Òmua naoti, e tatau nei te ènana kākiu ma he tekau me te touhā ; ia nui oko te mēmau me te ènana, aòè i koàka ai te tatau, i peàuìa ai tini tini tini mea.
I te tiheìa mai o te tau hāoè înei, he tau poì menike akoè à peketane âtou. Me i òto mai o to âtou èo te mou ponatekao moni/money, hānere/hundred me tautini (u pēpenaìa hua ponatekao me i òto mai o nā mou pona tekao ènana, o tau me tini te hakaìte nei i te nuiìa o te mēmau me te ènana e tekao ana ìa). Nā mou ponatekao e ùa, o mirioni me miriā, me i òto mai o nā ponatekao farani o million me milliard.
Tihe i tēnei, aê koàka i te tau poì ànamotua te tatau e haahana ana ia hānere me tautini. Ia peàu atu òe i te èhua o to âtou hānauìa, u haahua âtou ma he èo farani. Atii me te moni utu io he tau haèhoko ; i èià u òkoìa hae : « Deux mille trois cent dix francs » io te kōava o « e ùa tautini e toù hānere me te ònohuu farane/vaihū ».
Na òe i tēnei :
- 1774 : tautini e hitu hānere et hitu ònohuu ma hā.
- 1946 : tautini e iva hānere e hā ònohuu ma ono.
- 2001 : e ùa tautini ma tahi.
- 2019 : e ùa tautini me te ònohuu ma iva.
Tāpapaìa nūmera :
|
0 Aê he mea |
10 ònohuu |
20 tekau |
30 e toù ònohuu |
|
1 e tahi |
11 ònohuu ma tahi |
21 tekau ma tahi |
31 e toù ònohuu ma tahi |
|
2 e ùa |
12 ònohuu ma ùa |
22 tekau ma ùa |
32 e toù ònohuu ma ùa |
|
3 e toù |
13 ònohuu ma toù |
23 tekau ma toù |
…. |
|
4 e hā |
14 ònohuu ma hā |
24 tekau ma hā |
|
|
5 e ìma |
15 ònohuu ma ìma |
…. |
|
|
6 e ono |
16 ònohuu ma ono |
||
|
7 e hitu |
… |
||
|
8 e vaù |
|||
|
9 e iva |
40 e hā ònohuu… 50 e ìma ònohuu… 60 e ono ònohuu…
41…ma tahi 51…ma tahi 61…ma tahi…….
70 e hitu ònohuu 80 e vaù ònohuu 90 e iva ònohuu
100 hānere 273 e ùa hānere e hitu ònohuu ma toù
1 000 tautini,
1 000 000 mirioni, e tahi mirioni
1 000 000 000 miriā, e tahi miriā
Tau haamaàmaìa kē atu :
1) - Aê he mea te ponahumu « i » ia tū te nūmera ma hope o te haahana : « Ua ìte au e ùa peto ».
2) - Me he mea aê koàka te tatau o te mēmau me te ènana, i haahanaìa ai te ponatekao tini io te kōava o te nūmera : « U tihe mai tini tini tini ènana i te koìka ».
3) - Aê he mea te « e » ma mua o ònohuu, tekau, hānere, tautini, mirioni me miriā. Ia tū te « aê he mea » ma mua o te nūmera ònohuu paoìa, e tukuìa ai ia « me te » ma mua : « 2011 : e ùa tautini me te ònohuu ma tahi ».
4) - Te heiìa, enā te tuipona « ma » i vāveka o te tau nūmera ònohuu me te tau nūmera e tahi. Ia koè te tau nūmera ònohuu me te hānere, e tukuìa te « e » i mua o te nūmera e tahi : « 2008 : te èhua e ùa tautini e vaù ».
Patuìa e Jacques Iakopo Pelleau i te èhua 2016.
U haatoitoiìa te patuhei vāàna i te tau aahiìa a te Haè tuhuka èo ènana i te 21/08/2022.
Comments est propulsé par CComment