TE KOÌKA EPIFANIA
(Â tapu 7 no Èhua 2024)
TOMOÌA : F.10
Kātahi mai tātou kōtoa Mea hahi i te Tama hou, Te Hatu Emanuera e, A ìte tātou, nā hoa e. |
I te henua Petereemi, Hakaìki hānau hou, Te pohuè o te poì. |
O Maria me Ioteve I te tūmoe nui I te kaokao o te Tama hou. |
Taramo : E ìteìa to Òe haapohuè mai, e te Hatu e,
e te tau henua me te tau mataèinaa paotū.
Kio Vānana : Ua ìte mātou i to Īa hetū.
Ua tihe mātou no te atoratio i te Hatu.
Pure a te poì haatià : A òko mai, e te Hatu e, i ta mātou pure.
A apuu mai.
ÙTUNA : F.2 GLORIA IN EXCELSIS DEO
1 I te pō, u ìteìa E te tau tiaki mutō. Ua tihe te anera Me tēnei hīmene hou. |
2 A haameitaììa Te Etua i ùka nui. Te moû io he henua To Īa hīa tiàtohu. |
3 O Īa te Arenio, Te kāìè me te moû. Na Īa i haakoè To te ènana mikeo. |
||
4 O Īa te Tapu Nui, Te hakanä to Īa Mana. E Tuhuka mahaò, E mana paona koè. |
5 I te kaokao o te Motua To Īa nohoka kāìè. Na Ietu to tātou Hatu E toko mai ia tātou. |
Anamnèse : Te kāìè ia Òe, te i mate, te pohuè.
Ietu to mātou Hatu, a tihe mai.
KŌMŌNIŌ : F.5
1 Mōumu
Ua mutu te àki me te henua, E ìò nei o Īa he tama iti,
Ua ìò te Tekao mea ènana. Te haapohuè me te tāvini.
2 3
I te tūmoe nui, u hānau mai nei Taioko te poì e memae nei
Ietu, te Māàma nui no te ao nei. Te i haapāpaku to âtou koekoe.
4 5
A hee mai, e te tau tiaki mutō Atii me tātou, a hee io Ietu
Me te koakoa i òto o te fātene. Atoratio me te haameitaì atu.
Action de grâces : Tu viens relever le faible
1 – Au-delà des océans, Tu es venu me chercher, Au-delà de mes tourments, Ton amour a triomphé, Montre-moi la splendeur Et la beauté qu’il y a À T’obéir de tout cœur, À se confier à Ta voix ! |
Refrain Tu viens relever le faible, Tu le prends dans tes bras, Tu le conduis vers ton Père, Qui le console ici-bas. Entends le cri de ma prière, Sois mon secours et ma joie, Passé de l’ombre à Ta lumière, J’ai mis mon espoir en Toi ! |
PAHIÌA : Couronnée d’étoiles
Refrain Nous te saluons, Ô toi, Notre Dame, Marie, Vierge Sainte, Que drape le soleil. Couronnée d’étoiles, La lune est sous tes pas, En toi nous est donnée L’aurore du salut. |
Marie, Ève nouvelle Et joie de Ton Seigneur, Tu as donné naissance à Jésus, Le Sauveur. Par toi nous sont ouvertes Les portes du jardin. Guide-nous en chemin, Étoile du Matin. |
TE KOÌKA EPIFANIA
TATAUÌA O TE HĀMANI O TE PEROHETA ITAIA 60, 1-6
1 A maô, e Ierutaremi e. A pupuà.
Ua tihe mai te àma no te haakeàpa ia òe.
Ua vāhī te kāìè o te Etua ia òe.
2 A tiòhi atu. Ua pō pōtako te henua vii pu.
Io te vao maù nui, ua noho te tau mataèinaa.
Atià, ua tū te Hatu. E pupuà nei to Īa kāìè i ùka o òe.
3 E haatata mai te tau mataèinaa io to òe māàma.
E tataha mai te tau hakaìki io to òe atauà.
4 A heau. A tiòhi matiòka vii pu o òe.
E hakātahi mai âtou nui. E titihe nei âtou paotū.
Ua tihe mai nei ta òe tau tama me i te henua mamao.
Ua hua mai ta òe tau moî, e tautuaìa âtou.
5 I hua ava e ìte òe, e èkaèka nui òe.
E ù to òe koekoe pī i te koakoa.
E tihe ai io òe te tau taetae me i te henua mamao.
E haapukeìa io òe te tau hāìna kē
me io te tau mataèinaa o te aomāàma vii pu.
6 E hihiti mai io òe te tau naho kamerō
o te Henua Matiana me te Henua Efa.
E titihe mai io òe te poì Hapa kave aa i to âtou
moni kiki me te mēmau kakaa.
E hahi âtou me te haakāìè i te Hatu Etua.
TARAMO 72 (71), 1-2, 7-8, 10ab.11, 12-13
E ìteìa to Òe haapohuè mai, e te Hatu e, e te tau henua me te tau mataèinaa paotū. cf. 72,11
E te Etua e, a tuku i to Òe mana i te hakaìki.
A tuku i to Òe toitoi i te tama o te hakaìki.
2 A vivini īa i to Òe mataèinaa vāàna i te toitoi.
A apuu īa me te toko i te poì veve e uēuē aa.
7 I hua tau â, e pupuà te hakatu pohuè vāàna i te toitoi,
I te henua, e puàha te moû ma te nuiìa o te tau meàma.
8 A vivini te hakaìki me io te tai tihe atu i te tai,
Me io te kaavai tihe atu i te kotina o te henua.
10 Te hakaìki o te Henua Tarati, o te tau motu
E kave mai i te vaetukia me te taetae kāòha.
11 E moe haatona i mua o īa paotū te tau hakaìki.
E tāvini no īa te tau henua me te tau mataèinaa.
12 E haapohuè īa i te ènana veve e vavaò ia īa,
E toko īa i te poì oomiìa e te àì.
13 E apuu īa i te ènana pōtako, mātua avai noa.
E tiòhi meitaì īa i ùka o te poì tupe noa.
TATAUÌA O TE HĀMANI A PAURO PEÀTO I TO EFETIA 3, 2-3a.5-6
E tu ù tau tuàne tuehine,
2 Ua òko hoì ôtou pēhea mēìa i to Īa vaièi,
ua tuku mai te Etua i te karatia no te hana i uē ia ôtou.
3 Ma òto o te hakiìa me io te Kuhane Meitaì,
u hakaìte mai te Etua i to Īa makimaki hakanā.
5 I te tau tai tehito,
aòè te tau ènana i ìte i hua makimaki hakanā.
Atià, i tēnei, ua hakiìa atu e te Kuhane Meitaì
i te tau Àpotoro o te Etua me te tau peroheta, pēènei :
6 U koàka mai i te tau êteni te tau taetae kuhane,
peàuìa òmua, hua mea anaiho me to te tau ati Iuta.
O âtou nui me he tau mēmau o te Tino e tahi.
Ia âtou, te poì êteni tūtaì me te tau ati Iuta,
te taetae vaièiìa i òto o te Kirito Ietu.
Oia hoì te tau puku o te Evanerio.
ALLELUIA ALLELUIA
cf. Mt.2,2
Ua ìte mātou i to Īa hetū.
Ua tihe mātou no te atoratio i te Hatu.
EVANERIO O IETU KIRITO VĀÀNA E MATEO 2, 1-12
1 U hānauìa Ietu i te kaavai Petereemi o te Henua Iutea,
i te ava o Herote te hakaìki o hua henua.
I hua mou â, u titihe mai i Ierutaremi, te mou Mākoi
me io te henua o te kēkē tiheìa òumati.
2 U peàu âtou :
« I hea te hakaìki nui o te tau ati Iuta te i hānau i tēnei tau pō ?
Ua ìte hoì mātou i to Īa hetū
io he henua o te kēkē tiheìa òumati.
Ua tihe mātou no te moe haatona i to Īa aò. »
3 Ia òko te hakaìki Herote i hua tekao, u emièe,
atii me to Ierutaremi ia ôtoa.
4 U haaputuputu mai īa i te tau tāuà nui paotū
me te tau tuhuka tekao o te mataèinaa.
Ua ūi atu Herote ia âtou :
« I te vahi hea e hānau ai te Kirito ? »
5 U peàu âtou ia īa :
« I Petereemi io te Henua Iutea,
vāàna i te mea i patuìa e te peroheta :
6 « O òe, e Petereemi o te Henua Iutea e,
aòè hoì òe he kaavai iti noa i te Henua Iutea !
Na te mea me io òe e tū ai te Hakaìki,
te Tiaki meitaì o Iraene, to ù mataèinaa. »
7 Ma te tekao hakanā, u vavaò mai Herote i te tau Mākoi
me to īa ape ia âtou no te haavivini toitoi mai
inehea i pupuà ai te hetū.
8 U pōpahi Herote ia âtou i Petereemi.
U peàu ia âtou pēènei : « A hee atu ôtou.
A ùmihi mamate i te tekao i ùka o hua Tama hou.
Me koàka ia ôtou te tekao, a haki mai ponihoo,
etià e hee me au e pakaihi ia Īa. »
9 U aotahi âtou i te hakaìki me to âtou tataha atu.
Enā te hetū ta te tau Mākoi i ìte òmua io te henua
o te kēkē tiheìa òumati, u pupuà i mua o âtou
me te tau io te vahi i èià te Tama hou.
10 E ìte aa i te hetū, u koakoa nui te tau Mākoi.
11 Ua uu âtou i òto o te haè me to âtou ìte
i te Tama hou me Maria, to Īa òna kui.
U momoe haatona âtou i to Īa aò.
E too aa i to âtou taetae, u ùtuna i te vaetukia :
te moni kiki, te èpau kakaa, te mira.
12 Ma òto o te hiamoe, u hakaìteìa i te tau Mākoi,
umoì âtou e hua io te hakaìki Herote.
Ua hua hoì âtou i to âtou henua ma he vaanui kē.