TOMINIKA TEKAU O TE AVA MA TE ÈHUA
TATAUÌA O TE PEROHETA IEREMIA 38, 4-6.8-10
4 I tēia mou pō, i Ierutaremi, u humuìa Ieremia te Peroheta.
U peàu te vivini o te pūpū kape i te hakaìki Hetekia :
« A haamate ia Ieremia.
Mēìa i ta īa tekao, u kuhane koè te mataèinaa,
ìi koè te tau kape no te tōua.
Aòè tēnei ènana e ùmihi nei i to te mataèinaa pohuè,
atià à to īa haahika. »
5 U haahua te hakaìki : « Enā īa i òto o to ôtou îìma.
Aòè e kiko te hakaìki me ôtou. »
6 A tahi a too âtou ia Ieremia me te titii ia īa
i òto o te ùavai io te pāpua o te hakaìki Meratia,
pii i te haèhumu. U haaiho ia īa ma he tōuà.
Aòè he vai i òto o tenā ùavai, e èpokau anaè.
Ua kaò Ieremia i òto o hua èpokau.
8 Enā tītahi ènana me i te Henua Etiopia, o Mereki to īa ikoa,
he vivini īa o te haè o te hakaìki.
9 Ua òko īa i te hana pē i hanaìa ma ùka o Ieremia.
Ua tihe īa io te hakaìki Hetekia me to īa peàu :
« E te hakaìki e, mea hauhau te hana i hanaìa
i ùka o te peroheta Ieremia.
Ua titii te tau kape ia īa i òto o te ùavai no te haamate. »
10 A tahi a peàu te hakaìki ia Mereki te Etiopia :
« A too òe tokotoù ènana me òe.
A taki i te peroheta Ieremia me i òto o te ùavai,
oa mate nui īa. »
TARAMO 40 (39), 2, 3, 4, 18
E te Hatu e, a tiòhi mai, a toko mai.
Umoì e haatevee, o Òe tu ù vevaò. 40 ,14
2 U tetaì au, e tohe mau te tetaì i te Hatu.
U tiòhi mai te Etua, ua òko Īa i tu ù vevaò.
3 Ua taki mai Īa me i te peteò pōtako,
Me io te ùavai me te èpokau.
Na te Hatu i haatū ia ù i ùka o te papakeâ.
E taha nei au, heòheò to ù nino hou.
4 U pepeù te Etua i to ù haha no te hīmene hou,
E taki to ù èo no te hahi i to tātou Etua.
E òko aa te nuiìa o te tau ènana,
E emièe âtou me te haatià i te Hatu.
18 He ènana veve au nei, ènana avai noa.
O te Hatu anaè te i haamaakau mai ia ù.
O Īa te i toko me te haapohuè mai.
A mai. Umoì e haatevee, e te Hatu e.
TATAUÌA O TE HĀMANI I TO HEPEREO 12, 1-4.
1 E tu ù tau tuàne tuehine, a kaituto tātou
i te nuiìa o te ènana haatiàtohu i te haatià,
tini, tini âtou vii pu o tātou nei.
A haakoè me io tātou i te mea e haatoko mai ;
tōtahi atu, a titii i te mīkeo te i haapākeka mai,
etià e tohuti tātou me te tohe te tīkakai i haaheiìa no tātou.
2 A tiòhi matiòka tātou ia Ietu te tumu o te haatià
atii me to īa pao ònaòna.
U titii Ietu i te koakoa haapeiìa no Īa
me to Īa amo i te peka, e memae aa e aha à te hakaìka.
I tēnei, u tānoho Īa i te ìma oko o te Etua.
3 A haamaakau ôtou ia Ietu te i mākakaìa e te poì mīkeo,
etià aòè ôtou e paòpaò, aòè e kuhane koè.
4 Tihe i tēnei, u te e tahe to ôtou toto
e tōtōua aa no te haahika i te mīkeo.
ALLELUIA ALLELUIA
cf. In.10,14-15
Ietu, te Tiaki meitaì, ua ìte i to Īa tau mutō,
atii me to Īa tau mutō ua ìte ia Īa :
u haaìò Īa i to Īa pohuè i uē ia âtou.
ÈVANERIO O IETU KIRITO VĀÀNA E RUKA 12, 49-53
I tēia mou pō, u peàu Ietu i to Īa tau kouâ pēènei :
49 « Ua tihe au no te kave mai i te ahi io he henua.
E kōhoà nei au e haauàìa i tēnei.
50 To mua e haakaò au i te memae,
me he mea te ènana e ùku i te vai no te papatema.
He mea òomi menava te tiaki epō e pao ai hua papatema.
51 E auana oti ta ôtou ua tihe mai au
no te haaneke i te moû io he henua ?
Aòè, to ù peàu ia ôtou :
umoì te haaneke i te moû, atià à te tōtōua.
52 Me i tēnei mou pō, ia noho tokoìma ènana io tītahi haè,
e paekē âtou : tokotoù, tokoùa.
E tōtōua atu tōtōua mai âtou.
53 E tōtōua te motua me ta īa tama, te tama me to īa motua.
E tōtōua te kui me ta īa moî, te moî me to īa kui.
E tōtōua te motuòai vehine me te huòna,
te huòna me te motuòai. »