Le site de partage de la langue marquisienne
Te tohua niutavavā hou mea àva atu àva mai i te èo ènana
The new site for sharing the Marquesan language

Vue de la plage Vainaho et du Fort Collet, Taiohae, Nuku Hiva. René Gillotin, 1844.

Tai èhua, tai mataìki

Ma tai kākiu, o puni te ikoa o te èhua meàma.

                        secheresse uapou  pluies marquises

O te meàma mataìki to mua meàma o hua èhua ; ma te òaìa o hua meàma, e kaò te matahetū apaìa Heimataìki. Te meàma èhua, o te iva o hua èhua kākiu ; he mea taetae oko no te mea, ma te òaìa o hua meàma, e tupu ai te kohiìa mei nui.

Ohia u haahanaìa te tuhitū a te hāoè i te Henua ènana, ua ìò te meàma èhua to mua meàma o te èhua hou ; atii ua too i te ava o te ponatekao puni.

I tēnei tai hou, ia makimaki òe e tekao no te ava kamaìi me te ava veàveà o te èhua, he mea te ponatekao. I te tai kākiu à, e ùa ponatekao .

Me i te meàma Nāpeka tihe atu i te meàma Oaoamanu, e puhi nei te metaki me i te kēkē tuātoka aìna kanauu ; oia te ava e kaò ana te matahetū mataìki. I peàuìa ai hua ava, te tai mataìki ; oia te ava āìna kamaìi.

Me i te meàma Aveà tihe atu i te meàma Pohe, e puhi nei te metaki mei te kēkē tuātoka aìna tiu. Mēìa enā te meàma èhua i òto o hua ava, i peàuìa ai, te tai èhua ; oia te ava veàveà o te èhua.

A haamaakau : o te tai èhua te ava veàveà o te èhua, o te tai mataìki te ava kamaìi .

Mēìa ua ìò te meàma èhua to mua meàma o te èhua hāoè ; i haahanaìa ai mea ape atu i to te ènana èhua. A tiòhi meitaì i te hakatu kānea i te apeìa me te tekao haahua !

« E hīa o òe èhua ? E toù ònohuu o au èhua » ; ia haahanaìa tītahi nūmera, e ìò o « to/ta » he « o/a » …

 

A pīòmi înei no te tatau i te tumu tekao  ma he èo farani...

 

Patuìa e Jacques Iakopo Pelleau i te èhua 2015.
I te 08/08/2022, u haatoitoiìa te patuhei vāàna i te tau aahiìa a te Haè tuhuka èo ènana.

 

 

Comments est propulsé par CComment