TOMINIKA ÒNOHUU MA ÌMA O TE AVA MA TE ÈHUA
TATAUÌA O TE HĀMANI A MOITE PEÀUÌA TEUTERO 30, 10-14
10 U peàu Moite i te mataèinaa Iraene pēènei :
« A hakaòko òe i te èo o te Hatu, to òe Etua,
me te aotahi atu i to Īa makimaki, ta Īa tekao
patuìa ma òto o te hāmani o te Ture.
11 A hua mai i te Hatu to òe Etua
ma òto o te tiàtohu o to òe koekoe me te kuhane.
E koàka ia òe te aotahi atu i te tekao ta ù i peàu i tēnei â.
Umoì òe e maakau : Ua toko hua tekao. Na ai e aotahi atu ?
12 Aòè hoì e noho tenā Ture io he ataàki.
Umoì òe e peàu :
O ai te hiti io he àki no te ùmihi i hua Ture
me te hakaìte mai etià e aotahi atu mātou ?
13 Aòè hoì e noho tenā Ture ma tītahi kēkē o te tai.
Umoì òe e peàu :
O ai e taha ma tītahi kēkē o te tai no te ùmihi i hua Ture
me te hakaìte mai etià e aotahi mātou ?
14 Ua tata èka me òe hua tekao.
Enā īa i òto o to òe haha, i òto o to òe koekoe,
vāàna e aotahi atu òe. »
TARAMO 19 (18), 8, 9, 10, 11
He tiàtohu ta Òe tekao, e te Hatu e,
na to Òe ture e haapohuè mai. cf.In.17,17
8 U toitoi noa te ture o te Hatu,
Na Īa e haahou i to tātou ìi.
U tiàtohu te Tekao a te Hatu,
Te i haamāàma i te poì avai noa.
9 U toitoi te Tekao a te Hatu,
E haakoakoa âtou i te koekoe.
U hōata te makimaki o te Hatu,
E haakeàpa i te mata o te ènana.
10 U taìtaì te pakaihiìa o te Etua,
E noho mau ananu to Īa tau puku.
U toitoi te tekao paotū o te Hatu :
He māàma âtou no te haavā i te ènana.
11 U taetae atu te makimaki o te Hatu
I te puke monikiki, te kuà o te monikiki.
He mānini atu te Tekao a te Etua,
I te mānini tikauè e tahe me io te kaka.
TATAUÌA O TE HĀMANI A PAURO PEÀTO I TO KOROHA
1, 15-20
E tu ù tau tuàne tuehine.
15 O te Kirito te ata o te Etua ìtematakoèìa.
O te Kirito te Tama hāmua, tiketike atu
i te tau mēmau ia ôtoa te i pēpenaìa.
16 I òto o te Kirito, u pēpenaìa to te àki, to te henua,
Te tau mēmau ìtea, te mea ìtematakoèìa :
Te tau kuhane mana, hakaìki, hatu, vivini.
U pēpenaìa âtou nui, ma io Īa, no te haakāìè ia Īa.
17 Te Kirito à, ua tū Īa ma mua atu
o te tau mēmau paotū te i pēpenaìa.
I òto o Īa, e tū mau nei âtou paotū.
18 O te Kirito te upoko o te Tino, te Èkaretia.
O te Kirito te Tumu o to te Èkaretia pohuè.
O Īa te Tama hāmua tū hakaùa, haakāìèìa e te Etua,
etià e ìò Īa te vivini o te tau mēmau ia ôtoa.
19 Vāàna i to te Etua makimaki hakanā :
i òto o te Kirito te pao ònaòna o te hakatu Etua.
20 Ma io te Kirito, e haatutuki me te Etua
te tau mēmau paotū, to te àki, to te henua.
Ma te toto o te Kirito pāokapekaìa,
e haaneke i te moû, e haakoè nui i te tōua,
i vāveka o te tau mēmau ia ôtoa.
ALLELUIA ALLELUIA
cf. .1In,21.
Oia nei te tekao hou ta te Etua i peàu mai :
te ènana e kāòha i te Etua, a kāòha īa me to īa teina.
ÈVANERIO O IETU KIRITO VĀÀNA E RUKA 10, 25-37
I tēia mou pō,
25 ua tū tītahi tuhuka tekao
me to īa peàu no te haahiiveke ia Ietu :
« E Tuhuka e, e aha te hana e hana atu au
etià e ìò ia ù te pohuè ananu ? »
26 U peàu Ietu ia īa : « E aha te mea i patuìa
io he Hāmani tapu ? Pēhea to òe tatau ? »
27 Ua haahua īa : « A kāòha òe i te Hatu, to òe Etua,
ma io he koekoe, ma io he ènana tiàtohu,
ma io to òe ìi paotū, ma io he kuhane.
A kāòha i te hoa me he mea ia òe anaiho. »
28 U peàu Ietu ia īa : « He mea toitoi ta òe tekao.
A hana òe i hua hana, e pohuè ai. »
29 Atià, e makimaki aa te tuhuka tekao e hakaìte atu
he mea māàma to īa ūiìa,
u peàu hoì ia Ietu : « O ai à to ù hoa ? »
30 U haahua atu Ietu :
« Ua hee te ènana me i Ierutaremi i Ieriko.
Ua tutuki īa me te puke poì kamo.
Ua hao âtou ia īa me te kukumi.
Ua hiki âtou e avai aa i hua ènana mei mate nui.
31 Ua tihe pu tītahi tāuà, e hee aa ma io hua vaanui.
Ua ìte īa i te ènana me to īa taha atu
ma te taì kē o te vaanui.
32 Ua tihe me tītahi Revita i tēia vahi.
Ua ìte īa i te ènana me to īa taha atu
ma te taì kē o te vaanui.
33 Atià, te ènana Tamaria e vii aa i te henua,
u haatata mai me hua ènana te i haamākakaìa.
Ua ìtemata ia īa, u mehea to īa koekoe.
34 Ua oha, ua vāhī i te tau maki o te ènana takapii
e iiki aa i te kao me te vino.
Ua tuku ia īa ma ùka o to īa pūriki
no te kave io he haè apuu manihii.
U tiòhi meitaì ia īa.
35 I te oìoì, e too aa e ùa moni tea,
ua tuku atu i te ènana heihaè manihii me te peàu ia īa :
« A tiòhi meitaì i te ènana hōpī. Ia nui atu te moni e pao,
na ù e tuku atu ia òe i te ava e hua mai au. »
36 O ai òa me io nā ènana tokoùa ua ìò he hoa
o te ènana i mākakaìa e te poì kamo ? To òe maakau ? »
37 U peàu te tuhuka tekao :
« Tēia te i hakāòha mai i te ènana. »
U peàu Ietu ia īa :
« A taha atu, a hana òe hua mea anaiho. »