ènata tiaì muto.
19 O Maria à, u haamau io he koekoe i tenā tau mea paotū
me te kaituto hae.
20 Ua hua te tau ènata tiaì muto.
U haakāìè âtou me te hahi i te Etua
no te tau mea paotū ta âtou i òno me ta âtou i ìte,
vāàna i te teào i peàutia ia âtou.
21 Ia pao e vaù â, ua tihe te ava no te pātehe i te pōìti.
U apatia te inoa o Ietu, vāàna i ta te anera i peàu
ma mua atu i to Īa tuputina.
____________________________________________________
TOMINIKA E ÙA
MA MUÌ O TE KOÌNA NOERE
TETAUTINA O TE HĀMANI A PENETIRA 24, 1-2 8-12
1 Ua hahi te Māàma ia īa iho.
I vāvena ahau o to īa mataèinaa,
to īa haatiketike i te aò o te Etua mana nui,
2 i vāvena o te mataèinaa o te Etua Tiketike : u teào īa.
I mua o te Mana Nui, u haakāìè īa.
8 U teào mai te Etua te i kānea i te tau mēmau ia ôtoa.
O te Etua te i pēpena mai, u peàu i hea te nohona
ta Īa i vae no ù. Pēènei :
« A noho òe i vāvena o te tau tama a Iakopo.
Enā to òe hope taetae i te fenua o Iraene. »
9 I te tumu anamai o te aomāàma nei, òmua naoti,
u pēpena te Etua ia ù.
E tū mau au ma te tau tai a tihe anatu.
10 I òto o te taha tapu, i te aò o te Etua,
u tāvini au ma te haahuaèkaèka.
I te tuaivi Tiona to ù èkatina.
11 I Ierutaremi tu ù noho mau.
U vivini au me te mana i te pāpuafaè tapu.
12 Ua vae au me to ù haatupu i to ù aka io te mataèinaa kāìèa,
te hope taetae ta te Etua i tāpae no Īa,
i vāvena ahau o te motuhaka poì peàto.
TARAMO 147 (147B), 12-13, 14-15, 19-20
U haaènatatia te Teào me to Īa noho i vāvena o tātou.
In.1,14
12 A haakāìè i te Fatu, e Ierutaremi e.
A hahi i to òe Etua, e Tiona e.
13 U haamau Īa i te tau katina o to òe faè.
U haameitaì Īa i ta òe tau tama me te huaafaè.
14 U vaièi Īa i te moû io to òe fenua vii pu.
U tāfai haamaòna ia òe me te faraoa mōmona.
15 U pōpahi te Fatu i to Īa keèe i te fenua vii pu.
Ma te haakoi, u mevaha to Īa teào hou.
19 U haaìte te Fatu i to Īa teào ia Iakopo.
Ua faì i to Īa maìmaì me te Ture ia Iraene.
20 I hea te mataèinaa ta te Etua i haataetae atu ?
Aòè te fenua kē i ìte i to te Etua maìmaì.
TETAUTINA O TE HĀMANI A PAURO PEÀTO I TO EFETIA
1, 3-6 15-18
3
A haameitaìtia te Etua
me te Motua o to tātou Fatu, Ietu Kirito.
Io he àni, i òto o te Kirito, u haameitaì hoì te Etua ia tātou,
ma te haapī mai me te taetae kuhane.
4 Òmua naoti, ma mua to Īa pēpena i te ao nei,
ua vae te Etua ia tātou i òto o te Kirito,
etià e peàto, teka koè tātou i to Īa aò,
e pohoè ana i òto o te kāòha.
5 Ma mua o te pēpena, mēìa i to Īa vaièi anamai,
ua vae te Etua ia tātou, na Īa ta Īa anaè,
etià e ìò tātou he tau tama no Īa, ma io Ietu Kirito.
6 A hahitia te Etua, no to Īa karatia mahaò,
ta Īa i vaièi mai ia tātou, i òto o to Īa Tama tāhia.
15 No èià, me i te ava ua ìte au i to ôtou haatià i te Fatu Ietu,
to ôtou kāòha i te mataèinaa peàto o te Etua,
16 u haahuaèkaèka au mēìa ia ôtou,
e haamaakau ana ia ôtou i òto o ta ù pure.
17 Na te Etua o to tātou Fatu Ietu Kirito,
te Etua Motua o te kāìè nui io he àni,
e vaièi mai i te Kuhane haamāàma ia ôtou,
no te ìte ma te tiàtohu o ai te Etua.
18 Na te Etua e haapuàha i to ôtou koekoe
ma te haavivini i te mea nei : E aha te taetae
ta tātou e tetaì nei mēìa u vevaò mai te Etua ?
E aha te kāìè nui tāpaetia e te Etua no to Īa mataèinaa ?
ALLELUIA ALLELUIA
cf. .1 Tm.3,16
A hahitia Òe, e Ietu Kirito e, te i haaìtetia me te hakatu ènata, te i haaònonuitia i vāvena o te tau mataèinaa,
A hahitia òe !
EVANERIO O IETU KIRITO VĀÀNA E IOANE 1, 1-18
Akoè à 1, 1-5.9-14
1 I te tumu te Teào. Io te Etua te Teào.
2 He Etua te Teào.
I te tumu anamai io te Etua te Teào.
3 Ma io te Teào te tau mea paotū i pēpenatia.
Umoì īa, aòè he mea i pēpenatia to te i pēpenatia.
4 I òto o te Teào te pohoè.
He māàma no te tau ènata te pohoè.
5 U pupuà te māàma io he pōtano,
u haapākeka koè ta te pōtano i te māàma.
6 Ua ìtetia te ènata ta te Etua i pōpahi mai.
O Ioane to īa inoa.
7 Ua tihe īa no te haatiàtohu i te māàma,
etià e haatià te tau ènata paotū.
8 Aòè īa te māàma. U haatiàtohu īa i te māàma.
9 Enā te māàma tiàtohu mea tūìna i te tau ènata paotū
te i tihe mai i te ao nei.
10 Io te aomāàma te Teào, na īa i pēpena i te aomāàma :
aòè to te ao nei i ìte ia īa.
11 Ua tihe mai io to īa toitoi. Aòè to īa i apuu mai.
12 I te poì hakatahi i apuu ia īa,
ua tuu atu īa i te mana no te haaìò he tau tama a te Etua.
Oia te poì i haatià ia īa.
13 O te poì koè na te toto,
koè na te maìmaì tino, koè na te maìmaì ènata,
atià à na te maìmaì o te Etua i fānautia ai.
14 U haaènatatia te Teào me to īa noho i vāvena o tātou.
Ua ìte tātou i to īa kāìè,
he kāìè ta te Motua i vaièi atu i ta Īa Tama tootahi,
pī i te karatia me te tiàtohu.
15 U haatiàtohu Ioane ia Īa, e taaàu aa pēènei :
« O Īa nei te ènata ta ù i peàu atu :
u meitaì aè ia ù te i tihe ai ma muì o au.
Na te mea òmua atu Īa, epō au nei.
16 Me io to Īa meitaì nui, u koàna mai ia tātou kōtoa te taetae,
te tau karatia ma hope o te karatia.
17 Ma io Moite, ua tuu mai te Etua i te Ture.
Ma io Ietu Kirito, ua tihe mai te karatia me te tiàtohu.
18 Aòè te ènata e tahi i ìte i te Etua.
O te Tama tootahi, he Etua aneiho Īa, pii me te Motua,
u haaìtetia mai te Etua. »
___________________________________________
TE KOÌNA EPIFANIA
TETAUTINA O TE HĀMANI O TE PEROFETA ITAIA 60, 1-6
1 A maô, e Ierutaremi e. A pupuà.
Ua tihe mai te àma no te haakeàpa ia òe.
Ua fāfī te kāìè o te Etua ia òe.
2 A tiòhi atu. Ua pō pōtano te fenua vii pu.
Io te vao maù nui, ua noho te tau mataèinaa.
Atià, ua tū te Fatu. E pupuà nei to Īa kāìè i ùna o òe.
3 E haatata mai te tau mataèinaa io to òe māàma.
E tataha mai te tau hakaìki io to òe atauà.
4 A feau. A tiòhi matiòka vii pu o òe.
E hakātahi mai âtou nui. E titihe nei âtou paotū.
Ua tihe mai nei ta òe tau tama me i te fenua memao.
Ua hua mai ta òe tau moî, e tautuatia âtou.
5 I hua ava e ìte òe, e èkaèka nui òe.
E ù to òe koekoe pī i te koakoa.
E tihe ai io òe te tau taetae me i te fenua memao.
E haapuketia io òe te tau hāìna kē
me io te tau mataèinaa o te aomāàma vii pu.
6 E fifiti mai io òe te tau naho kamerō
o te Fenua Matiana me te Fenua Efa.
E titihe mai io òe te poì Hapa àve aa i to âtou
moni kiki me te mēmau kekaa.
E hahi âtou me te haakāìè i te Fatu Etua.
TARAMO 72 (71), 1-2, 7-8, 10ab.11, 12-13
E ìtetia to Òe haapohoè mai, e te Fatu e,
e te tau fenua me te tau mataèinaa paotū. cf. 72,11
E te Etua e, a tuu i to Òe mana i te hakaìki.
A tuu i to Òe toitoi i te tama o te hakaìki.
2 A vivini īa i to Òe mataèinaa vāàna i te toitoi.
A apuu īa me te toko i te poì veve e uēuē aa.
7 I hua tau â, e pupuà te hakatu pohoè vāàna i te toitoi,
I te fenua, e puàha te moû ma te nuitina o te tau māhina.
8 A vivini te hakaìki me io te tai tihe atu i te tai,
Me io te kaavai tihe atu i te kotiana o te fenua.
10 Te hakaìki o te Fenua Tarati, o te tau motu
E àve mai i te vaetukia me te taetae kāòha.
11 E moe haatona i mua o īa paotū te tau hakaìki.
E tāvini no īa te tau fenua me te tau mataèinaa.
12 E haapohoè īa i te ènata veve e vevaò ia īa,
E toko īa i te poì oomitia e te àì.
13 E apuu īa i te ènata pōtano, mātua avai noa.
E tiòhi meitaì īa i ùna o te poì tupe noa.
TETAUTINA O TE HĀMANI A PAURO PEÀTO I TO EFETIA
3, 2-3a.5-6
E tu ù tau tunane tuehine,
2 Ua òno hoì ôtou pēhea mēìa i to Īa vaièi,
ua tuu mai te Etua i te karatia no te hana i uē ia ôtou.
3 Ma òto o te faìtina me io te Kuhane Meitaì,
u haaìte mai te Etua i to Īa maìmaì pūnana.
5 I te tau tai tehito,
aòè te tau ènata i ìte i hua maìmaì pūnana.
Atià, i tēnei, ua faìtia atu e te Kuhane Meitaì
i te tau Àpotoro o te Etua me te tau perofeta, pēènei :
6 U koàna mai i te tau êteni te tau taetae kuhane,
peàutia òmua, hua mea aneiho me to te tau ati Iuta.
O âtou nui me he tau mēmau o te Tino e tahi.
Ia âtou, te poì êteni tūtaì me te tau ati Iuta,
te taetae vaièitia i òto o te Kirito Ietu.
Oia hoì te tau puu o te Evanerio.
ALLELUIA ALLELUIA
cf. Mt.2,2
Ua ìte mātou i to Īa fetū.
Ua tihe mātou no te atoratio i te Fatu.
EVANERIO O IETU KIRITO VĀÀNA E MATEO 2, 1-12
1 U fānautia Ietu i te kaavai Petereemi o te Fenua Iutea,
i te ava o Herote te hakaìki o hua fenua.
I hua mou â, u titihe mai i Ierutaremi, te mou Mākoi
me io te fenua o te kēkē tihena òumati.
2 U peàu âtou :
« I hea te hakaìki nui o te tau ati Iuta te i fānau i tēnei tau pō ?
Ua ìte hoì mātou i to Īa fetū
io he fenua o te kēkē tihena òumati.
Ua tihe mātou no te moe haatona i to Īa aò. »
3 Ia òno te hakaìki Herote i hua teào, u emièe,
atii me to Ierutaremi ia ôtoa.
4 U haaputuputu mai īa i te tau tāuà nui paotū
me te tau tuhuna teào o te mataèinaa.
Ua ūi atu Herote ia âtou :
« I te taha hea e fānau ai te Kirito ? »
5 U peàu âtou ia īa :
« I Petereemi io te Fenua Iutea,
vāàna i te mea i patutia e te perofeta :
6 « O òe, e Petereemi o te Fenua Iutea e,
aòè hoì òe he kaavai iti noa i te Fenua Iutea !
Na te mea me io òe e tū ai te Hakaìki,
te Tiaì meitaì o Iraene, to ù mataèinaa. »
7 Ma te teào pūnana, u vevaò mai Herote i te tau Mākoi
me to īa ape ia âtou no te haavivini mai toitoi
inehea i pupuà ai te fetū.
8 U pōpahi Herote ia âtou i Petereemi.
U peàu ia âtou pēènei : « A hee atu ôtou.
A ìmi mamate i te teào i ùna o hua Tama hou.
Me koàna ia ôtou te teào, a faì mai ponihoo,
etià e hee me au e pakaihi ia Īa. »
9 U aotahi âtou i te hakaìki me to âtou tataha atu.
Enā te fetū ta te tau Mākoi i ìte òmua io te fenua
o te kēkē tihena òumati, u pupuà i mua o âtou
me te tau io te taha i èià te Tama hou.
10 E ìte aa i te fetū, u koakoa nui te tau Mākoi.
11 Ua uu âtou i òto o te faè me to âtou ìte
i te Tama hou me Maria, to Īa òna kui.
U momoe haatona âtou i to Īa aò.
E too aa i to âtou taetae, u ùtuna i te vaetukia :
te moni kiki, te èpau kekaa, te mira.
12 Ma òto o te hiamoe, u haaìtetia i te tau Mākoi,
umoì âtou e hua io te hakaìki Herote.
Ua hua hoì âtou i to âtou fenua ma he aanui kē.
______________________________________________________
TE KOÌNA O TE PAPATEMA O IETU
TETAUTINA O TE PEROFETA ITAIA 55, 1-11
1 Oia nei te Teào a te Fatu Etua :
Me mate ôtou i te paka vai ? A mai ! A inu !
Me moni koè ôtou ? A hoko pu ! A kai !
A inu i te vino, i te vaiū !
2 Umoì e haapao pu i ta ôtou moni hana
no te kai i te înaì haamaòna koè.
3 A hakaòno mai ! E maòna ôtou i te înaì mōmona.
A hakaòno mai ! Mave mai ! E pohoè meitaì ôtou.
E haatoitoi au me ôtou i te Piimau paona koè.
E ìò hoì ia ôtou te taetae a Tavite.
4 Ua haamau au ia īa he ènata no ù i vāvena o te tau mataèinaa,
te aahi, te vivini o te tau ati.
5 O òe à, e vevaò òe i tītahi ati aòè òe i ìte ;
e tihe mai io òe tītahi ati kē mēìa i to òe Fatu Etua,
te Peàto nui o Iraene te i haakāìè ia òe.
6 A ìmi ôtou i te Etua, oia te ava e âvei me Īa.
I te ava nei, a pure ôtou i te Etua, u tata èka me ôtou.
7 A hua mai te ènata mākaka me io to īa aanui hukaka.
A titii te ènata ìno i to īa maakau pē.
A hua io te Etua te i hakāòha mai ia īa.
8 He mea kē hoì te maìmaì o te Etua, mea kē to te tau ènata.
He mea kē te hakatu o te Etua, mea kē to te tau ènata.
9 Atii te tiketike o te àni ma ùna o te fenua,
atii te hōhonu atu o te maakau o te Etua
ma ùna o te maakau ènata.
10 Ia topa te ūa me te nive me io he àni,
haakutaù âtou me te haatapavaù i te fenua.
U haatupu âtou i te teitā me te haahua i te puu
no te tāfai i te tau ènata me te tau manu e kai aa.
11 Atii hoì te teào ta ù i haaìte atu :
E hana tēia teào i te hana ta ù i maìmaì.
U te e hua io ù ta ù teào puu koè.
HĪMENE : ITAIA 12, 2, 4b-e, 5b-6
E tātakahiti ana ôtou me te koakoa,
E kapu i te vai me io te punavai pohoè. 12,3
2 O te Fatu Etua tu ù Haapohoè.
U haatià nei au, haametaù koè.
O te Fatu Etua tu ù ìi. E hīmene au ia Īa.
Io te Fatu te tumu o to ù pohoè.
4 I hua â, e haahuaèkaèka ana i te Fatu, e peàu ôtou :
« A faì atu io te poì êteni i to Īa tau hana mana. »
A haaìte atu : he Tiketike to Īa inoa.
5 Ua hana hoì te Fatu i te hana mahaò.
U mevaha to Īa òno nui ma nā fenua vii pu.
6 E Tiona e, a èkaèka, a taaàu i te koakoa !
U titike te Fatu Etua i vāvena o ôtou.
O Īa te Peàto nui o Iraene.
TETAUTINA O TO MUA HĀMANI A IOANE ÀPOTORO 5, 1-6
1 O te ènata i haatià o Ietu te Kirito,
u fānautia me io te Etua.
Me kāòha te ènata i te Motua,
u kāòha hoì i ta Īa tau tama.
2 Pēènei to tātou ìte u kāòha tātou i te tau tama a te Etua :
a kāòha tātou i te Etua, a aotahi atu i ta Īa teào.
3 Na te mea, hua mea aneiho te kāòha i te Etua
me te aotahi atu i ta Īa tau teào.
Mea hana māeà te aotahi i te Teào a te Etua,
4 na te mea, u tuàkitia to te ao nei e te tau tama a te Etua.
5 Ma te haatià, u tuàki tātou i to te ao nei.
Na ai i tuàki i te ao nei ?
O te ènata e haatià o Ietu te Tama a te Etua.
6 O hua Ietu Kirito te i tihe me te vai me te toto,
aòè me te vai anaè, atià me te vai me te toto.
O te Kuhane te i haatiàtohu ia Ietu Kirito.
O te Kuhane hoì te Tiàtohu.
ALLELUIA ALLELUIA
cf.Mt.3,16-17 ; Ta.29,3
I tēnei â, u pepeùtia te àni,
ua iho mai te Kuhane i ùna o Ietu,
ua ònotia te èo o te Motua :
« O Īa nei tu ù Tama tāhia. »
EVANERIO O IETU KIRITO VĀÀNA E MAREKO 1, 7-11
I tēia mou pō,
7 u hakako Ioane i te teào me to īa peàu :
« Enā a tihe mai tītahi ma hope o au nei :
he mana keî atu to Īa, he mana iti to ù nei.
Aòè e hei ia oha au pii to Īa nā vaevae
no te vevete i te aho o to Īa aihū.
8 O au à, u papatema au ia ôtou me te vai,
o Īa e papatema ia ôtou i òto o te Kuhane Meitaì. »
9 I tēia mou pō, ua hee Ietu
me io te pāpuafaè Natareti i te Fenua Karirea.
I òto o te vaitahe Ioritane,
u koàna mai ia Īa te papatema ma io Ioane.
10 I te ava ua fiti Ietu me i òto o te vai,
ua ìte anamai Īa i te ataàni e vahi aa me te pepeù.
Me he manu māìta, ua iho mai te Kuhane Meitaì i ùna o Īa.
11 U pohā te èo me io he àni, pēènei :
« O Òe tu ù Tama tāhia.
Io Òe te tiàtohu o to ù kāòha. »
PŌ E TOÙ TE KOÌNA ÈHUAHI
TETAUTINA O TE HĀMANI A TE PEROFETA IOERE 2, 12-18
12 Oia nei te Teào a te Fatu Etua.
A hua mai ôtou io ù me te koekoe tiàtohu,
ma òto o te haaone, te vaimata me te kahu uē.
13 Aua e veti i te kahu.
A fāìu i to ôtou koekoe me te hua io to ôtou Etua.
He moû, he hakāòha nui te Fatu,
u haatevee i te peê, ua pī nui i te uē,
U haatūhaa Īa i te tuki pē.
14 O ai te i ìte ? E hua ùanei Īa me te moû
no te haakoè i te umu, me te haapī ia ôtou i to Īa vaièi mai.
E koàna ia ôtou te ùtuna atu i te hēana
io te Fatu, to ôtou Etua.
15 A haatani i te pū, e Ierutaremi e.
A haaìte i te ava haaone tapu.
A haapei i te koìna pure. A putuputu te motuhaka peàto.
A hakātahi mai i te papa hakaìki me i te tau tuhuna.
A muimui mai te mataèinaa.
A haaputuputu mai te tau tama hou me te tau tōìki.
16 A uu i vaho me io he faè te āhana hou,
i vaho me io to īa pāòto te vehine hou.
A tomo io he faèpure te tau tāuà, tāvini o te Etua.
A pure âtou, a hīmene i te hīmene uē e peàu aa :
« E te Fatu e, a hakāòha mai i to Òe mataèinaa.
17 Aua Òe e ao i te poì êteni
te i haamee me te māio i to òe mataèinaa.
No te aha e peàu âtou : « I hea to âtou Etua ? »
18 A tahi a tāvaè te Fatu me te hakāòha i to Īa mataèinaa.
TARAMO 51 (50), 3-4, 5-6ab, 12-13, 14.17
E te Etua e, a hakāòha mai, mēìa i to mātou mikeo.
cf. Ta. 51,3
3 E te Etua e, a hakāòha mai.
Mēìa i te nuitina o to Òe uē,
4 A hooi mai me i to ù mikeo.
A haamā i tu ù koekoe pē.
5 Ua ìte au i to ù mikeo.
U maakau anatu au i to ù piò.
6 Ua teka au io Òe aneiho,
I to Òe aò, ua hana au i te mea pē.
12 A pēpena i òto o au nei i te koekoe taìtaì.
A haahou i to ù kuhane, a haamau i to īa meitaì.
13 Umoì e titii atu ia ù memao me io Òe.
Umoì e taki me i òto o au i to òe Kuhane Meitaì.
14 A haakoakoa ia ù to Òe haapohoè mai.
A haamau i te èkaèka io to ù koekoe.
17 E te Fatu, tu ù Etua e, a pepeù i to ù kiinutu,
A tahi a hahi to ù fafa i to Òe kāìè.
TETAUTINA O TE HĀMANI E ÙA I TO KORINETIA 5, 20-6, 2
E tu ù tau tunane tuehine,
20 Ua ìò mātou he tau keèe no te Kirito.
O te Etua iho te i oonaì ia ôtou ma òto o to mātou fafa.
I te inoa o te Kirito, u toutaki mātou ia ôtou :
a ao ôtou e haaâvei te Etua ia ôtou me Īa.
21 Ua piò koè, mikeo koè te Kirito.
Atià, i uē ia tātou, u haatopa te Etua i ùna o te Kirito
i te tuki pē o te mikeo.
Ma èià, i òto o te Kirito, u toitoi mātou nei i mua o te Etua.
6,1 Ohia ua hana mātou me he mou tautua o te Etua,
u toutaki mātou : « Umoì ôtou e avai pu anaè
i te karatia ta te Etua i vaièi mai.
2 Ua patutia hoì ma òto o te Hāmani tapu :
« I te ava e hei, e fati au i to òe hīa ;
i te â haapohoè, e toko au ia òe.
Oia nei te ava e hei, oia hoì te â o te haapohoè. »
TE HĪMENE VĀNANA
Mt. 4,17
U peàu te Fatu : « A fāìu i to ôtou koekoe,
u tata èka te Patirēia o te Etua. »
EVANERIO O IETU KIRITO VĀÀNA E MATEO 6, 1-6.16-18
I tēia mou pō, ohia u putuputu mai te tau kouâ
i ùna o te tuaivi vii pu o Ietu, u peàu ia âtou pēènei :
1 « Umoì e aotahi ôtou i to te Etua maìmaì,
i te ava enā te tau ènata
e tiòhi ia ôtou me te haakāìè mai.
Me hana ôtou atii, e koè ai to ôtou tuki
me io to ôtou Motua te io he àni.
2 Ia vaièi atu òe i te taetae kāòha,
umoì e hana òe me he mea ta te poì koekoe e ùa
te i haatani i te pū i òto o te tinakoka, i no he tohua,
etià e haakāìè te tau ènata ia âtou.
Ma te tiàtohu to ù peàu ia ôtou, u koàna mai ia âtou te tuki.
3 Ia vaièi atu òe i te taetae kāòha,
aua e ìte to òe ìma aèaè e aha ta te ìma oko i tuu.
4 Ma èià, e hana pūnana to òe vaièitina.
Na to òe Motua te ìte i te mea pūnana,
e haahua mai ia òe. »
5 I te ava e pure ôtou,
aua e hana hakatu me te poì koekoe e ùa.
U koakoa âtou e pure tū aa i òto o te tau tinakoka,
akoè à, io te tau tohua, etià e ìte te tau ènata ia âtou.
Ma te tiàtohu to ù peàu ia ôtou : u koàna mai ia âtou te tuki.
6 O òe, i te ava e hano òe i te pure,
a uu i òto o te pāòto pūnana o te faè, a pā te avaputa,
a pure io to òe Motua te i noho io he taha pūnana.
Na to òe Motua te ìte i te mea pūnana,
e haahua mai ia òe.
16 Me haaone ôtou,
umoì e haaìò i to ôtou mata me he mata uē,
hakatu me te tau ènata koekoe e ùa te i haakē i te mata,
etià e mata haaone to âtou i mua o te tau ènata.
Ma te tiàtohu to ù peàu ia ôtou : u koàna mai ia âtou te tuki.
17 O òe â, me haaone òe, a paù i to òe upoo
me te kao kekaa, a hooi i to òe mata,
18 etià u te e ìte te tau ènata e haaone nei òe.
E ìte anaè to òe Motua te i noho io he taha pūnana.
Na to òe Motua te ìte i te mea pūnana,
e haahua mai ia òe. »
___________________________________________TE TOMINIKA TO MUA O TE AVA HAAONE
TETAUTINA O TE HĀMANI A MOITE PEAUTIA TENETE
9,8-15
Ma hope o te vaiā nui,
8 u peàu te Fatu Etua ia Noa me ta īa tau tama, pēènei :
9 « Enā to ù Piimau me ôtou, atii me to ôtou ati i ùna aè,
10 te tau mēmau pohoè paotū vii pu o ôtou ana :
te tau manu e ona nei ma he ataàni,
te tau puaa vaè me te tau puaa fiō,
te tau ànimara paotū te i uu i vaho o te Àraka
no te haapī hakaùa i te fenua.
11 Oia nei te Piimau e haatoitoi au me ôtou :
Aòè e tahi mēmau pohoè e haamatetia hakaùa e te vaiā nui.
Aòè e vaiā nui hakaùa no te haanaò i te fenua. »
12 U peàu atu te Fatu Etua :
« Eīa te hakatu no te haamaakau i te Piimau
e haatoitoi au me ôtou
atii me te tau mēmau pohoè vii pu o ôtou ana,
no te tau tai ènata a tihe anatu.
13 E tauèva au i to ù anuanua io he ataàni,
i vāvena ahau o te kohu.
I èià, e ìtetia te hakatu o to ù Piimau me te fenua.
14 Ohia e haamuimui mai au i te tau kohu i ùna o te fenua,
me ìtetia te anuanua i vāvena ahau o âtou,
e haamaakau au i to ù Piimau me ôtou,
atii me te tau mēmau pohoè paotū.
15 Aòè te tau vai e ìò hakaùa he vaiā nui
no te haanaò i te mēmau pohoè.
TARAMO 25 (24), 4-5b, 6-7, 8-9
E te Fatu e, he kāòha me te tiàtohu to Òe aanui,
no te ènata e aotahi atu i to Òe Piimau. cf. 25,10
4 E te Fatu e, a haaìte mai i to Òe maìmaì.
O Òe iho, a hakako mai i to Òe tau aanui.
5 A haatee mai to Òe tiàtohu : a haamāàma mai.
O Òe hoì te Etua e haapohoè ia ù.
6 E te Fatu e, a haamaakau i to Òe uē,
Me i kiu mai to Òe kāòha te i noho mau.
7 A tūhaa i te tau tekateka o to ù houtina,
Umoì e titii atu ia ù nei : a haamaakau mai.
8 U meitaì, u toitoi anaè te Fatu
Te i haaìte i te aanui i te poì hukaka.
9 U aahi to Īa toitoi i te poì haapāpaù,
U hakako i to Īa maìmaì i te ènata kāìè koè.
TETAUTINA O TO MUA HĀMANI A PETERO PEÀTO 3, 18-22
E te tau tunane tuehine.
18 Ua mate nui hoì Ietu Kirito mēìa i te tau mikeo o te ènata.
U memae Īa i te matena e tahi anaè,
ua àva no te tau tai anatu.
Ua mate te ènata toitoi noa i uē i te poì toitoi koè
no te aahi ia tātou io te Etua.
U haamate te tau ènata i to te Kirito tino,
u haatū hakaùa te Etua ia Īa vāàna i te Kuhane.
19 I hua ava, ua hee Ietu no te àve i te Teào hou
io te tau kuhane humutia i Havaiki.
20 O âtou te poì pūtuì i haatevee ai te Etua i to Īa peê,
u kānea Noa i te Àraka.
I ùna o hua Àraka, u haapohoètia te mou ènata,
toovaù âtou, mēìa ua àna âtou io he vai.
21 Ua ìò hua haapohoètina i òto o te vai,
te hakatu o te papatema te i haapohoè ia tātou.
U te e hooi te papatema i te èpo me io he tino,
he pure vevaò io te Fatu Etua hua papatema
no te koàna mai i te koekoe toitoi noa,
ma te mana o te Tūhakaùatina o Ietu Kirito.
22 U tānoho hoì Ietu io he àni, i te ìma òko o te Etua,
e vivini aa i te tau anera, te tau hakaìki anera,
atii me te tau kuhane mana ia ôtoa.
HĪMENE VĀNANA :
He tiàtohu nui to Òe teào,
Aòè e pohoè te ènata i te faraoa anaè,
atià i te teào paotū me io te fafa o te Etua.
EVANERIO O IETU KIRITO VĀÀNA E MAREKO 1, 12-15
I tēia mou pō,
u aahi ponihoo te Kuhane Meitaì ia Ietu i te fenua ataha.
13 Ua noho Ietu i te fenua ataha e fā ònohuu â,
u haamōtiitia e Tatane.
I vāvena o te tau puaa fiō to Īa èkatina.
U tāvini te tau anera ia Īa.
14 Ma hope u haaìòtia Ioane, ua fiti Ietu i te Fenua Karirea.
U haaìte atu Īa i te Teào Meitaì Hou Mai me io te Etua.
15 U peàu Īa pēènei :
« Ua pao te ava i haaheitia.
U tata èka te Patirēia o te Etua.
A fāìu ôtou i te koekoe.
A haatià i te Teào Meitaì Hou Mai ! »
TOMINIKA E ÙA O TE AVA HAAONE
TETAUTINA O TE HĀMANI A MOITE PEÀUTIA TENETE
22, 1-2.9a.10-13.15-18
1 U haahiiveke te Etua ia Aparahamo
me te peàu ia īa : « E Aparahamo e ! »
U haahua atu īa : « Eīa au nei. »
2 U peàu te Etua :
« A too i ta òe tama, te tamaòa tootahi,
te tama ta òe e haataetae nei, o Itaako.
A hee atu io te Fenua Moria ; i èià, a ùtuna mai ia īa,
i ùna o te tuaivi e haaìte atu au ia òe. »
9 I te ava ua tihe âua i te taha i peàutia e te Etua,
10 u hapai Aparahamo i te ìma,
ua too i te kohe no te kukumi i ta īa tama.
11 A tahi a vevaò te anera o te Fatu Etua me io he àni
me te peàu : « E Aparahamo, Aparahamo e ! »
U haahua atu īa : « Eīa au nei. »
12 U peàu te anera : « Umoì òe e tā i te māhaì.
Umoì òe e haamemae ia īa.
Ua ìte au i tēnei i te mea u pakaihi òe i te Etua.
Aòè hoì òe i kaikino mai i te tama, ta òe tama tootahi. »
13 A tahi a feau Aparahamo me to īa ìte i te koimaa keukeu
te i hiiveke io he maateitā keoho.
Ua hano īa i te keukeu too mai,
me to īa ùtuna atu mea hēana i te ava o ta īa tama.
Ua apa Aparahamo i hua taha : « Ua ìte te Fatu Etua. »
15 Na te anera o te Fatu Etua me io he àni
i vevaò hakaùa ia Aparahamo me te peàu :
16 « He teào a te Fatu Etua.
E haatiàtohu au ma to ù iho inoa :
mēìa u aotahi mai, aòè i kaikino òe i te tama,
ta òe tama tootahi, e haameitaì me te vaièi nui au ia òe.
17 E haanui au tini tini i to òe ati i ùna aè,
me he nui o te tau fetū io he ataàni,
me he nui o te one i te hiku o te tai.
E haahina âtou i te pākeâ me te mounatōua
o te mataèinaa e ahi me âtou.
18 Mēìa u aotahi mai òe,
e haameitaì atu haameitaì mai te tau mataèinaa paotū
ma te vevaò mai i to òe inoa. »
TARAMO 116B (114-115), 10.15, 16ac-17, 18-19
E taha au i te aò o te Fatu
i no he fenua o te poì pohopohoè. 115,9
10 U haatià au, no èià e pohā nei to ù èo.
Nui atu to ù memae me te uē.
15 He taetae io te Fatu,
Te matena o to Īa huaa.
16 O au à to Òe tāvini, e te Fatu e,
Te ènata humutia ta Òe i vevete ai.
17 E ùtuna au i te hēana haahuaèkaèka,
E vevaò au i te inoa o te Fatu.
18 E hana au vāàna i ta ù teào voto
I mua o te motuhaka nui o to Īa mataèinaa,
19 Io te tohua o te faè tapu o te Fatu,
I vāvena ahau o te pāpuafaè Ierutaremi.
TETAUTINA O TE HĀMANI A PAURO PEÀTO I TO ROMA
8, 31b-34
E tu ù tau tunane tuehine.
31 Me he mea me tātou te Etua, o ai e tuàki mai ?
32 Aòè i kaikino te Etua i ta Īa iho Tama :
ua tuu mai ia Īa no tātou paotū.
Pēhea ta te Etua e kaikino ai i tītahi mea ?
E vaièi mai hoì Īa i te tau mea paotū.
33 O ai e pōtoho pu i te tau ènata ta te Etua i vae ?
O te Etua aneiho te i haatoitoi ia âtou.
O ai te ènata e hakatio ia tātou ?
34 U vevaò i uē ia tātou Ietu Kirito te i mate ai,
tōtahi atu te i tū hakaùa mai,
te i noho i te ìma oko o te Etua.
HĪMENE VĀNANA :
cf. Mt 17,5
Me i òto o te ao tapu e pupuà nei,
ua tani te èo o te Etua Motua :
« O Īa nei tu ù Tama tāhia ; a hakaòno ôtou ia Īa. »
EVANERIO O IETU KIRITO VĀÀNA E MAREKO 9, 2-10
2 I tēia mou pō, ua too Ietu me Īa
ia Petero, ia Iakopo me Ioane.
U aahi atu ia âtou i ùna o te tuaivi tiketike,
io te taha kē, o âtou anaè.
3 U haahuìkētia Ietu i mua o âtou.
U pōnionio to Īa kahu : u māìta oko.
Aòè e koàna i te ènata te haamāìta atii i te kahu.
4 Ua ìte âtou ia Eria me Moite e teàteào aa me Ietu.
5 U pohā te èo o Petero me to īa peàu ia Ietu :
« E Rapi e, mea meitaì a noho tātou înei.
A haatū tātou e toù faèkā : e tahi no Òe,
e tahi no Moite, e tahi no Eria. »
6 Aòè hoì Petero i ìte aha to te peàu atu,
na te mea ua hemo âtou i te haametaù.
7 A tahi a iho mai te ao te i fāfī ia âtou.
U pohā mai te èo me i òto o te ao e peàu aa :
« O Īa nei tu ù Tama tāhia. A hakaòno ôtou ia Īa. »
8 E tiòhi anamai âtou vii pu, aòè he ènata i ìtetia.
O Ietu tootahi me âtou.
9 E iho ana âtou me i ùna he tuaivi, u oonaì Ietu ia âtou :
« Umoì e faì atu i te mea ta âtou i ìte,
tihe i te â e tū ai hakaùa te Tama a te ènata
me i vāvena o te huaa mamate. »
10 Aòè âtou i faì atu.
Atià, u peàpeàu atu te hoa i te hoa, e aha oti
« te Tūhakaùatina me i vāvena o te huaa mamate. »
TOMINIKA E TOÙ O TE AVA HAAONE
TETAUTINA O TE HĀMANI A MOITE PEAUTIA EHOTO
20, 1-17
1 U teào te Etua ia Moite me to Īa peàu pēènei à :
2 « O au te Fatu, to òe Etua, te i haauu ia òe
i vaho me i te Fenua Ekipito,
me i òto mai o te faè o te poì haamōèhutia.
3 Umoì te Etua kē io òe : o au anaè te Etua.
4 Umoì e haatiki òe i te ata o te mea io he àni,
o te tau mēmau i no he fenua,
akoè à i òto o te vai, i àò o te fenua.
5 Umoì òe e moe haatona i mua o hua tau ata,
umoì e tāvini atu ia âtou.
O au hoì te Fatu, to òe Etua, he Etua toumakou au.
Ia teka tītahi io ù, me te haahaa ia ù,
e topa te tuki pē ma ùna o te upoo o ta īa tau tama
me te tau poupuna, tihe atu e fā o te tai ènata.
6 Atià, te ènata te i kāòha mai me te aotahi i ta ù teào,
e haameitaì au ia īa tihe atu i te tai ènata tini tini.
7 Umoì e vevaò pu i te inoa o te Fatu, to òe Etua,
no te haatiàtohu i te mea tīkoe.
U te e avai te Fatu tuki koè i te ènata e vevaò pu
i to Īa inoa, no te haatiàtohu i te mea tīkoe.
8 A haamaakau òe i te Tāpati : he â tapu.
9 Ma te mou pō e ono, a hana i ta òe hana.
10 Atià, o te fitu o te tau â, he â hakaēa i te hana,
he Tāpati no te hahi i te Fatu, to òe Etua.
Aua e hana òe, ta òe tamaòa, te moî,
te tueni, akoè à ta òe ànimara.
11 Ma te òa o nā pō e ono, u pēpena te Etua i te àni,
te fenua, te tai me te tau mēmau i òto.
I te â e fitu, u hakaēa te Etua i te hana,
me to Īa haatapu i hua â.
12 A pakaihi i to òe motua me te kui, vāàna e òa to òe pohoè
i no he fenua ta te Fatu Etua e tuu ia òe.
13 Umoì e kukumi haamate i te ènata.
14 Umoì e hana pē i te mātirimonio.
15 Umoì e kamo.
16 Umoì e pōtoho pu no te hakatio i te hoa.
17 Umoì e hinenaò pu i te vehine a te hoa.
Umoì e kōhoà pu i te faè o to òe hoa, akoè à i ta īa tueni,
ta īa pifa, ta īa pūriki, ta īa tau mēmau kē. »
TARAMO 19 (18), 8,9,10,11
E te Etua e, io Òe aneiho te Teào
e aahi atu i te pohoè anatu. cf. In.6,69
8 U toitoi noa te ture o te Fatu,
Na Īa e haahou i to tātou ìi.
U tiàtohu te Teào a te Fatu
Te i haamāàma i te poì avai noa.
9 U toitoi te Teào a te Fatu,
E haakoakoa âtou i te koekoe.
U hōata te maìmaì o te Fatu,
E haakeàpa i te mata o te ènata.
10 U taìtaì te pakaihitina o te Etua,
E noho mau anatu to Īa tau puu.
U toitoi te teào paotū o te Fatu :
U māàma âtou no te haavā i te ènata.
11 U taetae atu te maìmaì o te Fatu
I te puke moni kiki, te kuà o te moni kiki.
U mānini atu te Teào a te Etua,
I te mānini tikauè e tahe me io he tīpapa.
TETAUTINA O TO MUA HĀMANI I TO KORINETIA 1, 22-25
E tu ù tau tunane tuehine,
22 u maìmaì te tau ati Iuta e ìtemata
i te tau hana mana me he hakatu.
No te poì Hereni, he mea kē :
e ìmi nei âtou i te māàma hōhonu o te teào.
23 O tātou à, u hakako tātou i te Kirito pāokapekatia.
No te tau ati Iuta, he teào haapākeka i te haatià.
He teào kōea no te tau mataèinaa êteni.
24 Atià, no te tau ènata vaetia e te Etua,
e aha à he tau ati Iuta, akoè à he tau êteni,
O Īa nei te Kirito, te Mana o te Etua, te Māàma o te Etua.
25 Na te mea te hakatu tuaave o te Etua,
he māàma aè i te maakau o te tau ènata.
O te hakatu pepee o te Etua,
he mana atu i to te tau ènata maakau.
HĪMENE VĀNANA :
cf.Ko.2,9
I òto hoì o te Kirito ènata tiàtohu,
ua noho te hakatu toitoi pao ònaòna o te Etua.
EVANERIO O IETU KIRITO VĀÀNA E IOANE 2, 13-25
13 Ohia ua tata te koìna Pakate o te tau ati Iuta,
ua fiti Ietu i Ierutaremi.
14 I òto o te Hiero, u koàna mai ia Īa
te tau ènata hoko atu i te tau pifa, te tau muto,
te tau manu māìta atii me te tau ènata haahuìkē i te moni,
e kaapee aa pii o to âtou fātaa hoko moni.
15 U kānea Ietu i te tā me te mou touà.
Ua tute atu Īa i vaho o te Hiero ia âtou paotū,
me te tau muto me te tau pifa.
U tioà ma ùna o te tuaèpo i te moni
o te poì haahuìkē i te moni.
U haatohuì Īa i to âtou fātaa moni.
U peàu Īa i te poì hoko manu māìta :
« A àve atu me i înei ia âtou paotū.
Umoì e haaìò ôtou i te faè o to ù Motua mea faèhoko ! »
17 U haamaakau to Ietu tau kouâ i te teào i patutia :
« He koekoe ūo toù nei no to òe faè,
me he ahi i òto o au te kena. »
18 U pohā te èo o te tau ati Iuta me te peàu ia Ietu :
« E aha ta òe hana mahaò no te haatiàtohu
e mana to òe no te hana i hua hana nei ? »
19 Ua hua atu Ietu ia âtou : « A vāvahi ôtou i tēnei Hiero.
Ma te toù o te pō, e haatū hakaùa au ia īa. »
20 U peàu te tau ati Iuta ia Īa : « Toufā ma ono èhua
e hana nei te poì hana i òto o te Hiero.
Na òe e haatū ai ma te toù o te pō ? »
21 O to Īa tino aneiho te Hiero ta Ietu i teào atu.
22 Ia tū hakaùa Ietu me i vāvena o te huaa mamate,
u haamaakau aè to Īa tau kouâ i hua teào nei.
U haatià âtou i te Hāmani tapu atii me te teào i peàutia e Ietu.
23 E noho aa Ietu i Ierutaremi no te Koìna Pakate,
he mea nui te ènata i haatià ia Īa.
U ìte hoì âtou i te tau hana mahaò hakatu
me ta Ietu i hana atu.
24 O Ietu à, u te e haatià ia âtou, na te mea ua ìte Īa ia âtou nui.
25 Aòè hoì na tītahi i haavivini ia Ietu i te hakatu o te ènata.
Ua ìte Ietu e aha te meitaì me te pē i òto o te ènata.
TOMINIKA E FĀ O TE AVA HAAONE
TETAUTINA O TE ÙA O TE HĀMANI PARARIPO
36,14-16.19-23
14 I te ava e hakaìki aa Hetetia,
paotū te tau vivini tāuà me te mataèinaa
u pūtuì âtou i te Etua,
e haapao aa i te tau hana mākaka nui
me he mea to te tau mataèinaa êteni.
U haameìe âtou i te Hiero o Ierutaremi
i haataputia e te Fatu.
15 Na te Etua o to âtou tupuna e pōpahi anamai
ma te hakaēa koè i te tau keèe
na te mea, u hakāòha Īa i te faè tapu
atii me to Īa mataèinaa.
16 Atià, o âtou i haamee nei i te tau keèe a te Etua,
e kakata aa i to âtou tau teào,
e māio aa i te tau perofeta.
No èià, tōtahi atu to te Etua peê i to Īa mataèinaa.
19 Ua tihe mai te fatu kape Papironia,
me to âtou tutu me te ahi i te Hiero o te Etua.
U vāvahi âtou i te tau pākeâ o Ierutaremi,
u haapūovo âtou i te tau faè hakaìki
me te tau taetae nui i òto.
20 Te tau ati Iuta, u te e haamate koè tia,
u aahi te hakaìki Naputonoro ia âtou i Papironia
me he poì mōèhu.
Ua ìò âtou he tau ènata tueni no te hakaìki
me ta īa tau tama, tihe i te ava i hina ai Papironia
i te tau hakaìki o te Fenua Pereha.
21 Ma èià, ua pao te tau teào ta te Fatu
i haaìte mai i te perofeta Ieremia, pēènei :
« E mamapetia te fenua.
E hakaēa te fenua e fitu ònohuu èhua,
aòè e hua i te puu.
Oiana te tuki o te nuitina o te tau Tāpati i pakaihi koè tia. »
22 Atià, i to mua èhua o te hakaìkitina o Kiruto
i te Fenua Pereha, u haamāàma te Etua ia īa,
etià e paoa te teào i peàutia e te perofeta Ieremia.
U hakaìte atu Kiruto ma io to īa fenua vii pu
me to īa patu iho pēènei à :
23 « Oia nei te teào a Kiruto, te Hakaìki o te Fenua Pereha.
U vaièi mai te Fatu, te Etua o te àni,
i te mana no te vivini i te tau fenua paotū o te ao nei.
U peàu mai no te haatū no Īa i te Faèpure
i Ierutaremi, io te Fenua Iutea.
No èià, ôtou, e te poì ati Iuta,
ôtou paotū, e te mataèinaa vaetia e te Etua,
me ôtou te Fatu no te hua atu i Ierutaremi. »
TARAMO 137 (136),1-2, 3, 4-5, 6
E Ierutaremi e, faè o tu ù tau hoa,
Taetae atu i to ù iho pohoètina. cf. .137,6
Akoè à
E te Fatu e, a haamaakau i to Òe kāòha,
a haapohoè mai ia mātou.
1 Io te tau kākaavai o te Fenua Papironia,
U kākaapee mātou me te uēuē,
2 E maakau ana me te aumiti ia Tiona.
U tauèvatia te kitā io te tumu âkau.
3 I èià, ua ape mai te tau ènata tiaì
No te haatani i te èo haakoakoa.
Ua ape mai te poì i fao ia mātou,
No te hīmene ma òto o te èo Tiona.
4 Pēhea e tani to tātou èo no te hīmene,
E noho aa me te uē io te fenua hāoè.
5 Me haatūhaa au ia òe, e Ierutaremi e,
A moô, a haakopatia to ù ìma oko.
6 A paka meô to ù èo io he fafa,
Ia haatūhaa au me te haamee ia òe,
E Ierutaremi e, te faè o tu ù tau hoa,
Taetae atu i to ù iho pohoètina.
TETAUTINA O TE HĀMANI A PAURO PEÀTO I TO EFETIA
2, 4-10
E tu ù tau tunane tuehine.
4 Atià, mea nui to te Etua hakāòha mai,
mēìa i te nui o to Īa uē ia tātou,
5 u haapohoè te Etua ia tātou kātahi me te Kirito,
tātou hoì he huaa mamate mēìa i te mikeo.
Na to Īa vaièi mai anaè, u haapohoètia ôtou.
6 U haatū hakaùa te Etua ia tātou, e tahi me Ietu Kirito,
me te haanoho ia tātou io he àni, e tahi me Ietu Kirito.
7 Oia to te Etua vaièitina mahaò i uē ia tātou,
i òto o te Kirito.
U maìmaì hoì Īa e haaìte atu i te tau tai ènata paotū
i to Īa kāòha,
nui atu i te mea e kaitutotia e te tau ènata.
8 U haapohoètia ôtou na te karatia o te Etua, mēìa i te haatià.
Aòè me io ôtou aneiho hua haapohoètina,
he taetae kāòha ta te Etua i vaièi mai.
9 Aòè mēìa i to ôtou tau hana meitaì,
etià, umoì e haakāìè pu te ènata e tahi aneiho.
10 U kānea hoì te Etua ia tātou.
Na Īa i pēpena ia tātou, i òto o te Kirito,
etià he toitoi noa ta tātou hana meitaì,
vāàna i te hakatu pohoè ta te Etua i haaìte mai.
HĪMENE VĀNANA :
In.3,16
Mēìa i te nuitina o to Īa kāòha i to te ao nei,
u tuu mai te Etua i ta Īa Tama tootahi ;
te ènata i haatià ia Īa, e koàna hoì te pohoè anatu.
EVANERIO O IETU KIRITO VĀÀNA E IOANE 3, 14-21
I tēia mou pō, u peàu Ietu ia Nikotemo, pēènei :
14 I te fenua ataha, u hapai Moite i te ata nenie o te puhi fenua.
15 Atii aneiho e hapaitia te Tama a te ènata,
etià e koàna mai i te ènata haatià ia Īa te pohoè anatu.
16 Mēìa i te nuitina o to Īa kāòha i to te ao nei,
ua tuu te Etua i ta Īa Tama tootahi,
etià aòè e mate ai te ènata i haatià i hua Tama,
e koàna hoì ia īa te pohoè anatu.
17 U te e pahi te Etua i ta Īa Tama i te ao nei
no te hakatio i te tau ènata,
atià no te haapohoè ia âtou.
18 U te e hakatio te Etua i te ènata haatià i te Tama.
Atià, te ènata haatià koè, u hakatio te Etua ia īa.
Na te mea, ua ao koè īa i te haatià
i te Tama Tootahi a te Etua.
19 Pēènei te tumu o te haatoitoi i te teào :
ua tihe i te ao nei te māàma tiàtohu,
aòè te tau ènata i apuu i hua māàma.
U haataetae atu âtou i te pōtano,
na te mea ua pē to âtou hakatu pohoè.
20 Te ènata hoì te i hana i te hana pē, u haahaa īa i te māàma.
Aòè e haatata mai īa me te māàma,
oa haaìtetia ta īa tau hana pē.
21 Ia hana te ènata i te hana vāàna i te tiàtohu,
u haatata mai hua ènata me te māàma,
etià e haaìtetia to īa aotahi atu i te Etua.
TOMINIKA E ÌMA O TE AVA HAAONE
TETAUTINA O TE PEROFETA IEREMIA 31, 31-34
31 Oia nei te teào a te Fatu :
« E tihe te ava e haatoitoi au i te Piimau hou
me te ati Iraene me te ati Iuta.
32 He mea kē te Piimau ta ù i haatoitoi
me to ôtou tau tupuna i te â ua too au ia âtou ma te ìma
no te aahi mai i vaho me io te Fenua Ekipito.
U haakoè âtou i to ù Piimau, e aha à o au to âtou vivini.
33 Atià, oia nei te hakatu o te Piimau
ta ù e haatoitoi me te ati Iraene ia tihe mai hua mou â.
E tuu au i to ù ture i te take o to âtou koekoe.
E patu au i hua ture i òto o to âtou hōupo.
E ìò o au to âtou Etua. E ìò o âtou to ù mataèinaa.
34 Aòè âtou e hakako atu hakako mai te hoa i te hoa,
e peàu ana : « A hano òe e ìte o ai te Fatu Etua. »
Na te mea, ua ìte âtou paotū ia ù,
o te tau tōìki tihe atu i te tau ànamotua.
E haakoè au i to âtou tekateka paotū.
E haatūhaa au i to âtou tau mikeo. »
TARAMO 51 (50), 3-4, 12-13, 14-15
A pēpena i òto o au nei i te koekoe taìtaì. cf.51,12
3 E te Etua e, a hakāòha mai.
Mēìa i te nuitina o to Òe uē,
4 A hooi mai me i to ù mikeo.
A haamā i tu ù koekoe pē.
12 A pēpena i òto o au nei i te koekoe taìtaì.
A haahou i to ù kuhane, a haamau i to īa meitaì.
13 Umoì e titii atu ia ù memao me io Òe.
Umoì e taki me i òto o au i to Òe Kuhane Meitaì.
14 A haakoakoa ia ù to Òe haapohoè mai.
A haamau i te èkaèka io to ù koekoe.
15 E hakako au i to Òe aanui i te poì mikeo.
E hua mai io Òe te poì e hukaka nei.
TETAUTINA O TE HĀMANI I TO HEPEREO 5, 7-9
7 O Ietu Kirito e pohoè aa i no he fenua nei,
me he ènata mate vave, ua pure Īa i te pure vevaò,
e uē aa, e taaàu aa io te Etua,
etià e haapohoètia me i te mana o te matena.
U apuutia to Ietu Kirito pure
mēìa i to Īa kāòha me te aotahi atu.
8 E aha à he Tama te Kirito,
ma to Īa memae, u hakako Īa i te aotahitina.
9 Ma èià, ua ìò Īa he toitoi noa i mua o te Etua,
u haatūtia te tumu o te pohoè anatu
no te tau ènata paotū e aotahi ia Īa.
HĪMENE VĀNANA
cf.In.3,14-15
E te Tama a te ènata, hapaitia io he peka,
mēìa ia Òe, e koàna ai i te ènata haatià i te pohoè anatu.
EVANERIO O IETU KIRITO VĀÀNA E IOANE 12, 20-33
I hua mou pō,
20 enā te mou ènata peàutia poì Hereni
te i fiti me he pererina i Ierutaremi no te Koìna.
21 U haatata mai âtou me Firipo te i fānautia
i Petehaita o te Fenua Karirea. U ape âtou ia īa :
« E te hakaìki e, u maìmaì mātou e âvei me Ietu. »
22 Ua faì Firipo ia Aterea. Ua faì âua tokoùa ia Ietu.
23 U haahua Ietu ia âtou : « Ua tihe te hora
e haakāìètia te Tama a te ènata.
24 He teào tiàtohu ta ù nei ia ôtou :
Ia tūtūtia io he èpo te kākano faraoa
me he mea aòè e èhutia, e avai tootahi anaè.
Ia èhu te kākano, he mea nui te puu e koàna mai.
25 Te ènata e haataetae i to īa pohoè,
e koè ai to īa pohoètina.
Te ènata e haahaa i to te ao nei pohoètina io te ao nei,
e koàna mai ia īa te pohoè anatu.
26 Me maìmaì te ènata e tāvini ia ù, a ūtaì mai.
I èià au, i èià to ù tāvini.
E haataetae tu ù Motua i te ènata e tāvini ia ù.
27 I tēnei, u pūpūkina to ù kuhane. E aha ta ù i peàu ?
E tu ù Motua e, a haapohoè mai me i te ava nei.
Atià, no hua ava to ù tihe io te aomāàma nei.
28 E to ù Motua e, a haakāìè i to Òe inoa. »
A tahi a iho mai te èo me io he àni :
« U haakāìè au i to ù inoa.
Tōtahi atu to ù haakāìè ia īa. »
29 Te faètoa e pī aa i èià, ua òno i hua èo.
U peàu âtou : « Ua tani te fatutii. »
U peàu tahipito : « O te anera te i teào me Īa. »
30 U peàu Ietu :
« Aòè no ù i tani ai hua èo, atià no te toko ia ôtou.
31 I tēnei, e haavātia te aomāàma nei.
I tēnei, e tutetia i vaho te hakaìki o te aomāàma nei.
32 O au à, ia hapaitia au me io he fenua,
e toi mai au io ù i te tau ènata paotū. »
33 U teào Ietu atii no te haaìte pēhea e mate nui Īa.
TOMINIKA MANAMANA TEITĀ
1 - TE TAHATINA PURE ME TE MANAMANA TEITĀ
EVANERIO O IETU KIRITO VĀÀNA E MAREKO 11, 1-10
I tēia mou pō ma mua te Koìna Pakate,
1 o Ietu me to Īa tau kouâ, ua tihe tata mai i Ierutaremi.
I te kēkē o Petania me Petefahe, i pii te tuaivi Oriveti,
ua pahi atu Ietu i nā kouâ tokoùa me te peàu ia âua :
2 « A hee ôùa i te pāpuafaè i mua nei.
I te tomotina, e koàna mai ia ôùa
te punua pūriki humutia.
Aòè te ènata i piki i ùna o īa.
A vevete ia īa. A aahi mai.
3 Me peàu te ènata ia ôùa : « E aha ta ôùa ? »
A peàu atu : « E hana ta te Fatu me īa.
E haahua ponihoo Īa i te pūriki. »
4 Ua hee atu âua. U koàna mai ia âua
te punua pūriki humutia i vaho, i te taì o te aanui,
i pii te avaputa. U vevete âua ia īa.
5 U peàu tahipito noho aa i èià :
« No te aha e vevete nei ôùa i te punua pūriki ? »
6 U haahua âua ia âtou me he mea ta Ietu i peàu,
me to âtou avai pu.
7 U aahi âua i te punua pūriki io Ietu.
U hohoà âua i te kahu uhi pu i ùna o te pūriki
me te kaapee o Ietu i ùna.
8 U auau te nuitina o te poì
i to âtou kahu ma no he aanui,
akoè à, i te pūpā manamana teitā no te maìi.
9 Te tau ènata e taha i mua me te ūtaì ia Ietu,
u taaàu nātoa pēènei : « Òtana !
A meitaìtia te tihe nei ma te inoa o te Fatu.
10 A meitaìtia te Hakaìkitina e tihe nei,
te Hakaìkitina o to tātou motua Tavite.
Òtana i ùna nui ! »
Akoè à :
EVANERIO O IETU KIRITO VĀÀNA E IOANE 12, 12-16
12 I tēia mou pō, ua òno te faètoa nui
te i tihe mai no te Koìna Pakate,
enā a fiti ai Ietu i Ierutaremi.
13 Ua too âtou i te tau àupoà,
me to âtou taha atu i mua o Ietu e taaàu aa oko ki :
« Òtana ! A meitaìtia te tihe nei ma te inoa o te Fatu !
A meitaìtia te Hakaìki nui o Iraene ! »
14 U koàna mai ia Ietu te kaiū pūriki.
Ua piki Īa ma ùna, vāàna i te mea patutia :
15 « E te moî Tiona e. Umoì òe e haametaù.
Enā a tihe to òe Hakaìki i ùna o te punua pūriki. »
16 Òmua, u te e vivini te huaa kouâ i hua teào.
Atià, ma muì u haakāìètia Ietu,
u haamāmaakau âtou u patutia hua teào i ùna o Īa.
U haapaotia hoì te mea paotū
te i patutia io he Hāmani tapu.
2 – NO TE PURE META
TE AVA MEMAE O IETU KIRITO VĀÀNA E MAREKO
14, 1 -- 15, 47
14,1 E ùa â i toe, e faitia ai te Koìna Pakate
me te faraoa haapupuhi koè.
Ua hano te tau tāuà nui, te tau tuhuna teào
e popoki ia Ietu no te haamate nui,
atià ma he hana haatukee. U peàu hoì âtou pēènei :
2 A « Umoì ma te ava o te koìna oa tohuìtia te mataèinaa. »
NO TE PAÙTINA O TO IETU TINO
3 Ua noho Ietu i Petania io te faè o Timone te kovi.
E moe aa io he tapukai, u haatata mai e tahi vehine
me te huekeâ pī i te kao kekaa peàutia narati.
He mēmau kekaa oko nui hua kao narati.
U haapohā te vehine i te huekeâ.
U kiini īa i te kao kekaa i ùna o to Ietu upoo.
4 U kōhumuhumu oko tahipito e peàu atu peàu mai :
A « Umaha i titii pu ai i tenā kao kekaa ?
5 Anoa ua ìò i te hoko, e koàna mai
e toù hānere moni tea no te tuu atu i te poì veve. »
Ua nui to âtou oonaì peê i hua vehine.
6 Atià, u peàu Ietu ia âtou :
+ « Avai ôtou i tēnei vehine. Umaha te haapaòpaò ia īa ?
He mea kanahau ta īa hana i ùna o au.
7 Enā anatu hoì te poì veve i vāvena o ôtou.
Vāàna e to ôtou maìmaì, e koàna ia ôtou te vaièi atu.
O au à, aòè anatu me ôtou.
8 Ua hana īa i te mea i koàna ia īa.
Ma mua e tomitia au,
ua paù īa i to ù tino me te kao kekaa.
9 E teào tiàtohu ta ù nei ia ôtou :
i te tau fenua paotū i èià e haaìtetia te Evanerio,
io he aomāàma vii pu, e peàutia ai
ta hua vehine i hana no te haamaakau ia īa. »
NO TE HAAHAETINA O IUTA
10 O Iuta Ikariote, tītahi me i vāvena o te Tīònohuu ma tokoùa,
ua tihe io te tau tāuà nui e hano haaìò ia Ietu.
11 U hakaòno âtou i ta īa teào me te koakoa.
U peàu âtou e tuu atu i te moni ia īa.
U tiaì hoì Iuta i te ava e hei no te haaìò ia Ietu.
NO TE HAAPEI I TE KAINAMAU PAKATE
12 I te â to mua o te koìna faraoa haapupuhi koè,
oia te ava e kukumitia te àrenio Pakate,
u peàu to Īa tau kouâ ia Ietu :
D « I hea mātou e hee ai,
no te haapei no Òe i te kainamau Pakate ? »
13 U pōpahi Ietu i nā kouâ tokoùa me te peàu ia âua :
+ « A hee io he pāpuafaè. E âvei ôùa
me te ènata àve aa i te huevai. A ūtaì ia īa ;
14 io he faè e uu ai hua ènata, a uu me ôùa.
A peàu i te ènata heifaè :
E ūi atu ta te tuhuna i hea to ù pāòto
i èià e kai au i te Pakate me to ù tau kouâ ?
15 Na īa e haaìte ia ôùa, io he tohua i ùna o te faè,
i te pāòto keî, tāpītia me te tau moena,
meitaì to īa kāneatina. I èià, a haapei no tātou. »
16 Ua hee atu nā kouâ tokoùa me te tomo io he pāpuafaè.
U koàna ia âua te mea i peàutia e Ietu.
U haapeipei âua i te Pakate.
NO TE ÈNATA E HAAÌÒ IA IETU
17 Ia topa te pō, ua tihe Ietu me te Tīònohuu ma tokoùa.
18 Ua kaapee âtou io he tapukai. E kai aa âtou, u peàu Ietu :
+ « E teào tiàtohu ta ù nei ia ôtou, e haaìò ia ù
tītahi me i vāvena o ôtou. E kai nei īa me au. »
19 U kuhane koè âtou me to âtou peàu atu ia Ietu,
te hoa ma hope o te hoa, pēènei :
D « O au oti, e te Fatu e ? »
20 U peàu Ietu :
+ « Tītahi me io te Tīònohuu ma tokoùa.
E kai nei īa me au, e tahi kaina ta māua.
21 Enā a hee hoì te Tama a te ènata
vāàna i te mea patutia i ùna o Īa.
Atià, mea ìno te ènata
te i haaìò i te Tama a te ènata.
Meitaì aè no hua ènata umoì i fānautia. »
NO TO IETU HAAEUKARITIA
22 E kai aa âtou, ua too Ietu i te faraoa,
u haahuaèkaèka, ua vahi, ua tuu atu ia âtou
me te peàu :
+ « A too. O to ù tino tēnei. »
23 I muì iho, e too aa i te ipu,
u haahuaèkaèka me te tuu ia âtou.
Ua inu âtou paotū.
24 U peàu Ietu ia âtou pēènei :
+ « O to ù toto tēnei,
te toto o te Piimau, te tahe aè no te poì nui.
25 E teào tiàtohu ta ù nei ia ôtou :
Aòè au e inu hakaùa me io te puu o te tumuvino,
tihe i te â e inu au i te vino hou
i to he Patirēia o te Etua. »
NO TO IETU HAAÌTE I TO TE TAU ÀPOTORO TITIITINA
26 Ma hope o te hīmene o te tau taramo,
ua uu âtou i vaho no te fiti io he tuaivi Oriveti.
27 U peàu Ietu ia âtou :
+ « E titii ôtou paotū ia ù.
U patutia hoì : E tā haamate au i te tiaì muto,
me te tavavā o te tau muto.
28 Atià, ia tū hakaùa au,
e fiti au ma mua o ôtou i te Fenua Karirea. »
29 U peàu Petero ia Īa :
D « E aha à u titii âtou paotū ia Òe,
o au nei aòè, koè nui. »
30 U hua atu Ietu ia īa :
+ « E teào tiàtohu ta ù nei ia òe :
i tēnei pō, ma mua e tani te moa, e ùa tanitina,
e titii òe aneiho ia ù. E toù titiitina. »
31 Atià, tōtahi atu to Petero peàu atu :
D « E aha à e mate au me Òe, koè nui au e titii ia Òe. »
O hua teào to te tau kouâ paotū.
NO IETU E PURE AA IO HE PĀPUA KEHEMANI
32 Ua tihe âtou io tītahi pāpua, o Kehemani te inoa.
U peàu Ietu i to Īa tau kouâ :
+ « A kaapee ôtou înei, oi pure au. »
33 Ua too ia Petero ia Iakopo ia Ioane me Īa.
Ua hemo Īa i te haametaù me te uē òomi menava.
34 U peàu Ietu ia âtou :
+ « Mei mate nui au i te kuhane koè.
A kaapee ôtou înei. A matavaa. »
35 Ua taha atu Īa ma te ava poto. Ua topa io he tuaèpo
me to Īa pure etià ia koàna mai
a haamemao atu me io Īa tēnei ava.
36 U peàu Īa :
+ « E Apa e. E tu ù Motua e.
Aòè te mea e avai i to Òe mana.
A haamemao me io ù i tēnei ipu memae.
Atià, umoì me he mea ta ù i maìmaì. A tae ta Òe.
37 Ua hua Ietu. U koàna mai ia Īa te tau kouâ e hiamoe aa.
U peàu ia Petero :
+ « E Timone, u hiamoe òe ?
Aòè i koàna ia òe te aa e tahi hora aneiho ?
38 A matavaa. A pure, oa hemo ôtou i te mōtii.
He mea ìi te kuhane ènata, atià u pepee to īa koekoe. »
39 Ua hee atu hakaùa Ietu me to Īa pure me he mea òmua.
40 Ua tihe Īa hakaùa. U koàna ia Īa
te tau kouâ e hiamoe aa, u matakaù hoì âtou.
Aòè âtou i ìte e aha te mea ta Īa i peàu.
41 Ua hua Ietu io âtou, o te toù o to Īa hua mai.
U peàu Īa :
+ « I tēnei, a hiamoe ôtou. A hakaēa.
Ua tihe te hora. Enā e haaìòtia te Tama a te ènata
i te îìma o te poì mikeo.
42 A tū ôtou ! A pau ! U haatata mai tēia e haaìò ia ù. »
NO TE HUMUTINA O IETU
43 Aòè i pao èka ta Ietu teào, ua tihe anamai Iuta,
tītahi me i vāvena o te Tīònohuu ma tokoùa.
Enā me īa te faètoa e àve aa i te tau kohetā,
te tau pooâkau, i pōpahitia âtou
e te tau tāuà nui, te tau tuhuna teào, te tau kōkooūa.
44 Te ènata e haaìò atu ia Ietu,
u haatoitoi me âtou i te hakatu, pēènei à :
D « Te ènata e honi au, o īa nei.
A humu ôtou ia īa. A aahi atu me te tiòhi meitaì. »
45 Ia tihe mai īa, u haatata ponihoo me Ietu. U peàu :
D « E Rapi e. »
Ua honi mau ia Īa.
46 A tahi a popoki âtou ia Ietu me te humu ia Īa.
47 Ua too i te kohetā tītahi me i vāvena o te tau ènata
e tū aa nei. Ua tā īa i te tāvini o te tāuà nui.
Ua motu te puaìna o hua tāvini.
48 U pohā te èo o Ietu me te peàu ia âtou :
+ « Ua tihe mai ôtou me te tau kohetā me te tau pooâkau
no te popoki ia ù me he mea i te ènata mākaka.
49 I tēia â, i tēia â, ua noho au i vāvena o ôtou,
e hakako aa io he Hiero. Aòè ôtou i humu ia ù.
Ma èià, u haapaotia te mea patutia io he Hāmani tapu. »
50 E titii aa ia Ietu, ua hiki te tau kouâ paotū.
51 Ua taha e tahi māhaì ma muì o Ietu,
e tapa tomi òki anaè to īa kahu.
U popoki âtou ia īa ;
52 e tuu aa i te tapa, ua hiki kahu koè anaè.
NO IETU I MUA O TE TAUÀ NUI
53 U aahi âtou ia Ietu io te faè o te tāuà nui.
I èià, u haaputuputu te papa tāuà nui,
te tau kōkooūa, te tau tuhuna teào.
54 O Petero me i te vahi memao, u ūtaì ia Ietu
tihe atu i òto o te pāpua o te tāuà nui.
U kaapee īa pii o te ahi me te tau tueni,
e haamāhanahana ia īa.
55 Atià, ua ìmi te tau tāuà nui me i te Tuneteri ia ôtoa
i te teào pōtoho pu ia Ietu, no te haamate ia Īa.
Aòè i koàna mai.
56 U pōtoho hoì te nuitina o te ènata ia Ietu,
atià, teào kē to tītahi, teào kē to tītahi.
57 E tū aa tahipito, u pōtoho ia Ietu, pēènei :
58 A « Ua òno mātou ia Īa e peàu aa :
e vāvahi au i tēnei Hiero haatūtia e te îìma ènata.
Ma te toù o te â, e haatū au i te Hiero kē,
aòè tēia e haatūtia e te îìma ènata. »
59 Atià, teào kē to tītahi, teào kē to tītahi.
60 E tū aa te tāuà nui i vāvena ahau o te putupututina,
ua ūi ia Ietu :
A « Aòè òe e haahua atu e tahi ponateào ?
E aha ta tenā poì i hakatio ia òe ? »
61 Atià, ua mutu pu Ietu. U te e pohā to Īa èo.
Ua ūi hakaùa te tāuà nui ia Īa me te peàu :
A « Aha o òe nei te Kirito, te Tama a te Meitaì nui ? »
62 U haahua atu Ietu :
+ « O au.
E ìte ôtou i te Tama a te ènata
e tānoho aa i te ìma oko o te Mana nui,
me te tihe aa ma ùna o te tau ao o te àni. »
63 U veti te tāuà nui i to īa kahu me te peàu :
A « No te aha e hano tātou hakaùa i te ènata haatiàtohu ?
64 Ua òno ôtou i ta Īa teào paha. E aha to ôtou maakau ? »
U peàu âtou paotū he mea toitoi te haamate nui ia Īa.
NO TE TAU TĀVINI TIAÌ E HAAMEE IA IETU
65 U tīmata tahipito i te tuhā i te anuanu io he mata o Ietu.
Ua tomi âtou i to Īa mata me te tapa,
u papaì ia Īa me te peàu atu :
F « A perofeta mai òe ! »
U pehipehi me te papaì ia Īa te tau tāvini tiaì.
NO PETERO E TITII IA IETU
66 Ohia e noho aa Petero i àò, i òto o te pāpua,
ua tihe e tahi vehine tueni o te tāuà nui.
67 Ua ìte hua vehine ia Petero e haamāhanahana pii he ahi,
u tiòhi matiòka i to īa mata me te peàu atu :
A « O òe tītahi me Ietu no Natareti. »
68 U haakoè Petero me te peàu :
D « Aòè au i ìte ia Īa.
Aòè au e vivini nei i ta òe teào. »
Ua taha Petero io he avaputa. A tahi a tani te moa.
69 Ia ìte te vehine tueni ia Petero,
u peàu hakaùa i te poì e kaapee aa i èià :
A « O īa nei tītahi me i vāvena o âtou. »
70 U haakoè hakaùa Petero.
Ava poto i muì iho, u peàu atu ia Petero
te poì e noho aa tata èka :
F « Tiàtohu, o òe tītahi me âtou.
Me i te Fenua Karirea hoì òe nei. »
71 Atià, u teào pē ta Petero me te paha atu :
D « Koè nui au i ìte i tēnei ènata ta ôtou i peàu mai nei. »
72 Pu anamai, ua tani te moa. O te ùa o te tanitina.
A tahi a haamaakau Petero i te teào i peàutia e Ietu,
pēènei : « Ma mua e tani te moa, e ùa tanitina,
u titii òe ia ù, e toù titiitina. »
U mateteka Petero me te uē.
NO IETU I MUA O TE TUNETERI
15.1 I te pōpōuì tika, u haaputuputu te papa tāuà nui,
te tau kōkooūa, te tau tuhuna teào,
te Tuneteri paotū. U hakatoo atu hakatoo mai âtou nui.
U kitii âtou ia Ietu me te aahi atu
no te haaìò ia Īa i te îìma o Pinato.
NO IETU I MUA O PINATO
2 Ua ūi Pinato ia Ietu me te peàu :
A « O òe te hakaìki nui o te tau ati Iuta ? »
U haahua atu Ietu :
+ « Na òe i peàu. »
3 Ma te haanui i te teào,
u hakatio pu te papa tāuà nui ia Ietu.
4 Ua ūi hakaùa Pinato ia Īa me te peàu :
A « Aòè òe e haahua atu ?
A òno i te nuitina o ta âtou teào e hakatio aa ia òe. »
5 Aòè Ietu i haahua atu e tahi ponateào.
Ua pē Pinato i te mahaò.
NO PARAPĀ
6 I tēia koìna Pakate, i tēia koìna Pakate, u vevete Pinato
i tītahi ènata humutia, tēia ta te poì ati Iuta e ape atu.
7 Enā te ènata, o Parapā to īa inoa,
humutia kātahi me nā hoa kē mākaka
te i kukumi haamate i te ènata
i te ava o te tōua io he pāpuafaè.
8 Ua fiti te faètoa io Pinato me te ape ia īa
no te apuu mai me he mea ua hani īa me âtou.
9 U haahua Pinato ia âtou :
A « Aha, e maìmaì ôtou
a vevete au i te hakaìki nui o te tau ati Iuta ? »
10 Ua ìte hoì Pinato
na te keitani i haaìò ai te papa tāuà nui ia Ietu.
11 Atià, u hakapahi âtou i te faètoa etià e vevetetia o Parapā.
E haahua aa Pinato, u peàu ia âtou :
A « E aha ta ù me tēia i vevaòtia e ôtou :
‘’Te hakaìki nui o te tau ati Iuta’’ ? »
12 U taaàu hakaùa âtou :
F « A pāokapeka atu ! »
13 U peàu Pinato ia âtou :
F « E aha ta īa hana mākaka ? »
Atià, u taaàu âtou ma te haaoko atu :
F « A pāokapeka atu ! »
15 U vevete Pinato ia Parapā,
mēìa u maìmaì e haatāvaè i te faètoa.
O Ietu à, u haaìò Pinato ia Īa no te tā me te touà,
i muì iho a pāokapeka atu.
NO TE TAU KAPE TIAÌ E HAAMEE IA IETU
16 U aahi te tau kape ia Ietu
io te tohua i òto o te pāpua, o Peretorio te inoa.
U vevaò âtou i te fatu kape ia ôtoa.
17 U haauhi âtou ia Ietu me te kahu pu veàkiki
me te tuu ma ùna o to Īa upoo
i te paè teitā taataa àanatia e âtou.
18 I muì iho, ua oha âtou i mua o Īa e peàu aa :
F « Kāòha, e te hakaìki nui o te tau ati Iuta. »
19 Ua tā âtou i to Īa upoo me te kākaho.
Ua tuhā i te anuanu i ùna o Īa
me te noho muò no te pakaihi ia Īa.
20 Ia pao te haamee ia Ietu,
ua taki âtou i te kahu pu veàkiki
me te haauhi iho i to Īa kahu.
NO TE AANUI O TE PEKA
21 U aahi âtou ia Ietu i vaho o te pāpuafaè
no te pāokapeka ia Īa.
Ua toi pu âtou i tītahi ènata me i te Fenua Kirene,
e hua aa me io he vahi teitā.
O Timone to īa inoa, te motua o Arihano me Rufo.
U toutaki ia īa no te amo i te peka o Ietu.
22 U aahi âtou ia Ietu i te vahi peàutia Korekota,
o Ipuoo ma he èo ènata.
23 Ua tuu atu âtou ia Īa i te vino kāvaìtia me te hāika mira.
Atià, aòè Ietu e inu.
NO TE PĀOKAPEKATINA O IETU
24 U pāoka âtou ia Ietu uo he peka.
U tuhatuha âtou i to Īa kahu ma te haakai,
no te ìte e aha te pāio e ìò i te hoa, i te hoa.
25 He oatea nui te ava i pāokapeka âtou ia Ietu.
26 U patutia te piò o to Īa hakatio pēènei :
« Te hakaìki nui o ati Iuta. »
27 U pāokapekatia me Īa nā ènata mākaka tokoùa :
i te ìma oko tītahi, i te ìma aèaè tītahi.
28 Atii u toitoi te teào i patutia io he Hāmani tapu,
pēènei à : U haahakatutia me te poì mākaka.
NO TE PAHA IA IETU
29 Ua paha te poì e taha aa ma èià,
e haaùu i te upoo me te peàu :
F « O òe te i vāvahi i te Hiero
me te haatū hakaùa ma te toù o te pō !
30 A haapohoè ia òe iho. A iho mai me io he peka. »
31 Hua mea aneiho, u haamee ia Īa te mou tāuà nui,
e peàu aa te hoa i te hoa, atii me te tau tuhuna teào, pēènei :
A « U haapohoè Īa i tahipito,
aòè i koàna ia Īa iho te haapohoè.
32 E te Kirito e ! E te hakaìki nui o Iraene !
I tēnei, a iho mai me i ùna o te peka,
etià e ìtemata mātou me te haatià. »
U haamāio ia Ietu me nā ènata i pāokapeka me Īa.
NO TE MATENA O IETU
33 Ua topa te pō pōtano ma ùna o te tiàtohu o te fenua
me i te ava oatea nui tihe atu te hora e toù ahiahi.
34 I te hora e toù, u taaàu Ietu me te èo oko :
+ « Eroi, Eroi rama tapakatani. »
O hua mea aneiho :
+ « E tu ù Etua e, e tu ù Etua e.
Umaha òe i titii ai ia ù ? »
35 Ia òno tahipito me i vāvena o te poì e noho pii me Īa, u peàu :
F « Enā u vevaò ia Eria. »
36 U tohuti tītahi ènata.
U haatokū me te vīneka i te mēmau omotai.
U haamau i hua mēmau omotai io he muamua o te kākaho.
U fāinu ia Ietu, e peàu aa :
A « Epō. A tiòhi tātou aha e hano mai Eria e haaiho ia Īa. »
37 Atià, o Ietu e taaàu aa me te èo oko,
ua tuu atu i te ao paona.
MA MUÌ TE MATENA O IETU
38 A tahi a tuiva ma vāvena me i ùna tihe i àò nui
te tapa tauèvatia io he Hiero.
39 Te keneturione e noho ana i te aò o Ietu,
ia ìtemata i te hakatu o to Īa matena, u peàu :
A « Tiàtohu nui, o te ènata nei he Tama a te Etua. »
NO TE TAU VEHINE PII I TE PEKA
40 Enā i èià te mou vehine e tiòhi aa me i te vahi memao :
i vāvena o âtou o Maria Matarena, o Tarome me
Maria, te kui o Iakopo iti me Iote.
41 I te ava ua noho Ietu i te Fenua Karirea,
ua ūtaì me te tāvini atu âtou ia Īa.
Atii me tahipito vehine kē te i fiti me Ietu i Ierutaremi.
NO TE TOMINA O IETU
42 I te ahiahi māèhuèhu, mēìa he ava no te haapei i te Tāpati,
43 ua tihe Ioteve no te kaavai Arimatea, he ènata òno nui,
tītahi me io te Tuneteri, e tetaì aa i te Patirēia o te Etua.
Aòè īa i haametaù no te haaâvei me Pinato
no te ape mai i te tino o Ietu.
44 U mahaò Pinato mēìa ua mate ponihoo Ietu.
U vevaò īa i te keneturione me te ūi atu aha ua mate nui Ietu.
45 Ia òno Pinato i te keneturione,
ua ao anamai e too Ioteve i te tino tūpāpaù o Ietu.
46 Ua hoko mai Ioteve i te tapa pōòu.
U haaiho aè īa i te tino o Ietu me i ùna o te peka,
ua fāfī me hua tapa pōòu me te tuu atu ia Īa
i òto o te ana tūpāpaù te i tekaitia i to he papakeâ.
I muì iho, ua huì īa i te keâ
no te pā i te avaputa o te ana tūpāpaù.
47 Atià, o Maria Matarena, o Maria te kui o Iote,
u tiòhi matiòka âua i te vahi i èià i tomitia Ietu.
NO TE IUTĪ TAPU
TE PURE META AHIAHI
TETAUTINA O TE HĀMANI A MOITE PEAUTIA EHOTO
12, 1-8.11-14
1 I te Fenua Ekipito, u peàu te Fatu Etua ia Moite
atii me ia Aarone, to īa teina :
2 « A ìò te māhina nei e māhina tumu no ôtou.
Oia to mua māhina o to ôtou èhua.
3 A haaìte atu i te motuhaka tiàtohu o to Iraene i te mea nei :
Ma te pō ònohuu o te māhina nei, a too ôtou
e tahi kaiū muto ma tēia faè, ma tēia faè.
4 Me he mea ua ìte ôtou aòè e àva te huaafaè no te haapao
i te kai i te muto, a haapii te faè me tītahi faè kē.
Umoì e toe te înaì !
5 Te muto à, a kanahau, kaiū toa, e tahi èhua.
E koàna te too i te kaiū keukeu hakatu me hua muto nei.
6 A haaavai tihe i te pō ònohuu ma fā o te māhina.
I hua â, ia topa te pō, a kukumi i hua muto te motuhaka nui
o te mataèinaa tiàtohu o Iraene.
7 A tootia i te mea toto no te paù i nā katina e ùa
me te paènutu o te avaputa o te faè i èià te kai.
8 I hua pō, e kaitia te kiko tunu pātaka
me te faraoa haapupuhi koè me te tau teitā kavakava.
11 Pēènei to ôtou kai :
A taka i te kooi. A oka te vaevae me te aihū.
Te tootoo io te ìma, a kai haakoi :
O te Pakate o te Fatu, to te Fatu Etua Tahatina.
12 I hua pō nei, e taha atu au ma vāvena o te Fenua Ekipito ;
e tā au i te tau hāmua hakatahi o te Fenua Ekipito,
me i to te ènata anamai tihe atu i to te tau ànimara. »
13 E haatopa au i te tuki pē ma ùna o te tau ètua Ekipito :
O au hoì te Fatu.
E ìò te toto mea hakatu ma ùna o te faè i èià ua noho ôtou.
E ìte au i te toto, me tu ù taha atu.
14 Aòè ôtou e pē i te mea ìno ta ù e àve i te Fenua Ekipito.
A haamāmaakau ôtou i hua â nei.
A ìò he â koìna pererina no te hahi i te Fatu.
A tū mau hua ture no te tau tai hakatahi ! »
TARAMO 116 B (115), 12-13, 15-16a.c, 17-18
U meitaìtia te ipu me te faraoa o te pohoè,
te i haatū i te motuhaka nui o te Etua.
12 Pēhea tu ù haahuaèkaèka i te Fatu
No te meitaì hakatahi ta Īa i vaièi mai ?
13 E ùtuna au i te ipu o te pohoè.
E vevaò ana i te inoa o te Fatu.
15 He taetae io te Fatu te matena o to Īa huaa.
16 E te Fatu e, o au to Òe tāvini,
Te ènata humutia ta Òe i vevete.
17 E ùtuna au i te hēana haahuaèkaèka,
E vevaò au i te inoa o te Etua.
18 E hana au vāàna i tu ù teào voto,
I mua o te motuhaka nui o to Īa mataèinaa.
TETAUTINA O TO MUA HĀMANI I TO KORINETIA 11, 23-26
E tu ù tau tunane tuehine,
23 o au à, ua tuutia mai e te Fatu i te teào
ta ù i tuu atu ia ôtou, pēènei :
24 I te pō u mākakatia, ua too te Fatu i te faraoa,
u haahuaèkaèka, ua vahi me te peàu :
« O tu ù tino tēnei i haaìòtia no ôtou.
A hana ôtou atii no te haamaakau mai ia ù. »
25 Me hua hakatu, ma hope o te mau,
ua too Īa i te ipu, e peàu aa :
« O te ipu nei, he Piimau hou i òto o to ù toto.
I te ava hakatahi e inu ôtou me io hua ipu,
a hana ôtou no te haamaakau mai ia ù. »
26 Ma èià, i tēia ava, i tēia ava
ua kai ôtou i hua faraoa, ua inu ôtou me io hua ipu,
ua faì atu ôtou i te matena o te Fatu,
e tetaì ana i to Īa hua mai.
HĪMENE VĀNANA :
cf. In.13,34
« U haaìte au ia ôtou i te Ture hou :
A kāòha atu kāòha mai te hoa i te hoa,
me he mea u kāòha atu au ia ôtou. »
EVANERIO O IETU KIRITO VĀÀNA E IOANE 13, 1-15
1 Ma mua o te koìna Pakate, ua ìte Ietu ua tihe to Īa hora
no te taha atu me i te aomāàma nei io te Motua.
Ohia u kāòha Ietu i to Īa huaa te io he aomāàma nei,
u kāòha ia âtou tihe i te paona.
2 E kai aa i te kaina ahiahi,
u haatonake te tiaporo i te koekoe o Iuta,
tama na Timone, no te haaìò ia Ietu.
3 E ìte aa Ietu, ua tuu mai te Motua
i te tau mea paotū ma òto o to Īa îìma ;
ua ìte Īa me io te Etua to Īa ihotia mai,
atii me to Īa hua atu io te Etua,
4 ua tū Īa me io he tapukai.
Ua taki Īa i te kahu uhi pu,
ua too i te tapa me to Īa taka anamai.
5 Ma hope, u kiini Ietu i te vai io he papa
me to Īa hano hooi i nā vaevae o te huaa kouâ ;
u haamoô me te tapa i takatia.
6 Ua tihe Īa io Timone Petero.
U peàu Petero ia Īa :
« E te Fatu e, na Òe e hooi i to ù vaevae ? »
7 U haahua atu Ietu : « E aha te hana e hana nei au,
aòè òe e vivini. Epō iho e vivo ai òe. »
8 U peàu Petero ia Īa : « Koè nui Òe e hooi i to ù vaevae ! »
U haahua Ietu ia īa :
« Me he mea aòè au e hooi ia òe, u te e pii òe me au nei. »
9 U peàu Petero ia Īa : « E te Fatu e,
umoì nā vaevae anaè, atià me nā îìma atii me te upoo. »
10 U peàu Ietu ia īa : « Te ènata i kaukau i te vai, ua àva.
Umoì e hooi hakaùa.
O ôtou nei, u taìtaì ôtou ; atià aòè paotū. »
11 Ua ìte hoì Ietu i tēia e haamākaka mai ia Īa.
Oia te piò u peàu pēènei : « Aòè i taìtaì ôtou nui. »
12 Ia pao te hooi i to âtou vaevae,
ua too hakaùa Ietu i to Īa kahu uhi pu
me to Īa noho io he tapukai.
U peàu i to Īa tau kouâ :
« Aha, u vivini ôtou i te tumu o to ù hana i uē ia ôtou ?
13 U vevaò mai ôtou ia ù : he Tuhuna, he Fatu.
He mea hei to ôtou peàu mai ; oia hoì au.
14 Me he mea u hooi au i to ôtou vaevae,
o au te Fatu me te Tuhuna, a hana atii me ôtou :
a hooi ôtou i nā vaevae te hoa i te hoa.
15 U haaìte atu nei au i te hakatu ia ôtou,
etià e hana ôtou me he mea ta ù i hana i uē ia ôtou. »
NO TE VENINI TAPU
TETAUTINA O TE PEROFETA ITAIA 52, 13-15 ; 53,1-12
13 Eīa e tapavaù to ù tāvini,
e òno nui aè, e fiti aè, e tiketike nui.
14 U peàu te Fatu : « U kiiete nui te mataèinaa
ia tiòhi atu i to ù tāvini :
ohia u mata koè īa, aòè e hakatu ènata hakaùa.
15 Atii te tau hakaìki, e haamāmā i te fafa i mua o to ù tāvini.
E ìte ai âtou i te mea koè anatu i peàutia mai,
e kanino atu i te mea koè anatu i ònotia mai.
53,1 O ai e haatià atu i ta tātou i òno nei ?
Ia ai te ìi o te Fatu i haaìtetia mai ?
2 I te aò o te Etua, ua tiò te tāvini me he kohoe i àò,
me he aka totoo ma he fenua moô.
Ia tiòhi atu, koè īa i poèa, koè īa i kanahau.
3 U haameetia, u titiitia hua tāvini me he mātua kai memae.
U haaìno atu tātou ia Īa me te haapaòpaò aneiho,
u tukitukitia e te uē
hakatu me te mea toomanu e haapiko i to mātou mata.
4 Atià, no tātou te memae e amo nei Īa,
no tātou te uē u òomi i to Īa menava.
5 I to tātou maakau, na te Etua i oonaì, i pehi, i haapaìha iho.
Atià, mēìa i to tātou mikeo, u tīputatia Īa ;
mēìa i to tātou mākaka, i pehitia Īa.
6 Ma ùna o Īa, u topa mai te tuì haamoû mai ia tātou ;
mēìa i to Īa tau maki i oà ai tātou.
Me he muto papauō tātou hakatahi ma to Īa iho puta.
Me te haatopa o te Fatu ma ùna o Īa i te mikeo o tātou paotū.
7 U hanapētia, u haapāpaù, aòè e pepeù i te fafa.
Me he àrenio aahitia i te kukumi.
Me he koivi muto i mua o te ènata tinaì, pepeù koè i te fafa.
8 Ua humutia, haavātia, haakoètia.
O ai to te haamaakau atu i to Īa paona ?
U takitia me io te fenua o te poì pohoè.
U pehitia haamate mēìa i te mikeo o to Īa mataèinaa.
9 U tomitia me he poì haatià koè.
O to Īa menema me te poì moni.
Atià o Īa, koè anatu i mākaka i tītahi,
koè to Īa èo i teào tīkoe.
10 U maìmaì te Fatu e tukituki atu me te memae.
Mēìa u ùtuna atu i to Īa pohoè mea hoko mikeo,
e ìte ai i to Īa tupu i ùna aè, e haakoa aè i to Īa tau â.
Ma io Īa, e tae anamai te hīa o te Fatu.
11 Ma hope o te ûûkina o to Īa kuhane, e ìtetia te māàma,
e tapavaù nui. Ma to Īa memae, e haameitaì tu ù tāvini
i te tini tini ènata a amo ai i to âtou mikeo.
12 No èià, e tuu au io Īa i te tau faètoa,
e àva Īa i te tuhatina taetae me te poì mana.
Ohia à, na Īa ta Īa i ìò atu i te mate,
i tetautia me te poì mikeo.
Mēìa ua amo i te mikeo o te tau tini tini ènata,
u vevaò nei Īa i uē i te poì mikeo.
TARAMO 31 (30), 2.6, 12, 13-14ac, 15-16, 17.25
Io to ìma, e te Fatu e, e tuu nei au i to ù kuhane.
E te Fatu e, io Òe to ù vahi maù.
Umoì e haameetia au ma te tau â paotū.
6 Io to Òe îìma, e tuu nei au i to ù kuhane,
E te Fatu te Etua tiàtohu e, tu ù Haapohoè.
12
U toomanu au nei no to ù tau hoa noho tata,
Ia ìte mai, u haametaù to ù tau hoa.
Ua hiki memao me io ù
Te poì i âvei me au ma no he aanui.
13 U haatūhaatia au me he tūpāpaù ìtekoètia.
U haatūhaa âtou ia ù me he kaù tioàtia.
14 Ua òno au i te teào haapōtoho mai
Ta te faètoa e hano ana no te kukumi mai.
15 U haatià au ia Òe, e te Fatu e.
U peàu hakaùa : o Òe tu ù Etua.
16 I òto o to Òe îìma to ù pohoè :
A taki mai me io te îìma i mākaka ia ù.
17 A pupuà to Òe mata no to Òe tāvini,
Mēìa i to Òe uē, a haapohoè mai.
25 A oko nui te koekoe. Oho te ìi
Ôtou paotū e tetaì nei i te Fatu !
TETAUTINA O TE HĀMANI I TO HEPEREO 4, 14-16-- 5, 7-9
E tu ù tau tunane tuehine.
4,14 Ohia ua ìò Ietu he Tama a te Etua, to tātou Tāuà nui tiketike,
te i tomo i ùna nui o te àni,
a tohe mau tātou i te faì atu i te haatià.
15 Na te mea, u mehea hua Tāuà nui
mēìa i te tau tekateka o to tātou koekoe pepee.
Ua ìte hoì Īa ma te tiàtohu i te nuitina
o te mea haaveke me te haamōtii mai ia Īa,
atià à, u mikeo koè Īa.
16 No èià, a haatata mai tātou haametaù koè
me te Etua mana nui, te tumu o te vaièitina,
vāàna e ìò mai ia tātou to Īa hakāòha
me te karatia no te toko mai, i te ava e hei.
5,7 O Ietu Kirito e pohoè aa i no he fenua nei,
me he ènata mate vave, ua pure Īa i te pure vevaò,
e uē aa, e taaàu aa io te Etua,
etià e haapohoètia me io te mana o te matena.
U apuutia ta Ietu Kirito pure
mēìa i to Īa kāòha me te aotahi atu.
8 E aha à he Tama te Kirito,
ma to Īa memae, u hakako Īa i te aotahitina.
9 Ma èià, ua ìò Īa he toitoi noa i mua o te Etua,
u haatūtia te tumu o te pohoè anatu
no te tau ènata paotū e aotahi ia Īa.
HĪMENE VĀNANA :
cf. Fi. 2,8-9
U aotahi te Kirito tihe i te matena, te matena uo he peka.
Oia te tumu u haatiketike anaè te Etua ia Īa,
me te apa i te inoa ma ùna o te tau inoa ia ôtoa.
TETAUTINA O TE MEMAE O IETU KIRITO
VĀÀNA E IOANE
18, 1-40--19, 1-42
I tēia mou pō,
18.1 ua hee Ietu me to Īa huaa kouâ
i àpai atu o te vaitahe Keterone. Enā i èià e tahi pāpua.
Ua uu Ietu me to Īa huaa kouâ i òto o hua pāpua.
2 O Iuta, te i haaìò ia Ietu, ua ìte meitaì i hua taha,
mea nui hoì te tihena o Ietu i èià me to Īa huaa kouâ.
3 Ua tihe mai Iuta, e haatee aa
i te fatu kape Roma me te tau mūtoi tiaì
i tuutia mai ia īa e te tau tāuà nui me te tau fariteo.
Ua àve âtou i te tau àma hue, te àma kohe me te hāìna tōua.
4 Ua ìte Ietu i te tau hana paotū ta âtou i haapao ma ùna o Īa.
Ua hee Īa i to âtou aò me te peàu :
+ « O ai ta ôtou e ìmi nei ? »
5 U hua atu âtou ia Īa :
F « O Ietu no Natareti. »
U peàu Ietu ia âtou :
+ « O au. »
O Iuta tītahi me âtou.
6 Ia peàu Ietu i tēnei ponateào, O au,
ua hua âtou i muì me te topa i no he tuaèpo.
7 Ua ūi hakaùa Ietu ia âtou :
+ « O ai ta ôtou e ìmi nei ? »
U peàu âtou ia Īa :
F « O Ietu no Natareti. »
8 U hua atu Ietu ia âtou :
+ « U peàu au ia ôtou i kapo nei : O au.
No to ôtou ìmi mai ia ù,
a avai ia âtou a hee atu. »
9 Atii e haatiàtohutia te teào a Ietu, pēènei à :
« Aòè i naò e tahi o te huaa ta òe i tuu mai. »
10 O Timone Petero, ua too i te kohetā ta īa i àve mai.
Ua tā īa i te tueni o te tāuà nui
me to īa haamotu i te puaìna ìma oko o te tueni.
O Marakuto te inoa o hua tueni.
11 U peàu Ietu ia Petero :
+ « A tuu iho i to òe kohetā i to he kato.
Aha, aòè au e inu i te ipu memae
i tuutia mai e tu ù Motua ? »
NO IETU I HAAVĀTIA E ANA ME KAIFA
12 Te fatu kape Roma, to âtou vivini,
te tau mūtoi i pahitia e te tau ati Iuta,
u popoki âtou ia Ietu me te humu ia Īa.
13 Òmua ìka, u aahi âtou ia Ietu io Ana.
He motunoai īa no Kaifa. I hua ava he tāuà nui Kaifa.
14 Na hua Kaifa i peàu i te tau ati Iuta :
« E meitaì atu no ôtou e mate nui te ènata e tahi anaè
i uē i te mataèinaa. »
15 Atià, u ūtaì Petero me tītahi kouâ kē ia Ietu.
Ua ìtetia hua kouâ e te tāuà nui.
Ua uu īa me Ietu io he pāpua o te tāuà nui.
16 Ua noho Petero i vaho o te avaputa.
Ia uu i vaho hua kouâ te i ìtetia e te tāuà nui,
u teào īa me te vehine tiaì avaputa.
U haauu īa ia Petero i òto o te pāpua.
17 U peàu hua vehine tiaì avaputa ia Petero :
A « Aòè à òe tītahi kouâ o tēnei ènata ? »
Ua hua atu Petero ia īa :
D « Aòè au e kouâ no Īa. »
18 Mēìa i te anu, u haauà i te ahi te tau tueni me te tau mūtoi tiaì.
Ua kaapee âtou pii he ahi no te haamāhanahana.
O Petero tītahi me âtou.
19 Ua ūi atu te tāuà nui ia Ietu no to Īa tau kouâ
atii me to Īa hakakotina.
20 U haahua atu Ietu ia īa pēènei :
+ « U teào anatu au etià e vivini ia ù te tau ènata paotū.
U hakako anatu au io he tinakoka me te Hiero,
i èià te putuputu o te tau ati Iuta paotū.
U te e peàu au e tahi teào pūnana.
21 A ape òe i te tau ènata te i haaòno mai
e aha ta ù i peàu ia âtou.
O âtou hoì te i ìte i tu ù hakakotina. »
22 Ia òno i hua ponateào tītahi mūtoi tiaì e tū aa nei,
u papaì ia Ietu me te peàu :
A « Atii ta òe teào i te tāuà nui ? »
23 U hua atu Ietu ia īa :
+ « Me teka tu ù teào, a haaìte mai.
' Ia meitaì tu ù teào,
e aha te piò o to òe papaì ia ù ?
24 I muì iho, ua pahi atu Ana ia Ietu humutia io Kaifa.
25 Atià i èià, pii he ahi, ua kaapee Timone Petero,
e haamāhanahana aa ia īa. U peàu mou ènata ia īa :
A « Aòè à òe tītahi o to īa tau kouâ ? »
U haakoè Petero me te peàu :
D « Aòè au he kouâ no Īa. »
26 U pohā te èo o tītahi tueni o te tāuà nui,
e huaa īa no te ènata i haamotutia te puaìna
e Petero me to īa kohetā. U peàu hua tueni ia Petero :
A « Aha aòè ua ìte au ia òe
io he pāpua me te ènata nei ? »
27 U haakoè hakaùa Petero. Ua tani anamai te moa.
NO IETU HAAVĀTIA E PINATO
28 U aahitia Ietu me io Kaifa io te faè o te hakaìki Roma.
He pōpōuì tika. Atià, aòè i uu te tau ati Iuta
i òto o te faè o te hakaìki Roma, oa havatia âtou i te piò.
E hano hoì âtou i te mau Pakate kai.
29 Ua uu Pinato i vaho no te âvei me âtou. U peàu īa :
A « E aha te piò te hakatio pu ôtou i tēnei ènata ? »
30 Ua peàu âtou ia Pinato :
F « Me he mea aòè īa he ènata mākaka,
u te e haaìò mātou ia òe i hua ènata. »
31 U peàu Pinato ia âtou :
A « A too ôtou ia īa me te haavā vāàna i to ôtou ture. »
U haahua atu te tau ati Iuta :
F « Aòè e koàna ia mātou te haamate i te ènata. »
32 Oia hoì te mea e haatiàtohu ai i ta Ietu i peàu
no te haavivini i te hakatu o to Īa matena.
33 Ua uu hakaùa Pinato io to īa faè
me to īa vevaò ia Ietu. U peàu ia Īa :
A « Aha, o òe te Hakaìki nui o te tau ati Iuta ? »
34 U hua atu Ietu :
+ « Na òe ta òe tenā teào ?
Akoè à na tahipito i peàu mai i ùna o au ? »
35 U peàu Pinato :
A « Aha, he ènata ati Iuta au nei ?
Na to òe mataèinaa me te tau tāuà
i haaìò mai ia òe io ù. E aha ta òe i hana atu ? »
36 Ua hua atu Ietu :
+ « Aòè me i te ao nei to ù hakaìkitina.
Anoa me i te ao nei to ù hakaìkitina,
e tōtōua hoì to ù huaa tautua,
oa haaìòtia au i te poì ati Iuta.
Atià, aòè e hakatu to ù hakaìkitina me to te ao nei. »
37 U peàu Pinato :
A « No èià, he hakaìki òe ? »
Ua hua atu Ietu :
+ « Na òe i peàu. He hakaìki au.
Oia te tumu o to ù fānautina me te tihena
i te aomāàma nei : no te haaìte i te mea tiàtohu.
O te ènata ua kē me te tiàtohu, u haaòno i ta ù teào. »
38 U peàu Pinato ia Īa :
A « E aha te tiàtohu ? »
Ia haafitipona Pinato i hua teào, ua uu hakaùa i vaho.
NO IETU E HAKATIOTIA E PINATO
39 Ua taha Pinato io te poì ati Iuta me te peàu :
A « Aòè i koàna ia ù te piò no te hakatio i hua ènata.
Atià, no te Koìna Pakate, vāàna i to ôtou haa ati Iuta,
e vevete au i tītahi me io he faèhumu.
Aha, u maìmaì ôtou e vevete au
i te hakaìki nui o te tau ati Iuta ? »
40 U taaàu oko ki âtou :
F « Umoì tēia. A vevete ia Parapā ! »
O Parapā hoì he ènata mākaka.
19,1 I muì iho, u peàu Pinato a tootia Ietu no te tā ia Īa.
2 U àana te tau kape i te paè me te teitā taataa.
Ua tuu âtou i hua paè i ùna o te upoo o Ietu.
Ua tomi âtou ia Īa me te kahu uhi pu veàkiki.
3 U haatata mai âtou me Ietu e peàu aa :
F « Kāòha, e te hakaìki o te tau ati Iuta. »
U papaì âtou ia Īa.
4 Ua uu hakaùa i vaho Pinato me te peàu :
A « Eīa. U aahi au ia Īa i vaho nei io ôtou,
etià e ìte ôtou aòè i koàna ia ù
te piò no te hakatio i hua ènata. »
5 Ua uu Ietu i vaho me te paè taataa,
me te kahu uhi pu veàkiki.
U peàu Pinato ia âtou :
A « Oia nei te ènata. »
6 O te tau tāuà nui me te tau mūtoi tiaì,
e tiòhi aa ia Ietu, u taaàu oko ki âtou :
F « A pāoka. A pāokapeka atu ! »
U hua atu Pinato ia âtou :
A « A too ôtou ia Īa. A pāokapeka atu !
Aòè i koàna ia ù te piò no te hakatio ia Īa. »
7 U haahua atu te tau ati Iuta :
F « He Ture no mātou. Vāàna i hua Ture, a mate nui Īa
mēìa u peàu e Tama Īa a te Etua. »
8 Ia òno Pinato i hua teào, ua nui aè to īa haametaù.
9 Ua uu hakaùa Pinato io to īa faè. Ua ūi atu ia Ietu :
A « Me i hea mai òe ? »
Ua mutu Ietu.
10 A tahi a peàu Pinato :
A « Umaha u te e maìmaì òe e teào mai ?
Aòè òe i ìte e mana to ù no te vevete ia òe,
akoè à e mana to ù no te pāokapeka ia òe ? »
11 U haahua Ietu :
+ « He mana ta òe i ùna o au
mēìa i tuutia ia òe e te Etua.
No èià, nui atu te mikeo o te ènata
te i haaìò ia ù i to òe îìma. »
12 Oia te tumu ua hano Pinato e vevete ia Ietu.
Atià, u taaàu te tau ati Iuta me te peàu :
F « Me vevete òe i tēnei ènata, aòè e hoa òe no Ketare.
O te ènata i hano ia īa haahakaìki nui,
ua hano hua ènata e tōua me Ketare. »
13 Ia òno Pinato i hua teào, u peàu no te aahi ia Ietu i vaho.
U kaapee īa ma ùna o to īa nohona haavā teào,
io he vahi i vevaòtia Tohua keâ,
o Kapata ma he èo hepereo.
14 He â i peàutia no te haapei i te Koìna Pakate,
o hua â nei, i te oatea nui.
U peàu Pinato i te poì ati Iuta :
A « O īa nei to ôtou hakaìki nui. »
15 U taaàu âtou :
F « A mate ! A mate. A pāokapeka atu ! »
U peàu Pinato :
A « E pāokapeka au i to ôtou hakaìki ? »
U haahua atu te tau tāuà nui :
F « O Ketare aneiho to mātou hakaìki. »
16 A tahi a haaìò Pinato ia Ietu, etià e pāokapekatia e âtou.
NO TO IETU PĀOKAPEKATINA
17 Ua too âtou ia Ietu me te aahi atu.
E amo aa Ietu tootahi i to Īa peka,
ua taha Īa io te vahi apatia Karavario,
o Korokota ma he èo hepereo.
18 I èià, u pāokapeka âtou ia Ietu.
U pāokapeka âtou i nā ènata kē tokoùa :
i tēia kēkē tītahi, i tēia kēkē tītahi.
O Ietu i vāvena.
19 U kānea Pinato e tahi mēmau patutia.
U tauèvatia hua mēmau uo he peka.
Oia nei te mea i patutia :
« O Ietu no Natareti, te Hakaìki nui o te tau ati Iuta. »
20 He mea nui te tau ati Iuta te i tetau i hua teào haaìte,
na te mea ua tata me te pāpuafaè
te taha i èià u pāokapekatia Ietu.
U patutia ma he èo hepereo, te èo hereni, te èo ratino.
21 U peàu te tau tāuà nui ia Pinato.
F « Umoì e patu : e hakaìki nui o te tau ati Iuta. »
A patu pēènei : u peàu hua ènata :
O au te hakaìki o te tau ati Iuta. »
22 U haahua Pinato :
A « O te mea ta ù i patu, ua pao i te patu. »
23 Ia pāokapekatia Ietu e te tau kape,
ua too âtou i to Īa tau kahu me te hopehope e fā pāio,
pāio kē to te hoa, pāio kē to te hoa.
Ua too âtou me to Īa kahu òa.
Atià, aòè i tuitia hua kahu.
E tahi tapa aneiho me i ùna tihe atu i àò nui.
24 U peàu âtou :
A « Umoì e veti, a tuha tātou ma te haakai. »
Ua pao hua mea etià e toitoi te teào
i patutia io he Hāmani tapu :
« Ua tuha âtou i to ù kahu, u haakai i to ù kahu òa. »
Oiana ta te tau kape i haapao.
NO TO IETU MATENA
25 U maô pii te peka o Ietu to Īa kui me te teina o to Īa kui,
te vehine a Kereopa, o Maria te inoa, o Maria Matarena.
26 E tiòhi aa Ietu i to Īa kui
me to Īa kouâ tāhia ma to īa kaokao,
u peàu i to Īa kui :
+ « E te vehine, o īa nei ta òe tama. »
27 I muì iho, u peàu i to Īa kouâ :
+ « O īa nei to òe kui. »
Me i tēia ava aneiho, ua too te kouâ ia Maria io to īa faè.
28 Ua ìte Ietu ua pao te mea ta Īa i haapao,
no te haatoitoi i tītahi ponateào patutia io he Hāmani tapu,
u peàu :
+ « Ua paka au i te vai. »
29 Enā i èià e tahi ipu pī i te vīneka.
U haakutaùtia me te vīneka tītahi mēmau omotai.
U haamautia hua mea omotai ma ùna o te manamana âkau.
U haatatatia me to Ietu fafa.
30 Ia ako Ietu i te vīneka, u peàu :
+ « Ua pao ònaòna. »
A tahi, e oha aa Ietu i te upoo, ua tuu atu i te kuhane.
(A noho muò, a kaituto)
NO TE VEÒ I TE KAOKAO O IETU
31 Oia te â no te Haapei i te Koìna Pakate.
He â tapu oko no te tau ati Iuta tēia koìna,
tōtahi atu mēìa e faitia ma te Tāpati.
No èià, ua ape âtou ia Pinato
a fafati i nā vaevae o te tau ènata i pāokapekatia
me te taki iho i to âtou tino
oa èva âtou i hua â uo he peka.
32 Ua tihe mai mou kape te i fafati i te tau pūhāvaevae
o nā ènata i pāokapekatia me Ietu.
33 Ua tihe âtou io Ietu, ua ìte u mate nui,
aòè âtou i fafati i to Īa vaevae.
34 Atià, tītahi kape, me te taa, ua veò i to Īa kaokao.
Ua tahe anamai te toto me te vai.
35 Na te ènata i ìtemata te i haatiàtohu i hua mea.
He teào tiàtohu ta īa.
Ua ìte te Fatu : u peàu īa i te mea tiàtohu,
etià e haatià me ôtou.
36 U haapaotia hoì hua mea etià e toitoi
te teào o te Hāmani tapu te i peàu :
« Umoì e fafatitia e tahi o to Īa tau ivi. »
37 U patutia io he vahi kē :
« E tiòhi ai âtou i tēia ta âtou i tīputaèe. »
NO TE TOMINA O IETU
38 I muì iho, ua ape Ioteve no Arimatea ia Pinato,
no te too mai i te tino tūpāpaù o Ietu.
He kouâ Ioteve no Ietu, atià ma te haapupuni
na te haametaù i te tau ati Iuta.
Ua ao Pinato. Ua tihe Ioteve
me to īa taki atu i te tino o Ietu.
39 Ua tihe me Nikotemo.
O īa te i âvei me Ietu, òmua i te pō.
Ua àve mai īa i te mea kekaa, me he e ìma ònohuu kiro,
he mira me te aroe ua pao i te kāvohi.
40 Ua too âtou i te tino o Ietu,
ua fāfī me te tapa me te mēmau kekaa.
Ua hana aneiho âtou vāàna i te haa ati Iuta
no te tomina i te tino tūpāpaù.
41 Enā i èià, tata èka me te taha o to Īa pāokapekatina,
e tahi pāpua me te ana tūpāpaù hou.
Òmua, aòè i tomitia tītahi tino tūpāpaù i òto o hua ana.
42 Mēìa i te â Haapei i te Koìna Pakate,
ohia mea tata èka hua ana tūpāpaù,
i èià ua tomi âtou ia Ietu.
TE PŌ PAKATE
1 - TETAUTINA O TE HĀMANI A MOITE PEÀUTIA TENETE
1, 1-31--2, 1-2
1 I te tumu, u pēpena te Etua i te àni me te fenua.
2 O te fenua à, e hakatu koè, kiko koè.
Ma ùna o te peteò, he pō keevō,
ma ùna o te tau vai, e ona nei te kuhane o te Etua.
3 U peàu te Etua : « A māàma ! »
Me te māàma anamai.
4 Ua ìte te Etua u meitaì te māàma.
Me te haapae o te Etua i te māàma me io he pō keevō.
5 Ua apa te Etua i te māàma, he â.
Ua apa te Etua i te pōtano, he pō.
Me te ahiahi me te pōpōuì anamai.
Pō a tahi.
6 U peàu te Etua :
« A papafenua ma vāvena o te tau vai,
mea haapae i te tau vai me io te tau vai. »
7 Ua hana te Etua i te papafenua,
me te haapae i te tau vai ma ùna o te papafenua
me io te tau vai ma àò o te papafenua.
Ua pao anamai atii.
8 Ua apa te Etua i te papafenua, he àni.
Me te ahiahi me te pōpōuì anamai.
Pō a ùa.
9 U peàu te Etua :
« A putu mai ma he ava e tahi,
te tau vai ma àò o te àni,
a ìtetia mai te vahi moô. »
Ua pao anamai atii.
10 Ua apa te Etua i te vahi moô, he fenua.
Ua apa i te tau vai, he tai.
Ua ìte te Etua he mea meitaì.
11 U peàu te Etua :
« A tupu te fenua i te mutiē,
i te teitā e hua nei i te kākano,
me te tumu âkau e hua nei i te puu
e avai nei ma òto te kākano ma to īa hakatu. »
Ua pao anamai atii.
12 Ua tupu te fenua i te mutiē,
i te teitā e hua nei i te kākano ma to īa hakatu,
me te tumu âkau e hua nei i te puu
e avai nei ma òto iho o te kākano ma to īa hakatu.
Ua ìte te Etua he mea meitaì.
13 Me te ahiahi me te pōpōuì anamai.
Pō a toù.
14 U peàu te Etua :
« A tauèva mou àma ma àò o te papafenua o te àni,
mea haapae i te â me i te pō.
A ìò âtou he mou hakatu e tuhi i te tau ava koìna,
te tau â me te tau èhua.
15 E ìò hua tau àma ma àò o te papafenua o te àni,
mea tūìna i te fenua. » Ua pao anamai atii.
16 U kānea te Etua i nā àma keîkeî e ùa.
O te àma keî oko mea vivini i te â,
me te àma iti mea vivini i te pō, i muì iho te tau fetū.
17 U tauèva te Etua ia âtou io te papafenua o te àni
mea tūìna i te fenua,
18 mea vivini i te â me i te pō,
mea haapaekē i te māàma me io te pō keevō.
Ua ìte te Etua he mea meitaì.
19 Me te ahiahi me te pōpōuì anamai.
Pō a fā.
20 U peàu te Etua : « A pī nui te tau vai
i te nuitina o te mēmau pohoè.
A ona te manu ma ùna o te fenua,
i àò o te papafenua o te àni. »
21 U pēpena te Etua i te tau ià tai hakaìpaìpa pē
me te ià pohoè hakatahi e nokenoke nei,
e pī nei ma he tau vai, vāàna i to âtou hakatu,
me te manu pekeheu hakatahi vāàna i to âtou hakatu.
Me te ìte o te Etua he mea meitaì.
22 U haameitaì atu te Etua ia âtou e peàu aa :
« A tuputupu, a nuinui, a haapī i te tau vai me te tai,
a nuinui me te tau manu ona ma he fenua. »
23 Me te ahiahi me te pōpōuì anamai :
Pō a ìma.
24 U peàu te Etua :
« A pī te fenua i nā puaa pohoè vāàna i to âtou hakatu,
te tau puaa kai, te tau puaa totoo,
te tau puaa hae vāàna i to âtou hakatu.
Ua pao anamai atii.
25 U kānea te Etua i te tau manu hae vāàna i to âtou hakatu,
me te tau puaa kai vāàna i to âtou hakatu
me te puaa paotū totoo ma ùna o te fenua
vāàna i to âtou hakatu.
Ua ìte te Etua he mea meitaì.
26 U peàu te Etua : « A kānea tātou i te ènata
he ata no tātou, e haahakatu me tātou aneiho.
A vivini īa i te ià o te tai,
i te puaa kai me te puaa hae paotū,
i te tau puaa paotū e totoo nei ma ùna o te fenua. »
27 U pēpena te Etua i te ènata e ata no Īa.
He ata no te Etua i pēpena atu ai i te ènata.
He āhana, he vehine i pēpena atu ai ia âua.
28 U haameitaì atu te Etua ia âua.
U peàu atu te Etua ia âua :
« A tuputupu, a nuinui, a haapī i te fenua, a tuàki atu :
a vivini i te ià o te tai me te manu o te ataàni
me te puaa hakatahi totoo ma ùna o te fenua. »
29 U peàu te Etua :
« Eīa, ua tuu au no ôtou i te teitā paotū e hua nei i te kākano,
e avai nei ma ùna o te fenua tiàtohu me te tumu âkau paotū
e hua nei i te puu me te kākano i òto : a kai ôtou i tēia kai.
30 Atii i te puaa hae paotū me te manu paotū o te ataàni,
i te mēmau paotū e totoo ma ùna o te fenua,
i te mēmau paotū me te menava o te pohoètina,
ua tuu atu au i te teitā hakatu kē no te kai.
Ua pao anamai atii.
31 Ua ìte te Etua i ta Īa mea paotū i hana, eīa he mea meitaì nui.
Me te ahiahi me te pōpōuì anamai :
Pō a ono.
2,1 Atii ua pao anamai te àni me te fenua
me to âua mēmau paotū i òto.
I te pō e fitu, ua haapao te Etua i te hana ta Īa i hana.
2 U hakaēa ma te pō e fitu me i te hana paotū
TARAMO 104 (103) 1-2a, 5-6, 10.12, 13-14b, 24.35c
E te Fatu e, a pōpahi i to Òe Kuhane no te haahou
i te hakatu o te fenua. cf. 104,30
1 A haameitaì i te Fatu, e tu ù kuhane e.
E te Fatu e, tu ù Etua e, u tiketike Òe.
Ua tāpītia Òe me te kāìè
2 O te àma, te kahu e fāfī ia Òe.
5 E haamau Òe i te tūàka o te fenua,
Etià e neue koè ma te tau tai a tihe nei.
6 Ua uhitia hua fenua me te tau tai.
Òmua, u haanaò te vai i te tau tuaivi.
10 Io te vao nui, e haapihiti Òe i te punavai.
E tahe te vai ma io he kaavai hōhonu o te tuaivi.
12 Ua noho pii o hua vai te nuitina o te manu ;
Ua ònotia te tanitina o to âtou èo.
13 Me io to Òe nohona, u fāinu Òe i te tau tuaivi,
Ua kai haamaòna te mēmau pohoè i to Òe tau puu.
14 U haatupu Òe i te teitā no te tau naho ànimara,
U haatapavaù i te pāpua o te ènata paòpaò i te hana.
24 He mea nui to Òe hana, e te Fatu e.
Na to Òe māàma i pēpenatia te tau mēmau paotū.
Ua pī te fenua i to Òe tau taetae.
A haameitaì i te Fatu, e tu ù kuhane e !
Akoè à
TARAMO 33 (32) 4-5, 6-7, 12-13, 20.22,
Ua pī te aomāàma i to Òe tau hana kāòha, e te Fatu e.
33,5
4 He toitoi noa te Teào a te Fatu.
U tiàtohu anaè to Īa tau hana paotū.
5 U haataetae Īa i te hakatu toitoi, hakahae koè.
Ua pī te aomāàma i to Īa tau hana kāòha.
6 U pēpena te Etua i te àni na to Īa teào.
U kānea Īa i te aomāàma na te mana o to Īa ao.
7 U haapuke Īa i te tai me te haapākeka, oa neke īa.
U tāpae Īa i te moana me te tau taetae i òto.
12 Mamau te mataèinaa ia ìò te Etua he Fatu no īa.
Mamau te fenua vaetia me he pāpua no te Fatu.
13 Me io he àni, u tiòhi meitaì te Fatu
E ìte aa i tēia ènata, i tēia ènata.
20 O te Fatu te tumu o to tātou pohoè.
O Īa to tātou toko me te vevao.
22 E te Fatu e, a noho mau to Òe kāòha i ùna o mātou
Atii me mātou e tetaì mau i to Òe vaièitina.
2. - TETAUTINA O TE HĀMANI A MOITE PEÀUTIA TENETE
22, 1-2.9a.10-13.15 (22, 1-13.15-18)
1 U haahiiveke te Etua ia Aparahamo me te peàu ia īa :
« E Aparahamo e ! » U haahua atu īa : « Eīa au nei. »
2 U peàu te Etua : « A too i ta òe tama, te tamaòa tootahi,
te tama ta òe e haataetae nei, o Itaako.
A hee atu io te Fenua Moria ; i èià, a ùtuna mai ia īa
i ùna o te tuaivi e haaìte atu au ia òe. »
3 I te pōpōuì tika, ua aa Aparahamo
me ta īa haapei i te pūriki.
U vevaò īa i nā pahinaèo e ùa me Itaako ta īa tama.
U haapūpā i te vehie no te ahi tapu.
Ua fiti īa i uta, io te tuaivi ta te Etua i peàu atu.
4 I te â e toù, u feau Aparahamo
me to īa ìte memao i te tuaivi peàutia e te Etua.
5 U peàu Aparahamo i ta īa nā pahinaèo :
« A noho ôùa înei me te pūriki.
O au nei me te tama e fiti māua i èià.
Ia pao to māua moe haatona me te pure, e hua mai māua. »
6 Ua too Aparahamo i te pūpā vehie
me ta īa tuu ma ùna o te paufifi o Itaako, ta īa tama.
Ua tooìma īa i te ahi me te kohe.
U fifiti âua amana tokoùa.
7 U peàu Itaako ia Aparahamo : « E to ù motua e. »
U haahua atu : « Eīa au nei, e tu ù tama e. »
U peàu Itaako :
« Enā te ahi, enā me te vehie, i hea te hēana ? »
8 U haahua atu Aparahamo :
« Na te Etua e haaìte mai i te hēana, e tu ù tama e. »
U fifiti âua amana tokoùa.
9 I te ava ua tihe âua i te vahi peàutia e te Etua,
u haatū Aparahamo i te fātaapure
me te tuu i te vehie ma ùna.
U kitii Aparahamo i ta īa tama, ia Itaako,
me te tuu atu ma ùna o te fātaa, uo he puke vehie.
10 U hapai Aparahamo i te ìma,
ua too i te kohe no te kukumi i ta īa tama.
11 A tahi a vevaò te anera o te Fatu Etua me io he àni
me te peàu : « E Aparahamo, Aparahamo e. »
U haahua atu ia : « Eīa au nei. »
12 U peàu te anera : « Umoì òe e tā i te māhaì.
Umoì òe e haamemae ia īa.
Ua ìte au i tēnei i te mea u pakaihi òe i te Etua.
Aòè hoì òe i kaikino mai i te tama, ta òe tama tootahi. »
13 A tahi a feau Aparahamo me to īa ìte i te koimaa keukeu
te i haaveketia io he maateitā keoho.
Ua hano īa i te keukeu too,
me to īa ùtuna atu i te hēana io te kōava o ta īa tama.
Ua apa Aparahamo i hua vahi : « Ua ìte te Fatu Etua. »
15 Na te anera o te Fatu Etua me io he àni
i vevaò hakaùa ia Aparahamo me te peàu pēènei :
16 « He teào a te Fatu Etua. E haatiàtohu au ma to ù iho inoa :
mēìa u aotahi mai, aòè òe i kaikino i te tama,
ta òe tama tootahi, e haameitaì me te vaièi nui au ia òe.
17 E haanui au tini, tini i to òe ati i ùna aè,
me he nui o te fetū io he ataàni,
me he nui o te one io te hiku o te tai.
E haahina âtou i te pākeâ me te mōuna tōua
o te mataèinaa e ahi me âtou.
18 Mēìa u aotahi mai òe, e haameitaì atu haameitaì mai
te tau mataèinaa paotū ma te vevaò mai i to òe inoa. »
TARAMO 16 (15), 5.8, 9-10, 1b.11
E tu ù Etua e, a tiaì meitaì ia ù ; io Òe anaè tu ù tetaì.
cf. 16,1
5 O te Fatu te hope taetae ua ìò ia ù.
Io to Òe ìma, e te Fatu e, to ù pohoètina.
8 I mua o to ù mata anatu te Fatu,
Ma to ù kaokao to Īa noho, u haametaù koè au.
9 Ua û i te koakoa to ù kuhane.
U èkaèka to ù tino, ua moe me te moû.
10 Aòè te Fatu e ao e hina au i te matena.
Aòè Īa e avai i to Īa hoa e pē ai io he èpo.
1b E tu ù Etua e, o to ù hīa, io Òe tu ù vahi maù.
11 U aahi mai Òe ma no he aanui o te pohoè ;
I mua o to Òe mata, te koakoa, te koakoa nui.
Ma to Òe kaokao, te èkaèka paona koè.
3. - TETAUTINA O TE HĀMANI A MOITE PEÀUTIA EHOTO
14, 15-31 -- 15,1a.
Ia ìte te poì o Iraene u tatai mai te pūpū kape Ekipito,
ua pī âtou i te haametaù.
14,15 U peàu te Fatu Etua ia Moite : « No te aha te taaàu io ù ?
A peàu i te tau tama Iraene a tataha atu.
16 O òe, a too i to òe tootoo,
a hapai i to ìma ma ùna o te tai, e vahitia ma vāvena.
A taha atu te poì Iraene io he tai,
paìpaì koè nā vaevae.
17 O au à, e haafeò i te koekoe o te poì Ekipito.
Ma hope o ôtou, e taha âtou io he tai.
E haakāìètia au e te hakaìki Faraone,
to īa tau pūpū kape, to īa tau pāriri, to īa tau ihovare.
18 E ìte to Ekipito o au te Fatu Etua,
ia pao i te tuàki te hakaìki Faraone me to īa tau pāriri
me to īa tau pūpū kape piki ihovare.
19 Enā ma mua o te pāpua o te tau tama Iraene
te anera o te Etua ; ua hee īa i hope atu.
Hua mea te kohu keekee te i ūtaì i te pūpū tama Iraene ;
ua hee īa i hope atu.
20 Ua tū te kohu keekee i vāvena o te pāpua
o te tau kape Ekipito me te pāpua o to Iraene.
I te tūmoe, e ùa hakatu hua kohu :
he pō keevō i te kēkē Ekipito, he àma pupuà i te kēkē Iraene.
I te pō, u te e haatata mai to Ekipito me to Iraene.
21 U hapai Moite i te ìma ma ùna o te tai.
Ma te tiàtohu o te pō, ua puhi te Etua i te metani oko
me i te kēkē tihena òumati.
Ua hee pororō nui te tai, vahitia ma vāvena.
22 Ua taha atu to Iraene paìpaì koè te vaevae.
Ua tū anaè te tai me he pā i te ìma oko,
me he pā i te ìma aèaè.
23 U tatai i to Iraene i te poì Ekipito,
te hakaìki Faraone me to īa tau ihovare,
to īa tau pāriri, to īa tau pūpū kape.
Ua tihe âtou paotū i vāvena o te tai.
24 I te hāhakateiao, me i vāvena anamai o te kohu,
u tiòhi mai te Fatu i te tau pūpū kape Ekipito.
U haahina te Fatu ia âtou.
25 U haakati Īa i to âtou pāriri, he mea hana nui te aahi atu.
U peàu to Ekipito : « A hihiki tātou i mua o Iraene.
U tōua te Fatu, e toko aa ia âtou. »
26 U peàu te Fatu Etua ia Moite :
« A hapai i to òe ìma i ùna o te tai.
A hua anamai te tai ma ùna o te tau kape Ekipito,
to âtou pāriri, to âtou poì piki ihovare. »
27 U hapai Moite i te ìma ma ùna o te tai.
I te pōpōuì tika, ua hua te tai i to īa kōava.
U hihiki to Ekipito.
Ua tomi te Fatu ia âtou i te take o te tai.
28 Ua fiti te tai. U tomitia te tau pāriri,
te poì piki ihovare, te tau pūpū kape o Faraone
te i tohuti ma hope o te tau tama Iraene.
Aòè e tahi aneiho i toe atu.
29 Te tau tama Iraene à,
ua taha atu âtou paìpaì koè nā vaevae ;
me he pākeâ te tai i to âtou ìma oko me te ìma aèaè.
30 I hua â, u haapohoè te Fatu ia Iraene
me i te îìma o te tau Ekipito.
I te hiku o te tai, ua ìtemata Iraene
i te puke tino tūpāpaù o te poì Ekipito.
31 A tahi nei a ìte Iraene i te hana mana o te Fatu Etua
te i haahina i to Ekipito.
U pakaihi me te haametaù te mataèinaa Iraene i te Fatu.
U haatià âtou i te Fatu Etua, ia Moite, ta īa tāvini.
15,1 Ua hahi Moite me te tau tama Iraene i te Fatu Etua,
e hīmene ana pēènei :
HĪMENE A MOITE = Ehoto 15, 2, 3-4, 5-6, 10a-11, 17
A hahi tātou i te Fatu, u pupuà to Īa kāìè ;
o te Fatu to tātou ìi. 15,1a
2 O te Fatu tu ù ìi. No Īa tu ù hīmene hahi.
O te Fatu tu ù Etua, te i haapohoè mai.
Ua faì au i to Īa òno nui.
U haatiketike au i te Etua o to ù tupuna.
3 O te Fatu te toa mana io he tōua,
He Fatu Etua to Īa inoa.
4 U tioà Īa io he tai i te pāriri o Faraone.
Io he tai, u haanaò Īa i to Ekipito tau kape.
5 Ua tomitia âtou io he peteò ;
Ua kaò me he keâ io he take o te tai.
6 E te Fatu e, ua mana to Òe ìma,
U haapaìha i te poì e tōtōua me Òe.
10 Ua puhi te Fatu : ua tomitia âtou io he moana.
11 O ai te ètua e kiko me Òe, e te Fatu e ?
O ai e tūtū me Òe, te Peàto nui,
Te tumu o te mana haahopo i te ènata ?
17 U aahi mai Òe ia âtou me te tanu io he fenua
I ùna o te tuaivi ta Òe i haataetae.
E te Fatu e, oiana te taha o to Òe noho,
Te faè tapu ta Òe i haatū, e te Fatu Etua e.
4. - TETAUTINA O TE PEROFETA ITAIA 54, 5-14
Oia nei ta te Fatu Etua i peàu ia Ierutaremi :
5 He āhana no òe te Etua te i pēpena ia òe.
O te Fatu o te aomāàma, to Īa inoa.
He Haapohoè no òe te Etua peàto no Iraene.
Te Etua o te fenua ia ôtoa to Īa inoa.
6 E Ierutaremi e, te vehine titiitia, haameetia,
E vevaò hakaùa te Etua ia òe.
U peàu te Fatu Etua pēènei :
« E aha e titii te hoa mātiri
i ta īa vehine vaetia i te ava hou te tino ? »
7 U haatūhaa au ia òe no te ava poto.
Ma òto o to ù kāòha nui ia òe, e haakātahi mai hakaùa.
8 Mēìa i tu ù peê, u haapiko i tu ù mata me io òe.
Ma òto o tu ù kāòha paona koè, u matavaièi mai hakaùa.
Oia te teào o to òe Haapohoè, te Fatu Etua.
9 Me he mea i te tai kākiu i mua o Noa,
u haatiàtohu au i tu ù teào pēènei :
umoì e haanaòtia te fenua i te vaiā,
atii tēnei u haamau i tu ù teào :
Aòè au e peê ia òe.
Aòè e oonaì ma te haametaù ia òe.
10 E aha à e takitumutia te tau tuaivi,
E aha à e feùu te tau pūkei,
U te e huìkē to ù kāòha ia òe.
U te e hakaēa tu ù Piimau o te moû me òe.
Oia nei te Teào a te Fatu Etua, te i kāòha ia òe.
11 E Ierutaremi e, òmua u haameetia,
u haapūpūkinatia, u titiitia òe.
Enā e haakeàpa au i to òe pā me te tau keâ menia èreère.
He tau keâ pūkiki te puke keâ o to òe tūàka.
12 E pupuà to òe pā i te tau keâ pīàma pōnionio i te òumati.
He mea karahi to òe tau avaputa.
13 E haamāàma te Etua iho i ta òe tau tama.
E noho anatu to te Etua moû i ùna o âtou.
14 E tohe mau òe i òto o te toitoi.
E haamemaotia me io òe te tau kōfii e òomi mākaka.
Aòè òe e haametaù hakaùa,
e koè ai te mea haahopo.
TARAMO 30 (29) 3-4, 5-6b, 6c.12, 13,
U haatiketike au ia Òe, e te Fatu e, te i haatū ia ù. 30,2
3 I te ava e taaàu to ù èo io Òe,
E te Fatu, tu ù Etua e, u haameitaì mai.
4 Ua taki mai Òe me io he ōpata,
U haapohoè mai me io te ana o te tūpāpaù.
5 A hahi i te Fatu, ôtou, e te poì haatià e.
A haahuaèkaèka ma te haaòno nui i to Īa inoa.
6 He ava poto to te Etua peê,
Ma te òa o te pohoè to Īa haameitaì.
I te ahiahi, e tahe te vaimata,
Ma te pōpōuì te taaàu koakoa.
12 U haaìò Òe i tu ù uēuē me he â koìna.
Ua veti i to ù kahu pēpē no te uhi mai me te koakoa.
13 A taaàu i te koakoa, e tu ù kuhane.
Umoì òe e mutu pu, a haakoìna no te Fatu.
E hahi au hakaēa koè i te Fatu, tu ù Etua.
U haahuaèkaèka au ia Òe, e te Fatu e.
5. - TETAUTINA O TE PEROFETA ITAIA 55, 1-11
1 Oia nei te Teào a te Fatu Etua :
E mate ôtou i te paka vai ? A mai. A inu.
Moni koè ôtou ? A hoko pu.
A kai. A inu i te vino, i te vaiū.
2 Umoì e haapao pu i ta ôtou moni hana
no te kai i te înaì haamaòna koè.
3 A haaòno mai. E maòna ôtou i te înaì mōmona.
A haaòno mai. Mave mai. E pohoè meitaì ôtou.
E haatoitoi au me ôtou i te Piimau paona koè.
E ìò hoì ia ôtou te taetae o Tavite.
4 Ua haamau au ia īa he ènata no ù i vāvena o te tau mataèinaa, te aahi, te vivini o te tau ati.
5 O òe à, e vevaò òe i tītahi ati aòè òe i ìte ;
e tihe mai io òe tītahi ati kē mēìa i to òe Fatu Etua,
te Peàto Nui o Iraene te i haakāìè ia òe.
6 A ìmi ôtou i te Etua, oia te ava e âvei me Īa.
I te ava nei, a pure ôtou i te Etua,
u tata èka me ôtou.
7 A hua mai te ènata mākaka me io to īa aanui hukaka.
A titii te ènata ìno i to īa maakau pē.
A hua io te Etua te i hakāòha mai ia īa.
8 He mea kē hoì te maìmaì o te Etua,
mea kē to te tau ènata.
He mea kē te hakatu o te Etua,
mea kē to te tau ènata.
9 Atii te tiketike o te àni ma ùna o te fenua,
atii te hōhonu atu o te maakau o te Etua
ma ùna o te maakau ènata.
10 Ia topa te ūa me te nive me io he àni,
u haakutaù me te haatapavaù i te fenua.
U haatupu âtou i te teitā, haahua i te puu
no te tāfai i te tau ènata me te tau manu e kai aa.
11 Atii hoì te teào ta ù i haaìte atu :
E hana tēia teào i te hana ta ù i maìmaì.
U te e hua io ù ta ù teào puu koè.
HĪMENE ITAIA 12, 2, 4b-e, 5b-6a.c,
O te Fatu Etua te vaipuna o te pohoè ;
a èkaèka tātou, a taaàu i te koakoa ! 12,3
2 O te Fatu Etua tu ù haapohoè.
U haatià nei au, haametaù koè.
O te Fatu Etua tu ù ìi. E hīmene au ia Īa.
Io te Fatu te tumu o to ù pohoè.
4 A haahuaèkaèka i te Fatu. A hahi i to Īa inoa,
A faì atu io te poì êteni i to Īa tau hana mana.
A haaìte atu : he Tiketike to Īa inoa.
5 A haatani i te pū no te hahi i te Fatu.
Ua hana hoì te Fatu i te hana mahaò.
U mevaha to Īa òno nui ma nā fenua vii pu.
6 E Tiona e, a èkaèka, a taaàu i te koakoa.
U tiketike te Fatu Etua i vāvena o ôtou.
6. - TETAUTINA O TE PEROFETA PARUKO 3, 9-15.32-38 --4, 4
9 E te mataèinaa Iraene.
A haaòno i te teào haameitaì i te pohoè.
A apuu i te teào haamāàma ia òe.
10 E to Iraene, no te aha ua noho òe
i te fenua o te tau ènata e tōtōua me òe ?
No te aha ua ìò òe he kooūa i te fenua hāoè ?
11 Ua havatia òe ma te haatukia me te tino tūpāpaù.
U tetautia i vāvena o te huaa mamate i Havaiki.
12 Oia nei te piò : u titii òe i te puna o te Māàma.
13 Anoa òe i taha ma no he aanui o te Etua,
ua noho òe me te moû i to òe fenua.
14 A haamaakau òe i hea te māàma, te ìi, te ìtetina.
Ma èià, e ìte òe i hea te tumu o te pohoè òa,
i hea te àma e haatāhakahaka i to òe kikomata,
i hea te moû.
15 E noho te Māàma i hea ? O ai te i ìte ?
O ai te i uu io te pāòto o to te Māàma taetae ?
32 O te Etua te i tuhi i te aanui o te Māàma.
Ua ìte Īa i te tau mea ia ôtoa.
Ua ìmi Īa i te tau mea paotū.
U kānea Īa i te aomāàma vii pu.
U haapī Īa i te fenua me te tau ànimara kē, ànimara kē.
33 Ua pahi Īa i te àma te i hee atu, hee atu paona koè.
U vevaò Īa i hua àma, ua taha mai,
e aotahi aa me te emièe.
34 U tāmiomio te tau fetū i te pō, me he mea u koakoa âtou.
35 U vevaò te Etua ia âtou,
u haahua âtou e peàu aa : « Eīa au nei. »
U keàpa âtou no te haaèka i te i pēpena ia âtou.
36 O Īa hoì to tātou Etua.
Aòè te Etua kē i mua o Īa.
37 Ua ìmi Īa i te aanui o te Māàma.
Ua tuu Īa i hua aanui ia Iakopo, to Īa tāvini,
ia Iraene ta Īa i haataetae.
38 Ma èià, u haaìte ia Īa iho i te Māàma i no he fenua nei.
Ua noho te Māàma i vāvena o te tau ènata.
4, 1 He Teào o te Etua hua Māàma.
Oia te Ture te i noho mau ma te tau tai anatu.
E pohoè te tau ènata e aotahi i hua Teào.
E mate nui te tau ènata e titii i hua Teào.
2 A hua mai, e Iakopo e.
A apuu me te aotahi mau i te Teào.
A tūìna te Teào i te aanui e aahi ia òe
io he pohoè kanahau.
3 Aua e too pu te mataèinaa kē i to òe kāìè.
Aua e hao te ati kē i to òe iho taetae.
4 Oho te ìi, e Iraene ! A oko òe !
Ua ìte tātou i te mea te i haaèka i te Etua.
TARAMO 19 (18) 8, 9, 10, 11,
E te Etua e, io Òe te teào e aahi atu i te pohoè anatu.
cf. In 6,69
8 U toitoi noa te ture o te Fatu,
Na īa e haahou i to tātou ìi.
U tiàtohu te Teào a te Fatu,
Te i haamāàma i te poì avai noa.
9 U toitoi te Teào a te Fatu,
E haakoakoa âtou i te koekoe.
U hōata te maìmaì o te Fatu,
E haakeàpa i te mata o te ènata.
10 U taìtaì te pakaihitina o te Etua,
E noho mau anatu to īa tau puu.
U toitoi te teào paotū o te Fatu :
He māàma âtou no te haavā i te ènata.
11 U taetae atu te maìmaì o te Fatu
I te puke moni kiki, te kuà o te moni kiki.
He mānini atu te Teào a te Etua
I te mānini tikauè e tahe me io he tīpapa
7. - TETAUTINA O TE PEROFETA EHEKIERE 36, 16-28
16 Ua òno au i te Teào a te Fatu, pēènei à :
17 « E te ènata e, i nā pō e noho nei te mataèinaa Iraene
io to âtou fenua, u havatia hua fenua e âtou
mēìa i to âtou hakatu faufau me to âtou hana pē.
18 U haatopa au ma ùna o âtou i te tuki pē,
mēìa i te toto ta âtou i kiini nei,
mēìa i te tau ètua tīkoe te i haameìe i hua fenua.
19 I haatavavā ai au ia âtou i vāvena
o te tau mataèinaa êteni
i haahiki kē ia âtou ma he fenua kē anatu.
U haavā au ia âtou vāàna i to âtou hakatu me te hana.
20 I vāvena o hua tau mataèinaa êteni ta âtou i hee atu,
u haameìe âtou i tu ù inoa tapu.
U peàu te tau ènata pēènei :
« Oia nei te mataèinaa o te Fatu Etua,
te i titiitia me io to Īa fenua. »
21 Atià, u maìmaì au e haakāìè atu i tu ù inoa tapu,
ta te ati Iraene i haameìe
io he tau fenua i èià u tavavā âtou.
22 A peàu atu òe i te mataèinaa Iraene.
Pēènei te Teào a te Fatu Etua :
« E to Iraene, a haaòno mai.
Aòè no ôtou te tau hana e hana atu au,
atià no te haakāìè i tu ù inoa,
ta ôtou i haameìe io te tau fenua i hee atu ai ôtou. »
23 Ua tihe mai te teào a te Fatu Etua, pēènei :
« E haaìte au he mea tapu to ù inoa tiketike
te i haameetia e te tau mataèinaa êteni mēìa ia ôtou.
E vivini te tau mataèinaa i te mea : o au te Fatu Etua.
Na ù aneiho e haatapu i to ù inoa.
24 E vevaò au ia ôtou me i vāvena o te tau mataèinaa
e haaputuputu au ia ôtou,
te i takitia me io te tau fenua paotū.
E haahua au ia ôtou i to ôtou fenua tumu.
25 E kiini au ma ùna o ôtou i te vai mā, no te haamā ia ôtou.
E haataìtaì au i to ôtou tau mikeo paotū,
me to ôtou tau hana pakaihi teka i te tau ètua tīkoe.
26 E vaièi atu au ia ôtou i te koekoe hou.
E tuu au ia ôtou i te kuhane hou.
E taki au i to ôtou hōupo keâ no te tuu atu i te hōupo kiko.
27 E haaihi au i òto o ôtou i to ù Kuhane
etià e aotahi ôtou i to ù maìmaì,
me te haamau io he koekoe i to ù tau teào.
28 E nonoho ôtou io te fenua ta ù i tuu atu i to ôtou tau tupuna.
E ìò ôtou e mataèinaa no ù. He Etua au no ôtou. »
- Me papatematia tau tama hou,
HĪMENE ITAIA 12,2, 4b-e, 5b-6a.c, (a tiòhi i te tetautina 5)
Akoè à
TARAMO 51 (50) 12-13, 14-15, 18-19
E te Etua e, a pēpena i òto o au nei i te koekoe hou. cf. 51,12
12 A pēpena i òto o au nei i te koekoe taìtaì.
A haahou i to ù kuhane, a haamau i to īa meitaì.
13 Umoì e titii atu ia ù memao me io Òe.
Umoì e taki me i òto o au i to Òe Kuhane Meitaì.
14 A haakoakoa ia ù to Òe haapohoè mai.
A haamau i te èkaèka io to ù koekoe.
15 E hakako au i to Òe aanui i te poì mikeo.
E hua mai io Òe te poì i hukaka nei.
18 No tu ù ùtuna atu i te hēana, aòè e apuu mai.
Me kānea au i te hēana pūovo i te ahi, u titii Òe.
19 O te koekoe unu i te uē, oia te hēana e kākī Òe.
O te koekoe unu i te uē me te hopo mikeo,
Te ùtuna hēana e haatāvaè ia Òe, e te Fatu e.
- Me he mea aòè he papatema
TARAMO 42 (41) 2, 5bcd ; 43 (42) 3, 4,
Io te Etua to ù hīa, io te Etua haapohoè.
A fea e koàna ia ù te haatata me te tū i te aò o te Etua ?
cf. 42,3
1 Me he mea te keukeu i paka i te vai pohoè,
2 Atii e ìmi nei au ia Òe, e te Fatu, tu ù Etua e.
5 E taha au i vāvena o te faètoa nui,
No te tomo io te faè o te Etua.
Na ù e haatee ia âtou e fiti ana,
E hahi me te taaàu koakoa i te Etua.
3 A pahi mai i to Òe māàma me te tiàtohu,
Na âua e haatee i to ù tahatina,
E aahi ia ù i ùna o to Òe tuaivi,
Tihe atu io te taha tapu i èià e noho ai Òe.
4 E haatata au pii o te fātaa pure o te Etua,
Te Etua, te tumu o to ù koakoa.
E haahuaèkaèka au me te hīmene kitā,
Ia Òe, e te Etua, tu ù Etua e.
TETAUTINA A PAURO PEÀTO I TO ROMA 6, 3b-11
E tu ù tau tunane tuehine,
3 Ua ìte hoì ôtou u papatematia tātou
no te haatahi me te Kirito Ietu ;
i òto o to Īa matena to tātou papatema.
4 Ua tomitia tātou kātahi me Ietu Kirito,
mēìa i te papatema te i haatahi ia tātou
me to Ietu Kirito matena.
No èià, me he mea ua tū hakaùa Ietu Kirito
me i vāvena o te huaa mamate ma te mana nui o te Motua,
atii e pohoè ai me tātou no te hakatu pohoè hou.
5 Me haatahi tātou me Ietu ma te matena kātahi me Īa,
e haatahi hoì tātou me Īa
ma te pohoè hakaùa hakātahi me Īa.
6 Ua ìte meitaì tātou i te mea nei :
u pāokapekatia kātahi me Ietu
to mua hakatu pohoè o tātou ènata mikeo,
vāàna e haakoè te Etua i te hīa pē o te tino.
Ma èià, u te e vivini mai hakaùa ia tātou te mana o te mikeo.
7 Me mate nui hoì te ènata, ua koè to īa tāvini atu i te mikeo.
8 Me mate tātou kātahi me te Kirito,
e haatià mau tātou e pohoè hoì kātahi me Īa.
9 Ua ìte tātou i te mea nei :
ua tū hakaùa te Kirito me i vāvena o te poì mamate,
ua koè te mana o te matena i ùna o Īa.
Koè nui e hina hakaùa te Kirito i te matena.
10 Ua mate nui Ietu, ua koè te mana o te mikeo i ùna o Īa.
Ua àva to Īa matena no te tau tai hakatahi.
I tēnei, o to Ietu pohoè, he pohoè no te Etua.
11 Atii me ia ôtou. A kaituto ia ôtou iho,
me he poì mamate ôtou :
ua koè te mana o te mikeo i ùna o ôtou.
Atià, he poì pohopohoè nei ôtou
no te haaèka i te Etua kātahi me Ietu Kirito.
ALLELUIA ALLELUIA
TARAMO 118 (117) 1.4, 16-17, 22-23,
1 A haahuaèkaèka i te Fatu : u matavaièi mai Īa.
Paona koè to Īa kāòha.
4 A peàu te poì pakaihi i te Fatu :
Paona koè to Īa kāòha.
16 U tuàki te ìma oko o te Fatu,
Ua mana nui te pūhāìma o te Fatu.
17 Aòè e mate havaiki, e pohoè meitaì au
No te haaìte atu i te tau hana a te Fatu.
22 O te keâ i titiitia e te poì haatū faè,
O hua keâ avai noa, ua ìò he keâtaa.
23 Oiana te hana a te Fatu,
E hana mahaò haapekahi ia mātou.
No te Èhua B
EVANERIO O IETU KIRITO VĀÀNA E MAREKO 16, 1-8
1 Ma hope mai o te Tāpati, o Maria Matarena,
o Maria te kui o Iakopo, o Tarome, ua hoko mai âtou
i te mēmau kekaa no te haapaù i te tino tūpāpaù o Ietu.
2 I te pōpōuì tika nui māèhuèhu, i te â to mua o te âtapu,
ua tihe âtou io he ana tūpāpaù. U pōpōuì nui.
3 U peàpeàu atu peàpeàu mai âtou :
« Na ai e huì atu i te keâ me i mua o te avaputa o te ana ? »
4 Atià, e feau aa, ua ìte âtou
ua huìtia hua keâ : he keâ keî.
5 Ua uu âtou i òto o te ana tūpāpaù.
Ua ìte âtou e tahi māhaì e noho aa i te kēkē ìma oko,
he kahu òa, he kahu māìta to īa.
U emièe âtou me te haametaù.
6 U peàu hua māhaì ia âtou : « Umoì ôtou e haametaù !
Ua ìmi ôtou ia Ietu no Natareti te i pāokapekatia.
Ua tū hakaùa Īa. Aòè Īa i înei.
Oia nei te taha i tuu âtou ia Īa.
7 A tataha atu.
A peàu i to Īa tau kouâ atii me ia Petero,
enā Īa i te Fenua Karirea ma mua o ôtou.
I èià, e ìte ai ôtou ia Īa,
me he mea ta Īa i peàu atu ia ôtou. »
8 Ua uu âtou i vaho
me te hiki anamai me io he ana tūpāpaù.
U emièe hoì âtou, u pūpūkina to âtou koekoe.
Aòè âtou i faì atu i te ènata e tahi,
mēìa i te nui oko o to âtou haametaù.
TE KOÌNA NUI O TE PAKATE
TETAUTINA O TE HĀMANI HANA A TE TAU ÀPOTORO
10, 34a.37-43
Io te faè o te kereturione Korenio,
34 U pohā te èo o Petero me to īa peàu pēènei à :
37 « Ua ìte ôtou i te mea i haapaotia i te Fenua Iutea vii pu,
i te Fenua Karirea te tīmatatina,
ma muì o te papatema te i haaìtetia atu e Ioane.
38 Ua ìte ôtou pēhea u haapaù te Etua ia Ietu no Natareti
me te Kuhane Meitaì me te mana.
Ua taha Ietu e hana i te hana meitaì,
u haapohoè Īa i te tau ènata paotū
te i haamōèhutia e te tiaporo. O te Etua hoì me Ietu.
39 O mātou te tau ènata haatiàtohu i to Īa tau hana paotū
io he fenua ati Iuta atii me Ierutaremi.
O hua Ietu ta âtou i haamate ma te tauèva ia Īa uo he peka.
40 Atià, na te Etua e haatū hakaùa mai ia Īa,
ma te toù o te pō me te ao no te haaìte atu ia Īa aneiho,
41 aòè i te mataèinaa paotū,
atià i te tau ènata i vaetia e te Etua,
o mātou à te i kai me te inu me Īa,
ma muì o to Īa Tūhakaùatina
me i vāvena o te huaa mamate.
42 U peàu mai no te haaìte atu i te mataèinaa
me te haatiàtohu i tēnei teào : O Īa te i haatūtia e te Etua
no te haavā i te poì pohoè me te huaa mamate.
43 U haatiàtohu te tau perofeta paotū ia Ietu, e peàu aa :
ma to Īa inoa, a vevetetia te tau mikeo
o te ènata i haatià ia Īa. »
TARAMO 118 (117) 1.4, 16-17, 22-23
Oia nei te â haatoitoitia e te Fatu.
He â koìna te â o te koakoa, alleluia. cf. 118,24
1 A haahuaèkaèka i te Fatu : u matavaièi mai Īa.
Paona koè to Īa kāòha.
4 A peàu te poì pakaihi i te Fatu :
Paona koè to Īa kāòha.
16 U tuàki te ìma oko o te Fatu,
Ua mana nui te pūhāìma o te Fatu. »
17 Aòè e mate havaiki, e pohoè meitaì au,
No te haaìte atu i te tau hana a te Fatu.
22 O te keâ i titiitia e te poì haatū faè,
O hua keâ avai noa, ua ìò he keâtaa.
23 Oiana te hana a te Fatu,
E hana mahaò haapekahi ia mātou.
TETAUTINA O TE HĀMANI A PAURO PEÀTO I TO KOROHA
3, 1-4
E tu ù tau tunane tuehine,
1 Mēìa u pohoè hakaùa ôtou kātahi me te Kirito,
a ìmi i te taetae te io he àni, i èià hoì te Kirito,
e noho aa i te ìma oko o te Etua.
2 A kōhoà aneiho i te mea te io he àni,
umoì i te mea te io he aomāàma nei.
3 Ua mate ôtou kātahi me te Kirito.
To ôtou hakatu pohoè hou, u te e haaìtetia atu nei,
me he mea u te e haaìtetia to te Kirito :
u hakanātia i òto o te Etua.
4 O to ôtou hakatu pohoè hou e tahi me to te Kirito.
No èià, i te â e haaìte te Kirito ia Īa iho,
e tū ai ôtou me Īa i òto o te kāìè Etua.
Akoè à
TETAUTINA O TO MUA HĀMANI A PAURO PEÀTO
I TO KORINETIA 5, 6b-8
E tu ù tau tunane tuehine,
6 ua ìte ôtou i te teào haapupuà :
A kāvohi i te mana o te mea haapupuhi me te faraoa tee,
e pupuhi te faraoa paotū.
7 A haataìtaì hoì ia ôtou ma te taki me io ôtou
i te mea haapupuhi pē, ma èià he faraoa tee hou ôtou.
Na te mea, ôtou he faraoa tee hou haapupuhi koè tia.
U ùtunatia hoì to tātou Pakate e te Kirito.
8 A fai tātou i te Koìna Pakate,
umoì me te mēmau haapupuhi kākiu,
haapupuhi pē, haapupuhi teka.
Atià, a fai ôtou i te koìna me te faraoa tee
o te toitoi me te tiàtohu,
oia hoì te faraoa haapupuhi koè tia.
ALLELUIA ALLELUIA
1 Ko .5,7-8
U ùtunatia hoì to tātou Pakate, te Kirito.
Oia nei te kainamau o te Fatu.
Mave mai. A haamaòna tātou me te koakoa.
EVANERIO A IETU KIRITO VĀÀNA E IOANE 20, 1-9
1 I te â to mua o te âtapu, i te pōpōuì tika,
hāhakateiao, ua tihe Maria Matarena io he ana tūpāpaù.
Ua ìte i te keâ, takitia me io he ana.
2 A tahi a tohuti īa io Timone Petero
me tēia kouâ i haataetaetia e Ietu.
U peàu ia âtou :
« U tootia te tino o te Fatu me io he ana tūpāpaù.
Aòè mātou i ìte i hea te tuutia. »
3 Ua hee atu Petero me tītahi kouâ
me to âua tihe io te ana tūpāpaù tiòhi.
4 U tohuti nātoa amana tokoùa âua.
Atià, ua tihe te kouâ òmua ia Petero
mēìa te koi o to īa vaevae.
5 Ua oha me to īa ìte i òto o te ana
i te tapa fāfī i te tino, tuutia ma ùna o te tohua.
Atià, aòè i uu i òto o te ana tūpāpaù.
6 Ua tihe Timone Petero ma muì o īa.
Ua uu i òto o te ana me to īa ìte,
ma ùna o te tohua, i te tapa fāfī i te tino
7 me te tapa tomi i to Ietu upoo.
Aòè i tāpapatia hua tapa me to mua tapa te i fāfī i te tino.
U pikaotia hoì i vahi kē.
8 A tahi a uu i òto te kouâ kē te i tihe òmua ìka.
Ua ìte īa. U haatià.
9 Aòè âua i vivini hoì i te Hāmani tapu e peàu aa :
e tū hakaùa Ietu me i vāvena o te huaa mamate.
Akoè à, i te pure meta ahiahi Pakate
EVANERIO O IETU KIRITO VĀÀNA E RUKA 24, 13-35
13 I hua â to mua o te âtapu, ua hee nā kouâ tokoùa o Ietu
io he pāpuafaè, o Emau te inoa.
E ùa hora nehe te tahatina vaevae me i Ierutaremi.
14 U tekatekao âua no tenā tau mea paotū i paotia.
15 Ohia u teào atu teào mai âua,
u haatata mai Ietu iho me to Īa taha atu me âua.
16 E aha à u tiòhi âua ia Īa, u haakekehutia to âua mata
oi ìte âua o Īa Ietu.
17 U peàu Ietu ia âua : « E aha te tumu
o to ôùa teào atu teào mai, e taha ana ? »
U hakaēa âua, u kekehu nui te mata.
18 U haahua tītahi, o Kereopata te inoa, me te peàu ia Ietu :
« O Òe anaè i vāvena o te tau ènata e noho nei i Ierutaremi,
aòè i ìte i te tau mea i hanatia i nā pō i pao atu nei. »
19 U peàu Ietu : « E aha òa ? »
U peàu âua : « Te teào i ùna o Ietu no Natareti.
Ua tū Īa me he perofeta mana ma te hana, me te teào,
i mua o te Etua me te mataèinaa paotū.
20 Pēhea i haaìòtia no te haamate nui me te pāokapeka atu
e to mātou tau tāuà nui me te tau hakaìki.
21 O mātou à, u tetaì mātou
e haapohoè Īa i te mataèinaa Iraene.
Tōtahi atu, oia nei te toù o te pō
me i te ava i te paotia i tēia mea.
22 Atià à, u haaemièe mai te mou vehine kē me mātou.
I te pōpōuì tika, ua hee âtou i te ana tūpāpaù.
23 Aòè i koàna ia âtou to Īa tino.
Ua hua me to âtou peàu mai : ua ìte âua i nā anera
te i peàu ia âtou u pohoè Ietu.
24 Ua hee io he ana tūpāpaù tahipito me i vāvena o mātou.
Ua ìte âtou i te mea i peàutia e te tau vehine.
O Ietu à, aòè âtou i ìte ia Īa. »
25 U peàu Ietu ia âua : « E te poì pōtano !
E te koekoe tevee i te haatià i te mea paotū
ta te tau perofeta i peàu atu.
26 Aòè à tēia memae e memae ai te Kirito
no te tomo io to Īa kāìè ? »
27 U haavivini Ietu i te teào i patutia i ùna o Īa,
i òto o te Hāmani tapu, e tīmata aa
ma te haatuhuna i nā hāmani vāàna e Moite,
ma hope iho vāàna e te tau Perofeta hakatahi.
28 U haatata âtou me te pāpuafaè i èià to âtou tahatina.
Ua hano Ietu e hee memao atu.
29 Ua ūtaì âua ia Īa e peàu aa : « A noho me māua.
Ua èva te â. E naò ai te òumati. »
Ua uu Ietu no te noho me âua.
30 Ohia io he tapukai me âua,
ua too Ietu i te faraoa, u haahuaèkaèka,
ua vahi me te tuu atu ia âua.
31 U pepeùtia to âua kikomata : ua ìte âua ia Ietu.
Ua naò anamai Ietu me i to âua aò.
32 U peàpeàu atu peàpeàu mai âua :
« Aòè à u veàveà me he ahi to tāua koekoe
i te ava u teào Īa me tāua ma no he aanui ?
I te ava o to Īa haatuhuna i te Hāmani tapu ? »
33 Ua tū ponihoo âua no te hua i Ierutaremi.
U koàna mai ia âua te Tīònohuu ma tahi
putupututia me te huaa e noho aa me âtou.
34 U peàu âtou ia âua : « Tiàtohu nui.
Ua tū hakaùa te Fatu. U haaìte ia Īa iho ia Petero. »
35 Ua faì atu me âua i te mea i pao ma no he aanui,
pēhea to âua ìte ia Ietu i te ava vahitina o te faraoa.
TOMINIKA E ÙA O TE PAKATE
TE ETUA HAKĀÒHA NUI
TETAUTINA O TE HĀMANI HANA A TE TAU ÀPOTORO
4, 32-35
32 O te nuitina o te poì haatià, ua ìò ia âtou
te koekoe e tahi me te kuhane e tahi.
Aòè e tahi ènata i peàu
o īa anaè te fatu o ta īa taetae.
U àvaki âtou ma te tuha atu tuha mai i te tau mēmau.
33 Ua ìi te tau Àpotoro no te haatiàtohu
i te Tūhakaùatina o te Fatu Ietu.
Ma ùna o âtou nui te mana o te karatia.
34 Aòè e tahi ènata veve i vāvena o âtou.
O te tau ènata fatufenua, akoè à fatufaè,
ua ìò i te hoko atu i to âtou mēmau.
35 Ua àve mai âtou i te moni o te tau taetae pao i te hoko
me te tuu atu pii o nā vaevae o te tau Àpotoro.
U tuhatia ai hua moni ia tītahi, ia tītahi,
vāàna i te mea e hei no īa.
TARAMO 118 (117), 1.4, 16-17, 22-23, 24-25
Paona koè to ia kāòha ! 118,1
"
1 A haahuaèkaèka i te Fatu : u matavaièi mai Īa.
Paona koè to Īa kāòha.
4 A peàu te poì pakaihi i te Fatu :
Paona koè to Īa kāòha.
16 U tuàki te ìma oko o te Fatu,
Ua mana nui te pūhāìma o te Fatu.
17 Aòè e mate havaiki, e pohoè meitaì au
No te haaìte atu i te tau hana o te Fatu.
22 O te keâ i titiitia e te poì haatū i te faè,
O hua keâ avai noa, ua ìò he keâtaa.
23 Oiana te hana a te Fatu,
E hana mahaò haapekahi ia mātou.
24 Oia nei te â haatoitoitia e te Fatu.
He â koìna, te â o te koakoa no mātou.
25 E te Fatu e, a vaièi mai i te pohoètina.
E te Fatu e, a vaièi mai i te tuàkitina.
TETAUTINA O TO MUA HĀMANI A IOANE ÀPOTORO
5, 1-6
1 O te ènata i haatià o Ietu te Kirito,
u fānautia me io te Etua.
Me kāòha te ènata i te Motua,
u kāòha hoì i ta īa tau tama.
2 Pēènei to tātou ìte u kāòha tātou i te tau tama a te Etua :
a kāòha tātou i te Etua, a aotahi atu i to Īa teào.
3 Na te mea, o hua mea aneiho te kāòha i te Etua
me te aotahi atu i to Īa tau teào.
Mea hana māeà te aotahi i te Teào a te Etua,
4 na te mea u tuàkitia to te ao nei e te tau tama a te Etua.
5 Ma te haatià, u tuàki tātou i to te ao nei.
Na ai i tuàki i te ao nei ?
O te ènata e haatià o Ietu te Tama a te Etua.
6 O hua Ietu Kirito te i tihe me te vai me te toto,
aòè me te vai anaè, atià me te vai me te toto.
O te Kuhane te i haatiàtohu ia Ietu Kirito.
O te Kuhane hoì te Tiàtohu.
ALLELUIA ALLELUIA
cf.In.20,29
U ìtemata Toma i te Fatu : u haatià.
« Mamau te tau ènata i haatià e aha à u te e ìtemata âtou ».
EVANERIO O IETU KIRITO VĀÀNA E IOANE 20, 19-31
19 I te ahiahi o hua â to mua o te âtapu,
u putuputu te huaa kouâ i òto he pāòto.
Ua pā i te avaputa na te haametaù i te poì ati Iuta.
Ua tihe anamai Ietu. Ua tū anaè Īa i vāvena ahau o âtou.
U peàu Īa : « Ia ôtou te moû ! »
20 E peàu aa i hua ponateào, u haaìte Ietu ia âtou
i to Īa nā îìma me to Īa kaokao.
Ua pē i te koakoa te tau kouâ,
mēìa ua ìtemata âtou i te Fatu.
21 U peàu hakaùa Ietu : « Ia ôtou te moû ! »
Me he mea ua pahi mai to ù Motua ia ù,
atii me to ù pahi atu ia ôtou. »
22 Ia pao hua ponateào,
ua puhi Ietu i to Īa ao i ùna o âtou me te peàu :
« A haakoàna ia ôtou i te Kuhane Meitaì.
23 To te tau ènata mikeo e vevetetia e ôtou, u vevetetia.
To te tau ènata mikeo e tāmautia e ôtou, u tāmautia. »
24 O Toma, te i vevaòtia Mahaka, o Titimo ma he èo hereni,
tītahi o te tīònohuu ma tokoùa kouâ,
aòè īa me âtou i te â u haaìte Ietu ia Īa iho.
25 U peàu tahipito kouâ ia īa : « Ua ìte mātou i te Fatu. »
U haahua atu Toma ia âtou :
« Me he mea aòè au e ìte io nā îìma o Īa,
i te maì o te paapaa i te pāoka,
me he mea aòè au e tuu i tu ù manamanaìma
i òto o hua maì o te paapaa,
tu ù ìma i òto o to Īa kaokao,
aòè au e haatià. »
26 E vaù pō ma hope iho,
ua noho hakaùa te huaa kouâ io he faè.
O Toma tītahi me âtou.
Ua pātia te avaputa. Ua tihe anamai Ietu.
Ua tū anaè Īa i vāvena ahau o âtou me te peàu :
« Ia ôtou te moû ! »
27 I muì iho, u peàu ia Toma :
« A tuu înei i to òe manamanaìma,
a tiòhi i to ù nā îìma. A haatata i to òe ìma,
a tuu i òto o to ù kaokao.
Umoì òe e pūtuì. A haatià ! »
28 U hua atu Toma ia Īa me te peàu :
« E tu ù Fatu e, e tu ù Etua e. »
29 U peàu Ietu :
« U haatià òe, e Toma e, mēìa ua ìtemata ia ù.
Mamau te tau ènata e haatià
e aha à u te e ìtemata âtou. »
30 Mea nui te hana mana kē, hakatu kē
ta Ietu i hana i te aò o to Īa tau kouâ.
Aòè i patutia i òto o te hāmani nei.
31 U patutia tēia mea nei etià e haatià ôtou
o Ietu te Kirito, te Tama a te Etua.
Mēìa i to ôtou haatià, e pohoè ai ôtou ma to Īa inoa.
TOMINIKA E TOÙ O TE PAKATE
TETAUTINA O TE HĀMANI HANA A TE TAU ÀPOTORO
3, 13-19
13 O te Etua o Aparahamo, o Itaako, o Iakopo,
te Etua o to tātou tau tupuna,
u haakāìè i to Īa tāvini Ietu
ta ôtou i haaìò me te titii i mua o Pinato.
E aha à u maìmaì hua Pinato e haapohoè ia Īa,
14 u titii ôtou i te Peàto Nui, i te Toitoi Noa.
Ua ape ôtou a vevetetia te ènata mākaka kukumi i te ènata,
15 a haamate nui i te Tumu o te Pohoè.
Atià, na te Etua i haatū hakaùa ia Īa
me i vāvena o te poì mamate. O mātou te i haatiàtohu.
17 E tu ù tau teina e, ua ìte au na te koekoe pōtano
i hana ai ôtou atii, hakatu me to ôtou tau vivini.
18 Ma èià, ua tae te Teào a te Etua ta Īa i peàu òmua
ma te fafa o te tau perofeta paotū : e memae aè to Īa Kirito.
19 No èià, a fāìu te koekoe, a hua mai io te Etua,
etià e haakoètia to ôtou tau mikeo.
TARAMO 4, 2, 7, 9
E te Fatu e, a pupuà to Òe mata i ùna o mātou nui ! cf.4,7
2 E te Etua e, te i haatoitoi mai.
O Òe anaè to ù vavao. A hakaòno mai.
Na Òe te haakoè i te uē òomi menava,
A hakāòha mai. A apuu i ta ù pure.
7 E ìmi nei i te koakoa te tau ènata paotū.
E te Fatu e, a pupuà to Òe mata i ùna o mātou nui.
9 I òto o te moû, e moe au me te hiamoe,
E tetaì mau ana i to Òe kāòha, e te Fatu e.
TETAUTINA O TO MUA HĀMANI A IOANE PEÀTO 2, 1-5
2,1 E tu ù tau tama e, ua patu au i tēnei teào ia ôtou
etià u te e hava ôtou i te mikeo.
Atià, me hava tītahi i te mikeo,
enā to tātou vavao io te Motua,
2 o Ietu Kirito, te Toitoi noa.
O Īa te hēana ùtunatia
no te haakoè i te umu o to tātou mikeo.
Aòè to tātou mikeo aneiho,
atii me te tau mikeo o te ènata ia ôtoa o te aomāàma.
3 Ma te tiàtohu, u haapii tātou me te Etua,
me aotahi tātou i to te Etua teào.
4 Ia peàu te ènata ua ìte īa i te Etua,
atià u pūtuì i to Īa teào, he ènata tīkoe hua ènata,
aòè i noho te teào tiàtohu i òto o īa.
5 Me aotahi te ènata i te Teào a te Etua,
u toitoi noa to īa kāòha i te Etua.
Pēènei te ìte ua noho tātou i òto o te Etua.
ALLELUIA ALLELUIA
U haaìte te Fatu Ietu Kirito ia Īa iho i to Īa tau Àpotoro
me te peàu atu : « Ia ôtou te moû ».
EVANERIO O IETU KIRITO VĀÀNA E RUKA 24, 35-48
I tēia mou pō,
35 ua faì atu nā kouâ tokoùa e hee aa i Emau,
i te mea i pao ma no he aanui.
Pēhea to âua ìte ia Ietu i te ava vahitina o te faraoa.
E teào aa âua i hua teào,
ua tū anamai Ietu i vāvena ahau o âtou me to Īa peàu :
« Ia ôtou te moû ! »
37 Ua hemo âtou i te haametaù, u pūpūkina âtou.
U kaituto hoì e ìte âtou i te vehinehae.
38 U peàu Ietu ia âtou : « U pūpūkina ôtou no te aha ?
Umaha tēnei kaituto io he koekoe ?
39 A tiòhi ôtou i to ù mou îìma me nā vaevae : o au nei.
A maohi ôtou ia ù nei, a tiòhi mau.
He hakatu kē to te vehinehae.
Aòè o īa kiko. Aòè o īa ivi,
me he mea ua ìte ôtou me to ù nei. »
40 E peàu aa i hua teào,
u haaìte atu Ietu i to Īa mou îìma me nā vaevae.
41 Ohia u haatià koè âtou mēìa i te koakoa me te mahaò,
u peàu Ietu ia âtou : « Enā te mea kai ta ôtou înei ? »
42 Ua tuu atu âtou ia Īa i te poo ià tunu pātaka.
43 Ua too i te ià me to Īa kai, e tiòhi aa âtou.
44 I muì iho, u peàu Ietu ia âtou pēènei :
« Oia nei te teào ta ù i peàu ia ôtou,
e noho ana au me ôtou.
E haapao ònaòna tia te tau mea paotū
te i patutia i ùna o au nei i òto o te Ture a Moite,
i òto o te hāmani a te tau Perofeta me te hāmani Taramo. »
45 A tahi a haamāàma Ietu i to âtou koekoe
etià e vivini âtou i te Hāmani tapu.
46 U peàu ia âtou : « Ua patutia :
e memae ai te Kirito ; ma te toù o te pō,
e tū hakaùa Īa me i vāvena o te huaa mamate.
47 Ma to Īa inoa, e haaìtetia atu
te fāìutina o te koekoe no te haakoè i te mikeo
i te tau mataèinaa paotū, atià to mua i Ierutaremi.
O ôtou te tau ènata e haatiàtohu i hua teào.
TOMINIKA E FĀ O TE PAKATE
TETAUTINA O TE HĀMANI O TE HANA A TE TAU ÀPOTORO
4, 8-12
8 Pī i te Kuhane Meitaì, u peàu Petero :
« E te tau hakaìki me te tau kōkooūa,
9 i tēnei â, u haavātia māua mēìa i ta māua hana meitaì
i uē i te ènata takapii. Ua ape mai ôtou
no te haaìte atu pēhea te haapohoètia i hua ènata.
10 A ìte ôtou paotū atii me to Iraene mataèinaa ia ôtoa :
Ma te inoa o Ietu Kirito no Natareti,
te i pāokapekatia e ôtou,
te i haatuhakaùatia e te Etua,
ma hua inoa, i maô ai me te meitaì te ènata nei i mua o ôtou.
11 O Ietu te keâ i titiitia e ôtou, te tau ènata hana haatū i te faè.
Ua ìò Īa he keâtaa.
12 I òto o Ietu anaè te pohoè.
Aòè tītahi inoa kē ma àò o te àni,
i vāvena o te tau inoa i apatia e te tau ènata,
te i haapohoè ia tātou. »
TARAMO 118 (117), 1.4, 8-9, 22-23, 28-29
O te keâ i titiitia e te poì haatū i te faè,
O hua keâ avai noa, ua ìò he keâtaa. 118,22
1 A haahuaèkaèka i te Fatu : u matavaièi mai Īa.
Paona koè to Īa kāòha.
4 A peàu te poì pakaihi i te Fatu :
Paona koè to Īa kāòha.
8 U meitaì no te ènata te haatià i te Fatu,
Aua e haatià te ènata i to īa tau hoa.
9 A haatià tātou i to te Fatu tokotina mai.
Umoì e haatià tātou e toko mai te poì mana.
22 O te keâ i titiitia e te poì haatū i te faè,
O hua keâ avai noa, ua ìò he keâtaa.
23 Oiana te hana a te Fatu,
E hana mahaò haapekahi ia mātou.
28 O Òe to ù Etua, u haahuaèkaèka au ia Òe.
E tu ù Etua e, u haatiketike au ia Òe.
29 A haahuaèkaèka i te Fatu. U matavaièi Īa.
Paona koè to Īa kāòha.
TETAUTINA O TO MUA HĀMANI A IOANE ÀPOTORO
3, 1-2
E tu ù tau tama tāhia e,
1 A kaituto me te mahaò i te nuitina
o to te Etua kāòha ia tātou.
Ua ao Īa e apatia tātou he tau tama no Īa.
Ua ìò hoì tātou he tau tama tiàtohu no Īa.
Oia te piò aòè to te ao nei e apuu ia tātou.
Pēhea te koàna ? Aòè īa i ìte i te Etua.
2 E tu ù tau hoa tāhia e, i tēnei, he tama tātou a te Etua.
E aha to tātou hakatu ma tītahi â ?
U te e ìte meitaì tātou.
E tahi mea tiàtohu aneiho :
i te ava e haaìte Ietu Kirito ia Īa iho,
e ìò tātou hakatu me Īa,
na te mea, he mata he mata, e ìte ai tātou ia Īa.
ALLELUIA ALLELUIA
cf. In.10,14-15
Ua ìte Ietu, te Tiaì Meitaì, i to Īa tau muto.
Ua ìte to Īa tau muto ia Īa :
No âtou, u haaìò Īa i to Īa pohoè.
EVANERIO O IETU KIRITO VĀÀNA E IOANE 10, 11-18
I tēia mou pō, u peàu Ietu :
11 O au te Tiaì meitaì. E haaìò te Tiaì meitaì
i to Īa iho pohoè i uē i to Īa tau muto.
12 Me hana te ènata no te moni,
aòè no īa te tau muto, aòè īa to âtou tiaì.
Ia tihe te rupo, ua rere veve īa, e avai aa i te tau muto.
Ua hao te rupo i te tau muto me te haahikitararā ia âtou.
13 U te e haataetae hua ènata i te tau muto,
ua hana īa no te moni aneiho.
14 O au te Tiaì meitaì.
Me he mea ua ìte to ù Motua ia ù me to ù ìte i to ù Motua,
15 ua ìte au i to ù tau muto, ua ìte âtou ia ù.
E haaìò au i to ù pohoè i uē i tu ù tau muto.
16 Enā me tu ù tau muto kē.
Aòè âtou i òto o tēnei pāpua. E haatee au me ia âtou.
E hakaòno âtou i to ù èo.
E ìò ai te naho e tahi anaè, te tiaì muto e tahi anaè.
17 U haataetae te Motua ia ù na te mea
e haaìò au i to ù pohoè no te too hakaùa i hua pohoè.
18 Aòè te ènata e tahi e haamate ia ù.
Na ù ta ù aneiho te haaìò i to ù pohoè.
E mana to ù e haaìò i to ù pohoè
me te too hakaùa ia īa.
Oia nei te teào i peàutia mai e to ù Motua. »
TOMINIKA E ÌMA O TE PAKATE
TETAUTINA O TE HĀMANI HANA A TE TAU ÀPOTORO
9, 26-31
26 I te ava ua tihe Tauro i Ierutaremi,
ua hano īa e haapii me te tau kouâ.
Atià, u haametaù âtou paotū ia īa.
Aòè âtou i haatià o īa tītahi kouâ.
27 Ua too hoì Paranape ia Tauro me īa
me to īa aahi atu io te tau Àpotoro.
U peàu Paranape pēhea ua ìte Tauro i te Fatu
te i teào atu me īa ma no he aanui,
ma hope iho, pēhea u haaìte atu Tauro, haametaù koè,
i te inoa o Ietu i Tamati.
28 Me i tēnei ava, i Ierutaremi, ua hee atu,
ua hee mai Tauro me te tau kouâ
e faì atu aa me te koekoe oko i te inoa o te Fatu.
29 U teàteào īa me te tau ati Iuta me io te Fenua Hereni
me to īa tōtohe me âtou.
Oia te piò ua hano âtou e kukumi haamate ia īa.
30 Ia òno te tau tunane tuehine i hua hana pē,
u aahi âtou īa Tauro i Ketarea ;
me i èià, ua pahi âtou ia īa i Tarate.
31 I te Fenua Iutea ia ôtoa me te Fenua Tamaria,
ua noho te Èkaretia me te moû.
U haanui aè me he mea a te faè hou i haatūtia.
Paotū te â, u pakaihi te Èkaretia i te Fatu.
Ua neke i te fenua vii pu, pī i te koakoa o te Kuhane Meitaì.
TARAMO 22 (21) 26-27b, 28-29, 31-32
E hahi mātou ia Òe, e te Etua e, i òto o te motuhaka.
cf. .22,26
26 E hahi au ia Òe i mua o te motuhaka.
E hana au vāàna i to ù peàu atu ia Òe,
I mua o te tau ènata e pakaihi ia Òe.
27 E kai te poì veve, e maòna âtou.
E hahi i te Fatu te poì e ìmi nei ia Īa :
28 E haamaakau te fenua kōtoa me te hua mai io te Fatu.
E moe haatona te tau mataèinaa i mua o Īa.
29 O te Fatu te vivini o te aomāàma, o Īa te Hakaìki nui.
31 E pohoè au no te Fatu : e tāvini to ù ati ia Īa.
E haamevahatia te òno o te Fatu
I te tau tai ènata i ùna aè.
32 E faìtia to Īa toitoi i te tai ènata i ùna aè.
Oia hoì te hana mahaò o te Etua.
TETAUTINA O TO MUA HĀMANI A IOANE ÀPOTORO
3, 18-24
18 E tu ù tau tama e,
umoì tātou e kāòha ma te fafa anaè,
a haatiàtohu i to tātou kāòha
ma to tātou hana me te hakatu pohoè.
19 Ma èià, ua ìtetia ua kē tātou me te Etua te i hakahae koè.
U haaēa tātou i te menava i te aò o te Etua,
e aha à u hakatio te koekoe ia tātou iho.
20 E iti noa hoì to tātou koekoe, u tiketike atu to te Etua.
Ua ìte te Etua i te tau mea ia ôtoa.
21 E tu ù tau hoa tāhia e,
me hakatio koè to tātou koekoe ia tātou iho,
a noho tātou me te moû i mua o te Etua.
22 E vaièi mai Īa i te mea paotū ta tātou e ape me io Īa,
na te mea, u aotahi tātou i to Īa teào,
ua hana tātou i te hana haaèka ia Īa.
23 Pēènei hoì te Teào a te Etua :
A haatià tātou ia Ietu Kirito, ta Īa Tama,
a kāòha te hoa i te hoa, vāàna i to Īa maìmaì haaìtetia mai.
24 O te ènata i aotahi i te Teào a te Etua,
ua noho īa i òto o te Etua, ua noho te Etua i òto o īa.
Ua ìte tātou i te mea ua noho te Etua i òto o tātou
na te Kuhane Meitaì te i vaièitia mai.
ALLELUIA ALLELUIA
cf. Ta.1,3
Mamau te ènata haatià i te Etua.
Me he tumu âkau i tanutia pii he vaitahe.
I te ava e hei, e hua i te nuitina o te puu.
EVANERIO O IETU KIRITO VĀÀNA E IOANE 15, 1-8
I tēia mou pō, u peàu Ietu i to Īa tau kouâ :
1 « O au te tumuvino tiàtohu.
O tu ù Motua, o Īa te ènata taùtanu.
2 E kokoti Īa i te manamana te i koè e hua i te puu.
E auà Īa i te manamana te i hua i te puu
etià e nui aè te tau àhui.
3 U auàtia ôtou na te teào ta ù i hakako ia ôtou.
4 A noho ôtou i òto o au nei, e noho au i òto o ôtou.
Aòè e koàna i te manamana e hua i te puu na īa anaè.
Ia takitia te manamana me io te tumuvino,
aòè e hua i te puu.
Atii tēnei : aòè he mea e koàna ia ôtou
me paekē ôtou me io ù.
5 O au te tumuvino, o ôtou te tau manamana.
O te ènata te i noho i òto o au, e noho au i òto o īa,
e hua īa i te nuitina o te puu.
Ia naò au, aòè he mea e koàna ia ôtou.
6 Me paekē tītahi me io ù,
e titiitia me he manamana avai noa, te i pororō ai.
Ua kohitia te tau manamana pororō no te tutu me te ahi.
7 Me noho ôtou i òto o au,
e noho tu ù teào i òto o ôtou.
A tahi a ape mai i te mea ia ôtoa ta ôtou i maìmaì :
e ìò ia ôtou.
8 E haakāìètia tu ù Motua ma te nuitina o to ôtou puu.
Ma èià, e ìò ôtou he tau kouâ no ù. »
TOMINIKA E ONO O TE PAKATE
TETAUTINA O TE HĀMANI HANA A TE TAU ÀPOTORO
10, 25-27.34-35.44-48
I tēia mou pō, ua tihe Petero i Ketare
io te keneturione Korenio.
25 Ia uu Petero io he faè, ua taha Korenio io īa
me te moe haatona pii o to īa vaevae.
26 Atià, ua toko Petero ia Korenio no te haamaô,
e peàu aa : « A tū òe ! He ènata aneiho me au nei. »
34 U pohā te èo o Petero me to īa peàu pēènei à :
« Tiàtohu nui, u apuu te Etua i te tau ènata kōtoa,
e aha à hakatu kē, hakatu kē âtou.
35 I tēia fenua, i tēia fenua, u haaèka te ènata i te Etua
ma te pakaihi ia Īa, me te hana i te hana toitoi.
44 E teào aa Petero, ua iho te Kuhane Meitaì
i ùna o te tau ènata e hakaòno nei i te Teào.
45 Ua pē i te mahaò te poì haatià,
he tau ati Iuta âtou te i tihe mai me Petero,
Ua ìtemata hoì âtou i te mea ua neke
te vaièitina o te Kuhane Meitaì i ùna o te tau êteni.
46 Ua òno âtou i hua tau ènata e teào aa
ma he èo kē, èo kē no te hahi i te Etua.
47 U pohā hakaùa te èo o Petero me to īa peàu :
« Aha, aòè e ao tītahi e papatematia te tau ènata
te i koàna mai i te Kuhane Meitaì hakatu me mātou ? »
48 U peàu Petero no te papatema ia âtou ma te inoa o Ietu.
I muì iho, ua ape te tau kouâ ia Petero
no te noho mou pō me âtou.
TARAMO 98 (97), 1, 2-3aab, 3c-4a.6b
U haaìte te Etua i to Īa ìi nui i te tau mataèinaa ia ôtoa.
98,2
1 A hīmene i te Fatu i te hīmene hou.
U mahaò hoì to Īa tau hana.
U tuàki Īa i te mea haapākeka,
Na te mana o to Īa ìma peàto nui.
2 U haaìte te Fatu i to Īa tuàkitina,
U haapupuà i to Īa toitoi i mua o te poì êteni.
3 U haamaakau te Fatu i to Īa kāòha hakahae koè
I uē i te ati o Iraene, to Īa mataèinaa.
Ua ìte te fenua vii pu i to te Etua tuàkitina.
4 A hahi i te Fatu, e te fenua vii pu,
A hīmene, a haka, a haakoìna.
6 A ònotia te kitā, te pū hakahau, te pūtona.
A vānana i te Fatu, to ôtou Hakaìki.
TETAUTINA O TO MUA HĀMANI A IOANE ÀPOTORO
4, 7-10
7 Tu ù tau hoa tāhia e,
a kāòha atu kāòha mai te hoa i te hoa,
na te mea, me io te Etua te kāòha.
Te ènata i kāòha i te hoa,
he tama īa o te Etua, ua ìte īa i te Etua.
8 Me kāòha koè te ènata, aòè hua ènata i ìte i te Etua.
He kāòha hoì te Etua.
9 U haaìte te Etua i to Īa kāòha ia tātou
ma te pōpahi i ta Īa Tama tootahi io te ao nei,
etià e pohoè tātou ma io Īa.
10 Oia nei te kāòha tiàtohu :
« Aòè tātou te i kāòha i te Etua,
o te Etua te i kāòha ia tātou òmua ìka
ma te pahi mai i ta Īa Tama,
e hēana ùtunatia mea haakoè i te umu o to tātou mikeo. »
ALLELUIA ALLELUIA
cf.In.13,34
U haaìte mai te Fatu ia tātou i te teào
aòè i peàutia òmua atu nei :
« A kāòha atu kāòha mai te hoa i te hoa,
me he mea u kāòha au ia ôtou. »
EVANERIO O IETU KIRITO VĀÀNA E IOANE 15, 9-17
I tēia mou pō, u peàu Ietu i to Īa tau kouâ :
9 « Me he mea u kāòha tu ù Motua ia ù,
atii u kāòha me au ia ôtou.
Umoì e paekē ôtou me io tu ù kāòha.
10 Me aotahi ôtou i tu ù tau teào,
e noho ôtou i òto o tu ù kāòha ;
me he mea u aotahi au i to tu ù Motua maìmaì,
ma èià, ua noho au i òto o to Īa kāòha.
11 U peàu au ia ôtou i hua teào,
etià e àva atu ôtou i to ù iho koakoa,
e pī nui ôtou i te koakoa.
12 Oia nei tu ù teào : a kāòha te hoa i te hoa,
me he mea u kāòha au ia ôtou.
13 U haaìte te ènata i te nuitina o to īa kāòha
ma te tuu i to īa iho pohoè i uē i to īa tau hoa.
14 E hoa ôtou no ù, ia aotahi ôtou i ta ù tau teào.
15 U te e apa au ia ôtou te inoa tueni,
na te mea aòè e ìte te tueni i te maakau o to īa vivini.
Ua apa au ia ôtou e hoa pii me au,
u haaìte hoì au ia ôtou i te mea paotū
ta tu ù Motua i peàu mai.
16 Aòè na ôtou i vae mai ia ù, na ù i vae ia ôtou,
me te tāpae ia ôtou etià e hee ôtou,
e haanui i ta ôtou tau hana meitaì.
E ìò hua hana meitaì me he puu te i noho mau.
17 A tahi a vaièi tu ù Motua ia ôtou
i te mea paotū ta ôtou e ape io Īa ma tu ù inoa.
Oia nei hoì tu ù teào ia ôtou :
A kāòha te hoa i te hoa ! »
TE KOÌNA O TE FITINA O IETU IO HE ÀNI
TETAUTINA O TE HĀMANI HANA A TE TAU ÀPOTORO
1, 1-11
1 E Teofiro e, i òto o to mua hāmani ta ù i patu,
u haaìte atu au i te tau mea paotū ta Ietu i hana,
ta Īa i hakako me i te tīmatatina
tihe atu i te â o to Īa Fitina io he àni.
2 Òmua, ma te Kuhane Meitaì,
u haamāàma Īa i te tau Àpotoro ta Īa i vae.
3 Ma te òa e fā ònohuu â ma muì o to Īa memae,
i hua tau Àpotoro, u haaìte Ietu ia Īa iho e pohoè aa.
U haatiàtohu i to Īa pohoètina
ma te nuitina o te hakatu kē.
U teào Īa me âtou i ùna o te Patirēia o te Etua.
4 I tītahi â, e teào aa Ietu me to Īa tau Àpotoro,
u peàu ia âtou umoì e titii ia Ierutaremi,
atià e tetaì i èià i te mea i peàutia e te Motua.
5 U peàu atu Īa pēènei : « Me io to ù fafa,
ua òno ôtou u papatema Ioane me te vai.
Atià, ua poto te ava i toe,
a tahi a papatematia ôtou i òto o te Kuhane Meitaì. »
6 O âtou â, u haaputupututia me Ietu, ua ūiūi atu pēènei :
« E te Fatu e, aha oia nei te ava
o to òe haahou hakaùa i te hakaìkitina o Iraene ? »
7 U haahua atu Ietu : « Aòè ôtou e ìte i te ava
me i te â ta te Motua i haatoitoi
vāàna i to Īa maìmaì aneiho.
8 Atià, e iho mai te Kuhane Meitaì i ùna o ôtou ;
me io Īa, e koàna ia ôtou te ìi no te haatiàtohu ia ù,
i Ierutaremi, i te Fenua Tamaria,
tihe atu i te kotiana paona o te aomāàma vii pu. »
9 Ia pao hua ponateào, e tiòhi aa te tau Àpotoro,
ua fiti Ietu i te ataàni. Ua naò Īa i òto o te kohu.
10 Ohia i te ava ua paekē Ietu, e maô aa âtou
me te tiòhi i te ataàni, u haatata mai nā ènata tokoùa,
uhitia me te kahu māìta, te i peàu :
11 « E te poì no Karirea,
umaha i noho ai ôtou i înei, e tiòhi ana i te ataàni ?
O tēnei Ietu te i fiti me i vāvena o ôtou,
e tihe hakaùa mai Īa me hua hakatu
ta ôtou i ìte ia Īa e fiti aa io he àni. »
TARAMO 47 (46) 2-3, 6-7, 8-9
Ua fiti te Etua i vāvena o te hīmene hahi.
Ua fiti te Fatu e tani ana te pū. 47,6
2 E te tau mataèinaa paotū, a papaì i te îìma,
A hahi i te Etua ma to ôtou taaàu koakoa.
3 O te Fatu te Tiketike nui : ia Īa te kāìè.
O Īa te Hakaìki nui o te fenua ia ôtoa.
6 Ua fiti te Etua i vāvena o te hīmene hahi.
Ua fiti te Fatu e tani aa te pū.
7 A haatani i te pū no to tātou Etua.
A ùtu i te pahu no te hahi i te Hakaìki.
8 O te Etua te Hakaìki nui o te aomāàma.
A haaìte atu ôtou e te tau hīmene.
9 U vivini te Etua i te tau mataèinaa êteni.
Ua tū te Etua i ùna o to Īa nohona kāìè.
TETAUTINA O TE HĀMANI A PAURO PEÀTO I TO EFETIA
4, 1-13
E tu ù tau tunane tuehine.
1 O au nei o Pauro, io he faèhumu, mēìa u tāvini au i te Fatu.
U toutaki au ia ôtou no te pohoè
vāàna i to te Etua maìmaì te i vevaò ia ôtou.
2 A haapāpaù ôtou, a moû te koekoe, a tohe mau paòpaò koè.
A kāòha atu kāòha mai ma te apuu te hoa i te hoa.
3 A hano ôtou e haatahi i òto o te Kuhane Meitaì
te i haatūtaì ia ôtou i òto o te moû.
4 Enā e tahi tino anaè, e tahi Kuhane anaè,
me he mea u vevaò te Etua ia ôtou paotū
no te tetaìtina e tahi anaè.
5 E tahi Fatu anaè, e tahi haatià anaè, e tahi papatema anaè,
6 e tahi Etua me te Motua anaè no te tau ènata kōtoa.
O Īa te Fatu no tātou paotū
te i hana me tātou paotū, te i noho i òto o tātou paotū.
7 Atià, ua tuhatia te karatia kē ia tātou tikitahi,
vāàna ta te Kirito i vaièi mai :
karatia kē to tītahi, karatia kē to tītahi.
8 U patutia hoì pēènei : « E fiti aa i ùna nui,
ua toi Īa i te poì mōèhu ;
ua tuha Īa i te tau taetae i te tau ènata. »
9 U peàu te Hāmani tapu : « Ua fiti Īa. »
E aha te hakatu o hua ponateào : ua fiti Īa ?
E haamaakau hoì i te mea ua iho te Kirito òmua i Havaiki.
10 O te i iho òmua, o Īa aneiho te i fiti i ùna nui o te àni
no te tāpapa i te tau mea ia ôtoa io te aomāàma vii pu.
11 O Īa te i tuha i te taetae :
u vaièi mai i tahipito te hana àpotoro,
i tahipito te hana perofeta,
i tahipito te hana keèe o te Evanerio,
akoè à te vivini me te hakako i te poì haatià.
12 U haahei Īa i te hana tāvini i te mataèinaa o te Etua,
etià e tū mau te tino o te Kirito, te Èkaretia.
13 Ma èià, e haatūtaìtia tātou paotū
i òto o te haatià me te ìte māàma o te Tama a te Etua,
etià e ìò tātou hakatu me te ènata ànamotua,
me he mea e hei no te poì i haakē me te Kirito.
ALLELUIA ALLELUIA
cf. Ta.47,6.10
Ua fiti te Fatu i vāvena o te hīmene hahi.
Ua fiti te Fatu i ùna nui o te àni.
EVANERIO O IETU KIRITO VĀÀNA E MAREKO 16, 15-20
I tēia mou pō, u peàu Ietu i te Tīònohuu ma tahi kouâ :
15 « A tataha atu ôtou ma he aomāàma vii pu.
A haaìte i te Teào Meitaì Hou Mai
i te tau mēmau pēpenatia paotū.
16 Te ènata e haatià me te koàna mai ia īa te papatema,
e haapohoètia hua ènata.
Te ènata haatià koè, e hakatiotia hua ènata.
17 Oia nei te tau hana mahaò e hanatia e te poì haatià.
Ma to ù inoa, e tute âtou i te tiaporo,
e teào âtou ma he tau èo kē, èo kē,
18 e too âtou me te îìma i te puhi fenua ;
ia inu âtou i te mea tekeo, aòè e hemo i te mate,
e hapai âtou i te îìma i ùna o te poì hōpī :
e haameitaìtia hua poì.
19 Ohia ua pao to Īa teào ia âtou,
ua fiti te Fatu Ietu io he àni.
I èià to Īa noho i te ìma oko o te Etua.
20 O âtou à, u tataha atu ma te tau fenua ia ôtoa.
U haaìte âtou i te Teào Meitaì Hou Mai.
Ua toko te Fatu ia âtou, e haatiàtohu aa i te Teào
ma te tau hana mahaò i peàutia.
TOMINIKA E FITU O TE PAKATE
TETAUTINA O TE HĀMANI HANA A TE TAU ÀPOTORO
1, 15-17.20a-26
15 I tēia mou pō, ua tū Petero i vāvena ahau
o to īa tau tunane tuehine, hānere me te tekau oti âtou.
U peàu īa pēènei :
16 « U haapaotia te mea i patutia i òto o te Hāmani tapu,
oia hoì ta te Kuhane Meitaì i peàu ma te fafa o Tavite,
i ùna o Iuta te i haatee i te poì i haahumu ia Ietu.
17 O Iuta tītahi me i vāvena o tātou.
Ua àva atu īa i to tātou hana tāvini i te Etua.
20 U patutia i òto o te hāmani Taramo :
« E ìò to Īa pāpua me he fenua viviiō.
Umoì e èka e tahi ènata i òto. »
Atii hakaùa : « A amo tītahi i to īa hana tumu ! »
21 I tēnei, a tū tītahi me tātou no te haatiàtohu
i te Tuhakaùatina o Ietu.
22 A vae tātou ia īa me i vāvena o te tau ènata
te i kē mai me tātou ma te òa o te ava
ua noho Ietu me tātou : me i te papatematina a Ioane
tihe atu i te â ua takitia Īa me i vāvena o tātou. »
23 Ua tuhi âtou i nā ènata tokoùa :
o Ioteve peàutia te Toitoi tītahi, o Matia tītahi.
24 I muì iho, ua pure âtou pēènei : « E te Fatu e,
ua ìte Òe i te koekoe o te tau ènata paotū.
A haaìte mai o ai io nā ènata tokoùa nei ta òe e vae
25 no te amo i te hana àpotoro ta Iuta i titii,
i te â ua hee īa i to īa kōava. »
26 U haakai âtou ia âua. O Matia te ènata i vaetia.
U haatahi īa me te tau Àpotoro Tīònohuu ma tahi.
TARAMO 103 (102) 1-2, 11-12, 19.22
Te kāìè ia Òe, e te Fatu e noho nei i te ìma oko o te Motua.
1 E tu ù kuhane, a haameitaì i te Fatu,
Me io he koekoe, a haameitaì i to Īa inoa peàto.
2 A haameitaì i te Fatu, e tu ù kuhane,
Aua e tūhaa e tahi o to Īa vaièitina.
11 Me he tiketike o te àni ma ùna o te fenua,
Ua mana to te Fatu kāòha i uē i te poì haatià.
12 Me he memao o to te òumati tihena me i to īa naòna,
U tioà te Etua i te mikeo memao me io tātou.
19 I ùna nui o te àni te nohona o te Fatu.
O Īa te Hakaìki o te aomāàma vii pu.
22 A haameitaì i te Fatu te tau mēmau paotū ta Īa i pēpena,
Ôtou te i èka nei io te tau taha paotū o to īa ao.
A haameitaì i te Fatu, e tu ù kuhane.
TETAUTINA O TO MUA HĀMANI A IOANE ÀPOTORO
4, 11-16
11 E tu ù tau hoa tāhia e,
e pēhea atii te nui o to te Etua kāòha ia tātou,
a kāòha hoì te hoa i te hoa.
12 Aòè e tahi ènata i ìtemata i te Etua.
Me kāòha te hoa i te hoa,
ua noho te Etua i òto o tātou ;
u meitaì oko to tātou kāòha i te Etua.
13 Ua ìte tātou ua noho te Etua i òto o tātou,
ua noho tātou i òto o te Etua,
na te mea u vaièi mai te Etua ia tātou i to Īa Kuhane.
14 O tātou à, ua ìte tātou me to tātou haatiàtohu
i te mea u pōpahi te Motua i ta Īa Tama
no te haapohoè i te tau ènata.
15 Te ènata e faì o Ietu te Tama a te Etua,
ua noho te Etua i òto o īa me to īa noho i òto o te Etua.
16 O tātou à, ua ìte i te mea u kāòha te Etua ia tātou.
U haatià tātou i hua teào.
He kāòha te Etua.
Te ènata i kāòha me te tohe mau i te kāòha,
ua noho hua ènata i òto o te Etua,
ua noho te Etua i òto o īa.
ALLELUIA ALLELUIA
cf.In.14,18
Aòè e avai te Fatu ia ôtou
me he tau tama motua koè, kui koè.
E hua hakaùa mai Īa io ôtou.
A tahi a pī ai to ôtou koekoe i te koakoa.
EVANERIO O IETU KIRITO VĀÀNA E IOANE 17, 11-19
I tēia mou pō, ua feau Ietu io he àni
me te pure e peàu aa :
11 « E te Motua peàto e, a tiaì i to ù tau kouâ
etià e haatià mau âtou i te inoa ta Òe i apa mai.
Ma èià, e haatahi âtou me he mea to tāua haatahitina.
12 I te ava ua noho au me âtou, u tiaì au ia âtou
etià e haatià âtou i te inoa ta Òe i apa mai.
U tiòhi meitaì au i te huaa ta Òe i tuu mai :
aòè e tahi i naò ai.
Te ènata i hina, o īa aneiho te i naò.
Ma èià, u haatiàtohutia te teào o te Hāmani tapu.
13 I tēnei, e tihe au io Òe.
U peàu hoì au i tēnei teào oi noho i te ao nei,
etià e àva âtou i to ù iho koakoa, e pī âtou i te koakoa.
14 U hakako au ia âtou i ta Òe teào.
Oia te piò u haahaa to te ao nei ia âtou.
Ua paekē hoì âtou me io te ao nei
me he mea ua paekē au me io te ao nei.
15 U te e ape au ia Òe no te taki ia âtou me i te ao nei,
ua ape anaè au : a pāpua ia âtou me i te ìno.
16 Aòè âtou me io te ao nei, atii aneiho me au :
aòè au me io te ao nei.
17 A haapeàto Òe ia âtou vāàna i te Tiàtohu.
O ta Òe teào te Tiàtohu.
18 Me he mea ta Òe i pahi mai ia ù i te aomāàma nei,
atii ta ù pahi atu ia âtou i te aomāàma nei.
19 U ùtuna hēana au ia ù iho i uē ia âtou
etià e aotahi mau âtou ia Òe vāàna i te Tiàtohu. »
TĀMETĪ O TE KOÌNA PENETEKOTE
A vae mai e tahi me io tēnei e fā tetautina
1.- TETAUTINA O TE HĀMANI A MOITE PEÀUTIA TENETE
11, 1-9
1 I te fenua vii pu, u haafitipona te tau ènata paotū
i te èo e tahi me te tau ponateào hua mea aneiho.
2 E titii aa te tau ènata
i te fenua kēkē tihena o te òumati, ua taha atu âtou
io he Fenua Metopotamia, akoè à io he Fenua Hineare ;
ua èka âtou io he kaavai tapavaù. I èià to âtou noho.
3 U peàpeàu âtou pēènei :
« A pau ! A kānea tātou i te èpo kaaea taotia. »
Hua èpo taotia, me he keâ keetū no âtou.
Te korotā keekee to âtou himā no te haapipii i te tau keetū.
4 U peàpeàu te tau ènata pēènei : « A pau.
A haatū tātou i te pāpuafaè me te mōuna i vāvena ahau.
A haatiketike tihe io te ataàni i te kapua o te mōuna.
A haaoko nui i to tātou inoa,
etià aòè e haatavavātia tātou i te tau fenua kē vii pu. »
5 Ua iho mai te Fatu Etua no te tiòhi i te pāpuafaè,
io te mōuna tiketike haatūtia e te tau ènata.
6 U peàu te Fatu Etua : « He mataèinaa e tahi aneiho âtou nui.
E tahi èo anaè to âtou. Oia nei te tīmatatina.
E aha te mea e haapākeka i to âtou tau hīa kē ?
7 Epō. A haahiiveke mātou i to âtou èo
umoì e vivini te ènata hana i te ènata hana. »
8 Ma èià, u haatavavā te Fatu Etua i te tau ènata
io te tau fenua kē vii pu.
U hakaēa âtou i te hana haatū i te pāpuafaè.
9 Oia te piò ua apatia te inoa o hua pāpuafaè o Papere.
O Hikitararā ma he èo ènata.
I èià hoì, u haahiiveke te Fatu Etua i te èo o te tau ènata.
Ma èià, u tavavā te tau ènata ma he tau fenua kē, fenua kē.
2.- TETAUTINA O TE HĀMANI A MOITE PEAUTIA EHOTO
19, 3-8.16-20
Ua pao e toù māhina me i to âtou uutina
i vaho o te Fenua Ekipito,
ua tihe te tau tama Iraene io te tumu o te tuaivi Tinai.
3 O Moite à, ua fiti i ùna o te tuaivi no te haaâvei me te Etua.
Me i ùna o te tuaivi, u vevaò te Etua ia Moite pēènei :
« Oia nei ta ù teào i te ati o Iakopo,
ta òe e àve atu io te tau tama Iraene.
4 Ua ìte ôtou pēhea u haahina au i te poì Ekipito.
U aahi au ia ôtou înei, me he mea te manu akuira
te i tautua i to īa tau kiokio ma ùna o to īa pekeheu.
Na ù i aahi mai ia ôtou i taa o au nei.
5 I tēnei, me haaòno ôtou i ta ù teào,
me aotahi atu i to ù Piimau,
e ìò ôtou he mataèinaa vaetia e au
me i vāvena o te tau mataèinaa paotū o te aomāàma vii pu.
Na te mea, na ù anaè te tau fenua ia ôtoa.
6 E ìò ôtou no ù he ati tāuà, he mataèinaa peàto.
Oia nei te teào ta òe e haaìte atu i to Iraene. »
7 Ua iho Moite me i ùna o te tuaivi.
U âvei īa me te tau kōkooūa o te mataèinaa.
Ua faì atu i te teào a te Fatu Etua.
8 U haahua te mataèinaa ia ôtoa ma he èo e tahi :
« E aotahi tātou i te teào paotū a te Fatu Etua. »
Ua àve Moite i hua teào io te Fatu Etua.
16 Ma te toù o te pō, i te pōpōuì tika,
ua tani te hatutii, ua topa te uià,
ua naò te tuaivi i te kohu maù nui,
ua ònotia te tanitina èo òa òa o te pū.
U emièe te mataèinaa i òto o te pāpua.
17 Na Moite i haauu i vaho i te mataèinaa
no te haaâvei me te Etua.
Ua tū âtou paotū i te tumu o te tuaivi.
18 Ua naò i te auahi te tuaivi Tinai.
Ua iho mai hoì te Fatu Etua i òto o te ahi.
Ua fiti te auahi me he mea to te ahi uà tāpupu.
U feùu te tuaivi.
19 Ua tani te pū, oko atu, oko atu te tanitina.
U pohā te èo o Moite ; me i òto o te hatutii te èo o te Fatu.
20 Ua iho mai te Fatu Etua io he kapua o te tuaivi.
U vevaò te Fatu Etua ia Moite me io te kapua o te tuaivi.
Ua fiti Moite io te Fatu Etua.
3.- TETAUTINA O EHEKIERE PEROFETA 37, 1-14
1 I ùna o au nei te ìma o te Etua.
U aahi mai te Kuhane o te Etua io tītahi kaavai
tāpītia me te tau ivi e tavavā aa uo he tuaèpo.
2 Ua naò te tuaèpo i te nuitina o te ivi moô paa.
Ua ape mai te Kuhane no te vii i vāvena o âtou.
3 U peàu mai te Fatu : « E te ènata e,
aha e pohoè hakaùa te tau ivi nei ? »
U haahua : « E te Fatu Etua e, o Òe te i ìte. »
4 U peàu mai te Fatu :
« A haafitipona i te teào perofeta i ùna o tenā tau ivi.
A peàu pēènei :
E te tau ivi moô e, a haaòno i te Teào a te Fatu Etua.
5 Enā e haauu au i te ao i òto o ôtou. A tahi e pohoè ôtou.
6 E tāpī au ia ôtou me te uaua me te kiko,
e haauhi au ia ôtou me te kii.
E puhi au i te ao i ùna o ôtou. E pohoè ai ôtou.
E vivini ôtou o au te Fatu Etua. »
7 Ohia u pohā tu ù èo vāàna i te teào peàutia mai,
ua ònotia te tuìtuì, i muì iho te pooìna oko nui.
U haapii te tau ivi : te ivi me te ivi, te ivi me te ivi.
8 Ua tāpītia âtou me te uaua me te kiko, me te kii ma ùna.
Atià, aòè te Kuhane i òto.
9 U peàu mai te Fatu :
« E te ènata e, me he perofeta, a vevaò òe i te Kuhane.
A peàu òe : oia nei te Teào a te Fatu. E te Kuhane e, a mai !
A mai me io nā kēkē e fā o te metani !
A mai ! A puhi i ùna o te tūpāpaù nei ! E pohoè âtou. »
10 U vevaò au i te teào perofeta vāàna te i peàu mai.
A tahi a tau te Kuhane i ùna o te tūpāpaù. U pohoè âtou.
U maô anamai âtou paotū, hakatu me te faètoa nui, nui oko.
11 U peàu mai te Fatu :
« E te ènata e, o te tau ivi nei te mataèinaa Iraene.
U peàu hoì âtou pēènei :
Ua moô to tātou ivi, ua koè te ao, ua naò tātou nui. »
12 A teào perofeta òe ia âtou me te peàu pēènei :
Oia nei te Teào a te Fatu Etua :
Enā e vāvahi au i to ôtou ana tūpāpaù me te haauu i vaho,
e to ù mataèinaa e.
E haahua au ia ôtou io to ôtou fenua tumu.
13 E ìte ôtou o au te Fatu Etua
i te ava e pepeù au i to ôtou ana tūpāpaù
me te haauu i vaho ia ôtou nui.
14 E haaihi au i to ù Kuhane i òto o ôtou.
E pohoè ôtou. E noho hakaùa ôtou io to ôtou fenua tumu.
Oia nei ta ù teào, oia hoì te mea ta ù e hana ai. »
4.- TETAUTINA O TE PEROFETA IOERE 3, 1-5a
1 He teào na te Fatu.
« E kiini au i tu ù kuhane i ùna o te tau mēmau i pēpenatia,
e ìò he perofeta ta ôtou tau tama,
e haamāàmatia te tau ànamotua ma òto o te moemoeā,
atii me te poì hou ma òto o te tau haaìtetina me he moemoeā.
2 I hua ava, e kiini atii au i tu ù kuhane ma ùna o te tau tāvini.
3 E hana au i te tau hana mahaò nui
io he ataàni atii io he fenua :
he toto, he ahi, he tau pūkohe ahi.
4 E ìò te òumati he pō keevō. E ìò te māhina me he toto,
oa tihe mai te  o te Fatu o te haavātina.
5 E pohoè ai te tau ènata ia vevaò atu âtou i te Inoa o te Fatu. »
TARAMO 104 (103), 1-2, 1a.24, 27-28, 29b-30
E te Fatu e, a pahi mai i to Òe Kuhane,
no te haahou i te hakatu o te fenua. cf.103,30
1 A haameitaì i te Fatu, e tu ù kuhane e.
E te Fatu e, tu ù Etua e, u tiketike Òe.
Ua tāpītia Òe me te kāìè,
2 O te àma te kahu e fāfī ia Òe.
1a A haameitaì i te Fatu, e tu ù kuhane e.
24 He mea nui to Òe tau hana, e te Fatu e.
Na to Òe māàma i pēpenatia te tau mēmau paotū.
Ua pī te fenua i to Òe tau taetae.
27 O âtou paotū e tetaì nei ia Òe
No te koàka mai to âtou oà, i te ava e hei.
28 U vaièi atu Òe : e kohi mau âtou.
U pepeù i to Òe îìma : e kai haamaòna âtou.
29b Me too Òe i to âtou menava,
E mate nui âtou me te hua io he èpo.
30 Na Òe e puhi i te ao, e pēpena hou âtou.
U haahou Òe i te hakatu o te fenua.
TETAUTINA O TE HĀMANI A PAURO PEÀTO I TO ROMA
8, 22-27
22 Ua ìte hoì tātou, tihe i tēnei mou â,
u taaàu me te uē hua tau mēmau,
me he uē o te vehine haatotohi aa i te tama.
23 Aòè o te tau mēmau pēpenatia anaè.
O tātou nei tahipito te i koàna mai i te Kuhane Meitaì
me he to mua hope taetae me io te Etua,
e kōhoà nei me te uēuē o tātou e tetaì ana
na te Etua e haaìò ia tātou he tau tama na Īa,
me te haapao ònaòna i to tātou haapohoètina.
24 U haapohoètia tātou, e mea à i òto o te tetaìtina aneiho.
Ia ìte tātou i te hakatu pohoè ta tātou e tetaì nei,
e koè ai te tetaìtina.
O ai hoì te i tetaì i te mea i ìtemata ?
25 Atià, e tetaì nei tātou i te tau mea u te e ìtemata.
Ua tohe mau tātou e kōhoà ana i hua taetae.
26 Atii, ua toko te Kuhane Meitaì i to tātou koekoe pepee.
Aòè tātou i have i te hakatu o te pure.
Atià, u vevaò te Kuhane Meitaì i uē ia tātou
ma he èo mamaioo,
u te e koàna i te ponateào i te haavivini mai.
27 O te Etua te i ìte i te koekoe o te tau ènata,
u vivini Īa e aha to te Kuhane kōhoà i òto o tātou.
E tahi maìmaì hoì to te Etua me to te Kuhane vevaòtina
i uē ia tātou, te mataèinaa o te Etua.
ALLELUIA ALLELUIA
Mave mai, e te Kuhane Meitaì e.
A iho mai io he koekoe o mātou.
A haahoutia mātou e to Òe kāòha.
EVANERIO O IETU KIRITO VĀÀNA E IOANE 7, 37-39
37 I te â paona o te koìna, he â koìna nui tēia,
ua maô Ietu me to Īa peàu ma he èo oko pēènei :
« Me paka te ènata i te vai, a tihe mai io ù.
38 E fāinu au i te ènata e haatià ia ù.
Me he mea i patutia i òto o te Hāmani tapu :
E tahe te vai pohoè me i òto o Īa. »
39 U peàu Ietu i hua teào no te haavivini
i te Kuhane Meitaì ta te poì haatià ia Ietu e apuu ai.
Aòè hoì i tuutia atu nei te Kuhane Meitaì
na te mea aòè Ietu i haakāìètia.
TE KOÌNA O TE PENETEKOTE
TETAUTINA O TE HĀMANI HANA A TE TAU ÀPOTORO
2, 1-11
1 I te ava i faitia te koìna Penetekote,
io he vahi e tahi, u putupututia te poì haatià paotū.
2 Ua ònoputia anamai te pooìna me io he àni mai,
hakatu me he tūaio metani oko nui.
Ua pī i hua pooìna te faè i èià ua noho âtou.
3 Ua ìte âtou i tītahi mēmau hakatu me he èo ahi
te i tuhatia me te tau, e tahi ma ùna o âtou tikitahi.
4 A tahi a pī âtou paotū i te Kuhane Meitaì,
me to âtou teàteào ma he èo kē, èo kē,
vāàna ta te Kuhane Meitaì i maìmaì e peàu âtou.
5 Enā, ua noho i Ierutaremi te tau ati Iuta, poì pure,
te i titihe mai me i te tau fenua paotū ma àò o te àni.
6 Mēìa i te pooìna, u putuputu mai te faètoa.
U pūpūkina âtou na te mea ua òno âtou tikitahi
i te tau Àpotoro e teào aa ma òto o to âtou iho èo.
7 U mahaò âtou me te emièe e peàu ana :
« Aòè à me i te Fenua Karirea mai
tēnei poì paotū e teào nei ?
8 Pēhea òa tātou titikitahi, e òno ia âtou
e hakako ana ma òto o to tātou èo tumu ?
9 To Paratia, to Metai, to Erama,
te huaa ènata e noho nei i te Fenua Metopotamia,
Iutea, Kapatokia, Ponoto, Atia, Ferukia,
10 Pamafuria, Ekipito, Tiripia tata èka me Kirene,
to Roma manihii înei, te poì fānautia ati Iuta,
11 me te poì haa ati Iuta mēìa i to âtou haatià,
to Kerete, to Arapia, ua òno tātou paotū ia âtou
e teào aa ma io to tātou èo
no te haaìte i te hana mahaò o te Etua. »
TARAMO 104 (103) 1.24ac, 29b-30, 31.34
E te Fatu e, a pahi mai i to Òe Kuhane
Te i haahou i te hakatu o te fenua. cf.104,30
1 A haameitaì i te Fatu, e tu ù kuhane e.
E te Fatu e, tu ù Etua e, u tiketike Òe.
Ua tāpītia Òe me te kāìè,
24 He mea nui to Òe tau hana, e te Fatu e.
Ua pī te fenua i to Òe tau taetae.
29 Me too Òe i to âtou menava,
E mate nui âtou me te hua io he èpo.
30 Na Òe e puhi i te ao, e pēpena hou âtou.
U haahou Òe i te hakatu o te fenua.
31 A kāìè te Fatu no te tau tai e tihe anatu.
A èkaèka te Etua i òto o to Īa tau hana.
34 Koù e haaèkaèka to ù mou hīmene i te Fatu.
O tu ù koakoa te haapii me te Etua anaè.
TETAUTINA O TE HĀMANI I TO KARATA 5, 16-25
E tu ù tau tunane tuehine.
16 Oia nei ta ù teào : a ao i te Kuhane Meitaì
mea Haatee ia ôtou.
Ma èià, e òomi ôtou i te tau hīa pē o te tino.
17 He mea kē hoì te tau hīa o te tino,
mea kē te hīa o te Kuhane Meitaì.
Aòè e aotahi te hīa o te tino me to te Kuhane Meitaì.
Oia te piò, ia haatee te Kuhane ia ôtou,
u te e hana ôtou vāàna i te hīa o te tino.
18 Me aotahi ôtou i te maìmaì o te Kuhane Meitaì,
ua koè te mana o te Ture i ùna o ôtou.
19 Ma te tiòhi i te hakatu pohoè o te tau ènata,
ua ìte tātou paotū e aha te tau hīa pē o te tino :
te hinenaò pu, te hana mako, te keu pē,
20 te pakaihi i te ètua tīkoe, te nanikaha, te koekoe hiaki,
te tōtōua, te keitani, te haahaa, te totofai,
te tōtohe me te paekē,
21 te koekoe ovi atu ovi mai, te kai me te inu faufau
me tahipito hakatu pē atu.
Òmua, u peàu au ia ôtou, u peàu hakaùa :
te ènata te i hana i hua tau hana teka,
aòè īa e tomo i òto o te Patirēia o te àni.
22 He mea kē to te Kuhane Meitaì puu i òto o tātou.
Me io Īa te koekoe kāòha, koekoe koakoa, koekoe moû.
Ma te Kuhane Meitaì, e amo te ènata i te tau kōfii paotū,
e toko atu toko mai te hoa i te hoa me te koekoe vaièi,
23 te koekoe hakahae koè, peê koè, kāìè koè.
Aòè e hakako te Ture i hua hakatu pohoè.
24 Ia haatahi te tau ènata me te Kirito,
me he mea, u haamate âtou i to âtou iho tino
ma te òomi i te tau hīa pē.
25 U vaièi mai te Kuhane Meitaì i te hakatu pohoè hou.
A aotahi hoì tātou i hua Kuhane !
PURE VEVAÒ I TE KUHANE MEITAÌ
E te Kuhane Meitaì e,
A iho mai io he koekoe o mātou.
A pahi mai me i ùna i to Òe māàma.
E te Motua o te poì veve.
E te tumu o te vaièi i te taetae. A mave mai.
E te māàma o te koekoe. A ihi mai io mātou.
E te vevao meitaì nui.
E te manihii moû oko,
A haakoè i te momoù.
Ma òto o te hana, o Òe te hakaēa.
Ma òto o te veàveà, o Òe te kamaìi.
Ma òto o te uē, o Òe te èkaèka.
E te māàma haakoakoa mai.
A mai no te haapī me to Òe àma
I te koekoe o to Òe poì haatià.
Me takitia me io mātou to Òe mana Etua,
E koè ai te Meitaì i òto o te ènata.
E toe anaè te hīa pē me te Ìno nui io īa.
A haamā i te mea èpo.
A haatokū i te mea moô.
A haapohoè i te mea takapii.
A haanevaì i te mea feò.
A haamāhanahana i te mea anu.
A haatoitoi i te mea pikopiko.
A vaièi mai i te poì haatià
E hano nei e haapii me Òe,
I te fitu o to Òe hana kāòha.
Paotū te â, a haatee mai i te àni.
A vaièi mai i te tuki o te hana meitaì.
A tuu mai i te pohoè me te koakoa paona koè.
ALLELUIA ALLELUIA
Mave mai, e te Kuhane Meitaì e !
A ihi mai io he koekoe o mātou.
A haaveàveà i to mātou koekoe e to Òe kāòha.
EVANERIO O IETU KIRITO VĀÀNA E IOANE
15, 26-27 ; 16, 12-15
I te ava e taha atu Ietu me i te aomāàma nei io te Motua,
u peàu Īa i to Īa tau kouâ pēènei :
26 « E tihe mai te Vavao, o Īa te Kuhane
te i haaìte i te Tiàtohu i ùna o te Etua,
me io te Motua to Īa iho mai.
Na ù e pahi mai i hua Kuhane me io tu ù Motua.
Na Īa e haatiàtohu ia ù iho.
27 O ôtou tahipito te i haatiàtohu mai ia ù,
na te mea ua kē ôtou me au me i te tīmatatina.
12 He mea nui te teào kē e too ta ù e haaìte atu,
atià he teào tono.
I tēnei, u te e koàna ia ôtou te apuu.
I3 I te ava e tihe te Kuhane,
e haaìte i te Tiàtohu i ùna o te Etua ;
na Īa e haatee ia ôtou i te Tiàtohu paotū.
Aòè hoì e peàu na Īa ta Īa anaè,
e peàu Īa vāàna i te mea ta Īa i haaòno.
E haaìte atu Īa i te mea e tihe ai ma tītahi â.
14 E òno Īa i tu ù teào no te haaìte ia ôtou.
Ma èià hoì to Īa haakāìè ia ù.
15 To tu ù Motua taetae paotū, ua ìò no ù.
Oia te tumu u peàu ia ôtou :
e òno te Kuhane i ta ù teào me te faì atu ia ôtou. »
TE KOÌNA O TE ETUA TOÙTAHI
TETAUTINA O TE HĀMANI TEUTERO 4, 32,34 39-40
32 U peàu Moite i te mataèinaa Iraene :
« A ūi atu i tītahi ènata me i te tai i àò aè, i àò aè,
me i te ava u pēpena te Etua i te ènata tihe i te â nei,
me i tītahi kēkē tihe atu i tītahi kēkē o te fenua,
aha, ua ìtetia te mea hōhonu atii ?
33 Aha, u koàna mai te mataèinaa
te i hakaòno i te èo o te Etua e teào aa
me i òto o te ahi uà tāpupu,
koè i mate nui hua mataèinaa ?
34 Aha, me tītahi ètua kē te i vae i te mataèinaa
me te taki ia īa me i vāvena o te poì mākaka,
ma te hana haaveke, te tau hakatu mahaò, te hana mana,
te tōtōua, te ìi o te îìma, te hopo nui ?
Oiana te hana ta te Etua, to òe Fatu,
i hana no te aahi mai ia òe
i vaho o te Fenua Ekipito, me he mea ua ìtemata òe.
39 I tēnei, a haamaakau òe, a kaituto io he koekoe :
He Etua te Fatu i ùna nui o te àni,
atii i no he fenua. Aòè he Etua kē atu.
40 Ma te tau â paotū, a aotahi òe i te teào a te Fatu
ta ù i tuu nei ia òe i tēnei â,
etià a koakoa òe atii me ta òe tau tama ma hope o òe,
a òa to òe pohoètina i no he fenua
ta te Fatu Etua i tuu atu ia òe. »
TARAMO 33 (32) 4-5, 6.9, 18.20, 21-22
Mamau òe, e te mataèinaa o te Etua !
4 E toitoi noa te Teào a te Fatu.
U tiàtohu anaè to Īa tau hana paotū.
5 U haataetae Īa i te hakatu toitoi, hakahae koè.
Ua pī te aomāàma i to Īa tau hana kāòha.
6 U pēpena te Etua i te àni na to Īa teào.
U kānea Īa i te aomāàma na te mana o to Īa ao.
9 E tahi ponateào : u pēpena Īa i te aomāàma.
U peàu Īa : u kāneatia te tau mēmau paotū.
18 Ua toko te Etua i te tau ènata pakaihi ia Īa,
Te poì e tetaì mau i to Īa kāòha mai,
20 O te Fatu te tumu o to tātou pohoè.
O Īa to tātou toko me te vavao.
21 Me io Īa iho to tātou koakoa.
U haatià tātou i to Īa inoa peàto.
22 E te Fatu e, a noho mau to Òe kāòha i ùna o mātou
Atii me mātou e tetaì mau i to Òe vaièitina.
TETAUTINA O TE HĀMANI I TO ROMA 8, 14-17
E tu ù tau tunane tuehine.
14 Te tau ènata paotū i haateetia e te Kuhane o te Etua,
ua ìò âtou he tau tama a te Etua.
15 Aòè hoì i koàna ia ôtou te Kuhane
hakatu me to te poì haamōèhutia
no te aotahi atu me te koekoe haametaù.
Atià, u koàna ia ôtou te Kuhane
te i haaìò ia ôtou he tau tama.
I òto o hua Kuhane, u taaàu tātou : « E Apa. E te Motua e ! »
16 U haatahi te Kuhane o te Etua me to tātou kuhane
no te haatiàtohu he tau tama tātou a te Etua.
17 Me he mea he tau tama tātou, na tātou hoì
te taetae tāpaetia e te Etua no ta Īa tau tama.
E àva tātou i hua tau taetae me te Kirito,
me memae tātou i te memae kātahi me te Kirito,
ma èià e haakāìètia tātou kātahi me Īa.
ALLELUIA ALLELUIA
cf. Ap.1,8
Kāìè nui te Motua me te Tama me te Kuhane Meitaì :
I te Etua te i tū nei, te i tū òmua naoti, a tihe ai !
EVANERIO O IETU KIRITO VĀÀNA E MATEO 28, 16-20
I tēia mou pō,
16 ua fiti te Tīònohuu ma tahi kouâ i te Fenua Karirea,
i ùna o te tuaivi ta Ietu i peàu atu ia âtou.
17 Ia ìtemata âtou ia Ietu, u momoe haatona âtou nui,
âtou te i haatià koè òmua.
U haatata mai Ietu me âtou. U peàu Īa pēènei à :
« Ua tuutia mai te mana ia ôtoa, io he àni atii i no he fenua.
19 A tataha atu ôtou.
A haaìò i te tau mataèinaa paotū he tau kouâ
e papatema ana ia âtou i te inoa
o te Motua me te Tama me te Kuhane Meitaì.
20 A hakako ia âtou no te aotahi i te tau mea paotū
ta ù i peàu ia ôtou.
Enā, e noho au me ôtou ma te tau â paotū,
tihe atu i te paona o te ao nei. »
TE KOÌNA HAHI I TE EUKARITIA
TETAUTINA O TE HĀMANI A MOITE PEAUTIA EHOTO
24, 3-8
3 Ia iho mai Moite, u haaìte i te mataèinaa Iraene
i te tau teào paotū a te Fatu.
E tahi èo to te mataèinaa no te haahua atu :
« E aotahi mātou i te teào hakatahi ta te Etua i peàu mai. »
4 Ua patu Moite i tenā tau teào paotū a te Fatu.
I te pōpōuì ma te oìoì, u kānea Moite i te fātaapure
i te tumu aneiho o te tuaivi.
U haatū ònohuu ma ùa keâ ;
e tahi no te tau ati tikitahi o Iraene, ònohuu ma ùa âtou.
5 U peàu īa i te mou poì hou o Iraene
no te ùtuna atu i te hēana pūovo me te ahi,
no te kukumi i nā pifa toa kakaiū
mea ùtuna haatāvaè i te Etua.
6 Ua kohi Moite i te hope o te toto i òto o te tau kookā.
U pihau i te fātaapure me te toena o te toto.
7 I muì iho, ua too Moite i te Hāmani o te Piimau
me to īa tetau i mua o te mataèinaa.
Pēènei to te mataèinaa haahua atu :
« E aotahi atu mātou i te tau teào paotū a te Fatu. »
8 Ua too Moite i te toto me te pihau
i te mataèinaa e peàu aa :
« Oia nei te toto o te Piimau
ta te Fatu i haatoitoi me ôtou,
vāàna i te teào ta âtou i apuu mai. »
TARAMO 116B (115) 12-13, 15-16ac, 17-18
E ùtuna kātahi nei mātou i te ipu o te pohoè,
e vevaò ana i te inoa o te Fatu.
12 Pēhea to ù haahuaèkaèka i te Fatu
No te meitaì hakatahi ta Īa i vaièi mai ?
13 E ùtuna au i te ipu o te pohoè,
E vevaò au i te inoa o te Fatu.
15 He taetae io te Fatu,
Te matena o to Īa huaa.
16 O au à to Òe tāvini, e te Fatu e,
Te ènata humutia ta Òe i vevete mai.
17 E ùtuna au i te hēana haahuaèkaèka,
E vevaò au i te inoa o te Fatu.
18 E hana au vāàna i ta ù teào voto
I mua o te motuhaka nui o to Īa mataèinaa.
TETAUTINA O TE HĀMANI I TO HEPEREO 9, 11-15
11 Atià, ua tihe mai te Kirito. O Īa te Tāuà nui
o te taetae i peàutia ta tātou e tetaì nei.
Ua taha te Kirito ma vāvena o te faèkā keî aè,
peàto atu i to mua, aòè i kāneatia na te îìma ènata,
aòè hoì me i te aomāàma nei hua faèkā.
12 Ua tomo te Kirito i òto o te Ahu tapu o te àni,
e tahi tomotina anaè no te tau tai anatu.
Aòè te Kirito i tomo me te toto o te tau koimaa,
te tau piha, atià me to Īa iho toto.
Na hua toto, u haapohoè mai te Kirito ia tātou
no te ava paona koè.
13 Me he mea u haataìtaìtia te tau ènata i hava i te mikeo,
ma te toto o te koimaa me te toto o te piha
akoè à ma te pihau i to âtou tino me te vai tapu,
14 tōtahi atu e haataìtaì te toto o te Kirito
i to tātou koekoe hava i te tau hana pē
te i aahi ia tātou i te matena.
Ma io te Kuhane ètereno,
u ùtuna te Kirito ia Īa iho he hēana taìtaì pē,
etià e pakaihi tātou i te Etua pohoè.
15 No èià, ua ìò Ietu te tumu o te Piimau hou,
etià e koàna mai i te ènata vaetia
te tau taetae paona koè ta te Etua i peàu mai.
Atià òmua, ua mate te Kirito
no te haakoè i te mikeo o te Piimau tehito.
ALLELUIA ALLELUIA
cf. In.6,51-52
E te Fatu, e Ietu e,
O Òe te faraoa pohoè te i iho mai me io he àni.
O te ènata e kai i hua faraoa, e koàna ia īa te pohoè anatu.
EVANERIO O IETU KIRITO VĀÀNA E MAREKO
14, 12-16.22-26
12 I te â to mua o te koìna faraoa haapupuhi koè,
oia te ava e kukumitia te àrenio Pakate,
u peàu to Īa tau kouâ ia Ietu :
« I hea u maìmaì Òe e hee mātou,
e haapei no Òe i te kainamau Pakate ? »
13 U pōpahi Ietu i nā kouâ tokoùa me te peàu ia âua :
« A hee io he pāpuafaè. E âvei ôùa
me te ènata àve aa i te huevai. A ūtaì ia īa.
14 Io te faè e uu ai hua ènata, a uu me ôùa.
A peàu i te ènata heifaè :
E ūi atu ta te Tuhuna i hea to ù pāòto
i èià e kai au i te Pakate me to ù tau kouâ ?
15 Na īa e haaìte ia ôùa, io he tohua i ùna o te faè,
i te pāòto keî tāpītia me te tau moena,
meitaì te kāneatina. I èià, a haapei no tātou. »
16 Ua hee atu nā kouâ tokoùa me te tomo io he pāpuafaè.
U koàna ia âua te mea peàutia e Ietu.
U haapeipei âua i te Pakate.
22 E kai aa âtou, ua too Ietu i te faraoa,
u haahuaèkaèka, ua vahi, ua tuu atu ia âtou
me te peàu : « A too. O to ù tino tēnei. »
23 I muì iho, e too aa i te ipu,
u haahuaèkaèka me te tuu ia âtou.
Ua inu âtou paotū.
24 U peàu Ietu ia âtou pēènei : « O to ù toto tēnei,
te toto o te Piimau, te tahe aè no te poì nui.
25 E teào tiàtohu ta ù nei ia ôtou :
Aòè au e inu hakaùa me io te puu o te tumuvino
tihe i te â e inu au i te vino hou i to he Patirēia o te Etua. »
26 Ia pao te hīmene o te tau taramo,
ua uu âtou i vaho no te fiti io he tuaivi Oriveti.
TE KOÌNA O TE HŌUPO TAPU OKO O IETU
TETAUTINA O TE PEROHETA OHEA 11, 1.3-4.8c-9
1 Oia nei te teào a te Fatu Etua :
« U kāòha au i te mataèinaa Iraene me i te ava ua hou īa.
U vevaò au ia īa e tu ù òna tama
ia haauu au ia īa i vaho me io te Fenua Ekipito.
3 U hakako au ia īa i te taha vaevae
ma te too i to īa ìma.
Atià, aòè īa e vivini o au to īa pātoko.
4 U aahi au ia īa me te moû, e toitia e te hinenaò.
Ua hopu au ia īa
hakatu me te kui e tau aa i ta īa tama.
Ua oha au no te tāfai ia īa.
Atià, aòè Iraene i maìmaì e hua mai io ù.
E aha ? E haatopa au i ùna o âtou i te tuki pē ?
8 Koè nui. U mehea au, memae to ù koekoe.
9 Aòè au e hana me te peê.
Aòè au e haahina ia Iraene.
He Etua au. Aòè au e hakatu me te ènata.
I vāvena o âtou, he Etua peàto au.
Aòè au i tihe mai no te haahina me te haamate nui. »
HĪMENE : Itaia 12, 2, 4b-5a, 5b-6
E tātakahiti ana ôtou me te koakoa,
E kapu i te vai me io te punavai pohoè. It.12,3
2 O te Fatu Etua tu ù haapohoè.
U haatià nei au, haametaù koè.
O te Fatu Etua tu ù ìi. E hīmene au ia Īa.
Io te Fatu te tumu o to ù pohoè.
4 I hua â, e haahuaèkaèka ana i te Fatu, e peàu ôtou :
« A faì atu io te poì êteni i to Īa tau hana mana. »
A haaìte atu : he Tiketike to Īa inoa.
5 A haatani i te pū no te hahi i te Fatu.
Ua hana hoì te Fatu i te hana mahaò.
U mevaha to Īa òno nui ma nā fenua vii pu.
6 E Tiona e, a èkaèka, a taaàu i te koakoa.
U titiè te Fatu Etua i vāvena o ôtou.
O Īa te Peàto nui o Iraene.
TETAUTINA O TE HĀMANI A PAURO PEÀTO I TO EFETIA
3, 8-12.14-19
E tu ù tau tunane tuehine.
8 O au nei te iti noa i vāvena o te tau ènata vaetia e te Etua.
Atià, u vaièitia mai te karatia no te haaìte atu i te tau êteni
i te Teào Meitaì o te nuitina o te taetae kuhane,
ta te Kirito Ietu i tuu mai.
U te e koàna e tahi ènata i te tetau.
9 Atii, u vaièitia mai te karatia
no te haapuàha i mua o te tau ènata paotū,
pēhea ta te Etua e haapao i to Īa maìmaì,
te i hakanātia me i òmua naoti.
Na te Etua i pēpena i te tau mēmau ia ôtoa,
na Īa i hakanā i hua maìmaì
no te tau ènata o te tau tai i àò aè.
10 I tēnei, ma io te Èkaretia, u haaìtetia i te tau Anera,
i te tau Vivini e noho nei io he àni,
i te hakatu kē, hakatu kē mahaò nui o te Māàma o te Etua.
11 I te tumu o te tau tai paotū, oia te maìmaì o te Etua,
vāàna e haapaotia e Ietu Kirito, to tātou Fatu.
12 I òto o te Kirito, mēìa i to tātou haatià ia Īa,
u vevaò tātou no te haatata mai me te Etua, haametaù koè.
14 No èià, ua pure au e noho muò ana i te aò o te Etua Motua,
15 te i apa ma to âtou inoa tiàtohu i te tau huaa paotū,
to te àni, to te fenua vii pu.
16 Ua ape au i te Etua, vāàna i te tapavaù nui o to Īa kāìè,
na to Īa Kuhane Meitaì, a haaoko i to ôtou koekoe
etià e meitaì aè to ôtou pohoè haatià.
17 Ua ape au i te Etua a noho te Kirito i òto o ôtou,
mēìa i to ôtou haatià.
A ìò te kāòha te tumu o to ôtou hana ia ôtoa,
me he mea te tūàka no te faè hou.
18 Ma èià, o ôtou tahipito i vāvena o te mataèinaa o te Etua,
te i vivini i te fātea, te òa, te tiketike, te hōhonu.
19 E ìte māàma ôtou i to Ietu Kirito kāòha,
e aha à u te e àva te māàma ènata no te haapuàha mai.
A tahi a ìò ôtou pii èka me te Etua
te i haapī ia ôtou me to Īa hakatu pohoè Etua.
ALLELUIA ALLELUIA cf.In.5, 5-6
O Ietu Kirito, te Tama a te Etua.
Ua tihe mai nei me te toto me te vai.
U pohoè tātou mēìa i to Īa mate nui.
Akoè à :
U kāòha to mua te Etua ia tātou
me te tuu mai i ta Īa òna Tama.
U haatāvaè Ietu ia tātou me to Īa Motua
Ma te matena hēana no to tātou tau mikeo.
EVANERIO O IETU KIRITO VĀÀNA E IOANE 19, 31-37
I tēia mou pō,
31 Oia te â haapei i te Koìna Pakate.
He â tapu oko no te tau ati Iuta hua koìna,
tōtahi atu mēìa e faìtia ma te Tāpati.
No èià, ua ape âtou ia Pinato
a fafati i nā vaevae o te tau ènata i pāokapekatia
me te taki iho i to âtou tino
oa èva âtou i hua â uo he peka.
32 Ua tihe mai mou kape te i fafati i te tau pūhāvaevae
o nā ènata i pāokapekatia me Ietu.
33 Ua tihe âtou io Ietu ; e ìte aa ua mate nui,
aòè âtou i fafati i to Īa vaevae.
34 Atià, tītahi kape me te taa, ua veò i to Īa kaokao.
Ua tahe anamai te toto me te vai.
35 Na te ènata i ìtemata te i haatiàtohu i hua mea.
He teào tiàtohu ta īa.
Ua ìte te Fatu : u peàu īa i te mea tiàtohu,
etià e haatià me ôtou.
36 U haapaotia hoì hua mea etià e toitoi
te teào o te Hāmani tapu te i peàu :
« Umoì e fafatitia e tahi o to Īa tau ivi. »
37 U patutia io he vahi kē :
« E tiòhi ai âtou i tēia ta âtou i tīputaèe. »
TOMINIKA E ÙA
TETAUTINA O TO MUA HĀMANI O TAMUERA 3, 3-10.19
3 U hiamoe te pōìti, o Tamuera te inoa,
i òto o te faèpure o te Fatu, i èià te Àraka o te Etua.
4 U vevaò te Fatu Etua ia Tamuera.
U haahua atu īa : « Eīa au nei. »
5 U tohuti īa io te tāuà Eria me te peàu :
« U vevaò òe ia ù. Eīa au nei. »
U peàu Eria :
« Aòè au i vevaò ia òe. A hua atu. A moe. »
6 Ua hua te pōìti i te hiamoe.
U vevaò hakaùa te Fatu Etua ia Tamuera.
Ua maô īa. U tohuti io te tāuà Eria me te peàu :
« Eīa au nei, na te mea u vevaò òe ia ù. »
U haahua hakaùa Eria :
« Aòè au i vevaò ia òe, e tu ù tama e. »
A hua atu. A moe. »
7 U te e ìte Tamuera i te Fatu.
Aòè Tamuera i òno atu nei i te teào a te Fatu.
8 U vevaò te Fatu ia Tamuera. O te toù vevaòtina tēia.
U maô Tamuera me te tohuti io Eria.
U peàu : « U vevaò mai òe ia ù. Eīa au nei. »
9 A tahi a vivini Eria i te mea o te Fatu Etua
te i vevaò nei i te tama. U peàu hoì Eri ia Tamuera :
« A hua. A hiamoe.
Me vevaòhakaùatia òe, a peàu pēènei :
E te Fatu e, a faì mai i to òe hīa.
U hakaòno hoì to òe tāvini. »
Ua hua Tamuera i te hiamoe.
10 Ua tihe te Fatu. Ua noho pii o Tamuera
me to Īa vevaò me he mea òmua atu nei :
« E Tamuera, Tamuera e. »
U haahua atu Tamuera :
« E te Fatu e, a faì mai i to òe hīa.
U hakaòno hoì to òe tāvini. »
19 U keî aè Tamuera. O te Etua me īa.
Ua mana te teào paotū o te Fatu te i tihe io Tamuera.
TARAMO 40 (39) 2abc.4ab, 7-8a, 8b-9, 10cd-11cd
« E te Fatu e, eīa, ua tihe au nei
no te aotahi atu i to Òe maìmaì. » cf.40,8.9
2 U tetaì au, e tohe mau i te tetaì i te Fatu.
U tiòhi mai te Etua, ua òno Īa i tu ù vevaò.
4 U pepeù te Etua i to ù fafa no te hīmene hou,
E tani to ù èo no te hahi i to tātou Etua.
7 Aòè Òe e maìmaì i te tau ùtuna hēana.
U pepeù Òe i tu ù puaìna, e te Etua e.
Aòè Òe i apuu mai i te hēana pūovo i te ahi.
8 Oia te tumu o tu ù peàu atu : Eīa, ua tihe au nei.
Ua patutia no ù io he Hāmani tapu
9 Pēhea te haatae i to Òe maìmaì.
E tu ù Etua e, oia nei tu ù hīa :
Te aotahi atu i to Òe teào ma io he koekoe.
10 A haamaakau Òe u te e mutu to ù fafa.
E te Fatu e, ua ìte meitaì Òe.
11 U haaìte au i te motuhaka o te mataèinaa
I to Òe Hakāòha mai me to Òe Toitoitina.
TETAUTINA O TO MUA HĀMANI A PAURO PEÀTO
I TO KORINETIA 6, 13b-15a.17-20
E tu ù tau tunane tuehine.
13 Aòè i kāneatia te tino no te hana mako.
O te Fatu te vivini o to tātou tino.
O to tātou tino no te tāvini i te Fatu.
14 U haatū te Etua i te Fatu Ietu me i vāvena o te huaa mamate,
atii to te Etua Haapohoè i to tātou tino ma to Īa mana nui.
15 Aha, u te e ìte ôtou ? O to ôtou tino
me tītahi hopetino o to te Kirito tino ?
17 Te ènata e haatahi me te Fatu
e ìò he Kuhane e tahi me te Fatu.
18 A titii ôtou i te hana mako.
Te tau mikeo paotū te i tāhava i te ènata,
te tau tekateka, i vaho o to īa tino ;
te ènata mako e tāhava i to īa iho tino,
19 aha, u haatūhaa ôtou ?
To ôtou tino te Hiero o te Kuhane Meitaì
te i noho nei i òto o ôtou,
te i vaièitia mai e te Etua ia ôtou.
U te e koàna te peàu : na ôtou ta ôtou anaè.
20 Ma te tiàtohu, ua hokotia mai ôtou.
No èià, a haakāìè ôtou i te Etua ma òto o to ôtou tino.
ALLELUIA ALLELUIA
cf. In.1, 41.17
« U koàna mai ia māua te Metia, o hua mea aneiho te Kirito » ; ma io Ietu Kirito, ua tihe mai te Karatia me te Tiàtohu.
EVANERIO O IETU KIRITO VĀÀNA E IOANE 1, 35-42
I tēia mou pō,
35 ua noho Ioane me nā kouâ tokoùa
ma hiva o te kaavai Ioritane.
36 E tiòhi mau ia Ietu e taha aa, u peàu :
« O Īa nei te Àrenio o te Etua. »
37 Ua òno nā kouâ tokoùa i hua teào.
Ua ūtaì âua ia Ietu.
38 E fāìu aa Ietu, ua ìte ia âua e ūtaì aa ia Īa,
u peàu : « E aha ta ôùa e ìmi nei ? »
Ua haahua atu âua :
« E Rapi e, o hua mea aneiho e Tuhuna e,
i hea to Òe noho ? »
39 U peàu Ietu ia âua : « A mai. A tiòhi ! »
Ua tihe mai âua no te ìte i te vahi o to Īa nohotina.
Ua noho âua pii o Ietu i hua pō ana.
Ua èva te â, me he hora e fā i te ahiahi.
40 O Aterea, te teina o Timone Petero,
tītahi o nā kouâ tokoùa
te i òno i te teào a Ioane, te i ūtaì ia Ietu.
41 U âvei Aterea me to īa tuaana, ia Timone.
U peàu Aterea : « U koàna mai ia māua te Metia,
hua mea aneiho te Kirito. »
42 U aahi Aterea ia Timone io Ietu.
E tiòhi mau Ietu ia īa, u peàu :
« O Timone òe, tama na Iona.
O Keâ te inoa e apatia òe i tēnei. »
O hua mea aneiho me Petero.
TOMINIKA E TOÙ
TETAUTINA O TE HĀMANI A IONA 3, 1-5.10
1 U peàu te Fatu Etua ia Iona pēènei :
2 « A tū òe. A taha atu i Ninive io he pāpuafaè keî.
I èià, a haaòno nui i te teào ta ù e haaìte atu ia òe. »
3 Ua tū Iona me te hee i Ninive, vāàna i te Teào a te Fatu.
O Ninive à, he pāpuafaè keî, keî oko :
e toù pō te heetina me io tītahi kēkē io tītahi kēkē.
4 Ua tomo Iona io he pāpuafaè e tahi pō anaè.
U haaòno nui īa i te teào :
« E fā ònohuu pō i toe, a tahi a haahinatia Ninive. »
5 Te tau ènata noho aa i Ninive,
u haatià anamai âtou i te Etua.
10 Ua ìte te Etua i to âtou haaone. U fāìu âtou i te koekoe.
U tāvaè te Etua me te haakoè i to Īa peê.
Aòè te Etua e haatopa i ùna o âtou i te tuki peê.
TARAMO 25 (24) 4-5b, 6-7, 8-9
E te Fatu e, a hakako mai i to Òe tau aanui. 25,4
4 E te Fatu e, a haaìte mai i to Òe maìmaì.
O Òe iho, a hakako mai i to Òe tau aanui.
5 A haatee mai to Òe tiàtohu : a haamāàma mai.
O Òe hoì te Etua e haapohoè ia ù.
6 E te Fatu e, a haamaakau i to Òe uē,
Me i kiu mai to Òe kāòha te i noho mau.
7 A tūhaa i te tau tekateka o to ù houtina,
Umoì e titii atu ia ù nei : a haamaakau mai.
8 U meitaì, u toitoi anaè te Fatu
Te i haaìte i te aanui i te poì hukaka.
9 U aahi to Īa toitoi i te poì haapāpaù,
U hakako i to Īa maìmaì i te ènata kāìè koè.
TETAUTINA O TO MUA HĀMANI A PAURO PEÀTO
I TO KORINETIA 7, 29-31
29 E tu ù tau tunane tuehine, oia nei tu ù teào ia ôtou :
he mea poto te ava i toe, u tihe te paona o te aomāàma nei.
No èià, ia noho tahipito me te vehine,
a pohoè âtou me he mea e vehine koè.
30 Ia mateteka tahipito, me he mea u uēuē koè âtou.
Ia koakoa tahipito, me he mea u koakoa koè âtou.
Ia hoko mai tahipito i te tau mēmau,
me he mea aòè no âtou te tau taetae te i koànatia mai.
31 Te tau ènata te i hana me te tau mēmau o te ao nei,
a hana âtou me he mea aòè o âtou te fatu o hua tau mēmau.
Na te mea, e huìkē anatu te hakatu o te ao nei.
ALLELUIA ALLELUIA
Mk 1,15
Ua tata mai te Patirēia o te Etua.
A haatià ôtou i te Teào Meitaì Hou Mai.
EVANERIO O IETU KIRITO VĀÀNA E MAREKO 1, 14-20
14 Ma hope o to Ioane haaìòtia,
ua fiti Ietu io he Fenua Karirea.
U haaìte atu Īa i te Teào Meitaì Hou Mai me io te Etua.
15 U peàu Īa pēènei :
« Ua pao te ava i haaheitia.
U tata èka te Patirēia o te Etua.
A fāìu ôtou i te koekoe.
A haatià i te Teào Meitaì Hou Mai ! »
16 E taha aa Ietu ma te hiku o te tai Karirea,
ua ìte ia Timone me Aterea, to īa teina.
Ua haatopa âua i te ùpena io he tai.
He mou ènata àvaika hoì âua tokoùa.
17 U peàu Ietu ia âua :
« A ūtaì mai ia ù. E haaìò au ia ôùa he àvaika ènata. »
18 U avai anamai âua i te tau ùpena me te ūtaì ia Īa.
19 Ua taha Ietu i te ava poto.
Ua ìte Īa ia Iakopo, tama na Ihepetea, me Ioane, to īa teina.
Ua noho me âua i òto o te vaa no te kānea i te tau ùpena.
20 A tahi a vevaò Ietu ia âua.
U avai âua io he vaa
ia Ihepetea, to âua motua, me te poì hana.
Ua ūtaì âua ia Ietu.
TOMINIKA E FĀ
TETAUTINA O TE HĀMANI A MOITE PEAUTIA TEUTERO
18, 15-20
15 U peàu Moite i te mataèinaa Iraene :
« Ma vāvena o ôtou, ma vāvena o to ôtou tau tunane tuehine,
e vae te Fatu i te perofeta me he mea ia ù nei.
A hakaòno ôtou ia īa.
16 Oiana ta ôtou e ape i te Fatu
ia putupututia ôtou io te tuaivi Horepe, pēènei à :
« Aòè tātou e maìmaì e òno hakaùa
i te èo o te Fatu, to tātou Etua, oa mate nui tātou. »
17 A tahi a peàu mai te Fatu : He mea hei to ôtou apetina
i te perofeta hakatu me òe nei.
E tuu au i tu ù tau teào io to īa fafa.
E haaìte īa i te tau teào paotū ta ù i peàu ia īa.
19 Me he mea aòè tītahi e hakaòko
i ta īa teào peàutia ma tu ù inoa,
na ù e haavā ia īa.
20 Atià, me peàu pu tītahi perofeta na īa ta īa anaè,
akoè à, e teào īa ma te inoa o te ètua tīkoe,
e mate nui tenā perofeta. »
TARAMO 96 (95) 1-2,6-7b,7d-8a.9
I tēnei â, umoì tātou e taha kē te koekoe,
a apuu tātou i te Teào a te Etua. cf.95,8
1 A mai. A hahi tātou me te koakoa i te Fatu,
A haakāìè i to tātou motukeâ, te Haapohoè.
2 E haahuaèkaèka ana, a haatata mai tātou io Īa
E hīmene haakoìna no te hahi i te Fatu.
6 A tomo. A oha. A atoratio ia Īa.
A moe haatona i mua o te Fatu,
Na Īa hoì i pēpena ia tātou.
7 O Īa te Etua, o tātou te mataèinaa.
I tēnei â, aha e apuu ôtou i to Īa teào ?
8 Umoì ôtou e pūtuì me he mea i te fenua ataha,
9 U haaveke mai to ôtou tau tupuna me te hakaki ia ù,
E aha à ua ìtemata âtou i to ù hana mana.
TETAUTINA O TO MUA HĀMANI I A PAURO PEÀTO
TO KORINETIA 7, 32-35
E tu ù tau tunane tuehine.
32 E kōhoà nei au e pohoè ôtou paòpaò koè.
Te ènata aòè i noho me te vehine,
e tahi o īa maakau : te haataetae i te Fatu,
e ìmi aa pēhea te haaèka i te Fatu.
33 Te ènata i noho me te vehine, e ùa o īa maìmaì :
tītahi : e kōhoà i te taetae o te aomāàma haakoàna mai,
tītahi : e hano e haaèka i ta īa vehine.
34 Ma èià, e toitia hua āhana ma nā e ùa kēkē.
Te vehine, aòè a īa āhana, me he mea te vehine hou,
ua hano e haaèka i te Fatu
etià e peàto īa ma io he kuhane, ma io he ènata tiàtohu.
Te vehine e noho aa me te āhana,
u haapaòpaò ia īa iho mēìa i te taetae o te ao nei,
maakau aa pēhea te haaèka i ta īa āhana.
35 No te toko ia ôtou tu ù teào nei.
U te e maìmaì au e haatukee ia ôtou.
E too ta ù e hakapahi ia ôtou i te mea meitaì,
etià e haapii ôtou me te Fatu ma te tiàtohu o te koekoe.
ALLELUIA ALLELUIA
cf. Rk.1,68.79
A haameitaìtia te Fatu to tātou Etua :
no te poì e noho nei io he pō pōtano,
u haapupuà Īa i to Īa Māàma.
EVANERIO O IETU KIRITO VĀÀNA E MAREKO 1, 21-28
Ua tomo Ietu me to Īa kouâ i Kafaranaumi.
I te Tāpati, ua uu Ietu i òto o te tinakoka
me to Īa hano i te hakako.
22 Ua pē âtou i te mahaò mēìa i to Īa hakakotina
na te mea, u hakako Ietu ia âtou me te mana,
aòè me he mea ta te tau tuhuna teào.
23 Enā i òto o te tinakoka tītahi ènata uutia e te kuhane ìno.
24 U taaàu īa ma he èo oko me te peàu pēènei :
« E Ietu no Natareti, e aha ta mātou nei me Òe ?
Ua tihe mai Òe no te haahina ia mātou ?
Ua ìte au o ai Òe : o Òe te Peàto o te Etua. »
25 U oonaì Ietu ia īa me te peàu :
« A mutu òe. A uu i vaho me i òto o īa. »
26 U haaneue oko te kuhane ìno i hua ènata,
u taaàu oko ki me te uu anamai me i òto o īa.
27 Ua pī âtou paotū i te mahaò
me te peàpeàu atu ta te hoa i te hoa :
« E aha oti te mea nei ?
He teào hou hakakotia me te mana.
U vivini hoì Īa i te tau kuhane ìno. U aotahi atu âtou ia Īa. »
28 A tahi a mevaha to Ietu òno nui i te Fenua Karirea vii pu.
TOMINIKA E ÌMA
TETAUTINA O TE HĀMANI A IOPE 7, 1-4 6-7
1 Oia nei te teào a Iope : « Tiàtohu nui,
te pohoè o te ènata i no he fenua,
u hakatu me to te tueni viitoitia no te hana tono.
Ua hana haapaòpaò pu īa me i te pōpōuì tihe atu i te pō.
2 Me he mea a te tueni e kōhoà nei i te hakaēa io he vahi maù,
hakatu me te ènata hana e tiaì aa i ta īa moni hana,
3 atii me au nei. I tēia māhina, tēia māhina
e aha te mea i koàna mai ? He metani anaè.
U matakaù au i te pō mēìa i te memae.
4 Ia moe au, u peàu : Meitaì atu e aa hakaùa au.
E òa, òa oko te pō.
U moemoe au i te tau moemoeā faufau, tihe atu i te pōpōuì.
6 E pao vave to ù tau â,
tōtahi atu te vavetina i to te aho
e vevete me i te ìma o te ènata àvaika.
Ia pao te aho, u hakaēa te òa o to ù pohoètina.
7 E te Fatu e, a maakau Òe :
me he pūhea metani anaè to ù pohoètina.
Ia pao hua pohoè, aòè au e ìte hakaùa i te koakoa. »
TARAMO 147A (146) 1.3,4-5,6-7
A haameitaì i te Fatu te i àpau i to tātou tau maì. cf. 147,3
1 U hei nui te haakāìè i to tātou Etua.
U toitoi noa te hīmene me te hahi ia Īa.
3 U haameitaì Īa i te menava o te poì uēuē.
U àpau te Fatu i to âtou tau maì.
4 U tetau te Fatu i te nuitina o te fetū.
Ua apa Īa i te inoa e hei i tītahi, i tītahi.
5 U tiketike, ua mana nui to tātou Fatu.
U te e vivini e tahi ènata i to Īa māàma.
6 U haatiketike te Fatu i te poì haapāpaù.
U haanuhe Īa io he tuaèpo i te tau ènata mākaka.
7 A kāhua ôtou i te hīmene haahuaèkaèka i te Fatu.
A haatani i te kitā no te hahi i to tātou Etua.
TETAUTINA O TO MUA HĀMANI A PAURO PEÀTO
I TO KORINETIA 9, 16-19.22-23
E tu ù tau tunane tuehine.
16 E aha à e hakako au i te Evanerio, u te e haakāìè pu au.
U tuutia mai hua hana e te Etua.
Aòè e koàna ia ù te haakoè.
He ènata pē au nei no to ù haamevaha koè i te Evanerio.
17 Me he mea u hana au i hua hana na ù ta ù anaè,
e koàna mai hoì ia ù te tuki meitaì.
Atià, u te e hana au i tēnei hana na ù ta ù.
Na te Etua i vae mai no te hana.
18 No èià, e aha te tuki i koàna mai ia ù ?
Oia nei : te koakoa o te hakako pu i te Evanerio.
Aòè au i hano i te tuki e hei ia ù
no te haaìte atu i te Evanerio.
19 Ua hana au na ù ta ù.
U te e tueni au i tītahi ènata kē.
Atià, u haaìò au iho he tueni no te tau ènata paotū,
vāàna e hua mai io te Fatu te nuitina o te ènata.
22 U haaìò au he ènata haatià iti,
hakatu me te poì haatià iti,
vāàna te haahua mai io te Etua te poì haatià iti.
U haaìò au hakatu me te tau ènata kē, ènata kē paotū,
vāàna e hua mai tahipito io te Fatu.
23 To ù tau hana paotū i hanatia i uē i te Evanerio,
etià e àva atu me au i to te Evanerio tau taetae.
ALLELUIA ALLELUIA
cf. Mt.8,17
« Ua too Ietu i to tātou pepee.
U haakoè Īa i to tātou tau mate. »
EVANERIO O IETU KIRITO VĀÀNA E MAREKO 1, 29-39
I tēia mou pō,
29 ua uu Ietu me to Īa tau kouâ i vaho o te tinakoka
me to âtou taha atu io te faè o Timone me Aterea.
Enā me âtou Iakopo me Ioane.
30 Ua moe te motunoai vehine a Timone,
ua hemo i te mate hautete.
U peàu ponihoo âtou ia Ietu e aha to īa.
31 U haatata mai Ietu me to Īa too ma te ìma o hua vehine
no te haatū ia īa. Ua koè anamai te hautete.
U tāvini atu te vehine ia âtou.
32 I te ahiahi, ia naò te òumati, u aahitia mai
te poì hōpī paotū me te tau ènata uutia e te kuhane ìno.
33 U haamuimui mai te tiàtohu o te pāpuafaè
i mua te avaputa o te faè i èià ua noho Ietu.
34 U haameitaì Īa i te nuitina o te poì mate,
mate kē to tēnei, mate kē to tēia.
Ua tute Īa i te nuitina o te tiaporo.
Aòè Ietu i ao e pohā to âtou èo,
na te mea ua ìte âtou o ai Īa.
35 I te hāhakateiao, ua aa Ietu.
Ua uu Īa i vaho me te hee io he taha viviiō.
I èià, ua pure Īa.
36 O Timone me to īa tau hoa, ua hano e ìmi atu ia Ietu.
37 U koàna ia âtou Ietu me to âtou peàu atu :
« Ua ìmi te tau ènata paotū ia Òe. »
38 U peàu Ietu ia âtou :
« A hee tātou i vahi kē, io te tau pāpuafaè tata mai,
etià me i èià, e haaìte atu au i te teào.
Oia hoì te tumu i uu ai au i vaho. »
39 Ua hee Ietu me to Īa hakako i te teào
i òto o to âtou tau tinakoka, i te Fenua Karirea vii pu.
Ua tute atu Īa i te tau tiaporo.
TOMINIKA E ONO
TETAUTINA O TE HĀMANI A MOITE PEAUTIA REVITA
13, 1-2.45-46.
1 U peàu te Etua ia Moite me to īa teina Aarone, pēènei :
2 « Ia ìtetia i ùna o te kii o te ènata
te uto, te huhuà, akoè à te patapata,
hakatu me he mate kovi, e aahitia hua ènata
io Aarone te tāuà, akoè à io tītahi tāuà o to īa ati.
45 Te ènata i hemo i te mate kovi,
e haauhitia me te tau kahu pēpē, tutuiva.
Aòè e paèhutia to īa òuoho,
e pātia to īa mata me te tapa,
e taha īa e taaàu aa : « Tapu, tapu. »
46 Ua tapu hoì hua ènata hemo i hua mate.
A noho īa io te taha kē anatu ;
ma vaho o te pāpuafaè to īa nohona.
TARAMO 102 (101) 2-3ab, 4-5, 6-13, 20-21
Umoì Òe, e Ietu, umoì Òe e titii i te poì uēuē.
2 E te Fatu e, a hakaòno i ta ù pure,
A apuu i to ù èo taaàu io Òe.
3 I te â e haauēuē mai te tau kōfii,
Umoì Òe e mata koè ia ù.
4 Me he auahi io te metani, ua koè to ù tau â.
U veàveà to ù tau ivi me he ànahuahi.
5 Me he teitā moô, u pororō to ù tino.
U te e kākī au e kai i ta ù oà.
6 Mēìa i to ù uēuē oatea te pō,
U pipii to ù kii me te ivi.
13 E te Fatu e, e mau paona koè to Òe hakaìkitina.
E haamamaakautia Òe e te tau ènata hakatahi.
20 Ua oha te Fatu me io to Īa Hiero tapu,
Me io he àni i ùna nui, u tiòhi te Fatu i te fenua.
21 Ua òno Īa i te uēuē o te poì humutia,
U vevete Īa i te tau ènata, oa haamatetia âtou.
TETAUTINA O TO MUA HĀMANI A PAURO PEÀTO
I TO KORINETIA 10, 31-33 ; 11,1
E tu ù tau tunane tuehine.
31 No èià, ia kai, ia inu, ia hana i te tau hana kē, hana kē,
anatu, a hano ôtou no te haakāìè i te Etua.
32 Umoì ôtou e hakapahi i te pē ma to ôtou hakatu pohoè,
i te tau ati Iuta, akoè à i te tau êteni,
akoè à i te Èkaretia o te Etua.
33 O au iho, ua hano au e haaèka i te tau ènata hakatahi
i òto o ta ù tau hana paotū.
Aòè au e hana no to ù meitaì anaè,
atià no te meitaì o te nuitina o te ènata,
vāàna e haapohoètia âtou paotū.
1 A hana ôtou hakatu me ta ù nei,
me he mea u hana au hakatu me ta Ietu Kirito.
ALLELUIA ALLELUIA
Rk .7,16
Ua tū tītahi perofeta keî i vāvena o tātou,
U haameitaì te Etua i to Īa mataèinaa.
EVANERIO O IETU KIRITO VĀÀNA E MAREKO 1, 40-45.
I tēia mou pō,
40 Ua tihe io Ietu tītahi ènata kovi.
Ua noho muò me to īa vevaò ia Ietu, e peàu aa :
« Me he mea u maìmaì Òe,
e koàna ia Òe te haataìtaì ia ù. »
41 U mehea Ietu. U hohoà Īa i te ìma
me te haatukia i te ènata kovi, e peàu aa :
« U maìmaì au. A taìtaì òe ! »
42 Ua koè anamai to īa mate kovi. U taìtaì te kii.
43 E oonaì aa Ietu ia īa, u titii me te peàu :
44 « Umoì òe e faì atu i te ènata e tahi.
Atià, a taha atu me te haaìte ia òe i te tāuà.
A ùtuna òe i te mea i peàutia e Moite,
no to òe haataìtaìtina ; e mea haatiàtohu no âtou. »
45 Atià, ua hee hua ènata i vaho
me to īa haaìte me te haamevaha i te teào hou.
No èià, aòè i koàna ia Ietu te tomo i òto o te pāpuafaè
ia tiòhi mai te tau ènata ia Īa.
Ua noho hoì Īa i vaho io he tau taha viviiō.
Me i te tau taha paotū, u titihe mai te tau ènata io Ietu.
TOMINIKA E FITU
TETAUTINA O TE PEROFETA ITAIA 43 18-19.21-22.24c-25
Oia nei te Teào a te Etua :
18 Umoì ôtou e māmaakau i te tau tai kākiu.
Umoì e moemoeā i te tau mea i pao atu nei.
19 Enā, e pēpena au i te aomāàma hou.
Aòè ôtou e ìte nei ia īa ? U tata èka.
E kānea au i te aanui ma vāvena o te fenua ataha.
E haatahe au i te vai i to he vao moô.
21 E hahi i tu ù kāìè te mataèinaa vaetia e au.
O òe, e te mataèinaa a Iakopo e, aòè òe i vevaò mai.
E to Iraene, u te e haapaòpaò òe ia òe iho no te hahi mai.
24 Na to òe tau mikeo, u haaìò òe ia ù
me he ènata haamōèhutia.
U haapaòpaò to òe tau tekateka ia ù.
25 O au â, o au iho nei,
e haamaakau koè au i to òe hakakitina.
E haakoè àu i to òe tau mikeo.
TARAMO 41 (40) 2-3a.4a, 5-6, 11a.12a.13
E te Fatu e, a haakoè i tu ù tau piò, he ènata mikeo au nei.
41,5
2 Mamau te ènata hakāòha i te poì veve.
Me io te ìno, e haapohoè te Etua ia īa.
3 E meitaì to īa pohoètina, koakoa anatu īa.
4 Ia hemo i te mate, o te Fatu to īa toko.
5 E pure au : A hakāòha mai, e te Fatu e.
Ènata mikeo au, a haakoè i tu ù memae.
6 He teào kaipipiò to te ènata e mākaka mai.
« A fea e mate ai. A fea e naò to īa inoa ?»
11 O Òe te Fatu e, a hakāòha mai.
12 E ìte meitaì au i to Òe haataetae mai.
13 Ua toko mai te Fatu mēìa u teka koè au.
U apuu te Etua ia ù i to Īa aò.
TETAUTINA O TE HĀMANI E ÙA A PAURO PEÀTO
I TO KORINETIA 1, 18-22
E tu ù tau tunane tuehine.
18 O te Etua tiàtohu te i ìte ia ù.
O te teào ta ù i peàu atu ia ôtou,
aòè te teào nātoa : E, aòè.
19 O te Kirito Ietu, te Tama a te Etua,
ta Timoteo, Tira me au nei i haaìte ia ôtou,
aòè Īa nātoa : E, aòè.
O te « E » o te Etua anaè, i òto o Īa.
20 I òto o Īa hoì he mea « E » aneiho te tau taetae
ta te Etua i peàu e vaièi mai.
Oia te tumu u peàu tātou : Amene,
ma io te Kirito, no te hahi i te Etua.
21 Na te Etua i haatiàtohu i to mātou noho mau i òto o te Kirito,
o mātou nei atii me ia ôtou.
Ua vae te Etua ia tātou me to Īa haapeàto mai.
22 U òomi te Etua i to Īa hakatu i òto o tātou,
ma te vaièi mai i to Īa Kuhane,
me he to mua hope taetae o te nuitina
o te tau taetae ta Īa i peàu.
ALLELUIA ALLELUIA
cf.Rk.4,18-19
U pōpahi mai te Fatu ia Ietu
no te àve i te Teào Meitaì Hou Mai i te poì veve,
no te haaìte i te poì humutia, e pohoè âtou.
EVANERIO O IETU KIRITO VĀÀNA E MAREKO 2, 1-12
1 Ua tihe hakaùa Ietu i Kafaranaumi.
Ua òno te mataèinaa enā Īa io he faè.
2 Mēìa i te faètoa te i haaputuputu mai,
aòè he kōava i avai pii te avaputa.
U hakako Ietu ia âtou i te Teào.
3 Ua tihe mai io Īa te mou ènata e àve aa i te ènata hapaa,
toofā âtou no te amo ia īa.
4 Aòè e koàna ia âtou te haatata mai
mēìa i te nuitina o te ènata.
No èià, ua piki âtou i ùna o te faè
me to âtou vāvahi i te mēmau tomi ana i te faè,
i ùna toitoi o te kōava i èià Ietu.
U tīputatia te ava, u haaiho âtou i te òki pateà
me te ènata hapaa moe ana ma ùna.
5 Ua ìte Ietu i to âtou haatià me to Īa peàu i te ènata hapaa :
« E tu ù tama e, u vevetetia to òe tau mikeo. »
6 Enā, u kaapee i èià mou tuhuna teào.
U kaituto âtou io he koekoe :
7 « E aha te teào o te ènata nei ? Ua paha īa.
E koàna ia ai te vevete i te mikeo ? Na te Etua anaè. »
8 Ua ìte anamai Ietu io to Īa kuhane i to âtou kaituto.
U peàu atu ia âtou :
« No te aha e kaituto ôtou atii io he koekoe ?
9 E aha te mea māeà ? Te peàu i te ènata hapaa :
U vevetetia to òe tau mikeo ? Akoè à te peàu :
A tū òe ! A too i to òe òki ! A taha atu !?
10 Etià e ìte ôtou he mana ta te Tama a te ènata
te vetevete i te tau mikeo i no he fenua. »
11 U peàu Ietu i te ènata hapaa :
« Na ù te peàu ia òe : a tū òe !
A too i to òe òki ! A hua io to òe faè ! »
12 Ua tū īa. Ua amo anamai i to īa òki
me te hee i vaho, i te aò o âtou nui.
U mate hoì âtou paotū i te mahaò.
Ua hahi âtou i te Etua, e peàu aa :
« A tahi nei mātou a ìte i te mea atii. »
TOMINIKA E VAÙ
TETAUTINA O TE PEROFETA OHEA 2, 16.17b.21-22
16 Oia nei te Teào a te Etua :
Ua teka te mataèinaa Iraene, ta ù vehine,
ma te hinenaò pu i te hoa.
E hano au e haahua mai io ù. E aahi au ia īa i te fenua ataha,
i èià, e teàteào māua ma he tiàtohu o te koekoe.
17 I èià, e aotahi mai īa me he mea nā pō hou,
i te ava o to īa fitina me io te Fenua Ekipito.
21 Tōtahi atu ta te Fatu i peàu :
E ìò òe ta ù vehine tuia.
Aòè òe e paekē hakaùa.
E tuu nei au ia òe i te toitoitina,
te tiàtohu, te kāòha, te hinenaò.
22 E ìò òe ta ù vehine tuia,
na ù e tuu ia òe i te haatià teka koè,
e haapii òe me te Fatu Etua.
TARAMO 103 (102) 1-2, 3-4, 8.10, 12-13
He moû, he kāòha te hakatu o te Fatu. 103,8
1 E tu ù kuhane, a haameitaì i te Fatu,
Me io he koekoe, a haameitaì i to Īa inoa peàto.
2 A haameitaì i te Fatu, e tu ù kuhane,
Aua e tūhaa e tahi o to Īa vaièitina.
3 U vevete te Fatu i to òe tau mikeo paotū.
U haakoè te Fatu i te memae o to òe tino.
4 Na Īa i taki ia òe me io te ana tūpāpaù.
Na Īa i fāfī ia òe i te kāòha me te hinenaò.
8 He moû, he kāòha te hakatu o te Fatu.
U haatevee i to Īa peê ; ua pī i te kāòha.
10 U te e utu mai te Fatu vāàna i to tātou tau piò.
Aòè e huke Īa i te umu ia tātou poì mikeo.
12 Me he memao te tihena o te òumati me i to īa naòna,
U tioà te Etua i te mikeo memao me io tātou.
13 Me he mea u kāòha te motua i ta īa tama,
Hua hakatu to te Fatu kāòha i te ènata pakaihi ia Īa.
TETAUTINA O TE ÙA O TE HĀMANI A PAURO PEÀTO
I TO KORINETIA 3, 1b-6
E tu ù tau tunane tuehine.
1 Aha, ua ape mai ôtou i tītahi hāmani haatiàtohu ia mātou iho,
me he mea ua ape ôtou i tahipito poì kē ?
Akoè à, aha na mātou iho e ape i hua hāmani ia ôtou ?
2 Atià, o ôtou aneiho to mātou hāmani haatiàtohu.
Ua patutia hua hāmani i òto o to mātou hōupo,
me he mea ua ìtetia, e tetautia e te tau ènata paotū,
3 He mea tāhakahaka hoì, ua ìò ôtou me he hāmani
me io te Kirito, ta mātou i patu, aòè me te hinu,
atià me te mana o te kuhane o te Etua pohoè ;
aòè i ùna o te keâ me he mea a te ture a Moite,
atià i ùna o to te ènata hōupo.
4 Mēìa i to mātou haatià i te Etua,
ta te Kirito i vaièi mai, u vaavō mātou e peàu i hua teào.
5 U te e koàna ia mātou te kaituto
na mātou anaè e haapao i tītahi hana.
O te Etua te i vaièi mai i te kuhane māàma.
6 O te Etua hoì te i haamāàma mai no te tāvini i te Piimau hou.
Vāàna i hua Piimau, u te e aotahi tātou
i te Ture patutia, atià à i te Kuhane o te Etua.
O te Ture patutia te i aahi i te ènata i te matena.
O te Kuhane te i vaièi mai i te pohoètina.
ALLELUIA ALLELUIA
cf.Mk.2,19.22
Mamau te tau hoa i vevaòtia no te koìna mātiri :
na âtou te vino hou, oia hoì te hakatu o te Piimau Hou.
EVANERIO O IETU KIRITO VĀÀNA E MAREKO 2, 18-22.
I tēia mou pō,
18 ohia u haaone te tau kouâ o Ioane me te tau fariteo,
ua tihe mai tahipito io Ietu me to âtou ūiūi atu :
« No te aha u haaone te tau kouâ o Ioane
me te tau kouâ o te tau fariteo,
atià to òe tau kouâ, aòè âtou e haaone ? »
19 U peàu atu Ietu ia âtou : « Aha òa e koàna
i te tau hoa vevaòtia i te koìna mātiri
te haaone oi noho me âtou te āhana hou ?
Aòè hoì e hei no âtou te haaone.
20 Enā a tihe ai te tau â
e takitia te āhana hou me i vāvena o âtou,
i tēia mou pō, e haaone âtou.
21 Aòè te ènata e àpana i te kahu pēpē me te tapa hou,
na te mea e toi te tapa hou i te kahu pēpē,
e haatotahi atu aa i te nehaètina.
22 Aòè e tahi ènata e kiini i te vino hou i òto o te hue kākiu,
oa haapohā te vino i te tau hue ;
e koè anamai te vino me te tau hue.
Te vino hou i òto o te hue hou. »
TOMINIKA E IVA
TETAUTINA O TE HĀMANI A MOITE PEAUTIA TEUTERO
5, 12-15
I ùna o te tuaivi Tinai,
u haaìte te Etua i to Īa maìmaì, pēènei :
12 A haamaakau òe i te Tāpati : he  tapu
me he mea ta te Fatu Etua i peàu ia òe.
13 Ma te mou pō e ono, a hana i ta òe hana paotū.
14 Atià, te fitu o te â, he â hakaēa i te hana,
he Tāpati no te hahi i te Fatu, to òe Etua.
Aua òe e hana ta òe tamaòa, ta òe moî, ta òe tueni,
akoè à ta òe tau ànimara me te tau manihii noho aa
i òto o to òe tau pāpuafaè.
A hakaēa òe atii me ta òe tau tāvini āhana, vehine.
15 A haamaakau hoì òe i te ava
he ènata haamōèhutia io te Fenua Ekipito.
U aahi mai te Fatu i vaho me io hua fenua
ma te ìi o to Īa ìma me te tau hana mana.
Oia te tumu u peàu te Fatu ia òe e haataputia te  Tāpati.
TARAMO 81 (80) 3-4, 5-6ab, 6c-8b, 10-11ab
A taaàu me te koakoa i te Etua, to tātou ìi. 81,2
3 A ùtu i te pahu, a haatani i te pū,
A ònotia te kitā me te kinura.
4 Oia nei te māhina hou : a haatani i te pūtona.
He â koìna no tātou te pō māhina.
5 He ture no Iraene me i kiu mai,
Vāàna i te Teào a te Etua o Iakopo.
6 Oia ta te Etua i peàu ia Ioteve,
I te ava o to Īa haahina i te Fenua Ekipito.
Ua òno au i te mou ponateào hou :
7 « Me i ùna to īa pauhihi, ua taki au i te amona.
Aòè e àve ai to īa îìma i te hāìna tono.
8 Ia òomitia i te memae, u haapohoè au ia òe.
10 Aua te Etua kē i òto to òe fenua.
Umoì e pakaihi òe i te ètua o te tau hāoè.
11 O au aneiho te Fatu, to òe Etua.
Na ù i haafiti ia òe me io te Fenua Ekipito.
TETAUTINA O TE HĀMANI E ÙA A PAURO PEÀTO
I TO KORINETIA 4, 6-11
E tu ù tau tunane tuehine,
6 o te Etua te i peàu mai pēènei :
« A pupuà te àma me io te pō pōtano ! »
O te Etua iho te i haapupuà i to Īa māàma
i òto o to mātou koekoe ma te haaìte mai
i to Īa kāìè te i haakeàpa i te mata o Ietu Kirito.
7 Atià, ua àve mātou i hua taetae
i òto o te huekeâ te i pohā vave.
Ma èià, ua ìte te tau ènata paotū,
me io te Etua anaè te mana mahaò
o te Evanerio ta mātou e haamevaha nei.
8 Paotū te â, enā te tau kōhii e haaveke mai ;
Atià, aòè mātou i hakaēa.
U pepee to mātou tetaìtina ; atià, aòè mātou i kuhane koè.
9 Ua tute te tau ènata ia mātou. U pāpua mai te Etua.
U tuàkitia mātou ; atià, u te e hina mātou.
10 I tēia taha, i tēia taha, mei haamatetia mātou
me he mea i kukumitia Ietu Kirito.
Atià, e pohoè nei mātou
no te haapuàha i te mea e pohoè me Ietu.
11 He tau ènata pohoè hoì mātou
me he poì haametaù, oa haamatenuitia âtou.
Ma èià, e puàha te Pohoè o Ietu
i òto o to mātou tino te i mate vave.
ALLELUIA ALLELUIA
2Ko.3,6.17
O te Kuhane o te Etua te i vaièi mai i te Pohoètina.
I èià te Kuhane o te Fatu, i èià te Pohoè.
EVANERIO O IETU KIRITO VĀÀNA E MAREKO 2, 23 - 3, 6
23 I te Tāpati, ua taha Ietu i vāvena o te maateitā faraoa.
E hee aa to Īa tau kouâ, u huhuti âtou i te àhui faraoa.
24 U peàu te tau fariteo ia Ietu :
« A tiòhi. Umaha i hana ai to òe tau kouâ
i te hana tapu ma te Tāpati ? »
25 U peàu Ietu ia âtou :
« Aòè ôtou i tetau i te mea i hanatia e Tavite
me mate īa i te one, oia hoì me te tau ènata te i hee me īa ?
26 Pēhea ua tomo īa i òto o te faè o te Etua,
i te ava o Aviatere te tāuà nui.
Ua kai īa i te faraoa ùtunatia io te Etua
te i koàna o te tāuà anaè te kai.
Ua tuu atu Tavite i hua faraoa i te tau ènata e hee me īa. »
27 U peàu Ietu ia âtou :
« U haatoitoitia te ture o te Tāpati no te meitaì o te ènata.
Aòè i kāneatia te ènata no te Tāpati.
28 No èià, he fatu o te Tāpati te Tama a te ènata. »
3,1 Ua uu hakaùa Ietu i òto o te tinakoka.
Enā i èià te ènata me te ìma kopa.
2 U kanino âtou ia Ietu mea tiòhi aha e haapohoè Īa
i hua ènata ma te Tāpati. Ua hano hoì âtou te hakatio ia Īa.
3 U peàu Ietu i te ènata ìma kopa :
« A tū òe ! I vāvena ahau ! »
4 U peàu Ietu ia âtou pēènei :
« I te Tāpati, aha e koàna i te ènata
te hana i te hana meitaì, akoè à i te hana pē ?
Te haapohoè i te ènata, akoè à te haamate ia īa ? »
Ua mutu âtou.
5 E tiòhi mau Ietu ia âtou me te mata peê,
uē aa mēìa i to âtou koekoe pūtuì, u peàu i hua ènata :
« A hohoà i te ìma ! »
U hohoà īa i to īa ìma. U meitaì anamai.
6 Ia uu i vaho te tau fariteo,
u putuputu anamai âtou me te poì kē ana me Herote
no te hakatoo pēhea e haamate âtou ia Ietu.
TOMINIKA ÒNOHUU
TETAUTINA O TE HĀMANI A MOITE PEAUTIA TENETE
3, 9-15
Ia pūtuì te ènata ma te kai i te puu haataputia,
9 u vevaò te Fatu Etua i te ènata me te peàu : « I hea òe ? »
U haahua te ènata me te peàu :
10 « Ua òno au ia òe io he pāpua.
U haametaù au. U kahu koè au. U haapupuni au. »
11 U peàu te Fatu Etua :
« Na ai i haaìte atu ia òe i te mea u kahu koè òe ?
U haatapu au i te kai i te puu o tītahi tumu âkau.
Aha, ua kai òe ? »
12 U peàu te ènata : « Te vehine ta òe i vaièi mai,
na īa i tuu mai te puu : ua kai au. »
13 U peàu te Fatu Etua i te vehine : « E aha ta òe ? »
U peàu te vehine :
« U haatukee mai te puhi fenua. Ua kai au. »
I4 U peàu te Fatu Etua i te puhi fenua :
« Mēìa i te mea ta òe i hana,
a ìno òe i vāvena o te tau ànimara
me te tau mēmau pohoè io he teitā.
E totoo òe i àò te aò.
O te èpo ta òe e kai à, paotū te tau â o to òe pohoètina.
15 E tōtōua atu tōtōua mai òe me te vehine,
e tōtōua to òe ati me to te vehine ati i ùna aè.
E tekahitia to òe upoo e to te vehine ati i ùna aè,
e nanahu òe i to īa tuke vaevae. »
TARAMO 130 (129) 1-2, 3-4, 5-6ab, 7bc-8
Ohia io te Fatu te kāòha,
Te haapohoètina hou anatu. 130,7
1 Me i te peteò tu ù taaàu atu,
E te Fatu e, a òno mai i to ù èo.
2 A haaòno meitaì to Òe puaìna
I te tanitina o ta ù pure.
3 Me haamau Òe i te mikeo,
E te Fatu e, na ai te tū aè ?
4 Io Òe te tuutina o te mikeo.
Ua hopo au, e tetaì ana ia Òe.
5 U tetaì tu ù kuhane i te Fatu.
He mea tiàtohu to Īa teào ia ù.
6 Tiàtohu atu e tetaì to ù kuhane i te Fatu,
I te ènata tiaì, aa i te pō.
7 Ohia io te Fatu te kāòha,
Te haapohoètina hou anatu.
8 E hoko hakaùa te Fatu ia Iraene
Me i te nuitina o te mikeo.
TETAUTINA O TE HĀMANI E ÙA A PAURO PEÀTO
I TO KORINETIA 4,13 - 5,1
13 U patutia i òto o te Hāmani tapu : « U haatià au i te Etua,
Oia nei te tumu ua faì au i ta Īa teào. »
Atii me mātou : u haatià me mātou,
oia te tumu u hakako mātou i te teào.
14 Ua ìte hoì tātou : Na te Etua i haatū hakaùa ia Ietu
me i vāvena o te huaa mamate.
Na Īa iho e haapohoè hakaùa ia tātou kātahi me Ietu.
I muì iho, e apuu mai te Etua ia tātou no te haapii me Ietu.
15 Te mea i haapaòpaò mai, u memae mātou,
etià he mea meitaì atu ôtou.
Ia haapohoè hoì te karatia vaièitia e te Etua
i te nuitina o te ènata, he mea nui te ènata
te i haahuaèkaèka me te haakāìè i te Etua.
16 Oiana te tumu aòè mātou i kuhane koè,
e aha à e pepee atu, pepee atu to mātou tino.
I tēia â, tēia â hoì, u haahoutia to mātou kuhane.
17 Te tau kōfii e haamemae nei,
he mea māeà, he mea pao vave
me kaituto tātou i te taetae ta tātou e tetaì nei :
u te e koàna i te ènata te tetau i hua taetae.
Oia hoì te àva atu i te kāìè nui o te Etua.
18 No èià, aòè tātou e tiòhi anaè i te hakatu o te tino,
atià à i te kuhane : te mea ìtematakoètia.
Te mea ìtematatia, u pupuà no te ava poto anaè.
E mau no te pohoè anatu te mea ìtematakoètia.
5,1 I te ava e mate nui tātou, me he mea u vāvahitia te faèkā,
to tātou faè noho i te ao nei. Atià, enā me te faè
kāneatia e te Etua no tātou io he àni.
E noho mau hua faè no te pohoè.
ALLELUIA ALLELUIA
cf. Ap.12,10 ; In.12,31
Eīa e haapohoè te Etua i to Ia mataèinaa
me te hakaìkitina o to Īa Kirito :
Te Tama a te Ènata te i hapaitia i ùna o te peka,
e toi mai Īa i te tau ènata paotū.
EVANERIO O IETU KIRITO VĀÀNA E MAREKO 3, 20-35
I tēia mou pō,
20 ua tihe Ietu io he faè.
U haaputuputu hakaùa mai te faètoa nui.
Aòè i koàna ia Ietu me to Īa tau kouâ te kai.
21 Ia òno to Īa huaa i tēnei teào,
ua tihe mai e hano no te toi no te àve ia Īa me âtou,
e peàpeàu aa : « U tuaave Īa. »
22 U peàu te tau tuhuna teào te i iho mai me i Ierutaremi :
« O hua Ietu i uutia e Peretepu.
Ma te inoa o te hakaìki tiaporo to Īa tute i te tau tiaporo. »
23 U vevaò Ietu ia âtou i pii o Īa me te peàu ia âtou
i tēnei teào haapupuà :
« Pēhea te koàna e tute Tatane ia Tatane ?
24 Me tōua atu tōua mai te mataèinaa,
epō e hina ai hua mataèinaa.
25 Me tōtōua atu tōtōua mai te huaafaè,
epō e vāvahitia te faè.
26 Me tute Tatane ia īa aneiho,
me paekē te tiaporo me te tiaporo,
aòè Tatane e tū mau ai. E koè to īa mana.
27 Atià, aòè e koàna i te ènata e tahi
te uu i òto o te faè o te ènata oko
mea hao i ta īa tau taetae.
E humutia òmua hua ènata oko.
A tahi a hao te ènata kamo i to īa faè.
28 Ma te tiàtohu to ù peàu atu ia ôtou :
e haakoètia te tau tekateka paotū o te tau ènata,
te tau mikeo, te tau paha,
e aha à te nuitina o to âtou teào paha.
29 Atià, me paha te ènata i te Kuhane Meitaì,
aòè e ìò hua paha i te haakoè.
E hava mau hua ènata i te mikeo paona koè. »
30 U peàu hoì âtou : « Ua uutia e te kuhane ìno. »
31 Ua tihe mai te kui o Ietu me to Īa tau teina.
Ua noho âtou ma vaho o te faè
me to âtou pahi atu i te ènata no te vevaò ia Īa.
32 U kaapee te faètoa vii pu o Ietu.
U peàu âtou ia Īa :
« Enā i vaho to òe kui me to òe tau tunane tuehine
e hano nei haaâvei me òe. »
33 U haahua Ietu ia âtou :
« O ai òa tu ù kui ? O ai tu ù tau teina ? »
34 U tiòhi i te poì e kaapee aa vii pu o Īa, u peàu :
« Oia nei tu ù kui me tu ù tau teina.
35 Te ènata e aotahi atu i te maìmaì o te Etua,
o īa na tu ù teina, tu ù tuehine me tu ù kui. »
TOMINIKA ÒNOHUU MA TAHI
TETAUTINA O TE PEROFETA EHEKIERE 17, 22-24
22 Oia nei te Teào a te Fatu Etua.
« Me io te hiku o te tumu âkau tiketike,
e fafati au i te manamana poto.
E tanu au me to ù îìma i hua manamana âkau
ma ùna te kapua o te tuaivi tiketike.
E tanu au nei ia īa
ma ùna o te tuaivi tiketike o te Fenua Iraene.
23 E tupu, e hua i te puu, e ìò he tumu âkau keî.
I òto o īa, e kānea te tau manu paotū i to âtou kōhata.
Ma àò o īa, he ava maù no te nuitina
o te tau manu hakatu kē, hakatu kē.
24 E ìte te tau tumu âkau paotū o au nei te Fatu.
E haatopa au i te tau tumu âkau tiketike
me te haatū i te tumu âkau moe aa i ùna o te tuaèpo.
E haamoô au i te teitā òutītee me te haakutaù i te teitā moô. »
TARAMO 92 (91) 2-3, 13-14, 15-16
E te Fatu e, u hei nui te hīmene hahi i to Òe inoa. cf.92,2
2 U hei nui te haahuaèkaèka i te Fatu,
Te hīmene hahi i to Òe inoa, e te Etua tiketike.
3 I te pōpōuì, e haamevaha i te òno o to Òe kāòha,
I te ahiahi te haatiàtohu i to Òe vaièitina.
13 E tupu te ènata toitoi me he tumu âkau èhi
E hohoà ana i to īa tau manamana,
14 Hakatu me te âkau o te tuaivi Ripano,
Tanutia io te pāpua tapu o to tātou Etua.
15 E hua īa i te puu tihe to īa kooūa pē,
Pī i te èpau hakatu me to te tino hou,
16 No te haamevaha i te teào : « U toitoi te Fatu.
Aòè e hakahae te Etua, to ù motukeâ. »
TETAUTINA O TE HĀMANI E ÙA A PAURO PEÀTO
I TO KORINETIA 5, 6-10
E tu ù tau tunane tuehine.
6 Oia te tumu ua ūo anatu to tātou tetaìtina,
e aha à to tātou noho io te tino,
hakatu me he manihii e noho aa i te fenua memao
me io te faè o te Fatu.
7 E pohoè ana i te ao nei ua taha tātou i òto o te haatià,
ìtemata koè ia Ietu.
No èià, ua ūo to tātou haatià, e kōhoà nei te haapaekē
me io te faè o to tātou tino, no te noho io te faè o te Fatu.
9 E tahi aneiho hīa o tātou : te haaèka i te Etua,
e aha à e noho tātou i te ao nei, akoè à io te faè o te Fatu.
10 Ma tītahi â hoì, e tū tātou paotū i mua o te Kirito
no te haatoitoi i te teào.
A tahi a tuhatia i tītahi to īa tuki, i tītahi to īa tuki,
vāàna i ta īa hana i te ava o to īa noho i òto o te tino,
hana meitaì, akoè à hana pē.
ALLELUIA ALLELUIA
cf. Mt.13,4.23
Ua tūtū te Kirito i te kākano o te Teào Meitaì Hou Mai.
Mamau te ènata e apuu i hua teào, e hua īa i te puu.
EVANERIO O IETU KIRITO VĀÀNA E MAREKO 4, 26-34
I tēia mou pō, u peàu Ietu i te faètoa :
26 « U hakatu te Patirēia o te Etua
me te ènata te i tūtū i te kākano io he èpo.
27 Me hiamoe īa, me aa īa, â te pō,
ua hua te kākano, ua tupu aè.
Pēhea te koàna ? Aòè īa i ìte.
28 E haatupu hoì te èpo i to īa puu na īa ta īa :
òmua ìka te tumu o te teitā, i muì iho te àhui,
i muì mai te faraoa te i haapī i te àhui.
29 Ia paa te puu, e kokoti te ènata i te teitā faraoa,
na te mea ua tihe te ava kohi i te puu. »
30 U peàu Ietu : « E aha te hakatu o te Patirēia o te Etua ?
Ma te teào haapupuà hea ta mātou e haaìte atu ?
31 U hakatu me te kākano terepota.
Ia tūtūtia io he èpo, he kākano hunahuna ti.
He kākano iti atu i te tau kākano paotū i no he fenua.
32 Ia tūtūtia, e tupu aè, tupu aè, e ìò te òa atu
i tahipito tau teitā tanutia. U kokoa to īa tau manamana.
I to īa vahi maù, e kōfiifii te tau manu i to âtou kōhata.
33 Ma te nuitina o te teào haapupuà hakatu me tēia,
u hakako Ietu i te faètoa, vāàna e koàna ia âtou te vivini.
34 Aòè Ietu i hakako i te faètoa ma he teào haapupuà koè.
Ia paekē âtou me io te faètoa, u haavivini Ietu
i te tiàtohu o te teào haapupuà i to Īa tau kouâ.
TOMINIKA ÒNOHUU MA ÙA
TETAUTINA O TE HĀMANI A IOPE 38, 1.8-11
1 Me i vāvena o te metani kāviivii me te ūa,
u peàu te Fatu ia Iope, pēènei :
8 « Me pihiti anamai te tai me io te peteò hōhonu maa ti,
o ai te i pā i to īa tahetina me te haakoè i to īa puta mai ?
9 I hea òe i te ava u kānea au i te kohu mea uhi i te tai ?
I hea òe ia fāfī au ia īa me te ao me he èpaèpa no īa ?
10 I hea òe i te ava i haahei au i te kotiana o te tai
me to ù kānea i te tau avaputa, u te e koàna ia īa te pepeù ?
11 I hea òe i te ava to ù peàu atu i te tai :
« E tihe òe io tēnei vahi.
Aua òe e taha i mua atu, înei e hakaēa te kāìè
o to òe tau naùtai koùkoùa atu koùkoùa mai. »
TARAMO 107 (106) 21a.22a.24, 25-26a.27b, 28-29, 30-31
A haahuaèkaèka i te Fatu, mēìa i to Īa tau hana mahaò.
cf.107,8
21 A haahuaèkaèka âtou i te Fatu mēìa i to Īa kāòha.
22 A ùtuna âtou i te hēana haahuaèkaèka.
24 Ua ìtemata âtou io te tai nui
I te hana mahaò, hana mana o te Fatu.
25 U pohā te èo o te Etua, ua puhi anamai te metani,
Koùkoùa atu, koùkoùa mai te tai peê.
26a Ua fiti te vaa i te ataàni, ua iho i te peteò,
27b E takanini te upoo, ua naò to âtou maakau.
28 U taaàu âtou io te Fatu me te koekoe pūpūkina,
Na Īa i haakoè i to âtou hopo nui.
29 U haamenino te Fatu i te tai peê,
U haakoè i te pooìna o te tau koùkoù tai.
30 Ia mate te tai, u koakoa te tau ènata,
Koakoa atu ia tau io te kaavai ta âtou i maìmaì.
31 A haahuaèkaèka âtou i te Fatu mēìa i to Īa kāòha,
Ua hana Īa i te hana mahaò i uē i te tau ènata.
TETAUTINA O TE ÙA O TE HĀMANI A PAURO PEÀTO
I TO KORINETIA 5, 14-17
E tu ù tau tunane tuehine e.
14 O to te Kirito hakāòha mai te i hakapahi ia mātou
no te hana me he mea ua ìte ôtou.
Ua mate nui te Kirito i uē i te tau ènata paotū ;
no èià, me he mea u mate nui vāàna e te kuhane tātou paotū.
15 Ua mate nui te Kirito no te tau ènata ia ôtoa,
etià, aòè e pohoè no to âtou meitaì aneiho, atià no te Kirito,
te poì e pohoè nei i te pohoè hou.
Na te mea, ua mate nui te Kirito i uē ia tātou,
ua tū hakaùa Īa i uē ia tātou.
16 I tēnei, mēìa he poì haatià tātou,
aòè tātou e ìte i te tau ènata vāàna i te maakau ènana anaè.
Ma te tiàtohu, òmua, atii to mātou ìte i te Kirito,
vāàna i te maakau ènata.
I tēnei, he mea kē to tātou ìte i te Kirito.
17 Me haatahi te ènata me te Kirito,
ua ìò hua ènata me he mēmau pēpenahoutia.
Ua koè te hakatu pohoè kākiu.
U tīmata te hakatu pohoè hou.
ALLELUIA ALLELUIA
cf. Ta.66,5 ; 29,3 ; 65,8
A mai. A ìte ôtou i te tau hana mahaò o te Etua.
Ua ònotia te èo o te Fatu ma ùna aè o te metani.
U haamenino te Fatu i te pooìna o te tai.
EVANERIO O IETU KIRITO VĀÀNA E MAREKO 4, 35-41
Me i te pōpōuì, ua hakako Ietu i te faètoa.
35 I te ahiahi o hua â aneiho, u peàu Ietu i to Īa tau kouâ :
« A hee tātou i hiva atu o te tai. »
36 E avai aa i te faètoa,
u aahi ponihoo âtou ia Ietu i òto he vaa.
Enā me te mou vaa kē tei tihe me Ietu.
37 Ua puhi anamai te tūaio metani oko.
Ua fati te naùtai io he vaa, mei pī i te ìu.
38 Ua noho Ietu i hope nui o te vaa ma ùna o te patiètiè.
U hiamoe Īa. U haaāa âtou ia Īa me te peàu :
« E Tuhuna e, e aha ta Òe ? Enā e naò tātou ! »
39 Ia aa Ietu, u oonaì oko ki i te metani me to Īa peàu i te tai :
« Tuìtuì òe ! A mutu ! »
Ua koè te metani. U menino paa te tai.
40 U peàu Ietu ia âtou :
« Umaha to ôtou haametaù ?
E aha ? U haatià koè ôtou ? »
41 Ua pē âtou i te haametaù nui me te peàu te hoa i te hoa :
« O ai òa tēnei ?
E aotahi atu ia Īa te metani me te tai ! »
TOMINIKA ÒNOHUU MA TOÙ
TETAUTINA O TE HĀMANI O TE MĀÀMA 1, 13-15 ; 2,23-24
13 Aòè te Etua i pēpena i te matena.
U te e haaeka i te Etua te mate nui o te mēmau pohoè.
14 Te Pohoè. Oia te tumu o to te Etua
pēpena i te tau mēmau paotū.
Te mea i pēpenatia, he mea meitaì âtou paotū.
I òto o âtou, u te e koàna mai te mea tekeo haamate.
He mana koè te Havaiki io te ao nei.
15 E noho mau paona koè te hana toitoi.
23 U pēpena te Etua i te ènata no te pohoè mau anatu.
U kānea te Etua i te ènata e ata no Īa iho.
24 Ua tihe te matena i te aomāàma nei
ma te hana keitani o te tiaporo.
O te poì kē me te tiaporo te i mate nui anatu.
TARAMO 30 (29) 3-4, 5-6ab, 6cd.12, 13
E te Fatu e, u haatiketike au ia Òe te i haatū mai ia ù. 30, 2
3 I te ava e taaàu to ù èo io Òe,
E te Fatu, tu ù Etua e, u haameitaì mai.
4 Ua taki mai Òe me io he ōpata,
U haapohoè mai me i te ana o te tūpāpaù.
5 A hahi i te Fatu, ôtou, e te poì haatià e.
A haahuaèkaèka ma te haaòno nui i to Īa inoa.
6 He ava poto to te Etua peê,
Ma te òa o te pohoè to Īa haameitaì.
I te ahiahi, e tahe te vaimata ;
Ma te pōpōuì, te taaàu koakoa.
12 U haaìò Òe i tu ù uēuē me he â koìna.
Ua veti i to ù kahu pēpē no te uhi mai me te koakoa.
13 A taaàu i te koakoa, e tu ù kuhane.
Umoì òe e mutu pu, a haakoìna no te Fatu.
E hahi au hakaēa koè i te Fatu, tu ù Etua.
U haahuaèkaèka au ia Òe, e te Fatu e.
TETAUTINA O TE HĀMANI E ÙA A PAURO PEÀTO
I TO KORINETIA 8, 7.9.13-15
E tu ù tau tunane tuehine,
7 O ôtou te kuà o te poì kiritiano,
mēìa i to ôtou haatià te haamevaha i te Evanerio,
te ìte māàma o te Etua, te ūo no te tāvini atu i te hoa,
te kāòha ta ôtou i koàna mai me io mātou.
Atii hoì, e kōhoà ta ù he mea meitaì atu
to ôtou vaièitina i to tahipito.
9 Ua ìte hoì ôtou i te vaièitina o to tātou Fatu Ietu Kirito.
E aha à na Īa te tau taetae ia ôtoa,
ua ìò Īa he ènata veve oko,
etià e tapavaù nui ôtou mēìa i to Īa haavevetina.
13 Aòè au e hano e haatono i to ôtou amona
no te haamāeà i to tahipito.
Te haatūtahi te hoa me te hoa, oia te mea e hei.
14 I tēnei, u tapavaù ôtou, enā to tātou tau hoa io he àì.
A toko ôtou ia âtou.
Me tihe te â e tapavaù âtou, o ôtou â io he àì,
na âtou e toko mai ia ôtou.
Ma èià hoì, e ìò hua mea aneiho te hoa me te hoa.
15 U patutia i ùna o te Manahū me io he àni mai :
« Me kohi tītahi i te nuitina, aòè he mea i toe.
Me kohi tītahi i te mea iti, ua àva no īa. »
ALLELUIA ALLELUIA
2Tm.1,10
O Ietu Kirito to tātou Haapohoè. U tuàki Īa i te matena.
Ma to Īa Evanerio, u haapupuà i te pohoètina hou paona koè.
EVANERIO O IETU KIRITO VĀÀNA E MAREKO 5, 21-43
Akoè à 5,21-24.35b-43
I tēia mou pō,
21 ua hee Ietu ma he vaa i hiva atu o te tai.
U haaputuputu te faètoa nui vii pu o Īa.
Ua kaapee Īa i te hiku o te tai.
22 Ua tihe mai e tahi hakaìki vivini o te tinakoka,
o Ihaira te inoa.
E ìte aa ia Ietu, ua hina Ihaira pii nā vaevae o Īa.
23 U toutaki atu ia īa Ietu me te peàu :
« Mei mate nui tu ù moî. A mai.
A hapai i to òe îìma i ùna o īa, etià e pohoè.
Umoì īa e mate !
24 Ua hee Ietu me īa.
Ua ūtaì ia Īa te faètoa nui, e haatita aa vii pu o Īa.
25 Enā e tahi vehine hemotia i te mate kātahe,
ònohuu ma ùa èhua i tēnei me i to īa hemotina i hua mate.
Ua oko to īa memae mēìa i te nuitina o te tau tātihi.
Mei pao nui ta īa taetae paotū.
Atià, u te e ànaàna to īa memae, ua oko aè aneiho.
27 Ua òno hua vehine i te teào hou no Ietu.
U haatata mai ma to Īa tua
me to īa haatukia pu me to Īa kahu.
28 U peàu hoì : « Me koàna ia ù
te hatukia pu me to Īa kahu, e pohoè au. »
29 Ua maha anamai te tahe o te toto.
Ua òno ma òto o īa u meitaì to īa tino.
30 Atià, ua ìte Ietu ua ìò atu te mana me i òto o Īa.
U fāìu Īa, e tiòhi aa i te faètoa. U peàu Īa :
« O ai te i haatukia pu me to ù kahu ? »
31 U peàu to Ietu huaa kouâ ia Īa : « A tiòhi Òe.
U haatita te faètoa vii pu o Òe me to Òe ūi mai :
o ai i haatukia pu ia ù ? »
32 U tiòhi Ietu vii pu o Īa mea ìte i te vehine te i hana i tenā mea.
33 E ìte aa hua vehine i te mea hou i òto o īa,
ua hemo i te haametaù me te emièe.
Ua hina īa pii nā vaevae o Ietu me to īa faì atu i te tiàtohu.
34 U peàu Ietu ia īa :
« E tu ù moî e, mēìa i to òe haatià, i pohoè ai òe.
A taha atu me te moû. A koè nui to òe mate ! »
35 Aòè i pao èka ta Ietu teào i hua vehine,
ua tihe mai te mou keèe me io te faè
o te hakaìki vivini tinakoka.
U peàu âtou : « Ua mate nui ta òe moî.
Umaha e haapaòpaò pu i te Tuhuna ? »
36 Atià, ua òno Ietu i hua teào.
U peàu Īa i te vivini o te tinakoka :
« Umoì òe e haametaù. A haatià anaè ! »
37 Aòè Ietu i ao e hee atu e tahi ènata me Īa,
o Petero anaè, o Iakopo me Ioane, te teina o Iakopo.
38 Ua tihe âtou io te faè o te vivini o te tinakoka.
Ua òno Ietu i te pooìna.
Ua uēuē te faètoa me te taaàu i te ûûkina.
39 Ua tomo Ietu i òto o te faè me te peàu ia âtou :
« No te aha to ôtou pooìna nei ? No te aha te uēuē atii ?
Aòè te tama i mate nui. U hiamoe aneiho. »
40 U kakata âtou ia Īa.
Atià, ua tute Ietu ia âtou nui i vaho.
Ua too me Īa i te motua me te kui o te tama
atii me nā ènata i titihe mai me Īa.
Ua uu Īa i òto o te pāòto i èià te tama.
41 Ua too Ietu i te ìma o te tama me te peàu :
« Talita kumi ! »
O hua mea aneiho : « E pāhoè, na ù te peàu : a aa ! »
42 Ua maô anamai te pāhoè me to īa taha.
E ònohuu ma ùa hoì o īa èhua.
Ua pē âtou i te mahaò me te emièe.
43 U oonaì Ietu ia âtou umoì e faì atu i te ènata e tahi.
U peàu Īa no te tuu i te mea kai i te pāhoè.
TOMINIKA ÒNOHUU MA FĀ
TETAUTINA O TE HĀMANI A TE PEROFETA EHEKIERE
2, 2-5
2 Ua iho mai te kuhane i òto o au nei, me to īa haatū ia ù.
A tahi, ua òno au i te èo o te Fatu te i peàu mai :
« E te tama ènata e, e pahi nei au ia òe
io te tau tama Iraene,
io tēia mataèinaa pūtuì te i hakaki ia ù.
3 Tihe i tēnei â, âtou me to âtou tupuna i hakaki ia ù.
He tau tama mata feò âtou me te koekoe tōtohe to âtou.
4 E pahi nei au ia òe io âtou me to òe peàu atu :
« Pēènei ta te Fatu Etua teào... »
5 A tahi, e aha à aòè âtou e hakaòno mai,
mēìa he ati pūtuì aneiho âtou,
e ìte âtou me te tiàtohu :
ua tū e tahi Perofeta i vāvena o âtou. »
TARAMO 123 (122) 1-2a, 2bcd, 3-4
E te Fatu e, u feau to tātou mata io Òe,
e tiaì ana i to Òe hakāòha mai. cf.123,2
1 E te Fatu e, io Òe to ù mata,
o Òe te i noho nei io he àni.
2 Me he mea e feau te tueni
E tiòhi ana i te ìma o to īa vivini,
Me he mea e tiòhi mau te vehine tāvini
I te ìma o to īa haatepēiù,
Atii to tātou mata io te Fatu,
E tiaì ana i to Īa hakāòha mai.
3 E te Fatu e, a hakāòha mai ia mātou.
Ua kū mātou i te òno i te teào haamāio mai.
4 U paòpaò mātou e hakaòno anatu
I te poì tapavaù e haamee mai.
TETAUTINA O TE ÙA O TE HĀMANI A PAURO PEÀTO
I TO KORINETIA 12, 7-10
E tu ù tau tunane tuehine,
7 Ua àva te teào māàma i haaìtetia mai e te Etua
no te haatupu i te kāìè pu i òto o to ù koekoe.
No te haakoè i hua kāìè pu,
enā u veòtia to ù tino me te taa :
o te tiaporo te i pōpahitia no te papaì ia ù.
8 Ua ape au i te Fatu, e toù apetina,
no te haamemao i tēia taa me io ù.
9 U peàu mai te Fatu pēènei : « E àva to ù karatia.
U puàha to ù mana i òto o te keèe me te hakatu pepee. »
No èià, e hakaìna koè au no te peàu :
to ù hakatu pepee te tumu o tu ù kāìè.
Ma èià hoì, e noho i òto o au nei te mana nui o te Kirito.
10 Oia te mea haaèkaèka ia ù : te ìi koè, te mea haamāio mai,
te tau kōfii haamemae, te teào tīkoe e hakatio pu mai,
te tau veke e mākaka mai mēìa i te inoa o te Kirito.
Na te mea, i te ava u pepee au,
a tahi, enā i òto o au nei te mana o te Kirito.
ALLELUIA ALLELUIA cf.Rk.4,18
U pōpahi te Fatu ia Ietu, to Īa tāvini,
no te haaìte atu i te poì veve
i te Teào Meitaì Hou Mai o te pohoè.
EVANERIO O IETU KIRITO VĀÀNA E MAREKO 6, 1-6
I tēia mou pō,
1 ua tihe Ietu io to Īa fenua tumu.
To Īa huaa kouâ me Īa.
2 I te Tāpati, u hakako Īa i òto o te tinakoka.
Ua pē i te mahaò te nuitina o te ènata
i te hakaòno ia Īa. U peàu âtou :
« Me i hea mai ta Īa o te tau mea nei ?
Nui te māàma i vaièitia ia Īa !
E aha oti te tau hana mana ma to Īa nā îìma ?
3 Aòè à o Īa nei te kamuta ?
Aòè à o Īa nei te tama a Maria,
te tuaana o Iakopo, o Iote, o Iuta me Timone ?
Aòè à i vāvena o tātou nei to Īa tau tuehine ? »
U te e haatià âtou ia Ietu.
4 U peàu Ietu ia âtou :
« U haameetia te perofeta io to īa fenua,
io to īa faè, i vāvena o to īa huaa aneiho. »
5 Aòè i koàna ia Ietu te hana i te hana mana i èià.
U haapohoè Īa anaè i te mou ènata hōpī
ma te hapai i to Īa nā îìma i ùna o âtou.
6 U mahaò Ietu i to âtou haatià koè.
Ua vii Īa i te tau pāpuafaè kē tata mai,
e hakako aa i te Teào.
TOMINIKA ÒNOHUU MA ÌMA
TETAUTINA O TE PEROFETA AMOTE 7, 12-15
12 I muì iho, u peàu Amatia i te perofeta Amote :
« A taha atu òe me i înei, o òe me to òe tau moemoeā.
A hee atu i te Fenua Iutea.
I èià, e pohoè meitaì òe
ma te hana i to òe hana perofeta.
13 Înei, i Petere, a haakoè i to òe teào perofeta
na te mea oia nei te pāpua me te vahi tapu
o te hakaìki o te Fenua Tamaria. »
14 U haahua atu Amote ia Amatia :
« Òmua atu nei, u te e hana au i te hana perofeta.
Aòè hoì au e tama na te perofeta.
He ènata tiaì pifa aneiho au nei,
he ènata ìte i te auà i te tau tumu âkau fiko.
15 Atià, ua vae te Fatu ia ù
oi noho au nei i vāvena o te naho pifa.
Na Īa i peàu mai :
A tū òe me he perofeta no tu ù mataèinaa Iraene. »
TARAMO 85 (84),9ab-10, 11-12, 13-14
E te Fatu e, a haaìte mai i to Òe kāòha,
A vaièi mai i to Òe haapohoètina. 85,8
9 E hakaòno au : E aha òa ta te Fatu e peàu.
Oia nei ta te Fatu Etua i peàu : te moû,
I no he fenua no to Īa mataèinaa,
10 U tata èka to Īa haapohoè no te ènata haatià.
E noho te kāìè o te Etua io to tātou fenua.
11 U âvei te kāòha me te tiàtohu.
Ua honi atu honi mai te toitoi me te moû.
12 E tupu te tiàtohu me io he fenua.
E tiòhi mai te toitoi me io he àni.
13 E vaièi mai te Etua i to Īa taetae kāòha.
E hua to mātou fenua i to īa puu.
14 E taha te toitoi ma mua o te Fatu,
E haaìte hua toitoitina i te aanui.
TETAUTINA O TE HĀMANI A PAURO PEÀTO I TO EFETIA
1, 3-14
3 A haameitaìtia te Etua
me te Motua o to tātou Fatu, Ietu Kirito.
Io he àni, i òto o te Kirito, u haameitaì hoì te Etua ia tātou,
ma te haapī mai me te taetae kuhane.
4 Òmua naoti, ma mua o to Īa pēpena i te ao nei,
ua vae te Etua ia tātou i òto o te Kirito,
etià e peàto, teka koè tātou i to Īa aò,
e pohoè ana i òto o te kāòha.
5 Ma mua o te Pēpena, mēìa i to Īa vaièi anamai,
ua vae te Etua ia tātou, na Īa ta Īa anaè,
etià e ìò tātou he tau tama no Īa, ma io Ietu Kirito.
6 A hahitia te Etua, no to Īa karatia mahaò,
ta Īa i vaièi mai ia tātou, i òto o to Īa Tama tāhia.
7 I òto o te Kirito pāokapekatia, u haapohoè te Etua ia tātou,
ma te haakoè i to tātou tau mikeo.
8 Oia te nuitina o te karatia ta te Etua i vaièi ia tātou,
vāàna i to Īa maakau māàma.
9 U haaìte te Etua i to Īa maìmaì pūnana,
to Īa hīa me i òmua naoti, te i haapao ai ma io te Kirito.
10 I te ava paona e haaheitia,
te haatūtaì i te tau mēmau o te ao nei,
to te àni, to te fenua ia ôtoa,
ma àò o te upoo e tahi, te Kirito.
11 I òto o te Kirito, ua vae te Etua
te i haatee i te tau mea hakatahi vāàna i to Īa maìmaì,
ua vae hoì te Etua ia mātou, te tau ati Iuta,
etià e ìò mātou he mataèinaa no Īa.
12 Oia te tumu e hahi me te haakāìè mātou i te Etua,
mātou te mataèinaa e tetaì ana i te Kirito,
ma mua to Īa tihena mai.
13 I òto o te Kirito, atii me ia ôtou, e te tau êteni e,
ua ìò ôtou he mataèinaa o te Etua,
mēìa to ôtou apuu i te Teào Meitaì Hou Mai
te i haapohoè ia ôtou.
I òto o te Kirito, u apuu ôtou i te haatià ;
no èià, u òomi te Etua ia ôtou
me te hakatu o te Kuhane Meitaì.
O hua Kuhane Meitaì to mua hope taetae
ta te Etua i peàu i to Īa mataèinaa.
14 Oia te tumu i tetaì mau ai tātou i te haapohoètina
ta te Etua e vaièi mai i to Īa huaa vaetia.
He mea hei nui e hahi tātou me te haakāìè i to Īa inoa.
ALLELUIA ALLELUIA
cf.Ta.19,5
Atià, u mevaha te teào o tēia tau keèe,
Ua tihe to âtou teào i te kotiana o te fenua.
EVANERIO O IETU KIRITO VĀÀNA E MAREKO 6, 7-13
I tēia mou pō,
7 u vevaò Ietu io Īa i te Tīònohuu ma tokoùa
me to Īa pōpahi atu ia âtou, tokoùa, tokoùa.
Ua tuu atu ia âtou i te mana
i ùna o te tau kuhane ìno.
8 U peàu Ietu ia âtou ma to âtou heetina io he aanui :
umoì e àve i te mēmau, e tahi tootoo anaè,
umoì te kete avaina taetae, umoì te oà,
umoì te moni i òto o te kato.
9 Atià, a oka i te aihū io te vaevae.
« Umoì ôtou e uhi e ùa kahu. »
10 Tōtahi atu to Īa peàu : « Me apuu tītahi faè ia ôtou,
a nonoho i èià tihe i to ôtou heetia atu.
11 Me he mea aòè ôtou e apuuìa,
aòè e hakaòkoìa i tītahi pāpuafaè,
a hee atu me i èià,
a tūtū i te èpo me i àò o to ôtou vaevae
mea oonaì ia âtou. »
12 Ua hee atu te tau àpotoro.
U hakako âtou i te tau ènata etià e fāìu i te koekoe.
13 Ua tute âtou i te nuitina o te tiaporo.
Ua paù âtou me te kao i te nuitina o te poì hōpī.
U haameitaìtia hua poì.
TOMINIKA ÒNOHUU MA ONO
TETAUTINA O TE HĀMANI A TE PEROFETA IEREMIA
23, 1-6
1 Oia nei te Teào a te Fatu Etua :
« E te poì pē, ôtou te tau tiaì muto o tu ù pāpua.
U avai ôtou e hina me te haatavavātia te tau muto.
2 A òno ôtou i te teào a te Fatu, te Etua o Iraene,
i ùna o te tau tiaì e haatee i tu ù mataèinaa.
U tavavā tu ù tau muto ; u hukaka âtou
mēìa aòè ôtou i tiòhi meitaì ia âtou.
3 O au à, e haavā au ia ôtou, mēìa i to ôtou hana mākaka.
Atii ta te Fatu i peàu atu.
O au iho e haaputuputu au i te toena o tu ù tau muto
me io te tau fenua paotū ta ù i haatavavā ia âtou.
4 Na ù e haahua mai io to âtou pāpua pī i te mutiē ;
e fānafānau âtou me to âtou haanui aè, nui aè.
E vae au i te tau tiaì no te aahi ia âtou.
Aòè âtou e haametaù hakaùa, aòè e paòpaò hakaùa.
U te e naò pu tītahi. Oia nei te teào a te Fatu.
5 Eīa e tihe te tau â, e tuu au ia Tavite i te huì toitoi noa.
E vivini īa me he hakaìki tiàtohu ; he māàma ta īa teào,
e haatee īa i te fenua vāàna i te ture me te toitoi noa.
6 I hua ava, e pohoè meitaì te ati o Iuta
e noho me te moû to Iraene.
E apatia to īa inoa : « Te Fatu, to tātou Toitoi. »
TARAMO 23 (22) 1-2a, 2b-3, 4, 5, 6
O te Fatu to ù Tiaì meitaì, e aha te mea e toe ? 23,1
1 O te Fatu to ù Tiaì meitaì,
E aha te mea e toe ?
2 U aahi mai te Fatu no te hakaēa
Io he pāpua pī i te mutiē hou.
3 U aahi mai te Fatu io te punavai ;
I èià, u haahoutia to ù pohoè.
U haatee mai Īa ma he aanui toitoi
No te kāìè o to Īa inoa.
4 No tu ù taha ma he vao maù nui,
Aòè au e haametaù i te ìno.
I èià, o Òe me au nei, e te Fatu e.
O to Òe tootoo te i aahi mai me te moû.
5 E te Fatu e, ua tuu mai Òe i te oà,
I mua o te tau ènata e haatōtōua mai.
Ua paù Òe i tu ù upoo me te kao.
U haakoakoa mai te hope taetae tuutia mai.
6 Te koakoa me te èkaèka me au nei
Ma te òa o to ù pohoètina.
E noho au io te faè o te Fatu
Ma te nuitina o to ù tau â.
TETAUTINA O TE HĀMANI A PAURO PEÀTO I TO EFETIA
2, 13-18
E tu ù tau tunane tuehine.
13 I tēnei, i òto o te Kirito, ôtou te i noho memao,
u haatata mai ôtou mēìa i te ùtuna hēana o te Kirito.
14 Te Kirito aneiho te tumu o to tātou moû ;
na Īa e haatūtahi i te tau êteni me te tau ati Iuta
i òto o te mataèinaa e tahi.
Ma to Īa matena, u vāvahi te Kirito i te pā e haapaekē
ia âtou me he nā mataèinaa tōtōua atu tōtōua mai.
15 U haakoè te Kirito i te Ture, te nuitina o te mea tapu
me te tau teào kē, teào kē o hua Ture,
vāàna te pēpena i òto o Īa i te mataèinaa e tahi anaè,
me he ènata hou e tahi anaè.
Ma èià, u vaièi mai i te moû.
16 Ma to Īa matena uo he peka,
u haakoè te Kirito i to âtou haahaa me te tōtōua.
Ma to Īa peka, u haatūtaì te Kirito
i nā mataèinaa e ùa me he tino e tahi,
no te haaâvei ia âtou me te Etua.
17 Ua tihe mai hoì te Kirito no te haaìte atu
i te Teào Meitaì Hou Mai o te moû i te tau ènata paotū,
ia ôtou, e te tau êteni te i noho memao me io te Etua,
me ia ôtou, e te tau ati Iuta, te i haapii me te Etua.
18 Tātou me te tau ati Iuta me te tau êteni,
ma io te Kirito, u koàna ia tātou paotū
te haapii me te Etua Motua, i òto o te Kuhane e tahi.
ALLELUIA ALLELUIA
cf.In.10,14-15
Ietu, te Tiaì Meitaì, ua ìte i to Īa tau muto, ua ìte âtou ia Īa : Ua tuu atu Īa i to Īa pohoè i uē ia âtou.
EVANERIO O IETU KIRITO VĀÀNA E MAREKO 6, 30-34
I tēia mou pō,
30 u putuputu mai te tau Àpotoro ma te kaokao o Ietu.
Ua faì âtou ia Īa i te hana ta âtou i hana atu,
te teào ta âtou i hakako atu.
31 U peàu Ietu ia âtou : « A hee ôtou i te taha kē,
io te fenua viviiō. A hakaēa ôtou i te ava poto. »
Aòè hoì i koàna ia âtou te kai
mēìa i te nuitina o te ènata
e tihe mai me te taha atu.
32 No èià, ua piki âtou i ùna o te vaa
me to âtou hee atu i te fenua viviiō i te vahi kē.
33 Ia ìte te faètoa i to âtou heetina, u vivini âtou nui.
Me i tēia faè, tēia faè,
u tohuti anamai âtou ma he vaevae.
O âtou te i tihe mai òmua, epō Ietu me to Īa huaa kouâ.
34 I te tautina o Ietu i uta,
ua ìte Īa i te faètoa nui putupututia i èià.
U mehea te koekoe o Ietu mēìa ia âtou
na te mea me he naho muto âtou, aòè he ènata tiaì.
A tahi a tīmata Ietu e hakako ia âtou.
He mea òa to Īa hakakotina.
TOMINIKA ÒNOHUU MA FITU
TETAUTINA O TE HĀMANI E ÙA O TE TAU HAKAÌKI
4.42-44
42 I tēia mou pō, ua one nui te fenua.
Ua too te ènata i te hope o te tau puu i kohihoutia :
tekau faraoa me te kākano tee i òto o te kaka.
Ua tuu atu īa i hua mēmau kāòha i te perofeta Erihea.
43 U peàu Erihea : « A tuha atu i te tau ènata. A kai âtou. »
U peàu to īa tāvini :
« E ìma hānere ènata âtou paotū. Pēhea te tuha atu ? »
U peàu hakaùa Erihea :
« A tuha atu i te tau ènata paotū. A kai âtou.
Oia nei te teào a te Fatu :
A kai haamaòna âtou.
Enā e toe hakaùa te mea e kai. »
44 Ua tuha atu te tāvini i te tau ènata i te faraoa me te kākano.
Ua kai haamaòna âtou. Aòè i pao te mea e kai.
Atii hoì ta te Fatu i peàu.
TARAMO 145 (144) 10-11, 15-16, 17-18
Ua tuha Òe i te mea e hei, i kai ai haamaòna mātou. 145,16
10 E te Fatu e, a hahi te tau mēmau paotū
Me te haahuaèkaèka to mataèinaa ia Òe.
11 E haavivini âtou i te kāìè o to Òe Patirēia,
E vānana âtou i to Òe tau hana mahaò.
15 U feau io Òe te mēmau pohoè paotū
E tetaì aa i to âtou oà me io Òe.
16 Ua tuha to Òe nā îìma i te mea e hei :
E kai haamaòna te tau mēmau pohoè kōtoa.
17 U toitoi noa to te Fatu maìmaì paotū.
O te kāòha te tumu o to Īa tau hana ia ôtoa.
18 U tata èka me te poì i vevaò ia Īa
E pure aa ma io he koekoe tiàtohu.
TETAUTINA O TE HĀMANI A PAURO PEÀTO I TO EFETIA
4, 1-6
1 O au nei Pauro, io he faèhumu,
mēìa u tāvini au i te Fatu.
U toutaki au ia ôtou no te pohoè
vāàna i to te Etua maìmaì te i vevaò ia ôtou.
2 A haapāpaù ôtou, a moû te koekoe,
a tohe mau paòpaò koè.
A kāòha atu kāòha mai ma te apuu te hoa i te hoa.
3 A hano ôtou te haatahi i òto o te Kuhane Meitaì
te i haatūtaì ia ôtou i òto o te moû.
4 Enā e tahi tino anaè,
e tahi Kuhane anaè
me he mea u vevaò te Etua ia ôtou paotū
no te tetaìtina e tahi anaè.
5 E tahi Fatu anaè,
e tahi haatià anaè,
e tahi papatema anaè,
6 e tahi Etua me te Motua anaè no te tau ènata kōtoa.
O Īa te Fatu no tātou paotū
te i hana me tātou paotū, te i noho i òto o tātou paotū.
ALLELUIA ALLELUIA
Rk.7,16
Enā i vāvena o tātou e tahi Perofeta òno nui.
U tiòhi me te meitaì te Etua i to Īa mataèinaa.
EVANERIO O IETU KIRITO VĀÀNA E IOANE 6, 1-15
I tēia mou pō,
1 ua hee Ietu ma hiva atu o te tai Karirea
te i peàutia Tiperiata.
2 Ua ūtaì te faètoa nui ia Īa,
Mēìa ua ìte âtou i te tau hana mahaò haahakatu
ta Ietu i hana no te meitaì o te poì hōpī.
3 O Ietu à, ua fiti i ùna o te tuaivi.
I èià, u kaapee Īa e tahi me to Īa tau kouâ.
4 Ua tata te Pakate. He â koìna no te tau ati Iuta.
5 E feau aa Ietu, ua ìte i te faètoa nui e haatata mai.
U peàu Ietu ia Firipo :
« I hea e hoko mai tātou i te faraoa etià e kai âtou nui ? »
6 Atii hoì ta Ietu peàu no te haaveke ia Firipo,
na te mea ua ìte Īa e aha te hana e hana atu Īa.
7 U haahua Firipo ia Ietu :
« Aòè e àva e ùa hānere moni tenario
etià e koàna mai ia âtou tikitahi i te òna poo faraoa. »
8 U peàu tītahi me i vāvena o to Īa tau kouâ,
o Aterea te inoa, te teina o Timone Petero :
9 « O te pōìti înei me nā faraoa e ìma me nā ià e ùa.
E mea à, e aha tēia no te faètoa nui ? »
10 U peàu Ietu : « A haakapee ia âtou ! »
He mea nui te mutiē i hua vahi.
Ua nonoho âtou me he ìma tautini āhana âtou nui.
11 Ua too Ietu i te tau faraoa.
U haahuaèkaèka me te tuha i te tau hoa kai.
Atii no te mou ià, vāàna i to âtou maìmaì.
12 Ia maòna âtou, u peàu Ietu i to Īa tau kouâ :
« A kohi ôtou i te toena. Umoì e pao i te pē e tahi mea. »
13 Ua kohi âtou i te toena : ònohuu ma ùa kete
pī i te tau poo faraoa i toe, ia pao toitoi te mau.
14 Ia ìte te faètoa i te hana mahaò i hanatia e Ietu,
u peàu âtou : « Tiàtohu nui, o te ènata nei
te perofeta e tihe ai io te aomāàma. »
15 Atià, ua ìte Ietu e hano âtou ia Īa e viitoi
me te haatū mea hakaìki no âtou ;
no èià, ua fiti hakaùa Īa i no he tuaivi, tootahi anaè.
TOMINIKA ÒNOHUU MA VAÙ
TETAUTINA O TE HĀMANI EHOTO 16, 2-4. 12-15
2 I te fenua ataha, u kōhumuhumu ia Moite me Aarone
te motuhaka tiàtohu o te tau tama Iraene.
3 U peàu te tau tama Iraene, pēènei :
« Koù na te Fatu Etua e haamate nui
ia tātou i te Fenua Ekipito.
I èià, u kaapee tātou i pataa o te hue paapaa pī i te înaì,
ua kai tātou haamaòna me te faraoa.
U aahi mai ôùa i vaho o hua fenua tapavaù
me te haatihe i te fenua ataha nei.
Na ôùa e haamate nui i tēnei motuhaka o te tau tama Iraene. »
4 U peàu te Fatu Etua ia Moite :
« Me io he àni, e haatopa au i te faraoa me he ūa
no te tāfai ia ôtou.
I tēia â, tēia â, e taha te mataèinaa
i vaho o te pāpua no te kohi i hua faraoa.
Oia hoì ta īa mea kai no te â e tahi.
Ma èià, e haamōtii au i tu ù mataèinaa
e tiòhi ana aha e aotahi âtou i tu ù maìmaì,
akoè à, e pūtuì âtou.
12 Ua òno au i te tau tama Iraene e kōhumuhumu aa.
A peàu òe ia âtou, pēènei :
Ia naò te òumati, e kai ôtou i te înaì kiko.
I te oìoì pōpōuì, e koàna ia ôtou te faraoa ma te pī nui.
E ìte ôtou o au te Fatu, to ôtou Etua. »
13 Ia èva te â, ua tihe pu anamai te toka manu nui oko, nui oko,
te i tomi i te tuaèpo o te pāpua.
14 I te oìoì pōpōuì, u motoù te haupō i te pāpua vii pu.
I te ava u haamoôtia hua haupō,
enā i ùna o te tuaèpo te mēmau hakatu me te èhuahi.
15 U mahaò to Iraene e ìte i hua mēmau me to âtou peàpeàu :
« E aha tenā mea ? »
Oia hoì ma he èo Hepereo : « Manahū ? »
U te e vivini âtou e aha hua mēmau.
U peàu atu Moite :
« Oia nei te faraoa ta te Fatu e tuu ia ôtou no te kai. »
TARAMO 78 (77) 3.4a.c, 23-24, 25.52a.54a
E te Fatu e, a tuu mai anatu Òe i hua faraoa o te àni.
cf. In.6,34
3 Ua òno tātou, u haamau ma he koekoe
I ta to tātou tau tupuna i peàu mai.
4 Na tātou e haaìte atu i te tau tai i ùna aè.
To Īa mana e haapuàha i to Īa kāìè.
23 U vevaò te Etua i te tau kohu io te ataàni,
U pepeù Īa i te tau avaputa o te ataàni,
24 U haaiho mai Īa i te Manahū no te tāfai ia âtou,
Ua tuu ia âtou i te faraoa me io he àni mai.
25 Ua kai âtou i te faraoa o te tau anera.
Ua tuu te Etua ia âtou i te oà ma te kū.
52 Me he mea te ènata tiaì muto, u aahi te Etua,
54 U haatomo ia âtou i òto o to Īa pāpua tapu.
TETAUTINA O TE HĀMANI A PAURO PEÀTO I TO EFETIA
4, 17.20-24
17 E tu ù tau tunane tuehine.
U peàu me te toutaki au ia ôtou, i òto o te Kirito,
aua e hana hakaùa ôtou
i te hana hakatu me to te poì êteni,
te i haahukakatia e to âtou maakau tupepaka.
20 O ôtou â, he mea kē.
I te ava ua ìò ôtou he kouâ o te Kirito,
u hakako ôtou i te teào kē atu,
21 me he mea u vivini hoì ôtou o ai te Kirito,
ia haaòno ôtou i te teào tiàtohu i ùna o Ietu.
22 A fāìu ôtou i te koekoe, a titii i te hakatu ènata tehito
te i haapētia mēìa i to īa tau hīa haahukaka.
23 A haahoutia ôtou ma te fāìutina o te koekoe
me te titii i to ôtou maakau ènata aneiho.
24 A ìò ôtou me he ènata hakatu hou
ta te Etua i pēpena vāàna i to Īa maìmaì,
ènata peàto me te toitoi i òto o te tiàtohu.
ALLELUIA ALLELUIA
cf. Ta.78,24
I te fenua ataha, u tāfai te Fatu i to Īa mataèinaa.
U haamaòna ia īa me te faraoa me io he àni mai.
EVANERIO O IETU KIRITO VĀÀNA E IOANE 6, 24-35
I tēia mou pō,
24 ohia ua ìte te faètoa aòè Ietu me âtou,
ua naò me to Īa tau kouâ, ua piki âtou i ùna o te tau vaa
me to âtou hee atu i Kafaranaumi e ìmi aa ia Ietu.
25 I hiva atu o te tai, u koàna mai ia âtou Ietu,
me to âtou ūi ia Īa :
« E Rapi e, inehea to Òe tihetia mai înei ? »
26 U haahua Ietu ia âtou :
« He teào tiàtohu ta ù nei ia ôtou : ua ìmi ôtou ia ù,
aòè na te mea ua ìte ôtou i te tau hana mana haahakatu,
atià mēìa i to ôtou kai haamaòna i te faraoa.
27 A hana ôtou aòè no te oà e pao ai i te pē,
atià no te hano mai i te oà
e mau tihe i te pohoè anatu.
E tuutia ia ôtou hua oà e te Tama a te ènata.
Na te mea, o Īa ta te Etua Motua i vae ma te tiàtohu. »
28 A tahi a peàu âtou ia Ietu :
« E aha te tau hana e hana mātou
vāàna i te maìmaì o te Etua ? »
Ua hua Ietu :
« Oia nei te hana ta te Etua i maìmaì,
te haatià ia ù te i pahitia mai e te Etua. »
30 U peàu âtou ia Īa : « E aha to Òe hana mana haahakatu,
etià e ìtemata mātou me te haatià ia Òe ?
Te hana hea e hana Òe ?
31 I te fenua ataha, ua kai to mātou tupuna i te Manahū
me he mea i patutia :
« Na Īa i tāfai ia âtou i te faraoa me io he àni. »
32 Ua hua atu Ietu ia âtou :
« E teào tiàtohu ta ù nei ia ôtou :
aòè Moite i tuu ia ôtou i te faraoa me io he àni mai.
Te faraoa tiàtohu me io he àni mai,
ua tuutia ia ôtou e tu ù Motua.
33 Te faraoa hoì a te Etua,
o īa te i iho mai me io he àni ;
na īa e tuu i te pohoè i to te ao nei. »
34 U peàu âtou ia Ietu :
« E te Fatu e, anatu a tuu mai i hua faraoa ! »
35 Ua hua Ietu ia âtou :
« O au te faraoa pohoè.
Te ènata e tihe mai io ù me te haatià ia ù,
u te e mate īa i te one hua ènata, u te e maò i te vai. »
TOMINIKA ÒNOHUU MA IVA
TETAUTINA O TO MUA HĀMANI O TE TAU HAKAÌKI 19, 4-8
4 E hiki aa te perofeta Eria me i te Fenua Tamaria,
ua rere īa i te fenua ataha.
Ua taha vaevae īa ma te òa e tahi â.
U hakaēa īa me to īa noho i te vahi maù,
ma àò o te maateitā.
U kuhane koè. U kōhoà e mate nui īa.
U peàu Eria pēènei :
« I tēnei, e te Fatu e, ua àva aneiho, nui oko tenā.
A too òe i tu ù pohoè.
Aòè hoì i meitaì aè au i tu ù tau tupuna. »
5 I èià, ua moe me te hiamoe aneiho.
Atià, enā tītahi anera u haatukia me īa, e peàu aa :
« A tū òe ! A kai ! »
6 U tiòhi Eria me to īa ìte pii o to īa upoo
i te huevai me te faraoa tunupātakatia.
Ua kai Eria, ua inu me to īa hiamoe hakaùa.
7 U haatukia te anera me īa, o te ùa tēia, e peàu aa :
« A tū òe ! A kai, oa pepee òe ma no he aanui.
He mea òa oko te aanui i toe. »
8 Ua maô Eria, ua kai, ua inu.
U feòfeò te tino o Eria mēìa i te kai.
Ua taha īa e fā ònohuu â
tihe atu i te tuaivi Horepe, te tuaivi hoì a te Etua.
TARAMO 34 (33) 2-3, 4-5, 6-7, 8-9
A mai. A ìte me ôtou i te vaièitina o te Fatu. 34,9
2 E haameitaì au i te Fatu ma te tau â paotū.
E hahi au i te Fatu i te tau vahi ia ôtoa.
3 Io te Fatu anaè to ù haakāìè.
A òno mai e te poì veve, a koakoa me ôtou.
4 A haatiketike ôtou me au nei i te Fatu.
A haakāìè tātou nātoa i to Īa inoa.
5 Ia ìmi au i te Fatu, u tiòhi mai Īa.
U haakoè Īa i to ù tau pūpūkina ia ôtoa.
6 Te ènata e feau io te Fatu, e pupuà īa :
He moû, hakaìna koè to īa mata.
7 Ia taaàu te ènata veve, u hakaòno te Fatu,
Me to Īa haapohoè me io te mea haahaametaù mai.
8 Ua noho te anera o te Fatu ma to tātou kaokao
No te haapohoè i te ènata e pakaihi ia Īa.
9 A mai. A ìte me ôtou i te vaièitina o te Fatu.
Mamau te ènata ia ìò te Etua to īa pātoko.
TETAUTINA O TE HĀMANI A PAURO PEÀTO I TO EFETIA
4,30-32 ; 5,2
E tu ù tau tunane tuehine.
30 Umoì ôtou e haauē i te Kuhane Meitaì.
O te Kuhane Meitaì hoì te hakatu o te Etua
te i òomitia i òto o ôtou
no te â o to ôtou haapohoètina pao ònaòna.
31 A haakoè me i òto o ôtou i te koekoe kōhumuhumu,
te haahaa, te peê, te taaàu me te teào paha.
A haakoè i te maakau mākaka paotū.
32 A ìò ôtou he tau ènata koekoe moû,
koekoe hakāòha i te hoa.
A vevete atu vevete mai te hoa i te hoa i to īa tau tekateka,
me he mea i òto o te Kirito u vevete te Etua i to ôtou mikeo.
5,1 A hana ôtou me he mea ta te Etua
mēìa o ôtou ta Īa tau tama tāhia.
2 A kāòha atu kāòha mai te hoa i te hoa
me he mea u kāòha te Kirito ia ôtou.
U haaìò hoì te Kirito i uē ia ôtou
e ùtuna ia Īa iho e hēana haatāvaè i te Etua.
ALLELUIA ALLELUIA
cf.In.6,51-52
E te Fatu, e Ietu e,
o Òe te faraoa pohoè te i iho mai me io he àni.
Te ènata e kai i hua faraoa,
e koàna ia īa te pohoè anatu.
EVANERIO O IETU KIRITO VĀÀNA E IOANE 6, 41-51
I tēia mou pō,
41 u kōhumuhumu te tau ati Iuta mēìa u peàu Ietu pēènei :
« O au te faraoa te i iho mai me io he àni. »
42 U peàu âtou : « Aòè à te tama a Ioteve hua Ietu ?
Ua ìte hoì tātou i to Īa motua me to Īa kui.
Pēhea òa ta Īa peàu : ua iho au me io he àni ? »
43 U haahua atu Ietu pēènei :
« Umoì ôtou e kōhumuhumu.
44 E ūtaì te ènata ia ù
me aahitia e te Motua te i pahi mai ia ù.
Akoè à, u te e ūtaì mai ia ù te ènata e tahi.
E haatū hakaùa au i hua ènata i te â paona o te ao nei.
45 U patutia hoì io te hāmani o te tau Perofeta :
« E hakakotia âtou paotū e te Etua. »
Ia hakaòno te ènata i te Motua
me te apuu i ta Īa teào, e tihe mai hua ènata io ù.
46 U te e peàu au : ua ìte te ènata e tahi i te Etua.
O au te i tihe mai me io te Etua,
o au anaè te i ìte i te Motua.
47 E teào tiàtohu ta ù nei ia ôtou :
Te ènata e haatià,
u koàna mai ia īa te pohoè anatu.
48 O au te faraoa pohoè.
49 I te fenua ataha, ua kai to ôtou tupuna i te Manahū ;
atià à, ua mate nui âtou.
50 He mea kē te faraoa te i iho mai me io he àni :
me kai te ènata i hua faraoa,
aòè īa e mate.
51 O au te faraoa pohoè te i iho mai me io he àni.
Te ènata e kai i hua faraoa,
e koàna ia īa te pohoè anatu.
Tu ù tino te faraoa e tuu nei au
mea haapohoè i to te ao nei. »
TOMINIKA TEKAU
TETAUTINA O TE HĀMANI TOUMAKI 9, 1-6
1 Ua haatū te Māàma i to īa faè.
U haatū i nā pou e fitu me to īa haatiki ia âtou.
2 U kukumi i ta īa tau ànimara.
U kiini i te vino me to īa tāpī i te tapukai.
A tahi a pōpahi atu īa i te tau keèe.
3 U haaìtetia i no he tau tohua o te pāpuafaè
4 pēènei : « A haatata mai te ènata ìmi aa i te Māàma. »
5 U peàutia i te ènata pōtano :
« A mai. A kai i te faraoa, a inu i ta ù vino.
6 A titii i ta ôtou tau hana kōea, e pohoè meitaì ôtou.
A taha ôtou ma no he aanui o te Māàma. »
TARAMO 34 (33), 2-3, 10-11, 12-13, 14-15
A mai, a ìte me ôtou i te meitaì o te Fatu. 34,9
2 E haameitaì au i te Fatu ma te tau â paotū.
E hahi au i te Fatu i te tau vahi ia ôtoa.
3 Io te Fatu anaè to ù haakāìè.
A òno mai e te poì veve, a koakoa me ôtou.
10 E te poì peàto o te Fatu, a atoratio ia Īa.
Aòè he mea e toe i te ènata i pakaihi i te Fatu.
11 Ua mate i te one tahipito me io te poì tapavaù.
E àva te tau taetae o te ènata ìmi nei i te Fatu.
12 E tu ù tau tama e, a mai. A hakaòno mai.
E hakako atu au no te pakaihi i te Etua.
13 O ai te ènata e maìmaì i te pohoè ?
O ai e kōhoà nei i te aanui o te koakoa ?
14 Umoì e pohā to èo no te teào pē.
Umoì e pepeù i to òe kiinutu no te tipaî.
15 A titii i te mea ìno. A hana i te hana meitaì.
A ìmi mau i te moû ma io he koekoe.
TETAUTINA O TE HĀMANI A PAURO PEÀTO I TO EFETIA
5, 15-20
E tu ù tau tunane tuehine,
15 no èià, a tiòhi meitaì i to ôtou hakatu pohoè.
A hana me he poì māàma,
umoì ôtou e tūtū me te poì pōtano.
16 A hana i te hana meitaì, i tēia ava, tēia ava e koàna ia ôtou.
I tēnei mou pō hoì, ua pē te hakatu pohoè o te tau ènata.
17 Umoì ôtou e hana me he poì pōtano.
A hano e haavivini e aha te maìmaì o te Etua i ùna o ôtou.
18 Umoì ôtou e kona i te inu vino,
oia te mea e haahina ia ôtou.
A avai i te Kuhane Meitaì te haaūo i to ôtou koekoe.
19 Ia putupututia ôtou, a hīmene i te tau taramo,
te tau hīmene pure kē e hahi i te Etua.
A hahi me te haameitaì i te Fatu me i òto o te koekoe,
me he mea e haatee te Kuhane Meitaì ia ôtou.
20 A haahuaèkaèka anatu i te Etua Motua,
i tēia â, i tēia â, no te tau mea ia ôtoa,
ma te inoa o to tātou Fatu, Ietu Kirito.
ALLELUIA ALLELUIA
cf. Ta.145,15
U feau io Òe te mēmau pohoè paotū,
E tetaì aa i to âtou oà me io Òe.
Ua tuha to Òe nā îìma i te mea e hei,
I te tino me te toto o te Àrenio te i hēanatia.
EVANERIO O IETU KIRITO VĀÀNA E IOANE 6, 51-58
I tēia mou pō, u peàu Ietu i te faètoa pēènei :
51 « O au te faraoa pohoè te i iho mai me io he àni.
Te ènata e kai i hua faraoa, e koàna ia īa te pohoè anatu.
O tu ù tino te faraoa e tuu nei au
mea haapohoè i to te ao nei. »
52 U tōtohe atu tōtohe mai te tau ati Iuta, e peàu aa :
« Pēhea òa te tuu mai o hua ènata i to Īa tino no te kai ? »
53 U peàu Ietu ia âtou :
« E teào tiàtohu ta ù nei ia ôtou :
Me he mea aòè ôtou e kai i te tino o te Tama a te ènata,
me he mea aòè ôtou e inu i to Īa toto,
aòè te pohoè i òto o ôtou.
54 Me kai te ènata i tu ù tino, me inu īa i tu ù toto,
u koàna mai ia īa te pohoè anatu.
E haapohoè hakaùa au ia īa i te â paona o te ao nei.
55 He mea oà tiàtohu hoì tu ù tino,
he mea inu tiàtohu tu ù toto.
56 Te ènata i kai i tu ù tino, te i inu i tu ù toto,
ua noho īa i òto o au, ua noho au i òto o īa.
57 Me he mea u pahi mai ia ù te Motua, te tumu o te Pohoè,
me io Īa tu ù pohoètina,
atii no te ènata te i kai ia ù,
e ìò au te tumu o to īa pohoètina.
58 O īa hoì te faraoa te i iho mai me io he àni.
Mea kē te faraoa i kaitia e to ôtou tau tupuna :
u mamate âtou.
Te ènata e kai i tēnei faraoa,
e koàna ia īa te pohoè anatu. »
TOMINIKA TEKAU MA TAHI
TETAUTINA IO TE HĀMANI O IOTUE 24, 1.15-18
1 I Tikemi, u haaputu Iotuē i te tau ati Iraene paotū.
I muì iho, u vevaò īa i te tau kooūa,
te tau hakaìki paotū e haatee i te mataèinaa ;
Ua tū âtou haakātahitia i te aò o te Etua.
2 U peàu Iotuē i te mataèinaa pēènei :
15 « Me he mea aò è ôtou e maìmaì e tāvini i te Fatu Etua,
i tēnei â, a vae i to ôtou ètua :
te tau ètua o to ôtou tau tupuna
i te fenua ma hiva o te kaavai Efarate,
akoè à te tau ètua o to Amorite,
te mataèinaa o te fenua nei.
O au nei me tu ù huaafaè,
u maìmaì mātou e tāvini i te Fatu. »
16 U haahua atu te mataèinaa :
« E mate nui tātou ma mua te titii i to tātou Fatu Etua
no te tāvini atu i te tau ètua kē.
O te Fatu to tātou Etua, te i aahi ia tātou
atii me to tātou tau tupuna me i te Fenua Ekipito,
te faèhumu no te poì haamōèhutia.
O te Fatu Etua te i hana i te nuitina
o te tau hana mahaò ta tātou i ìtemata.
18 O te Fatu Etua te i tiòhi meitaì i ùna o tātou
e taha ana i vāvena o te tau fenua kē anatu,
te tau mataèinaa tōtōua me tātou.
U maìmaì tātou me he mea ta òe e tāvini atu i te Fatu.
O Īa to tātou Etua. »
TARAMO 34 (33) 2-3, 16-17, 20-21, 22-23
A mai, a ìte me ôtou i te meitaì o te Fatu. 34,9
2 E haameitaì au i te Fatu ma te tau â paotū.
E hahi au i te Fatu i te tau tahi ia ôtoa.
3 Io te Fatu anaè to ù haakāìè.
A òno mai e te poì veve, a koakoa me to ù.
16 U tiòhi te Fatu i te tau ènata toitoi.
U hakaòno i to âtou èo vevaò ia Īa.
17 U titii te Fatu i te tau ènata mākaka,
U haakoè i to âtou inoa me io te fenua.
20 E aha à te nuitina o te kōfii
Te i haamemae i te ènata toitoi,
21 Paotū te â, u haakoè te Fatu ia âtou.
Aòè e tahi ivi o hua ènata e fatitia ai.
22 E haahina te hana ìno i te ènata mākaka.
E haapei te Fatu i te umu no te ènata pē
23 Te i haahaa me te hiaki i te ènata toitoi.
E haapohoè te Fatu i te ènata haatià.
TETAUTINA O TE HĀMANI A PAURO PEÀTO I TO EFETIA
5, 21-32
E tu ù tau tunane tuehine,
21 a aotahi atu aotahi mai te hoa i te hoa,
mēìa i to ôtou pakaihi i te Kirito.
22 A aotahi atu te tau vehine i ta âtou āhana
me he mea i te Fatu.
23 O te āhana hoì te upoo o ta īa vehine,
me he mea o Ietu Kirito te upoo o te Èkaretia,
hua Èkaretia, te tino o te Kirito, to īa haapohoè.
24 Ohia u aotahi atu te Èkaretia ia Ietu Kirito,
a aotahi hua mea aneiho te vehine i ta īa āhana.
25 A kāòha te tau āhana i ta ôtou vehine,
me he mea ta te Kirito, te i kāòha i te Èkaretia
me te haaìò i te matena i uē ia īa.
26 U haapeàto te Kirito i te Èkaretia
ma te papatema me te vai me te mana o te teào.
27 U maìmaì hoì Ietu Kirito
e aahi ia Īa i te Èkaretia e keàpa aa i te pootu,
èpo koè, komimo koè, atià à peàto, toitoi noa.
28 Atii aneiho tēnei : a kāòha te āhana i ta īa vehine,
me he mea u haataetae īa i to īa tino.
Ia kāòha te āhana i ta īa vehine, u kāòha ia īa aneiho.
29 Aòè e tahi ènata e haahaa i to īa tino.
He mea kē : u tāfai ia īa me te tiòhi meitaì
me he mea ta te Kirito i te Èkaretia.
30 O tātou hoì te mēmau o to te Kirito tino.
31 No èià, a titii te āhana i to īa motua me to īa kui
no te haapii me ta īa vehine.
E ìò âua tokoùa e tahi aneiho.
32 E teào hōhonu hua miterio,
oia hoì te maìmaì pūnana o te Etua.
U maakau ta ù e haavivini mai hua teào
i te haatahitina o te Kirito me te Èkaretia.
ALLELUIA ALLELUIA
cf. In.6, 63.68
E te Fatu e, o ta Òe teào te Kuhane e tuu nei i te pohoè.
Io Òe aneiho te teào e aahi i te pohoè anatu.
EVANERIO O IETU KIRITO VĀÀNA E IOANE 6, 60-69
I tēia mou pō, u peàu Ietu pēènei :
60 Ia òno te tau kouâ o Ietu i hua teào,
u peàu te nuitina o âtou :
« He teào māàma koè tēnei teào. O ai te i hakaòno ? »
61 Aòè i peàu tītahi ia Ietu i te mea
u kōhumuhumu to Īa tau kouâ mēìa i hua teào.
Atià ua ìte Īa ; no èià, u peàu ia âtou :
« Mēìa i hua teào, e huìkētia to ôtou maakau ?
62 Pēhea ôtou ia ìtemata i te Tama a te ènata
e fiti aa i te vahi i èià to Īa noho òmua ?
63 O te Kuhane o te Etua te i tuu i te pohoè.
Aòè he mea e koàna mai me io to te ènata mana.
Te teào ta ù i peàu ia ôtou,
he teào Kuhane, he teào pohoè.
64 Atià, i vāvena o ôtou, enā tahipito te i haatià koè. »
Me i te tumu hoì, ua ìte Ietu
o ai te huaa haatià koè, o ai te kouâ e haaìò ia Īa.
65 U peàu atu Ietu :
« Oia te piò u peàu au ia ôtou pēènei :
E ūtaì te ènata ia ù me he mea u aahitia e te Motua.
Akoè à, u te e ūtaì mai ia ù te ènata e tahi.
66 Me i hua ava, he mea nui te kouâ i paekē me io Ietu,
ua koè to âtou ūtaì ia Īa.
67 U peàu Ietu i te Tīònohuu ma tokoùa :
« U maìmaì me ôtou e taha atu ? »
68 Ua hua atu Timone Petero ia Īa :
« E te Fatu e, e ūtaì mātou ia ai ?
Io Òe aneiho te teào e aahi i te pohoè anatu.
69 U haatià mātou,
ua ìte mātou o Òe te Peàto nui a te Etua. »
TOMINIKA TEKAU MA ÙA
TETAUTINA O TE HĀMANI TEUTERO 4, 1-2.6-8
1 U peàu Moite i te mataèinaa Iraene pēènei :
« E to Iraene e, a hakaòno mai i te teào
me te tau ture ta ù e hakako atu ia ôtou.
A aotahi i hua teào etià e pohopohoè meitaì ôtou
io he fenua i tuutia e te Fatu Etua i to ôtou tau tupuna.
2 Āua e poho pu ôtou i te teào ta ù e tuu atu ia ôtou.
Āua e haapoto i te teào ma te taki e tahi pona.
A haamau ma io he koekoe me te aotahi atu
i hua teào o te Fatu Etua,
ta ù i haaìte ia ôtou i tēnei â.
6 A haamau ma io he koekoe, a aotahi meitaì ôtou i hua teào.
Ma èià, e pupuà ai ôtou me he poì māàma, papa tuhuna
i mua o te tau ènata paotū
te i òno e haavivini i te hakatu o to ôtou tau ture.
E peàu âtou : « O hua mataèinaa òno nui,
te kātahitina o te poì māàma, poì tuhuna. »
7 O ai hoì te mataèinaa òno nui me te tau ètua
e haatata mai io âtou, hakatu me to mātou Fatu Etua,
i te ava u vevaò mātou ia Īa ?
8 O ai te mataèinaa òno nui
me te tau teào māàma, me te ture toitoi oko,
hakatu me te tau ture e tuu nei au ia ôtou i tēnei â ? »
TARAMO 15 (14) 1a.2, 3b-4b, 5
E te Fatu e, u haatata mai Òe me mātou,
a haapohoè Òe ia mātou me Òe. cf.Dt.4,1-7
1 E te Fatu e, o ai òa e noho io to Òe faè ?
2 Te ènata e hana vāàna i te toitoi noa.
Te ènata e faì anatu i te teào tiàtohu.
3 Aòè īa e hao i te mēmau o to īa teina.
Aòè īa e teào kaipipiò i te hoa.
4 E haamee īa i te ènata ta te Etua e tute.
E pakaihi i te ènata haataetae i te Etua.
5 Aòè īa e kamo i te ènata te i àiê io īa.
U titii īa i te moni utu i te kaipipiò.
O te ènata e hana atii e haamau i to īa pohoètina.
TETAUTINA O TE HĀMANI A IAKOPO PEÀTO
1,17-18.21b-22.27
E tu ù tau tunane tuehine.
17 Te mea kanahau paotū, te kuà o te tau taetae kāòha,
ua iho mai âtou me io he àni.
Ua tuutia mai âtou e te Etua Motua
te i pēpena i te òumati, te māàma, te tau fetū.
I òto o Īa aòè te huìkētina te i haatihe mai i te pōtano.
18 U maìmaì te Etua Motua e vaièi mai i te pohoè,
ma te mana o to Īa teào tiàtohu,
etià e ìò tātou ta Īa tau tama hāmua,
i vāvena o te tau mēmau paotū ta Īa i pēpena.
21 A apuu hoì ôtou me te koekoe haapāpaù
i te Teào a te Etua, tanutia i òto o ôtou.
E koàna i hua teào te haapohoè ia ôtou.
22 Atià, a hana ôtou vāàna i te teào,
aua e òno pu me he ènata e hakahae ia īa iho.
27 I mua o te Etua, to tātou Motua,
oia nei te hakatu toitoi noa, teka koè,
o te ènata haatià, te ènata pure hae
te toko atu i te tau tama motua koè, kui koè,
te tau vehine pōpī ma òto o to âtou àì.
A tiòhi meitaì ia ôtou iho, oa teka ôtou io tēnei ao pē. »
ALLELUIA ALLELUIA
cf.1Tam.16,7
« Aòè te Etua e tiòhi i te ènata ma vaho anaè
me ta te ènata e tiòhi nei.
Ua ìte te Fatu i te tiàtohu o te ate me te koekoe. »
EVANERIO O IETU KIRITO VĀÀNA E MAREKO
7, 1-8.14-15.21-23
I tēia mou pō,
7,1 ua putuputu vii pu o Ietu te tau fariteo,
te mou tuhuna teào te i titihe mai me i Ierutaremi.
2 Ua ìte âtou i tahipito kouâ o Ietu e kai aa
me te îìma èpo, oia hoì aòè i hooitia me te vai.
3 U aotahi te huaa fariteo me te tau ati Iuta paotū
i te teào kākiu o to âtou tupuna.
Aòè âtou e kaikai, koè te hooi me te vai
i nā îìma tihe i te tuke îìma.
4 Ia hua mai âtou me i te mākete, aòè âtou e kai
ma mua ta âtou e pihau me te vai i te tino.
Nui oko te hana atii me io to âtou tau tupuna mai,
me he mea e hooi me te vai i te tau ipu,
te tau huekeâ, te tau papa piura.
U aotahi hoì âtou i hua teào.
5 No èià i ūiūi ai te tau fariteo me te tau tuhuna teào
ia Ietu pēènei : « No te aha to òe tau kouâ aòè âtou
e taha i no he aanui o te tau tupuna ?
No te aha e kaikai âtou ma te hooi koè i nā îìma ? »
6 U peàu Ietu ia âtou : « E te poì koekoe e ùa.
He mea toitoi te teào o te perofeta Itaia i ùna o ôtou :
« U haameitaì te mataèinaa nei ia ù ma te fafa ;
o to âtou koekoe à, u memao me io ù.
7 He avai noa aneiho to âtou ùtuna.
Na te mea he teào ènata ta âtou e hakako nei.
8 U pūtuì ôtou i te Teào a te Etua.
Atià, u aotahi atu i te teào i peàutia e te tau ènata. »
14 U vevaò hakaùa Ietu i te faètoa
me to Īa peàu ia âtou :
« A hakaòno mai ôtou paotū, a vivini meitaì.
15 Aòè i havatia te ènata
i te mea me i vaho e uu mai i òto o īa.
Atià, e hava te ènata
i te mea i uu atu i vaho me i òto o īa.
Ia pae Ietu me io te faètoa, u peàu i to Īa tau kouâ :
21 Me i òto o te ènata hoì, me i òto o to īa koekoe
te tau metaò pē, te hana mako, te kamo,
22 te kukumi i te ènata, te too i te vehine a te hoa,
te kaikino, te mākaka pu, te hakahae, te kai faufau,
te keitani, te paha, te kāìè pu me te tau hana tuaave.
23 Me i òto mai o te ènata hua tau mea pē.
Na âtou e tāhava i te ènata. »
TOMINIKA TEKAU MA TOÙ
TETAUTINA O TE PEROFETA ITAIA 35, 4-7
4 A peàu i te tau ènata kuhane koè :
« Oho te ìi. Umoì e haametaù.
Oia nei to ôtou Etua.
O te Etua aneiho no te huke i te umu.
E tihe nei te Etua no te haapohoè mai. »
5 E tāhakahaka te kikomata o te matapō.
E pepeùtia te puaìna pūtuì.
6 E kekeepao te ènata vaekoki me he kaiū keukeu.
E taaàu i te koakoa te fafa o te ènata mutu.
7 E pupuhi mai te vaipuna io te fenua ataha.
E tahe te kaavai io te vao paka meô.
E ìò te fenua moô he fenua me te vaiòto.
E ìò te fenua paka meô he fenua me te tau vaipuna pupuhi.
TARAMO 146 (145) 7, 8, 9ab.10b
E hīmene au no te hahi i to ù Etua, ma te òa o to ù pohoètina. 146,2
7 U haavā Īa me te toitoi i te poì mākakatia.
U vaièi Īa i te oà i te poì mate i te one.
U vevete atu Īa i te poì me io he faèhumu.
8 O te Fatu te i haatahahaka i te tau matapō,
O te Fatu te i haaūo i te poì kuhane koè.
O te Fatu te i haataetae i te poì toitoi noa.
9 O te Fatu te vavao o te tau manihii.
O te Fatu te toko o te vehine pōpī
me te tama motua kui koè.
10 E Tiona e, a pohoè paona koè to òe Etua.
TETAUTINA O TE HĀMANI A IAKOPO PEÀTO 2, 1-5
1 E tu ù tau tunane tuehine.
U haatià ôtou i te Fatu Ietu Kirito, te Fatu kāìè nui.
No èià, aòè e hei te haahuìkē to ôtou apuu
i te tau ènata vāàna i to âtou hakatu kē, hakatu kē.
2 A maakau pu ôtou pēènei :
Ia putupututia ôtou, e tihe anamai nā ènata tokoùa.
Ua tāpītia tītahi me te kahu naènaè,
te koro moni kiki i to īa ìma.
O te ùa o te ènata, he mātua veve, uhitia me te kahu pēpē.
3 U tiòhi anamai ôtou i te ènata me te kahu naènaè,
me to ôtou peàu atu : « A mai.
A too òe i te nohona meitaì, a kaapee i mua nei. »
Atià, u peàu ôtou i te ènata veve :
« O òe, a maô pu i èià ! » Akoè à, u peàu ôtou :
« A kaapee òe i no he tohua, pii o to ù nā vaevae. »
4 No to ôtou hana atii, aòè à u haahuìkē
to ôtou apuu i te tau ènata
vāàna i te hakatu kē to tītahi, hakatu kē to tītahi ?
5 E tu ù tau teina tāhia e, a hakaòno ôtou ia ù :
Ua vae te Etua i te poì veve ia tiòhi atu te ao nei.
Ua tuu te Etua ia âtou i te taetae o te haatià.
E ìò ia âtou te koakoa o te Patirēia
ta te Etua i kānea no te poì te i kāòha mai ia Īa.
ALLELUIA ALLELUIA
cf.Mt.4,23
U haamevaha Ietu i te Teào Meitaì Hou Mai o te Patirēia.
U haapohoè Īa i te mataèinaa me io to âtou memae paotū.
EVANERIO O IETU KIRITO VĀÀNA E MAREKO 7, 31-37
I tēia mou pō,
31 ua hua Ietu me io te Fenua Tiro.
Ua taha Īa ma he Fenua Titone
e hee aa io te tai Karirea,
ma vāvena toitoi o te Fenua Tekapori.
32 U aahitia io Īa te ènata pūtuì me te èo patate.
U toutaki âtou ia Ietu
etià e hapai i to Īa nā îìma i ùna o īa.
33 Ua too Ietu ia īa me te aahi i vahi kē,
memao me io te faètoa.
Ua tuu Ietu to Īa manamana ìma
i òto o te puaìna o hua ènata,
u haatukia i to īa èo me te anuanu.
34 E feau aa, ua uē me te peàu ia īa : « Efata ! »
O hua mea aneiho : « A pepeù òe ! »
35 U pepeù fatafata anamai to īa puaìna.
Ua pohā to īa èo me to īa haafitipona.
36 U oonaì Ietu ia âtou umoì e faì atu i te ènata e tahi.
Atià, tōtahi atu to Ietu oonaì, tōtahi atu to âtou haaìte atu.
37 Ua pē âtou i te mahaò nui me to âtou peàpeàu :
« U toitoi noa to Īa tau hana paotū.
U haafatafata i te puaìna o te poì pūtuì,
u haapohā te èo o te poì mutu. »
TOMINIKA TEKAU MA FĀ
TETAUTINA O TE PEROFETA ITAIA 50, 5-9
Oia nei te teào a te tāvini o te Etua :
5 I tēia pōpōuì, tēia pōpōuì, ua aa mai te Teào a te Fatu
etià e haaòno au me he mea te ènata aotahi atu.
6 Na te Etua i kānea i tu ù puaìna.
Aòè au e patitoo, aòè au e pūtuì.
U avai au i te tau ènata e tā i to ù tua.
Ua tuu au i to ù papaìna i te tau ènata
e huhuti i te huu o to ù kumikumi.
Aòè au i pāpua i to ù mata me i te ènata e māio mai,
e tuhā aa i te anuanu i ùna o au.
7 O te Fatu to ù pātoko. Aòè au e hina atu.
U haafeò au i to ù mata me he keâ.
8 Enā e haatata mai te i haavā ia ù
vāàna i te teào tiàtohu.
O ai te ènata e pōtoho pu mai ?
A maô nātoa māua i mua o te haavā.
O ai te ènata e hakatio mai ?
O ai te ènata e mākaka mai ?
9 O te Fatu to ù Etua, o Īa to ù vavao.
TARAMO 116 A (114-115) 1-2, 3ac-4, 5-6, 8ac-9
E taha au i te aò o te Fatu i no he fenua o te poì pohopohoè.
115, 9
1 U haataetae au i te Fatu.
U apuu Īa i tu ù pure.
2 U hakaòno te Fatu i to ù èo.
Paotū te â e vevaò au ia Īa.
3 U hiiveketia au i te tau kōfii haamate mai.
Ua humutia au me te tuitui o te matena.
4 U vevaò au i te inoa o te Fatu :
« E te Fatu e, a òno, a haapohoè mai. »
5 U toitoi noa, hakāòha nui te Fatu.
He kāòha, he toitoi anaè to tātou Etua.
6 U tiòhi meitaì te Fatu i te poì iti noa.
U pepee au, u haapohoè mai te Fatu.
8 Na Īa i haapā ia havaiki, oa iho au i òto.
U tiòhi meitaì Īa, oa vii to ù vaevae.
9 E taha au i te aò o te Fatu,
I no he fenua o te poì pohopohoè.
TETAUTINA O TE HĀMANI A IAKOPO PEÀTO 2, 14-18
14 E tu ù tau tunane tuehine,
a kaituto ôtou i te ènata e peàu aa pēènei :
« U haatià au, atià u te e hana au vāàna i to ù haatià. »
E aha te mea e koàna mai ia īa ?
Aha, e haapohoè te haatià i hua ènata ?
15 A maakau pu tātou pēènei :
Enā tītahi tunane, akoè à tītahi tuehine,
kahu pēpē to īa, aòè e àva ta īa mea kai no te â nei.
16 Me peàu tītahi me io ôtou :
« E hoa e, a taha atu me te moû.
A noho òe io te vahi māhanahana, a kai haamaòna. »
Atià â, u te e tuu ôtou ia īa i te kahu me te mea kai.
E aha te mea e koàna mai ?
17 Me he haatià mate te haatià hana koè i te hana meitaì.
18 Oia nei te teào e peàu i hua poì :
« U haatià òe. O au à, ua hana au i te hana meitaì.
A haatiàtohu i to òe haatià hana meitaì koè.
E haatiàtohu au i to ù haatià ma to ù hana. »
ALLELUIA ALLELUIA
cf. Ka.6,14
E tahi kāìè anaè to tātou :
te peka o Ietu Kirito, te Fatu.
I òto o te Kirito, u pāokapekatia te ao nei no tātou.
Atii me tātou iho no te ao nei.
EVANERIO O IETU KIRITO VĀÀNA E MAREKO 8, 27-35
I tēia mou pō,
27 ua fiti Ietu me to Īa tau kouâ
i te tau pāpuafaè o te Fenua Ketare Firipo.
E taha aa, ua ūi Ietu ia âtou pēènei à :
« Vāàna ta te tau ènata peàu mai : o ai au nei ? »
28 Ua hua atu âtou : « O Ioane Papetita.
Na tahipito, o Eria.
Na tahipito, tītahi o te tau perofeta. »
29 Ua ūi atu Ietu ia âtou : « No ôtou o ai au nei ? »
E pohā aa to Petero èo, u peàu :
« O Òe te Kirito. »
30 U oonaì Ietu ia âtou umoì e teào
i te ènata e tahi i ùna o Īa.
31 U tīmata Ietu e hakako i to Īa tau kouâ
i te mea e memae oko te Tama a te ènata,
e titiitia e te tau kōkooūa, te tau tāuà nui,
me te tau tuhuna teào. E mate nui Īa,
atià, ma hope o te toù o te pō, e tū hakaùa Īa.
32 U haatāhakahaka Ietu i ta Īa teào ia âtou.
O Petero à, u aahi ia Ietu i te vahi kē
me te hano oonaì ia Īa.
33 Atià, u fāìu Ietu, e tiòhi aa i to Īa tau kouâ,
u oonaì oko ia Petero, pēènei à :
« A hee atu òe. Ma to ù tua, e Tatane.
Aòè to òe maakau me io te Etua.
He maakau ènata anaè to òe. »
34 I muì iho, u vevaò Ietu i te faètoa me to Īa tau kouâ.
U peàu ia âtou :
« Me maìmaì te ènata e ūtaì ia ù,
a titii ia īa aneiho, a amo i to īa peka, a ūtaì mai.
35 Te ènata i maìmaì i to īa pohoè e koàna mai,
e haakoè īa i hua pohoè.
Te ènata e haakoè i to īa pohoè
mēìa ia ù nei me te Evanerio,
e koàna mai ia īa te pohoètina. »
TOMINIKA TEKAU MA ÌMA
TETAUTINA O TE HĀMANI O TE MĀÀMA 2, 12.17-20
U kaituto te poì haatià koè i te maakau pē.
U peàu hoì âtou pēènei à :
12 « A moioè tātou i te ènata koekoe toitoi.
U haapaòpaò mai hoì īa,
e haapākeka nei i to tātou hakatu pohoè.
U oonaì mai īa mēìa u pūtuì tātou i te Ture a te Etua.
U hakatio mai mēìa u titii tātou i te teào
hakakotia mai e to tātou tau tupuna.
17 A tiòhi tātou aha he teào tiàtohu ta īa teào.
Epō, e ìte tātou e aha te hakatu o to īa matena.
Me he mea e tama a te Etua hua ènata toitoi,
e toko hoì te Etua ia īa.
E haapohoè te Etua ia īa
me i te îìma o te tau ènata tōtōua me īa.
19 A haamee oko nui tātou ia īa, a haamāio atu
etià e ìtetia to īa koekoe moû, peê koè.
20 A haamate tātou ia īa ma òto o te matena faufau.
U peàu hoì īa enā tītahi no te tiòhi meitaì ia īa. »
TARAMO 54 (53) 3-4, 5.7b, 6.8
E te Fatu e, a tiòhi mai.
O Òe tu ù pātoko me tu ù haapohoè. cf. 70,6
3 E te Fatu e, a toko mai, o Òe tu ù haapohoè.
Ma to Òe inoa, a haavā mai me te toitoi.
4 E te Etua e, a apuu i tu ù vevaò ia Òe.
A hakaòno i tu ù èo e uēuē nei.
5 Ua hano tahipito hāoè e haatōtōua me au.
Enā te poì mana e hano e kukumi ia ù.
Aòè he kōava i toe no te Etua i mua o âtou.
E te Etua tiàtohu nui e, a haahina ia âtou.
6 U tiòhi mai te Etua, o Īa tu ù pātoko.
O te Fatu te kuà o tu ù tau toko.
8 E te Fatu e, e ùtuna au ia Òe i te hēana,
E haahua èkaèka au ia Òe te kuà o te meitaì.
TETAUTINA O TE HĀMANI A IAKOPO PEÀTO 3, 16-4,3
E tu ù tau tunane tuehine,
16 o te keitani me te ovi atu ovi mai
te tumu o te tōtōua me te nuitina o te tau hana pē.
17 O te koekoe toitoi to mua puu o te māàma
ta te Etua i vaièi mai.
I muì iho, e ìò te māàma he koekoe moû,
te koekoe pakaihi te hoa i te hoa,
e avai aa i te ènata na īa ta īa.
Ua pī te koekoe māàma i te hakāòha, nui oko to īa vaièi,
u apuu īa i te tau ènata paotū,
e aha à hakatu kē to tītahi, hakatu kē to tītahi.
Aòè e koekoe e ùa to te ènata māàma.
18 Ia hano te ènata e haaneke i te moû,
u hakatu īa me tītahi i tanu i te kākano.
E haatupu hua kākano i te koekoe toitoi i mua o te Etua.
4,1 Me i hea mai hoì te totofai me te tōtōua i vāvena o ôtou ?
Aha, aòè me io te tau hīa pē te i tōtōua nei i òto o to ôtou ?
2 Ua pī ôtou i te nuitina o te hīa kē, hīa kē.
Aòè he mea e koàna mai ia ôtou.
A tahi a kukumi pu te hoa i te hoa.
E kōhoà keitani ta ôtou.
Aòè e tae to ôtou hīa.
Ua hano hoì ôtou e koàna mai ma te tōtōua me te pipikièe.
3 Aòè he mea ta ôtou e koàna mai mēìa u te e ape ôtou.
Ia pure ôtou, aòè he mea e tuutia ia ôtou
na te mea aòè i meitaì ta ôtou pure.
E pure nei hoì ôtou no te ape aneiho i te taetae
vāàna i to ôtou hīa haakoakoa i te tino.
ALLELUIA ALLELUIA
cf. .2 Te.2,14
Ma te Teào Meitaì Hou Mai, u vevaò te Etua ia tātou
no te àva atu i te kāìè nui o Ietu Kirito to tātou Fatu.
EVANERIO O IETU KIRITO VĀÀNA E MAREKO 9, 30-37
I tēia mou pō,
30 ua taha Ietu me to Īa tau kouâ
ma vāvena o te Fenua Karirea.
Aòè Ietu i maìmaì e ìte te ènata pēhea Īa.
31 Na te mea, u hakako i to Īa tau kouâ me ta Īa peàu :
« Enā e haaìòtia te Tama a te ènata
i te îìma o te tau ènata. E haamate âtou ia Īa.
Ia mate nui Īa, ma te toù o te pō, e tū hakaùa Īa. »
32 Atià, aòè âtou i vivini i hua teào
me to âtou haametaù i te ūi atu ia Ietu.
33 Ua tihe âtou i Kafaranaumi.
Io he faè, u peàu Ietu ia âtou :
« Ma no he aanui, e aha ta ôtou teàteào ? »
34 Ua mutu âtou na te mea, u tōtohe âtou ma io he aanui
no te ìte : o ai i vāvena o âtou te tiketike atu.
35 E kaapee aa Ietu, u vevaò i te Tīònohuu ma tokoùa
me to Īa peàu ia âtou :
« Me maìmaì tītahi e tū ai i mua,
a haaìò ia īa iho he ènata i muì òa.
A ìò īa te tueni no ôtou paotū. »
36 Ua too Ietu i te pōìti me te haatū i vāvena ahau o âtou.
Ua hopu ia īa me te peàu ia âtou :
37 « Te ènata e apuu ma tu ù inoa
i tītahi tōìki hakatu me īa, u apuu mai ia ù.
Te ènata i apuu mai ia ù,
aòè īa i apuu mai ia ù aneiho :
atià u apuu i tēia i pahi mai ia ù. »
TOMINIKA TEKAU MA ONO
TETAUTINA O TE HĀMANI A MOITE PEAUTIA NŪMERA 11, 25-29
25 Ua iho te Fatu Etua ma òto o te ao tapu.
U teào Īa me Moite.
Atià, ua too Īa i te Kuhane e ihi nei i òto o Moite
me to Īa tuha io te fitu tīònohuu mou ènata,
oia hoì o te tau kōkooūa haatee i te mataèinaa.
Ua iho mai te Kuhane i ùna o âtou.
No te ava poto, u teào perofeta to âtou.
26 Enā tokoùa ènata i nonoho io te pāpua faèkā.
O Eretate me Metate to âua inoa.
Ua ihi te kuhane i òto o âua.
E aha à aòè âua i tihe io te faèkā o te âveitina,
o âua tokoùa tikitahi i vaetia me i vāvena o te papa kōkooūa.
Ma òto o te pāpua faèkā ta âua e perofeta atu.
27 U haakoi tītahi māhaì no te àve i te teào hou ia Moite
e peàu aa : « Enā Eretate atii me Metate
e vii aa i te pāpua me he perofeta âua. »
28 O Iotuē, tama na Nuna, e tāvini aa ia Moite
me i to īa houtina, u teào mai :
« E Moite, e tu ù hakaìki e, a humu òe ia âua. »
29 Atià, u peàu Moite ia īa : « Aha, u keitani òe mēìa ia ù ?
E too ta ù e pōpahi te Fatu i to Īa Kuhane i ùna o âtou paotū,
vāàna te haaìò to Īa mataèinaa, e mataèinaa perofeta. »
TARAMO 19 (18) 8, 10, 12-13, 14
U toitoi te Teào a te Fatu, e haakoakoa âtou i te koekoe. 19,9
8 U toitoi noa te ture o te Fatu,
Na Īa e haahou i to tātou ìi.
U tiàtohu te Teào a te Fatu
Te i haamāàma i te poì avai noa.
10 U taìtaì te pakaihitina o te Etua,
E noho mau anatu to īa tau puu.
U toitoi te teào paotū a te Fatu :
He māàma âtou no te haavā i te ènata.
12 U haamāàmatia to òe tāvini i hua teào.
E te Fatu e, ma te aotahi atu, e tapavaù īa.
13 O ai te i ìte i to īa iho tekateka ?
No to ù tūhaa i tahipito, a haataìtaì mai.
14 A titii me io ù i te kāìè pu.
Umoì e haateetia au i te maakau pē.
Āua e hava au i te teka pūnana.
Āua e hemo au i te mikeo nui.
TETAUTINA O TE HĀMANI A IAKOPO 5, 1-6
1 A hakaòno mai ôtou, e te poì tapavaù.
A uēuē, a mateteka ôtou. E nui ai to ôtou ìno.
U tata èka te ava e topa te ìno nui i ùna o ôtou.
2 Ua èhu pē to ôtou taetae.
Ua kai te tau manumanu i to ôtou tau kahu.
3 Ua tupu me he mea te nenie to ôtou moni kiki
me te moni māìta.
O hua tupu haanenie te i hakatio ia ôtou,
o īa te i kai me he ahi i to ôtou kiko.
U haapuke ôtou i te moni,
e aha à o īa nei te ava paona o te ao nei.
4 Ua kohi te poì hana i te tau puu io to ôtou pāpua,
aòè ôtou i tuu atu nei i to âtou moni utu.
E taaàu hua moni utu e hano huke i te umu.
U tihe io te puaìna o te Fatu o te aomāàma
te tanitina èo o te poì hana e vevaò nei i te tuki.
5 I te ao nei, ua ìmi ôtou i te koakoa, te èkaèka,
te haakāìè pu, ua tuha ôtou i te kainamau,
e aha à, i tēnei ava, u haamākakatia te nuitina o te ènata.
6 U haavā haamate ôtou i te ènata koekoe toitoi,
te ènata piò koè. U kukumi haamate ôtou ia īa,
e tōtohe koè, me ôtou, hua ènata.
ALLELUIA ALLELUIA
cf.In.17,17
E te Fatu e, he tiàtohu ta Òe Teào.
A haapeàto mai ia mātou i òto o hua tiàtohu.
EVANERIO O IETU KIRITO VĀÀNA E MAREKO
9, 38-43.45.47-48
38 I tēia mou pō, u peàu Ioane ia Ietu :
« E Tuhuna e, ua ìte mātou i te ènata
e tute aa i te tiaporo ma to òe inoa.
Ohia aòè īa i kē me mātou, u haapākeka mātou ia īa. »
39 U peàu Ietu : « Umoì ôtou e haapākeka ia īa.
Aòè te ènata e hana i te hana mana ma to ù inoa,
i muì iho, e kaipipiò ponihoo hua ènata ia ù.
40 Te ènata aòè i tōua mai ia tātou,
ua kē hua ènata me tātou.
41 Te ènata e tuu ia ôtou i te ipu vai maoì,
na te mea ua kē ôtou me te Kirito,
he teào tiàtohu ta ù nei ia ôtou : aòè e naò to īa tuki.
42 Te ènata i hakapahi pē
i tītahi me io te poì iti noa te i haatià,
mea meitaì aè no īa e kitiitia to īa kākī
me te keâ nunui no te titii atu i to he tai.
43 Ia hakapahi to òe ìma oko ia òe i te piò, a kokoti.
Mea meitaì aè no òe te tomo ìma motu io he pohoè
i te topa me to òe nā îìma e ùa i to he Kehena,
i èià te ahi mate koè.
45 Ia hakapahi to òe vaevae ia òe i te piò, a kokoti.
Mea meitaì aè no òe te tomo vaekoki io he pohoè
i te topa me nā vaevae e ùa i to he Kehena.
47 Ia hakapahi to òe kikomata ia òe i te piò, a tīkaò.
Mea meitaì aè no òe te tomo mata koìò
i òto o te Patirēia o te Etua
i te topa me nā kikomata e ùa i to he Kehena.
I èià hoì aòè e koè te iò, aòè e mate te ahi.
TOMINIKA TEKAU MA FITU
TETAUTINA O TE HĀMANI TENETE 2, 18-24
18 U peàu te Fatu Etua :
« Aòè he mea meitaì e noho tootahi te ènata.
E kānea au i te toko e hei no īa. »
19 U kānea te Fatu Etua me io he èpo
i te tau puaa e totoo nei io he teitā
me te tau manu e ona nei io he ataàni.
U aahi te Fatu Etua ia âtou paotū i mua o te ènata :
Na īa e apa i to âtou inoa.
20 Ua apa te ènata i te inoa o te tau ànimara paotū :
te tau manu e ona nei io he ataàni,
me te tau puaa e totoo nei io he teitā.
Atià, u te e koàna mai i te ènata te mēmau toko e hei no īa.
21 A tahi a haatau te Fatu Etua i te hiamoe èka uo he ènata.
E hiamoe aa te ènata,
ua taki te Fatu Etua i te vakavaka me io to īa tino
me te haaoà i te maki.
22 U kānea te Etua i hua vakavaka he vehine,
me te aahi ia īa i mua o te ènata.
23 U peàu te ènata : « O īa nei te ivi o to ù ivi.
Oia nei te kiko o to ù kiko.
E apatia to īa inoa : Vehine. Me io te Ahana hoì īa. »
24 Oia te tumu e pae ai te āhana
me i to īa motua me te kui,
no te haapii me ta īa vehine.
E ìò âua tokoùa e tahi aneiho.
TARAMO 128 (127) 1-2, 3, 4.5c.6a
A haameitaì te Fatu ia tātou,
ma te tau â paotū o to tātou pohoètina. cf.128,5
1 Mamau te ènata, e pakaihi i te Fatu,
E aotahi aa i ta te Etua teào.
2 E tāfaitia òe e te hana o to òe îìma :
Mamau òe. A noho te koakoa io òe.
3 Io to òe faè, ua noho ta òe ona vehine
Hakatu me te tumuvino pī i te tau puu.
Ta òe mou tama vii pu o te tapukai,
E tū aa me he maa âkau oriveti.
4 Oia te taetae i vaièitia i te ènata i pakaihi i te Fatu.
E haameitaì te Etua o Iraene ia òe
Ma te tau â paotū o to òe pohoètina.
6 E ìtemata ai òe i to òe tau poupuna i ùna aè.
TETAUTINA O TE HĀMANI I TO HEPEREO 2, 9-11
9 Ua ìte meitaì tātou e tahi mea : o Ietu te i haapāpaùtia
no te ava poto, ma àò o te tau anera,
i tēnei, u keàpa Īa me te kāìè me te mana
mēìa i te memae haamate nui ia Īa.
U mate nui hoì Ietu i uē i te tau ènata paotū,
vāàna i te karatia ta te Etua i vaièi mai.
10 U pēpena te Etua i te tau mēmau paotū
vāàna i to Īa maìmaì, no te haakāìè ia Īa iho.
I te ava e kōhoà te Etua e aahi i te kāìè o te àni
i te nuitina o ta Īa tama,
he mea hei no Īa te haatoitoi noa, mēìa i to Īa memae,
ia Ietu te tumu o te haapohoètina.
11 O Ietu hoì te i haakoè i te mikeo
atii me te tau ènata te i hooitia to âtou mikeo,
e tahi Motua to âtou nātoa.
Oia te piò aòè e hakaìna Ietu e vevaò ia âtou :
e tu ù tau tunane tuehine e.
ALLELUIA ALLELUIA
cf.1In.4,16
Te ènata i kāòha me te tohe mau i te kāòha,
ua noho hua ènata i òto o te Etua :
he kāòha hoì te hakatu o te Etua.
EVANERIO O IETU KIRITO VĀÀNA E MAREKO
10, 2-16, akoè à 10, 2-12
I tēia mou pō,
2 u haatata mai io Ietu mou fariteo e ūiūi aa
aha e koàna i te āhana te titii i ta īa vehine.
Ua hano âtou e haaveke ia Īa.
3 U haahua Ietu me to Īa peàu ia âtou :
« E aha te teào a Moite no ôtou ? »
4 U peàu âtou : « Ua ao Moite
e tute te āhana i ta īa vehine,
atià, e tuu atu ia īa i te hāmani titiitina. »
5 U peàu Ietu ia âtou : « Mēìa u koekoe pūtuì to ôtou,
i patu ai Moite i hua ture.
6 Atià, i te tumu, i te pēpenatina o te aomāàma,
u kānea te Etua i te ènata, he āhana he vehine.
7 Oia te tumu e titii te āhana i to īa motua me te kui,
no te haapii me ta īa vehine.
8 E ìò ai âua he tino e tahi.
Ma èià hoì, aòè tokoùa âua, atià e tahi anaè.
9 Umoì te ènata e haapaekē i ta te Etua i haatūtaì. »
10 Io he faè, ua ūiūi hakaùa to Īa tau kouâ i ùna o hua teào.
11 U peàu Ietu ia âtou : « Te āhana
e titii i ta īa vehine me te noho me te vehine kē,
he āhana haapē i te mātirimonio.
12 Me titii te vehine i ta īa āhana
me te noho me te āhana kē,
he vehine haapē i te mātirimonio. »
13 U aahitia io Ietu mou tōìki etià e haatukia Īa ia âtou.
U oonaì te tau kouâ ia âtou.
14 Atià, ua ìte Ietu. Ua peê me to Īa peàu i te tau kouâ :
« A avai i te tau tōìki e haatata mai.
Umoì ôtou e haapākeka ia âtou.
No te tau ènata hakatu me âtou hoì te Patirēia o te Etua.
15 E teào tiàtohu ta ù nei ia ôtou :
me he mea aòè te ènata e apuu i te Patirēia o te Etua
me te koekoe hakatu me to te tōìki,
aòè hua ènata e tomo i òto. »
16 Ua hopu Ietu ia âtou me te haameitaì
ma te hapai i nā îìma i ùna o âtou.
TOMINIKA TEKAU MA VAÙ
TETAUTINA O TE HĀMANI O TE MĀÀMA 7, 7-11
7 Ua pure au. U vaièitia mai te Māàma.
U vevaò toutaki au.
Ua ihi i òto o au nei te Kuhane Māàma.
8 U haataetae au ia īa ma ùna atu o te inoa haakāìè
me te tootoo hakaìki.
9 No ù he mēmau tupepaka te tau taetae paotū.
O te Māàma tu ù taetae anaè.
Aòè e àva me īa te tau keâ pupuà pīàma.
Me he one te moni kiki paotū o te aomāàma nei
ia tiòhitia te Māàma.
Me he èpokau te moni tea i mua o īa.
10 U haataetae au i te Māàma ma ùna atu
i te tino feòfeò me te poèa.
Ua vae au i te Māàma ma ùna atu o te àma òumati.
Aòè hoì to īa pupuà e koè ai.
11 Me te Māàma, u koàna mai ta ù tau taetae paotū.
O te Māàma te tumu o te tau taetae
u te e koàna i te ènata te tetau.
TARAMO 90 (89) 12-13, 14-15, 16-17
I te pōpōuì, a haaèka mai to Òe hakāòha ia mātou :
E pao ai to mātou tau â me he koìna me te hīmene. 90,14
12 A haaìte mai i te nuitina o to mātou tau â.
A tahi nei e ìmi mau mātou i te Māàma.
13 E te Fatu e, a òomi ponihoo i to Òe peê.
Umoì te haatevee i uē i to Òe tau tāvini.
14 I te pōpōuì a haaèka mai to Òe hakāòha ia mātou :
E pao ai to mātou tau â me he koìna me te hīmene.
15 Òmua, ua ìte mātou i te uēuē ; i tēnei, a haakoakoa mai.
Òmua, u òomi mai te ìno nui ; i tēnei, a èkaèka mātou.
16 A haavivini i to Òe tau tāvini te tumu o ta Òe hana.
A haapupuà i mua o to âtou tau tama i to Òe kāìè.
17 I ùna o mātou te moû o te Fatu, to mātou Etua.
A haamau te Etua i te hana o to mātou îìma.
A haameitaì te Fatu ia mātou te tau ènata hana.
TETAUTINA O TE HĀMANI I TO HEPEREO 4, 12-13
12 Na te mea e mēmau pohoè te Teào a te Etua,
he mea ìi oko, tōtahi atu to īa koi
i te koitina o te kohetā e ùa mata.
U putaèe te Teào a te Etua i òto òa o te ènata tiàtohu,
tihe i te tumu o te kuhane me te koekoe,
tihe i te pohotina o te pooviitua, te pūhoo o te ivi.
U haatāhakahaka te Teào a te Etua i to te ènata tau hīa
atii me to īa tau maakau pūnana.
13 Aòè e tahi mēmau te i pēpenatia
i haapupuni i mua o te mata o te Etua.
I mua o Īa, u kahu koè te tau mēmau paotū ;
ua ìte meitaì te Etua ia âtou tikitahi.
O te Etua te i haavā ia tātou paotū.
ALLELUIA ALLELUIA
Mt.5,3
Mamau te tau ènata koekoe veve :
no âtou te Patirēia o te àni.
EVANERIO O IETU KIRITO VĀÀNA E MAREKO
10, 17-30 (10,17-27)
I tēia mou pō,
17 ia hano Ietu e hee atu, u tohuti mai te ènata,
ua noho muò i mua o Īa me te ūi atu :
« E Tuhuna meitaì e, e aha te hana e hana atu au
etià e koàna mai ia ù te pohoè anatu ? »
18 U peàu Ietu ia īa : « Umaha to òe peàu mai :
e tuhuna meitaì ? Aòè e tahi ènata meitaì.
O te Etua anaè te i meitaì.
19 Ua ìte òe i te tau teào a te Etua :
Umoì e kukumi haamate i te ènata.
Umoì e haapē i te mātirimonio.
Umoì e kamo. Umoì e pōtoho pu. Umoì e kaipipiò.
A pakaihi i to òe motua me to òe kui. »
20 U peàu īa : « E Tuhuna e. Me i to ù tino hou,
u aotahi au i hua tau teào. »
21 O Ietu à, e tiòhi mau aa ia īa, u haataetae.
U peàu Īa : « E tahi mea i toe ia òe.
A hee. A hoko atu i ta òe tau taetae paotū.
A tuu i te poì veve.
E koàna ia òe te puke taetae io he àni.
I muì iho, a mai. A ūtaì mai ! »
22 Ia òno hua ènata i tēnei teào, ua maù nui īa,
me to īa hee atu, nui to īa kuhane koè,
mēìa ua nui ta īa tau taetae.
23 E tiòhi aa Ietu vii pu o Īa, u peàu i to Īa tau kouâ :
« He mea hana nui no te tau ènata me te taetae
e tomo i òto o te Patirēia o te Etua. »
24 Te tau kouâ, u emièe oko âtou mēìa i tēnei teào.
Atià, u peàu hakaùa Ietu ia âtou :
« E tu ù tau tama e, he mea hana nui te tomo
i òto o te Patirēia o te Etua.
25 He mea māeà atu no te kamerō te uu ma he puta o te nina.
He mea hana nui no te ènata me te taetae
te tomo i òto o te Patirēia o te Etua. »
26 Ua nui aè to te tau kouâ emièe
me te peàpeàu te hoa i te hoa :
« O ai òa te ènata e haapohoètia ? »
27 U tiòhi matiòka Ietu ia âtou me to Īa peàu :
« Aòè e koàna i te tau ènata. Atià, e koàna i te Etua.
Aòè he mea aòè e koàna i te Etua. »
28 A tahi a peàu Petero ia Ietu :
« O mātou à, u titii mātou i te tau mea paotū
me te ūtaì ia òe. »
29 U peàu Ietu : « E teào tiàtohu ta ù nei.
Me titii te ènata i to īa faè, to īa tau tunane tuehine,
to īa motua, to īa kui, ta īa tau tama,
akoè à to īa fenua i uē ia ù me te Evanerio,
30 io te aomāàma nei, e koàna ia īa
te nuitina o te faè, te huaa tunane tuehine,
te tau kui, te tau tama, te tau fenua,
atià me te tōtōua haamākaka mai.
I te ao a tihe mai, e koàna ia īa te pohoè anatu. »
TOMINIKA TEKAU MA IVA
TETAUTINA O TE PEROFETA ITAIA 53, 10-11
10 U maìmaì te Fatu e tukituki atu me te memae.
Mēìa u ùtuna atu i to Īa pohoè mea hoko mikeo,
e ìte ai i to Īa tupu i ùna aè,
e haakoa aè i to Īa tau â.
Ma io Īa, e tae anamai te hīa o te Fatu.
11 Ma hope o te ûûkina o to Īa kuhane,
e ìtetia te Māàma, e tapavaù nui.
Ma to Īa memae, u haameitaì tu ù tāvini
i te tini tini ènata, e amo aa i to âtou mikeo.
TARAMO 33 (32) 4-5, 18-19, 20.22
E te Fatu e, a noho mau to Òe kāòha i ùna o mātou
Atii me mātou e tetaì mau i to Òe vaièitina. 33,22
4 He toitoi noa te Teào a te Fatu.
U tiàtohu anaè to Īa tau hana paotū.
5 U haataetae Īa i te hakatu toitoi, haakahaè koè.
Ua pī te aomāàma i to Īa tau hana kāòha.
18 Ua toko te Etua i te tau ènata pakaihi ia Īa,
Te poì e tetaì mau i to Īa kāòha mai,
19 U haapohoè ia âtou me io te ìno me te matena,
Te haapohoè i te ava o te ìno me te one nui.
20 O te Fatu te tumu o to tātou pohoè.
O Īa to tātou toko me te vavao.
22 E te Fatu e, a noho mau to Òe Kāòha i ùna o mātou
Atii me mātou e tetaì mau i to Òe Vaièitina.
TETAUTINA O TE HĀMANI I TO HEPEREO 4, 14-16
E tu ù tau tunane tuehine.
14 Ohia ua ìò Ietu te Tama a te Etua,
to tātou Tāuà nui tiketike, te i tomo i ùna nui o te àni,
a tohe mau tātou e faì atu i te Haatià.
15 Na te mea, u mehea hua Tāuà nui
mēìa i te tau tekateka o to tātou koekoe pepee.
Ua ìte hoì Īa ma te tiàtohu i te nuitina
o te mea haaveke me te haamōtii mai ia Īa,
atià, aòè i mikeo Īa.
16 No èià, a haatata mai tātou haametaù koè
me te Etua mana nui, te tumu o te vaièitina,
vāàna e ìò mai ia tātou to Īa Hakāòha
me te karatia no te toko mai, i te ava e hei.
ALLELUIA ALLELUIA
Mk.10,45
Ua tihe mai te Tama a te ènata no te tāvini atu
me te haaìò i to Īa pohoè me he ùtuna hēana,
no te hoko mai i te nuitina o te tau ènata.
EVANERIO O IETU KIRITO VĀÀNA E MAREKO 10, 35-45
akoè à : 10, 42-45
I tēia mou pō,
35 u haatata mai io Ietu Iakopo me Ioane,
nā tama a Ihepetea. U peàu âua ia Īa :
« E Tuhuna e. Ua ape māua :
a fati mai Òe i to māua hīa. »
36 U peàu Ietu ia âua : « E aha te hana e hana au no ôùa ? »
37 U peàu âua : « A ao mai a noho māua i òto o to Òe kāìè,
tītahi i to Òe ìma oko, tītahi i to òe ìma aèaè. »
38 U peàu Ietu ia âua :
« Aòè au i ìte i ta ôùa e ape nei.
Aha òa e koàna ia ôùa te inu i te ipu ta ù e inu ai ?
Aha e koàna ia ôùa te papatema e koàna mai ia ù ? »
39 U peàu âua : « E koàna ia māua. »
U peàu Ietu ia âua :
« Te ipu e inu nei au, e inu ai me ôùa.
Te papatema e koàna nei ia ù,
e papatematia ai me ôùa.
40 Atià, no te noho i to ù ìma oko,
akoè à i to ù ìma aèaè, aòè na ù te tuu atu.
E tuutia i tēia i haapeitia. »
41 Ua òno te Tīònohuu i hua teào
me to âtou haahaa ia Iakopo me Ioane.
42 U vevaò Ietu ia âtou io Īa me te peàu :
« Ua ìte ôtou : te tau ènata
peàutia e hakaìki o te tau êteni,
e haatono âtou i to âtou vivinitina.
Atii ta te poì hōhonu : ua haatono i to âtou hakaìkitina.
43 Umoì atii io ôtou. Me maìmaì tītahi
e ìò he ènata tiketike atu i vāvena o ôtou,
a haaìò ia īa aneiho he ènata tāvini ia ôtou.
44 Te ènata me i vāvena o ôtou
i maìmaì e vivini ia ôtou,
a ìò īa he ènata tueni ia ôtou paotū.
45 Na te mea, te Tama a te ènata,
aòè Īa i tihe no te haatāvini mai,
atià, no te tāvini atu me te tuu i to Īa pohoètina
no te hoko mai i te nuitina o te ènata. »
TOMINIKA E TOÙ ÒNOHUU
TETAUTINA O TE HĀMANI O TE PEROFETA IEREMIA 31, 7-9
U peàu hoì te Fatu : « A taaàu i te koakoa no Iakopo,
a hahi i te kuà o te tau mataèinaa.
A hīmene i te hīmene hahi e peàu ana :
E te Fatu Etua e, a haapohoè i to òe mataèinaa,
i te toena o Iraene. »
8 Enā, e haahua nei au ia âtou me i te fenua i te kēkē tiu.
Enā, e haaputuputu nei au ia âtou
me i te kotiana paona o te fenua.
Enā ma vāvena o âtou te poì matapō, te tau vaekoki,
te tau vehine ôpū tama, te tau vehine fānau hou mai.
E motuhaka nui oko te poì te i hua mai.
9 Ua hee âtou, e uē aa me te mateteka.
E haahuatia mai âtou ma òto o te koakoa.
E aahi au ia âtou io te tau vaitahe
ma te aanui meitaì : aòè e tukia to âtou vaevae.
Ua ìò au e motua no te mataèinaa Iraene,
O Efarima tu ù tama hāmua.
He teào na te Fatu. »
TARAMO 126 (125) 1-2b, 2c-3, 4-5, 6
He hana mahaò hoì to Īa i uē ia mātou,
Ua tihe to mātou ava no te haakoìna koakoa. 126,3
1 Ia haahua mai te Fatu ia mātou,
Ia hua mai i Tiona mātou, poì mōèhu ;
me he ènata moemoeā to mātou hakatu.
2 Ua pī to mātou fafa i te katahehe.
U taaàu mātou i te taa koakoa.
A tahi a mevaha te teào io te poì êteni :
« Auē, te hana mahaò ta te Fatu i hana no âtou. »
3 He hana mahaò hoì to Īa i uē ia mātou,
Ua tihe to mātou ava no te haakoìna koakoa.
4 E te Fatu e, a haahua ia mātou,
Me he mea te vaitahe io te fenua ataha.
5 E tūtū te ènata i te kākano e uēuē aa.
Ua kohi īa i te tau puu me te koakoa.
6 E taha īa, taha atu e tūtū i te kākano,
Me te uē me te mateteka.
Ua hua īa, hua mai me te koakoa,
E àve aa i te pūpā faraoa.
TETAUTINA O TE HĀMANI I TO HEPEREO 5, 1-6.
1 Ua vaetia te Tāuà nui me i vāvena o te tau ènata.
To īa hana tumu te tāvini i te Etua,
ma te inoa o te tau ènata.
E ùtuna īa i te taetae kāòha me te hēana haatāvaè
no te hooi i te mikeo.
2 Na te mea he koekoe pepee to īa
me he mea to te tau ènata,
e koàna ia īa te hakāòha mai i te poì e mikeo nei,
e hukaka ana mēìa i to âtou koekoe pōtano.
3 No èià, he mea nui to īa ùtuna hēana,
no to īa iho mikeo, atii no te tau mikeo o te mataèinaa.
4 Aòè e too pu te ènata na īa ta īa anaè
i hua hana haakāìè. E vevaò te Etua i to Īa tāuà,
me he mea ua ìte tātou no Aarone.
5 Hua mea aneiho ta Ietu Kirito :
i te ava ua tū Īa e Tāuà nui,
u te e too Īa i hua inoa haakāìè na Īa ta Īa anaè.
U vevaò ia Īa te Etua e peàu aa :
« O òe tu ù Tama. I tēnei â, e fānau au ia òe. »
6 Io te vahi kē, u patutia pēènei : « He Tāuà òe,
vāàna i te hakatu o Meretiteka,
no te tau tai a tihe anatu. »
ALLELUIA ALLELUIA
cf.Rk.1,68.79
A haameitaìtia te Fatu, to tātou Etua ;
U haapupuà Īa i te māàma i ùna o te poì
e noho nei io te pō pōtano.
EVANERIO O IETU KIRITO VĀÀNA E MAREKO 10, 46b-52
I tēia mou pō,
46 e hee ana i vaho o Ieriko Ietu,
to Īa tau kouâ me te faètoa nui,
enā io te taì o te aanui,
u kaapee te ènata matapō e kaiape aa.
O Paratimeo to īa inoa, tama na Timeo.
47 Ua òno hua ènata matapō e taha nei Ietu no Natareti.
U taaàu anamai me te peàu :
« E te tama a Tavite. E Ietu e. A hakāòha mai. »
48 Mea nui te poì i oonaì ia īa etià e mutu īa.
Atià, tōtahi atu to īa taaàu :
« E te tama a Tavite, a hakāòha mai. »
49 U hakaēa Ietu me te peàu : « A vevaò ia īa ! »
U vevaò âtou i hua matapō me te peàu :
« Oho te ìi. A tū ! U vevaò nei Īa ia òe. »
50 Ua taki anamai īa i te kahu uhi pu,
u keepao me te tihe io Ietu.
51 U pohā te èo o Ietu me te peàu :
« E aha to òe maìmaì e hana au no òe ? »
U peàu te matapō :
« E Rapuni e. A tāhakahaka to ù mata. »
52 U peàu Ietu ia īa : « A taha atu.
Mēìa i to òe haatià, u pohoè òe. »
U tāhakahaka anamai to īa mata
me to īa ūtaì ia Ietu, ma no he aanui.
TOMINIKA E TOÙ ÒNOHUU MA TAHI
TETAUTINA O TE HĀMANI A MOITE PEÀUTIA TEUTERO
6, 2-6
U peàu Moite i te mataèinaa Iraene pēènei à :
2 etià e pakaihi òe i te Fatu, to òe Etua,
o òe me ta òe tau tama me te tau poupuna,
e aotahi ana ma te tau â paotū i to Īa ture, to Īa teào,
ta ù e hakako i tēnei â, etià e òa to òe pohoètina.
3 E to Iraene e, a hakaòno ôtou,
a hano ôtou e aotahi atu :
ma èià, e koakoa ôtou, e haanuitia ôtou,
me he mea ta te Fatu Etua i peàu i to ôtou tau motua tupuna,
ôtou e noho aa io te fenua tapavaù
i èià e tahe te vaiū me te mānini tikauè.
4 A hakaòno, e to Iraene.
Te Fatu, to tātou Etua, he Fatu e tahi anaè Īa.
5 A kāòha òe i te Fatu, to òe Etua, ma io he koekoe,
ma io he kuhane me to òe ìi pao nātoa.
6 A haamau ma he koekoe i tēnei teào
ta ù i tuu ia òe i tēnei â.
TARAMO 119 (118) 97.99, 101-102, 103-104, 105-106
A kāòha òe i te Fatu, to Òe Etua, e pohoè ai òe. Tto. 6,2.5
97 U haataetae nui au i to Òe Ture.
E te Fatu e, paotū te â, u kaituto au ia īa.
99 U māàma atu au i te tau tuhuna e hakako ia ù
Mēìa e kaituto hakaēa koè au i to Òe Ture.
101 Aòè au e taha ma no he aanui hukaka.
Ua tohe au, e pohoè vāàna i ta Òe teào.
102 Aòè au e pūtuì i to Òe maìmaì.
O Òe aneiho te tuhuna te i hakako mai.
103 U kōnini to Òe teào te i haamāàma mai,
U mānini atu i to te tau manumanu tikauè.
104 U haamāàma mai to Òe Ture ia ù.
U haahaa au i te aanui haahukaka i te ènata.
105 To Òe Ture me he àma o to ù taha vaevae,
Me he àma kohe e tūìna i to ù aanui.
106 U haatiàtohu au i ta ù teào voto :
E tohe au e aotahi i to Òe Ture.
TETAUTINA O TE HĀMANI I TO HEPEREO 7, 23-28
23 He mea nui te tau tāuà vāàna i te ati o Revi.
Aòè e koàna hoì ia âtou te hana anatu i te hana tāuà,
na te mea e poì mate vave âtou.
24 O Ietu à, e pohoè Īa no te ava paona koè.
No èià, u Tāuà nui Īa no te ava paona koè.
25 U koàna ia Īa te haapohoè pao ònaòna
i te tau ènata e ìmi aa i te Etua ma io Īa.
U pohoè hoì Ietu no te vevaò i uē i hua tau ènata.
26 O īa na te Tāuà nui e hei toitoi no tātou :
he Tāuà peàto, taìtaì pē, mikeo koè,
haapaekētia me i vāvena o te poì mikeo,
haatiketiketia i ùna nui o te àni.
27 Aòè e hei no Īa, me he mea te tau tāuà kē,
e ùtuna paotū te â i te hēana no to Īa iho tau mikeo,
ma hope, no te tau mikeo o te mataèinaa.
O Ietu Kirito à, u haapao Īa e tahi ùtuna anaè,
to Īa ùtuna ia Īa iho me he hēana
te i mau ai no te ava paona koè.
28 Vāàna i te Ture a Moite,
ua vaetia te tau ènata koekoe pepee no te hana Tāuà nui.
Atià, vāàna i te teào tiàtohu haamautia e te Etua,
te i tihe ma hope o te Ture,
u haatūtia tītahi Tama peàto pao ònaòna
no te tau tai a tihe anatu.
ALLELUIA ALLELUIA
1 In.4,8.7
He kāòha hoì te Etua.
Te ènata i kāòha i te hoa,
he tama īa o te Etua ; ua ìte īa i te Etua.
EVANERIO O IETU KIRITO VĀÀNA E MAREKO 12, 28b-34
I tēia mou pō,
28 u haatata mai io Ietu tītahi o te tau tuhuna teào
me te ūi atu ia Ietu pēènei :
« Te teào hea te teào to mua i vāvena o âtou nui ? »
29 U haahua atu Ietu : « Oia nei te teào to mua.
A hakaòno mai, e to Iraene e !
Te Fatu, to tātou Etua, o Īa anaè te Fatu.
30 A kāòha òe i te Fatu to òe Etua, me io he koekoe,
me io he kuhane, me io he ènata tiàtohu,
me io to òe ìi paotū.
31 Oia nei te teào e ùa :
A kāòha òe i te hoa me he mea ia òe aneiho.
Aòè he teào kē taetae aè i nā teào nei. »
32 U peàu te tuhuna teào ia Ietu :
« Meitaì oko, e Tuhuna e !
E tiàtohu nui ta òe teào nei :
Tootahi te Etua. Aòè he Etua kē.
33 Te kāòha ia Īa me io he koekoe,
me io he ènata tiàtohu, me io he ìi pao ònaòna,
atii te kāòha i te hoa me he mea ia òe aneiho,
he mea taetae atu i te tau ùtuna pūovo i te ahi
me te tau hēana paotū. »
34 E ìte aa Ietu u toitoi ta īa teào, u peàu :
« Ua tata òe me te Patirēia o te Etua. »
Aòè te ènata e tahi i vaavō no te ūi atu ia Īa.
TOMINIKA E TOÙ ÒNOHUU MA ÙA
TETAUTINA O TE HĀMANI TO MUA A TE TAU HAKAÌKI 17, 10-16
10 Ua tū Eria me to īa fiti i Tarepa.
Ua tihe īa i te avaputa o te pāpuafaè.
Enā i èià tītahi vehine pōpī e kohi aa i te vehie.
U vevaò Eria ia īa me te peàu atu :
« A kapu òe i te òna vai io he hue. E inu au. »
11 Ua hano te vehine e kapu i te òna vai.
U peàu atu Eria ia īa : « A tuu mai i te faraoa. »
12 Ua hua te vehine :
« Ma te inoa o te Fatu, to òe Etua, aòè a ù faraoa.
Oia anaè ta ù : te atuàka faraoa tee
i òto o te huekeâ me te iti noa o te kao.
E kohi nei au i te vehie. E hua au io he faè
kānea i te toena o te kai no ù me ta ù tama.
E kai māua me to māua mamate. »
13 U peàu Eria i te vehine : « Aua e haametaù.
A hee atu. A hana me he mea ta òe i peàu.
Atià, òmua a tao i te poo faraoa iti. A àve mai.
Ma hope iho, a kānea òe i te faraoa na òe me ta òe tama.
14 Oia nei hoì te Teào a te Fatu, te Etua o Iraene :
« Aòè e pao ai te hue me te faraoa tee.
Aòè e kiko koè te hue me te kao,
tihe i te â e haatopa te Fatu i te ūa i ùna o te fenua. »
15 Ua hee te vehine me ta īa hana vāàna i te teào a Eria.
Ma te nuitina o te â, ua kai haamaòna
te perofeta, te vehine me ta īa tama.
16 Aòè e pao te hue faraoa tee. Aòè e kiko koè te hue kao,
vāàna i te Teào a te Fatu, te i haaìtetia e te perofeta Eria. »
TARAMO 146 (145) 5-6a, 6c-7b, 8b-9a, 9b-10
E hīmene au i te Fatu ma te òa o to ù pohoètina. cf.146,2
5 Mamau te ènata e ìò te Fatu o Iakopo to īa toko.
Mamau te ènata e tetaì nei i te Fatu, to īa Etua.
6 Na Īa i pēpena i te àni, te fenua, te tai.
E hana anatu te Fatu vāàna i ta Īa i haaìte mai.
7 U haavā Īa me te toitoi i te poì mākakatia.
U vaièi Īa i te oà i te poì mate i te one.
8 O te Fatu te i haaūo i te poì kuhane koè.
O te Fatu te i haataetae i te poì toitoi noa.
9 O te Fatu te vavao o te tau manihii.
O te Fatu te toko o te vehine pōpī
me te tama motua kui koè.
10 E vivini nei te Fatu ma te tau tai anatu.
E Tiona e, a pohoè paona koè to òe Etua.
TETAUTINA O TE HĀMANI I TO HEPEREO 9, 24-28
E tu ù tau tunane tuehine,
24 aòè Ietu i tomo i òto o te Vahi tapu
hanatia e te îìma ènata,
he ata anaè hua Vahi o te Ahu tapu tiàtohu.
Ua tomo Ietu i òto o te àni toitoi,
etià e tū Īa i mua o te Etua no te vevaò i uē ia tātou.
25 Aòè Ietu e ùtuna hakaùa i to Īa ùtuna hēana,
me he mea a te tāuà nui te i tomo
i òto o te Vahi tapu i tēia èhua, i tēia èhua,
no te ùtuna i te toto o te tau ànimara,
aòè o to īa iho toto.
26 Anoa i hana atii Ietu,
he mea nui to Īa memae me te matena
me i te tumu u pēpenatia te aomāàma nei.
Atià, i tēnei ava paona o te ao nei,
e tahi anaè to Ietu haaìte ia Īa iho
no te haakoè i te mikeo ma to Īa ùtuna hēana.
27 E mate te tau ènata paotū, atià e tahi matena anaè to âtou.
I muì iho, e haavātia âtou e te Etua.
28 Atii to Ietu Kirito : ua ùtuna ia Īa aneiho,
e tahi ùtuna anaè no te haakoè i te mikeo
no te nuina o te poì.
E haaìte iho ia Īa, aòè mēìa i te mikeo,
atià no te haapohoè i te tau ènata e tetaì nei ia Īa. »
ALLELUIA ALLELUIA
Mt.5,3
Mamau te tau ènata koekoe veve.
No âtou te Patirēia o te Àni.
EVANERIO O IETU KIRITO VĀÀNA E MAREKO 12, 38-44
I tēia mou pō, e hakako ana Ietu, u peàu pēènei :
38 « Umoì ôtou e haakē me te tau tuhuna teào.
E kōhoà nei âtou e taha atu ma io he aanui,
uhitia âtou me te kahu kokoa.
Te mea haaèkaèka ia âtou, te òno i no he tohua
i te tau ènata e pohā te èo no te pakaihi ia âtou,
39 te i kaapee i no he nohona to mua i òto o te tau tinakoka,
te moe io he òki haakāìè io te kainamau.
40 Ua hao âtou i te taetae o te tau vehine pōpī,
i te ava u haakoa i to âtou pure ma te kāìè pu.
He mea pē atu te tuki haamemae e topa i ùna o âtou. »
41 I òto o te Hiero, e noho aa Ietu i mua o te puho avaitina moni,
u tiòhi Īa pēhea e tuu te faètoa i te moni hunahuna
io te vahi avaina moni. Enā te nuitina o te poì taetae
te i tuu atu i te puke moni.
42 Ua tihe mai e tahi vehine pōpī, ua veve īa.
Ua tuu īa e ùa pene anaè, he moni hunahuna ti.
43 U vevaò Ietu i to Īa tau kouâ me te peàu ia âtou :
« E teào tiàtohu ta ù nei ia ôtou.
O hua vehine pōpī, he vehine veve,
ua tuu īa nui atu i te tau ènata paotū
te i tuu io he puho avaitina moni.
44 Ua tuu âtou i te mea i toe o te nuitina
o to âtou taetae. O īa, me io to īa àì,
ua tuu atu i ta īa taetae paotū.
Ua tuu hoì hua vehine
i te moni utu i te mea kai no te pohoè. »
TOMINIKA E TOÙ ÒNOHUU MA TOÙ
TETAUTINA O TANIERE TE PEROFETA 12, 1-3
1 O au nei o Taniere.
Ua òno au i te teào ta te Fatu i peàu mai :
« I hua ava a tihe mai nei, e tū ai Mikaere,
te hakaìki o te tau anera, te tiaì meitaì o to òe mataèinaa.
He ava hoì o te àì nui.
I te tai tehito, me i te tumu o te tau mataèinaa paotū,
u te e ìte te tau ènata i te mou â
hakatu me hua ava a tihe mai.
2 Atià, e haapohoètia to òe mataèinaa
atii me te tau mataèinaa u patutia to âtou inoa
i òto o te Hāmani o te Etua.
E aa te nuitina o te ènata mamate
e moe aa i òto o te èpo :
E aa tahipito no te pohoè anatu,
e aa tahipito no te hakaìna me te mate anatu.
3 Ma te tau tai a tihe anatu,
e pupuà me he òumati te tau ènata kuhane māàma.
Me he mea i te pō, u keàpa te tau fetū,
atii te tau tuhuna teào te i hakako i te tau ènata
no te pohoè vāàna i te toitoi o te Etua. »
TARAMO 16 (15) 5.8, 9-10, 1b.11
E tu ù Etua e, a tiaì meitaì ia ù.
O to ù hīa io Òe, tu ù vahi maù. 16,1
5 O te Fatu te hope taetae i ìò ia ù.
Io to Òe ìma, e te Fatu e, to ù pohoètina.
8 I mua o to ù mata anatu te Fatu,
Ma to ù kaokao to Īa noho, u haametaù koè au.
9 Ua û i te koakoa to ù kuhane.
U èkaèka to ù tino, ua moe me te moû.
10 Aòè te Fatu e ao e hina au i te matena.
Aòè Īa e avai i to Īa hoa e pē ai io he èpo.
1b E tu ù Etua e, o to ù hīa io Òe, tu ù vahi maù.
11 U aahi mai Òe ma no he aanui o te pohoè,
I mua o to Òe mata te koakoa, te koakoa nui.
Ma to Òe kaokao te èkaèka paona koè.
TETAUTINA O TE HĀMANI I TO HEPEREO 10, 11-14 18
11 I te ava o te Piimau tehito, i tēia â, tēia â,
ua tomo te tau tāuà io he faèpure
no te haapao i te hana pure
me te ùtuna atu i te tau hēana,
hua mea aneiho paotū te â.
E mea à, u te e koàna i hua hēana te hooi i te mikeo.
12 O Ietu Kirito à, he mea kē anatu.
Ia pao to Īa ùtuna atu, e tahi ùtuna anaè,
no te haakoè i te mikeo,
u tānoho Īa i te ìma oko o te Etua no te ava paona koè.
13 U tiaì Īa e tomitia ma àò o to Īa nā vaevae
te tau mana i tōtōua me Īa, te i haapākeka ia Īa.
14 Mēìa i to te Kirito ùtuna hēana e tahi anaè,
u haameitaì èka i te tau ènata ta Īa i haapeàto.
18 Ia koè te tau mikeo,
e koè hoì te ùtuna hēana no te tau mikeo.
ALLELUIA ALLELUIA
Rk.21,36
A matavaa ôtou. A pure paotū te â
etià e tū ai ôtou i te aò o te Tama a te ènata.
EVANERIO O IETU KIRITO VĀÀNA E MAREKO 13, 24-32
U peàu Ietu i to Īa tau kouâ no to Īa tihena.
24 « I tēia mou pō, ma hope o hua ava o te memae nui,
e haapōtanotia te òumati, u te e pupuà te māhina.
25 E topa pu te tau fetū me io he àni.
E neuneue te tau mana o te àni.
26 A tahi a ìtetia te Tama a te ènata e iho aa
i òto o te ao me io he àni me te mana me te kāìè.
27 E pahi atu Īa i te tau anera no te haaputuputu
i te tau ènata vaetia, me io te kēkē o nā metani e fā,
me io te kotiana paona o te fenua,
tihe atu i te kotiana paona o te àni.
28 A tiòhi i te tumuâkau fiko,
a vivo ôtou i tēnei teào haapupuà.
Ia peehū te manamana, ia tupu te àu,
e vivini ôtou u haatata mai te ava o te mei nui.
29 Atii me ia ôtou : ia ìte ôtou i te tau mea peàutia,
a māmaakau ôtou, u haatata mai te paona.
Enā i te avaputa.
30 E teào tiàtohu ta ù nei ia ôtou :
oi naò tēnei tai ènata, enā e tihe mai tēia tau mea.
31 E koè ai te àni, e koè ai me i te fenua,
aòè e koè ta ù tau teào.
32 Atià, a hea e tihe hua pō ? A hea hua ava ?
U te e ìte te ènata e tahi, aòè te tau anera io he àni.
U te e ìte me te Tama aneiho.
O te Motua anaè te i ìte. »
TE KOÌNA O IETU KIRITO TE HAKAÌKI NUI
TETAUTINA O TE PEROFETA TANIERE 7, 13-14
O au nei o Taniere.
13 E tiòhi mau nei au, ua ìte au i te hakatu ènata
e iho ana i òto o te ao me io he àni :
e Tama a te ènata.
Ua tihe Īa io te Kooūa.
U aahitia me te haatata mai i mua o te nohona kāìè.
14 Ua tuutia i hua Tama a te ènata
te mana me te kāìè me te hakaìkitina.
Na Īa te vivini i te tau mataèinaa ia ôtoa
me te tau fenua paotū me te nuitina o te ènata,
èo kē èo kē to âtou.
E mau paona koè to Īa vivinitina,
to Īa hakaìkitina no te tau tai a tihe anatu.
TARAMO 93 (92) 1abc, 1d-2, 5
E Ietu Kirito, te Fatu e, ia Òe te Patirēia me te kāìè.
1 He Hakaìki te Fatu.
U fāfītia me te kāìè.
Ua uhi Īa i te mana.
2 Ua mau te fenua, neue koè.
Ua mau to Òe nohona hakaìki.
Me i òmua naoti ua tū toitoi Òe.
5 Aòè e huìkē to Òe maìmaì.
U haapī to Òe ao tapu i te Hiero.
E te Fatu e, no te tau tai hakatahi.
TETAUTINA O TE HĀMANI APOKARUPO 1, 5-8
O Ietu Kirito te i haatiàtohu i te Etua.
5 O Īa to mua ta te Etua i haatū hakaùa
me i vāvena o te huaa mamate.
O Īa te Hakaìki nui o te tau hakaìki paotū o te fenua vii pu.
Ia Ietu Kirito te i kāòha mai, te i haakoè
i to tātou tau mikeo, ma to Īa ùtuna hēana i uo he peka,
6 te i haaìò ia tātou he mataèinaa,
he papatauà no te tāvini i te Etua, to Īa Motua.
Ia Ietu Kirito hoì te kāìè me te mana
ma te tau tai a tihe anatu. Amene.
7 Eīa, me io he àni, ma òto o te ao, e tihe mai te Kirito.
E ìtetia Īa e te tau ènata kōtoa me te poì te i putaèe ia Īa.
I to Īa aò, e unu me te uēuē te tau mataèinaa paotū. Amene.
8 U peàu te Fatu Etua : « O au te Tumu me te Hiku
te i tū nei, te i tū òmua naoti, te i tihe mai ai, te Mana nui. »
ALLELUIA ALLELUIA
cf. Mk.11,10
A meitaìtia te hakaìkitina o Tavite, to tātou Motua,
te Patirēia o te tau tai hou !
A meitaìtia te tihe nei ma te inoa o te Fatu.
EVANERIO O IETU KIRITO VĀÀNA E IOANE 18, 33-37
I tēia mou pō, u peàu Pinato ia Ietu
33 « Aha, o òe te hakaìki nui o te tau ati Iuta ? »
34 U hua atu Ietu : « Na òe ta òe tenā teào ?
Akoè à na tahipito i peàu mai i ùna o au ? »
35 U peàu Pinato ia Īa : « Aha, he ènata ati Iuta au nei ?
Na to òe mataèinaa me te tau tāuà
i haaìò mai ia òe io ù.
E aha ta òe i hana atu ? »
36 Ua hua atu Ietu ia Īa :
« Aòè me i te ao nei to ù hakaìkitina.
Me he mea me i te ao nei to ù hakaìkitina,
e tōtōua hoì to ù huaatautua,
oa haaìòtia au i te poì ati Iuta.
Atià, aòè hakatu to ù hakaìkitina me to te ao nei. »
37 U peàu Pinato ia Īa :
« No èià, he hakaìki òe ? »
Ua hua atu Ietu ia Īa :
« Na òe i peàu. He hakaìki au.
Oia te tumu o to ù fānautina
me te tihena i te aomāàma nei :
no te haaìte i te mea tiàtohu.
Te ènata i kē me te tiàtohu,
u hakaòno īa i ta ù teào. »