INFOS / MOU TEKAO HAKAÌTE

   

24/04/2024 : 100000 VISITEURS EN 5 ANS - MERCI À TOUS - KOÙTAÙ NUI / VAIÈI NUI ÔTOU PAOTŪ !!! SUIVEZ MON ACTUALITÉ JOURNALIÈRE EN CLIQUANT SUR L’ICÔNE FACEBOOK CI-DESSOUS  !  À BIENTÔT ! ÒOA IHO ! --- Jacques Iakopo Pelleau  - - -

Le site de partage de la langue marquisienne
Te tohua niutavavā hou mea àva atu àva mai i te èo ènana
The new site for sharing the Marquesan language

Vue de la plage Vainaho et du Fort Collet, Taiohae, Nuku Hiva. René Gillotin, 1844.

Tau pure no te Tominika e toù o te Ava ma te Èhua, èhua B (21/01/2024)

« A ūtaì mai ia ù. E haaìò au ia ôùa he àvaika ènana. » « A ūtaì mai ia ù. E haaìò au ia ôùa he àvaika ènana. »

È

TOMINIKA E TOÙ O TE AVA MA TE ÈHUA

(Â tapu 21 no Èhua 2024)

 

TOMOÌA :     G.9

Haameitaì nei mātou

I te Patirēia o te àki

Ta Òe, e Ietu, i haamevaha,

No te poì nui hemo i te mate

Me te tau ènana i òto o te veve.

                 Mōumu
Hāìu te koekoe, ua tata te Patirēia.
U peàu te Hatu : Hāìu te koekoe !
A hua mai tātou io Ietu.

 

TARAMO 25 (24) : E te Hatu e, a hakako mai i to Òe tau vaanui.

       

Kio Vānana : Ua tata mai te Patirēia o te Etua.

                        A haatià ôtou i te Tekao Meitaì Hou Mai.

 

Pure a te poì haatià : No to Òe kāòha ia mātou, e te Hatu e,

                 (Pō e ono)     a hakaòko mai Òe i ta mātou pure.

                                     Apuu mai me te moû.

 

                                     E te Hatu, a òko mai !

                                     E te Hatu, a āpuu mai !

ÙTUNA :     D.27

                 1
O te koekoe toitoi
O to mua puku

O te Māàma.
Me io te Etua mai
Te koekoe vaièi i te moû.


U apuu Ietu
I te tau ènana paotū.
Hakatu kē, hakatu kē,
Hakatu kē, hakatu kē.

                2
O te koekoe pakaihi
Te hoa i te hoa

I mua o te Etua.
Me io te Etua mai
Te koekoe pakaihi i te hoa.

3  O te koekoe tāvini / I te tau ènana i òto te veve.
    Me io te Etua mai / Te koekoe tāvini i te veve.

 

 

Haamaakauìa : Te kāìè ia Òe te i mate no mātou.   

                           Te kāìè ia Òe te pohuè nei ananu. 

                           E to mātou Hatu e, e to mātou Etua,

                           A tihe mai Òe, e Ietu, te Haapohuè.

 

KŌMŌNIŌ :   D.27          (Pō e ono)    

          1
E Ietu, e Ietu e,
Etua tiàtohu,
Ènana tiàtohu Òe,
Ua noho pohuè hoì Òe
I òto o te mataèinaa.

E Ietu, o Òe te tumu,
E Ietu, o Òe te hiku
O nā mea kōtoa.
E Ietu, òmua naoti,
E Ietu, i tēnei, ananu
To mātou Hatu.

          2
E Ietu, e Ietu e,
U hakāòha mai Òe
I te tau ènana paotū.
E moû, e kāòha anaè
To Òe hakatu Etua.
 

3
E Ietu, e Ietu e,
O Òe te Tekao
I te tumu anamai io te Etua,
U haaènanaìa Òe
No te haapohuè ia mātou.

4
E Ietu, e Ietu e,
E ùmihi nei Òe
I te tau hoa pii tini tini
No te pōpahi ia âtou
I te kākano meitaì ananu.

 

D.14

1
Ietu e, Òe te Kirito ;
Vaièi mai to Òe kāòha
I ùka o mātou nei
No te noho me Òe.

   3
Ietu e, Òe te Pohuè ;
Tuku mai to Òe nino tapu !
E oà no mātou nei
No te pohuè me Òe.

2
Ietu e, Òe te Vaanui ;
A pahi mai to Òe Kuhane
I ùka o mātou nei
No te taha me Òe.

      4
Ietu e, Òe te Mana nui ;
Tiiki mai to Òe toto mana !
E inu no mātou nei
No te hana me Òe.

 

Hīmene haahuaèkaèka : G.4

1
A ūtaì tātou me Ietu,
To tātou hoa pii,
Te puta o te àki,
Te puta hāpiti oko.

Mōumu
E te Hatu e,
A hahi mātou ia Òe,
I To meitaì e,
Ma te tau tai ananu.

2
A ape à tatou ia Ietu,
I te tau â haaoke,
Ia òko tātou to Īa èo,
Tohuti tātou io Īa.

 

PAHIÌA : V.79           (Pō e ono)    

1
E Maria, e te kui tāhia e,
O Òe te i tupu mikeo koè,
A pure Òe i to Tama Etua,
No mātou e vevaò nei ia Òe.

Mōumu
Kōnini, e Maria peàto e,
Kōnini oko to Òe ikoa,
Te kui, te virikine ananu,
Te kuà o to te àki pootu.

  

2  E Maria, e te kui tāhia e, / Te kui o Ietu, to tātou Hatu,

   A pure Òe (i) to Tama Etua / No mātou, ia kē ananu me Ietu.

T.1

1
Mamau te koekoe aotahi
I te vevaò a te Hatu ;
Me i te henua memao,
Ua hiti te keèe na Òe,
Ma te ava, ma te ava tai nui.

Mōumu
E èo no Òe, e te Hatu e,
A taha, a taha ma nā henua kōtoa ;
A hakaìte i to te ao nei
E haatāhia nui au nei.

 

2  E aha e mea mahaò / Te hana i hanaìa e Òe
    I uē i te poì kikino ; / U tīmata te hāìuìa koekoe
    O te huaa, o te huaa êteni.

 

---------------------------------------------------------------------------------------

 

TOMINIKA E TOÙ O TE AVA MA TE ÈHUA

TATAUÌA O TE HĀMANI A IONA      3, 1-5.10

1       U peàu te Hatu Etua ia Iona pēènei :

2       « A tū òe ! A taha atu i Ninive io he pāpuahaè karaiha.

        I èià, a haaòko nui i te tekao ta ù e hakaìte atu ia òe. »

3       Ua tū Iona me te hee i Ninive, vāàna i te Tekao a te Hatu.

        O Ninive à, he pāpuahaè kaùoo, kaùoo oko :

        e toù pō te heeìa me io tītahi kēkē io tītahi kēkē.

4       Ua tomo Iona io he pāpuahaè e tahi pō anaè.

        U haaòko nui īa i te tekao :

        « E hā ònohuu pō i toe, a tahi a haahikaìa Ninive. »

5       Te tau ènana noho aa i Ninive,

        u haatià anamai âtou i te Etua.

 

10      Ua ìte te Etua i to âtou haaoke. U hāìu âtou i te koekoe.

        U tāvaè te Etua me te haakoè i to Īa pekē.

        Aòè te Etua e haatopa i ùka o âtou i te tuki pekē.

 

TARAMO 25 (24) 4-5b, 6-7, 8-9

 E te Hatu e, a hakako mai i to Òe tau vaanui.      25,4

 

4       E te Hatu e, a hakaìte mai i to Òe makimaki.

        O Òe iho, a hakako mai i to Òe tau vaanui.

5       A haatee mai to Òe tiàtohu : a haamāàma mai.

        O Òe hoì te Etua e haapohuè ia ù.

 

6       E te Hatu e, a haamaakau i to Òe uē,

        Me i kiu mai to Òe kāòha te i noho mau.

7       A māhaè i te tau tekateka o to ù houìa,

        Umoì e titii atu ia ù nei : a haamaakau mai.

 

8       U meitaì, u toitoi anaè te Hatu

        Te i hakaìte i te vaanui i te poì hukaka.

9       U aahi to Īa toitoi i te poì haapāpaku,

        U hakako i to Īa makimaki i te ènana kāìè koè.

 

TATAUÌA O TO MUA HĀMANI A PAURO PEÀTO I TO KORINETIA   7, 29-31

29      E tu ù tau tuàne tuehine, oia nei tu ù tekao ia ôtou :

        he mea poto te ava i toe, u tihe te paoìa o te aomāàma nei.

        No èià, ia noho tahipito me te vehine,

        a pohuè âtou me he mea e vehine koè.

30      Ia mateteka tahipito, me he mea u uēuē koè âtou.

        Ia koakoa tahipito, me he mea u koakoa koè âtou.

        Ia hoko mai tahipito i te tau mēmau,

        me he mea aòè no âtou te tau taetae te i koàkaìa mai.

31      Te tau ènana te i hana me te tau mēmau o te ao nei,

        a hana âtou me he mea aòè o âtou te hatu o hua tau mēmau.

        Na te mea, e huìkē ananu te hakatu o te ao nei.

 

ALLELUIA ALLELUIA

                                                                                          Mk 1,15

Ua tata mai te Patirēia o te Etua.
A haatià ôtou i te Tekao Meitaì Hou Mai.

 

EVANERIO O IETU KIRITO VĀÀNA E MAREKO      1, 14-20

14      Ma hope o to Ioane haaìòìa,

        ua hiti Ietu io he Henua Karirea.

        U hakaìte atu Īa i te Tekao Meitaì Hou Mai me io te Etua.

15      U peàu Īa pēènei :

        « Ua pao te ava i haaheiìa.

        U tata èka te Patirēia o te Etua.

        A hāìu ôtou i te koekoe.

        A haatià i te Tekao Meitaì Hou Mai ! »

16      E taha aa Ietu ma te hiku o te tai Karirea,

        ua ìte ia Timone me Aterea, to īa teina.

        Ua haatopa âua i te ùpena io he tai.

        He mou ènana àvaika hoì âua tokoùa.

17      U peàu Ietu ia âua :

        « A ūtaì mai ia ù. E haaìò au ia ôùa he àvaika ènana. »

18      U avai anamai âua i te tau ùpena me te ūtaì ia Īa.

19      Ua taha Ietu i te ava poto.

        Ua ìte Īa ia Iakopo, tama na Ihepetea, me Ioane, to īa teina.

        Ua noho me âua i òto o te vaka no te kānea i te tau ùpena.

20      A tahi a vavaò Ietu ia âua.

        U avai âua io he vaka

        ia Ihepetea, to âua motua, me te poì hana.

        Ua ūtaì âua ia Ietu.

 

Plus dans cette catégorie : « Tau pure no te tominika e ùa o te Ava ma te Èhua, èhua B (14/01/2024) Tau pure no te tominika e hā o te Ava ma te Èhua, èhua B (28/01/2024) »

Comments est propulsé par CComment

Retour en haut