TOMINIKA E HĀ NO PAKATE
TATAUÌA O TE HĀMANI HANA A TE TAU ÀPOTORO
13, 14.43-52
14 Ua tihe Pauro me Paranape
i Anetiokia o te Henua Pihitia.
Ma te Tāpati, ua tomo âua io he tinakoka.
43 Ia pao te pure, u tavavā te haètoa ;
e mea nui te poì ati Iuta,
atii me i te tau ènana e tahi haatià me to ati Iuta
i ūtaì ia Pauro me Paranape.
E tekatekao ana âua tokoùa me âtou,
u haaūo no te noho mau i òto o te karatia o te Etua.
44 I te Tāpati i hope mai,
u putuputu te pāpuahaè tata èka paotū
no te hakaòko i te Tekao a te Hatu.
45 U keitani te tau ati Iuta
ia ìte i tēia putuputuìa o te haètoa nui.
U haapākeka âtou i te tekao a Pauro
me te paha ia īa.
46 Atià, u peàu haametaù koè Pauro me Paranape :
« U pōpahiìa māua no te hakaìte i te Tekao a te Etua
ia ôtou òmua ìka. Me he mea e titii ôtou i hua tekao,
e maakau ana, aòè no ôtou te pohuè ananu,
enā à māua a hee io te poì êteni.
47 Atii hoì ta te Hatu i peàu mai :
« U haatū au ia òe e àma no te tūìka i te tau êteni,
no te kave atu i te tekao o te pohuè
tihe atu i te kotina paoìa o te aomāàma. »
48 Ia òko te tau êteni i hua tekao,
u koakoa nui, me to âtou haakāìè i te Tekao a te Hatu.
U haatià te tau ènana paotū
i vevaòìa no te pohuè ananu.
49 Ma èià, u mevaha te Tekao a te Hatu
ma io te henua vii pu.
50 Atià, ua hano te tau ati Iuta
e haatohuì i te tau vivini o te pāpuahaè
me te tau vehine haatià mau,
poì taetae nui e pakaihi i te Etua
vāàna i te ture a Moite.
Na te tau ati Iuta i pōpahi no te òomi mākaka
ia Pauro me Paranape.
U tiehi âtou i nā Àpotoro i vaho o to âtou henua.
51 O âua à, e tūtū aa i te èpo me io he vaevae,
ua hee atu io te pāpuahaè Ikonio.
52 Ua pī te tau kouâ i te koakoa
me te Kuhane Meitaì.
TARAMO 99 (100) 1-2, 3, 5
E te Hatu e, na Òe e aahi ia mātou
i ùka o te vaanui o te pohuè,
na Òe e pepeù no mātou i te avaputa o to Òe haè.
1 A hahi i te Hatu, e te henua vii pu.
A pakaihi i te Hatu me te koakoa,
A tihe mai io Īa me te hīmene èkaèka.
3 A haki atu, e Etua te Hatu.
Na Īa i pēpena ia tātou,
No Īa hoì tātou, to Īa naho mutō.
5 Tiàtohu nui to Īa vaièiìa.
E paona koè to Īa kāòha mai.
E mau ta Īa tekao ma te tau tai ananu.
TATAUÌA O TE HĀMANI APOKARUPO 7, 9.14b-17
9 O au nei, o Ioane, ua ìte au i tītahi haètoa nui oko ;
aòè e koàka i te ènana te tatau tokohia âtou
me io te tau mataèinaa kē, te tau ati kē,
te tau henua kē, te tau èo kē, èo kē.
Ua tū âtou i te aò o te Nohoka kāìè, me te Àrenio.
Ua uhiìa âtou me te kahu tavaìè,
te makamaka èitā io to âtou îìma.
14 U haahua atu au ia Īa :
« E te hakaìki e. O Òe te i ìte. »
U peàu mai :
« Ua tihe mai âtou me i te tōua haamamae nui oko.
U hooi âtou me te haataìtaì i to âtou kahu
i òto te toto o te Àrenio.
15 No èià, ua tū âtou i te aò o te nohoka o te Etua
me te tāvini ia Īa me i te â, me i te pō,
i òto o te Hiero o te Etua.
Na Tēia e tū nei io he Nohoka kāìè,
e apuu ia âtou io to Īa haè.
16 I tēnei, koè nui âtou e mate i te oke, e paka i te vai.
Koè nui âtou e haapaòpaòìa e te òumati veàveà,
akoè à, tītahi metaki kena.
17 Te Àrenio e tū aa i te aò o te Nohoka kāìè,
e ìò o to âtou Tiaki meitaì.
Na Īa e aahi ia âtou io te punavai pohuè.
Na te Etua e haamaha i to âtou vaimata. »
ALLELUIA. ALLELUIA In 10, 14-15
Ietu, te Tiaki Meitaì, ua ìte i to Īa tau mutō,
ua ìte âtou ia Īa.
No âtou, u haaìò Īa i to Īa pohuèìa
i uē i to Īa tau mutō.
ÈVANERIO O IETU KIRITO VĀÀNA E IOANE 10, 27-30
I tēia mou pō, u peàu Ietu i te tau ati Iuta :
27 « U hakaòko tu ù tau mutō i to ù èo,
ua ìte au ia âtou. Ua ūtaì âtou ia ù.
28 E tuku nei au ia âtou i te pohuè ananu.
Aòè âtou e mate ananu.
Aòè e hao tītahi ia âtou me io tu ù îìma.
29 Na tu ù Motua i tuku mai ia âtou.
E mana atu tu ù Motua i te tau mea ia ôtoa.
Aòè e koàka i tītahi e hao mai i te mēmau
me io te ìma o tu ù Motua.
30 E tahi anaiho au nei me tu ù Motua. »