TOMINIKA E TOÙ O TE AVA HAAOKE
(Â tapu 3 no Pohe 2024)
TOMOÌA : SEIGNEUR JE NE SUIS PAS DIGNE
Seigneur, je ne suis pas digne |
Refrain À qui irions-nous, Seigneur, |
Penitenia
TARAMO 19 (18) : E te Etua e, io Òe anaiho te Tekao e aahi atu i te pohuè ananu.
Hīmene vānana : Te Kāìè me te hahi ia Òe, e te Hatu, e Ietu e.
Kio vānana : I òto hoì o te Kirito ènana tiàtohu, ua noho te hakatu toitoi pao ònaòna o te Etua.
Pure a te poì haatià : Eīa ta mātou pure i mua ia Òe. E to mātou Hatu, a apuu mai.
ÙTUNA : A.17
1 |
Mōumu |
2 |
3 E te Etua Motua e, / A tiòhi mai Òe
I te toto mana oko / o to Tama, o Ietu !
Peàto
Haamaakauìa : E te Haapohuè o te aomāàma,
A haapohuè mai ia mātou
Ma to Òe peka me to Òe Tūhakaùaìa,
E pohuè ai mātou.
To mātou Motua e. Àrenio
KŌMŌNIŌ : TE HARAOA
Te haraoa I òto to ù ìma, E nino mau no Ietu, (no Ietu) Vāhana Kirito. |
Te ipu hapai ia I mua o tou mata E toto mau no Ietu (no Ietu) Vāhana Kirito. |
||
Mōumu : O Òe hoì te tumu pohuè mau. Ia kai i To nino Ia inu i To toto Ua noho Òe, e Ietu, me mātou. |
|
||
Hīmene haahuaèkaèka : TE HAATIÀ
He ènana mātou, He Etua Òe, e te Hatu e. U pūkina ananu To mātou koekoe No te haatutuki mai, U âvei tātou. Na te moû O to mātou koekoe E haamehea mai. |
Mōumu I hea òe, te Haatià e ? No ai òe, te Haatià e ? Pēhea òe, te Haatià e ? Ahea òe, te Haatià e ? Mamau (Mamau) Mamau òe, e te Haatià. (bis) |
PAHIÌA : E MARIA E, NA AI E HAAVIVINI MAI
1 E Maria e, Na ai e haavivini mai To òe memae, To òe uē, Ta òe òna Tama mate. Aòè òe i haapē I te poì te i mākaka atu. |
Mōumu E te Kui memae nui e, A vaièi mai Òe (i) te koekoe oko Etià, ia kē ananu Mātou me ta òe tama, Me ta òe tama (2x). Tītahi èo kē : Tama, Tama, Tama. Te tau vāhana : Tāhia nui e, Tāhia nui e, Tāhia nui e. |
TOMINIKA E TOÙ O TE AVA HAAOKE
TATAUÌA O TE HĀMANI A MOITE PEÀUÌA EHOTO 20, 1-17
1 U tekao te Etua ia Moite me to Īa peàu pēènei à :
2 « O au te Hatu, to òe Etua, te i haauu ia òe
i vaho me i te Henua Ekipito,
me i òto mai o te haè o te poì haamōèhuìa.
3 Umoì te Etua kē io òe : o au anaè te Etua.
4 Umoì e haatiki òe i te ata o te mea io he àki,
o te tau mēmau io he henua,
akoè à i òto o te vai, i àò o te henua.
5 Umoì òe e moe haatona i mua o hua tau ata,
umoì e tāvini atu ia âtou.
O au hoì te Hatu, to òe Etua, he Etua toumakou au.
Ia teka tītahi io ù, me te haahaa ia ù,
e topa te tuki pē ma ùka o te upoko o ta īa tau tama
me te tau poupuna, tihe atu e hā o te tai ènana.
6 Atià, te ènana te i kāòha mai me te aotahi i ta ù tekao,
e haameitaì au ia īa tihe atu i te tai ènana tini tini.
7 Umoì e vavaò pu i te ikoa o te Hatu, to òe Etua,
no te haatiàtohu i te mea tīvava.
U te e avai te Hatu tuki koè i te ènana e vavaò pu
i to Īa ikoa, no te haatiàtohu i te mea tīvava.
8 A haamaakau òe i te Tāpati : he â tapu.
9 Ma te mou pō e ono, a hana i ta òe hana.
10 Atià, o te hitu o te tau â, he â hakaēa i te hana,
he Tāpati no te hahi i te Hatu, to òe Etua.
Aua e hana òe, ta òe tamaòa, te moî,
te tueni, akoè à ta òe ànimara.
11 Ma te òa o nā pō e ono, u pēpena te Etua i te àki,
te henua, te tai me te tau mēmau i òto.
I te â e hitu, u hakaēa te Etua i te hana,
me to Īa haatapu i hua â.
12 A pakaihi i to òe motua me te kui, vāàna e òa to òe pohuè
io he henua ta te Hatu Etua e tuku ia òe.
13 Umoì e kukumi haamate i te ènana.
14 Umoì e hana pē i te mātirimonio.
15 Umoì e kamo.
16 Umoì e pōtoho pu no te hakatio i te hoa.
17 Umoì e hinenaò pu i te vehine a te hoa.
Umoì e kōhoà pu i te haè o to òe hoa, akoè à i ta īa tueni,
ta īa piha, ta īa pūriki, ta īa tau mēmau kē. »
TARAMO 19 (18), 8,9,10,11
E te Etua e, io Òe anaiho te Tekao e aahi atu i te pohuè ananu. cf. In.6,69
8 U toitoi noa te ture o te Hatu,
Na Īa e haahou i to tātou ìi.
U tiàtohu te Tekao a te Hatu
Te i haamāàma i te poì avai noa.
9 U toitoi te Tekao a te Hatu,
E haakoakoa âtou i te koekoe.
U hōata te makimaki o te Hatu,
E haakeàpa i te mata o te ènana.
10 U taìtaì te pakaihiìa o te Etua,
E noho mau ananu to Īa tau puku.
U toitoi te tekao paotū o te Hatu :
U māàma âtou no te haavā i te ènana.
11 U taetae atu te makimaki o te Hatu
I te puke moni kiki, te kuà o te moni kiki.
U mānini atu te Tekao a te Etua,
I te mānini tikauè e tahe me io he tīpapa.
TATAUÌA O TO MUA HĀMANI I TO KORINETIA 1, 22-25
E tu ù tau tuàne tuehine,
22 u makimaki te tau ati Iuta e ìtemata
i te tau hana mana me he hakatu.
No te poì Hereni, he mea kē :
e ùmihi nei âtou i te māàma hōhonu o te tekao.
23 O tātou à, u hakako tātou i te Kirito pāokapekaìa.
No te tau ati Iuta he tekao haapākeka i te haatià.
He tekao kōea no te tau mataèinaa êteni.
24 Atià, no te tau ènana vaeìa e te Etua,
e aha à he tau ati Iuta, akoè à he tau êteni,
O Īa nei te Kirito, te Mana o te Etua, te Māàma o te Etua.
25 Na te mea te hakatu tuaave o te Etua,
he māàma aè i te maakau o te tau ènana.
O te hakatu pepae o te Etua,
he mana atu i to te tau ènana maakau.
HĪMENE VĀNANA :
cf.Ko.2,9
I òto hoì o te Kirito ènana tiàtohu, ua noho te hakatu toitoi pao ònaòna o te Etua.
EVANERIO O IETU KIRITO VĀÀNA E IOANE 2, 13-25
13 Ohia ua tata te koìka Pakate o te tau ati Iuta,
ua hiti Ietu i Ierutaremi.
14 I òto o te Hiero, u koàka mai ia Īa
te tau ènana hoko atu i te tau piha, te tau mutō,
te tau manu tavaìè atii me te tau ènana haahuìkē i te moni,
e noho aa pii o to âtou hātaa hoko moni.
15 U kānea Ietu i te tā me te mou touà.
Ua tute atu Īa i vaho o te Hiero ia âtou paotū,
me te tau mutō me te tau piha.
U tioà ma ùka o te tuaèpo i te moni
o te poì haahuìkē i te moni.
U haatohuì Īa i to âtou hātaa moni.
U peàu Īa i te poì hoko manu tavaìè :
« A kave atu me i înei ia âtou paotū.
Umoì e haaìò ôtou i te haè o to ù Motua mea haèhoko ! »
17 U haamaakau to Ietu tau kouâ i te tekao i patuìa :
« He koekoe ūo to ù nei no to òe haè,
me he ahi i òto o au te kena. »
18 U pohā te èo o te tau ati Iuta me te peàu ia Ietu :
« E aha ta òe hana mahaò no te haatiàtohu
e mana to òe no te hana i hua hana nei ? »
19 Ua hua atu Ietu ia âtou : « A vāvahi ôtou i tēnei Hiero.
Ma te toù o te pō, e hakatū hakaùa au ia īa. »
20 U peàu te tau ati Iuta ia Īa : « Touhā ma ono èhua
e hana nei te poì hana i òto o te Hiero.
Na òe e hakatū ai ma te toù o te pō ? »
21 O to Īa nino anaiho te Hiero ta Ietu i tekao atu.
22 Ia tū hakaùa Ietu me i vāveka o te huaa mamate,
u haamaakau aè to Īa tau kouâ i hua tekao nei.
U haatià âtou i te Hāmani tapu atii me te tekao i peàuìa e Ietu.
23 E noho aa Ietu i Ierutaremi no te Koìka Pakate,
he mea nui te ènana i haatià ia Īa.
U ìte hoì âtou i te tau hana mahaò hakatu
me ta Ietu i hana atu.
24 O Ietu â, u te e haatià ia âtou, na te mea ua ìte Īa ia âtou nui.
25 Aòè hoì na tītahi i haavivini ia Ietu i te hakatu o te ènana.
Ua ìte Ietu e aha te meitaì me te pē i òto o te ènana.