TE KOÌKA O NĀ ÀPOTORO PETERO ME PAURO
NO TE Â KOÌKA 29 NO TŪHUA
TATAUÌA O TE HĀMANI HANA A TE TAU ÀPOTORO
12, 1-11
1 I tēia mou pō, ua hano te Hakaìki Herote
e mākaka i tahipito me io te Èkaretia.
2 U kukumi me te kohetā ia Iakopo, te tuaana o Ioane.
3 Ia ìte Herote u koakoa te tau ati Iuta,
u peàu no te humu ia Petero.
Oia te ava koìka haraoa haapupuhi koè,
te Koìka Pakate hoì.
4 Ia popokiìa Petero me te kave atu io he haèhumu,
u peàu Herote no te tiaki me nā pūpū e hā,
toohā kape tiaki ma tēia pūpū,
toohā kape tiaki ma tēia pūpū.
U makimaki Herote e haavā ia Petero
i mua o te mataèinaa, ma hope o te Koìka Pakate.
5 I òto o te haèhumu Petero,
ua nui te pure o te Èkaretia io te Etua
ma te hakaēa koè.
6 I te pō ma mua e haavā Herote ia īa, u hiamoe Petero
i vāveka o nā kape tokoùa, humuìa me nā tuitui e ùa.
I mua o te avaputa, ua tū te mou kape tiaki.
7 Ua tihe anamai te anera o te Hatu.
Ua pī nui te haèhumu i te māàma.
U hakavaa te anera ia Petero
ma te haatukia i to īa kaokao.
U peàu ia īa : « A tū ponihoo òe ! »
U kōèò nā tuitui me io nā ìma o Petero.
8 U peàu atu te anera : « A taka i te kooi,
a oka i te aihū. » Ua hana Petero atii.
U peàu hakaùa te anera :
« A uhi i to òe kahu uhi pu. A ūtaì ma muì o au. »
9 Ua uu Petero i vaho ma hope o te anera.
Aòè īa i vivini i te hana tiàtohu o te anera.
U maakau e moemoeā ta īa.
10 Atii, ua tihe âua ma tītahi kēkē
o to mua pūpū kape tiaki ;
i muì iho, ma tītahi kēkē o te ùa o te pūpū,
me to âua tihe i mua o te avaputa puhipuhi
ma èià te hee io te vaanui o te pāpuahaè.
U pepeù pu anamai te avaputa i mua o âua.
Ia tihe âua i vaho, ua taha atu io he vaanui.
U avai anamai te anera ia Petero.
11 A tahi a vivini Petero me to īa peàu :
« I tēnei, ua ìte au i te Tiàtohu : u pōpahi te Hatu
i to Īa anera no te haapohuè ia ù
me i nā ìma o Herote me te tau mea paotū
ta te poì ati Iuta e makimaki e hana i ùka o au. »
TARAMO 33 (34) 2-3,4-5,6-7,8-9
Ua haakoè Īa i to ù tau pūpūkina ia ôtoa. 34, 5
2 E haameitaì au i te Hatu ma te tau â paotū.
E hahi au i te Hatu i te tau vahi ia ôtoa.
3 Io te Hatu anaè to ù haakāìè.
A òko mai, te poì veve, a koakoa me âtou.
4 A haatiketike ôtou me au nei i te Hatu.
A haakāìè tātou nātoa i to Īa ikoa.
5 Ia ùmihi au i te Hatu, u tiòhi mai Īa.
U haakoè Īa i to ù tau pūpūkina ia ôtoa.
6 Te ènana e heau io te Hatu, e pupuà īa :
He moû, hakaìka koè to īa mata.
7 Ia taaàu te ènana veve, u hakaòko te Hatu,
Me to Īa haapohuè me io te mea haametaù mai.
8 Ua noho te anera o te Hatu ma to tātou kaokao
No te haapohuè i te ènana e pakaihi ia Īa.
9 A mai. A ìte me ôtou i te vaièiìa o te Hatu.
Mamau te ènana ia ìò te Etua to īa pātoko.
TATAUÌA O TE HĀMANI E ÙA A PAURO PEÀTO IA TIMOTEO
4, 6-8.17-18
6 O au à, u ùtunaìa au me he hēaka.
Ua tihe mai te ava o to ù paekē.
7 Tihe i te paoìa, u tōua au no te tekao tiàtohu.
U tohuti au, ua pao meitaì to ù tikākai.
Ua tohe mau no te haki atu i te haatià.
8 Oia nei te mea e toe :
ia koàka mai te heipaè kāìè ta te Hatu e tuku mai
i te  o to Īa Tiheìa, o Īa hoì te Haavā toitoi noa.
Aòè e tukuìa ia ù anaiho, atii me i te tau ènana paotū
te i tataì me te kāòha i te  o to Īa Tiheìa.
16 U titii te tau ènana paotū ia ù : aòè tītahi e toko mai.
17 Ua toko mai te Hatu. U vaièi mai i te ìi hou
etià e koàka ia ù te hakaìte atu i te Tekao
me te haamevaha i mua o te tau êteni ia ôtoa.
U haapohuè hoì te Hatu ia ù me io te niho o te reone.
18 E haapohuè mai te Hatu me io te tau ìno paotū
me to Īa aahi mai ia ù tihe io to Īa Patirēia o te àki.
Te kāìè ia Īa no te tau tai a tihe ananu. Àmene !
ALLELUIA. ALLELUIA Mt 16, 18
I ùka o te haatià o Petero,
e haatū Ietu i to Īa Èkaretia.
Aòè e hika i te mana o te havaiki pē.
ÈVANERIO O IETU KIRITO VĀÀNA E MATEO 16, 13-19
I tēia mou pō,
13 ua tihe Ietu i te Henua Ketare Firipo.
Ua ūi atu Īa i te tau kouâ pēènei :
« O ai òa te Tama a te Ènana,
vāàna i te mea i peàuìa e te tau ènana ? »
14 U haahua âtou : « Ta tahipito, o Ioane Papetita.
Ta tahipito, o Eria. Ta tahipito, o Ieremia,
akoè à tītahi me i vāveka o te tau peroheta. »
15 U peàu atu Ietu : « No ôtou à, o ai au nei ? »
16 U pohā te èo o Timone Petero me te haahua atu :
« O òe te Kirito, te Tama a te Etua pohuè. »
17 U haahua Ietu me te peàu :
« Mamau òe e Timone e, tama a Iona,
na te mea, aòè na te ènana i haamāàma ia òe ;
atià, na tu ù Motua te io he àki i hakaìte mai.
18 U peàu au ia òe : O Keâ to òe ikoa.
(Hua mea anaiho me Petero)
Ma ùka o hua papakeâ, e haatū au i to ù Èkaretia.
Aòè e hika e te mana o te havaiki pē.
19 E tuku atu au ia òe i te kirī o te Patirēia o te àki.
Te tau mea paotū ta òe e haamau io he henua,
e haamauìa io he àki.
Te tau mea paotū ta òe e vevete io he henua,
e veveteìa io he àki. »