TOMINIKA E HĀ O TE PAKATE

(Â tapu 21 no Nāpeka 2024)

TOMOÌA : I.15 (Pō e ono) 

 2  Ua tū hakaùa Ietu, / To tātou Hatu mana nui.
     U pohuè ananu Īa. / Alleluia, Alleluia !

Z.170

TARAMO 118 (117) : O te keâ i titiiìa e te poì hakatū i te haè,

                                      o hua keâ avai noa, ua ìò he keâtaa.

Kio Vānana : Ua ìte Ietu, te Tiaki Meitaì, i to Īa tau mutō.

Ua ìte to Īa tau mutō ia Īa :

No âtou, u haaìò Īa i to Īa pohuè.

Pure a te poì haatià : E te Hatu e, a òko mai.          (Pō e ono) 

                                     E te Hatu e, a apuu mai i ta mātou pure.

                                     E te Hatu, apuu mai i ta mātou òna pure.

                                     E Ietu e, e tuku nei au i ta mātou nei pure.

ÙTUNA :     I.5

Haamaakauìa :  Te kāìè ia Òe, e te Hatu Ietu e,

                           te i mate nui, te pohuè ;

                          A tihe mai, e Ietu ; a tihe mai, e Ietu.

KŌMŌNIŌ : D.36 (Pō e ono)

K.1

Hīmene haahuaèkaèka : I.16

E ìte ôtou ia Ietu i Karirea ;

E ìte ôtou ia Ietu, ua tū hakaùa.

PAHIÌA : V.83 E MARIA E, ME IO ÒE TE PUNAÌA MAI

----------------------------------------------------------------------------------------

TOMINIKA E HĀ O TE PAKATE

TATAUÌA O TE HĀMANI O TE HANA A TE TAU ÀPOTORO  4, 8-12

⁸       Pī i te Kuhane Meitaì, u peàu Petero :

        « E te tau hakaìki me te tau kōkooūa,

⁹       i tēnei â, u haavāìa māua mēìa i ta māua hana meitaì

        i uē i te ènana takapii. Ua ape mai ôtou

        no te hakaìte atu pēhea te haapohuèìa i hua ènana.

¹⁰      A ìte ôtou paotū atii me to Iraene mataèinaa ia ôtoa :

        Ma te ikoa o Ietu Kirito no Natareti,

        te i pāokapekaìa e ôtou,

        te i hakatū hakaùa ìa e te Etua,

        ma hua ikoa, i maô ai me te meitaì te ènana nei i mua o ôtou.

¹¹      O Ietu te keâ i titiiìa e ôtou, te tau ènana hana hakatū i te haè.

        Ua ìò Īa he keâtaa.

¹²      I òto o Ietu anaè te pohuè.

        Aòè tītahi ikoa kē ma àò o te àki,

        i vāveka o te tau ikoa i apaìa e te tau ènana,

        te i haapohuè ia tātou. »

TARAMO 118 (117), 1.4, 8-9, 22-23, 28-29

 O te keâ i titiiìa e te poì hakatū i te haè, O hua keâ avai noa, ua ìò he keâtaa.      118,22

¹       A haahuaèkaèka i te Hatu : u matavaièi mai Īa.

        Paona koè to Īa kāòha.

⁴       A peàu te poì pakaihi i te Hatu :

        Paona koè to Īa kāòha.

⁸       U meitaì no te ènana te haatià i te Hatu,

        Aua e haatià te ènana i to īa tau hoa.

⁹       A haatià tātou i to te Hatu tokoìa mai.

        Umoì e haatià tātou e toko mai te poì mana.

²²      O te keâ i titiiìa e te poì hakatū i te haè,

        O hua keâ avai noa, ua ìò he keâtaa.

²³      Oiana te hana a te Hatu,

        E hana mahaò haapekahi ia mātou.

²⁸      O Òe to ù Etua, u haahuaèkaèka au ia Òe.

        E tu ù Etua e, u haatiketike au ia Òe.

²⁹      A haahuaèkaèka i te Hatu. U matavaièi Īa.

        Paona koè to Īa kāòha.

TATAUÌA O TO MUA HĀMANI A IOANE ÀPOTORO 3, 1-2

        E tu ù tau tama tāhia e,

¹       A kaituto me te mahaò i te nuiìa

        o to te Etua kāòha ia tātou.

        Ua ao Īa e apaìa tātou he tau tama no Īa.

        Ua ìò hoì tātou he tau tama tiàtohu no Īa.

        Oia te piò aòè to te ao nei e apuu ia tātou.

        Pēhea te koàka ? Aòè īa i ìte i te Etua.

²       E tu ù tau hoa tāhia e, i tēnei, he tama tātou a te Etua.

        E aha to tātou hakatu ma tītahi â ?

        U te e ìte meitaì tātou.

        E tahi mea tiàtohu anaiho :

        i te ava e hakaìte Ietu Kirito ia Īa iho,

        e ìò tātou hakatu me Īa,

        na te mea, he mata he mata, e ìte ai tātou ia Īa.

ALLELUIA ALLELUIA

                                                                                          cf. In.10,14-15

Ua ìte Ietu, te Tiaki Meitaì, i to Īa tau mutō.

Ua ìte to Īa tau mutō ia Īa : No âtou, u haaìò Īa i to Īa pohuè.

EVANERIO O IETU KIRITO VĀÀNA E IOANE      10, 11-18

        I tēia mou pō, u peàu Ietu :

¹¹      O au te Tiaki meitaì. E haaìò te Tiaki meitaì

        i to īa iho pohuè i uē i to īa tau mutō.

¹²      Me hana te ènana no te moni,

        aòè no īa te tau mutō, aòè īa to âtou tiaki.

        Ia tihe te rupo, ua rere veve īa, e avai aa i te tau mutō.

        Ua hao te rupo i te tau mutō me te haahikitararā ia âtou.

¹³      U te e haataetae hua ènana i te tau mutō,

        ua hana īa no te moni anaiho.

¹⁴      O au te Tiaki meitaì.

        Me he mea ua ìte to ù Motua ia ù me to ù ìte i to ù Motua,

¹⁵      ua ìte au i to ù tau mutō, ua ìte âtou ia ù.

        E haaìò au i to ù pohuè i uē i tu ù tau mutō.

¹⁶      Enā me tu ù tau mutō kē.

        Aòè âtou i òto o tēnei pāpua. E haatee au me ia âtou.

        E hakaòko âtou i to ù èo.

        E ìò ai te naho e tahi anaè, te tiaki mutō e tahi anaè.

¹⁷      U haataetae te Motua ia ù na te mea

        e haaìò au i to ù pohuè no te too hakaùa i hua pohuè.

¹⁸      Aòè te ènana e tahi e haamate ia ù.

        Na ù ta ù anaiho te haaìò i to ù pohuè.

        E mana to ù e haaìò i to ù pohuè

        me te too hakaùa ia īa.

        Oia nei te tekao i peàuìa mai e to ù Motua. »