TOMINIKA TEKAU MA ÙA O TE AVA MA TE ÈHUA
TATAUÌA O TE TUHUKA TEKAO PENETIRA 3, 17-18.20.28-29
17 E tu ù tama e, a hana òe i to òe tau hana paotū
me te koekoe haapāpaku, koekoe moû.
Ma èià, e haataetaeìa òe ma ùka atu o te ènana vaièi
e tuha ana i to īa tau taetae.
18 Me he mea he ènana tiketike, ènana mana òe,
tōtahi atu to òe haapāpaku.
Ma èià, e haaèka òe i te Hatu.
20 E aha à to te Etua mana nui,
u haakāìèìa te Etua e te poì avai noa haapāpaku.
28 Pēhea te haakoè i te ìno me i òto o te ènana kāìè pu ?
I òto òa o to īa koekoe te aka o te pē.
29 Te ènana koekoe toitoi,
he ènana kaituto hae i te tekao māàma.
Oia nei ta te tuhuka tekao māàma e kōhoà ma ùka atu :
te ènana puaìka hakaòko.
TARAMO 68 (67), 4-5a.c, 6-7ab, 10-11
Haameitaììa te Hatu te i haatiketike i te poì iti noa.
cf. Rk.1,52
4 He koìka haaèkaèka to te poì koekoe toitoi.
I te aò o te Etua, ua haka âtou i te koakoa.
5 A hahi ôtou i te Etua, a haataki i te pū no Īa,
O te Hatu to Īa ikoa. A hīmene me te haka i mua o Īa.
6 He motua te Hatu no te tau tama motua kui koè.
He vevaò te Hatu no te tau vehine pōpī.
7 E tuku Īa i te haè i te ènana pāpāuō.
E vevete Īa i te poì haamōèhuìa.
10 U haatopa Òe i te ūa haatapavaù i to Òe mataèinaa,
U haaìi Òe i to Òe mataèinaa kuhane koè.
11 I te henua e noho aa to Òe naho mutō,
U hākai Òe ia īa, o Òe te vevaò o te poì veve.
TATAUÌA O TE HĀMANI I TO HEPEREO 12, 18-19.22-24a
E tu ù tau tuàne tuehine,
18 U te e haatata mai ôtou me te tuaivi Tinai,
te tuaivi tapu umoì e haatukia te ènana.
Aòè ôtou i ìtemata i te ahi uà tāpupu,
te kohu maù, te pōtako, te metaki kāviivii,
19 te takiìa o te pū, te èo taaàu me he hatutii
haahopo i te mataèinaa e peàu aa : Etue te tekao.
22 O ôtou à, u haatata mai ôtou me te tuaivi Tiona,
te pāpuahaè o te Etua pohuè, Ierutaremi te io he àki,
te nuiìa o to īa anera tautini, tini âtou.
Ua tū ôtou i te aò o te motuhaka òko nui,
te putuputuìa o te tau tama hāmua,
to âtou ikoa i patuìa io he àki.
23 U haatata mai ôtou me te Etua,
te Haavā o te tau ènana paotū.
U haatata mai ôtou me te tau kuhane o te poì toitoi noa,
meitaì èka to âtou hakatu pohuè.
24 U haatata mai ôtou me Ietu ;
ma io Īa, u haatoitoiìa te Piimau hou.
ALLELUIA ALLELUIA
cf. Rk.1,52-53
Mamau te poì keèeìa no te mau o te Hatu.
U haatapavaù Īa i te tau ènana mate i te oke.
U haatiketike Īa i te poì iti noa.
ÈVANERIO O IETU KIRITO VĀÀNA E RUKA 14, 1a.7-14
I tēia mou pō,
1 i te Tāpati, ua uu Ietu io te haè
o tītahi hakaìki Fariteo no te kai i te haraoa.
U tiòhi matiòka âtou ia Īa.
7 U peàu Ietu i te tekao haapupuà i te tau hoakai.
Ua ìte hoì Īa, ua hano âtou e noho i te vahi to mua.
8 « Ia vevaò te ènana ia òe i te kaiìamau koìka mātiri,
umoì òe e moe i te kōava to mua,
oa vevaòìa tītahi ènana hōhonu atu ia òe.
9 E peàu oti te heihaè te i vevaò i hua ènana e tahi me òe :
« A avai òe i te kōava no to mua ènana. »
O òe à, hemoìa i te hakaìka,
e hee òe io te nohoka paoìa i muì òa.
10 I te ava u vevaòìa òe, a moe io te kōava paoìa
etià me tihe mai te heihaè, e peàu ia òe :
« E to ù hoa e, i mua atu òe ! »
Ma èià, e haakāìèìa òe i mua o te tau hoakai paotū.
11 No te haatiketike te ènana, e haapāpakuìa.
No te haapāpaku tītahi, e haatiketikeìa hua ènana. »
12 U peàu Ietu me i te ènana i vevaò ia Īa :
« Me he mea e hano òe e tuha i te kai iti,
akoè à i te kaiìamau,
aua e vevaò i to òe tau hoa, te tau teina,
to òe huaa, akoè à te poì pī i te taetae,
noho tata io òe, oa vevaò me âtou ia òe
no te vaièi mai i ta òe i vaièi atu ia âtou.
13 Atià, me he mea e tuha òe i te kaiìamau,
a vevaò i te poì veve,
te poì takapii, te tau vaekoki me te tau matapō.
14 Mamau òe, na te mea aòè e koàka ia âtou
te vaièi mai ia òe. E vaièiìa hoì ia òe
i te â e tū hakaùa te tau ènana toitoi vāàna e te Etua. »