TOMINIKA TEKAU MA TAHI O TE AVA MA TE ÈHUA
TATAUÌA O TE PEROHETA ITAIA 66, 18-21
18 Oia nei te Tekao a te Hatu.
« E tihe nei au no te haakātahi mai i te tau ènana
me io te tau henua kē, te èo kē, èo kē ia ôtoa.
E tihe mai âtou no te tiòhi me te haatiàtohu i tu ù kāìè.
19 E tuku au ia âtou i te hana mana me he hakatu.
E pōpahi au i te mou ènana me i te toeka o tu ù mataèinaa
i te tau henua memao, te tau motu memao,
i èià, aòè i ìteìa tu ù kāìè, aòè i òkoìa tu ù tekao.
E hakaìte atu tenā tau keèe i to ù kāìè i te tau mataèinaa.
20 Tītahi : Me io te tau mataèinaa êteni paotū,
e aahi mai tu ù tau keèe i to âtou tau tuàne tuehine
no te ùtuna atu i te Etua.
E hua mai âtou ma he ihovare, ma he miura, ma he kāmero,
ma òto o te tau pāriri hakatu kē, hakatu kē.
E aahiìa âtou tihe toitoi i tu ù tuaivi tapu, i Ierutaremi,
hakatu me te tau vaetukia kaveìa e te mataèinaa Iraene,
ma ùka o te papa taìtaì no te ùtuna atu io he Hiero tapu.
21 Atià tōtahi atu : E vae au ma vāveka o âtou
i tahipito tāuà me te mou revita. »
TARAMO 117 (116), 1, 2
A tataha atu ôtou i te aomāàma vii pu,
a hakaìte i te Tekao Meitaì Hou Mai. Mk.16,15
1 A hahi i te Hatu, e te tau mataèinaa paotū.
A haakāìè i te Etua, e te tau henua ia ôtoa.
2 Ua mana nui to Īa kāòha i uē ia tātou.
Ua mau te tiàtohu o te Hatu ma te tau tai e tihe ananu.
TATAUÌA O TE HĀMANI I TO HEPEREO 12, 5-7.11-13
5 E tu ù tuàne tuehine,
Aha u māhaè ôtou i te Hāmani tapu te i peàu ia ôtou
me he mea i te tau tama :
« E tu ù tama e, aua e haamee i te Tekao a te Hatu,
aua e kuhane koè me oonakiìa òe e te Hatu.
6 Me haataetae te Etua i te ènana i oonaki ia Īa,
u oonaki pekē te Etua i ta Īa tau tama. »
7 Te mea ta ôtou e memae nei,
me he tekao oonaki hua memae.
He tau tama hoì ôtou no te Etua.
O ai te tama aòè i oonakiìa e to īa motua ?
11 Ia oonakiìa tātou, e uēuē hoì, u memae te koekoe.
Atià, ia hua mai tātou i te meitaì, ua ìte tātou
o te oonakiìa te tumu o te moû me te toitoiìa.
12 No èià, me he mea i patuìa :
« A ìi te tau pūhāìma momoù.
A heòheò te tau muò pepae.
13 A haamenia i te vaanui no te haamāeka te taha atu,
umoì te vaekoki e hipa me te tohuì to īa vaevae.
Ia makiìa te vaevae, e haameitaììa ponihoo. »
ALLELUIA ALLELUIA cf. Rk.13,29
E tihe te tau ènana me i te kēkē metaki tuatoka,
te kēkē metaki tokoàu, te kēkē metaki tiu
me te kēkē metaki karauu no te àva atu
i te kaiìamau io te Patirēia o te Etua.
ÈVANERIO O IETU KIRITO VĀÀNA E RUKA 13, 22-30
I tēia mou pō,
22 e hiti aa Ietu i Ierutaremi, ua vii Īa i te tau pāpuahaè kē,
te tau haè kē no te hakako i te Tekao.
23 U peàu tītahi ènana ia Īa :
« E te Hatu e, aha he mea iti te poì e haapohuèìa ? »
24 U peàu Ietu ia âtou :
« A tohe ôtou no te uu ma he puta hāiti.
He mea nui hoì te ènana, ta ù e peàu ia ôtou,
e hano e uu i òto, aòè e koàka ia âtou.
25 Ia tū te heihaè me to īa pā i te avaputa,
i nonoho ai ôtou i vaho, u paopao i te avaputa,
e peàu aa : « E te hatu e, a pepeù mai. »
U haahua atu īa :
« Aòè au i ìte me i hea mai ôtou. »
26 A tahi a peàu ôtou :
« Ua kai me te inu mātou i to òe aò.
U hakako òe i te tekao io to mātou tohua. »
27 U haahua īa me te peàu :
« Aòè au i ìte me i hea mai ôtou.
A taha atu memao me io ù,
ôtou nui, e te poì hana pē hae.
28 I èià te mateteka, te haatetei i te niho,
i te ava e ìte ôtou ia Aparahamo, ia Itaako, ia Iakopo
me i te tau peroheta paotū i to he Patirēia o te Etua.
O ôtou à, e tuteìa i vaho.
29 E tihe te tau ènana me i te kēkē metaki tuatoka,
kēkē metaki tokoàu, kēkē metaki tiu, kēkē metaki karauu.
E àva atu âtou i te kaiìamau i to he Patirēia o te Etua.
30 Enā a ìò te vahi to mua i te poì i muì òa,
te vahi i muì i te poì to mua. »