TE TEKAO A TE ETUA NO TE ÈHUA KIRITIANO A - ÈO KĒKĒ ÙNA
TO MUA TOMINIKA O TE AVA TETAÌ
TETAUTINA O TE PEROFETA ITAIA 2, 1-5
1 Oia nei te Teào a te Etua
i te perofeta Itaia i ùna o Ierutaremi.
2 Ma tītahi â, e ìtetia te mea nei :
o te tuaivi i èià te Hiero o te Etua,
e haatiketiketia ma ùna aè o te tau tuaivi hakatahi
me te tau pūkei ia ôtoa.
3 E fifiti io īa te tau faètoa nui.
E titihe io īa te tau mataèinaa paotū e peàu ana :
A pei. A fifiti tātou io te tuaivi o te Fatu,
io he Hiero o te Etua o te ati Iakopo.
E hakako mai Īa i to Īa maìmaì.
E tetaha tātou io to Īa aanui.
Me i ùna o te tuaivi Tiona, ua neke te Ture a Moite.
Me io Ierutaremi, u mevaha te Teào a te Etua.
4 E vivini te Fatu Etua i te tau mataèinaa ia ôtoa.
E haatoitoi te Etua i te teào no te nuitina o te tau ati kē, ati kē.
E kānea âtou i te tau kohetā me he toki keì i te èpo.
Me to âtou tau taatōua, e kānea i te kohe vavee teitā.
Aòè hoì e tōtōua atu tōtōua mai hakaùa te tau mataèinaa.
Aòè e hakakotia hakaùa te hana kape.
5 A mai, e te ati Iakopo, a mai.
A taha tātou io te māàma o te Fatu.
TARAMO 122 (121), 1-2,3-4b,4c-5,6-7,8-9
Ma te koakoa, a pei tātou no te âvei atu me te Fatu.
cf.122,1
1 U koakoa au ia peàutia mai :
« E fiti tātou io te faè o te Fatu. »
2 I tēnei, u hakaēa to tātou tapuvae
I mua o to òe avaputa, e Ierutaremi e.
3 E Ierutaremi e, pāpuafaè ato meitaì tia.
Oia te pāpuafaè o te tūtahitina.
4 Înei e fiti te tau ati o Iraene,
Înei e kātahi mai te tau ati o te Fatu.
Înei e haahuaèkaèka to Iraene,
Me te hahi i te inoa o to īa Fatu.
5 Ua tū înei te tau vivini haatoitoi i te teào,
Te tau hakaìki o te mataèinaa Iraene.
6 A pure ôtou no te haatihe i te moû io Ierutaremi.
A peàu : « A iho te moû i ùna o to òe tau hoa.
7 A noho mau te moû i òto o to òe pāpua,
Me te koakoa i òto o to òe faè hakaìki. »
8 I uē i to ù tau teina me to ù tau hoa,
U peàu au : « Ia òe te moû, e Ierutaremi e. »
9 I uē i te faè o te Fatu, to tātou Etua, U faì au i to ù hīa : A meitaì anatu òe.
TETAUTINA O TE HĀMANI A PAURO PEÀTO I TO ROMA
13, 11-14a
E tu ù tau tunane tuehine.
11 Ua ìte hoì ôtou e aha te hakatu o to tātou tau â.
Ua tihe te ava no te haakoè i te hiamoe.
He mea memao te tau â u aotahi tātou i te haatià.
I tēnei, u haatata mai te ava o to tātou haapohoètina.
12 Ua pao te pō. Oia nei te maùteiao.
A haakoè tātou i te tau hana pē o te pō.
A too i te hāìna toa,
a nahu i te tōua io he àma e pupuà nei.
13 Me he mea a te poì e taha ana i te oatea nui,
a kanahau to ôtou hakatu pohoè.
Umoì te kai oko, te kona hae, te haamako,
te hana faufau, te keitani, te tōtōua.
14 A ìò Ietu Kirito me he hāìna tōua no tātou.
ALLELUIA ALLELUIA
cf.Ta.85,8
E te Fatu e, a haaìte mai i to Òe hakāòha nui.A haaìte mai i to Òe haapohoètina.
EVANERIO O IETU KIRITO VĀÀNA E MATEO 24, 37-44
I tēia mou pō, u peàu Ietu i to Īa tau kouâ pēènei :
37 E ìò te Tihena o te Tama a te ènata
hakatu me te tau â o Noe.
38 I hua tau â, ma mua o te vaiā nui,
ua kai, ua inu te tau ènata,
ua noho te āhana me te vehine, te vehine me te āhana,
tihe atu i te â ua uu Noe i òto o te Àraka.
39 Aòè te tau ènata i ìte e tihe ponihoo
te vaiā nui te i haanaò ia âtou paotū.
Hua mea aneiho hoì i te â e tihe mai te Tama a te ènata.
40 I tēia ava, e hana nā ènata tokoùa i uta, io he taha teitā.
E vaetia tītahi, e avaitia tītahi.
41 Eīa e pioi i te faraoa nā vehine tokoùa.
E vaetia tītahi, e avaitia tītahi.
42 A matavaa ôtou, na te mea aòè ôtou e ìte
afea e tihe mai to ôtou Fatu.
43 A vivini meitaì ôtou.
Me he mea ua ìte te heifaè i te hora o te pō
e tihe mai te ènata kamo, u matavaa īa.
Aòè īa i avai e putaèetia te pā o te faè.
44 No èià, a haapeipei me ia ôtou.
I te ava hoì u te e maakau ôtou,
e tihe mai te Tama a te ènata.
TOMINIKA E ÙA O TE AVA TETAÌ
TETAUTINA O TE PEROFETA ITAIA 11, 1-10
Oia nei te Teào o te Fatu, te Etua.
1 E huì te tumu o Iete, te motua o Tavite.
E hoe to īa aka me te haatupu i te tumu hou.
2 Ma ùna o hua tama, e tau ai te Kuhane o te Etua.
He kuhane māàma me te kuhane vivini,
he kuhane kātoo, me te kuhane ìi oko,
he kuhane tuhuna me te pakaihi i te Etua.
E ìò hoì īa he ènata pakaihi i te Etua.
3 Aòè īa e haavā vāàna i te mea ìtea.
Aòè īa e haatoitoi i te teào vāàna i te mea i peàutia anaè.
4 Atià, e apuu īa me te toitoi i te poì iti noa.
E haavā īa me te toitoi i te tau ènata avai noa.
O to īa teào he tootoo no te haatee i to īa fenua.
O to īa èo he ahi no te haapūovo i te ènata mākaka.
5 Ua tāpītia i te tiàtohu. O te toitoitina to īa takakooi.
6 I hua ava, e noho io he ana e tahi te rupo me te kaiū muto.
E tāfaitia te punua pifa me te kaiū reone.
Na tītahi pōìti e haatee ia âtou.
7 E tāfaitia te uruto pii me te pifa ;
io te pāpua e tahi, ua noho to âtou tau punua.
E kai te reone i te teitā, hakatu me te pifa.
8 E keu pu te tama hou pii o te ùa o te puhifenua tekeo.
E too te tōìki me te ìma i te puhifenua faufau.
9 Ma ùna o tu ù tuaivi tapu, e koè ai te hana pē,
e koè nui me te mea ìno.
Me he mea e tomi te tai i te take o te moana,
atii hoì e haapī te māàma o te Etua i to Īa fenua.
10 I hua â, e tū te huì o te tumu o Iete, te motua o Tavite,
hakatu me he tipa. E vivini īa i te tau mataèinaa.
E kōhoà te nuitina o te tau ati e haapii me īa.
O te kāìè me he faè no īa.
TARAMO 72 (71),1-2,7-8,12-13,17
Eīa a tihe mai te tau â e pupuà te toitoi me te moû.
cf. .72,7
1 E te Etua e, a tuu i to Òe mana i te hakaìki.
A tuu i to Òe toitoi i te tama hakaìki.
2 A vivini īa i to Òe mataèinaa vāàna i te toitoi.
A apuu īa me te toko i te poì veve e uēuē ana.
7 I hua tau â, e pupuà te hakatu pohoè vāàna te toitoi.
I te fenua, e puàha te moû ma te nuitina o te tau māhina.
8 A vivini te hakaìki me io te tai tihe atu i te tai,
Me io te kaavai tihe atu i te kotiàna o te fenua.
12 E haapohoè īa i te ènata veve e vevaò ia īa,
E toko īa i te poì òomitia e te ài.
13 E apuu i te ènata pōtano, mātua avai noa.
E tiòhi meitaì īa i ùna o te poì tupe noa.
17 A haapohoè i to īa inoa to īa tau poopuna.
A ìtetia to īa òno nui ma te tau tai anatu.
Ma to īa inoa, a haameitaìtia te tau ati ènata ia ôtoa.
A hahi ia īa te tau mataèinaa paotū o te fenua.
TETAUTINA O TE HĀMANI A PAURO PEÀTO I TO ROMA
15, 4-9
E tu ù tau tunane tuehine.
4 O te tau teào paotū i patutia òmua io he Hāmani tapu,
u patutia mea haamāàma mai,
etià e tetaì mau tātou i te mea peàutia,
mēià u haaèka me te haatohe mau ia tātou te Hāmani tapu.
5 Koù te Etua, te tumu o te koekoe moû, te koekoe tohe mau,
e vaièi ia ôtou no te haatūtaì atu tūtaì mai
vāàna i ta Ietu Kirito i hakako mai.
6 Ma èià, e haatahi ôtou i te koekoe me te tanitina èo
no te hahi i te Etua, te Motua o to tātou Fatu Ietu Kirito.
7 A apuu atu apuu mai te hoa i te hoa,
me he mea u apuu Ietu Kirito ia ôtou no te haakāìè i te Etua.
8 U peàu hoì au i te mea u aotahi te Kirito
i te Ture o te poì ati Iuta no te haatiàtohu i te teào
ta te Etua i peàu òmua i to tātou tau tupuna.
9 O te tau êteni à, ua hahi âtou i te Etua
mēià i to Īa hakāòha nui.
Oia hoì te mea i patutia, pēènei :
« I vāvena o te tau mataèinaa êteni
e haameitaì au ia Òe, e hahi au i to Òe inoa. »
ALLELUIA ALLELUIA
cf. Rk. 3, 4.6
A kānea ôtou i te aanui o te Fatu. A haamenia i to Īa ava no te puta mai. E ìte te tau ènata paotū i te haapohoètina a te Etua.
EVANERIO O IETU KIRITO VĀÀNA E MATEO 3, 1-12
1 I tēia mou pō, ua tihe Ioane Papetita.
I te fenua ataha no Iutea, u haaìte īa i te teào hou.
2 U peàu īa pēènei :
« A fāìu i te koekoe. U tata èka hoì te Patirēia o te àni. »
3 No īa te teào o te perofeta Itaia te i peàu atu pēènei :
« I te fenua ataha, u taaàu te èo.
A haapei ôtou i te putatina mai o te Fatu.
A haapāàhaaha i to Īa aanui. »
4 Ua uhitia hua Ioane me te kahu huu kamerō.
O te kii puaa to īa takakooi.
Ua kai īa i te tau manu kākaiū me te mānini tikauè fiō.
5 U titihe mai io īa to Ierutaremi, to Iutea ia ôtoa,
to te Fenua Ioritane paotū.
6 U koàna ia âtou te papatema ma io īa
i òto o te vaitahe Ioritane, e faì ana i to âtou tau mikeo.
7 Ua ìte Ioane e titihe mai te tau Fariteo, te tau Tatuteo
i to īa papatema haakoàna mai, u peàu atu ia âtou :
« E te tai ènata tūtū me te puhifenua tekeo,
na ai òa e haaìte ia ôtou no te haamemao
me io te tuki pē ia haatata mai ?
8 A hana ôtou i te hana haatiàtohu i te fāìutina o te koekoe.
9 Umoì ôtou e maakau ua àva te peàu i òto o te koekoe :
« O Aparahamo to mātou motua. »
U peàu au ia ôtou : Me i òto o tēnei tau keâ,
e koàna i te Etua te haatupu i te tau tama o Aparahamo.
10 Enā te toki io te aka o te tumuâkau.
O te tau tumuâkau e hua koè i te puku meitaì,
e kokotitia, e tūtūtia me te ahi.
11 U papatema au ia ôtou i to he vai
etià e fāìu ôtou i te koekoe.
Atià, o te tihe ma hope o au nei, mea mana atu to Īa.
U hei koè au e taki i to Īa aihū.
O Īa te i papatema ia ôtou i to he Kuhane Meitaì me te ahi.
12 Enā io to Īa îima te haìna haaneue i te faraoa
me te haataìtaì i to īa tohua no te kākano.
E haapuke Īa i te kākano i òto o te faè avaina faraoa.
O te kaù e tūtūtia me te ahi e uà paona koè. »
TOMINIKA E TOÙ O TE AVA TETAÌ
TETAUTINA O TE PEROFETA ITAIA 35, 1-6a.10
1 E te fenua ataha, e te fenua moû, a èkaèka òe.
Enā e tāpītia òe me te teitā.
2 A hahi, a taaàu i te koakoa, o òe, e te fenua o te maovai.
E tūtū to òe kāìè me to te tuaivi Ripano te tiketike.
E tūtū to òe tapavaù me to te Fenua Tirone,
to te pūkei Karame.
3 E ìtetia te kāìè o te Etua. E puàha te māàma o te Fatu.
A feòfeò te tau îima momoù, a oko te tau muò pepee.
4 A peàu i te tau ènata kuhane koè :
« Oho te ìi. Umoì e haametaù.
O Īa na to ôtou Etua.
O te Etua aneiho no te huke i te umu.
E tihe nei te Etua no te haapohoè mai. »
5 E tāhakahaka te kikomata o te matapō.
E pepeùtia te puaìna pūtuì.
6 E keepao te ènata vaekoki me he kaiū keukeu.
E taaàu i te koakoa te fafa o te ènata mutu.
10 E hua mai i to âtou fenua tumu te poì haamōèhutia.
O te Fatu Etua to âtou haapohoè.
E tomo âtou i Ierutaremi, e taaàu ana i te koakoa.
E keàpa to âtou mata i te koakoa paona koè.
Me âtou anatu te èkaèka me te koakoa.
E koè nui te uē me te mateteka.
TARAMO 146 (145), 7,8,9ab.10a
E te Fatu e, a mai, a haapohoè mai. cf. It.35,4
7 U haavā Īa me te toitoi i te poì mākakatia.
U vaièi Īa i te oà i te poì mate i te one.
U vevete atu Īa i te poì me io he faèhumu.
8 O te Fatu te i haatāhakahaka i te tau matapō,
O te Fatu te i haaūo i te poì kuhane koè.
O te Fatu te i haataetae i te poì toitoi noa.
9 O te Fatu te vevaò o te tau manihii.
O te Fatu te toko o te vehine pōpī,
Me te tama motua koè, kui koè.
10 E vivini nei te Fatu ma te tau tai anatu.
TETAUTINA O TE HĀMANI A IAKOPO PEÀTO 5, 7-10
7 E tu ù tau tunane tuehine,
e tiaì ana epō e tihe mai te Fatu,
umoì e paòpaò e kuhane koè ôtou.
A kaituto te ènata tanu. U tetaì ia e haatupu i te puku,
i te ava e hei, te tuaèpo ia haakūtaùtia e te ūa.
8 Atii me ia ôtou : a tiaì me te koekoe tohe.
U tata èka hoì te Tihena o te Fatu.
9 Umoì e kōhumuhumu te hoa i te hoa.
Ma èià, aòè ôtou e hakatiotia.
Enā te haavā pii o to ôtou avaputa.
10 E tu ù tau teina e, a hana ôtou hakatu me te tau perofeta
te i haamevaha i te Teào a te Fatu,
e tohe ana, kōhumuhumu koè e aha à te memae
me te tau kōfii e haapaòpaò mai.
ALLELUIA ALLELUIA
cf. Rk .2,76 ; In. 1,7
O Ioane, te perofeta a te Tiketike nui, te i tihe mai no te haapei te aanui o te Fatu me te haatiàtohu i te māàma.
EVANERIO O IETU KIRITO VĀÀNA E MATEO 11, 2-11
I tēia mou pō,
2 i òto o te faèhumu, ua òno Ioane e aha to te Kirito tau hana.
Ua pahi Ioane i nā kouâ o īa no te peàu ia Ietu, pēènei :
3 « O òe tēia e tihe mai ?
Akoè à, e tetaì nei mātou i te ènata kē ? »
4 U haahua atu Ietu ia âtou : « A hee.
A faì atu ia Ioane i te mea ua ìte, ua òno ôtou :
5 U tāhakahaka te kikomata o te poì matapō.
Ua taha te tau vaekoki, u taìtaì te poì kovi,
u pepeùtia te puaìna o te poì pūtuì,
ua tū hakaùa, u pohoè te huaa mamate,
u haaìtetia atu te Teào Meitaì Hou mai i te poì veve.
6 Mamau te ènata aòè e koè to īa haatià mēià ia ù. »
7 E hee ana âtou, u peàu Ietu i te faètoa i te teào o Ioane :
« Ua hee ôtou i te fenua ataha no te ìte e aha ?
No te tiòhi i te kākaho haanevaìtia e te metani ?
8 Ua hee ôtou e tiòhi e aha ?
I te ènata uhitia me te kahu naènaè ?
Enā hoì i òto o te faè hakaìki
te tau ènata tāpītia me te kahu naènaè.
9 No te aha òa ua hee ôtou i te fenua ataha ?
No te haaâvei me te perofeta ? E. Ta ù peàu ia ôtou.
No te ìte i te ènata meitaì aè i te perofeta.
10 I ùna o īa iho, u patutia pēènei :
« Enā e pahi atu au i to ù keèe ma mua o òe,
na īa e kānea i to òe aanui epō o to òe tihe mai. »
11 Ma te tiàtohu ta ù peàu ia ôtou :
I vāvena o te tau ènata i fānautia,
aòè tītahi i tiketike atu ia Ioane Papetita.
Atià, te i iti atu io te Patirēia o te àni,
ua ìò o īa te i tiketike aè ia Ioane. »
TOMINIKA E FĀ O TE AVA TETAÌ
TETAUTINA O TE PEROFETA ITAIA 7, 10-16
10 U pōpahi te Etua ia Itaia te perofeta, io te hakaìki,
o Akata to īa inoa.
U peàu Itaia i te hakaìki pēènei :
11 « A ape òe i tītahi hakatu io te Fatu : e aha à te hakatu,
me io te havaiki oti, me io te àni i ùna oti. »
12 U haahua te hakaìki : « Aòè. U te e haamōtii atu au i te Etua »
13 A tahi a peàu Itaia, te perofeta :
« A haaòno mai, e te ati o Tavite.
Aòè e àva ta ôtou haapaòpaò i te tau ènata ?
E hano ôtou i tēnei e haapaòpaò i tu ù Etua ?
14 Na te Fatu iho e tuu atu ia ôtou i tītahi hakatu.
U ôpū tama te vehine hou virikine, e fānau īa i te tamaòa.
U apatia to Īa inoa o Emanuera.
Oia hoì ma he èo ènata : O te Etua me tātou.
15 U tāfaitia me te mānini tikauè me te vaiū,
tihe e ìte Īa i te titii i te mea pē, te hana i te mea meitaì.
16 Na te mea, ma mua e ìte hua tama te hana i te hana meitaì
me te titii i te mea pē, e viviiō te fenua o nā hakaìki tokoùa
te i haametaù ia òe i tēnei. »
TARAMO 24 (23), 1-2, 3-4ab, 5-6
A tihe mai te Fatu, te Hakaìki pī i te kāìè cf. .24,7.10
1 Na te Etua te aomāàma me to īa taetae paotū,
Te fenua me te tau ènata e noho nei i òto.
2 Na Īa i haatū i te fenua me io te tau vai.
Na Īa i haamau neue koè ma ùna o te tai.
3 O ai te ènata e fiti i ùna o te tuaivi o te Fatu ?
O ai te i koàna e noho io he taha tapu ?
4 Te ènata koekoe taìtaì me te îima piò koè.
Te ènata i vevaò teka koè i te inoa o te Fatu.
5 Me io te Fatu, e ìò mai to īa meitaì.
Me io te Etua, e ìò mai to īa toitoitina.
6 Eīa nei te mataèinaa ìmi i te Fatu.
Oia te poì e ìmi nei i te mata o te Etua.
TETAUTINA O TE HĀMANI A PAURO PEÀTO I TO ROMA
1, 1-7
1 O au Pauro, te tāvini o Ietu Kirito, vaetia no te hana Àpotoro,
tāpaetia mea haamevaha i te Evanerio a te Etua,
2 ta Īa i peàu òmua ma te fafa o te tau perofeta,
vāàna i te Hāmani tapu.
3 O hua Evanerio,
he Teào Meitaì Hou Mai o te Tama o te Etua,
he ènata fānautia me io te ati Tavite.
4 Vāàna e te Kuhane Meitaì te i haapeàto mai,
u haatiketiketia he Tama a te Etua me te mana,
mēià i to Īa tū hakaùa me i vāvena o te huaa mamate,
o Ietu Kirito, to tātou Fatu.
5 Ma io Īa, ua vaièi mai te Etua i te karatia
me te hana Àpotoro o te Kirito,
no te vevaò ma to īa inoa i te poì êteni paotū,
e hakako ia âtou i te aotahi atu i te haatià.
6 O ôtou tahipito vaetia e te Etua no te haatahi me Ietu Kirito.
7 E patu au i tēnei hāmani io ôtou, te i haataetaetia e te Etua,
te mataèinaa peàto e noho nei i Roma.
Ia ôtou te karatia me te moû
me io te Etua to tātou Motua, me io te Fatu Ietu Kirito.
ALLELUIA ALLELUIA
Mt.1,23
« Enā e ôpū tama te Virikine, e fānau ai i te tamaòa. E apatia te inoa o Emanuera. » Oia hoì ma he èo ènata : O te Etua me tātou.
EVANERIO O IETU KIRITO VĀÀNA E MATEO 1, 18-24
18 Oia nei te fānauna o Ietu Kirito.
U tuia te kui o Ietu, o Maria to īa inoa,
me tītahi āhana, o Ioteve te inoa.
Ma mua to âua nohotina, u ôpū tama Maria
na te mana o te Kuhane Meitaì.
19 He ènata toitoi noa Ioteve, ta īa āhana.
Aòè īa e maìmaì e pōtoho pu ia Maria.
No èià, u kaituto īa e titii ia īa ma te ìte koè.
20 Ohia e auana atii Ioteve, ua ìte īa i to he moemoeā,
i te anera o te Fatu te i peàu mai :
« E Ioteve e, te tama a Tavite, umoì òe e haametaù
no te apuu io to òe faè ia Maria, ta òe vehine.
U ôpū tama hoì īa na te mana o te Kuhane Meitaì.
21 E fānau īa i te tamaòa. E apa òe i to īa inoa o Ietu.
O Īa hoì te i haapohoè i to Īa mataèinaa
me i to âtou tau mikeo. »
22 Ua pao tēia tau mea paotū no te haatiàtohu
i te Teào o te Fatu i peàutia e te perofeta, pēènei :
23 « Enā, e ôpū tama te virikine. E fānau īa i te tamaòa.
E apa âtou i to īa inoa o Emanuera. »
Oia hoì ma he èo ènata : O te Etua me tātou.
24 Ua aa Ioteve. U aotahi īa i ta te anera o te Fatu i peàu atu
me to īa apuu i ta īa vehine io to īa faè.
NO TE OÌOÌ O TE KOÌKA NOERE
TATAUÌA O TE PEROFETA ITAIA 62, 1-5
1 I uē ia Ierutaremi, aòè au e mutu.
I uē ia Tiona, aòè e mutu to ù fafa,
tihe e ìtetia to īa toitoi me he pupuà o te atauà,
e keàpa to īa hakatu me he àma pūkohe i te pō.
2 E ìte te tau mataèinaa i to òe toitoi,
e ìte te tau hakaìki i to òe kāìè.
E apa te Fatu ia òe i te inoa hou ta Īa i ìte.
3 E ìò òe me he paèkuà io te ìma o te Etua,
me he heipua kekaa io te ìma o te Fatu,
U te e vevaòtia hakaùa òe « Tāhia titii »,
aòè to òe fenua e vevaòtia « Fenua ataha ».
4 Atià, e apatia to òe inoa « Māùi ».
E apatia to òe fenua « Tu ù hoa mātiri ».
Na te mea, e haataetae te Fatu ia òe.
E ìò te Fatu me he āhana no to òe fenua.
5 Me he mea e noho te māhaì me te vehine hou,
atii e noho me òe te tuhuna i haatū ia òe.
Me he mea o te vehine mātiri hou te koakoa o ta īa āhana,
atii e haaèka òe i to òe Fatu Etua.
TARAMO 89 (88), 20ab.21, 27-28, 29-30
E te Etua e, io Òe anaiho te Tekao e aahi atu io te pohuè anatu.
20 E te Fatu e, òmua u peàu Òe i to Òe tau hoa,
I to he moemoeā, u haaìte atu òe ia âtou :
21 « U koàna ia ù te tāvini, o Tavite te inoa.
U paù au ia īa me te kao tapu. »
27 E peàu mai īa : « O Òe tu ù Etua, tu ù Motua.
O Òe tu ù motukeâ, tu ù Haapohuè. »
28 E haaìò au ia īa he tama hāmua no ù,
Te tiketike nui o te tau hakaìki ia ôtoa.
29 I ùka o īa, e noho mau to ù kāòha, hakahae koè.
Me īa tu ù Piimau no te tau tai hakatahi.
30 E haatū au i to īa vivinitina paona koè.
E mau to īa hakaìkitina ma te tau tai anatu.
TETAUTINA O TE HĀMANI HANA A TE TAU ÀPOTORO
13, 16-17.22-25
16
E tū ana Pauro, u hapai i te ìma me te peàu pēènei à :
« E to Iraene atii me ôtou, e te tau ènana pakaihi i te Etua,
a hakaòno mai.
17 O te Etua o tēnei mataèinaa, te Etua o Iraene,
ua vae i to tātou tau tupuna.
U haanui aè Īa i te mataèinaa oi noho âtou i te Fenua Ekipito.
Ma te mana o to Īa ìma, u haauu i vaho ia âtou.
22 I muì iho, u titii te Etua ia Tauro
me te vae ia Tavite he hakaìki no âtou.
U haameitaì te Etua ia īa e peàu ana :
« U koàna ia ù Tavite, tama a Iete,
o īa te ènana vāàna i to ù hīa, te i aotahi atu i to ù maìmaì. »
23 Me i òto o to īa ati, u haatupu te Etua
ia Ietu, te Haapohoè o Iraene.
24 Òmua atu o to īa tihena,
u haaìte Ioane i te mataèinaa Iraene i te papatema
no te fāìu i te koekoe me te hopo i te mikeo.
25 I te paona o ta īa hana perofeta, u peàu Ioane :
« Aòè o au tēia ta ôtou i māmaakau pu nei.
Enā e tihe ai tītahi ma muì o au ;
aòè e hei ia ù te vevete i to īa aihū. »
ALLELUIA ALLELUIA
Oìoì e hinatia te mikeo io te aomāàma nei. Oìoì e vivini te Haapohoè i te fenua.
EVANERIO O IETU KIRITO VĀÀNA E MATEO 1, 1-25
(Tetau poto 1,18-25)
1 Te hāmani matatetau o Ietu Kirito,
te tama a Tavite, te tama a Aparahamo.
2 U fānau ta Aparahamo o Itaako.
U fānau ta Itaako o Iakopo.
U fānau ta Iakopo o Iuta me to īa tau teina.
3 U fānau ta Iuta o Farete me Fara no òto o Tamara.
U fānau ta Farete o Eteroma.
U fānau ta Eteroma o Arama.
4 U fānau ta Arama o Aminatape.
U fānau ta Aminatape o Naatona.
U fānau ta Naatona o Taremone.
5 U fānau ta Taremone o Poaha no òto o Rahapa.
U fānau ta Poaha o Opete no òto o Ruta.
U fānau ta Opete o Iete.
6 U fānau ta Iete o Tavite te hakaìki.
U fānau ta Tavite o Taromona no òto o te vehine a Uria.
7 U fānau ta Taromona o Ropoama.
U fānau ta Ropoama o Apia.
U fānau ta Apia o Ata.
8 U fānau ta Ata o Iehotafa.
U fānau ta Iehotafa o Iorama.
U fānau ta Iorama o Otia.
9 U fānau ta Otia o Iotane.
U fānau ta Iotane o Akata.
U fānau ta Akata o Etekiata.
10 U fānau ta Etekiata o Manate.
U fānau ta Manate o Amona.
U fānau ta Amona o Iotia.
11 U fānau ta Iotia o Iekoniata me to īa tau teina,
i te ava o te mōèhutina io he Fenua Papironia.
12 Ma muì o te ava i te mōèhutina io te Fenua Papironia,
u fānau ta Iekoniata o Taratiere.
U fānau ta Taratiere o Toropapere.
13 U fānau ta Toropapere o Apiuta.
U fānau ta Apiuta o Eriakimi.
U fānau ta Eriakimi o Atore.
14 U fānau ta Atore o Tatoka.
U fānau ta Tatoka o Akimi.
U fānau ta Akimi o Eriuta.
15 U fānau ta Eriuta o Ereatara.
U fānau ta Ereatara o Matana.
U fānau ta Matana o Iakopo.
16 U fānau ta Iakopo o Ioteve te āhana a Maria.
me i òto o īa i fānautia ai o Ietu te i peàutia te Kirito.
17 No èià e tetautia
ònohuu ma fā tai kē me io Aparahamo tihe atu io Tavite,
ònohuu ma fā tai kē me io Tavite
tihe atu i te ava o te mōèhutina i te Fenua Papironia,
ònohuu ma fā tai kē me i te mōèhutina i Papironia
tihe atu i te Kirito.
18 Oiana te hāmani matatetau o Ietu Kirito.
Oia nei te fānauna o Ietu Kirito.
U tuia te kui o Ietu, o Maria to īa inoa,
me tītahi āhana, o Ioteve te inoa.
Ma mua to âua nohotina, u ôpū tama Maria
na te mana o te Kuhane Meitaì.
19 He ènata toitoi noa Ioteve, ta īa āhana.
Aòè īa e maìmaì e pōtoho pu ia Maria.
No èià, u kaituto īa e titii ia īa ma te ìte koè.
Ohia e auana atii Ioteve, ua ìte īa i to he moemoeā,
i te anera o te Fatu te i peàu mai :
« E Ioteve e, tama a Tavite, umoì òe e haametaù
no te apuu io to òe faè ia Maria, ta òe vehine.
U ôpū tama hoì īa na te mana o te Kuhane Meitaì.
21 E fānau īa i te tamaòa. E apa òe i to īa inoa o Ietu.
Oia hoì ‘’ Te i haapohuè i to īa mataèinaa
me i to âtou tau mikeo. ‘’ »
22 Ua pao tēia tau mea paotū no te haatiàtohu
i te Teào o te Fatu i peàuìa e te perofeta, pēènei :
23 « Enā e ôpū tama te virikine. E fānau īa i te tamaòa.
E apa âtou i to īa inoa o Emanuera. »
Oia hoì ma he èo ènana « O te Etua me tātou ».
24 Ua aa Ioteve. U aotahi īa i ta te anera o te Fatu i peàu atu
me to īa apuu i ta īa vehine io to īa faè.
25 Atià, aòè Ioteve i too ia Maria tihe atu i te fānauna o te tama.
Ua apa Ioteve i to īa inoa « O Ietu ».
TE KOÌNA NOERE
PURE META TŪMOE
TETAUTINA O TE PEROFETA ITAIA 9, 1-6
1 O te mataèinaa e taha ana io te ava pōtano,
ua ìte i te tihena o te māàma pupuà nui.
I ùna o te poì e noho aa io he vao maù nui, u pupuà te àma.
2 Na Òe, e te Etua e, i haanui i te èkaèka :
me he koakoa o te ènata e kohi ana i te puku fenua,
me he koakoa o te tau kape ia tuhatia te tau taetae
o te poì hina ma òto o te tōua.
3 Me he mea ta Òe i haahina i te poì Matiana,
na Òe i fafati te âkau te i òomi i te mataèinaa,
atii te âkau tā a te vivini o te poì hana.
4 Ua èhu nui i te ahi to te tau kape aihū
te i haaneuu i te papafenua,
atii me to âtou kahu pī i te toto.
5 U vaièitia mai tītahi tama hou, e tamaòa i tuutia mai.
O te hakatu hakaìki i ùna o to Īa paufifi.
U apatia to Īa inoa : « Tuhuna mahaò. Etua mana.
Motua paona koè. Hakaìki o te moû. »
6 No èià, e neketia to Īa mana :
Aòè e pao te moû no Tavite me to Īa Patirēia.
E tū mau Īa i òto o te tiàtohu me te toitoi, i tēnei, atii anatu.
Oiana te hana kāòha ta te Fatu o te aomāàma i uē ia mātou.
TARAMO 96 (95), 1-2a, 2b-3, 11-12a, 12b-13a.c
I tēnei pō, ua fānau to tātou Haapohoè. O Īa te Kirito te Fatu. cf. Rk. 2,11
1 A hīmene no te Fatu i te hīmene hou.
A hīmene i te Fatu te fenua vii pu.
2 A hīmene no te Fatu, a hahi i to Īa inoa.
Ma tēia â, ma tēia â,
3 A haaòno nui i to Īa haapohoètina,
A hano a faì atu i te tau mataèinaa,
I te tau ènata paotū to Īa tau hana mahaò.
11 A koakoa te àni i ùna nui.
A èkaèka te fenua ia ôtoa.
A taaàu me te pooìna te moana.
12 A haakoìna, a neue te tau tuaivi.
A haka me te koakoa te maa tumuâkau,
I te aò o te Fatu e taha mai.
13 E tihe te Fatu no te haavā i te fenua.
E toitoi, e tiàtohu to Īa haavātina.
TETAUTINA O TE HĀMANI A PAURO PEÀTO IA TITO
2, 11-14
11
U haaìtetia mai hoì te vaièitina o te Etua.
Oia te tumu e koàna i te tau ènata paotū
te pohoè te io he àni.
12 Na hua karatia e hakako mai
no te titii i te mea haapākeka i te Etua,
te òomi i to tātou hīa kāìè ènata, te pohoè io te ao nei
me te koekoe atenoho, koekoe toitoi, koekoe pure hae.
13 U hakapahi hua karatia ia tātou
no te tetaì i te tetaìtina haakoakoa.
Oia hoì te tihena me te kāìè o Ietu Kirito,
to tātou Etua tiketike me te Haapohoè.
14 U ùtunahēanatia hoì Ietu Kirito i uē ia tātou,
mea hooi i to tātou mikeo me te haataìtaì,
etià e ìò tātou to Īa mataèinaa,
poì koekoe ūo i te hana meitaì.
ALLELUIA ALLELUIA
cf. Rk. 2,10-11
Ua faì atu nei au ia ôtou i te Teào Meitaì Hou haakoakoa : I tēnei pō, u fānautia te Haapohoè. O Īa te Kirito, te Fatu.
EVANERIO O IETU KIRITO VĀÀNA E RUKA 2, 1-14
1 I tēia mou pō, ua tihe te teào me io Ketare Aukuto.
U hakapahi īa i te tau ènata o te aomāàma vii pu
no te patu i to âtou inoa.
2 Oia te patutina inoa to mua,
i te ava ua tū Kirino he kuvenea o te Fenua Ihiria.
3 Ua hee atu te tau ènata paotū no to âtou inoa patu
io to âtou kākaavai me te pāpuafaè tumu.
4 O Ioteve me i Natareti o te Fenua Karirea,
ua fiti i te Fenua Iutea, io te pāpuafaè o Tavite,
o Petereemi te inoa.
Ua tupu hoì Ioteve me io te ati me te huaafaè o Tavite.
5 Ua hano Ioteve i te inoa patu me Maria ta īa vehine,
he ôpū tama ta īa.
6 Ohia i èià âua, ua tihe te ava e fānau ai Maria.
7 U fānau Maria i ta īa tama, he tama hāmua.
Ua fāfī īa me te èpa me te haamoe ia īa i to he fatene,
mēìa aòè he taha e hei no âtou io he faè apuu manihii.
8 Enā i te fenua vii pu mou ènata tiaì muto.
Ua noho âtou io he taha teitā, e matavaa i te pō
no te tiòhi meitaì i to âtou naho muto.
9 U haatata mai io âtou te anera o te Fatu.
U pupuà vii pu o âtou i te kāìè o te Fatu,
ua hemo âtou i te hopo nui.
10 U peàu te anera ia âtou :
« Umoì ôtou e haametaù,
na te mea u faì atu au ia ôtou
i te Teào Meitaì Hou Mai
e haakoakoa nui i te mataèinaa ia ôtoa.
11 I tēnei pō, io te pāpuafaè o Tavite, no ôtou,
u fānautia te Haapohoè. O Īa te Kirito, te Fatu.
12 Eīa tītahi mea hakatu no ôtou :
e koàna ia ôtou te tama hou,
fāfītia me te èpa, e moe ana i òto o te fatene. »
13 Enā pu anamai me te anera
te nuitina o te faètoa te io he àni, tini tini âtou,
e hahi ana i te Etua me te peàu pēènei :
14 « Te kāìè i te Etua i ùna nui.
Te moû io he fenua i te ènata poì tāhia. »
TE KOÌNA NOERE
PURE META PŌPŌUÌ
TETAUTINA O TE PEROFETA ITAIA 62, 11-12
11 Oia nei te teào ta te Fatu
e haamevaha tihe atu i te kotiàna o te aomāàma, pēènei :
« A peàu i te moî a Tiona :
Enā e tihe mai te Haapohoè, e àve ana me Īa
i te tau taetae o to Īa tuàkitina ;
vii pu o Īa te tau taetae haakāìè ia Īa.
12 E apatia ôtou i te inoa hou pēènei :
« Mataèinaa tapu. Poì hokotia e te Fatu. »
E apatia òe iho :
« Vaetia e te Fatu. Pāpuafaè titii koè. »
TARAMO 97 (96) 1.6,11-12
Enā te àma haapupuà i te ènata, ua fānau te Haapohoè.
1 O te Fatu te hakaìki nui. A koakoa te fenua.
A haaèkaèka te tau motu tini, tini.
6 U haamevaha te papafenua i to Īa toitoi noa.
Ua ìte me te mahaò te tau ènata i to Īa kāìè.
11 Enā te àma haapupuà i te ènata teka koè.
Enā me te koakoa i vāvena o te poì haatià.
12 A koakoa ôtou, e te poì aotahi i te Fatu.
A haahuaèkaèka i te inoa o te Fatu Etua.
TETAUTINA O TE HĀMANI A PAURO PEÀTO IA TITO
3, 4-7
4
Atià, u haaìte mai te Etua, to tātou Haapohoè,
i to Īa vaièitina me to Īa kāòha nui no te tau ènata.
5 Na Īa i haapohoè ia tātou, mēìa i to Īa hakāòha mai,
aòè no te vaièi mai i te tuki o to tātou hana meitaì
i hanatia na tātou ta tātou anaè.
Ma te vai, u haafānau hakaùa te Etua ia tātou nei.
I òto o te Kuhane Meitaì,
u haahou Īa i to tātou hakatu pohoè.
6 Na te Etua i haaneke ma te nuitina o hua Kuhane Meitaì
i òto o tātou, ma te inoa o Ietu Kirito to tātou Haapohoè,
7 etià, ma to Īa karatia, e ìò tātou
he tau ènata toitoi i mua o te Etua,
no te koàna mai te pohoè paona koè ta tātou e tetaì mau nei.
ALLELUIA ALLELUIA
Rk.2,14
Te kāìè i te Etua i ùna nui. Te moû io he fenua i te ènata poì tāhia
EVANERIO O IETU KIRITO VĀÀNA E RUKA 2, 15-20
15 Ohia ua pae te tau anera me to âtou hua io he àni,
u peàu atu peàu mai te tau ènata tiaì muto,
te hoa i te hoa :
« A pau. A fifiti tātou i Petereemi no te ìtemata
i te mea i haapaotia vāàna ta te Fatu i haaìte mai. »
16 U titihe haakoi te tau ènata tiaì muto.
U koàna mai ia âtou o Maria, o Ioteve
me te tama hou e moe ana i òto o te fatene.
17 Ia ìte meitaì âtou, ua faì atu i te mea
i peàutia ia âtou i ùna o hua pōìti.
18 Ua pē i te mahaò te tau ènata paotū
te i òno i te teào o te tau ènata tiaì muto.
19 O Maria à, u haamau io he koekoe i tenā tau mea paotū
me te kaituto hae ia âtou.
20 Ua hua te tau ènata tiaì muto.
U haakāìè âtou me te hahi i te Etua
no te tau mea paotū ta âtou i òno me te ìte,
vāàna i te teào i peàutia ia âtou.
PURE META OATEA
TETAUTINA O TE PEROFETA ITAIA 52, 7-10
7 Auē te mea kanahau,
ia tiòhi atu i te keèe e tohuti ana nei ma he tuaivi
no te haaìte atu i te ava o te moû.
Auē, te mea kanahau
ia tiòhi atu i te keèe o te Teào Meitaì Hou Mai,
e haaìte aa i te Pohoè.
E tihe nei īa no te peàu i te pāpuafaè tapu :
« E hakaìki to òe Fatu Etua.
8 A òno ôtou i te èo o te poì tiaì.
Ua tani to âtou vevaòtina. E tahi taa anaè : e taaàu koakoa.
Ua ìtemata âtou i te Fatu e tihe nei i Tiona. »
9 A tātakahiti i te koakoa ôtou,
e te toena o Ierutaremi te i vāvahitia.
Na te mea, u haakoè te Fatu i te uē o to Īa mataèinaa.
Na Īa i haapohoè ia Ierutaremi.
10 U haaìte mai te Fatu i te mana Etua o to Īa ìma
i te tau mataèinaa êteni paotū.
Me i tītahi kēkē tihe toitoi i tītahi kēkē o te fenua,
e ìte âtou i te haapohoètina o to tātou Etua.
TARAMO 98 (97), 1,2-3ab, 3c-4, 5-6
Ua ìte te fenua vii pu i te Haapohoè ta te Etua i tuu mai.
cf. .98,3
1 A hīmene i te Fatu i te hīmene hou.
U mahaò hoì to Īa tau hana.
U tuàki Īa i te mea haapākeka,
Na te mana o to Īa ìma peàto nui.
2 U haaìte te Fatu i to Īa tuàkitina,
U haapupuà i to Īa toitoi i mua o te poì êteni.
3 U haamaakau te Fatu i to Īa kāòha hakahae koè
I uē i te ati o Iraene, to Īa mataèinaa.
Ua ìte te fenua vii pu i to te Etua tuàkitina
4 A hahi i te Fatu, e te fenua vii pu,
A hīmene, a haka, a haakoìna.
5 A haatani i te pū, a vānana i te Fatu,
A ùtu te pahu, a òno nui te Fatu Etua.
6 A ònotia te kitā, te pū hakahau, te pūtoka.
A vānana i te Fatu, to ôtou Hakaìki.
TETAUTINA O TE HĀMANI I TO HEPEREO 1, 1-6
1 I te tai kākiu, ma io te tau perofeta,
u teào mai te Etua ma te tau pona kē, te tau pona kē,
te tau hakatu kē, te tau hakatu kē.
2 I tēnei tau â paona o te aomāàma,
u teào mai te Etua ma io tītahi Tama.
U haaìò te Etua i hua Tama te Fatu o te tau mēmau ia ôtoa ;
ma io Īa, u pēpenatia te tau aomāàma.
3 O tēnei Tama, te ata tokihi i te kāìè o te Etua,
te hakatu tiàtohu èka o te Etua Motua,
e haamau ana i te aomāàma vii pu ma te mana o to Īa teào.
Ia pao to Īa hooi i te tau mikeo,
u tānoho Īa i te ìma oko o te Etua Tiketike,
i ùna nui o te àni.
4 Ua tū Īa ma ùna aè o te tau anera paotū,
mēìa ua apatia te inoa òno nui atu i te inoa o te tau anera.
5 Aòè hoì i peàu te Etua i tītahi anera :
« O Òe tu ù Tama ; i tēnei â, u haafānau au ia Òe. »
U peàu hakaùa :
« E ìò au e Motua no Īa, o Īa nei tu ù Tama. »
6 U peàu hakaùa te Etua
i te ava u pōpahi Īa i te Hāmua io te ao nei :
« A atoratio ia Īa te tau anera o te Etua paotū. »
ALLELUIA ALLELUIA
I tēnei â, u keàpa nui te Māàma o te Etua. E te tau mataèinaa e, a mai no te atoratio atu i te Fatu !
TE TĪMATATINA O TE EVANERIO O IETU KIRITO VĀÀNA E IOANE 1, 1-18. (1, 1-5.9-14.)
1 I te tumu te Teào. Io te Etua te Teào.
He Etua te Teào.
2 I te tumu anamai io te Etua te Teào.
3 Ma io te Teào, te tau mea paotū i pēpenatia.
Umoì Īa, aòè he mea i pēpenatia to te i pēpenatia.
4 I òto o te Teào te Pohoè.
He Māàma no te tau ènata te Pohoè.
5 U pupuà te Māàma io he pōtano,
u haapākeka koè ta te pōtano i te Māàma.
6 Ua ìtetia te ènata ta te Etua i pōpahi mai.
O Ioane to īa inoa.
7 Ua tihe īa no te haatiàtohu i te Māàma,
etià e haatià te tau ènata paotū.
8 Aòè o īa te Māàma. U haatiàtohu īa i te Māàma.
9 Enā te Māàma tiàtohu mea tūìna i te tau ènata paotū,
te i tihe mai i te ao nei.
10 Io te aomāàma te Teào, na Īa i pēpena i te aomāàma :
aòè i ìte to te ao nei ia Īa.
11 Ua tihe mai io to Īa Toitoi. Aòè to Īa i apuu mai.
12 I te poì hakatahi i apuu ia Īa,
ua tuu atu Īa i te mana no te haaìò he tau tama a te Etua.
Oia te poì i haatià ia Īa.
13 O te poì koè na te toto,
koè na te maìmaì tino, koè na te maìmaì ènata,
atià à, na te maìmaì o te Etua i fānautia ai.
14 U haaènatatia te Teào me to Īa noho i vāvena o tātou.
Ua ìte tātou i to Īa Kāìè,
he Kāìè ta te Motua i vaièi atu i ta Īa Tama tootahi,
pī i te karatia me te tiàtohu.
15 U haatiàtohu Ioane ia Īa, e taaàu ana pēènei :
« O īa nei te ènata ta ù i peàu atu :
u meitaì aè ia ù te i tihe ai ma muì o au.
Na te mea òmua atu Īa, epō au nei.
16 Me io to Īa Meitaì nui, u koàna mai ia tātou ôtoa te taetae,
te tau karatia ma hope o te karatia.
17 Ma io Moite, ua tuu mai te Etua i te Ture.
Ma io Ietu Kirito, ua tihe mai te Karatia me te Tiàtohu.
18 Aòè te ènata e tahi i ìte i te Etua.
Na te Tama tootahi, he Etua aneiho Īa, pii me te Motua,
u haaìtetia mai te Etua. »
TE HUAAFAÈ MEITAÌ NO NATARETI
TETAUTINA O TE HĀMANI A PENETIRA 3, 2-6 12-14
2 U haakāìè te Etua i te motua ma òto o ta īa tau tama.
U haamau te Etua i te vivini o te kui i ùna o ta īa tau tama.
3 Ia pakaihi te ènata i to īa motua,
e hooi te Fatu i to īa tau mikeo.
4 Ia pakaihi te ènata i to īa kui, e hakatu īa me te ènata
e haapuke nei i te nuitina o te tau taetae.
5 Ia pakaihi te ènata i to īa motua,
e koakoa īa ma òto o ta īa iho tau tama ;
i te ava e pure īa, e apuutia ta īa pure.
6 Ia pakaihi te ènata i to īa motua,
e òa to īa pohoètina i no he fenua.
Ia aotahi te ènata i te Etua, e haaūo īa i te koekoe o to īa kui.
12 E tu ù tama e, a toko i to òe motua ia kooūa īa.
Aua òe e haauē ia īa i te ava o to īa pohoètina.
13 E aha à u kōea īa, a haataetae atu.
Umoì e haamee i to òe motua.
14 U te e tūhaètia io te Etua i to òe hakāòha
i te motua me te kui.
Mēìa i to òe hakāòha ia âua,
e haameitaì hakaùa te Etua i to òe huaafaè,
ia vāvahitia e te mikeo.
TARAMO 128 (127), 1-2, 3, 4.5bc
Mamau te ènata e noho ana io to Òe faè, e te Fatu e.
Ta. 83,5
1 Mamau te ènata e pakaihi i te Fatu,
E aotahi ana i to te Etua teào.
2 E tāfaitia òe e te hana o to òe îìma :
Mamau òe. A noho te koakoa io òe.
3 Io he faè, ua noho ta òe òna vehine
Hakatu me te tumuvino pī i te tau puku.
Ta òe mou tama vii pu o te tapukai,
E tū ana me he maa tumuâkau oriveti.
4 Oia te taetae e vaièitia ai
I te ènata pakaihi i te Fatu.
E haameitaì ia òe te Etua o Iraene.
5 A òno òe i te koakoa o Ierutaremi tapu
Ma te tau â paotū o to òe pohoètina.
TETAUTINA O TE HĀMANI A PAURO PEÀTO I TO KOROHA
3, 12-21
12 O ôtou, e te poì vaetia e te Etua,
ta Īa i haapeàto, i haataetae,
a uhi ia ôtou me te kahu o te hakatu pohoè :
te koekoe mehea hae, te koekoe haapāpaù,
te koekoe moû me te òomi i te peê.
13 A pakaihi atu, pakaihi mai, umoì te haahaa atu haahaa mai.
A vevete te hoa i te hoa i to īa teka.
Umoì te kōhumu atu kōhumu mai.
Me he mea u haakoè te Fatu i to ôtou tau mikeo,
a haakoè me ia ôtou i te mikeo o te hoa.
14 Tōtahi atu, a kōhoà mau i te koekoe kāòha.
Oia hoì te kuà o te hakatu pohoè te i haatūtaì ia ôtou.
15 A ihi i òto o to ôtou koekoe te moû o Ietu Kirito ;
ma èià, e haaìòtia ôtou he tino e tahi
vāàna i te tumu o to ôtou vaetina.
A haaèka atu, haaèka mai te hoa i te hoa.
16 A noho te teào o Ietu Kirito io to ôtou koekoe
me te nuitina o to Īa meitaì.
A hakako te hoa i te hoa, a oonaì atu, oonaì mai,
vāàna i te māàma tiàtohu.
A hahi i te Etua, e haahuaèkaèka ia Īa, ma te Taramo,
te tau hīmene kē ta te Kuhane Meitaì e haatupu
i òto o te koekoe.
17 O to ôtou hana ia ôtoa me te teào paotū,
a ùtuna atu i te Etua ma te inoa o Ietu Kirito.
Ma io Īa, a haahuaèkaèka ôtou i te Etua, te Motua.
18 O ôtou, e te huaa vehine, a aotahi i ta ôtou āhana,
oia te mea hei ma òto o te Fatu.
19 O ôtou, e te huaa āhana, a haataetae i ta ôtou vehine.
Umoì e haapaòpaò pu, a moû to ôtou hakatu.
20 O ôtou, e te huaa tama,
a aotahi atu i te èo o to ôtou motua me te kui.
Oia te mea haaèka i te Etua.
21 O ôtou, e te tau motua me te tau kui,
umoì e haapeê pu i ta ôtou huaa tama,
oa kuhane koè âtou.
ALLELUIA ALLELUIA
cf. It.45,15
Tiàtohu nui he Etua haapūnana Òe, Etua i vāvena o te tau ènata, Etua haapohoè.
EVANERIO O IETU KIRITO VĀÀNA E MATEO 2, 13-I5 19-23
13 Ia hee atu te tau hakaìki Mākoi,
ua ìte Ioteve io he hiamoe i te anera o te Fatu.
U peàu te anera ia īa : « A aa òe.
A too i te Tama me to īa kui. A hee io te Fenua Ekipito.
A noho i èià tihe atu e haaìte au ia òe,
na te mea ua hano Herote e ìmi i te tama
no te haamate ia īa. »
14 Ua aa Ioteve.
I te pō, ua too īa i te tama me to īa kui.
Ua hee atu io te Fenua Ekipito.
15 Ua noho īa i èià tihe i te matena o Herote,
etià e toitoi te Teào o te Fatu i peàutia e te perofeta :
« U vevaò au i ta ù tama me io he Fenua Ekipito. »
19 I mate nui ai te hakaìki Herote.
E noho aa io te Fenua Ekipito,
ua ìte Ioteve i te anera o te Fatu io he hiamoe.
20 U peàu te anera pēènei :
« A aa. A too òe i te tama me to īa kui.
A taha atu i te fenua o Iraene.
Ua mate hoì te poì i hano e ùumi i te tama. »
21 Ua aa Ioteve. Ua too i te tama me to īa kui.
Ua tihe īa io te fenua o Iraene.
22 Atià, ia òno Ioteve ua ìò te hakaìkitina o te Fenua Iutea
ia Arekerau i te ava o to īa motua,
u haametaù īa e noho io hua Fenua Iutea.
U haamāàmatia e te Etua ma he moemoeā
me to īa hee io te Fenua Karirea.
23 Ua noho Ioteve io he pāpuafaè, o Natareti te inoa,
etià e toitoi te teào i peàutia e te tau perofeta :
« E vevaòtia te ènata no Natareti. »
TE KOÌNA O MARIA PEÀTO, TE KUI O TE ETUA
TETAUTINA O TE HĀMANI A MOITE PEÀUTIA NŪMERA
6, 22-27
22 U peàu te Etua ia Moite :
23 « Oia nei te ponateào ta Aarone e peàu ai,
atii me to īa ati ma te tau tai i ùna aè,
no te haameitaì i te tau tama o Iraene, pēènei à :
24 A haameitaì me te tiaì meitaì te Fatu Etua ia òe.
25 A matavaièi me te haakāòha mai te Fatu Etua ia òe.
26 A tiòhi meitaì te Fatu Etua i ùna o òe.
A tuu atu ia òe i to Īa moû. »
27 Oia te hakatu e vevaòtia tu ù inoa
ma ùna o te tau tama Iraene.
O au à, e haameitaì au ia âtou.
TARAMO 67 (66), 2b.3, 5abd, 7-8b
A matavaièi mai te Fatu ia tātou, a haameitaì mai.
2 A pupuà to Īa mata i ùna o tātou nei.
3 E ìtetia to Òe aanui io te aomāàma vii pu,
To Òe haapohoètina ma te tau fenua paotū.
5 A koakoa te tau mataèinaa, a hīmene âtou.
U vivini hoì Òe i te aomāàma me te toitoi.
U haatee Òe i te tau mataèinaa ma he fenua.
7 Ua hua te fenua i to īa puku,
U haameitaì mai te Etua ia tātou.
8 A pakaihi te fenua vii pu i to īa Fatu.
TETAUTINA O TE HĀMANI A PAURO PEÀTO I TO KARATA
4, 4-7
4 Ia tihe te ava i haaheitia e te Etua,
na Īa i pahi i ta Īa iho Tama
te i fānautia me i òto o te vehine, te i aotahi i te Ture a Moite,
5 mea haapohoè i te tau ènata aotahi ana i te Ture,
me te haaìò ia tātou paotū he tau tama a te Etua.
6 Ohia he tau tama ôtou a te Etua,
ua pahi Īa i te Kuhane Meitaì i òto o ôtou te i taaàu nei :
« E Apa, e tu ù Motua e. »
7 Oia te tumu ua koè to òe hakatu o te ènata
haamōèhutia i te tau kuhane mana o te ao nei.
Ua ìò òe he tama a te Etua. Me he mea e tama òe,
e àva atu hoì i te tau taetae
ta te Etua i tāpae no ta Īa tau tama.
ALLELUIA ALLELUIA
cf. He.1,1-2
Òmua ìka, u teào mai te Etua ma te fafa o to Īa tau perofeta. I tēnei mou pō, u teào te Etua me tātou ma to Īa Tama.
EVANERIO O IETU KIRITO VĀÀNA E RUKA 2, 16-21
I tēia mou pō,
16 u titihe haakoi mai te tau ènata tiaì muto.
U koàna mai ia âtou o Maria, o Ioteve
me te tama hou e moe ana i òto o te fatene.
17 Ia ìte meitaì âtou, ua faì atu i te mea
i peàutia ia âtou i ùna o hua pōìti.
18 Ua pē i te mahaò te tau ènata paotū
te i òno i te teào o te tau ènata tiaì muto.
19 O Maria à, u haamau io he koekoe i tenā tau mea paotū
me te kaituto hae ia âtou.
20 Ua hua te tau ènata tiaì muto.
U haakāìè âtou me te hahi i te Etua
no te tau mea paotū ta âtou i òno me ta âtou i ìte,
vāàna i te teào i peàutia ia âtou.
21 Ia pao e vaù â, ua tihe te ava no te pātehe i te pōìti.
U apatia te inoa o Ietu, vāàna i ta te anera i peàu
ma mua atu i to Īa tuputina.
TOMINIKA E ÙA MA MUÌ O TE KOÌNA NOERE
TETAUTINA O TE HĀMANI A PENETIRA 24, 1-2 8-12
1 Ua hahi te Māàma ia īa iho.
I vāvena ahau o to īa mataèinaa,
to īa haatiketike i te aò o te Etua mana nui,
2 i vāvena o te mataèinaa o te Etua Tiketike : u teào īa.
I mua o te Mana Nui, u haakāìè īa.
8 U teào mai te Etua te i kānea i te tau mēmau ia ôtoa.
O te Etua te i pēpena mai, u peàu i hea te nohona
ta Īa i vae no ù. Pēènei :
« A noho òe i vāvena o te tau tama a Iakopo.
Enā to òe hope taetae i te fenua o Iraene. »
9 I te tumu anamai o te aomāàma nei, òmua naoti,
u pēpena te Etua ia ù.
E tū mau au ma te tau tai a tihe anatu.
10 I òto o te taha tapu, i te aò o te Etua,
u tāvini au ma te haahuaèkaèka.
I te tuaivi Tiona to ù nohotina.
11 I Ierutaremi tu ù noho mau.
U vivini au me te mana i te pāpuafaè tapu.
12 Ua vae au me to ù haatupu i to ù aka io te mataèinaa kāìèa,
te hope taetae ta te Etua i tāpae no Īa,
i vāvena ahau o te motuhaka poì peàto.
TARAMO 147 (147B), 12-13, 14-15, 19-20
U haaènatatia te Teào me to Īa noho i vāvena o tātou.
In.1,14
12 A haakāìè i te Fatu, e Ierutaremi e.
A hahi i to òe Etua, e Tiona e.
13 U haamau Īa i te tau katina o to òe faè.
U haameitaì Īa i ta òe tau tama me te huaafaè.
14 U vaièi Īa i te moû io to òe fenua vii pu.
U tāfai haamaòna ia òe me te faraoa mōmona.
15 U pōpahi te Fatu i to Īa keèe i te fenua vii pu.
Ma te haakoi, u mevaha to Īa teào hou.
19 U haaìte te Fatu i to Īa teào ia Iakopo.
Ua faì i to Īa maìmaì me te Ture ia Iraene.
20 I hea te mataèinaa ta te Etua i haataetae atu ?
Aòè te fenua kē i ìte i to te Etua maìmaì.
TETAUTINA O TE HĀMANI A PAURO PEÀTO I TO EFETIA
1, 3-6 15-18
3 A haameitaìtia te Etua
me te Motua o to tātou Fatu, Ietu Kirito.
Io he àni, i òto o te Kirito, u haameitaì hoì te Etua ia tātou,
ma te haapī mai me te taetae kuhane.
4 Òmua naoti, ma mua to Īa pēpena i te ao nei,
ua vae te Etua ia tātou i òto o te Kirito,
etià e peàto, teka koè tātou i to Īa aò,
e pohoè aa i òto o te kāòha.
5 Ma mua o te pēpena, mēìa i to Īa vaièi anamai,
ua vae te Etua ia tātou, na Īa ta Īa anaè,
etià e ìò tātou he tau tama no Īa, ma io Ietu Kirito.
6 A hahitia te Etua, no to Īa karatia mahaò,
ta Īa i vaièi mai ia tātou, i òto o to Īa Tama tāhia.
15 No èià, me i te ava ua ìte au i to ôtou haatià i te Fatu Ietu,
to ôtou kāòha i te mataèinaa peàto o te Etua,
16 u haahuaèkaèka au mēìa ia ôtou,
e haamaakau ana ia ôtou i òto o ta ù pure.
17 Na te Etua o to tātou Fatu Ietu Kirito,
te Etua Motua o te kāìè nui io he àni,
e vaièi mai i te Kuhane haamāàma ia ôtou,
no te ìte ma te tiàtohu o ai te Etua.
18 Na te Etua e haapuàha i to ôtou koekoe
ma te haavivini i te mea nei : E aha te taetae
ta tātou e tetaì nei mēìa u vevaò mai te Etua ?
E aha te kāìè nui tāpaetia e te Etua no to Īa mataèinaa ?
ALLELUIA ALLELUIA
cf. .1 Tm.3,16
A hahitia Òe, e Ietu Kirito e, te i haaìtetia me te hakatu ènata, te i haaònonuitia i vāvena o te tau mataèinaa, A hahitia Òe !
EVANERIO O IETU KIRITO VĀÀNA E IOANE 1, 1-18
Akoè à 1, 1-5.9-14
1 I te tumu te Teào. Io te Etua te Teào.
2 He Etua te Teào.
I te tumu anamai io te Etua te Teào.
3 Ma io te Teào te tau mea paotū i pēpenatia.
Umoì Īa, aòè he mea i pēpenatia to te i pēpenatia.
4 I òto o te Teào te Pohoè.
He Māàma no te tau ènata te Pohoè.
5 U pupuà te Māàma io he pōtano,
u haapākeka koè ta te pōtano i te Māàma.
6 Ua ìtetia te ènata ta te Etua i pōpahi mai.
O Ioane to īa inoa.
7 Ua tihe īa no te haatiàtohu i te Māàma,
etià e haatià te tau ènata paotū.
8 Aòè o īa te Māàma. U haatiàtohu īa i te Māàma.
9 Enā te Māàma tiàtohu mea tūìna i te tau ènata paotū
te i tihe mai i te ao nei.
10 Io te aomāàma te Teào, na Īa i pēpena i te aomāàma :
aòè to te ao nei i ìte ia Īa.
11 Ua tihe mai io to Īa toitoi. Aòè to Īa i apuu mai.
12 I te poì hakatahi i apuu ia Īa,
ua tuu atu Īa i te mana no te haaìò he tau tama a te Etua.
Oia te poì i haatià ia Īa.
13 O te poì koè na te toto,
koè na te maìmaì tino, koè na te maìmaì ènata,
atià à na te maìmaì o te Etua i fānautia ai.
14 U haaènatatia te Teào me to Īa noho i vāvena o tātou.
Ua ìte tātou i to Īa kāìè,
he kāìè ta te Motua i vaièi atu i ta Īa Tama tootahi,
pī i te Karatia me te Tiàtohu.
15 U haatiàtohu Ioane ia Īa, e taaàu ana pēènei :
« O Īa nei te ènata ta ù i peàu atu :
u meitaì aè ia ù te i tihe ai ma muì o au.
Na te mea, òmua atu Īa, epō au nei.
16 Me io to Īa Meitaì nui, u koàna mai ia tātou ôtoa te taetae,
te tau Karatia ma hope o te Karatia.
17 Ma io Moite, ua tuu mai te Etua i te Ture.
Ma io Ietu Kirito, ua tihe mai te Karatia me te Tiàtohu.
18 Aòè te ènata e tahi i ìte i te Etua.
O te Tama tootahi, he Etua aneiho Īa, pii me te Motua,
u haaìtetia mai te Etua. »
TE KOÌNA EPIFANIA
TETAUTINA O TE HĀMANI O TE PEROFETA ITAIA 60, 1-6
1 A maô, e Ierutaremi e. A pupuà.
Ua tihe mai te àma no te haakeàpa ia òe.
Ua fāfī te kāìè o te Etua ia òe.
2 A tiòhi atu. Ua pō pōtano te fenua vii pu.
Io te vao maù nui, ua noho te tau mataèinaa.
Atià, ua tū te Fatu. E pupuà nei to Īa kāìè i ùna o òe.
3 E haatata mai te tau mataèinaa io to òe Māàma.
E tataha mai te tau hakaìki io to òe atauà.
4 A feau. A tiòhi matiòka vii pu o òe.
E hakātahi mai âtou nui. E titihe nei âtou paotū.
Ua tihe mai nei ta òe tau tama me i te fenua memao.
Ua hua mai ta òe tau moî, e tautuatia âtou.
5 I hua ava e ìte òe, e èkaèka nui òe.
E ù to òe koekoe pī i te koakoa.
E tihe ai io òe te tau taetae me i te fenua memao.
E haapuketia io òe te tau hāìna kē
me io te tau mataèinaa o te aomāàma vii pu.
6 E fifiti mai io òe te tau naho kamerō
o te Fenua Matiana me te Fenua Efa.
E titihe mai io òe te poì Hapa àve aa i ta âtou
monikiki me te mēmau kekaa.
E hahi âtou me te haakāìè i te Fatu Etua.
TARAMO 72 (71), 1-2, 7-8, 10ab.11, 12-13
E ìtetia to Òe haapohoè mai, e te Fatu e, e te tau fenua me te tau mataèinaa paotū. cf. 72,11
1 E te Etua e, a tuu i to Òe mana i te hakaìki.
A tuu i to Òe toitoi i te tama o te hakaìki.
2 A vivini īa i to Òe mataèinaa vāàna i te toitoi.
A apuu īa me te toko i te poì veve e uēuē ana.
7 I hua tau â, e pupuà te hakatu pohoè vāàna i te toitoi,
I te fenua, e puàha te moû ma te nuitina o te tau māhina.
8 A vivini te hakaìki me io te tai tihe atu i te tai,
Me io te kaavai tihe atu i te kotiàna o te fenua.
10 Te hakaìki o te Fenua Tarati, o te tau motu
E àve mai i te vaetukia me te taetae kāòha.
11 E moe haatona i mua o īa paotū te tau hakaìki.
E tāvini no īa te tau fenua me te tau mataèinaa.
12 E haapohoè īa i te ènata veve e vevaò ia īa,
E toko īa i te poì òomitia e te àì.
13 E apuu īa i te ènata pōtano, mātua avai noa.
E tiòhi meitaì īa i ùna o te poì tupe noa.
TETAUTINA O TE HĀMANI A PAURO PEÀTO I TO EFETIA
3, 2-3a.5-6
E tu ù tau tunane tuehine,
2 Ua òno hoì ôtou pēhea, mēìa i to Īa vaièi,
ua tuu mai te Etua i te karatia no te hana i uē ia ôtou.
3 Ma òto o te faìtina me io te Kuhane Meitaì,
u haaìte mai te Etua i to Īa maìmaì hakanā.
5 I te tau tai tehito, aòè te tau ènata i ìte i hua maìmaì hakanā.
Atià i tēnei, ua faìtia atu e te Kuhane Meitaì
i te tau Àpotoro o te Etua me te tau perofeta, pēènei :
6 U koàna mai i te tau êteni te tau taetae kuhane,
peàutia òmua, hua mea aneiho me to te tau ati Iuta.
O âtou nui me he tau hope o te Tino e tahi.
Ia âtou, te poì êteni tūtaì me te tau ati Iuta,
te taetae vaièitia i òto o te Kirito Ietu.
Oia hoì te tau puku o te Evanerio.
ALLELUIA ALLELUIA
cf. Mt.2,2
Ua ìte mātou i to Īa fetū. Ua tihe mātou no te atoratio i te Fatu.
EVANERIO O IETU KIRITO VĀÀNA E MATEO 2, 1-12
1 U fānautia Ietu i te kaavai Petereemi o te Fenua Iutea,
i te ava o Herote te hakaìki o hua fenua.
I hua mou â, u titihe mai i Ierutaremi te mou Mākoi
me io te fenua o te kēkē tihena òumati.
2 U peàu âtou :
« I hea te hakaìki nui o te tau ati Iuta
te i fānau i tēnei tau pō ?
Ua ìte hoì mātou i to Īa fetū
io te fenua o te kēkē tihena òumati.
Ua tihe mātou no te moe haatona i to Īa aò. »
3 Ia òno te hakaìki Herote i hua teào, u emièe īa,
atii me to Ierutaremi ia ôtoa.
4 U haaputuputu mai īa i te tau Tāuà nui paotū
me te tau tuhuna teào o te mataèinaa.
Ua ūi atu Herote ia âtou :
« I te taha hea e fānau ai te Kirito ? »
5 U peàu âtou ia īa :
« I Petereemi io te Fenua Iutea,
vāàna i te mea i patutia e te perofeta :
6 « O òe, e Petereemi o te Fenua Iutea e,
aòè hoì òe he kaavai iti noa i te Fenua Iutea !
Na te mea me io òe e tū ai te hakaìki,
te Tiaì Meitaì o Iraene, to ù mataèinaa. »
7 Ma te teào hakanā, u vevaò mai Herote i te tau Mākoi
me to īa ape ia âtou no te haavivini mai toitoi
inehea i pupuà ai te fetū.
8 U pōpahi Herote ia âtou i Petereemi.
U peàu ia âtou pēènei : « A hee atu ôtou.
A ìmi mamate i te teào i ùna o hua tama hou.
Me koàna ia ôtou te teào, a faì mai ponihoo,
etià e hee me au e pakaihi ia Īa. »
9 U aotahi âtou i te hakaìki me to âtou tataha atu.
Enā te fetū ta te tau Mākoi i ìte òmua io te fenua
o te kēkē tihena òumati, u pupuà i mua o âtou
tihe atu ua tau io te taha i èià te tama hou.
10 E ìte ana i te fetū, u koakoa nui te tau Mākoi.
11 Ua uu âtou i òto o te faè me to âtou ìte
i te tama hou me Maria, to Īa òna kui.
U momoe haatona âtou i to Īa aò.
E too ana i ta âtou taetae, u ùtuna i te vaetukia :
te monikiki, te èpau kekaa, te mira.
12 Ma òto o te hiamoe, u haaìtetia i te tau Mākoi
umoì âtou e hua io te hakaìki Herote.
Ua hua hoì âtou i to âtou fenua ma he aanui kē.
TE KOÌNA O TE PAPATEMA O IETU KIRITO
TETAUTINA O TE PEROFETA ITAIA 42, 1-7
1 O īa nei to ù tāvini, te tāvini ta ù e toko nei.
Ua vaetia e au. O īa tu ù koakoa nui.
U haanoho au i tu ù Kuhane i ùna o īa.
E haaìte īa i te tau mataèinaa i ta ù teào.
2 U te e taaàu īa. Aòè īa e teào me te èo oko.
Aòè e ònotia to īa èo ma no he tohua.
3 Aòè īa e haafati pu i te kākaho ohatia.
Aòè īa e ùumi i te ùiki e auahi ana.
E haatoitoi īa i te teào hakahae koè.
4 Aòè īa e ìi koè. Aòè īa e hina
tihe atu i te ava e aotahi te fenua vii pu
i to ù maìmaì, tihe atu e kōhoà nei te tau motu memao
e haaòno i ta īa teào.
6 O au, te Fatu, te i vevaò ia òe vāàna e te toitoi.
U aahi au ia òe ma te ìma. Ua vae au ia òe.
O òe te tumu o to ù Piimau me to ù mataèinaa.
O òe te Māàma no te tau mataèinaa paotū.
7 E haatāhakahaka òe i te tau matapō.
E vetevete òe i te poì humutia.
E haapohoè òe i te poì haamōèhutia
te i noho nei io te taha pōtano.
TARAMO 29 (28), 1-2, 3ac-4, 3b.9c-10
E te Fatu e, a haameitaì i to Òe mataèinaa, a vaièi atu i te moû. cf. 29,11
A haahuaèkaèka i te Fatu, ôtou e te tau anera.
A haameitaì me te hahi i te mana nui o te Fatu.
A haakāìè i te inoa peàto o te Fatu.
A pakaihi i te Fatu e keàpa nei i te kāìè.
Ua ònotia te èo o te Fatu io he tai.
O te mana o te Fatu i ùna o te tai moana.
Ua ìi oko te èo o te Fatu ;
U haapōnionio Īa me he uià.
O te Etua kāìè nui te i haatani i te fatutii.
Io to Īa Hiero e tahi taaàutina : « Te Kāìè ».
I te ava o te vaiā nui, ua tū te Fatu me te kāìè.
Ua eke te Fatu, o Īa te Hakaìki no te tau tai anatu.
TETAUTINA O TE HANA O TE TAU ÀPOTORO 10, 34-38
34 U pohā te èo o Petero me to īa peàu pēènei à :
« Tiàtohu nui, u apuu te Etua i te tau ènata ôtoa,
e aha à hakatu kē, hakatu kē âtou.
35 I tēia fenua, tēia fenua, u haaèka te ènata i te Etua
ma to īa pakaihi ia Īa me te hana i te hana toitoi.
36 Oiana te teào ta te Etua i haaìte atu ia Iraene,
e haamevaha ana i te Teào Meitaì Hou Mai o te moû,
ma io te Kirito, te Fatu o tātou paotū.
37 Ua ìte ôtou i te mea i haapaotia i te Fenua Iutea vii pu,
i te Fenua Karirea te tīmatatina,
ma muì o te papatema haaìtetia atu e Ioane.
38 Ua ìte ôtou pēhea u haapaù te Etua ia Ietu no Natareti
me te Kuhane Meitaì me te mana.
Ua taha Ietu e hana i te hana meitaì, e haapohoè Īa
i te tau ènata paotū te i haamōèhutia e te Tiaporo.
O te Etua hoì me Ietu.
ALLELUIA ALLELUIA
cf. Mt.3,16-17, Ta.29,3
I tēnei â, u pepeùtia te ataàni. Ua iho mai te Kuhane i ùna o Ietu, ua ònotia te èo o te Motua i ùna o te tai moana nui : « O Īa nei tu ù Tama, tu ù tāhia memae. »
EVANERIO O IETU KIRITO VĀÀNA E MATEO 3, 13-17
13 I tēia mou pō, ua tihe mai Ietu
me i te Fenua Karirea io te kaavai Ioritane, io Ioane,
no te hano i te papatema haakoàna mai ma io īa.
14 Atià, u maìmaì Ioane i te haapākeka e peàu ana :
« Na Òe e papatema ia ù ! Pēhea to Òe tihe mai io ù ? »
15 U haahua Ietu me te peàu : « A avai aneiho.
A hana tāua vāàna i te toitoi noa.
Oia nei te mea e hei. » U avai hoì Ioane ia Īa.
16 Ia papatematia Ietu, ua fiti me io he vai.
Enā, u pepeùtia te àni.
Ua ìte Ietu i te Kuhane Meitaì e iho ana i ùna o Īa,
hakatu me he manu māìta.
17 Enā, u pohā te èo me io he àni.
U peàu īa pēènei : « O Īa nei tu ù Tama tāhia.
Io Īa te tiàtohu o to ù kāòha. »
PŌ E TOÙ TE KOÌNA ÈHUAHI
TETAUTINA O TE HĀMANI A TE PEROFETA IOERE 2, 12-18
12 Oia nei te Teào o te Fatu Etua.
A hua mai ôtou io ù me te koekoe tiàtohu,
ma òto o te haaone, te vaimata me te kahu uē.
13 Aua e veti te kahu.
A fāìu i to ôtou koekoe, me te hua io to ôtou Etua.
He moû, he hakāòha nui te Fatu,
u haatevee i te peê, ua pī nui i te uē,
u haatūhaa Īa i te tuki pē.
14 O ai te i ìte ? E hua ùanei Īa me te moû
no te haakoè i te umu, me te haapī ia ôtou i to Īa vaièi mai.
E koàna ia ôtou te ùtuna atu i te hēana
io te Fatu to ôtou Etua.
15 A haatani i te pū, e Ierutaremi e.
A haaìte i te ava haaone tapu.
A haapei i te koìna pure. A putuputu te motuhaka peàto.
A hakātahi mai i te papa hakaìki me i te tau tuhuna.
A muimui mai te mataèinaa.
A haaputuputu mai te tau tama hou me te tau tōìki.
16 A uu i vaho me io he faè te āhana hou,
i vaho me io to īa pāòto te vehine hou.
A tomo io he faèpure te tau tāuà, tāvini o te Etua.
A pure âtou, a hīmene i te hīmene uē e peàu aa :
« E te Fatu e, a hakāòha mai i to Òe mataèinaa.
17 Aua Òe e ao i te poì êteni
te i haamee me te māio i to Òe mataèinaa.
No te aha e peàu âtou : « I hea to âtou Etua ? »
18 A tahi a tāvaè te Fatu me te hakāòha i to Īa mataèinaa.
TARAMO 51 (50), 3-4, 5-6ab, 12-13, 14.17
E te Etua e, a hakāòha mai, mēìa i to mātou mikeo.
cf. Ta. 51,3
3 E te Etua e, a hakāòha mai.
Mēìa i te nuitina o to Òe uē,
4 A hooi mai me i to ù mikeo.
A haamā i tu ù koekoe pē.
5 Ua ìte au i to ù mikeo.
U maakau anatu au i to ù piò.
6 Ua teka au io Òe aneiho,
I to Òe aò, ua hana au i te mea pē.
12 A pēpena i òto o au nei i te koekoe taìtaì.
A haahou i to ù kuhane, a haamau i to īa meitaì.
13 Umoì e titii atu ia ù memao me io Òe.
Umoì e taki me i òto o au i to òe Kuhane Meitaì.
14 A haakoakoa ia ù to Òe haapohoè mai.
A haamau i te èkaèka io to ù koekoe.
17 E te Fatu, tu ù Etua e, a pepeù i to ù kiinutu,
A tahi a hahi to ù fafa i to Òe kāìè.
TETAUTINA O TE HĀMANI E ÙA I TO KORINETIA 5, 20-6, 2
E tu ù tau tunane tuehine,
20 Ua ìò mātou he tau keèe no te Kirito.
O te Etua iho te i oonaì ia ôtou ma òto o to mātou fafa.
I te inoa o te Kirito, u toutaki mātou ia ôtou :
a ao ôtou e haaâvei te Etua ia ôtou me Īa.
21 Ua piò koè, mikeo koè te Kirito.
Atià, i uē ia tātou, u haatopa te Etua i ùna o te Kirito
i te tuki pē o te mikeo.
Ma èià, i òto o te Kirito, u toitoi mātou nei i mua o te Etua.
6,1 Ohia ua hana mātou me he mou tautua o te Etua,
u toutaki mātou : « Umoì ôtou e avai pu anaè
i te karatia ta te Etua i vaièi mai.
2 Ua patutia hoì ma òto o te Hāmani tapu :
« I te ava e hei, e fati au i to òe hīa ;
i te â haapohoè, e toko au ia òe.
Oia nei te ava e hei, oia hoì te â o te haapohoè. »
TE HĪMENE VĀNANA
Mt. 4,17
U peàu te Fatu : « A fāìu i to ôtou koekoe, u tata èka te Patirēia o te Etua. »
EVANERIO O IETU KIRITO VĀÀNA E MATEO 6, 1-6.16-18
I tēia mou pō, ohia u putuputu mai te tau kouâ
i ùna o te tuaivi vii pu o Ietu, u peàu ia âtou pēènei :
1 « Umoì e aotahi ôtou i to te Etua maìmaì
i te ava enā te tau ènata
e tiòhi ia ôtou me te haakāìè mai.
Me hana ôtou atii, e koè ai to ôtou tuki
me io to ôtou Motua te io he àni.
2 Ia vaièi atu òe i te taetae kāòha,
umoì e hana òe me he mea ta te poì koekoe e ùa
te i haatani i te pū i òto o te tinakoka, i no he tohua,
etià e haakāìè te tau ènata ia âtou.
Ma te tiàtohu to ù peàu ia ôtou, u koàna mai ia âtou te tuki.
3 Ia vaièi atu òe i te taetae kāòha,
aua e ìte to òe ìma aèaè e aha ta te ìma oko i tuu.
4 Ma èià, e hana hakanā to òe vaièitina.
Na to òe Motua te ìte i te mea hakanā,
e haahua mai ia òe. »
5 I te ava e pure ôtou,
aua e hana hakatu me te poì koekoe e ùa.
U koakoa âtou e pure tū ana i òto o te tau tinakoka,
akoè à, io te tau tohua, etià e ìte te tau ènata ia âtou.
Ma te tiàtohu to ù peàu ia ôtou : u koàna mai ia âtou te tuki.
6 O òe, i te ava e hano òe i te pure,
a uu i òto o te pāòto hakanā o te faè, a pā te avaputa,
a pure io to òe Motua te i noho io he taha hakanā.
Na to òe Motua te ìte i te mea hakanā,
e haahua mai ia òe.
16 Me haaone ôtou,
umoì e haaìò i to ôtou mata me he mata uē,
hakatu me te tau ènata koekoe e ùa te i haakē i te mata
etià e mata haaone to âtou i mua o te tau ènata.
Ma te tiàtohu to ù peàu ia ôtou : u koàna mai ia âtou te tuki.
17 O òe â, me haaone òe, a paù i to òe upoo
me te kao kekaa, a hooi i to òe mata,
18 etià u te e ìte te tau ènata e haaone nei òe.
E ìte anaè to òe Motua te i noho io he taha hakanā.
Na to òe Motua te ìte i te mea hakanā,
e haahua mai ia òe. »
TOMINIKA TO MUA O TE AVA HAAONE
TETAUTINA O TE HĀMANI A MOITE PEÀUTIA TENETE
2, 7-9 ; 3, 1-7a
I te tai u pēpena te Fatu Etua i te àni me te fenua,
7 u kānea te Fatu Etua i te ènata me te èpo
ta Īa i taki me io te fenua.
Ua puhi i to Īa ao pohoè i òto o to īa ihu :
ma èià, ua ìò te ènata he mēmau pohoè.
8 Io te Etene, kēkē tihena o te òumati,
u kānea te Fatu Etua i te pāpua.
Ua tuu Īa i te ènata i òto o hua Pāpua Meitaì, ta Īa i kānea.
9 U haatupu te Fatu Etua me io te èpo
i te nuitina o te tau tumuâkau kanahau, pī i te puku mānini.
Enā i vāvena ahau o te Pāpua Meitaì,
te tumuâkau o te Pohoètina me te tumuâkau o te Māàma
te i haaìte i te mea meitaì me i te mea pē.
3,1 I vāvena o te tau ânimara totoo ma no he fenua,
ta te Etua i pēpena,
o te puhifenua te ânimara te i haatukee nui atu.
U peàu te puhifenua i te vehine :
« Aha ma te tiàtohu, oia nei te Teào a te Etua :
Umoì e kai ôùa i te puku o te tau tumuâkau paotū » ?
2 U peàu te vehine i te puhifenua :
« E kai māua i te tau puku o te tau tumuâkau.
3 Atià, u peàu te Etua : umoì e kai māua
i te puku o te âkau i vāvena toitoi o te pāpua.
Umoì māua e haatukia pu. Akoè à e mate nui māua. »
4 U peàu te puhifenua i te vehine :
« Koè nui. Aòè ôùa e mate ai.
5 Ua ìte hoì te Etua :
i te â e kai ôùa, e pepeù ai to ôùa kikomata,
e ìò ôùa hakatu me te tau ètua,
e ìte ana i te mea meitaì me te mea pē. »
6 E tiòhi ana te vehine,
u kaituto īa he puku mānini to te tumuâkau,
u pupuà to īa kanahautina,
u kōhoà hoì e ako no te koàna mai te Māàma.
Ua too īa i te puku me te kai.
Ua tuu i tītahi i ta īa āhana te i tū ma to īa kaokao.
Ua kai me te āhana.
7 A tahi a pepeùtia to âua kikomata
me to âua ìte u kahu koè âua.
Ua àana âua i te àu fiko me te kānea i te hami.
TARAMO 51 (50), 3-4, 5-6ab, 12-13, 14-17
E te Etua e, a hakāòha mai, mēìa i to mātou mikeo.
cf. .51,3
3 E te Etua e, a hakāòha mai.
Mēìa i te nuitina o to Òe uē,
4 A hooi mai me i to ù mikeo.
A haamā i tu ù koekoe pē.
5 Ua ìte au i to ù mikeo.
U maakau anatu au i to ù piò.
6 Ua teka au io Òe aneiho,
I to Òe aò, ua hana au i te mea pē.
12 A pēpena i òto o au nei i te koekoe taìtaì.
A haahou i to ù kuhane, a haamau i to īa meitaì.
13 Umoì e titii atu ia ù memao me io Òe.
Umoì e taki me i òto o au i to Òe Kuhane Meitaì.
14 A haakoakoa ia ù to Òe haapohoè mai.
A haamau i te èkaèka io to ù koekoe.
17 E te Fatu, tu ù Etua e, a pepeù i to ù kiinutu,
A tahi a hahi to ù fafa i to Òe kāìè.
TETAUTINA O TE HĀMANI A PAURO PEÀTO I TO ROMA
5, 12-19 (5, 12.17-19)
E tu ù tau tunane tuehine,
12 no èià, a kaituto tātou pēènei :
Ua tomo te mikeo io te aomāàma nei
na te piò o te ènata e tahi, o Atamo to īa inoa.
Mēìa i te mikeo o hua ènata, ua tihe mai te matena.
Ua neke te matena io te tau ènata hakatahi,
na te mea ua hava te tau ènata hakatahi i te mikeo.
13 Me i òmua naoti, ma mua o te Ture a Moite,
enā te mikeo io te aomāàma.
Atià, mēìa u te e haaìtetia te Ture,
aòè i hakatiotia te tau ènata.
14 Me i te ava o Atamo hoì tihe atu i te ava o Moite,
ua mate nui te tau ènata hakatahi,
e aha à u te e havatia âtou i te mikeo hakatu
me to Atamo, te i pūtuì i te Teào o te Etua.
O Atamo, me he ata e haavivini mai i te ènata e tihe ai.
Atià, he mea kē tītahi, he mea kē tītahi.
15 He mea kē hoì te karatia i vaièitia mai e te Etua,
i òto o te ènata e tahi, o te Kirito Ietu,
he mea kē to Atamo mikeo.
Ma te tiàtohu, mēìa i te mikeo o hua ènata e tahi,
i mate nui ai te nuitina o te ènata.
Atià, u meitaì atu te hakatu o te Etua
no te haaìte mai i to Īa karatia i òto o te Kirito.
Ua neke te vaièitina o te Etua,
tōtahi atu to īa nuitina i ùna o te tau ènata tini, tini.
16 He mea kē to te Etua vaièitina, he mea kē te pē haaneketia
mēìa i te mikeo o te ènata e tahi.
Ma muì o te mikeo o te ènata e tahi,
u haatoitoitia te teào no te hakatio i te ènata mikeo.
Ma muì o te nuitina o to te mikeo,
u vaièitia te karatia no te haatoitoi i te ènata i mua o te Etua.
17 Ma te mikeo o te ènata e tahi,
ua mana te matena i ùna o te tau ènata hakatahi
mēìa i hua ènata e tahi aneiho.
Tōtahi atu, ma io Ietu Kirito, tootahi anaè,
e pohoè me te mana te tau ènata,
te i apuu i te karatia ma te nuitina,
te i haatoitoitia i mua o te Etua.
18 No te haapoto i te teào, pēènei :
Me he mea u hakatio te tau ènata paotū
mēìa i te mikeo o te ènata tootahi,
atii hoì, u haatoitoitia te tau ènata paotū no te pohoè anatu,
mēìa i te hana toitoi o te ènata e tahi.
19 Me he mea u havatia i te mikeo te nuitina o te ènata
mēìa i te ènata e tahi i pūtuì,
hua mea aneiho, u haatoitoitia te nuitina o te ènata
mēìa u aotahi meitaì te ènata e tahi anaè.
HĪMENE VĀNANA :
Mt.4,4
Aòè e pohoè te ènata i te faraoa anaè. E pohoè īa i te teào me io te fafa a te Etua.
EVANERIO O IETU KIRITO VĀÀNA E MATEO 4, 1-11
I tēia mou pō, ma muì o to Īa papatema,
1 ua aahi te Kuhane Meitaì ia Ietu i te fenua ataha,
etià e haamōtiitia e te Tiaporo.
2 U haaone Ietu e fā ònohuu â, e fā ònohuu pō.
Ma hope iho, ua mate Īa i te one.
3 U haatata mai te kuhane haamōtii me to īa peàu atu :
« Ohia he tama òe a te Etua,
a haaìò òe i tēnei mou keâ mea faraoa. »
4 U haahua Ietu me te peàu : « U patutia :
Aòè te ènata e pohoè i te faraoa anaè,
atià i te teào paotū me io te fafa o te Etua. »
5 A tahi a aahi atu te Tiaporo ia Ietu io te Pāpuafaè tapu.
U hapai ia Īa i ùna o te mōuna o te Hiero me te peàu :
6 « Me he mea he tama òe a te Etua, a ketu òe i àò.
U patutia hoì :
« E peàu i to Īa tau anera no te tiaì ia òe.
E amo îima âtou ia òe, oa tukia to òe vaevae me te keâ. »
7 U peàu Ietu ia īa : « U patutia hakaùa :
umoì òe e haamōtii i te Fatu, to òe Etua. »
8 I muì iho, u aahi te Tiaporo ia Ietu
i ùna o te tuaivi tiketike nui.
U haaìte atu i te tau fenua paotū o te aomāàma
me to âtou mēmau haakāìè.
9 U peàu īa : « E tuu atu au i hua tau mēmau paotū
ia òe aneiho, me moe haatona òe
no te pakaihi mai ia ù. »
10 A tahi a peàu Ietu ia īa : « A hee atu òe, e Tatane.
U patutia hoì : A moe haatona i mua o te Fatu,
to òe Etua, a pakaihi ia Īa anaè. »
11 U avai te Tiaporo ia Ietu.
U haatata mai te tau anera me to âtou tāvini ia Īa.
NO TE TOMINIKA E ÙA O TE AVA HAAONE
TETAUTINA O TE HĀMANI A MOITE PEÀUTIA TENETE
12, 1-4a
E noho aa Aparahamo io te Fenua Harane,
1 u peàu te Fatu Etua ia īa : « A titii i to òe fenua.
A titii i to òe huaafaè, i te faè o to òe tau tupuna.
A taha io te fenua ta ù e haaìte atu ia òe.
2 E haaìò au ia òe he mataèinaa nui oko.
E haameitaì au ia òe me te haakāìè i to òe inoa.
A haameitaìtia òe.
3 E haameitaì au i te tau ènata te i pakaihi ia òe.
E haaìno au i te tau ènata te i paha ia òe.
I òto o òe, e haameitaìtia te tau ati paotū o te fenua vii pu. »
4 Ua hee atu Aparahamo me he mea ta te Fatu i peàu ia īa.
Atii, ua hee Roto me īa.
TARAMO 33 (32),4-5, 18-19, 20.22
E te Fatu e, a noho mau to Òe kāòha i ùna o mātou Atii me mātou e tetaì mau i to Òe vaièitina. Ta. 33, 22
4 He toitoi noa te Teào o te Fatu.
U tiàtohu anaè to Īa tau hana paotū.
5 U haataetae Īa i te hakatu toitoi, haakahaè koè.
Ua pī te aomāàma i to Īa tau hana kāòha.
18 Ua toko te Etua i te tau ènata pakaihi ia Īa,
Te poì e tetaì mau i to Īa kāòha mai,
19 U haapohoè ia âtou me io te ìno me te matena,
Te haapohoè i te ava o te ìno me te one nui.
20 O te Fatu te tumu o to tātou pohoè.
O Īa to tātou toko me te vevaò.
22 E te Fatu e, a noho mau to Òe kāòha i ùna o mātou
Atii me mātou e tetaì mau i to Òe vaièitina.
TETAUTINA O TE HĀMANI E ÙA A PAURO PEÀTO IA TIMOTEO 1, 8b-10
E tu ù tama tāhia e,
8 a àva òe i te memae e tahi me au
no te haatiàtohu i te Evanerio,
e toko ana te mana o te Etua ia òe.
9 U haapohoè mai hoì te Etua me to Īa haaìò ia tātou
he mataèinaa peàto no Īa,
umoì mēìa i to tātou tau hana meitaì,
atià, mēìa i to Īa maìmaì aneiho me to Īa karatia.
Òmua na oti, ma mua o te tau tai hakatahi,
u vaièi mai te Etua i hua karatia i òto o te Kirito Ietu.
10 I tēnei, u haapuàha te Etua i hua karatia
ma te haaìtetina o to tātou Haapohoè, te Kirito Ietu.
Ma te Evanerio, u haahina hua Ietu Kirito i te matena
me te haapupuà i te pohoètina hou paona koè.
HĪMENE VĀNANA :
cf. Mt.17,5
Me i òto o te ao tapu, ua tani te èo o te Etua Motua : « O Īa nei tu ù Tama Tāhia nui. A haaòno ôtou ia Īa. »
EVANERIO O IETU KIRITO VĀÀNA E MATEO 17, 1-9
1 I tēia mou pō : ua too Ietu me Īa :
ia Petero, o Iakopo me Ioane to īa teina.
U aahi atu ia âtou i ùna o te tuaivi tiketike i te taha kē.
2 U haahuìkētia Ietu i to âtou aò.
U pōnionio to Īa mata me he òumati.
U keàpa to Īa kahu me he àma.
3 Enā ua ìte nā kouâ ia Moite, ia Eria e teàteào ana me Ietu.
4 U pohā te èo o Petero me to īa peàu atu ia Ietu :
« E te Fatu e, he mea meitaì no tātou înei.
Me maìmaì òe e ato au i înei e toù faèkā :
e tahi no òe, e tahi no Moite, e tahi no Eria. »
5 E teào ana Petero, ua fāfītia âtou e te ao pupuà.
U pohā te èo me io te ao pupuà te i peàu :
« O Īa nei ta ù Tama tāhia. Io Īa te Tiàtohu o to ù Kāòha.
A haaòno ôtou ia Īa. »
6 Ia òno âtou i hua èo,
ua moe haatona te tau kouâ i àò te aò.
Ua pē âtou i te haametaù.
7 Atià, u haatata mai Ietu.
U haatukia ia âtou me te peàu :
« A tū ôtou. Umoì e haametaù. »
8 E feau ana, ua ìte âtou ia Ietu aneiho, tootahi Īa.
9 E iho ana âtou me i ùna o te tuaivi,
u peàu Ietu ia âtou pēènei :
« Umoì ôtou e faì atu i te ènata e tahi
i te ponateào i ònotia, i ìtetia e ôtou,
tihe atu i te Tūhakaùatina o te Tama a te ènata
me i vāvena o te poì mamate. »
TOMINIKA E TOÙ O TE AVA HAAONE
TETAUTINA O TE HĀMANI A MOITE PEÀUTIA EHOTO
17, 3-7
I tēia mou pō, ua noho te tau tama o Iraene
i te fenua ataha io te kaavai peàutia Refitima.
3 Ua mate te mataèinaa i te maovai.
U kōhumuhumu âtou ia Moite e peàu ana pēènei :
« No te aha u aahi òe ia tātou înei i vaho o te Fenua Ekipito ?
Aha, u maìmaì òe e mate nui tātou i te maovai ?
O tātou me ta tātou tau tama, ta tātou tau naho ânimara ? »
4 Ua pure Moite i te Etua, e vevaò ana :
« E te Fatu e, e aha ta ù e hana i uē i te mataèinaa nei ?
Mei ùumi haamate âtou ia ù, e pehi ana me te keâ. »
5 Ua hua te Etua ia Moite : « A taha òe i mua o âtou.
A too me òe i tahipito vivini kooūa o Iraene.
A mau io to òe ìma te tootoo te i tā i te vaitahe Niro.
6 O au ma mua o òe i ùna o te tuaivi Horepe.
E tā òe i te keâ keî. E tahe te vai me te inu te mataèinaa. »
Oiana te hana ta Moite i hana
ma te aò o te tau vivini kooūa o Iraene.
7 Ua apa Moite i te inoa o hua kaavai : « Maha me Meripa. »
Oia hoì ma he èo ènata :
« Kōhumuhumu me te Haahiiveke. »
Na te mea, u kōhumuhumu me te haahiiveke
te mataèinaa Iraene i te Etua, e peàu aa :
« Aha, i vāvena o tātou te Etua ?
Aha, u titii te Fatu Etua ia tātou ? »
TARAMO 95 (94), 1-2, 6-7b, 7d-8a.9
I tēnei â, umoì tātou e taha kē te koekoe ; a apuu tātou i te Teào a te Fatu. cf. 95,8
1 A mai. A hahi tātou me te koakoa i te Fatu,
A haakāìè i to tātou motukeâ, te Haapohoè.
2 E haahuaèkaèka ana a haatata mai tātou io Īa,
E hīmene haakoìna no te hahi i te Fatu.
6 A tomo. A oha. A atoratio ia Īa.
A moe haatona i mua o te Fatu,
Na Īa hoì i pēpena ia tātou.
7 O Īa te Etua, o tātou te mataèinaa
Te naho muto haateetia e to Īa îima.
I tēnei â, aha e apuu ôtou i to Īa teào ?
8 Umoì ôtou e pūtuì me he mea i te fenua ataha ;
9 U haaveke mai to ôtou tau tupuna me te hakaki ia ù,
E aha à ua ìtemata âtou i to ù hana mana.
TETAUTINA O TE HĀMANI A PAURO PEÀTO I TO ROMA
5, 1-2.5-8
E tu ù tau tunane tuehine.
1 Ma to tātou haatià ia Ietu Kirito,
u haatoitoitia tātou i mua o te Etua.
Mēìa i to tātou Fatu Ietu Kirito, e koàna ia tātou
te tū me te koekoe moû i te aò o te Etua.
2 Ma io Ietu Kirito, mēìa i to tātou haatià ia Īa,
ua tomo tātou i òto o te karatia a te Etua,
ta tātou i koàna mai nei,
atii hoì e tetaì nei tātou me te koakoa
te àva atu i te kāìè o te Etua.
5 Aòè e hakahae hua tetaìtina i te ènata.
U vaièitia mai hoì te Kuhane Meitaì.
Na Īa iho e haatiàtohu i òto o tātou i to te Etua kāòha.
6 I te ava he tau ènata koekoe pepee tātou,
ua mate Ietu Kirito i uē i te poì mikeo,
me he mea i haaheitia e te Etua.
7 Aha, e ao tītahi ènata e mate nui
i uē i te ènata koekoe meitaì ?
E fati oti te maakau o tītahi
no te tuu i to īa pohoè i uē i te ènata toitoi.
8 Oiana te mea i haatiàtohu i te nuitina o to te Etua kāòha mai :
ua mate nui te Kirito i uē ia tātou
e aha à he tau ènata mikeo tātou.
HĪMENE VĀNANA :
cf. In. 4,42.15
E te Fatu e, o Òe te Haapohoè o te aomāàma. A vaièi mai i te vai pohoè, etià e koè to mātou mao i te vai.
EVANERIO O IETU KIRITO VĀÀNA E IOANE 4,5-42
(4, 5-15.19b-26.39a.40-42)
I tēia mou pō :
5 Ua tihe Ietu io tītahi pāpuafaè o te Fenua Tamaria,
o Tikara te inoa, pii o te pāio fenua
i tuutia e Iakopo i ta īa tama, o Ioteve te inoa.
6 Enā i èià te punavai : te Punavai o Iakopo, te inoa.
U momoù Ietu mēìa i te òa o te aanui.
U kaapee Īa pii o te punavai.
He oatea nui, ua tū toitoi te òumati.
7 Ua tihe mai te vehine o te Fenua Tamaria mea kapu i te vai.
U peàu Ietu ia īa : « A tuu mai i te vai no te inu. »
8 (Ua hee hoì to Ietu tau kouâ io he pāpuafaè
no te hoko mai i te mea e kai.)
9 U peàu te vehine Tamaria ia Ietu :
« E ènata ati Iuta òe nei. He vehine Tamaria au.
He mea mahaò ta òe i ape mai o te vai no te inu. »
(Aòè hoì e tūtaì te tau ati Iuta me to Tamaria.)
10 U haahua Ietu i te vehine :
« Me ìte òe i te taetae vaièitia e te Etua,
me ìte òe o ai te i ape ia òe : a fāinu mai i te vai,
o òe oti te i ape òmua ia īa i te vai e inu.
Na ù i tuu atu ia òe i te vai pohoè. »
11 U peàu te vehine :
« E te hakaìki e, aòè a òe e ipu no te kapu atu i te vai.
E ùavai hōhonu tēnei.
Pēhea e koàna mai ia òe hua vai pohoè ?
12 Aha, u tiketike atu òe ia Iakopo to mātou tupuna ?
Na īa i tuu mai i tēnei ùavai.
Ua inu īa, ta īa tau tama, me ta īa naho ânimara. »
13 U haahua atu Ietu :
« O te ènata e inu i hua vai nei, e mao hakaùa īa i te vai.
O te ènata e inu i te vai ta ù i tuu atu ia īa,
aòè īa e mate i te maovai.
14 O te vai e tuu atu au ia īa, e ìò ma òto o īa
me he punavai e pupuhi ana he tumu o te pohoè paona koè. »
15 U peàu te vehine ia īa :
« E te hakaìki e, a tuu mai i hua vai
etià e koè tu ù mao i te vai,
etià e koè to ù tihe hakaùa mai i te vai kapu. »
16 U peàu Ietu ia īa :
« A hee atu. A vevaò i ta òe āhana. A hua mai înei. »
17 Ua hua te vehine : » Aòè a ù āhana. »
U peàu Ietu :
« Toitoi ta òe e peàu nei : aòè a òe āhana.
18 Tokoìma āhana ua noho me òe.
O te ènata e noho nei me òe i tēnei, aòè īa e āhana na òe.
He mea tiàtohu ta òe teào. »
19 U peàu te vehine ia Ietu :
« E te hakaìki e, ua ìte hoì au he perofeta òe.
20 U atoratio to mātou tupuna i ùna o tēnei tuaivi.
U peàu ôtou : O Ierutaremi te taha toitoi no te atoratio. »
21 U peàu Ietu ia īa :
« E te vehine, a haatià i tu ù teào.
E tihe te ava aòè ôtou e atoratio i te Motua
i ùna o tēnei tuaivi, akoè à i Ierutaremi.
22 U atoratio ôtou i te mea aòè ôtou i ìte.
U atoratio mātou i te mea ua ìte mātou.
Na te mea, me io te mataèinaa ati Iuta,
u vaièi te Etua i te pohoè.
23 Atià, e tihe te ava, o te ava e hei i tēnei,
e atoratio te tau ènata i te Etua
ma io he kuhane vāàna i te tiàtohu.
Oiana te hakatu o te poì atoratio ta te Motua e maìmaì.
24 He Kuhane te Etua.
O te tau ènata e hano e atoratio,
a atoratio âtou ma io he kuhane, vāàna i te tiàtohu.
25 U peàu te vehine ia Ietu :
« Ua òno au e tihe mai te Metia, te i peàutia te Kirito.
I te ava e tihe mai Īa, e haaìte atu i te tau mea paotū. »
26 U peàu Ietu i te vehine :
« O Au nei te Kirito, o Au te i teào nei me òe. »
27 E teào ana âua tokoùa, ua tihe mai to Ietu tau kouâ.
U mahaò âtou mēìa u teào Ietu me te vehine.
Atià, u te e peàu tītahi i te vehine :
« No te aha e ūi nei òe ia Īa ? »
Aòè e ape tītahi ia Ietu :
« E aha te tumu o to òe teào me Īa ? »
28 U avai te vehine i to īa huevai i èià
me to īa taha atu io he pāpuafaè.
29 U peàu īa i te tau ènata pēènei :
« A mai ôtou me te tiòhi i te ènata te i faì mai
i te hana paotū i hanatia e au. O Īa oti te Kirito. »
30 Ua uu âtou me i òto o te pāpuafaè e hano ia Ietu tiòhi.
31 Atià, o to Ietu tau kouâ, u toutaki ia Īa,
e peàu ana : « E Rapi e, a kai. »
32 U haahua Ietu ia âtou :
« E kai au i te oà u te e ìte ôtou. »
33 U peàu atu peàu mai te tau kouâ :
« Aha na tītahi i àve mai i ta Īa kai ? »
34 U peàu Ietu ia âtou :
« Oia nei tu ù oà :
o te haatae i te hīa o tēia i pahi mai ia ù,
te haapao ònaòna i te hana ta Īa i tuu mai.
35 Aòè à, u peàu ôtou : e fā māhina i toe
enā te ava e hei no te kohi i te puku ?
O au à, u peàu ia ôtou : A feau.
A tiòhi i te pāpua faraoa. U māìta te teitā, ua moô ».
Ua tihe te ava no te kohitina i te puku.
36 I tēnei, o te ènata kohi i te puku,
e koàna mai ia īa te tuki o ta īa hana :
ua kohi hoì īa i te puku no te pohoè paona koè.
E koakoa nātoa te ènata tanu i te kākano
me te ènata kohi i te puku.
37 U toitoi aneiho tēnei teào haapupuà :
Ua tanu te ènata i te kākano, ua kohi te ènata kē i te puku.
38 Ua pahi au ia ôtou e kohi i te puku
me io te pāpua i èià u te e hana ôtou.
U paopao tahipito i te hana, o ôtou te i kohi i te puku. »
39 He mea nui te poì Tamaria me io tēnei pāpuafaè
te i haatià ia Ietu mēìa i te teào o hua vehine i faì atu :
« U peàu mai i te tau hana paotū i hanatia e au. »
40 Ohia ua tihe to Tamaria io Ietu,
u toutaki âtou e noho Īa i òto o to âtou pāpuafaè.
Ua noho Ietu me âtou e ùa pō.
41 He mea nui aè âtou te i haatià ia Ietu
mēìa ua òno âtou i ta Īa teào.
42 U peàu âtou i te vehine pēènei :
« Aòè mātou e haatià ia Īa mēìa i ta òe teào mai.
Ua òno me mātou nei ia Īa.
Ua ìte mātou o Īa te Haapohoè o te aomāàma. »
TOMINIKA E FĀ O TE AVA HAAONE
TETAUTINA O TO MUA HĀMANI A TAMUERA
16, 1.6-7.10-13a
1 U peàu te Fatu ia Tamuera, te perofeta :
« Afea òe e hakaēa i te uēuē ia Tauro ?
U titii au ia īa. Umoì īa e vivini hakaùa ia Iraene.
A fiti òe i Petereemi io te faè o Iete.
Me i vāvena o ta īa tau tama, u koàna mai ia ù te hakaìki.
A too i te hue pī i te kao tapu. A taha atu. »
6 Ia putuputu mai âtou, ua ìte Tamuera
i te tama hāmua, o Eriapa te inoa. U maakau Tamuera :
« O īa hoì te tama i peàutia mai e te Etua
e paù au me te kao tapu. »
7 Atià, u peàu te Fatu ia Tamuera :
« Umoì òe e tiòhi i te ènata ma vaho anaè,
to īa tino poèa. U titii au ia īa.
Aòè te tau ènata e ìte i ta te Etua e tiòhi mau.
U tiòhi te tau ènata i te hakatu ma vaho.
Ua ìte te Fatu i te tiàtohu o te koekoe. »
10 U haatihe mai Iete i mua o Tamuera i ta īa tau tamaòa,
toofitu âtou.
U peàu Tamuera ia Iete :
« Aòè âtou i vaetia e te Etua. » Aha, enā me te tama i toe ? »
11 U peàu Iete : « Oia. Enā e tahi māhaì i toe.
Enā īa e tiaì aa i te naho muto. »
U peàu Tamuera :
« A hano atu. Epō, ia tihe mai īa, a tahi a kai tātou. »
12 U pōpahi Iete i te tueni no te hano atu i hua māhaì.
He upoo kehu to īa me te mata hōata, tama poèa.
U peàu te Fatu : « Oia nei. A paù ia īa me te kao tapu. »
13 Ua too Tamuera i te hue pī i te kao tapu.
Ua paù i te tama i vāvena ahau o to īa tau tuaana.
Me i tēnei â, ua ihi te Kuhane o te Fatu i òto o Tavite.
Ua hua Tamuera i te kaavai Rama.
TARAMO 23 (22), 1-2ab, 2cd-3, 4, 5, 6.
O te Fatu tu ù Tiaì Meitaì, e aha te mea e toe ?
1 O te Fatu to ù Tiaì Meitaì,
E aha te mea e toe ?
2 U aahi mai te Fatu no te hakaēa
Io te pāpua pī i te mutiē hou.
U aahi mai te Fatu io te punavai,
I èià u haahoutia to ù pohoè.
3 U haatee mai Īa ma he aanui toitoi,
No te kāìè o to Īa inoa.
4 No tu ù taha ma he vao maù nui,
Aòè au e haametaù i te ìno.
I èià o Òe me au nei, e te Fatu e.
O to Òe tootoo te i aahi mai me te moû.
5 E te Fatu e, ua tuu mai Òe i te oà
I mua o te tau ènata e haatōtōua mai.
Ua paù Òe i tu ù upoo me te kao.
U haakoakoa mai te hope taetae tuutia mai.
6 Te koakoa me te èkaèka me au nei,
Ma te òa o to ù pohoètina.
E noho au io te faè o te Fatu
Ma te nuitina o to ù tau â.
TETAUTINA O TE HĀMANI A PAURO PEÀTO I TO EFETIA
5, 8-14
E tu ù tau tunane tuehine,
8 O ôtou à òmua, ua noho ôtou i òto o te pō pōtano ;
i tēnei, mēìa ua ìò ôtou he mataèinaa o te Fatu,
ua pohoè ôtou i to he māàma o te oatea.
A hana hoì ôtou i te hana e hei no te poì o te māàma.
9 O te māàma te tumu o te hana meitaì, te koekoe toitoi,
te koekoe tiàtohu hae, vāàna i te maìmaì o te Etua.
10 A ìmi mamate ôtou i te mea haaèka i te Etua.
11 Umoì ôtou e àva atu i te hana tupe noa
o te poì noho i te pō pōtano.
A haapuàha ôtou i to he māàma i hua tau hana.
12 He mea hakaìna te faì atu i te hana hakanā
e hana hua poì ia ìtekoètia âtou e te tau ènata.
13 Atià, me haapuàha te māàma i te tau hana,
e ìte tātou ma te tiàtohu i to âtou hakatu.
Na te mea, e ìò me he māàma te tau hana paotū haapuàhatia.
14 Oia te piò u peàu tītahi pēènei :
« A matavaa òe, te i hiamoe nei.
A aa me i vāvena o te poì mamate.
E haamāàma te Kirito ia òe. »
HĪMENE VĀNANA :
cf. In.8,12
O au te àma o te ao nei. O te ènata e ūtaì ia ù, e koàna ia īa te māàma haapohoè.
EVANERIO O IETU KIRITO VĀÀNA E IOANE 9, 1-41
(9, 1.6.13-17.34-38)
I tēia mou pō :
1 E taha ana Ietu, ua ìte Īa i te ènata matapō me i to īa fānauna.
2 Ua ūiūi atu to Īa tau kouâ pēènei à :
« E Rapi e, na ai te piò i matapō ai tēnei ènata ?
E mikeo no īa to īa, akoè à no to īa motua me to īa kui ? »
3 U peàu Ietu ia âtou :
« Aòè i fānautia matapō mēìa i to īa iho mikeo,
akoè à i te mikeo o to īa motua me to īa kui.
U fānautia matapō hua ènata
etià e ìtetia te hana mana ta te Etua anaè e hana.
4 Oi te pupuà te oatea, u haapao au i te hana
i peàutia mai e Tēia i pahi mai ia ù.
Ia topa te pō, u te e koàna i te ènata e hana i ta īa hana.
5 Ma te òa o to ù noho io te aomāàma nei,
o au te māàma o to te ao nei. »
6 Ia pao hua teào, ua tuha Ietu i to Īa anuanu i ùna o te tuaèpo.
U haakūtaù i te èpo me to Īa anuanu.
Ua paù Īa i te kiimata o te matapō me hua èpokau.
7 U peàu Ietu i te matapō :
« A taha atu me te hooi i to òe kikomata
i òto o te ùavai Tiroe.
(te Pahitia, oia te hakatu o hua inoa ma he èo ènata.) »
Ua hee te matapō. U hooi i to īa kikomata.
I to īa huatina mai, u tāhakahaka to īa kikomata.
8 U peàu te tau ènata tata me īa
atii me tahipito te i ìte ia īa òmua e kaiape ana.
« Aòè à te ènata nei
te matapō e kaapee ana, e kaiape ana ? »
U peàu tahipito : « O īa nei. »
9 U peàu tahipito : « Aòè. O tītahi ènata hakatu me īa. »
Atià, u peàu te matapō ia âtou nui : « O au nei aneiho. »
10 Ua peàpeàu atu te tau ènata pēènei :
« Pēhea te haatāhakahakatia to òe kikomata ? »
11 U haahua atu īa :
« O te ènata i vevaòtia Ietu,
u kānea i te èpokau me to īa paù io tu ù kiimata.
U peàu mai : A hee io te ùavai Tiroe.
A hooi i to òe kikomata. Ua hee au.
U hooi au i te mata. Ua ìte anamai. »
12 U peàu âtou ia īa : « I hea tēnei ènata ? »
Ua haahua atu īa : « Aòè au i ìte. »
13 U aahi âtou io te tau Fariteo i hua ènata te i matapō òmua.
14 I te Tāpati, u kānea Ietu i te èpokau,
no te haatāhakahaka i te kikomata.
15 Ua ūiūi me te tau Fariteo i hua ènata
no te haaìte mai pēhea i tāhakahaka ai to īa kikomata.
U peàu te matapō ia âtou :
« Ua paù Īa i tu ù kiimata me te èpokau.
U hooi au i to ù mata. Ua ìte meitaì au. »
16 U peàu te mou Fariteo :
« Aòè me io te Etua mai tēnei ènata.
Na te mea aòè e aotahi Īa i te ture o te Tāpati. »
Atià, u peàu tahipito :
« Pēhea te koàna i te ènata mikeo
e hana i te hana mana atii ? »
U totohe atu totohe mai âtou.
17 U peàu hakaùa âtou i te matapō :
« O òe iho, e aha to òe maakau
i ùna o te ènata te i haatāhakahaka i to òe kikomata ? »
U peàu īa : « He perofeta hoì. »
18 U te e haatià te tau ati Iuta
u matapō hua ènata òmua me to īa ìte i muì iho.
U aahi mai âtou i te motua me te kui
o hua ènata i haatāhakahakatia te kikomata.
19 Ua ūiūi atu âtou ia âua pēènei :
« O īa nei to ôùa tama te i peàutia e ôùa u fānau matapō ?
Pēhea i tāhakahaka ai to īa kikomata i tēnei ? »
20 Ua haahua atu te motua me te kui ia âtou, e peàu ana :
« Ua ìte toitoi māua,
o ta māua tama tēia te i fānau matapō tia.
21 Aòè māua i ìte pēhea i tāhakahaka ai to īa kikomata.
Na ai oti i haatāhakahaka i to īa kikomata,
aòè māua i ìte. A ūiūi atu ôtou ia īa.
Ua àva to īa èhua. Na īa ta īa e teào atu. »
22 U peàu te motua me te kui atii
mēìa ua hopo âua i te tau hakaìki ati Iuta.
U haatoitoi âtou hoì no te tute i vaho o te tinakoka
i te ènata e haatià i te mea o Ietu te Kirito.
23 Oia te piò i peàu ai te motua me te kui :
« Ua àva to īa èhua. A ūiūi atu ôtou ia īa. »
24 U vevaò hakaùa te tau hakaìki ati Iuta
i te ènata i fānau matapō tia.
U peàu âtou ia īa : « A hahi òe i te Etua.
Ua ìte mātou he ènata mikeo tēnei ènata. »
25 Ua haahua atu te matapō ia âtou :
« Aha he ènata mikeo tēnei ènata, aòè au i ìte.
E tahi mea ta ù i ìte :
òmua, u matapō au ; i tēnei, u tāhakahaka to ù kikomata. »
26 U peàu âtou ia īa :
« E aha ta īa i hana i ùna o òe ?
Pēhea to īa haatāhakahakatia i to òe kikomata ? »
27 Ua haahua atu īa :
« U peàu au ia ôtou i kapo nei. Aòè ôtou i haaòno mai.
No te aha u kōhoà ôtou e òno hakaùa ?
Aha, u maìmaì ôtou e ìò mea kouâ no Īa ? »
28 Ua paha âtou i te ènata matapō òmua, e peàu ana :
« O òe to Īa kouâ. E kouâ mātou no Moite.
29 Ua ìte mātou u teào te Etua me Moite.
Me i hea mai tēnei ènata, aòè mātou i ìte. »
30 U peàu te matapō ia âtou :
« Oia te mea mahaò. Aòè ôtou i ìte no hea mai tēnei ènata.
Atià, na Īa i haatāhakahaka i tu ù kikomata.
31 Ua ìte hoì mātou aòè te Etua e apuu i te pure o te poì mikeo.
U haaòno te Etua i te ènata e pakaihi ia Īa
me te aotahi atu i to Īa maìmaì.
32 Me i te pēpenatina o te aomāàma nei,
aòè i ònotia e tahi ènata i te mea
u haatāhakahaka īa te mata o te i fānau matapō tia.
33 Anoa aòè i pahitia mai tēnei ènata e te Etua,
u te e koàna ia Īa te haapao i tēia hana. »
34 Ua haahua atu âtou ia īa :
« Ua pī òe i te mikeo, me i te â o to òe fānautina.
Umaha to òe vaavō no te hakako ia mātou ? »
Ua tute âtou ia īa i vaho.
35 Ua òno Ietu ua tute âtou i te ènata matapō i vaho.
Ia âvei iho Ietu me īa, u peàu pēènei :
« Aha, u haatià òe i te Tama a te ènata ? »
36 U haahua atu te ènata :
« E te Fatu e, o ai Īa, etià e haatià au ? »
37 U peàu Ietu ia īa :
« Ua ìte òe ia Īa. O au tēnei te i teào me òe. »
38 U peàu īa : « U haatià au, e te Fatu e. »
Ua moe haatona īa i te aò o Ietu.
39 A tahi a peàu Ietu pēènei :
« Ua tihe au io te aomāàma nei no te haapaekē i te tau ènata :
A ìte tāhakahaka te poì matapō. A matapō te poì i ìte. »
40 Ua òno mou Fariteo te i noho pii o Ietu i hua teào.
U peàu âtou : « Aha, he poì matapō me mātou ? »
41 Ua haahua atu Ietu ia âtou : « Anoa i matapō ôtou,
u te e hakatiotia ôtou mēìa i te mikeo.
Atià, no to ôtou peàu : ua ìte mātou,
e hakatiotia ôtou mēìa i to ôtou mikeo. »
TOMINIKA E ÌMA O TE AVA HAAONE
TETAUTINA O TE HĀMANI A EHEKIERE PEROFETA
37, 12-14
12 Oia nei te Teào o te Fatu Etua :
E to ù mataèinaa e, enā e vāvahi au i to ôtou ana tūpāpaù
me te haauu i te tau tūpāpaù i vaho ;
e haahua au ia ôtou io to ôtou fenua tumu.
13 E ìte ôtou o au te Fatu Etua i te ava e pepeù au
i to ôtou ana tūpāpaù me te haauu i vaho ia ôtou nui.
14 E haaihi au i to ù Kuhane i òto o ôtou. E pohoè ôtou.
E noho hakaùa ôtou io to ôtou fenua tumu.
Oia nei to ù teào, oia hoì te mea ta ù e hana ai. »
TARAMO 130 (129), 1-2, 3-4, 5-6ab, 7bc-8
Io te Fatu te kāòha, te haapohoètina hou anatu. 130,3
1 Me i te peteò tu ù taaàu atu,
E te Fatu e, a òno mai i to ù èo.
2 A haaòno meitaì to Òe puaìna,
I te tanitina o to ù pure.
3 Me haamau Òe i te mikeo,
E te Fatu e, na ai te tū aè ?
4 Io Òe te tuutina o te mikeo.
Ua hopo au, e tetaì ana ia Òe.
5 U tetaì tu ù kuhane i te Fatu.
He mea tiàtohu to Īa teào ia ù.
6 Tiàtohu atu, e tetaì to ù kuhane i te Fatu,
I te ènata tiaì, aa i te pō,
I tetaì i te maùteiao.
7 E to Iraene, a tetaì Òe i te Fatu.
Ohia io te Fatu te kāòha,
Te haapohoètina hou anatu.
8 E hoko hakaùa te Fatu ia Iraene,
Me i te nuitina o te tau mikeo.
TETAUTINA O TE HĀMANI A PAURO PEÀTO I TO ROMA
8, 8-11
E tu ù tau tunane tuehine,
8 O te tau ènata e pohoè nei vāàna i te hīa o te tino,
aòè âtou e haaèka i te Etua.
9 O ôtou à, u te e pohoè ôtou vāàna i te hīa o te tino,
atià vāàna i ta te Kuhane i peàu ia ôtou,
me noho te Kuhane o te Etua i òto o ôtou.
Me koè te Kuhane o Ietu Kirito i òto o te ènata,
aòè i haapii hua ènata me te Kirito.
10 Me noho te Kirito i òto o ôtou,
e aha à he tino mate vave to ôtou mēìa i te mikeo,
ua ìò te Kuhane Meitaì te tumu o to ôtou pohoè
mēìa u haatoitoitia ôtou e te Etua.
11 Me noho i òto o ôtou te Kuhane o te Etua,
te i haatū hakaùa ia Ietu me i vāvena o te huaa mamate,
na hua Kuhane te i haatū hakaùa ia Ietu,
e haapohoè i to ôtou tino mate vave.
Oia te hana o te Kuhane te i òto o ôtou.
HĪMENE VĀNANA :
cf. In.11,25-26
E te Fatu e Ietu e, o Òe te Pohoè, o Òe te Haapohoè. O te ènata i haatià ia Òe, aòè īa e mate anatu.
EVANERIO O IETU KIRITO VĀÀNA E IOANE 11, 1-45
(11, 3-7. 20-27. 33b-45)
I tēia mou pō :
1 Enā te ènata hōpī, o Rataro te inoa, i Petania,
te pāpuafaè o Maria me to īa tuaana, o Marata te inoa.
2 O hua Maria, te vehine te i kiini i te kao kekaa i ùna o Ietu,
u hooi īa me to īa òuoho i nā vaevae o Ietu.
O to īa tunane te ènata hōpī, o Rataro te inoa.
3 U pōpahi atu nā tuehine tokoùa i te keèe io Ietu no te peàu :
« E te Fatu e, ua hemo i te mate to òe hoa. »
4 Ia òno Ietu i hua teào, u peàu :
« Aòè tenā memae e haamate nui. E haakāìè īa i te Etua.
Ma èià, e haakāìètia me te Tama a te Etua. »
5 U haataetae Ietu ia Marata, ia Maria to īa teina me Rataro.
6 Atià, ia òno Ietu ua hemo i te mate Rataro,
ua noho Īa e ùa â io hua taha i èià to Īa noho.
7 U peàu Ietu i muì iho i to Īa tau kouâ :
« A pau. A hua tātou io te Fenua Iutea. »
8 U peàu to Īa huaa kouâ ia Īa :
« E Rapi e, i te mou â i pao atu nei, ua hano te tau ati Iuta
e pehi me te keâ no te haamate ia Òe.
I tēnei, e haahua atu Òe i vāvena o âtou ? »
9 Ua haahua atu Ietu :
« Aha, aòè à ònohuu ma ùa hora i te â e tahi ?
Ia taha te ènata i te oatea, aòè e tukia to īa vaevae
na te mea u tūìnatia e te àma o te oatea.
10 O te ènata e taha i te pō pōtano,
u tukia to īa vaevae mēìa aòè he àma o te oatea i òto o īa. »
11 Oiana to Ietu teào. I muì iho, u peàu i to Īa tau kouâ :
« U hiamoe Rataro, to tātou hoa.
Atià, e hano au e haaaa ia īa. »
12 U peàu to Īa tau kouâ : « Me hiamoe īa, e pohoè ai. »
13 U peàu Ietu ua mate nui Rataro.
U vivini âtou i ta Ietu e peàu ana : u hiamoe aneiho Rataro.
14 A tahi a peàu atu Ietu me to Īa haapuàha toitoi :
« Ua mate nui Rataro.
15 U koakoa au mēìa aòè au i èià.
Oia te hana no te toko i to ôtou haatià mai ia ù.
A pau. A hee tātou io Rataro. »
16 A tahi a peàu Toma, o Titimo to īa inoa vevaò,
i tahipito kouâ : « A pau tātou. E tahi matena me Īa. »
17 I te ava ua tihe Ietu i èià, enā Rataro i òto o te ana tūpāpaù.
E fā pō me i te tomitina.
18 Ohia ua tata Petania me Ierutaremi,
me he hope hora me taha vaevae,
19 he mea nui te ati Iuta te i tihe io Marata me Maria,
no te haamaha i to âua mateteka
mēìa ua mate nui to âua tunane.
20 Ia òno Marata enā ua tihe Ietu,
ua uu īa i vaho no te haaâvei me Īa.
E kaapee ana Maria, ua noho īa i òto o te faè.
21 U peàu Marata ia Ietu :
« E te Fatu e, anoa înei Òe, aòè i mate nui tu ù tunane.
22 Ua ìte hoì au e vaièi anamai te Etua ia Òe,
i te tau mea paotū e ape nei Òe io Īa. »
23 U haahua atu Ietu ia Marata :
« E pohoè hakaùa to òe tunane. »
24 U peàu Marata ia Ietu :
« Ua ìte hoì au e pohoè hakaùa īa
i te â paona o te aomāàma nei. »
25 U haahua atu Ietu ia īa :
« O au te i haapohoè hakaùa, o au te tumu o te pohoè.
Me haatià te ènata ia ù,
e aha à ua mate nui īa, e pohoè hakaùa.
26 O te ènata e pohoè nei me te haatià ia ù,
aòè īa e mate anatu. Aha u haatià òe i tēnei teào ? »
27 « Oia, e te Fatu e » te peàu a Marata ia Ietu.
« U haatià hoì au o Òe te Kirito, te Tama a te Etua,
ta te tau ènata e tiaì nei e tihe mai ai io te ao nei. »
28 Ia pao hua teào, ua hee Marata me to īa vevaò
ma he èo hinihini ia Maria, to īa teina.
U peàu īa : « I înei te Tuhuna. U vevaò īa ia òe. »
29 Ia òno Maria i tēnei teào, ua maô anamai.
Ua taha ponihoo īa io Ietu.
30 Aòè Ietu i tihe atu i òto o te pāpuafaè.
Ua noho i hua taha o to Īa âveitina me Marata.
31 O te tau ati Iuta te i noho io he faè me Maria,
ia ìte âtou i to īa maô anamai no te taha atu,
ua hee me âtou ma muì o īa, e peàu ana :
« Ua taha īa mea uēuē i pii he ana tūpāpaù. »
32 Ua tihe Maria i te taha i èià Ietu.
E ìte ana ia Ietu, ua hina pii o nā vaevae o Īa.
U peàu pēènei :
« E te Fatu e, anoa Òe înei, aòè tu ù tunane i mate nui. »
33 Ia ìte Ietu i to īa uē
me te uēuē o te tau ati Iuta ma te kaokao o Maria,
u emièe Īa, u mehea to Īa koekoe.
34 U peàu Īa : « Ua tomitia i hea ? »
I peàu ai âtou : « E te Fatu e, a mai. A tiòhi. »
35 U mateteka Ietu.
36 U peàu te tau ati Iuta : « A tiòhi i te nui o to Īa kāòha. »
37 Atià u peàu tahipito :
« U haatāhakahaka i te kikomata o te ènata matapō.
No te aha u te e koàna ia Īa
te haapākeka i te matena o Rataro ? »
38 U emièe hakaùa Ietu me to Īa tihe i te taha o te tomina.
He ana io he motukeâ. Ua pātia te ana me te keâ.
39 U peàu Ietu : « A huì atu i te keâ. »
U haahua atu Marata, te tuehine o te tūpāpaù :
« E te Fatu e, u piàu. O te fā tēnei o te â me i te tomitina. »
40 U peàu Ietu :
« Aòè à me ta ù i peàu ia òe :
me haatià òe ia ù, e ìte òe i te kāìè o te Etua ? »
41 Ua huìtia te keâ. U feau Ietu me te peàu :
« E tu ù Motua e, u haahuaèkaèka au ia Òe
na te mea u haaòno Òe ia ù.
42 Ua ìte hoì au e haaòno anatu Òe i tu ù hīa ;
atià, u peàu au i tēnei teào, vāàna e haatià
te faètoa vii pu o au nei : na Òe i pōpahi mai ia ù. »
43 Ia pao hua pure, u taaàu Ietu me te èo oko :
« E Rataro e, a uu mai i vaho. »
44 Ua tihe anamai te tūpāpaù i vaho me io te ana,
u humutia me te tapa to īa nā îima me nā vaevae.
U peàu Ietu ia âtou :
« A vevete i te tapa. Avai a taha atu īa. »
45 Ua tihe te tau ati Iuta io Maria.
Ia ìtemata âtou i te hana ta Ietu i hana atu,
he mea nui me i vāvena o âtou te i haatià ia Īa.
TE TOMINIKA MANAMANA TEITĀ
1 - TE TAHATINA PURE ME TE MANAMANA TEITĀ
EVANERIO O IETU KIRITO VĀÀNA E MATEO 21, 1-11
I tēia mou pō ma mua o te Koìna Pakate,
1 u haatata mai Ietu me to Īa tau kouâ i Ierutaremi.
Ia tihe âtou i Petefahe, i te tumu o te tuaivi Oriveti,
ua pahi atu Ietu i nā kouâ tokoùa,
2 e peàu ana ia âua pēènei :
« A hee ôùa io te pāpuafaè i mua nei,
e koàna ponihoo ia ôùa te koivi pūriki i humutia
me to īa punua me īa. A vevete me te aahi mai io ù.
3 Me peàu tītahi ia ôùa i te teào, a haahua atu :
« E hana ta te Fatu me īa. Ponihoo to Īa haahua atu. »
4 Ma èià, e haatoitoitia te teào o te perofeta, pēènei :
5 « A peàu i te moî a Tiona : enā a tihe mai to òe Hakaìki.
He moû to īa hakatu. U piki īa ma ùna o te pūriki,
na te punua pūriki i amo te haìna o te ènata. »
6 Ua hee atu nā kouâ me he mea ta Ietu i peàu ia âua.
7 U aahi mai âua i te koivi pūriki me to īa punua.
U hohoà i to âua kahu uhi pu ma ùna o te pūriki.
A tahi a piki Ietu ma ùna.
8 U auau te faètoa nui i to âtou kahu pu ma no he aanui.
U kokoti tahipito i te tau manamana teitā
no te tuu atu ma no he aanui.
9 U taaàu me te faètoa te i hee i mua,
me te faètoa e taha ana ma muì :
« Òtana ! E te Tama a Tavite e !
A meitaìtia te i tihe nei ma te inoa o te Fatu.
Òtana i ùna nui ! »
10 Ia tomo Ietu i òto o te pāpua Ierutaremi,
u emièe te tiàtohu o te mataèinaa.
U peàu âtou : « O ai òa tēnei ? »
U haahua atu te faètoa :
« O Ietu, te Perofeta, no Natareti, i te Fenua Karirea. »
2- TE PURE META
TETAUTINA O TE PEROFETA ITAIA 50, 4-7
4 Ua tuu mai te Etua, to ù Fatu,
i te èo o te ènata aotahi, te èo o te kouâ.
Ma èià, e koàna ia ù te toko i te ènata kuhane koè.
5 I tēia pōpōuì, i tēia pōpōuì,
u haaaa mai te Teào o te Etua ia ù
etià e òno au me he ènata aotahi, me he kouâ.
6 Na te Etua i pepeù mai i to ù puaìna.
Aòè au e patitoo, aòè au e pūtuì.
Ua tuu au i to ù tua i te tau ènata e tā ia ù.
Ua tuu au i tu ù pāpāìna i te tau ènata
e huhuti i te huu o to ù kumikumi.
Aòè au i pāpua i to ù mata me io te ènata e haamāio mai,
me te tuhā mai i te anuanu io ù.
7 O te Fatu tu ù pātoko. Aòè au e hina.
No èià, u haafeò au i to ù koekoe, me he keâ to ù mata.
Aòè au e hakaìna.
TARAMO 22 (21), 8-9, 17-18a, 19-20, 22c-24a
He ènata toomanu au nei, e te Fatu e, a haapohoè mai.
cf. It.38,16-17
Akoè à
Tu ù Etua e, tu ù Etua e, umaha to Òe titii mai ia ù. 22, 2
8 He ènata toomanu ia tiòhi mai âtou.
U haameemee te poì paotū e neue i te upoo :
9 « U haatià ia i te Fatu, na Īa te haapohoè mai.
O te Fatu to īa hoa, a haapohoè hoì ia īa. »
17 Nui te tau nuhe i muimui vii pu o au nei.
Ua hano tītahi pūpū ènata pē e tuàki ia ù.
18 U tīputaèe âtou i tu ù îima me tu ù vaevae,
U koàna ia ù te tetau i tu ù tau ivi hakatahi.
19 U hopehope âtou i to ù kahu no âtou.
U haakai âtou i to ù kahu uhi pu.
20 E te Fatu e, umoì Òe e haamemao me io ù.
O Òe to ù ìi, a haakoi no te toko mai.
22 U haaòno nui au i to Òe inoa
23 I mua o to ù tau tunane tuehine.
U haahuaèkaèka atu au ia Òe,
I vāvena nui ahau o te motuhaka.
24 A hahi i te Etua, te poì e haatià ia Īa.
TETAUTINA O TE HĀMANI A PAURO PEÀTO I TO FIRIPO
2, 6-11
E tu ù tau tunane tuehine,
6 O te Kirito Ietu hakatu tiàtohu me te Etua.
Aòè Īa e haamau kaikino i te haatūtaì me te Etua.
7 U haakoè pu ia Īa iho e too ana i te hakatu o te tāvini ;
ua ìò Īa hakatu me te tau ènata.
8 E haaènata to Īa, ia tiòhi atu,
u haapāpaù iho ma te aotahi atu,
e aotahi ana tihe i te matena, te matena hoì uo he peka.
9 Oia te tumu i haatiketike anaè ai te Etua ia Īa,
me te apa atu i te inoa ma ùna o te inoa ia ôtoa, ia ôtoa.
10 Etià, ia tani te inoa o Ietu, e noho muò paotū
to te àni, to te fenua, to havaiki.
11 A faì anamai te tau èo paotū :
« He Fatu o Ietu Kirito, no te haakāìè i te Etua Motua. »
HĪMENE VĀNANA
cf. Fi. 2,8-9
U aotahi te Kirito tihe i te matena, te matena uo he peka. Oia te tumu u haatiketike anaè te Etua ia Īa, me te apa atu i te inoa, ma ùna o te tau inoa ia ôtoa.
TETAUTINA O TE AVA MEMAE O IETU KIRITO VĀÀNA E MATEO
26, 14---27, 66 (27, 11-54)
14 Enā tītahi me i vāvena o te Tīònohuu ma tokoùa,
o Iuta Ikariote to īa inoa.
U âvei Īa me te tau Tāuà nui e peàu ana pēènei :
15 D « E aha ta ôtou e tuu mai, ia haaìò atu au ia Ietu ? »
U haatoitoi âtou e toù ònohuu moni māìta.
16 U ìmi hoì Iuta i te ava e hei
no te haaìò atu ia Ietu.
17 I te â tumu o te koìna faraoa haapupuhi koè,
u haatata mai te tau kouâ io Ietu me te peàu :
D « I hea te taha u maìmaì Òe e haapeipei mātou
i te kainamau Pakate ? »
18 U peàu Ietu :
+ « A hee ôtou io te pāpuafaè,
io te ènata, o mea to īa inoa, me te peàu ia īa :
U peàu te Fatu : u tata mai to ù ava.
Io òe e faì au me to ù tau kouâ i te Pakate. »
19 Ua hana te tau kouâ me he mea ta Ietu i peàu ia âtou.
U haapeipei âtou i te kaina Pakate.
20 Ia topa te pō, ua moe io te tapukai
o Ietu me te Tīònohuu ma tokoùa.
21 E kai ana âtou, u peàu Ietu :
+ « Ma te tiàtohu to ù peàu ia ôtou,
enā e haaìò ia ù tītahi me i vāvena o ôtou. »
22 Ua nui to âtou kuhane koè.
U peàpeàu âtou ia Ietu tītahi ma hope o tītahi :
D « O au oti, e te Fatu e ? »
23 U haahua Ietu :
+ « O te ènata e haaìò ia ù,
ua tuu īa i te ìma me au i to he papakai.
24 Enā a hee ai te Tama a te ènata
vāàna i te mea i patutia i ùna o Īa.
Atià, mea ìno te ènata te i haaìò i te Tama a te ènata.
Mea meitaì aè no hua ènata umoì īa i fānautia. »
25 U pohā te èo o Iuta te i haaìò ia Ietu me te peàu :
D « O au oti, e Rapi e ? »
U haahua atu Ietu :
+ « Na òe i peàu. »
26 Atià, e kai ana âtou, ua too Ietu i te faraoa,
u haahuaèkaèka, ua vahi
me te tuu atu i te tau kouâ e peàu ana :
+ « A too ôtou, a kai. O to ù tino tēnei. »
27 I muì iho, ua too Īa i te ipu, u haahuaèkaèka
me te tuu atu ia âtou, e peàu ana :
28 + « A inu ôtou paotū, na te mea o to ù toto tēnei,
te toto o te Piimau, te i tahe aè no te poì nui
mea haakoè i te tau mikeo.
29 O ta ù i peàu ia ôtou : aòè au e inu hakaùa
i te puku o te tumuvino tihe i te â
e inu au me ôtou i te vino hou
i to he Patirēia o to ù Motua. »
NO IETU E HAAÌTE I TO TE TAU ÀPOTORO TITIITINA
30 U kāhua âtou i te hīmene taramo.
I muì iho, ua fiti âtou io he tuaivi Oriveti.
31 I hua ava, u peàu Ietu ia âtou :
+ « I tēnei pō, e titii ôtou paotū ia ù.
Ua patutia hoì : E tā au haamate i te tiaì muto,
me te tavavā atu o te naho muto.
32 Atià, ia tū hakaùa au,
e fiti au ma mua o ôtou i te Fenua Karirea. »
33 U pohā te èo o Petero me te peàu :
D « E aha à u titii âtou paotū ia Òe, o au nei aòè, koè nui. »
34 U haahua atu Ietu ia īa :
+ « Ma te tiàtohu to ù peàu ia òe, i tēnei pō,
ma mua e tani te moa, e titii òe ia ù, e toù titiitina. »
35 U peàu Petero :
D « E aha à e mate nui au me Òe,
koè nui e titii au ia Òe. »
O hua teào ta te tau kouâ paotū.
NO IETU E PURE ANA IO HE PĀPUA KEHEMANI
36 Ua tihe Ietu me to Īa tau kouâ io tītahi pāpua,
o Kehemani to īa inoa.
U peàu Īa i te tau kouâ :
+ « A nonoho ôtou înei.
E hee atu au i èià no te pure. »
37 Ua too Ietu me Īa ia Petero me nā tama tokoùa a Hepetaia,
Ua hemo Īa i te kuhane koè me te uē òomi menava.
38 U peàu Ietu ia âtou :
+ « Mei mate au i te kuhane koè.
A nonoho ôtou înei, a matavaa me au. »
39 Ua taha atu Īa ma te ava poto.
Ua topa Īa i àò te aò io he tuaèpo,
e pure ana me te peàu :
+ « E tu ù Motua e, me koàna ia Òe,
a haamemao me io ù i te ipu memae nei.
Atià, umoì me he mea ta ù i maìmaì.
A tae to Òe maìmaì. »
40 Ua hua Ietu io te tau kouâ
me to Īa ìte ia âtou e hiamoe ana.
U peàu Ietu ia Petero :
+ « Atii to òe aa me au ?
U te e koàna ia ôtou te matavaa e tahi hora me au ?
41 A matavaa, a pure, oa hemotia ôtou i te mōtii.
He mea ūo te maìmaì o te ènata ;
atià, u pepee to īa koekoe. »
42 Ua hee Ietu hakaùa, o te ùa tēnei.
Ua pure Īa pēènei :
+ « E tu ù Motua e,
me koàna koè e haamemao me io ù
i te ipu memae nei, a tae to Òe maìmaì. »
43 Ua tihe Ietu hakaùa me to Īa ìte
i te tau kouâ e hiamoe ana, mēìa u matakaù âtou.
44 U avai Ietu ia âtou.
E hee ana hakaùa, ua pure Īa, o te toù tenā.
U peàu iho me hua tau ponateào.
45 U haatata mai Ietu io te tau kouâ
me to Īa peàu ia âtou :
+ « I tēnei, a hiamoe ôtou, a hakaēa.
Enā, u tata èka te ava e haaìòtia te Tama a te ènata
i te îima o te poì mikeo.
46 A aa ôtou. A pau. U haatata mai te i haaìò ia ù. »
NO TE HUMUTINA O IETU
47 Aòè i pao èka to Ietu teào, ua tihe mai Iuta,
tītahi me i vāvena o te Tīònohuu ma tokoùa kouâ.
Ua tihe me īa te faètoa nui e àve ana
i te tau kohetā me te tau pooâkau.
Ua pahitia âtou e te tau Tāuà nui
me te tau kōkooūa o te mataèinaa.
48 O te ènata e haaìò ia Ietu,
u haatoitoi me âtou i te hakatu e peàu ana, pēènei :
D « O te ènata e honi au, o Īa na, a humu ôtou ia Īa. »
49 A tahi a haatata mai Iuta io Ietu.
U peàu īa :
D « Kāòha, e Rapi e. »
Ua honi mau ia Īa.
50 U peàu Ietu :
+ « E to ù hoa, e aha ta òe nei ? »
E haatata mai âtou io Ietu, u popoì me te humu ia Īa.
51 Enā me tītahi o te poì kē me Ietu, e too ana i to īa kohetā,
ua tā i te tueni o te Tāuà nui.
Ua motu to īa puaìna.
52 U peàu Ietu ia īa :
+ « A tuu iho i to òe kohetā io to īa vahi,
na te mea, o te tau ènata paotū
e too i te kohetā, e mate âtou na te kohetā.
53 E aha to òe maakau ?
Aòè à e koàna ia ù te vevaò i to ù Motua ?
E pahi anamai Īa no te toko mai ia ù
ònohuu ma ùa pūpū anera, tōtahi atu te nuitina.
54 Pēhea te haapao te mea i patutia io te tau Hāmani tapu ?
Vāàna e âtou atii te mea paotū. »
55 I hua ava, u peàu Ietu i te faètoa, pēènei :
+ « He ènata mākaka au nei ?
No te aha ua tihe mai ôtou no te popoì ia ù
me te tau kohetā me te pooâkau ?
I tēia â, i tēia â, u kaapee au io he Hiero
e hakako ana. Aòè ôtou i humu mai.
56 Atià, u haapaotia tenā tau mea paotū
etià e toitoi te Hāmani o te tau perofeta. »
O te tau kouâ paotū e titii ana ia Ietu, ua hihiki atu.
NO IETU I MUA O TE TĀUÀ NUI
57 O te tau ènata te i popoì ia Ietu,
u aahi âtou ia Īa io he faè o Kaifa, te Tāuà nui.
I èià, u putupututia te tau tuhuna teào
me te tau kōkooūa o te mataèinaa.
58 O Petero à, ua ūtaì me i te taha memao,
tihe atu io te faè o te Tāuà nui. Ua uu īa i òto.
U kaapee Petero me te tau mūtoi tiaì
no te tiòhi pēhea te paona.
59 O te tau Tāuà nui me te Tuneteri ia ôtoa,
ua ìmi âtou i te teào haapōtoho pu ia Ietu
no te haatoitoi i to Īa matena.
60 Aòè i koàna ia âtou
e aha à he mea nui te ènata te i tū mai no te pōtoho pu.
Atià, i te paona, ua tihe nā ènata tokoùa te i peàu :
61 A « U faì atu hua ènata pēènei :
e koàna ia ù te vāvahi i te Hiero o te Etua,
ma te toù o te pō e haatū hakaùa au ia īa. »
62 E tū ana te Tāuà nui, u peàu ia Ietu :
A « Aòè òe e haahua atu e tahi ponateào ?
E aha ta tenā poì i hakatio ia òe ? »
63 O Ietu à, ua mutu Īa. U peàu te Tāuà nui ia Īa :
A « Ma te inoa o te Etua pohoè, u toutaki au ia òe :
a faì mai aha o òe te Kirito, te Tama a te Etua ? »
64 U haahua atu Ietu :
+ « Na òe i peàu. E.
Oia nei to ù peàu ia ôtou :
I tēnei, e ìte ôtou i te Tama a te ènata
e tānoho ana i te ìma oko o te Mana nui,
me te tihe mai ma ùna o te tau ao o te ataàni. »
65 A tahi a veti te Tāuà nui i to īa tau kahu me te peàu :
A « Ua paha Īa.
Umaha ta mātou e hano hakaùa i te ènata haatiàtohu.
I kapo nei, ua òno ôtou i te teào paha.
66 E aha to ôtou maakau ? »
U haahua âtou :
F « A mate Īa. »
NO TE HAAMEETINA IA IETU
67 A tahi a tuhā âtou i te anuanu io to Īa mata
me te pehipehi atu ia Īa.
U papaki tahipito ia Īa e peàu ana :
68 F « E te Kirito e, a perofeta mai :
o ai oti te i pehi ia òe ? »
NO PETERO E TITII IA IETU
69 O Petero à, u kaapee īa i vaho, i òto o te pāpua.
U haatata mai io īa e tahi vehine tueni te i peàu atu :
A « O òe tītahi me Ietu no Natareti. »
70 Atià, u haakoè Petero i mua o te tau ènata paotū, e peàu ana :
D « Aòè au e vivini nei i ta òe teào. »
71 Ohia ua taha Petero io te avaputa,
ua ìte ia īa tītahi vehine tueni kē
te i peàu i te poì e noho nei i èià :
A « O īa nei tītahi me Ietu no Natareti. »
72 U haakoè hakaùa Petero ma te haatiàtohu i ta īa teào :
D « Aòè au i ìte i hua ènata. »
73 Ava poto i muì iho, u haatata mai te poì
e noho ana i èià me to âtou peàu :
A « Toitoi, o òe tītahi me âtou.
Na to òe tanitina èo te haaìte mai. »
74 A tahi a teào pē ta Petero me te paha atu.
A « Aòè au i ìte i hua ènata. Koè nui. »
Ua tani pu anamai te èo o te moa.
75 U haamaakau Petero i te teào ta Ietu i peàu :
« Ma mua atu e tani te moa,
e titii òe ia ù, e toù titiitina. »
Ua uu Petero i vaho. Ua nui to īa mateteka.
NO IETU I MUA O TE TUNETERI
27,1 I te pōpōuì, u putuputu te tau Tāuà nui paotū
me i te tau kōkooūa o te mataèinaa
no te hakatio ia Ietu me te haamate ia Īa.
2 I muì iho, e kitii ana âtou ia Ietu,
u aahi atu me te haaìò ia Īa
i te îima o te Kuvenea, Pinato to īa inoa.
NO TE MATAKIHEETINA O IUTA
3 O Iuta te kouâ te i haaìò ia Ietu.
Ua hemo īa i te hopo nui ia òno īa
u haavātia Ietu me to âtou haamate ia Īa.
Ua àve hakaùa atu Iuta i te moni māìta e toù ònohuu
io te tau Tāuà nui me te tau kōkooūa.
4 U peàu īa pēènei :
D « E mikeo ta ù ma te haaìòtina i te ènata piò koè. »
Atià, u haahua atu âtou :
A « E aha ta mātou. Na òe ta òe. »
5 U tioà Iuta i te moni io he ahu tapu o te Hiero.
Ua uu īa i vaho me to īa matakifee ia īa.
6 Ua too te tau Tāuà nui i te moni me te peàu :
A « Aòè e ao te Ture e tuu atu i hua moni
io te taha avaina moni mēìa he moni hokotototia. »
7 U hakatoo atu hakatoo mai âtou no te hoko mai
me hua moni i te pāio fenua o te ènata kānea hue èpo,
i èià te pāpua e hei no te tomi i te tau manihii.
8 Oia te piò tihe i tēnei mou â,
u apatia hua pāpua : te pāpua o te toto.
9 Ma èià, u haatoitoitia te teào o te perofeta Ieremia :
« Ua too âtou i te moni māìta e toù ònohuu.
Oia nei te moni utu o tēia i hokotia atu
vāàna i te tau tama o Iraene te i hoko atu.
10 Ua tuu atu âtou i hua moni no te hoko mai
i te pāio fenua o te ènata kānea hue èpo.
Atii hoì ta te Fatu Etua i peàutia mai. »
NO IETU I MUA O PINATO
11 Ua tū Ietu i mua o te Kuvenea.
Ua ūi te Kuvenea ia Īa pēènei à :
A « Aha, o òe te hakaìki nui o te tau ati Iuta ? »
U peàu Ietu :
+ « Na òe i peàu. »
12 Atià, u te e haahua atu Īa i te ponateào e tahi,
e aha à u hakatio ia Īa te tau Tāuà nui me te tau kōkooūa.
13 A tahi a peàu Pinato :
A « Aha, u te e òno òe i to âtou hakatio atu ia òe ? »
14 O Ietu à, u te e haahua atu, aòè i peàu e tahi ponateào.
Ua pē hoì te Kuvenea i te mahaò.
15 I tēia Koìna Pakate, i tēia Koìna Pakate,
ua hani te Kuvenea i te vevete e tahi ènata humutia
vāàna ta te faètoa i maìmaì.
16 Enā io he faèhumu te ènata piò nui : O Parapā te inoa.
17 Ua ūi Pinato i te faètoa te i putuputu mai :
A « O ai òa ta ôtou e maìmaì e vevete au :
o Parapā, akoè à o Ietu te i apatia te Kirito ? »
18 Ua ìte hoì Pinato o te koekoe keitani
te tumu o to âtou haaìò atu ia Ietu.
19 E tū ana Pinato i to he nohona haavā,
ua tihe te keèe pahitia e ta īa vehine no te peàu :
A « Umoì òe e teka i tēnei ènata toitoi.
I te pō nei, u memae oko au i to he hiamoe
mēìa i hua ènata. »
20 Atià, u hakapahi te tau Tāuà nui me te tau kōkooūa
i te faètoa no te ape ia Parapā me te haamate ia Ietu.
21 U pohā hakaùa te èo o te Kuvenea me to īa ūi atu ia âtou :
A « No nā ènata tokoùa nei,
o ai e maìmaì ôtou e vevete au ? »
U haahua atu âtou :
F « O Parapā. »
22 U peàu Pinato ia âtou :
A « E aha ta ù i ùna o Ietu te i apatia te Kirito ? »
U haahua atu âtou paotū :
F « A pāokapeka atu. »
23 U peàu Pinato :
A « E aha ta īa hana mākaka ? »
Atià, u taaàu âtou ma he èo oko ki :
F « A pāokapeka atu. »
24 U vivini Pinato he teào pu ta īa, mei tōtōua te faètoa.
No èià, ua too īa i te vai no te òpiòpi i nā îima
i mua o te faètoa, u peàu :
A « Ia mate nui tēnei ènata, u piò koè au.
Na ôtou ta ôtou. »
25 U haahua atu te mataèinaa paotū me to âtou peàu :
F « To īa toto ma ùna o mātou me to mātou tau tama. »
26 A tahi a vevete Pinato ia Parapā.
I muì iho, u haatā Pinato ia Ietu,
me to īa haaìò i te tau kape no te pāokapeka atu.
NO TE TAU KAPE TIAÌ E HAAMEE IA IETU
27 Ua too te tau kape o te Kuvenea ia Ietu
me to âtou aahi ia Īa i to he pāpua peàutia Peretorio.
U haaputuputu âtou i te fatu kape ia ôtoa vii pu o Īa.
28 Ua taki âtou i to Ietu tau kahu,
u haauhi ia Īa me te kahu pu veàkiki.
29 U àana âtou i te paè teitā taataa
me te tuu ma ùna o to Īa upoo,
ua tuu me te kākaho i to Īa ìma oko.
E noho muò ana i te aò o Ietu, ua mee atu ia Īa,
e peàu ana :
F « Kāòha, e te hakaìki nui o te tau ati Iuta. »
30 Ua tuhā âtou i te anuanu i ùna o Īa.
Ua too i te kākaho no te tā i to Īa upoo.
31 Ia pao te haamee ia Ietu,
ua taki âtou i te kahu veàkiki me i ùna o Īa.
Ua haauhi hakaùa me to Īa tau kahu.
NO TE VAANUI O TE PEKA
32 I muì iho, u aahi te tau kape ia Ietu
no te pāokapeka ia Īa.
E uu ana i vaho, u âvei âtou me te ènata no Kirene,
o Timone to īa inoa.
Ua toi pu âtou ia īa no te amo i to Ietu peka.
33 Ia tihe âtou i te taha peàutia Korokota,
ma he èo ènata, o Ipuoo,
34 ua tuu âtou ia Īa i te mea inu :
te vino kāvaìtia me te au.
Ua ako Ietu. Atià, u te e maìmaì Īa te inu.
NO TE PĀOKAPEKATINA O IETU
35 Ia pāokapekatia Ietu,
u tuhatuha âtou i to Īa kahu ma te haakai.
36 I muì iho, e kaapee ana i èià, u tiaì âtou ia Īa.
37 U tauèvatia e âtou i ùna o to Īa upoo
i te piò o to Īa hakatio patutia pēènei :
« O Ietu tēnei, te Hakaìki nui o te tau ati Iuta. »
38 U pāokapekatia nātoa me Īa nā ènata mākaka tokoùa,
i te ìma oko tītahi, i te ìma aèaè tītahi.
NO TE PAHA IA IETU
39 U haameemee atu ia Ietu te poì e taha ana ma èià,
u neue i te upoo me te peàu atu :
40 F « O òe te i vāvahi i te Hiero
me te haatū hakaùa ma te toù o te pō,
a haapohoè ia òe aneiho.
Me he mea e Tama òe a te Etua,
a iho mai me i ùna o te peka. »
41 Atii hoì me te tau tuhuna teào me te tau kōkooūa,
u haamāio âtou nātoa me i te tau Tāuà nui, e peàu ana :
42 A « U haapohoè Īa i tahipito.
O Īa iho, aòè i koàna ia Īa te haapohoè.
O Īa nei te hakaìki nui o Iraene !
I tēnei, a iho mai me i ùna o te peka,
e haatià hoì mātou ia Īa.
43 Io te Etua to Īa haatià.
I tēnei, me kāòha te Etua ia Īa, a haapohoè mai.
U peàu hoì Īa : o au te Tama a te Etua. »
44 Hua mea aneiho te haameemee atu ia Ietu
na ènata mākaka tokoùa te i pāokapekatia me Īa.
NO TE MATENA O IETU
45 Ua topa te pō pōtano ma ùna te tiàtohu o te fenua
me i te ava oatea nui tihe atu i te hora e toù i te ahiahi.
46 Ia tata te hora e toù, u taaàu Ietu me te èo oko :
+ « Eri, Eri rama tapakatani. »
Oia nei te hakatu ma he èo ènata :
+ « E tu ù Etua e, e tu ù Etua e,
umaha Òe i titii mai ia ù ? »
47 Ua òno tahipito me i vāvena o te poì noho ana i èià.
U peàu âtou :
F « Enā Īa u vevaò ia Eria. »
48 U tohuti ponihoo tītahi, ua too īa i te mēmau omotai
ta īa i haatokū me te vineka.
U haamau īa i hua mea io te muamua o te kākaho
me te fāinu ia Ietu.
49 U peàu tahipito :
F « Epō. A tiòhi tātou
aha e hano mai Eria e haapohoè ia Īa. »
50 Atià, o Ietu e taaàu ana hakaùa me te èo oko,
ua tuu i te kuhane.
MA HOPE O TE MATENA O IETU
51 Enā, u nehae ma vāvena me i ùna topa i àò nui
te tapa o te ahu tapu o te Hiero.
U neuu te fenua, u pohāpohā te motukeâ.
52 U pepeùtia anaè te tau ana tūpāpaù ;
ua pohoè hakaùa te nuitina o te tau ènata peàto
i mamate òmua.
53 Ma hope o to Ietu Tūhakaùatina,
ua uu âtou i vaho o te tau ana tūpāpaù.
Ua tomo âtou i to he Pāpuafaè tapu.
Ua ìte ia âtou i te nuitina o te tau ènata.
54 O te Keneturione me to īa pūpū kape e tiaì ana ia Ietu,
ia ìte âtou i te neuutina o te fenua
me i te mea hou kē i tihe mai,
ua pē i te haametaù. U peàpeàu âtou pēènei :
« Tiàtohu nui, e Tama a te Etua te ènata nei. »
NO TE TAU VEHINE PII TE PEKA
55 Enā i èià tahipito tau vehine e tiòhi aa me i te taha memao.
Ua ūtaì âtou ia Ietu me i te Fenua Karirea mai
no te tāvini ia Īa.
56 I vāvena o âtou, enā o Maria Matarena,
o Maria, te kui o Iakopo me Ioteve,
enā me te kui o nā tama a Hepetaia.
NO TE TOMITINA O IETU
57 I te ahiahi pō, ua tihe mai te ènata taetae nui
no Arimatea, o Ioteve to īa inoa.
Ua ìò me īa he kouâ o Ietu.
58 Ua hano īa e haaâvei me Pinato
no te ape i te tino o Ietu.
U peàu Pinato e tuu atu ia īa i te tino tūpāpaù.
59 Ua too Ioteve i te tino.
Ua fāfī me te tapa pōòu māìta.
60 Ua tuu i òto o te ana tūpāpaù hou,
tekaitia no īa aneiho i to he papakeâ.
Ua huì īa me te keâ kaùoo i mua o te avaputa,
me to īa hee atu.
61 Enā i èià o Maria Matarena me tītahi Maria kē,
e kaapee ana i mua o te menema.
NO TE TIAÌTINA O TE ANA TŪPAPAÙ
62 Ma te oìoì, i te â ma muì o te Haapeipeitina,
ua hee nātoa te tau Tāuà nui me te tau Fariteo io Pinato.
63 U peàu âtou :
A « E te Hakaìki e, u haamaakau mātou,
e pohoè ana hua ènata tīkoe, ua faì atu :
Ma te pō toù, e tū hakaùa au.
64 A peàu òe no te tiaì i te menema
tihe atu i te toù o te pō, oa tihe mai to Īa tau kouâ
no te kamo i te tino me te peàu i te mataèinaa :
« Ua tū hakaùa Īa me i vāvena o te poì mamate. »
E nui aè te pē o tēnei teào tīkoe i to mua to Īa teào. »
65 U peàu Pinato ia âtou :
A « Enā me to ôtou pūpū mūtoi tiaì.
A hee ôtou. Na ôtou ta ôtou te tiaì i te menema. »
66 Ua hee atu âtou me to âtou tiaì i te menema.
U haamau âtou i te toù â ma ùna o te keâ
me to âtou haatihe mai i te poì tiaì no te tiòhi meitaì.
NO TE IUTĪ TAPU
PURE META NO TE KAO TAPU
TETAUTINA O TE PEROFETA ITAIA 61, 1-3.6-9
1 I ùna o au nei te Kuhane o te Fatu Etua,
na te mea, u haapeàto mai ma te paùtina me te kao tapu.
U pōpahi mai te Fatu ia ù no te àve atu
i te Teào Meitaì Hou Mai i te poì veve,
no te haaūo i te koekoe o te poì kuhane koè,
no te haaìte atu i te poì humutia i to âtou vevetetina,
2 no te haamevaha i te teào o te èhua o te vaièitina
ta te Etua e tuu mai.
Enā, e haaèkaèkatia te tau ènata e uēuē nei.
3 E takitia to âtou kahu uē
no te tāpī me te kahu koìna, te heipua, te paèkuà.
E haamaha i te vaimata no te paù me te kao kekaa.
O te poì kuhane koè, e hīmene âtou me te koakoa.
6 E peàutia ôtou he Tāuà o te Fatu Etua.
E apatia to ôtou inoa he Tautua o te Etua.
8 E vaièi atu au ia ôtou i te tuki o te hana meitaì.
E haatū au me ôtou i te Piimau no te ava paona koè.
9 E haakāìètia to ôtou ati i ùna aè,
i vāvena o te tau mataèinaa ia ôtoa.
O te tau ènata paotū e ìte ia âtou, e peàu pēènei :
Mamau te ati nei ta te Etua i haameitaì.
TARAMO 89 (88), 20ab.21, 22.25, 27.29
E te Etua e, io Òe aneiho te teào e aahi atu i te pohoè paona koè.
20 E te Fatu e, òmua i peàu Òe i to òe tau hoa,
I to he moemoeā, u haaìte atu Òe ia âtou :
21 U koàna ia ù te tāvini, o Tavite te inoa.
Ua paù au ia īa me te kao tapu.
22 No èià, e toko anatu to ù ìma ia īa.
E haatoa to ù ìi ia īa paòpaò koè.
25 Enā me Tavite to ù kāòha, to ù teào tiàtohu.
O te mana o to ù inoa e haamau i to īa ìi.
27 E peàu mai īa : « O Òe tu ù Etua, tu ù Motua.
O Òe tu ù Motukeâ, tu ù Haapohoè. »
29 I ùna o īa e noho mau to ù kāòha, hakahae koè.
Me īa tu ù Piimau no te tau tai hakatahi.
TETAUTINA O TE HĀMANI APOKARUPO 1, 5-8
E tu ù tau tunane tuehine,
ia ôtou te karatia me te moû ma te inoa o Ietu Kirito.
5 O Īa to mua ta te Etua i haatū hakaùa
me i vāvena o te huaa mamate.
O Īa te Hakaìki nui
o te tau hakaìki paotū o te fenua vii pu.
Ia Ietu Kirito te i kāòha mai, te i haakoè
i to tātou tau mikeo, ma to Īa ùtuna hēana uo he peka,
6 te i haaìò ia tātou he mataèinaa,
he papa tāuà no te tāvini i te Etua, to Īa Motua.
Ia Ietu Kirito hoì te kāìè me te mana
ma te tau tai a tihe anatu. Amene.
7 Eīa, me io he àni, e tihe mai te Kirito i òto o te ao.
E ìtetia Īa e te tau ènata ôtoa me te poì te i mākaka ia Īa.
I to Īa aò, e unu me te uēuē te tau mataèinaa paotū. Amene.
8 U peàu te Fatu Etua : O au te Tumu me te Hiku,
te tū nei, te i tū òmua naoti, te i tihe ai, te Mana nui.
HĪMENE VĀNANA :
cf. It.16,21
I ùna o Òe te Kuhane o te Fatu. Na Īa i pahi ia Òe no te haaìte atu i te poì veve i te Teào Meitaì Hou Mai o te haapohoè.
EVANERIO O IETU KIRITO VĀÀNA E RUKA 4, 16-21
I tēia mou pō,
16 ua tihe Ietu i Natareti, i èià te tāfaitina ia Īa.
I te Tāpati, ua tomo Īa i òto o te tinakoka
me he mea ua hani Īa. Ua maô Īa no te tetau.
17 Ua tuutia ia Īa te hāmani o te perofeta Itaia.
E ìmi ana, u kāvii Ietu i te hāmani,
me te koàna mai ia Īa te mou kio te i patutia pēènei :
18 « I ùna o au nei te Kuhane o te Fatu,
na te mea u haapeàto mai Īa ma te paùtina,
etià e haaìte atu au i te Teào Meitaì Hou Mai i te poì veve.
U pōpahi mai Īa no te haamevaha
i te Teào Meitaì Hou Mai :
e vetevetetia te poì me io he faèhumu,
e ìte tāhakahaka te poì matapō,
e pohoè na âtou ta âtou te poì òomi mākaka tia.
19 U pōpahitia mai au no te haaìte atu
i te èhua o to te Fatu vaièitina mai. »
20 U kāvii hakaùa Ietu i te hāmani me te tuu atu i te tāvini.
U kaapee Īa. O te poì paotū te i òto o te tinakoka,
u tiòhi matiòka ia Īa.
21 U pohā te èo o Ietu me to Īa peàu ia âtou :
« I tēnei â, u haapaotia hua teào o te Hāmani tapu
ta ôtou i ònopuaìna i kapo nei. »
NO TE IUTĪ TAPU
TE PURE META AHIAHI
TETAUTINA O TE HĀMANI A MOITE PEÀUTIA EHOTO
12, 1-8.11-14
1 I te Fenua Ekipito, u peàu te Fatu Etua ia Moite
atii me ia Aarone, to īa teina :
2 « A ìò te māhina nei e māhina tumu no ôtou.
Oia to mua māhina o to ôtou èhua.
3 A haaìte atu i te motuhaka tiàtohu o to Iraene i te mea nei :
Ma te pō ònohuu o te māhina nei, a too ôtou
e tahi kaiū muto ma tēia faè, ma tēia faè.
4 Me he mea ua ìte ôtou aòè e àva te huaafaè no te haapao
i te kai i te muto, a haapii te faè me tītahi faè kē.
Umoì e toe te înaì !
5 Te muto à, a kanahau, kaiū toa, e tahi èhua.
E koàna te too i te kaiū keukeu hakatu me hua muto nei.
6 A haaavai tihe i te pō ònohuu ma fā o te māhina.
I hua â, ia topa te pō, a ùumi i hua muto te motuhaka nui
o te mataèinaa tiàtohu o Iraene.
7 A tootia i te mea toto no te paù i nā katina e ùa
me te paènutu o te avaputa o te faè i èià te kai.
8 I hua pō, e kaitia te kiko tunu pātaa,
me te faraoa haapupuhi koè me te tau teitā kavakava.
11 Pēènei to ôtou kai :
A taka i te kooi. A oka te vaevae me te aihū.
Te tootoo io te ìma, a kai haakoi :
O te Pakate o te Fatu, to te Fatu Etua Tahatina.
12 I hua pō nei, e taha atu au ma vāvena o te Fenua Ekipito ;
e tā au i te tau hāmua hakatahi o te Fenua Ekipito,
me i to te ènata anamai tihe atu i to te tau ânimara. »
13 E haatopa au i te tuki pē ma ùna o te tau ètua Ekipito :
O au hoì te Fatu.
E ìò te toto mea hakatu ma ùna o te faè i èià ua noho ôtou.
E ìte au i te toto, me tu ù taha atu.
14 Aòè ôtou e pē i te mea ìno ta ù e àve i te Fenua Ekipito.
A haamāmaakau ôtou i hua â nei.
A ìò he â koìna pererina no te hahi i te Fatu.
A tū mau hua ture no te tau tai hakatahi ! »
TARAMO 116 B (115), 12-13, 15-16a.c, 17-18
U meitaìtia te ipu me te faraoa o te pohoè te i haatū i te motuhaka nui o te Etua.
12 Pēhea tu ù haahuaèkaèka i te Fatu
No te meitaì hakatahi ta Īa i vaièi mai ?
13 E ùtuna au i te ipu o te pohoè.
E vevaò ana i te inoa o te Fatu.
15 He taetae io te Fatu te matena o to Īa huaa.
16 E te Fatu e, o au to Òe tāvini,
Te ènata humutia ta Òe i vevete.
17 E ùtuna au i te hēana haahuaèkaèka,
E vevaò au i te inoa o te Etua.
18 E hana au vāàna i tu ù teào voto
I mua o te motuhaka nui o to Īa mataèinaa.
TETAUTINA O TO MUA HĀMANI I TO KORINETIA 11, 23-26
E tu ù tau tunane tuehine,
23 O au à, ua tuutia mai e te Fatu i te teào
ta ù i tuu atu ia ôtou, pēènei :
24 I te pō u mākakatia, ua too te Fatu i te faraoa,
u haahuaèkaèka, ua vahi me te peàu :
« O tu ù tino tēnei i haaìòtia no ôtou.
A hana ôtou atii no te haamaakau mai ia ù. »
25 Me hua hakatu, ma hope o te mau,
ua too Īa i te ipu, e peàu ana :
« O te ipu nei he Piimau hou, i òto o to ù toto.
I te ava hakatahi e inu ôtou me io hua ipu,
a hana ôtou no te haamaakau mai ia ù. »
26 Ma èià, i tēia ava, i tēia ava
ua kai ôtou i hua faraoa, ua inu ôtou me io hua ipu,
ua faì atu ôtou i te matena o te Fatu,
e tetaì ana i to Īa hua mai.
HĪMENE VĀNANA :
cf. In.13,34
« U haaìte au ia ôtou i te Ture hou : A kāòha atu kāòha mai te hoa i te hoa me he mea u kāòha atu au ia ôtou. »
EVANERIO O IETU KIRITO VĀÀNA IOANE 13, 1-15
1 Ma mua o te Koìna Pakate, ua ìte Ietu ua tihe to Īa ava
no te taha atu me i te aomāàma nei io te Motua.
Ohia u kāòha Ietu i to Īa huaa te io he aomāàma nei,
u kāòha ia âtou tihe i te paona.
2 E kai aa i te kaina ahiahi,
u haatonake te Tiaporo i te koekoe o Iuta,
tama na Timone, no te haaìò ia Ietu.
3 E ìte ana Ietu, ua tuu mai te Motua
i te tau mea paotū ma òto o to Īa îìma ;
ua ìte Īa me io te Etua to Īa ihotia mai,
atii me to Īa haahua atu io te Etua,
4 ua tū Īa me io he tapukai.
Ua taki Īa i te kahu uhi pu,
ua too i te tapa me to Īa taka anamai.
5 Ma hope, u kiini Ietu i te vai io he papa
me to Īa hano hooi i nā vaevae o te huaa kouâ ;
u haamoô me te tapa i takatia.
6 Ua tihe Īa io Timone Petero.
U peàu Petero ia Īa :
« E te Fatu e, na Òe e hooi i to ù vaevae ? »
7 U haahua atu Ietu : « E aha te hana e hana nei au,
aòè òe e vivini. Epō iho e vivini ai òe. »
8 U peàu Petero ia Īa : « Koè nui Òe e hooi i to ù vaevae ! »
U haahua Ietu ia īa :
« Me hooi koè au ia òe, u te e pii òe me au nei. »
9 U peàu Petero ia Īa : « E te Fatu e,
umoì nā vaevae anaè, atià me nā îìma atii me te upoo. »
10 U peàu Ietu ia īa : « O te ènata i kaukau i te vai, ua àva.
Umoì e hooi hakaùa.
O ôtou nei, u taìtaì ôtou ; atià aòè paotū. »
11 Ua ìte hoì Ietu i tēia e haamākaka mai ia Īa.
Oia te piò u peàu pēènei : « Aòè i taìtaì ôtou nui. »
12 Ia pao te hooi i to âtou vaevae,
ua too hakaùa Ietu i to Īa kahu uhi pu
me to Īa noho io he tapukai.
U peàu i to Īa tau kouâ :
« Aha, u vivini ôtou i te tumu o to ù hana i uē ia ôtou ?
13 U vevaò mai ôtou ia ù : he Tuhuna, he Fatu.
He mea hei to ôtou peàu mai ; oia hoì au.
14 Me he mea u hooi au i to ôtou vaevae,
o au te Fatu me te Tuhuna, a hana atii me ôtou :
a hooi ôtou i nā vaevae te hoa i te hoa.
15 U haaìte atu nei au i te hakatu ia ôtou
etià e hana ôtou me he mea ta ù i hana i uē ia ôtou. »
NO TE VENINĪ TAPU
TETAUTINA O TE PEROFETA ITAIA 52, 13-15 ; 53,1-12
13 Eīa e tapavaù to ù tāvini,
e òno nui aè, e fiti aè, e tiketike nui.
14 U peàu te Fatu : « U kiiete nui te mataèinaa
ia tiòhi atu i to ù tāvini :
ohia u mata koè īa, aòè e hakatu ènata hakaùa.
15 Atii te tau hakaìki e haamāmā i te fafa i mua o to ù tāvini.
E ìte ai âtou i te mea koè anatu i peàutia mai,
e kanino atu i te mea koè anatu i ònotia mai.
53,1 O ai e haatià atu i ta tātou i òno nei ?
Ia ai te ìi o te Fatu i haaìtetia mai ?
2 I te aò o te Etua, ua tupu te tāvini me he kohoe i àò,
me he aka totoo ma he fenua moô.
Ia tiòhi atu, koè īa i poèa, koè īa i kanahau.
3 U haameetia, u titiitia hua tāvini me he mātua kai memae.
U haaìno atu tātou ia īa me te haapaòpaò aneiho,
u tukitukitia e te uē
hakatu me te mea toomanu e haapiko i to mātou mata.
4 Atià, no tātou te memae e amo nei īa,
no tātou te uē u òomi i to īa menava.
5 I to tātou maakau, na te Etua i oonaì, i pehi, i haapaìha iho.
Atià, mēìa i to tātou mikeo, u tīputatia īa ;
mēìa i to tātou mākaka i pehitia īa.
6 Ma ùna o īa, u topa mai te tuki haamoû mai ia tātou ;
mēìa i to īa tau maki i oà ai tātou.
Me he muto papauō tātou, hakatahi ma to īa iho puta.
Me te haatopa o te Fatu ma ùna o īa i te mikeo o tātou paotū.
7 U hanapētia, u haapāpaù, aòè e pepeù i te fafa.
Me he arenio aahitia i te ùumi.
Me he koivi muto i mua o te ènata tinaì, pepeù koè i te fafa.
8 Ua humutia, haavātia, haakoètia.
O ai to te haamaakau atu i to īa paona ?
U takitia me io te fenua o te poì pohoè.
U pehitia haamate mēìa i te mikeo o to īa mataèinaa.
9 U tomitia me he poì haatià koè.
O to īa menema me te poì moni.
Atià o īa, koè anatu i mākaka i tītahi,
koè to īa èo i teào tīkoe.
10 U maìmaì te Fatu e tukituki atu me te memae.
Mēìa u ùtuna atu i to īa pohoè mea hoko mikeo,
e ìte ai i to īa tupu i ùna aè, e haakoa aè i to īa tau â.
Ma io īa, e tae anamai te hīa o te Fatu.
11 Ma hope o te ûûkina o to īa kuhane, e ìtetia te māàma,
e tapavaù nui. Ma to īa memae, e haameitaì tu ù tāvini
i te tini tini ènata a amo ai i to âtou mikeo.
12 No èià, e tuu au io īa i te tau faètoa,
e àva īa i te tuhatina taetae me te poì mana.
Ohia à, na īa ta īa i ìò atu i te mate,
i tetautia me te poì mikeo.
Mēìa ua amo i te mikeo o te tau tini tini ènata,
u vevaò nei īa i uē i te poì mikeo.
TARAMO 31 (30), 2.6, 12, 13-14ac, 15-16, 17.25
Io to ìma, e te Fatu e, e tuu nei au i to ù kuhane.
E te Fatu e, io Òe to ù taha maù.
Umoì e haameetia au ma te tau â paotū.
6 Io to Òe îìma, e tuu nei au i to ù kuhane,
E te Fatu te Etua tiàtohu e, tu ù Haapohoè.
12
U toomanu au nei no to ù tau hoa noho tata,
Ia ìte mai, u haametaù to ù tau hoa.
Ua hiki memao me io ù
Te poì i âvei me au ma no he aanui.
13 U haatūhaatia au me he tūpāpaù ìtekoètia.
U haatūhaa âtou ia ù me he kaù tioàtia.
14 Ua òno au i te teào haapōtoho mai
Ta te faètoa e hano ana no te ùumi mai.
15 U haatià au ia Òe, e te Fatu e.
U peàu hakaùa : o Òe tu ù Etua.
16 I òto o to Òe îìma to ù pohoè :
A taki mai me io te îìma i mākaka ia ù.
17 A pupuà to Òe mata no to Òe tāvini,
Mēìa i to Òe uē, a haapohoè mai.
25 A oko nui te koekoe. Oho te ìi
Ôtou paotū e tetaì nei i te Fatu !
TETAUTINA O TE HĀMANI I TO HEPEREO 4, 14-16-- 5, 7-9
E tu ù tau tunane tuehine.
4,14 Ohia ua ìò Ietu he Tama a te Etua, to tātou Tāuà nui tiketike,
te i tomo i ùna nui o te àni,
a tohe mau tātou i te faì atu i te haatià.
15 Na te mea, u mehea hua Tāuà nui
mēìa i te tau tekateka o to tātou koekoe pepee.
Ua ìte hoì Īa ma te tiàtohu i te nuitina
o te mea haaveke me te haamōtii mai ia Īa ;
atià à, u mikeo koè Īa.
16 No èià, a haatata mai tātou haametaù koè
me te Etua mana nui, te tumu o te vaièitina,
vāàna e ìò mai ia tātou to Īa hakāòha
me te karatia no te toko mai, i te ava e hei.
5,7 O Ietu Kirito e pohoè ana i no he fenua nei,
me he ènata mate vave, ua pure Īa i te pure vevaò,
e uē ana, e taaàu ana io te Etua,
etià e haapohoètia me io te mana o te matena.
U apuutia ta Ietu Kirito pure
mēìa i to Īa kāòha me te aotahi atu.
8 E aha à he Tama te Kirito,
ma to Īa memae, u hakako Īa i te aotahitina.
9 Ma èià, ua ìò Īa he toitoi noa i mua o te Etua,
u haatūtia te tumu o te pohoè paona koè,
no te tau ènata paotū e aotahi ia Īa.
HĪMENE VĀNANA :
cf. Fi. 2,8-9
U aotahi te Kirito tihe i te matena, te matena uo he peka. Oia te tumu u haatiketike anaè te Etua ia Īa, me te apa i te inoa, ma ùna o te tau inoa ia ôtoa.
TETAUTINA O TE MEMAE O IETU KIRITO VĀÀNA E IOANE
18, 1-40--19, 1-42
I tēia mou pō,
18.1 ua hee Ietu me to Īa huaa kouâ
i hiva atu o te vaitahe Keterone. Enā i èià e tahi pāpua.
Ua uu Ietu me to Īa huaa kouâ i òto o hua pāpua.
2 O Iuta, te i haaìò ia Ietu, ua ìte meitaì i hua taha ;
mea nui hoì te tihena o Ietu i èià me to Īa huaa kouâ.
3 Ua tihe mai Iuta, e haatee aa
i te fatu kape Roma me te tau mūtoi tiaì
i tuutia mai ia īa e te tau Tāuà nui me te tau Fariteo.
Ua àve âtou i te tau àmahue, te àmakohe me te hāìna tōua.
4 Ua ìte Ietu i te tau hana paotū ta âtou i haapao ma ùna o Īa.
Ua hee Īa i to âtou aò me te peàu :
+ « O ai ta ôtou e ìmi nei ? »
5 U haahua atu âtou ia Īa :
F « O Ietu no Natareti. »
U peàu Ietu ia âtou :
+ « O au. »
O Iuta tītahi me âtou.
6 Ia peàu Ietu i tēnei ponateào, O au,
ua hua âtou i muì me te topa i no he tuaèpo.
7 Ua ūi hakaùa Ietu ia âtou :
+ « O ai ta ôtou e ìmi nei ? »
U peàu âtou ia Īa :
F « O Ietu no Natareti. »
8 U haahua atu Ietu ia âtou :
+ « U peàu au ia ôtou i kapo nei : O au.
No to ôtou ìmi mai ia ù,
a avai ia âtou a hee atu. »
9 Atii e haatiàtohutia te teào a Ietu, pēènei à :
« Aòè i naò e tahi o te huaa ta òe i tuu mai. »
10 O Timone Petero, ua too i te kohetā ta īa i àve mai.
Ua tā īa i te tueni o te Tāuà nui
me to īa haamotu i te puaìna ìma oko o te tueni.
O Marakuto te inoa o hua tueni.
11 U peàu Ietu ia Petero :
+ « A tuu iho i to òe kohetā i to he kato.
Aha aòè e inu au i te ipu memae
i tuutia mai e tu ù Motua ? »
NO IETU I HAAVĀTIA E ANA ME KAIFA
12 O te fatu kape Roma, to âtou vivini,
te tau mūtoi i pahitia e te tau ati Iuta,
u popoì âtou ia Ietu me te humu ia Īa.
13 Òmua ìka, u aahi âtou ia Ietu io Ana.
He motuòai īa no Kaifa. I hua ava, he Tāuà nui Kaifa.
14 Na hua Kaifa i peàu i te tau ati Iuta :
« E meitaì atu no ôtou e mate nui te ènata e tahi anaè
i uē i te mataèinaa. »
15 Atià, u ūtaì Petero me tītahi kouâ kē ia Ietu.
Ua ìtetia hua kouâ e te Tāuà nui.
Ua uu īa me Ietu io he pāpua o te Tāuà nui.
16 Ua noho Petero i vaho o te avaputa.
Ia uu i vaho hua kouâ te i ìtetia e te Tāuà nui,
u teào īa me te vehine tiaì avaputa.
U haauu īa ia Petero i òto o te pāpua.
17 U peàu hua vehine tiaì avaputa ia Petero :
A « Aòè à o òe tītahi kouâ o tēnei ènata ? »
Ua haahua atu Petero ia īa :
D « Aòè au e kouâ no Īa. »
18 Mēìa i te anu, u haauà i te ahi te tau tueni me te tau mūtoi tiaì.
Ua noho âtou pii he ahi no te haamāhanahana.
O Petero tītahi me âtou.
19 Ua ūi atu te Tāuà nui ia Ietu no to Īa tau kouâ
atii me to Īa hakakotina.
20 U haahua atu Ietu ia īa pēènei :
+ « U teào anatu au etià e vivini ia ù te tau ènata paotū.
U hakako anatu au io he tinakoka me te Hiero,
i èià te putuputu o te tau ati Iuta paotū.
U te e peàu au e tahi teào hakanā.
21 A ape òe i te tau ènata te i haaòno mai
e aha ta ù i peàu ia âtou.
O âtou hoì te i ìte i tu ù hakakotina. »
22 Ia òno i hua ponateào tītahi mūtoi tiaì e tū aa nei,
u papaì ia Ietu me te peàu :
A « Atii to òe teào i te Tāuà nui ? »
23 U haahua atu Ietu ia īa :
+ « Me teka tu ù teào, a haaìte mai.
' Ia meitaì tu ù teào,
e aha te piò o to òe papaì ia ù ?
24 I muì iho, ua pahi atu Ana ia Ietu humutia io Kaifa.
25 Atià i èià, pii he ahi, ua noho Timone Petero,
e haamāhanahana ana ia īa. U peàu mou ènata ia īa :
A « Aòè à o òe tītahi o to īa tau kouâ ? »
U haakoè Petero me te peàu :
D « Aòè au he kouâ no Īa. »
26 U pohā te èo o tītahi tueni o te Tāuà nui,
e huaa īa no te ènata i haamotutia te puaìna
e Petero me to īa kohetā. U peàu hua tueni ia Petero :
A « Aha aòè ua ìte au ia òe
io he pāpua me te ènata nei ? »
27 U haakoè hakaùa Petero. Ua tani anamai te moa.
NO IETU HAAVĀTIA E PINATO
28 U aahitia Ietu me io Kaifa io te faè o te hakaìki Roma.
He pōpōuì tika. Atià, aòè i uu te tau ati Iuta
i òto o te faè o te hakaìki Roma, oa havatia âtou i te piò.
E hano hoì âtou i te mau Pakate kai.
29 Ua uu Pinato i vaho no te âvei me âtou. U peàu īa :
A « E aha te piò e hakatio pu ôtou i tēnei ènata ? »
30 Ua peàu âtou ia Pinato :
F « Anoa aòè īa he ènata mākaka,
u te e haaìò mātou ia òe i hua ènata. »
31 U peàu Pinato ia âtou :
A « A too ôtou ia īa me te haavā vāàna i to ôtou ture. »
U haahua atu te tau ati Iuta :
F « Aòè e koàna ia mātou te haamate i te ènata. »
32 Oia hoì te mea e haatiàtohu ai i ta Ietu i peàu
no te haavivini i te hakatu o to Īa matena.
33 Ua uu hakaùa Pinato io to īa faè
me to īa vevaò ia Ietu. U peàu ia Īa :
A « Aha, o òe te Hakaìki nui o te tau ati Iuta ? »
34 U haahua atu Ietu :
+ « Na òe ta òe tenā teào,
akoè à na tahipito i peàu mai i ùna o au ? »
35 U peàu Pinato :
A « Aha, he ènata ati Iuta au nei ?
Na to òe mataèinaa me te tau tāuà
i haaìò mai ia òe io ù. E aha ta òe i hana atu ? »
36 Ua haahua atu Ietu :
+ « Aòè me i te ao nei to ù hakaìkitina.
Me he mea me i te ao nei to ù hakaìkitina,
e tōtōua hoì to ù huaa tautua,
oa haaìòtia au i te poì ati Iuta.
Atià, aòè e hakatu to ù hakaìkitina me to te ao nei. »
37 U peàu Pinato :
A « No èià, he hakaìki òe ? »
Ua haahua atu Ietu :
+ « Na òe i peàu. He hakaìki au.
Oia te tumu o to ù fānautina me te tihena
i te aomāàma nei : no te haaìte i te mea tiàtohu.
O te ènata ua kē me te tiàtohu, u haaòno i ta ù teào. »
38 U peàu Pinato ia Īa :
A « E aha te tiàtohu ? »
Ia haafitipona Pinato i hua teào, ua uu hakaùa i vaho.
NO IETU E HAKATIOÌA E PINATO
39 Ua taha Pinato io te poì ati Iuta me te peàu :
A « Aòè i koàna ia ù te piò no te hakatio i hua ènata.
Atià, no te Koìna Pakate, vāàna i to ôtou haa ati Iuta,
e vevete au i tītahi me io he faèhumu.
Aha, u maìmaì ôtou e vevete au
i te hakaìki nui o te tau ati Iuta ? »
40 U taaàu oko ki âtou :
F « Umoì tēia. A vevete ia Parapā ! »
O Parapā hoì, he ènata mākaka.
19,1 I muì iho, u peàu Pinato a tootia Ietu no te tā ia Īa.
2 U àana te tau kape i te paè me te teitā taataa.
Ua tuu âtou i hua paè i ùna o te upoo o Ietu.
Ua tomi âtou ia Īa me te kahu uhi pu veàkiki.
3 U haatata mai âtou me Ietu e peàu ana :
F « Kāòha, e te hakaìki o te tau ati Iuta. »
U papaì âtou ia Īa.
4 Ua uu hakaùa Pinato i vaho me te peàu :
A « Eīa. U aahi au ia Īa i vaho nei io ôtou
etià e ìte ôtou aòè i koàna ia ù
te piò no te hakatio i hua ènata. »
5 Ua uu Ietu i vaho me te paè taataa,
me te kahu uhi pu veàkiki.
U peàu Pinato ia âtou :
A « O Īa nei te ènata. »
6 O te tau Tāuà nui me te tau mūtoi tiaì,
e tiòhi aa ia Ietu, u taaàu oko ki âtou :
F « A pāoka. A pāokapeka atu ! »
U haahua atu Pinato ia âtou :
A « A too ôtou ia Īa. A pāokapeka atu !
Aòè i koàna ia ù te piò no te hakatio ia Īa. »
7 U haahua atu te tau ati Iuta :
F « He Ture no mātou. Vāàna i hua Ture, a mate nui Īa
mēìa u peàu e Tama Īa a te Etua. »
8 Ia òno Pinato i hua teào, u nui aè to īa haametaù.
9 Ua uu hakaùa Pinato io to īa faè. Ua ūi atu ia Ietu :
A « Me i hea mai òe ? »
Ua mutu Ietu.
10 A tahi a peàu Pinato :
A « Umaha u te e maìmaì òe e teào mai ?
Aòè òe i ìte e mana to ù no te vevete ia òe,
akoè à e mana to ù no te pāokapeka ia òe ? »
11 U haahua Ietu :
+ « He mana ta òe i ùna o au
mēìa i tuutia ia òe e te Etua.
No èià, nui atu te mikeo o te ènata
te i haaìò ia ù i to òe îìma. »
12 Oia te tumu ua hano Pinato e vevete ia Ietu.
Atià, u taaàu te tau ati Iuta me te peàu :
F « Me vevete òe i tēnei ènata, aòè e hoa òe no Ketare.
O te ènata ua hano ia īa haahakaìki nui,
ua hano hua ènata e tōua me Ketare. »
13 Ia òno Pinato i hua teào, u peàu no te aahi ia Ietu i vaho.
U kaapee īa ma ùna o to īa nohona haavā teào,
io he taha i vevaòtia Tohua keâ,
o Kapata ma he èo hepereo.
14 He â i peàutia no te haapei i te Koìna Pakate,
o hua â nei, i te oatea nui.
U peàu Pinato i te poì ati Iuta :
A « O Īa nei to ôtou hakaìki nui. »
15 U taaàu âtou :
F « A mate ! A mate. A pāokapeka atu ! »
U peàu Pinato :
A « E pāokapeka au i to ôtou hakaìki ? »
U haahua atu te tau Tāuà nui :
F « O Ketare aneiho to mātou hakaìki. »
16 A tahi a haaìò Pinato ia Ietu, etià e pāokapekatia e âtou.
NO TO IETU PĀOKAPEKATINA
17 Ua too âtou ia Ietu me te aahi atu.
E amo ana Ietu tootahi i to Īa peka,
ua taha Īa io te taha apatia Karavario,
o Korokota ma he èo hepereo.
18 I èià, u pāokapeka âtou ia Ietu.
U pāokapeka âtou i nā ènata kē tokoùa :
i tēia kēkē tītahi, i tēia kēkē tītahi.
O Ietu i vāvena.
19 U kānea Pinato e tahi mēmau patutia.
U tauèvatia hua mēmau uo he peka.
Oia nei te mea i patutia :
« O Ietu no Natareti, te Hakaìki nui o te tau ati Iuta. »
20 He mea nui te tau ati Iuta te i tetau i hua teào haaìte,
na te mea ua tata me te pāpuafaè
te taha i èià u pāokapekatia Ietu.
U patutia ma he èo hepereo, te èo hereni, te èo ratino.
21 U peàu te tau Tāuà nui ia Pinato.
F « Umoì e patu : e hakaìki nui o te tau ati Iuta. »
A patu pēènei : u peàu hua ènata :
O au te hakaìki o te tau ati Iuta. »
22 U haahua Pinato :
A « O te mea ta ù i patu, ua pao i te patu. »
23 Ia pāokapekatia Ietu e te tau kape,
ua too âtou i to Īa tau kahu me te hopehope e fā pāio,
pāio kē to te hoa, pāio kē to te hoa.
Ua too âtou me to Īa kahu òa.
Atià, aòè i tuitia hua kahu.
E tahi tapa aneiho me i ùna tihe atu i àò nui.
24 U peàu âtou :
A « Umoì e haatuiva, a tuha tātou ma te haakai. »
Ua pao hua mea etià e toitoi te teào
i patutia io he Hāmani tapu :
« Ua tuha âtou i to ù kahu, u haakai i to ù kahu òa. »
Oiana ta te tau kape i haapao.
NO TO IETU MATENA
25 U maô pii te peka o Ietu to Īa kui me te teina o to Īa kui,
te vehine a Kereopa, o Maria te inoa, o Maria Matarena.
26 E tiòhi ana Ietu i to Īa kui
me to Īa kouâ tāhia ma to īa kaokao,
u peàu i to Īa kui :
+ « E te vehine, o īa nei ta òe tama. »
27 I muì iho, u peàu i to Īa kouâ :
+ « O īa nei to òe kui. »
Me i tēia ava aneiho, ua too te kouâ ia Maria io to īa faè.
28 Ua ìte Ietu ua pao te mea ta Īa i haapao
no te haatoitoi i tītahi ponateào patutia io he Hāmani tapu,
u peàu :
+ « Ua mao au i te vai. »
29 Enā i èià e tahi ipu pī i te vīneka.
U haakutaùtia me te vīneka tītahi mēmau omotai.
U haamautia hua mea omotai ma ùna o te manamana âkau.
U haatatatia me to Ietu fafa.
30 Ia ako Ietu i te vīneka, u peàu :
+ « Ua pao ònaòna. »
A tahi, e oha ana Ietu i te upoo, ua tuu atu i te kuhane.
(A noho muò, a kaituto)
NO TE VEÒ I TE KAOKAO O IETU
31 Oia te â no te Haapei i te Koìna Pakate.
He â tapu oko no te tau ati Iuta tēia koìna,
tōtahi atu mēìa e faìtia ma te Tāpati.
No èià, ua ape âtou ia Pinato
a fafati i nā vaevae o te tau ènata i pāokapekatia
me te taki iho i to âtou tino
oa èva âtou i hua â uo he peka.
32 Ua tihe mai mou kape te i fafati i te tau pūhāvaevae
o nā ènata i pāokapekatia me Ietu.
33 Ua tihe âtou io Ietu, ua ìte u mate nui,
aòè âtou i fafati i to Īa vaevae.
34 Atià, tītahi kape, me te taa, ua veò i to Īa kaokao.
Ua tahe anamai te toto me te vai.
35 Na te ènata te i ìtemata te i haatiàtohu i hua mea.
He teào tiàtohu ta īa.
Ua ìte te Fatu : u peàu īa i te mea tiàtohu,
etià e haatià me ôtou.
36 U haapaotia hoì hua mea etià e toitoi
te teào o te Hāmani tapu te i peàu :
« Umoì e fafatitia e tahi o to Īa tau ivi. »
37 U patutia io he taha kē :
« E tiòhi ai âtou i tēia ta âtou i tīputaèe. »
NO TE TOMINA O IETU
38 I muì iho, ua ape Ioteve no Arimatea ia Pinato
no te too mai i te tino tūpāpaù o Ietu.
He kouâ Ioteve no Ietu, atià ma te haapupuni
na te haametaù i te tau ati Iuta.
Ua ao Pinato. Ua tihe Ioteve
me to īa taki atu i te tino o Ietu.
39 Ua tihe me Nikotemo.
O īa te i âvei me Ietu, òmua i te pō.
Ua àve mai īa i te mea kekaa, me he e ìma ònohuu kiro,
he mira me te aroe ua pao i te kāvohi.
40 Ua too âtou i te tino o Ietu,
ua fāfī me te tapa me te mēmau kekaa.
Ua hana aneiho âtou vāàna i te haa ati Iuta
no te tomina i te tino tūpāpaù.
41 Enā i èià, tata èka me te taha o to Īa pāokapekatina,
e tahi pāpua me te ana tūpāpaù hou.
Òmua, aòè i tomitia tītahi tino tūpāpaù i òto o hua ana.
42 Mēìa i te â Haapei i te Koìna Pakate,
ohia mea tata èka hua ana tūpāpaù,
i èià ua tomi âtou ia Ietu.
TE PŌ PAKATE
1-TETAUTINA O TE HĀMANI A MOITE PEÀUTIA TENETE
1, 1-31--2, 1-2
1 I te tumu, u pēpena te Etua i te àni me te fenua.
2 O te fenua à, e hakatu koè, kiko koè.
Ma ùna o te peteò, he pō keevō ;
ma ùna o te tau vai, e ona nei te kuhane o te Etua.
3 U peàu te Etua : « A māàma ! »
Me te māàma anamai.
4 Ua ìte te Etua u meitaì te māàma.
Me te haapae o te Etua i te māàma me io he pō keevō.
5 Ua apa te Etua i te māàma, he â.
Ua apa te Etua i te pōtano, he pō.
Me te ahiahi me te pōpōuì anamai.
Pō a tahi.
6 U peàu te Etua :
« A papafenua ma vāvena o te tau vai
mea haapae i te tau vai me io te tau vai. »
7 Ua hana te Etua i te papafenua,
me te haapae i te tau vai ma ùna o te papafenua
me io te tau vai ma àò o te papafenua.
Ua pao anamai atii.
8 Ua apa te Etua i te papafenua, he àni.
Me te ahiahi me te pōpōuì anamai.
Pō a ùa.
9 U peàu te Etua :
« A putu mai ma he ava e tahi
te tau vai ma àò o te àni,
a ìtetia mai te taha moô. »
Ua pao anamai atii.
10 Ua apa te Etua i te taha moô, he fenua.
Ua apa i te tau vai, he tai.
Ua ìte te Etua he mea meitaì.
11 U peàu te Etua :
« A tupu te fenua i te mutiē,
i te teitā e hua nei i te kākano,
me te tumuâkau e hua nei i te puku
e avai nei ma òto te kākano ma to īa hakatu. »
Ua pao anamai atii.
12 Ua tupu te fenua i te mutiē,
i te teitā e hua nei i te kākano ma to īa hakatu,
me te tumuâkau e hua nei i te puku
e avai nei ma òto iho o te kākano ma to īa hakatu.
Ua ìte te Etua he mea meitaì.
13 Me te ahiahi me te pōpōuì anamai.
Pō a toù.
14 U peàu te Etua :
« A tauèva mou àma ma àò o te papafenua o te àni
mea haapae i te â me i te pō.
A ìò âtou he mou hakatu e tuhi i te tau ava koìna,
te tau â me te tau èhua.
15 E ìò hua tau àma ma àò o te papafenua o te àni,
mea tūìna i te fenua. » Ua pao anamai atii.
16 U kānea te Etua i nā àma keîkeî e ùa.
O te àma keî oko mea vivini i te â,
me te àma iti mea vivini i te pō, i muì iho, te tau fetū.
17 U tauèva te Etua ia âtou io te papafenua o te àni
mea tūìna i te fenua,
18 mea vivini i te â me i te pō,
mea haapaekē i te māàma me io te pō keevō.
Ua ìte te Etua he mea meitaì.
19 Me te ahiahi me te pōpōuì anamai.
Pō a fā.
20 U peàu te Etua : « A pī nui te tau vai
i te nuitina o te mēmau pohoè.
A ona te manu ma ùna o te fenua,
i àò o te papafenua o te àni. »
21 U pēpena te Etua i te tau ià tai keî oo
me te ià pohoè hakatahi e nokenoke nei,
e pī nei ma he tau vai, vāàna i to âtou hakatu,
me te manu pekeheu hakatahi vāàna i to âtou hakatu.
Me te ìte o te Etua he mea meitaì.
22 U haameitaì atu te Etua ia âtou e peàu ana :
« A tuputupu, a nuinui, a haapī i te tau vai me te tai,
a nuinui me te tau manu ona ma he fenua. »
23 Me te ahiahi me te pōpōuì anamai :
Pō a ìma.
24 U peàu te Etua :
« A pī te fenua i nā puaa pohoè vāàna i to âtou hakatu,
te tau puaa kai, te tau puaa totoo,
te tau puaa hae vāàna i to âtou hakatu.
Ua pao anamai atii.
25 U kānea te Etua i te tau manu hae vāàna i to âtou hakatu,
me te tau puaa kai vāàna i to âtou hakatu
me te puaa paotū totoo ma ùna o te fenua
vāàna i to âtou hakatu.
Ua ìte te Etua he mea meitaì.
26 U peàu te Etua : « A kānea tātou i te ènata
he ata no tātou, e haahakatu me tātou aneiho.
A vivini īa i te ià o te tai,
i te puaa kai me te puaa hae paotū,
i te tau puaa paotū e totoo nei ma ùna o te fenua. »
27 U pēpena te Etua i te ènata e ata no Īa.
He ata no te Etua i pēpena atu ai i te ènata.
He āhana, he vehine i pēpena atu ai ia âua.
28 U haameitaì atu te Etua ia âua.
U peàu atu te Etua ia âua :
« A tuputupu, a nuinui, a haapī i te fenua, a tuàki atu :
a vivini i te ià o te tai me te manu o te ataàni
me te puaa hakatahi totoo ma ùna o te fenua. »
29 U peàu te Etua :
« Eīa, ua tuu au no ôtou i te teitā paotū e hua nei i te kākano,
e avai nei ma ùna o te fenua tiàtohu me te tumuâkau paotū
e hua nei i te puku me te kākano i òto : a kai ôtou i tēia kai.
30 Atii i te puaa hae paotū me te manu paotū o te ataàni,
i te mēmau paotū e totoo ma ùna o te fenua,
i te mēmau paotū me te menava o te pohoètina,
ua tuu atu au i te teitā hakatu kē no te kai.
Ua pao anamai atii.
31 Ua ìte te Etua i ta Īa mea paotū i hana, eīa he mea meitaì nui.
Me te ahiahi me te pōpōuì anamai :
Pō a ono.
2,1 Atii, ua pao anamai te àni me te fenua
me to âua mēmau paotū i òto.
I te pō e fitu, ua haapao te Etua i te hana ta Īa i hana.
2 U hakaēa ma te pō e fitu me i te hana paotū.
TARAMO 104 (103) 1-2a, 5-6, 10.12, 13-14b, 24.35c
E te Fatu e, a pōpahi i to Òe Kuhane no te haahou i te hakatu o te fenua. cf. 104,30
1 A haameitaì i te Fatu, e tu ù kuhane e.
E te Fatu e, tu ù Etua e, u tiketike Òe.
Ua tāpītia Òe me te kāìè
2 O te àma, te kahu e fāfī ia Òe.
5 E haamau Òe i te tūàka o te fenua,
Etià e neue koè ma te tau tai a tihe nei.
6 Ua uhitia hua fenua me te tau tai.
Òmua, u haanaò te vai i te tau tuaivi.
10 Io te vao nui, e haapihiti Òe i te punavai.
E tahe te vai ma io he kaavai hōhonu o te tuaivi.
12 Ua noho pii o hua vai te nuitina o te tau manu ;
Ua ònotia te tanitina o to âtou èo.
13 Me io to Òe nohona, u fāinu Òe i te tau tuaivi,
Ua kai haamaòna te mēmau pohoè i to Òe tau puku.
14 U haatupu Òe i te teitā no te tau naho ânimara,
U haatapavaù i te pāpua o te ènata paòpaò i te hana.
24 He mea nui to Òe tau hana, e te Fatu e.
Na to Òe māàma i pēpenatia te tau mēmau paotū.
Ua pī te fenua i to Òe tau taetae.
A haameitaì i te Fatu, e tu ù kuhane e !
Akoè à
TARAMO 33 (32) 4-5, 6-7, 12-13, 20.22,
Ua pī te aomāàma i to Òe tau hana kāòha, e te Fatu e.
33,5
4 He toitoi noa te Teào o te Fatu.
U tiàtohu anaè to Īa tau hana paotū.
5 U haataetae Īa i te hakatu toitoi, hakahae koè.
Ua pī te aomāàma i to Īa tau hana kāòha.
6 U pēpena te Etua i te àni na to Īa teào.
U kānea Īa i te aomāàma na te mana o to Īa ao.
7 U haapuke Īa i te tai me te haapākeka, oa neke īa.
U tāpae Īa i te moana me te tau taetae i òto.
12 Mamau te mataèinaa ia ìò te Etua he Fatu no īa.
Mamau te fenua vaetia me he pāpua no te Fatu.
13 Me io he àni, u tiòhi meitaì te Fatu
E ìte ana i tēia ènata, i tēia ènata.
20 O te Fatu te tumu o to tātou pohoè.
O Īa to tātou toko me te vevaò.
22 E te Fatu e, a noho mau to Òe kāòha i ùna o mātou
Atii me mātou e tetaì mau i to Òe vaièitina.
2. - TETAUTINA O TE HĀMANI A MOITE PEÀUTIA TENETE
22, 1-2.9a.10-13.15 (22, 1-13.15-18)
1 U haahiiveke te Etua ia Aparahamo me te peàu ia īa :
« E Aparahamo e ! » U haahua atu īa : « Eīa au nei. »
2 U peàu te Etua : « A too i ta òe tama, te tamaòa tootahi,
te tama ta òe e haataetae nei, o Itaako.
A hee atu io te Fenua Moria ; i èià, a ùtuna mai ia īa
i ùna o te tuaivi e haaìte atu au ia òe. »
3 I te pōpōuì tika, ua aa Aparahamo
me ta īa haapei i te pūriki.
U vevaò īa i nā pahinaèo e ùa me Itaako, ta īa tama.
U haapūpā i te vehie no te ahi tapu.
Ua fiti īa i uta, io te tuaivi ta te Etua i peàu atu.
4 I te â e toù, u feau Aparahamo
me to īa ìte memao i te tuaivi peàutia e te Etua.
5 U peàu Aparahamo i ta īa nā pahinaèo :
« A noho ôùa înei me te pūriki.
O au nei me te tama e fiti māua i èià.
Ia pao to māua moe haatona me te pure, e hua mai māua. »
6 Ua too Aparahamo i te pūpā vehie
me ta īa tuu ma ùna o te paufifi o Itaako, ta īa tama.
Ua tooìma īa i te ahi me te kohe.
U fifiti âua amana tokoùa.
7 U peàu Itaako ia Aparahamo : « E to ù motua e. »
U haahua atu : « Eīa au nei, e tu ù tama e. »
U peàu Itaako :
« Enā te ahi, enā me te vehie, i hea te hēana ? »
8 U haahua atu Aparahamo :
« Na te Etua e haaìte mai i te hēana, e tu ù tama e. »
U fifiti âua amana tokoùa.
9 I te ava ua tihe âua i te taha peàutia e te Etua,
u haatū Aparahamo i te fātaa pure
me te tuu i te vehie ma ùna.
U kitii Aparahamo i ta īa tama, o Itaako,
me te tuu atu ma ùna o te fātaa, uo he puke vehie.
10 U hapai Aparahamo i te ìma,
ua too i te kohe no te ùumi i ta īa tama.
11 A tahi a vevaò te anera o te Fatu Etua me io he àni
me te peàu : « E Aparahamo, Aparahamo e. »
U haahua atu ia : « Eīa au nei. »
12 U peàu te anera : « Umoì òe e tā i te māhaì.
Umoì òe e haamemae ia īa.
Ua ìte au i tēnei i te mea u pakaihi òe i te Etua.
Aòè hoì òe i kaikino mai i te tama, ta òe tama tootahi. »
13 A tahi a feau Aparahamo me to īa ìte i te koimaa keukeu
te i haaveketia io he maateitā keoho.
Ua hano īa i te keukeu too
me to īa ùtuna atu i te hēana io te kōava o ta īa tama.
Ua apa Aparahamo i hua taha : « Ua ìte te Fatu Etua. »
15 Na te anera o te Fatu Etua me io he àni
i vevaò hakaùa ia Aparahamo me te peàu pēènei :
16 « He teào a te Fatu Etua. E haatiàtohu au ma to ù iho inoa :
mēìa u aotahi mai, aòè i kaikino òe i te tama,
ta òe tama tootahi, e haameitaì me te vaièi nui au ia òe.
17 E haanui au tini, tini i to òe ati i ùna aè,
me he nui o te tau fetū io he ataàni,
me he nui o te one io te hiku o te tai.
E haahina âtou i te pākeâ me te mōuna tōua
o te mataèinaa e ahi me âtou.
18 Mēìa u aotahi mai òe, e haameitaì atu haameitaì mai
te tau mataèinaa paotū ma te vevaò mai i to òe inoa. »
TARAMO 16 (15), 5.8, 9-10, 1b.11
E tu ù Etua e, a tiaì meitaì ia ù ; io Òe anaè tu ù tetaì.
cf. 16,1
5 O te Fatu te hope taetae ua ìò ia ù.
Io to Òe ìma, e te Fatu e, to ù pohoètina.
8 I mua o to ù mata anatu te Fatu,
Ma to ù kaokao to Īa noho, u haametaù koè au.
9 Ua û i te koakoa to ù kuhane.
U èkaèka to ù tino, ua moe me te moû.
10 Aòè te Fatu e ao e hina au i te matena.
Aòè Īa e avai i to Īa hoa e pē ai io he èpo.
1b E tu ù Etua e, o to ù hīa, io Òe tu ù taha maù.
11 U aahi mai Òe ma no he aanui o te pohoè ;
I mua o to Òe mata, te koakoa, te koakoa nui.
Ma to Òe kaokao, te èkaèka paona koè.
3. - TETAUTINA O TE HĀMANI A MOITE PEÀUTIA EHOTO
14, 15-31 -- 15,1a.
Ia ìte te poì o Iraene u tatai mai te pūpū kape Ekipito,
ua pī âtou i te haametaù.
14,15 U peàu te Fatu Etua ia Moite : « No te aha te taaàu io ù ?
A peàu i te tau tama Iraene a tataha atu.
16 O òe, a too i to òe tokotoko,
a hapai i to ìma ma ùna o te tai, e vahitia ma vāvena.
A taha atu te poì Iraene io he tai,
paìpaì koè nā vaevae.
17 O au à, e haafeò i te koekoe o te poì Ekipito.
Ma hope o ôtou, e taha âtou io he tai.
E haakāìètia au e te hakaìki Faraone,
to īa tau pūpū kape, to īa tau pāriri, to īa tau ihovare.
18 E ìte to Ekipito o au te Fatu Etua,
ia pao i te tuàki te hakaìki Faraone me to īa tau pāriri
me to īa tau pūpū kape piki ihovare.
19 Enā ma mua o te pāpua o te tau tama Iraene
te anera o te Etua ; ua hee īa i hope atu.
Hua mea te kohu keekee te i ūtaì i te pūpū tama Iraene ;
ua hee īa i hope atu.
20 Ua tū te kohu keekee i vāvena o te pāpua
o te tau kape Ekipito me te pāpua o to Iraene.
I te tūmoe, e ùa hakatu hua kohu :
he pō keevō i te kēkē Ekipito, he àma pupuà i te kēkē Iraene.
I te pō, u te e haatata mai to Ekipito me to Iraene.
21 U hapai Moite i te ìma ma ùna o te tai.
Ma te tiàtohu o te pō, ua puhi te Etua i te metani oko
me i te kēkē tihena o te òumati.
Ua hee pororō nui te tai, vahitia ma vāvena.
22 Ua taha atu to Iraene paìpaì koè te vaevae.
Ua tū anaè te tai me he pā i te ìma oko,
me he pā i te ìma aèaè.
23 U tatai i to Iraene te poì Ekipito,
te hakaìki Faraone, me to īa tau ihovare,
to īa tau pāriri, to īa tau pūpū kape.
Ua tihe âtou paotū i vāvena o te tai.
24 I te hāhakateiao, me i vāvena anamai o te kohu,
u tiòhi mai te Fatu i te tau pūpū kape Ekipito.
U haahina te Fatu ia âtou.
25 U haakati Īa i to âtou pāriri, he mea hana nui te aahi atu.
U peàu to Ekipito : « A hihiki tātou i mua o Iraene.
U tōua te Fatu, e toko ana ia âtou. »
26 U peàu te Fatu Etua ia Moite :
« A hapai i to òe ìma i ùna o te tai.
A hua anamai te tai ma ùna o te tau kape Ekipito,
to âtou pāriri, to âtou poì piki ihovare. »
27 U hapai Moite i te ìma ma ùna o te tai.
I te pōpōuì tika, ua hua te tai i to īa kōava.
U hihiki to Ekipito.
Ua tomi te Fatu ia âtou io he take o te tai.
28 Ua fiti te tai. U tomitia te tau pāriri,
te poì piki ihovare, te tau pūpū kape o Faraone,
te i tohuti ma hope o te tau tama Iraene.
Aòè e tahi aneiho i toe atu.
29 O te tau tama Iraene,
ua taha atu âtou paìpaì koè nā vaevae,
me he pākeâ te tai i to âtou ìma oko me te ìma aèaè.
30 I hua â, u haapohoè te Fatu ia Iraene
me i te îìma o te tau Ekipito.
I te hiku o te tai, ua ìtemata Iraene
i te puke tino tūpāpaù o te poì Ekipito.
31 A tahi nei, ua ìte Iraene i te hana mana o te Fatu Etua
te i haahina i to Ekipito.
U pakaihi me te haametaù te mataèinaa Iraene i te Fatu.
U haatià âtou i te Fatu Etua, ia Moite ta īa tāvini.
15,1 Ua hahi Moite me te tau tama Iraene i te Fatu Etua,
e hīmene ana pēènei :
HĪMENE A MOITE = Ehoto 15, 2, 3-4, 5-6, 10a-11, 17
A hahi tātou i te Fatu, u pupuà to Īa kāìè ; o te Fatu to tātou ìi. 15,1a
2 O te Fatu tu ù ìi. No Īa tu ù hīmene hahi.
O te Fatu tu ù Etua, te i haapohoè mai.
Ua faì au i to Īa òno nui.
U haatiketike au i te Etua o to ù tupuna.
3 O te Fatu te toa mana io he tōua,
He Fatu Etua to Īa inoa.
4 U tioà Īa io he tai i te pāriri o Faraone,
Io he tai, u haanaò Īa i to Ekipito tau kape.
5 Ua tomitia âtou io he peteò,
Ua kaò me he keâ io he take o te tai.
6 E te Fatu e, ua mana to Òe ìma,
U haapaìha i te poì e tōtōua me Òe.
10 Ua puhi te Fatu : ua tomitia âtou io he moana.
11 O ai te ètua e kiko me Òe, e te Fatu e ?
O ai e tūtū me Òe, te Peàto nui,
Te tumu o te mana haahopo i te ènata ?
17 U aahi mai Òe ia âtou me te tanu io he fenua
I ùna o te tuaivi ta Òe i haataetae.
E te Fatu e, oiana te taha o to Òe noho,
Te faè tapu ta Òe i haatū, e te Fatu Etua e.
4. - TETAUTINA O TE PEROFETA ITAIA 54, 5-14
Oia nei ta te Fatu Etua i peàu ia Ierutaremi :
5 He āhana no òe te Etua te i pēpena ia òe.
O te Fatu o te aomāàma, to Īa inoa.
He Haapohoè no òe te Etua peàto no Iraene.
O te Etua o te fenua ia ôtoa, to Īa inoa.
6 E Ierutaremi e, te vehine titiitia, haameetia,
E vevaò hakaùa te Etua ia òe.
U peàu te Fatu Etua pēènei :
« E aha e titii te hoa mātiri
i ta īa vehine vaetia i te ava hou te tino ? »
7 U haatūhaa au ia òe no te ava poto.
Ma òto o to ù kāòha nui ia òe, e haakātahi mai hakaùa.
8 Mēìa i tu ù peê, u haapiko i tu ù mata me io òe.
Ma òto o tu ù kāòha paona koè, u matavaièi mai hakaùa.
Oia te Teào o to òe Haapohoè, te Fatu Etua.
9 Me he mea i te tai kākiu i mua o Noa,
u haatiàtohu au i tu ù teào pēènei :
umoì e haanaòtia te fenua i te vaiā ;
atii tēnei, u haamau i tu ù teào :
Aòè au e peê ia òe.
Aòè e oonaì ma te haametaù ia òe.
10 E aha à e takitumutia te tau tuaivi,
e aha à e feùu te tau pūkei,
u te e huìkē to ù kāòha ia òe.
U te e hakaēa tu ù Piimau o te moû me òe.
Oia nei te Teào o te Fatu Etua te i kāòha ia òe.
11 E Ierutaremi e, òmua u haameetia,
u haapūpūkinatia, u titiitia òe.
Enā e haakeàpa au i to òe pā me te tau keâ menia èreère.
He tau keâ pūkiki te puke keâ o to òe tūàka.
12 E pupuà to òe pā i te tau keâ pīàma pōnionio i te òumati.
He mea karahi to òe tau avaputa.
13 E haamāàma te Etua iho i ta òe tau tama.
E noho anatu to te Etua moû i ùna o âtou.
14 E tohe mau òe i òto o te toitoi.
E haamemaotia me io òe te tau kōfii e òomi mākaka.
Aòè òe e haametaù hakaùa,
e koè ai te mea haahopo.
TARAMO 30 (29) 3-4, 5-6b, 6c.12, 13,
U haatiketike au ia Òe, e te Fatu e, te i haatū ia ù. 30,2
3 I te ava e taaàu to ù èo io Òe,
E te Fatu, tu ù Etua e, u haameitaì mai.
4 Ua taki mai Òe me io he ōpata,
U haapohoè mai me io te ana o te tūpāpaù.
5 A hahi i te Fatu, ôtou, e te poì haatià e.
A haahuaèkaèka ma te haaòno nui i to Īa inoa.
6 He ava poto to te Etua peê,
Ma te òa o te pohoè to Īa haameitaì.
I te ahiahi, e tahe te vaimata,
Ma te pōpōuì te taaàu koakoa.
12 U haaìò Òe i tu ù uēuē me he â koìna.
Ua veti i to ù kahu pēpē no te uhi mai me te koakoa.
13 A taaàu i te koakoa, e tu ù kuhane.
Umoì Òe e mutu pu, a haakoìna no te Fatu.
E hahi au hakaēa koè i te Fatu, tu ù Etua.
U haahuaèkaèka au ia Òe, e te Fatu e.
5. - TETAUTINA O TE PEROFETA ITAIA 55, 1-11
1 Oia nei te Teào o te Fatu Etua :
E mate ôtou i te maovai ? A mai. A inu.
Moni koè ôtou ? A hoko pu.
A kai. A inu i te vino, i te vaiū.
2 Umoì e haapao pu i ta ôtou moni hana
no te kai i te înaì haamaòna koè.
3 A haaòno mai. E maòna ôtou i te înaì mōmona.
A haaòno mai. Mave mai. E pohoè meitaì ôtou.
E haatoitoi au me ôtou i te Piimau paona koè.
E ìò hoì ia ôtou te taetae o Tavite.
4 Ua haamau au ia īa he ènata no ù i vāvena o te tau mataèinaa,
te aahi, te vivini o te tau ati.
5 O òe à, e vevaò òe i tītahi ati aòè òe i ìte ;
e tihe mai io òe tītahi ati kē mēìa i to òe Fatu Etua,
te Peàto Nui o Iraene te i haakāìè ia òe.
6 A ìmi ôtou i te Etua, oia te ava e âvei me Īa.
I te ava nei, a pure ôtou i te Etua,
u tata èka me ôtou.
7 A hua mai te ènata mākaka me io to īa aanui hukaka.
A titii te ènata ìno i to īa maakau pē.
A hua io te Etua te i hakāòha mai ia īa.
8 He mea kē hoì te maìmaì o te Etua,
mea kē to te tau ènata.
He mea kē te hakatu o te Etua,
mea kē to te tau ènata.
9 Atii te tiketike o te àni ma ùna o te fenua,
atii te hōhonu atu o te maakau o te Etua
ma ùna o te maakau ènata.
10 Ia topa te ūa me te nive me io he àni,
u haakutaù âtou me te haatapavaù i te fenua.
U haatupu âtou i te teitā, haahua i te puku
no te tāfai i te tau ènata me te tau manu e kai ana.
11 Atii hoì te teào ta ù i haaìte atu :
E hana tēia teào i te hana ta ù i maìmaì.
U te e hua io ù to ù teào puku koè.
HĪMENE = ITAIA 12, 2, 4b-e, 5b-6a.c,
O te Fatu Etua te vaipuna o te pohoè ; a èkaèka tātou, a taaàu i te koakoa ! 12,3
2 O te Fatu Etua tu ù Haapohoè.
U haatià nei au, haametaù koè.
O te Fatu Etua tu ù ìi. E hīmene au ia Īa.
Io te Fatu te tumu o to ù pohoè.
4 A haahuaèkaèka i te Fatu. A hahi i to Īa inoa,
A faì atu io te poì êteni i to Īa tau hana mana.
A haaìte atu : he Tiketike to Īa inoa.
5 A haatani i te pū no te hahi i te Fatu.
Ua hana hoì te Fatu i te hana mahaò.
U mevaha to Īa òno nui ma nā fenua vii pu.
6 E Tiona e, a èkaèka, a taaàu i te koakoa.
U tiketike te Fatu Etua i vāvena o ôtou.
6. - TETAUTINA O TE PEROFETA PARUKO 3, 9-15.32-38 --4, 4
9 E te mataèinaa Iraene,
a haaòno i te teào haameitaì i te pohoè.
A apuu i te teào haamāàma ia òe.
10 E to Iraene, no te aha ua noho òe
i te fenua o te tau ènata e tōtōua me òe ?
No te aha ua ìò òe he kooūa i te fenua hāoè ?
11 Ua havatia òe ma te haatukia me te tino tūpāpaù.
U tetautia i vāvena o te huaa mamate i Havaiki.
12 Oia nei te piò : u titii òe i te puna o te Māàma.
13 Anoa òe i taha ma no he aanui o te Etua,
ua noho òe me te moû i to òe fenua.
14 A haamaakau òe i hea te māàma, te ìi, te ìtetina.
Ma èià, e ìte òe i hea te tumu o te pohoè òa,
i hea te àma e haatāhakahaka i to òe kikomata,
i hea te moû.
15 E noho te Māàma i hea ? O ai te i ìte ?
O ai te i uu io te pāòto o to te Māàma taetae ?
32 O te Etua te i tuhi i te aanui o te Māàma.
Ua ìte Īa i te tau mea ia ôtoa.
Ua ìmi Īa i te tau mea paotū.
U kānea Īa i te aomāàma vii pu.
U haapī Īa i te fenua me te tau ânimara kē, ânimara kē.
33 Ua pahi Īa i te àma te i hee atu, hee atu paona koè.
U vevaò Īa i hua àma, ua taha mai,
e aotahi ana me te emièe.
34 U tāmiomio te tau fetū i te pō, me he mea u koakoa âtou.
35 U vevaò te Etua ia âtou,
u haahua âtou e peàu ana : « Eīa au nei. »
U keàpa âtou no te haaèka i te i pēpena ia âtou.
36 O Īa hoì to tātou Etua.
Aòè te Etua kē i mua o Īa.
37 Ua ìmi Īa i te aanui o te Māàma.
Ua tuu Īa i hua aanui ia Iakopo, to Īa tāvini,
ia Iraene ta Īa i haataetae.
38 Ma èià, u haaìte ia Īa iho i te Māàma i no he fenua nei.
Ua noho te Māàma i vāvena o te tau ènata.
4, 1 He Teào o te Etua hua Māàma.
Oia te Ture te i noho mau ma te tau tai anatu.
E pohoè te tau ènata e aotahi i hua Teào.
E mate nui te tau ènata e titii i hua Teào.
2 A hua mai, e Iakopo e.
A apuu me te aotahi mau i te Teào.
A tūìna te Teào i te aanui e aahi ia òe
io he pohoè kanahau.
3 Aua e too pu te mataèinaa kē i to òe kāìè.
Aua e fao te ati kē i to òe iho taetae.
4 Oho te ìi, e Iraene ! A oko òe !
Ua ìte tātou i te mea te i haaèka i te Etua.
TARAMO 19 (18) 8, 9, 10, 11,
E te Etua e, io Òe te teào e aahi atu i te pohoè paona koè.
cf. In 6,69
8 U toitoi noa te ture o te Fatu,
Na īa e haahou i to tātou ìi.
U tiàtohu te Teào o te Fatu
Te i haamāàma i te poì avai noa.
9 U toitoi te Teào o te Fatu,
E haakoakoa âtou i te koekoe.
U hōata te maìmaì o te Fatu,
E haakeàpa i te mata o te ènata.
10 U taìtaì te pakaihitina o te Etua,
E noho mau anatu to īa tau puku.
U toitoi te teào paotū o te Fatu :
He māàma âtou no te haavā i te ènata.
11 U taetae atu te maìmaì o te Fatu
I te puke monikiki, te kuà o te monikiki.
He mānini atu te Teào o te Etua
I te mānini tikauè e tahe me io he tīpapa.
7. - TETAUTINA O TE PEROFETA EHEKIERE 36, 16-28
16 Ua òno au i te Teào o te Fatu, pēènei à :
17 « E te ènata e, i nā pō e noho nei te mataèinaa Iraene
io to âtou fenua, u havatia hua fenua e âtou
mēìa i to âtou hakatu faufau me to âtou hana pē.
18 U haatopa au ma ùna o âtou i te tuki pē,
mēìa i te toto ta âtou i kiini nei,
mēìa i te tau ètua tīkoe te i haameìe i hua fenua.
19 I haatavavā ai au ia âtou i vāvena
o te tau mataèinaa êteni
te i haahiki kē ia âtou ma he fenua kē anatu.
U haavā au ia âtou vāàna i to âtou hakatu me te hana.
20 I vāvena o hua tau mataèinaa êteni ta âtou i hee atu,
u haameìe âtou i tu ù inoa tapu.
U peàu te tau ènata pēènei :
« Oia nei te mataèinaa o te Fatu Etua
te i titiitia me io to Īa fenua. »
21 Atià, u maìmaì au e haakāìè atu i tu ù inoa tapu
ta te ati Iraene i haameìe
io he tau fenua, i èià u tavavā âtou.
22 A peàu atu òe i te mataèinaa Iraene,
pēènei te Teào o te Fatu Etua :
« E to Iraene, a haaòno mai.
Aòè no ôtou te tau hana e hana atu au,
atià no te haakāìè i tu ù inoa
ta ôtou i haameìe io te tau fenua i hee atu ai ôtou. »
23 Ua tihe mai te Teào a te Fatu Etua, pēènei :
« E haaìte au he mea tapu to ù inoa tiketike
te i haameetia e te tau mataèinaa êteni mēìa ia ôtou.
E vivini te tau mataèinaa i te mea : o au te Fatu Etua.
Na ù aneiho e haatapu i to ù inoa.
24 E vevaò au ia ôtou me i vāvena o te tau mataèinaa
e haaputuputu au ia ôtou
te i takitia me io te tau fenua paotū.
E haahua au ia ôtou i to ôtou fenua tumu.
25 E kiini au ma ùna o ôtou i te vai mā, no te haamā ia ôtou.
E haataìtaì au i to ôtou tau mikeo paotū
me to ôtou tau hana pakaihi teka i te tau ètua tīkoe.
26 E vaièi atu au ia ôtou i te koekoe hou.
E tuu au ia ôtou i te kuhane hou.
E taki au i to ôtou koekoe keâ no te tuu atu i te koekoe kiko.
27 E haaihi au i òto o ôtou i to ù Kuhane
etià e aotahi ôtou i to ù maìmaì
me te haamau io he koekoe i to ù tau teào.
28 E nonoho ôtou io te fenua ta ù i tuu atu i to ôtou tau tupuna.
E ìò ôtou e mataèinaa no ù. He Etua au no ôtou. »
- Me papatematia tau tama hou,
HĪMENE = ITAIA 12,2, 4b-e, 5b-6a.c, (a tiòhi i te tetautina e 5)
Akoè à
TARAMO 51 (50) 12-13, 14-15, 18-19
E te Etua e, a pēpena i òto o au nei, i te koekoe hou. cf. 51,12
12 A pēpena i òto o au nei i te koekoe taìtaì.
A haahou i to ù kuhane, a haamau i to īa meitaì.
13 Umoì e titii atu ia ù memao me io Òe.
Umoì e taki me i òto o au i to Òe Kuhane Meitaì.
14 A haakoakoa ia ù to Òe haapohoè mai.
A haamau i te èkaèka io to ù koekoe.
15 E hakako au i to Òe aanui i te poì mikeo.
E hua mai io Òe te poì i hukaka nei.
18 No tu ù ùtuna atu i te hēana, aòè e apuu mai.
Me kānea au i te hēana pūovo i te ahi, u titii Òe.
19 O te koekoe unu i te uē, oia te hēana e kaki Òe.
O te koekoe unu i te uē me te hopo mikeo,
Te ùtuna hēana e haatāvaè ia Òe, e te Fatu e.
- Me he mea aòè he papatema
TARAMO 42 (41) 2, 5bcd ; 43 (42) 3, 4,
Io te Etua to ù hīa, io te Etua haapohoè. Afea e koàna ia ù te haatata me te tū i te aò o te Etua ?
cf. 42,3
1 Me he mea te keukeu i mao i te vai pohoè,
2 Atii e ìmi nei au ia Òe, e te Fatu, tu ù Etua e.
5 E taha au i vāvena o te faètoa nui
No te tomo io te faè o te Etua.
Na ù e haatee ia âtou e fiti ana,
E hahi me te taaàu koakoa i te Etua.
3 A pahi mai i to Òe māàma me te tiàtohu,
Na âua e haatee i to ù tahatina,
Te aahi ia ù i ùna o to Òe tuaivi,
Tihe atu io te taha tapu i èià e noho ai Òe.
4 E haatata au pii o te fātaa pure o te Etua,
Te Etua, te tumu o to ù koakoa.
E haahuaèkaèka au me te hīmene kitā,
Ia Òe, e te Etua, tu ù Etua e.
TETAUTINA A PAURO PEÀTO I TO ROMA 6, 3b-11
E tu ù tau tunane tuehine,
3 ua ìte hoì ôtou u papatematia tātou
no te haatahi me te Kirito Ietu
i òto o to Īa matena, to tātou papatema.
4 Ua tomitia tātou kātahi me Ietu Kirito
mēìa i te papatema te i haatahi ia tātou
me to Ietu Kirito matena.
No èià, me he mea ua tū hakaùa Ietu Kirito
me i vāvena o te huaa mamate ma te mana nui o te Motua,
atii e pohoè ai me tātou no te hakatu pohoè hou.
5 Me haatahi tātou me Ietu ma te matena kātahi me Īa,
e haatahi hoì tātou me Īa
ma te pohoè hakaùa hakātahi me Īa.
6 Ua ìte meitaì tātou i te mea nei :
u pāokapekatia kātahi me Ietu
to mua hakatu pohoè o tātou ènata mikeo,
vāàna e haakoè te Etua i te hīa pē o te tino.
Ma èià, u te e vivini mai hakaùa ia tātou te mana o te mikeo.
7 Me mate nui hoì te ènata, ua koè to īa tāvini atu i te mikeo.
8 Me mate tātou kātahi me te Kirito,
e haatià mau tātou e pohoè hoì kātahi me Īa.
9 Ua ìte tātou i te mea nei :
ua tū hakaùa te Kirito me i vāvena o te poì mamate,
ua koè te mana o te matena i ùna o Īa.
Koè nui e hina hakaùa te Kirito i te matena.
10 Ua mate nui Ietu, ua koè te mana o te mikeo i ùna o Īa.
Ua àva to Īa matena no te tau tai hakatahi.
I tēnei, o to Ietu pohoè, he pohoè no te Etua.
11 Atii me ia ôtou. A kaituto ia ôtou iho,
me he poì mamate ôtou :
ua koè te mana o te mikeo i ùna o ôtou.
Atià, he poì pohopohoè nei ôtou
no te haaèka i te Etua kātahi me Ietu Kirito.
ALLELUIA ALLELUIA
TARAMO 118 (117) 1.4, 16-17, 22-23,
1 A haahuaèkaèka i te Fatu : u matavaièi mai Īa.
Paona koè to Īa kāòha.
4 A peàu te poì pakaihi i te Fatu :
Paona koè to Īa kāòha.
16 U tuàki te ìma oko o te Fatu,
Ua mana nui te pūhāìma o te Fatu.
17 Aòè e mate havaiki, e pohoè meitaì au,
No te haaìte atu i te tau hana a te Fatu.
22 O te keâ i titiitia e te poì ato faè,
O hua keâ avai noa, ua ìò he keâtaa.
23 Oiana te hana o te Fatu,
E hana mahaò haapekahi ia mātou.
No te Èhua A
EVANERIO O IETU KIRITO VĀÀNA E MATEO 28, 1-10
1 Ma muì o te Tāpati, i te pōpōuì māèhuèhu
o te â to mua o te âtapu, ua hee Maria Matarena
me tītahi Maria kē io te ana tūpāpaù tiòhi.
2 Enā, u feùu oko te fenua,
ua iho mai hoì te anera o te Fatu me io he àni.
E haatata mai ana, ua huì te anera i te keâ
me to īa kaapee ma ùna o hua keâ.
3 U hakatu to īa mata me he uià,
ua māìta me he nive to īa kahu.
4 Mēìa i te haametaù, u pūpūkina te tau kape tiaì,
mei mate nui âtou.
5 Atià, u pohā te èo o te anera me te peàu i nā vehine :
« Umoì ôùa e haametaù.
Ua ìte au e ìmi nei ôùa ia Ietu te i pāokapekatia.
6 Aòè Īa înei. Ua tū hakaùa
me he mea ta Īa i peàu atu.
A mai, a tiòhi ôùa i te taha o to Īa moe.
7 I tēnei, a hee ponihoo me te peàu i to Īa tau kouâ :
ua tū hakaùa Īa me i vāvena o te huaa mamate.
Enā Īa i te Fenua Karirea i mua o ôtou.
I èià e ìte ôtou ia Īa.
Enā, ua òno ôùa i te teào hou. »
8 U titii ponihoo âua i te ana tūpāpaù
me te haametaù me te koakoa nui.
U kokouō âua no te àve atu
i te teào hou io to Īa tau kouâ.
9 Eīa, ua tihe mai Ietu e haaâvei me hua mou vehine
me to Īa peàu : « Kāòha ôùa ! »
U haatata mai âua me Ietu.
Ua too âua i to Ietu mou vaevae, ua moe haatona i to Īa aò.
10 U peàu Ietu ia âua : « Umoì ôùa e haametaù.
A taha atu me te peàu i to ù tau teina :
a hee âtou i te Fenua Karirea. I èià e ìte âtou ia ù. »
No te Èhua B
EVANERIO O IETU KIRITO VĀÀNA E MAREKO 16, 1-8
1 Ma hope mai o te Tāpati, o Maria Matarena,
o Maria te kui o Iakopo, o Tarome, ua hoko mai âtou
i te mēmau kekaa no te haapaù i te tino tūpāpaù o Ietu.
2 I te pōpōuì tika nui māèhuèhu, i te â to mua o te âtapu,
ua tihe âtou io he ana tūpāpaù. U pōpōuì nui.
3 U peàpeàu atu peàpeàu mai âtou :
« Na ai e huì atu i te keâ me i mua o te avaputa o te ana ? »
4 Atià, e feau ana, ua ìte âtou
ua huìtia hua keâ : he keâ kaùoo.
5 Ua uu âtou i òto o te ana tūpāpaù.
Ua ìte âtou e tahi māhaì e noho ana i te kēkē ìma oko,
he kahu òa, he kahu māìta to īa.
U emièe âtou me te haametaù.
6 U peàu hua māhaì ia âtou : « Umoì ôtou e haametaù !
Ua ìmi ôtou ia Ietu no Natareti te i pāokapekatia.
Ua tū hakaùa Īa. Aòè Īa i înei.
Oia nei te taha i tuu âtou ia Īa.
7 A tataha atu.
A peàu i to Īa tau kouâ atii me ia Petero,
enā Īa i te Fenua Karirea ma mua o ôtou.
I èià, e ìte ai ôtou ia Īa
me he mea ta Īa i peàu atu ia ôtou. »
8 Ua uu âtou i vaho
me te hiki anamai me io he ana tūpāpaù.
U emièe hoì âtou, u pūpūkina to âtou koekoe.
Aòè âtou i faì atu i te ènata e tahi
mēìa i te nui oko o to âtou haametaù.
No te Èhua C
EVANERIO O IETU KIRITO VĀÀNA E RUKA 24, 1-12
1 I te â to mua o te âtapu, ma te oìoì tika,
ua tihe te mou vehine io he ana tūpāpaù,
e àve ana i te mēmau kekaa kāneatia e âtou.
2 U koàna ia âtou te keâ huìtia
me i mua o te ana tūpāpaù.
3 Ua uu âtou i òto he ana.
Aòè i koàna mai ia âtou te tino o te Fatu Ietu.
4 Ohia ua pē âtou i te mahaò, enā i mua o âtou
nā ènata tokoùa tāpītia me te kahu haapōnionio.
5 Ua hemo âtou i te haametaù me to âtou oha i àò te mata.
U peàu nā ènata ia âtou : « Umaha te ìmi o ôtou
i vāvena o te huaa mamate i tēia i pohoè ?
6 Aòè Īa înei. Ua aa Īa.
A haamāmaakau ôtou i to Īa teào
i te ava ua noho Īa i te Fenua Karirea.
7 U peàu Īa e haaìòtia te Tama a te ènata
i te îìma o te poì mikeo pāokapekatia.
Ma te pō toù, e tū hakaùa Īa. »
8 A tahi a haamāmaakau âtou i to Ietu tau teào.
9 Ia hua âtou me io he ana tūpāpaù,
ua faì atu i nā mea hakatahi
i te Tīònohuu ma tahi me te tau ènata kē paotū.
10 Oia nei te inoa o hua mou vehine :
O Maria Matarena tītahi, o Ioana tītahi,
o Maria, te kui o Iakopo tītahi.
Enā me tahipito vehine kē me âtou
te i peàu hua mea aneiho i te tau Àpotoro.
11 E auana he teào paèpaèa ta te tau vehine,
aòè i haatià te tau Àpotoro ia âtou.
12 Atià, ua tū Petero me to īa tohuti atu io he ana tūpāpaù.
Ua oha īa. Ua ìte īa i òto, he tau tapa anaè.
Ua hua mai īa io he faè.
U mahaò īa e kaituto ana i te mea i haapaotia.
TE KOÌNA NUI O TE PAKATE
TETAUTINA O TE HĀMANI HANA A TE TAU ÀPOTORO
10, 34a.37-43
Io te faè o te kereturione Korenio,
34 u pohā te èo o Petero me to īa peàu pēènei à :
37 « Ua ìte ôtou i te mea i haapaotia i te Fenua Iutea vii pu,
i te Fenua Karirea te tīmatatina,
ma muì o te papatema te i haaìtetia atu e Ioane.
38 Ua ìte ôtou pēhea u haapaù te Etua ia Ietu no Natareti
me te Kuhane Meitaì me te mana.
Ua taha Ietu e hana i te hana meitaì,
u haapohoè Īa i te tau ènata paotū
te i haamōèhutia e te Tiaporo. O te Etua hoì me Ietu.
39 O mātou te tau ènata haatiàtohu i to Īa tau hana paotū
io he fenua ati Iuta atii me Ierutaremi.
O hua Ietu ta âtou i haamate ma te tauèva ia Īa uo he peka.
40 Atià, na te Etua e haatū hakaùa mai ia Īa,
ma te toù o te pō me te ao no te haaìte atu ia Īa aneiho,
41 aòè i te mataèinaa paotū,
atià i te tau ènata i vaetia e te Etua,
o mātou à te i kai me te inu me Īa,
ma muì o to Īa Tūhakaùatina
me i vāvena o te huaa mamate.
42 U peàu mai no te haaìte atu i te mataèinaa
me te haatiàtohu i tēnei teào : O Īa te i haatūtia e te Etua
no te haavā i te poì pohoè me te huaa mamate.
43 U haatiàtohu te tau perofeta paotū ia Ietu, e peàu ana :
ma to Īa inoa, a vevetetia te tau mikeo
o te ènata u haatià ia Īa. »
TARAMO 118 (117) 1.4, 16-17, 22-23
Oia nei te â haatoitoitia e te Fatu. He â koìna te â o te koakoa, alleluia. cf. 118,24
1 A haahuaèkaèka i te Fatu : u matavaièi mai Īa.
Paona koè to Īa kāòha.
4 A peàu te poì pakaihi i te Fatu :
Paona koè to Īa kāòha.
16 U tuàki te ìma oko o te Fatu,
Ua mana nui te pūhāìma o te Fatu. »
17 Aòè e mate havaiki, e pohoè meitaì au,
No te haaìte atu i te tau hana a te Fatu.
22 O te keâ i titiitia e te poì ato faè,
O hua keâ avai noa, ua ìò he keâtaa.
23 Oiana te hana o te Fatu,
E hana mahaò haapekahi ia mātou.
TETAUTINA O TE HĀMANI A PAURO PEÀTO I TO KOROHA
3, 1-4
E tu ù tau tunane tuehine,
1 mēìa u pohoè hakaùa ôtou kātahi me te Kirito,
a ìmi i te taetae te io he àni, i èià hoì te Kirito,
e noho ana i te ìma oko o te Etua.
2 A kōhoà aneiho i te mea te io he àni,
umoì i te mea te io he aomāàma nei.
3 Ua mate ôtou kātahi me te Kirito.
To ôtou hakatu pohoè hou, u te e haaìtetia atu nei,
me he mea u te e haaìtetia to te Kirito :
u hakanātia i òto o te Etua.
4 O to ôtou hakatu pohoè hou e tahi me to te Kirito.
No èià, i te â e haaìte te Kirito ia Īa iho,
e tū ai ôtou me Īa i òto o te kāìè Etua.
Akoè à
TETAUTINA O TO MUA HĀMANI A PAURO PEÀTO
I TO KORINETIA 5, 6b-8
E tu ù tau tunane tuehine,
6 ua ìte ôtou i te teào haapupuà :
A kāvohi i te mana o te mea haapupuhi me te faraoa tee,
e pupuhi te faraoa paotū.
7 A haataìtaì hoì ia ôtou ma te taki me io ôtou
i te mea haapupuhi pē, ma èià he faraoa tee hou ôtou.
Na te mea ôtou, he faraoa tee hou haapupuhi koè tia.
U ùtunatia hoì to tātou Pakate e te Kirito.
8 A faì tātou i te Koìna Pakate,
umoì me te mēmau haapupuhi kākiu,
haapupuhi pē, haapupuhi teka.
Atià, a faì ôtou i te koìna me te faraoa tee
o te toitoi me te tiàtohu,
ia hoì te faraoa haapupuhi koè tia.
ALLELUIA ALLELUIA
1 Ko .5,7-8
U ùtunatia hoì to tātou Pakate, te Kirito. Oia nei te kainamau o te Fatu. Mave mai. A haamaòna tātou me te koakoa.
EVANERIO A IETU KIRITO VĀÀNA E IOANE 20, 1-9
1 I te â to mua o te âtapu, i te pōpōuì tika,
hāhakateiao, ua tihe Maria Matarena io he ana tūpāpaù.
Ua ìte i te keâ, takitia me io he ana.
2 A tahi a tohuti īa io Timone Petero
me tēia kouâ i haataetaetia e Ietu.
U peàu ia âtou :
« U tootia te tino o te Fatu me io he ana tūpāpaù.
Aòè mātou i ìte i hea te tuutia. »
3 Ua hee atu Petero me tītahi kouâ
me to âua tihe io te ana tūpāpaù tiòhi.
4 U tohuti nātoa amana tokoùa âua.
Atià, ua tihe te kouâ òmua ia Petero
mēìa i te koi o to īa vaevae.
5 Ua oha me to īa ìte i òto o te ana
i te tapa fāfī i te tino, tuutia ma ùna o te tohua.
Atià, aòè īa i uu i òto o te ana tūpāpaù.
6 Ua tihe Timone Petero ma muì o īa.
Ua uu i òto o te ana me to īa ìte,
ma ùna o te tohua, i te tapa fāfī i te tino
7 me te tapa tomi i to Ietu upoo.
Aòè i tāpapatia hua tapa me to mua tapa te i fāfī i te tino.
U pikaotia hoì i taha kē.
8 A tahi a uu i òto te kouâ kē te i tihe òmua ìka.
Ua ìte īa. U haatià.
9 Aòè i vivini hoì âua i te Hāmani tapu e peàu ana :
e tū hakaùa Ietu me i vāvena o te huaa mamate.
Akoè à, i te pure meta ahiahi Pakate :
EVANERIO O IETU KIRITO VĀÀNA E RUKA 24, 13-35
13 I hua â to mua o te âtapu, ua hee nā kouâ tokoùa o Ietu
io he pāpuafaè, o Emau te inoa.
E ùa hora nehe te tahatina vaevae me i Ierutaremi.
14 U teàteào âua no tenā tau mea paotū i paotia.
15 Ohia u teào atu teào mai âua,
u haatata mai Ietu iho me to Īa taha atu me âua.
16 E aha à u tiòhi âua ia Īa, u haakekehutia to âua mata,
oi ìte âua o Īa Ietu.
17 U peàu Ietu ia âua : « E aha te tumu
o to ôùa teào atu teào mai, e taha ana ? »
U hakaēa âua, u kekehu nui te mata.
18 U haahua tītahi, o Kereopata te inoa, me te peàu ia Ietu :
« O òe anaè i vāvena o te tau ènata e noho nei i Ierutaremi,
aòè i ìte i te tau mea i hanatia i nā pō i pao atu nei. »
19 U peàu Ietu : « E aha òa ? »
U peàu âua : « Te teào i ùna o Ietu no Natareti.
Ua tū Īa me he perofeta mana ma te hana, me te teào,
i mua o te Etua me te mataèinaa paotū.
20 Pēhea i haaìòtia no te haamate nui me te pāokapeka atu
e to mātou tau Tāuà nui me te tau hakaìki.
21 O mātou à, u tetaì mātou
e haapohoè Īa i te mataèinaa Iraene.
Tōtahi atu, oia nei te toù o te pō
me i te ava i te paotia i tēia mea.
22 Atià à, u haaemièe mai te mou vehine kē me mātou.
I te pōpōuì tika, ua hee âtou i te ana tūpāpaù.
23 Aòè i koàna ia âtou to Īa tino.
Ua hua me to âtou peàu mai : ua ìte âua i nā anera
te i peàu ia âtou u pohoè Ietu.
24 Ua hee io he ana tūpāpaù tahipito me i vāvena o mātou.
Ua ìte âtou i te mea i peàutia e te tau vehine.
O Ietu à, aòè âtou i ìte ia Īa. »
25 U peàu Ietu ia âua : « E te poì pōtano !
E te koekoe tevee i te haatià i te mea paotū
ta te tau perofeta i peàu atu.
26 Aòè à tēia memae e memae ai te Kirito
no te tomo io to Īa kāìè ? »
27 U haavivini Ietu i te teào i patutia i ùna o Īa
i òto o te Hāmani tapu, e tīmata ana
ma te haatuhuna i nā hāmani vāàna e Moite,
ma hope iho vāàna e te tau Perofeta hakatahi.
28 U haatata âtou me te pāpuafaè i èià to âtou tahatina.
Ua hano Ietu e hee memao atu.
29 Ua ūtaì âua ia Īa e peàu ana : « A noho me māua.
Ua èva te â. E naò ai te òumati. »
Ua uu Ietu no te noho me âua.
30 Ohia io he tapukai me âua,
ua too Ietu i te faraoa, u haahuaèkaèka,
ua vahi me te tuu atu ia âua.
31 U pepeùtia to âua kikomata : ua ìte âua ia Ietu.
Ua naò anamai Ietu me i to âua aò.
32 U peàpeàu atu peàpeàu mai âua :
« Aòè à u veàveà me he ahi to tāua koekoe
i te ava u teào Īa me tāua ma no he aanui ?
I te ava o to Īa haatuhuna i te Hāmani tapu ? »
33 Ua tū ponihoo âua no te hua i Ierutaremi.
U koàna mai ia âua te Tīònohuu ma tahi
putupututia me te huaa e noho ana me âtou.
34 U peàu âtou ia âua : « Tiàtohu nui.
Ua tū hakaùa te Fatu. U haaìte ia Īa iho ia Petero. »
35 Ua faì atu me âua i te mea i pao ma no he aanui,
pēhea to âua ìte ia Ietu i te ava vahitina o te faraoa.
TOMINIKA E ÙA O TE PAKATE
NO TE ETUA HAKĀÒHA NUI
TETAUTINA O TE HĀMANI HANA A TE TAU ÀPOTORO
2, 42-47
42 U tohe mau te tau tunane te haaòno
i te hakakotina o te tau Àpotoro
te haatūtaì atu tūtaì mai me he tunane tuehine,
te i vahi i te faraoa, te i haaputuputu no te pure.
43 Ua hemo i te haametaù te tau ènata paotū
mēìa i te nuitina o te tau hana mahaò
me te hakatu mana i haapaotia e te tau Àpotoro.
44 U haatahi te poì haatià ia ôtoa,
u àva atu àva mai âtou i to âtou tau mēmau paotū.
45 U haaìò i to âtou tau fenua me te taetae
i te hoko atu, no te tuha i te moni i koàna mai
vāàna i te mea e hei i tītahi, i tītahi.
46 I tēia â, i tēia â, ma òto o te koekoe e tahi,
ua tohe mau âtou te fiti io te Hiero o Ierutaremi.
Ua vahi âtou i te faraoa io to âtou iho faè.
Pī i te koakoa, u atekai âtou i te oà me te koekoe moû.
47 Ua hahi âtou i te Fatu.
O te mataèinaa paotū, u haataetae ia âtou.
I tēia â, i tēia â, na te Etua i haapii me âtou
i te poì haapohoètia.
TARAMO 118 (117), 1.4, 13-14, 19.21, 22-23, 24-25
Paona koè to Īa kāòha. 118,1
1 A haahuaèkaèka i te Fatu : u matavaièi mai Īa.
Paona koè to Īa kāòha.
4 A peàu te poì pakaihi i te Fatu :
Paona koè to Īa kāòha.
13 U tōtōua âtou me au, ua ketu mai e hano e haamate,
O te Fatu te i tiòhi meitaì i ùna o au.
14 Io te Etua to ù ìi, e hahi au ia Īa.
O Īa hoì te i haapohoè mai.
19 A pepeù i te avaputa o te Hiero,
E tomo au no te haahuaèkaèka i te Fatu.
21 U haahuaèkaèka au ia Òe te i haaòno mai,
E te Fatu e, o Òe tu ù Haapohoè.
22 O te keâ i titiitia e te poì haatū i te faè,
O hua keâ avai noa, ua ìò he keâtaa.
23 Oiana te hana o te Fatu,
E hana mahaò haapekahi ia mātou.
24 Oia nei te â i haatoitoitia e te Fatu.
He â koìna, he â o te koakoa no mātou.
25 E te Fatu e, a vaièi mai i te pohoètina.
E te Fatu e, a vaièi mai i te tuàkitina.
TETAUTINA O TO MUA HĀMANI A PETERO ÀPOTORO
1, 3-9
3 A haameitaìtia te Etua,
te Motua o to tātou Fatu Ietu Kirito.
Mēìa i to Īa hakāòha nui,
u haafānau hou te Etua Motua ia tātou
ma te haatū hakaùa ia Ietu Kirito
me i vāvena o te huaa mamate.
4 Oia te tumu u tetaì mau tātou i te tau taetae
ta te Etua e vaièi mai i to Īa mataèinaa.
Aòè e koè ai, aòè e haapētia, aòè e naò hua taetae.
Na te mea u tāpaetia io he àni no ôtou.
5 O ôtou aneiho ta te mana o te Etua e pāpua meitaì,
mēìa i to ôtou haatià i te Kirito.
U tetaì ôtou i te haapohoètina ta te Etua e haaìte
i te ava paona o te aomāàma nei.
Enā, e haatata mai īa.
6 No èià, ua pī to ôtou koekoe i te koakoa,
e aha à no te ava poto e haamemaetia ôtou
e te nuitina o te tau kōfii.
7 Na hua kōfii e haatiàtohu i to ôtou haatià.
U haapupuà hoì te ahi i te monikiki te i pao vave.
Tōtahi atu, na te tau kōfii e haatiàtohu i to ôtou haatià.
Ma èià, he mea nui atu to ôtou hahi, te kāìè, te haatiketike
i te â e haaìte mai hakaùa Ietu Kirito ia Īa iho.
8 U kāòha ôtou ia Īa, e aha à aòè i ìtemata.
U haatià ôtou ia Īa, e aha à i tēnei, aòè ôtou i ìtemata.
Ua pī i te koakoa to ôtou koekoe ; u te e àva te ponateào
no te haavivini i te tumu o hua koakoa me io he àni mai.
9 Na te mea, u haapohoè te Etua ia ôtou.
Oia hoì te mea i koàna mai ma to ôtou haatià ia Ietu Kirito.
ALLELUIA ALLELUIA
cf. In.20,29
Ua ìte Toma i te Fatu, u haatià īa.
Mamau te ènata i haatià ìte koè īa.
EVANERIO O IETU KIRITO VĀÀNA E IOANE 20, 19-31
19 I te ahiahi o hua â to mua o te âtapu,
u putuputu te huaa kouâ i òto he pāòto.
Ua pātia te avaputa na te haametaù i te poì ati Iuta.
Ua tihe anamai Ietu.
Ua tū anaè Īa i vāvena ahau o âtou.
U peàu Īa : « Ia ôtou te moû. »
20 E peàu ana i hua ponateào, u haaìte Ietu ia âtou
i to Īa nā îima me to Īa kaokao.
Ua pē i te koakoa te tau kouâ,
mēìa ua ìtemata âtou i te Fatu.
21 U peàu hakaùa Ietu : « Ia ôtou te moû.
Me he mea ua pahi mai to ù Motua ia ù,
atii me to ù pahi atu ia ôtou. »
22 Ia pao hua ponateào,
ua puhi Ietu i to Īa ao i ùna o âtou me te peàu :
« A haakoàna ia ôtou te Kuhane Meitaì.
23 To te tau ènata mikeo e vevetetia e ôtou, u vevetetia.
To te tau ènata mikeo e tāmautia e ôtou, u tāmautia. »
24 O Toma, te i vevaòtia Mahaka, o Titime ma he èo hereni,
tītahi o te Tīònohuu ma tokoùa kouâ,
aòè īa me âtou i te â u haaìte Ietu ia Īa iho.
25 U peàu tahipito kouâ ia īa : « Ua ìte mātou i te Fatu. »
U haahua atu Toma ia âtou :
« Me he mea aòè au e ìte io nā îima o Īa,
i te maki o te paapaa i te pāoka,
me he mea aòè au e tuu i tu ù manamana ìma
i òto o hua maki o te paapaa,
tu ù ìma i òto o to Īa ava kaokao,
aòè au e haatià. »
26 E vaù pō ma hope iho,
ua noho hakaùa te huaa kouâ io he faè.
O Toma tītahi me âtou.
Ua pātia te avaputa.
Ua tihe anamai Ietu.
Ua tū anaè Īa i vāvena ahau o âtou me te peàu :
« Ia ôtou te moû. »
27 I muì iho, u peàu ia Toma :
« A tuu înei i to òe manamana ìma ;
a tiòhi i to ù nā îima. A haatata i to òe ìma ;
a tuu i òto o to ù ava kaokao.
Umoì òe e pūtuì. A haatià. »
28 U haahua atu Toma ia Īa me te peàu :
« E tu ù Fatu e, e tu ù Etua e. »
29 U peàu Ietu ia īa :
« U haatià òe, e Toma e, mēìa i to òe ìtemata ia ù.
Mamau te tau ènata i haatià e aha à u te e ìtemata âtou. »
30 Mea nui te tau hana mana kē me te tau hakatu kē
ta Ietu i hana i te aò o to Īa tau kouâ.
Aòè âtou i patutia i òto o te hāmani nei.
31 U patutia hua tau mea nei, etià e haatià ôtou
o Ietu te Kirito, te Tama a te Etua.
Mēìa i to ôtou haatià, e pohoè ai ôtou ma to Īa inoa.
TOMINIKA E TOÙ O TE PAKATE
TETAUTINA O TE HĀMANI HANA A TE TAU ÀPOTORO
2, 14.22b-33
I te â Penetekote,
14 e tū ana Petero me te Tīònohuu ma tahi ma to īa kaokao,
u pohā te èo me te peàu pēènei à :
« E te tau ènata o te Fenua Iutea,
me ôtou nui e noho nei i Ierutaremi, a ìte meitaì,
a pepeù i to ôtou puaìna no te haaòno i to ù teào.
22 E to Iraene, a haaòno i tēnei teào :
U haatiàtohu te Etua ia Ietu no Natareti
ma te tau hana mana, hana mahaò me te hakatu mana,
me he mea ta ôtou i ìte i te ava ua hana Īa i vāvena o ôtou.
23 O hua ènata, u haamate ôtou ia Īa
ma te haapāokapekatia ma te îima o te tau êteni,
vāàna i te maìmaì o te Etua me i òmua naoti.
24 U haatū hakaùa te Etua ia Īa,
e haakoè ana i te memae o te matena.
Aòè e àva hoì te mana o te matena no te òomi ia Īa.
25 U peàu Tavite i ùna o Īa pēènei :
« Ua ìte anatu au i te Fatu i mua o au.
Enā Īa i to ù kaokao i te ìma oko, oa hina au.
26 No èià, u èkaèka to ù koekoe,
u hīmene me te koakoa to ù èo,
e moe ai to ù tino tūpāpaù i òto o te tetaìtina.
27 Na te mea, aòè e avai òe i to ù kuhane i Havaiki,
aòè e ao e hina i te pē to òe peàto.
28 U haaìte mai òe i te aanui o te pohoè,
e haapī òe ia ù i te koakoa me to òe tiòhi mai. »
29 E tu ù tau tunane tuehine,
a ao mai te peàu atu haametaù koè :
ua mate te Pateriareka Tavite, u tomitia.
E avai nei to īa menema io tātou.
30 He perofeta Tavite. Ua ìte īa i te teào ta te Etua
i haatiàtohu no te tuu i to īa nohona hakaìki
i tītahi o to īa huaa, to īa toto.
31 Ua ìte hoì Tavite i te Tūhakaùatina o te Kirito
ma mua e haapaotia. No èià, u peàu òmua
aòè i avaitia i Havaiki, aòè i pē to īa tino.
32 O Īa hua Ietu ta te Etua i haatū hakaùa.
O mātou paotū te tau ènata haatiàtohu.
33 U haakāìètia me to Īa noho i te ìma oko o te Etua.
Ua ìò ia Īa te Kuhane Meitaì te i peàutia,
vāàna i te hīa o to Īa Motua. I tēnei, u pōpahi Īa
i hua Kuhane me he mea ta ôtou i ìte me te òno.
TARAMO 16 (15), 1-2a, 7-8, 9-10, 2b.11
E te Fatu e, u haaìte mai Òe ia ù te aanui o te pohoè.
16,11
1 E tu ù Etua e, a tiaì meitaì ia ù.
O to ù hīa io Òe, tu ù taha maù.
2 U peàu au i te Fatu : O Òe tu ù Etua.
7 U haameitaì au i te Fatu, to ù māàma.
Me i te â, me i te pō tu ù vevaò ia Īa.
8 I mua o to ù mata, anatu te Fatu,
Ma to ù kaokao to Īa noho, u haametaù koè au.
9 Ua û i te koakoa to ù kuhane.
U èkaèka to ù tino, ua moe me te moû.
10 Aòè te Fatu e ao e hina au i te matena.
Aòè Īa e avai i to īa hoa e pē ai io he èpo.
2b Io Òe anaè to ù koakoa.
11 U aahi mai Òe ma no he aanui o te pohoè ;
I mua o to Òe mata te koakoa, te koakoa nui.
Ma to Òe kaokao te èkaèka paona koè.
TETAUTINA O TO MUA HĀMANI A PETERO PEÀTO 1, 17-21
E te tau tunane tuehine,
17 E pure ana i te Etua, ua apa ôtou i te inoa Motua ia Īa
te i haavā i te tau ènata paotū vāàna i to âtou hana,
koè te haataetae i tahipito, te haamee i tahipito.
A pakaihi hoì ôtou i hua Etua
ma te òa o to ôtou pohoè i te ao nei.
18 Ua ìte meitaì ôtou e aha te mea i vevete ia ôtou
me io te hakatu pohoè o to ôtou tau tupuna,
te i haaòomi mai ia ôtou me he poì haamōèhutia.
Aòè hoì te taetae avai noa, te monikiki, te monitea.
19 Atià à, o te toto o Ietu Kirito, utukoètia me te puke moni,
o Īa te Arenio o te Etua, teka koè, piò koè.
20 Epō te pēpena i te ao nei, me i òmua naoti,
ua vae te Etua ia Ietu no te haapohoè i te tau ènata.
I tēnei ava, te ava paona o te aomāàma,
e haaìtetia atu no to ôtou meitaì.
21 Ma io Ietu, u haatià ôtou i te Etua te i haatū hakaùa ia Īa
me i vāvena o te huaa mamate me te haakāìè ia Īa.
No èià, u haatià ôtou i te Etua aneiho,
atii me to ôtou tetaì i ta te Etua i peàu mai.
ALLELUIA ALLELUIA
cf. Rk.24,32
E te Fatu Ietu Kirito e, a haavivini mai Òe i te Teào o te Etua patutia io he Hāmani tapu. A veàveà to mātou koekoe me he ahi i te ava u teào mai Òe.
EVANERIO O IETU KIRITO VĀÀNA E RUKA 24, 13-35
I hua â to mua o te âtapu,
13 ua hee nā kouâ tokoùa o Ietu
io te pāpuafaè, o Emau te inoa.
E ùa hora nehe te tahatina ma he vaevae me i Ierutaremi.
14 U teàteào âua no tenā tau mea paotū i paotia.
15 Ohia u teào atu teào mai âua,
u haatata mai Ietu iho me to Īa taha atu me âua.
16 E aha à u tiòhi âua ia Īa, u haakekehutia to âua mata,
oi ìte âua o Īa Ietu.
17 U peàu Ietu ia âua : « E aha te tumu
o to ôùa teào atu teào mai, e taha ana nei ? »
U hakaēa âua, u kekehu nui te mata.
18 U haahua tītahi, o Kereopata te inoa, me te peàu ia Ietu :
« O òe anaè i vāvena o te tau ènata e noho nei i Ierutaremi,
aòè i ìte i te tau mea i hanatia i nā pō i pao atu nei. »
19 U peàu Ietu : « E aha òa ? »
U peàu âua ia Īa : « Te teào i ùna o Ietu no Natareti.
Ua tū Īa me he perofeta mana ma te hana, ma te teào,
i mua o te Etua me te mataèinaa paotū.
20 Pēhea i haaìòtia no te haamate nui me te pāokapeka atu
e to mātou tau Tāuà nui me te tau hakaìki.
21 O mātou à, u tetaì mātou
e haapohoè Īa i te mataèinaa Iraene.
Tōtahi atu, oia nei te toù o te pō
me i te ava i te paotia o tēia mea.
22 Atià à, u haaemièe mai te mou vehine kē me mātou.
I te pōpōuì tika, ua hee âtou io te ana tūpāpaù.
23 Aòè i koàna ia âtou to Īa tino.
Ua hua me to âtou peàu mai : ua ìte âtou i nā anera
te i peàu ia âtou u pohoè Ietu.
24 Ua hee io te ana tūpāpaù tahipito me i vāvena o mātou.
Ua ìte âtou i te mea i peàutia e te tau vehine.
O Ietu à, aòè âtou i ìte ia Īa. »
25 U peàu Ietu ia âua : « E te poì pōtano !
E te koekoe tevee i te haatià i te mea paotū
ta te tau perofeta i peàu atu.
26 Aòè à tēia memae e memae ai te Kirito
no te tomo io to Īa kāìè ? »
27 U haavivini Ietu i te teào i patutia i ùna o Īa
i òto o te Hāmani tapu, e tīmata ana
ma te haatuhuna i nā hāmani vāàna e Moite,
ma hope iho vāàna e te tau Perofeta hakatahi.
28 U haatata âtou me te pāpuafaè i èià to âtou tahatina.
Ua hano Ietu e hee memao atu.
29 Ua taî âua ia Īa e peàu ana : « A noho me māua.
Ua èva te â. E naò ai te òumati. »
Ua uu Ietu no te noho me âua.
30 Ohia io te tapukai me âua, ua too Ietu i te faraoa,
u haahuaèkaèka, ua vahi me te tuu atu ia âua.
31 U pepeùtia to âua kikomata : ua ìte âua ia Ietu.
Ua naò anamai Ietu me i to âua aò.
32 U peàpeàu atu peàpeàu mai âua :
« Aòè à u veàveà me he ahi to tāua koekoe
i te ava u teào Īa me tāua ma no he aanui ?
I te ava o to Īa haatuhuna i te Hāmani tapu ? »
33 Ua tū ponihoo âua no te hua i Ierutaremi.
U koàna mai ia âua te Tīònohuu ma tahi
putupututia me te huaa e noho ana me âtou.
34 U peàu âtou ia âua : « Tiàtohu nui.
Ua tū hakaùa te Fatu. U haaìte ia Īa iho ia Petero. »
35 Ua faì atu me âua i te mea i pao ma no he aanui.
Pēhea to âua ìte ia Ietu i te ava vahitia faraoa.
TOMINIKA E FĀ O TE PAKATE
TETAUTINA O TE HĀMANI HANA A TE TAU ÀPOTORO
2, 14a.36-41
I te â Penetekote,
14 e tū aa Petero me te Tīònohuu ma tahi ma to īa kaokao,
u pohā te èo me te peàu pēènei à :
36 « A ìte to Iraene mataèinaa ia ôtoa ma te tiàtohu :
o hua Ietu ta ôtou i pāokapeka ai,
u haatū te Etua ia Īa he Fatu, he Kirito. »
37 Ia òno âtou i hua teào, u mehea to âtou koekoe
me to âtou ūiūi atu ia Petero me te tau Àpotoro :
« E te tau teina e, e aha ta mātou e hana atu ? »
38 U haahua atu Petero : « A fāìu i te koekoe.
A papatematia ôtou tikitahi ma te inoa o Ietu Kirito
etià e vevetetia to ôtou tau mikeo.
A tahi a koàna mai ia ôtou te Kuhane Meitaì,
te vaièitina o te Etua.
39 U peàu hoì te Etua e vaièitia hua taetae ia ôtou,
atii me i ta ôtou tau tama me te tau ènata e noho memao,
te nuitina o âtou te i vevaòtia e te Fatu, to tātou Etua. »
40 Ma te nuitina o te tau teào kē, te teào kē
u toutaki me te hakapahi Petero ia âtou, e peàu ana :
« A haapohoè ia ôtou iho
me i vāvena o tēnei tai ènata pūtuì oko. »
41 O te tau ènata te i apuu i te teào u papatematia.
I hua â, e toù tautini ènata ùanei te i haapii me te tau kouâ.
TARAMO 23 (22),1-2b, 2c-3, 4, 5, 6.
O te Fatu to ù Tiaì Meitaì, e aha te mea e toe ?
1 O te Fatu to ù Tiaì Meitaì,
E aha te mea e toe ?
2 U aahi mai te Fatu no te hakaēa
Io te pāpua pī i te mutiē hou.
3 U aahi mai te Fatu io te punavai ;
I èià, u haahoutia to ù pohoè.
U haatee mai Īa ma he aanui toitoi
No te kāìè o to Īa inoa.
4 No tu ù taha ma he vao maù nui,
Aòè au e haametaù i te ìno.
I èià o Òe me au nei, e te Fatu e.
O to Òe tootoo te i aahi mai me te moû.
5 E te Fatu e, ua tuu mai Òe i te oà
I mua o te tau ènata e haatōtōua ia ù.
Ua paù Òe i tu ù upoo me te kao.
U haakoakoa mai te hope taetae tuutia mai.
6 Te koakoa me te èkaèka me au nei
Ma te òa o to ù pohoètina.
E noho au io te faè o te Fatu
Ma te nuitina o to ù tau â.
TETAUTINA O TO MUA HĀMANI A PETERO ÀPOTORO
2, 20-25
E tu ù tau tunane tuehine,
20 ia memae ôtou mēìa i to ôtou tau hana teka,
o ai e hahi ia ôtou ?
Ia memae ôtou i te tuki pē, e aha à u toitoi noa to ôtou hana,
oiana te hakatu koekoe e haaèka i te Etua.
21 U memae te Kirito i uē ia tātou,
e haaìte atu ana i te hakatu, etià e ūtaì tātou ia Īa.
22 U teka koè te Kirito Ietu, u hakahae koè to Īa fafa.
23 Ua paha âtou i te Kirito, aòè Īa i haahua i te paha.
Ia haamākakatia te Kirito, ua mutu Īa, e òomi aa i te peê.
U avai anaè i te Etua te haavā me te toitoi.
24 Ia pāokapekatia te Kirito, ua amo Īa i to tātou mikeo.
Ma te memae o to Īa tino, i koè ai to tātou tau mikeo ;
e pohoè tātou vāàna i te toitoi noa.
Na to Īa tau maki hoì, u haapohoètia tātou.
25 Òmua, u papauō ôtou me he naho muto ;
i tēnei, ua hua ôtou io te Tiaì Meitaì o to ôtou tau kuhane.
ALLELUIA ALLELUIA
cf. In.10,14-15
Ua ìte Ietu, te Tiaì Meitaì i to Īa tau muto, ua ìte to Īa tau muto ia Īa. « E haaìò au i tu ù pohoè i uē i tu ù tau muto. »
EVANERIO O IETU KIRITO VĀÀNA E IOANE 10, 1-10
I tēia mou pō, u peàu Ietu i te tau Fariteo pēènei :
1 « E teào tiàtohu ta ù nei ia ôtou.
O te ènata aòè e uu i òto o te pāpua muto
ma te avaputa, atià e tomo ma tītahi kōava kē,
he ènata kamo, he ènata fao i te mēmau.
2 O te ènata te i uu ma te avaputa, o īa na te tiaì muto.
3 No īa, u pepeùtia te avaputa e te ènata tiaì.
Ua òno te tau muto i to īa èo.
U vevaò i to īa tau muto tikitahi ma to âtou iho inoa.
U haauu īa âtou i vaho.
4 Ia haauu īa i vaho i to īa tau muto, ua taha īa i mua o âtou.
E ūtaì te tau muto ia īa, na te mea ua òno âtou i to īa èo.
5 U te e ūtaì te tau muto i te ènata kē, ua hikitararā âtou,
na te mea aòè âtou i òno i to īa èo. »
6 U peàu Ietu i te tau Fariteo i tēnei teào haapupuà,
atià aòè âtou i vivini e aha te hakatu o hua teào.
7 U peàu hakaùa Ietu ia âtou :
« E teào tiàtohu ta ù nei ia ôtou :
O au te avaputa no te tau muto.
8 O te tau ènata kē te i tihe ma mua o au,
e poì kamo âtou, e poì fao i te mēmau.
U te e haaòno te tau muto ia âtou.
9 O au te avaputa. Ia tomo tītahi ma òto o au nei,
u pohoè īa, e taha atu taha mai na īa ta īa.
E koàna ia īa te oà.
10 O te ènata kamo à, ua tihe īa no te kamo aneiho,
no te ùumi me te haahina.
Ua tihe au etià e pohoè te tau muto,
etià e meitaì èka to âtou pohoètina.
TOMINIKA E ÌMA O TE PAKATE
TETAUTINA O TE HĀMANI HANA A TE TAU ÀPOTORO
6, 1-7
1 I tēia mou pō, ua nui, nui aè te tau kouâ.
U kōhumuhumu te poì Hereni i to Hepereo,
na te mea, i tēia â, i tēia â,
e tāvini atu tāvini mai te hoa i te hoa,
u haatūhaatia anatu te tau vehine pōpī Hereni.
2 U haaputuputu te Tīònohuu ma tokoùa
i te tau kouâ hakātahi me to âtou peàu pēènei :
« Aòè e hei no mātou te titii i te Teào a te Etua
no te tāvini i te tapukai.
3 E te tau tunane tuehine, a vae me i vāvena o ôtou
toofitu ènata, ònonuitia to âtou meitaì,
koekoe toitoi, pī i te Kuhane Meitaì.
Na âtou hua hana tāvini i te hoa.
4 O mātou à, e tohe mau mātou i te pure
me te hakako i te Teào. »
5 U koakoa te huaa paotū i putupututia.
Ua vae âtou ia Tepano, e ènata haatià pī i te Kuhane Meitaì,
ia Firipo, ia Porokore, ia Nikanore, ia Timone,
ia Paremona, ia Nikorao no Anetioka,
he ènata haatià no ati Iuta.
6 U aahitia âtou i te aò o te tau Àpotoro.
Ua pure te tau Àpotoro ;
ma hope mai, u hapai i to âtou nā îima i ùna o âtou.
7 U mevaha, mevaha atu te Teào a te Etua.
Ua nui aè, nui aè te tau kouâ i Ierutaremi.
Enā me te nuitina o te tau tāuà te i aotahi i te haatià.
TARAMO 33 (32), 1.2b-3a, 4-5, 18-19
E te Fatu e, a noho mau to Òe kāòha i ùna o mātou atii me mātou e tetaì mau i to Òe vaièitina. 33, 22
1 A hīmene me te koakoa i te Fatu,
U hei nui e hahi ôtou, e te tau ènata toitoi.
2 A haatani i te pū, a hīmene me te kitā.
3 A hīmene i te Fatu i te hīmene hou,
4 He toitoi noa te Teào o te Fatu.
U tiàtohu anaè to Īa tau hana paotū.
5 U haataetae Īa i te hakatu toitoi, haakahae koè.
Ua pī te aomāàma i to Īa tau hana kāòha.
18 Ua toko te Etua i te tau ènata pakaihi ia Īa,
I te poì e tetaì mau i to Īa kāòha mai.
19 U haapohoè ia âtou me io te ìno me te matena.
U haapohoè i te ava o te ìno me te one nui.
TETAUTINA O TO MUA HĀMANI A PETERO PEÀTO 2, 4-9
E tu ù tau tunane tuehine,
4 A haatata mai ôtou me te Fatu Ietu.
O Īa te keâ pohoè titiitia e te tau ènata,
atià, u vaetia e te Etua mēìa i to Īa meitaì.
5 O ôtou à, he tau keâ pohoè ;
a ao e haatūtia ôtou me he Faèpure kuhane.
A haaputuputu ôtou me he pūpū tāuà peàto
no te ùtuna atu i te hēana kuhane
te i haaèka i te Etua ma io Ietu Kirito.
6 Ua patutia hoì io he Hāmani tapu pēènei :
« Enā, e haatū au i ùna o te tuaivi Tiona
i te keâtaa, keâ vaetia, keâ taetae nui.
Aòè e hina ai te ènata e haatià i hua keâ. »
7 A haakāìètia ôtou, e te poì te i haatià i hua keâ.
Atià, no te poì haatià koè, u patutia pēènei :
« Ua ìò te keâ titiitia e te poì hana, he keâtaa o te faè.
Na hua keâ te haahina me te haakoè i te ènata tukia me īa. »
8 Ua hina hua tau ènata
mēìa u te e haatià âtou i te Teào a te Etua.
Oia te mea i koàna mai ia âtou vāàna i hua Teào.
9 O ôtou à te ati vaetia, te huaa tāuà o te hakaìki,
te mataèinaa peàto ta te Etua i hoko mai no Īa iho,
etià e haaìte ôtou i te tau hana mahaò
o Tēia i vevaò mai me io te ava pōtano
no te haapupuà ia ôtou i to Īa māàma.
ALLELUIA ALLELUIA
cf. In.14,6.9
E Ietu e, te Tama a te Etua, O Òe te Vaanui, o Òe te Tiàtohu, o Òe te Pohoè. O te ènata i ìte ia ù, ua ìte īa i tu ù Motua.
EVANERIO O IETU KIRITO VĀÀNA E IOANE 14, 1-12
I tēia mou pō, u peàu Ietu i to Īa tau kouâ pēènei :
1 « Umoì ôtou e pūpūkina.
A haatià ôtou i tu ù Motua. A haatià me ôtou ia ù.
2 Io he faè o tu ù Motua, he mea nui te tau taha no te noho.
Aua, u te e peàu au ia ôtou i te mea
e hee au i to ôtou taha nohotina kānea.
3 Enā hoì e hee au no te kānea i to ôtou taha nohona,
e hua hakaùa mai au no te too ia ôtou e haapii me au.
Etià, i èià e noho au, i èià e noho me ôtou.
4 Ua ìte ôtou i te aanui no te tihe i te taha i èià e hee au. »
5 U peàu Toma ia Ietu : « E te Fatu e,
aòè mātou i ìte i te taha hea ta Òe e hee nei.
Pēhea ta mātou ìte i te aanui ? »
6 Ua haahua atu Ietu ia īa :
« O au te Aanui, o au te Tiàtohu, o au te Pohoè.
Aòè e tihe e tahi ènata io te Motua,
me he mea aòè īa e taha ma io ù.
7 No to ôtou ìte ma te tiàtohu o ai au nei,
e ìte ôtou o ai tu ù Motua.
Me i tēnei ava, ua vivini ôtou o ai tu ù Motua.
Ua ìte hoì ôtou ia Īa. »
8 U peàu Firipo ia Ietu :
« E te Fatu e, a haaìte mai i te Motua. E àva no mātou.
9 Ua haahua atu Ietu ia īa :
« E Firipo e, he mea òa to ù noho me ôtou,
aòè òe e ìte o ai au nei ?
O te ènata i ìte ia ù, ua ìte īa i tu ù Motua.
Umaha i peàu ai òe : a haaìte mai i te Motua ?
10 Aòè òe i haatià :
o au nei i òto o tu ù Motua, o tu ù Motua i òto o au ? »
U peàu hakaùa Ietu pēènei :
« O tu ù Motua te i noho nei i òto o au,
o Īa te i haapao i te hana ta Īa i maìmaì.
11 A haatià i to ù peàu ia ôtou :
o au nei i òto o tu ù Motua, o tu ù Motua i òto o au.
Akoè à, a haatià ôtou mēìa i te tau hana mahaò ua hana au.
12 He teào tiàtohu ta ù nei ia ôtou : O te ènata e haatià ia ù,
e hana īa i te tau hana mahaò me he mea ta ù nei.
E hana hua ènata i te mea mahaò atu i ta ù iho i hana nei,
na te mea, enā e hee au io te Motua. »
TOMINIKA E ONO O TE PAKATE
TETAUTINA O TE HĀMANI HANA A TE TAU ÀPOTORO
8, 5-8.14-17
5 Ua hee Firipo io tītahi pāpuafaè o te Fenua Tamaria
me to īa haaìte atu i te Kirito.
6 Ua ūo te tau faètoa te i haaòno i te hakakotina o Firipo,
mēìa ua òno âtou me to âtou ìtemata
i te tau hana mahaò ta īa i hana.
7 He mea nui te kuhane ìno i tutetia i vaho
o te tau ènata uutia. Ua hee âtou e taaàu oko ki aa.
He mea nui te ènata hapaa
me te tau vaekoki i haameitaìtia.
8 U koakoa nui te tiàtohu o hua pāpuafaè.
14 Ua òno te tau Àpotoro noho ana nei i Ierutaremi,
u mevaha te Teào a te Etua i te Fenua Tamaria.
U pōpahi hoì âtou i èià ia Petero me Ioane.
15 Ua tihe âua io te poì Tamaria.
Ua pure âua i uē i hua poì haatià
etià e koàna mai ia âtou te Kuhane Meitaì.
16 Aòè i iho atu nei te Kuhane Meitaì
i ùna o tītahi me i vāvena o âtou.
U koàna mai anaè ia âtou te papatema
ma te inoa o te Fatu Ietu.
17 U hapai Petero me Ioane i to âua îima ma ùna o âtou.
U koàna mai ia âtou te Kuhane Meitaì.
TARAMO 66 (65), 1-3a, 4-5, 6-7a, 16.20
E te fenua ia ôtoa, a hahi i te Etua, a hīmene i te Fatu.
1 A hahi i te Etua, e te fenua ia ôtoa.
2 A haakoìna no te haakāìè i to Īa inoa.
A haahuaèkaèka me te hahi ia Īa.
A haameitaìtia te Etua mēìa i to Īa kāòha mai.
3 A peàu ôtou i te Etua : « Auē ! To Òe hana mana.
4 I to Òe aò, e moe haatona te tau mataèinaa paotū,
E hīmene ana ia Òe me te hahi i to Òe inoa.
5 A mai. A ìte ôtou i te hana o te Etua,
To Īa tau hana mahaò i uē i te tau ènata.
6 Na te Fatu i haaìò i te tai me he papakeâ,
U paìpaì koè te vaevae o to Īa mataèinaa.
O hua tau hana mahaò te tumu o to tātou koakoa.
7 E paona koè to Īa vivini me te mana.
16 A mai, e te poì pakaihi i te Etua !
A haaòno i to te Etua hana i uē ia ù.
20 A haameitaìtia te Etua
Te i apuu i to ù pure,
Te i tiòhi mai me te kāòha.
TETAUTINA O TO MUA HĀMANI A PETERO PEÀTO 3, 15-18
E tu ù tau tunane tuehine.
15 A pakaihi ôtou me io he koekoe i te Kirito, to tātou Fatu.
A peipei anatu ôtou no te apuu i te ènata te i ūi mai
no te haavivini e aha te mea e koàna ia ôtou
mēìa i to ôtou tetaìtina.
A haahua atu i te teào me te koekoe moû,
e pakaihi ana i te ènata.
16 A toitoi noa to ôtou tau hana ia ôtoa
etià e hakaìna te poì pōtoho pu aa i to ôtou hana meitaì,
me he mea e hei no te ènata haatahi me te Kirito.
17 Ia ao te Etua e haamākakatia ôtou
mēìa i to ôtou hana meitaì, pēhea te koàna ?
A memae i te memae e aha à teka koè ôtou.
Atià, he mea hakaìna te memae me he tuki o to ôtou hana pē.
18 Ua mate nui hoì Ietu Kirito mēìa i te tau mikeo o te ènata.
U memae Īa i te matena e tahi anaè,
ua àva no te tau tai anatu.
Ua mate te ènata toitoi noa i uē i te poì toitoi koè
no te aahi ia tātou io te Etua.
U haamate te tau ènata i to te Kirito tino ;
u haatū hakaùa te Etua ia Īa vāàna i te Kuhane.
ALLELUIA ALLELUIA
cf. 1In.5,6
Ma òto o te Kuhane Meitaì, a haatiàtohu tātou o Ietu Kirito, he Tama no te Etua. O te Kuhane hoì te Tiàtohu.
EVANERIO O IETU KIRITO VĀÀNA E IOANE 14, 15-21
I tēia mou pō, u peàu Ietu i to Īa tau kouâ pēènei :
15 « Me kāòha ôtou ia ù, e aotahi ôtou i tu ù tau teào.
16 O au à, e pure au io tu ù Motua.
Na Īa e tuu ia ôtou i te Vevaò,
oia hoì te Toko te i noho anatu me ôtou.
17 O Īa te Kuhane e haaìte atu
i te teào tiàtohu i ùna o te Etua.
U te e koàna i to te ao nei e apuu i hua Kuhane.
Aòè hoì âtou e ìte, e vivini ia Īa.
He mea kē ôtou : ua ìte ôtou ia Īa,
na te mea ua noho Īa me ôtou, ua ihi Īa i òto o ôtou.
18 Aòè au e avai ia ôtou me he tau tama
motua koè, kui koè. E hua hakaùa mai au io ôtou.
19 Ava poto i toe, aòè e ìte to te ao nei ia ù.
Mea kē ôtou : e ìte ôtou ia ù,
na te mea e pohoè hakaùa au, e pohoè me ôtou.
20 I te ava o to ù pohoè hakaùa,
e ìte ôtou i te mea ua ìò au e tahi aneiho me tu ù Motua.
Atii me ôtou, e ìò ôtou e tahi me au nei.
21 O te ènata e apuu i tu ù teào
me te aotahi atu i hua teào, o īa te i kāòha mai ia ù.
E haataetae tu ù Motua i te ènata i kāòha mai ia ù.
E kāòha me au ia īa, e haaìte ia ù iho ia īa.
TE KOÌNA FITINA O IETU IO HE ÀNI
TETAUTINA O TE HĀMANI HANA A TE TAU ÀPOTORO
1, 1-11
1 « E Teofiro e, i òto o to mua hāmani ta ù i patu,
u haaìte atu au i te tau mea paotū ta Ietu i hana,
ta Īa i hakako me i te tīmatatina
tihe atu i te â o to Īa Fitina io he àni.
2 Òmua, ma te Kuhane Meitaì, u haamāàma Īa
i te tau Àpotoro ta Īa i vae.
3 Ma te òa e fā ònohuu â ma muì o to Īa memae,
i hua tau Àpotoro, u haaìte Ietu ia Īa iho e pohoè ana.
U haatiàtohu i to Īa pohoè ma te nuitina o te hakatu kē.
U teào Īa me âtou i ùna o te Patirēia o te Etua.
4 I tītahi â, e teào ana Ietu me to Īa tau Àpotoro,
u peàu ia âtou umoì e titii ia Ierutaremi,
atià, e tetaì i èià i te mea peàutia e te Motua.
5 U peàu atu Īa pēènei : « Me io to ù fafa,
ua òno ôtou u papatema Ioane me te vai.
Atià, ua poto te ava i toe
a tahi a papatematia ôtou i òto o te Kuhane Meitaì. »
6 O âtou à, e putuputu ana me Ietu, ua ūiūi atu pēènei :
« E te Fatu e, aha oia nei te ava
o to Òe haahou hakaùa i te Hakaìkitina o Iraene ? »
7 U haahua atu Ietu : « Aòè ôtou e ìte i te ava
me i te â ta te Motua i haatoitoi
vāàna i to Īa maìmaì aneiho.
8 Atià, e iho mai te Kuhane Meitaì i ùna o ôtou ;
me io Īa, e koàna ia ôtou te ìi no te haatiàtohu ia ù,
i Ierutaremi, i te Fenua Tamaria,
tihe atu i te kotiàna paona o te aomāàma vii pu. »
9 Ia pao hua ponateào, e tiòhi ana te tau Àpotoro,
ua fiti Ietu i te ataàni. Ua naò Īa i òto o te kohu.
10 Ohia i te ava ua paekē Ietu, e maô ana âtou
me te tiòhi i te ataàni, u haatata mai nā ènata tokoùa,
uhitia me te kahu māìta, te i peàu :
11 « E te poì no Karirea, umaha e noho ôtou înei,
e tiòhi ana i te ataàni ?
O tēnei Ietu te i hapaitia me i vāvena o ôtou,
e tihe hakaùa mai Īa me hua hakatu
ta ôtou i ìte ia Īa e fiti ana io he àni. »
TARAMO 47 (46),2-3, 6-7, 8-9
Ua fiti te Etua i vāvena o te hīmene hahi, Ua fiti te Fatu e tani ana te èo o te pū. 47, 6
2 E te tau mataèinaa paotū, a papaki i te îima,
A hahi i te Etua ma to ôtou taaàu koakoa.
3 O te Fatu te Tiketike nui : ia Īa te kāìè.
O Īa te Hakaìki nui o te fenua ia ôtoa.
6 Ua fiti te Etua i vāvena o te hīmene hahi.
Ua fiti te Fatu e tani ana te pū.
7 A haatani i te pū no to tātou Etua.
A ùtu i te pahu no te hahi i te Hakaìki.
8 O te Etua te Hakaìki nui o te aomāàma.
A haaìte atu ôtou i te tau hīmene.
9 U vivini te Etua i te tau mataèinaa êteni.
Ua tū te Etua i ùna o to Īa nohona kāìè.
TETAUTINA O TE HĀMANI A PAURO PEÀTO I TO EFETIA
1, 17-23
E tu ù tau tunane tuehine,
17 Na te Etua o to tātou Fatu Ietu Kirito,
te Etua Motua o te kāìè nui io he àni,
e vaièi mai i te Kuhane haamāàma ia ôtou,
no te ìte ma te tiàtohu o ai te Etua.
18 Na te Etua e haapuàha i to ôtou iho koekoe
ma te haavivini i te mea nei :
E aha te taetae ta tātou e tetaì nei mēìa u vevaò mai te Etua ?
E aha te kāìè nui i tāpaetia e te Etua no to Īa mataèinaa ?
19 E aha te mana, u te e ava te māàma ènata no te haavivini,
ta te Etua i toko mai ia tātou, poì haatià ?
20 O te mana e toko ia tātou,
ua tūtū īa me to te Etua Motua mana nui
te i haatū hakaùa i te Kirito me i vāvena o te huaa mamate,
me te haanoho i to Īa ìma oko io he àni.
21 Na te Etua i haatiketike aè i te Kirito ma ùna o
te tau hakaìki, te tau vivini, te tau mana, te tau fatu,
te tau inoa kē, inoa kē, i te ao nei me te ao e tihe ai.
22 Ua tuu te Etua Motua i te tau mēmau ia ôtoa
ma àò o nā vaevae o te Kirito.
U haatiketiketia ma ùna o te tau mea hakatahi ;
u haatū te Etua i te Kirito e upoo o te Èkaretia.
23 O te Èkaretia hoì te tino o te Kirito.
U haapao ònaòna te Èkaretia i òto o te Kirito.
O te Kirito à, u haapao ònaòna Īa i te tau mea hakatahi
io te tau taha ia ôtoa.
ALLELUIA ALLELUIA
cf.Ta.47,6.10
Ua fiti te Fatu ma òto o te hahi. Ua fiti te Fatu i ùna o te àni.
EVANERIO O IETU KIRITO VĀÀNA E MATEO 28, 16-20
I tēia mou pō,
16 O te Tīònohuu ma tahi kouâ, ua fiti âtou i te Fenua Karirea
i ùna o te tuaivi ta Ietu i peàu atu ia âtou.
17 Ia ìtemata âtou ia Ietu, u momoe haatona âtou nui,
âtou te i haatià koè òmua.
18 U haatata mai Ietu me âtou. U peàu Īa pēènei à :
« Ua tuutia mai te mana ia ôtoa, io he àni atii i no he fenua.
19 A tataha atu ôtou.
A haaìò i te tau mataèinaa paotū he tau kouâ,
e papatema ana ia âtou i te inoa
o te Motua me te Tama me te Kuhane Meitaì.
20 A hakako ia âtou no te aotahi i te tau mea paotū
ta ù i peàu ia ôtou.
Enā e noho au me ôtou ma te tau â paotū
tihe atu i te paona o te ao nei. »
TOMINIKA E FITU O TE PAKATE
TETAUTINA O TE HĀMANI HANA A TE TAU ÀPOTORO
1, 12-14
12 U titii te tau Àpotoro i te tuaivi Oriveti
me to âtou hua mai i Ierutaremi.
He mea tata hua tuaivi Oriveti me Ierutaremi :
te aanui e koàna i te ènata te taha atu ma te Tāpati.
13 Ia hua mai, ua piki âtou io he pāòto i ùna,
i èià ua hani âtou e haaputuputu.
Oia hoì ia Petero, ia Ioane, ia Iakopo, ia Aterea,
ia Firipo, ia Toma, ia Patoromeo, ia Mateo,
ia Iakopo, tama a Arafe, ia Timone, vevaòtia Haaūo,
ia Iuta, tama a Iakopo.
14 O âtou paotū ma òto te koekoe e tahi,
ua tohe mau i te pure me te mou vehine :
o Maria, te kui o Ietu tītahi me âtou, atii me to Īa tau teina.
TARAMO 27 (26), 1, 4a-d, 7-8
Tiàtohu nui, e ìte tātou i te meitaì o te Fatu, I te ao nei, i vāvena o te tau ènata pohopohoè.
1 O te Fatu tu ù Māàma, tu ù Pātoko.
O ai òa e haametaù mai ?
O te Fatu te i tiaì i tu ù pohoè.
O ai òa e haapūkina mai ?
4 I mua o te Etua e tahi hīa anaè to ù,
E tahi mea ta ù e ape io Īa :
O te noho io he faè o te Fatu
Ma te tau â paotū o to ù pohoètina,
7 E te Fatu e, a haaòno mai, e vevaò au ia Òe.
A hakāòha mai, a haahua mai i te teào.
8 U maakau au ma he koekoe i to Òe peàu mai :
« A ìmi ôtou i to ù mata. »
TETAUTINA O TO MUA HĀMANI A PETERO PEÀTO 4,13-16
E tu ù tau tunane tuehine.
13 Umoì ôtou e emièe ;
a koakoa, mēìa ua àva ôtou i te memae o Ietu Kirito.
Ma èià hoì, i te â e haaìtetia to Īa kāìè,
e nui aè to ôtou koakoa me te èkaèka.
14 Mamau ôtou me haamee te ènata ia ôtou
mēìa i te inoa o Ietu Kirito.
A koakoa na te mea, me ôtou te Kuhane haakāìè,
te Kuhane o te Etua.
15 Me memae tītahi me i vāvena o ôtou,
aua īa e memae mēìa he ènata mākaka
e ùumi haamate i te ènata kamo, i te ènata haapē i te hoa,
e haì ana i te teào kaipīpiò.
16 Ia memae te hoa mēìa i to īa haatià kiritiano,
umoì e hakaìna ôtou i te haakē me te Kirito.
A hahi ôtou i te Etua na te mea ua apatia ôtou e Kiritiano.
ALLELUIA ALLELUIA
cf. In.14,18
Aòè te Fatu e avai ia ôtou me he tau tama motua koè, kui koè. E hua hakaùa mai Īa io ôtou. A tahi a koakoa to ôtou koekoe.
EVANERIO O IETU KIRITO VĀÀNA E IOANE 17, 1-11a
1 I tēia mou pō, u feau Ietu io he àni me te peàu :
« E te Motua e, ua tihe te ava a haakāìè ia ù, ta Òe Tama,
etià e haakāìè te Tama ia Òe.
2 Ua tuu mai Òe i te mana i ùna o te tau ènata ia ôtoa.
Ma èià, e koàna ia ù e vaièi i te pohoè paona koè
i te tau ènata paotū ta Òe i vae no te haakē me au.
3 Oia nei te pohoè paona koè :
te ìte ia Òe, o Òe anaè te Etua tiàtohu,
me te ìte ia Ietu Kirito te i pahitia mai e Òe.
4 Èka ana io te aomāàma nei, u haaìte au i to Òe kāìè,
ma te haapao i te mea paotū ta Òe i peàu mai.
5 E tu ù Motua e, i tēnei, a haakāìè mai Òe ia ù io Òe,
me he mea u haakāìètia au io Òe,
òmua atu, ma mua i pēpenatia te aomāàma nei.
6 U haaìte au o ai Òe i te huaa ènata ta Òe i tuu mai
ma te haapae ia âtou me i to te ao nei.
Na Òe âtou. O Òe te i tuu mai ia âtou.
U aotahi âtou i to Òe teào.
7 I tēnei, ua ìte âtou me io Òe
te tau mea paotū i tuutia e Òe ia ù.
8 Ua faì hoì au ia âtou i te teào ta Òe i peàu mai.
U apuu âtou i hua teào.
Ua ìte âtou he mea tiàtohu me io Òe au nei.
U haatià âtou na Òe i pahi mai ia ù.
9 Ua pure au i uē ia âtou, hua tau ènata ta Òe i tuu mai,
na te mea na Òe âtou.
U te e pure au i uē i to te ao nei.
10 O hua tau ènata paotū te i haakē me au, na Òe âtou.
O te tau ènata paotū te i haakē me Òe, na ù âtou.
O âtou te i haapuàha i to ù kāìè.
11 Ua pae au me i te aomāàma nei ;
o âtou à, e noho âtou i òto o te ao nei,
ohia à e tihe au io Òe.
E te Motua peàto e, a tiaì i to ù tau kouâ
etià e haatià mau âtou i te inoa ta Òe i apa mai.
Ma èià, e haatahi âtou me he mea o to tāua haatahitina.
TĀMETĪ O TE KOÌNA PENETEKOTE
A vae mai e tahi me io tēnei e fā tetautina
1.- TETAUTINA O TE HĀMANI A MOITE PEÀUTIA TENETE
11, 1-9
1 I te fenua vii pu, u haafitipona te tau ènata paotū
i te èo e tahi me te tau ponateào hua mea aneiho.
2 E titii ana te tau ènata
i te fenua kēkē tihena o te òumati, ua taha atu âtou
io he Fenua Metopotamia, akoè à io he fenua Hineare,
ua noho âtou io he kaavai tapavaù. I èià to âtou noho.
3 U peàpeàu âtou pēènei :
« A pau ! A kānea tātou i te èpo kaaea taotia. »
O hua èpo taotia, me he keâ keetū no âtou.
O te korotā keekee to âtou himā no te haapipii i te tau keetū.
4 U peàpeàu te tau ènata pēènei : « A pau.
A ato tātou i te pāpuafaè me te mōuna i vāvena ahau.
A haatiketike tihe io te ataàni i te kapua o te mōuna.
A haaoko nui i to tātou inoa,
etià aòè e haatavavātia tātou i te tau fenua kē vii pu. »
5 Ua iho mai te Fatu Etua no te tiòhi i te pāpuafaè
io te mōuna tiketike atotia e te tau ènata.
6 U peàu te Fatu Etua : « He mataèinaa e tahi aneiho âtou nui.
E tahi èo anaè to âtou. Oia nei te tīmatatina.
E aha te mea e haapākeka i to âtou tau hīa kē ?
7 Epō. A haahiiveke mātou i to âtou èo
umoì e vivini te ènata hana i te ènata hana. »
8 Ma èià, u haatavavā te Fatu Etua i te tau ènata
io te tau fenua kē vii pu.
U hakaēa âtou i te hana ato i te pāpuafaè.
9 Oia te piò ua apatia te inoa o hua pāpuafaè o Papere,
o Hikitararā ma he èo ènata.
I èià hoì, u haahiiveke te Fatu Etua i te èo o te tau ènata.
Ma èià, u tavavā te tau ènata ma he tau fenua kē, fenua kē.
2.- TETAUTINA O TE HĀMANI A MOITE PEÀUTIA EHOTO
19, 3-8.16-20
Ua pao e toù māhina me i to âtou uutia
i vaho o te Fenua Ekipito,
ua tihe te tau tama Iraene io te tumu o te tuaivi Tinai.
3 O Moite à, ua fiti i ùna o te tuaivi no te haaâvei me te Etua.
Me i ùna o te tuaivi, u vevaò te Etua ia Moite pēènei :
« Oia nei to ù teào i te ati o Iakopo
ta òe e àve atu io te tau tama Iraene.
4 Ua ìte ôtou pēhea u haahina au i te poì Ekipito.
U aahi au ia ôtou înei, me he mea te manu akuira
te i tautua i to īa tau kiokio ma ùna o to īa pekeheu.
Na ù i aahi mai ia ôtou i taa o au nei.
5 I tēnei, me haaòno ôtou i to ù teào,
me aotahi atu i to ù Piimau,
e ìò ôtou he mataèinaa vaetia e au
me i vāvena o te tau mataèinaa paotū o te aomāàma vii pu.
Na te mea, na ù anaè te tau fenua ia ôtoa.
6 E ìò ôtou no ù he ati tāuà, he mataèinaa peàto.
Oia nei te teào ta òe e haaìte atu i to Iraene. »
7 Ua iho Moite me i ùna o te tuaivi.
U âvei īa me te tau kōkooūa o te mataèinaa.
Ua faì atu i te Teào a te Fatu Etua.
8 U haahua te mataèinaa ia ôtoa ma he èo e tahi :
« E aotahi tātou i te teào paotū a te Fatu Etua. »
Ua àve Moite i hua teào io te Fatu Etua.
16 Ma te toù o te pō, i te pōpōuì tika,
ua tani te fatutii, ua topa te uià,
ua naò te tuaivi i te kohu maù nui,
ua ònotia te tanitina èo òa òa o te pū.
U emièe te mataèinaa i òto o te pāpua.
17 Na Moite i haauu i vaho i te mataèinaa,
no te haaâvei me te Etua.
Ua tū âtou paotū i te tumu o te tuaivi.
18 Ua naò i te auahi te tuaivi Tinai.
Ua iho mai hoì te Fatu Etua i òto o te ahi.
Ua fiti te auahi me he mea to te ahi uà tāpupu.
U feùu te tuaivi.
19 Ua tani te pū, oko atu, oko atu te tanitina.
U pohā te èo o Moite ; me i òto o te fatutii te èo o te Fatu.
20 Ua iho mai te Fatu Etua io he kapua o te tuaivi.
U vevaò te Fatu Etua ia Moite me io te kapua o te tuaivi.
Ua fiti Moite io te Fatu Etua.
3.- TETAUTINA O EHEKIERE PEROFETA 37, 1-14
1 I ùna o au nei te ìma o te Etua.
U aahi mai te Kuhane o te Etua io tītahi kaavai
tāpītia me te tau ivi e tavavā ana uo he tuaèpo.
2 Ua naò te tuaèpo i te nuitina o te tau ivi moô paa.
Ua ape mai te Kuhane no te vii i vāvena o âtou.
3 U peàu mai te Fatu : « E te ènata e,
aha e pohoè hakaùa te tau ivi nei ? »
U haahua : « E te Fatu Etua e, o Òe te i ìte. »
4 U peàu mai te Fatu :
« A haafitipona i te teào perofeta i ùna o tenā tau ivi.
A peàu pēènei :
E te tau ivi moô e, a haaòno i te Teào o te Fatu Etua.
5 Enā, e haauu au i te ao i òto o ôtou. A tahi e pohoè ôtou.
6 E tāpī au ia ôtou me te uaua me te kiko ;
e haauhi au ia ôtou me te kii.
E puhi au i te ao i ùna o ôtou. E pohoè ai ôtou.
E vivini ôtou o au te Fatu Etua. »
7 Ohia u pohā tu ù èo vāàna i te teào peàutia mai,
ua ònotia te tuìtuì, i muì iho, te pooìna oko nui.
U haapii te tau ivi : te ivi me te ivi, te ivi me te ivi.
8 Ua tāpītia âtou me te uaua me te kiko, me te kii ma ùna.
Atià, aòè te Kuhane i òto.
9 U peàu mai te Fatu :
« E te ènata e, me he perofeta, a vevaò òe i te Kuhane.
A peàu òe : oia nei te Teào o te Fatu. E te Kuhane e, a mai !
A mai me io nā kēkē e fā o te metani !
A mai ! A puhi i ùna o te tūpāpaù nei ! E pohoè âtou. »
10 U vevaò au i te teào perofeta vāàna te i peàu mai.
A tahi a tau te Kuhane i ùna o te tūpāpaù. U pohoè âtou.
U maô anamai âtou paotū, hakatu me te faètoa nui, nui oko.
11 U peàu mai te Fatu :
« E te ènata e, o te tau ivi nei te mataèinaa Iraene.
U peàu hoì âtou pēènei :
Ua moô to tātou ivi, ua koè te ao, ua naò tātou nui. »
12 A teào perofeta òe ia âtou me te peàu pēènei :
Oia nei te Teào o te Fatu Etua :
Enā, e vāvahi au i to ôtou ana tūpāpaù me te haauu i vaho,
e to ù mataèinaa e.
E haahua au ia ôtou io to ôtou fenua tumu.
13 E ìte ôtou o au te Fatu Etua
i te ava e pepeù au i to ôtou ana tūpāpaù
me te haauu i vaho ia ôtou nui.
14 E haaihi au i to ù Kuhane i òto o ôtou.
E pohoè ôtou. E noho hakaùa ôtou io to ôtou fenua tumu.
Oia nei to ù teào, oia hoì te mea ta ù e hana ai. »
4.- TETAUTINA O TE PEROFETA IOERE 3, 1-5a
1 He Teào na te Fatu.
« E kiini au i tu ù kuhane i ùna o te tau mēmau i pēpenatia,
e ìò he perofeta ta ôtou tau tama,
e haamāàmatia te tau ànamotua ma òto o te moemoeā
atii me te poì hou ma òto o te tau haaìtetina me he moemoeā.
2 I hua ava, e kiini atii au i tu ù kuhane ma ùna o te tau tāvini.
3 E hana au i te tau hana mahaò nui
io he ataàni atii io he fenua :
he toto, he ahi, he tau pūkohe ahi.
4 E ìò te òumati he pō keevō. E ìò te māhina me he toto
oa tihe mai te  o te Fatu o te Haavātina.
5 E pohoè ai te tau ènata ia vevaò atu âtou i te inoa o te Fatu. »
TARAMO 104 (103), 1-2, 1a.24, 27-28, 29b-30
E te Fatu e, a pahi mai i to Òe Kuhane no te haahou i te hakatu o te fenua. cf.103,30
1 A haameitaì i te Fatu, e tu ù kuhane e.
E te Fatu e, tu ù Etua e, u tiketike Òe.
Ua tāpītia Òe me te kāìè,
2 O te àma te kahu e fāfī ia Òe.
1a A haameitaì i te Fatu, e tu ù kuhane e.
24 He mea nui to Òe hana, e te Fatu e.
Na to Òe māàma i pēpenatia te tau mēmau paotū.
Ua pī te fenua i to Òe tau taetae.
27 O âtou paotū e tetaì nei ia Òe
No te koàna mai to âtou oà, i te ava e hei.
28 U vaièi atu Òe : e kohi mau âtou.
U pepeù i to Òe îìma : e kai haamaòna âtou.
29b Me too Òe i to âtou menava,
E mate nui âtou me te hua io he èpo.
30 Na Òe e puhi i te ao, e pēpena hou âtou.
U haahou Òe i te hakatu o te fenua.
TETAUTINA O TE HĀMANI A PAURO PEÀTO I TO ROMA
8, 22-27
22 Ua ìte hoì tātou tihe i tēnei mou â,
u taaàu me te uē hua tau mēmau,
me he uē o te vehine haatotohi ana i te tama.
23 Aòè o te tau mēmau pēpenatia anaè.
O tātou nei tahipito te i koàna mai i te Kuhane Meitaì
me he to mua hope taetae me io te Etua,
e kōhoà nei me te uēuē o tātou e tetaì ana
na te Etua e haaìò ia tātou he tau tama na Īa,
me te haapao ònaòna i to tātou haapohoètina.
24 U haapohoètia tātou, e mea à i òto o te tetaìtina aneiho.
Ia ìte tātou i te hakatu pohoè ta tātou e tetaì nei,
e koè ai te tetaìtina.
O ai hoì te i tetaì i te mea ua ìtemata ?
25 Atià, e tetaì nei tātou i te tau mea u te e ìtemata.
Ua tohe mau tātou e kōhoà ana i hua taetae.
26 Atii ua toko te Kuhane Meitaì i to tātou koekoe pepee.
Aòè tātou i ìte i te hakatu o te pure.
Atià, u vevaò te Kuhane Meitaì i uē ia tātou
ma he èo mamaioo ;
u te e koàna i te ponateào i te haavivini mai.
27 O te Etua te i ìte i te koekoe o te tau ènata ;
u vivini Īa e aha to te Kuhane kōhoà i òto o tātou.
E tahi maìmaì hoì to te Etua me to te Kuhane vevaòtina
i uē ia tātou, te mataèinaa o te Etua.
ALLELUIA ALLELUIA
Mave mai, e te Kuhane Meitaì e. A iho mai io he koekoe o mātou. A haahoutia mātou e to Òe kāòha.
EVANERIO O IETU KIRITO VĀÀNA E IOANE 7, 37-39
37 I te â paona o te koìna, he â koìna nui tēia,
ua maô Ietu me to Īa peàu ma he èo oko pēènei :
« Me mao te ènata i te vai, a tihe mai io ù.
38 E fāinu au i te ènata e haatià ia ù.
Me he mea i patutia i òto o te Hāmani tapu :
E tahe te vai pohoè me i òto o Īa. »
39 U peàu Ietu i hua teào no te haavivini
i te Kuhane Meitaì ta te poì haatià ia Ietu e apuu ai.
Aòè hoì i tuutia atu nei te Kuhane Meitaì
na te mea aòè Ietu i haakāìètia.
TE KOÌNA PENETEKOTE
TETAUTINA O TE HĀMANI HANA A TE TAU ÀPOTORO
2, 1-11
1 I te ava u faìtia te koìna Penetekote,
io he taha e tahi, u putupututia te poì haatià paotū.
2 Ua ònoputia anamai te pooìna me io he àni mai,
hakatu me he tuaio metani oko nui.
Ua pī te faè i hua pooìna i èià te noho o âtou.
3 Ua ìte âtou i te mēmau hakatu me he èo ahi,
te i tuhatia me te tau, e tahi i ùna o âtou tikitahi.
4 A tahi a pī âtou paotū i te Kuhane Meitaì,
me to âtou teàteào ma he èo kē, èo kē,
vāàna ta te Kuhane Meitaì i maìmaì e peàu âtou.
5 Enā, ua noho i Ierutaremi te tau ati Iuta, poì pure,
te i titihe mai me io te tau fenua paotū i àò o te àni.
6 Mēìa i te pooìna, u putuputu mai te faètoa.
U pūpūkina âtou na te mea ua òno âtou tikitahi
i te tau Àpotoro e teào aa ma òto to âtou iho èo.
7 U mahaò âtou me te emièe, e peàu aa :
« Aòè à me io te Fenua Karirea mai
tēnei poì paotū e teào nei ?
8 Pēhea òa tātou tikitahi e òno ia âtou
e hakako aa nei ma òto o to tātou èo tumu ?
9 To Paratia, to Metai, to Erama,
te huaa ènata e noho nei i te Fenua Metopotamia,
Iutea, Kapatokia, Ponoto, Atia, Ferukia,
10 Pamafuria, Ekipito, Tiripia tata èka me Kirene,
to Roma, manihii înei, te poì fānautia ati Iuta,
11 me te poì haa ati Iuta mēìa i to âtou haatià,
to Kerete, to Arapia, ùa òno tātou paotū ia âtou
e teào aa i to tātou èo
no te haaìte i te hana mahaò o te Etua. »
TARAMO 104 (103), 1.24ac, 29b-30, 31.34
E te Fatu e, a pahi mai i to Òe Kuhane no te haahou i te hakatu o te fenua. cf. .104,30
1 A haameitaì i te Fatu, e tu ù kuhane e.
E te Fatu e, tu ù Etua e, u tiketike Òe.
24 He mea nui to Òe tau hana, e te Fatu e.
Ua pī te fenua i to Òe tau taetae.
29 Me too Òe i to âtou menava,
E mate nui âtou me te hua io he èpo.
30 Na Òe e puhi i te ao, e pēpena hou âtou.
U haahou Òe i te hakatu o te fenua.
31 A kāìè te Fatu no te tau tai a tihe anatu.
A èkaèka te Etua i òto o to Īa tau hana.
34 Koù e haaèkaèka to ù mou hīmene i te Fatu.
O tu ù koakoa te haapii me te Etua anaè.
TETAUTINA O TO MUA HĀMANI A PAURO PEÀTO I TO KORINETIA 12, 3b-7.12-13
E tu ù tau tunane tuehine,
3 O te ènata e peàu : o Ietu te Fatu,
u haateetia hua ènata e te Kuhane Meitaì.
4 E hakatu kē, hakatu kē te tau vaièitina kuhane,
atià, me io te Kuhane e tahi anaè.
5 E hakatu kē, hakatu kē te hana tāvini,
atià, e tāvinitia te Fatu e tahi anaè.
6 E hakatu kē, hakatu kē te tau hana te i haapaotia,
atià, o te Etua e tahi anaè te tumu o te tau hana ôtoa
i òto o te tau ènata paotū.
7 U vaièitia ia ôtou tikitahi te ìi o te Kuhane,
hakatu kē to tītahi, hakatu kē to tītahi
no te meitaì o tātou paotū.
12 E tahi tino anaè to te ènata
e aha à he mea nui to īa tau hope.
O hua tau hopetino paotū hakatu kē tītahi, hakatu kē tītahi,
e ìò âtou nui e tino e tahi anaè.
Hua mea aneiho no te Kirito.
13 Atii tātou : he ati Iuta tahipito, he poì Hereni tahipito.
Enā te tau ènata na âtou ta âtou,
enā te tau tueni haamōèhutia.
Atià, u papatematia tātou paotū
na te mana o te Kuhane e tahi,
etià e ìò tātou he tino e tahi.
U fāinutia tātou nui me te Kuhane e tahi.
PURE VEVAÒ I TE KUHANE MEITAÌ
E te Kuhane Meitaì e,
A ihi mai io he koekoe o mātou.
A pahi mai me i ùna i to Òe māàma.
E te Motua o te poì veve.
E te tumu o te vaièi i te taetae. Mave mai.
E te māàma o te koekoe. A ihi mai io mātou.
E te vevaò meitaì nui.
E te manihii moû oko,
A haakoè i te momoù.
Ma òto o te hana, o Òe te hakaēa.
Ma òto o te veàveà, o Òe te kamaìi.
Ma òto o te uē, o Òe te èkaèka.
E te māàma haakoakoa mai,
A mai no te haapī me to Òe àma
I te koekoe o to Òe poì haatià.
Me takitia me io mātou to Òe mana Etua,
E koè ai te meitaì i òto o te ènata.
E toe anaè te hīa pē, te ìno nui io īa.
A haamā i te mea èpo.
A haatoku i te mea moô.
A haapohoè i te mea takapii.
A haanevaì i te mea feò.
A māhanahana i te mea anu.
A haatoitoi i te mea pikopiko.
A vaièi mai i te poì haatià
Te i tohe mau i te vevaò ia Òe,
I te fitu o to Òe taetae kāòha.
A toko mai no te hana meitaì.
A haatee mai tihe io he àni,
I èià te koakoa paona koè.
ALLELUIA ALLELUIA
Mave mai, e te Kuhane Meitaì e. A ihi mai io he koekoe o mātou. A haaveàveà i to mātou koekoe e to Òe kāòha.
EVANERIO O IETU KIRITO VĀÀNA E IOANE 20, 19-23
I te ahiahi o hua â to mua o te âtapu,
19 u putuputu te huaa kouâ i òto he pāòto.
Ua pātia te avaputa na te haametaù i te poì ati Iuta.
Ua tihe anamai Ietu.
Ua tū anaè Īa i vāvena ahau o âtou.
U peàu Īa : « Ia ôtou te moû. »
20 E peàu ana i hua ponateào, u haaìte Ietu ia âtou
i to Īa nā îima me to Īa ava kaokao.
Ua pī i te koakoa te tau kouâ,
mēìa ua ìtemata âtou i te Fatu.
21 U peàu hakaùa Ietu : « Ia ôtou te moû.
Me he mea ua pahi mai to ù Motua ia ù,
atii me to ù pahi atu ia ôtou. »
22 Ia pao hua ponateào,
ua puhi Ietu i to Īa ao i ùna o âtou me te peàu :
« A haakoàna ia ôtou i te Kuhane Meitaì.
23 To te tau ènata mikeo e vevetetia e ôtou, u vevetetia.
To te tau ènata mikeo e tāmautia e ôtou, u tāmautia. »
TE KOÌNA O TE ETUA TOÙTAHI
TETAUTINA O TE HĀMANI A MOITE PEÀUTIA EHOTO
34, 4b-6.8-9
4 I te hāhakateiao, ua aa Moite ; ua fiti i ùna o te tuaivi
me he mea ta te Fatu Etua i peàu ia īa
me nā keâ e ùa i òto o to īa nā îìma.
5 Ua iho mai te Etua i òto o te ao ;
u haatata me Moite te i taaàu i te inoa o te Fatu Etua.
6 E taha ana te Fatu Etua i te aò o Moite, u taaàu :
« E te Fatu Etua e, te Fatu Etua hakāòha nui
me te matavaièi atu, te i haatevee i to Īa peê,
te i hana vāàna i te Tiàtohu, hakahae koè ».
8 Ua moe haatona ponihoo Moite i àò te aò.
9 U peàu Moite :
« E te Fatu Etua e, anoa e koàna ia ù te karatia io Òe,
a taha te Fatu Etua i vāvena o mātou nei.
He mataèinaa upoo feò, hua poì.
A vetevete Òe i to mātou tau tekateka me to mātou tau mikeo.
E ìò ai mātou o ta Òe hope taetae. »
HĪMENE A TE PEROFETA TANIERE 3, 52-56
Ia Òe te hahi me te kāìè ma te tau tai a tihe anatu.
Tan.3,52
52 A haameitaìtia Òe, e te Fatu e,
te Etua o to tātou tupuna e.
Ia Òe te hahi me te kāìè, i tēnei, anatu.
53 A haameitaìtia to Òe inoa tapu nui,
a haameitaìtia Òe, fāfītia me te kāìè.
Ia Òe te hahi me te kāìè, i tēnei, anatu.
54 A haameitaìtia Òe e noho nei io to Òe ahu tapu.
A haameitaìtia Òe io to Òe nohona kāìè.
Ia Òe te hahi me te kāìè, i tēnei, anatu.
55 A haameitaìtia Òe te i ìte i te take o te tai.
A meitaìtia Òe te i noho i ùna nui o te àni.
Ia Òe te hahi me te kāìè, i tēnei, anatu.
56 A haameitaìtia Òe te i pēpena i te papafenua.
A haameitaì i te Fatu Etua to Īa tau hana paotū.
Ia Òe te hahi me te kāìè, i tēnei, anatu.
TETAUTINA O TE HĀMANI E ÙA A PAURO PEÀTO I TO KORINETIA 13, 11-13
11 E tu ù tau tunane tuehine, a koakoa ôtou.
A tohe mau te haameitaì atu i to ôtou hakatu pohoè.
A haaoho i te ìi te hoa i te hoa.
A haatūtaì atu tūtaì mai ma òto o te maakau e tahi.
A noho me te moû ; me ôtou nui hoì
te Etua o te kāòha me te moû.
12 A kāòha te hoa i te hoa ma te honi atu honi mai,
me he mea ua hani tātou poì haatià.
U kāòha ia ôtou te tau ènata haatià paotū.
13 Me ôtou nui te karatia o te Fatu Ietu Kirito,
te haataetae na te Etua, te haatahi na te Kuhane Meitaì.
ALLELUIA ALLELUIA
cf. Ap.1,8
Kāìè nui te Motua me te Tama me te Kuhane Meitaì, te i tū nei, te i tū òmua naoti, te tihe ai, te Mana nui.
EVANERIO O IETU KIRITO VĀÀNA E IOANE 3, 16-18
I tēia mou pō, u peàu Ietu ia Nikotemo pēènei :
16 Mēìa i te nuitina o to Īa kāòha i to te ao nei,
ua tuu te Etua i ta Īa Tama tootahi,
etià aòè e mate ai te ènata i haatià i hua Tama,
e koàna hoì ia īa te pohoè paona koè.
17 U te e pahi te Etua i ta Īa Tama i te ao nei
no te hakatio i te tau ènata,
atià, no te haapohoè ia âtou.
18 U te e hakatio te Etua i te ènata i haatià i te Tama.
Atià, o te ènata haatià koè, u hakatio te Etua ia īa.
Na te mea, e ao koè īa i te haatià
i te Tama Tootahi a te Etua.
TE KOÌNA HAHI I TE EUKARITIA
TETAUTINA O TE HĀMANI TEUTERO 8, 2-3.14b-16a
U peàu Moite i te mataèinaa Iraene pēènei :
2 A haamaakau òe i to òe èkatina io he fenua ataha :
ma te òa e toufā èhua, ua hee, hee atu òe.
Oia nei te maìmaì o te Fatu, to òe Etua :
e tuutia òe i òto o te kōfii me te àì nui.
Ma èià, e ìtetia e aha te hakatu o to òe koekoe :
aha e aotahi òe i te Teào a te Etua,
aha e kōhumuhumu òe me te paekē me io te Fatu ?
3 Na te Etua i aahi ia òe io he aanui o te poì veve,
te poì mate i te one.
Na te Etua e tuu ia òe i te oà me io he àni,
te Manahū ta to òe tau tupuna i ako koè i te tai kākiu.
Ma èià, e koàna ia òe te vivini i te mea :
aòè e pohoè te tau ènata na te faraoa anaè,
atià na te teào me io te fafa o te Fatu Etua.
14 Umoì òe e haatūhaa i te Etua te i haapohoè ia òe
me io te Fenua Ekipito, te faè o te poì haamōèhutia.
15 U haatee te Fatu Etua ia òe ma vāvena o te fenua ataha,
fenua fātea nui, fenua haahopo, fenua me te tau koropio,
te tau puhifenua e nanahu me he ahi,
fenua moô haamate i te maovai.
I uē ia òe, u haapihiti te Fatu Etua i te vai
me io he motukeâ keî, feò oko.
16 Na te Etua i vaièi atu ia òe i te faraoa Manahū,
te oà u te e ako òmua atu to òe tau tupuna.
TARAMO 147(147B), 12-13, 14-15, 19-20
E te mataèinaa a te Etua e, a hahi i to òe Fatu.
12 A haakāìè i te Fatu, e Ierutaremi e.
A hahi i to òe Etua, e Tiona e.
13 U haamau Īa i te tau katina o to òe faè.
U haameitaì Īa i ta òe tau tama me te huaafaè.
14 U vaièi Īa i te moû io to òe fenua vii pu.
U tāfai haamāòna ia òe me te faraoa mōmona.
15 U pōpahi te Fatu i to Īa keèe i te fenua vii pu.
Ma te haakoi, u mevaha to Īa teào hou.
19 U haaìte te Fatu i to Īa teào ia Iakopo.
Ua faì i to Īa maìmaì me te Ture ia Iraene.
20 I hea te mataèinaa ta te Etua i haataetae atu ?
Aòè te fenua kē i ìte i to te Etua maìmaì.
TETAUTINA O TO MUA HĀMANI A PAURO PEÀTO I TO KORINETIA 10, 16-17
E tu ù tau tunane tuehine,
16 io te kainamau o te Fatu,
u haameitaì tātou i te ipu.
Ia àva atu tātou i hua ipu,
ua inu tātou i te toto o te Kirito.
Ia vahi tātou i te faraoa,
ua kai tātou i te tino o te Kirito.
17 Mēìa e tahi poo faraoa anaè,
u haatahi tātou nui i òto o te tino e tahi.
U àva atu hoì tātou paotū i te faraoa e tahi.
ALLELUIA ALLELUIA
cf. In.6,51-52
E te Fatu e Ietu e, O Òe te faraoa pohoè te i iho mai me io he àni. O te ènata e kai i tēia faraoa, e pohoè anatu.
EVANERIO O IETU KIRITO VĀÀNA E IOANE 6, 51-58
I tēia mou pō, ma muì ta Ietu haanui i te faraoa,
u peàu Īa i te faètoa pēènei :
51 « O au te faraoa pohoè te i iho mai me io he àni.
O te ènata e kai i hua faraoa,
e koàna ia īa te pohoè paona koè.
O tu ù tino te faraoa e tuu nei au
mea haapohoè i to te ao nei. »
52 U totohe atu totohe mai te tau ati Iuta, e peàu ana :
« Pēhea òa te tuu mai o hua ènata i to Īa tino mea kai ? »
53 U peàu Ietu ia âtou :
« E teào tiàtohu ta ù nei ia ôtou :
Anoa u te e kai ôtou i te tino o te Tama a te ènata,
u te e inu ôtou i to Īa toto,
aòè te pohoè i òto o ôtou.
54 Me kai te ènata i tu ù tino ; me inu īa i tu ù toto,
u koàna mai ia īa te pohoè paona koè.
E haapohoè hakaùa au ia īa
i te â paona o te ao nei.
55 He mea oà tiàtohu hoì tu ù tino,
he mea inu tiàtohu tu ù toto.
56 O te ènata i kai i tu ù tino, i inu i tu ù toto,
ua noho īa i òto o au, ua noho au i òto o īa.
57 Me he mea o te Motua, te tumu o te pohoè,
i pahi mai ia ù, me io Īa tu ù pohoètina,
atii no te ènata i kai ia ù,
e ìò o au te tumu o to īa pohoètina.
58 Oia hoì te faraoa te i iho mai me io he àni.
Mea kē te faraoa i kaitia e to ôtou tau tupuna :
u mamate âtou. O te ènata e kai i tēnei faraoa,
e koàna ia īa te pohoè paona koè. »
TE KOÌNA O TE HŌUPO TAPU OKO O IETU
TETAUTINA O TE HĀMANI TEUTERO 7, 6-11
6 Ua ìò hoì ôtou he mataèinaa haapeàtotia
no te tāvini i te Fatu to ôtou Etua.
Ua vae te Fatu ia ôtou vāàna e ìò ôtou
to Īa òna mataèinaa tāpaetia me i vāvena
o te tau mataèinaa paotū o te aomāàma vii pu.
7 Ua vae te Fatu Etua ia ôtou,
aòè mēìa he mataèinaa nui, nui atu ôtou i vāvena o tahipito ;
o ôtou hoì te iti noa i vāvena o âtou nui.
8 Atià, u kāòha te Fatu Etua ia ôtou,
e haamaakau ana i te teào ta Īa i peàu i to ôtou tau tupuna.
Oia te tumu o to Īa tau hana mahaò i uē ia ôtou.
Na te mana o to Īa ìma, u aahi te Fatu Etua
ia ôtou i vaho o te Fenua Ekipito,
e haapohoè ia ôtou me i te faè o te poì haamōèhutia,
e haakoè i te vivinitina mākaka o te hakaìki Faraone
i ùna o ôtou.
9 Ma èià, e ìte hoì ôtou he Etua tiàtohu te Fatu to ôtou Etua.
I uē i te tau ènata,
e kāòha ia Īa me te aotahi atu i to Īa maìmaì.
Ua hana te Fatu vāàna i to Īa Piimau me to Īa hakāòha nui,
ma te òa o te tai ènata tautini, tini.
10 Atià, ua huke Īa i te umu i te tau ènata e haahaa ia ù.
Umoì te haatevee e haahina te Fatu ia âtou.
11 O ôtou à, a aotahi meitaì i te teào, te maìmaì,
te ture ta ù i haaìte atu ia ôtou i tēnei â. »
TARAMO 103 (102), 1-2, 3-4, 6-7, 8.13
A kāòha atu kāòha mai te hoa i te hoa, me he kāòha o te Etua ia tātou. cf. In.4,7
1 E tu ù kuhane, a haameitaì i te Fatu ;
Me io he koekoe a haameitaì i to Īa inoa peàto.
2 A haameitaì i te Fatu, e tu ù kuhane,
Aua e tūhaa e tahi o to Īa vaièitina.
3 U vevete te Fatu i to òe tau mikeo paotū.
U haakoè te Fatu i te memae o to òe tino.
4 Na Īa i taki ia òe me io te ana tūpāpaù.
Na Īa i fāfī ia òe i te kāòha me te hinenaò.
6 E hana te Fatu vāàna i te toitoitina.
O Īa te vevaò o te poì i haamākakatia.
7 Ua faì atu i to Īa maìmaì ia Moite ;
U haaìte i to Īa tau hana mana ia Iraene.
8 He moû, he kāòha te hakatu o te Fatu.
U haatevee i to Īa peê ; ua pī i te kāòha.
13 Me he mea u kāòha te motua i ta īa tama,
Hua hakatu to te Fatu kāòha i te ènata pakaihi ia Īa.
TETAUTINA O TO MUA HĀMANI A IOANE ÀPOTORO
4, 7-16
E tu ù tau teina tāhia e,
7 Tu ù tau hoa tāhia e, a kāòha atu kāòha mai te hoa i te hoa.
Na te mea, me io te Etua te kāòha.
O te ènata i kāòha i te hoa, he tama īa o te Etua,
ua ìte īa i te Etua.
8 Me kāòha koè te ènata, aòè hua ènata i ìte i te Etua.
He kāòha hoì te Etua.
9 U haaìte te Etua i to Īa kāòha ia tātou
ma te pōpahi i ta Īa Tama tootahi io te ao nei,
etià e pohoè tātou ma io Īa.
10 Oia nei te kāòha tiàtohu :
Aòè o tātou te i kāòha i te Etua.
O te Etua te i kāòha ia tātou òmua ìka
ma te pahi mai i ta Īa Tama,
e hēana ùtunatia mea haakoè i te umu o to tātou mikeo.
11 Tu ù tau hoa tāhia e,
e pēhea atii te nui o to te Etua kāòha ia tātou,
a kāòha hoì te hoa i te hoa.
12 Aòè e tahi ènata i ìtemata i te Etua.
Me kāòha te hoa i te hoa, ua noho te Etua i òto o tātou ;
u meitaì oko to tātou kāòha i te Etua.
13 Ua ìte tātou ua noho te Etua i òto o tātou,
ua noho tātou i òto o te Etua
na te mea, u vaièi mai te Etua ia tātou i to Īa Kuhane.
14 O tātou à, ua ìte tātou me to tātou haatiàtohu
i te mea u pōpahi te Motua i ta Īa Tama
no te haapohoè i te tau ènata.
15 O te ènata e faì o Ietu te Tama a te Etua,
ua noho te Etua i òto o īa me to īa noho i òto o te Etua.
16 O tātou à, ua ìte i te mea u kāòha te Etua ia tātou.
U haatià tātou i hua teào. He kāòha te Etua.
O te ènata i kāòha me te tohe mau i te kāòha,
ua noho hua ènata i òto o te Etua,
ua noho te Etua i òto o īa.
ALLELUIA ALLELUIA
cf. Mt.11, 29
E te Fatu e Ietu e, he koekoe moû, he koekoe haapāpaù to Òe. Ia Òe te kāìè me te vaièi. Pii me Òe, e koàna mai ia mātou te hakaēatina kuhane.
EVANERIO O IETU KIRITO VĀÀNA E MATEO 11, 25-30
25 I tēia mou pō, u pohā te èo o Ietu me te peàu :
« U haameitaì au ia Òe, e te Motua e,
te Fatu o te àni me te fenua,
mēìa u hakanā Òe i tenā mea
i te poì māàma me te tau tuhuna
no te haaìte atu i te poì iti noa.
26 E hoì, e te Motua e,
oia nei te hīa o to Òe vaièi mai.
27 Na tu ù Motua, i tuutia mai te tau mea ia ôtoa.
Aòè e tahi ènata i ìte i te Tama,
o te Motua anaè.
Aòè e tahi ènata i ìte i te Motua,
o te Tama anaè,
atii me te ènata ia īa i haaìtetia e te Tama,
vāàna i to hua Tama maìmaì.
28 A tihe mai io ù, ôtou nui te i paòpaò hae
mēìa i te tono o te amona. Na ù e haaànaàna.
29 A amo ôtou i te amona o to ù teào.
A haaòno mai mēìa he koekoe moû,
he koekoe haapāpaù to au nei.
E koàna mai ia ôtou te hakaēatina kuhane.
30 Na te mea he māeà to ù amona,
he mea ànaàna te tono o to ù teào. »
TE AVA MA TE ÈHUA
TOMINIKA E ÙA
TETAUTINA O TE PEROFETA ITAIA 49, 3.5-6
Oia nei te teào a te Tāvini o te Etua.
3 U peàu mai te Fatu :
« E te mataèinaa Iraene, o òe tu ù tāvini. Io òe tu ù kāìè. »
5 I tēnei, u pohā te èo o te Fatu Etua te i kānea ia ù
i òto o te ôpū o to ù kui, etià he tāvini au no Īa,
me to ù haahua i te meitaì i te ati o Iakopo,
me te haakātahi mai i te mataèinaa Iraene.
U haataetae te Etua ia ù. O te Etua tu ù ìi.
6 Oia nei ta te Etua i peàu mai :
« O òe tu ù tāvini no te haahua i te meitaì
i te tau ati o Iakopo,
no te haakātahi mai i te toena o te mataèinaa Iraene.
Tōtahi atu, e haaìò au ia òe he māàma o te poì êteni,
etià e neke to ù haapohoè
tihe atu io he kotiàna paona o te fenua. »
TARAMO 40 (39), 2abc.4ab, 7-8a, 8b-9, 10cd.11cd
Io te Fatu tu ù tetaì me tu ù koakoa.
2 U tetaì au, e tohe mau te tetaì i te Fatu.
U tiòhi mai te Etua, ua òno Īa i tu ù vevaò.
4 U pepeù te Etua i to ù fafa no te hīmene hou ;
E tani to ù èo no te hahi i to tātou Etua.
7 Aòè Òe maìmaì i te tau ùtuna hēana.
U pepeù Òe i tu ù puaìna, e te Etua e.
Aòè Òe i apuu mai i te hēana pūovo i te ahi.
8 Oia te tumu o tu ù peàu atu : Eīa e tihe au nei.
Ua patutia no ù io he Hāmani tapu
9 Pēhea te haatae i to Òe maìmaì.
E tu ù Etua e, oia nei tu ù hīa :
Te aotahi atu i to Òe teào ma io he koekoe.
10 A haamaakau Òe u te e pā to ù fafa.
E te Fatu e, ua ìte meitaì Òe.
11 Ua faì au i to Òe toitoitina me to Òe tiàtohu
I mua o te motuhaka o te mataèinaa
TETAUTINA O TO MUA HĀMANI I TO KORINETIA 1, 1-3
1 O au tēnei o Pauro, vaetia he àpotoro o Ietu Kirito,
vāàna i to te Etua maìmaì.
Enā me au nei o Hotene, to tātou teina.
2 Kāòha ôtou, e te Èkaretia o te Etua
e èka ana io te Fenua Korinetia.
Kāòha ôtou te i haapeàtotia ma io te Kirito Ietu,
vaetia no te pohoè me he poì peàto.
Kāòha ôtou e tahi me te nuitina o te ènata
e noho nei i te fenua kē, fenua kē,
te i pakaihi i te inoa o Ietu Kirito,
to tātou Fatu : to âtou Fatu hoì atii me to mātou.
3 Ia ôtou te karatia me te moû
me io te Etua, to tātou Motua, me io te Fatu Ietu Kirito.
ALLELUIA ALLELUIA
cf. In.1, 14.12
U haaènatatia te Teào me to Īa noho i vāvena o tātou. Ma io Īa, e ìò he tau tama no te Etua te tau ènata e haatià ia Īa.
EVANERIO O IETU KIRITO VĀÀNA E IOANE 1, 29-34
29 I tēia mou pō, ua ìte Ioane ia Ietu e tihe aa io īa.
U peàu Ioane :
« O Īa nei te Arenio o te Etua.
O Īa te i too i te mikeo o te aomāàma nei.
30 No Īa to ù teào pēènei :
« E tihe mai ma muì o au nei te ènata.
U meitaì aè Īa, na te mea òmua atu Īa, epō au nei.
31 Aòè ai i ìte ia Īa. Atià, mea haaìte ia Īa i to Iraene,
i tihe ai au i te papatema vai tuu. »
32 U haatiàtohu hoì Ioane pēènei :
« Ua ìtemata au i te Kuhane Meitaì e iho aa me io he àni
me he manu māìta noho aa ma ùna o Īa.
33 Aòè au i ìte o ai Īa. Atià, o te Etua te i pahi mai ia ù
no te papatema i òto o te vai, u peàu mai pēènei à :
« E ìtemata òe i te Kuhane Meitaì e iho aa
me te noho i ùna o te ènata.
O Īa nei te i papatema i òto o te Kuhane Meitaì.
34 Ua ìtemata hoì au.
U haatiàtohu au o Īa nei te Tama a te Etua. »
TOMINIKA E TOÙ
TETAUTINA O TE HĀMANI A TE PEROFETA ITAIA
8, 23b--9, 1-3
23 I te tai tehito, u haahakaìna te Fatu
i te Fenua Tapuro me te Fenua Nafetari.
I muì iho, i te tau â e tihe ai, u haakāìè nui te Fatu
i te fenua o te aanui e hee i tai,
i te fenua ma hiva atu o te kaavai Ioritane,
i te Fenua Karirea, te makatina aanui o te poì êteni.
1 O te mataèinaa e taha aa io te vao pōtano,
ua ìte i te àma pōnionio.
I ùna o te poì noho aa io te fenua maù nui, u pupuà te àma.
2 Na te Etua i vaièi mai i te èkaèka ;
na te Etua i haanui i te koakoa :
e koakoa nei âtou i te aò o te Fatu,
me he koakoa o te tau ènata e kohi i te puku o te fenua,
me he koakoa o te tau kape ia tuhatia te tau taetae
o te poì i hina ma òto o te tōua.
3 Na te mea, ua haafati te Etua me te peê
i te amona tono me i ùna o to âtou paufifi,
i te pooâkau haamaki i to âtou tua, i te tā o to âtou kapetiaì.
Atii to te Etua i hana i te â u tuàki Īa i to Matiana.
TARAMO 27 (26), 1, 4a-d, 13-14
O te Fatu tu ù māàma, tu ù pātoko.
1 O te Fatu tu ù māàma, tu ù pātoko.
O ai òa e haametaù mai ?
O te Fatu te i tiaì i tu ù pohoè.
O ai òa e haapūkina mai ?
4 I mua o te Etua, e tahi hīa anaè to ù,
E tahi mea ta ù e ape io Īa :
O te noho io he faè o te Fatu
Ma te tau â paotū o to ù pohoètina,
13 Tiàtohu nui, e ìte au i te meitaì o te Fatu,
I te ao nei i vāvena o te tau ènata pohopohoè.
14 A tetaì i te Fatu. Oho te ìi.
TETAUTINA O TO MUA HĀMANI I TO KORINETIA
1, 10-13.17
10 E tu ù tau tunane tuehine,
ma te inoa o Ietu Kirito to tātou Fatu,
u toutaki au ia ôtou : a haatūtaì atu tūtaì mai
ma te haatahi i to ôtou maakau.
Umoì e pūpū kē tahipito, pūpū kē tahipito.
A haatūtaì ôtou ma te haatahi i te kaituto atii me te maìmaì.
11 Na te poì me io he faè o Koroe i àve mai i te teào,
enā io ôtou, u patitoo te hoa i te hoa.
12 Oia nei te mea ua ìte au. U peàu ta tītahi :
« Ua kē au me Pauro. »
Ta tītahi : « Ua kē au me Aporo. »
Ta tītahi : « Ua kē au ma Petero. »
Ta tītahi : « Ua kē au me Ietu Kirito. »
13 Aha, u pāheetia Ietu Kirito ?
Aha, i pāokapekatia Pauro i uē ia ôtou ?
Aha, u koàna ia ôtou te papatema ma te inoa o Pauro ?
17 Ma te tiàtohu, u te e pahi mai Ietu Kirito ia ù
mea tuu atu i te papatema.
Ua pahitia au mea haamevaha i te Evanerio,
umoì vāàna i te teào māàma a te tau ènata,
oa ìò he mea tupepaka noa te peka o Ietu te Kirito.
ALLELUIA ALLELUIA
cf. Rk.1,68.79
A haameitaìtia te Etua, to tātou Fatu, te i haaiho mai me io he àni i te māàma haapupuà i te poì e noho nei io he pō.
EVANERIO O IETU KIRITO VĀÀNA E MATEO 4, 12-23
12 Ia òno Ietu u haaìòtia Ioane,
ua hee atu Īa io te Fenua Karirea.
13 U titii Īa ia Natareti.
Ua noho Īa i Kafaranaumi i te hiku o te tai
i te kotiàna o te Fenua Tapurone me te Fenua Nafetari,
14 etià e toitoi te teào i peàutia e te perofeta Itaia :
15 « E te Fenua Tapurone, e te Fenua Nafetari e,
e te aanui hee i tai, e te fenua ma hiva
o te kaavai Ioritane, e te Fenua Karirea pī i te poì êteni.
16 O te mataèinaa e noho aa i to he maù pōtano,
ua ìte i te māàma haapupuà.
O te poì e kaapee ana io te fenua me te vao o te matena,
ua ìte i ùna o âtou i te àma e haakeàpa mai. »
17 A tahi nei, u tīmata Ietu i te hakako ma te peàu pēènei :
« A fāìu i te koekoe.
U tata èka hoì te Patirēia o te àni. »
18 E taha ana Ietu ma te hiku o te tai Karirea,
ua ìte Īa i nā tunane tokoùa,
o Timone, te i apatia Petero, o Aterea, to īa teina.
U haatopa âua i te ùpena io he tai.
He nā ènata àvaià hoì âua tokoùa.
19 U peàu Ietu ia âua : « A ūtaì mai ôùa ia ù.
E haaìò au ia ôùa he àvaià ènata. »
20 U avai anamai âua i te ùpena me te ūtaì ia Ietu.
21 Ua taha Ietu i te ava poto. Ua ìte Īa i nā tunane kē tokoùa,
o Iakopo, tama na Ihepetea, o Ioane, to īa teina.
Io he vaa âua me te motua. U kānea âtou i to âtou tau ùpena.
U vevaò Ietu ia âua tokoùa.
22 U avai anamai âua i te vaa me to âua motua
no te ūtaì ia Ietu.
23 Ua vii Ietu i te Fenua Karirea ia ôtoa,
e hakako aa i òto o to âtou tau tinakoka.
U haaìte Īa i te Teào Meitaì Hou Mai o te Patirēia.
U haapohoè Īa i te tau ènata hemo i te mate,
me te tau ènata takapii memae kē, memae kē
i vāvena o te mataèinaa.
TOMINIKA E FĀ
TETAUTINA O TE HĀMANI A TE PEROFETA HOFONIA
2, 3 --3, 12-13
3 Oia nei te Teào a te Etua :
« A ìmi i te Fatu, ôtou e te poì iti noa o te fenua nei,
te poì e aotahi atu i te Teào a te Etua.
A kōhoà ôtou i te hana vāàna i te maìmaì o te Etua ;
a hano ôtou a haapāpaù etià e haametaù koè ôtou
i te â e haaìte ai te Etua i to Īa peê.
3, 12 E te mataèinaa Iraene,
me i vāvena o òe, he mea iti te poì e pohoè ai :
o te poì me te koekoe haapāpaù, te poì veve.
E vevaò âtou i te inoa o te Fatu, to âtou pātoko.
13 Aòè tēnei toena o Iraene e teka hakaùa.
Aòè e teào tīkoe to īa. Aòè e hana hakahae hakaùa.
Me taha īa, me hakaēa īa, aòè e tahi ènata e haahopo ia īa.
TARAMO 146 (145), 7, 8, 9ab.10b
Mamau te poì koekoe veve, no âtou te Patirēia o te àni.
Mt.5,3
7 U haavā Īa me te toitoi i te poì mākakatia.
U vaièi Īa i te oà i te poì mate i te one.
U vevete atu Īa i te poì me io he faèhumu.
8 O te Fatu te i haatāhahaka i te tau matapō,
O te Fatu te i haaūo i te poì kuhane koè.
O te Fatu te i haataetae i te poì toitoi noa.
9 O te Fatu te vevaò o te tau manihii.
O te Fatu te toko o te tama motua kui koè
me te vehine pōpī.
10 E Tiona e, a pohoè paona koè to òe Etua.
TETAUTINA O TO MUA HĀMANI I TO KORINETIA 1, 26-31
26 E tu ù tau tunane tuehine,
ôtou te i vaetia e te Etua, a tiòhi vii pu o ôtou.
I vāvena o ôtou, aòè te mea nui
te poì māàma vāàna i to te tau ènata maakau.
Aòè te mea nui i vāvena o ôtou te tau hakaìki,
akoè à te poì hōhonu.
27 Na te mea, o te poì peàutia tuaave vāàna i to te ao nei,
oia te tau ènata vaetia e te Etua
no te haahakaìna i te poì māàma.
Ua vae te Etua i te poì pepee vāàna i to te ao nei,
no te haahina i te poì oko.
28 O te tau ènata avai noa, poì haameetia e to te ao nei,
oiana ta te Etua i vae.
Ua vae hoì te Etua i te mea tupepaka
no te haahina hutararā i te mea taetae vāàna i to te ao nei.
29 Ma èià, aòè e tahi ènata
e koàna te haakāìè ia īa iho i mua o te Etua.
30 Na te karatia o te Etua, u haatahitia ôtou me te Kirito Ietu.
I òto o hua Kirito, u maìmaì te Etua
e koàna mai ia tātou te māàma,
e ìò tātou he tau ènata toitoi i mua o Īa,
he mataèinaa peàto, haapohoètia.
31 Ua patutia hoì io he Hāmani tapu pēènei :
« O te ènata te i hano haakāìè ia īa iho,
a haakāìè i òto o te Fatu. »
ALLELUIA ALLELUIA
Mt.5,12
A koakoa, a èkaèka ôtou, e nui ai to ôtou tuki meitaì i òto o te àni.
EVANERIO O IETU KIRITO VĀÀNA E MATEO 5, 1-12
I tēia mou pō, ia ìte Ietu i te faètoa nui,
1 ua fiti Īa i ùna o te tuaivi. U kaapee Īa.
U haatata mai to Īa tau kouâ.
2 U pohā te èo o Ietu. U hakako ia âtou.
U peàu Īa pēènei :
3 Mamau te poì koekoe veve :
no âtou te Patirēia o te àni.
4 Mamau te poì koekoe moû :
e ìò ia âtou te Fenua i peàutia e te Etua.
5 Mamau te poì e uēuē nei :
e haakoètia ai to âtou uē.
6 Mamau te poì e ūo to âtou kōhoà no te aotahi atu
i te maìmaì o te Etua :
e vaièitia mai ia âtou vāàna i to âtou kōhoà.
7 Mamau te poì koekoe hakāòha atu :
e hakāòhatia mai.
8 Mamau te poì koekoe taìtaì :
e ìte âtou i te Etua.
9 Mamau te poì haaneke i te moû :
e peàutia âtou te tau tama a te Etua.
10 Mamau te poì e mākakatia
mēìa i to âtou aotahi atu i te maìmaì o te Etua :
no âtou te Patirēia o te àni.
11 Mamau ôtou me haapētia, me mākakatia,
me pōtohoputia mēìa he kouâ ôtou no ù.
12 A koakoa, a èkaèka ôtou ;
e nui ai to ôtou tuki meitaì i òto o te àni.
TOMINIKA E ÌMA
TETAUTINA O TE HĀMANI O TE PEROFETA ITAIA 58, 7-10
7 A tuha i to òe oà i te ènata mate i te one.
A apuu io to òe faè i te ènata veve, huaa koè.
A tuu i to òe kahu i te ènata kahu koè.
Aua e fāìu i te tua i to òe hoa.
8 Ma èià, e pupuà to òe māàma
me he mea o te òumati i to īa eketina ;
e haahoutia to òe ìi.
E fāfītia òe me te toitoitina ;
ma ùna o òe, te kāìè o te Etua.
9 Ia vevaò òe i te Fatu, e haahua Īa.
Ia taaàu òe i te Etua, e peàu Īa : « Eīa au nei. »
Me vetevete òe i te umu o te poì haamōèhutia,
me titii òe i te hana mākaka me te teào paha,
10 me tāfai òe i te poì mate i te one,
me apuu òe i te hīa o te ènata kaiape,
e ìò òe me he àma pupuà i te pō ;
e keàpa òe me he òumati i te oatea.
TARAMO 112 (111), 1a.4, 5a.6, 7-8a, 9
I òto o te pōtano o tēnei ao, u pupuà te māàma o te toitoi.
cf. .112,4
1 Mamau te ènata pakaihi i te Etua.
4 Me he àma i te pō, e pupuà hua ènata
Me te koekoe toitoi, kāòha, vaièi.
5 Mamau te ènata e tuu me te koekoe vaièi.
6 Aòè e hinatia te ènata toitoi ;
U te e haatūhaatia to īa inoa.
7 U emièe koè īa me tihe te teào haauēuē.
U haatià īa i te Fatu me te koekoe oko.
8 E koekoe moû to īa, haametaù koè.
9 Ua tuha īa me te koekoe vaièi i ta īa taetae,
U haatapavaù īa i te poì veve.
E mau paona koè io te Etua to īa vaièitina.
E nui aè to īa mana me to īa òno nui.
TETAUTINA O TO MUA HĀMANI I TO KORINETIA 2, 1-5
E tu ù tau tunane tuehine,
1 I te ava ua tihe au io ôtou no te haaìte atu
i te maìmaì hakanā o te Etua,
aòè au i haafitipona i te teào hōhonu,
akoè à te teào haakāìè pu me he mea to tahipito tuhuna.
2 E tahi maakau anaè to ù : o Ietu Kirito,
Ietu Kirito hoì te i pāokapekatia.
Oia aneiho te teào u hakako au ia ôtou.
3 Ua tihe au io ôtou
me he ènata avai noa, koekoe pūkina, emièe aa.
4 U haaìte au ia ôtou i tu ù teào,
aòè me te èo kōnini o te tuhuna teào māàma.
O te tau hana mana o te Kuhane Meitaì
te i haatiàtohu i tu ù hakakotina.
5 Ma èià hoì, u haamautia to ôtou haatià,
aòè na te teào māàma o te tau ènata,
atià na te mana o te Etua.
ALLELUIA ALLELUIA
cf. In.8,12
E Ietu Kirito, te Māàma o te ao nei, O te ènata e ūtaì ia Òe, e koàna ia īa te māàma o te pohoè.
EVANERIO O IETU KIRITO VĀÀNA E MATEO 5, 13-16
I tēia mou pō,
ohia u putupututia te tau kouâ i te tuaivi vii pu o Ietu,
u peàu Īa peenei :
13 « O ôtou te paatai o te fenua.
Ia koè te kava o te paatai,
pēhea te haaìò hakaùa mea paatai ?
Ua koè nui to īa meitaì. E tahi mea e toe :
a titii i vaho, a tekatekahitia e te tau ènata.
14 O ôtou te àma o te aomāàma nei.
Pēhea te haanaò i te pāpuafaè i haatūtia ma ùna o te tuaivi ?
15 Aòè e tahi ènata e haauà i te àma
me te tuu atu ma àò o te hue.
Ua tuutia ma ùna o te pou avaina àma.
E pupuà hoì te àma no te poì paotū e noho nei io he faè.
16 Atii, a pupuà to ôtou àma i mua o te tau ènata,
etià e ìte âtou i to ôtou hana meitaì
me ta âtou haakāìè i to ôtou Motua te io he àni. »
TOMINIKA E ONO
TETAUTINA O TE HĀMANI A PENETIRA 15, 15-20
15 E koàna ia òe te aotahi atu i te Teào a te Etua.
A haapii òe me te Etua, vāàna e to òe maìmaì.
16 Ua tuu atu te Etua i mua o òe i te vai me te ahi.
A too òe vāàna e to òe maìmaì : ia òe.
17 I mua o te tau ènata, enā te pohoè, akoè à te matena :
na âtou ta âtou te vaetina.
E ìò ia âtou vāàna i to âtou maìmaì.
18 Mea hōhonu hoì te māàma o te Fatu.
Ua ìte te Etua i te mea hakatahi, hakatahi.
Ia Īa aneiho te vivini o te tau mea ia ôtoa.
19 U matavaièi te Etua i te tau ènata e pakaihi ia Īa.
Ua ìte te Etua i te hana hakatahi o te tau ènata ia ôtoa.
20 Aòè te Etua e peàu ia tītahi : a mākaka òe.
Aòè te Etua e ao i te ènata e tahi te hana teka.
TARAMO 119 (118), 1-2, 4-5, 17-18, 33-34
Mamau te ènata e taha teka koè i no he aanui, e hana ana vāàna i to Òe teào. cf. 119,1.17
1 Mamau te ènata e taha teka koè i no he aanui,
Te aanui haaìtetia e te Ture o te Fatu.
2 Mamau te ènata e haataetae i te hīa o te Fatu,
Te ènata e ìmi i te Fatu ma he koekoe tiàtohu.
4 E te Fatu e, u haaìte Òe i to maìmaì,
U peàu Òe e aotahi atu mātou teka koè.
5 Koù e tohe mau to ù taha vaevae
Vāàna e to Òe tau hīa ia ôtoa.
17 A matavaièi mai, e meitaì to ù pohoè.
E hana au vāàna i to Òe teào, e te Fatu e.
18 A haatāhakahaka i to ù kikomata,
E ìte au u mahaò nui to Òe Ture.
33 E te Fatu e, a aahi mai ma he aanui o te Ture,
E aotahi au no te koàna mai te tuki ta Òe i peàu.
34 A hakako mai i to Òe maìmaì, e te Fatu e.
E aotahi atu au me io he koekoe.
TETAUTINA O TO MUA HĀMANI I TO KORINETIA 2, 6-10
E tu ù tau tunane tuehine,
6 I te ava ua ìò tahipito me he ànamotua,
ma to âtou hakatu pohoè i òto o te Kirito,
u hakako mātou ia âtou i te teào māàma.
He mea kē anatu hua māàma ta te poì e haatee i te ao nei,
atii me te māàma o te tau kuhane ìno e vivini i te ao nei.
E hina ai âtou i te ava a tihe ai.
7 U hakako mātou i te teào māàma i ùna o te Etua.
U hakanātia io te Etua hua teào hōhonu
i te tau tai ènata hakatahi i àò aè.
Me i òmua naoti, ma mua o te pēpenatia i te aomāàma nei,
u tāpae te Etua i hua teào te i haakāìè ia tātou.
8 Aòè te tau kuhane ìno haatee i te ao nei
i ìte i tēia teào hōhonu a te Etua.
Anoa i ìte âtou i hua teào,
aòè âtou i pāokapeka i te Fatu o te kāìè nui.
9 Vāàna i te mea i patutia i òto o te Hāmani tapu,
u hakako hoì mātou :
« I te mea aòè te kikomata i ìte,
aòè te puaìna ènata i òno,
aòè te koekoe o te ènata i kaituto,
te mea paotū ta te Etua i haapei no te poì i kāòha ia Īa. »
10 Ia tātou, u haaìte te Etua, ma to Īa Kuhane,
i hua teào māàma.
Ua ìte meitaì te Kuhane
i te tau mea ia ôtoa, tihe atu i te hōhonu o te Etua.
ALLELUIA ALLELUIA
cf.19 (18),9
U toitoi te Teào o te Fatu, E haakoakoa âtou i te koekoe. E haakeàpa i te mata o te ènata.
EVANERIO O IETU KIRITO VĀÀNA E MATEO 5, 17-37
(5, 20-22a.27-28.33-34a.37)
I tēia mou pō,
ohia u putupututia te tau kouâ i te tuaivi
vii pu o Ietu, u peàu Īa peenei :
17 « Umoì ôtou e maakau ua tihe mai au
no te haakoè i te Ture a Moite,
me te teào o te tau Perofeta.
Aòè au i tihe mai no te haakoè,
atià à, no te haapao èka i te Ture me te tau Perofeta.
18 Ma te tiàtohu ta ù peàu ia ôtou :
e naò te àni me te fenua, koè nui e naò
e tahi ponateào hunahuna ti o te Ture,
ma mua e paoònaònatia paotū.
19 O te ènata pūtuì i te teào e tahi,
e aha à he teào iti noa,
me to īa hakako i hua hana teka i tahipito,
e peàutia : « Te iti noa » io he Patirēia o te àni.
O te ènata koekoe aotahi me te hakako i te aotahi atu,
e vevaòtia : « Te Tiketike » io he Patirēia o te àni.
20 U peàu hoì au ia ôtou :
Anoa u te e toitoi atu to ôtou hakatu pohoè
vāàna i to te Etua maìmaì,
i to te tau tuhuna teào me to te tau Fariteo,
aòè ôtou e tomo i òto o te Patirēia o te àni.
21 Ua òno ôtou i te teào peàutia i te tau tupuna :
umoì ôtou e ùumi haamate i te ènata.
Me ùumi tītahi i te hoa,
e hakatiotia hua ènata i mua o te haavā.
22 O au à, u peàu ia ôtou :
No te peê o te ènata i to īa teina,
e hakatiotia hua ènata i mua o te haavā.
No te paha o te ènata i to īa teina ma te peàu atu : e pupure,
e haavātia i mua o te Tuneteri.
No te haamee o te ènata i to īa teina ma te peàu : e tuaave,
e tutetia io he Kehena.
23 No èià, me ùtuna atu òe i te taetae kāòha pii o te fātaa pure,
me ta òe haamaakau u peê te hoa ia òe,
24 a avai i to òe ùtuna i pii te fātaa pure,
a hee òmua, a hano haaâvei me to òe hoa.
A tahi a hua mai no te ùtuna atu i to òe taetae kāòha.
25 A hano òe ponihoo e haaâvei me te ènata e tōua me òe,
i te ava e taha nātoa ôùa ma io he aanui.
Etià, umoì e aahi hua ènata ia òe io te haavā ;
na te haavā e haaìò ia òe i te mūtoi.
E àve te mūtoi ia òe io he faèhumu.
26 Tiàtohu ta ù peàu ia òe :
e utu òe i te pene paona ma mua to òe uu i vaho.
27 Ua òno ôtou i te mea peàutia :
Umoì òe e teka i te mātirimonio.
28 O au à, u peàu ia ôtou :
O te ènata e tiòhi atu i te vehine
me te hinenaò pu ia īa i òto o te koekoe,
ua piò īa i te mātirimonio me hua vehine.
29 Me hakapahi to òe kikomata ìma oko ia òe i te piò,
a tīkaò. A tioà memao me io òe.
Mea meitaì aè no òe
a naò ai e tahi hope o to òe tino,
i te topa o to òe tino tiàtohu i to he Kehena.
30 Me hakapahi to òe ìma oko ia òe i te piò,
a kokoti me te tioà atu memao me io òe :
mea meitaì aè no òe
a naò ai e tahi hope o to òe tino
i te topa to òe tino tiàtohu i to he Kehena.
31 U peàutia pēènei :
Me titii te ènata i ta īa vehine,
a tuu atu i te hāmani haatiàtohu i te titiitina.
32 O au à, u peàu ia ôtou : o te āhana e titii i ta īa vehine,
u hakapahi ia īa te haapē i te mātirimonio.
Aòè i teàotia no te hana mako.
O te ènata e noho me te vehine titiitia,
u haapē īa i te mātirimonio.
33 Ua òno ôtou i te mea i peàutia i to ôtou tau tupuna :
umoì e haatīkoe òe i te teào i peàutia i mua o te Etua.
A hana òe vāàna i to òe teào haatiàtohutia i mua o te Etua.
34 O au à, u peàu au ia ôtou :
umoì e vevaò i te Etua no te haatiàtohu i to ôtou teào.
Umoì e vevaò i te àni : oia te nohona o te Etua.
35 Umoì e vevaò i te fenua :
oia te tohua o to te Etua tuutia vaevae.
Umoì e vevaò ia Ierutaremi :
oia te pāpuafaè o te Hakaìki nui.
36 Umoì e vevaò i to òe upoo :
u te e koàna ia òe e haamāìta,
akoè à e haakeekee e tahi o to òe tau òuoho.
37 Pēètii to ôtou teào :
o te mea : E, a peàu : E.
O te mea : Aòè, a peàu : Aòè. »
TOMINIKA E FITU
TETAUTINA O TE HĀMANI A MOITE PEÀUTIA REVITIKA
19,1-2 17-18
1 U peàu te Fatu ia Moite pēènei à :
2 « A pohā to òe èo i mua o te motuhaka nui
o te tama a Iraene. A peàu atu ia âtou : A peàto ôtou.
Na te mea, u peàto au nei, te Fatu, to ôtou Etua.
17 Umoì e haahaa òe i te hoa.
Atià, a oonaì ia īa ; ma èià, aòè òe e hava i to īa mikeo.
18 Aua e huke i te umu. Aua e hiaki i tītahi o to òe huaa.
A kāòha i te hoa me he mea ia òe iho. O au te Etua. »
TARAMO 103 (102), 1-2, 3-4, 8.10, 12-13
He moû, he kāòha te hakatu o te Fatu. 103 ;8
1 E tu ù kuhane, a haameitaì i te Fatu.
Me io he koekoe, a haameitaì i to Īa inoa peàto.
2 A haameitaì i te Fatu, e tu ù kuhane,
Aua e tūhaa e tahi o to Īa vaièitina.
3 U vevete te Fatu i to òe tau mikeo paotū.
U haakoè te Fatu i te memae o to òe tino.
4 Na Īa i taki ia òe me io te ana tūpāpaù.
Na Īa i fāfī ia òe i te kāòha me te hinenaò.
8 He moû, he kāòha te hakatu o te Fatu.
U haatevee i to Īa peê ; ua pī i te kāòha.
10 U te e utu mai te Fatu vāàna i to tātou tau piò.
Aòè e huke Īa i te umu ia tātou, poì mikeo.
12 Me he memao o te tihena o te òumati me i to īa naòna,
U tioà te Etua i te mikeo memao me io tātou.
13 Me he mea u kāòha te motua i to īa tama,
Hua hakatu to te Fatu kāòha i te ènata i pakaihi ia Īa.
TETAUTINA O TO MUA HĀMANI I TO KORINETIA 3,1 6-23
E tu ù tau tunane tuehine,
16 Umoì e tūhaa ia ôtou. O ôtou te Hiero o te Etua.
Ua noho te Kuhane o te Etua i òto o ôtou.
17 Me vāvahi tītahi ènata i te Hiero o te Etua,
e haahina te Etua i hua ènata.
Ua tapu hoì te Hiero o te Etua,
o ôtou aneiho hua Hiero o te Etua.
18 Umoì e hakahae ia ôtou aneiho.
Me maakau tītahi me i vāvena o ôtou
he ènata māàma īa vāàna i to te ao nei,
a ìò īa me he ènata tuaave
no te koàna mai ia īa te māàma o te Etua.
19 Na te mea, i mua o te Etua, me he kōea te māàma o te ao nei.
Ua patutia hoì pēènei : « E haatukee te Etua
i te poì māàma ma òto o to âtou iho māàma. »
20 Ua patutia hakaùa : « Ua ìte te Fatu
i te maakau o te poì māàma : he maakau avai noa anaè. »
21 No èià, aua ôtou e haakāìè mēìa i to ôtou māàma ènata.
22 No ôtou te tau mea ia ôtoa : o Pauro, o Aporo, o Kefa,
to te aomāàma, to te pohoè, to te matena,
to tēnei tai ènata, to te tai e tihe ai.
No ôtou te tau mea ia ôtoa.
23 Atià à, o ôtou no te Kirito. O te Kirito no te Etua.
ALLELUIA ALLELUIA
1In.2,5
O te ènata e aotahi i te Teào o te Kirito, ua ìte īa ma te tiàtohu i te kāòha pao ònaòna o te Etua.
EVANERIO O IETU KIRITO VĀÀNA E MATEO 5, 38-48
I tēia mou pō,
ohia u putupututia te tau kouâ i te tuaivi
vii pu o Ietu, u peàu Īa peenei :
38 « Ua òno ôtou i te mea i peàutia :
Te kikomata no te kikomata. Te niho no te niho.
39 O au à, u peàu au ia ôtou : Umoì ôtou e totohe
me te ènata mākaka. Me papaì mai te ènata ia òe
ma te pāpāìna ìma oko, a tuu atu me tītahi.
40 Me maìmaì te ènata e aahi ia òe i mua o te haavā,
no te fao mai i to òe kahu, a tuu atu me to òe kahu uhi pu.
41 Me viitoi mai te ènata ia òe no te taha me īa
e tautini tapuvae, a taha atu e ùa tautini tapuvae.
42 Me kaiape te ènata ia òe, a tuu atu.
Me maìmaì te ènata e àiê io òe, umoì òe e fāìu i te tua.
43 Ua òno ôtou i te mea peàutia : A kāòha i to òe hoa,
a haahaa i te ènata i tōtōua me òe.
44 O au à, u peàu au ia ôtou :
A kāòha ôtou i te tau ènata e tōtōua mai,
a pure i uē i te poì e mākaka mai,
etià he tama ôtou a to ôtou Motua te io he àni.
45 U haaeke hoì Īa i to Īa òumati
i ùna o te tau ènata meitaì me te tau ènata pē.
U haatopa Īa i te ūa i ùna o te poì toitoi to âtou hakatu pohoè,
i ùna o te poì toitoi koè.
46 Me kāòha anaè ôtou i te tau ènata te i kāòha mai,
e aha te tuki e ìò mai ia ôtou ?
Atii hoì, u te e hana i hua hana me he tau Pupurikano aneiho ?
47 Me teào ôtou me to ôtou tau teina anaè,
e aha te hana mahaò ta ôtou e hana nei ?
Atii hoì ta te poì êteni.
48 O ôtou à, a tūtū te toitoitina o to ôtou hakatu pohoè
me te toitoi noa o to ôtou Motua te io he àni. »
TOMINIKA E VAÙ
TETAUTINA O TE PEROFETA ITAIA 49, 14-15
14 U peàu Ierutaremi pēènei :
« Auē. Ua pae te Fatu me io mātou.
U haatūhaa te Fatu ia mātou nei. »
15 E aha ? E tūhaa te kui i ta īa tama ?
E haahaa te vehine i te puku o to īa ôpū ?
E aha à e koàna i te kui te haatūhaa i ta īa tama,
O au à, u te e haatūhaa au ia ôtou. »
Oia te Teào o te Etua mana nui.
TARAMO 62 (61), 2-3, 8, 9
Io te Etua anaè to ù hakaēa. cf. .62,2
2 Io te Etua anaè to ù hakaēa.
Me io te Etua to ù pohoè.
3 O te Etua to ù motukeâ, te i pāpua mai.
O te Etua to ù mōuna : u te e hina au.
8 Pii i te Etua, u koàna mai ia ù
Te pohoè me te kāìè.
Io te Etua te taha maù i èià e noho au.
O te Etua to ù motukeâ neue koè.
9 E te mataèinaa o te Etua,
A haatià ôtou ia Īa, teka koè.
Io Īa a faì atu i to ôtou maakau :
O te Etua to ôtou taha maù.
TETAUTINA O TO MUA HĀMANI I TO KORINETIA 4, 1-5
E tu ù tau tunane tuehine,
1 Ia tiòhi mai te tau ènata, koù a kaituto âtou
e pahinaèo mātou no Ietu Kirito, te mou tāvini
no te haamevaha i te maìmaì hakanā o te Etua.
2 O to mua hakatu o hua mou tāvini, oia nei :
e hana âtou teka koè i te hana tuutia ia âtou.
3 O au à, he mea avai noa no ù ia haavātia au e ôtou,
akoè à e tahipito ènata haavā kē.
Tōtahi atu, aòè au e haameitaì ia ù iho.
4 U taìtaì tu ù koekoe, atià, u te e peàu teka koè au.
O te Fatu tu ù haavā.
5 No èià, aua ôtou e kokouō i te haatoitoi i te teào.
A tiaì i te tihena o te Fatu.
Na Īa e haaìte atu i te mea hakanā io he pō pōtano.
Na Īa e haapuàha i te hīa hakanātia io he koekoe.
Na te Etua e hahi i tēia ènata, i tēia ènata,
vāàna te mea e hei no īa.
ALLELUIA ALLELUIA
Mt.6,23
To mua, a ìmi mau ôtou i te Patirēia o te Etua, E tuuputia ia ôtou hua tau mēmau paotū.
EVANERIO O IETU KIRITO VĀÀNA E MATEO 6, 24-34
I tēia mou pō,
ohia u putupututia te tau kouâ i te tuaivi vii pu o Ietu,
u peàu Īa pēènei :
24 Aòè e koàna i te ènata e tahi te tāvini i nā hakaìki tokoùa.
E haahaa hua tueni i tītahi fatu me te kāòha i tītahi,
akoè à, e haataetae i tītahi fatu me te haamee i tītahi.
Aòè e koàna ia ôtou te tāvini atu i te Etua
atii me te tāvini ia Mamona, te ètua o te moni.
25 Oia te tumu u peàu au ia ôtou :
umoì ôtou e haapaòpaò pu e ìmi ana i te pohoè :
umoì no te mea kai, umoì no te kahu uhi i te tino.
Taetae atu hoì te pohoètina i te oà,
taetae atu te tino i te kahu.
26 A tiòhi ôtou i te tau manu e ona nei i to he ataàni ;
koè âtou e tanu, koè âtou e kohi i te puku,
koè âtou e haapuke i òto o te faè avaina kākano.
U tāfaitia âtou e to ôtou Motua te io he àni.
Aha, u te e taetae atu ôtou i hua tau manu ?
27 O ai hoì te ènata me i vāvena o ôtou, ma to īa haapaòpaò pu,
e koàna ia īa te haaòa atu i te ava o to īa pohoètina ?
28 Umaha e haapaòpaò pu ôtou no te kahu ?
A tiòhi ôtou i te pua riria io he maa teitā.
A mahaò i to âtou tupu aè.
Atià, aòè âtou e hana, aòè o âtou tino.
29 U peàu hoì au ia ôtou : O Taromone iho,
fāfītia e to īa kāìè, u te e tāpītia me te kahu naènaè
me he mea e tahi me io hua pua riria.
30 Na te Etua e tāpī atii i te teitā te i pupuà i tēnei â,
oìoì e titiitia io he ahi.
Tōtahi atu ta te Etua i uē ia ôtou, e te tau ènata haatià iti.
31 Umoì ôtou e haapaòpaò pu, e maakau aa :
e aha te mea e kai ? E aha te mea e inu ?
Me i hea mai te kahu ?
32 Oiana te mea e ìmi mau te poì êteni.
Ua ìte hoì to ôtou Motua te io he àni
oia te mea i toe no ôtou.
33 To mua, a ìmi mau ôtou i te Patirēia me to īa toitoi noa,
e tuuputia ia ôtou hua tau mēmau paotū.
34 Umoì ôtou e haapaòpaò pu no to ma te oìoì.
E haapaòpaò to oìoì no īa aneiho.
I tēia â to tēia â paòpaòtina.
TOMINIKA E IVA
TETAUTINA O TE HĀMANI TEUTERO 11, 18.26.28.32
18 A haamau ma io he koekoe i tēnei teào ta ù i tuu ia ôtou.
A tāmau i hua teào me he hakatu i ùna o to òe ìma,
a tuu i ùna o to òe àe, i vāvena o nā kikomata e ùa.
26 I tēnei â, u avai au ia ôtou no te vae vāàna i to ôtou maìmaì.
27 E haameitaìtia ôtou, akoè à e haaìnotia.
E haameitaìtia ôtou me aotahi atu
i te tau teào ta te Fatu, to ôtou Etua, e haaìte atu i tēnei â.
28 Atià, e haaìnotia ôtou me pūtuì ôtou
i te tau teào o te Fatu to ôtou Etua,
e titii ana i te aanui ta ù e haaìte atu
no te pakaihi i te tau ètua tīkoe, ètua hou no ôtou.
32 A tiòhi meitaì, e aotahi ôtou i te tau ture paotū
me te tau hakatu pohoè ta ù e tuu atu i tēnei â.
TARAMO 31 (30),3bc-4, 17.20cd, 24ab.25
E te Fatu e, o Òe to ù motukeâ te i haapohoè mai. cf. .31,3
3 A ìò o Òe to ù motukeâ,
Te mōuna o to ù nohotina haametaù koè.
4 E te Fatu e, o Òe to ù mōuna, to ù pākeâ,
U haatee mai Òe no te haakāìè i to Òe inoa.
17 A pupuà to Òe mata no to Òe tāvini,
Mēìa i to Òe uē, a haapohoè mai.
20 I mua o te mataèinaa, u haatae Òe i te hīa
O te tau ènata e peàu o Òe to âtou taha maù.
24 A kāòha i te Fatu ôtou e te poì haatià.
U tiaì te Fatu i to Īa tau tāvini.
25 A oko nui te koekoe. Oho te ìi.
Ôtou paotū e tetaì nei i te Fatu.
TETAUTINA O TE HĀMANI A PAURO PEÀTO I TO ROMA
3,21-25a 28
E tu ù tau tunane tuehine,
21 I tēnei, e avai pu ana i te ture a Moite,
u haaìte mai te Etua
pēhea to Īa haatoitoi i te ènata i mua o Īa.
Me i òmua mai, u haatiàtohu te tau perofeta me te Ture
i hua maìmaì o te Etua.
22 U haatoitoi te Etua i te tau ènata paotū i mua o Īa,
mēìa i to âtou haatià ia Ietu Kirito,
e aha à he ati Iuta tahipito, he poì êteni tahipito.
23 Ua hava te tau ènata ia ôtoa i te mikeo.
He mea memao nui âtou me io to te Etua kāìè.
24 U haatoitoi te Etua i te tau ènata i mua o Īa,
na to Īa karatia anaè,
mēìa i te haapohoètina ta Ietu Kirito i haakoàna mai.
25 Na te mea, u maìmaì te Etua e pāokapekatia te Kirito,
e tahe to Īa toto no te haakoè i te mikeo
o te tau ènata te i haatià ia Īa.
28 U peàu hoì tātou, u haatoitoitia te ènata i mua o te Etua
mēìa i te haatià, aòè mēìa i to īa aotahi atu i te Ture.
ALLELUIA ALLELUIA
95,1.7
A mai, a hahi tātou me te koakoa i te Fatu. A haakāìè i to tātou motukeâ, te Haapohoè. O Īa to tātou Etua.
EVANERIO O IETU KIRITO VĀÀNA E MATEO 7, 21-27
I tēia mou pō,
ohia u putupututia te tau kouâ i te tuaivi vii pu o Ietu, u peàu Īa peenei :
21 O ai te ènata e tomo i òto o te Patirēia o te àni ?
Aòè te tau ènata paotū e peàu mai :
E te Fatu e, e te Fatu e !
Atià, o tēia anaè te i aotahi atu
i te maìmaì o to ù Motua te io he àni.
22 I te â o te haavā paona, he mea nui te ènata e peàu mai :
« E te Fatu e, e te Fatu e !
Aha, aòè mātou i perofeta ma to Òe inoa ?
Aha, aòè mātou i tute i te tiaporo ma to Òe inoa ?
Aha, aòè mātou i hana i te nuitina
o te hana mahaò ma to Òe inoa ? »
23 A tahi a peàu au ia âtou :
« Koè nui au i ìte ia ôtou.
A taha atu memao me io ù, ôtou te i hana i te hana pē. »
24 O te ènata e hakaòno i te teào ta ù i peàu iho nei
me te aotahi atu,
ua tūtū īa me te ènata māàma
te i haatū i to īa faè ma ùna o te papakeâ.
25 Ua topa te ūa, ua tahe te vaiā,
ua puhi te metani me te haaneue i hua faè.
Aòè i hina na te mea u haatūtia ma ùna o te papakeâ.
26 Ia haaòno te ènata i te teào ta ù i peàu iho nei,
atià u aotahi koè īa, e koàna te haatūtū ia īa
me te ènata tuaave te i haatū i to īa faè i no he one.
27 Ua topa te ūa, ua tahe te vaiā,
ua puhi te metani me te haahina i hua faè.
TOMINIKA ÒNOHUU
TETAUTINA O TE PEROFETA OHEA 6, 3-6
3 A hano tātou haaâvei me te ìte i te Fatu.
Atii te atauà i te pōpōuì māèhuèhu,
atii hoì te tihena mai o te Fatu.
A ìò to Īa tihena mai me he ūa haatapavaù i te fenua,
me he ūa òtuòtu e haakūtaù i te èpo.
4 U haahua atu te Etua :
« E aha ta ù e hana atu no òe, e te ati Efarimi e ?
E aha ta ù e hana atu no òe, e te ati Iuta e ?
5 Hakatu to ôtou kāòha mai
me he kohu topa puhitia e te metani,
me he haupō i mititia e te òumati.
Oia te piò ua tā au ia ôtou me to ù tau perofeta.
Oia te piò u ùumi au ia ôtou me te teào o tu ù fafa.
6 O te kāòha, oia nei to ù maìmaì, aòè te ùtuna hēana.
O te haapii me te Etua, oia ta ù i maìmaì,
umoì te ùtuna hēana pūovo i te ahi. »
TARAMO 50 (49), 1ab.4b.8, 12-13, 14-15
A tataha tātou ma no he aanui o te Fatu no te haakāìè i to tātou Etua. cf.50,15-23
1 U pohā te èo o te Etua o te tau ètua.
U vevaò te Fatu i te fenua vii pu.
4 U haavā te Fatu i to Īa mataèinaa.
8 U te e oonaì au ia òe mēìa i to òe ùtuna.
I mua o au nei to òe tau hēana pūovo i te ahi.
12 Me mate au i te one, aha e faì atu au ia òe ?
Na ù te aomāàma me to īa tau taetae paotū.
13 Aha, e kai au i te kiko pifa taùtaù ?
Aha, e inu au i te toto o te ùtuna hēana ?
14 A ùtuna òe i te hēana haahuaèkaèka.
A haapao i to òe teào voto i te Etua.
15 Ia òomitia òe e te haametaù, a vevaò mai.
E haapohoè au ia òe. O òe, a haakāìè mai.
TETAUTINA O TE HĀMANI A PAURO PEÀTO I TO ROMA
4, 18-25
E tu ù tau tunane tuehine,
18 u haatià Aparahamo i te Etua me to īa tetaì
vāàna i te mea ta te Etua i peàu ia īa,
e aha à he tumu koè to īa tetaìtina.
Ma èià, ua ìò Aparahamo he motua tupuna
o te mataèinaa nui, nui oko, me he mea i peàutia :
« Atii hoì to òe ati i ùna aè. »
19 I tēia mou â, u tata èka hānere èhua to Aparahamo.
Atià, u te e èva to īa haatià,
e aha à e maakau īa mei mate nui to īa tino,
atii me to Tara, ta īa vehine paafio pē.
20 Tōtahi atu to Aparahamo tohe mau i te haatià.
U haaūo te haatià i to īa koekoe.
Ua hahi īa i te mana o te Etua.
21 Ua ìte meitaì Aparahamo e koàna i te Etua
te hana vāàna i ta Īa I peàu mai.
22 Oia te tumu u haaìòtia Aparamo
he ènata toitoi i mua o te Etua.
23 Atià, aòè no īa anaè i patutia :
« U haaìòtia he ènata toitoi i mua o te Etua. »
24 U patutia no tātou iho :
E haaìòtia tātou he tau ènata toitoi
mēìa u haatià tātou i te Etua te i haatū hakaùa
me i vāvena o te poì mamate,
ia Ietu Kirito, to tātou Fatu.
25 Ua ao te Etua e mate nui te Kirito
no te tuutina o te mikeo.
U haatū te Etua i te Kirito
etià e haatoitoitia tātou i mua o te Etua.
ALLELUIA ALLELUIA
Ta.130 (129),7
Ohia io te Fatu te kāòha, te haapohoètina hou anatu.
EVANERIO O IETU KIRITO VĀÀNA E MATEO 9, 9-13
I tēia mou pō,
9 E hee aa Ietu me i èià, ua ìte Īa i tītahi ènata,
o Mateo te inoa, e kaapee ana io he faè kohi moni.
U peàu Ietu ia īa :
« A ūtaì mai òe ia ù. »
Ua tū hua ènata. Ua ūtaì ia Ietu.
10 E kai aa Ietu i òto o te faè,
u titihe mai te nuitina o te tau Pupurikano me te poì mikeo.
Ua noho âtou io he tapukai
e tahi me Ietu me to Īa tau kouâ.
11 E ìte ana, u peàu te tau Fariteo i to Īa tau kouâ :
« No te aha ua kai to ôtou Tuhuna
me te tau Pupurikano me te poì mikeo ? »
12 Ua òno Ietu. U haahua atu Īa pēènei :
« Aòè e hano i te tātihi te tau ènata feòfeò te tino.
U vevaòtia te tātihi no te poì hōpī.
13 A hee ôtou me te hakako i te hakatu o tēnei teào :
« O te kāòha ta ù i maìmaì, aòè o te ùtuna hēana.
Na te mea, u te e tihe mai au
no te vevaò i te tau ènata toitoi noa
atià, no te vevaò i te poì mikeo. »
TOMINIKA ÒNOHUU MA TAHI
TETAUTINA O TE HĀMANI A MOITE PEÀUTIA EHOTO
19,2-6
E toù māhina ma hope o to te mataèinaa Iraene
uutina i vaho me io te Fenua Ekipito,
2 u titii âtou i te fenua Rafitimi
me to âtou noho i te fenua ataha.
I èià, ua ato âtou i te tau faè kā ; u kānea i te pāpua,
i pataa o te tumu o te tuaivi Tinai.
3 O Moite à, ua fiti īa i ùna o te tuaivi no te âvei me te Etua.
Me i ùna o te tuaivi, u vevaò te Etua ia Moite pēènei :
« Oia nei to ù teào i te ati o Iakopo
ta òe e àve atu io te tau tama Iraene.
4 Ua ìte ôtou pēhea u haahina au i te poì Ekipito.
U aahi au ia ôtou înei, me he mea a te manu akuira
te i tautua i ta īa tau kiokio ma ùna o to īa pekeheu.
Na ù i aahi mai ia ôtou i taa me au nei.
5 I tēnei, me haaòno ôtou i to ù teào,
me aotahi atu i to ù Piimau,
e ìò ôtou he mataèinaa vaetia e au
me i vāvena o te tau mataèinaa paotū o te aomāàma vii pu.
Na te mea, na ù anaè te fenua ia ôtoa.
6 E ìò ôtou no ù he ati tāuà, he mataèinaa peàto.
Oia nei te teào ta òe e haaìte atu i to Iraene. »
TARAMO 100 (99), 1-2, 3, 5
E te Fatu e, na Òe e aahi ia mātou ma no he aanui o te pohoè. Na Òe e pepeù ia mātou te avaputa o to Òe faè.
1 A hahi i te Fatu, e te fenua vii pu.
A pakaihi i te Fatu me te koakoa,
A tihe mai io Īa me te hīmene èkaèka.
3 A faì atu : he Etua te Fatu.
Na Īa i pēpena ia tātou,
No Īa hoì tātou, to Īa naho muto.
5 Tiàtohu nui to Īa vaièitina.
He paona koè to Īa kāòha mai.
E mau to Īa teào ma te tau tai anatu.
TETAUTINA O TE HĀMANI A PAURO PEÀTO I TO ROMA
5,6-11
E tu ù tau tunane tuehine,
6 I te ava he tau ènata koekoe pepee tātou,
ua mate Ietu Kirito i uē i te poì mikeo,
me he mea i haaheitia e te Etua.
7 Aha, e ao tītahi ènata e mate nui
i uē i te ènata koekoe meitaì ?
E fati oti te maakau o tītahi
no te tuu i to īa pohoè i uē i te ènata toitoi ?
8 Oiana te mea i haatiàtohu
i te nuitina o to te Etua kāòha mai :
ua mate nui te Kirito i uē ia tātou,
e aha à he tau ènata mikeo tātou.
9 Tōtahi atu i tēnei, ia haatoitoitia tātou na te toto o te Kirito,
e haapohoè mai Īa me io te peê o te Etua.
10 Me he mea u haaâvei te Etua ia tātou, poì mikeo, me Īa,
ma te matena o to Īa Tama,
tōtahi atu e vaièi mai te Etua i te pohoè o te àni
ma te Tūhakaùatina o hua Tama, te Kirito.
11 Oia nei tītahi : U haakāìè mai ia tātou iho
i òto o te Etua, mēìa i to tātou Fatu Ietu Kirito.
Ma io Īa hoì, u haaâveitia tātou me te Etua.
ALLELUIA ALLELUIA
Mk.1,15
U tata èka te Patirēia o te Etua. A haatià i te Teào Meitaì Hou Mai.
EVANERIO O IETU KIRITO VĀÀNA E MATEO 9,36-38 ; 10,1-8
I tēia mou pō,
36 e ìte ana Ietu i te faètoa, u mehea to Īa koekoe
mēìa u paòpaò, u èeva ka âtou
hakatu me te naho muto, aòè he ènata tiaì.
37 A tahi a peàu Ietu i to Īa tau kouâ :
« He mea nui te puku paa.
O te poì kohi i te puku te mea i toe.
38 A pure ôtou i te Fatu o te pāpua
etià e pahi atu Īa i te poì hana mea kohi i te tau puku. »
10, 1 U vevaò mai Ietu
i to Īa tau kouâ tīònohuu ma tokoùa.
Ua tuu ia âtou i te mana
i ùna o te tau kuhane ìno, etià e tute atu ia âtou,
etià e haameitaì i te tau ènata hemo i te mate
me te tau takapii paotū.
2 Oia nei te tau inoa o te Tīònohuu ma tokoùa Àpotoro :
To mua o Timone, te i apatia Petero, o Aterea, to īa teina,
o Iakopo, te tama a Ihepetea, o Ioane, to īa teina,
3 o Firipo, o Paratomeo, o Toma, o Mateo, te Pupurikano,
o Iakopo, te tama a Arafe, o Tateo,
4 o Timone, te ènata Kananea, o Iuta Ikariote,
tēia aneiho te i haaìò ia Ietu.
5 U pahi atu Ietu i hua Tīònohuu ma tokoùa,
e peàu ana ia âtou pēènei :
« Umoì ôtou e taha atu ma io he aanui o te poì êteni.
Umoì e tomo io tītahi pāpuafaè o te Fenua Tamaria.
6 A hee ôtou io te tau muto i naò me io te ati Iraene.
7 E taha ana ôtou, a haaìte atu i te mea
ua tata mai te Patirēia o te àni.
8 A haameitaì ôtou i te poì hōpī.
A haapohoè hakaùa i te poì mate nui.
A haataìtaì i te tau ènata hemo i te mate kovi.
U vaièitia anamai ia ôtou, a vaièi pu me ôtou. »
TOMINIKA ÒNOHUU MA ÙA
TETAUTINA O TE PEROFETA IEREMIA 20, 10-13
10 Ua òno au i te èo peê o te faètoa e taaàu ana pēènei :
« A tuhi ia īa. A tuhi i hua ènata te i haahopo mai. »
Ma to ù kaokao, u tiòhi matiòka to ù tau hoa, u peàpeàu :
« E hina oti īa. E tuàki mātou me te huke i te umu ia īa. »
11 Atià, o te Fatu me au nei ;
ua tū Īa me he toa no te haahaametaù
i te tau ènata e tōua mai.
Ua hina pu te tau ènata i mākaka mai :
aòè e àva to âtou māàma.
E mau anatu te hakaìna ma ùna o âtou.
E te Fatu o te aomāàma vii pu e,
ua ìte toitoi Òe e aha te ènata.
U tiòhi Òe i òto o te hōupo me i te koekoe o te ènata.
A haaìte mai i te tuki ta Òe i haatopa
i ùna o te poì mākaka, o Òe hoì to ù pātoko.
13 A hahi ôtou i te Fatu.
U haapohoè Īa i te ènata veve
me i te îima o te poì mākaka. »
TARAMO (69 –68), 8.10, 14, 17.33, 34-35
A pohoè, a koakoa ôtou te ìmi nei i te Fatu. 69,33
8 E te Etua e, u hakaìna tu ù mata,
U haameetia au i uē ia Òe.
10 Ua hina au mēìa i to ù haataetae i to Òe faè.
Me paha âtou ia Òe, e topa te paha i ùna o au.
14 E te Fatu e, e pure nei au ia Òe.
Oia nei te ava no to Òe karatia.
Mēìa i to Òe kāòha, a haahua mai i te teào.
E te Etua e, o Òe anaè to ù Haapohoè.
17 Auē te taetae o to Òe kāòha mai.
A hakāòha ia ù. A tiòhi meitaì mai.
33 Ua ìte hoì te poì veve, u haakoìna âtou.
A pohoè, a koakoa ôtou te ìmi nei i te Fatu.
34 E apuu te Etua i te ènata koekoe haapāpaù.
Aòè te Fatu e tūhaa i to Īa poì humutia.
35 A hahi i te Etua te àni me i te fenua,
Te tai me to īa mēmau pohoè paotū.
TETAUTINA O TE HĀMANI A PAURO PEÀTO I TO ROMA
5, 12-15
E tu ù tau tunane tuehine,
12 no èià, a kaituto tātou pēènei :
ua tomo te mikeo io te aomāàma nei
na te piò o te ènata e tahi, o Atamo to īa inoa.
Mēìa i te mikeo o hua ènata, ua tihe mai te matena.
Ua neke te matena io te tau ènata hakatahi
na te mea, ua hava te tau ènata hakatahi i te mikeo.
13 Me i òmua naoti, ma mua o te Ture a Moite,
enā te mikeo io te aomāàma.
Atià, mēìa u te e haaìtetia te Ture,
aòè i hakatiotia te tau ènata.
14 Me i te ava o Atamo hoì tihe atu i te ava o Moite,
ua mate nui te tau ènata hakatahi,
e aha à u te e havatia âtou i te mikeo hakatu me to Atamo
te i pūtuì i te Teào o te Etua.
O Atamo, me he ata e haavivini mai i te ènata e tihe ai.
Atià, he mea kē tītahi, he mea kē tītahi.
15 He mea kē hoì te karatia i vaièitia mai e te Etua
i òto o te ènata e tahi, te Kirito Ietu ;
he mea kē to Atamo mikeo.
Ma te tiàtohu, mēìa i te mikeo o hua ènata e tahi,
i mate nui ai te nuitina o te tau ènata.
Atià, u meitaì atu te hakatu o te Etua
no te haaìte mai i to Īa karatia i òto o te Kirito.
Ua neke te vaièitina o te Etua,
tōtahi atu to īa nuitina i ùna o te tau ènata tini, tini.
ALLELUIA ALLELUIA
cf. In.15,26.27
E haatiàtohu ia ù te Kuhane Meitaì i òto o to ôtou koekoe. Atii me ia ôtou, e ìò ôtou he tau ènata haatiàtohu mai.
EVANERIO O IETU KIRITO VĀÀNA E MATEO 10, 26-33
I tēia mou pō, u peàu Ietu i to Īa tau kouâ pēènei :
26 umoì ôtou e haametaù i te tau ènata.
O te tau mea hakanātia paotū, e haaìtetia atu.
O te tau hana haanaòtia paotū, e faìtia atu.
27 O te teào ta ù i peàu ia ôtou i to he pōtano,
a haamevaha ôtou i te àma oatea nui.
O te teào ta ôtou i òno puaìna, a taaàu i no he tohua.
28 Umoì ôtou e haametaù i te poì e haamate i te tino.
U te e koàna ia âtou te haamate i te kuhane.
A haametaù aneiho ôtou i Tēia e mana to Īa no te haanaò
i te kuhane me te tino io he Kehena.
29 Aòè à e ìò i te hoko
nā manu vini e ùa no te pene e tahi ?
Atià, u te e topa pu tītahi i no he tuaèpo,
me he mea aòè to ôtou Motua e ao mai.
30 O ôtou à, u tetautia to ôtou tau òuoho hakatahi.
31 Umoì ôtou e haametaù.
U taetae atu ôtou i te nuitina o te manu vini.
32 No èià, me haakē tītahi me au nei i mua o te tau ènata,
o au iho e haakē me īa i mua o tu ù Motua te io he àni.
33 Atià, me titii tītahi ia ù i mua o te tau ènata,
e titii me au nei ia īa i mua o tu ù Motua te io he àni. »
TOMINIKA ÒNOHUU MA TOÙ
TETAUTINA O TE HĀMANI E ÙA A TE TAU HAKAÌKI
4, 8-11.14-16a
8 I tītahi â, e taha aa te perofeta Erihea
io he Fenua Tunama, u vevaòtia īa no te kaikai
e tītahi vehine taetae nui.
Me i tēia â nei, ia tihe Erihea i te Fenua Tunama,
e kaikai īa io te faè o hua vehine.
9 U peàu te vehine i ta īa āhana pēènei :
« Ua ìte au he ènata peàto te Peroheta
te i tihe mai i te kaikai.
10 A ato tāua i te faè pekeheu no īa.
A tuu i òto te òki, te tapukai, te nohoka, te àma.
11 No īa te faè i te â ia hua mai īa io tātou. »
14 I tītahi â, ua tihe mai Erihea
me to īa moe io hua faè pekeheu.
U peàu te perofeta i to īa tāvini :
« Pēhea òa ta tāua no te haaèka i tenā vehine ? »
U haahua atu te tāvini : « Auē, tenā vehine,
e tama koè ta īa. U kooūa ta īa āhana. »
15 U peàu Erihea i te tāvini : « A vevaò i te vehine. »
Ua tihe mai te vehine me to īa haatata i te avaputa.
16 U peàu Erihea ia īa :
« E tahi èhua i toe, i tēnei ava, e fānau òe i te tama. »
TARAMO 89 (88), 2-3, 16-17, 18-19
E te Fatu e, ma te tau tai hakatahi, e hīmene anatu au i to Òe kāòha. 89,2
2 E te Fatu e, e hīmene anatu au i to Òe kāòha.
Ma te tau tai hakatahi, e faì atu au i to Òe tiàtohu.
3 U peàu au : e mau to Òe kāòha no te ava paona koè.
Me he mea u neue koè te papafenua, atii to Òe tiàtohu.
16 E te Fatu e, mamau te mataèinaa e hahi ia Òe,
E haapupuà to Òe māàma i to īa tau â paotū.
17 Oatea te pō, e haakoìna âtou no Òe.
O to Òe kāìè te tumu o to âtou koakoa.
18 O Òe, e te Fatu e, te tumu o to mātou mana.
Na to Òe karatia, ua oko to mātou ìi.
19 O te Fatu te hakaìki e pāpua mai ia tātou.
O te Peàto nui, te Etua o Iraene, to tātou toko.
TETAUTINA O TE HĀMANI A PAURO PEÀTO I TO ROMA
6, 3-4.8-11
E te tau tunane tuehine.
3 Ua ìte hoì ôtou u papatematia tātou
no te haatahi me te Kirito Ietu
i òto o to Īa matena, to tātou papatema.
4 Ua tomitia tātou kātahi me Ietu Kirito,
mēìa i te papatema
te i haatahi ia tātou me to Ietu Kirito matena.
No èià, me he mea ua tū hakaùa Ietu Kirito
me i vāvena o te huaa mamate ma te mana nui o te Motua,
atii e pohoè ai me tātou no te hakatu pohoè hou.
8 Anoa i mate tātou kātahi me te Kirito,
e haatià mau tātou e pohoè hoì kātahi me Īa.
9 Ua ìte tātou i te mea nei :
ua tū hakaùa te Kirito me i vāvena o te poì mamate,
ua koè te mana o te matena i ùna o Īa.
Koè nui e hina hakaùa te Kirito i te matena.
10 Ua mate nui Ietu, ua koè te mana o te mikeo i ùna o Īa.
Ua àva to Īa matena no te tau tai hakatahi.
I tēnei, o to Ietu pohoè, he pohoè no te Etua.
11 Atii me ia ôtou.
A kaituto ia ôtou iho, me he poì mamate ôtou :
ua koè te mana o te mikeo i ùna o ôtou.
Atià, he poì pohopohoè nei ôtou
no te haaèka i te Etua kātahi me Ietu Kirito.
ALLELUIA ALLELUIA
cf.1P.2,9
O ôtou te ati vaetia, te huaa tāuà o te hakaìki ; a haaìte ôtou i te tau hana mahaò a te Fatu : o tēia i vevaò mai me io te ava pōtano no te haapupuà ia ôtou i to Īa māàma.
EVANERIO O IETU KIRITO VĀÀNA E MATEO 10, 37-42
I tēia mou pō, u peàu Ietu i to Īa tau kouâ pēènei :
37 o te ènata e haataetae i to īa motua, akoè à i to īa kui,
ma ùna atu o au nei, ua hei koè īa no te haakē me au.
O te ènata i haataetae i ta īa tamaòa, i ta īa moî,
ma ùna atu o au nei, u hei koè īa no te haakē me au.
38 O te ènata u te e amo i to īa peka no te ūtaì ia ù,
u hei koè hua ènata no te haakē me au.
39 O te ènata i kaikino mai i to īa pohoè,
e koè nui hua pohoètina.
O te ènata e haakoè i to īa pohoè mēìa ia ù,
e koàna mai ia īa te pohoètina.
40 O te ènata e apuu ia ôtou, e apuu hua ènata ia ù iho.
Me apuu te ènata ia ù, e apuu īa i tēia i pahi mai ia ù.
41 O te ènata e apuu i te perofeta, mēìa he perofeta īa,
e koàna mai i hua ènata te tuki o te perofeta.
O te ènata e apuu i te hoa toitoi, mēìa i to īa toitoitina,
e koàna mai ia īa te tuki o te ènata toitoi.
42 O te ènata e fāinu i te ipu vai māoì aneiho
i tītahi me i vāvena o te poì iti noa nei, mēìa he kouâ īa no ù,
ma te tiàtohu ta ù peàu ia ôtou,
aòè e naò te tuki meitaì o hua ènata. »
TOMINIKA ÒNOHUU MA FĀ
TETAUTINA O TE PEROFETA TAKARIA 9, 9-10
9 Oia nei te Teào o te Fatu Etua :
A tātakahiti i te koakoa, e te moî Tiona e.
A taaàu i te koakoa, e te moî Ierutaremi e.
Enā a tihe mai io òe to òe Hakaìki.
He Hakaìki toitoi noa, o Īa te vivini.
Ua taha mai me te koekoe haapāpaù,
Ua piki Īa ma ùna o te pūriki me to Īa punua pūriki.
10 E haakoè hua Hakaìki i te pāriri tōua
me io te Fenua Efarimi.
U haakoè Īa i te tau ihovare tōua me i òto o Ierutaremi.
E fafati Īa i te pana me te haìna tōua paotū,
e haamevaha Īa i te moû io te tau mataèinaa ia ôtoa.
E neke to Īa vivinitina me io tēia tai tihe atu i te tai kē,
me i te kaavai Eufarata tihe atu
i te kotiàna paona o te aomāàma nei.
TARAMO 145 (144), 1-2, 8-9, 10-11, 13c-14
A haameitaìtia te Fatu, te Etua o te aomāàma nei, ma te tau tai anatu. cf.145,1
1 E haatiketike au ia Òe, e to ù Etua, to ù Hakaìki e.
E haakāìè au i to Òe inoa ma te tau tai anatu.
2 O to ù hīa e haakāìè ia Òe paotū te â,
E hahi i to Òe inoa ma te tau tai hakatahi.
8 He moû, he kāòha te hakatu o te Fatu :
U haatevee i to Īa peê, ua pī i te uē.
9 U matavaièi anaè te Fatu no tātou paotū.
U haataetae i te tau mēmau ta Īa i pēpena.
10 E te Fatu e, a hahi te tau mēmau paotū,
Me te haahuaèkaèka to mataèinaa ia Òe.
11 E haavivini âtou i te kāìè o to Òe Patirēia,
E vānana âtou i to Òe tau hana mahaò.
13 E tiàtohu anaè te tau teào o te Fatu,
E kāòha anatu to Īa tau hana paotū.
14 Ua toko te Fatu i te poì hinatia e te ìno.
U haaūo Īa i te ìi o te poì kuhane koè.
TETAUTINA O TE HĀMANI A PAURO PEÀTO I TO ROMA
8, 9.11-13
E tu ù tau tunane tuehine.
9 O ôtou à, u te e pohoè ôtou vāàna i te hīa o te tino,
atià vāàna i ta te Kuhane i peàu ia ôtou,
me noho te Kuhane o te Etua i òto o ôtou.
Me koè te Kuhane o Ietu Kirito i òto o te ènata,
aòè hua ènata i haapii me te Kirito.
11 Me noho i òto o ôtou te Kuhane o te Etua
te i haatū hakaùa ia Ietu me i vāvena o te huaa mamate,
na hua Kuhane te i haatū hakaùa ia Ietu,
e haapohoè i to ôtou tino mate vave.
Oia te hana o te Kuhane te i òto o ôtou.
12 No èià, e tu ù tau tunane tuehine,
aua e haatee to te tino hīa ia tātou,
no te pohoè vāàna i te hīa o te tino.
13 No to ôtou aotahi i hua tau hīa, e mate anatu ôtou.
Atià, ia òomi ôtou, ma te mana o te Kuhane Meitaì,
i hua tau hīa pē o te tino, e pohoè ôtou.
ALLELUIA ALLELUIA
cf.Mt.11,25
U meitaìtia Òe e te Etua, to mātou Motua, te Fatu o te aomāàma. U haaìte atu Òe i te poì iti noa, i te māàma hakanā o te Patirēia o te Àni.
EVANERIO O IETU KIRITO VĀÀNA E MATEO 11, 25-30
I tēia mou pō, u peàu Ietu i to Īa tau kouâ pēènei :
25 « U haameitaì au ia Òe, e te Motua e,
te Fatu o te àni me te fenua,
mēìa u hakanā Òe i tenā mea
i te poì māàma me te tau tuhuna,
no te haaìte atu i te poì iti noa.
26 E hoì, e te Motua e, oia nei te hīa o to Òe vaièi mai.
27 Na tu ù Motua i tuutia mai te tau mea ia ôtoa.
Aòè e tahi ènata e ìte i te Tama, o te Motua anaè.
Aòè e tahi ènata i ìte i te Motua, o te Tama anaè,
atii i te ènata e haaìtetia e te Tama,
vāàna i to hua Tama maìmaì.
28 A tihe mai io ù, ôtou nui te i paòpaò hae
mēìa i te tono o te amona. Na ù e haaànaàna.
29 A amo ôtou i te amona o to ù teào.
A haaòno mai mēìa he koekoe moû,
he koekoe haapāpaù to au nei.
E koàna mai ia ôtou te hakaēatina kuhane.
30 Na te mea, he māeà to ù amona,
he mea ànaàna te tono o to ù teào. »
TOMINIKA ÒNOHUU MA ÌMA
TETAUTINA O TE PEROFETA ITAIA 55,10-11
Oia nei te Teào o te Etua :
10 Ia topa te ūa me te nive me io he àni,
u haakūtaù âtou me te haatapavaù i te fenua.
U haatupu âtou i te teitā, haahua i te puku
no te tāfai i te tau ènata me te tau manu e kai aa.
11 Atii hoì te teào ta ù i haaìte atu :
E hana tēia teào i te hana ta ù i maìmaì.
U te e hua io ù to ù teào puku koè.
TARAMO 65 (64),
E te Fatu e, u tiòhi mau Òe i te fenua me to Òe haameitaì me to īa tau taetae. cf. .65,10.
10 E te Fatu e, u tiòhi mau Òe i te fenua
Me to Òe haapī ia īa i te tau taetae.
Me io he ataàni te nuitina o te vai,
Na Òe te haatupu i te kāhui me te puku.
11 U haatapavaù Òe i te fenua, e te Fatu e
Me to Òe haakūtaù i to īa tau pāpua.
12 I tēia èhua, tēia èhua to īa ava mei nui.
I èià to Òe taha atu, u àvakai te ènata.
13 U haatahe Òe i te vai me io te tuaivi
No te haatupu me io te èpo i te mutiē.
14 U pupuà te tuaivi i te tapavaù.
U tavavā te tau ânimara io te teitā.
U tāpītia te tau kakaavai me te teitā faraoa.
U taaàu âtou me te koakoa i to âtou hīmene.
TETAUTINA O TE HĀMANI A PAURO PEÀTO I TO ROMA
8,18-23
E tu ù tau tunane tuehine,
18 To ù maakau, he mea iti noa te tau memae o te ao nei,
me kaituto tātou i te kāìè ta te Etua e vaièi mai.
19 E kōhoà nei hoì te tau mēmau paotū ta te Etua i pēpena,
e pupuà ponihoo te hakatu o te pohoè tama a te Etua.
20 U aotahi te tau mēmau pēpenatia i te mana o te ìno,
e aha à u te e ao âtou, atià oiana te maìmaì o te Etua :
u aotahi hoì âtou ma òto o te tetaìtina.
21 Na te mea, e haakoètia to âtou haamōèhutina e te mea ìno
no te àva atu i te hakatu kāìè o te tau tama a te Etua
e pohoè aa na âtou ta âtou.
22 Ua ìte hoì tātou tihe i tēnei mou â,
u taaàu me te uē hua tau mēmau,
me he uē o te vehine e haatotohi aa i te tama.
23 Aòè o te tau mēmau i pēpenatia anaè.
O tātou nei tahipito ma te haakoàna i te Kuhane Meitaì
me he to mua hope taetae me io te Etua,
u kōhoà nei me te uēuē tātou e tetaì ana
na te Etua e haaìò ia tātou he tau tama na Īa,
me te haapao ònaòna i to tātou haapohoètina.
ALLELUIA ALLELUIA
cf. Mt.13,4.23
Enā, ua uu i vaho te ènata tūtū kākano ; o te Teào o te Etua te kākano. Mamau te ènata te i apuu mau i hua Teào me te haatapavaù atu.
EVANERIO O IETU KIRITO VĀÀNA E MATEO 13, 1-23
(13, 1-9)
1 I hua â, ua uu Ietu i vaho o te faè.
U kaapee Īa i te hiku o te tai.
2 U muimui mai vii pu o Īa te faètoa nui.
Ua piki Ietu i no he vaa me to Īa kaapee i òto.
Ua noho te faètoa tiàtohu i no he one.
3 He mea nui ta Ietu i peàu atu ia âtou ma he teào haapupuà.
U peàu Ietu pēènei :
« Enā, ua uu i vaho te ènata tūtū kākano
no te hano tūtū i te kākano.
4 Ohia ua tūtū īa i te kākano,
ua topa e tahi hope i no he taì o te aanui.
Ua tihe mai te tau manu o te ataàni
te i haapao i te kai.
5 Ua topa e tahi hope i no he tukii keâ.
He mea iti te èpo i èià.
Aòè i tevee, ua tupu te kākano.
Na te mea aòè i motoù te èpo.
6 Ia eke te òumati, ua òì,
ua moô te kākano na te mea aòè i òa te aka.
7 Ua topa e tahi hope i vāvena o te maateitā taataa.
Ua tupu aè te teitā taataa.
I mate ai te kākano na te pāuhu.
8 Ua topa e tahi hope o te kākano i òto o te èpo meitaì.
Ua hua âtou i te puku : e ìma tekau puku to tītahi.
e ono ònohuu puku to tītahi, e toù ònohuu to tītahi.
9 A haaòno te ènata me te puaìna no te haaòno.
10 U haatata mai te tau kouâ me to âtou peàu atu :
« No te aha u peàu Òe ia âtou ma he teào haapupuà ? »
11 U peàu Ietu pēènei :
« No ôtou, u vaièitia mai e vivini
i te māàma hakanā o te Patirēia o te àni.
Atià, u te e tuutia ia âtou.
12 O te ènata me te taetae,
tōtahi atu te taetae i vaièitia etià e tapavaù īa.
O te ènata taetae koè, e takitia ta īa taetae.
13 Oia te tumu o to ù hakako ia âtou
ma he teào haapupuà.
Na te mea, e tiòhi aa âtou, aòè i ìte.
E òno aa âtou, aòè i haaòno, aòè i vivini.
14 U haapao èka hoì i òto o âtou
te teào a te perofeta Itaia pēènei :
« E aha à ua òno, aòè âtou i vivini.
E aha à u tiòhi, aòè âtou i ìte.
15 Na te mea, he koekoe pō to tēnei mataèinaa :
u pūtuì to âtou puaìna. Ua pā i to âtou kikomata.
U te e ìte hoì to âtou kikomata, u te e òno te puaìna,
aòè âtou e vivini, aòè e fāìu i te koekoe.
O au à, e kōhoà au e haapohoè ia âtou. »
16 Mamau to ôtou kikomata mēìa i ta ôtou i ìte nei.
Mamau to ôtou puaìna mēìa i ta ôtou i òno nei.
17 Ma te tiàtohu ta ù peàu ia ôtou :
He mea nui te perofeta me te ènata toitoi
i maìmaì e ìte i te mea ua ìte ôtou, u te e ìte âtou.
U maìmaì e òno i te mea ua òno ôtou, u te e òno âtou.
18 O ôtou à, a haaòno i te hakatu tumu
o te teào haapupuà o te ènata tūtū i te kākano.
19 I te ava ua òno te ènata i te teào no te Patirēia,
me to īa vivini koè, ua tihe te kuhane ìno.
Ua fao īa i te mea i tūtūtia i òto o hua ènata.
Oia te kākano te i tūtūtia io he taì o te aanui.
20 O te i tūtūtia i ùna o te tukii keâ,
oia te ènata te i haaòno i te teào.
U apuu meitaì īa i hua teào me te koakoa.
21 Atià, aòè e aka i òto o īa, he ènata no te ava poto.
Ia tihe mai te mea haaveke,
akoè à te mea haamākaka mai mēìa i te teào,
u titii anamai i te haatià.
22 O te mea i tūtūtia i to he maateitā taataa,
oia te ènata te i haaòno i te teào.
Atià, o te tau kōfii o te ao nei
te kōhoà pu i te taetae avai noa,
oia te mea i haahonie i te teào.
U te e hua īa i te puku.
23 O te mea i tūtūtia i òto o te èpo meitaì,
oia te ènata te i haaòno me te vivini meitaì i te teào.
Ua hua īa i te puku, e ìma tekau to tītahi,
e toù tekau to tītahi, e toù ònohuu to tītahi. »
TOMINIKA ÒNOHUU MA ONO
TETAUTINA O TE HĀMANI O TE MĀÀMA 12,13.16-19
13 O Òe anaè te Etua, e te Fatu e. Aòè he Etua kē.
O Òe tootahi anaè no te tiòhi meitaì
i te tau mea ia ôtoa ta Òe i pēpena.
O Òe anaè te i haavā me te toitoi noa.
16 U mana nui Òe ;
oia te tumu e haatoitoi Òe i te teào teka koè.
Mēìa i to Òe vivini i nā mea hakatahi,
ua moû Òe, u haatevee i te peê.
17 Ia patitootia te ènata, u haaìte īa i to īa mana
ma te haahina i tēia e tōtōua me īa.
18 He mea kē ta Òe, e te Fatu mana nui e,
ia Òe te ìi me te toitoi noa.
U haavā Òe i te ènata ma te hakāòha mai ia īa.
Aòè hoì he mea e avai atu i to Òe mana.
19 Ma èià, u haamāàma Òe i to mataèinaa
me te hakako i te ènata toitoi
pēhea te apuu me te moû i te hoa.
U haavivini meitaì Òe ia mātou i te tetaìtina haakoakoa.
E koàna hoì i te poì tekateka te hua mai i te meitaì.
TARAMO 86 (85), 5-6, 9ab-10, 15-16ab
E te Fatu meitaì nui e, haakoè i te mikeo, a òno i to ù pure nei. cf. .86,5
5 E te Fatu meitaì nui e, a haakoè i te mikeo,
Pī i te uē no te poì e vevaò ia Òe,
6 A haaòno i to ù òna pure,
E te Fatu e, a apuu i to ù èo e uē nei ia Òe.
9 O te tau mataèinaa ta Òe i pēpena
E haakātahi mai no te pakaihi ia Òe,
10 He tiketike hoì Òe, he mea mahaò to Òe tau hana.
O Òe anaè te Etua, te Etua tiàtohu.
15 E te Fatu e, o Òe te Etua pī i te uē,
U haatevee i to Òe peê, u haataetae i te tiàtohu,
16 A tiòhi meitaì ia ù,
A hakāòha mai.
TETAUTINA O TE HĀMANI A PAURO PEÀTO I TO ROMA 8, 26-27
E tu ù tunane tuehine,
26 Atii ua toko te Kuhane Meitaì i to tātou koekoe pepee,
aòè tātou i ìte i te hakatu o te pure.
Atià, u vevaò te Kuhane Meitaì i uē ia tātou
ma he èo mamaioo,
u te e koàna i te ponateào i te haavivini mai.
27 O te Etua te i ìte i te koekoe o te tau ènata,
u vivini Īa e aha te kōhoà o te Kuhane i òto o tātou.
E tahi anaè maìmaì to te Etua me to te Kuhane :
te vevaòtina i uē ia tātou, te mataèinaa o te Etua.
ALLELUIA ALLELUIA
cf. Mt.11,25
A meitaìtia Òe, e te Motua, te Fatu o te àni me te fenua. U haaìte mai Òe i te poì iti noa i te māàma hakanā o te Patirēia o te àni.
EVANERIO O IETU KIRITO VĀÀNA E MATEO 13, 24-43
(13,24-30)
I tēia mou pō,
24 u peàu Ietu i tītahi teào haapupuà kē, pēènei :
« E koàna te peàu, u hakatu te Patirēia o te àni
me te ènata te i tūtū i te kākano meitaì i òto o to īa pāpua.
25 Atià, e hiamoe aa te poì hana,
ua tihe mai te ènata mākaka. Ua tūtū iho īa i te titania
i vāvena o te faraoa me to īa hee atu.
26 Ia tupu aè te teitā, ia hua te kāhui,
ua ìtetia te teitā titania.
27 E tihe aa te tau tāvini o te fatu pāpua,
u peàu âtou pēènei : « E te hakaìki e,
aòè à he kākano meitaì
ta òe i tūtū i òto o to òe pāpua ?
Me i hea mai oti te titania ? »
28 U peàu te fatu pāpua :
« Na te ènata i hiaki mai tenā hana. »
U peàu te tau tāvini ia īa :
« Aha e maìmaì òe e hano mātou e taki i te titania ? »
29 U haahua atu īa :
« Umoì, oa taki ôtou i te titania,
e takitumutia e ôtou me i te faraoa.
30 Avai ôtou e tupu amana e ùa teitā
tihe atu i te ava o te kohitina.
I hua ava, e peàu atu au i te poì hana :
« A kohi òmua i te titania, a haapūpā, a tutu me te ahi.
A haapuke ôtou i te faraoa i òto o to ù faè avaina faraoa. »
31 U peàu atu Ietu i tītahi teào haapupuà kē :
« U hakatu te Patirēia o te àni me te kākano terepota
ta tītahi ènata i too me te tūtū i òto o to īa pāpua.
32 Oia te kākano iti atu i tahipito tau kākano paotū.
Atià, ia tupu aè, oia te teitā keî atu
i tahipito tau teitā i tanutia.
Ua ìò he tumuâkau. Ua tihe mai te tau manu o te ataàni
no te kānea i to âtou kōhata io to īa tau manamana. »
33 U peàu atu Ietu i tītahi teào haapupuà kē :
« U hakatu te Patirēia o te àni
me te mea haapupuhi ta te vehine i too me te kāvohi atu
me nā hakatu e toù o te faraoa tee,
no te haapupuhi i te tiàtohu o te faraoa. »
34 U haaìte Ietu i hua mea paotū
i te faètoa ma te teào haapupuà.
U hakako Ietu ia âtou ma te teào haapupuà anaè,
35 etià e toitoi te teào i peàutia e te tau perofeta :
« E pohā to ù èo no te faì atu i te teào haapupuà.
E haaìte atu au i te māàma hakanātia
me i te ava o te pēpena i te aomāàma nei. »
36 E avai ana Ietu i te faètoa, ua hee atu Īa io he faè.
U haatata mai me Īa te tau kouâ me to âtou peàu :
« A haavivini mai Òe i te teào o te titania io te pāpua. »
37 U haahua atu Ietu : « O te ènata tūtū i te kākano,
o te Tama a te ènata tēia.
38 O te pāpua, o te aomāàma nei tēia.
O te kākano meitaì, o te tau ènata no âtou te Patirēia.
O te titania, o te tau ènata kē me te kuhane ìno âtou.
39 O te ènata i tōua mai te i tūtū i te titania, o te tiaporo tēia.
O te ava kohi i te puku, o te ava paona o te aomāàma tēia.
O te poì hana, o te tau anera a te Etua âtou.
40 Me he mea e kohitia te titania no te haapūovo io te ahi,
atii i te paona o te aomāàma nei.
41 E pahi te Tama a te ènata i to Īa tau anera ;
e kohi âtou no te tute i vaho o te Patirēia
i te tau ènata paotū e hakapahi i te piò,
i te tau ènata e haapiò i te Ture.
42 U tioàtia âtou i to he ahi kena oko.
I èià te uē me te haatetei i te niho.
43 O te poì toitoi à, e pupuà âtou me he òumati
i òto o te Patirēia o to âtou Motua.
A hakaòno te ènata me te puaìna. »
TOMINIKA ÒNOHUU MA FITU
TETAUTINA O TO MUA HĀMANI A TE TAU HAKAÌKI 3, 5.7-12
5 I te pō e moemoeā aa, ua ìte Taromone i te Fatu Etua
te i peàu ia īa pēènei :
« E Taromone e, e aha to òe hīa ? A faì mai, e hana au. »
U peàu Taromone :
7 E te Fatu, tu ù Etua e, na Òe i vaièi mai
i te hakaìkitina o to ù motua Tavite.
He māhaì hou au, u te e àva to ù māàma
no te haatee ia ù iho.
8 Atià, ua ìò ia ù te vivinitina o te mataèinaa
vaetia e Òe. He mataèinaa nui, nui oko.
Aòè e koàna i te ènata te tetau i to īa nuitina.
9 A tuu mai ia ù, to Òe tāvini, i te koekoe māàma
no te haatee i to Òe mataèinaa,
e ìte ana e aha te mea meitaì, e aha te mea teka.
Ia māàma koè au, pēhea te vivini i to òe mataèinaa ? »
10 U haaèka i te Fatu Etua hua teào o Taromone.
11 U peàu te Fatu ia īa pēènei :
« Na te mea oia nei to òe hīa.
Mēìa aòè òe i ape mai i te pohoètina òa, òa aè,
akoè à i te tau taetae e haatapavaù ia òe,
akoè à te ùumi haamate i te tau ènata tōtōua me òe,
enā e hana au vāàna i to òe maìmaì.
12 Ua ape mai òe i te māàma no te vae i te mea meitaì,
te titii i te mea pē, te vivini me te toitoi i te mataèinaa.
E tuu nei au ia òe i te koekoe māàma, koekoe hakatoo,
Aòè e kiko te māàma o te ènata kē me to òe
ma te tau tai a tihe anatu. »
TARAMO 119 (118), 57.72, 76-77, 127-128, 129-130
U haataetae nui au i to Òe Ture, e te Fatu e. 119,97
57 Te pakaihi me te hakako i to Òe teào,
Oia nei te hope taetae e ìò mai ia ù.
72 U haakoakoa mai ia ù to Òe Ture, e te Fatu e,
Koakoa nui atu i to te haapuke i te monikiki.
76 A haaànaàna to Òe hakāòha i to ù memae,
Vāàna i ta Òe peàu i to Òe pahinaèo.
77 A toko mai mēìa i to Òe uē, e pohoè au.
O to Òe teào hoì to ù koakoa.
127 U haataetae au i to Òe maìmaì,
Taetae atu i te monikiki me te keâ pīàma.
128 O to Òe teào te àma e tūìna i to ù aanui.
U haahaa au i te mea tīkoe e haahukaka mai.
129 He mea mahaò te tau teào o te Ture.
U haamau au ma he koekoe no te aotahi atu.
130 U haamāàmatia te ènata ma te vetevete i to Òe teào.
U vivini meitaì te poì iti noa i hua teào.
TETAUTINA O TE HĀMANI A PAURO PEÀTO I TO ROMA 8, 28-30
E tu ù tau tunane tuehine,
28 Ua ìte tātou na te Etua e haaìò i te tau mea paotū ;
he karatia âtou nui e haameitaì i te tau ènata i kāòha ia Īa,
o âtou te i vevaòtia e te Etua
vāàna i to Īa maìmaì tumu aneiho.
29 O te tau ènata ta te Etua i ìte
me i òmua anaòa, i te tumu anamai,
u maìmaì Īa e ìò âtou hakatu me te ata o ta Īa Tama,
etià he Tama hāmua Īa i vāvena o te nuitina o te teina.
30 O hua tau ènata ta te Etua i ìte me i te tumu,
u vevaò Īa ia âtou.
O hua tau ènata ta te Etua i vevaò,
u haatoitoitia âtou e te Etua.
O hua tau ènata haatoitoitia e te Etua,
ua àva atu âtou i to te Etua kāìè.
ALLELUIA ALLELUIA
cf. Mt.11,25
A haameitaìtia Òe, e te Etua Motua e, te Fatu o te àni me te fenua, mēìa u hakanā Òe i tenā mea i te poì māàma me te tau tuhuna no te haaìte atu i te poì iti noa.
EVANERIO O IETU KIRITO VĀÀNA E MATEO 13,44-52 (13,44-46)
I tēia mou pō,
u peàu Ietu ma he teào haapupuà, pēènei :
44 U hakatu te Patirēia o te àni me te puke taetae
i hakanātia i òto o tītahi pāpua.
U koàna mai i te ènata tēnei puke taetae i hakanātia.
U hakanā hakaùa hua ènata i hua taetae
me to īa hee atu pī i te koakoa.
I muì iho, ua hoko atu i ta īa tau taetae paotū
no te hoko mai i hua pāpua.
45 Hakaùa : U hakatu te Patirēia o te àni
me te ènata hoko taetae e ìmi aa i te matauhi kanahau.
46 Ia koàna mai ia īa e tahi matauhi kanahau èka,
ua hano īa e hoko atu i ta īa tau taetae paotū
no te hoko mai i hua matauhi.
47 Hakaùa : U hakatu te Patirēia o te àni
me te ùpena i haatopatia i to he tai,
te i haamau i te nuitina o te tau ià kē, ià kē.
48 Ia pī te ùpena, u toitia i no he one.
U kaapee te tau ènata àvaià no te vae i te tau ià meitaì
me te tuu i to he ète.
U tioà âtou i te tau ià nōuo.
49 Atii hoì i te paona o te aomāàma :
e titihe mai te tau anera,
e haapaekē âtou i te tau ènata pē
me i vāvena o te tau ènata meitaì.
50 U titii âtou i te tau ènata pē i to he ahi kena oko.
I èià te uē me te haatetei i te niho.
51 Aha, u vivini ôtou i tenā mea paotū ? »
Ua haahua atu âtou : « E. »
52 U peàu Ietu pēènei : « O te tuhuna teào te i haaìòtia
he kouâ o te Patirēia o te àni,
u hakatu īa me te heifaè
te i too i te mea hou me te mea tehito
me io to īa puke taetae. »
TOMINIKA ÒNOHUU MA VAÙ
TETAUTINA O TE PEROFETA ITAIA 55,1-3
1 Oia nei te Teào o te Fatu Etua :
E mate ôtou i te maovai ? A mai. A inu.
Moni koè ôtou ? A hoko pu.
A kai. A inu i te vino, i te vaiū.
2 Umoì e tūtā pu i to ôtou moni hana
no te kai i te înaì haamāòna koè.
3 A haaòno mai. E maòna ôtou i te înaì mōmona.
A haaòno mai. Mave mai. E pohoè meitaì ôtou.
E haatoitoi au me ôtou i te Piimau paona koè.
E ìò hoì ia ôtou te taetae o Tavite.
TARAMO 145 (144), 8-9, 15-16, 17-18
Ua tuha to Òe nā îima i te mea e hei : i kai haamāòna ai mātou. 145,16
8 He moû, he kāòha te hakatu o te Fatu :
U haatevee i to Īa peê, ua pī i te uē.
9 U matavaièi anaè te Fatu no tātou paotū.
U haataetae i te tau mēmau ta Īa i pēpena.
15 U feau io Òe te mēmau pohoè paotū,
E tetaì ana i to âtou oà me io Òe.
16 Ua tuha to Òe nā îima i te mea e hei :
E kai haamāòna te tau mēmau pohoè ôtoa.
17 U toitoi noa to te Fatu maìmaì paotū.
O te kāòha te tumu o to Īa tau hana ia ôtoa.
18 U tata èka me te poì i vevaò ia Īa,
E pure ana ma io he koekoe tiàtohu.
TETAUTINA O TE HĀMANI A PAURO PEÀTO I TO ROMA 8, 35.37-39
35 Na ai e haapaekē ia tātou me io to te Kirito kāòha mai ?
Te tau kōfii haauē mai ? Te kuhane koè ?
Te hana mākaka ? Te one ? Te àì ?
Te haametaù ? Te kohetā ?
37 Atià, e tuàki tātou i te tau mea haapākeka paotū.
Ua toko hoì Ietu Kirito ia tātou mēìa i to Īa kāòha mai.
38 O to ù haatià mau i tēnei : u te e haapaekē ia tātou
me io te Kirito te mēmau e tahi,
e aha à e pohoè tātou, e mate ai tātou,
aòè te tau anera, te tau hakaìki anera,
aòè te tau mea o tēnei mou â,
akoè à i te ava e tihe ai,
39 aòè te tau mana hakanā e viitoi mai,
aòè te tau mēmau me i ùna o te àni,
akoè à me i havaiki,
aòè te tau mea kē pēpenatia
e haapaekē ia tātou me io te kāòha
ta te Etua i haaìte mai i òto o Ietu Kirito, to mātou Fatu.
ALLELUIA ALLELUIA
cf.Ta.78,24
Ua tāfai te Fatu i to Īa mataèinaa io te fenua ataha, me te haamaòna ia âtou me te faraoa me io he àni mai.
EVANERIO O IETU KIRITO VĀÀNA MATEO 14, 13-21
13 Ia òno Ietu ua mate Ioane Papetita,
ua hee atu Īa ma he vaa i te fenua ataha, io te taha viviiō.
Ua ìte te faètoa me to âtou ūtaì ia Ietu
me te taha atu ma no he vaevae, me io to âtou fenua.
14 Ia tau Ietu, ua ìte Īa i te faètoa nui.
U mehea te koekoe o Ietu.
U haameitaì Īa i te poì hōpī.
15 I te ahiahi, u haatata mai me Ietu te tau kouâ
me to âtou peàu pēènei : « O te fenua ataha înei.
Ua èva te â. A haahua òe i te faètoa.
A hee atu âtou i to he pāpuafaè,
no te hoko mai i te mea kai. »
16 U peàu Ietu ia âtou : « Aòè e meitaì ia huhua atu âtou.
A tuu atu ôtou aneiho i te mea kai ia âtou. »
17 U peàu te tau kouâ : « E ìma faraoa,
me nā ià e ùa anaè ta mātou. »
18 U peàu Ietu : « A àve mai înei, io ù. »
19 I muì iho, u peàu Īa no te haanoho i te faètoa i no he mutiē.
Ua too Ietu i nā faraoa e ìma me nā ià e ùa.
U feau te mata io he àni, u haahuaèkaèka,
ua vahi i te faraoa me to Īa tuu i te tau kouâ.
Na te tau kouâ te tuha atu i te faètoa.
20 Ua kai haamāòna âtou paotū.
Ua kohitia te toena : ònohuu ma ùa ète pī meitaì.
21 E ìma tautini ùanei te nuitina o te ènata kai.
Aòè te tau vehine me te tau tōìki i tetautia.
TOMINIKA ÒNOHUU MA IVA
TETAUTINA O TO MUA HĀMANI O TE TAU HAKAÌKI 19, 9a.11-13a
9 Ua fiti Eria i ùna te tuaivi
me to īa uu i òto te ana no te hiamoe.
11 U peàu te Fatu Etua ia Eria :
« I vaho òe. A tū i te aò o te Fatu.
Enā, e haatata mai te Etua. »
U haatata mai hoì te Fatu Etua.
Ua puhi te metani ìi oko nui
te i haaneue i te tuaivi me te haapohā i te papakeâ.
Atià, aòè te Etua io te pooìna o te metani.
U feùu te tuaivi.
Aòè te Etua io te feùutina o te tuaivi.
12 A tahi a topa te ahi me io te àni.
Aòè te Etua io te ahi.
Ua puhi te metani moû, moû oko, u menino te fenua.
13 Ua òno Eria i te metani moû.
U tomi anamai i to īa mata me te kahu uhi pu,
ua uu īa i vaho o te ana.
TARAMO 85 (84), 9ab-10, 11-12, 13-14
E te Fatu e, a haaìte mai i to Òe kāòha, a vaièi mai i to Òe haapohoètina. 85,8
9 E haaòno au : E aha òa ta te Fatu e peàu.
Oia nei ta te Fatu Etua i peàu :
te moû i no he fenua no to Īa mataèinaa ;
10 U tata èka to Īa haapohoè no te ènata haatià.
E noho te kāìè o te Etua io to tātou fenua.
11 U âvei te kāòha me te tiàtohu.
Ua honi atu honi mai te toitoi me te moû.
12 E tupu te tiàtohu me io he fenua.
E tiòhi mai te toitoi me io he àni.
13 E vaièi mai te Etua i to Īa taetae kāòha.
E hua to mātou fenua i to īa puku.
14 E taha te toitoi ma mua o te Fatu,
E haaìte hua toitoitina i te aanui.
TETAUTINA O TE HĀMANI A PAURO PEÀTO I TO ROMA 9, 1-5
E tu ù tau tunane tuehine,
1 I òto o te Kirito, he mea tiàtohu to ù teào nei.
Aòè au he ènata tīkoe.
U haatiàtohu mai to ù koekoe
haamāàmatia e te Kuhane Meitaì, aòè au e tīkoe.
2 Paotū te â, u memae to ù koekoe,
he mea òomi menava to ù uēuē,
3 mēìa i to ù mataèinaa, te tau ati Iuta.
Koù e titii te Etua ia ù, e haapaekē ia ù me io te Kirito,
etià, ma èià, e koàna ia ù e toko
i to ù tau tunane tuehine, e tahi toto âtou me au nei.
4 O âtou hoì te mataèinaa Iraene. Ua vae te Etua ia âtou.
U haaìòtia âtou he tau tama na Īa.
U haaìte te Etua i to Īa kāìè ia âtou.
U haatoitoi te Etua me âtou i nā Piimau.
Ua tuutia ia âtou te Ture
me te hakatu pure haaèka i te Etua.
No âtou te taetae peàutia e te Etua.
5 O âtou te ati i ùna aè o te tau Pateriareka.
Me io âtou, u fānautia te Kirito, te i haatiketiketia atu
ma ùna o te tau mēmau ia ôtoa,
te Etua haameitaìtia ma te tau tai a tihe anatu. Amene.
ALLELUIA ALLELUIA
cf. Ta.62,3 ; 18,17
O te Etua to ù motukeâ te i pāpua mai. Me i ùna o te àni, ua tuu mai Īa i te ìma no te taki mai ia ù me i òto o te vaitahe.
EVANERIO O IETU KIRITO VĀÀNA MATEO 14, 22-23
Ia tāfai Ietu i te faètoa i te fenua ataha,
22 a tahi a peàu Īa i to Īa tau kouâ
no te piki i ùna o te vaa
me te hee atu ma mua o Īa, i hiva atu o te tai,
oi haahua atu Īa i te faètoa.
23 Ma hope o to Ietu haahua atu i te faètoa,
ua fiti Īa i ùna o te tuaivi no te pure, io te taha viviiō.
Ia topa te pō, o Ietu tootahi i èià.
24 Atià, ua tee i tai òa te vaa o te tau kouâ.
Ua oko te metani, u neuneue te vaa i te naùnaù tai.
25 I te hāhakateiao, e taha aa Ietu io he tai,
u haatata mai me to Īa tau kouâ.
26 E ìte aa âtou ia Ietu e taha aa ma ùna o te tai,
u kiiete âtou e peàu ana : « E vehinehae. »
U taaàu âtou na te haametaù.
27 Atià, u peàu Ietu ia âtou :
« Oho te ìi. O au tēnei. Umoì ôtou e haametaù. »
28 A tahi a pohā te èo o Petero me to īa peàu :
« E te Fatu e, anoa o òe,
a peàu mai no tu ù taha atu io Òe, ma ùna o te tai. »
29 U peàu Ietu : « A mai. » Ua iho Petero me io he vaa,
ua taha īa i no he tai, u haatata atu io Ietu.
30 Mēìa i te metani oko, u haametaù Petero.
U tīmata īa te naò me to īa taaàu :
« E te Fatu e, a hakāòha mai. »
31 U hohoà ponihoo Ietu i te ìma, ua too mai me te peàu :
« E te ènata haatià iti.
No te aha to òe kaituto e naò òe ? »
32 Ua piki âua i no he vaa. U menino anamai te metani.
33 U momoe haatona i te aò o Ietu te poì te io he vaa,
e peàu ana : « Ma te tiàtohu, e Tama Òe a te Etua. »
TOMINIKA TEKAU
TETAUTINA O TE PEROFETA ITAIA 56, 1.6-7
1 Oia nei te Teào a te Fatu :
« A hana ôtou vāàna i te ture.
A toitoi noa to ôtou hakatu pohoè.
U haatata mai hoì te haapohoètina.
U tata èka te ava no te haaìte atu i tu ù toitoitina.
6 O te tau manihii te i aotahi atu i te Teào a te Etua,
e haakāìè i to Īa inoa me te tāvini ia Īa,
o te tau ènata paotū e aotahi teka koè i te Tāpati,
e haataetae ana i to ù Piimau,
7 o âtou nui e aahitia e au nei i ùna o to ù tuaivi tapu.
E apuu au ia âtou me te haaìò ia âtou
he huaa ènata koakoa i òto o to ù faèpure.
E haaèka ia ù to âtou ùtuna i ùna o to ù fātaa pure,
atii me to âtou hēana pūovo i te ahi.
U apatia te inoa o to ù faèpure :
Te Faèpure o te tau mataèinaa ia ôtoa. »
TARAMO 67, (66), 2b-3, 5abd, 7b-8
E te Etua e, a hahi te tau mataèinaa, a haahuaèkaèka âtou ôtoa ia Òe. cf.67,4
2 A pupuà to Īa mata i ùna o tātou nei.
3 E ìtetia to Òe aanui io te aomāàma vii pu,
To Òe haapohoètina ma te tau fenua paotū.
5 A koakoa te tau mataèinaa, a hīmene âtou.
U vivini hoì Òe i te aomāàma me te toitoi.
U haatee Òe i te tau mataèinaa ma he fenua.
7 U haameitaì mai te Etua ia tātou.
8 A matavaièi mai te Etua ia tātou.
A pakaihi te fenua vii pu i to Īa Fatu.
TETAUTINA O TE HĀMANI A PAURO PEÀTO I TO ROMA 11, 13-15.29-32
E tu ù tau tunane tuehine,
13 E too ta ù e peàu ia ôtou, e te poì êteni, pēènei :
He àpotoro au, pōpahitia io te tau mataèinaa êteni ;
ua hana au i tu ù hana tumu me te koekoe ūo,
14 e hano hoì e haatupu i te keitani io he koekoe
o tahipito ati Iuta, tu ù tau tunane,
e tahi toto âtou me au, etià e haapohoètia âtou.
15 I te ava u titiitia âtou, u haaâvei te Etua me Īa
i te tau mataèinaa o te ao nei.
E aha ta te Etua e hana i te ava e apuu Īa i te tau ati Iuta ?
E ìò hua ava me he mea te haapohoè hakaùa
i te huaa mamate.
29 Aòè hoì e huìkē to te Etua maìmaì,
i ùna o te ènata vaetia, vevaòtia.
30 Ôtou, e te poì êteni, òmua ìka, u pūtuì ôtou i te Etua.
I tēnei, u hakāòha te Etua ia ôtou, mēìa u pūtuì te tau ati Iuta.
31 Atii tēnei, mēìa u hakāòha mai te Etua ia ôtou,
u pūtuì te tau ati Iuta, etià e hakāòha te Etua ia âtou.
32 Ua ao hoì te Etua e ìò te tau ènata paotū
me he poì humutia i to âtou pūtuìtina,
etià e koàna ia Īa te haakāòha mai i te tau ènata ia ôtoa.
ALLELUIA ALLELUIA
Ta. 146,8-9.5
O te Fatu te i haaūo i te poì kuhane koè, O te Fatu te vevaò o te tau manihii, Mamau te ènata e tetaì nei i te Fatu, to īa Etua.
EVANERIO O IETU KIRITO VĀÀNA MATEO 15, 21-28
I tēia mou pō,
21 ua vii Ietu i te fenua Tiro me Titone.
22 Enā e tahi vehine Kananea te i tihe me io hua fenua.
U taaàu īa : « A hakāòha mai Òe,
e te Fatu, te tama a Tavite e.
U haamemae oko te tiaporo i ta ù moî. »
23 Aòè i pohā te èo o Ietu.
U haatata mai to Īa tau kouâ me to âtou vevaò pēènei :
« A haahua atu òe ia īa
na te mea e taaàu hakaēa koè, ma muì o tātou. »
24 U peàu Ietu : « U pahitia au
no te tau muto i naò me io te ati Iraene anaè. »
25 Atià, ua tihe te vehine, ua moe haatona i te aò o Ietu,
me te peàu : « E te Fatu e, a toko mai. »
26 U haahua atu Ietu : « Aòè e meitaì
te too i te faraoa o te tau tama
no te titii atu i te tau kakaiū nuhe. »
27 U peàu te vehine : « Tiàtohu hoì, e te Fatu e,
atià, ua kai te tau kakaiū nuhe
i te tau ota i topa me io he tapu o to âtou tau fatu. »
28 A tahi a pohā te èo o Ietu me te peàu :
« E te vehine, ua nui to òe haatià !
A tae vāàna e to òe hīa. »
Me te meitaì anamai ta īa moî.
TOMINIKA TEKAU MA TAHI
TETAUTINA O TE PEROFETA ITAIA 22, 19-23
19 Oia nei te Teào a te Fatu ia Hepera,
te Kuvenea o te Fenua Tiria :
« E haakoè au i to òe vivinitina.
E taki au me io òe i to òe hakaìkitina.
20 E vevaò au i to ù pahinaèo, o Etiakimi, tama na Hirikia.
21 E haauhi au ia īa me to òe kahu,
e tu ù au ia īa i to òe paèkuà,
e haaìò au ia īa i to òe mana.
E motua īa no te poì noho aa i Ierutaremi
me te mataèinaa ati Iuta.
22 E tuu au ma ùna o to īa paufifi i te kirī o te faè o Tavite.
No to īa pepeù mai, aòè e koàna i te ènata te pā.
No to īa pā, aòè e koàna i te ènata te pepeù iho.
23 E haamau au ia īa me he pou tanutia io he èpo.
E tū īa no te haakāìè i te inoa o to īa tau tupuna.
TARAMO 138 (137), 1-2a, 2b-3, 6a.8
E te Etua tiàtohu e, umoì e hakaēa i to Òe matavaièi mai. cf. 138,8
1 E te Fatu e, u haahuaèkaèka au me io he koekoe.
U haaòno hoì Òe i tu ù pure vevaò.
E hīmene nei au ia Òe i mua o te tau anera,
2 E oha nei au e tiòhi ana i to Òe Hiero tapu.
E hahi nei au ia Òe mēìa i to Òe kāòha me te tiàtohu.
U tiketike atu i te tau mēmau paotū to Òe inoa.
3 I te â u haahua mai Òe i to ù pure vevaò,
U haaūo to Òe mana i te ìi o tu ù kuhane.
6 Ua ìte te Etua tiketike i te ènata avai noa.
8 I uē ia ù, ua hana me he mea ta Īa i peàu mai.
E te Fatu e, paona koè to Òe kāòha.
Umoì e hakaēa i to Òe matavaièi mai.
TETAUTINA O TE HĀMANI A PAURO PEÀTO I TO ROMA 11, 33-36
33 Auē, te nui o to te Etua vaièitina,
te hōhonu o to te Etua ìte māàma.
O ai te ènata e koàna te haavivini mai
i to te Etua maìmaì, e haapuàha i to Īa tau aanui ?
34 O ai te i ìte i te maakau o te Etua ?
O ai te i hakatoo i te Etua ?
35 O ai te ènata te i tuu atu i te Etua i tītahi mēmau
no te hoko mai i to Īa vaièi ?
36 Me io Īa, ma io Īa, no Īa te tau mēmau ia ôtoa.
Te kāìè i te Etua ma te tau tai a tihe anatu. Amene.
ALLELUIA ALLELUIA
cf.Mt.16,18
I ùna o te haatià o Petero, ua haatū te Fatu i to Īa Èkaretia ; aòè e hinatia i te mana o te havaiki pē.
EVANERIO O IETU KIRITO VĀÀNA MATEO 16, 13-20
I tēia mou pō,
13 Ua tihe Ietu io te Fenua Ketare Firipo.
Ua ūi atu Īa i te tau kouâ pēènei :
« O ai òa te Tama a te ènata
vāàna i te mea i peàutia e te tau ènata ? »
14 U haahua âtou : « Ta tahipito, o Ioane Papetita.
Ta tahipito o Eria. Ta tahipito o Ieremia,
akoè à tītahi me i vāvena o te tau perofeta. »
15 U peàu atu Ietu : « No ôtou à, o ai au nei ? »
16 U pohā te èo o Timone Petero me te haahua atu :
« O Òe te Kirito, te Tama a te Etua pohoè. »
17 U haahua Ietu me te peàu :
« Mamau òe e Timone e, te tama a Iona,
na te mea aòè na te ènata i haamāàma ia òe.
Atià, na tu ù Motua te io he àni i haaìte mai.
18 U peàu au ia òe : O Keâ to òe inoa.
(o hua mea aneiho me Petero.)
I ùna o hua papakeâ, e haatū au i to ù Èkaretia.
Aòè e hinatia i te mana o te havaiki pē.
19 E tuu atu au ia òe i te kirī o te Patirēia o te àni.
O te tau mea paotū ta òe e haamau i no he fenua,
e haamautia i no he àni.
O te tau mea paotū ta òe e vevete i no he fenua,
e vevetetia i no he àni. »
20 I muì iho, u oonaì Ietu i te tau kouâ,
umoì e faì atu i te ènata e tahi o Īa te Kirito.
TOMINIKA TEKAU MA ÙA
TETAUTINA O TE PEROFETA IEREMIA 20, 7-9
7 I tēia mou pō, u peàu Ieremia pēènei :
« E te Fatu e, u maìmaì Òe e haataetae au ia Òe,
u haataetae hoì. Ua viitoi mai Òe, u tuàkitia au.
8 I tēnei, me i te â, me i te pō,
u haamee mai te tau ènata, u haamāio mai.
I te ava u pohā tu u èo no te haaìte atu i to Òe teào,
u taaàu anaè :
« Auē. Te tōtōua atu te tōtōua mai. Auē. Te haotina nui. »
No èià, me i te â, me i te pō, ua pahatia au ;
u haameetia au mēìa i te Teào a te Etua.
9 U peàu au pēènei : E hakaēa au.
U te e haaìte atu i te Teào a te Etua.
A tahi a veàveà me he ahi to ù koekoe.
Aòè e koàna ia ù te haamoû.
TARAMO 63 (62), 2, 3-4, 5-6, 8-9
E te Fatu, e tu ù Etua e, ua mao tu ù kuhane ia Òe me he mea i te vai. 63,2
2 E te Etua e, o Òe tu ù Etua.
I te pōpōuì tika, e ìmi nei au ia Òe.
O Òe te hīa o to ù kuhane me i te tino,
Me he mea e mao i te vai te èpo paka meô.
3 Ua ìte au ia Òe i òto o te taha tapu,
U tiòhi mata au i to Òe mana me te kāìè.
4 Te hinenaò ia Òe, u meitaì atu i te pohoè,
Te hahi ia Òe to ù tanitina èo anaè.
5 Ma te òa o to ù pohoè, e haameitaì au ia Òe.
U hapai au i to ù îima e hahi ana i to Òe inoa.
6 U koakoa hoì au me he ènata maòna i te kai mōmona.
Me te mata kata, e hīmene au no te hahi ia Òe.
8 Ua tihe hoì Òe no te toko mai.
I to Òe aò, u hīmene au me te koakoa.
9 Ua haapii to ù kuhane me Òe.
O to Òe ìma oko to ù toko.
TETAUTINA O TE HĀMANI A PAURO PEÀTO I TO ROMA 12, 1-2
1 E tu ù tau tunane tuehine.
U toutaki mamate au ia ôtou
ma te inoa o to te Etua hakāòha mai :
a ùtuna atu ia Īa i to ôtou ènata tiàtohu,
me he hēana e pohoè nei, hēana peàto,
hēana haaèka i te Etua.
Oia hoì te hana pure māàma e hei no ôtou.
2 Umoì ôtou e pohoè vāàna i to te aomāàma hakatu.
A fāìu i to ôtou koekoe
ma te avai i te Etua te haahou i to ôtou kuhane.
A tahi a ìte ôtou i te maìmaì o te Etua,
e aha te mea toitoi,
te mea haaèka i te Etua, te mea meitaì èka.
ALLELUIA ALLELUIA
cf. Ef.1,17-18
Na te Etua o to tātou Fatu Ietu Kirito e vaièi mai i te Kuhane haamāàma i to tātou koekoe. Na te Etua e haapuàha i te mea nei : E aha te taetae ta tātou e tetaì nei mēìa u vevaò mai te Etua.
EVANERIO O IETU KIRITO VĀÀNA E MATEO 16, 21-27
21 I tēia mou pō, u tīmata Ietu e haaìte atu i to Īa tau kouâ :
enā e fiti Īa i Ierutaremi, i èià e haamemae nui ia Īa
te tau kōkooūa, te tau Tāuà, te tau tuhuna teào.
E ùumi haamate nui âtou ia Īa.
Atià, ma te pō toù, e tū hakaùa Īa.
22 E aahi ana Petero ia Ietu io te taha viviiō,
u oonaì ia Īa pēènei : « E te Fatu e,
aòè e pao ai tenā mea i ùna o Òe. »
23 E fāìu ana Ietu, u peàu ia Petero :
« A hee ma to ù tua, e Tatane.
U hano òe e haahina ia ù.
Aòè to òe maakau nei me io te Etua.
He maakau ènata aneiho. »
24 I hua ava, u peàu Ietu i to Īa tau kouâ pēènei :
« O te ènata e maìmaì e ūtaì mai ia ù,
a titii ia īa iho, a amo i to īa peka, a ūtaì mai.
25 O te ènata e maìmaì e haakoàna i to īa pohoè,
e haakoè īa i hua pohoè.
O te ènata e haakoè i to īa pohoè
mēìa ia ù, e koàna mai to īa pohoètina.
26 E aha ta te ènata e koàna mai
ma te vivini i te aomāàma ia ôtoa,
me koè to īa aneiho pohoètina ?
Akoè à, no te hoko mai i to īa pohoètina
e aha te taetae ta te ènata e tuu atu ?
27 E tihe mai hoì te Tama a te ènata
me to Īa tau anera, io te kāìè o to Īa Motua.
Na Īa e haaìò i te tuki i te tau ènata tikitahi
vāàna e to âtou hana. »
TOMINIKA TEKAU MA TOÙ
TETAUTINA O TE PEROFETA EHEKIERE 33, 7-9
7 U peàu mai te Etua pēènei :
« E te ènata e. U vae au ia òe he ènata matavaa,
e kanino meitaì i te mataèinaa Iraene.
Ia òno òe i tu ù teào, a haaìte atu ia âtou.
8 Me peàu au i te ènata mākaka : E mate òe,
a oonaì òe ia īa, etià e hua i te meitaì.
Anoa u te e oonaì òe ia īa
etià e titii īa i te mikeo,
e mate nui hoì īa i òto o to īa mikeo.
9 E mea à, e ìò ia òe te tuki o to īa toto.
Me oonaì òe ia īa no te hua i te meitaì,
atià u pūtuì īa, i ùna o īa to īa mikeo, na īa ta īa.
E mate nui hua ènata. E mea à, u pohoè òe.
TARAMO 95 (94), 1-2, 6-7b, 7d-8a.9
I tēnei â, umoì tātou e taha kē te koekoe, a apuu i to Īa Teào. cf. .95,8
1 A mai. A hahi tātou me te koakoa i te Fatu,
A haakāìè i to tātou motukeâ, te Haapohoè.
2 E haahuaèkaèka ana, a haatata mai tātou io Īa,
E hīmene haakoìna no te hahi i te Fatu.
6 A tomo. A oha. A atoratio ia Īa.
A moe haatona i mua o te Fatu,
Na Īa hoì i pēpena ia tātou.
7 O Īa te Etua, o tātou te mataèinaa,
Te naho muto haateetia e to Īa îima.
I tēnei â, aha e apuu ôtou i to Īa teào ?
8 Umoì ôtou e pūtuì me he mea i te fenua ataha,
9 U haaveke mai to ôtou tau tupuna me te hakaki ia ù,
E aha à ua ìtemata âtou i to ù hana mana.
TETAUTINA O TE HĀMANI A PAURO PEÀTO I TO ROMA 13, 8-10
E tu ù tau tunane tuehine,
8 a haakoè i to ôtou àiê paotū.
E avai e tahi àiê anaè : te kāòha atu kāòha mai.
O te ènata e kāòha i te hoa,
u aotahi pao ònaòna īa i te Ture a Moite.
9 A haamāmaakau hoì ôtou i te tau teào o te Ture :
umoì e haapē i te mātirimonio.
Umoì e ùumi haamate i te hoa.
Umoì e kamo. Umoì e kōhoà pu i te taetae a te hoa.
Atii me te tau teào kē, teào kē.
E koàna te haapoto i hua tau teào ma te peàu :
A kāòha i te hoa me he mea ia òe aneiho.
10 Ia kāòha te ènata i te hoa, u te e haamākaka ia īa.
Ia kāòha te ènata i te hoa,
e aotahi meitaì èka īa i te Ture.
ALLELUIA ALLELUIA
cf. 2Ko.5,19
I òto o te Kirito, o te Etua aneiho te i haaâvei me te aomāàma. Na te Etua i tuu mai te teào o te haaâveitina.
EVANERIO O IETU KIRITO VĀÀNA E MATEO 18, 15-20
I tēia mou pō, u peàu Ietu i to Īa tau kouâ, pēènei :
15 « Me mikeo to òe hoa, a hano òe haaâvei me īa.
A oonaì atu : ôùa, tokoùa aneiho.
Me haaòno te hoa ia òe, u haaìò òe i te meitaì i te hoa.
16 Me pūtuì te hoa ia òe, a too me òe
e tahi, akoè à e ùa ènata kē etià e haatoitoitia te teào
me nā tokoùa, akoè à tootoù ènata haatiàtohu.
17 Me pūtuì te hoa ia âtou, a peàu atu òe i te Èkaretia.
Me ao koè te hoa e haaòno i te Èkaretia,
a ìò īa no òe me he ènata êteni, me he Pupurikano.
18 Ma te tiàtohu to ù peàu ia ôtou : o te tau tekateka paotū
ta ôtou e haamau i no he fenua, e haamautia i to he àni.
O te tau tekateka paotū ta ôtou e vevete i no he fenua,
e vevetetia i to he àni.
19 U peàu hakaùa au ia ôtou :
Me haatahi nā ènata tokoùa me i vāvena o ôtou
i no he fenua, no te ape mai i tītahi mea,
e vaièitia mai e to ù Motua te io he àni.
20 Na te mea, i èià e haaputuputu ma to ù inoa
tokoùa akoè à tootoù ènata,
enā me au nei i vāvena o âtou. »
TOMINIKA TEKAU MA FĀ
TETAUTINA O TE HĀMANI A PENETIRA 27, 30 ; 28, 1-7
30 Te koekoe peê me te koekoe huke i te umu,
oiana te hana ìno nui
te i noho mau i òto o te ènata mikeo.
Ia huke te ènata i te umu,
e ìò ia īa te umu me io te Etua :
aòè te Etua e haatāvaètia e hua ènata.
28, 1 A tuu òe i te umu o te hoa te i teka io òe,
a tahi a haakoè te Etua i to òe iho mikeo.
2 Me haahaa atu haahaa mai te hoa i te hoa,
pēhea e vevaò âtou i to te Etua hakāòha mai ?
Me hakāòha koè te ènata i to īa hoa,
3 e ape īa i te Etua no te vevete i to īa mikeo ?
4 No te huke i te umu tītahi ènata te i mate vave,
na ai oti e vevete i to īa iho mikeo ?
5 A maakau òe i te ava o to òe matena :
a haakoè te hiaki.
6 A kaituto òe i to òe èeva ka me te matena,
a aotahi atu i te maìmaì o te Etua.
A haamaakau i te Teào a te Etua,
umoì e haahaa i to òe hoa.
7 A haamaakau i te Piimau o te Etua tiketike,
a haatūhaa i te tau tekateka o to òe hoa.
TARAMO 103 (102), 1-2, 3-4, 9-10, 11-12
He moû, he kāòha te hakatu o te Fatu. 103,8
1 E tu ù kuhane, a haameitaì i te Fatu,
Me io he koekoe, a haameitaì i to Īa inoa peàto.
2 A haameitaì i te Fatu, e tu ù kuhane,
Aua e tūhaa e tahi o to Īa vaièitina.
3 U vevete te Fatu i to òe tau mikeo paotū.
U haakoè te Fatu i te memae o to òe tino.
4 Na Īa i taki ia òe me io te ana tūpāpaù.
Na Īa i fāfī ia òe me te kāòha me te hinenaò.
9 U oonaì mai Īa no te ava poto,
Ua pao vave to Īa hiaki mai.
10 U te e utu mai te Fatu vāàna i to tātou tau piò.
Aòè Īa e huke i te umu ia tātou poì mikeo.
11 Me he tiketike o te àni ma ùna o te fenua,
Ua mana to te Fatu kāòha i uē i te poì haatià.
12 Me he memao o te tihena o te òumati me i to īa naòna,
U tioà te Etua i te mikeo memao me io tātou.
TETAUTINA O TE HĀMANI A PAURO PEÀTO I TO ROMA 14, 7-9
E tu ù tau tunane tuehine,
aua e pohuè tītahi me io ôtou no īa to īa anaè.
Me mate nui te ènana, aòè e mate no īa to īa anaè.
U pohuè tātou no te hahi i te Fatu.
Me mate nui tātou, e mate no te hahi i te Fatu.
Me pohuè, me mate nui tātou, no te Fatu hoì tātou.
Ua mate te Kirito, ua tū hakaùa Īa etià e peàu
te tau ènana pohopohoè nei me te huaa mamate :
o te Kirito te Fatu.
ALLELUIA ALLELUIA
cf.In.13,34
U haaìte mai te Fatu i te Teào aòè i peàutia òmua atu nei : « A kāòha atu kāòha mai te hoa i te hoa me he mea u kāòha au ia ôtou. »
EVANERIO O IETU KIRITO VĀÀNA E MATEO 18, 21-35
I tēia mou pō,
e haatata mai aa Petero me Ietu, u peàu pēènei :
« E te Fatu e, e hia piò ta te hoa ia ù
me ta ù vevete ia īa ? E hitu ? »
U peàu Ietu : « Aòè au i peàu ia òe e hitu,
atià, tihe atu e hitu ònohuu ma hitu hitutina.
No èià, u hakatu te Patirēia o te àni
me te hakaìki te i maìmaì
i te haatoitoi i te teào me to īa tau tāvini.
I te tīmataìa, u aahiìa io īa tītahi tāvini :
e àiê to īa, ònohuu tautini tāreni.
Ohia aòè e koàna i te tāvini te haakoè i te àiê,
u peàu te hakaìki no te hoko atu ia īa
atii me ta īa vehine me ta īa tau tama,
me to īa tau mēmau paotū no te utu i te àiê.
A tahi a hina hua tāvini pii o nā vaevae o te hakaìki,
ua moe haatona me te peàu pēènei :
« Umoì òe e peê ia ù.
Epō e utu au, e haakoè au i to ù àiê ».
Ua pī i te kāòha te hakaìki, ua ao e hee pu te tāvini.
U haakoè īa i te àiê.
Ia tihe i vaho, u âvei hua tāvini me tītahi o to īa tau hoa
te i àiê io īa hānere moni tenario.
U popoì te tāvini i te kākī o to īa hoa
e hano e matakifee ia īa e peàu aa :
« A utu mai i to òe àiê. »
Ua hina te hoa pii o to īa nā vaevae
me te toutaki mamate ia īa : « Umoì òe e peê ia ù.
Epō e utu au, e haakoè au i to ù àiê. »
Atià, u te e ao te hoa.
Tōtahi atu to īa aahi atu ia īa io he faèhumu
tihe atu i te ututina o te àiê.
Ia ìte tahipito tau hoa i hua mea, ua nui to âtou kuhane koè.
U haaìte âtou i tēia mea paotū i to âtou hakaìki.
U haatihe mai te hakaìki i hua tāvini me to īa peàu pēènei :
« E te tāvini pē. Ua tuu atu au ia òe i to àiê ia ôtoa
mēìa i to òe vevaò mai.
Aòè à e hei ia òe iho te hakāòha atu i to òe hoa,
me he mea u hakāòha au ia òe ? »
Mēìa i to īa peê, u haaìò te hakaìki i te tāvini
i te îìma o te poì haamamae,
tihe atu i te ututina paona o te àiê.
Atii ta to ù Motua te io he àni ia ôtou,
me he mea aòè ôtou tikitahi e tuu atu
i te àiê o te hoa ma te koekoe vaièi nui. »
TOMINIKA TEKAU MA ÌMA
TETAUTINA O TE PEROFETA ITAIA 55, 6-9
6 A ìmi ôtou i te Etua, oia te ava e âvei me Īa.
I te ava nei, a pure ôtou i te Etua, u tata èka me ôtou.
7 A hua mai te ènata mākaka me io to īa aanui hukaka.
A titii te ènata ìno i to īa maakau pē.
A hua io te Etua te i hakāòha mai ia īa.
8 He mea kē hoì te maìmaì o te Etua, mea kē to te tau ènata.
He mea kē te hakatu o te Etua, mea kē to te tau ènata.
9 Atii te tiketike o te àni ma ùna o te fenua,
atii te hōhonu atu o te maakau o te Etua
ma ùna o te maakau ènata.
TARAMO 145 (144), 2-3, 8-9, 17-18
U tata èka te Fatu me te poì i vevaò ia Īa. 145,18
2 O to ù hīa, e haakāìè ia Òe paotū te â,
E hahi i to Òe inoa ma te tau tai hakatahi.
3 U tiketike te Fatu : nui atu, nui atu te hahi ia Īa.
O ai te ènata te i vivini i to Īa òno nui ?
8 He moû, he kāòha te hakatu o te Fatu :
U haatevee i to Īa peê, ua pī i te uē.
9 U matavaièi anaè te Fatu no tātou paotū.
U haataetae i te tau mēmau ta Īa i pēpena.
17 U toitoi noa to te Fatu maìmaì paotū.
O te kāòha te tumu o to Īa tau hana ia ôtoa.
18 U tata èka me te poì i vevaò ia Īa,
E pure ana ma io he koekoe tiàtohu.
TETAUTINA O TE HĀMANI A PAURO PEÀTO I TO FIRIPO 1, 20c-24.27
E tu ù tau tunane tuehine,
20 i tēnei me he mea òmua atu, etià e haakāìètia te Kirito,
ma òto o to ù ènata tiàtohu, e aha à e pohoè au,
e mate nui au.
21 No te aha te pohoè ?
O au à, u pohoè au no te haatahi me te Kirito.
Me mate au, he mea nui te tau taetae e koàna mai.
22 Atià, me pohoè au i te ao nei,
e koàna ia ù te hana no te toko i tahipito.
Aòè au i ìte e aha te mea meitaì no ù.
23 Ua toitia au ma nā kēkē e ùa : te titii i te pohoè o te ao nei
no te haatahi me Ietu Kirito, oia hoì te mea meitaì atu.
24 Atià te noho i te ao nei, oia te mea e hei no te toko ia ôtou.
27 A haaìò i to ôtou hakatu pohoè
vāàna i ta te Evanerio o Ietu Kirito i hakako mai,
etià ia koàna ia ù te tihe io ôtou me te ìtemata,
akoè à u te e koàna ia ù i te tihe io ôtou,
e òno au i te mea ua tohe ôtou
ma òto o te haatià e tahi,
e toko atu toko mai ma he koekoe e tahi
no te haatià me te aotahi i te Evanerio.
ALLELUIA ALLELUIA
cf.145,7.9
U matavaièi te Fatu no tātou paotū. U haataetae i te tau mēmau ta Īa i pēpena ; e hahi te tau ènata paotū i to Īa Toitoi.
EVANERIO O IETU KIRITO VĀÀNA E MATEO 20, 1-16a
I tēia mou pō, u peàu Ietu i to Īa tau kouâ
i tēnei teào haapupuà :
1 U hakatu te Patirēia o te àni me te ènata heifaè
te i uu i vaho i te pōpōuì tika
no te vae i te poì hana no to īa pāpuavino.
2 U haatoitoi īa me te poì hana
no te moni tenario e tahi, ma te â hana e tahi.
Ma hope, u pahi atu ia âtou io to īa pāpua.
3 I te oatea, ua uu i vaho te heifaè.
Ua ìte īa i tahipito e noho aa i no he tohua, hana koè.
4 U peàu īa ia âtou : « A hee atu me ia ôtou
io to ù pāpuavino, e tuu atu au ia ôtou i te moni e hei. »
5 Ua hee atu âtou. I te oatea nui, tū toitoi te òumati,
atii me i te èvatina o te â, ua uu hakaùa i vaho
te heifaè me to īa hana hua mea aneiho.
6 I te ahiahi, ua uu i vaho te heifaè ;
ua ìte īa i tahipito e noho pu aa i no he tohua.
U peàu īa ia âtou : « No te aha to ôtou noho înei,
pō te â, hana koè ? »
7 U haahua âtou :
« Aòè he ènata i hano mai ia mātou no te hana. »
U peàu te heifaè ia âtou :
« A hee me ia ôtou io to ù pāpuavino. »
8 Ia topa te pō,
u peàu te fatu o te pāpuavino i to īa vivini taetae :
« A vevaò òe i te poì hana. A utu i to âtou moni hana,
e tīmata ana ma te poì i hope òa.
O te poì to mua i te paona. »
9 Ua tihe mai te poì hana o te ava ahiahi.
U koàna mai ia âtou e tahi moni tenario.
10 Ia titihe mai to mua poì hana,
u kaituto âtou e nui atu to âtou e koàna mai.
Atià, u koàna mai ia âtou iho tikitahi e tahi moni tenario.
11 E too aa i te moni, u kōhumuhumu âtou i te heifaè.
12 U peàu âtou pēènei : « E tahi hora hana anaè
ta tenā poì te i tihe i te ava paona.
U hakatu to òe utu atu ia âtou
me to mātou te i paòpaò i te hana
ma te â tiàtohu, i to he òumati veàveà. »
13 Atià, u patitoo te heifaè me tītahi o âtou
e peàu ana pēènei :
« E tu ù hoa e, u te e teka au ia òe.
Aòè à i haatoitoi tāua no te tenario e tahi ?
14 A too i ta òe me te hee atu.
U maìmaì au e tuu atu i tenā ènata
te i hana i hope òa, hakatu me te mea i tuutia ia òe.
15 Aòè à e koàna ia ù e hana me ta ù taetae
vāàna e to ù maìmaì ?
Akoè à, u keitani òe mēìa e koekoe vaièi to ù ?
16 Atii te poì i hope òa, e ìò to mua.
O te poì i mua, e ìò i hope òa. »
TOMINIKA TEKAU MA ONO
TETAUTINA O TE PEROFETA EHEKIERE 18, 25-28
25 Atià u peàu ôtou :
Aòè he mea toitoi te hana o te Fatu.
26 A haaòno mai ôtou, e te tau tama o Iraene,
e aha te mea u te e toitoi ?
O to ù hana, akoè à to ôtou iho hana ?
27 Me hukaka te ènata toitoi, e hua i te hana pē,
e mate nui hoì mēìa i to īa ìno nui.
Me fāìu te ènata mikeo i to īa koekoe
no te hua i te meitaì, e pohoè īa.
28 Mēìa u maìmaì īa e hua i te meitaì,
me to īa titii i te mikeo, e pohoè :
u te e mate nui īa.
TARAMO 25 (24),4-5b, 6-7, 8-9
E te Fatu e, a haamaakau i to Òe uē. 25,6
4 E te Fatu e, a haaìte mai i to Òe maìmaì.
O Òe iho, a hakako mai i to Òe tau aanui.
5 A haatee mai to Òe tiàtohu : a haamāàma mai.
O Òe hoì te Etua e haapohoè ia ù.
6 E te Fatu e, a haamaakau i to Òe uē,
Me i kiu mai to Òe kāòha te i noho mau.
7 A haatūhaa i te tau tekateka o to ù houtina,
Umoì e titii atu ia ù nei : a haamaakau mai.
8 U meitaì, u toitoi anaè te Fatu
Te i haaìte i te aanui i te poì hukaka.
9 U aahi to Īa toitoi i te poì haapāpaù,
U hakako i to Īa maìmaì i te ènata kāìè koè.
TETAUTINA O TE HĀMANI A PAURO PEÀTO I TO FIRIPO 2,1-11
E tu ù tau tunane tuehine,
1 ohia he mea tiàtohu i òto o te Kirito
te haaūo atu haaūo mai i te kāòha,
te toko atu toko mai te hoa i te hoa,
te kātahi mai ma òto o te Kuhane Meitaì,
te pakaihi atu, te uē atu uē mai,
2 a tahi a haanui aè ôtou i to ù koakoa
ma te haatūtaì atu tūtaì mai ôtou paotū.
A haapii ôtou i òto o te kāòha,
e haatahi ana i to ôtou koekoe, i to ôtou maìmaì.
3 Umoì e tōtōua atu tōtōua mai, umoì e kāìè pu.
Me te koekoe haapāpaù, a maakau te hoa
e meitaì atu tahipito ia īa iho.
4 Umoì e hano e haameitaì ia ôtou aneiho,
a haameitaì atu haameitaì mai te hoa i te hoa.
5 A haatūtū i to ôtou koekoe me to Ietu Kirito.
6 O te Kirito Ietu hakatu tiàtohu me te Etua.
Aòè Īa e haamau kaikino i te haatūtahi me te Etua.
7 U haakoè pu ia Īa iho.
E too ana i te hakatu o te tāvini,
ua ìò Īa hakatu me te tau ènata.
8 E haa ènata to Īa, ia tiòhi atu,
u haapāpaù iho ma te aotahi atu,
e aotahi aa tihe i te matena, te matena hoì o te peka.
9 Oia te tumu i haatiketike anaè ai te Etua ia Īa
me te apa atu i te inoa ma ùna o te inoa ia ôtoa, ia ôtoa.
10 Etià, ia tani te inoa o Ietu,
e noho muò paotū to te àni, to te fenua, to havaiki.
11 A faì anamai te èo paotū :
« He Fatu o Ietu Kirito », no te haakāìè i te Etua Motua.
ALLELUIA ALLELUIA
Ta.95,8
I tēnei â, umoì tātou e taha kē te koekoe, a apuu tātou i te Teào a te Fatu.
EVANERIO O IETU KIRITO VĀÀNA E MATEO 21, 28-32
I tēia mou pō, u peàu Ietu
i te tau tāuà me te tau kooūa pēènei :
28 « E aha to ôtou maakau ?
Enā te ènata me ta īa tama tokoùa.
U âvei īa me te tama hāmua. U peàu īa pēènei :
« E tu ù tama e, i tēnei â,
a fiti òe i te hana io te pāpuavino. »
29 U haahua atu te tama : « Aòè au e maìmaì. »
Ava poto i muì iho, ua unu to īa koekoe,
ua fiti io te pāpuavino.
30 E âvei aa me te ùa o te tama,
u peàu te motua i hua teào aneiho :
U haahua atu te tama :
« E fiti au i te hana, e te fatu e. »
Atià, u te e fiti īa io te pāpuavino.
31 O ai no nā tama tokoùa nei
te i aotahi i te maìmaì o te motua ? »
U peàu âtou : « O te hāmua. »
U peàu Ietu ia âtou : « Ma te tiàtohu to ù peàu ia ôtou,
o te tau Pupurikano me te tau vehine mako
e tomo ma mua atu ia ôtou i to te Patirēia o te Etua.
32 Ua tihe mai hoì Ioane io ôtou.
U hakako īa i te aanui vāàna e te Etua,
u te e haatià ôtou ia īa.
Atià, u haatià te tau Pupurikano me te tau vehine mako.
O ôtou, e ìte ana i hua mea,
aòè ôtou i unutia ma hope iho no te haatià ia īa. »
TOMINIKA TEKAU MA FITU
TETAUTINA O TE PEROFETA ITAIA 5, 1-7
1 E hīmene au no to ù hoa tāhia
te i haataetae i to īa pāpuavino.
I ùna he tuaivi tapavaù te pāpuavino o to ù hoa.
U haapeehū īa i te èpo, ua taki īa i te tau keâ.
Ua tanu īa i te kuà o te tumuvino.
U haapāpua īa i te pāio fenua me te pākeâ.
I vāvena ahau, u haatū īa i te mōuna no te ènata tiaì.
U kānea īa i te tohua no te òomi i te kāhui vino.
U tetaì īa i te vino mānini :
o te puku kavakava ta īa i koàna mai.
3 I tēnei, e te poì ati Iuta, e to Ierutaremi e,
na ôtou te haatoitoi i te teào :
4 Aòè e àva oti to ù tiòhi meitaì i tu ù pāpuavino ?
U tetaì au i te puku mānini,
umaha i tupu ai te puku kava ?
5 A òno ôtou i to ù teào peê :
E haakoè au i te pākeâ o to ù pāpuavino
etià e vāvahitia e te tau puaa fiō.
E haahutararā au i to īa pākeâ
etià e tekatekahitia me he aanui.
6 E haaìò au ia īa he tohua pāheke moô.
E tupu pu i òto o īa te teitā taataa me te keoho.
Aòè te teitā e vaveetia, aòè te vehie moô e kohitia.
Aòè te ūa e topa no te haakutaù.
7 O te mataèinaa Iraene te pāpuavino o te Fatu.
O te poì ati Iuta te tau tumuvino ta Īa e haataetae.
U tetaì Īa i te hana toitoi, ua ìò he hana pē.
U tetaì Īa i te teào tiàtohu, ua tani te èo haauē.
TARAMO 80 (79),9-10, 13-14, 15-16a, 19a.20
E te Fatu e, a tiòhi ta Òe tumuvino, a haapohoè i to Òe mataèinaa. cf. It.5,7
9 Ua taki mai Òe i te tumuvino me io te Fenua Ekipito.
U tiehi Òe i te tau ati no te tanu i hua tumuvino.
10 U haapeehū Òe i te tuaèpo etià e tupu meitaì īa.
U kotiè to īa tau aka ma he fenua vii pu.
13 No te aha u vāvahi Òe i to īa pākeâ ?
Ua too pu i te puku te ènata e taha aa.
14 Ua faotia e te tau puaa fiō.
Ua kai mamape ia īa te ânimara fiō.
15 E te Etua mana nui e, a matavaièi mai.
A tiòhi Òe me io he àni, a ìte meitaì.
16 A toko i te tumuvino tanutia e to Òe ìma,
I te huì na to Òe mana i haatupu.
19 Koè nui e paekē mātou me io Òe.
A haapohoè mai, e hahi mātou i to Òe inoa.
20 E te Fatu mana nui e, a haahua ia mātou i te meitaì,
A matavaièi mai, e haapohoètia mātou.
TETAUTINA O TE HĀMANI A PAURO PEÀTO I TO FIRIPO 4,6-9
E tu ù tau tunane tuehine,
6 umoì e haapaòpaò pu ia ôtou iho.
I tēia ava, i tēia ava, a haahuaèkaèka i te Fatu.
Ma òto o te pure vevaò, a ùtuna atu i te Etua i to ôtou apetina.
7 Ia noho i òto o ôtou te moû me io te Etua,
e haametaù koè to ôtou koekoe me te kuhane
i òto o Ietu Kirito.
O hua moû te i iho mai me io te Etua,
u te e koàna i te ènata te haavivini mai.
8 E tu ù tau teina e,
a haataetae ôtou me te haamau io he koekoe
i te mea tiàtohu me te mea taìtaì,
i te mea toitoi me te mea kanahau,
i te mea poèa me te mea haaòno nui i te ènata,
haameitaì to īa hakatu pohoè me te haakāìè ia īa.
9 A hana ôtou vāàna i te mea u hakako au ia ôtou,
ua tuu au nei ia ôtou, ua ìte ôtou ua hana au,
ua òno ôtou me io tu ù fafa.
Ma èià, e noho me ôtou te Etua te i vaièi mai i te moû.
ALLELUIA ALLELUIA cf. Hep.1,2 - Mt.21,42
I tēnei â, u teào mai te Etua ma io to Īa Tama, te Fatu o te tau mēmau ia ôtoa. Oiana te hana o te Fatu.
EVANERIO O IETU KIRITO VĀÀNA E MATEO 21, 33-43
I tēia mou pō,
u peàu Ietu i te tau tāuà me te tau kooūa pēènei :
33 « A haaòno ôtou i te teào haapupuà kē.
Enā tītahi fatu fenua te i tanu i te maavino.
U pāpua ia īa, u kānea īa i te faè òomi i te kāhui vino ;
i òto, u haatū i te mōuna. Ua tuu i hua pāpuavino
i te poì hana. I muì iho, ua naò īa i te fenua memao.
34 Ia tata èka te ava no te kohi i te puku,
ua pahi te fatu fenua i to īa tau pahinaèo
io te tau ènata tiòhi i te pāpua
no te haakoàna mai i te tau puku.
35 Atià, u popoì te poì hana i te tau pahinaèo,
ua tā âtou i tītahi, u ùumi i tītahi,
ua pehi me te keâ haamate i tītahi.
36 U pōpahi hakaùa te fatu fenua i tahipito pahinaèo kē,
nui atu i to mua. U haapētia âtou me he mea i to mua.
37 I te paona, u pōpahi te fatu fenua i ta īa iho tama,
e peàu aa : E pakaihi âtou i tu ù tama.
38 Atià, ia ìte te poì hana i te tama,
u peàpeàu atu peàpeàu mai âtou :
« O īa te tama o te fatu fenua.
A pau. A haamate tātou ia īa.
E ìò mai to īa pāpuavino ia tātou. »
39 U popoì âtou i te tama, u titii i vaho o te pāpua
me te ùumi haamate ia īa.
40 Ia hua mai te fatu pāpuavino,
pēhea ta īa i tenā poì hana ?
41 U haahua atu âtou : « E haamate i tenā poì mākaka.
E vae īa i te tau poì hana kē
no te tiòhi meitaì i to īa pāpuavino.
E tuu âtou i te tau puku ia īa i te ava e hei. »
42 U peàu Ietu ia âtou :
« Aha, aòè ôtou i tetau i to he Hāmani tapu ?
O te keâ i titiitia e te poì
haatū i te faè, ua ìò īa he keâtaa.
Oiana te hana o te Fatu. E hana mana ia tiòhi atu.
43 No èià, ua faì atu au ia ôtou :
e takitia te Patirēia o te Etua me io ôtou,
e tuutia i te mataèinaa na īa e haahua i te tau puku. »
TOMINIKA TEKAU MA VAÙ
TETAUTINA O TE PEROFETA ITAIA 25, 6-9
6 Ia tihe te â, na te Fatu Etua o te aomāàma
e kānea i te kainamau ma ùna o to Īa tuaivi
no te tau mataèinaa ia ôtoa.
E tuha Īa i te kiko kerehi, te vino mānini,
te înaì mōmona, te vino oko nui.
7 E taki te Etua i te kahu uē ;
e haauhi Īa i te tau ènata ia ôtoa.
E haakoè Īa i te kahu tomina tūpāpaù
e fāfī ana i te tau mataèinaa paotū.
8 E haahina pao te Etua i te matena.
E haamaha te Etua i te vaimata no te tau ènata uēuē.
E haakoè te Etua i te mea haamee
i to Īa mataèinaa ma nā fenua vii pu.
Oia hoì to Īa teào.
9 Ia tihe te â, e peàutia pēènei : « O Īa to tātou Etua.
U tetaì tātou ia Īa : u haapohoè mai.
O Īa te Fatu. U haatià tātou ia Īa.
A èkaèka, a koakoa tātou.
O te Fatu te i haapohoè mai. »
TARAMO 23 (22), 1-2b, 2c-3, 5, 6
E te Fatu e, e noho au pii me Òe no to ù pohoè anatu.
1 O te Fatu to ù Tiaì meitaì,
E aha te mea e toe ?
2 U aahi mai te Fatu no te hakaēa
Io te pāpua pī i te mutiē hou.
U aahi mai te Fatu io te punavai.
3 I èià, u haahoutia to ù pohoè.
U haatee mai Īa ma he aanui toitoi
No te kāìè o to Īa inoa.
4 No tu ù taha ma he vao maù nui,
Aòè au e haametaù i te ìno.
I èià o Òe me au nei, e te Fatu e.
O to Òe tootoo te i aahi mai me te moû.
5 E te Fatu e, ua tuu mai Òe i te oà
I mua o te tau ènata e haatōtōua me au.
Ua paù Òe i tu ù upoo me te kao.
U haakoakoa mai te hope taetae tuutia mai.
6 Te koakoa me te èkaèka me au nei
Ma te òa o to ù pohoètina.
E noho au io te faè o te Fatu
Ma te nuitina o to ù tau â.
TETAUTINA O TE HĀMANI A PAURO PEÀTO I TO FIRIPO 4, 12-14.19-20
E tu ù tau tunane tuehine,
12 ua hani au i te pohoè me he ènata tapavaù,
akoè à te ènata io he àì, e kai haamāòna paotū te â,
ma te nui o te tau â o te kaikai koè.
Ua ìte au i te hakatu o te ènata pī i te taetae,
atii me to te mātua veve nui.
U haamāàma mai te tau hakatu kē o to ù pohoè.
13 E aha à te mea e tihe mai, e àva to ù ìi
mēìa e toko te Kirito ia ù.
14 Atià, he mea kanahau to ôtou tiòhi meitaì ia ù
no te toko mai i te ava o to ù àì nui.
19 Me io to Īa tapavaù nui i òto o te Kirito,
e tuu te Etua ia ôtou i te tau mēmau ia ape ôtou.
20 A hahitia anatu te Etua, to tātou Motua,
ma te tau tai a tihe anatu. Amene.
ALLELUIA ALLELUIA
Eīa te Pakate o te Fatu i vāvena o to Īa mataèinaa. Mamau te poì te i vevaòtia no te kaimau me te Etua.
EVANERIO O IETU KIRITO VĀÀNA E MATEO 22, 1-14 (22,1-10)
I tēia mou pō,
1 u pohā te èo o Ietu me to Īa peàu hakaùa
i te teào haapupuà i te tau tāuà me te tau kooūa, pēènei :
2 « E ìò te Patirēia o te àni hakatu me tītahi hakaìki
te i kānea i te kainamau no te koìna mātiri o ta īa tama.
3 U pōpahi īa i to īa tau keèe no te vevaò atu
i te tau ènata i vaetia.
Atià, aòè âtou i maìmaì e tihe mai.
4 U pōpahi hakaùa te hakaìki i tahipito keèe
no te peàu i te poì vevaòtia, pēènei :
« U kāneatia to ù kainamau.
U ùumitia te tau pifa, te tau puaa taùtaù.
U peipeitia te mēmau paotū. A mai i te koìna. »
5 Atià, u te e haaòno âtou. Ua hee âtou nui,
tītahi i to īa iho pāpua, tītahi i to īa faèhoko.
6 U popoì tahipito i te tau keèe,
u haamākaka me te haamate ia âtou.
7 U peê te hakaìki. Ua pahi īa i to īa fatu kape
no te haamate i hua tau ènata mākaka,
no te haapūovo me te ahi i to âtou pāpuafaè.
8 I muì iho, u peàu te hakaìki i to īa tau tāvini :
« Ua pei te koìna. Atià, u hei koè te poì vevaòtia.
9 A hee atu ôtou io te tau tohua.
A vevaò ôtou no te koìna i te tau ènata paotū
ta ôtou i koàna mai. »
10 U tetaha atu te tau tāvini ma no he tau aanui,
me to âtou haatihe mai i te poì paotū ta âtou i koàna mai :
te poì pē me te poì meitaì.
Ua pī te faè koìna i te tau hoakai.
11 A tahi a tihe te hakaìki no te kāòha i te tau hoakai.
Ua ìte īa i te ènata aòè i uhi mai i to īa kahu koìna.
12 U peàu ia īa : « E te hoa e, pēhea òe i tomo mai nei,
aòè òe i uhi mai to kahu koìna ? » Ua mutu te ènata.
13 U peàu te hakaìki i te tau tāvini :
« A humu i nā vaevae me nā îima o hua ènata
no te titii i vaho, i to he pō pōtano.
I èià te uē me te haatetei i te niho.
14 U vevaòtia hoì te tau ènata nui, nui oko.
He mea iti te huaa i tihe mai. »
TOMINIKA TEKAU MA IVA
TETAUTINA O TE PEROFETA ITAIA 45, 1.4-6a
1 He Teào na te Fatu ia Kiruto,
te hakaìki ta te Etua i vevaòtia,
paùtia me te kao tapu, aahitia ma te ìma,
no te haaìò ia īa te vivini o te tau mataèinaa,
no te haahina i te tau hakaìki paotū,
no te kānea i te tau aanui ma mua o te Fatu.
Aòè hoì e tahi avaputa te pā i mua o te Fatu.
4 Oia nei te Teào o te Fatu :
« E haamaakau ana ia Iakopo, to ù tāvini, ia Iraene ta ù i vae,
u vevaò au ia òe ma to òe inoa, e Kiruto e.
Ua tuu au ia òe i te hakaìkitina i te ava aòè i ìte òe ia ù.
5 O au te Fatu. Aòè tītahi fatu kē.
Aòè te ètua kē. O au anaè te Etua.
Ua tuu au i te mana ia òe, e aha à u te e ìte òe ia ù,
6 etià e puàha no te tau ènata ia ôtoa
me i te kēkē tihena o te òumati
tihe atu i te kēkē naòna o te òumati : o au anaè te Etua.
Umoì au nei, he mea tupepaka te tau mēmau paotū.
TARAMO 96 (95) 1a.3, 4.5b, 7-8a, 9a.10ac
E te Fatu e, ia Òe te kāìè me te mana a tihe anatu. 96,7
1 A hīmene no te Fatu i te hīmene hou.
3 A haaòno nui i to Īa haapohoètina,
A hano a faì atu i te tau mataèinaa,
I te tau ènata paotū to Īa tau hana mahaò.
4 U tiketike te Fatu. A haakāìè nui ia Īa.
A hahi i te Fatu ma ùna atu o te tau ètua paotū.
5 O te Fatu à, u kānea Īa i te ataàni.
7 E te tau mataèinaa e, a hua io te Fatu,
A hua io te Fatu me te kāìè me te mana.
8 A haakāìè i te inoa o te Fatu.
9 A atoratio i te Fatu, pōnionio i te peàto nui.
10 A haaìte atu i te tau êteni : o te Fatu te Hakaìki.
E vivini Īa me te toitoi i te tau mataèinaa.
TETAUTINA O TO MUA HĀMANI I TO TETARONIKA 1, 1-5
1 O Pauro, o Tirana me Timoteo,
o te Èkaretia èka aa i te Fenua Tetaronika,
te i òto o te Etua Motua, te i òto o te Fatu Ietu Kirito.
Ia ôtou te karatia me te moû.
2 U te e hakaēa mātou e haahuaèkaèka i te Etua
mēìa ia ôtou paotū,
e kaituto ana ia ôtou ma òto o to mātou pure.
3 I te aò o te Etua, to mātou Motua,
u haamaakau anatu mātou i to ôtou haatià
te i hana i te nuitina o te tau hana meitaì,
to ôtou kāòha paòpaò koè e aha à te tau kōfii,
atii me to ôtou tetaìtina e tohe mau
i òto o to tātou Fatu Ietu Kirito.
4 E te tau tunane tuehine haataetaetia e te Etua,
ua ìte mātou o ôtou tahipito
i vāvena o te tau ènata vaetia e Īa.
5 Na te mea, u haaìte mātou i te Evanerio ia ôtou,
aòè ma te teào anaè, atià ma te tau hana mana,
te vaièitina o te Kuhane Meitaì,
te koekoe haatià haametaù koè.
Ua ìte ôtou e aha to mātou hana no to ôtou meitaì,
i vāvena ahau o ôtou.
ALLELUIA ALLELUIA cf. Tar 29,1-2
A haahuaèkaèka i te Fatu ôtou, e te tau ètua, A haameitaì me te hahi i te mana nui o te Fatu.
EVANERIO O IETU KIRITO VĀÀNA E MATEO 22, 15-21
15 I tēia mou pō, ua hee atu te tau Fariteo me to âtou hakatoo
e hano haatukee ia Ietu ma òto o to Īa teào.
16 Ua pahi âtou io Ietu i to âtou tau kouâ
atii me te poì kē me Herote no te peàu pēènei :
« E Tuhuna e, ua ìte mātou he ènata teào tiàtohu òe.
U hakako òe i te aanui o te Etua ma te tiàtohu,
aòè òe e haametaù i te tau ènata,
na te mea u te e tiòhi òe i to âtou hakatu ma vaho.
17 A faì mai i to òe maakau :
Aha e hana meitaì, akoè à hana pē
te utu ia Ketare i te moni peàutia ?
18 E ìte ana Ietu i to âtou maakau haatukee ia Īa,
u peàu pēènei : « E te poì koekoe e ùa !
No te aha ua hano ôtou e haahiiveke mai ia ù ?
19 A haaìte mai i te moni i haaheitia no te utu. »
Ua àvetia mai io Īa e tahi moni tenario.
20 U peàu Ietu ia âtou :
« No ai tēnei ata ? O ai te inoa ? »
21 U haahua atu âtou : « No Ketare. »
A tahi a peàu Ietu ia âtou :
« A tuu atu ia Ketare ta Ketare.
A tuu atu i te Etua ta te Etua. »
TOMINIKA E TOÙ ÒNOHUU
TETAUTINA O TE HĀMANI A MOITE PEÀUTIA EHOTO 22,20-26
20 Umoì e mākaka òe i te hāoè e noho aa io to òe fenua,
aua e haapaòpaò pu ia īa me te hana tono.
A haamāmaakau i to ôtou tau tupuna
te i haamōèhutia io te Fenua Ekipito.
21 Aua e mākaka ôtou i te vehine pōpī,
i te tau tama motua koè, kui koè.
22 Me uēuē âtou, e taaàu aa io ù,
e òno au i to âtou uēuē.
23 Mēìa i tu ù peê, e ùumi au ia ôtou me te kohetā.
E haaìò au e motua koè ta ôtou tau tama,
e vehine pōpī ta ôtou tau vehine.
24 Me àiê i te moni io òe tītahi me io tu ù mataèinaa,
te ènata veve me i vāvena o to ôtou tau tunane tuehine,
umoì òe e kamo ma te haanui atu i to īa àiê.
25 Me too mau òe i te kahu uhi pu o te hoa
no te utu i to īa àiê,
ma mua e naò te òumati, a haahua atu i to īa kahu uhi pu.
26 Oia anaè to īa kahu uhi pu no te pō, to īa moena no te hiamoe.
No to īa taaàu io ù, e òno au i to īa èo uēuē,
e hakāòha nui hoì au.
TARAMO 18 (17) 2-3, 4.20, 47.51ab
E te Fatu e, u haataetae au ia Òe. O Òe hoì tu ù ìi, tu ù motukeâ. 18,2
2 E te Fatu e, u haataetae au ia Òe.
O Òe hoì tu ù ìi, tu ù motukeâ.
3 O Òe tu ù Etua, to ù taha maù,
To ù mōuna, to ù kohetā io te tōua.
4 A hahitia te Etua.
Ia vevaò au i te Fatu, na Īa e haapohoè mai.
20 Na te Fatu i haatee mai me i te taha memao.
U haapohoè mai mēìa i to Īa haataetae ia ù.
47 A pohoè te Fatu Etua. A meitaì Īa, to ù motukeâ.
A kāìè te Etua te tumu o to ù koakoa.
51 U haanui te Fatu i te kāìè o to Īa hakaìki,
Ua toko anatu i to Īa Metia, o Tavite,
Atii me to īa huaa no te tau tai a tihe anatu.
TETAUTINA O TO MUA HĀMANI I TO TETARONIKA 1, 5c-10
E tu ù tau tunane tuehine,
5 ua ìte ôtou e aha to mātou hana no to ôtou meitaì,
i vāvena ahau no ôtou.
6 O ôtou à, ua ìò ôtou hakatu me mātou nei atii me ta te Fatu.
U apuu hoì ôtou i te Evanerio,
e aha à te nuitina o te mea haaveke,
e haakoakoa ana te Kuhane Meitaì ia ôtou.
7 Ma èià, ua ìò ôtou he hakatu toitoi no te poì haatià paotū
o te Fenua Maketonia me te Fenua Akaia.
8 Me io ôtou, u mevaha te Teào o te Fatu
i te Fenua Maketonia me te Fenua Akaia.
Ua ìte te tau fenua paotū i te òno nui o to ôtou haatià.
Aòè na mātou te haaìte atu.
9 I te ava hoì e teào te tau ènata paotū i ùna o mātou,
u peàu âtou i te hakatu kanahau o to ôtou apuu mai,
pēhea u titii ôtou i te tau ètua tīkoe
no te fāìu io te Etua, e tāvini i te Etua pohoè, Etua tiàtohu,
10 e tetaì ana a iho mai me io he àni ta Īa Tama,
te Tama ta Īa i haatū hakaùa me i vāvena o te poì mamate,
o Ietu, te i haapohoè ia tātou me io te peê a tihe ai.
ALLELUIA ALLELUIA
1 In.4,8.7
He kāòha te Etua. O te ènata i kāòha i te hoa, he tama īa o te Etua, ua ìte īa i te Etua.
EVANERIO O IETU KIRITO VĀÀNA E MATEO 22, 34-40
I tēia mou pō,
34 ohia ua òno te tau Fariteo u haamutu Ietu
i te tau Tatuteo, u haaputuputu âtou.
35 Enā tītahi me i vāvena o âtou, he tuhuna teào īa,
ua ūi atu ia Ietu e hano haaveke ia Īa, pēènei :
36 « E Tuhuna e, o te teào hea te teào taetae aè
i vāvena o te tau teào paotū te io te Ture o Moite ?
37 U peàu Ietu : « A kāòha òe i te Fatu to òe Etua,
ma io he koekoe, ma io he kuhane, ma io he ènata tiàtohu.
38 Oia nei te teào taetae nui, o to mua teào.
39 Ua tūtū me īa te ùa o te tau teào, pēènei :
A kāòha òe i te hoa me he mea ia òe aneiho.
40 O nā teào e ùa nei te tumu tiàtohu
o te Ture me te tau Perofeta paotū. »
TOMINIKA E TOÙ ÒNOHUU MA TAHI
TETAUTINA O TE PEROFETA MARAKIA 1, 14b--2,1.2b.8-10
14 O au te Hakaìki nui,
u peàu te Fatu o te aomāàma nei vii pu.
Ua hopo te tau mataèinaa i to ù inoa.
2, 1 E te tau tāuà, no ôtou iho te teào oonaì nei :
2 Oia nei to ù teào, o au te Fatu o te aomāàma :
Me ìò to ôtou ūo koè no te haakāìè i tu ù inoa,
e haaìno au ia ôtou, me te haameìe i to ôtou teào haapeàto.
8 Ua taha ôtou ma no he aanui hukaka ;
ua teka to ôtou hakako i te Ture a Moite,
oia te piò ua hana i te hana pē
te nuitina o te tau ènata.
U haakoè ôtou i to ù Piimau me te ati o Revi.
Oia te Teào o te Fatu o te aomāàma vii pu.
9 Na ù iho i haamee me te haahakaìna ia ôtou
i mua o te mataèinaa tiàtohu,
mēìa u te e taha ôtou ma io tu ù aanui.
Ua teka ôtou ma te haavivini i te ture a Moite. »
10 O mātou à, te mataèinaa a te Etua.
Aòè à e Motua e tahi ta mātou ?
Aòè à e Etua e tahi te i pēpena mai ?
E aha te piò e tīkoe atu tīkoe mai te hoa i te hoa
me te haakoè i te Piimau o to tātou tupuna ?
TARAMO 131 (130), 1, 2, 3
E te Fatu e, a apuu Òe i òto o te moû i tu ù kuhane.
1 E te Fatu e, u te e kāìè pu to ù koekoe.
Aòè e hakatu tu ù mata me to te hakaìki.
Aòè au e hano i te māàma hōhonu.
U te e kōhoà au i te hana mahaò.
2 U òomi au i te tau hīa pē o te tino.
U atenoho tu ù kuhane me te moû.
U hakatu au me te tama hou,
E moe ana io he pūhāîima o to īa kui.
3 E te mataèinaa Iraene, a tetaì òe i te Fatu,
I tēnei atii ma te tau tai a tihe anatu.
TETAUTINA O TO MUA HĀMANI I TO TETARONIKA 2, 7b-9.13
E tu ù tau tunane tuehine,
7 me ôtou, ua pī to mātou koekoe i te moû,
me he mea a te kui e tāfai aa i to īa tau tama hou.
8 Atii, mēìa i to mātou kāòha ia ôtou,
u maìmaì mātou e tuu atu i te Evanerio a te Etua.
Aòè te Evanerio anaè,
e vaièi atu me i to mātou iho pohoè.
U haatāhia hoì mātou ia ôtou.
9 E tu ù tau tunane tuehine, u haamāmaakau ôtou
i to mātou hana haapaòpaò mai.
U hakako mātou ia ôtou
i te Teào Meitaì Hou Mai me io te Etua,
e hana îima aa me i te â, me i te pō,
etià u te e tāfai mai ôtou.
13 Oia nei te tumu aòè mātou e hakaēa
i te haahuaèkaèka i te Etua,
mēìa i te ava ua àvetia mai io ôtou te Teào o te Etua,
u apuu ôtou i hua teào, aòè me he teào ènata,
atià me he Teào a te Etua. Oia aneiho ta Īa.
U haaìte hoì te Etua i te mana o hua Teào
te i hana i òto o ôtou, e te poì haatià.
ALLELUIA ALLELUIA
cf. Mt.23,9-10
E tahi anaè to ôtou Motua, te io he àni. E tahi anaè to ôtou Tuhuna, o te Kirito.
EVANERIO O IETU KIRITO VĀÀNA E MATEO 23, 1-12
1 I tēia mou pō, u peàu Ietu i te faètoa,
atii me to Īa tau kouâ, pēènei à :
2 « I ùna o te nohona o Moite, u kaapee
te tau tuhuna teào me te tau Fariteo.
3 A aotahi atu ia âtou, a hana vāàna i ta âtou i hakako mai ;
atià, umoì e haaìò i to ôtou hakatu pohoè me he mea o âtou.
He mea kē hoì to âtou hakako, he mea kē te hana.
4 U haapuke me te humu o âtou i te tau amona tono,
ua tuu ma ùna o te paufifi o te tau ènata ;
atià, u te e hapai me to âtou iho manamana ìma.
5 Ua hana âtou i to âtou tau hana paotū
i mua o te tau ènata etià e haakāìètia âtou.
U haafātea âtou i te tapa tāmautia
i ùna o to âtou àe, i ùna o to âtou pūhāîima.
U haaòa atu i te taì o to âtou kahu uhi pu.
6 U kōhoà âtou i te kōava haakāìè io te kainamau,
atii me te nohona to mua i òto o te tau tinakoka.
7 U kōhoà âtou e kāòha te tau ènata ia âtou i no he tohua,
e apatia âtou i te inoa o Rapi.
8 O ôtou, umoì e apa te tau ènata ia ôtou i te inoa Rapi,
na te mea e tahi anaè to ôtou Vivini.
He tau tunane tuehine ôtou nui.
9 I te ao nei, umoì e apa ôtou i tītahi ènata i te inoa Motua,
na te mea, e tahi anaè to ôtou Motua te io he àni.
10 Umoì e apa te tau ènata ia ôtou i te inoa Tuhuna,
na te mea, e tahi anaè to ôtou Tuhuna, o te Kirito.
11 O te ènata tiketike atu i vāvena o ôtou,
a ìò īa he tāvini no ôtou.
12 O te ènata te i haatiketike ia īa aneiho, e haapāpaùtia.
Te ènata e haapāpaù ia īa iho, e haatiketiketia.
TOMINIKA E TOÙ ÒNOHUU MA ÙA
TETAUTINA O TE HĀMANI A TE MĀÀMA 6, 12-16
12 U pupuà te Māàma, aòè īa e huìkē.
Me haataetae te ènata ia īa,
he mea māeà te haakoàna mai,
he mea māeà te hakako ia īa.
13 Ua tū anamai te Māàma i mua o te tau ènata e kōhoà ia īa,
u haaìte ia īa iho i te ènata e ìmi nei.
A ìmi ia īa i te pōpōuì, aòè òe e paòpaò.
E koàna ia òe te Māàma
e kaapee ana i te avaputa o to òe faè.
14 A kaituto ia īa anaè, me i te â, me i te pō,
oia te hakatu toitoi o te ènata koekoe māàma.
15 A matavaa i uē ia īa ; ma èià, e koè ai
te mea haapaòpaò ia òe.
16 U taha atu taha mai te Māàma no te ìmi
i te tau ènata e hei no te haakē me īa.
Ua ìtetia ma he aanui me te mata kata.
A haamaakau ia īa, ponihoo to īa âvei me òe.
TARAMO 63(62),2, 3-4,5-6, 7-8
E te Etua e, e ìmi nei tu ù kuhane ia Òe.
2 E te Etua e, o Òe tu ù Etua.
I te pōpōuì tika, e ìmi nei au ia Òe.
O Òe te hīa o to ù kuhane me i te tino,
Me he mea ua mao i te vai te èpo paka meô.
3 Ua ìte au ia Òe i òto o te taha tapu,
U tiòhi mata au i to Òe mana me te kāìè.
4 Te hinenaò ia Òe, u meitaì atu i te pohoè,
Te hahi ia Òe, to ù tanitina èo anaè.
5 Ma te òa o to ù pohoè, e haameitaì au ia Òe.
U hapai au i to ù îima e hahi ana i to Òe inoa.
6 U koakoa hoì au me he ènata maòna i te kai mōmona.
Me te mata kata e hīmene au no te hahi ia Òe.
7 I te pō, e moe ana, u maakau au ia Òe,
He òa oko to ù pure vevaò ia Òe.
8 Ua tihe hoì Òe no te toko mai.
I to Òe aò, u hīmene au me te koakoa.
TETAUTINA O TO MUA HĀMANI I TO TETARONIKA 4, 13-18
13 E tu ù tau tunane tuehine,
u maìmaì mātou e ìte ôtou ma te tiàtohu
e aha te hakatu o te tau ènata te i mamate,
etià umoì e kuhane koè ôtou,
me he mea ta te poì u te e tetaì i te Etua.
14 U haatià tātou i te mea ua mate Ietu, ua tū hakaùa Īa.
Atii hoì, u haatià tātou i te mea e ìò hua mea aneiho
no te tau ènata te i moe e haatià ana ia Ietu.
Na te Etua e haatahi ia âtou me te Fatu Ietu.
15 U hakako mātou ia ôtou vāàna i to te Fatu teào :
O tātou te i pohoè i te ava o te Huatina o te Fatu,
u te e âvei tātou me Īa ma mua o te huaa mamate.
16 E ònotia te èo. E taaàu te Hakaìki anera.
E tani te pū o te Etua.
E iho mai me io he àni te Fatu aneiho.
E tū pohoè hakaùa te tau ènata te i mamate,
e haatià aa i te Kirito.
O âtou to mua e pohoè hakaùa.
17 I muì iho, tātou te i pohoè nei,
e hapaitia tātou me âtou nātoa, i òto o te ao,
no te haaâvei me te Fatu io he ataàni.
Ma èià, e haapii tātou me te Fatu no te tau tai anatu.
18 A haamau io he koekoe i hua teào ta ù i peàu nei.
A haaoho i te ìi te hoa i te hoa.
ALLELUIA ALLELUIA
Mt.24,42.44
A matavaa ôtou, na te mea aòè ôtou e ìte i te ava afea e tihe mai te Tama a te ènata.
EVANERIO O IETU KIRITO VĀÀNA E MATEO 25, 1-13
I tēia mou pō,
u peàu Ietu i to Īa tau kouâ i tēnei teào haapupuà :
1 E ìò te Patirēia o te àni
hakatu me he tīònohuu pāhoè te i too i ta âtou àma
no te hee haaâvei me te āhana hou.
2 Tokoìma i vāvena o âtou, he tau pāhoè pupure,
tokoìma, he tau pāhoè māàma.
3 O te tau pupure hoì,
e too aa i ta âtou àma, u te e too i te kao.
4 O te tau pāhoè māàma,
ua too âtou i te àma me te kao i òto o te tau hue.
5 Ohia u haatevee te āhana i te tihe mai,
ua tau te hiamoe me te hiamoe o âtou paotū.
6 I te tūmoe nui, ua ònotia te èo e taaàu aa :
« Te āhana. I vaho. A apuu ia īa. »
7 A tahi a aa te tau pāhoè paotū me te haapeipei i ta âtou àma.
8 U peàu te tau pupure i to âtou tau hoa māàma :
« A tuu mai ôtou i tītahi mea kao,
u tāmiomio hoì ta mātou àma. »
9 U peàu te tau pāhoè māàma pēènei :
« Aòè e ava te kao no tātou.
A hee io te faèhoko. A hoko atu ta ôtou kao. »
10 Atià, e tetaha aia âtou i te kao hoko mai,
ua tihe te āhana.
O te tau pāhoè te i peipei,
ua tomo me īa i òto o te pāòto koìna. Ua pā īa i te avaputa.
11 I muì iho, ua tihe mai te tau pāhoè pupure.
U peàu âtou : « E te fatu e. E te fatu e. A pepeù mai. »
12 Atià, u haahua atu īa :
« Ma te tiàtohu to ù peàu ia ôtou : aòè au i ìte o ai ôtou. »
13 U peàu Ietu pēènei :
« A matavaa ôtou
na te mea, aòè ôtou e ìte i te â, i te ava. »
TOMINIKA E TOÙ ÒNOHUU MA TOÙ
TETAUTINA O TE HĀMANI TOUMAKI 31, 10-13.19-20.30-31
10 O ai te i ìte i te vehine oko ?
Taetae atu īa, taetae aè i te tau matauhi.
11 E haatià ta īa āhana ia īa :
e haatapavaù hua vehine i to īa faè,
aòè e koè ta īa tau mēmau.
12 Ma te tau â paotū, e haamemao īa i te àì
me to īa haapuke i te tau taetae.
13 U kānea īa iho i te tau haìna kahu,
aòè to īa nā îima e hakaēa i te hana.
19 U àana īa i te moena, ua nino i te puu.
20 U pepeù i nā îima no te tuu i te ènata kaiape,
u haaànaàna i te poì uē.
30 Te pootu ? He mea avai noa.
A haameitaìtia te vehine i pakaihi i te Etua.
31 Ua oko nui te teào o ta īa hana îima.
Ua hahitia ma he pāpuafaè te kanahau o to īa pohoè.
TARAMO 128 (127) 1-2, 3, 4.5c.6a
Mamau te tāvini toitoi, cf.Mt.25,21
e haatū te Fatu ia īa he vivini no to īa faè toa nui.
1 Mamau te ènata e pakaihi i te Fatu,
E aotahi aa i to te Etua teào.
2 E tāfaitia òe e te hana o to òe îima :
Mamau òe. A noho te koakoa io òe.
3 Io he faè, ua noho ta òe òna vehine
Hakatu me te tumuvino pī i te tau puku.
Ta òe mou tama vii pu o te tapukai,
E tū aa me he maa tumuâkau oriveti.
4 Oia te taetae e vaièitia ai i te ènata e pakaihi i te Fatu.
E haameitaì ia òe te Etua o Iraene.
5 Ma te tau â paotū o to òe pohoètina,
6 A ìtemata i to òe tau poopuna i ùna aè.
TETAUTINA O TO MUA HĀMANI I TO TETARONIKA 5, 1-6
E tu ù tau tunane tuehine,
1 afea, e aha te ava o te Huatina mai o te Fatu ?
E tu ù tau tunane tuehine,
aòè e ape mai ôtou no te peàu atu.
2 Ua ìte meitaì ôtou : e tihe mai te â o te Fatu
me he ènata kamo i te pō.
3 Ia peàu te tau ènata : u menino paotū, tuìtuì koè te fenua,
a tahi a topa anamai te ìno i ùna o âtou
me he mea ua hemo i te memae te vehine ôpū tama.
Aòè e koàna ia âtou te hiki atu.
4 O ôtou, e tu ù tau teina e,
aòè e tūtū ôtou me te poì e noho nei io te pō pōtano.
Umoì ôtou e kiiete ia tihe pu anamai te â,
me he mea o te ènata u popoìputia e te poì kamo.
5 O ôtou paotū, he tau tama o te māàma, tau tama o te oatea.
Aòè tātou me he poì noho aa io he pō pōtano.
6 No èià, aua tātou e hiamoe me he mea o tahipito.
A matavaa, a atekai tātou.
ALLELUIA ALLELUIA cf. Ap.22,12
Eīa a tihe mai te Fatu, aòè te haatevee, àve mai aa i te tuki o te tau ènata titikitahi, vāàna i to īa hana.
EVANERIO O IETU KIRITO VĀÀNA E MATEO 25, 14-30
I tēia mou pō,
u peàu Ietu i to Īa tau kouâ i tēnei teào haapupuà :
14 E ìò te Patirēia o te àni
hakatu me tītahi ènata e hee aa e vii i te fenua.
U vevaò īa i to īa tau tāvini
me to īa tuu ia âtou i ta īa tau taetae.
15 Ua tuu īa i tītahi e ìma moni tareni, i tītahi e ùa moni tareni,
i tītahi e tahi moni tareni anaè. Ua tuu hoì ia âtou tikitahi
vāàna i to âtou māàma. I muì iho, ua hee atu īa.
16 O te ènata te i koàna mai ia īa e ìma tareni,
ua hana ponihoo me âtou. Ua ìò ia īa e ìma tareni kē.
17 Hua mea aneiho ta te ènata te i koàna mai ia īa e ùa tareni.
Ua ìò ia īa e ùa tareni kē.
18 Atià, o te ènata te i koàna mai ia īa e tahi tareni,
ua keì īa i te ùa io he èpo
me to īa hakanā i òto i te tareni a to īa fatu.
19 Ava òa ma hope iho, ua tihe mai te fatu o hua tau tāvini.
Ua hano īa e haatoitoi i te teào me âtou.
20 U haatata mai te tāvini te i koàna mai e ìma tareni.
U haaìte atu īa e ìma tareni kē, e peàu ana :
« E te fatu e, ua tuu mai òe e ìma moni tareni.
Enā e ìma tareni kē i koàna mai ia ù.
21 U peàu to īa fatu pēènei :
« He mea meitaì, e te tāvini toitoi, teka koè.
Ua hana meitaì òe no te mea iti noa, enā e haatū au ia òe
he vivini o te nuitina o te tau taetae.
A mai. A koakoa òe me to òe fatu. »
22 U haatata mai te tāvini me nā e ùa tareni.
U peàu īa : « E te fatu e, ua tuu mai òe e ùa moni tareni.
Enā e ùa tareni kē te i koàna mai ia ù. »
23 U peàu to īa fatu :
« He mea meitaì, e te tāvini toitoi, teka koè.
Ua hana meitaì òe no te mea iti noa, enā e haatū au ia òe
he vivini o te nuitina o te tau taetae.
A mai, a koakoa òe me to òe fatu. »
24 U haatata mai me te tāvini
te i koàna mai ia īa e tahi moni tareni.
U peàu īa pēènei : « E te fatu e. Ua ìte au ia òe.
He ènata mahioko òe
te i kohi i te puku me io te taha aòè i tanutia te kākano.
U haapuke òe i te taetae
me io te taha i èià u te e tuhatia òmua tītahi mēmau.
25 Mēìa i te haametaù,
u hakanā au io he èpo i ta òe tareni. Enā ta òe taetae. »
26 Atià, u haahua atu to īa fatu pēènei :
« E te tāvini pē, te tāvini hopee.
Ua ìte òe e kohi au me io te taha aòè i tanutia te kākano.
U haapuke au i te taetae
me io te taha i èià u te e tuhatia òmua tītahi mēmau.
27 No te aha aòè i àve atu òe i to ù tareni io he faèmoni ?
Ia hua mai, u koàna ia ù ta ù taetae
me tītahi puke moni kē atu.
28 A too ôtou i ta īa tareni.
A tuu i te ènata me te ònohuu tareni.
29 Na te mea, o te ènata me te taetae te i tuutia atu,
etià e nui aè to īa tapavaù.
Atià, me io te ènata taetae koè, e takitia to īa mou mēmau.
30 O tēnei tāvini avai noa, a titii ia īa i vaho, io he taha pōtano.
I èià te uē me te teteitina o te tau niho. »
TE KOÌNA O IETU KIRITO TE HAKAÌKI NUI
TETAUTINA O TE PEROFETA EHEKIERE 34, 11-12.15-17
11 Oia nei te Teào a te Etua, te Fatu :
12 « I tēnei, e ìmi hoì au i tu ù tau muto,
me te tiòhi meitaì ma ùna o âtou.
Atii te tiòhi meitaì o te ènata tiaì muto
i to īa naho i tavavātia,
atii e tiòhi meitaì au ma ùna o tu ù tau muto.
E hano au e haapohoè ia âtou
me io te kōava i èià ua naò âtou,
io te kohu maù nui me te pō pōtano.
15 Na ù aneiho e tāfai i tu ù naho muto,
na ù te tiòhi meitaì ia âtou.
16 E ìmi au i te muto te i naò,
e haahua au i te muto te i hukaka nei.
Ua maki tītahi ? Na ù e àpau ia īa.
Ua hemo i te mate tītahi ? Na ù e haaòa.
U taùtaù me te feòfeò tītahi ?
E pāpua au ia īa me te tāfai ma te toitoi noa.
17 A haaòno mai òe, e tu ù naho muto,
enā, e haavā au i to ôtou tekateka,
to te tau muto me to te tau keukeu.
TARAMO 23 (22), 1-2b, 2c-3, 4, 5, 6
E Tiaì Meitaì to tātou Fatu Etua.
1 O te Fatu to ù Tiaì Meitaì,
E aha te mea e toe ?
2 U aahi mai te Fatu no te hakaēa
Io te pāpua pī i te mutiē hou.
3 U aahi mai te Fatu io te punavai ;
I èià, u haahoutia to ù pohoè.
U haatee mai Īa ma he aanui toitoi
No te kāìè o to Īa inoa.
4 No tu ù taha ma he vao maù nui,
Aòè au e haametaù i te ìno.
I èià o Òe me au nei, e te Fatu e.
O to Òe tootoo te i aahi mai me te moû.
5 E te Fatu e, ua tuu mai Òe i te oà
I mua o te tau ènata e tōtōua ia ù.
Ua paù Òe i tu ù upoo me te kao.
U haakoakoa mai te hope taetae tuutia mai.
6 Te koakoa me te èkaèka me au nei
Ma te òa o to ù pohoètina.
E èka au io te faè o te Fatu
Ma te nuitina o to ù tau â.
TETAUTINA O TO MUA HĀMANI I TO KORINETIA 15, 20-26.28
E tu ù tau tunane tuehine,
20 He mea kē : tiàtohu nui, ua tū hakaùa te Kirito
me i vāvena o te huaa mamate.
O Īa te ènata to mua te i pohoè hakaùa
me i vāvena o te huaa mamate paotū.
21 Ua tihe mai te matena ma te ènata e tahi.
Ma te ènata e tahi, e tihe hoì
me te pohoè hakaùa me io te matena.
22 Me he mea e mamate te tau ènata paotū
mēìa i to âtou haakē me Atamo,
atii e pohopohoè hakaùa te tau ènata paotū
mēìa i to âtou haatahi me te Kirito.
23 Atià, e pohoè hakaùa tikitahi te tau ènata
vāàna i to âtou ava : to mua ìka te Kirito,
o Īa te hāmua i vāvena o te huaa mamate paotū.
Ma muì iho, te tau ènata kē aa me te Kirito
i te ava o to Īa hua mai me te kāìè.
24 E haahina te Kirito i te mana o te tau anera
e vivini nei, e aha à to âtou inoa kē, inoa kē.
A tahi a pao ai ònaòna te tau tai ia ôtoa
i te ava e tuu atu te Kirito
i te hakaìkitina i te Etua Motua.
25 E vivini hoì te Kirito i te aomāàma nei,
tihe atu e haahina te Etua i te tau mana te i haapākeka ia Īa
me te òomi ia âtou ma àò o te vaevae o te Kirito.
26 O te matena te mana paona e haahinatia.
28 Ia pao te haaìò i te tau mēmau paotū ma àò o Īa,
e aotahi anamai me te Tama i te Etua
te i haaìò i te tau mēmau paotū ma àò o Īa, te Kirito.
Ma èià, o te Etua te vivini paona o te tau mēmau ia ôtoa.
ALLELUIA ALLELUIA
cf. Mk.11,10
« A meitaìtia te Hakaìkitina e tihe nei, A meitaìtia te Hakaìkitina o to tātou motua Tavite. Òtana i ùna nui ! »
EVANERIO O IETU KIRITO VĀÀNA E MATEO 25, 31-46
I tēia mou pō, u peàu Ietu i to Īa tau kouâ
e haavivini aa i te hakatu o to Īa Tihena, pēènei :
31 I te ava e tihe te Tama a te ènata
i òto o to Īa kāìè me to Īa tau anera paotū,
e tū Īa i ùna o to Īa nohona kāìè.
32 I mua o Īa, e haaputupututia te tau mataèinaa ia ôtoa.
E haapaekē Īa i te tau ènata me he mea a te tiaì muto
e haapaekē i te tau muto me i vāvena o te tau keukeu.
33 E haapuke Īa i te tau muto i to Īa ìma oko,
i te tau keukeu i to Īa ìma aèaè.
34 A tahi a peàu te Hakaìki i te pūpū ènata
te i noho i to Īa ìma oko pēènei à :
« A mai, e te poì te i haameitaìtia e tu ù Motua.
A ìò ia ôtou te Patirēia i haapeitia no ôtou
me i te tumu o te aomāàma.
35 Na te mea, ua mate au i te one,
ua tuu mai ôtou i te mea kai.
Ua mao au i te vai, u fāinu mai ôtou.
U manihii au, u apuu mai ôtou.
36 U kahu koè au, u haauhi mai ôtou ia ù me te kahu.
Ua hemo au i te mate, ua tihe ôtou no te tiòhi mai.
I to he faèhumu au, u haaâvei ôtou me au.
37 U haahua atu te tau ènata toitoi, e peàu ana :
« E te Fatu e, inehea ua ìte mātou ia Òe,
e mate aa i te one me to mātou tāfai ia Òe,
e mao aa i te vai, me to mātou fāinu ia Òe ?
38 Inehea ua ìte mātou ia Òe he manihii
me to mātou apuu ia Òe ;
u kahu koè me to mātou haauhi me te kahu ia Òe ?
39 Inehea ua ìte mātou ia Òe u hemo i te mate,
akoè à io he faèhumu,
me to mātou tihe atu io Òe ? »
40 E haahua atu te Hakaìki, pēènei à :
« Ma te tiàtohu to ù peàu ia ôtou, ua toko ôtou ia ù
ohia ua toko ôtou i tītahi o te poì iti noa nei,
he tau teina hoì âtou no ù. »
41 A tahi a peàu te Hakaìki
i te poì te i noho i to Īa ìma aèaè : « E te poì ìno,
a hee atu ôtou memao me io ù, i to he ahi paona koè
te i haapeitia no te tiaporo me to īa tau anera.
42 Na te mea, ua mate au i te one,
aòè ôtou i tuu mai i te mea kai.
Ua mao au i te vai, aòè ôtou i fāinu mai.
43 U manihii au, aòè ôtou i apuu mai.
U kahu koè au, aòè ôtou i haauhi mai me te kahu.
Ua hemo au i te mate, i òto o te faèhumu au,
aòè ôtou i tihe mai e haaâvei me au. »
44 E haahua atu âtou pēènei :
« E te Fatu e, inehea to mātou ìte ia Òe
e mate aa i te one, akoè à e mao aa i te vai,
e manihii Òe, e kahu koè, hemotia i te mate,
akoè à i to he faèhumu,
koè mātou i tihe mai no te toko ia Òe ? »
45 U haahua atu te Hakaìki :
« Ma te tiàtohu to ù peàu ia ôtou :
i te ava aòè ôtou i hana i hua tau mea
no te toko i tītahi me i vāvena o te tau ènata nei,
e aha à he tau ènata iti noa âtou,
u te e hana ôtou no te toko ia ù iho. »
46 U peàu Ietu pēènei à :
« Ua ìò ia âtou te tuki pē no te ava paona koè.
Ua ìò i te poì toitoi te pohoè paona koè. »