TOMINIKA E HĀ O TE AVA HAAOKE
(Â tapu 10 no Pohe 2024)
TOMOÌA : G.10 (Pō e ono)
1 |
Mōumu |
2 |
G.4
1 |
Mōumu |
2 |
Penitenia
TARAMO 137 (136) : E te Hatu e, a haamaakau i to Òe kāòha,
a haapohuè mai ia mātou.
Hīmene vānana : Te Kāìè me te hahi ia Òe, e te Hatu, e Ietu e.
Kio vānana : Mēìa i te nuiìa o to Īa kāòha i to te ao nei,
u tuku mai te Etua i ta Īa Tama tootahi ;
te ènana i haatià ia Īa, e koàka hoì te pohuè ananu.
Pure a te poì haatià : E te Motua e, a òko mai ia mātou, ta Òe tau tama.
ÙTUNA : G.3
1 |
2 |
3 A mave mai, e Ietu e, / E pepeù nei mātou, (e Ietu e)
I to mātou hōupo, / Òe te Hakāòha.
Haamaakauìa : Te kāìè ia Òe te i mate no mātou.
Te kāìè ia Òe te pohuè nei ananu
E to mātou Hatu e, e to mātou Etua,
A tihe mai Òe, e Ietu, te Haapohuè.
KŌMŌNIŌ : D.38
1
|
2 |
|
3 |
E Ietu, te Oà Pohuè, |
Hīmene haahuaèkaèka : G.9
Haameitaì nei mātou i te Patirēia o te àki Ta Òe, e Ietu, i haamevaha, No te poì nui hemo i te mate Me te tau ènana i òto o te veve. |
Mōumu |
PAHIÌA : V.83
E Maria e, Me io Òe te punaìa mai, Te kākāno o te Pohuè. |
Te Hatu Ietu, te Kirito, Hakaìki nui, Tuhuka e, Te Mana nui. |
Maria, Maria, Maria e, A apuu mai. Maria, Maria, Maria e, A pure mai. |
TOMINIKA E HĀ O TE AVA HAAOKE
TATAUÌA O TE ÙA O TE HĀMANI PARARIPO 36,14-16.19-23
14 I te ava e hakaìki aa Hetetia,
paotū te tau vivini tāuà me te mataèinaa
u pūtuì âtou i te Etua,
e haapao aa i te tau hana mākaka nui
me he mea to te tau mataèinaa êteni.
U haameìe âtou i te Hiero o Ierutaremi
i haatapuìa e te Hatu.
15 Na te Etua o to âtou tupuna e pōpahi anamai
ma te hakaēa koè, i te tau keèe
na te mea, u hakāòha Īa i te haè tapu
atii me to Īa mataèinaa.
16 Atià, o âtou i haamee nei i te tau keèe a te Etua,
e kakata aa i to âtou tau tekao,
e māio aa i te tau peroheta.
No èià, tōtahi atu to te Etua pekē i to Īa mataèinaa.
19 Ua tihe mai te hatu kape Papironia,
me to âtou tutu me te ahi i te Hiero o te Etua.
U vāvahi âtou i te tau pākeâ o Ierutaremi,
u haapūovo âtou i te tau haè hakaìki
me te tau taetae nui i òto.
20 Te tau ati Iuta, u te e haamate koè ìa,
u aahi te hakaìki Naputonoro ia âtou i Papironia
me he poì mōèhu.
Ua ìò âtou he tau ènana tueni no te hakaìki
me ta īa tau tama, tihe i te ava i hika ai Papironia
i te tau hakaìki o te Henua Pereha.
21 Ma èià, ua pao te tau tekao ta te Hatu
i hakaìte mai i te peroheta Ieremia, pēènei :
« E mamapeìa te henua.
E hakaēa te henua e hitu ònohuu èhua,
aòè e hua i te puku.
Oiana te tuki o te nuiìa o te tau Tāpati i pakaihi koè ìa. »
22 Atià, i to mua èhua o te hakaìkiìa o Kiruto
i te Henua Pereha, u haamāàma te Etua ia īa,
etià e paoa te tekao i peàuìa e te peroheta Ieremia.
U hakaìte atu Kiruto ma io to īa henua vii pu
me to īa patu iho pēènei à :
23 « Oia nei te tekao a Kiruto, te Hakaìki o te Henua Pereha.
U vaièi mai te Hatu, te Etua o te àki,
i te mana no te vivini i te tau henua paotū o te ao nei.
U peàu mai no te hakatū no Īa i te Haèpure
i Ierutaremi, io te Henua Iutea.
No èià, ôtou, e te poì ati Iuta,
ôtou paotū, e te mataèinaa vaeìa e te Etua,
me ôtou te Hatu no te hua atu i Ierutaremi. »
TARAMO 137 (136),1-2, 3, 4-5, 6
E Ierutaremi e, haè o tu ù tau hoa, Taetae atu i to ù iho pohuèìa. cf. .137,6
Akoè à
E te Hatu e, a haamaakau i to Òe kāòha, a haapohuè mai ia mātou.
1 Io te tau kākaavai o te Henua Papironia,
U nonoho mātou me te uēuē,
2 E maakau ana me te aumiti ia Tiona.
U tauèvaìa te kitā io te tumuâkau.
3 I èià, ua ape mai te tau ènana tiaki
No te haataki i te èo haakoakoa.
Ua ape mai te poì i hao ia mātou,
No te hīmene ma òto o te èo Tiona.
4 Pēhea e taki to tātou èo no te hīmene,
E noho aa me te uē io te henua hāoè.
5 Me haamāhaè au ia òe, e Ierutaremi e,
A moô, a haakopaìa to ù ìma oko.
6 A paka meô to ù èo io he haha,
Ia haamāhaè au me te haamee ia òe,
E Ierutaremi e, te haè o tu ù tau hoa,
Taetae atu i to ù iho pohuèìa.
TATAUÌA O TE HĀMANI A PAURO PEÀTO I TO EFETIA 2, 4-10
E tu ù tau tuàne tuehine.
4 Atià, mea nui to te Etua hakāòha mai,
mēìa i te nui o to Īa uē ia tātou,
5 u haapohuè te Etua ia tātou kātahi me te Kirito,
tātou hoì he huaa mamate mēìa i te mikeo.
Na to Īa vaièi mai anaè, u haapohuèìa ôtou.
6 U hakatū hakaùa te Etua ia tātou, e tahi me Ietu Kirito,
me te haanoho ia tātou io he àki, e tahi me Ietu Kirito.
7 Oia to te Etua vaièiìa mahaò i uē ia tātou,
i òto o te Kirito.
U makimaki hoì Īa e hakaìte atu i te tau tai ènana paotū
i to Īa kāòha,
nui atu i te mea e kaitutoìa e te tau ènana.
8 U haapohuèìa ôtou na te karatia o te Etua, mēìa i te haatià.
Aòè me io ôtou anaiho hua haapohuèìa,
he taetae kāòha ta te Etua i vaièi mai.
9 Aòè mēìa i to ôtou tau hana meitaì,
etià umoì e haakāìè pu te ènana e tahi anaiho.
10 U kānea hoì te Etua ia tātou.
Na Īa i pēpena ia tātou, i òto o te Kirito,
etià he toitoi noa ta tātou hana meitaì,
vāàna i te hakatu pohuè ta te Etua i hakaìte mai.
HĪMENE VĀNANA :
In.3,16
Mēìa i te nuiìa o to Īa kāòha i to te ao nei, u tuku mai te Etua i ta Īa Tama tootahi ; te ènana i haatià ia Īa, e koàka hoì te pohuè ananu.
EVANERIO O IETU KIRITO VĀÀNA E IOANE 3, 14-21
I tēia mou pō, u peàu Ietu ia Nikotemo, pēènei :
14 I te henua ataha, u hapai Moite i te ata nenie o te puhi henua.
15 Atii anaiho e hapaiìa te Tama a te ènana,
etià e koàka mai i te ènana haatià ia Īa te pohuè ananu.
16 Mēìa i te nuiìa o to Īa kāòha i to te ao nei,
ua tuku te Etua i ta Īa Tama tootahi,
etià aòè e mate ai te ènana i haatià i hua Tama,
e koàka hoì ia īa te pohuè ananu.
17 U te e pahi te Etua i ta Īa Tama i te ao nei
no te hakatio i te tau ènana,
atià no te haapohuè ia âtou.
18 U te e hakatio te Etua i te ènana haatià i te Tama.
Atià, te ènana haatià koè, u hakatio te Etua ia īa.
Na te mea, ua ao koè īa i te haatià
i te Tama Tootahi a te Etua.
19 Pēènei te tumu o te haatoitoi i te tekao :
ua tihe i te ao nei te māàma tiàtohu,
aòè te tau ènana i apuu i hua māàma.
U haataetae atu âtou i te pōtako,
na te mea ua pē to âtou hakatu pohuè.
20 Te ènana hoì te i hana i te hana pē, u haahaa īa i te māàma.
Aòè e haatata mai īa me te māàma,
oa hakaìteìa ta īa tau hana pē.
21 Ia hana te ènana i te hana vāàna i te tiàtohu,
u haatata mai hua ènana me te māàma,
etià e hakaìteìa to īa aotahi atu i te Etua.