TOMINIKA ÒNOHUU MA IVA O TE AVA MA TE ÈHUA
TATAUÌA O TE HĀMANI O TE MĀÀMA 18, 6-9
6 Ua ìte to tātou tau tupuna,
te pō Pakate te pō o te haapohuèìa.
Ua ìò ia âtou te koakoa nui mēìa ta âtou i ìte òmua
e aha te tekao ta âtou i haatià.
7 E te Hatu e, u tiaki to Òe mataèinaa,
epō e haapohuè Òe i te poì toitoi
me te haahika i te poì e tōua ia âtou.
8 I hua ava anaiho, u mamape Òe
i te tau ènana e tōua aa ia mātou.
Ua vae Òe ia mātou no te vaièi mai i to Òe kāìè.
9 I te pāòto hakanā o to âtou haè,
te tau moupuna i ùka aè o te poì toitoi,
u ùtuna âtou i te hēaka Pakate.
I muì iho, u haahou ma he koekoe e tahi i te Piimau tapu,
e peàu aa pēènei :
« Mātou, poì peàto, a àva atu àva mai mātou
i te mea meitaì me te mea haauē mai. »
Ma hope mai, u kāhua âtou
i te hīmene haahuaèkaèka o to âtou tau tupuna.
TARAMO 33 (32), 1.12, 18-19, 20.22
Mamau te mataèinaa o te Etua. 33, 12
1 A hīmene me te koakoa i te Hatu,
U hei nui e hahi ôtou, e te tau ènana toitoi.
12 Mamau te mataèinaa ia ìò te Etua he Hatu no īa.
Mamau te henua vaeìa me he pāpua no te Hatu.
18 Ua toko te Etua i te tau ènana pakaihi ia Īa,
Te poì e tetaì mau i to Īa kāòha mai,
19 U haapohuè ia âtou me io te ìno me te mateìa
Te haapohuè i te ava o te ìno me te oke nui.
20 O te Hatu te tumu o to tātou pohuè.
O Īa to tātou toko me te vavao.
22 E te Hatu e, a noho mau to Òe kāòha i ùka o mātou
Atii me mātou e tetaì mau i to Òe vaièiìa.
TATAUÌA O TE HĀMANI I TO HEPEREO 11, 1-2 8-19
akoè à 11,1-2.8-12
E tu ù tau tuàne tuehine.
1 Na te haatià i haatiàtohu e koàka mai ia tātou
te tau taetae ta tātou e tetaì nei.
Na te haatià i peàu mai
he mea tiàtohu te tau mēmau u te e ìteìa.
2 U haameitaì te Etua i to tātou tau tupuna
mēìa i to âtou haatià.
8 Mēìa i te haatià,
u aotahi Aparahamo i te Etua te i vevaò ia īa.
U titii Aparahamo i to īa henua no te hee i te henua kē.
O īa te henua e ìò ia īa ma tītahi â.
Ua hee hoì Aparahamo ìte koè i hea.
9 Mēìa i to īa haatià,
ua tihe Aparahamo i te henua peàuìa e te Etua.
Ua noho īa io hua henua me he manihii, i òto o te haèâ.
Atii Itaako, Iakopo te i ìte e ìò ia âua hua henua
vāàna ta te Etua i peàu.
10 U tetaì Aparahamo i te pāpuahaè haatūìa i ùka o te tūàka.
Na te Etua i kānea i te ata o hua pāpuahaè,
na te Etua e haatū ia īa.
11 Mēìa i te haatià,
ua tupu Tara i te tama, e aha à u uehine īa.
U maakau hoì Tara e haapao te Etua i te mea ta īa i peàu.
12 Ma èià, me i òto mai o te ènana e tahi anaè, kooūa pē,
ua tupu te ati nui nui atu i te tau hetū o te ataàki,
nui atu i te one io te hiku o te tai.
13 Ma òto o te haatià,
u mamate âtou paotū, ìte koè i te mea i peàuìa.
Atià, u tiòhi atu âtou i hua taetae me i te vahi memao.
Ua maakau hoì âtou me he tau manihii
io te ao nei âtou, e hee, hee ananu.
14 I te ava u kaituto atii te tau ènana,
u haatiàtohu hoì ua tūtū âtou
me te tau manihii e ùmihi aa i to âtou henua tumu.
15 Aòè âtou i haamaakau i te henua ta âtou i titii i mua atu.
U koàka ia âtou e hua atu i tēia henua.
16 U kōhoà âtou i te henua meitaì atu :
te àki, te havaiki meitaì.
O īa te tumu ua ao te Etua e apaìa : to âtou Etua.
Tōtahi atu, na te Etua iho e kānea i te pāpuahaè no âtou.
17 I te ava u haaveke te Etua ia Aparahamo,
mēìa i to īa haatià, u ùtuna Aparahamo ia Itaako.
18 E aha à u peàu te Etua ia Aparahamo
e haanui i to īa ati i ùka aè me i òto o Itaako,
ua ao Aparahamo te ùtuna i ta īa òna tama,
he tama tootahi Itaako.
19 U haatià hoì Aparahamo e koàka i te Etua
te haapohuè hakaùa i te poì mamate.
No èià, me he mea e hua ta īa tama io īa,
atii me te haatū hakaùa i te poì mamate.
ALLELUIA ALLELUIA
Mt .24, 42.44
A matavaa ôtou, a tiaki : na te mea, aòè ôtou i ìte
i te hora e tihe mai ai te Tama a te Ènana.
ÈVANERIO O IETU KIRITO VĀÀNA E RUKA 12, 32-48
I tēia mou pō, u peàu Ietu i to Īa tau kouâ pēènei :
32 Umoì e haametaù, e te naho mutō iti noa.
U makimaki to ôtou Motua
e vaièi atu ia ôtou i te Patirēia.
33 A hoko atu i to ôtou tau mēmau paotū.
Te moni i koàka mai, a vaièi atu i te poì veve.
A kānea i te tiha moni aòè e paoìa i te pē.
A haapuke i te tau taetae io he àki.
I èià, aòè te ènana kamo e haatata mai,
aòè e pao i te kai a te piura.
34 Te vahi i èià to ôtou taetae, i èià me to ôtou koekoe.
35 A taka i te kooi me te haauà i to ôtou àma.
36 A tūtū ôtou me te poì e tetaì i to âtou vivini
ia hua mai īa me i te koìka mātiri.
Etià e pepeù anamai âtou ia tihe īa
me to īa paopao i te avaputa,
37 Mamau te mou tāvini ta te vivini i koàka mai
e matavaa aa i te ava o to īa huaìa io he haè.
Ma te tiàtohu, u peàu au ia ôtou : e takakooi te vivini
me te haanoho i hua tau tāvini io he tapukai,
na īa te tuha i te mea kai ia âtou tikitahi.
38 Ia tihe te vivini i te tūmoe nui oti, i te hāhakateiao oti,
mamau te tau tāvini matavaa aa.
39 A vivini meitaì ôtou : anoa i ìte te heihaè
i te hora e tihe ai te ènana kamo,
aòè īa i avai te haaputaèe i te pākeâ o te haè.
40 Atii me ia ôtou, a haapeipei me ia ôtou :
e tihe mai hoì te Tama a te Ènana
i te hora aòè ôtou i ìte. »
41 U peàu Petero : « E te Hatu e,
no mātou anaè tēnei tekao haapupuà,
akoè à no te tau ènana paotū ? »
42 U peàu te Hatu :
« O ai òa te vivini toitoi, te vivini māàma,
te i vaeìa e te heihaè no te haatee i to īa poì hana
me te tuha ia âtou, i te ava e hei, i te hope haraoa tee ?
43 Mamau hua tāvini, ta te heihaè e koàka mai
e hana atii, i te ava o to īa hua mai.
44 Ma te tiàtohu, u peàu au ia ôtou :
e vae me te haatū te heihaè
i hua tāvini no te tiòhi i to īa tau taetae paotū.
45 Atià, me kaituto hua tāvini pēènei :
Aòè e tihe vave mai to ù hatu.
No èià, e tīmata īa e pehi i te tau tueni,
me te tau vāhana me te tau vehine,
e kai oko īa me te inu haakona.
46 E tihe mai te hatu o hua tāvini
i te â i tetaìkoèìa, i te hora ìtekoèìa.
E haatopa te hatu i te tuki pē i ùka o hua tāvini
me te haakē ia īa me te tau poì te i titii i te Etua.
47 No te ìte te tāvini i te makimaki o to īa hatu,
atià aòè he mea ta īa i haapei, ta īa i hana atu,
e pepehiìa īa, e tātāìa īa.
48 Atià, me he mea u te e ìte te tāvini i te makimaki o to īa hatu,
e mea à ua hana īa i te hana pē, e tāìa he mea iti.
Ia nui te mea i vaièiìa atu i te ènana,
e apeìa me io īa te mea nui.
Ia nui te mea i tukuìa i te ènana no te tiòhi meitaì,
he mea nui te taetae e apeìa me io īa. »