(E) noho ana te henua i òto o te pō keevō,

(e) kau ana te kuhane o te tau ètua

ma ùka o te tai nui.

Eīa i nā pō òmua, o Atea me ta īa vehine, o Atanua,

e pohuè ana, haè koè to âua.

I tītahi â, ua peàu te vehine i ta īa vāhana :

« E aha òa tēnei hakatu pohuèìa o tāua, haè koè ? »

I te ahiahi, (ua) peàu te vāhana i ta īa vehine :

« I te pō nei, e hakatū au i to tāua haè ».

(U) topa iho te â, (u) hiti ake te pō.

Ua tū o Atea i vāveka o te pō keevō me

to īa anaunau i to īa tau pāìoìo peenei à :

« E aopa…, e aopa…, e aopaki nui te henua,

haha te kuhane i Havaiki.

E aka òa e, e aka pito e, e aka poto e, e aka hana e,

e aka nui e, (a) hakatū, hakatū, hakatū (i) te haè ! ».

Ia pao èka to īa anaunau,

ua vae o Atea i te tūàka o te haè.

Ua too īa i nā pou e ùa, me te tuku io he èpo,

me te nanu, me te hakatū.

I peàuìa ai : « O Ua Pou ! ».

Te pou, oia hoì te heòheò o te haè.

Ua too (īa) i te ao, me te tuku ma ùka o nā pou,

me te humu me te puu.

I peàuìa ai : « O Hiva Oa ! ».

Ma hope, ua nanu o Atea i te kātina,

i te paèkutu, i te tuutuu, i te kaava òa.

U hakamau o Atea i te oka o te haè ma te aò

me te hiva tihe i te kaava òa,

ma te tua me te hiva tihe i te tūàka.

Ua pao nā mea hakatahi o te hiva i te hakanuku.

I peàuìa ai : « O Nuku Hiva ! ».

E aha hoì to te tīmaù o te haè ?

E àupoà.

Ua hatu īa (i) te àupoà o te haè, e iva kōtū te òa.

I peàuìa ai : « O Fatu Iva ! ».

Ua peàu ta īa vehine ia īa :

« Ua tahu, ua tahu, ua tahu te ataūà ».

(I) peàuìa īa ai : « O Tahuata ! ».

Ua hiti te puàha ma ùka o te tai,

e hakakite ana u tau tata te â,

e hua te kuhane i Havaiki.

Ponihoo anamai, ua taki te moho pōpōuì,

te moho e hakakite ana e, enā te â eâ.

I peàuìa ai : « O Moho Tani ! ».

Ua kohi o Atea i te tau huka paotū o te haè,

me te tuku io he ùa, me te tomi.

I peàuìa ai : « O Ua Huka ! ». (Ua Huna)

Ua puàha te kōpū òumati i te papa o te àki,

(ua) avai anamai te henua,

te haè i vāveka o te Moana nui.

Ua taa te èo o Atanua e :

« Eīa ua ao, ua ao, ua ao te Henua ènana ».

I peàuìa ai : « O Eiao ! ».

U haatoitoiìa te patuhei vāàna i te tau aahiìa
a te Haè tuhuka èo ènana i te 20/08/2022.