TE TEKAO A TE ETUA NO TE ÈHUA KIRITIANO B
TO MUA TOMINIKA O TE AVA TETAÌ
TATAUÌA O TE PEROHETA ITAIA 63, 16b-17.19b ; 64,2b-7
16 E te Hatu e, o Òe to mātou Motua me to mātou Haapohuè.
Oia nei to Òe ikoa me i kiu mai.
17 E te Hatu e, no te aha u avai Òe ia mātou
e hukaka ana mamao me io to Òe vaanui ?
No te aha na Òe e haaheò o i to mātou koekoe,
te i pakaihi koè i to Òe ikoa ?
A hua mai, e te Hatu e, i uē i to Òe tau tāvini,
i uē i te tau ati ta Òe e haataetae !
A iho mai io mātou ! I mua o Òe, e èhu ai te tau tuaivi.
64,2 Ua iho mai hoì Òe, e te Hatu e.
I to Òe aò, ua èhu te tau tuaivi.
3 I te tai tehito òmua naoti, aòè i òko te tau ènana.
Aòè e tahi ènana i ìte i te Etua te i hana
me he mea ta Òe i uē i te poì e pakaihi ia Òe .
O Òe anaè, e te Hatu e.
4 Ua pii Òe me te ènana e aotahi ana ia Òe me te koakoa,
te ènana e haamaakau ia Òe e taha ana io to Òe vaanui.
5 Ua pekē Òe mēìa i to mātou tohe i te mikeo.
E aha à e haapohuè Òe ia mātou,
he tau ènana havaìa i te mikeo mātou nui ;
me he kahu tīèpo i to mātou tau hana meitaì.
Ua puhi te mikeo ia mātou me he mea a te metaki.
6 E te Hatu e, u te e vavaò e tahi ènana i to Òe ikoa.
Aòè i matavaa e tahi ènana no te hahi ia Òe.
Mēìa i to Òe mata koè ia mātou,
u avai mai i te mana o to mātou tau mikeo.
7 Atià o Òe, e te Hatu e, to mātou Motua,
u hakatu Òe me te ènana kānea hue me te èpo pipii.
O mātou nui te hana o to Òe îìma.
TARAMO 80 (79), 2.3bc, 15-16, 18-19
Te Etua e, a haahua ia mātou i te meitaì !
A matavaièi mai, e pohuè ai mātou ! 80, 4
2 E te Tiaki o Iraene, a hakaòko i ta mātou pure !
O Òe te i haatee mai me he mea i te naho mutō.
3 A haapupuà i to Òe mana !
A mai ! A haapohuè ia mātou !
15 E te Etua mana nui e, a matavaièi mai !
A tiòhi Òe me io he àki, a ìte meitaì !
16 A toko i te tumuvino nanuìa e to Òe ìma,
I te huì ta to Òe mana i haatupu !
18 A toko to Òe ìma i te ènana vaeìa e Òe,
I te tama a te ènana ta Òe i hakatū !
19 Koè nui e paekē mātou me io Òe !
A haapohuè mai, e hahi mātou i to Òe ikoa !
TATAUÌA O TO MUA HĀMANI I TO KORINETIA 1, 3-9
3 Ia ôtou te karatia me te moû
me io te Etua, to tātou Motua, me io te Hatu Ietu Kirito.
4 U te e hakaēa au i te haahuaèkaèka i te Etua
e kaituto ana ia ôtou, mēìa i te karatia
ta te Etua i vaièi ia ôtou i òto o Ietu Kirito.
5 I òto o Īa hoì, u koàka mai ia ôtou te tau taetae ia ôtoa,
to te Tekao a te Etua atii me to te ìte māàma i te Etua.
6 Na te mea, i vāveka o ôtou, ua noho mau
te tekao haatiàtohu i te Kirito.
7 No èià, aòè e tahi taetae kāòha o te karatia
i toe no ôtou, ôtou te i tiaki nei
i te Tiheìa o to tātou Hatu Ietu Kirito,
8 Na Īa e toko ia ôtou no te tohe mau
i òto o te haatià tihe i te paoìa, etià e piò koè ôtou,
i te â e tihe to tātou Hatu Ietu Kirito.
9 Aòè e hakahae te Etua ia ôtou, u tiàtohu ta Īa tekao.
no te haatahi me ta Īa Tama, Ietu Kirito to tātou Hatu.
ALLELUIA ALLELUIA
cf.Ta.85,8
E te Hatu e, a hakaìte mai i to Òe kāòha.
A vaièi mai i to Òe haapohuèìa.
EVANERIO O IETU KIRITO VĀÀNA E MAREKO 13, 33-37
I tēia mou pō, u peàu Ietu i to Īa tau kouâ :
33 « A tiòhi meitaì ia ôtou ! A matavaa !
34 U hakatu me te ènana e hee atu i te henua mamao.
Na te tau tāvini e tiòhi i te tau mēmau paotū.
U haatoitoi īa i te hana ta tēnei, ta tēia e hana atu.
U peàu i te tueni tiaki i te avaputa : a matavaa !
35 A matavaa hoì !
Aòè ôtou e ìte a hea e tihe mai ai te Hatu o te haè :
i te ahiahi oti ? I te tūmoe nui oti ?
Ia taki te moa oti ? I te pōpōuì tika oti ?
me te koàka mai ia Īa e hiamoe ana ôtou.
e peàu au i te tau ènana paotū : a matavaa ! »
TOMINIKA E ÙA O TE AVA TETAÌ
TATAUÌA O TE PEROHETA ITAIA 40, 1-5.9-11
1 Oia nei te tekao a to ôtou Etua :
« A haamaha te uē, a haamaha te uē, e to ù mataèinaa.
2 A kōnini ta òe tekao no te peàu i Ierutaremi :
ua ìò i te hooi i to īa tau mikeo.
Na te ìma o te Hatu to īa tuki haamamae,
mēìa i to īa tau hana tekateka. »
3 U taaàu te èo : « I te henua ataha,
a haapei ôtou i te tiheìa o te Hatu.
I te henua ataha, a kānea te vaanui no te Etua.
4 A haapī meitaì i te tau kākaavai paotū.
A haapāàhaaha i te tau tuaivi me te tau pūkei.
A haamenia i te vaanui keâkeâ.
A pepeù te ava i ùka o te tau kapua tuaivi.
5 A tahi a pupuà te kāìè o te Hatu Etua.
E ìte ai te tau ènana paotū i te mea
me io te haha o te Etua hua haahitipona i te tekao.
9 A piki òe ma ùka o te tuaivi tiketike,
e te keèe te i kave atu i te tekao i Tiona.
e te keèe i kave i te tekao hakaìte i Ierutaremi.
A tekao me te èo oko : umoì e haametaù.
A haki atu io te tau pāpuahaè o te Henua Iutea :
« Eīa to ôtou Etua.
10 Eīa te Hatu Etua e tihe nei me te mana nui.
Ua ìò te vivini ia Īa. Me Īa te tau taetae
ta Īa i koàka mai ma òto o te tōtōua.
I mua o Īa te tuki kāìè i koàka mai.
11 U hākai Īa i to Īa naho hakatu me te ènana tiaki mutō.
Na to Īa ìma e haaputuputu i te tau mutō kakaiū,
TARAMO 85 (84), 9ac-10, 11-12, 13-14
E te Hatu e, a hakaìte mai i to Òe kāòha !
A vaièi mai i to Òe haapohuèìa ! 85,8
9 E hakaòko au : E aha òa ta te Hatu e peàu ?
Oia nei ta te Hatu Etua i peàu :
te moû no to Īa mataèinaa.
10 U tata èka to Īa haapohuè no te ènana haatià.
E noho te kāìè o te Etua io to tātou henua.
11 U tutuki te kāòha me te tiàtohu.
U hoki atu hoki mai te toitoi me te moû.
12 E tupu te tiàtohu me io he henua.
E tiòhi mai te toitoi me io he àki.
13 E vaièi mai te Etua i to Īa taetae kāòha.
E hua to mātou henua i to īa puku.
Taha te toitoi ma mua o te Hatu.
14 E hakaìte hua toitoitìa i te vaanui.
TATAUÌA O TE HĀMANI E ÙA A PETERO ÀPOTORO
3, 8-14
E tu ù tau tuàne tuehine tāhia e,
8 Oia nei e tahi tekao, umoì ôtou e māhaè.
No te Hatu, u hakatu te â e tahi me te tautini, tini èhua.
Atii hoì no te Hatu, ua tūtū te tautini,
9 U te e haatevee te Hatu i te haapao
i te mea ta Īa i peàu mai,
me he mea e maakau nei tahipito.
U haaòa, òa te Etua i to tātou tetaììa,
na te mea aòè Īa i makimaki e kaò e tahi ènana.
U makimaki Īa e hāìu te tau ènana paotū i te koekoe
no te hua i te meitaì.
10 Atià, e tihe te â o te Hatu me he ènana kamo.
I hua â, e koè ai te ataàki ma òto o te pokokina nui.
E koè ai te tau mēmau ia ôtoa, e haaèhuìa âtou me te ahi.
Te henua atii me to īa tau mēmau paotū e haapūovoìa.
11 Ohia e koè ai te tau mēmau paotū o te ao nei,
a pohuè ôtou me he tau ènana e tāvini i te Etua,
12 A tetaì ôtou, a hana i te hana meitaì
etià e tihe mai ponihoo te â o te Hatu.
I hua â, e koè ai te ataàki na te ahi uàuà,
e èhu nui te tau mēmau i pūovo.
13 Atià, vāàna i te tekao a te Hatu, e tetaì nei tātou
i èià, e tae toitoi noa te makimaki o te Etua.
mēìa e tetaì tātou i hua mea i peàuìa,
a hana tātou vāàna e koàka mai i te Kirito
ôtou nui, piò koè, teka koè, e noho ana me te moû.
ALLELUIA ALLELUIA
cf. Rk.3,4.6
A haapeipei i te putaìa mai o te Hatu.
A haapāàhaaha i to Īa vaanui.
E ìte te ènana paotū i te haapohuèìa o te Etua.
EVANERIO O IETU KIRITO VĀÀNA E MAREKO 1, 1-8
1 Te tīmataìa o te Evanerio o Ietu Kirito, Tama a te Etua.
2 Vāàna i te mea i patuìa i òto te hāmani o Itaia te peroheta :
« Eīa e pōpahi au i to ù keèe i mua o òe.
Na īa e haapei i to òe vaanui.
3 I te henua ataha, u taaàu e tahi èo, pēènei :
« A haapei ôtou i te putaìa mai o te Hatu.
A haapāàhaaha i to Īa vaanui. »
4 Ua tihe mai Ioane i te henua ataha
me to īa hakaìte atu i te papatema
no te hāìu i te koekoe, etià e haakoèìa te tau mikeo.
5 U titihe mai io īa to Iutea henua ia ôtoa
me to Ierutaremi paotū.
U koàka ia âtou te papatema ma io īa
i òto o te vaitahe Ioritane,
e haki aa i to âtou tau mikeo.
6 Ua uhiìa Ioane i te kahu huu kamerō,
e taka kii puaka to īa taka kooi.
Ua kai īa i te tau manu kakaiū me te mānini tikauè kaipekā.
7 U hakako Ioane i te tekao me ta īa peàu :
« Enā a tihe mai tītahi ma hope o au nei :
he mana kaùoo to Īa, he mana iti to ù nei.
Aòè e hei ia oha au pii to Īa nā vaevae
no te vevete i te aho o to Īa aihū.
8 O au â, u papatema au ia ôtou me te vai,
o Īa e papatema ia ôtou i òto o te Kuhane Meitaì. »
TOMINIKA E TOÙ O TE AVA TETAÌ
TATAUÌA O TE PEROHETA ITAIA 61, 1-2a 10-11
1 I ùka o au nei te Kuhane o te Hatu Etua,
na te mea u haapeàto mai ma te paùìa me te kao tapu.
U pōpahi mai te Hatu ia ù
no te kave atu i te Tekao Meitaì Hou Mai i te poì veve,
no te haaūo i te koekoe o te poì kuhane koè,
no te hakaìte atu i te poì humu to âtou veveteìa,
2 no te haamevaha i te tekao o te èhua o te vaièìa
ta te Etua e tuku mai.
10 U haaèkaèka tu ù kuhane i te Hatu.
Ua û i te koakoa tu ù kuhane i òto o te Etua.
Na Īa i vāhī mai me te kahu kaèkaè o te ènana piò koè.
Na Īa i haauhi mai me te kahu tavaìè o te piò koè.
U hakatu au me he vāhana mātiri hou tāpīìa me te heipua,
hakatu me he vehine hou tāpīìa
me te tapeà puaìka me te koro.
11 Me he mea u haatupu te tuaèpo i te kākano,
me te tiò o te tau kohoe hou,
atii ta te Hatu e vaièi mai i te hakatu pohuè toitoi.
E hahiìa te Etua i mua o te tau mataèinaa ia ôtoa.
HĪMENE : RUKA 1,46-48, 49-50, 53-54
Ua û i te koakoa to ù koekoe
mēìa i te Etua, to ù Haapohuè. cf. It.61,10
46 A tahi a peàu Maria pēènei :
« U haatiketike tu ù kuhane i te Hatu.
47 Ua û i te koakoa tu ù koekoe io te Etua Haapohuè.
48 U tiòhi mai i to Īa pahikaèo haapāpaku.
Mamau òe, e peàu mai te tau tai ènana paotū.
49 I uē ia ù, ua hana i te hana mahaò.
Te Mana nui, o Peàto to Īa ikoa.
50 I tēia tai, i tēia tai, e mau à to Īa Hakāòha,
I uē i te tau ènana e pakaihi ia Īa.
53 U haatapavaù Īa i te tau ènana mate i te oke.
U titii i te poì me te taetae, kiko koè nā îìma.
54 Ua toko te Hatu ia Iraene, to Īa tāvini,
E haamaakau aa i to Īa Hakāòha nui. »
TATAUÌA O TO MUA HĀMANI I TO TETARONIKA
5,16-24
16 A koakoa ananu ôtou.
18 A haahuaèkaèka ananu, i tēia ava, i tēia ava.
Oiana ta te Etua e makimaki nei no ôtou,
ma òto o te Kirito Ietu.
19 Aua ôtou e haapākeka i te Kuhane Meitaì.
20 Aua ôtou e haamee i te tekao a te tau peroheta.
21 A tiòhi mau, a kaituto me te māàma i te tau tekao ia ôtoa.
A apuu i te mea meitaì.
22 A tiehi i te mea paotū te i haatopa io he ìno.
23 Koù e haapeàtoìa ôtou e te Etua, te tumu o te moû.
Na Īa e pāpua i to ôtou ènana tiàtohu me i te ìno,
oia hoì to ôtou kuhane, to ôtou koekoe, to ôtou nino,
e tetaì ana i te tiheìa o to tātou Hatu Ietu Kirito.
24 He tiàtohu te Etua te i vavaò ia ôtou :
e hana Īa vāàna i te mea i peàuìa.
ALLELUIA ALLELUIA
cf. Rk.1,76 ; In.1,7
He Peroheta o te Tiketike nui,
u tihe mai Ioane no te taha i mua o te Hatu,
no te kānea i to Īa vaanui, me te haatiàtohu i te Māàma.
EVANERIO O IETU KIRITO VĀÀNA E IOANE 1, 6-8.19-28
6 Ua ìteìa te ènana ta te Etua i pōpahi atu. O Ioane to īa ikoa.
7 Ua tihe īa no te haatiàtohu i te Māàma,
etià e haatià te tau ènana paotū.
8 Aòè o īa te Māàma. U haatiàtohu īa i te Māàma.
Oia nei ta Ioane tekao haatiàtohu
i te ava me i Ierutaremi i pahiìa e te tau ati Iuta,
mea ūi atu ia īa pēènei à : « O ai òe ? »
20 U koutee hakanā Ioane. Ua haki atu īa pēènei :
« Aòè o au nei te Kirito. »
21 Ua ūiūi hakaùa âtou ia īa : « E aha òa ? O Eria òe ? »
U peàu Ioane : « Aòè o au nei. »
Ua ūi mai âtou : « Aha o òe te Peroheta ? »
U haahua Ioane : « Aòè o au nei. »
22 Ma hope, u peàu âtou ia īa : « O ai òe ?
Etià e kave mātou i te òko io te huaa te i pahi ia mātou.
E aha ta òe tekao no òe anaiho. »
23 U haki atu Ioane : « O au nei te èo taaàu i te henua ataha,
vāàna te i peàuìa e te peroheta. »
24 He mou fariteo te tau keèe i pahiìa.
« Ohia aòè o òe te Kirito, aòè o Eria, aòè he Peroheta,
e aha te piò e tuku atu òe i te papatema ? »
26 Ua hua atu Ioane : « E papatema au io he vai,
i vāveka o ôtou, enā tītahi aòè ôtou i ìte :
27 O Īa te tihe mai ma muì o au nei. Òmua atu Īa, epō au nei.
U hei koè no ù te vevete i te aho tāmau i to Īa aihū. »
28 I haapaoìa hua mea nei i Petania,
ma tītahi kēkē o te kaavai Ioritane,
i èià i tuku ai Ioane i te papatema.
TOMINIKA E HĀ O TE AVA TETAÌ
TATAUÌA O TE ÙA O TE HĀMANI O TAMUERA
7, 1-5 8b-12.14a.16
1 Ua noho te hakaìki Tavite i òto o to īa iho haè, i Ierutaremi.
Na te Hatu i vaièi ia īa i te noho me te moû,
ma te haahika i te tau ènana tōtōua me īa.
2 Ma tītahi â, u peàu Tavite te hakaìki i te peroheta Natano :
« A tiòhi, e noho nei au i òto o te haè âkau taetae nui.
Atià, io he haèâ te Àraka o te Piimau. »
3 U haahua atu te peroheta :
« E te Hakaìki e, a hana òe vāàna i to òe makimaki.
Me òe hoì te Hatu. »
4 Atià, i te pō anamai, u tekao te Hatu me Natano
5 pēènei à : « A taha atu io tu ù tāvini o Tavite.
A peàu ia īa : « Aha o òe te ènana e hakatū i tu ù haè ?
8 O au iho te i vae ia òe he ènana tiaki mutō,
vāàna e haaìò ia òe
te hakaìkiìa i ùka o to ù mataèinaa Iraene.
9 O au me òe i tēia taha, i tēia taha ua hee òe.
Na ù i haahika me i mua o òe
i te tau mataèinaa e tōua me òe.
E haaìò au i to òe ikoa e ikoa òko nui,
ma ùka aè o te tau ikoa o te poì mana,
e noho aa io he henua.
10 Na ù e haanoho mau ia Iraene io tēnei henua.
O īa tu ù mataèinaa ta ù i nanu io tēnei vahi.
E tuputupu īa haametaù koè.
Aòè e tihe mai hakaùa te poì mākaka e haamee ia īa,
me he mea ua hana âtou,
me i te â, u hakatū au i te mou hakaìki Hofetima
no te vivini i tu ù mataèinaa Iraene.
11 E vaièi au ia òe i te tau èhua moû nui.
E haahika au i te poì tōtōua me òe.
O te Hatu te i peàu ia òe : na Īa e hakatū i tītahi haè no òe iho.
12 Na Īa e hakatū i to ù haè.
Na ù e haamau i to Īa nohoka hakaìki no te ava paona koè.
14 E ìò au he motua no īa.
E ìò īa he tama na ù.
16 Te haè o to òe ati i ùka aè, e mau ananu i mua o au.
U te e koè to òe hakaìkiìa ma te tau tai ananu.
To òe nohoka hakaìki e mau ai no te ava paona koè. »
TARAMO 89 (88), 4-5,27-28,29-30
E te Etua e, io Òe anaiho te tekao
e aahi atu i te pohuè ananu.
4 U peàu te Hatu :
u haatoitoi au i te Piimau me to ù tāvini.
Ma tu ù ikoa, u haatiàtohu au ia Tavite, ta ù i vae.
5 E haaeke au me te haamau i to òe ati i ùka aè.
E hakatū au i to òe nohoka hakaìki no te tau tai ananu.
27 E peàu mai īa : « O Òe tu ù Etua, tu ù Motua.
O Òe tu ù motukeâ, tu ù Haapohuè. »
28 E haaìò au ia īa he tama hāmua na ù,
Te tiketike nui o te tau hakaìki ia ôtoa.
29 I ùka o īa, e noho mau to ù kāòha, hakahae koè.
Me īa tu ù Piimau no te tau tai hakatahi.
30 E hakatū au i to īa viviniìa paona koè.
E mau to īa hakaìkiìa ma te tau tai ananu.
TATAUÌA O TE HĀMANI A PAURO PEÀTO I TO ROMA
16, 25-27
25 A hahi tātou i te Etua.
Na to Īa mana e tohe mau ôtou
e haatià vāàna i te Evanerio e hakako au,
me te tekao o Ietu Kirito,
atii hoì vāàna i te tekao hakanāìa
ma te òa o te nuiìa o te tai ènana tini, tini.
26 I tēnei mou â, u hakaìteìa hua tekao,
u haamevahaìa i vāveka o te tau mataèinaa êteni paotū,
ma te hāmani o te tau peroheta,
me he mea u makimaki te Etua ètereno,
etià e aotahi i te haatià âtou paotū hua tau êteni.
27 Ma io Ietu Kirito, a kāìèìa te Etua, o Īa anaè te Māàma,
no te tau tai a tihe ananu. Amene.
ALLELUIA ALLELUIA
U apuu Maria peàto i te Tekao :
« O au nei te pahikaèo a te Hatu.
A tae to Òe makimaki ta Òe i haki mai. »
EVANERIO O IETU KIRITO VĀÀNA E RUKA 1, 26-38
I tēia mou pō,
26 U pōpahi te Etua i te anera Kapiriere
io te pāpuahaè o te Henua Karirea, o Natareti te ikoa,
27 io tītahi pāhoè virikine, tuia me te vāhana,
o Ioteve te ikoa, no te ati Tavite.
O Maria te ikoa o te virikine.
28 Ua uu te anera i òto o to īa haè me te peàu :
« Kāòha òe pī i te karatia, me òe te Hatu. »
29 Ia òko Maria i hua tekao, u emièe īa,
e kaituto aa e aha òa te hakatu o hua kāòha mai ?
30 U peàu te anera ia īa :
« Umoì òe e haametaù, e Maria e.
U koàka mai hoì ia òe te karatia io te Etua.
31 Enā e tupu òe i te tama, e hānau òe i te tamaòa.
E apa òe i to Īa ikoa : o Ietu.
32 E òko nui Īa. E vavaòìa te Tama a te Tiketike Nui.
E haaìò te Hatu Etua ia Īa i te nohoka hakaìki o Tavite.
33 O Īa te hakaìki o te ati o Iakopo no te tau tai ananu.
He paona koè hoì to Īa hakaìkiìa ».
U peàu Maria i te anera :
« E pēhea tenā ? Aòè au i noho me te vāhana. »
35 U haahua te anera me te peàu ia īa :
« E iho mai te Kuhane Meitaì i ùka o òe ;
E vāhīìa òe e te ao tapu o te Tiketike Nui.
No èià, e peàto te tama : e peàuìa Tama a te Etua.
36 Eīa tītahi : O Eritapeta, kui teina no òe,
ua tupu īa i te tama e aha à e uehine īa.
O te meàma e ono i tēnei no tēia i peàuìa vehine mahoi.
37 Aòè he mea aòè i koàka i te Etua. »
A tahi a peàu Maria : « O au nei te pahikaèo o te Hatu.
A tae to òe hīa, ta òe i haki nei. »
U titii te anera ia Maria.
______________________________________________________
NO TE OÌOÌ O TE KOÌKA NOERE
TATAUÌA O TE PEROHETA ITAIA 62, 1-5
1 I uē ia Ierutaremi, aòè au e mutu.
I uē ia Tiona, aòè e mutu to ù haha,
tihe e ìteìa to īa toitoi me he pupuà o te atauà,
e keàpa to īa hakatu me he àma pūkohe i te pō.
2 E ìte te tau mataèinaa i to òe toitoi,
e ìte te tau hakaìki i to òe kāìè.
E apa te Hatu ia òe i te ikoa hou ta Īa i ìte.
3 E ìò òe me he paèkuà io te ìma o te Etua,
me he heipua kakaa io te ìma o te Hatu.
U te e vavaò hakaùa ìa òe « Tāhia titii » ;
aòè to òe henua e vavaòìa « Fenua ataha ».
4 Atià, e apaìa to òe ikoa « Mākui » ;
e apaìa to òe henua « Tu ù hoa mātiri ».
Na te mea, e haataetae te Hatu ia òe.
E ìò te Hatu me he vāhana no to òe henua.
5 Me he mea e noho te māhaì me te vehine hou,
atii e noho me òe te tuhuka i hakatū ia òe.
Me he mea o te vehine mātiri hou te koakoa o ta īa vāhana,
atii e haaèka òe i to òe Hatu Etua.
TARAMO 89 (88), 20ab.21, 27-28, 29-30
E te Etua e, io Òe anaiho te Tekao
e aahi atu io te pohuè ananu.
20 E te Hatu e, òmua u peàu Òe i to Òe tau hoa,
Io he moemoeā, u hakaìte atu Òe ia âtou :
21 « U koàka ia ù te tāvini, o Tavite te ikoa.
U paù Au ia īa me he kao tapu. »
27 E peàu mai īa : « O Òe tu ù Etua, tu ù Motua.
O Òe tu ù motukeâ, tu ù Haapohuè. »
28 E haaìò au ia īa he tama hāmua no ù,
Te tiketike nui o te tau hakaìki ia ôtoa.
29 I ùka o īa, e noho mau to ù kāòha, hakahae koè.
Me īa tu ù Piimau no te tau tai hakatahi.
30 E hakatū au i to īa viviniìa paona koè.
E mau to īa hakaìkiìa ma te tau tai ananu.
TATAUÌA O TE HĀMANI HANA A TE TAU ÀPOTORO
13, 16-17.22-25
16
E tū aa Pauro, u hapai i te ìma me te peàu pēènei à :
« E to Iraene atii me ôtou, e te tau ènana pakaihi i te Etua,
a hakaòko mai.
17 Te Etua o tēnei mataèinaa, te Etua o Iraene,
ua vae Īa i to tātou tau tupuna.
U haanui aè Īa i te mataèinaa oi noho âtou i te Henua Ekipito.
Ma te mana o to Īa ìma, u haauu i vaho ia âtou.
22 I muì iho, u titii te Etua ia Tauro
me te vae ia Tavite he hakaìki no âtou.
U haameitaì te Etua ia īa e peàu aa :
« U koàka ia ù Tavite, tama a Iete,
o īa te ènana vāàna i to ù hīa, te i aotahi atu i to ù makimaki. »
23 Me i òto o to īa ati, u haatupu te Etua
ia Ietu, te Haapohuè o Iraene.
24 Òmua atu o to Īa tiheìa,
u hakaìte Ioane i te mataèinaa Iraene i te papatema
no te hāìu i te koekoe me te hopo i te mikeo.
25 I te paona o ta īa hana peroheta, u peàu Ioane :
« Aòè o au tēia ta ôtou i māmaakau pu nei.
Enā e tihe ai tītahi ma muì o au :
aòè e hei ia ù te vevete i to īa aihū. »
ALLELUIA ALLELUIA
Oìoì e hikaìa te mikeo io te aomāàma nei.
Oìoì e vivini te Haapohuè i te henua.
EVANERIO O IETU KIRITO VĀÀNA E MATEO 1, 1-25
(Tatau poto 1,18-25)
1 Te hāmani matatatau o Ietu Kirito,
te tama a Tavite, te tama a Aparahamo.
2 U hānau ta Aparahamo o Itaako.
U hānau ta Itaako o Iakopo.
U hānau ta Iakopo o Iuta me to īa tau teina.
3 U hānau ta Iuta o Farete me Fara no òto o Tamara.
U hānau ta Farete o Eteroma.
U hānau ta Eteroma o Arama.
4 U hānau ta Arama o Aminatape.
U hānau ta Aminatape o Naatona.
U hānau ta Naatona o Taremone.
5 U hānau ta Taremone o Poaha no òto o Rahapa.
U hānau ta Poaha o Opete no òto o Ruta.
U hānau ta Opete o Iete.
6 U hānau ta Iete o Tavite te hakaìki.
U hānau ta Tavite o Taromona no òto o te vehine a Uria.
7 U hānau ta Taromona o Ropoama.
U hānau ta Ropoama o Apia.
U hānau ta Apia o Ata.
8 U hānau ta Ata o Iehotafa.
U hānau ta Iehotafa o Iorama.
U hānau ta Iorama o Otia.
9 U hānau ta Otia o Iotane.
U hānau ta Iotane o Akata.
U hānau ta Akata o Etekiata.
10 U hānau ta Etekiata o Manate.
U hānau ta Manate o Amona.
U hānau ta Amona o Iotia.
11 U hānau ta Iotia o Iekoniata me to īa tau teina,
i te ava o te mōèhuìa io he Henua Papironia.
12 Ma muì o te ava i te mōèhuìa io he Henua Papironia,
u hānau ta Iekoniata o Taratiere.
U hānau ta Taratiere o Toropapere.
13 U hānau ta Toropapere o Apiuta.
U hānau ta Apiuta o Eriakimi.
U hānau ta Eriakimi o Atore.
14 U hānau ta Atore o Tatoka.
U hānau ta Tatoka o Akimi.
U hānau ta Akimi o Eriuta.
15 U hānau ta Eriuta o Ereatara.
U hānau ta Ereatara o Matana.
U hānau ta Matana o Iakopo.
16 U hānau ta Iakopo o Ioteve te vāhana a Maria.
me i òto o īa i hānauìa ai o Ietu te i peàuìa te Kirito.
17 No èià e tatauìa
ònohuu ma hā tai kē me io Aparahamo tihe atu io Tavite,
ònohuu ma hā tai kē me io Tavite
tihe atu i te ava o te mōèhuìa i te Henua Papironia,
ònohuu ma hā tai kē me i te mōèhuìa i Papironia
tihe atu i te Kirito.
18 Oiana te hāmani matatatau o Ietu Kirito.
Oa nei te hānauìa o Ietu Kirito.
U tuia te kui o Ietu, o Maria to īa ikoa,
me tītahi vāhana, o Ioteve te ikoa.
Ma mua to âua nohoìa, u kōpū tama Maria
na te mana o te Kuhane Meitaì.
19 He ènana toitoi noa Ioteve, ta īa vāhana.
Aòè īa e makimaki e pōtoho pu ia Maria.
No èià, u kaituto īa e titii ia īa ma te ìte koè.
Ohia e auana atii Ioteve, ua ìte īa io he moemoeā
i te anera o te Hatu te i peàu mai :
« E Ioteve e, tama a Tavite, umoì òe e haametaù
no te apuu io to òe haè ia Maria, ta òe vehine.
U kōpū tama hoì īa na te mana o te Kuhane Meitaì.
21 E hānau īa i te tamaòa. E apa òe i to īa ikoa o Ietu.
Oia hoì "Te i haapohuè i to īa mataèinaa
me i to âtou tau mikeo" ».
22 Ua pao tēia tau mea paotū no te haatiàtohu
i te Tekao a te Hatu i peàuìa e te peroheta, pēènei :
23 « Enā e kōpū tama te virikine. E hānau īa i te tamaòa.
E apa âtou i to īa ikoa o Emanuera. »
Oia hoì ma he èo ènana « O te Etua me tātou ».
24 Ua vaa Ioteve. U aotahi īa i ta te anera o te Hatu i peàu atu
me to īa apuu i ta īa vehine io to īa haè.
25 Atià, aòè Ioteve i too ia Maria tihe atu i te hānauìa o te tama.
Ua apa Ioteve i to īa ikoa « O Ietu ».
TE KOÌKA NOERE
TATAUÌA O TE PEROHETA ITAIA 9, 1-6
1 Te mataèinaa e taha ana io te ava pōtako,
ua ìte i te tiheìa o te māàma pupuà nui.
I ùka o te poì e noho aa io he vao maù nui, u pupuà te àma.
2 Na Òe, e te Etua e, i haanui i te èkaèka :
me he koakoa o te ènana e kohi aa i te puku henua,
me he koakoa o te tau kape ia tuhaìa te tau taetae
o te poì hika ma òto o te tōua.
3 Me he mea ta Òe i haahika i te poì Matiana,
na Òe i hahati i te âkau te i òomi i te mataèinaa,
atii te âkau tā a te vivini o te poì hana.
4 Ua èhu nui i te ahi to te tau kape aihū
te i haakeuu i te papa henua,
atii me to âtou kahu pī i te toto.
5 U vaièiìa mai tītahi tama hou, e tamaòa i tukuìa mai.
O te hakatu hakaìki i ùka o to īa pauhihi.
U apaìa to Īa ikoa : « Tuhuka mahaò. Etua mana.
Motua paona koè. Hakaìki o te moû. »
6 No èià, e nekeìa to Īa mana :
Aòè e pao te moû no Tavite me to Īa Patirēia.
E tū mau Īa i òto o te tiàtohu me te toitoi, i tēnei, atii ananu.
Oiana te hana kāòha ta te Hatu o te aomāàma i uē ia mātou.
TARAMO 96 (95), 1-2a, 2b-3, 11-12a, 12b-13a.c
I tēnei pō, ua hānau to tātou Haapohuè.
O Īa te Kirito te Hatu. cf... Rk. 2,11
1 A hīmene no te Hatu i te hīmene hou.
A hīmene i te Hatu te henua vii pu.
2 A hīmene no te Hatu, a hahi i to Īa ikoa.
Ma tēia â, ma tēia â,
3 A haaòko nui i to Īa haapohuèìa,
A hano a haki atu i te tau mataèinaa,
I te tau ènana paotū to Īa tau hana mahaò.
11 A koakoa te àki i ùka nui.
A èkaèka te henua ia ôtoa.
A taaàu me te pokokina te moana.
12 A haakoìka, a keue te tau tuaivi.
A haka me te koakoa te maa tumuâkau,
I te aò o te Hatu e taha mai.
13 E tihe te Hatu no te haavā i te henua.
E toitoi, e tiàtohu to Īa haavāìa.
TATAUÌA O TE HĀMANI A PAURO PEÀTO IA TITO
2, 11-14
11
U hakaìteìa mai hoì te vaièiìa o te Etua.
Oia te tumu e koàka i te tau ènana paotū
te pohuè te io he àki.
12 Na hua karatia e hakako mai
no te titii i te mea haapākeka i te Etua,
te òomi i to tātou hīa kāìè ènana, te pohuè io te ao nei
me te koekoe atenoho, koekoe toitoi, koekoe pure hae.
13 U hakapahi hua karatia ia tātou
no te tetaì i te tetaììa haakoakoa.
Oia hoì te tiheìa me te kāìè o Ietu Kirito,
to tātou Etua tiketike me te Haapohuè.
14 U ùtuna hēaka ìa hoì Ietu Kirito i uē ia tātou,
no te hooi i to tātou mikeo me te haataìtaì,
etià e ìò tātou to Īa mataèinaa,
poì koekoe ūo i te hana meitaì.
ALLELUIA ALLELUIA
cf. Rk. 2,10-11
Ua haki atu nei au ia ôtou i te Tekao Meitaì Hou haakoakoa :
I tēnei pō, u hānauìa te Haapohuè. O Īa te Kirito, te Hatu.
EVANERIO O IETU KIRITO VĀÀNA E RUKA 2, 1-14
1 I tēia mou pō, ua tihe te tekao me io Ketare Aukuto.
U hakapahi īa i te tau ènana o te aomāàma vii pu
no te patu i to âtou ikoa.
i te ava ua tū Kirino he kuvenea o te Henua Ihiria.
3 Ua hee atu te tau ènana paotū no to âtou ikoa patu
io to âtou kākaavai me te pāpuahaè tumu.
4 O Ioteve me i Natareti o te Henua Karirea,
ua hiti i te Henua Iutea, io te pāpuahaè o Tavite,
o Petereemi te ikoa.
Ua tupu hoì Ioteve me io te ati me te huaahaè o Tavite.
5 Ua hano Ioteve i te ikoa patu me Maria ta īa vehine,
he kōpū tama ta īa.
6 Ohia i èià âua, ua tihe te ava e hānau ai Maria.
7 U hānau Maria i ta īa tama, he tama hāmua.
Ua vāhīìa me te èpa me te haamoe ia īa io he fātene,
mēìa aòè he vahi e hei no âtou io he haè apuu manihii.
8 Enā i te henua vii pu mou ènana tiaki mutō.
Ua noho âtou io he vahi èitā, e matavaa i te pō
no te tiòhi meitaì i to âtou naho mutō.
9 U haatata mai io âtou te anera o te Hatu.
U pupuà vii pu o âtou i te kāìè o te Hatu,
10 U peàu te anera ia âtou :
« Umoì ôtou e haametaù,
na te mea u haki atu au ia ôtou
i te Tekao Meitaì Hou Mai
e haakoakoa nui i te mataèinaa ia ôtoa.
11 I tēnei pō, io te pāpua haè o Tavite, no ôtou,
u hānauìa te Haapohuè. O Īa te Kirito, te Hatu.
12 Eīa tītahi mea hakatu no ôtou :
e koàka ia ôtou te tama hou,
vāhīìa me te èpa, e moe aa i òto o te fātene. »
13 Enā pu anamai me te anera
te nuiìa o te haètoa te io he àki, tini tini âtou,
e hahi aa i te Etua me te peàu pēènei :
14 « Te kāìè i te Etua i ùka nui.
Te moû io he henua i te ènana poì tāhia. »
TE KOÌKA NOERE
TATAUÌA O TE PEROHETA ITAIA 62, 11-12
11 Oia nei te tekao ta te Hatu
e haamevaha tihe atu i te kotina o te aomāàma, pēènei :
« A peàu i te moî a Tiona :
Enā e tihe mai te Haapohuè, e kave ana me Īa
i te tau taetae o to Īa tuàkiìa ;
vii pu o Īa te tau taetae haakāìè ia Īa.
12 E apaìa ôtou i te ikoa hou pēènei :
« Mataèinaa tapu. Poì hokoìa e te Hatu. »
E apaìa òe iho :
« Vaeìa e te Hatu. Pāpuahaè titii koè. »
TARAMO 97 (96) 1.6,11-12
Enā te àma haapupuà i te ènana, ua hānau te Haapohuè.
1 O te Hatu te hakaìki nui. A koakoa te henua.
A haaèkaèka te tau motu tini, tini.
6 U haamevaha te papa henua i to Īa toitoi noa.
Ua ìte me te mahaò te tau ènana i to Īa kāìè.
11 Enā te àma haapupuà i te ènana teka koè.
Enā me te koakoa i vāveka o te poì haatià.
12 A koakoa ôtou, e te poì aotahi i te Hatu.
A haahuaèkaèka i te ikoa o te Hatu Etua.
TATAUÌA O TE HĀMANI A PAURO PEÀTO IA TITO
3, 4-7
4
Atià, u hakaìte mai te Etua, to tātou Haapohuè
i to Īa vaièiìa me to Īa kāòha nui no te tau ènana.
5 Na Īa i haapohuè ia tātou, mēìa i to Īa hakāòha mai,
aòè no te vaièi mai i te tuki o to tātou hana meitaì,
i hanaìa na tātou ta tātou anaè.
Ma te vai, u haahānau hakaùa te Etua ia tātou nei.
I òto o te Kuhane Meitaì,
u haahou Īa i to tātou hakatu pohuè.
6 Na te Etua i haaneke ma te nuiìa o hua Kuhane Meitaì
i òto o tātou, ma te ikoa o Ietu Kirito, to tātou Haapohuè,
7 etià, ma to Īa karatia, e ìò tātou
he tau ènana toitoi i mua o te Etua,
no te koàka mai te pohuè ananu ta tātou e tetaì mau nei.
ALLELUIA ALLELUIA
Rk.2,14
Te kāìè i te Etua i ùka nui.
Te moû io he henua i te ènana poì tāhia.
EVANERIO O IETU KIRITO VĀÀNA E RUKA 2, 15-20
15 Ohia ua pae te tau anera me to âtou hua io he àki,
u peàu atu peàu mai te tau ènana tiaki mutō,
te hoa i te hoa :
« A pau. A hihiti tātou i Petereemi no te ìtemata
i te mea i haapaoìa vāàna ta te Hatu i hakaìte mai. »
16 U titihe haakoi te tau ènana tiaki mutō.
U koàka mai ia âtou o Maria, o Ioteve
me te tama hou e moe aa i òto o te fātene.
17 Īa ìte meitaì âtou, ua haki atu i te mea
i peàuìa ia âtou i ùka o hua pōìti.
18 Ua pē i te mahaò te tau ènana paotū
te i òko i te tekao o te tau ènana tiaki mutō.
19 O Maria à, u haamau io he koekoe i tenā tau mea paotū
me te kaituto hae.
20 Ua hua te tau ènana tiaki mutō.
U haakāìè âtou me te hahi i te Etua
no te tau mea paotū ta âtou i òko me te ìte,
vāàna i te tekao i peàuìa ia âtou.
TATAUÌA O TE PEROHETA ITAIA 52, 7-10
ia tiòhi atu i te keèe e tohuti aa ma he tuaivi
no te hakaìte atu i te ava o te moû.
ia tiòhi atu i te keèe o te Tekao Meitaì Hou Mai
e hakaìte aa i te pohuè.
E tihe nei īa no te peàu i te pāpuahaè tapu :
« E hakaìki to òe Hatu Etua.
8 A òko ôtou i te èo o te poì tiaki.
Ua taki to âtou vavaòìa. E tahi taa anaè : e taaàu koakoa.
Ua ìtemata âtou i te Hatu e tihe nei i Tiona. »
9 A tātakahiti i te koakoa ôtou,
e te toeka o Ierutaremi te i vāvahiìa.
Na te mea u haakoè te Hatu i te uē o to Īa mataèinaa.
Na Īa i haapohuè ia Ierutaremi.
10 U hakaìte mai te Hatu i te mana Etua o to Īa ìma
i te tau mataèinaa êteni paotū.
Me i tītahi kēkē tihe toitoi i tītahi kēkē o te henua,
e ìte âtou i te haapohuèìa o to tātou Etua.
TARAMO 98 (97), 1,2-3ab, 3c-4, 5-6
Ua ìte te henua vii pu i te Haapohuè ta te Etua i tuku mai.
cf. .98,3
1 A hīmene i te Hatu i te hīmene hou.
U mahaò hoì to Īa tau hana.
U tuàki Īa i te mea haapākeka,
Na te mana o to Īa ìma peàto nui.
2 U hakaìte te Hatu i to Īa tuàkiìa,
U haapupuà i to Īa toitoi i mua o te poì êteni.
3 U haamaakau te Hatu i to Īa kāòha hakahae koè
I uē i te ati o Iraene, to Īa mataèinaa.
Ua ìte te henua vii pu i to te Etua tuàkiìa
4 A hahi i te Hatu, e te henua vii pu,
A hīmene, a haka, a haakoìka.
5 A haataki i te pū, a vānana i te Hatu,
A ùtu te pahu, a òko nui te Hatu Etua.
6 A òkoìa te kitā, te pū hakahau, te pūtoka.
A vānana i te Hatu, to ôtou Hakaìki.
TATAUÌA O TE HĀMANI I TO HEPEREO 1, 1-6
1 I te tai kākiu, ma io te tau peroheta,
u tekao mai te Etua ma te tau pona kē, te tau pona kē,
te tau hakatu kē, te tau hakatu kē.
2 I tēnei tau â paona o te aomāàma,
u tekao mai te Etua ma io tītahi Tama.
U haaìò te Etua i hua Tama te Hatu o te tau mēmau ia ôtoa ;
ma io Īa, u pēpenaìa te tau aomāàma.
3 O tēnei Tama te ata tokihi i te kāìè o te Etua,
te hakatu tiàtohu èka o te Etua Motua,
e haamau aa i te aomāàma vii pu ma te mana o to Īa tekao.
Ia pao to Īa hooi i te tau mikeo,
u tānoho Īa i te ìma oko o te Etua Tiketike,
i ùka nui o te àki.
4 Ua tū Īa ma ùka aè o te tau anera paotū,
mēìa ua apaìa te ikoa òko nui atu i te ikoa o te tau anera.
5 Aòè hoì i peàu te Etua i tītahi anera :
« O Òe tu ù Tama ; i tēnei â, u haahānau au ia Òe. »
U peàu hakaùa :
« E ìò au e Motua no Īa, o Īa nei tu ù Tama. »
6 U peàu hakaùa te Etua
i te ava u pōpahi Īa i te Hāmua io te ao nei :
« A atoratio ia Īa te tau anera o te Etua paotū. »
ALLELUIA ALLELUIA
I tēnei â, u keàpa nui te māàma o te Etua.
E te tau mataèinaa e, a mai no te atoratio atu i te Hatu !
TE TĪMATAÌA O TE EVANERIO O IETU KIRITO
VĀÀNA E IOANE 1, 1-18. (1, 1-5.9-14.)
1 I te tumu te Tekao. Io te Etua te Tekao.
He Etua te Tekao.
2 I te tumu anamai io te Etua te Tekao.
3 Ma io te Tekao te tau mea paotū i pēpenaìa.
Umoì īa, aòè he mea i pēpenaìa to te i pēpenaìa.
4 I òto o te Tekao te pohuè.
He māàma no te tau ènana te pohuè.
5 U pupuà te māàma io he pōtako,
u haapākeka koè ta te pōtako i te māàma.
6 Ua ìteìa te ènana ta te Etua i pōpahi mai.
O Ioane to īa ikoa.
7 Ua tihe īa no te haatiàtohu i te māàma
etià e haatià te tau ènana paotū.
8 Aòè o īa te māàma. U haatiàtohu īa i te māàma.
9 Enā te māàma tiàtohu mea tūìka i te tau ènana paotū
te i tihe mai i te ao nei.
10 Io te aomāàma te Tekao, na īa i pēpena i te aomāàma :
aòè to te ao nei i ìte ia īa.
11 Ua tihe mai io to īa toitoi. Aòè to īa i apuu mai.
12 I te poì hakatahi i apuu ia īa,
ua tuku atu īa i te mana no te haaìò he tau tama a te Etua.
Oia te poì i haatià ia īa.
13 O te poì koè na te toto,
koè na te makimaki nino, koè na te makimaki ènana,
atià à, na te makimaki o te Etua i hānauìa ai.
14 U haaènanaìa te Tekao me to īa noho i vāveka o tātou.
Ua ìte tātou i to īa kāìè,
he kāìè ta te Motua i vaièi atu i ta īa Tama tootahi,
pī i te karatia me te tiàtohu.
15 U haatiàtohu Ioane ia īa, e taaàu aa pēènei :
« O Īa nei te ènana ta ù i peàu atu :
u meitaì aè ia ù te i tihe ai ma muì o au.
Na te mea òmua atu Īa, epō au nei.
16 Me io to Īa meitaì nui, u koàka mai ia tātou kōtoa te taetae,
te tau karatia ma hope o te karatia.
17 Ma io Moite, ua tuku mai te Etua i te Ture.
Ma io Ietu Kirito, ua tihe mai te karatia me te tiàtohu.
18 Aòè te ènana e tahi i ìte i te Etua.
Na te Tama tootahi, he Etua anaiho Īa, pii me te Motua,
u hakaìteìa mai te Etua. »
_____________________________________________________
TE HUAAHAÈ MEITAÌ NO NATARETI
TATAUÌA O TE HĀMANI A MOITE PEÀUÌA TENETE
15, 1-6 ; 21,1-3
1 Ia pao tēia mea paotū, u tekao te Hatu Etua
me Aparahamo ma te ìtea moemoeā.
U peàu te Hatu Etua pēènei :
« Umoì e haametaù, e Aparahamo e.
O au te i pāpua ia òe. E haanui au i ta òe moni utu. »
2 U haahua Aparahamo :
« E te Hatu Etua e, e aha ta òe e tuku mai ?
Enā, e kaò au tama koè. E ìò ta ù tau taetae i te huaahaè,
ia Eriehere no Tamati, tu ù tāvini hāoè. »
3 U peàu Aparahamo : « Aòè òe i tuku mai i te tama.
O te ènana kē me i to ù huaahaè, te hatu o ta ù tau taetae. »
4 A tahi a peàu te Hatu Etua pēènei à :
« Aòè e ìò i hua ènana te hatu o ta òe tau taetae,
atià o tītahi tama ta òe e hānau mai. »
5 U aahi te Hatu ia Aparahamo i vaho o to īa haèâ
me to Īa peàu pēènei :
« A tiòhi i te ataàki.
A tatau i te nuiìa o te hetū, me koàka ia òe.
Atii te nuiìa o to òe ati i ùka aè. »
6 U haatià Aparahamo i te Hatu Etua.
Ma èià, u haaìòìa Aparahamo
he ènana toitoi noa i mua o te Hatu Etua.
1 U haameitaì te Hatu Etua ia Tara, vāàna i to Īa tekao.
2 I te ava ta te Etua i peàu atu,
u kōpū tama Tara me to īa hānau i te tamaòa
no Aparahamo, e aha à u kooūa īa.
3 Ua apa Aparahamo i ta īa tama o Itaako,
te tama hānauìa me i òto o Tara.
TARAMO 105 (104) 1-2, 3-4, 5-6, 8-9
U haamaakau ananu te Hatu i to Īa Piimau. 105,8
1 A haahuaèkaèka ôtou i te Hatu. A hahi i to Īa ikoa.
A hakaìte i te tau mataèinaa i to Īa tau hana mana.
2 A haka, a hīmene no te haameitaì ia Īa.
A vānana i te haakakai o to Īa tau hana mahaò.
3 A haakāìèìa ôtou iho mēìa he huaa no Īa ôtou.
A koakoa te tau ènana e ùmihi nei i te Etua.
4 A ùmihi ôtou i te Hatu me to Īa mana,
A hano mai paòpaò koè i to Īa kāòha.
5 A haamaakau ôtou i to Īa tau hana mahaò.
Umoì e māhaè i to Īa haatoitoi i te tekao.
6 Ôtou nui, e te ati o Aparahamo to Īa tāvini,
Ôtou te tau tama o Iraene, ta Īa i vae.
8 U haamaakau ananu te Hatu i to Īa Piimau,
Tekao haatiàtohuìa no te tau tai tini tini :
9 He tekao peàuìa ia Aparahamo,
Tekao haatiàtohuìa i uē ia Itaako.
TATAUÌA O TE HĀMANI I TO HEPEREO 11, 8.11-12.17-19
8 Mēìa i te haatià, u aotahi Aparahamo i te Etua te i vavaò ia īa.
U titii Aparahamo i to īa henua no te hee i te henua kē.
Oia te henua e ìò ia īa ma tītahi â.
Ua hee hoì Aparahamo ìte koè i hea e hee atu ai.
11 Mēìa i te haatià, ua tupu Tara i te tama, e aha à e uehine īa.
U maakau hoì Tara e haapao te Etua i te mea ta Īa i peàu.
12 Ma èià, me i òto mai o te ènana, e tahi anaè, kooūa pē,
mei mate nui īa, ua tupu te ati,
nui atu i te tau hetū o te ataàki,
nui atu i te one io te hiku o te tai.
17 I te ava u haaveke me te haamōtii te Etua ia Aparahamo,
mēìa i to ia haatià, u ùtuna Aparahamo ia Itaako.
18 E aha à u peàu te Etua ia Aparahamo
e haanui i to īa ati i ùka aè me i òto o Itaako,
ua ao Aparahamo e ùtuna i ta īa òna tama, e tahi anaè.
19 U kaituto hoì Aparahamo e koàka i te Etua
te haapohuè hakaùa i te poì mamate.
No èià, ua hua ta īa tama ia īa,
me he mea u pohuè hakaùa me i vāveka o te poì mamate.
ALLELUIA ALLELUIA
Ta.118, 26.27
A meitaììa te tihe nei ma te ikoa o te Hatu,
O te Etua, te Hatu, te i haapupuà mai.
EVANERIO O IETU KIRITO VĀÀNA E RUKA 2, 22-40
akoè à 2,22.39-40
22 Ia pao te mou â
i haatoitoiìa e te Ture a Moite, no to âtou haataìtaììa,
ua hiti Maria me Ioteve i Ierutaremi
me to âua kave i te tama no te ùtuna io te Hatu.
23 Ua patuìa hoì i òto o te Ture a te Hatu, pēènei :
Te tama hāmua, a haapeàtoìa, a ùtunaìa i te Hatu.
24 U makimaki te motua me te kui e ùtuna i te hēaka,
nā manu kuku e ùa, akoè à e ùa manu tavaìè,
vāàna i te Ture a te Hatu.
25 Enā i Ierutaremi te ènana, o Timeone te ikoa.
He ènana toitoi me te ènana pure hae.
U tetaì īa i te ava e koè ai te uēuē o Iraene.
O te Kuhane Meitaì i ùka o īa.
26 Na te Kuhane Meitaì i hakaìte ia īa i te mea
aòè e mate nui īa oi ìtemata i te Kirito o te Hatu.
27 Ua tihe Timeone io he Hiero.
U aahiìa e te Kuhane Meitaì.
I te ava toitoi, ua kave te motua me te kui i te pōìti Ietu,
mea ùtuna vāàna i te i peàuìa e te Ture.
28 Ua too Timeone i te tama io to īa pūhāîìma.
U haameitaì īa i te Etua me te peàu :
29 « I tēnei, e te Hatu e, a ao mai
e pae me te moû to òe tāvini, vāàna i ta òe peàu mai.
30 Ua ìtemata hoì au i to Òe haapohuèìa
31 i haaheiìa e Òe i mua o te tau mataèinaa paotū.
32 He àma no te haamāàma i te tau êteni.
He kāìè o Iraene, to Òe mataèinaa. »
33 Ua pī i te mahaò te motua me te kui o te tama
mēìa i te tekao peàuìa i ùka o Īa.
34 U haameitaì Timeone ia âua.
Ma hope o ta īa peàu ia Maria, te kui :
« Enā te tama nei, ua vaeìa no te haahika me te hakatū
i te nuiìa o te ènana Iraene.
E ìò ai te tama me he hakatu ta te tau ènana e haapākeka.
35 O to òe kuhane anaiho e tīputaèeìa me te kohetā.
Ma èià, e hakaìteìa
te kaituto hakanā o te nuiìa o te ènana. »
36 Enā me te vehine peroheta, o Ana te ikoa.
He moî a Hanuere, no te ati Atere. He pakahio oko nui.
U mātiriìa : e hitu èhua to īa noho me te vāhana.
37 I muì iho, he vehine pōpī : e vaù ònohuu ma hā o īa èhua.
O te Hiero to īa haè nohoka, e pakaihi aa i te Etua,
me i te â, me i te pō, ma te haaoke me te pure.
38 I hua ava toitoi, ua tihe īa me to īa hahi i te Etua.
U tekao īa i ùka o te tama i te poì paotū
te i tetaì nei i te haapohuèìa o Ierutaremi.
39 Ia haapaoìa ta te ture a te Hatu i haatoitoi,
ua hua âtou i te Henua Karirea,
io to âtou kaavai, o Natareti te ikoa.
40 O te pōìti à, u kaùoo aè, kaùoo aè Īa. Ua oko aè Īa.
Ua pī i te māàma. I ùka o Īa te karatia o te Etua.
TE KOÌKA O MARIA PEÀTO
TE KUI O TE ETUA
TATAUÌA O TE HĀMANI A MOITE PEÀUÌA NŪMERA
6, 22-27
22 U peàu te Etua ia Moite :
23 « Oia nei te ponatekao ta Aarone e peàu ai,
atii me to īa ati ma te tau tai i ùka aè,
no te haameitaì i te tau tama o Iraene, pēènei à :
24 A haameitaì me te tiaki meitaì te Hatu Etua ia òe.
25 A matavaièi me te haakāòha mai te Hatu Etua ia òe.
26 A tiòhi meitaì te Hatu Etua i ùka o òe.
A tuku atu ia òe i to Īa moû. »
27 Oia te hakatu e vavaòìa tu ù ikoa
ma ùka o te tau tama Iraene.
O au à, e haameitaì au ia âtou.
TARAMO 67 (66), 2b.3, 5abd, 7-8b
A matavaièi mai te Hatu ia tātou, a haameitaì mai.
2 A pupuà to Īa mata i ùka o tātou nei.
3 E ìteìa to Òe vaanui io te aomāàma vii pu,
To Òe haapohuèìa ma te tau henua paotū.
5 A koakoa te tau mataèinaa, a hīmene âtou.
U vivini hoì Òe i te aomāàma me te toitoi.
U haatee Òe i te tau mataèinaa ma he henua.
7 Ua hua te henua i to īa puku,
U haameitaì mai te Etua ia tātou.
8 A pakaihi te henua vii pu i to īa Hatu.
TATAUÌA O TE HĀMANI A PAURO PEÀTO I TO KARATA
4, 4-7
4 Ia tihe te ava i haaheiìa e te Etua,
na Īa i pahi i ta Īa iho Tama,
te i hānauìa me i òto o te vehine, te i aotahi i te Ture a Moite,
5 no te haapohuè i te tau ènana aotahi ana i te Ture,
me te haaìò ia tātou paotū he tau tama a te Etua.
6 Ohia he tau tama ôtou a te Etua,
ua pahi Īa i te Kuhane Meitaì i òto o ôtou, te i taaàu nei :
« E Apa, e tu ù Motua e. »
7 Oia te tumu ua koè to òe hakatu o te ènana
haamōèhuìa i te tau kuhane mana o te ao nei.
Ua ìò òe he tama a te Etua. Me he mea e tama òe,
e àva atu hoì i te tau taetae
ta te Etua i tāpae no to Īa tau tama.
ALLELUIA ALLELUIA
cf. He.1,1-2
Òmua ìka, u tekao mai te Etua ma te haha o to Īa tau peroheta.
I tēnei mou pō, u tekao te Etua me tātou ma to Īa Tama.
EVANERIO O IETU KIRITO VĀÀNA E RUKA 2, 16-21
I tēia mou pō,
16 u titihe haakoi mai te tau ènana tiaki mutō.
U koàka mai ia âtou o Maria, o Ioteve
me te tama hou e moe aa i òto o te fātene.
17 Ia ìte meitaì âtou, ua haki atu i te mea
i peàuìa ia âtou i ùka o hua pōìti.
18 Ua pē i te mahaò te tau ènana paotū
te i òko i te tekao o te tau ènana tiaki mutō.
19 O Maria à, u haamau io he koekoe i tenā tau mea paotū
me te kaituto hae.
20 Ua hua te tau ènana tiaki mutō.
U haakāìè âtou me te hahi i te Etua
no te tau mea paotū ta âtou i òko me ta âtou i ìte,
vāàna i te tekao i peàuìa ia âtou.
21 Ia pao e vaù â, ua tihe te ava no te pātehe i te pōìti.
U apaìa te ikoa o Ietu, vāàna i ta te anera i peàu
ma mua atu i to Īa tupuìa.
_____________________________________________________
TOMINIKA E ÙA
MA MUÌ O TE KOÌKA NOERE
TATAUÌA O TE HĀMANI A PENETIRA 24, 1-2 8-12
1 Ua hahi te Māàma ia īa iho.
I vāveka ahau o to īa mataèinaa,
to īa haatiketike i te aò o te Etua mana nui,
2 i vāveka o te mataèinaa o te Etua Tiketike : u tekao īa.
I mua o te Mana Nui, u haakāìè īa.
8 U tekao mai te Etua te i kānea i te tau mēmau ia ôtoa.
O te Etua te i pēpena mai, u peàu i hea te nohoka
ta Īa i vae no ù. Pēènei :
« A noho òe i vāveka o te tau tama a Iakopo.
Enā to òe hope taetae i te henua o Iraene. »
9 I te tumu anamai o te aomāàma nei, òmua naoti,
u pēpena te Etua ia ù.
E tū mau au ma te tau tai a tihe ananu.
10 I òto o te vahi tapu, i te aò o te Etua,
u tāvini au ma te haahuaèkaèka.
I te tuaivi Tiona to ù nohoìa.
11 I Ierutaremi tu ù noho mau.
U vivini au me te mana i te pāpuahaè tapu.
12 Ua vae au me to ù haatupu i to ù aka io te mataèinaa kāìèa,
te hope taetae ta te Etua i tāpae no Īa,
i vāveka ahau o te motuhaka poì peàto.
TARAMO 147 (147B), 12-13, 14-15, 19-20
U haaènanaìa te Tekao me to Īa noho i vāveka o tātou.
In.1,14
12 A haakāìè i te Hatu, e Ierutaremi e.
A hahi i to òe Etua, e Tiona e.
13 U haamau Īa i te tau katina o to òe haè.
U haameitaì Īa i ta òe tau tama me te huaahaè.
14 U vaièi Īa i te moû io to òe henua vii pu.
U hākai haamaòna ia òe me te haraoa mōmona.
15 U pōpahi te Hatu i to Īa keèe i te henua vii pu.
Ma te haakoi, u mevaha to Īa tekao hou.
19 U hakaìte te Hatu i ta Īa tekao ia Iakopo.
Ua haki i to Īa makimaki me te Ture ia Iraene.
20 I hea te mataèinaa ta te Etua i haataetae atu ?
Aòè te henua kē i ìte i to te Etua makimaki.
TATAUÌA O TE HĀMANI A PAURO PEÀTO I TO EFETIA
1, 3-6 15-18
3
A haameitaììa te Etua
me te Motua o to tātou Hatu, Ietu Kirito.
Io he àki, i òto o te Kirito, u haameitaì hoì te Etua ia tātou,
ma te haapī mai me te taetae kuhane.
4 Òmua naoti, ma mua to Īa pēpena i te ao nei,
ua vae te Etua ia tātou i òto o te Kirito,
etià e peàto, teka koè tātou i to Īa aò,
e pohuè ana i òto o te kāòha.
5 Ma mua o te pēpena, mēìa i to Īa vaièi anamai,
ua vae te Etua ia tātou, na Īa ta Īa anaè,
etià e ìò tātou he tau tama no Īa, ma io Ietu Kirito.
6 A hahiìa te Etua, no to Īa karatia mahaò,
ta Īa i vaièi mai ia tātou, i òto o to Īa Tama tāhia.
15 No èià, me i te ava ua ìte au i to ôtou haatià i te Hatu Ietu,
to ôtou kāòha i te mataèinaa peàto o te Etua,
16 u haahuaèkaèka au mēìa ia ôtou,
e haamaakau ana ia ôtou i òto o ta ù pure.
17 Na te Etua o to tātou Hatu Ietu Kirito,
te Etua Motua o te kāìè nui io he àki,
e vaièi mai i te Kuhane haamāàma ia ôtou,
no te ìte ma te tiàtohu o ai te Etua.
18 Na te Etua e haapuàha i to ôtou koekoe
ma te haavivini i te mea nei : E aha te taetae
ta tātou e tetaì nei mēìa u vavaò mai te Etua ?
E aha te kāìè nui tāpaeìa e te Etua no to Īa mataèinaa ?
ALLELUIA ALLELUIA
cf. .1 Tm.3,16
A hahiìa Òe, e Ietu Kirito e, te i hakaìteìa me te hakatu ènana, te i haaòko nui ìa i vāveka o te tau mataèinaa,
A hahiìa Òe !
EVANERIO O IETU KIRITO VĀÀNA E IOANE 1, 1-18
Akoè à 1, 1-5.9-14
1 I te tumu te Tekao. Io te Etua te Tekao.
2 He Etua te Tekao.
I te tumu anamai io te Etua te Tekao.
3 Ma io te Tekao te tau mea paotū i pēpenaìa.
Umoì īa, aòè he mea i pēpenaìa to te i pēpenaìa.
4 I òto o te Tekao te pohuè.
He māàma no te tau ènana te pohuè.
5 U pupuà te māàma io he pōtako,
u haapākeka koè ta te pōtako i te māàma.
6 Ua ìteìa te ènana ta te Etua i pōpahi mai.
O Ioane to īa ikoa.
7 Ua tihe īa no te haatiàtohu i te māàma,
etià e haatià te tau ènana paotū.
8 Aòè īa te māàma. U haatiàtohu īa i te māàma.
9 Enā te māàma tiàtohu mea tūìka i te tau ènana paotū
te i tihe mai i te ao nei.
10 Io te aomāàma te Tekao, na īa i pēpena i te aomāàma :
aòè to te ao nei i ìte ia īa.
11 Ua tihe mai io to īa toitoi. Aòè to īa i apuu mai.
12 I te poì hakatahi i apuu ia īa,
ua tuku atu īa i te mana no te haaìò he tau tama a te Etua.
Oia te poì i haatià ia īa.
13 O te poì koè na te toto,
koè na te makimaki nino, koè na te makimaki ènana,
atià à na te makimaki o te Etua i hānauìa ai.
14 U haaènanaìa te Tekao me to īa noho i vāveka o tātou.
Ua ìte tātou i to īa kāìè,
he kāìè ta te Motua i vaièi atu i ta Īa Tama tootahi,
pī i te karatia me te tiàtohu.
15 U haatiàtohu Ioane ia Īa, e taaàu aa pēènei :
« O Īa nei te ènana ta ù i peàu atu :
u meitaì aè ia ù te i tihe ai ma muì o au.
Na te mea òmua atu Īa, epō au nei.
16 Me io to Īa meitaì nui, u koàka mai ia tātou kōtoa te taetae,
te tau karatia ma hope o te karatia.
17 Ma io Moite, ua tuku mai te Etua i te Ture.
Ma io Ietu Kirito, ua tihe mai te karatia me te tiàtohu.
18 Aòè te ènana e tahi i ìte i te Etua.
O te Tama tootahi, he Etua anaiho Īa, pii me te Motua,
u hakaìteìa mai te Etua. »
__________________________________________
TE KOÌKA EPIFANIA
TATAUÌA O TE HĀMANI O TE PEROHETA ITAIA 60, 1-6
1 A maô, e Ierutaremi e. A pupuà.
Ua tihe mai te àma no te haakeàpa ia òe.
Ua vāhī te kāìè o te Etua ia òe.
2 A tiòhi atu. Ua pō pōtako te henua vii pu.
Io te vao maù nui, ua noho te tau mataèinaa.
Atià, ua tū te Hatu. E pupuà nei to Īa kāìè i ùka o òe.
3 E haatata mai te tau mataèinaa io to òe māàma.
E tataha mai te tau hakaìki io to òe atauà.
4 A heau. A tiòhi matiòka vii pu o òe.
E hakātahi mai âtou nui. E titihe nei âtou paotū.
Ua tihe mai nei ta òe tau tama me i te henua mamao.
Ua hua mai ta òe tau moî, e tautuaìa âtou.
5 I hua ava e ìte òe, e èkaèka nui òe.
E ù to òe koekoe pī i te koakoa.
E tihe ai io òe te tau taetae me i te henua mamao.
E haapukeìa io òe te tau hāìna kē
me io te tau mataèinaa o te aomāàma vii pu.
6 E hihiti mai io òe te tau naho kamerō
o te Henua Matiana me te Henua Efa.
E titihe mai io òe te poì Hapa kave aa i to âtou
E hahi âtou me te haakāìè i te Hatu Etua.
TARAMO 72 (71), 1-2, 7-8, 10ab.11, 12-13
E ìteìa to Òe haapohuè mai, e te Hatu e,
e te tau henua me te tau mataèinaa paotū. cf. 72,11
E te Etua e, a tuku i to Òe mana i te hakaìki.
A tuku i to Òe toitoi i te tama o te hakaìki.
2 A vivini īa i to Òe mataèinaa vāàna i te toitoi.
A apuu īa me te toko i te poì veve e uēuē aa.
7 I hua tau â, e pupuà te hakatu pohuè vāàna i te toitoi,
I te henua, e puàha te moû ma te nuiìa o te tau meàma.
8 A vivini te hakaìki me io te tai tihe atu i te tai,
Me io te kaavai tihe atu i te kotina o te henua.
10 Te hakaìki o te Henua Tarati, o te tau motu
E kave mai i te vaetukia me te taetae kāòha.
11 E moe haatona i mua o īa paotū te tau hakaìki.
E tāvini no īa te tau henua me te tau mataèinaa.
12 E haapohuè īa i te ènana veve e vavaò ia īa,
E toko īa i te poì oomiìa e te àì.
13 E apuu īa i te ènana pōtako, mātua avai noa.
E tiòhi meitaì īa i ùka o te poì tupe noa.
TATAUÌA O TE HĀMANI A PAURO PEÀTO I TO EFETIA
3, 2-3a.5-6
E tu ù tau tuàne tuehine,
2 Ua òko hoì ôtou pēhea mēìa i to Īa vaièi,
ua tuku mai te Etua i te karatia no te hana i uē ia ôtou.
3 Ma òto o te hakiìa me io te Kuhane Meitaì,
u hakaìte mai te Etua i to Īa makimaki hakanā.
5 I te tau tai tehito,
aòè te tau ènana i ìte i hua makimaki hakanā.
Atià, i tēnei, ua hakiìa atu e te Kuhane Meitaì
i te tau Àpotoro o te Etua me te tau peroheta, pēènei :
6 U koàka mai i te tau êteni te tau taetae kuhane,
peàuìa òmua, hua mea anaiho me to te tau ati Iuta.
O âtou nui me he tau mēmau o te Tino e tahi.
Ia âtou, te poì êteni tūtaì me te tau ati Iuta,
te taetae vaièiìa i òto o te Kirito Ietu.
Oia hoì te tau puku o te Evanerio.
ALLELUIA ALLELUIA
cf. Mt.2,2
Ua ìte mātou i to Īa hetū.
Ua tihe mātou no te atoratio i te Hatu.
EVANERIO O IETU KIRITO VĀÀNA E MATEO 2, 1-12
1 U hānauìa Ietu i te kaavai Petereemi o te Henua Iutea,
i te ava o Herote te hakaìki o hua henua.
I hua mou â, u titihe mai i Ierutaremi, te mou Mākoi
me io te henua o te kēkē tiheìa òumati.
2 U peàu âtou :
« I hea te hakaìki nui o te tau ati Iuta te i hānau i tēnei tau pō ?
Ua ìte hoì mātou i to Īa hetū
io he henua o te kēkē tiheìa òumati.
Ua tihe mātou no te moe haatona i to Īa aò. »
3 Ia òko te hakaìki Herote i hua tekao, u emièe,
atii me to Ierutaremi ia ôtoa.
4 U haaputuputu mai īa i te tau tāuà nui paotū
me te tau tuhuka tekao o te mataèinaa.
Ua ūi atu Herote ia âtou :
« I te vahi hea e hānau ai te Kirito ? »
5 U peàu âtou ia īa :
« I Petereemi io te Henua Iutea,
vāàna i te mea i patuìa e te peroheta :
6 « O òe, e Petereemi o te Henua Iutea e,
aòè hoì òe he kaavai iti noa i te Henua Iutea !
Na te mea me io òe e tū ai te Hakaìki,
te Tiaki meitaì o Iraene, to ù mataèinaa. »
7 Ma te tekao hakanā, u vavaò mai Herote i te tau Mākoi
me to īa ape ia âtou no te haavivini toitoi mai
inehea i pupuà ai te hetū.
8 U pōpahi Herote ia âtou i Petereemi.
U peàu ia âtou pēènei : « A hee atu ôtou.
A ùmihi mamate i te tekao i ùka o hua Tama hou.
Me koàka ia ôtou te tekao, a haki mai ponihoo,
etià e hee me au e pakaihi ia Īa. »
9 U aotahi âtou i te hakaìki me to âtou tataha atu.
Enā te hetū ta te tau Mākoi i ìte òmua io te henua
o te kēkē tiheìa òumati, u pupuà i mua o âtou
me te tau io te vahi i èià te Tama hou.
10 E ìte aa i te hetū, u koakoa nui te tau Mākoi.
11 Ua uu âtou i òto o te haè me to âtou ìte
i te Tama hou me Maria, to Īa òna kui.
U momoe haatona âtou i to Īa aò.
E too aa i to âtou taetae, u ùtuna i te vaetukia :
te moni kiki, te èpau kakaa, te mira.
12 Ma òto o te hiamoe, u hakaìteìa i te tau Mākoi,
umoì âtou e hua io te hakaìki Herote.
Ua hua hoì âtou i to âtou henua ma he vaanui kē.
TE KOÌKA O TE PAPATEMA O IETU
TATAUÌA O TE PEROHETA ITAIA 55, 1-11
1 Oia nei te Tekao a te Hatu Etua :
Me mate ôtou i te paka vai ? A mai ! A inu !
Me moni koè ôtou ? A hoko pu ! A kai !
2 Umoì e haapao pu i ta ôtou moni hana
no te kai i te înaì haamaòna koè.
3 A hakaòko mai ! E maòna ôtou i te înaì mōmona.
A hakaòko mai ! Mave mai ! E pohuè meitaì ôtou.
E haatoitoi au me ôtou i te Piimau paona koè.
E ìò hoì ia ôtou te taetae a Tavite.
4 Ua haamau au ia īa he ènana no ù i vāveka o te tau mataèinaa,
te aahi, te vivini o te tau ati.
5 O òe à, e vavaò òe i tītahi ati aòè òe i ìte ;
e tihe mai io òe tītahi ati kē mēìa i to òe Hatu Etua,
te Peàto nui o Iraene te i haakāìè ia òe.
6 A ùmihi ôtou i te Etua, oia te ava e tutuki me Īa.
I te ava nei, a pure ôtou i te Etua, u tata èka me ôtou.
7 A hua mai te ènana mākaka me io to īa vaanui hukaka !
A titii te ènana ìno i to īa maakau pē !
A hua io te Etua te i hakāòha mai ia īa !
8 He mea kē hoì te makimaki o te Etua, mea kē to te tau ènana.
He mea kē te hakatu o te Etua, mea kē to te tau ènana.
9 Atii te tiketike o te àki ma ùka o te henua,
atii te hōhonu atu o te maakau o te Etua
ma ùka o te maakau ènana.
10 Ia topa te ūa me te nive me io he àki,
haakutaù âtou me te haatapavaù i te henua.
U haatupu âtou i te èitā me te haahua i te puku
no te hākai i te tau ènana me te tau manu e kai aa.
11 Atii hoì te tekao ta ù i hakaìte atu :
E hana tēia tekao i te hana ta ù i makimaki.
U te e hua io ù ta ù tekao puku koè.
HĪMENE : ITAIA 12, 2, 4b-e, 5b-6
E tātakahiti ana ôtou me te koakoa,
E kapu i te vai me io te punavai pohuè. 12,3
2 O te Hatu Etua tu ù Haapohuè.
U haatià nei au, haametaù koè.
O te Hatu Etua tu ù ìi. E hīmene au ia Īa.
Io te Hatu te tumu o to ù pohuè.
4 I hua â, e haahuaèkaèka ana i te Hatu, e peàu ôtou :
« A haki atu io te poì êteni i to Īa tau hana mana. »
A hakaìte atu : he Tiketike to Īa ikoa.
5 Ua hana hoì te Hatu i te hana mahaò.
U mevaha to Īa òko nui ma nā henua vii pu.
6 E Tiona e, a èkaèka, a taaàu i te koakoa !
U titike te Hatu Etua i vāveka o ôtou.
O Īa te Peàto nui o Iraene.
TATAUÌA O TO MUA HĀMANI A IOANE ÀPOTORO 5, 1-6
1 O te ènana i haatià o Ietu te Kirito,
u hānauìa me io te Etua.
Me kāòha te ènana i te Motua,
u kāòha hoì i ta Īa tau tama.
2 Pēènei to tātou ìte u kāòha tātou i te tau tama a te Etua :
a kāòha tātou i te Etua, a aotahi atu i ta Īa tekao.
3 Na te mea, hua mea anaiho te kāòha i te Etua
me te aotahi atu i ta Īa tau tekao.
Mea hana māeka te aotahi i te Tekao a te Etua,
4 na te mea, u tuàkiìa to te ao nei e te tau tama a te Etua.
5 Ma te haatià, u tuàki tātou i to te ao nei.
Na ai i tuàki i te ao nei ?
O te ènana e haatià o Ietu te Tama a te Etua.
6 O hua Ietu Kirito te i tihe me te vai me te toto,
aòè me te vai anaè, atià me te vai me te toto.
O te Kuhane te i haatiàtohu ia Ietu Kirito.
O te Kuhane hoì te Tiàtohu.
ALLELUIA ALLELUIA
cf.Mt.3,16-17 ; Ta.29,3
I tēnei â, u pepeùìa te àki,
ua iho mai te Kuhane i ùka o Ietu,
ua òkoìa te èo o te Motua :
« O Īa nei tu ù Tama tāhia. »
EVANERIO O IETU KIRITO VĀÀNA E MAREKO 1, 7-11
I tēia mou pō,
7 u hakako Ioane i te tekao me to īa peàu :
« Enā a tihe mai tītahi ma hope o au nei :
he mana kaùoo atu to Īa, he mana iti to ù nei.
Aòè e hei ia oha au pii to Īa nā vaevae
no te vevete i te aho o to Īa aihū.
8 O au à, u papatema au ia ôtou me te vai,
o Īa e papatema ia ôtou i òto o te Kuhane Meitaì. »
9 I tēia mou pō, ua hee Ietu
me io te pāpuahaè Natareti i te Henua Karirea.
I òto o te vaitahe Ioritane,
u koàka mai ia Īa te papatema ma io Ioane.
10 I te ava ua hiti Ietu me i òto o te vai,
ua ìte anamai Īa i te ataàki e vahi aa me te pepeù.
Me he manu tavaìè, ua iho mai te Kuhane Meitaì i ùka o Īa.
11 U pohā te èo me io he àki, pēènei :
« O Òe tu ù Tama tāhia.
Io Òe te tiàtohu o to ù Kāòha. »
___________________________________________
PŌ E TOÙ TE KOÌKA ÈHUAHI
TATAUÌA O TE HĀMANI A TE PEROHETA IOERE 2, 12-18
12 Oia nei te Tekao a te Hatu Etua.
A hua mai ôtou io ù me te koekoe tiàtohu,
ma òto o te haaoke, te vaimata me te kahu uē.
A hāìu i to ôtou koekoe me te hua io to ôtou Etua.
He moû, he hakāòha nui te Hatu,
u haatevee i te pekē, ua pī nui i te uē,
U haamāhaè Īa i te tuki pē.
14 O ai te i ìte ? E hua ùanei Īa me te moû
no te haakoè i te umu, me te haapī ia ôtou i to Īa vaièi mai.
E koàka ia ôtou te ùtuna atu i te hēaka
io te Hatu, to ôtou Etua.
15 A haataki i te pū, e Ierutaremi e.
A hakaìte i te ava haaoke tapu.
A haapei i te koìka pure. A putuputu te motuhaka peàto.
A hakātahi mai i te papa hakaìki me i te tau tuhuka.
A muimui mai te mataèinaa.
A haaputuputu mai te tau tama hou me te tau tōìki.
16 A uu i vaho me io he haè te vāhana hou,
i vaho me io to īa pāòto te vehine hou.
A tomo io he haèpure te tau tāuà, tāvini o te Etua.
A pure âtou, a hīmene i te hīmene uē e peàu aa :
« E te Hatu e, a hakāòha mai i to Òe mataèinaa.
17 Aua Òe e ao i te poì êteni
te i haamee me te māio i to Òe mataèinaa.
No te aha e peàu âtou : « I hea to âtou Etua ? »
18 A tahi a tāvaè te Hatu me te hakāòha i to Īa mataèinaa.
TARAMO 51 (50), 3-4, 5-6ab, 12-13, 14.17
E te Etua e, a hakāòha mai, mēìa i to mātou mikeo.
cf. Ta. 51,3
3 E te Etua e, a hakāòha mai.
Mēìa i te nuiìa o to Òe uē,
4 A hooi mai me i to ù mikeo.
A haamā i tu ù koekoe pē.
5 Ua ìte au i to ù mikeo.
U maakau ananu au i to ù piò.
6 Ua teka au io Òe anaiho,
I to Òe aò, ua hana au i te mea pē.
12 A pēpena i òto o au nei i te koekoe taìtaì.
A haahou i to ù kuhane, a haamau i to īa meitaì.
13 Umoì e titii atu ia ù mamao me io Òe.
Umoì e taki me i òto o au i to Òe Kuhane Meitaì.
14 A haakoakoa ia ù to Òe haapohuè mai.
A haamau i te èkaèka io to ù koekoe.
17 E te Hatu, tu ù Etua e, a pepeù i to ù kiinutu,
A tahi a hahi to ù haha i to Òe kāìè.
TATAUÌA O TE HĀMANI E ÙA I TO KORINETIA 5, 20-6, 2
E tu ù tau tuàne tuehine,
20 Ua ìò mātou he tau keèe no te Kirito.
O te Etua iho te i oonaki ia ôtou ma òto o to mātou haha.
I te ikoa o te Kirito, u toutaki mātou ia ôtou :
a ao ôtou e haatutuki te Etua ia ôtou me Īa.
21 Ua piò koè, mikeo koè te Kirito.
Atià, i uē ia tātou, u haatopa te Etua i ùka o te Kirito
i te tuki pē o te mikeo.
Ma èià, i òto o te Kirito, u toitoi mātou nei i mua o te Etua.
6,1 Ohia ua hana mātou me he mou tautua o te Etua,
u toutaki mātou : « Umoì ôtou e avai pu anaè
i te karatia ta te Etua i vaièi mai.
2 Ua patuìa hoì ma òto o te Hāmani tapu :
« I te ava e hei, e hati au i to òe hīa ;
i te â haapohuè, e toko au ia òe.
Oia nei te ava e hei, oia hoì te â o te haapohuè. »
TE HĪMENE VĀNANA
Mt. 4,17
U peàu te Hatu : « A hāìu i to ôtou koekoe,
u tata èka te Patirēia o te Etua. »
EVANERIO O IETU KIRITO VĀÀNA E MATEO 6, 1-6.16-18
I tēia mou pō, ohia u putuputu mai te tau kouâ
i ùka o te tuaivi vii pu o Ietu, u peàu ia âtou pēènei :
1 « Umoì e aotahi ôtou i to te Etua makimaki,
i te ava enā te tau ènana
e tiòhi ia ôtou me te haakāìè mai.
Me hana ôtou atii, e koè ai to ôtou tuki
me io to ôtou Motua te io he àki.
2 Ia vaièi atu òe i te taetae kāòha,
umoì e hana òe me he mea ta te poì koekoe e ùa
te i haataki i te pū i òto o te tinakoka, io he tohua,
etià e haakāìè te tau ènana ia âtou.
Ma te tiàtohu to ù peàu ia ôtou, u koàka mai ia âtou te tuki.
3 Ia vaièi atu òe i te taetae kāòha,
aua e ìte to òe ìma aèaè e aha ta te ìma oko i tuku.
4 Ma èià, e hana hakanā to òe vaièiìa.
Na to òe Motua te ìte i te mea hakanā,
e haahua mai ia òe. »
5 I te ava e pure ôtou,
aua e hana hakatu me te poì koekoe e ùa.
U koakoa âtou e pure tū aa i òto o te tau tinakoka,
akoè à io te tau tohua, etià e ìte te tau ènana ia âtou.
Ma te tiàtohu to ù peàu ia ôtou : u koàka mai ia âtou te tuki.
6 O òe, i te ava e hano òe i te pure,
a uu i òto o te pāòto hakanā o te haè, a pā te avaputa,
a pure io to òe Motua te i noho io he vahi hakanā.
Na to òe Motua te ìte i te mea hakanā,
e haahua mai ia òe.
16 Me haaoke ôtou,
umoì e haaìò i to ôtou mata me he mata uē,
hakatu me te tau ènana koekoe e ùa te i haakē i te mata,
etià e mata haaoke to âtou i mua o te tau ènana.
Ma te tiàtohu to ù peàu ia ôtou : u koàka mai ia âtou te tuki.
17 O òe à, me haaoke òe, a paù i to òe upoko
me te kao kakaa, a hooi i to òe mata,
18 etià u te e ìte te tau ènana e haaoke nei òe.
E ìte anaè to òe Motua te i noho io he vahi hakanā.
Na to òe Motua te ìte i te mea hakanā,
e haahua mai ia òe. »
TE TOMINIKA TO MUA O TE AVA HAAOKE
TATAUÌA O TE HĀMANI A MOITE PEÀUÌA TENETE
9,8-15
Ma hope o te vaiā nui,
8 u peàu te Hatu Etua ia Noa me ta īa tau tama, pēènei :
9 « Enā to ù Piimau me ôtou, atii me to ôtou ati i ùka aè,
10 te tau mēmau pohuè paotū vii pu o ôtou ana :
te tau manu e ona nei ma he ataàki,
te tau puaka vaè me te tau puaka kaipekā,
te tau ànimara paotū te i uu i vaho o te Àraka
no te haapī hakaùa i te henua.
11 Oia nei te Piimau e haatoitoi au me ôtou :
Aòè e tahi mēmau pohuè e haamateìa hakaùa e te vaiā nui.
Aòè e vaiā nui hakaùa no te haakaò i te henua. »
12 U peàu atu te Hatu Etua :
« Eīa te hakatu no te haamaakau i te Piimau
e haatoitoi au me ôtou
atii me te tau mēmau pohuè vii pu o ôtou ana,
no te tau tai ènana a tihe ananu.
13 E tauèva au i to ù anuanua io te ataàki,
i vāveka ahau o te kohu.
I èià, e ìteìa te hakatu o to ù Piimau me te henua.
14 Ohia e haamuimui mai au i te tau kohu i ùka o te henua,
me ìteìa te anuanua i vāveka ahau o âtou,
e haamaakau au i to ù Piimau me ôtou,
atii me te tau mēmau pohuè paotū.
15 Aòè te tau vai e ìò hakaùa he vaiā nui
no te haakaò i te mēmau pohuè.
TARAMO 25 (24), 4-5b, 6-7, 8-9
E te Hatu e, he kāòha me te tiàtohu to Òe vaanui,
no te ènana e aotahi atu i to Òe Piimau. cf. 25,10
4 E te Hatu e, a hakaìte mai i to Òe makimaki.
O Òe iho, a hakako mai i to òe tau vaanui.
5 A haatee mai to Òe tiàtohu : a haamāàma mai.
O Òe hoì te Etua e haapohuè ia ù.
6 E te Hatu e, a haamaakau i to Òe uē,
Me i kiu mai to Òe kāòha te i noho mau.
7 A māhaè i te tau tekateka o to ù houìa,
Umoì e titii atu ia ù nei : a haamaakau mai.
8 U meitaì, u toitoi anaè te Hatu
Te i hakaìte i te vaanui i te poì hukaka.
9 U aahi to Īa toitoi i te poì haapāpaku,
U hakako i to Īa makimaki i te ènana kāìè koè.
TATAUÌA O TO MUA HĀMANI A PETERO PEÀTO 3, 18-22
E te tau tuàne tuehine.
18 Ua mate nui hoì Ietu Kirito mēìa i te tau mikeo o te ènana.
U mamae Īa i te mateìa e tahi anaè,
ua àva no te tau tai ananu.
Ua mate te ènana toitoi noa i uē i te poì toitoi koè
no te aahi ia tātou io te Etua.
U haamate te tau ènana i to te Kirito nino,
u hakatū hakaùa te Etua ia Īa vāàna i te Kuhane.
19 I hua ava, ua hee Ietu no te kave i te Tekao hou
io te tau kuhane humuìa i Havaiki.
20 O âtou te poì pūtuì i haatevee ai te Etua i to Īa pekē,
u kānea Noa i te Àraka.
I ùka o hua Àraka, u haapohuèìa te mou ènana,
toovaù âtou, mēìa ua àka âtou io he vai.
21 Ua ìò hua haapohuèìa i òto o te vai,
te hakatu o te papatema te i haapohuè ia tātou.
U te e hooi te papatema i te èpo me io he nino,
he pure vavaò io te Hatu Etua hua papatema
no te koàka mai i te koekoe toitoi noa,
ma te mana o te Tūhakaùaìa o Ietu Kirito.
22 U tānoho hoì Ietu io he àki, i te ìma òko o te Etua,
e vivini aa i te tau anera, te tau hakaìki anera,
atii me te tau kuhane mana ia ôtoa.
HĪMENE VĀNANA :
He tiàtohu nui to Òe tekao,
Aòè e pohuè te ènana i te haraoa anaè,
Atià i te tekao paotū me io te haha o te Etua.
EVANERIO O IETU KIRITO VĀÀNA E MAREKO 1, 12-15
I tēia mou pō,
u aahi ponihoo te Kuhane Meitaì ia Ietu i te henua ataha.
13 Ua noho Ietu i te henua ataha e hā ònohuu â,
u haamōtiiìa e Tatane.
I vāveka o te tau puaka kaipekā to īa nohoìa.
U tāvini te tau anera ia Īa.
14 Ma hope u haaìòìa Ioane, ua hiti Ietu i te Henua Karirea.
U hakaìte atu Īa i te Tekao Meitaì Hou Mai me io te Etua.
15 U peàu Īa pēènei :
« Ua pao te ava i haaheiìa.
U tata èka te Patirēia o te Etua.
A hāìu ôtou i te koekoe.
A haatià i te Tekao Meitaì Hou Mai ! »
TOMINIKA E ÙA O TE AVA HAAOKE
TATAUÌA O TE HĀMANI A MOITE PEÀUÌA TENETE
22, 1-2.9a.10-13.15-18
1 U haahiiveke te Etua ia Aparahamo
me te peàu ia īa : « E Aparahamo e ! »
U haahua atu īa : « Eīa au nei. »
2 U peàu te Etua :
« A too i ta òe tama, te tamaòa tootahi,
te tama ta òe e haataetae nei, o Itaako.
A hee atu io te Henua Moria ; i èià, a ùtuna mai ia īa,
i ùka o te tuaivi e hakaìte atu au ia òe. »
9 I te ava ua tihe âua i te vahi i peàuìa e te Etua,
10 u hapai Aparahamo i te ìma,
ua too i te kohe no te kukumi i ta īa tama.
11 A tahi a vavaò te anera o te Hatu Etua me io he àki
me te peàu : « E Aparahamo, Aparahamo e ! »
U haahua atu īa : « Eīa au nei. »
12 U peàu te anera : « Umoì òe e tā i te māhaì.
Umoì òe e haamamae ia īa.
Ua ìte au i tēnei i te mea u pakaihi òe i te Etua.
Aòè hoì òe i kaikino mai i te tama, ta òe tama tootahi. »
13 A tahi a heau Aparahamo me to īa ìte i te koimaa menē
te i hiiveke io he maaèitā keoho.
Ua hano īa i te menē too mai,
me to īa ùtuna atu mea hēaka i te ava o ta īa tama.
Ua apa Aparahamo i hua vahi : « Ua ìte te Hatu Etua. »
15 Na te anera o te Hatu Etua me io he àki
i vavaò hakaùa ia Aparahamo me te peàu :
16 « He tekao a te Hatu Etua.
E haatiàtohu au ma to ù iho ikoa :
mēìa u aotahi mai, aòè i kaikino òe i te tama,
ta òe tama tootahi, e haameitaì me te vaièi nui au ia òe.
17 E haanui au tini tini i to òe ati i ùka aè,
me he nui o te tau hetū io he ataàki,
me he nui o te one i te hiku o te tai.
E haahika âtou i te pākeâ me te moukatōua
o te mataèinaa e ahi me âtou.
18 Mēìa u aotahi mai òe,
e haameitaì atu haameitaì mai te tau mataèinaa paotū
ma te vavaò mai i to òe ikoa. »
TARAMO 116B (114-115), 10.15, 16ac-17, 18-19
E taha au i te aò o te Hatu
io he henua o te poì pohupohuè. 115,9
10 U haatià au, no èià e pohā nei to ù èo.
Nui atu to ù mamae me te uē.
15 He taetae io te Hatu,
Te mateìa o to Īa huaa.
16 O au à to Òe tāvini, e te Hatu e,
Te ènana humuìa ta Òe i vevete ai.
17 E ùtuna au i te hēaka haahuaèkaèka,
E vavaò au i te ikoa o te Hatu.
18 E hana au vāàna i ta ù tekao voto
I mua o te motuhaka nui o to Īa mataèinaa,
19 Io te tohua o te haè tapu o te Hatu,
I vāveka ahau o te pāpuahaè Ierutaremi.
TATAUÌA O TE HĀMANI A PAURO PEÀTO I TO ROMA
8, 31b-34
E tu ù tau tuàne tuehine.
31 Me he mea me tātou te Etua, o ai e tuàki mai ?
32 Aòè i kaikino te Etua i ta Īa iho Tama :
ua tuku mai ia Īa no tātou paotū.
Pēhea ta te Etua e kaikino ai i tītahi mea ?
E vaièi mai hoì Īa i te tau mea paotū.
33 O ai e pōtoho pu i te tau ènana ta te Etua i vae ?
O te Etua anaiho te i haatoitoi ia âtou.
O ai te ènana e hakatio ia tātou ?
34 U vavaò i uē ia tātou Ietu Kirito te i mate ai,
tōtahi atu te i tū hakaùa mai,
te i noho i te ìma oko o te Etua.
HĪMENE VĀNANA :
cf. Mt 17,5
Me i òto o te ao tapu e pupuà nei,
ua taki te èo o te Etua Motua :
« O Īa nei tu ù Tama tāhia ; a hakaòko ôtou ia Īa. »
EVANERIO O IETU KIRITO VĀÀNA E MAREKO 9, 2-10
2 I tēia mou pō, ua too Ietu me Īa
ia Petero, ia Iakopo me Ioane.
U aahi atu ia âtou i ùka o te tuaivi tiketike,
io te vahi kē, o âtou anaè.
3 U haahuìkēìa Ietu i mua o âtou.
U pōnionio to Īa kahu : u tavaìè oko.
Aòè e koàka i te ènana te haatavaìè atii i te kahu.
4 Ua ìte âtou ia Eria me Moite e tekatekao aa me Ietu.
5 U pohā te èo o Petero me to īa peàu ia Ietu :
« E Rapi e, mea meitaì a noho tātou înei.
A hakatū tātou e toù haèâ : e tahi no Òe,
e tahi no Moite, e tahi no Eria. »
6 Aòè hoì Petero i ìte e aha to te peàu atu,
na te mea ua hemo âtou i te haametaù.
7 A tahi a iho mai te ao te i vāhī ia âtou.
U pohā mai te èo me i òto o te ao e peàu aa :
« O Īa nei tu ù Tama tāhia. A hakaòko ôtou ia Īa. »
8 E tiòhi anamai âtou vii pu, aòè he ènana i ìteìa.
O Ietu tootahi me âtou.
9 E iho ana âtou me i ùka he tuaivi, u oonaki Ietu ia âtou :
« Umoì e haki atu i te mea ta âtou i ìte,
tihe i te â e tū ai hakaùa te Tama a te ènana
me i vāveka o te huaa mamate. »
10 Aòè âtou i haki atu.
Atià, u peàpeàu atu te hoa i te hoa, e aha oti
« te Tūhakaùaìa me i vāveka o te huaa mamate. »
TOMINIKA E TOÙ O TE AVA HAAOKE
TATAUÌA O TE HĀMANI A MOITE PEÀUÌA EHOTO
20, 1-17
1 U tekao te Etua ia Moite me to Īa peàu pēènei à :
2 « O au te Hatu, to òe Etua, te i haauu ia òe
i vaho me i te Henua Ekipito,
me i òto mai o te haè o te poì haamōèhuìa.
3 Umoì te Etua kē io òe : o au anaè te Etua.
4 Umoì e haatiki òe i te ata o te mea io he àki,
o te tau mēmau io he henua,
akoè à i òto o te vai, i àò o te henua.
5 Umoì òe e moe haatona i mua o hua tau ata,
umoì e tāvini atu ia âtou.
O au hoì te Hatu, to òe Etua, he Etua toumakou au.
Ia teka tītahi io ù, me te haahaa ia ù,
e topa te tuki pē ma ùka o te upoko o ta īa tau tama
me te tau poupuna, tihe atu e hā o te tai ènana.
6 Atià, te ènana te i kāòha mai me te aotahi i ta ù tekao,
e haameitaì au ia īa tihe atu i te tai ènana tini tini.
7 Umoì e vavaò pu i te ikoa o te Hatu, to òe Etua,
no te haatiàtohu i te mea tīvava.
U te e avai te Hatu tuki koè i te ènana e vavaò pu
i to Īa ikoa, no te haatiàtohu i te mea tīvava.
8 A haamaakau òe i te Tāpati : he â tapu.
9 Ma te mou pō e ono, a hana i ta òe hana.
10 Atià, o te hitu o te tau â, he â hakaēa i te hana,
he Tāpati no te hahi i te Hatu, to òe Etua.
Aua e hana òe, ta òe tamaòa, te moî,
te tueni, akoè à ta òe ànimara.
11 Ma te òa o nā pō e ono, u pēpena te Etua i te àki,
te henua, te tai me te tau mēmau i òto.
I te â e hitu, u hakaēa te Etua i te hana,
me to Īa haatapu i hua â.
12 A pakaihi i to òe motua me te kui, vāàna e òa to òe pohuè
io he henua ta te Hatu Etua e tuku ia òe.
13 Umoì e kukumi haamate i te ènana.
14 Umoì e hana pē i te mātirimonio.
15 Umoì e kamo.
16 Umoì e pōtoho pu no te hakatio i te hoa.
17 Umoì e hinenaò pu i te vehine a te hoa.
Umoì e kōhoà pu i te haè o to òe hoa, akoè à i ta īa tueni,
ta īa piha, ta īa pūriki, ta īa tau mēmau kē. »
TARAMO 19 (18), 8,9,10,11
E te Etua e, io Òe anaiho te Tekao
e aahi atu i te pohuè ananu. cf. In.6,69
8 U toitoi noa te ture o te Hatu,
Na Īa e haahou i to tātou ìi.
U tiàtohu te Tekao a te Hatu
Te i haamāàma i te poì avai noa.
9 U toitoi te Tekao a te Hatu,
E haakoakoa âtou i te koekoe.
U hōata te makimaki o te Hatu,
E haakeàpa i te mata o te ènana.
10 U taìtaì te pakaihiìa o te Etua,
E noho mau ananu to Īa tau puku.
U toitoi te tekao paotū o te Hatu :
U māàma âtou no te haavā i te ènana.
11 U taetae atu te makimaki o te Hatu
I te puke moni kiki, te kuà o te moni kiki.
U mānini atu te Tekao a te Etua,
I te mānini tikauè e tahe me io he tīpapa.
TATAUÌA O TO MUA HĀMANI I TO KORINETIA 1, 22-25
E tu ù tau tuàne tuehine,
22 u makimaki te tau ati Iuta e ìtemata
i te tau hana mana me he hakatu.
No te poì Hereni, he mea kē :
e ùmihi nei âtou i te māàma hōhonu o te tekao.
23 O tātou à, u hakako tātou i te Kirito pāokapekaìa.
No te tau ati Iuta he tekao haapākeka i te haatià.
He tekao kōea no te tau mataèinaa êteni.
24 Atià, no te tau ènana vaeìa e te Etua,
e aha à he tau ati Iuta, akoè à he tau êteni,
O Īa nei te Kirito, te Mana o te Etua, te Māàma o te Etua.
25 Na te mea te hakatu tuaave o te Etua,
he māàma aè i te maakau o te tau ènana.
O te hakatu pepae o te Etua,
he mana atu i to te tau ènana maakau.
HĪMENE VĀNANA :
cf.Ko.2,9
I òto hoì o te Kirito ènana tiàtohu,
ua noho te hakatu toitoi pao ònaòna o te Etua.
EVANERIO O IETU KIRITO VĀÀNA E IOANE 2, 13-25
13 Ohia ua tata te koìka Pakate o te tau ati Iuta,
ua hiti Ietu i Ierutaremi.
14 I òto o te Hiero, u koàka mai ia Īa
te tau ènana hoko atu i te tau piha, te tau mutō,
te tau manu tavaìè atii me te tau ènana haahuìkē i te moni,
e noho aa pii o to âtou hātaa hoko moni.
15 U kānea Ietu i te tā me te mou touà.
Ua tute atu Īa i vaho o te Hiero ia âtou paotū,
me te tau mutō me te tau piha.
U tioà ma ùka o te tuaèpo i te moni
o te poì haahuìkē i te moni.
U haatohuì Īa i to âtou hātaa moni.
U peàu Īa i te poì hoko manu tavaìè :
« A kave atu me i înei ia âtou paotū.
Umoì e haaìò ôtou i te haè o to ù Motua mea haèhoko ! »
17 U haamaakau to Ietu tau kouâ i te tekao i patuìa :
« He koekoe ūo to ù nei no to òe haè,
me he ahi i òto o au te kena. »
18 U pohā te èo o te tau ati Iuta me te peàu ia Ietu :
« E aha ta òe hana mahaò no te haatiàtohu
e mana to òe no te hana i hua hana nei ? »
19 Ua hua atu Ietu ia âtou : « A vāvahi ôtou i tēnei Hiero.
Ma te toù o te pō, e hakatū hakaùa au ia īa. »
20 U peàu te tau ati Iuta ia Īa : « Touhā ma ono èhua
e hana nei te poì hana i òto o te Hiero.
Na òe e hakatū ai ma te toù o te pō ? »
21 O to Īa nino anaiho te Hiero ta Ietu i tekao atu.
22 Ia tū hakaùa Ietu me i vāveka o te huaa mamate,
u haamaakau aè to Īa tau kouâ i hua tekao nei.
U haatià âtou i te Hāmani tapu atii me te tekao i peàuìa e Ietu.
23 E noho aa Ietu i Ierutaremi no te Koìka Pakate,
he mea nui te ènana i haatià ia Īa.
U ìte hoì âtou i te tau hana mahaò hakatu
me ta Ietu i hana atu.
24 O Ietu â, u te e haatià ia âtou, na te mea ua ìte Īa ia âtou nui.
25 Aòè hoì na tītahi i haavivini ia Ietu i te hakatu o te ènana.
Ua ìte Ietu e aha te meitaì me te pē i òto o te ènana.
TOMINIKA E HĀ O TE AVA HAAOKE
TATAUÌA O TE ÙA O TE HĀMANI PARARIPO
36,14-16.19-23
14 I te ava e hakaìki aa Hetetia,
paotū te tau vivini tāuà me te mataèinaa
u pūtuì âtou i te Etua,
e haapao aa i te tau hana mākaka nui
me he mea to te tau mataèinaa êteni.
U haameìe âtou i te Hiero o Ierutaremi
i haatapuìa e te Hatu.
15 Na te Etua o to âtou tupuna e pōpahi anamai
ma te hakaēa koè, i te tau keèe
na te mea, u hakāòha Īa i te haè tapu
atii me to Īa mataèinaa.
16 Atià, o âtou i haamee nei i te tau keèe a te Etua,
e kakata aa i to âtou tau tekao,
e māio aa i te tau peroheta.
No èià, tōtahi atu to te Etua pekē i to Īa mataèinaa.
19 Ua tihe mai te hatu kape Papironia,
me to âtou tutu me te ahi i te Hiero o te Etua.
U vāvahi âtou i te tau pākeâ o Ierutaremi,
u haapūovo âtou i te tau haè hakaìki
me te tau taetae nui i òto.
20 Te tau ati Iuta, u te e haamate koè ìa,
u aahi te hakaìki Naputonoro ia âtou i Papironia
me he poì mōèhu.
Ua ìò âtou he tau ènana tueni no te hakaìki
me ta īa tau tama, tihe i te ava i hika ai Papironia
i te tau hakaìki o te Henua Pereha.
21 Ma èià, ua pao te tau tekao ta te Hatu
i hakaìte mai i te peroheta Ieremia, pēènei :
« E mamapeìa te henua.
E hakaēa te henua e hitu ònohuu èhua,
aòè e hua i te puku.
Oiana te tuki o te nuiìa o te tau Tāpati i pakaihi koè ìa. »
22 Atià, i to mua èhua o te hakaìkiìa o Kiruto
i te Henua Pereha, u haamāàma te Etua ia īa,
etià e paoa te tekao i peàuìa e te peroheta Ieremia.
U hakaìte atu Kiruto ma io to īa henua vii pu
me to īa patu iho pēènei à :
23 « Oia nei te tekao a Kiruto, te Hakaìki o te Henua Pereha.
U vaièi mai te Hatu, te Etua o te àki,
i te mana no te vivini i te tau henua paotū o te ao nei.
U peàu mai no te hakatū no Īa i te Haèpure
i Ierutaremi, io te Henua Iutea.
No èià, ôtou, e te poì ati Iuta,
ôtou paotū, e te mataèinaa vaeìa e te Etua,
me ôtou te Hatu no te hua atu i Ierutaremi. »
TARAMO 137 (136),1-2, 3, 4-5, 6
E Ierutaremi e, haè o tu ù tau hoa,
Taetae atu i to ù iho pohuèìa. cf. .137,6
Akoè à
E te Hatu e, a haamaakau i to Òe kāòha,
a haapohuè mai ia mātou.
1 Io te tau kākaavai o te Henua Papironia,
U nonoho mātou me te uēuē,
2 E maakau ana me te aumiti ia Tiona.
U tauèvaìa te kitā io te tumuâkau.
3 I èià, ua ape mai te tau ènana tiaki
No te haataki i te èo haakoakoa.
Ua ape mai te poì i hao ia mātou,
No te hīmene ma òto o te èo Tiona.
4 Pēhea e taki to tātou èo no te hīmene,
E noho aa me te uē io te henua hāoè.
5 Me haamāhaè au ia òe, e Ierutaremi e,
A moô, a haakopaìa to ù ìma oko.
6 A paka meô to ù èo io he haha,
Ia haamāhaè au me te haamee ia òe,
E Ierutaremi e, te haè o tu ù tau hoa,
Taetae atu i to ù iho pohuèìa.
TATAUÌA O TE HĀMANI A PAURO PEÀTO I TO EFETIA
2, 4-10
E tu ù tau tuàne tuehine.
4 Atià, mea nui to te Etua hakāòha mai,
mēìa i te nui o to Īa uē ia tātou,
5 u haapohuè te Etua ia tātou kātahi me te Kirito,
tātou hoì he huaa mamate mēìa i te mikeo.
Na to Īa vaièi mai anaè, u haapohuèìa ôtou.
6 U hakatū hakaùa te Etua ia tātou, e tahi me Ietu Kirito,
me te haanoho ia tātou io he àki, e tahi me Ietu Kirito.
7 Oia to te Etua vaièiìa mahaò i uē ia tātou,
i òto o te Kirito.
U makimaki hoì Īa e hakaìte atu i te tau tai ènana paotū
i to Īa kāòha,
nui atu i te mea e kaitutoìa e te tau ènana.
8 U haapohuèìa ôtou na te karatia o te Etua, mēìa i te haatià.
Aòè me io ôtou anaiho hua haapohuèìa,
he taetae kāòha ta te Etua i vaièi mai.
9 Aòè mēìa i to ôtou tau hana meitaì,
etià umoì e haakāìè pu te ènana e tahi anaiho.
10 U kānea hoì te Etua ia tātou.
Na Īa i pēpena ia tātou, i òto o te Kirito,
etià he toitoi noa ta tātou hana meitaì,
vāàna i te hakatu pohuè ta te Etua i hakaìte mai.
HĪMENE VĀNANA :
In.3,16
Mēìa i te nuiìa o to Īa kāòha i to te ao nei,
u tuku mai te Etua i ta Īa Tama tootahi ;
te ènana i haatià ia Īa, e koàka hoì te pohuè ananu.
EVANERIO O IETU KIRITO VĀÀNA E IOANE 3, 14-21
I tēia mou pō, u peàu Ietu ia Nikotemo, pēènei :
14 I te henua ataha, u hapai Moite i te ata nenie o te puhi henua.
15 Atii anaiho e hapaiìa te Tama a te ènana,
etià e koàka mai i te ènana haatià ia Īa te pohuè ananu.
16 Mēìa i te nuiìa o to Īa kāòha i to te ao nei,
ua tuku te Etua i ta Īa Tama tootahi,
etià aòè e mate ai te ènana i haatià i hua Tama,
e koàka hoì ia īa te pohuè ananu.
17 U te e pahi te Etua i ta Īa Tama i te ao nei
no te hakatio i te tau ènana,
atià no te haapohuè ia âtou.
18 U te e hakatio te Etua i te ènana haatià i te Tama.
Atià, te ènana haatià koè, u hakatio te Etua ia īa.
Na te mea, ua ao koè īa i te haatià
i te Tama Tootahi a te Etua.
19 Pēènei te tumu o te haatoitoi i te tekao :
ua tihe i te ao nei te māàma tiàtohu,
aòè te tau ènana i apuu i hua māàma.
U haataetae atu âtou i te pōtako,
na te mea ua pē to âtou hakatu pohuè.
20 Te ènana hoì te i hana i te hana pē, u haahaa īa i te māàma.
Aòè e haatata mai īa me te māàma,
oa hakaìteìa ta īa tau hana pē.
21 Ia hana te ènana i te hana vāàna i te tiàtohu,
u haatata mai hua ènana me te māàma,
etià e hakaìteìa to īa aotahi atu i te Etua.
TOMINIKA E ÌMA O TE AVA HAAOKE
TATAUÌA O TE PEROHETA IEREMIA 31, 31-34
31 Oia nei te tekao a te Hatu :
« E tihe te ava e haatoitoi au i te Piimau hou
me te ati Iraene me te ati Iuta.
32 He mea kē te Piimau ta ù i haatoitoi
me to ôtou tau tupuna i te â ua too au ia âtou ma te ìma
no te aahi mai i vaho me io te Henua Ekipito.
U haakoè âtou i to ù Piimau, e aha à o au to âtou vivini.
33 Atià, oia nei te hakatu o te Piimau
ta ù e haatoitoi me te ati Iraene, ia tihe mai hua mou â.
E tuku au i to ù ture i te take o to âtou koekoe.
E patu au i hua ture i òto o to âtou hōupo.
E ìò o au to âtou Etua. E ìò o âtou to ù mataèinaa.
34 Aòè âtou e hakako atu hakako mai te hoa i te hoa,
e peàu ana : « A hano òe e ìte o ai te Hatu Etua. »
Na te mea, ua ìte âtou paotū ia ù,
o te tau tōìki tihe atu i te tau ànamotua.
E haakoè au i to âtou tekateka paotū.
E haamāhaè au i to âtou tau mikeo. »
TARAMO 51 (50), 3-4, 12-13, 14-15
A pēpena i òto o au nei i te koekoe taìtaì. cf.51,12
3 E te Etua e, a hakāòha mai.
Mēìa i te nuiìa o to Òe uē,
4 A hooi mai me i to ù mikeo.
A haamā i tu ù koekoe pē.
12 A pēpena i òto o au nei i te koekoe taìtaì.
A haahou i to ù kuhane, a haamau i to īa meitaì.
13 Umoì e titii atu ia ù mamao me io Òe.
Umoì e taki me i òto o au i to Òe Kuhane Meitaì.
14 A haakoakoa ia ù to Òe haapohuè mai.
A haamau i te èkaèka io to ù koekoe.
15 E hakako au i to Òe vaanui i te poì mikeo.
E hua mai io Òe te poì e hukaka nei.
TATAUÌA O TE HĀMANI I TO HEPEREO 5, 7-9
7 O Ietu Kirito e pohuè aa io he henua nei,
me he ènana mate vave, ua pure Īa i te pure vavaò,
e uē aa, e taaàu aa io te Etua,
etià e haapohuèìa me i te mana o te mateìa.
U apuuìa to Ietu Kirito pure
mēìa i to Īa kāòha me te aotahi atu.
8 E aha à he Tama te Kirito,
ma to Īa mamae, u hakako Īa i te aotahiìa.
9 Ma èià, ua ìò Īa he toitoi noa i mua o te Etua,
u haatūìa te tumu o te pohuè ananu
no te tau ènana paotū e aotahi ia Īa.
HĪMENE VĀNANA
cf.In.3,14-15
E te Tama a te ènana, hapaiìa io he peka,
mēìa ia Òe, e koàka ai i te ènana haatià i te pohuè ananu.
EVANERIO O IETU KIRITO VĀÀNA E IOANE 12, 20-33
I hua mou pō,
20 enā te mou ènana peàuìa poì Hereni
te i hiti me he pererina i Ierutaremi no te Koìka.
21 U haatata mai âtou me Firipo te i hānauìa
i Petehaita o te Henua Karirea. U ape âtou ia īa :
« E te hakaìki e, u makimaki mātou e tutuki me Ietu. »
22 Ua haki Firipo ia Aterea. Ua haki âua tokoùa ia Ietu.
23 U haahua Ietu ia âtou : « Ua tihe te hora
e haakāìèìa te Tama a te ènana.
24 He tekao tiàtohu ta ù nei ia ôtou :
Ia tūtūìa io he èpo te kākano haraoa,
me he mea aòè e èhuìa, e avai tootahi anaè.
Ia èhu te kākano, he mea nui te puku e koàka mai.
25 Te ènana e haataetae i to īa pohuè,
e koè ai to īa pohuèìa.
Te ènana e haahaa i to te ao nei pohuèìa io te ao nei,
e koàka mai ia īa te pohuè ananu.
26 Me makimaki te ènana e tāvini ia ù, a ūtaì mai.
I èià au, i èià to ù tāvini.
E haataetae tu ù Motua i te ènana e tāvini ia ù.
27 I tēnei, u pūpūkina to ù kuhane. E aha ta ù i peàu ?
E tu ù Motua e, a haapohuè mai me i te ava nei.
Atià, no hua ava to ù tihe io te aomāàma nei.
28 E to ù Motua e, a haakāìè i to Òe ikoa. »
A tahi a iho mai te èo me io he àki :
« U haakāìè au i to ù ikoa.
Tōtahi atu to ù haakāìè ia īa. »
29 Te haètoa e pī aa i èià, ua òko i hua èo.
U peàu âtou : « Ua taki te hatutii. »
U peàu tahipito : « O te anera te i tekao me Īa. »
30 U peàu Ietu :
« Aòè no ù i taki ai hua èo, atià no te toko ia ôtou.
31 I tēnei, e haavāìa te aomāàma nei.
I tēnei, e tuteìa i vaho te hakaìki o te aomāàma nei.
32 O au à, ia hapaiìa au me io he henua,
e toi mai au io ù i te tau ènana paotū. »
33 U tekao Ietu atii no te hakaìte pēhea e mate nui Īa.
TOMINIKA MAKAMAKA ÈITĀ
1 - TE TAHAÌA PURE ME TE MAKAMAKA ÈITĀ
EVANERIO O IETU KIRITO VĀÀNA E MAREKO 11, 1-10
I tēia mou pō ma mua te koìka Pakate,
1 o Ietu me to Īa tau kouâ, ua tihe tata mai i Ierutaremi.
I te kēkē o Petania me Petefahe, i pii te tuaivi Oriveti,
ua pahi atu Ietu i nā kouâ tokoùa me te peàu ia âua :
2 « A hee ôùa i te pāpuahaè i mua nei.
I te tomoìa, e koàka mai ia ôùa
te punua pūriki humuìa,
aòè te ènana i piki i ùka o īa.
A vevete ia īa. A aahi mai.
3 Me peàu te ènana ia ôùa : « E aha ta ôùa ? »
A peàu atu : « E hana ta te Hatu me Īa.
E haahua ponihoo Īa i te pūriki. »
4 Ua hee atu âua. U koàka mai ia âua
te punua pūriki humuìa i vaho, i te taì o te vaanui,
i pii te avaputa. U vevete âua ia īa.
5 U peàu tahipito noho aa i èià :
« No te aha e vevete nei ôùa i te punua pūriki ? »
6 U haahua âua ia âtou me he mea ta Ietu i peàu,
me to âtou avai pu.
7 U aahi âua i te punua pūriki io Ietu.
U hohoà âua i te kahu uhi pu i ùka o te pūriki
me te noho o Ietu i ùka.
8 U auau te nuiìa o te poì
i to âtou kahu ma io he vaanui,
akoè à, i te pūpā makamaka èitā no te maìki.
9 Te tau ènana e taha i mua me te ūtaì ia Ietu,
u taaàu nātoa pēènei : « Òtana !
A meitaììa te tihe nei ma te ikoa o te Hatu.
10 A meitaììa te Hakaìkiìa e tihe nei,
te Hakaìkiìa o to tātou motua Tavite.
Òtana i ùka nui ! »
Akoè à :
EVANERIO O IETU KIRITO VĀÀNA E IOANE 12, 12-16
12 I tēia mou pō, ua òko te haètoa nui
te i tihe mai no te Koìka Pakate,
enā a hiti ai Ietu i Ierutaremi.
13 Ua too âtou i te tau àupoà,
me to âtou taha atu i mua o Ietu e taaàu aa oko ki :
« Òtana ! A meitaììa te tihe nei ma te ikoa o te Hatu !
A meitaììa te Hakaìki nui o Iraene ! »
14 U koàka mai ia Ietu te kaiū pūriki.
Ua piki Īa ma ùka, vāàna i te mea patuìa :
15 « E te moî Tiona e. Umoì òe e haametaù.
Enā a tihe to òe Hakaìki i ùka o te punua pūriki. »
16 Òmua, u te e vivini te huaa kouâ i hua tekao.
Atià, ma muì u haakāìèìa Ietu,
u haamāmaakau âtou u patuìa hua tekao i ùka o Īa.
U haapaoìa hoì te mea paotū
te i patuìa io he Hāmani tapu.
2 – NO TE PURE META
TE AVA MEMAE O IETU KIRITO VĀÀNA E MAREKO
14, 1 -- 15, 47
14,1 E ùa â i toe, e hakiìa ai te Koìka Pakate
me te haraoa haapupuhi koè.
Ua hano te tau tāuà nui, te tau tuhuka tekao
e popoki ia Ietu no te haamate nui,
atià ma he hana haatukee. U peàu hoì âtou pēènei :
2 A « Umoì ma te ava o te koìka oa tohuììa te mataèinaa. »
NO TE PAÙÌA O TO IETU NINO
3 Ua noho Ietu i Petania io te haè o Timone te mohoi.
E moe aa io he tapukai, u haatata mai e tahi vehine
me te huekeâ pī i te kao kakaa peàuìa narati.
He mēmau kakaa oko nui hua kao narati.
U haapohā te vehine i te huekeâ.
U kiini īa i te kao kakaa i ùka o to Ietu upoko.
4 U kōhumuhumu oko tahipito e peàu atu peàu mai :
A « Umaha i titii pu ai i tenā kao kakaa ?
5 Anoa ua ìò i te hoko, e koàka mai
e toù hānere moni tea no te tuku atu i te poì veve. »
Ua nui to âtou oonaki pekē i hua vehine.
6 Atià, u peàu Ietu ia âtou :
+ « Avai ôtou i tēnei vehine. Umaha te haapaòpaò ia īa ?
He mea kanahau ta īa hana i ùka o au.
7 Enā ananu hoì te poì veve i vāveka o ôtou.
Vāàna e to ôtou makimaki, e koàka ia ôtou te vaièi atu.
O au à, aòè ananu me ôtou.
8 Ua hana īa i te mea i koàka ia īa.
Ma mua e tomiìa au,
ua paù īa i to ù nino me te kao kakaa.
9 E tekao tiàtohu ta ù nei ia ôtou :
i te tau henua paotū i èià e hakaìteìa te Evanerio,
io he aomāàma vii pu, e peàuìa ai
ta hua vehine i hana no te haamaakau ia īa. »
NO TE HAKAHAEÌA O IUTA
10 O Iuta Ikariote, tītahi me i vāveka o te Tīònohuu ma tokoùa,
ua tihe io te tau tāuà nui e hano haaìò ia Ietu.
11 U hakaòko âtou i ta īa tekao me te koakoa.
U peàu âtou e tuku atu i te moni ia īa.
U tiaki hoì Iuta i te ava e hei no te haaìò ia Ietu.
NO TE HAAPEI I TE KAIÌAMAU PAKATE
12 I te â to mua o te koìka haraoa haapupuhi koè,
oia te ava e kukumiìa te àrenio Pakate,
u peàu to Īa tau kouâ ia Ietu :
D « I hea mātou e hee ai,
no te haapei no Òe i te kaiìamau Pakate ? »
13 U pōpahi Ietu i nā kouâ tokoùa me te peàu ia âua :
+ « A hee io he pāpuahaè. E tutuki ôùa
me te ènana kave aa i te huevai. A ūtaì ia īa ;
14 io he haè e uu ai hua ènana, a uu me ôùa.
A peàu i te ènana heihaè :
E ūi atu ta te tuhuka i hea to ù pāòto
i èià e kai au i te Pakate me to ù tau kouâ ?
15 Na īa e hakaìte ia ôùa, io he tohua i ùka o te haè,
i te pāòto kaùoo, tāpīìa me te tau moeka,
meitaì to īa kāneaìa. I èià, a haapei no tātou. »
16 Ua hee atu nā kouâ tokoùa me te tomo io he pāpuahaè.
U koàka ia âua te mea i peàuìa e Ietu.
U haapeipei âua i te Pakate.
NO TE ÈNANA E HAAÌÒ IA IETU
17 Ia topa te pō, ua tihe Ietu me te Tīònohuu ma tokoùa.
18 Ua noho âtou io he tapukai. E kai aa âtou, u peàu Ietu :
+ « E tekao tiàtohu ta ù nei ia ôtou, e haaìò ia ù
tītahi me i vāveka o ôtou. E kai nei īa me au. »
19 U kuhane koè âtou me to âtou peàu atu ia Ietu,
te hoa ma hope o te hoa, pēènei :
D « O au oti, e te Hatu e ? »
20 U peàu Ietu :
+ « Tītahi me io te Tīònohuu ma tokoùa.
E kai nei īa me au, e tahi kaiìa ta māua.
21 Enā a hee hoì te Tama a te ènana
vāàna i te mea patuìa i ùka o Īa.
Atià, mea ìno te ènana
te i haaìò i te Tama a te ènana.
Meitaì aè no hua ènana umoì i hānauìa. »
NO TO IETU HAAEUKARITIA
22 E kai aa âtou, ua too Ietu i te haraoa,
u haahuaèkaèka, ua vahi, ua tuku atu ia âtou
me te peàu :
+ « A too. O to ù nino tēnei. »
23 I muì iho, e too aa i te ipu,
u haahuaèkaèka me te tuku ia âtou.
Ua inu âtou paotū.
24 U peàu Ietu ia âtou pēènei :
+ « O to ù toto tēnei,
te toto o te Piimau, te tahe aè no te poì nui.
25 E tekao tiàtohu ta ù nei ia ôtou :
Aòè au e inu hakaùa me io te puku o te tumuvino,
tihe i te â e inu au i te vino hou
io he Patirēia o te Etua. »
NO TO IETU HAAÌTE I TO TE TAU ÀPOTORO TITIIÌA
26 Ma hope o te hīmene o te tau taramo,
ua uu âtou i vaho no te hiti io he tuaivi Oriveti.
27 U peàu Ietu ia âtou :
+ « E titii ôtou paotū ia ù.
U patuìa hoì : E tā haamate au i te tiaki mutō,
me te tavavā o te tau mutō.
28 Atià, ia tū hakaùa au,
e hiti au ma mua o ôtou i te Henua Karirea. »
29 U peàu Petero ia Īa :
D « E aha à u titii âtou paotū ia Òe,
o au nei aòè, koè nui. »
30 U hua atu Ietu ia īa :
+ « E tekao tiàtohu ta ù nei ia òe :
i tēnei pō, ma mua e taki te moa, e ùa takiìa,
e titii òe anaiho ia ù. E toù titiiìa. »
31 Atià, tōtahi atu to Petero peàu atu :
D « E aha à e mate au me Òe, koè nui au e titii ia Òe. »
O hua tekao to te tau kouâ paotū.
NO IETU E PURE AA IO HE PĀPUA KEHEMANI
32 Ua tihe âtou io tītahi pāpua, o Kehemani te ikoa.
U peàu Ietu i to Īa tau kouâ :
+ « A nonoho ôtou înei, oi pure au. »
33 Ua too ia Petero ia Iakopo ia Ioane me Īa.
Ua hemo Īa i te haametaù me te uē òomi menava.
34 U peàu Ietu ia âtou :
+ « Mei mate nui au i te kuhane koè.
A nonoho ôtou înei. A matavaa. »
35 Ua taha atu Īa ma te ava poto. Ua topa io he tuaèpo
me to Īa pure etià ia koàka mai
a haamamao atu me io Īa tēnei ava.
36
U peàu Īa :
+ « E Apa e. E tu ù Motua e.
Aòè te mea e avai i to Òe mana.
A haamamao me io ù i tēnei ipu mamae.
Atià, umoì me he mea ta ù i makimaki. A tae ta Òe. »
37 Ua hua Ietu. U koàka mai ia Īa te tau kouâ e hiamoe aa.
U peàu ia Petero :
+ « E Timone, u hiamoe òe ?
Aòè i koàka ia òe te vaa e tahi hora anaiho ?
38 A matavaa. A pure, oa hemo ôtou i te mōtii.
He mea ìi te kuhane ènana, atià u pepae to īa koekoe. »
39 Ua hee atu hakaùa Ietu me to Īa pure me he mea òmua.
40 Ua tihe Īa hakaùa. U koàka ia Īa
te tau kouâ e hiamoe aa, u matakaù hoì âtou.
Aòè âtou i ìte e aha te mea ta Īa i peàu.
41 Ua hua Ietu io âtou, o te toù o to Īa hua mai.
U peàu Īa :
+ « I tēnei, a hiamoe ôtou. A hakaēa.
Ua tihe te hora. Enā e haaìòìa te Tama a te ènana
i te îìma o te poì mikeo.
42 A tū ôtou ! A pau ! U haatata mai tēia e haaìò ia ù. »
NO TE HUMUÌA O IETU
43 Aòè i pao èka ta Ietu tekao, ua tihe anamai Iuta,
tītahi me i vāveka o te Tīònohuu ma tokoùa.
Enā me īa te haètoa e kave aa i te tau kohetā,
te tau pooâkau, i pōpahiìa âtou
e te tau tāuà nui, te tau tuhuka tekao, te tau kōkooūa.
44 Te ènana e haaìò atu ia Ietu,
u haatoitoi me âtou i te hakatu, pēènei à :
D « Te ènana e hoki au, o īa nei.
A humu ôtou ia īa. A aahi atu me te tiòhi meitaì. »
45 Ia tihe mai īa, u haatata ponihoo me Ietu. U peàu :
D « E Rapi e. »
Ua hoki mau ia Īa.
46 A tahi a popoki âtou ia Ietu me te humu ia Īa.
47 Ua too i te kohetā tītahi me i vāveka o te tau ènana
e tū aa nei. Ua tā īa i te tāvini o te tāuà nui.
Ua motu te puaìka o hua tāvini.
48 U pohā te èo o Ietu me te peàu ia âtou :
+ « Ua tihe mai ôtou me te tau kohetā me te tau pooâkau
no te popoki ia ù me he mea i te ènana mākaka.
49 I tēia â, i tēia â, ua noho au i vāveka o ôtou,
e hakako aa io he Hiero. Aòè ôtou i humu ia ù.
Ma èià, u haapaoìa te mea patuìa io he Hāmani tapu. »
50 E titii aa ia Ietu, ua hiki te tau kouâ paotū.
51 Ua taha e tahi māhaì ma muì o Ietu,
e tapa tomi òki anaè to īa kahu.
U popoki âtou ia īa ;
52 e tuku aa i te tapa, ua hiki kahu koè anaè.
NO IETU I MUA O TE TAUÀ NUI
53 U aahi âtou ia Ietu io te haè o te tāuà nui.
I èià, u haaputuputu te papa tāuà nui,
te tau kōkooūa, te tau tuhuka tekao.
54 O Petero me i te vahi mamao, u ūtaì ia Ietu
tihe atu i òto o te pāpua o te tāuà nui.
U noho īa pii o te ahi me te tau tueni,
e haamāhanahana ia īa.
55 Atià, ua ùmihi te tau tāuà nui me i te Tuneteri ia ôtoa
i te tekao pōtoho pu ia Ietu, no te haamate ia Īa.
Aòè i koàka mai.
56 U pōtoho hoì te nuiìa o te ènana ia Ietu,
atià, tekao kē to tītahi, tekao kē to tītahi.
57 E tū aa tahipito, u pōtoho ia Ietu, pēènei :
58 A « Ua òko mātou ia Īa e peàu aa :
e vāvahi au i tēnei Hiero haatūìa e te îìma ènana.
Ma te toù o te â, e hakatū au i te Hiero kē,
aòè tēia e haatūìa e te îìma ènana. »
59 Atià, tekao kē to tītahi, tekao kē to tītahi.
60 E tū aa te tāuà nui i vāveka ahau o te putuputuìa,
ua ūi ia Ietu :
A « Aòè òe e haahua atu e tahi ponatekao ?
E aha ta tenā poì i hakatio ia òe ? »
61 Atià, ua mutu pu Ietu. U te e pohā to Īa èo.
Ua ūi hakaùa te tāuà nui ia Īa me te peàu :
A « Aha, o òe nei te Kirito, te Tama a te Meitaì nui ? »
62 U haahua atu Ietu :
+ « O au.
E ìte ôtou i te Tama a te ènana
e tānoho aa i te ìma oko o te Mana nui,
me te tihe aa ma ùka o te tau ao o te àki. »
63 U veti te tāuà nui i to īa kahu me te peàu :
A « No te aha e hano tātou hakaùa i te ènana haatiàtohu ?
64 Ua òko ôtou i ta Īa tekao paha. E aha to ôtou maakau ? »
U peàu âtou paotū he mea toitoi te haamate nui ia Īa
NO TE TAU TĀVINI TIAKI E HAAMEE IA IETU
65 U tīmata tahipito i te tuhā i te vaianu io he mata o Ietu.
Ua tomi âtou i to Īa mata me te tapa,
u papaki ia Īa me te peàu atu :
F « A peroheta mai òe ! »
U pehipehi me te papaki ia Īa te tau tāvini tiaki.
NO PETERO E TITII IA IETU
66 Ohia e noho aa Petero i àò, i òto o te pāpua,
ua tihe e tahi vehine tueni o te tāuà nui.
67 Ua ìte hua vehine ia Petero e haamāhanahana pii he ahi,
u tiòhi matiòka i to īa mata me te peàu atu :
A « O òe tītahi me Ietu no Natareti. »
68 U haakoè Petero me te peàu :
D « Aòè au i ìte ia Īa.
Aòè au e vivini nei i ta òe tekao. »
Ua taha Petero io he avaputa. A tahi a taki te moa.
69 Ia ìte te vehine tueni ia Petero,
u peàu hakaùa i te poì e noho aa i èià :
A « O īa nei tītahi me i vāveka o âtou. »
70 U haakoè hakaùa Petero.
Ava poto i muì iho, u peàu atu ia Petero
te poì e noho aa tata èka :
F « Tiàtohu, o òe tītahi me âtou.
Me i te Henua Karirea hoì òe nei. »
71 Atià, u tekao pē ta Petero me te paha atu :
D « Koè nui au i ìte i tēnei ènana ta ôtou i peàu mai nei. »
72 Pu anamai, ua taki te moa. O te ùa o te takiìa.
A tahi a haamaakau Petero i te tekao i peàuìa e Ietu,
pēènei : « Ma mua e taki te moa, e ùa takiìa,
u titii òe ia ù, e toù titiiìa. »
U mateteka Petero me te uē.
NO IETU I MUA O TE TUNETERI
15.1 I te pōpōuì tika, u haaputuputu te papa tāuà nui,
te tau kōkooūa, te tau tuhuka tekao,
te Tuneteri paotū. U hakatoo atu hakatoo mai âtou nui.
U kitii âtou ia Ietu me te aahi atu
no te haaìò ia Īa i te îìma o Pinato.
NO IETU I MUA O PINATO
2 Ua ūi Pinato ia Ietu me te peàu :
A « O òe te hakaìki nui o te tau ati Iuta ? »
U haahua atu Ietu :
+ « Na òe i peàu. »
3 Ma te haanui i te tekao,
u hakatio pu te papa tāuà nui ia Ietu.
4 Ua ūi hakaùa Pinato ia Īa me te peàu :
A « Aòè òe e haahua atu ?
A òko i te nuiìa o ta âtou tekao e hakatio aa ia òe. »
5 Aòè Ietu i haahua atu e tahi ponatekao.
Ua pē Pinato i te mahaò.
NO PARAPĀ
6 I tēia koìka Pakate, i tēia koìka Pakate, u vevete Pinato
i tītahi ènana humuìa, tēia ta te poì ati Iuta e ape atu.
7 Enā te ènana, o Parapā to īa ikoa,
humuìa kātahi me nā hoa kē mākaka
te i kukumi haamate i te ènana
i te ava o te tōua io he pāpuahaè.
8 Ua hiti te haètoa io Pinato me te ape ia īa
no te apuu mai me he mea ua hani īa me âtou.
9 U haahua Pinato ia âtou :
A « Aha, e makimaki ôtou
a vevete au i te hakaìki nui o te tau ati Iuta ? »
10 Ua ìte hoì Pinato
na te keitani i haaìò ai te papa tāuà nui ia Ietu.
11 Atià, u hakapahi âtou i te haètoa etià e veveteìa o Parapā.
E haahua aa Pinato, u peàu ia âtou :
A « E aha ta ù me tēia i vavaòìa e ôtou
‘’Te hakaìki nui o te tau ati Iuta’’ ? »
12 U taaàu hakaùa âtou :
F « A pāokapeka atu ! »
13 U peàu Pinato ia âtou :
F « E aha ta īa hana mākaka ? »
Atià, u taaàu âtou ma te haaoko atu :
F « A pāokapeka atu ! »
15 U vevete Pinato ia Parapā
mēìa u makimaki e haatāvaè i te haètoa.
O Ietu à, u haaìò Pinato ia Īa no te tā me te touà ;
i muì iho, a pāokapeka atu.
NO TE TAU KAPE TIAKI E HAAMEE IA IETU
16 U aahi te tau kape ia Ietu
io te tohua i òto o te pāpua, o Peretorio te ikoa.
U vavaò âtou i te Hatu kape ia ôtoa.
17 U haauhi âtou ia Ietu me te kahu pu veàkiki
me te tuku ma ùka o to Īa upoko
i te paè èitā taataa àakaìa e âtou.
18 I muì iho, ua oha âtou i mua o Īa e peàu aa :
F « Kāòha, e te hakaìki nui o te tau ati Iuta. »
19 Ua tā âtou i to Īa upoko me te kākaho.
Ua tuhā i te vaianu i ùka o Īa
me te noho muò no te pakaihi ia Īa.
20 Ia pao te haamee ia Ietu,
ua taki âtou i te kahu pu veàkiki
me te haauhi iho i to Īa kahu.
NO TE VAANUI O TE PEKA
21 U aahi âtou ia Ietu i vaho o te pāpuahaè
no te pāokapeka ia Īa.
Ua toi pu âtou i tītahi ènana me i te henua Kirene,
e hua aa me io he vahi èitā.
O Timone to īa ikoa, te motua o Arihano me Rufo.
U toutaki ia īa no te amo i te peka o Ietu.
22 U aahi âtou ia Ietu i te vahi peàuìa Korekota,
o Ipuoo ma he èo ènana.
23 Ua tuku atu âtou ia Īa i te vino kāvaììa me te hāika mira.
Atià, aòè Ietu e inu.
NO TE PĀOKAPEKAÌA O IETU
24 U pāoka âtou ia Ietu io he peka.
U tuhatuha âtou i to Īa kahu ma te haakai,
no te ìte e aha te pāio e ìò i te hoa, i te hoa.
25 He oatea nui te ava i pāokapeka âtou ia Ietu.
26 U patuìa te piò o to Īa hakatio pēènei :
« Te hakaìki nui o ati Iuta. »
27 U pāokapekaìa me Īa nā ènana mākaka tokoùa :
i te ìma oko tītahi, i te ìma aèaè tītahi.
28 Atii u toitoi te tekao i patuìa io he Hāmani tapu,
pēènei à : U haahakatuìa me te poì mākaka.
NO TE PAHA IA IETU
29 Ua paha te poì e taha aa ma èià,
e haaùu i te upoko me te peàu :
F « O òe te i vāvahi i te Hiero
me te hakatū hakaùa ma te toù o te pō !
30 A haapohuè ia òe iho. A iho mai me io he peka. »
31 Hua mea anaiho, u haamee ia Īa te mou tāuà nui,
e peàu aa te hoa i te hoa, atii me te tau tuhuka tekao, pēènei :
A « U haapohuè Īa i tahipito,
aòè i koàka ia Īa iho te haapohuè.
32 E te Kirito e ! E te hakaìki nui o Iraene !
I tēnei, a iho mai me i ùka o te peka,
etià e ìtemata mātou me te haatià. »
U haamāio ia Ietu me nā ènana i pāokapeka me Īa.
NO TE MATEÌA O IETU
33 Ua topa te pō pōtako ma ùka o te tiàtohu o te henua
me i te ava oatea nui tihe atu te hora e toù ahiahi.
34 I te hora e toù, u taaàu Ietu me te èo oko :
+ « Eroi, Eroi rama tapakatani. »
O hua mea anaiho :
+ « E tu ù Etua e, e tu ù Etua e.
Umaha òe i titii ai ia ù ? »
35 Ia òko tahipito me i vāveka o te poì e noho pii me Īa, u peàu :
F « Enā u vavaò ia Eria. »
36 U tohuti tītahi ènana.
U haatokū me te vīneka i te mēmau omotai.
U haamau i hua mēmau omotai io he muamua o te kākaho.
U hāinu ia Ietu, e peàu aa :
A « Epō. A tiòhi tātou aha e hano mai Eria e haaiho ia Īa. »
37 Atià, o Ietu e taaàu aa me te èo oko,
ua tuku atu i te ao paoìa.
MA MUÌ TE MATEÌA O IETU
38 A tahi a tuiva ma vāveka me i ùka tihe i àò nui
te tapa tauèvaìa io he Hiero.
39 Te keneturione e noho aa i te aò o Ietu,
ia ìtemata i te hakatu o to Īa matena, u peàu :
A « Tiàtohu nui, o te ènana nei he Tama a te Etua. »
NO TE TAU VEHINE PII I TE PEKA
40 Enā i èià te mou vehine e tiòhi aa me i te vahi mamao :
i vāveka o âtou o Maria Matarena, o Tarome me
Maria, te kui o Iakopo iti me Iote.
41 I te ava ua noho Ietu i te Henua Karirea,
ua ūtaì me te tāvini atu âtou ia Īa.
Atii me tahipito vehine kē te i hiti me Ietu i Ierutaremi.
NO TE TOMINA O IETU
42 I te ahiahi mākehukehu, mēìa he ava no te haapei i te Tāpati,
43 ua tihe Ioteve no te kaavai Arimatea, he ènana òko nui,
tītahi me io te Tuneteri, e tetaì aa i te Patirēia o te Etua.
Aòè īa i haametaù no te haatutuki me Pinato
no te ape mai i te nino o Ietu.
44 U mahaò Pinato mēìa ua mate ponihoo Ietu.
U vavaò īa i te keneturione me te ūi atu aha ua mate nui Ietu.
45 Ia òko Pinato i te keneturione,
ua ao anamai e too Ioteve i te nino tūpāpaù o Ietu.
46 Ua hoko mai Ioteve i te tapa pōòu.
U haaiho aè īa i te nino o Ietu me i ùka o te peka,
ua vāhī me hua tapa pōòu me te tuku atu ia Īa
i òto o te ana tūpāpaù te i taaiìa io he papakeâ.
no te pā i te avaputa o te ana tūpāpaù.
47 Atià, o Maria Matarena, o Maria te kui o Iote,
u tiòhi matiòka âua i te vahi i èià i tomiìa Ietu.
NO TE IUTĪ TAPU
TE PURE META AHIAHI
TATAUÌA O TE HĀMANI A MOITE PEÀUÌA EHOTO
12, 1-8.11-14
1 I te Henua Ekipito, u peàu te Hatu Etua ia Moite
atii me ia Aarone, to īa teina :
2 « A ìò te meàma nei e meàma tumu no ôtou.
Oia to mua meàma o to ôtou èhua.
3 A hakaìte atu i te motuhaka tiàtohu o to Iraene i te mea nei :
Ma te pō ònohuu o te meàma nei, a too ôtou
e tahi kaiū mutō ma tēia haè, ma tēia haè.
4 Me he mea ua ìte ôtou aòè e àva te huaahaè no te haapao
i te kai i te mutō, a haapii te haè me tītahi haè kē.
5 Te mutō à, a kanahau, kaiū toa, e tahi èhua.
E koàka te too i te kaiū menē hakatu me hua mutō nei.
6 A haaavai tihe i te pō ònohuu ma hā o te meàma.
I hua â, ia topa te pō, a kukumi i hua mutō te motuhaka nui
o te mataèinaa tiàtohu o Iraene.
7 A tooìa i te mea toto no te paù i nā katina e ùa
me te paèkutu o te avaputa o te haè i èià te kai.
8 I hua pō, e kaiìa te kiko nunu pātaka
me te haraoa haapupuhi koè me te tau èitā kavakava.
11 Pēènei to ôtou kai :
A taka i te kooi. A oka te vaevae me te aihū.
Te tokotoko io te ìma, a kai haakoi :
O te Pakate o te Hatu, to te Hatu Etua Tahaìa.
12 I hua pō nei, e taha atu au ma vāveka o te Henua Ekipito ;
e tā au i te tau hāmua hakatahi o te Henua Ekipito,
me i to te ènana anamai tihe atu i to te tau ànimara. »
13 E haatopa au i te tuki pē ma ùka o te tau ètua Ekipito :
O au hoì te Hatu.
E ìò te toto mea hakatu ma ùka o te haè i èià ua noho ôtou.
E ìte au i te toto, me tu ù taha atu.
14 Aòè ôtou e pē i te mea ìno ta ù e kave i te Henua Ekipito.
A haamāmaakau ôtou i hua â nei.
A ìò he â koìka pererina no te hahi i te Hatu.
A tū mau hua ture no te tau tai hakatahi. »
TARAMO 116 B (115), 12-13, 15-16a.c, 17-18
U meitaììa te ipu me te haraoa o te pohuè,
te i hakatū i te motuhaka nui o te Etua.
12 Pēhea tu ù haahuaèkaèka i te Hatu
No te meitaì hakatahi ta Īa i vaièi mai ?
13 E ùtuna au i te ipu o te pohuè.
E vavaò ana i te ikoa o te Hatu.
15 He taetae io te Hatu te mateìa o to Īa huaa.
16 E te Hatu e, o au to Òe tāvini,
Te ènana humuìa ta Òe i vevete.
17 E ùtuna au i te hēaka haahuaèkaèka,
E vavaò au i te ikoa o te Etua.
18 E hana au vāàna i tu ù tekao voto,
I mua o te motuhaka nui o to Īa mataèinaa.
TATAUÌA O TO MUA HĀMANI I TO KORINETIA 11, 23-26
E tu ù tau tuàne tuehine,
23 o au à, ua tukuìa mai e te Hatu i te tekao
ta ù i tuku atu ia ôtou, pēènei :
24 I te pō u mākakaìa, ua too te Hatu i te haraoa,
u haahuaèkaèka, ua vahi me te peàu :
« O tu ù nino tēnei i haaìòìa no ôtou.
A hana ôtou atii no te haamaakau mai ia ù. »
25 Me hua hakatu, ma hope o te mau,
ua too Īa i te ipu, e peàu aa :
« O te ipu nei, he Piimau hou i òto o to ù toto.
I te ava hakatahi e inu ôtou me io hua ipu,
a hana ôtou no te haamaakau mai ia ù. »
26 Ma èià, i tēia ava, i tēia ava
ua kai ôtou i hua haraoa, ua inu ôtou me io hua ipu,
ua haki atu ôtou i te mateìa o te Hatu,
e tetaì ana i to Īa hua mai.
HĪMENE VĀNANA :
cf. In.13,34
« U hakaìte au ia ôtou i te Ture hou :
A kāòha atu kāòha mai te hoa i te hoa,
me he mea u kāòha atu au ia ôtou. »
EVANERIO O IETU KIRITO VĀÀNA E IOANE 13, 1-15
1 Ma mua o te koìka Pakate, ua ìte Ietu ua tihe to Īa hora
no te taha atu me i te aomāàma nei io te Motua.
Ohia u kāòha Ietu i to Īa huaa te io he aomāàma nei,
u kāòha ia âtou tihe i te paoìa.
2 E kai aa i te kaiìa ahiahi,
u haatonake te tiaporo i te koekoe o Iuta,
tama na Timone, no te haaìò ia Ietu.
3 E ìte aa Ietu, ua tuku mai te Motua
i te tau mea paotū ma òto o to Īa îìma ;
ua ìte Īa me io te Etua to Īa ihoìa mai,
atii me to Īa hua atu io te Etua,
4 ua tū Īa me io he tapukai.
Ua taki Īa i te kahu uhi pu,
ua too i te tapa me to Īa taka anamai.
5 Ma hope, u kiini Ietu i te vai io he papa
me to Īa hano hooi i nā vaevae o te huaa kouâ ;
u haamoô me te tapa i takaìa.
6 Ua tihe Īa io Timone Petero.
U peàu Petero ia Īa :
« E te Hatu e, na Òe e hooi i to ù vaevae ? »
7 U haahua atu Ietu : « E aha te hana e hana nei au,
aòè òe e vivini. Epō iho e vivini ai òe. »
8 U peàu Petero ia Īa : « Koè nui Òe e hooi i to ù vaevae. »
U haahua Ietu ia īa :
« Me he mea aòè au e hooi ia òe, u te e pii òe me au nei. »
9 U peàu Petero ia Īa : « E te Hatu e,
umoì nā vaevae anaè, atià me nā îìma atii me te upoko. »
10 U peàu Ietu ia īa : « Te ènana i kaukau i te vai, ua àva.
Umoì e hooi hakaùa.
O ôtou nei, u taìtaì ôtou ; atià aòè paotū. »
11 Ua ìte hoì Ietu i tēia e haamākaka mai ia Īa.
Oia te piò u peàu pēènei : « Aòè i taìtaì ôtou nui. »
12 Ia pao te hooi i to âtou vaevae,
ua too hakaùa Ietu i to Īa kahu uhi pu
me to Īa noho io he tapukai.
U peàu i to Īa tau kouâ :
« Aha, u vivini ôtou i te tumu o to ù hana i uē ia ôtou ?
13 U vavaò mai ôtou ia ù : he Tuhuka, he Hatu.
He mea hei to ôtou peàu mai ; oia hoì au.
14 Me he mea u hooi au i to ôtou vaevae,
o au te Hatu me te Tuhuka, a hana atii me ôtou :
a hooi ôtou i nā vaevae te hoa i te hoa.
15 U hakaìte atu nei au i te hakatu ia ôtou,
etià e hana ôtou me he mea ta ù i hana i uē ia ôtou. »
NO TE VENINI TAPU
TATAUÌA O TE PEROHETA ITAIA 52, 13-15 ; 53,1-12
13 Eīa e tapavaù to ù tāvini,
e òko nui aè, e hiti aè, e tiketike nui.
14 U peàu te Hatu : « U kiiete nui te mataèinaa
ia tiòhi atu i to ù tāvini :
ohia u mata koè īa, aòè e hakatu ènana hakaùa.
15 Atii te tau hakaìki, e haamāmā i te haha i mua o to ù tāvini.
E ìte ai âtou i te mea koè ananu i peàuìa mai,
e kanino atu i te mea koè ananu i òkoìa mai.
53,1 O ai e haatià atu i ta tātou i òko nei ?
Ia ai te ìi o te Hatu i hakaìteìa mai ?
2 I te aò o te Etua, ua tiò te tāvini me he kohoe i àò,
me he aka totoko ma he henua moô.
Ia tiòhi atu, koè īa i poèa, koè īa i kanahau.
3 U haameeìa, u titiiìa hua tāvini me he mātua kai mamae.
U haaìno atu tātou ia Īa me te haapaòpaò anaiho,
u tukitukiìa e te uē
hakatu me te mea toomanu e haapiko i to mātou mata.
4 Atià, no tātou te mamae e amo nei Īa,
no tātou te uē u òomi i to Īa menava.
5 I to tātou maakau, na te Etua i oonaki, i pehi, i haapaìha iho.
Atià, mēìa i to tātou mikeo, u tīputaìa Īa ;
mēìa i to tātou mākaka, i pehiìa Īa.
6 Ma ùka o Īa, u topa mai te tuki haamoû mai ia tātou ;
mēìa i to Īa tau maki i oà ai tātou.
Me he mutō papauō tātou hakatahi ma to Īa iho puta.
Me te haatopa o te Hatu ma ùka o Īa i te mikeo o tātou paotū.
7 U hanapēìa, u haapāpaku, aòè e pepeù i te haha.
Me he àrenio aahiìa i te kukumi.
Me he koivi mutō i mua o te ènana tinaì, pepeù koè i te haha.
8 Ua humuìa, haavāìa, haakoèìa.
O ai to te haamaakau atu i to Īa paoìa ?
U takiìa me io te henua o te poì pohuè.
U pehiìa haamate mēìa i te mikeo o to Īa mataèinaa.
9 U tomiìa me he poì haatià koè.
O to Īa menema me te poì moni.
Atià o Īa, koè ananu i mākaka i tītahi,
koè to Īa èo i tekao tīvava.
10 U makimaki te Hatu e tukituki atu me te mamae.
Mēìa u ùtuna atu i to Īa pohuè mea hoko mikeo,
e ìte ai i to Īa tupu i ùka aè, e haaòa aè i to Īa tau â.
Ma io Īa, e tae anamai te hīa o te Hatu.
11 Ma hope o te ûûkina o to Īa kuhane, e ìteìa te māàma,
e tapavaù nui. Ma to Īa mamae, e haameitaì tu ù tāvini
i te tini tini ènana a amo ai i to âtou mikeo.
12 No èià, e tuku au io Īa i te tau haètoa,
e àva Īa i te tuhaìa taetae me te poì mana.
Ohia à, na Īa ta Īa i ìò atu i te mate,
i tatauìa me te poì mikeo.
Mēìa ua amo i te mikeo o te tau tini tini ènana,
u vavaò nei Īa i uē i te poì mikeo.
TARAMO 31 (30), 2.6, 12, 13-14ac, 15-16, 17.25
Io to ìma, e te Hatu e, e tuku nei au i to ù kuhane.
E te Hatu e, io Òe to ù vahi maù.
Umoì e haameeìa au ma te tau â paotū.
6 Io to Òe îìma, e tuku nei au i to ù kuhane,
E te Hatu te Etua tiàtohu e, tu ù Haapohuè.
12
U toomanu au nei no to ù tau hoa noho tata,
Ia ìte mai, u haametaù to ù tau hoa.
Ua hiki mamao me io ù
Te poì i tutuki me au ma io he vaanui.
13 U haamāhaèìa au me he tūpāpaù ìtekoèìa.
U haamāhaè âtou ia ù me he kaù tioàìa.
14 Ua òko au i te tekao haapōtoho mai
Ta te haètoa e hano ana no te kukumi mai.
15 U haatià au ia Òe, e te Hatu e.
U peàu hakaùa : o Òe tu ù Etua.
16 I òto o to Òe îìma to ù pohuè :
A taki mai me io te îìma i mākaka ia ù.
17 A pupuà to Òe mata no to Òe tāvini,
Mēìa i to Òe uē, a haapohuè mai.
25 A oko nui te koekoe. Oho te ìi
Ôtou paotū e tetaì nei i te Hatu !
TATAUÌA O TE HĀMANI I TO HEPEREO 4, 14-16-- 5, 7-9
E tu ù tau tuàne tuehine.
4,14 Ohia ua ìò Ietu he Tama a te Etua, to tātou Tāuà nui tiketike,
te i tomo i ùka nui o te àki,
a tohe mau tātou i te haki atu i te haatià.
15 Na te mea, u mehea hua Tāuà nui
mēìa i te tau tekateka o to tātou koekoe pepae.
Ua ìte hoì Īa ma te tiàtohu i te nuiìa
o te mea haaveke me te haamōtii mai ia Īa,
atià à, u mikeo koè Īa.
16 No èià, a haatata mai tātou haametaù koè
me te Etua mana nui, te tumu o te vaièiìa,
vāàna e ìò mai ia tātou to Īa hakāòha
me te karatia no te toko mai, i te ava e hei.
5,7 O Ietu Kirito e pohuè aa io he henua nei,
me he ènana mate vave, ua pure Īa i te pure vavaò,
e uē aa, e taaàu aa io te Etua,
etià e haapohuèìa me io te mana o te mateìa.
U apuuìa ta Ietu Kirito pure
mēìa i to Īa kāòha me te aotahi atu.
8 E aha à he Tama te Kirito,
ma to Īa mamae, u hakako Īa i te aotahiìa.
9 Ma èià, ua ìò Īa he toitoi noa i mua o te Etua,
u haatūìa te tumu o te pohuè ananu
no te tau ènana paotū e aotahi ia Īa.
HĪMENE VĀNANA :
cf. Fi. 2,8-9
U aotahi te Kirito tihe i te mateìa, te mateìa io he peka.
Oia te tumu u haatiketike anaè te Etua ia Īa,
me te apa i te ikoa ma ùka o te tau ikoa ia ôtoa.
TATAUÌA O TE MAMAE O IETU KIRITO
VĀÀNA E IOANE
18, 1-40--19, 1-42
I tēia mou pō,
18.1 ua hee Ietu me to Īa huaa kouâ
i tītahi kēkē o te vaitahe Keterone. Enā i èià e tahi pāpua.
Ua uu Ietu me to Īa huaa kouâ i òto o hua pāpua.
2 O Iuta, te i haaìò ia Ietu, ua ìte meitaì i hua vahi,
mea nui hoì te tiheìa o Ietu i èià me to Īa huaa kouâ.
3 Ua tihe mai Iuta, e haatee aa
i te hatu kape Roma me te tau mūtoi tiaki
i tukuìa mai ia īa e te tau tāuà nui me te tau fariteo.
Ua kave âtou i te tau àma hue, te àma kohe me te hāìna tōua.
4 Ua ìte Ietu i te tau hana paotū ta âtou i haapao ma ùka o Īa.
Ua hee Īa i to âtou aò me te peàu :
+ « O ai ta ôtou e ùmihi nei ? »
5 U hua atu âtou ia Īa :
F « O Ietu no Natareti. »
U peàu Ietu ia âtou :
+ « O au. »
O Iuta tītahi me âtou.
6 Ia peàu Ietu i tēnei ponatekao, O au,
ua hua âtou i muì me te topa io he tuaèpo.
7 Ua ūi hakaùa Ietu ia âtou :
+ « O ai ta ôtou e ùmihi nei ? »
U peàu âtou ia Īa :
F « O Ietu no Natareti. »
8 U hua atu Ietu ia âtou :
+ « U peàu au ia ôtou i kapo nei : O au.
No to ôtou ùmihi mai ia ù,
a avai ia âtou a hee atu. »
9 Atii e haatiàtohuìa te tekao a Ietu, pēènei à :
« Aòè i kaò e tahi o te huaa ta òe i tuku mai. »
10 O Timone Petero, ua too i te kohetā ta īa i kave mai.
Ua tā īa i te tueni o te tāuà nui
me to īa haamotu i te puaìka ìma oko o te tueni.
O Marakuto te ikoa o hua tueni.
11 U peàu Ietu ia Petero :
+ « A tuku iho i to òe kohetā io he kato.
Aha, aòè au e inu i te ipu mamae
i tukuìa mai e tu ù Motua ? »
NO IETU I HAAVĀÌA E ANA ME KAIFA
12 Te hatu kape Roma, to âtou vivini,
te tau mūtoi i pahiìa e te tau ati Iuta,
u popoki âtou ia Ietu me te humu ia Īa.
13 Òmua ìka, u aahi âtou ia Ietu io Ana.
He motuòai īa no Kaifa. I hua ava, he tāuà nui Kaifa.
14 Na hua Kaifa i peàu i te tau ati Iuta :
« E meitaì atu no ôtou e mate nui te ènana e tahi anaè
i uē i te mataèinaa. »
15 Atià, u ūtaì Petero me tītahi kouâ kē ia Ietu.
Ua ìteìa hua kouâ e te tāuà nui.
Ua uu īa me Ietu io he pāpua o te tāuà nui.
16 Ua noho Petero i vaho o te avaputa.
Ia uu i vaho hua kouâ te i ìteìa e te tāuà nui,
u tekao īa me te vehine tiaki avaputa.
U haauu īa ia Petero i òto o te pāpua.
17 U peàu hua vehine tiaki avaputa ia Petero :
A « Aòè à òe tītahi kouâ o tēnei ènana ? »
Ua hua atu Petero ia īa :
D « Aòè au e kouâ no Īa. »
18 Mēìa i te anu, u haauà i te ahi te tau tueni me te tau mūtoi tiaki. Ua noho âtou pii he ahi no te haamāhanahana.
O Petero tītahi me âtou.
19 Ua ūi atu te tāuà nui ia Ietu no to Īa tau kouâ
atii me to Īa hakakoìa.
20 U haahua atu Ietu ia īa pēènei :
+ « U tekao ananu au etià e vivini ia ù te tau ènana paotū.
U hakako ananu au io he tinakoka me te Hiero,
i èià te putuputu o te tau ati Iuta paotū.
U te e peàu au e tahi tekao hakanā.
21 A ape òe i te tau ènana te i hakaòko mai
e aha ta ù i peàu ia âtou.
O âtou hoì te i ìte i tu ù hakakoìa. »
22 Ia òko i hua ponatekao tītahi mūtoi tiaki e tū aa nei,
u papaki ia Ietu me te peàu :
A « Atii ta òe tekao i te tāuà nui ? «
23 U hua atu Ietu ia īa :
+ « Me teka tu ù tekao, a hakaìte mai.
' Ia meitaì tu ù tekao,
e aha te piò o to òe papaki ia ù ? »
24 I muì iho, ua pahi atu Ana ia Ietu humuìa io Kaifa.
25 Atià i èià, pii he ahi, ua noho Timone Petero,
e haamāhanahana aa ia īa. U peàu mou ènana ia īa :
A « Aòè à òe tītahi o to īa tau kouâ ? »
U haakoè Petero me te peàu :
D « Aòè au he kouâ no Īa. »
26 U pohā te èo o tītahi tueni o te tāuà nui,
e huaa īa no te ènana i haamotuìa te puaìka
e Petero me to īa kohetā. U peàu hua tueni ia Petero :
A « Aha aòè ua ìte au ia òe
io he pāpua me te ènana nei ? »
27 U haakoè hakaùa Petero. Ua taki anamai te moa.
NO IETU HAAVĀÌA E PINATO
28 U aahiìa Ietu me io Kaifa io te haè o te hakaìki Roma.
He pōpōuì tika. Atià, aòè i uu te tau ati Iuta
i òto o te haè o te hakaìki Roma, oa havaìa âtou i te piò.
E hano hoì âtou i te mau Pakate kai.
29 Ua uu Pinato i vaho no te tutuki me âtou. U peàu īa :
A « E aha te piò te hakatio pu ôtou i tēnei ènana ? »
30 Ua peàu âtou ia Pinato :
F « Me he mea aòè īa he ènana mākaka,
u te e haaìò mātou ia òe i hua ènana. »
31 U peàu Pinato ia âtou :
A « A too ôtou ia Īa me te haavā vāàna i to ôtou ture. »
U haahua atu te tau ati Iuta :
F « Aòè e koàka ia mātou te haamate i te ènana. »
32 Oia hoì te mea e haatiàtohu ai i ta Ietu i peàu
no te haavivini i te hakatu o to Īa mateìa.
33 Ua uu hakaùa Pinato io to īa haè
me to īa vavaò ia Ietu. U peàu ia Īa :
A « Aha, o òe te Hakaìki nui o te tau ati Iuta ? »
34 U hua atu Ietu :
+ « Na òe ta òe tenā tekao ?
Akoè à na tahipito i peàu mai i ùka o au ? »
35 U peàu Pinato :
A « Aha, he ènana ati Iuta au nei ?
Na to òe mataèinaa me te tau tāuà
i haaìò mai ia òe io ù. E aha ta òe i hana atu ? »
36 Ua hua atu Ietu :
+ « Aòè me i te ao nei to ù hakaìkiìa.
Anoa me i te ao nei to ù hakaìkiìa,
e tōtōua hoì to ù huaa tautua,
oa haaìòìa au i te poì ati Iuta.
Atià, aòè e hakatu to ù hakaìkiìa me to te ao nei. »
37 U peàu Pinato :
A « No èià, he hakaìki òe ? »
Ua hua atu Ietu :
+ « Na òe i peàu. He hakaìki au.
Oia te tumu o to ù hānauìa me te tiheìa
i te aomāàma nei : no te hakaìte i te mea tiàtohu.
O te ènana ua kē me te tiàtohu, u hakaòko i ta ù tekao. »
38 U peàu Pinato ia Īa :
A « E aha te tiàtohu ? »
Ia haahitipona Pinato i hua tekao, ua uu hakaùa i vaho.
NO IETU E HAKATIOÌA E PINATO
39 Ua taha Pinato io te poì ati Iuta me te peàu :
A « Aòè i koàka ia ù te piò no te hakatio i hua ènana.
Atià, no te Koìka Pakate, vāàna i to ôtou haa ati Iuta,
e vevete au i tītahi me io he haèhumu.
Aha, u makimaki ôtou e vevete au
i te hakaìki nui o te tau ati Iuta ? »
40 U taaàu oko ki âtou :
F « Umoì tēia. A vevete ia Parapā. »
O Parapā hoì he ènana mākaka.
19,1 I muì iho, u peàu Pinato a tooìa Ietu no te tā ia Īa.
2 U àaka te tau kape i te paè me te èitā taataa.
Ua tuku âtou i hua paè i ùka o te upoko o Ietu.
Ua tomi âtou ia Īa me te kahu uhi pu veàkiki.
3 U haatata mai âtou me Ietu e peàu aa :
F « Kāòha, e te hakaìki o te tau ati Iuta. »
U papaki âtou ia Īa.
4 Ua uu hakaùa i vaho Pinato me te peàu :
A « Eīa. U aahi au ia Īa i vaho nei io ôtou,
etià e ìte ôtou aòè i koàka ia ù
te piò no te hakatio i hua ènana. »
5 Ua uu Ietu i vaho me te paè taataa,
me te kahu uhi pu veàkiki.
U peàu Pinato ia âtou :
A « Oia nei te ènana. »
6 O te tau tāuà nui me te tau mūtoi tiaki,
e tiòhi aa ia Ietu, u taaàu oko ki âtou :
F « A pāoka. A pāokapeka atu ! »
U hua atu Pinato ia âtou :
A « A too ôtou ia Īa. A pāokapeka atu.
Aòè i koàka ia ù te piò no te hakatio ia Īa. »
7 U haahua atu te tau ati Iuta :
F « He Ture no mātou. Vāàna i hua Ture, a mate nui Īa
mēìa u peàu e Tama Īa a te Etua. »
8 Ia òko Pinato i hua tekao, ua nui aè to īa haametaù.
9 Ua uu hakaùa Pinato io to īa haè. Ua ūi atu ia Ietu :
A « Me i hea mai òe ? »
Ua mutu Ietu.
10 A tahi a peàu Pinato :
A « Umaha u te e makimaki òe e tekao mai ?
Aòè òe i ìte e mana to ù no te vevete ia òe,
akoè à e mana to ù no te pāokapeka ia òe ? »
11 U haahua Ietu :
+ « He mana ta òe i ùka o au
mēìa i tukuìa ia òe e te Etua.
No èià, nui atu te mikeo o te ènana
te i haaìò ia ù i to òe îìma. »
12 Oia te tumu ua hano Pinato e vevete ia Ietu.
Atià, u taaàu te tau ati Iuta me te peàu :
F « Me vevete òe i tēnei ènana, aòè e hoa òe no Ketare.
O te ènana i hano ia īa haahakaìki nui,
ua hano hua ènana e tōua me Ketare. »
13 Ia òko Pinato i hua tekao, u peàu no te aahi ia Ietu i vaho.
U noho īa ma ùka o to īa nohoka haavā tekao,
io he vahi i vavaòìa Tohua keâ,
o Kapata ma he èo hepereo.
14 He â i peàuìa no te haapei i te Koìka Pakate,
o hua â nei, i te oatea nui.
U peàu Pinato i te poì ati Iuta :
A « O īa nei to ôtou hakaìki nui. »
15 U taaàu âtou :
F « A mate. A mate. A pāokapeka atu ! »
U peàu Pinato :
A « E pāokapeka au i to ôtou hakaìki ? »
U haahua atu te tau tāuà nui :
F « O Ketare anaiho to mātou hakaìki. »
16 A tahi a haaìò Pinato ia Ietu, etià e pāokapekaìa e âtou.
NO TO IETU PĀOKAPEKAÌA
17 Ua too âtou ia Ietu me te aahi atu.
E amo aa Ietu tootahi i to Īa peka,
ua taha Īa io te vahi apaìa Karavario,
o Korokota ma he èo Hepereo.
18 I èià, u pāokapeka âtou ia Ietu.
U pāokapeka âtou i nā ènana kē tokoùa :
i tēia kēkē tītahi, i tēia kēkē tītahi.
O Ietu i vāveka.
19 U kānea Pinato e tahi mēmau patuìa.
U tauèvaìa hua mēmau io he peka.
Oia nei te mea i patuìa :
« O Ietu no Natareti, te Hakaìki nui o te tau ati Iuta. »
20 He mea nui te tau ati Iuta te i tatau i hua tekao hakaìte,
na te mea ua tata me te pāpuahaè
te taha i èià u pāokapekaìa Ietu.
U patuìa ma he èo hepereo, te èo hereni, te èo ratino.
21 U peàu te tau tāuà nui ia Pinato.
F « Umoì e patu : e hakaìki nui o te tau ati Iuta.
A patu pēènei : u peàu hua ènana :
O au te hakaìki o te tau ati Iuta. »
22 U haahua Pinato :
A « O te mea ta ù i patu, ua pao i te patu. »
23 Ia pāokapekaìa Ietu e te tau kape,
ua too âtou i to Īa tau kahu me te hopehope e hā pāio,
pāio kē to te hoa, pāio kē to te hoa.
Ua too âtou me to Īa kahu òa.
Atià, aòè i tuiìa hua kahu.
E tahi tapa anaiho me i ùka tihe atu i àò nui.
24 U peàu âtou :
A « Umoì e veti, a tuha tātou ma te haakai. »
Ua pao hua mea etià e toitoi te tekao
i patuìa io he Hāmani tapu :
« Ua tuha âtou i to ù kahu, u haakai i to ù kahu òa. »
Oiana ta te tau kape i haapao.
NO TO IETU MATEÌA
25 U maô pii te peka o Ietu to Īa kui me te teina o to Īa kui,
te vehine a Kereopa, o Maria te ikoa, o Maria Matarena.
26 E tiòhi aa Ietu i to Īa kui
me to Īa kouâ tāhia ma to īa kaokao,
u peàu i to Īa kui :
+ « E te vehine, o īa nei ta òe tama. »
27 I muì iho, u peàu i to Īa kouâ :
+ « O īa nei to òe kui. »
Me i tēia ava anaiho, ua too te kouâ ia Maria io to īa haè.
28 Ua ìte Ietu ua pao te mea ta Īa i haapao,
no te haatoitoi i tītahi ponatekao patuìa io he Hāmani tapu,
u peàu :
+ « Ua paka au i te vai. »
29 Enā i èià e tahi ipu pī i te vīneka.
U haakutaùìa me te vīneka tītahi mēmau omotai.
U haamauìa hua mea omotai ma ùka o te makamaka âkau.
U haatataìa me to Ietu haha.
30 Ia ako Ietu i te vīneka, u peàu :
+ « Ua pao ònaòna. »
A tahi, e oha aa Ietu i te upoko, ua tuku atu i te kuhane.
(A noho muò, a kaituto)
NO TE VEÒ I TE KAOKAO O IETU
31 Oia te â no te Haapei i te Koìka Pakate.
He â tapu oko no te tau ati Iuta tēia koìka,
tōtahi atu mēìa e haììa ma te Tāpati.
No èià, ua ape âtou ia Pinato
a hahati i nā vaevae o te tau ènana i pāokapekaìa
me te taki iho i to âtou nino
oa èva âtou i hua â io he peka.
32 Ua tihe mai mou kape te i hahati i te tau pūhāvaevae
o nā ènana i pāokapekaìa me Ietu.
33 Ua tihe âtou io Ietu, ua ìte u mate nui,
aòè âtou i hahati i to Īa vaevae.
34 Atià, tītahi kape, me te taa, ua veò i to Īa kaokao.
Ua tahe anamai te toto me te vai.
35 Na te ènana i ìtemata te i haatiàtohu i hua mea ;
he tekao tiàtohu ta īa.
Ua ìte te Hatu : u peàu īa i te mea tiàtohu,
etià e haatià me ôtou.
36 U haapaoìa hoì hua mea etià e toitoi
te tekao o te Hāmani tapu te i peàu :
« Umoì e hahatiìa e tahi o to Īa tau ivi. »
37 U patuìa io he vahi kē :
« E tiòhi ai âtou i tēia ta âtou i tīputaèe. »
NO TE TOMIÌA O IETU
38 I muì iho, ua ape Ioteve no Arimatea ia Pinato,
no te too mai i te nino tūpāpaù o Ietu.
He kouâ Ioteve no Ietu, atià ma te haapupuni
na te haametaù i te tau ati Iuta.
Ua ao Pinato. Ua tihe Ioteve
me to īa taki atu i te nino o Ietu.
39 Ua tihe me Nikotemo.
O īa te i tutuki me Ietu, òmua i te pō.
Ua kave mai īa i te mea kakaa, me he e ìma ònohuu kiro,
he mira me te aroe ua pao i te kāvohi.
40 Ua too âtou i te nino o Ietu,
ua vāhī me te tapa me te mēmau kakaa.
Ua hana anaiho âtou vāàna i te haa ati Iuta
no te tomiìa i te nino tūpāpaù.
41 Enā i èià, tata èka me te taha o to Īa pāokapekaìa,
e tahi pāpua me te ana tūpāpaù hou.
Òmua, aòè i tomiìa tītahi nino tūpāpaù i òto o hua ana.
42 Mēìa i te â Haapei i te Koìka Pakate,
ohia mea tata èka hua ana tūpāpaù,
i èià ua tomi âtou ia Ietu.
TE PŌ PAKATE
1 - TATAUÌA O TE HĀMANI A MOITE PEÀUÌA TENETE
1, 1-31--2, 1-2
1 I te tumu, u pēpena te Etua i te àki me te henua.
2 O te henua à, e hakatu koè, kiko koè.
Ma ùka o te peteò, he pō keevō,
ma ùka o te tau vai, e ona nei te kuhane o te Etua.
3 U peàu te Etua : « A māàma ! »
Me te māàma anamai.
4 Ua ìte te Etua u meitaì te māàma.
Me te haapae o te Etua i te māàma me io he pō keevō.
5 Ua apa te Etua i te māàma, he â.
Ua apa te Etua i te pōtako, he pō.
Me te ahiahi me te pōpōuì anamai.
Pō a tahi.
6 U peàu te Etua :
« A papahenua ma vāveka o te tau vai,
mea haapae i te tau vai me io te tau vai. »
7 Ua hana te Etua i te papahenua,
me te haapae i te tau vai ma ùka o te papahenua
me io te tau vai ma àò o te papahenua.
Ua pao anamai atii.
8 Ua apa te Etua i te papahenua, he àki.
Me te ahiahi me te pōpōuì anamai.
Pō a ùa
9 U peàu te Etua :
« A putu mai ma he ava e tahi,
te tau vai ma àò o te àki,
a ìteìa mai te vahi moô. »
Ua pao anamai atii.
10 Ua apa te Etua i te vahi moô, he henua.
Ua apa i te tau vai, he tai.
Ua ìte te Etua he mea meitaì.
11 U peàu te Etua :
« A tupu te henua i te mutiē,
i te èitā e hua nei i te kākano,
i te tumuâkau e hua nei i te puku
e avai nei ma òto te kākano ma to īa hakatu. »
Ua pao anamai atii.
12 Ua tupu te henua i te mutiē,
i te èitā e hua nei i te kākano ma to īa hakatu,
me te tumuâkau e hua nei i te puku
e avai nei ma òto iho o te kākano ma to īa hakatu.
Ua ìte te Etua he mea meitaì.
13 Me te ahiahi me te pōpōuì anamai.
Pō a toù.
14 U peàu te Etua :
« A tauèva mou àma ma àò o te papahenua o te àki,
mea haapae i te â me i te pō.
A ìò âtou he mou hakatu e tuhi i te tau ava koìka,
te tau â me te tau èhua.
15 E ìò hua tau àma ma àò o te papahenua o te àki,
mea tūìka i te henua. » Ua pao anamai atii.
16 U kānea te Etua i nā àma kākaùoo e ùa.
O te àma kaùoo oko mea vivini i te â,
me te àma iti mea vivini i te pō, i muì iho te tau hetū.
17 U tauèva te Etua ia âtou io te papahenua o te àki
mea tūìka i te henua,
18 mea vivini i te â me i te pō,
mea haapaekē i te māàma me io te pō keevō.
Ua ìte te Etua he mea meitaì.
19 Me te ahiahi me te pōpōuì anamai.
Pō a hā.
20 U peàu te Etua : « A pī nui te tau vai
i te nuiìa o te mēmau pohuè.
A ona te manu ma ùka o te henua,
i àò o te papahenua o te àki. »
21 U pēpena te Etua i te tau ika tai hakaìpaìpa pē
me te ika pohuè hakatahi e nokenoke nei,
e pī nei ma he tau vai, vāàna i to âtou hakatu,
me te manu pekeheu hakatahi vāàna i to âtou hakatu.
Me te ìte o te Etua he mea meitaì.
22 U haameitaì atu te Etua ia âtou e peàu aa :
« A tuputupu, a nuinui, a haapī i te tau vai me te tai,
a nuinui me te tau manu ona ma he henua. »
23 Me te ahiahi me te pōpōuì anamai :
Pō a ìma.
24 U peàu te Etua :
« A pī te henua i nā puaka pohuè vāàna i to âtou hakatu,
te tau puaka kai, te tau puaka totoo,
te tau puaka hae vāàna i to âtou hakatu.
Ua pao anamai atii.
25 U kānea te Etua i te tau manu hae vāàna i to âtou hakatu,
me te tau puaka kai vāàna i to âtou hakatu
me te puaka paotū totoo ma ùka o te henua
vāàna i to âtou hakatu.
Ua ìte te Etua he mea meitaì.
26 U peàu te Etua : « A kānea tātou i te ènana
he ata no tātou, e haahakatu me tātou anaiho.
A vivini īa i te ika o te tai,
i te puaka kai me te puaka hae paotū,
i te tau puaka paotū e totoo nei ma ùka o te henua. »
27 U pēpena te Etua i te ènana e ata no Īa.
He ata no te Etua i pēpena atu ai i te ènana.
He vāhana, he vehine i pēpena atu ai ia âua.
28 U haameitaì atu te Etua ia âua.
U peàu atu te Etua ia âua :
« A tuputupu, a nuinui, a haapī i te henua, a tuàki atu :
a vivini i te ika o te tai me te manu o te ataàki
me te puaka hakatahi totoo ma ùka o te henua. »
29 U peàu te Etua :
« Eīa, ua tuku au no ôtou i te èitā paotū e hua nei i te kākano, e avai nei ma ùka o te henua tiàtohu me te tumuâkau paotū
e hua nei i te puku me te kākano i òto : a kai ôtou i tēia kai.
30 Atii i te puaka hae paotū me te manu paotū o te ataàki,
i te mēmau paotū e totoo ma ùka o te henua,
i te mēmau paotū me te menava o te pohuèìa,
ua tuku atu au i te èitā hakatu kē no te kai.
Ua pao anamai atii.
31 Ua ìte te Etua i ta Īa mea paotū i hana, eīa he mea meitaì nui.
Me te ahiahi me te pōpōuì anamai :
Pō a ono.
2,1 Atii ua pao anamai te àki me te henua
me to âua mēmau paotū i òto.
I te pō e hitu, ua haapao te Etua i te hana ta Īa i hana.
2 U hakaēa ma te pō e hitu me i te hana paotū.
TARAMO 104 (103) 1-2a, 5-6, 10.12, 13-14b, 24.35c
E te Hatu e, a pōpahi i to Òe Kuhane no te haahou
i te hakatu o te henua. cf. 104,30
1 A haameitaì i te Hatu, e tu ù kuhane e.
E te Hatu e, tu ù Etua e, u tiketike Òe.
Ua tāpīìa Òe me te kāìè
2 O te àma, te kahu e vāhī ia Òe.
5 E haamau Òe i te tūàka o te henua,
Etià e keue koè ma te tau tai a tihe nei.
6 Ua uhiìa hua henua me te tau tai.
Òmua, u haakaò te vai i te tau tuaivi.
10 Io te vao nui, e haapihiti Òe i te punavai.
E tahe te vai ma io he kaavai hōhonu o te tuaivi.
12 Ua noho pii o hua vai te nuiìa o te manu ;
Ua òkoìa te takiìa o to âtou èo.
13 Me io to Òe nohoka, u hāinu Òe i te tau tuaivi,
Ua kai haamaòna te mēmau pohuè i to Òe tau puku.
14 U haatupu Òe i te èitā no te tau naho ànimara,
U haatapavaù i te pāpua o te ènana paòpaò i te hana.
24 He mea nui to Òe hana, e te Hatu e.
Na to Òe māàma i pēpenaìa te tau mēmau paotū.
Ua pī te henua i to Òe tau taetae.
A haameitaì i te Hatu, e tu ù kuhane e !
Akoè à
TARAMO 33 (32) 4-5, 6-7, 12-13, 20.22,
Ua pī te aomāàma i to Òe tau hana kāòha, e te Hatu e.
33,5
4 He toitoi noa te Tekao a te Hatu.
U tiàtohu anaè to Īa tau hana paotū.
5 U haataetae Īa i te hakatu toitoi, hakahae koè.
Ua pī te aomāàma i to Īa tau hana kāòha.
6 U pēpena te Etua i te àki na to Īa tekao.
U kānea Īa i te aomāàma na te mana o to Īa ao.
7 U haapuke Īa i te tai me te haapākeka, oa neke īa.
U tāpae Īa i te moana me te tau taetae i òto.
12 Mamau te mataèinaa ia ìò te Etua he Hatu no īa.
Mamau te henua vaeìa me he pāpua no te Hatu.
13 Me io he àki, u tiòhi meitaì te Hatu
E ìte aa i tēia ènana, i tēia ènana.
20 O te Hatu te tumu o to tātou pohuè.
O Īa to tātou toko me te vavao.
22 E te Hatu e, a noho mau to Òe kāòha i ùka o mātou
Atii me mātou e tetaì mau i to Òe vaièiìa.
2. - TATAUÌA O TE HĀMANI A MOITE PEÀUÌA TENETE
22, 1-2.9a.10-13.15 (22, 1-13.15-18)
1 U haahiiveke te Etua ia Aparahamo me te peàu ia īa :
« E Aparahamo e ! » U haahua atu īa : « Eīa au nei. »
2 U peàu te Etua : « A too i ta òe tama, te tamaòa tootahi,
te tama ta òe e haataetae nei, o Itaako.
A hee atu io te Henua Moria ; i èià, a ùtuna mai ia īa
i ùka o te tuaivi e hakaìte atu au ia òe. »
3 I te pōpōuì tika, ua vaa Aparahamo
me ta īa haapei i te pūriki.
U vavaò īa i nā pahikaèo e ùa me Itaako ta īa tama.
U haapūpā i te vehie no te ahi tapu.
Ua hiti īa i uta, io te tuaivi ta te Etua i peàu atu.
4 I te â e toù, u heau Aparahamo
me to īa ìte mamao i te tuaivi peàuìa e te Etua.
5 U peàu Aparahamo i ta īa nā pahikaèo :
« A noho ôùa înei me te pūriki.
O au nei me te tama e hiti māua i èià.
Ia pao to māua moe haatona me te pure, e hua mai māua. »
6 Ua too Aparahamo i te pūpā vehie
me ta īa tuku ma ùka o te pauhihi o Itaako, ta īa tama.
Ua tooìma īa i te ahi me te kohe.
U hihiti âua amana tokoùa.
7 U peàu Itaako ia Aparahamo : « E to ù motua e. »
U haahua atu : « Eīa au nei, e tu ù tama e. »
U peàu Itaako :
« Enā te ahi, enā me te vehie, i hea te hēaka ? »
8 U haahua atu Aparahamo :
« Na te Etua e hakaìte mai i te hēaka, e tu ù tama e. »
U hihiti âua amana tokoùa.
9 I te ava ua tihe âua i te vahi peàuìa e te Etua,
u hakatū Aparahamo i te hātaapure
me te tuku i te vehie ma ùka.
U kitii Aparahamo i ta īa tama, ia Itaako,
me te tuku atu ma ùka o te hātaa, io he puke vehie.
10 U hapai Aparahamo i te ìma,
ua too i te kohe no te kukumi i ta īa tama.
11 A tahi a vavaò te anera o te Hatu Etua me io he àki
me te peàu : « E Aparahamo, Aparahamo e. »
U haahua atu īa : « Eīa au nei. »
12 U peàu te anera : « Umoì òe e tā i te māhaì.
Umoì òe e haamamae ia īa.
Ua ìte au i tēnei i te mea u pakaihi òe i te Etua.
Aòè hoì òe i kaikino mai i te tama, ta òe tama tootahi. »
13 A tahi a heau Aparahamo me to īa ìte i te koimaa menē
te i haavekeìa io he maaèitā keoho.
Ua hano īa i te menē too,
me to īa ùtuna atu i te hēaka io te kōava o ta īa tama.
Ua apa Aparahamo i hua vahi : « Ua ìte te Hatu Etua. »
15 Na te anera o te Hatu Etua me io he àki
i vavaò hakaùa ia Aparahamo me te peàu pēènei :
16 « He tekao a te Hatu Etua. E haatiàtohu au ma to ù iho ikoa :
mēìa u aotahi mai, aòè òe i kaikino i te tama,
ta òe tama tootahi, e haameitaì me te vaièi nui au ia òe.
17 E haanui au tini, tini i to òe ati i ùka aè,
me he nui o te hetū io he ataàki,
me he nui o te one io te hiku o te tai.
E haahika âtou i te pākeâ me te mōuka tōua
o te mataèinaa e ahi me âtou.
18 Mēìa u aotahi mai òe, e haameitaì atu haameitaì mai
te tau mataèinaa paotū ma te vavaò mai i to òe ikoa. »
TARAMO 16 (15), 5.8, 9-10, 1b.11
E tu ù Etua e, a tiaki meitaì ia ù ; io Òe anaè tu ù tetaì.
cf. 16,1
5 O te Hatu te hope taetae ua ìò ia ù.
Io to Òe ìma, e te Hatu e, to ù pohuèìa.
8 I mua o to ù mata ananu te Hatu,
Ma to ù kaokao to Īa noho, u haametaù koè au.
9 Ua û i te koakoa to ù kuhane.
U èkaèka to ù nino, ua moe me te moû.
10 Aòè te Hatu e ao e hika au i te mateìa.
Aòè Īa e avai i to Īa hoa e pē ai io he èpo.
1b E tu ù Etua e, o to ù hīa, io Òe tu ù vahi maù.
11 U aahi mai Òe ma io he vaanui o te pohuè ;
I mua o to Òe mata, te koakoa, te koakoa nui.
Ma to Òe kaokao, te èkaèka paona koè.
3. - TATAUÌA O TE HĀMANI A MOITE PEÀUÌA EHOTO
14, 15-31 -- 15,1a.
Ia ìte te poì o Iraene u tatai mai te pūpū kape Ekipito,
ua pī âtou i te haametaù.
14,15 U peàu te Hatu Etua ia Moite : « No te aha te taaàu io ù ?
A peàu i te tau tama Iraene a tataha atu.
16 O òe, a too i to òe tokotoko,
a hapai i to ìma ma ùka o te tai, e vahiìa ma vāveka.
A taha atu te poì Iraene io he tai,
paìpaì koè nā vaevae.
17 O au à, e haaheò i te koekoe o te poì Ekipito.
Ma hope o ôtou, e taha âtou io he tai.
E haakāìèìa au e te hakaìki Faraone,
to īa tau pūpū kape, to īa tau pāriri, to īa tau ihovare.
18 E ìte to Ekipito o au te Hatu Etua,
ia pao i te tuàki te hakaìki Faraone me to īa tau pāriri
me to īa tau pūpū kape piki ihovare.
19 Enā ma mua o te pāpua o te tau tama Iraene
te anera o te Etua ; ua hee īa i hope atu.
Hua mea te kohu keekee te i ūtaì i te pūpū tama Iraene ;
ua hee īa i hope atu.
20 Ua tū te kohu keekee i vāveka o te pāpua
o te tau kape Ekipito me te pāpua o to Iraene.
I te tūmoe, e ùa hakatu hua kohu :
he pō keevō i te kēkē Ekipito, he àma pupuà i te kēkē Iraene.
I te pō, u te e haatata mai to Ekipito me to Iraene.
21 U hapai Moite i te ìma ma ùka o te tai.
Ma te tiàtohu o te pō, ua puhi te Etua i te metaki oko
me i te kēkē tiheìa òumati.
Ua hee pororō nui te tai, vahiìa ma vāveka.
22 Ua taha atu to Iraene paìpaì koè te vaevae.
Ua tū anaè te tai me he pā i te ìma oko,
me he pā i te ìma aèaè.
23 U tatai i to Iraene i te poì Ekipito,
te hakaìki Faraone me to īa tau ihovare,
to īa tau pāriri, to īa tau pūpū kape.
Ua tihe âtou paotū i vāveka o te tai.
24 I te hāhakateiao, me i vāveka anamai o te kohu,
u tiòhi mai te Hatu i te tau pūpū kape Ekipito.
U haahika te Hatu ia âtou.
25 U haakati Īa i to âtou pāriri, he mea hana nui te aahi atu.
U peàu to Ekipito : « A hihiti tātou i mua o Iraene.
U tōua te Hatu, e toko aa ia âtou. »
26 U peàu te Hatu Etua ia Moite :
« A hapai i to òe ìma i ùka o te tai.
A hua anamai te tai ma ùka o te tau kape Ekipito,
to âtou pāriri, to âtou poì piki ihovare. »
27 U hapai Moite i te ìma ma ùka o te tai.
I te pōpōuì tika, ua hua te tai i to īa kōava.
U hihiki to Ekipito.
Ua tomi te Hatu ia âtou i te take o te tai.
28 Ua hiti te tai. U tomiìa te tau pāriri,
te poì piki ihovare, te tau pūpū kape o Faraone
te i tohuti ma hope o te tau tama Iraene.
Aòè e tahi anaiho i toe atu.
29 Te tau tama Iraene à,
ua taha atu âtou paìpaì koè nā vaevae ;
me he pākeâ te tai i to âtou ìma oko me te ìma aèaè.
30 I hua â, u haapohuè te Hatu ia Iraene
me i te îìma o te tau Ekipito.
I te hiku o te tai, ua ìtemata Iraene
i te puke nino tūpāpaù o te poì Ekipito.
31 A tahi nei a ìte Iraene i te hana mana o te Hatu Etua
te i haahika i to Ekipito.
U pakaihi me te haametaù te mataèinaa Iraene i te Hatu.
U haatià âtou i te Hatu Etua, ia Moite, ta Īa tāvini.
15,1 Ua hahi Moite me te tau tama Iraene i te Hatu Etua,
e hīmene ana pēènei :
HĪMENE A MOITE = Ehoto 15, 2, 3-4, 5-6, 10a-11, 17
A hahi tātou i te Hatu, u pupuà to Īa kāìè ;
o te Hatu to tātou ìi. 15,1a
2 O te Hatu tu ù ìi. No Īa tu ù hīmene hahi.
O te Hatu tu ù Etua, te i haapohuè mai.
Ua haki au i to Īa òko nui.
U haatiketike au i te Etua o to ù tupuna.
3 O te Hatu te toa mana io he tōua,
He Hatu Etua to Īa ikoa.
4 U tioà Īa io he tai i te pāriri o Faraone.
Io he tai, u haakaò Īa i to Ekipito tau kape.
5 Ua tomiìa âtou io he peteò ;
Ua kaò me he keâ io he take o te tai.
6 E te Hatu e, ua mana to Òe ìma,
U haapaìha i te poì e tōtōua me Òe.
10 Ua puhi te Hatu : ua tomiìa âtou io he moana.
11 O ai te ètua e kiko me Òe, e te Hatu e ?
O ai e tūtū me Òe, te Peàto nui,
Te tumu o te mana haahopo i te ènana ?
17 U aahi mai Òe ia âtou me te nanu io he henua
I ùka o te tuaivi ta Òe i haataetae.
E te Hatu e, oiana te vahi o to Òe noho,
Te haè tapu ta Òe i hakatū, e te Hatu Etua e.
4. - TATAUÌA O TE PEROHETA ITAIA 54, 5-14
Oia nei ta te Hatu Etua i peàu ia Ierutaremi :
5 He vāhana no òe te Etua te i pēpena ia òe.
O te Hatu o te aomāàma, to Īa ikoa.
He Haapohuè no òe te Etua peàto no Iraene.
Te Etua o te henua ia ôtoa to Īa ikoa.
6 E Ierutaremi e, te vehine titiiìa, haameeìa,
E vavaò hakaùa te Etua ia òe.
U peàu te Hatu Etua pēènei :
« E aha e titii te hoa mātiri
i ta īa vehine vaeìa i te ava hou te nino ? »
7 U haamāhaè au ia òe no te ava poto.
Ma òto o to ù kāòha nui ia òe, e haakātahi mai hakaùa.
8 Mēìa i tu ù pekē, u haapiko i tu ù mata me io òe.
Ma òto o tu ù kāòha paona koè, u matavaièi mai hakaùa.
Oia te tekao o to òe Haapohuè, te Hatu Etua.
9 Me he mea i te tai kākiu i mua o Noa,
u haatiàtohu au i tu ù tekao pēènei :
Umoì e haakaòìa te henua i te vaiā,
atii tēnei u haamau i tu ù tekao :
Aòè au e pekē ia òe.
Aòè e oonaki ma te haametaù ia òe.
10 E aha à e takitumuìa te tau tuaivi,
E aha à e heùu te tau pūkei,
U te e huìkē to ù kāòha ia òe.
U te e hakaēa tu ù Piimau o te moû me òe.
Oia nei te Tekao a te Hatu Etua, te i kāòha ia òe.
11 E Ierutaremi e, òmua u haameeìa,
u haapūpūkinaìa, u titiiìa òe.
Enā e haakeàpa au i to òe pā me te tau keâ menia èreère.
He tau keâ pūkiki te puke keâ o to òe tūàka.
12 E pupuà to òe pā i te tau keâ pīàma pōnionio i te òumati.
He mea karahi to òe tau avaputa.
13 E haamāàma te Etua iho i ta òe tau tama.
E noho ananu to te Etua moû i ùka o âtou.
14 E tohe mau òe i òto o te toitoi.
E haamamaoìa me io òe te tau kōhii e òomi mākaka.
Aòè òe e haametaù hakaùa,
e koè ai te mea haahopo.
TARAMO 30 (29) 3-4, 5-6b, 6c.12, 13,
U haatiketike au ia Òe, e te Hatu e, te i hakatū ia ù. 30,2
3 I te ava e taaàu to ù èo io Òe,
E te Hatu, tu ù Etua e, u haameitaì mai.
4 Ua taki mai Òe me io he ōpata,
U haapohuè mai me io te ana o te tūpāpaù.
5 A hahi i te Hatu, ôtou, e te poì haatià e.
A haahuaèkaèka ma te haaòko nui i to Īa ikoa.
6 He ava poto to te Etua pekē,
Ma te òa o te pohuè to Īa haameitaì.
I te ahiahi, e tahe te vaimata,
Ma te pōpōuì te taaàu koakoa.
12 U haaìò Òe i tu ù uēuē me he â koìka.
Ua veti i to ù kahu pēpē no te uhi mai me te koakoa.
13 A taaàu i te koakoa, e tu ù kuhane.
Umoì òe e mutu pu, a haakoìka no te Hatu.
E hahi au hakaēa koè i te Hatu, tu ù Etua.
U haahuaèkaèka au ia Òe, e te Hatu e.
5. - TATAUÌA O TE PEROHETA ITAIA 55, 1-11
1 Oia nei te Tekao a te Hatu Etua :
E mate ôtou i te paka vai ? A mai. A inu.
Moni koè ôtou ? A hoko pu.
A kai. A inu i te vino, i te vaiū.
2 Umoì e haapao pu i ta ôtou moni hana
no te kai i te înaì haamaòna koè.
3 A hakaòko mai. E maòna ôtou i te înaì mōmona.
A hakaòko mai. Mave mai. E pohuè meitaì ôtou.
E haatoitoi au me ôtou i te Piimau paona koè.
E ìò hoì ia ôtou te taetae o Tavite.
4 Ua haamau au ia īa he ènana no ù i vāveka o te tau mataèinaa, te aahi, te vivini o te tau ati.
5 O òe à, e vavaò òe i tītahi ati aòè òe i ìte ;
e tihe mai io òe tītahi ati kē mēìa i to òe Hatu Etua,
te Peàto Nui o Iraene te i haakāìè ia òe.
6 A ùmihi ôtou i te Etua, oia te ava e tutuki me Īa.
I te ava nei, a pure ôtou i te Etua,
u tata èka me ôtou.
7 A hua mai te ènana mākaka me io to īa vaanui hukaka.
A titii te ènana ìno i to īa maakau pē.
A hua io te Etua te i hakāòha mai ia īa.
8 He mea kē hoì te makimaki o te Etua,
mea kē to te tau ènana.
He mea kē te hakatu o te Etua,
mea kē to te tau ènana.
9 Atii te tiketike o te àki ma ùka o te henua,
atii te hōhonu atu o te maakau o te Etua
ma ùka o te maakau ènana.
10 Ia topa te ūa me te nive me io he àki,
u haakutaù me te haatapavaù i te henua.
U haatupu âtou i te èitā, haahua i te puku
no te hākai i te tau ènana me te tau manu e kai aa.
11 Atii hoì te tekao ta ù i hakaìte atu :
E hana tēia tekao i te hana ta ù i makimaki.
U te e hua io ù ta ù tekao puku koè.
HĪMENE ITAIA 12, 2, 4b-e, 5b-6a.c,
O te Hatu Etua te vaipuna o te pohuè ;
a èkaèka tātou, a taaàu i te koakoa ! 12,3
2 O te Hatu Etua tu ù haapohuè.
U haatià nei au, haametaù koè.
O te Hatu Etua tu ù ìi. E hīmene au ia Īa.
Io te Hatu te tumu o to ù pohuè.
4 A haahuaèkaèka i te Hatu. A hahi i to Īa ikoa
A haki atu io te poì êteni i to Īa tau hana mana.
A hakaìte atu : he Tiketike to Īa ikoa.
5 A haataki i te pū no te hahi i te Hatu.
Ua hana hoì te Hatu i te hana mahaò.
U mevaha to Īa òko nui ma nā henua vii pu.
6 E Tiona e, a èkaèka, a taaàu i te koakoa.
U tiketike te Hatu Etua i vāveka o ôtou.
6. - TATAUÌA O TE PEROHETA PARUKO 3, 9-15.32-38 --4, 4
9 E te mataèinaa Iraene.
A haaòko i te tekao haameitaì i te pohuè.
A apuu i te tekao haamāàma ia òe.
10 E to Iraene, no te aha ua noho òe
i te henua o te tau ènana e tōtōua me òe ?
No te aha ua ìò òe he kooūa i te henua hāoè ?
11 Ua havaìa òe ma te haatukia me te nino tūpāpaù.
U tatauìa i vāveka o te huaa mamate i Havaiki.
12 Oia nei te piò : u titii òe i te puna o te Māàma.
13 Anoa òe i taha òe ma io he vaanui o te Etua,
ua noho òe me te moû i to òe henua.
14 A haamaakau òe i hea te māàma, te ìi, te ìteìa.
Ma èià, e ìte òe i hea te tumu o te pohuè òa,
i hea te àma e haatāhakahaka i to òe kikomata,
i hea te moû.
15 E noho te Māàma i hea ? O ai te i ìte ?
O ai te i uu io te pāòto o to te Māàma taetae ?
32 O te Etua te i tuhi i te vaanui o te Māàma.
Ua ìte Īa i te tau mea ia ôtoa.
Ua ùmihi Īa i te tau mea paotū.
U kānea Īa i te aomāàma vii pu.
U haapī Īa i te henua me te tau ànimara kē, ànimara kē.
33 Ua pahi Īa i te àma te i hee atu, hee atu paona koè.
U vavaò Īa i hua àma, ua taha mai,
e aotahi aa me te emièe.
34 U tāmiomio te tau hetū i te pō, me he mea u koakoa âtou.
35 U vavaò te Etua ia âtou,
u haahua âtou e peàu aa : « Eīa au nei. »
U keàpa âtou no te haaèka i te i pēpena ia âtou.
36 O Īa hoì to tātou Etua.
Aòè te Etua kē i mua o Īa.
37 Ua ùmihi Īa i te vaanui o te Māàma.
Ua tuku Īa i hua vaanui ia Iakopo, to Īa tāvini,
ia Iraene ta Īa i haataetae.
38 Ma èià, u hakaìte ia Īa iho i te Māàma io he henua nei.
Ua noho te Māàma i vāveka o te tau ènana.
4, 1 He Tekao o te Etua hua Māàma.
Oia te Ture te i noho mau ma te tau tai ananu.
E pohuè te tau ènana e aotahi i hua Tekao.
E mate nui te tau ènana e titii i hua Tekao.
2 A hua mai, e Iakopo e.
A apuu me te aotahi mau i te Tekao.
A tūìka te Tekao i te vaanui e aahi ia òe
io he pohuè kanahau.
3 Aua e too pu te mataèinaa kē i to òe kāìè.
Aua e hao te ati kē i to òe iho taetae.
4 Oho te ìi, e Iraene ! A oko òe !
Ua ìte tātou i te mea te i haaèka i te Etua.
TARAMO 19 (18) 8, 9, 10, 11,
E te Etua e, io Òe te tekao e aahi atu i te pohuè ananu.
cf. In 6,69
8 U toitoi noa te ture o te Hatu,
Na īa e haahou i to tātou ìi.
U tiàtohu te Tekao a te Hatu,
Te i haamāàma i te poì avai noa.
9 U toitoi te Tekao a te Hatu,
E haakoakoa âtou i te koekoe.
U hōata te makimaki o te Hatu,
E haakeàpa i te mata o te ènana.
10 U taìtaì te pakaihiìa o te Etua,
E noho mau ananu to īa tau puku.
U toitoi te tekao paotū o te Hatu :
He māàma âtou no te haavā i te ènana.
11 U taetae atu te makimaki o te Hatu
I te puke moni kiki, te kuà o te moni kiki.
He mānini atu te Tekao a te Etua
I te mānini tikauè e tahe me io he tīpapa.
7. - TATAUÌA O TE PEROHETA EHEKIERE 36, 16-28
16 Ua òko au i te Tekao a te Hatu, pēènei à :
17 « E te ènana e, i nā pō e noho nei te mataèinaa Iraene
io to âtou henua, u havaìa hua henua e âtou
mēìa i to âtou hakatu hauhau me to âtou hana pē.
18 U haatopa au ma ùka o âtou i te tuki pē,
mēìa i te toto ta âtou i kiini nei,
mēìa i te tau ètua tīvava te i haameìe i hua henua.
19 I haatavavā ai au ia âtou i vāveka
o te tau mataèinaa êteni
i haahiki kē ia âtou ma he henua kē ananu.
U haavā au ia âtou vāàna i to âtou hakatu me te hana.
20 I vāveka o hua tau mataèinaa êteni ta âtou i hee atu,
u haameìe âtou i tu ù ikoa tapu.
U peàu te tau ènana pēènei :
« Oia nei te mataèinaa o te Hatu Etua,
te i titiiìa me io to Īa henua. »
21 Atià, u makimaki au e haakāìè atu i tu ù ikoa tapu,
ta te ati Iraene i haameìe
io he tau henua i èià u tavavā âtou.
22 A peàu atu òe i te mataèinaa Iraene.
Pēènei te Tekao a te Hatu Etua :
« E to Iraene, a hakaòko mai.
Aòè no ôtou te tau hana e hana atu au,
atià no te haakāìè i tu ù ikoa,
ta ôtou i haameìe io te tau henua i hee atu ai ôtou. »
23 Ua tihe mai te tekao a te Hatu Etua, pēènei :
« E hakaìte au he mea tapu to ù ikoa tiketike
te i haameeìa e te tau mataèinaa êteni mēìa ia ôtou.
E vivini te tau mataèinaa i te mea : o au te Hatu Etua.
Na ù anaiho e haatapu i to ù ikoa.
24 E vavaò au ia ôtou me i vāveka o te tau mataèinaa
e haaputuputu au ia ôtou,
te i takiìa me io te tau henua paotū.
E haahua au ia ôtou i to ôtou henua tumu.
25 E kiini au ma ùka o ôtou i te vai mā, no te haamā ia ôtou.
E haataìtaì au i to ôtou tau mikeo paotū,
me to ôtou tau hana pakaihi teka i te tau ètua tīvava.
26 E vaièi atu au ia ôtou i te koekoe hou.
E tuku au ia ôtou i te kuhane hou.
E taki au i to ôtou hōupo keâ no te tuku atu i te hōupo kiko.
27 E haaihi au i òto o ôtou i to ù Kuhane
etià e aotahi ôtou i to ù makimaki,
me te haamau io he koekoe i to ù tau tekao.
28 E nonoho ôtou io te henua ta ù i tuku atu i to ôtou tau tupuna.
E ìò ôtou e mataèinaa no ù. He Etua au no ôtou. »
- Me papatemaìa tau tama hou,
HĪMENE ITAIA 12,2, 4b-e, 5b-6a.c, (a tiòhi i te tatauìa 5)
Akoè à
TARAMO 51 (50) 12-13, 14-15, 18-19
E te Etua e, a pēpena i òto o au ne i te koekoe hou. cf. 51,12
12 A pēpena i òto o au nei i te koekoe taìtaì.
A haahou i to ù kuhane, a haamau i to īa meitaì.
13 Umoì e titii atu ia ù mamao me io Òe.
Umoì e taki me i òto o au i to Òe Kuhane Meitaì.
14 A haakoakoa ia ù to Òe haapohuè mai.
A haamau i te èkaèka io to ù koekoe.
15 E hakako au i to Òe vaanui i te poì mikeo.
E hua mai io Òe te poì i hukaka nei.
18 No tu ù ùtuna atu i te hēaka, aòè e apuu mai.
Me kānea au i te hēaka pūovo i te ahi, u titii Òe.
19 O te koekoe unu i te uē, oia te hēaka e kākī Òe.
O te koekoe unu i te uē me te hopo mikeo,
Te ùtuna hēaka e haatāvaè ia Òe, e te Hatu e.
- Me he mea aòè he papatema
TARAMO 42 (41) 2, 5bcd ; 43 (42) 3, 4,
Io te Etua to ù hīa, io te Etua haapohuè.
A hea e koàka ia ù te haatata me te tū i te aò o te Etua ?
cf. 42,3
1 Me he mea te menē i paka i te vai pohuè,
2 Atii e ùmihi nei au ia Òe, e te Hatu, tu ù Etua e.
5 E taha au i vāveka o te haètoa nui,
No te tomo io te haè o te Etua.
Na ù e haatee ia âtou e hiti ana,
E hahi me te taaàu koakoa i te Etua.
3 A pahi mai i to Òe māàma me te tiàtohu,
Na âua e haatee i to ù tahaìa,
E aahi ia ù i ùka o to Òe tuaivi,
Tihe atu io te vahi tapu i èià e noho ai Òe.
4 E haatata au pii o te hātaapure o te Etua,
Te Etua, te tumu o to ù koakoa.
E haahuaèkaèka au me te hīmene kitā,
Ia Òe, e te Etua, tu ù Etua e.
TATAUÌA A PAURO PEÀTO I TO ROMA 6, 3b-11
E tu ù tau tuàne tuehine,
3 Ua ìte hoì ôtou u papatemaìa tātou
no te haatahi me te Kirito Ietu ;
i òto o to Īa mateìa to tātou papatema.
4 Ua tomiìa tātou kātahi me Ietu Kirito,
mēìa i te papatema te i haatahi ia tātou
me to Ietu Kirito mateìa.
No èià, me he mea ua tū hakaùa Ietu Kirito
me i vāveka o te huaa mamate ma te mana nui o te Motua,
atii e pohuè ai me tātou no te hakatu pohuè hou.
5 Me haatahi tātou me Ietu ma te mateìa kātahi me Īa,
e haatahi hoì tātou me Īa
ma te pohuè hakaùa hakātahi me Īa.
6 Ua ìte meitaì tātou i te mea nei :
u pāokapekaìa kātahi me Ietu
to mua hakatu pohuè o tātou ènana mikeo,
vāàna e haakoè te Etua i te hīa pē o te nino.
Ma èià, u te e vivini mai hakaùa ia tātou te mana o te mikeo.
7 Me mate nui hoì te ènana, ua koè to īa tāvini atu i te mikeo.
8 Me mate tātou kātahi me te Kirito,
e haatià mau tātou e pohuè hoì kātahi me Īa.
9 Ua ìte tātou i te mea nei :
ua tū hakaùa te Kirito me i vāveka o te poì mamate,
ua koè te mana o te mateìa i ùka o Īa.
Koè nui e hika hakaùa te Kirito i te mateìa.
10 Ua mate nui Ietu, ua koè te mana o te mikeo i ùka o Īa.
Ua àva to Īa mateìa no te tau tai hakatahi.
I tēnei, o to Ietu pohuè, he pohuè no te Etua.
11 Atii me i ia ôtou. A kaituto ia ôtou iho,
me he poì mamate ôtou :
ua koè te mana o te mikeo i ùka o ôtou.
Atià, he poì pohupohuè nei ôtou
no te haaèka i te Etua kātahi me Ietu Kirito.
ALLELUIA ALLELUIA
TARAMO 118 (117) 1.4, 16-17, 22-23,
1 A haahuaèkaèka i te Hatu : u matavaièi mai Īa.
Paona koè to Īa kāòha.
4 A peàu te poì pakaihi i te Hatu :
Paona koè to Īa kāòha.
16 U tuàki te ìma oko o te Hatu,
Ua mana nui te pūhāìma o te Hatu.
17 Aòè e mate havaiki, e pohuè meitaì au
No te hakaìte atu i te tau hana a te Hatu.
22 O te keâ i titiiìa e te poì hakatū haè,
O hua keâ avai noa, ua ìò he keâtaa.
23 Oiana te hana a te Hatu,
E hana mahaò haapekahi ia mātou.
No te Èhua B
EVANERIO O IETU KIRITO VĀÀNA E MAREKO 16, 1-8
1 Ma hope mai o te Tāpati, o Maria Matarena,
o Maria te kui o Iakopo, o Tarome, ua hoko mai âtou
i te mēmau kakaa no te haapaù i te nino tūpāpaù o Ietu.
2 I te pōpōuì tika nui mākehukehu, i te â to mua o te âtapu,
ua tihe âtou io he ana tūpāpaù. U pōpōuì nui.
3 U peàpeàu atu peàpeàu mai âtou :
« Na ai e huì atu i te keâ me i mua o te avaputa o te ana ? »
4 Atià, e heau aa, ua ìte âtou
ua huììa hua keâ : he keâ kaùoo.
5 Ua uu âtou i òto o te ana tūpāpaù.
Ua ìte âtou e tahi māhaì e noho aa i te kēkē ìma oko,
he kahu òa, he kahu tavaìè to īa.
U emièe âtou me te haametaù.
6 U peàu hua māhaì ia âtou : « Umoì ôtou e haametaù !
Ua ùmihi ôtou ia Ietu no Natareti te i pāokapekaìa.
Ua tū hakaùa Īa. Aòè Īa i înei.
Oia nei te vahi i tuku âtou ia Īa.
7 A tataha atu.
A peàu i to Īa tau kouâ atii me ia Petero,
enā Īa i te Henua Karirea ma mua o ôtou.
I èià, e ìte ai ôtou ia Īa,
me he mea ta Īa i peàu atu ia ôtou. »
8 Ua uu âtou i vaho
me te hiki anamai me io he ana tūpāpaù.
U emièe hoì âtou, u pūpūkina to âtou koekoe.
Aòè âtou i haki atu i te ènana e tahi,
mēìa i te nui oko o to âtou haametaù.
TE KOÌKA NUI O TE PAKATE
TATAUÌA O TE HĀMANI HANA A TE TAU ÀPOTORO
10, 34a.37-43
Io te haè o te kereturione Korenio,
34 U pohā te èo o Petero me to īa peàu pēènei à :
37 « Ua ìte ôtou i te mea i haapaoìa i te Henua Iutea vii pu,
i te Henua Karirea te tīmataìa,
ma muì o te papatema te i hakaìteìa atu e Ioane.
38 Ua ìte ôtou pēhea u haapaù te Etua ia Ietu no Natareti
me te Kuhane Meitaì me te mana.
Ua taha Ietu e hana i te hana meitaì,
u haapohuè Īa i te tau ènana paotū
te i haamōèhuìa e te tiaporo. O te Etua hoì me Ietu.
39 O mātou te tau ènana haatiàtohu i to Īa tau hana paotū
io he henua ati Iuta atii me Ierutaremi.
O hua Ietu ta âtou i haamate ma te tauèva ia Īa io he peka.
40 Atià, na te Etua e hakatū hakaùa mai ia Īa,
ma te toù o te pō me te ao no te hakaìte atu ia Īa anaiho,
41 aòè i te mataèinaa paotū,
atià i te tau ènana i vaeìa e te Etua,
o mātou à te i kai me te inu me Īa,
ma muì o to Īa Tūhakaùaìa
me i vāveka o te huaa mamate.
42 U peàu mai no te hakaìte atu i te mataèinaa
me te haatiàtohu i tēnei tekao : O Īa te i haatūìa e te Etua
no te haavā i te poì pohuè me te huaa mamate.
43 U haatiàtohu te tau peroheta paotū ia Ietu, e peàu aa :
ma to Īa ikoa, a veveteìa te tau mikeo
o te ènana i haatià ia Īa. »
TARAMO 118 (117) 1.4, 16-17, 22-23
Oia nei te â haatoitoiìa e te Hatu.
He â koìka te â o te koakoa, alleluia. cf. 118,24
1 A haahuaèkaèka i te Hatu : u matavaièi mai Īa.
Paona koè to Īa kāòha.
4 A peàu te poì pakaihi i te Hatu :
Paona koè to Īa kāòha.
16 U tuàki te ìma oko o te Hatu,
Ua mana nui te pūhāìma o te Hatu. »
17 Aòè e mate havaiki, e pohuè meitaì au,
No te hakaìte atu i te tau hana a te Hatu.
22 O te keâ i titiiìa e te poì hakatū haè,
O hua keâ avai noa, ua ìò he keâtaa.
23 Oiana te hana a te Hatu,
E hana mahaò haapekahi ia mātou.
TATAUÌA O TE HĀMANI A PAURO PEÀTO I TO KOROHA
3, 1-4
E tu ù tau tuàne tuehine,
1 Mēìa u pohuè hakaùa ôtou kātahi me te Kirito,
a ùmihi i te taetae te io he àki, i èià hoì te Kirito,
e noho aa i te ìma oko o te Etua.
2 A kōhoà anaiho i te mea te io he àki,
umoì i te mea te io he aomāàma nei.
3 Ua mate ôtou kātahi me te Kirito.
To ôtou hakatu pohuè hou, u te e hakaìteìa atu nei,
me he mea u te e hakaìteìa to te Kirito :
u hakanāìa i òto o te Etua.
4 O to ôtou hakatu pohuè hou e tahi me to te Kirito.
No èià, i te â e hakaìte te Kirito ia Īa iho,
e tū ai ôtou me Īa i òto o te kāìè Etua.
Akoè à
TATAUÌA O TO MUA HĀMANI A PAURO PEÀTO
I TO KORINETIA 5, 6b-8
E tu ù tau tuàne tuehine,
6 ua ìte ôtou i te tekao haapupuà :
A kāvohi i te maka o te mea haapupuhi me te haraoa tee,
e pupuhi te haraoa paotū.
7 A haataìtaì hoì ia ôtou ma te taki me io ôtou
i te mea haapupuhi pē, ma èià he haraoa tee hou ôtou.
Na te mea, ôtou he haraoa tee hou haapupuhi koè ìa.
U ùtunaìa hoì to tātou Pakate e te Kirito.
8 A haì tātou i te Koìka Pakate,
umoì me te mēmau haapupuhi kākiu,
haapupuhi pē, haapupuhi teka.
Atià, a haì ôtou i te koìka me te haraoa tee
o te Toitoi me te Tiàtohu,
oia hoì te haraoa haapupuhi koè ìa.
ALLELUIA ALLELUIA
1 Ko .5,7-8
U ùtunaìa hoì to tātou Pakate, te Kirito.
Oia nei te kaiìamau o te Hatu.
Mave mai. A haamaòna tātou me te koakoa.
EVANERIO A IETU KIRITO VĀÀNA E IOANE 20, 1-9
1 I te â to mua o te âtapu, i te pōpōuì tika,
hāhakateiao, ua tihe Maria Matarena io he ana tūpāpaù.
Ua ìte i te keâ, takiìa me io he ana.
2 A tahi a tohuti īa io Timone Petero
me tēia kouâ i haataetaeìa e Ietu.
U peàu ia âtou :
« U tooìa te nino o te Hatu me io he ana tūpāpaù.
Aòè mātou i ìte i hea te tukuìa. »
3 Ua hee atu Petero me tītahi kouâ
me to âua tihe io te ana tūpāpaù tiòhi.
4 U tohuti nātoa amana tokoùa âua.
Atià, ua tihe te kouâ òmua ia Petero
mēìa te koi o to īa vaevae.
5 Ua oha me to īa ìte i òto he ana
i te tapa vāhī i te nino, tukuìa ma ùka o te tohua.
Atià, aòè i uu i òto o te ana tūpāpaù.
6 Ua tihe Timone Petero ma muì o īa.
Ua uu i òto o te ana me to īa ìte,
ma ùka o te tohua, i te tapa vāhī i te nino
7 me te tapa tomi i to Ietu upoko.
Aòè i tāpapaìa hua tapa me to mua tapa te i vāhī i te nino.
U pikaoìa hoì i vahi kē.
8 A tahi a uu i òto te kouâ kē te i tihe òmua ìka.
Ua ìte īa. U haatià.
9 Aòè âua i vivini hoì i te Hāmani tapu e peàu aa :
e tū hakaùa Ietu me i vāveka o te huaa mamate.
Akoè à, i te pure meta ahiahi Pakate
EVANERIO O IETU KIRITO VĀÀNA E RUKA 24, 13-35
13 I hua â to mua o te âtapu, ua hee nā kouâ tokoùa o Ietu
io he pāpuahaè, o Emau te ikoa.
E ùa hora nehe te tahaìa vaevae me i Ierutaremi.
14 U tekatekao âua no tenā tau mea paotū i paoìa.
15 Ohia u tekao atu tekao mai âua,
u haatata mai Ietu iho me to Īa taha atu me âua.
16 E aha à u tiòhi âua ia Īa, u haakekehuìa to âua mata
oi ìte âua o Īa Ietu.
17 U peàu Ietu ia âua : « E aha te tumu
o to ôùa tekao atu tekao mai, e taha ana ? »
U hakaēa âua, u kekehu nui te mata.
18 U haahua tītahi, o Kereopata te ikoa, me te peàu ia Ietu :
« O Òe anaè i vāveka o te tau ènana e noho nei i Ierutaremi,
aòè i ìte i te tau mea i hanaìa i nā pō i pao atu nei. »
19 U peàu Ietu : « E aha òa ? »
U peàu âua : « Te tekao i ùka o Ietu no Natareti.
Ua tū Īa me he peroheta mana ma te hana, me te tekao,
i mua o te Etua me te mataèinaa paotū.
20 Pēhea i haaìòìa no te haamate nui me te pāokapeka atu,
e to mātou tau tāuà nui me te tau hakaìki.
21 O mātou à, u tetaì mātou
e haapohuè Īa i te mataèinaa Iraene.
Tōtahi atu, oia nei te toù o te pō
me i te ava i te paoìa i tēia mea.
22 Atià à, u haaemièe mai te mou vehine kē me mātou.
I te pōpōuì tika, ua hee âtou i te ana tūpāpaù.
23
Aòè i koàka ia âtou to Īa nino.
Ua hua me to âtou peàu mai : ua ìte âua i nā anera
te i peàu ia âtou u pohuè Ietu.
24 Ua hee io he ana tūpāpaù tahipito me i vāveka o mātou.
Ua ìte âtou i te mea i peàuìa e te tau vehine.
O Ietu à, aòè âtou i ìte ia Īa. »
25 U peàu Ietu ia âua : « E te poì pōtako !
E te koekoe tevee i te haatià i te mea paotū
ta te tau peroheta i peàu atu.
26 Aòè à tēia mamae e mamae ai te Kirito
no te tomo io to Īa kāìè ? »
27 U haavivini Ietu i te tekao i patuìa i ùka o Īa,
i òto o te Hāmani tapu, e tīmata aa
ma te haatuhuka i nā hāmani vāàna e Moite,
ma hope iho vāàna e te tau Perofeta hakatahi.
28 U haatata âtou me te pāpuahaè i èià to âtou tahaìa.
Ua hano Ietu e hee mamao atu.
29 Ua ūtaì âua ia Īa e peàu aa : « A noho me māua.
Ua èva te â. E kaò ai te òumati.
Ua uu Ietu no te noho me âua.
30 Ohia io he tapukai me âua,
ua too Ietu i te haraoa, u haahuaèkaèka,
ua vahi me te tuku atu ia âua.
31 U pepeùìa to âua kikomata : ua ìte âua ia Ietu.
Ua kaò anamai Ietu me i to âua aò.
32 U peàpeàu atu peàpeàu mai âua :
« Aòè à u veàveà me he ahi to tāua koekoe,
i te ava u tekao Īa me tāua ma io he vaanui ?
I te ava o to Īa haatuhuka i te Hāmani tapu ? »
33 Ua tū ponihoo âua no te hua i Ierutaremi.
U koàka mai ia âua te Tīònohuu ma tahi
putuputuìa me te huaa e noho aa me âtou.
34 U peàu âtou ia âua : « Tiàtohu nui.
Ua tū hakaùa te Hatu. U hakaìte ia Īa iho ia Petero. »
35 Ua haki atu me âua i te mea i pao ma io he vaanui,
pēhea to âua ìte ia Ietu i te ava vahiìa o te haraoa.
TOMINIKA E ÙA O TE PAKATE
TE ETUA HAKĀÒHA NUI
TATAUÌA O TE HĀMANI HANA A TE TAU ÀPOTORO
4, 32-35
32 O te nuiìa o te poì haatià, ua ìò ia âtou
te koekoe e tahi me te kuhane e tahi.
Aòè e tahi ènana i peàu
o īa anaè te Hatu o ta īa taetae.
U àvaki âtou ma te tuha atu tuha mai i te tau mēmau.
33 Ua ìi te tau Àpotoro no te haatiàtohu
i te Tūhakaùaìa o te Hatu Ietu.
Ma ùka o âtou nui te mana o te karatia.
34 Aòè e tahi ènana veve i vāveka o âtou.
O te tau ènana hatuhenua, akoè à hatuhaè,
ua ìò i te hoko atu i to âtou mēmau.
35 Ua kave mai âtou i te moni o te tau taetae pao i te hoko
me te tuku atu pii o nā vaevae o te tau Àpotoro.
U tuhaìa ai hua moni ia tītahi, ia tītahi,
vāàna i te mea e hei no īa.
TARAMO 118 (117), 1.4, 16-17, 22-23, 24-25
Paona koè to Īa kāòha ! 118,1
"
1 A haahuaèkaèka i te Hatu : u matavaièi mai Īa.
Paona koè to Īa kāòha.
4 A peàu te poì pakaihi i te Hatu :
Paona koè to Īa kāòha.
16 U tuàki te ìma oko o te Hatu,
Ua mana nui te pūhāìma o te Hatu.
17 Aòè e mate havaiki, e pohuè meitaì au
No te hakaìte atu i te tau hana o te Hatu.
22 O te keâ i titiiìa e te poì hakatū i te haè,
O hua keâ avai noa, ua ìò he keâtaa.
23 Oiana te hana a te Hatu,
E hana mahaò haapekahi ia mātou.
24 Oia nei te â haatoitoiìa e te Hatu.
He â koìka, te â o te koakoa no mātou.
25 E te Hatu e, a vaièi mai i te pohuèìa.
E te Hatu e, a vaièi mai i te tuàkiìa.
TATAUÌA O TO MUA HĀMANI A IOANE ÀPOTORO
5, 1-6
1 O te ènana i haatià o Ietu te Kirito,
u hānauìa me io te Etua.
Me kāòha te ènana i te Motua,
u kāòha hoì i ta īa tau tama.
2 Pēènei to tātou ìte u kāòha tātou i te tau tama a te Etua :
a kāòha tātou i te Etua, a aotahi atu i to Īa tekao.
3 Na te mea, o hua mea anaiho te kāòha i te Etua
me te aotahi atu i to Īa tau tekao.
Mea hana māeka te aotahi i te Tekao a te Etua,
4 na te mea u tuàkiìa to te ao nei e te tau tama a te Etua.
5 Ma te haatià, u tuàki tātou i to te ao nei.
Na ai i tuàki i te ao nei ?
O te ènana e haatià o Ietu te Tama a te Etua.
6 O hua Ietu Kirito te i tihe me te vai me te toto,
aòè me te vai anaè, atià me te vai me te toto.
O te Kuhane te i haatiàtohu ia Ietu Kirito.
O te Kuhane hoì te Tiàtohu.
ALLELUIA ALLELUIA
cf.In.20,29
U ìtemata Toma i te Hatu : u haatià.
« Mamau te tau ènana i haatià e aha à u te e ìtemata âtou ».
EVANERIO O IETU KIRITO VĀÀNA E IOANE 20, 19-31
19 I te ahiahi o hua â to mua o te âtapu,
u putuputu te huaa kouâ i òto he pāòto.
Ua pā i te avaputa na te haametaù i te poì ati Iuta.
Ua tihe anamai Ietu. Ua tū anaè Īa i vāveka ahau o âtou.
U peàu Īa : « Ia ôtou te moû ! »
20 E peàu aa i hua ponatekao, u hakaìte Ietu ia âtou
i to Īa nā îìma me to Īa kaokao.
Ua pē i te koakoa te tau kouâ,
mēìa ua ìtemata âtou i te Hatu.
21 U peàu hakaùa Ietu : « Ia ôtou te moû.
Me he mea ua pahi mai to ù Motua ia ù,
atii me to ù pahi atu ia ôtou. »
22 Ia pao hua ponatekao,
ua puhi Ietu i to Īa ao i ùka o âtou me te peàu :
« A haakoàka ia ôtou i te Kuhane Meitaì.
23 To te tau ènana mikeo e veveteìa e ôtou, u veveteìa.
To te tau ènana mikeo e tāmauìa e ôtou, u tāmauìa. »
24 O Toma, te i vavaòìa Mahaka, o Titimo ma he èo hereni,
tītahi o te tīònohuu ma tokoùa kouâ,
aòè īa me âtou i te â u hakaìte Ietu ia Īa iho.
25 U peàu tahipito kouâ ia īa : « Ua ìte mātou i te Hatu. »
U haahua atu Toma ia âtou :
« Me he mea aòè au e ìte io nā îìma o Īa
i te maki o te puhipuhi i te pāoka,
me he mea aòè au e tuu i tu ù makamakaìma
i òto o hua maki o te puhipuhi,
tu ù ìma i òto o to Īa kaokao,
aòè au e haatià. »
26 E vaù pō ma hope iho,
ua noho hakaùa te huaa kouâ io he haè.
O Toma tītahi me âtou.
Ua pāìa te avaputa. Ua tihe anamai Ietu.
Ua tū anaè Īa i vāveka ahau o âtou me te peàu :
« Ia ôtou te moû ! »
27 I muì iho, u peàu ia Toma :
« A tuku înei i to òe makamakaìma,
a tiòhi i to ù nā îìma. A haatata i to òe ìma,
a tuku i òto o to ù kaokao.
Umoì òe pūtuì. A haatià ! »
28 U hua atu Toma ia Īa me te peàu :
« E tu ù Hatu e, e tu ù Etua e. »
29 U peàu Ietu :
« U haatià òe, e Toma e, mēìa ua ìtemata ia ù.
Mamau te tau ènana i haatià
e aha à u te e ìtemata âtou. »
30 Mea nui te hana mana kē, hakatu kē
ta Ietu i hana i te aò o to Īa tau kouâ
aòè i patuìa i òto o te hāmani nei.
31 U patuìa tēia mea nei etià e haatià ôtou
o Ietu te Kirito, te Tama a te Etua.
Mēìa i to ôtou haatià, e pohuè ai ôtou ma to Īa ikoa.
TOMINIKA E TOÙ O TE PAKATE
TATAUÌA O TE HĀMANI HANA A TE TAU ÀPOTORO
3, 13-19
13 O te Etua o Aparahamo, o Itaako, o Iakopo,
te Etua o to tātou tau tupuna,
u haakāìè i to Īa tāvini Ietu
ta ôtou i haaìò me te titii i mua o Pinato.
E aha à u makimaki hua Pinato e haapohuè ia Īa,
14 u titii ôtou i te Peàto Nui, i te Toitoi Noa.
Ua ape ôtou a veveteìa te ènana mākaka kukumi i te ènana,
15 a haamate nui i te Tumu o te Pohuè.
Atià, na te Etua i hakatū hakaùa ia Īa
me i vāveka o te poì mamate. O mātou te i haatiàtohu.
17 E tu ù tau teina e, ua ìte au na te koekoe pōtako
i hana ai ôtou atii, hakatu me to ôtou tau vivini.
18 Ma èià, ua tae te Tekao a te Etua ta Īa i peàu òmua
ma te haha o te tau peroheta paotū : e mamae aè to Īa Kirito.
19 No èià, a hāìu te koekoe, a hua mai io te Etua,
etià e haakoèìa to ôtou tau mikeo.
TARAMO 4, 2, 7, 9
E te Hatu e, a pupuà to Òe mata i ùka o mātou nui ! cf.4,7
2 E te Etua e, te i haatoitoi mai.
O Òe anaè to ù vavao. A hakaòko mai.
Na Òe te haakoè i te uē òomi menava,
A hakāòha mai. A apuu i ta ù pure.
7 E ùmihi nei i te koakoa te tau ènana paotū.
E te Hatu e, a pupuà to Òe mata i ùka o mātou nui.
9 I òto o te moû, e moe au me te hiamoe,
E tetaì mau ana i to Òe kāòha, e te Hatu e.
TATAUÌA O TO MUA HĀMANI A IOANE PEÀTO 2, 1-5
2,1 E tu ù tau tama e, ua patu au i tēnei tekao ia ôtou
etià u te e hava ôtou i te mikeo.
Atià, me hava tītahi i te mikeo,
enā to tātou vavao io te Motua,
2 o Ietu Kirito, te Toitoi noa.
O Īa te hēaka ùtunaìa
no te haakoè i te umu o to tātou mikeo.
Aòè to tātou mikeo anaiho,
atii me te tau mikeo o te ènana ia ôtoa o te aomāàma.
3 Ma te tiàtohu, u haapii tātou me te Etua,
me aotahi tātou i to te Etua tekao.
4 Ia peàu te ènana ua ìte īa i te Etua,
atià u pūtuì i to Īa tekao, he ènana tīvava hua ènana,
aòè i noho te tekao tiàtohu i òto o īa.
5 Me aotahi te ènana i te Tekao a te Etua,
u toitoi noa to īa kāòha i te Etua.
Pēènei te ìte ua noho tātou i òto o te Etua.
ALLELUIA ALLELUIA
U hakaìte te Hatu Ietu Kirito ia Īa iho i to Īa tau Àpotoro
me te peàu atu : « Ia ôtou te moû ! »
EVANERIO O IETU KIRITO VĀÀNA E RUKA 24, 35-48
I tēia mou pō,
35 ua haki atu nā kouâ tokoùa e hee aa i Emau,
i te mea i pao ma io he vaanui.
Pēhea to âua ìte ia Ietu i te ava vahiìa o te haraoa.
E tekao aa âua i hua tekao,
ua tū anamai Ietu i vāveka ahau o âtou me to Īa peàu :
« Ia ôtou te moû ! »
37 Ua hemo âtou i te haametaù, u pūpūkina âtou.
U kaituto hoì e ìte âtou i te vehinehae.
38 U peàu Ietu ia âtou : « U pūpūkina ôtou no te aha ?
Umaha tēnei kaituto io he koekoe ?
39 A tiòhi ôtou i to ù mou îìma me nā vaevae : o au nei.
A maohi ôtou ia ù nei, a tiòhi mau.
He hakatu kē to te vehinehae.
Aòè o īa kiko. Aòè o īa ivi,
me he mea ua ìte ôtou me to ù nei. »
40 E peàu aa i hua tekao,
u hakaìte atu Ietu i to Īa mou îìma me nā vaevae.
41 Ohia u haatià koè âtou mēìa i te koakoa me te mahaò,
u peàu Ietu ia âtou : « Enā te mea kai ta ôtou înei ? »
42 Ua tuku atu âtou ia Īa i te poo ika nunu pātaka.
43 Ua too i te ika me to Īa kai, e tiòhi aa âtou.
44 I muì iho, u peàu Ietu ia âtou pēènei :
« Oia nei te tekao ta ù i peàu ia ôtou,
e noho ana au me ôtou.
E haapao ònaòna ìa te tau mea paotū
te i patuìa i ùka o au nei i òto o te Ture a Moite,
i òto o te hāmani a te tau Peroheta me te hāmani Taramo. »
45 A tahi a haamāàma Ietu i to âtou koekoe
etià e vivini âtou i te Hāmani tapu.
46 U peàu ia âtou : « Ua patuìa :
e mamae ai te Kirito ; ma te toù o te pō,
e tū hakaùa Īa me i vāveka o te huaa mamate.
47 Ma to Īa ikoa, e hakaìteìa atu
te hāìuìa o te koekoe no te haakoè i te mikeo
i te tau mataèinaa paotū, atià to mua i Ierutaremi.
O ôtou te tau ènana e haatiàtohu i hua tekao.
TOMINIKA E HĀ O TE PAKATE
TATAUÌA O TE HĀMANI O TE HANA A TE TAU ÀPOTORO
4, 8-12
8 Pī i te Kuhane Meitaì, u peàu Petero :
« E te tau hakaìki me te tau kōkooūa,
9 i tēnei â, u haavāìa māua mēìa i ta māua hana meitaì
i uē i te ènana takapii. Ua ape mai ôtou
no te hakaìte atu pēhea te haapohuèìa i hua ènana.
10 A ìte ôtou paotū atii me to Iraene mataèinaa ia ôtoa :
Ma te ikoa o Ietu Kirito no Natareti,
te i pāokapekaìa e ôtou,
te i hakatū hakaùa ìa e te Etua,
ma hua ikoa, i maô ai me te meitaì te ènana nei i mua o ôtou.
11 O Ietu te keâ i titiiìa e ôtou, te tau ènana hana hakatū i te haè.
Ua ìò Īa he keâtaa.
12 I òto o Ietu anaè te pohuè.
Aòè tītahi ikoa kē ma àò o te àki,
i vāveka o te tau ikoa i apaìa e te tau ènana,
te i haapohuè ia tātou. »
TARAMO 118 (117), 1.4, 8-9, 22-23, 28-29
O te keâ i titiiìa e te poì hakatū i te haè,
O hua keâ avai noa, ua ìò he keâtaa. 118,22
1 A haahuaèkaèka i te Hatu : u matavaièi mai Īa.
Paona koè to Īa kāòha.
4 A peàu te poì pakaihi i te Hatu :
Paona koè to Īa kāòha.
8 U meitaì no te ènana te haatià i te Hatu,
Aua e haatià te ènana i to īa tau hoa.
9 A haatià tātou i to te Hatu tokoìa mai.
Umoì e haatià tātou e toko mai te poì mana.
22 O te keâ i titiiìa e te poì hakatū i te haè,
O hua keâ avai noa, ua ìò he keâtaa.
23 Oiana te hana a te Hatu,
E hana mahaò haapekahi ia mātou.
28 O Òe to ù Etua, u haahuaèkaèka au ia Òe.
E tu ù Etua e, u haatiketike au ia Òe.
29 A haahuaèkaèka i te Hatu. U matavaièi Īa.
Paona koè to Īa kāòha.
TATAUÌA O TO MUA HĀMANI A IOANE ÀPOTORO
3, 1-2
E tu ù tau tama tāhia e,
1 A kaituto me te mahaò i te nuiìa
o to te Etua kāòha ia tātou.
Ua ao Īa e apaìa tātou he tau tama no Īa.
Ua ìò hoì tātou he tau tama tiàtohu no Īa.
Oia te piò aòè to te ao nei e apuu ia tātou.
Pēhea te koàka ? Aòè īa i ìte i te Etua.
2 E tu ù tau hoa tāhia e, i tēnei, he tama tātou a te Etua.
E aha to tātou hakatu ma tītahi â ?
U te e ìte meitaì tātou.
E tahi mea tiàtohu anaiho :
i te ava e hakaìte Ietu Kirito ia Īa iho,
e ìò tātou hakatu me Īa,
na te mea, he mata he mata, e ìte ai tātou ia Īa.
ALLELUIA ALLELUIA
cf. In.10,14-15
Ua ìte Ietu, te Tiaki Meitaì, i to Īa tau mutō.
Ua ìte to Īa tau mutō ia Īa :
No âtou, u haaìò Īa i to Īa pohuè.
EVANERIO O IETU KIRITO VĀÀNA E IOANE 10, 11-18
I tēia mou pō, u peàu Ietu :
11 O au te Tiaki meitaì. E haaìò te Tiaki meitaì
i to īa iho pohuè i uē i to īa tau mutō.
12 Me hana te ènana no te moni,
aòè no īa te tau mutō, aòè īa to âtou tiaki.
Ia tihe te rupo, ua rere veve īa, e avai aa i te tau mutō.
Ua hao te rupo i te tau mutō me te haahikitararā ia âtou.
13 U te e haataetae hua ènana i te tau mutō,
ua hana īa no te moni anaiho.
14 O au te Tiaki meitaì.
Me he mea ua ìte to ù Motua ia ù me to ù ìte i to ù Motua,
15 ua ìte au i to ù tau mutō, ua ìte âtou ia ù.
E haaìò au i to ù pohuè i uē i tu ù tau mutō.
16 Enā me tu ù tau mutō kē.
Aòè âtou i òto o tēnei pāpua. E haatee au me ia âtou.
E hakaòko âtou i to ù èo.
E ìò ai te naho e tahi anaè, te tiaki mutō e tahi anaè.
17 U haataetae te Motua ia ù na te mea
e haaìò au i to ù pohuè no te too hakaùa i hua pohuè.
18 Aòè te ènana e tahi e haamate ia ù.
Na ù ta ù anaiho te haaìò i to ù pohuè.
E mana to ù e haaìò i to ù pohuè
me te too hakaùa ia īa.
Oia nei te tekao i peàuìa mai e to ù Motua. »
TOMINIKA E ÌMA O TE PAKATE
TATAUÌA O TE HĀMANI HANA A TE TAU ÀPOTORO
9, 26-31
26 I te ava ua tihe Tauro i Ierutaremi,
ua hano īa e haapii me te tau kouâ.
Atià, u haametaù âtou paotū ia īa.
Aòè âtou i haatià o īa tītahi kouâ.
27 Ua too hoì Paranape ia Tauro me īa
me to īa aahi atu io te tau Àpotoro.
U peàu Paranape pēhea ua ìte Tauro i te Hatu
te i tekao atu me īa ma io he vaanui,
ma hope iho, pēhea u hakaìte atu Tauro, haametaù koè,
i te ikoa o Ietu i Tamati.
28 Me i tēnei ava, i Ierutaremi, ua hee atu,
ua hee mai Tauro me te tau kouâ
e haki atu aa me te koekoe oko i te ikoa o te Hatu.
29 U tekatekao īa me te tau ati Iuta me io te Henua Hereni
me to īa tōtohe me âtou.
Oia te piò ua hano âtou e kukumi haamate ia īa.
30 Ia òko te tau tuàne tuehine i hua hana pē,
u aahi âtou ia Tauro i Ketarea ;
me i èià, ua pahi âtou ia īa i Tarate.
31 I te Henua Iutea ia ôtoa me te Henua Tamaria,
ua noho te Èkaretia me te moû.
U haanui aè me he mea a te haè hou i haatūìa.
Paotū te â, u pakaihi te Èkaretia i te Hatu.
Ua neke i te henua vii pu, pī i te koakoa o te Kuhane Meitaì.
TARAMO 22 (21) 26-27b, 28-29, 31-32
E hahi mātou ia Òe, e te Etua e, i òto o te motuhaka.
cf. .22,26
26 E hahi au ia Òe i mua o te motuhaka.
E hana au vāàna i to ù peàu atu ia Òe,
I mua o te tau ènana e pakaihi ia Òe.
27 E kai te poì veve, e maòna âtou.
E hahi i te Hatu te poì e ùmihi nei ia Īa :
28 E haamaakau te henua kōtoa me te hua mai io te Hatu.
E moe haatona te tau mataèinaa i mua o Īa.
29 O te Hatu te vivini o te aomāàma, o Īa te Hakaìki nui.
31 E pohuè au no te Hatu : e tāvini to ù ati ia Īa.
E haamevahaìa te òko o te Hatu
I te tau tai ènana i ùka aè.
32 E hakiìa to Īa toitoi i te tai ènana i ùka aè.
Oia hoì te hana mahaò o te Etua.
TATAUÌA O TO MUA HĀMANI A IOANE ÀPOTORO
3, 18-24
18 E tu ù tau tama e,
umoì tātou e kāòha ma te haha anaè,
a haatiàtohu i to tātou kāòha
ma to tātou hana me te hakatu pohuè.
19 Ma èià, ua ìteìa ua kē tātou me te Etua te i hakahae koè.
U haaēa tātou i te menava i te aò o te Etua,
e aha à u hakatio te koekoe ia tātou iho.
20 E iti noa hoì to tātou koekoe, u tiketike atu to te Etua.
Ua ìte te Etua i te tau mea ia ôtoa.
21 E tu ù tau hoa tāhia e,
me hakatio koè to tātou koekoe ia tātou iho,
a noho tātou me te moû i mua o te Etua.
22 E vaièi mai Īa i te mea paotū ta tātou e ape me io Īa,
na te mea, u aotahi tātou i to Īa tekao,
ua hana tātou i te hana haaèka ia Īa.
23 Pēènei hoì te Tekao a te Etua :
A haatià tātou ia Ietu Kirito, ta Īa Tama,
a kāòha te hoa i te hoa, vāàna i to Īa makimaki hakaìteìa mai.
24 O te ènana i aotahi i te Tekao a te Etua,
ua noho īa i òto o te Etua, ua noho te Etua i òto o īa.
Ua ìte tātou i te mea ua noho te Etua i òto o tātou
na te Kuhane Meitaì te i vaièiìa mai.
ALLELUIA ALLELUIA
cf. Ta.1,3
Mamau te ènana haatià i te Etua.
Me he tumuâkau i nanuìa pii he vaitahe.
I te ava e hei, e hua i te nuiìa o te puku.
EVANERIO O IETU KIRITO VĀÀNA E IOANE 15, 1-8
I tēia mou pō, u peàu Ietu i to Īa tau kouâ :
1 « O au te tumuvino tiàtohu.
O tu ù Motua, o Īa te ènana taùnanu.
2 E kokoti Īa i te makamaka te i koè e hua i te puku.
E auà Īa i te makamaka te i hua i te puku
etià e nui aè te tau kāhui.
3 U auàìa ôtou na te tekao ta ù i hakako ia ôtou.
4 A noho ôtou i òto o au nei, e noho au i òto o ôtou.
Aòè e koàka i te makamaka e hua i te puku na īa anaè.
Ia takiìa te makamaka me io te tumuvino,
aòè e hua i te puku.
Atii tēnei : aòè he mea e koàka ia ôtou
me paekē ôtou me io ù.
5 O au te tumuvino, o ôtou te tau makamaka.
O te ènana te i noho i òto o au, e noho au i òto o īa,
e hua īa i te nuiìa o te puku.
Ia kaò au, aòè he mea e koàka ia ôtou.
6 Me paekē tītahi me io ù,
e titiiìa me he makamaka avai noa te i pororō ai.
Ua kohiìa te tau makamaka pororō no te tutu me te ahi.
7 Me noho ôtou i òto o au,
e noho tu ù tekao i òto o ôtou.
A tahi a ape mai i te mea ia ôtoa ta ôtou i makimaki :
e ìò ia ôtou.
8 E haakāìèìa tu ù Motua ma te nuiìa o to ôtou puku.
Ma èià, e ìò ôtou he tau kouâ no ù. »
TOMINIKA E ONO O TE PAKATE
TATAUÌA O TE HĀMANI HANA A TE TAU ÀPOTORO
10, 25-27.34-35.44-48
I tēia mou pō, ua tihe Petero i Ketare
io te keneturione Korenio.
25 Ia uu Petero io he haè, ua taha Korenio io īa
me te moe haatona pii o to īa vaevae.
26 Atià, ua toko Petero ia Korenio no te haamaô,
e peàu aa : « A tū òe ! He ènana anaiho me au nei. »
34 U pohā te èo o Petero me to īa peàu pēènei à :
« Tiàtohu nui, u apuu te Etua i te tau ènana kōtoa,
e aha à hakatu kē, hakatu kē âtou.
35 I tēia henua, i tēia henua, u haaèka te ènana i te Etua
ma te pakaihi ia Īa, me te hana i te hana toitoi.
44 E tekao aa Petero, ua iho te Kuhane Meitaì
i ùka o te tau ènana e hakaòko nei i te Tekao.
45 Ua pē i te mahaò te poì haatià,
he tau ati Iuta âtou te i tihe mai me Petero,
Ua ìtemata hoì âtou i te mea ua neke
te vaièiìa o te Kuhane Meitaì i ùka o te tau êteni.
46 Ua òko âtou i hua tau ènana e tekao aa
ma he èo kē, èo kē no te hahi i te Etua.
47 U pohā hakaùa te èo o Petero me to īa peàu :
« Aha, aòè e ao tītahi e papatemaìa te tau ènana
te i koàka mai i te Kuhane Meitaì hakatu me mātou ? »
48 U peàu Petero no te papatema ia âtou ma te ikoa o Ietu.
I muì iho, ua ape te tau kouâ ia Petero
no te noho mou pō me âtou.
TARAMO 98 (97), 1, 2-3aab, 3c-4a.6b
U hakaìte te Etua i to Īa ìi nui i te tau mataèinaa ia ôtoa.
98,2
1 A hīmene i te Hatu i te hīmene hou.
U mahaò hoì to Īa tau hana.
U tuàki Īa i te mea haapākeka,
Na te mana o to Īa ìma peàto nui.
2 U hakaìte te Hatu i to Īa tuàkiìa,
U haapupuà i to Īa toitoi i mua o te poì êteni.
3 U haamaakau te Hatu i to Īa kāòha hakahae koè
I uē i te ati o Iraene, to Īa mataèinaa.
Ua ìte te henua vii pu i to te Etua tuàkiìa.
4 A hahi i te Hatu, e te henua vii pu,
A hīmene, a haka, a haakoìka.
6 A òkoìa te kitā, te pū hakahau, te pūtoka.
A vānana i te Hatu, to ôtou Hakaìki.
TATAUÌA O TO MUA HĀMANI A IOANE ÀPOTORO
4, 7-10
7 Tu ù tau hoa tāhia e,
a kāòha atu kāòha mai te hoa i te hoa,
na te mea, me io te Etua te kāòha.
Te ènana i kāòha i te hoa,
he tama īa o te Etua, ua ìte īa i te Etua.
8 Me kāòha koè te ènana, aòè hua ènana i ìte i te Etua.
He kāòha hoì te Etua.
9 U hakaìte te Etua i to Īa kāòha ia tātou
ma te pōpahi i ta Īa Tama tootahi io te ao nei,
etià e pohuè tātou ma io Īa.
10 Oia nei te kāòha tiàtohu :
« Aòè tātou te i kāòha i te Etua,
o te Etua te i kāòha ia tātou òmua ìka
ma te pahi mai i ta Īa Tama,
e hēaka ùtunaìa mea haakoè i te umu o to tātou mikeo. »
ALLELUIA ALLELUIA
cf.In.13,34
U hakaìte mai te Hatu ia tātou i te tekao
aòè i peàuìa òmua atu nei :
« A kāòha atu kāòha mai te hoa i te hoa,
me he mea u kāòha au ia ôtou. »
EVANERIO O IETU KIRITO VĀÀNA E IOANE 15, 9-17
I tēia mou pō, u peàu Ietu i to Īa tau kouâ :
9 « Me he mea u kāòha tu ù Motua ia ù,
atii u kāòha me au ia ôtou.
Umoì e paekē ôtou me io tu ù kāòha.
10 Me aotahi ôtou i tu ù tau tekao,
e noho ôtou i òto o tu ù kāòha ;
me he mea u aotahi au i to tu ù Motua makimaki,
ma èià, ua noho au i òto o to Īa kāòha.
11 U peàu au ia ôtou i hua tekao,
etià e àva atu ôtou i to ù iho koakoa,
e pī nui ôtou i te koakoa.
12 Oia nei tu ù tekao : a kāòha te hoa i te hoa,
me he mea u kāòha au ia ôtou.
13 U hakaìte te ènana i te nuiìa o to īa kāòha
ma te tuku i to īa iho pohuè i uē i to īa tau hoa.
14 E hoa ôtou no ù, ia aotahi ôtou i ta ù tau tekao.
15 U te e apa au ia ôtou te ikoa tueni,
na te mea aòè e ìte te tueni i te maakau o to īa vivini.
Ua apa au ia ôtou e hoa pii me au,
u hakaìte hoì au ia ôtou i te mea paotū
ta tu ù Motua i peàu mai.
16 Aòè na ôtou i vae mai ia ù, na ù i vae ia ôtou,
me te tāpae ia ôtou etià e hee ôtou,
e haanui i ta ôtou tau hana meitaì.
E ìò hua hana meitaì me he puku te i noho mau.
17 A tahi a vaièi tu ù Motua ia ôtou
i te mea paotū ta ôtou e ape io Īa ma tu ù ikoa.
Oia nei hoì tu ù tekao ia ôtou :
A kāòha te hoa i te hoa ! »
TE KOÌKA O TE FITINA O IETU IO HE ÀKI
TATAUÌA O TE HĀMANI HANA A TE TAU ÀPOTORO
1, 1-11
1 E Teofiro e, i òto o to mua hāmani ta ù i patu,
u hakaìte atu au i te tau mea paotū ta Ietu i hana,
ta Īa i hakako me i te tīmataìa
tihe atu i te â o to Īa hitiìa io he àki.
2 Òmua, ma te Kuhane Meitaì,
u haamāàma Īa i te tau Àpotoro ta Īa i vae.
3 Ma te òa e hā ònohuu â ma muì o to Īa mamae,
i hua tau Àpotoro, u hakaìte Ietu ia Īa iho e pohuè aa.
U haatiàtohu i to Īa pohuèìa
ma te nuiìa o te hakatu kē.
U tekao Īa me âtou i ùka o te Patirēia o te Etua.
4 I tītahi â, e tekao aa Ietu me to Īa tau Àpotoro,
u peàu ia âtou umoì e titii ia Ierutaremi,
atià e tetaì i èià i te mea i peàuìa e te Motua.
5 U peàu atu Īa pēènei : « Me io to ù haha,
ua òko ôtou u papatema Ioane me te vai.
Atià, ua poto te ava i toe,
a tahi a papatemaìa ôtou i òto o te Kuhane Meitaì. »
6 O âtou à, u haaputuputuìa me Ietu, ua ūiūi atu pēènei :
« E te Hatu e, aha oia nei te ava
o to òe haahou hakaùa i te hakaìkiìa o Iraene ? »
7 U haahua atu Ietu : « Aòè ôtou e ìte i te ava
me i te â ta te Motua i haatoitoi
vāàna i to Īa makimaki anaiho.
8 Atià, e iho mai te Kuhane Meitaì i ùka o ôtou ;
me io Īa, e koàka ia ôtou te ìi no te haatiàtohu ia ù,
i Ierutaremi, i te Henua Tamaria,
tihe atu i te kotina paoìa o te aomāàma vii pu. »
9 Ia pao hua ponatekao, e tiòhi aa te tau Àpotoro,
ua hiti Ietu i te ataàki. Ua kaò Īa i òto o te kohu.
10 Ohia i te ava ua paekē Ietu, e maô aa âtou
me te tiòhi i te ataàki, u haatata mai nā ènana tokoùa,
uhiìa me te kahu tavaìè, te i peàu :
11 « E te poì no Karirea,
umaha i noho ai ôtou i înei, e tiòhi ana i te ataàki ?
O tēnei Ietu te i hiti me i vāveka o ôtou,
e tihe hakaùa mai Īa me hua hakatu
ta ôtou i ìte ia Īa e hiti aa io he àki. »
TARAMO 47 (46) 2-3, 6-7, 8-9
Ua hiti te Etua i vāveka o te hīmene hahi.
Ua hiti te Hatu e taki ana te pū. 47,6
2 E te tau mataèinaa paotū, a papaki i te îìma,
A hahi i te Etua ma to ôtou taaàu koakoa.
3 O te Hatu te Tiketike nui : ia Īa te kāìè.
O Īa te Hakaìki nui o te henua ia ôtoa.
6 Ua hiti te Etua i vāveka o te hīmene hahi.
Ua hiti te Hatu e taki aa te pū.
7 A haataki i te pū no to tātou Etua.
A ùtu i te pahu no te hahi i te Hakaìki.
8 O te Etua te Hakaìki nui o te aomāàma.
A hakaìte atu ôtou e te tau hīmene.
9 U vivini te Etua i te tau mataèinaa êteni.
Ua tū te Etua i ùka o to Īa nohoka kāìè.
TATAUÌA O TE HĀMANI A PAURO PEÀTO I TO EFETIA
4, 1-13
E tu ù tau tuàne tuehine.
1 O au nei o Pauro, io he haèhumu, mēìa u tāvini au i te Hatu.
U toutaki au ia ôtou no te pohuè
vāàna i to te Etua makimaki te i vavaò ia ôtou.
2 A haapāpaku ôtou, a moû te koekoe, a tohe mau paòpaò koè.
A kāòha atu kāòha mai ma te apuu te hoa i te hoa.
3 A hano ôtou e haatahi i òto o te Kuhane Meitaì
te i haatūtaì ia ôtou i òto o te moû.
4 Enā e tahi nino anaè, e tahi Kuhane anaè,
me he mea u vavaò te Etua ia ôtou paotū
no te tetaììa e tahi anaè.
5 E tahi Hatu anaè, e tahi haatià anaè, e tahi papatema anaè,
6 e tahi Etua me te Motua anaè no te tau ènana kōtoa.
O Īa te Hatu no tātou paotū
te i hana me tātou paotū, te i noho i òto o tātou paotū.
7 Atià, ua tuhaìa te karatia kē ia tātou tikitahi,
vāàna ta te Kirito i vaièi mai :
karatia kē to tītahi, karatia kē to tītahi.
8 U patutia hoì pēènei : « E hiti aa i ùka nui,
ua toi Īa i te poì mōèhu ;
ua tuha Īa i te tau taetae i te tau ènana. »
9 U peàu te Hāmani tapu : « Ua hiti Īa. »
E aha te hakatu o hua ponatekao : ua hiti Īa ?
E haamaakau hoì i te mea ua iho te Kirito òmua i Havaiki.
10 O te i iho òmua, o Īa anaiho te i hiti i ùka nui o te àki
no te tāpapa i te tau mea ia ôtoa io te aomāàma vii pu.
11 O Īa te i tuha i te taetae :
u vaièi mai i tahipito te hana àpotoro,
i tahipito te hana peroheta,
i tahipito te hana keèe o te Evanerio,
akoè à te vivini me te hakako i te poì haatià.
12 U haahei Īa i te hana tāvini i te mataèinaa o te Etua,
etià e tū mau te nino o te Kirito, te Èkaretia.
13 Ma èià, e haatūtaììa tātou paotū
i òto o te haatià me te ìte māàma o te Tama a te Etua,
etià e ìò tātou hakatu me te ènana ànamotua,
me he mea e hei no te poì i haakē me te Kirito.
ALLELUIA ALLELUIA
cf. Ta.47,6.10
Ua hiti te Hatu i vāveka o te hīmene hahi.
Ua hiti te Hatu i ùka nui o te àki.
EVANERIO O IETU KIRITO VĀÀNA E MAREKO 16, 15-20
I tēia mou pō, u peàu Ietu i te Tīònohuu ma tahi kouâ :
15 « A tataha atu ôtou ma he aomāàma vii pu.
A hakaìte i te Tekao Meitaì Hou Mai
i te tau mēmau pēpenaìa paotū.
16 Te ènana e haatià me te koàka mai ia īa te papatema,
e haapohuèìa hua ènana.
Te ènana haatià koè, e hakatioìa hua ènana.
17 Oia nei te tau hana mahaò e hanaìa e te poì haatià.
Ma to ù ikoa, e tute âtou i te tiaporo,
e tekao âtou ma he tau èo kē, èo kē,
18 e too âtou me te îìma i te puhi henua,
ia inu âtou i te mea tekeo, aòè e hemo i te mate,
e hapai âtou i te îìma i ùka o te poì hōpī :
e haameitaììa hua poì.
19 Ohia ua pao to Īa tekao ia âtou,
ua hiti te Hatu Ietu io he àki.
I èià to Īa noho i te ìma oko o te Etua.
20 O âtou à, u tataha atu ma te tau henua ia ôtoa.
U hakaìte âtou i te Tekao Meitaì Hou Mai.
Ua toko te Hatu ia âtou, e haatiàtohu aa i te Tekao
ma te tau hana mahaò i peàuìa.
TOMINIKA E HITU O TE PAKATE
TATAUÌA O TE HĀMANI HANA A TE TAU ÀPOTORO
1, 15-17.20a-26
15 I tēia mou pō, ua tū Petero i vāveka ahau
o to īa tau tuàne tuehine, hānere me te tekau oti âtou.
U peàu īa pēènei :
16 « U haapaoìa te mea i patuìa i òto o te Hāmani tapu,
oia hoì ta te Kuhane Meitaì i peàu ma te haha o Tavite,
i ùka o Iuta te i haatee i te poì i haahumu ia Ietu.
17 O Iuta tītahi me i vāveka o tātou.
Ua àva atu īa i to tātou hana tāvini i te Etua.
20 U patuìa i òto o te hāmani Taramo :
« E ìò to Īa pāpua me he henua viviiō.
Umoì e noho e tahi ènana i òto. »
Atii hakaùa : « A amo tītahi i to īa hana tumu ! »
21 I tēnei, a tū tītahi me tātou no te haatiàtohu
i te Tūhakaùaìa o Ietu.
22 A vae tātou ia īa me i vāveka o te tau ènana
te i kē mai me tātou ma te òa o te ava
ua noho Ietu me tātou : me i te papatemaìa a Ioane
tihe atu i te â ua takiìa Īa me i vāveka o tātou. »
23 Ua tuhi âtou i nā ènana tokoùa :
o Ioteve peàuìa te Toitoi tītahi, o Matia tītahi.
24 I muì iho, ua pure âtou pēènei : « E te Hatu e,
ua ìte Òe i te koekoe o te tau ènana paotū.
A hakaìte mai o ai io nā ènana tokoùa nei ta òe e vae
25 no te amo i te hana àpotoro ta Iuta i titii,
i te â ua hee īa i to īa kōava. »
26 U haakai âtou ia âua. O Matia te ènana i vaeìa.
U haatahi īa me te tau Àpotoro Tīònohuu ma tahi.
TARAMO 103 (102) 1-2, 11-12, 19.22
Te kāìè ia Òe, e te Hatu e noho nei i te ìma oko o te Motua.
1 E tu ù kuhane, a haameitaì i te Hatu,
Me io he koekoe, a haameitaì i to Īa ikoa peàto.
2 A haameitaì i te Hatu, e tu ù kuhane,
Aua e māhaè e tahi o to Īa vaièiìa.
11 Me he tiketike o te àki ma ùka o te henua,
Ua mana to te Hatu kāòha i uē i te poì haatià.
12 Me he mamao o to te òumati tiheìa me i to īa kaòìa,
U tioà te Etua i te mikeo mamao me io tātou.
19 I ùka nui o te àki te nohoka o te Hatu.
O Īa te Hakaìki o te aomāàma vii pu.
22 A haameitaì i te Hatu te tau mēmau paotū ta Īa i pēpena,
Ôtou te i noho nei io te tau vahi paotū o to Īa ao.
A haameitaì i te Hatu, e tu ù kuhane.
TATAUÌA O TO MUA HĀMANI A IOANE ÀPOTORO
4, 11-16
11 E tu ù tau hoa tāhia e,
e pēhea atii te nui o to te Etua kāòha ia tātou,
a kāòha hoì te hoa i te hoa.
12 Aòè e tahi ènana i ìtemata i te Etua.
Me kāòha te hoa i te hoa,
ua noho te Etua i òto o tātou ;
u meitaì oko to tātou kāòha i te Etua.
13 Ua ìte tātou ua noho te Etua i òto o tātou,
ua noho tātou i òto o te Etua,
na te mea u vaièi mai te Etua ia tātou i to Īa Kuhane.
14 O tātou â, ua ìte tātou me to tātou haatiàtohu
i te mea u pōpahi te Motua i ta Īa Tama
no te haapohuè i te tau ènana.
15 Te ènana e haki o Ietu te Tama a te Etua,
ua noho te Etua i òto o īa me to īa noho i òto o te Etua.
16 O tātou â, ua ìte i te mea u kāòha te Etua ia tātou.
U haatià tātou i hua tekao.
He kāòha te Etua.
Te ènana i kāòha me te tohe mau i te kāòha,
ua noho hua ènana i òto o te Etua,
ua noho te Etua i òto o īa.
ALLELUIA ALLELUIA
cf.In.14,18
Aòè e avai te Hatu ia ôtou
me he tau tama motua koè, kui koè.
E hua hakaùa mai Īa io ôtou.
A tahi a pī ai to ôtou koekoe i te koakoa.
EVANERIO O IETU KIRITO VĀÀNA E IOANE 17, 11-19
I tēia mou pō, ua heau Ietu io he àki
me te pure e peàu aa :
11 « E te Motua peàto e, a tiaki i to ù tau kouâ
etià e haatià mau âtou i te ikoa ta Òe i apa mai.
Ma èià, e haatahi âtou me he mea to tāua haatahiìa.
12 I te ava ua noho au me âtou, u tiaki au ia âtou
etià e haatià âtou i te ikoa ta Òe i apa mai.
U tiòhi meitaì au i te huaa ta Òe i tuku mai :
aòè e tahi i kaò ai.
Te ènana i hika, o īa anaiho te i kaò.
Ma èià, u haatiàtohuìa te tekao o te Hāmani tapu.
13 I tēnei, e tihe au io Òe.
U peàu hoì au i tēnei tekao, oi noho i te ao nei,
etià e àva âtou i to ù iho koakoa, e pī âtou i te koakoa.
14 U hakako au ia âtou i ta Òe tekao.
Oia te piò u haahaa to te ao nei ia âtou.
Ua paekē hoì âtou me io te ao nei
me he mea ua paekē au me io te ao nei.
15 U te e ape au ia Òe no te taki ia âtou me i te ao nei,
ua ape anaè au : a pāpua ia âtou me i te ìno.
16 Aòè âtou me io te ao nei, atii anaiho me au :
aòè au me io te ao nei.
17 A haapeàto Òe ia âtou vāàna i te Tiàtohu.
O ta Òe tekao te Tiàtohu.
18 Me he mea ta Òe i pahi mai ia ù i te aomāàma nei,
atii ta ù pahi atu ia âtou i te aomāàma nei.
19 U ùtuna hēaka au ia ù iho i uē ia âtou
etià e aotahi mau âtou ia Òe vāàna i te Tiàtohu. »
PŌ E ONO O TE KOÌKA PENETEKOTE
A vae mai e tahi me io tēnei e hā tatauìa
1.- TATAUÌA O TE HĀMANI A MOITE PEÀUÌA TENETE
11, 1-9
1 I te henua vii pu, u haahitipona te tau ènana paotū
i te èo e tahi me te tau ponatekao hua mea anaiho.
2 E titii aa te tau ènana
i te henua kēkē tiheìa o te òumati, ua taha atu âtou
io he Henua Metopotamia, akoè à io he Henua Hineare ;
ua noho âtou io he kaavai tapavaù. I èià to âtou noho.
3 U peàpeàu âtou pēènei :
« A pau ! A kānea tātou i te èpo kaaea taoìa. »
Hua èpo taoìa, me he keâ keetū no âtou.
Te korotā keekee to âtou himā no te haapipii i te tau keetū.
4 U peàpeàu te tau ènana pēènei : « A pau !
A hakatū tātou i te pāpuahaè me te mōuka i vāveka ahau.
A haatiketike tihe io te ataàki i te kapua o te mōuka.
A haaoko nui i to tātou ikoa,
etià aòè e haatavavāìa tātou i te tau henua kē vii pu. »
5 Ua iho mai te Hatu Etua no te tiòhi i te pāpuahaè,
io te mōuka tiketike haatūìa e te tau ènana.
6 U peàu te Hatu Etua : « He mataèinaa e tahi anaiho âtou nui.
E tahi èo anaè to âtou. Oia nei te tīmataìa.
E aha te mea e haapākeka i to âtou tau hīa kē ?
7 Epō. A haahiiveke mātou i to âtou èo
umoì e vivini te ènana hana i te ènana hana. »
8 Ma èià, u haatavavā te Hatu Etua i te tau ènana
io te tau henua kē vii pu.
U hakaēa âtou i te hana hakatū i te pāpuahaè.
9 Oia te piò ua apaìa te ikoa o hua pāpuahaè o Papere.
O Hikitararā ma he èo ènana.
I èià hoì, u haahiiveke te Hatu Etua i te èo o te tau ènana.
Ma èià, u tavavā te tau ènana ma he tau henua kē, henua kē.
2.- TATAUÌA O TE HĀMANI A MOITE PEÀUÌA EHOTO
19, 3-8.16-20
Ua pao e toù meàma me i to âtou uuìa
i vaho o te Henua Ekipito,
ua tihe te tau tama Iraene io te tumu o te tuaivi Tinai.
3 O Moite à, ua hiti i ùka o te tuaivi no te haatutuki me te Etua.
Me i ùka o te tuaivi, u vavaò te Etua ia Moite pēènei :
« Oia nei tu ù tekao i te ati o Iakopo,
ta òe e kave atu io te tau tama Iraene.
4 Ua ìte ôtou pēhea u haahika au i te poì Ekipito.
U aahi au ia ôtou înei, me he mea te manu akuira
te i tautua i to īa tau kiokio ma ùka o to īa pekeheu.
Na ù i aahi mai ia ôtou i taa o au nei.
5 I tēnei, me hakaòko ôtou i ta ù tekao,
me aotahi atu i to ù Piimau,
e ìò ôtou he mataèinaa vaeìa e au
me i vāveka o te tau mataèinaa paotū o te aomāàma vii pu.
Na te mea, na ù anaè te tau henua ia ôtoa.
6 E ìò ôtou no ù he ati tāuà, he mataèinaa peàto.
Oia nei te tekao ta òe e hakaìte atu i to Iraene. »
7 Ua iho Moite me i ùka o te tuaivi.
U tutuki īa me te tau kōkooūa o te mataèinaa.
Ua haki atu i te tekao a te Hatu Etua.
8 U haahua te mataèinaa ia ôtoa ma he èo e tahi :
« E aotahi tātou i te tekao paotū a te Hatu Etua. »
Ua kave Moite i hua tekao io te Hatu Etua.
16 Ma te toù o te pō, i te pōpōuì tika,
ua taki te hatutii, ua topa te uià,
ua kaò te tuaivi i te kohu maù nui,
ua òkoìa te takiìa èo òa òa o te pū.
U emièe te mataèinaa i òto o te pāpua.
17 Na Moite i haauu i vaho i te mataèinaa
no te haatutuki me te Etua.
Ua tū âtou paotū i te tumu o te tuaivi.
18 Ua kaò i te auahi te tuaivi Tinai.
Ua iho mai hoì te Hatu Etua i òto o te ahi.
Ua hiti te auahi me he mea to te ahi uà tāpupu.
U heùu te tuaivi.
19 Ua taki te pū, oko atu, oko atu te takiìa.
U pohā te èo o Moite ; me i òto o te hatutii te èo o te Hatu.
20 Ua iho mai te Hatu Etua io he kapua o te tuaivi.
U vavaò te Hatu Etua ia Moite me io te kapua o te tuaivi.
Ua hiti Moite io te Hatu Etua.
3.- TATAUÌA O EHEKIERE PEROHETA 37, 1-14
1 I ùka o au nei te ìma o te Etua.
U aahi mai te Kuhane o te Etua io tītahi kaavai
tāpīìa me te tau ivi e tavavā aa io he tuaèpo.
2 Ua kaò te tuaèpo i te nuiìa o te ivi moô paa.
Ua ape mai te Kuhane no te vii i vāveka o âtou.
3 U peàu mai te Hatu : « E te ènana e,
aha e pohuè hakaùa te tau ivi nei ? »
U haahua au : « E te Hatu Etua e, o Òe te i ìte. »
4 U peàu mai te Hatu :
« A haahitipona i te tekao peroheta i ùka o tenā tau ivi.
A peàu pēènei :
E te tau ivi moô e, a hakaòko i te Tekao a te Hatu Etua.
5 Enā e haauu au i te ao i òto o ôtou. A tahi e pohuè ôtou.
6 E tāpī au ia ôtou me te uaua me te kiko,
e haauhi au ia ôtou me te kii.
E puhi au i te ao i ùka o ôtou. E pohuè ai ôtou.
E vivini ôtou o au te Hatu Etua. »
7 Ohia u pohā tu ù èo vāàna i te tekao peàuìa mai,
ua òkoìa te tuìtuì, i muì iho te pokokina oko nui.
U haapii te tau ivi : te ivi me te ivi, te ivi me te ivi.
8 Ua tāpīìa âtou me te uaua me te kiko, me te kii ma ùka.
Atià, aòè te Kuhane i òto.
9 U peàu mai te Hatu :
« E te ènana e, me he peroheta, a vavaò òe i te Kuhane.
A peàu òe : oia nei te Tekao a te Hatu. E te Kuhane e, a mai !
A mai me io nā kēkē e hā o te metaki !
A mai ! A puhi i ùka o te tūpāpaù nei ! E pohuè âtou. »
10 U vavaò au i te tekao peroheta vāàna te i peàu mai.
A tahi a tau te Kuhane i ùka o te tūpāpaù. U pohuè âtou.
U maô anamai âtou paotū, hakatu me te haètoa nui, nui oko.
11 U peàu mai te Hatu :
« E te ènana e, o te tau ivi nei te mataèinaa Iraene.
U peàu hoì âtou pēènei :
Ua moô to tātou ivi, ua koè te ao, ua kaò tātou nui. »
12 A tekao peroheta òe ia âtou me te peàu pēènei :
Oia nei te Tekao a te Hatu Etua :
Enā e vāvahi au i to ôtou ana tūpāpaù me te haauu i vaho,
e to ù mataèinaa e.
E haahua au ia ôtou io to ôtou henua tumu.
13 E ìte ôtou o au te Hatu Etua,
i te ava e pepeù au i to ôtou ana tūpāpaù
me te haauu i vaho ia ôtou nui.
14 E haaihi au i to ù Kuhane i òto o ôtou.
E pohuè ôtou. E noho hakaùa ôtou io to ôtou henua tumu.
Oia nei ta ù tekao, oia hoì te mea ta ù e hana ai. »
4.- TATAUÌA O TE PEROHETA IOERE 3, 1-5a
1 He tekao na te Hatu.
« E kiini au i tu ù kuhane i ùka o te tau mēmau i pēpenaìa,
e ìò he peroheta ta ôtou tau tama,
e haamāàmaìa te tau ànamotua ma òto o te moemoeā,
atii me te poì hou ma òto o te tau hakaìteìa me he moemoeā.
2 I hua ava, e kiini atii au i tu ù kuhane ma ùka o te tau tāvini.
3 E hana au i te tau hana mahaò nui
io he ataàki atii io he henua :
he toto, he ahi, he tau pūkohe ahi.
4 E ìò te òumati he pō keevō. E ìò te meàma me he toto,
oa tihe mai te  o te Hatu o te haavāìa.
5 E pohuè ai te tau ènana ia vavaò atu âtou i te ikoa o te Hatu. »
TARAMO 104 (103), 1-2, 1a.24, 27-28, 29b-30
E te Hatu e, a pahi mai i to òe Kuhane,
no te haahou i te hakatu o te henua. cf.103,30
1 A haameitaì i te Hatu, e tu ù kuhane e.
E te Hatu e, tu ù Etua e, u tiketike Òe.
Ua tāpīìa Òe me te kāìè,
2 O te àma te kahu e vāhī ia Òe.
1a A haameitaì i te Hatu, e tu ù kuhane e.
24 He mea nui to Òe tau hana, e te Hatu e.
Na to Òe māàma i pēpenaìa te tau mēmau paotū.
Ua pī te henua i to Òe tau taetae.
27 O âtou paotū e tetaì nei ia Òe
No te koàka mai to âtou oà, i te ava e hei.
28 U vaièi atu Òe : e kohi mau âtou.
U pepeù i to Òe îìma : e kai haamaòna âtou.
29b Me too Òe i to âtou menava,
E mate nui âtou me te hua io he èpo.
30 Na Òe e puhi i te ao, e pēpena hou âtou.
U haahou Òe i te hakatu o te henua.
TATAUÌA O TE HĀMANI A PAURO PEÀTO I TO ROMA
8, 22-27
22 Ua ìte hoì tātou, tihe i tēnei mou â,
u taaàu me te uē hua tau mēmau,
me he uē o te vehine haatotohi aa i te tama.
23 Aòè o te tau mēmau pēpenaìa anaè.
O tātou nei tahipito te i koàka mai i te Kuhane Meitaì
me he to mua hope taetae me io te Etua,
e kōhoà nei me te uēuē o tātou e tetaì ana
na te Etua e haaìò ia tātou he tau tama na Īa,
me te haapao ònaòna i to tātou haapohuèìa.
24 U haapohuèìa tātou, e mea à i òto o te tetaììa anaiho.
Ia ìte tātou i te hakatu pohuè ta tātou e tetaì nei,
e koè ai te tetaììa.
O ai hoì te i tetaì i te mea i ìtemata ?
25 Atià, e tetaì nei tātou i te tau mea u te e ìtemata.
Ua tohe mau tātou e kōhoà ana i hua taetae.
26 Atii ua toko te Kuhane Meitaì i to tātou koekoe pepae.
Aòè tātou i have i te hakatu o te pure.
Atià, u vavaò te Kuhane Meitaì i uē ia tātou
ma he èo mamaioo,
u te e koàka i te ponatekao i te haavivini mai.
27 O te Etua te i ìte i te koekoe o te tau ènana,
u vivini Īa e aha to te Kuhane kōhoà i òto o tātou.
E tahi makimaki hoì to te Etua me to te Kuhane vavaòìa
i uē ia tātou, te mataèinaa o te Etua.
ALLELUIA ALLELUIA
Mave mai, e te Kuhane Meitaì e.
A iho mai io he koekoe o mātou.
A haahouìa mātou e to Òe kāòha.
EVANERIO O IETU KIRITO VĀÀNA E IOANE 7, 37-39
37 I te â paoìa o te koìka, he â koìka nui tēia,
ua maô Ietu me to Īa peàu ma he èo oko pēènei :
« Me paka te ènana i te vai, a tihe mai io ù.
38 E hāinu au i te ènana e haatià ia ù.
Me he mea i patuìa i òto o te Hāmani tapu :
E tahe te vai pohuè me i òto o Īa. »
39 U peàu Ietu i hua tekao no te haavivini
i te Kuhane Meitaì ta te poì haatià ia Ietu e apuu ai.
Aòè hoì i tukuìa atu nei te Kuhane Meitaì
na te mea aòè Ietu i haakāìèìa.
TE KOÌKA O TE PENETEKOTE
TATAUÌA O TE HĀMANI HANA A TE TAU ÀPOTORO
2, 1-11
1 I te ava i hakiìa te koìka Penetekote,
io he vahi e tahi, u putuputuìa te poì haatià paotū.
2 Ua òkopuìa anamai te pokokina me io he àki mai,
hakatu me he tūaio metaki oko nui.
Ua pī i hua pokokina te haè i èià ua noho âtou.
3 Ua ìte âtou i tītahi mēmau hakatu me he èo ahi
te i tuhaìa me te tau, e tahi ma ùka o âtou tikitahi.
4 A tahi a pī âtou paotū i te Kuhane Meitaì,
me to âtou tekatekao ma he èo kē, èo kē,
vāàna ta te Kuhane Meitaì i makimaki e peàu âtou.
5 Enā, ua noho i Ierutaremi te tau ati Iuta, poì pure,
te i titihe mai me i te tau henua paotū ma àò o te àki.
6 Mēìa i te pokokina, u putuputu mai te haètoa.
U pūpūkina âtou na te mea ua òko âtou tikitahi
i te tau Àpotoro e tekao aa ma òto o to âtou iho èo.
7 U mahaò âtou me te emièe e peàu ana :
« Aòè à me i te Henua Karirea mai
tēnei poì paotū e tekao nei ?
8 Pēhea òa tātou titikitahi, e òko ia âtou
e hakako ana ma òto o to tātou èo tumu ?
9 To Paratia, to Metai, to Erama,
te huaa ènana e noho nei i te Henua Metopotamia,
Iutea, Kapatokia, Ponoto, Atia, Ferukia,
10 Pamafuria, Ekipito, Tiripia tata èka me Kirene,
to Roma manihii înei, te poì hānauìa ati Iuta,
11 me te poì haa ati Iuta mēìa i to âtou haatià,
to Kerete, to Arapia, ua òko tātou paotū ia âtou
e tekao aa ma io to tātou èo
no te hakaìte i te hana mahaò o te Etua. »
TARAMO 104 (103) 1.24ac, 29b-30, 31.34
E te Hatu e, a pahi mai i to Òe Kuhane
Te i haahou i te hakatu o te henua. cf.104,30
1 A haameitaì i te Hatu, e tu ù kuhane e.
E te Hatu e, tu ù Etua e, u tiketike Òe.
Ua tāpīìa Òe me te kāìè,
24 He mea nui to Òe tau hana, e te Hatu e.
Ua pī te henua i to Òe tau taetae.
29 Me too Òe i to âtou menava,
E mate nui âtou me te hua io he èpo.
30 Na Òe e puhi i te ao, e pēpena hou âtou.
U haahou Òe i te hakatu o te henua.
31 A kāìè te Hatu no te tau tai e tihe ananu.
A èkaèka te Etua i òto o to Īa tau hana.
34 Koù e haaèkaèka to ù mou hīmene i te Hatu.
O tu ù koakoa te haapii me te Etua anaè.
TATAUÌA O TE HĀMANI I TO KARATA 5, 16-25
E tu ù tau tuàne tuehine.
16 Oia nei ta ù tekao : a ao i te Kuhane Meitaì
mea Haatee ia ôtou.
Ma èià, e òomi ôtou i te tau hīa pē o te nino.
17 He mea kē hoì te tau hīa o te nino,
mea kē te hīa o te Kuhane Meitaì.
Aòè e haatūtahi te hīa o te nino me to te Kuhane Meitaì.
Oia te piò, ia haatee te Kuhane ia ôtou,
u te e hana ôtou vāàna i te hīa o te nino.
18 Me aotahi ôtou i te makimaki o te Kuhane Meitaì,
ua koè te mana o te Ture i ùka o ôtou.
19 Ma te tiòhi i te hakatu pohuè o te tau ènana,
ua ìte tātou paotū e aha te tau hīa pē o te nino :
te hinenaò pu, te hana mako, te keu pē,
20 te pakaihi i te ètua tīvava, te nanikaha, te koekoe kaipipiò,
te tōtōua, te keitani, te haahaa, te totofai,
te tōtohe me te paekē,
21 te koekoe ovi atu ovi mai, te kai me te inu hauhau
me tahipito hakatu pē atu.
Òmua, u peàu au ia ôtou, u peàu hakaùa :
te ènana te i hana i hua tau hana teka,
aòè īa e tomo i òto o te Patirēia o te àki.
22 He mea kē to te Kuhane Meitaì puku i òto o tātou.
Me io Īa te koekoe kāòha, koekoe koakoa, koekoe moû.
Ma te Kuhane Meitaì, e amo te ènana i te tau kōhii paotū,
e toko atu toko mai te hoa i te hoa me te koekoe vaièi,
23 te koekoe hakahae koè, pekē koè, kāìè koè.
Aòè e hakako te Ture i hua hakatu pohuè.
24 Ia haatahi te tau ènana me te Kirito,
me he mea, u haamate âtou i to âtou iho nino
ma te òomi i te tau hīa pē.
25 U vaièi mai te Kuhane Meitaì i te hakatu pohuè hou.
A aotahi hoì tātou i hua Kuhane !
PURE VEVAÒ I TE KUHANE MEITAÌ
E te Kuhane Meitaì e,
A iho mai io he koekoe o mātou.
A pahi mai me i ùka i to Òe māàma.
E te Motua o te poì veve,
E te tumu o te vaièi i te taetae. A mave mai.
E te māàma o te koekoe. A ihi mai io mātou.
E te vavao meitaì nui.
E te manihii moû oko,
A haakoè i te momoù.
Ma òto o te hana, o Òe te hakaēa.
Ma òto o te veàveà, o Òe te kamaìi.
Ma òto o te uē, o Òe te èkaèka.
E te māàma haakoakoa mai.
A mai no te haapī me to Òe àma
I te koekoe o to Òe poì haatià.
Me takiìa me io mātou to Òe mana Etua,
E koè ai te Meitaì i òto o te ènana.
E toe anaè te hīa pē me te Ìno nui io īa.
A haamā i te mea èpo.
A haatokū i te mea moô.
A haapohuè i te mea takapii.
A haakevaì i te mea heò.
A haamāhanahana i te mea anu.
A haatoitoi i te mea pikopiko.
A vaièi mai i te poì haatià
E hano nei e haapii me Òe,
I te hitu o to Òe hana kāòha.
Paotū te â, a haatee mai i te àki.
A vaièi mai i te tuki o te hana meitaì.
A tuku mai i te pohuè me te koakoa paona koè.
ALLELUIA ALLELUIA
Mave mai, e te Kuhane Meitaì e !
A ihi mai io he koekoe o mātou.
A haaveàveà i to mātou koekoe e to Òe kāòha.
EVANERIO O IETU KIRITO VĀÀNA E IOANE
15, 26-27 ; 16, 12-15
I te ava e taha atu Ietu me i te aomāàma nei io te Motua,
u peàu Īa i to Īa tau kouâ pēènei :
26 « E tihe mai te Vavao, o Īa te Kuhane
te i hakaìte i te Tiàtohu i ùka o te Etua,
me io te Motua to Īa iho mai.
Na ù e pahi mai i hua Kuhane me io tu ù Motua.
Na Īa e haatiàtohu ia ù iho.
27 O ôtou tahipito te i haatiàtohu mai ia ù,
na te mea ua kē ôtou me au me i te tīmataìa.
12 He mea nui te tekao kē e too ta ù e hakaìte atu,
atià he tekao toko.
I tēnei, u te e koàka ia ôtou te apuu.
I3 I te ava e tihe te Kuhane
e hakaìte i te Tiàtohu i ùka o te Etua ;
na Īa e haatee ia ôtou i te Tiàtohu paotū.
Aòè hoì e peàu na Īa ta Īa anaè,
e peàu Īa vāàna i te mea ta Īa i haaòko.
E hakaìte atu Īa i te mea e tihe ai ma tītahi â.
14 E òko Īa i tu ù tekao no te hakaìte ia ôtou.
Ma èià hoì to Īa haakāìè ia ù.
15 To tu ù Motua taetae paotū, ua ìò no ù.
Oia te tumu u peàu ia ôtou :
e òko te Kuhane i ta ù tekao me te haki atu ia ôtou. »
TE KOÌKA O TE ETUA TOÙTAHI
TATAUÌA O TE HĀMANI TEUTERO 4, 32,34 39-40
32 U peàu Moite i te mataèinaa Iraene :
« A ūi atu i tītahi ènana me i te tai i àò aè, i àò aè,
me i te ava u pēpena te Etua i te ènana tihe i te â nei,
me i tītahi kēkē tihe atu i tītahi kēkē o te henua.
Aha, ua ìteìa te mea hōhonu atii ?
33 Aha, u koàka mai te mataèinaa
te i hakaòko i te èo o te Etua e tekao aa
koè i mate nui hua mataèinaa ?
34 Aha, me tītahi ètua kē te i vae i te mataèinaa
me te taki ia īa me i vāveka o te poì mākaka,
ma te hana haaveke, te tau hakatu mahaò, te hana mana,
te tōtōua, te ìi o te îìma, te hopo nui ?
Oiana te hana ta te Etua, to òe Hatu,
i hana no te aahi mai ia òe
i vaho o te Henua Ekipito, me he mea ua ìtemata òe.
39 I tēnei, a haamaakau òe, a kaituto io he koekoe :
He Etua te Hatu i ùka nui o te àki,
atii io he henua. Aòè he Etua kē atu.
40 Ma te tau â paotū, a aotahi òe i te tekao a te Hatu
ta ù i tuku nei ia òe i tēnei â,
etià a koakoa òe atii me ta òe tau tama ma hope o òe,
a òa to òe pohuèìa io he henua
ta te Hatu Etua i tuku atu ia òe. »
TARAMO 33 (32) 4-5, 6.9, 18.20, 21-22
Mamau òe, e te mataèinaa o te Etua !
4 E toitoi noa te Tekao a te Hatu.
U tiàtohu anaè to Īa tau hana paotū.
5 U haataetae Īa i te hakatu toitoi, hakahae koè.
Ua pī te aomāàma i to Īa tau hana kāòha.
6 U pēpena te Etua i te àki na to Īa tekao.
U kānea Īa i te aomāàma na te mana o to Īa ao.
9 E tahi ponatekao : u pēpena Īa i te aomāàma.
U peàu Īa : u kāneaìa te tau mēmau paotū.
18 Ua toko te Etua i te tau ènana pakaihi ia Īa,
Te poì e tetaì mau i to Īa kāòha mai,
20 O te Hatu te tumu o to tātou pohuè.
O Īa to tātou toko me te vavao.
21 Me io Īa iho to tātou koakoa.
U haatià tātou i to Īa ikoa peàto.
22 E te Hatu e, a noho mau to Òe kāòha i ùka o mātou
Atii me mātou e tetaì mau i to Òe vaièiìa.
TATAUÌA O TE HĀMANI I TO ROMA 8, 14-17
E tu ù tau tuàne tuehine.
14 Te tau ènana paotū i haateeìa e te Kuhane o te Etua,
ua ìò âtou he tau tama a te Etua.
15 Aòè hoì i koàka ia ôtou te Kuhane
hakatu me to te poì haamōèhuìa
no te aotahi atu me te koekoe haametaù.
Atià, u koàka ia ôtou te Kuhane
te i haaìò ia ôtou he tau tama.
I òto o hua Kuhane, u taaàu tātou : « E Apa. E te Motua e ! »
16 U haatahi te Kuhane o te Etua me to tātou kuhane
no te haatiàtohu he tau tama tātou a te Etua.
17 Me he mea he tau tama tātou, na tātou hoì
te taetae tāpaeìa e te Etua no ta Īa tau tama.
E àva tātou i hua tau taetae me te Kirito,
me mamae tātou i te mamae kātahi me te Kirito,
ma èià e haakāìèìa tātou kātahi me Īa.
ALLELUIA ALLELUIA
cf. Ap.1,8
Kāìè nui te Motua me te Tama me te Kuhane Meitaì :
I te Etua te i tū nei, te i tū òmua naoti, a tihe ai !
EVANERIO O IETU KIRITO VĀÀNA E MATEO 28, 16-20
I tēia mou pō,
16 ua hiti te Tīònohuu ma tahi kouâ i te Henua Karirea,
i ùka o te tuaivi ta Ietu i peàu atu ia âtou.
17 Ia ìtemata âtou ia Ietu, u momoe haatona âtou nui,
âtou te i haatià koè òmua.
U haatata mai Ietu me âtou. U peàu Īa pēènei à :
« Ua tukuìa mai te mana ia ôtoa, io he àki atii io he henua.
19 A tataha atu ôtou.
A haaìò i te tau mataèinaa paotū he tau kouâ
e papatema ana ia âtou i te ikoa
o te Motua me te Tama me te Kuhane Meitaì.
20 A hakako ia âtou no te aotahi i te tau mea paotū
ta ù i peàu ia ôtou.
Enā, e noho au me ôtou ma te tau â paotū,
tihe atu i te paoìa o te ao nei. »
TE KOÌKA HAHI I TE EUKARITIA
TATAUÌA O TE HĀMANI A MOITE PEÀUÌA EHOTO
24, 3-8
3 Ia iho mai Moite, u hakaìte i te mataèinaa Iraene
i te tau tekao paotū a te Hatu.
E tahi èo to te mataèinaa no te haahua atu :
« E aotahi mātou i te tekao hakatahi ta te Etua i peàu mai. »
4 Ua patu Moite i tenā tau tekao paotū a te Hatu.
I te pōpōuì ma te oìoì, u kānea Moite i te hātaapure
i te tumu anaiho o te tuaivi.
U hakatū ònohuu ma ùa keâ ;
e tahi no te tau ati tikitahi o Iraene, ònohuu ma ùa âtou.
5 U peàu īa i te mou poì hou o Iraene
no te ùtuna atu i te hēaka pūovo me te ahi,
no te kukumi i nā piha toa kakaiū
mea ùtuna haatāvaè i te Etua.
6 Ua kohi Moite i te hope o te toto i òto o te tau kookā.
U pihau i te hātaapure me te toeka o te toto.
7 I muì iho, ua too Moite i te Hāmani o te Piimau
me to īa tatau i mua o te mataèinaa.
Pēènei to te mataèinaa haahua atu :
« E aotahi atu mātou i te tau tekao paotū a te Hatu. »
8 Ua too Moite i te toto me te pihau
i te mataèinaa e peàu aa :
« Oia nei te toto o te Piimau
ta te Hatu i haatoitoi me ôtou,
vāàna i te tekao ta âtou i apuu mai. »
TARAMO 116B (115) 12-13, 15-16ac, 17-18
E ùtuna kātahi nei mātou i te ipu o te pohuè,
e vavaò ana i te ikoa o te Hatu.
12 Pēhea to ù haahuaèkaèka i te Hatu
No te meitaì hakatahi ta Īa i vaièi mai ?
13 E ùtuna au i te ipu o te pohuè,
E vavaò au i te ikoa o te Hatu.
15 He taetae io te Hatu,
Te mateìa o to Īa huaa.
16 O au à to Òe tāvini, e te Hatu e,
Te ènana humuìa ta Òe i vevete mai.
17 E ùtuna au i te hēaka haahuaèkaèka,
E vavaò au i te ikoa o te Hatu.
18 E hana au vāàna i ta ù tekao voto
I mua o te motuhaka nui o to Īa mataèinaa.
TATAUÌA O TE HĀMANI I TO HEPEREO 9, 11-15
11 Atià, ua tihe mai te Kirito. O Īa te Tāuà nui
o te taetae i peàuìa ta tātou e tetaì nei.
Ua taha te Kirito ma vāveka o te haèâ karaiha aè,
peàto atu i to mua, aòè i kāneaìa na te îìma ènana,
aòè hoì me i te aomāàma nei hua haèâ.
12 Ua tomo te Kirito i òto o te Ahu tapu o te àki,
e tahi tomoìa anaè no te tau tai ananu.
Aòè te Kirito i tomo me te toto o te tau koimaa,
te tau piha, atià me to Īa iho toto.
Na hua toto, u haapohuè mai te Kirito ia tātou
no te ava paona koè.
13 Me he mea u haataìtaììa te tau ènana i hava i te mikeo,
ma te toto o te koimaa me te toto o te piha
akoè à ma te pihau i to âtou nino me te vai tapu,
14 tōtahi atu e haataìtaì te toto o te Kirito
i to tātou koekoe hava i te tau hana pē
te i aahi ia tātou i te mateìa.
Ma io te Kuhane ètereno,
u ùtuna te Kirito ia Īa iho he hēaka taìtaì pē,
etià e pakaihi tātou i te Etua pohuè.
15 No èià, ua ìò Ietu te tumu o te Piimau hou,
etià e koàka mai i te ènana vaeìa
te tau taetae paona koè ta te Etua i peàu mai.
Atià òmua, ua mate te Kirito
no te haakoè i te mikeo o te Piimau tehito.
ALLELUIA ALLELUIA
cf. In.6,51-52
E te Hatu, e Ietu e,
O Òe te haraoa pohuè te i iho mai me io he àki.
O te ènana e kai i hua haraoa, e koàka ia īa te pohuè ananu.
EVANERIO O IETU KIRITO VĀÀNA E MAREKO
14, 12-16.22-26
12 I te â to mua o te koìka haraoa haapupuhi koè,
oia te ava e kukumiìa te àrenio Pakate,
u peàu to Īa tau kouâ ia Ietu :
« I hea u makimaki Òe e hee mātou,
e haapei no Òe i te kaiìamau Pakate ? »
13 U pōpahi Ietu i nā kouâ tokoùa me te peàu ia âua :
« A hee io he pāpuahaè. E tutuki ôùa
me te ènana kave aa i te huevai. A ūtaì ia īa.
14 Io te haè e uu ai hua ènana, a uu me ôùa.
A peàu i te ènana heihaè :
E ūi atu ta te Tuhuka i hea to ù pāòto
i èià e kai au i te Pakate me to ù tau kouâ ?
15 Na īa e haaìte ia ôùa, io he tohua i ùka o te haè,
i te pāòto kaùoo tāpīìa me te tau moeka,
meitaì te kāneaìa. I èià, a haapei no tātou. »
16 Ua hee atu nā kouâ tokoùa me te tomo io he pāpuahaè.
U koàka ia âua te mea peàuìa e Ietu.
U haapeipei âua i te Pakate.
22 E kai aa âtou, ua too Ietu i te haraoa,
u haahuaèkaèka, ua vahi, ua tuku atu ia âtou
me te peàu : « A too. O to ù nino tēnei. »
23 I muì iho, e too aa i te ipu,
u haahuaèkaèka me te tuku ia âtou.
Ua inu âtou paotū.
24 U peàu Ietu ia âtou pēènei : « O to ù toto tēnei,
te toto o te Piimau, te tahe aè no te poì nui.
25 E tekao tiàtohu ta ù nei ia ôtou :
Aòè au e inu hakaùa me io te puku o te tumuvino
tihe i te â e inu au i te vino hou io te Patirēia o te Etua. »
26 Ia pao te hīmene o te tau taramo,
ua uu âtou i vaho no te hiti io he tuaivi Oriveti.
TE KOÌKA O TE HŌUPO TAPU OKO O IETU
TATAUÌA O TE PEROHETA OHEA 11, 1.3-4.8c-9
1 Oia nei te tekao a te Hatu Etua :
« U kāòha au i te mataèinaa Iraene me i te ava ua hou īa.
U vavaò au ia īa e tu ù òna tama
ia haauu au ia īa i vaho me io te Henua Ekipito.
3 U hakako au ia īa i te taha vaevae
ma te too i to īa ìma.
Atià, aòè īa e vivini o au to īa pātoko.
4 U aahi au ia īa me te moû, e toiìa e te hinenaò.
Ua hopu au ia īa
hakatu me te kui e tau aa i ta īa tama.
Ua oha au no te hākai ia īa.
Atià, aòè Iraene i makimaki e hua mai io ù.
E aha ? E haatopa au i ùka o âtou i te tuki pē ?
8 Koè nui. U mehea au, mamae to ù koekoe.
9 Aòè au e hana me te pekē.
Aòè au e haahika ia Iraene.
He Etua au. Aòè au e hakatu me te ènana.
I vāveka o âtou, he Etua peàto au.
Aòè au i tihe mai no te haahika me te haamate nui. »
HĪMENE : Itaia 12, 2, 4b-5a, 5b-6
E tātakahiti ana ôtou me te koakoa,
E kapu i te vai me io te punavai pohuè. It.12,3
2 O te Hatu Etua tu ù Haapohuè.
U haatià nei au, haametaù koè.
O te Hatu Etua tu ù ìi. E hīmene au ia Īa.
Io te Hatu te tumu o to ù pohuè.
4 I hua â, e haahuaèkaèka ana i te Hatu, e peàu ôtou :
« A haki atu io te poì êteni i to Īa tau hana mana. »
A hakaìte atu : he Tiketike to Īa ikoa.
5 A haataki i te pū no te hahi i te Hatu.
Ua hana hoì te Hatu i te hana mahaò.
U mevaha to Īa òko nui ma nā henua vii pu.
6 E Tiona e, a èkaèka, a taaàu i te koakoa.
U titiè te Hatu Etua i vāveka o ôtou.
O Īa te Peàto nui o Iraene.
TATAUÌA O TE HĀMANI A PAURO PEÀTO I TO EFETIA
3, 8-12.14-19
E tu ù tau tuàne tuehine.
8 O au nei te iti noa i vāveka o te tau ènana vaeìa e te Etua.
Atià, u vaièiìa mai te karatia no te hakaìte atu i te tau êteni
i te Tekao Meitaì o te nuiìa o te taetae kuhane,
ta te Kirito Ietu i tuku mai.
U te e koàka e tahi ènana i te tatau.
9 Atii, u vaièiìa mai te karatia
no te haapuàha i mua o te tau ènana paotū,
pēhea ta te Etua e haapao i to Īa makimaki,
te i hakanāìa me i òmua naoti.
Na te Etua i pēpena i te tau mēmau ia ôtoa,
na Īa i hakanā i hua makimaki
no te tau ènana o te tau tai i àò aè.
10 I tēnei, ma io te Èkaretia, u hakaìteìa i te tau Anera,
i te tau Vivini e noho nei io he àki,
i te hakatu kē, hakatu kē mahaò nui o te Māàma o te Etua.
11 I te tumu o te tau tai paotū, oia te makimaki o te Etua,
vāàna e haapaoìa e Ietu Kirito, to tātou Hatu.
12 I òto o te Kirito, mēìa i to tātou haatià ia Īa,
u vavaò tātou no te haatata mai me te Etua, haametaù koè.
14 No èià, ua pure au e noho muò ana i te aò o te Etua Motua,
15 te i apa ma to âtou ikoa tiàtohu i te tau huaa paotū,
to te àki, to te henua vii pu.
16 Ua ape au i te Etua, vāàna i te tapavaù nui o to Īa kāìè,
na to Īa Kuhane Meitaì, a haaoko i to ôtou koekoe
etià e meitaì aè to ôtou pohuè haatià.
17 Ua ape au i te Etua a noho te Kirito i òto o ôtou,
mēìa i to ôtou haatià.
A ìò te kāòha te tumu o to ôtou hana ia ôtoa,
me he mea te tūàka no te haè hou.
18 Ma èià, o ôtou tahipito i vāveka o te mataèinaa o te Etua,
te i vivini i te hātea, te òa, te tiketike, te hōhonu.
19 E ìte māàma ôtou i to Ietu Kirito kāòha,
e aha à u te e àva te māàma ènana no te haapuàha mai.
A tahi a ìò ôtou pii èka me te Etua
te i haapī ia ôtou me to Īa hakatu pohuè Etua.
ALLELUIA ALLELUIA cf.In.5, 5-6
O Ietu Kirito, te Tama a te Etua.
Ua tihe mai nei me te toto me te vai.
U pohuè tātou mēìa i to Īa mate nui.
Akoè à :
U kāòha to mua te Etua ia tātou
me te tuku mai i ta Īa òna Tama.
U haatāvaè Ietu ia tātou me to Īa Motua
Ma te mateìa hēaka no to tātou tau mikeo.
EVANERIO O IETU KIRITO VĀÀNA E IOANE 19, 31-37
I tēia mou pō,
31 Oia te â haapei i te Koìka Pakate.
He â tapu oko no te tau ati Iuta hua koìka,
tōtahi atu mēìa e hakiìa ma te Tāpati.
No èià, ua ape âtou ia Pinato
a hahati i nā vaevae o te tau ènana i pāokapekaìa
me te taki iho i to âtou nino
oa èva âtou i hua â io he peka.
32 Ua tihe mai mou kape te i hahati i te tau pūhāvaevae
o nā ènana i pāokapekaìa me Ietu.
33 Ua tihe âtou io Ietu ; e ìte aa ua mate nui,
aòè âtou i hahati i to Īa vaevae.
34 Atià, tītahi kape me te taa, ua veò i to Īa kaokao.
Ua tahe anamai te toto me te vai.
35 Na te ènana i ìtemata te i haatiàtohu i hua mea.
He tekao tiàtohu to īa.
Ua ìte te Hatu : u peàu īa i te mea tiàtohu,
etià e haatià me ôtou.
36 U haapaoìa hoì hua mea etià e toitoi
te tekao o te Hāmani tapu te i peàu :
« Umoì e hahatiìa e tahi o to Īa tau ivi. »
37 U patuìa io he vahi kē :
« E tiòhi ai âtou i tēia ta âtou i tīputaèe. »
TOMINIKA E ÙA
TATAUÌA O TO MUA HĀMANI O TAMUERA 3, 3-10.19
3 U hiamoe te pōìti, o Tamuera te ikoa,
i òto o te haèpure o te Hatu, i èià te Àraka o te Etua.
4 U vavaò te Hatu Etua ia Tamuera.
U haahua atu īa : « Eīa au nei. »
5 U tohuti īa io te tāuà Eria me te peàu :
« U vavaò òe ia ù. Eīa au nei. »
U peàu Eria :
« Aòè au i vavaò ia òe. A hua atu. A moe. »
6 Ua hua te pōìti i te hiamoe.
U vavaò hakaùa te Hatu Etua ia Tamuera.
Ua maô īa. U tohuti io te tāuà Eria me te peàu :
« Eīa au nei, na te mea u vavaò òe ia ù. »
U haahua hakaùa Eria :
« Aòè au i vavaò ia òe, e tu ù tama e.
A hua atu. A moe. »
7 U te e ìte Tamuera i te Hatu.
Aòè Tamuera i òko atu nei i te tekao a te Hatu.
8 U vavaò te Hatu ia Tamuera. O te toù vavaòìa tēia.
U maô Tamuera me te tohuti io Eria.
U peàu : « U vavaò mai òe ia ù. Eīa au nei. »
9 A tahi a vivini Eria i te mea o te Hatu Etua
te i vavaò nei i te tama. U peàu hoì Eri ia Tamuera :
« A hua. A hiamoe.
Me vavaò hakaùa ìa òe, a peàu pēènei :
E te Hatu e, a haki mai i to òe hīa.
U hakaòko hoì to òe tāvini. »
Ua hua Tamuera i te hiamoe.
10 Ua tihe te Hatu. Ua noho pii o Tamuera
me to Īa vavaò me he mea òmua atu nei :
« E Tamuera, Tamuera e. »
U haahua atu Tamuera :
« E te Hatu e, a haki mai i to òe hīa.
U hakaòko hoì to òe tāvini. »
19 U karaiha aè Tamuera. O te Etua me īa.
Ua mana te tekao paotū o te Hatu te i tihe io Tamuera.
TARAMO 40 (39) 2abc.4ab, 7-8a, 8b-9, 10cd-11cd
« E te Hatu e, eīa, ua tihe au nei
no te aotahi atu i to Òe makimaki. » cf.40,8.9
2 U tetaì au, e tohe mau i te tetaì i te Hatu.
U tiòhi mai te Etua, ua òko Īa i tu ù vavaò.
4 U pepeù te Etua i to ù haha no te hīmene hou,
E taki to ù èo no te hahi i to tātou Etua.
7 Aòè Òe e makimaki i te tau ùtuna hēaka.
U pepeù Òe i tu ù puaìka, e te Etua e.
Aòè Òe i apuu mai i te hēaka pūovo i te ahi.
8 Oia te tumu o tu ù peàu atu : Eīa, ua tihe au nei.
Ua patuìa no ù io he Hāmani tapu
9 Pēhea te haatae i to Òe makimaki.
E tu ù Etua e, oia nei tu ù hīa :
Te aotahi atu i to Òe tekao ma io he koekoe.
10 A haamaakau Òe u te e mutu to ù haha.
E te Hatu e, ua ìte meitaì Òe.
11 U hakaìte au i te motuhaka o te mataèinaa
I to Òe Hakāòha mai me to Òe Toitoiìa.
TATAUÌA O TO MUA HĀMANI A PAURO PEÀTO
I TO KORINETIA 6, 13b-15a.17-20
E tu ù tau tuàne tuehine.
13 Aòè i kāneaìa te nino no te hana mako.
O te Hatu te vivini o to tātou nino.
O to tātou nino no te tāvini i te Hatu.
14 U hakatū te Etua i te Hatu Ietu me i vāveka o te huaa mamate,
atii to te Etua Haapohuè i to tātou nino ma to Īa mana nui.
15 Aha, u te e ìte ôtou ? O to ôtou nino
me tītahi hopenino o to te Kirito nino ?
17 Te ènana e haatahi me te Hatu
e ìò he Kuhane e tahi me te Hatu.
18 A titii ôtou i te hana mako.
Te tau mikeo paotū te i tāhava i te ènana,
te tau tekateka, i vaho o to īa nino ;
te ènana mako e tāhava i to īa iho nino,
19 aha, u haamāhaè ôtou ?
To ôtou nino te Hiero o te Kuhane Meitaì
te i noho nei i òto o ôtou,
te i vaièiìa mai e te Etua ia ôtou.
U te e koàka te peàu : na ôtou ta ôtou anaè.
20 Ma te tiàtohu, ua hokoìa mai ôtou.
No èià, a haakāìè ôtou i te Etua ma òto o to ôtou nino.
ALLELUIA ALLELUIA
cf. In.1, 41.17
« U koàka mai ia māua te Metia, o hua mea anaiho te Kirito » ; ma io Ietu Kirito, ua tihe mai te Karatia me te Tiàtohu.
EVANERIO O IETU KIRITO VĀÀNA E IOANE 1, 35-42
I tēia mou pō,
35 ua noho Ioane me nā kouâ tokoùa
ma tītahi kēkē o te kaavai Ioritane.
36 E tiòhi mau ia Ietu e taha aa, u peàu :
« O Īa nei te Àrenio o te Etua. »
37 Ua òko nā kouâ tokoùa i hua tekao.
Ua ūtaì âua ia Ietu.
38 E hāìu aa Ietu, ua ìte ia âua e ūtaì aa ia Īa,
u peàu : « E aha ta ôùa e ùmihi nei ? »
Ua haahua atu âua :
« E Rapi e, o hua mea anaiho e Tuhuka e,
i hea to Òe noho ? »
39 U peàu Ietu ia âua : « A mai. A tiòhi. ! »
Ua tihe mai âua no te ìte i te vahi o to Īa nohoìa.
Ua noho âua pii o Ietu i hua pō ana.
Ua èva te â, me he hora e hā i te ahiahi.
40 O Aterea, te teina o Timone Petero,
tītahi o nā kouâ tokoùa
te i òko i te tekao a Ioane, te i ūtaì ia Ietu.
41 U tutuki Aterea me to īa tuaana, ia Timone.
U peàu Aterea : « U koàka mai ia māua te Metia,
hua mea anaiho te Kirito. »
42 U aahi Aterea ia Timone io Ietu.
E tiòhi mau Ietu ia īa, u peàu :
« O Timone òe, tama na Iona.
O Keâ te ikoa e apaìa òe i tēnei. »
O hua mea anaiho me Petero.
TOMINIKA E TOÙ
TATAUÌA O TE HĀMANI A IONA 3, 1-5.10
1 U peàu te Hatu Etua ia Iona pēènei :
2 « A tū òe ! A taha atu i Ninive io he pāpuahaè karaiha.
I èià, a haaòko nui i te tekao ta ù e hakaìte atu ia òe. »
3 Ua tū Iona me te hee i Ninive, vāàna i te Tekao a te Hatu.
O Ninive à, he pāpuahaè kaùoo, kaùoo oko :
e toù pō te heeìa me io tītahi kēkē io tītahi kēkē.
4 Ua tomo Iona io he pāpuahaè e tahi pō anaè.
U haaòko nui īa i te tekao :
« E hā ònohuu pō i toe, a tahi a haahikaìa Ninive. »
5 Te tau ènana noho aa i Ninive,
u haatià anamai âtou i te Etua.
10 Ua ìte te Etua i to âtou haaoke. U hāìu âtou i te koekoe.
U tāvaè te Etua me te haakoè i to Īa pekē.
Aòè te Etua e haatopa i ùka o âtou i te tuki pekē.
TARAMO 25 (24) 4-5b, 6-7, 8-9
E te Hatu e, a hakako mai i to Òe tau vaanui. 25,4
4 E te Hatu e, a hakaìte mai i to Òe makimaki.
O Òe iho, a hakako mai i to Òe tau vaanui.
5 A haatee mai to Òe tiàtohu : a haamāàma mai.
O Òe hoì te Etua e haapohuè ia ù.
6 E te Hatu e, a haamaakau i to Òe uē,
Me i kiu mai to Òe kāòha te i noho mau.
7 A māhaè i te tau tekateka o to ù houìa,
Umoì e titii atu ia ù nei : a haamaakau mai.
8 U meitaì, u toitoi anaè te Hatu
Te i hakaìte i te vaanui i te poì hukaka.
9 U aahi to Īa toitoi i te poì haapāpaku,
U hakako i to Īa makimaki i te ènana kāìè koè.
TATAUÌA O TO MUA HĀMANI A PAURO PEÀTO
I TO KORINETIA 7, 29-31
29 E tu ù tau tuàne tuehine, oia nei tu ù tekao ia ôtou :
he mea poto te ava i toe, u tihe te paoìa o te aomāàma nei.
No èià, ia noho tahipito me te vehine,
a pohuè âtou me he mea e vehine koè.
30 Ia mateteka tahipito, me he mea u uēuē koè âtou.
Ia koakoa tahipito, me he mea u koakoa koè âtou.
Ia hoko mai tahipito i te tau mēmau,
me he mea aòè no âtou te tau taetae te i koàkaìa mai.
31 Te tau ènana te i hana me te tau mēmau o te ao nei,
a hana âtou me he mea aòè o âtou te hatu o hua tau mēmau.
Na te mea, e huìkē ananu te hakatu o te ao nei.
ALLELUIA ALLELUIA
Mk 1,15
Ua tata mai te Patirēia o te Etua.
A haatià ôtou i te Tekao Meitaì Hou Mai.
EVANERIO O IETU KIRITO VĀÀNA E MAREKO 1, 14-20
14 Ma hope o to Ioane haaìòìa,
ua hiti Ietu io he Henua Karirea.
U hakaìte atu Īa i te Tekao Meitaì Hou Mai me io te Etua.
15 U peàu Īa pēènei :
« Ua pao te ava i haaheiìa.
U tata èka te Patirēia o te Etua.
A hāìu ôtou i te koekoe.
A haatià i te Tekao Meitaì Hou Mai ! »
16 E taha aa Ietu ma te hiku o te tai Karirea,
ua ìte ia Timone me Aterea, to īa teina.
Ua haatopa âua i te ùpena io he tai.
He mou ènana àvaika hoì âua tokoùa.
17 U peàu Ietu ia âua :
« A ūtaì mai ia ù. E haaìò au ia ôùa he àvaika ènana. »
18 U avai anamai âua i te tau ùpena me te ūtaì ia Īa.
19 Ua taha Ietu i te ava poto.
Ua ìte Īa ia Iakopo, tama na Ihepetea, me Ioane, to īa teina.
Ua noho me âua i òto o te vaka no te kānea i te tau ùpena.
20 A tahi a vavaò Ietu ia âua.
U avai âua io he vaka
ia Ihepetea, to âua motua, me te poì hana.
Ua ūtaì âua ia Ietu.
TOMINIKA E HĀ
TATAUÌA O TE HĀMANI A MOITE PEÀUÌA TEUTERO
18, 15-20
15 U peàu Moite i te mataèinaa Iraene :
« Ma vāveka o ôtou, ma vāveka o to ôtou tau tuàne tuehine,
e vae te Hatu i te peroheta me he mea ia ù nei.
A hakaòno ôtou ia īa.
16 Oiana ta ôtou e ape i te Hatu
ia putuputuìa ôtou io te tuaivi Horepe, pēènei à :
« Aòè tātou e makimaki e òko hakaùa
i te èo o te Hatu, to tātou Etua, oa mate nui tātou. »
17 A tahi a peàu mai te Hatu : He mea hei to ôtou apeìa
i te peroheta hakatu me òe nei.
E tuku au i tu ù tau tekao io to īa haha.
E hakaìte īa i te tau tekao paotū ta ù i peàu ia īa.
19 Me he mea aòè tītahi e hakaòko
i ta īa tekao peàuìa ma tu ù ikoa,
na ù e haavā ia īa.
20 Atià, me peàu pu tītahi peroheta na īa ta īa anaè,
akoè à, e tekao īa ma te ikoa o te ètua tīvava,
e mate nui tenā peroheta. »
TARAMO 96 (95) 1-2,6-7b,7d-8a.9
I tēnei â, umoì tātou e taha kē te koekoe,
a apuu tātou i te Tekao a te Etua. cf.95,8
1 A mai. A hahi tātou me te koakoa i te Hatu,
A haakāìè i to tātou motukeâ, te Haapohuè.
2 E haahuaèkaèka ana, a haatata mai tātou io Īa
E hīmene haakoìka no te hahi i te Hatu.
6 A tomo. A oha. A atoratio ia Īa.
A moe haatona i mua o te Hatu,
Na Īa hoì i pēpena ia tātou.
7 O Īa te Etua, o tātou te mataèinaa
I tēnei â, aha e apuu ôtou i to Īa tekao ?
8 Umoì ôtou e pūtuì me he mea i te henua ataha,
9 U haaveke mai to ôtou tau tupuna me te hakaki ia ù,
E aha à ua ìtemata âtou i to ù hana mana.
TATAUÌA O TO MUA HĀMANI I A PAURO PEÀTO
TO KORINETIA 7, 32-35
E tu ù tau tuàne tuehine.
32 E kōhoà nei au e pohuè ôtou paòpaò koè.
Te ènana aòè i noho me te vehine,
e tahi o īa maakau : te haataetae i te Hatu,
e ùmihi aa pēhea te haaèka i te Hatu.
33 Te ènana i noho me te vehine, e ùa o īa makimaki :
tītahi : e kōhoà i te taetae o te aomāàma haakoàka mai,
tītahi : e hano e haaèka i ta īa vehine.
34 Ma èià, e toiìa hua vāhana ma nā e ùa kēkē.
Te vehine, aòè a īa vāhana, me he mea te vehine hou,
ua hano e haaèka i te Hatu
etià e peàto īa ma io he kuhane, ma io he ènana tiàtohu.
Te vehine e noho aa me te vāhana,
u haapaòpaò ia īa iho mēìa i te taetae o te ao nei,
maakau aa pēhea te haaèka i ta īa vāhana.
35 No te toko ia ôtou tu ù tekao nei.
U te e makimaki au e haatukee ia ôtou.
E too ta ù e hakapahi ia ôtou i te mea meitaì,
etià e haapii ôtou me te Hatu ma te tiàtohu o te koekoe.
ALLELUIA ALLELUIA
cf. Rk.1,68.79
A haameitaììa te Hatu to tātou Etua :
no te poì e noho nei io he pō pōtako,
u haapupuà Īa i to Īa Māàma.
EVANERIO O IETU KIRITO VĀÀNA E MAREKO 1, 21-28
Ua tomo Ietu me to Īa kouâ i Kafaranaumi.
I te Tāpati, ua uu Ietu i òto o te tinakoka
me to Īa hano i te hakako.
22 Ua pē âtou i te mahaò mēìa i to Īa hakakoìa
na te mea, u hakako Ietu ia âtou me te mana,
aòè me he mea ta te tau tuhuka tekao.
23 Enā i òto o te tinakoka tītahi ènana uuìa e te kuhane ìno.
24 U taaàu īa ma he èo oko me te peàu pēènei :
« E Ietu no Natareti, e aha ta mātou nei me Òe ?
Ua tihe mai Òe no te haahika ia mātou ?
Ua ìte au o ai Òe : o Òe te Peàto o te Etua. »
25 U oonaki Ietu ia īa me te peàu :
« A mutu òe. A uu i vaho me i òto o īa. »
26 U haakeue oko te kuhane ìno i hua ènana,
u taaàu oko ki me te uu anamai me i òto o īa.
27 Ua pī âtou paotū i te mahaò
me te peàpeàu atu ta te hoa i te hoa :
« E aha oti te mea nei ?
He tekao hou hakakoìa me te mana.
U vivini hoì Īa i te tau kuhane ìno. U aotahi atu âtou ia Īa. »
28 A tahi a mevaha to Ietu òko nui i te Henua Karirea vii pu.
TOMINIKA E ÌMA
TATAUÌA O TE HĀMANI A IOPE 7, 1-4 6-7
1 Oia nei te tekao a Iope : « Tiàtohu nui,
te pohuè o te ènana io he henua,
u hakatu me to te tueni viitoiìa no te hana toko.
Ua hana haapaòpaò pu īa me i te pōpōuì tihe atu i te pō.
2 Me he mea a te tueni e kōhoà nei i te hakaēa io he vahi maù,
hakatu me te ènana hana e tiaki aa i ta īa moni hana,
3 atii me au nei. I tēia meàma, tēia meàma
e aha te mea i koàka mai ? He metaki anaè.
U matakaù au i te pō mēìa i te mamae.
4 Ia moe au, u peàu : Meitaì atu e vaa hakaùa au.
E òa, òa oko te pō.
U moemoe au i te tau moemoeā hauhau, tihe atu i te pōpōuì.
6 E pao vave to ù tau â,
tōtahi atu te vaveìa i to te aho
e vevete me i te ìma o te ènana àvaika.
Ia pao te aho, u hakaēa te òa o to ù pohuèìa.
7 E te Hatu e, a maakau Òe :
me he pūhea metaki anaè to ù pohuèìa.
Ia pao hua pohuè, aòè au e ìte hakaùa i te koakoa. »
TARAMO 147A (146) 1.3,4-5,6-7
A haameitaì i te Hatu te i hāika i to tātou tau maki. cf. 147,3
1 U hei nui te haakāìè i to tātou Etua.
U toitoi noa te hīmene me te hahi ia Īa.
3 U haameitaì Īa i te menava o te poì uēuē.
U hāika te Hatu i to âtou tau maki.
4 U tatau te Hatu i te nuiìa o te hetū.
Ua apa Īa i te ikoa e hei i tītahi, i tītahi.
5 U tiketike, ua mana nui to tātou Hatu.
U te e vivini e tahi ènana i to Īa māàma.
6 U haatiketike te Hatu i te poì haapāpaku.
U haanuhe Īa io he tuaèpo i te tau ènana mākaka.
7 A kāhua ôtou i te hīmene haahuaèkaèka i te Hatu.
A haataki i te kitā no te hahi i to tātou Etua.
TATAUÌA O TO MUA HĀMANI A PAURO PEÀTO
I TO KORINETIA 9, 16-19.22-23
E tu ù tau tuàne tuehine.
16 E aha à e hakako au i te Evanerio, u te e haakāìè pu au.
Ua tukuìa mai hua hana e te Etua.
Aòè e koàka ia ù te haakoè.
He ènana pē au nei no to ù haamevaha koè i te Evanerio.
17 Me he mea u hana au i hua hana na ù ta ù anaè,
e koàka mai hoì ia ù te tuki meitaì.
Atià, u te e hana au i tēnei hana na ù ta ù.
Na te Etua i vae mai no te hana.
18 No èià, e aha te tuki i koàka mai ia ù ?
Oia nei te koakoa o te hakako pu i te Evanerio.
Aòè au i hano i te tuki e hei ia ù
no te hakaìte atu i te Evanerio.
19 Ua hana au na ù ta ù.
U te e tueni au i tītahi ènana kē.
Atià, u haaìò au iho he tueni no te tau ènana paotū,
vāàna e hua mai io te Hatu te nuiìa o te ènana.
22 U haaìò au he ènana haatià iti,
hakatu me te poì haatià iti,
vāàna te haahua mai io te Etua te poì haatià iti.
U haaìò au hakatu me te tau ènana kē, ènana kē paotū,
vāàna e hua mai tahipito io te Hatu.
23 To ù tau hana paotū i hanaìa i uē i te Evanerio,
etià e àva atu me au i to te Evanerio tau taetae.
ALLELUIA ALLELUIA
cf. Mt.8,17
« Ua too Ietu i to tātou pepae.
U haakoè Īa i to tātou tau mate. »
EVANERIO O IETU KIRITO VĀÀNA E MAREKO 1, 29-39
I tēia mou pō,
29 ua uu Ietu me to Īa tau kouâ i vaho o te tinakoka
me to âtou taha atu io te haè o Timone me Aterea.
Enā me âtou Iakopo me Ioane.
30 Ua moe te motuòai vehine a Timone,
ua hemo i te mate hautete.
U peàu ponihoo âtou ia Ietu e aha to īa.
31 U haatata mai Ietu me to Īa too ma te ìma o hua vehine
no te hakatū ia īa. Ua koè anamai te hautete.
U tāvini atu te vehine ia âtou.
32 I te ahiahi, ia kaò te òumati, u aahiìa mai
te poì hōpī paotū me te tau ènana uuìa e te kuhane ìno.
33 U haamuimui mai te tiàtohu o te pāpuahaè
i mua te avaputa o te haè i èià ua noho Ietu.
34 U haameitaì Īa i te nuiìa o te poì mate,
mate kē to tēnei, mate kē to tēia.
Ua tute Īa i te nuiìa o te tiaporo.
Aòè Ietu i ao e pohā to âtou èo,
na te mea ua ìte âtou o ai Īa.
35 I te hāhakateiao, ua vaa Ietu.
Ua uu Īa i vaho me te hee io he vahi viviiō.
I èià, ua pure Īa.
36 O Timone me to īa tau hoa, ua hano e ùmihi atu ia Ietu.
37 U koàka ia âtou Ietu me to âtou peàu atu :
« Ua ùmihi te tau ènana paotū ia Òe. »
38 U peàu Ietu ia âtou :
« A hee tātou i vahi kē, io te tau pāpuahaè tata mai,
etià me i èià, e hakaìte atu au i te tekao.
Oia hoì te tumu i uu ai au i vaho. »
39 Ua hee Ietu me to Īa hakako i te tekao
i òto o to âtou tau tinakoka, i te Henua Karirea vii pu.
Ua tute atu Īa i te tau tiaporo.
TOMINIKA E ONO
TATAUÌA O TE HĀMANI A MOITE PEÀUÌA REVITA
13, 1-2.45-46.
1 U peàu te Etua ia Moite me to īa teina Aarone, pēènei :
2 « Ia ìteìa i ùka o te kii o te ènana
te uto, te huhuà, akoè à te patapata,
hakatu me he mate mohoi, e aahiìa hua ènana
io Aarone te tāuà, akoè à io tītahi tāuà o to īa ati.
45 Te ènana i hemo i te mate mohoi,
e haauhiìa me te tau kahu pēpē, tutuiva.
Aòè e paèhuìa to īa òuoho,
e pāìa to īa mata me te tapa,
e taha īa e taaàu aa : « Tapu, tapu. »
46 Ua tapu hoì hua ènana hemo i hua mate.
A noho īa io he vahi kē ananu ;
ma vaho o te pāpuahaè to īa nohoìa.
TARAMO 102 (101) 2-3ab, 4-5, 6-13, 20-21
Umoì Òe, e Ietu, umoì Òe e titii i te poì uēuē.
2 E te Hatu e, a hakaòko i ta ù pure,
A apuu i to ù èo taaàu io Òe.
3 I te â e haauēuē mai te tau kōhii,
Umoì Òe e mata koè ia ù.
4 Me he auahi io te metaki, ua koè to ù tau â.
U veàveà to ù tau ivi me he kaahuahi.
5 Me he èitā moô, u pororō to ù nino.
U te e kākī au e kai i ta ù oà.
6 Mēìa i to ù uēuē oatea te pō,
U pipii to ù kii me te ivi.
13 E te Hatu e, e mau paona koè to Òe hakaìkiìa.
E haamamaakauìa Òe e te tau ènana hakatahi.
20 Ua oha te Hatu me io to Īa Hiero tapu,
Me io he àki i ùka nui, u tiòhi te Hatu i te henua.
21 Ua òko Īa i te uēuē o te poì humuìa,
U vevete Īa i te tau ènana, oa haamateìa âtou.
TATAUÌA O TO MUA HĀMANI A PAURO PEÀTO
I TO KORINETIA 10, 31-33 ; 11,1
E tu ù tau tuàne tuehine.
31 No èià, ia kai, ia inu, ia hana i te tau hana kē, hana kē,
ananu, a hano ôtou no te haakāìè i te Etua.
32 Umoì ôtou e hakapahi i te pē ma to ôtou hakatu pohuè,
i te tau ati Iuta, akoè à i te tau êteni,
akoè à i te Èkaretia o te Etua.
33 O au iho, ua hano au e haaèka i te tau ènana hakatahi
i òto o ta ù tau hana paotū.
Aòè au e hana no to ù meitaì anaè,
atià no te meitaì o te nuiìa o te ènana,
vāàna e haapohuèìa âtou paotū.
1 A hana ôtou hakatu me ta ù nei,
me he mea u hana au hakatu me ta Ietu Kirito.
ALLELUIA ALLELUIA
Rk .7,16
Ua tū tītahi peroheta kaùoo i vāveka o tātou,
U haameitaì te Etua i to Īa mataèinaa.
EVANERIO O IETU KIRITO VĀÀNA E MAREKO 1, 40-45.
I tēia mou pō,
40 Ua tihe io Ietu tītahi ènana mohoi.
Ua noho muò me to īa vavaò ia Ietu, e peàu aa :
« Me he mea u makimaki Òe,
e koàka ia Òe te haataìtaì ia ù. »
41 U mehea Ietu. U hohoà Īa i te ìma
me te haatukia i te ènana mohoi, e peàu aa :
« U makimaki au. A taìtaì òe ! »
42 Ua koè anamai to īa mate mohoi. U taìtaì te kii.
43 E oonaki aa Ietu ia īa, u titii me te peàu :
44 « Umoì òe e haki atu i te ènana e tahi.
Atià, a taha atu me te hakaìte ia òe i te tāuà.
A ùtuna òe i te mea i peàuìa e Moite,
no to òe haataìtaììa ; e mea haatiàtohu no âtou. »
45 Atià, ua hee hua ènana i vaho
me to īa hakaìte me te haamevaha i te tekao hou.
No èià, aòè i koàka ia Ietu te tomo i òto o te pāpuahaè
ia tiòhi mai te tau ènana ia Īa.
Ua noho hoì Īa i vaho io he tau vahi viviiō.
Me i te tau vahi paotū, u titihe mai te tau ènana io Ietu.
TOMINIKA E HITU
TATAUÌA O TE PEROHETA ITAIA 43 18-19.21-22.24c-25
Oia nei te Tekao a te Etua :
18 Umoì ôtou e māmaakau i te tau tai kākiu.
Umoì e moemoeā i te tau mea i pao atu nei.
19 Enā, e pēpena au i te aomāàma hou.
Aòè ôtou e ìte nei ia īa ? U tata èka.
E kānea au i te vaanui ma vāveka o te henua ataha.
E haatahe au i te vai io he vao moô.
21 E hahi i tu ù kāìè te mataèinaa vaeìa e au.
O òe, e te mataèinaa a Iakopo e, aòè òe i vavaò mai.
E to Iraene, u te e haapaòpaò òe ia òe iho no te hahi mai.
24 Na to òe tau mikeo, u haaìò òe ia ù
me he ènana haamōèhuìa.
U haapaòpaò to òe tau tekateka ia ù.
25 O au â, o au iho nei,
e haamaakau koè au i to òe hakakiìa.
E haakoè àu i to òe tau mikeo.
TARAMO 41 (40) 2-3a.4a, 5-6, 11a.12a.13
E te Hatu e, a haakoè i tu ù tau piò, he ènana mikeo au nei.
41,5
2 Mamau te ènana hakāòha i te poì veve.
Me io te ìno, e haapohuè te Etua ia īa.
3 E meitaì to īa pohuèìa, koakoa ananu īa.
4 Ia hemo i te mate, o te Hatu to īa toko.
5 E pure au : A hakāòha mai, e te Hatu e.
Ènana mikeo au, a haakoè i tu ù mamae.
6 He tekao kaipipiò to te ènana e mākaka mai.
« A hea e mate ai. A hea e kaò to īa ikoa ?»
11 O Òe te Hatu e, a hakāòha mai.
12 E ìte meitaì au i to Òe haataetae mai.
13 Ua toko mai te Hatu mēìa u teka koè au.
U apuu te Etua ia ù i to Īa aò.
TATAUÌA O TE HĀMANI E ÙA A PAURO PEÀTO
I TO KORINETIA 1, 18-22
E tu ù tau tuàne tuehine.
18 O te Etua tiàtohu te i ìte ia ù.
O te tekao ta ù i peàu atu ia ôtou,
aòè te tekao nātoa : E, aòè.
19 O te Kirito Ietu, te Tama a te Etua,
ta Timoteo, Tira me au nei i hakaìte ia ôtou,
aòè Ia nātoa : E, aòè.
O te « E » o te Etua anaè, i òto o Īa.
20 I òto o Īa hoì he mea « E » anaiho te tau taetae
ta te Etua i peàu e vaièi mai.
Oia te tumu u peàu tātou : Amene,
ma io te Kirito, no te hahi i te Etua.
21 Na te Etua i haatiàtohu i to mātou noho mau i òto o te Kirito,
o mātou nei atii me ia ôtou.
Ua vae te Etua ia tātou me to Īa haapeàto mai.
22 U òomi te Etua i to Īa hakatu i òto o tātou,
ma te vaièi mai i to Īa Kuhane,
me he to mua hope taetae o te nuiìa
o te tau taetae ta Īa i peàu.
ALLELUIA ALLELUIA
cf.Rk.4,18-19
U pōpahi mai te Hatu ia Ietu
no te kave i te Tekao Meitaì Hou Mai i te poì veve,
no te hakaìte i te poì humuìa, e pohuè âtou.
EVANERIO O IETU KIRITO VĀÀNA E MAREKO 2, 1-12
1 Ua tihe hakaùa Ietu i Kafaranaumi.
Ua òko te mataèinaa enā Īa io he haè.
2 Mēìa i te haètoa te i haaputuputu mai,
aòè he kōava i avai pii te avaputa.
U hakako Ietu ia âtou i te Tekao.
3 Ua tihe mai io Īa te mou ènana e kave aa i te ènana hapaa,
tokohā âtou no te amo ia īa.
4 Aòè e koàka ia âtou te haatata mai
mēìa i te nuiìa o te ènana.
No èià, ua piki âtou i ùka o te haè
me to âtou vāvahi i te mēmau tomi ana i te haè,
i ùka toitoi o te kōava i èià Ietu.
U tīputaìa te ava, u haaiho âtou i te òki pateka
me te ènana hapaa moe ana ma ùka.
5 Ua ìte Ietu i to âtou haatià me to Īa peàu i te ènana hapaa :
« E tu ù tama e, u veveteìa to òe tau mikeo. »
6 Enā, u noho i èià mou tuhuka tekao.
U kaituto âtou io he koekoe :
7 « E aha te tekao o te ènana nei ? Ua paha īa.
E koàka ia ai te vevete i te mikeo ? Na te Etua anaè. »
8 Ua ìte anamai Ietu io to Īa kuhane i to âtou kaituto.
U peàu atu Īa ia âtou :
« No te aha e kaituto ôtou atii io he koekoe ?
9 E aha te mea māeka ? Te peàu i te ènana hapaa :
U veveteìa to òe tau mikeo ? Akoè à te peàu :
A tū òe ! A too i to òe òki ! A taha atu ! ?
10 Etià e ìte ôtou he mana ta te Tama a te Ènata
te vetevete i te tau mikeo io he henua. »
11 U peàu Ietu i te ènana hapaa :
« Na ù te peàu ia òe : a tū òe !
A too i to òe òki ! A hua io to òe haè. »
12 Ua tū īa. Ua amo anamai i to īa òki
me te hee i vaho, i te aò o âtou nui.
U mate hoì âtou paotū i te mahaò.
Ua hahi âtou i te Etua, e peàu aa :
« A tahi nei mātou a ìte i te mea atii. »
TOMINIKA E VAÙ
TATAUÌA O TE PEROHETA OHEA 2, 16.17b.21-22
16 Oia nei te Tekao a te Etua :
Ua teka te mataèinaa Iraene, ta ù vehine,
ma te hinenaò pu i te hoa.
E hano au e haahua mai io ù. E aahi au ia īa i te henua ataha,
i èià, e tekatekao māua ma he tiàtohu o te koekoe.
17 I èià, e aotahi mai īa me he mea nā pō hou,
i te ava o to īa hitiìa me io te Henua Ekipito.
21 Tōtahi atu ta te Hatu i peàu :
E ìò òe ta ù vehine tuia.
Aòè òe e paekē hakaùa.
E tuku nei au ia òe i te toitoiìa,
te tiàtohu, te kāòha, te hinenaò.
22 E ìò òe ta ù vehine tuia,
na ù e tuku ia òe i te haatià teka koè,
e haapii òe me te Hatu Etua.
TARAMO 103 (102) 1-2, 3-4, 8.10, 12-13
He moû, he kāòha te hakatu o te Hatu. 103,8
1 E tu ù kuhane, a haameitaì i te Hatu,
Me io he koekoe, a haameitaì i to Īa ikoa peàto.
2 A haameitaì i te Hatu, e tu ù kuhane,
Aua e māhaè e tahi o to Īa vaièiìa.
3 U vevete te Hatu i to òe tau mikeo paotū.
U haakoè te Hatu i te mamae o to òe nino.
4 Na Īa i taki ia òe me io te ana tūpāpaù.
Na Īa i vāhī ia òe i te kāòha me te hinenaò.
8 He moû, he kāòha te hakatu o te Hatu.
U haatevee i to Īa pekē ; ua pī i te kāòha.
10 U te e utu mai te Hatu vāàna i to tātou tau piò.
Aòè e huke Īa i te umu ia tātou poì mikeo.
12 Me he mamao te tiheìa o te òumati me i to īa kaòìa,
U tioà te Etua i te mikeo mamao me io tātou.
13 Me he mea u kāòha te motua i ta īa tama,
Hua hakatu to te Hatu kāòha i te ènana pakaihi ia Īa.
TATAUÌA O TE ÙA O TE HĀMANI A PAURO PEÀTO
I TO KORINETIA 3, 1b-6
E tu ù tau tuàne tuehine.
1 Aha, ua ape mai ôtou i tītahi hāmani haatiàtohu ia mātou iho,
me he mea ua ape ôtou i tahipito poì kē ?
Akoè à, aha na mātou iho e ape i hua hāmani ia ôtou ?
2 Atià, o ôtou anaiho to mātou hāmani haatiàtohu.
Ua patuìa hua hāmani i òto o to mātou hōupo,
me he mea ua ìteìa, e tatauìa e te tau ènana paotū,
3 He mea tāhakahaka hoì, ua ìò ôtou me he hāmani
me io te Kirito, ta mātou i patu, aòè me te hinu,
atià me te mana o te kuhane o te Etua pohuè ;
aòè i ùka o te keâ me he mea a te ture a Moite,
atià i ùka o to te ènana hōupo.
4 Mēìa i to mātou haatià i te Etua,
ta te Kirito i vaièi mai, u vaavō mātou e peàu i hua tekao.
5 U te e koàka ia mātou te kaituto
na mātou anaè e haapao i tītahi hana.
O te Etua te i vaièi mai i te kuhane māàma.
6 O te Etua hoì te i haamāàma mai no te tāvini i te Piimau hou.
Vāàna i hua Piimau, u te e aotahi tātou
i te Ture patuìa, atià à i te Kuhane o te Etua.
O te Ture patuìa te i aahi i te ènana i te mateìa.
O te Kuhane te i vaièi mai i te pohuèìa.
ALLELUIA ALLELUIA
cf.Mk.2,19.22
Mamau te tau hoa i vavaòìa no te koìka mātiri :
na âtou te vino hou, oia hoì te hakatu o te Piimau Hou.
EVANERIO O IETU KIRITO VĀÀNA E MAREKO 2, 18-22
I tēia mou pō,
18 ohia u haaoke te tau kouâ o Ioane me te tau fariteo,
ua tihe mai tahipito io Ietu me to âtou ūiūi atu :
« No te aha u haaoke te tau kouâ o Ioane
me te tau kouâ o te tau fariteo,
atià to òe tau kouâ, aòè âtou e haaoke ? »
19 U peàu atu Ietu ia âtou : « Aha òa e koàka
i te tau hoa vavaòìa i te koìka mātiri,
te haaoke oi noho me âtou te vāhana hou ?
Aòè hoì e hei no âtou te haaoke.
20 Enā a tihe ai te tau â
e takiìa te vāhana hou me i vāveka o âtou,
i tēia mou pō, e haaoke âtou.
21 Aòè te ènana e àpana i te kahu pēpē me te tapa hou,
na te mea e toi te tapa hou i te kahu pēpē,
e haatotahi atu aa i te kehaèìa.
22 Aòè e tahi ènana e kiini i te vino hou i òto o te hue kākiu,
oa haapohā te vino i te tau hue ;
e koè anamai te vino me te tau hue.
Te vino hou i òto o te hue hou. »
TOMINIKA E IVA
TATAUÌA O TE HĀMANI A MOITE PEÀUÌA TEUTERO
5, 12-15
I ùka o te tuaivi Tinai,
u hakaìte te Etua i to Īa makimaki, pēènei :
12 A haamaakau òe i te Tāpati : he  tapu
me he mea ta te Hatu Etua i peàu ia òe.
13 Ma te mou pō e ono, a hana i ta òe hana paotū.
14 Atià, te hitu o te â, he â hakaēa i te hana,
he Tāpati no te hahi i te Hatu, to òe Etua.
Aua òe e hana ta òe tamaòa, ta òe moî, ta òe tueni,
a koè a ta òe tau ànimara me te tau manihii noho aa
i òto o to òe tau pāpuahaè.
A hakaēa òe atii me ta òe tau tāvini vāhana, vehine.
15 A haamaakau hoì òe i te ava
he ènana haamōèhuìa io te Henua Ekipito.
U aahi mai te Hatu i vaho me io hua henua
ma te ìi o to Īa ìma me te tau hana mana.
Oia te tumu u peàu te Hatu ia òe e haatapuìa te  Tāpati.
TARAMO 81 (80) 3-4, 5-6ab, 6c-8b, 10-11ab
A taaàu me te koakoa i te Etua, to tātou ìi. 81,2
3 A ùtu i te pahu, a haataki i te pū,
A òkoìa te kitā me te kinura.
4 Oia nei te meàma hou : a haataki i te pūtoka.
He â koìka no tātou te pō meàma.
5 He ture no Iraene me i kiu mai,
Vāàna i te Tekao a te Etua o Iakopo.
6 Oia ta te Etua i peàu ia Ioteve,
I te ava o to Īa haahika i te Henua Ekipito.
Ua òko au i te mou ponatekao hou :
7 « Me i ùka to īa pauhihi, ua taki au i te amoka.
Aòè e kave ai to īa îìma i te hāìna toko.
8 Ia òomiìa i te mamae, u haapohuè au ia òe.
10 Aua te Etua kē i òto to òe henua.
Umoì e pakaihi òe i te ètua o te tau hāoè.
11 O au anaiho te Hatu, to òe Etua.
Na ù i haahiti ia òe me io te Henua Ekipito.
TATAUÌA O TE HĀMANI E ÙA A PAURO PEÀTO
I TO KORINETIA 4, 6-11
E tu ù tau tuàne tuehine,
6 o te Etua te i peàu mai pēènei :
« A pupuà te àma me io te pō pōtako ! »
O te Etua iho te i haapupuà i to Īa māàma
i òto o to mātou koekoe ma te hakaìte mai
i to Īa kāìè te i haakeàpa i te mata o Ietu Kirito.
7 Atià, ua kave mātou i hua taetae
i òto o te huekeâ te i pohā vave.
Ma èià, ua ìte te tau ènana paotū,
me io te Etua anaè te mana mahaò
o te Evanerio ta mātou e haamevaha nei.
8 Paotū te â, enā te tau kōhii e haaveke mai ;
atià, aòè mātou i hakaēa.
U pepae to mātou tetaììa ; atià, aòè mātou i kuhane koè.
9 Ua tute te tau ènana ia mātou. U pāpua mai te Etua.
U tuàkiìa mātou ; atià, u te e hika mātou.
10 I tēia vahi, i tēia vahi, mei haamateìa mātou
me he mea i kukumiìa Ietu Kirito.
Atià, e pohuè nei mātou
no te haapuàha i te mea e pohuè me Ietu.
11 He tau ènana pohuè hoì mātou
me he poì haametaù, oa haamate nui ìa âtou.
Ma èià, e puàha te Pohuè o Ietu
i òto o to mātou nino te i mate vave.
ALLELUIA ALLELUIA
2Ko.3,6.17
O te Kuhane o te Etua te i vaièi mai i te Pohuèìa.
I èià te Kuhane o te Hatu, i èià te Pohuè.
EVANERIO O IETU KIRITO VĀÀNA E MAREKO 2, 23 - 3, 6
23 I te Tāpati, ua taha Ietu i vāveka o te maaèitā haraoa.
E hee aa to Īa tau kouâ, u huhuti âtou i te kāhui haraoa.
24 U peàu te tau fariteo ia Ietu :
« A tiòhi. Umaha i hana ai to òe tau kouâ
i te hana tapu ma te Tāpati ? »
25 U peàu Ietu ia âtou :
« Aòè ôtou i tatau i te mea i hanaìa e Tavite
me mate īa i te oke, oia hoì me te tau ènana te i hee me īa ?
26 Pēhea ua tomo īa i òto o te haè o te Etua,
i te ava o Aviatere te tāuà nui.
Ua kai īa i te haraoa ùtunaìa io te Etua
te i koàka o te tāuà anaè te kai.
Ua tuku atu Tavite i hua haraoa i te tau ènana e hee me īa. »
27 U peàu Ietu ia âtou :
« U haatoitoiìa te ture o te Tāpati no te meitaì o te ènana.
Aòè i kāneaìa te ènana no te Tāpati.
28 No èià, he hatu o te Tāpati te Tama a te ènana. »
3,1 Ua uu hakaùa Ietu i òto o te tinakoka.
Enā i èià te ènana me te ìma kopa.
2 U kanino âtou ia Ietu mea tiòhi aha e haapohuè Īa
i hua ènana ma te Tāpati. Ua hano hoì âtou te hakatio ia Īa.
3 U peàu Ietu i te ènana ìma kopa :
« A tū òe ! I vāveka ahau ! »
4 U peàu Ietu ia âtou pēènei :
« I te Tāpati, aha e koàka i te ènana
te hana i te hana meitaì, akoè à i te hana pē ?
Te haapohuè i te ènana, akoè à te haamate ia īa ? »
Ua mutu âtou.
5 E tiòhi mau Ietu ia âtou me te mata pekē,
uē aa mēìa i to âtou koekoe pūtuì, u peàu i hua ènana :
« A hohoà i te ìma ! »
U hohoà īa i to īa ìma. U meitaì anamai.
6 Ia uu i vaho te tau fariteo,
u putuputu anamai âtou me te poì kē ana me Herote
no te hakatoo pēhea e haamate âtou ia Ietu.
TOMINIKA ÒNOHUU
TATAUÌA O TE HĀMANI A MOITE PEÀUÌA TENETE
3, 9-15
Ia pūtuì te ènana ma te kai i te puku haatapuìa,
9 u vavaò te Hatu Etua i te ènana me te peàu : « I hea òe ? »
U haahua te ènana me te peàu :
10 « Ua òko au ia òe io he pāpua.
U haametaù au. U kahu koè au. U haapupuni au. »
11 U peàu te Hatu Etua :
« Na ai i hakaìte atu ia òe i te mea u kahu koè òe ?
U haatapu au i te kai i te puku o tītahi tumuâkau.
Aha, ua kai òe ? »
12 U peàu te ènana : « Te vehine ta òe i vaièi mai,
na īa i tuku mai te puku : ua kai au. »
13 U peàu te Hatu Etua i te vehine : « E aha ta òe ? »
U peàu te vehine :
« U haatukee mai te puhi henua. Ua kai au. »
I4 U peàu te Hatu Etua i te puhi henua :
« Mēìa i te mea ta òe i hana,
a ìno òe i vāveka o te tau ànimara
me te tau mēmau pohuè io he èitā.
E totoo òe i àò te aò.
O te èpo ta òe e kai à, paotū te tau â o to òe pohuèìa.
15 E tōtōua atu tōtōua mai òe me te vehine,
e tōtōua to òe ati me to te vehine ati i ùka aè.
E keàhiìa to òe upoko e to te vehine ati i ùka aè,
e kakahu òe i to īa tuke vaevae. »
TARAMO 130 (129) 1-2, 3-4, 5-6ab, 7bc-8
Ohia io te Hatu te kāòha,
Te haapohuèìa hou ananu. 130,7
1 Me i te peteò tu ù taaàu atu,
E te Hatu e, a òko mai i to ù èo.
2 A haaòko meitaì to Òe puaìka
I te takiìa o ta ù pure.
3 Me haamau Òe i te mikeo,
E te Hatu e, na ai te tū aè ?
4 Io Òe te tukuìa o te mikeo.
Ua hopo au, e tetaì ana ia Òe.
5 U tetaì tu ù kuhane i te Hatu.
He mea tiàtohu to Īa tekao ia ù.
6 Tiàtohu atu e tetaì to ù kuhane i te Hatu,
I te ènana tiaki, vaa i te pō.
7 Ohia io te Hatu te kāòha,
Te haapohuèìa hou ananu.
8 E hoko hakaùa te Hatu ia Iraene,
Me i te nuiìa o te mikeo.
TATAUÌA O TE HĀMANI E ÙA A PAURO PEÀTO
I TO KORINETIA 4,13 - 5,1
13 U patuìa i òto o te Hāmani tapu : « U haatià au i te Etua,
Oia nei te tumu ua haki au i ta Īa tekao. »
Atii me mātou : u haatià me mātou,
oia te tumu u hakako mātou i te tekao.
14 Ua ìte hoì tātou : Na te Etua i hakatū hakaùa ia Ietu
me i vāveka o te huaa mamate.
Na Īa iho e haapohuè hakaùa ia tātou kātahi me Ietu.
I muì iho, e apuu mai te Etua ia tātou no te haapii me Ietu.
15 Te mea i haapaòpaò mai, u mamae mātou,
etià he mea meitaì atu ôtou.
Ia haapohuè hoì te karatia vaièiìa e te Etua
i te nuiìa o te ènana, he mea nui te ènana
te i haahuaèkaèka me te haakāìè i te Etua.
16 Oiana te tumu aòè mātou i kuhane koè,
e aha à e pepae atu, pepae atu to mātou nino.
I tēia â, tēia â hoì, u haahouìa to mātou kuhane.
17 Te tau kōhii e haamamae nei,
he mea māeka, he mea pao vave
me kaituto tātou i te taetae ta tātou e tetaì nei :
u te e koàka i te ènana te tatau i hua taetae.
Oia hoì te àva atu i te kāìè nui o te Etua.
18 No èià, aòè tātou e tiòhi anaè i te hakatu o te nino,
atià à i te kuhane : te mea ìtematakoèìa.
Te mea ìtemataìa, u pupuà no te ava poto anaè.
E mau no te pohuè ananu te mea ìtematakoèìa.
5,1 I te ava e mate nui tātou, me he mea u vāvahiìa te haèâ,
to tātou haè noho i te ao nei. Atià, enā me te haè
kāneaìa e te Etua no tātou io he àki.
E noho mau hua haè no te pohuè.
ALLELUIA ALLELUIA
cf. Ap.12,10 ; In.12,31
Eīa e haapohuè te Etua i to Īa mataèinaa
me te hakaìkiìa o to Īa Kirito :
Te Tama a te Ènana te i hapaiìa i ùka o te peka,
e toi mai Īa i te tau ènana paotū.
EVANERIO O IETU KIRITO VĀÀNA E MAREKO 3, 20-35
I tēia mou pō,
20 ua tihe Ietu io he haè.
U haaputuputu hakaùa mai te haètoa nui.
Aòè i koàka ia Ietu me to Īa tau kouâ te kai.
21 Ia òko to Īa huaa i tēnei tekao,
ua tihe mai e hano no te toi no te kave ia Īa me âtou,
e peàpeàu aa : « U tuaave Īa. »
22 U peàu te tau tuhuka tekao te i iho mai me i Ierutaremi :
« O hua Ietu i uuìa e Peretepu.
Ma te ikoa o te hakaìki tiaporo to Īa tute i te tau tiaporo. »
23 U vavaò Ietu ia âtou i pii o Īa me te peàu ia âtou
i tēnei tekao haapupuà :
« Pēhea te koàka e tute Tatane ia Tatane ?
24 Me tōua atu tōua mai te mataèinaa,
epō e hika ai hua mataèinaa.
25 Me tōtōua atu tōtōua mai te huaa haè,
epō e vāvāhiìa te haè.
26 Me tute Tatane ia īa anaiho,
me paekē te tiaporo me te tiaporo,
aòè Tatane e tū mau ai. E koè to īa mana.
27 Atià, aòè e koàka i te ènana e tahi
te uu i òto o te haè o te ènana oko
mea hao i ta īa tau taetae.
E humuìa òmua hua ènana oko.
A tahi a hao te ènana kamo i to īa haè. »
28 Ma te tiàtohu to ù peàu atu ia ôtou :
e haakoèìa te tau tekateka paotū o te tau ènana,
te tau mikeo, te tau paha,
e aha à te nuiìa o to âtou tekao paha.
29 Atià, me paha te ènana i te Kuhane Meitaì,
aòè e ìò hua paha i te haakoè.
E hava mau hua ènana i te mikeo paona koè. »
30 U peàu hoì âtou : « Ua uuìa e te kuhane ìno. »
31 Ua tihe mai te kui o Ietu me to Īa tau teina.
Ua noho âtou ma vaho o te haè
me to âtou pahi atu i te ènana no te vavaò ia Īa.
32 U noho te haètoa vii pu o Ietu.
U peàu âtou ia Īa :
« Enā i vaho to òe kui me to òe tau tuàne tuehine
e hano nei haatutuki me òe. »
33 U haahua Ietu ia âtou :
« O ai òa tu ù kui ? O ai tu ù tau teina ? »
34 U tiòhi i te poì e noho aa vii pu o Īa, u peàu :
« Oia nei tu ù kui me tu ù tau teina.
35 Te ènana e aotahi atu i te makimaki o te Etua,
o īa na tu ù teina, tu ù tuehine me tu ù kui. »
TOMINIKA ÒNOHUU MA TAHI
TATAUÌA O TE PEROHETA EHEKIERE 17, 22-24
22 Oia nei te Tekao a te Hatu Etua.
« Me io te hiku o te tumuâkau tiketike,
e hahati au i te makamaka poto.
E nanu au me to ù îìma i hua makamaka âkau
ma ùka te kapua o te tuaivi tiketike.
E nanu au nei ia īa
ma ùka o te tuaivi tiketike o te Henua Iraene.
23 E tupu, e hua i te puku, e ìò he tumuâkau kaùoo.
I òto o īa, e kānea te tau manu paotū i to âtou kōhata.
Ma àò o īa, he ava maù no te nuiìa
o te tau manu hakatu kē, hakatu kē.
24 E ìte te tau tumuâkau paotū o au nei te Hatu.
E haatopa au i te tau tumuâkau tiketike
me te hakatū i te tumuâkau moe aa i ùka o te tuaèpo.
E haamoô au i te èitā òutītee me te haakutaù i te èitā moô. »
TARAMO 92 (91) 2-3, 13-14, 15-16
E te Hatu e, u hei nui te hīmene hahi i to Òe ikoa. cf.92,2
2 U hei nui te haahuaèkaèka i te Hatu,
Te hīmene hahi i to Òe ikoa, e te Etua tiketike.
3 I te pōpōuì, e haamevaha i te òko o to Òe kāòha,
I te ahiahi te haatiàtohu i to Òe vaièiìa.
13 E tupu te ènana toitoi me he tumuâkau èhi
E hohoà ana i to īa tau makamaka,
14 Hakatu me te âkau o te tuaivi Ripano,
Nanuìa io te pāpua tapu o to tātou Etua.
15 E hua īa i te puku tihe to īa kooūa pē,
Pī i te èpau hakatu me to te nino hou,
16 No te haamevaha i te tekao : « U toitoi te Hatu.
Aòè e hakahae te Etua, to ù motukeâ. »
TATAUÌA O TE HĀMANI E ÙA A PAURO PEÀTO
I TO KORINETIA 5, 6-10
E tu ù tau tuàne tuehine.
6 Oia te tumu ua ūo ananu to tātou tetaììa,
e aha à to tātou noho io he nino,
hakatu me he manihii e noho aa i te henua mamao
me io te haè o te Hatu.
7 E pohuè ana i te ao nei, ua taha tātou i òto o te haatià,
ìtemata koè ia Ietu.
No èià, ua ūo to tātou haatià, e kōhoà nei te haapaekē
me io te haè o to tātou nino, no te noho io te haè o te Hatu.
9 E tahi anaiho hīa o tātou : te haaèka i te Etua,
e aha à e noho tātou i te ao nei, akoè à io te haè o te Hatu.
10 Ma tītahi â hoì, e tū tātou paotū i mua o te Kirito
no te haatoitoi i te tekao.
A tahi a tuhaìa i tītahi to īa tuki, i tītahi to īa tuki,
vāàna i ta īa hana i te ava o to īa noho i òto o te nino,
hana meitaì, akoè à hana pē.
ALLELUIA ALLELUIA
cf. Mt.13,4.23
Ua tūtū te Kirito i te kākano o te Tekao Meitaì Hou Mai.
Mamau te ènana e apuu i hua tekao, e hua īa i te puku.
EVANERIO O IETU KIRITO VĀÀNA E MAREKO 4, 26-34
I tēia mou pō, u peàu Ietu i te haètoa :
26 « U hakatu te Patirēia o te Etua
me te ènana te i tūtū i te kākano io he èpo.
27 Me hiamoe īa, me vaa īa, â te pō,
ua hua te kākano, ua tupu aè.
Pēhea te koàka ? Aòè īa i ìte.
28 E haatupu hoì te èpo i to īa puku na īa ta īa :
òmua ìka te tumu o te èitā, i muì iho te kāhui,
i muì mai te haraoa te i haapī i te kāhui.
29 Ia paa te puku, e kokoti te ènana i te èitā haraoa,
na te mea ua tihe te ava kohi i te puku. »
30 U peàu Ietu : « E aha te hakatu o te Patirēia o te Etua ?
Ma te tekao haapupuà hea ta mātou e hakaìte atu ?
31 U hakatu me te kākano terepota.
Ia tūtūìa io he èpo, he kākano hunahuna ti.
He kākano iti atu i te tau kākano paotū io he henua.
32 Ia tūtūìa, e tupu aè, tupu aè, e ìò te òa atu
i tahipito tau èitā nanuìa. U òoa to īa tau makamaka.
I to īa vahi maù, e kōhiihii te tau manu i to âtou kōhata.
33 Ma te nuiìa o te tekao haapupuà hakatu me tēia,
u hakako Ietu i te haètoa, vāàna e koàka ia âtou te vivini.
34 Aòè Ietu i hakako i te haètoa ma he tekao haapupuà koè.
Ia paekē âtou me io te haètoa, u haavivini Ietu
i te tiàtohu o te tekao haapupuà i to Īa tau kouâ.
TOMINIKA ÒNOHUU MA ÙA
TATAUÌA O TE HĀMANI A IOPE 38, 1.8-11
1 Me i vāveka o te metaki kāviivii me te ūa,
u peàu te Hatu ia Iope, pēènei :
8 « Me pihiti anamai te tai me io te peteò hōhonu maa ti,
o ai te i pā i to īa taheìa me te haakoè i to īa puta mai ?
9 I hea òe i te ava u kānea au i te kohu mea uhi i te tai ?
I hea òe ia vāhī au ia īa me te ao me he èpaèpa no īa ?
10 I hea òe i te ava i haahei au i te kotina o te tai
me to ù kānea i te tau avaputa, u te e koàka ia īa te pepeù ?
11 I hea òe i te ava to ù peàu atu i te tai :
« E tihe òe io tēnei vahi.
Aua òe e taha i mua atu, înei e hakaēa te kāìè
o to òe tau kaùtai koùkoùa atu koùkoùa mai. »
TARAMO 107 (106) 21a.22a.24, 25-26a.27b, 28-29, 30-31
A haahuaèkaèka i te Hatu, mēìa i to Īa tau hana mahaò.
cf.107,8
21 A haahuaèkaèka âtou i te Hatu mēìa i to Īa kāòha.
22 A ùtuna âtou i te hēaka haahuaèkaèka.
24 Ua ìtemata âtou io te tai nui
I te hana mahaò, hana mana o te Hatu.
25 U pohā te èo o te Etua, ua puhi anamai te metaki,
Koùkoùa atu, koùkoùa mai te tai pekē.
26a Ua hiti te vaka i te ataàki, ua iho i te peteò,
27b E takanini te upoko, ua kaò to âtou maakau.
28 U taaàu âtou io te Hatu me te koekoe pūpūkina,
Na Īa i haakoè i to âtou hopo nui.
29 U haamenino te Hatu i te tai pekē,
U haakoè i te pokokina o te tau koùkoù tai.
30 Ia mate te tai, u koakoa te tau ènana,
Koakoa atu ia tau io te kaavai ta âtou i makimaki.
31 A haahuaèkaèka âtou i te Hatu mēìa i to Īa kāòha,
Ua hana Īa i te hana mahaò i uē i te tau ènana.
TATAUÌA O TE ÙA O TE HĀMANI A PAURO PEÀTO
I TO KORINETIA 5, 14-17
E tu ù tau tuàne tuehine e.
14 O to te Kirito hakāòha mai te i hakapahi ia mātou
no te hana me he mea ua ìte ôtou.
Ua mate nui te Kirito i uē i te tau ènana paotū ;
no èià, me he mea u mate nui vāàna e te kuhane tātou paotū.
15 Ua mate nui te Kirito no te tau ènana ia ôtoa,
etià, aòè e pohuè no to âtou meitaì anaiho, atià no te Kirito,
te poì e pohuè nei i te pohuè hou.
Na te mea, ua mate nui te Kirito i uē ia tātou,
ua tū hakaùa Īa i uē ia tātou.
16 I tēnei, mēìa he poì haatià tātou,
aòè tātou e ìte i te tau ènana vāàna i te maakau ènana anaè.
Ma te tiàtohu, òmua, atii to mātou ìte i te Kirito,
vāàna i te maakau ènana.
I tēnei, he mea kē to tātou ìte i te Kirito.
17 Me haatahi te ènana me te Kirito,
ua ìò hua ènana me he mēmau pēpenahouìa.
Ua koè te hakatu pohuè kākiu.
U tīmata te hakatu pohuè hou.
ALLELUIA ALLELUIA
cf. Ta.66,5 ; 29,3 ; 65,8
A mai. A ìte ôtou i te tau hana mahaò o te Etua.
Ua òkoìa te èo o te Hatu ma ùka aè o te metaki.
U haamenino te Hatu i te pokokina o te tai.
EVANERIO O IETU KIRITO VĀÀNA E MAREKO 4, 35-41
Me i te pōpōuì, ua hakako Ietu i te haètoa.
35 I te ahiahi o hua â anaiho, u peàu Ietu i to Īa tau kouâ :
« A hee tātou i tītahi kēkē o te tai. »
36 E avai aa i te haètoa,
u aahi ponihoo âtou ia Ietu i òto he vaka.
Enā me te mou vaka kē te i tihe me Ietu.
37 Ua puhi anamai te tūaio metaki oko.
Ua hati te kaùtai io he vaka, mei pī i te ìu.
38 Ua noho Ietu i hope nui o te vaka ma ùka o te patiètiè.
U hiamoe Īa. U hakavaa âtou ia Īa me te peàu :
« E Tuhuka e, e aha ta Òe ? Enā e kaò tātou ! »
39 Ia vaa Ietu, u oonaki oko ki i te metaki me to Īa peàu i te tai :
« Tuìtuì òe ! A mutu ! »
Ua koè te metaki. U menino paa te tai.
40 U peàu Ietu ia âtou :
« Umaha to ôtou haametaù ?
E aha ? U te e haatià ôtou ? »
41 Ua pē âtou i te haametaù nui me te peàu te hoa i te hoa :
« O ai òa tēnei ?
E aotahi atu ia Īa te metaki me te tai ! »
TOMINIKA ÒNOHUU MA TOÙ
TATAUÌA O TE HĀMANI O TE MĀÀMA 1, 13-15 ; 2,23-24
13 Aòè te Etua i pēpena i te mateìa.
U te e haaèka i te Etua te mate nui o te mēmau pohuè.
14 Te Pohuè. Oia te tumu o to te Etua
pēpena i te tau mēmau paotū.
Te mea i pēpenaìa, he mea meitaì âtou paotū.
I òto o âtou, u te e koàka mai te mea tekeo haamate.
He mana koè te Havaiki io te ao nei.
15 E noho mau paona koè te hana toitoi.
23 U pēpena te Etua i te ènana no te pohuè mau ananu.
U kānea te Etua i te ènana e ata no Īa iho.
24 Ua tihe te mateìa i te aomāàma nei
ma te hana keitani o te tiaporo.
O te poì kē me te tiaporo te i mate nui ananu.
TARAMO 30 (29) 3-4, 5-6ab, 6cd.12, 13
E te Hatu e, u haatiketike au ia Òe te i hakatū mai ia ù. 30, 2
3 I te ava e taaàu to ù èo io Òe,
E te Hatu, tu ù Etua e, u haameitaì mai.
4 Ua taki mai Òe me io he ōpata,
U haapohuè mai me i te ana o te tūpāpaù.
5 A hahi i te Hatu, ôtou, e te poì haatià e.
A haahuaèkaèka ma te haaòko nui i to Īa ikoa.
6 He ava poto to te Etua pekē,
Ma te òa o te pohuè to Īa haameitaì.
I te ahiahi, e tahe te vaimata ;
Ma te pōpōuì, te taaàu koakoa.
12 U haaìò Òe i tu ù uēuē me he â koìka.
Ua veti i to ù kahu pēpē no te uhi mai me te koakoa.
13 A taaàu i te koakoa, e tu ù kuhane.
Umoì òe e mutu pu, a haakoìka no te Hatu.
E hahi au hakaēa koè i te Hatu, tu ù Etua.
U haahuaèkaèka au ia Òe, e te Hatu e.
TATAUÌA O TE HĀMANI E ÙA A PAURO PEÀTO
I TO KORINETIA 8, 7.9.13-15
E tu ù tau tuàne tuehine,
7 O ôtou te kuà o te poì kiritiano,
mēìa i to ôtou haatià te haamevaha i te Evanerio,
te ìte māàma o te Etua, te ūo no te tāvini atu i te hoa,
te kāòha ta ôtou i koàka mai me io mātou.
Atii hoì, e kōhoà ta ù he mea meitaì atu
to ôtou vaièiìa i to tahipito.
9 Ua ìte hoì ôtou i te vaièiìa o to tātou Hatu Ietu Kirito.
E aha à na Īa te tau taetae ia ôtoa,
ua ìò Īa he ènana veve oko
etià e tapavaù nui ôtou mēìa i to Īa haaveveìa.
13 Aòè au e hano e haatoko i to ôtou amoka
no te haamāeka i to tahipito.
Te haatūtahi te hoa me te hoa, oia te mea e hei.
14 I tēnei, u tapavaù ôtou, enā to tātou tau hoa io he àì.
A toko ôtou ia âtou.
Me tihe te â e tapavaù âtou, o ôtou â io he àì,
na âtou e toko mai ia ôtou.
Ma èià hoì, e ìò hua mea anaiho te hoa me te hoa.
15 U patuìa i ùka o te Manahū me io he àki mai :
« Me kohi tītahi i te nuiìa, aòè he mea i toe.
Me kohi tītahi i te mea iti, ua àva no īa. »
ALLELUIA ALLELUIA
2Tm.1,10
O Ietu Kirito to tātou Haapohuè. U tuàki Īa i te mateìa.
Ma to Īa Evanerio, u haapupuà i te pohuèìa hou paona koè.
EVANERIO O IETU KIRITO VĀÀNA E MAREKO 5, 21-43
Akoè à 5,21-24.35b-43
I tēia mou pō,
21 ua hee Ietu ma he vaka i tītahi kēkē o te tai.
U haaputuputu te haètoa nui vii pu o Īa.
Ua noho Īa i te hiku o te tai.
22 Ua tihe mai e tahi hakaìki vivini o te tinakoka,
o Ihaira te ikoa.
E ìte aa ia Ietu, ua hika Ihaira pii nā vaevae o Īa.
23 U toutaki atu ia īa Ietu me te peàu :
« Mei mate nui tu ù moî. A mai.
A hapai i to Òe îìma i ùka o īa, etià e pohuè.
Umoì īa e mate !
24 Ua hee Ietu me īa.
Ua ūtaì ia Īa te haètoa nui, e haatita aa vii pu o Īa.
25 Enā e tahi vehine hemoìa i te mate kātahe,
ònohuu ma ùa èhua i tēnei me i to īa hemoìa i hua mate.
Ua oko to īa mamae mēìa i te nuiìa o te tātihi.
Mei pao nui ta īa taetae paotū.
Atià, u te e àkaàka to īa mamae, ua oko aè anaiho.
27 Ua òko hua vehine i te tekao hou no Ietu.
U haatata mai ma to Īa tua
me to īa haatukia pu me to Īa kahu.
28 U peàu hoì : « Me koàka ia ù
te haatukia pu me to Īa kahu, e pohuè au. »
29 Ua maha anamai te tahe o te toto.
Ua òko ma òto o īa u meitaì to īa nino.
30 Atià, ua ìte Ietu ua ìò atu te mana me i òto o Īa.
U hāìu Īa, e tiòhi aa i te haètoa. U peàu Īa :
« O ai te i haatukia pu me to ù kahu ? »
31 U peàu to Ietu huaa kouâ ia Īa : « A tiòhi Òe.
U haatita te haètoa vii pu o Òe me to Òe ūi mai :
o ai i haatūkia pu ia ù ? »
32 U tiòhi Ietu vii pu o Īa mea ìte i te vehine te i hana i tenā mea.
33 E ìte aa hua vehine i te mea hou i òto o īa,
ua hemo i te haametaù me te emièe.
Ua hika īa pii nā vaevae o Ietu me to īa haki atu i te tiàtohu.
34 U peàu Ietu ia īa :
« E tu ù moî e, mēìa i to òe haatià, i pohuè ai òe.
A taha atu me te moû. A koè nui to òe mate ! »
35 Aòè i pao èka ta Ietu tekao i hua vehine,
ua tihe mai te mou keèe me io he haè
o te hakaìki vivini tinakoka.
U peàu âtou : « Ua mate nui ta òe moî.
Umaha e haapaòpaò pu i te Tuhuka ? »
36 Atià, ua òko Ietu i hua tekao.
U peàu Īa i te vivini o te tinakoka :
« Umoì òe e haametaù. A haatià anaè ! »
37 Aòè Ietu i ao e hee atu e tahi ènana me Īa,
o Petero anaè, o Iakopo me Ioane, te teina o Iakopo.
38 Ua tihe âtou io te haè o te vivini o te tinakoka.
Ua òko Ietu i te pokokina.
Ua uēuē te haètoa me te taaàu i te ûûkina.
39 Ua tomo Ietu i òto o te haè me te peàu ia âtou :
« No te aha to ôtou pokokina nei ? No te aha te uēuē atii ?
Aòè te tama i mate nui. U hiamoe anaiho. »
40 U kakata âtou ia Īa.
Atià, ua tute Ietu ia âtou nui i vaho.
Ua too me Īa i te motua me te kui o te tama
atii me nā ènana i titihe mai me Īa.
Ua uu Īa i òto o te pāòto i èià te tama.
41 Ua too Ietu i te ìma o te tama me te peàu :
« Talita kumi ! »
O hua mea anaiho : « E pāhoè, na ù te peàu : a vaa ! »
42 Ua maô anamai te pāhoè me to īa taha.
E ònohuu ma ùa hoì o īa èhua.
Ua pē âtou i te mahaò me te emièe.
43 U oonaki Ietu ia âtou umoì e haki atu i te ènana e tahi.
U peàu Īa no te tuku i te mea kai i te pāhoè.
TOMINIKA ÒNOHUU MA HĀ
TATAUÌA O TE HĀMANI A TE PEROHETA EHEKIERE
2, 2-5
2 Ua iho mai te kuhane i òto o au nei, me to īa hakatū ia ù.
A tahi, ua òko au i te èo o te Hatu te i peàu mai :
« E te tama ènana e, e pahi nei au ia òe
io te tau tama Iraene,
io tēia mataèinaa pūtuì te i hakaki ia ù.
3 Tihe i tēnei â, âtou me to âtou tupuna i hakaki ia ù.
He tau tama mata heò âtou me te koekoe tōtohe to âtou.
4 E pahi nei au ia òe io âtou me to òe peàu atu :
« Pēènei ta te Hatu Etua tekao... »
5 A tahi, e aha à aòè âtou e hakaòko mai,
mēìa he ati pūtuì anaiho âtou,
e ìte âtou me te tiàtohu :
ua tū e tahi Peroheta i vāveka o âtou. »
TARAMO 123 (122) 1-2a, 2bcd, 3-4
E te Hatu e, u heau to tātou mata io Òe,
e tiaki ana i to Òe hakāòha mai. cf.123,2
1 E te Hatu e, io Òe to ù mata,
o Òe te i noho nei io he àki.
2 Me he mea e heau te tueni
E tiòhi ana i te ìma o to īa vivini,
Me he mea e tiòhi mau te vehine tāvini
I te ìma o to īa haatepēiù,
Atii to tātou mata io te Hatu,
E tiaki ana i to Īa hakāòha mai.
3 E te Hatu e, a hakāòha mai ia mātou.
Ua kū mātou i te òko i te tekao haamāio mai.
4 U paòpaò mātou e hakaòko ananu
I te poì tapavaù e haamee mai.
TATAUÌA O TE ÙA O TE HĀMANI A PAURO PEÀTO
I TO KORINETIA 12, 7-10
E tu ù tau tuàne tuehine,
7 Ua àva te tekao māàma i hakaìteìa mai e te Etua
no te haatupu i te kāìè pu i òto o to ù koekoe.
No te haakoè i hua kāìè pu,
enā u veòìa to ù nino me te taa :
o te tiaporo te i pōpahi no te papaki ia ù.
8 Ua ape au i te Hatu, e toù apeìa,
no te haamamao i tēia taa me io ù.
9 U peàu mai te Hatu pēènei : « E àva to ù karatia.
U puàha to ù mana i òto o te keèe me te hakatu pepae.
No èià, e hakaìka koè au no te peàu :
to ù hakatu pepae te tumu o tu ù kāìè.
Ma èià hoì, e noho i òto o au nei te mana nui o te Kirito.
10 Oia te mea haaèkaèka ia ù : te ìi koè, te mea haamāio mai,
te tau kōhii haamamae, te tekao tīvava e hakatio pu mai,
te tau veke e mākaka mai mēìa i te ikoa o te Kirito.
Na te mea, i te ava u pepae au,
a tahi, enā i òto o au nei te mana o te Kirito.
ALLELUIA ALLELUIA cf.Rk.4,18
U pōpahi te Hatu ia Ietu, to Īa tāvini,
no te hakaìte atu i te poì veve
i te Tekao Meitaì Hou Mai o te pohuè.
EVANERIO O IETU KIRITO VĀÀNA E MAREKO 6, 1-6
I tēia mou pō,
1 ua tihe Ietu io to Īa henua tumu.
To Īa huaa kouâ me Īa.
2 I te Tāpati, u hakako Īa i òto o te tinakoka.
Ua pē i te mahaò te nuiìa o te ènana
i te hakaòko ia Īa. U peàu âtou :
« Me i hea mai ta Īa o te tau mea nei ?
Nui te māàma i vaièiìa ia Īa !
E aha oti te tau hana mana ma to Īa nā îìma ?
3 Aòè à o Īa nei te kamuta ?
Aòè à o Īa nei te tama a Maria,
te tuaana o Iakopo, o Iote, o Iuta me Timone ?
Aòè à i vāveka o tātou nei to Īa tau tuehine ? »
U te e haatià âtou ia Ietu.
4 U peàu Ietu ia âtou :
« U haameeìa te peroheta io to īa henua,
io to īa haè, i vāveka o to īa huaa anaiho. »
5 Aòè i koàka ia Ietu te hana i te hana mana i èià.
U haapohuè Īa anaè i te mou ènana hōpī
ma te hapai i to Īa nā îìma i ùka o âtou.
6 U mahaò Ietu i to âtou haatià koè.
Ua vii Īa i te tau pāpuahaè kē tata mai,
e hakako aa i te Tekao.
TOMINIKA ÒNOHUU MA ÌMA
TATAUÌA O TE PEROHETA AMOTE 7, 12-15
12 I muì iho, u peàu Amatia i te peroheta Amote :
« A taha atu òe me i înei, o òe me to òe tau moemoeā.
A hee atu i te Henua Iutea.
I èià, e pohuè meitaì òe
ma te hana i to òe hana peroheta.
13 Înei, i Petere, a haakoè i to òe tekao peroheta
na te mea oia nei te pāpua me te vahi tapu
o te hakaìki o te Henua Tamaria. »
14 U haahua atu Amote ia Amatia :
« Òmua atu nei, u te e hana au i te hana peroheta.
Aòè hoì au e tama na te peroheta.
He ènana tiaki piha anaiho au nei,
he ènana ìte i te auà i te tau tumuâkau fiko.
15 Atià, ua vae te Hatu ia ù
oi noho au nei i vāveka o te naho piha.
Na Īa i peàu mai :
A tū òe me he peroheta no tu ù mataèinaa Iraene. »
TARAMO 85 (84),9ab-10, 11-12, 13-14
E te Hatu e, a hakaìte mai i to Òe kāòha,
A vaièi mai i to Òe haapohuèìa. 85,8
9 E hakaòko au : E aha òa ta te Hatu e peàu.
Oia nei ta te Hatu Etua i peàu : te moû,
Io he henua no to Īa mataèinaa,
10 U tata èka to Īa haapohuè no te ènana haatià.
E noho te kāìè o te Etua io to tātou henua.
11 U tutuki te kāòha me te tiàtohu.
Ua hoki atu hoki mai te toitoi me te moû.
12 E tupu te tiàtohu me io he henua.
E tiòhi mai te toitoi me io he àki.
13 E vaièi mai te Etua i to Īa taetae kāòha.
E hua to mātou henua i to īa puku.
14 E taha te toitoi ma mua o te Hatu,
E hakaìte hua toitoiìa i te vaanui.
TATAUÌA O TE HĀMANI A PAURO PEÀTO I TO EFETIA
1, 3-14
3 A haameitaììa te Etua
me te Motua o to tātou Hatu, Ietu Kirito.
Io he àki, i òto o te Kirito, u haameitaì hoì te Etua ia tātou,
ma te haapī mai me te taetae kuhane.
4 Òmua naoti, ma mua o to Īa pēpena i te ao nei,
ua vae te Etua ia tātou i òto o te Kirito,
etià e peàto, teka koè tātou i to Īa aò,
e pohuè ana i òto o te kāòha.
5 Ma mua o te Pēpena, mēìa i to Īa vaièi anamai,
ua vae te Etua ia tātou, na Īa ta Īa anaè,
etià e ìò tātou he tau tama no Īa, ma io Ietu Kirito.
6 A hahiìa te Etua, no to Īa karatia mahaò,
ta Īa i vaièi mai ia tātou, i òto o to Īa Tama tāhia.
7 I òto o te Kirito pāokapekaìa, u haapohuè te Etua ia tātou,
ma te haakoè i to tātou tau mikeo.
8 Oia te nuiìa o te karatia ta te Etua i vaièi ia tātou,
vāàna i to Īa maakau māàma.
9 U hakaìte te Etua i to Īa makimaki hakanā,
to Īa hīa me i òmua naoti, te i haapao ai ma io te Kirito.
10 I te ava paoìa e haaheiìa,
te haatūtaì i te tau mēmau o te ao nei,
to te àki, to te henua ia ôtoa,
ma àò o te upoko e tahi, te Kirito.
11 I òto o te Kirito, ua vae te Etua
te i haatee i te tau mea hakatahi vāàna i to Īa makimaki,
ua vae hoì te Etua ia mātou, te tau ati Iuta,
etià e ìò mātou he mataèinaa no Īa.
12 Oia te tumu e hahi me te haakāìè mātou i te Etua,
mātou te mataèinaa e tetaì ana i te Kirito,
ma mua to Īa tiheìa mai.
13 I òto o te Kirito, atii me ia ôtou, e te tau êteni e,
ua ìò ôtou he mataèinaa o te Etua,
mēìa to ôtou apuu i te Tekao Meitaì Hou Mai
te i haapohuè ia ôtou.
I òto o te Kirito, u apuu ôtou i te haatià ;
no èià, u òomi te Etua ia ôtou
me te hakatu o te Kuhane Meitaì.
O hua Kuhane Meitaì to mua hope taetae
ta te Etua i peàu i to Īa mataèinaa.
14 Oia te tumu i tetaì mau ai tātou i te haapohuèìa
ta te Etua e vaièi mai i to Īa huaa vaeìa.
He mea hei nui e hahi tātou me te haakāìè i to Īa ikoa.
ALLELUIA ALLELUIA
cf.Ta.19,5
Atià, u mevaha te tekao o tēia tau keèe,
Ua tihe to âtou tekao i te kotina o te henua.
EVANERIO O IETU KIRITO VĀÀNA E MAREKO 6, 7-13
I tēia mou pō,
7 u vavaò Ietu io Īa i te Tīònohuu ma tokoùa
me to Īa pōpahi atu ia âtou, tokoùa, tokoùa.
Ua tuku atu ia âtou i te mana
i ùka o te tau kuhane ìno.
8 U peàu Ietu ia âtou ma to âtou heeìa io he vaanui :
umoì e kave i te mēmau, e tahi tokotoko anaè,
umoì te kete avaina taetae, umoì te oà,
umoì te moni i òto o te kato.
9 Atià, a oka i te aihū io te vaevae.
« Umoì ôtou e uhi e ùa kahu. »
10 Tōtahi atu to Īa peàu : « Me apuu tītahi haè ia ôtou,
a nonoho i èià tihe i to ôtou heeìa atu.
11 Me he mea aòè ôtou e apuuìa,
aòè e hakaòkoìa i tītahi pāpuahaè,
a hee atu me i èià,
a tūtū i te èpo me i àò o to ôtou vaevae
mea oonaki ia âtou. »
12 Ua hee atu te tau àpotoro.
U hakako âtou i te tau ènana etià e hāìu i te koekoe.
13 Ua tute âtou i te nuiìa o te tiaporo.
Ua paù âtou me te kao i te nuiìa o te poì hōpī.
U haameitaììa hua poì.
TOMINIKA ÒNOHUU MA ONO
TATAUÌA O TE HĀMANI A TE PEROHETA IEREMIA
23, 1-6
1 Oia nei te Tekao a te Hatu Etua :
« E te poì pē, ôtou te tau tiaki mutō o tu ù pāpua.
U avai ôtou e hika me te haatavavāìa te tau mutō.
2 A òko ôtou i te tekao a te Hatu, te Etua o Iraene,
i ùka o te tau tiaki e haatee i tu ù mataèinaa.
U tavavā tu ù tau mutō, u hukaka âtou
mēìa aòè ôtou i tiòhi meitaì ia âtou.
3 O au à, e haavā au ia ôtou mēìa i to ôtou hana mākaka.
Atii ta te Hatu i peàu atu.
O au iho, e haaputuputu au i te toeka o tu ù tau mutō
me io te tau henua paotū ta ù i haatavavā ia âtou.
4 Na ù e haahua mai io to âtou pāpua pī i te mutiē ;
e hānahānau âtou me to âtou haanui aè, nui aè.
E vae au i te tau tiaki no te aahi ia âtou.
Aòè âtou e haametaù hakaùa, aòè e paòpaò hakaùa.
U te e kaò pu tītahi. Oia nei te tekao a te Hatu.
5 Eīa e tihe te tau â, e tuku au ia Tavite i te huì toitoi noa.
E vivini īa me he hakaìki tiàtohu ; he māàma ta īa tekao,
e haatee īa i te henua vāàna i te ture me te toitoi noa.
6 I hua ava, e pohuè meitaì te ati o Iuta
e noho me te moû to Iraene.
E apaìa to īa ikoa : « Te Hatu, to tātou Toitoi. »
TARAMO 23 (22) 1-2a, 2b-3, 4, 5, 6
O te Hatu to ù Tiaki meitaì, e aha te mea e toe ? 23,1
1 O te Hatu to ù Tiaki meitaì,
E aha te mea e toe ?
2 U aahi mai te Hatu no te hakaēa
Io he pāpua pī i te mutiē hou.
3 U aahi mai te Hatu io te punavai ;
I èià, u haahouìa to ù pohuè.
U haatee mai Īa ma he vaanui toitoi
No te kāìè o to Īa ikoa.
4 No tu ù taha ma he vao maù nui,
Aòè au e haametaù i te ìno.
I èià, o Òe me au nei, e te Hatu e.
O to Òe tokotoko te i aahi mai me te moû.
5 E te Hatu e, ua tuku mai Òe i te oà
I mua o te tau ènana e haatōtōua mai.
Ua paù Òe i tu ù upoko me te kao.
U haakoakoa mai te hope taetae tukuìa mai.
6 Te koakoa me te èkaèka me au nei
Ma te òa o to ù pohuèìa.
E noho au io te haè o te Hatu
Ma te nuiìa o to ù tau â.
TATAUÌA O TE HĀMANI A PAURO PEÀTO I TO EFETIA
2, 13-18
E tu ù tau tuàne tuehine.
13 I tēnei, i òto o te Kirito, ôtou te i noho mamao,
u haatata mai ôtou mēìa i te ùtuna hēaka o te Kirito.
14 Te Kirito anaiho te tumu o to tātou moû ;
na Īa e haatūtaì i te tau êteni me te tau ati Iuta
i òto o te mataèinaa e tahi.
Ma to Īa matena, u vāvahi te Kirito i te pā e haapaekē
ia âtou me he nā mataèinaa tōtōua atu tōtōua mai.
15 U haakoè te Kirito i te Ture, te nuiìa o te mea tapu
me te tau tekao kē, tekao kē o hua Ture,
vāàna te pēpena i òto o Īa i te mataèinaa e tahi anaè,
me he ènana hou e tahi anaè.
Ma èià, u vaièi mai i te moû.
16 Ma to Īa mateìa io he peka,
u haakoè te Kirito i to âtou haahaa me te tōtōua.
Ma to Īa peka, u haatūtaì te Kirito
i nā mataèinaa e ùa me he nino e tahi,
no te haatutuki ia âtou me te Etua.
17 Ua tihe mai hoì te Kirito no te hakaìte atu
i te Tekao Meitaì Hou Mai o te moû i te tau ènana paotū,
ia ôtou, e te tau êteni te i noho mamao me io te Etua,
me ia ôtou, e te tau ati Iuta, te i haapii me te Etua.
18 Tātou me te tau ati Iuta me te tau êteni,
ma io te Kirito, u koàka ia tātou paotū
te haapii me te Etua Motua, i òto o te Kuhane e tahi.
ALLELUIA ALLELUIA
cf.In.10,14-15
Ietu, te Tiaki Meitaì, ua ìte i to Īa tau mutō, ua ìte âtou ia Īa : Ua tuku atu Īa i to Īa pohuè i uē ia âtou.
EVANERIO O IETU KIRITO VĀÀNA E MAREKO 6, 30-34
I tēia mou pō,
30 u putuputu mai te tau Àpotoro ma te kaokao o Ietu.
Ua haki âtou ia Īa i te hana ta âtou i hana atu,
te tekao ta âtou i hakako atu.
31 U peàu Ietu ia âtou : « A hee ôtou i te vahi kē,
io te henua viviiō. A hakaēa ôtou i te ava poto. »
Aòè hoì i koàka ia âtou te kai
mēìa i te nuiìa o te ènana
e tihe mai me te taha atu.
32 No èià, ua piki âtou i ùka o te vaka
me to âtou hee atu i te henua viviiō i te vahi kē.
33 Ia ìte te haètoa i to âtou heeìa, u vivini âtou nui.
Me i tēia haè, tēia haè,
u tohuti anamai âtou ma he vaevae.
O âtou te i tihe mai òmua, epō Ietu me to Īa huaa kouâ.
34 I te tauìa o Ietu i uta,
ua ìte Īa i te haètoa nui putuputuìa i èià.
U mehea te koekoe o Ietu mēìa ia âtou
na te mea me he naho mutō âtou, aòè he ènana tiaki.
A tahi a tīmata Ietu e hakako ia âtou.
He mea òa to Īa hakakoìa.
TOMINIKA ÒNOHUU MA HITU
TATAUÌA O TE HĀMANI E ÙA O TE TAU HAKAÌKI
4.42-44
42 I tēia mou pō, ua oke nui te henua.
Ua too te ènana i te hope o te tau puku i kohihouìa :
tekau haraoa me te kākano tee i òto o te kaka.
Ua tuku atu īa i hua mēmau kāòha i te peroheta Erihea.
43 U peàu Erihea : « A tuha atu i te tau ènana. A kai âtou. »
U peàu to īa tāvini :
« E ìma hānere ènana âtou paotū. Pēhea te tuha atu ?
U peàu hakaùa Erihea :
A tuha atu i te tau ènana paotū. A kai âtou.
Oia nei te tekao a te Hatu :
A kai haamaòna âtou.
Enā e toe hakaùa te mea e kai. »
44 Ua tuha atu te tāvini i te tau ènana i te haraoa me te kākano.
Ua kai haamaòna âtou. Aòè i pao te mea e kai.
Atii hoì ta te Hatu i peàu.
TARAMO 145 (144) 10-11, 15-16, 17-18
Ua tuha Òe i te mea e hei, i kai ai haamaòna mātou. 145,16
10 E te Hatu e, a hahi te tau mēmau paotū
Me te haahuaèkaèka to mataèinaa ia Òe.
11 E haavivini âtou i te kāìè o to Òe Patirēia,
E vānana âtou i to Òe tau hana mahaò.
15 U heau io Òe te mēmau pohuè paotū
E tetaì aa i to âtou oà me io Òe.
16 Ua tuha to Òe nā îìma i te mea e hei :
E kai haamaòna te tau mēmau pohuè kōtoa.
17 U toitoi noa to te Hatu makimaki paotū.
O te kāòha te tumu o to Īa tau hana ia ôtoa.
18 U tata èka me te poì i vavaò ia Īa
E pure aa ma io he koekoe tiàtohu.
TATAUÌA O TE HĀMANI A PAURO PEÀTO I TO EFETIA
4, 1-6
1 O au nei Pauro, io he haèhumu,
mēìa u tāvini au i te Hatu.
U toutaki au ia ôtou no te pohuè
vāàna i to te Etua makimaki te i vavaò ia ôtou.
2 A haapāpaku ôtou, a moû te koekoe,
a tohe mau paòpaò koè.
A kāòha atu kāòha mai ma te apuu te hoa i te hoa.
3 A hano ôtou te haatahi i òto o te Kuhane Meitaì,
te i haatūtaì ia ôtou i òto o te moû.
4 Enā e tahi nino anaè,
e tahi Kuhane anaè
me he mea u vavaò te Etua ia ôtou paotū
no te tetaììa e tahi anaè.
5 E tahi Hatu anaè,
e tahi haatià anaè,
e tahi papatema anaè,
6 e tahi Etua me te Motua anaè no te tau ènana kōtoa.
O Īa te Hatu no tātou paotū,
te i hana me tātou paotū, te i noho i òto o tātou paotū.
ALLELUIA ALLELUIA
Rk.7,16
Enā i vāveka o tātou e tahi Peroheta òko nui.
U tiòhi me te meitaì te Etua i to Īa mataèinaa.
EVANERIO O IETU KIRITO VĀÀNA E IOANE 6, 1-15
I tēia mou pō,
1 ua hee Ietu i tītahi kēkē o te tai Karirea
te i peàuìa Tiperiata.
2 Ua ūtaì te haètoa nui ia Īa,
mēìa ua ìte âtou i te tau hana mahaò haahakatu
ta Ietu i hana no te meitaì o te poì hōpī.
3 O Ietu à, ua hiti i ùka o te tuaivi.
I èià, u noho Īa e tahi me to Īa tau kouâ.
4 Ua tata te Pakate. He â koìka no te tau ati Iuta.
5 E heau aa Ietu, ua ìte i te haètoa nui e haatata mai.
U peàu Ietu ia Firipo :
« I hea e hoko mai tātou i te haraoa etià e kai âtou nui ? »
6 Atii hoì ta Ietu peàu no te haaveke ia Firipo,
na te mea ua ìte Īa e aha te hana e hana atu Īa.
7 U haahua Firipo ia Ietu :
« Aòè e àva e ùa hānere moni tenario
etià e koàka mai ia âtou tikitahi i te òna poo haraoa. »
8 U peàu tītahi me i vāveka o to Īa tau kouâ,
o Aterea te ikoa, te teina o Timone Petero :
9 « O te pōìti înei me nā haraoa e ìma me nā ika e ùa.
E mea à, e aha tēia no te haètoa nui ? »
10 U peàu Ietu : « A haanoho ia âtou ! »
He mea nui te mutiē i hua vahi.
Ua nonoho âtou me he ìma tautini vāhana âtou nui.
11 Ua too Ietu i te tau haraoa.
U haahuaèkaèka me te tuha i te tau hoa kai.
Atii no te mou ika, vāàna i to âtou makimaki.
12 Ia maòna âtou, u peàu Ietu i to Īa tau kouâ :
« A kohi ôtou i te toeka. Umoì e pao i te pē e tahi mea. »
13 Ua kohi âtou i te toeka : ònohuu ma ùa kete
pī i te tau poo haraoa i toe, ia pao toitoi te mau.
14 Ia ìte te haètoa i te hana mahaò i hanaìa e Ietu,
u peàu âtou : « Tiàtohu nui, o te ènana nei
te peroheta e tihe ai io te aomāàma. »
15 Atià, ua ìte Ietu e hano âtou ia Īa e viitoi
me te hakatū mea hakaìki no âtou ;
no èià, ua hiti hakaùa Īa io he tuaivi, tootahi anaè.
TOMINIKA ÒNOHUU MA VAÙ
TATAUÌA O TE HĀMANI EHOTO 16, 2-4. 12-15
2 I te henua ataha, u kōhumuhumu ia Moite me Aarone
te motuhaka tiàtohu o te tau tama Iraene.
3 U peàu te tau tama Iraene, pēènei :
« Koù na te Hatu Etua e haamate nui
ia tātou i te Henua Ekipito.
I èià, u noho tātou i pataa o te hue puhipuhi pī i te înaì,
ua kai tātou haamaòna me te haraoa.
U aahi mai ôùa i vaho o hua henua tapavaù
me te haatihe i te henua ataha nei.
Na ôùa e haamate nui i tēnei motuhaka o te tau tama Iraene. »
4 U peàu te Hatu Etua ia Moite :
« Me io he àki, e haatopa au i te haraoa me he ūa
no te hākai ia ôtou.
I tēia â, tēia â, e taha te mataèinaa
i vaho o te pāpua no te kohi i hua haraoa.
Oia hoì ta īa mea kai no te â e tahi.
Ma èià, e haamōtii au i tu ù mataèinaa
e tiòhi ana aha e aotahi âtou i tu ù makimaki,
akoè à, e pūtuì âtou.
12 Ua òko au i te tau tama Iraene e kōhumuhumu aa.
A peàu òe ia âtou, pēènei :
Ia kaò te òumati, e kai ôtou i te înaì kiko.
I te oìoì pōpōuì, e koàka ia ôtou te haraoa ma te pī nui.
E ìte ôtou o au te Hatu, to ôtou Etua. »
13 Ia èva te â, ua tihe pu anamai te toka manu nui oko, nui oko,
te i tomi i te tuaèpo o te pāpua.
14 I te oìoì pōpōuì, u motoù te haupō i te pāpua vii pu.
I te ava u haamoôìa hua haupō,
enā i ùka o te tuaèpo te mēmau hakatu me te èhuahi.
15 U mahaò to Iraene e ìte i hua mēmau me to âtou peàpeàu :
« E aha tenā mea ? »
Oia hoì ma he èo Hepereo : « Manahū ? »
U te e vivini âtou e aha hua mēmau.
U peàu atu Moite :
« Oia nei te haraoa ta te Hatu e tuku ia ôtou no te kai. »
TARAMO 78 (77) 3.4a.c, 23-24, 25.52a.54a
E te Hatu e, a tuku mai ananu Òe i hua haraoa o te àki.
cf. In.6,34
3 Ua òko tātou, u haamau ma he koekoe
I ta to tātou tau tupuna i peàu mai.
4 Na tātou e hakaìte atu i te tau tai i ùka aè.
To Īa mana e haapuàha i to Īa kāìè.
23 U vavaò te Etua i te tau kohu io te ataàki,
U pepeù Īa i te tau avaputa o te ataàki,
24 U haaiho mai Īa i te Manahū no te hākai ia âtou,
Ua tuku ia âtou i te haraoa me io he àki mai.
25 Ua kai âtou i te haraoa o te tau anera.
Ua tuku te Etua ia âtou i te oà ma te kū.
52 Me he mea te ènana tiaki mutō, u aahi te Etua,
54 U haatomo ia âtou i òto o to Īa pāpua tapu.
TATAUÌA O TE HĀMANI A PAURO PEÀTO I TO EFETIA
4, 17.20-24
17 E tu ù tau tuàne tuehine.
U peàu me te toutaki au ia ôtou, i òto o te Kirito,
aua e hana hakaùa ôtou
i te hana hakatu me to te poì êteni,
te i haahukakaìa e to âtou maakau tupepaka.
20 O ôtou â, he mea kē.
I te ava ua ìò ôtou he kouâ o te Kirito,
u hakako ôtou i te tekao kē atu,
21 me he mea u vivini hoì ôtou o ai te Kirito,
ia haaòko ôtou i te tekao tiàtohu i ùka o Ietu.
22 A hāìu ôtou i te koekoe, a titii i te hakatu ènana tehito
te i haapēìa mēìa i to īa tau hīa haahukaka.
23 A haahouìa ôtou ma te hāìuìa o te koekoe
me te titii i to ôtou maakau ènana anaiho.
24 A ìò ôtou me he ènana hakatu hou
ta te Etua i pēpena vāàna i to Īa makimaki,
ènana peàto me te toitoi i òto o te tiàtohu. »
ALLELUIA ALLELUIA
cf. Ta.78,24
I te henua ataha, u hākai te Hatu i to Īa mataèinaa.
U haamaòna ia īa me te haraoa me io he àki mai.
EVANERIO O IETU KIRITO VĀÀNA E IOANE 6, 24-35
I tēia mou pō,
24 ohia ua ìte te haètoa aòè Ietu me âtou,
ua kaò me to Īa tau kouâ, ua piki âtou i ùka o te tau vaka
me to âtou hee atu i Kafaranaumi e ùmihi aa ia Ietu.
25 I tītahi kēkē o te tai, u koàka mai ia âtou Ietu,
me to âtou ūi ia Īa :
« E Rapi e, inehea to òe tiheìa mai înei ? »
26 U haahua Ietu ia âtou :
« He tekao tiàtohu ta ù nei ia ôtou : ua ùmihi ôtou ia ù,
aòè na te mea ua ìte ôtou i te tau hana mana haahakatu,
atià mēìa i to ôtou kai haamaòna i te haraoa.
27 A hana ôtou aòè no te oà e pao ai i te pē,
atià no te hano mai i te oà
e mau tihe i te pohuè ananu.
E tukuìa ia ôtou hua oà e te Tama a te ènana.
Na te mea, o Īa ta te Etua Motua i vae ma te tiàtohu. »
28 A tahi a peàu âtou ia Ietu :
« E aha te tau hana e hana mātou
vāàna i te makimaki o te Etua ? »
Ua hua Ietu :
« Oia nei te hana ta te Etua i makimaki,
te haatià ia ù te i pahiìa mai e te Etua. »
30 U peàu âtou ia Īa : « E aha to Òe hana mana haahakatu,
etià e ìtemata mātou me te haatià ia Òe ?
Te hana hea e hana Òe ?
31 I te henua ataha, ua kai to mātou tupuna i te Manahū
me he mea i patuìa :
« Na Īa i hākai ia âtou i te haraoa me io he àki. »
32 Ua hua atu Ietu ia âtou :
« E tekao tiàtohu ta ù nei ia ôtou :
aòè Moite i tuku ia ôtou i te haraoa me io he àki mai.
Te haraoa tiàtohu me io he àki mai,
ua tukuìa ia ôtou e tu ù Motua.
33 Te haraoa hoì a te Etua,
o īa te i iho mai me io he àki ;
na īa e tuku i te pohuè i to te ao nei. »
34 U peàu âtou ia Ietu :
« E te Hatu e, ananu a tuku mai i hua haraoa ! »
35 Ua hua Ietu ia âtou :
« O au te haraoa pohuè.
Te ènana e tihe mai io ù me te haatià ia ù,
u te e mate īa i te oke, u te e paka i te vai. »
TOMINIKA ÒNOHUU MA IVA
TATAUÌA O TO MUA HĀMANI O TE TAU HAKAÌKI 19, 4-8
4 E hiki aa te peroheta Eria me i te Henua Tamaria,
ua rere īa i te henua ataha.
Ua taha vaevae īa ma te òa e tahi â.
U hakaēa īa me to īa noho i te vahi maù,
ma àò o te maaèitā.
U kuhane koè. U kōhoà e mate nui īa.
U peàu Eria pēènei :
« I tēnei, e te Hatu e, ua àva anaiho, nui oko tenā.
A too òe i tu ù pohuè.
Aòè hoì i meitaì aè au i tu ù tau tupuna. »
5 I èià, ua moe īa me te hiamoe anaiho.
Atià, enā tītahi anera u haatukia me īa, e peàu aa :
« A tū òe ! A kai ! »
6 U tiòhi Eria me to īa ìte pii o to īa upoko
i te huevai me te haraoa nunu pātaka ìa.
Ua kai Eria, ua inu me to īa hiamoe hakaùa.
7 U haatukia te anera me īa, o te ùa tēia, e peàu aa :
« A tū òe ! A kai, oa pepae òe ma io he vaanui.
He mea òa oko te vaanui i toe. »
8 Ua maô Eria, ua kai, ua inu.
U heòheò te nino o Eria mēìa i te kai.
Ua taha īa e hā ònohuu â
tihe atu i te tuaivi Horepe, te tuaivi hoì a te Etua.
TARAMO 34 (33) 2-3, 4-5, 6-7, 8-9
A mai. A ìte me ôtou i te vaièiìa o te Hatu. 34,9
2 E haameitaì au i te Hatu ma te tau â paotū.
E hahi au i te Hatu i te tau vahi ia ôtoa.
3 Io te Hatu anaè to ù haakāìè.
A òko mai e te poì veve, a koakoa me ôtou.
4 A haatiketike ôtou me au nei i te Hatu.
A haakāìè tātou nātoa i to Īa ikoa.
5 Ia ùmihi au i te Hatu, u tiòhi mai Īa.
U haakoè Īa i to ù tau pūpūkina ia ôtoa.
6 Te ènana e heau io te Hatu, e pupuà īa :
He moû, hakaìka koè to īa mata.
7 Ia taaàu te ènana veve, u hakaòko te Hatu,
Me to Īa haapohuè me io te mea haahaametaù mai.
8 Ua noho te anera o te Hatu ma to tātou kaokao
No te haapohuè i te ènana e pakaihi ia Īa.
9 A mai. A ìte me ôtou i te vaièiìa o te Hatu.
Mamau te ènana ia ìò te Etua to īa pātoko.
TATAUÌA O TE HĀMANI A PAURO PEÀTO I TO EFETIA
4,30-32 ; 5,2
E tu ù tau tuàne tuehine.
30 Umoì ôtou e haauē i te Kuhane Meitaì.
O te Kuhane Meitaì hoì te hakatu o te Etua
te i òomiìa i òto o ôtou,
no te â o to ôtou haapohuèìa pao ònaòna.
31 A haakoè me i òto o ôtou i te koekoe kōhumuhumu,
te haahaa, te pekē, te taaàu me te tekao paha.
A haakoè i te maakau mākaka paotū.
32 A ìò ôtou he tau ènana koekoe moû,
koekoe hakāòha i te hoa.
A vevete atu vevete mai te hoa i te hoa i to īa tau tekateka,
me he mea i òto o te Kirito, u vevete te Etua i to ôtou mikeo.
5,1 A hana ôtou me he mea ta te Etua
mēìa o ôtou ta Īa tau tama tāhia.
2 A kāòha atu kāòha mai te hoa i te hoa
me he mea u kāòha te Kirito ia ôtou.
U haaìò hoì te Kirito i uē ia ôtou
e ùtuna ia Īa iho e hēaka haatāvaè i te Etua.
ALLELUIA ALLELUIA
cf.In.6,51-52
E te Hatu, e Ietu e,
o Òe te haraoa pohuè te i iho mai me io he àki.
Te ènana e kai i hua haraoa,
e koàka ia īa te pohuè ananu.
EVANERIO O IETU KIRITO VĀÀNA E IOANE 6, 41-51
I tēia mou pō,
41 u kōhumuhumu te tau ati Iuta mēìa u peàu Ietu pēènei :
« O au te haraoa te i iho mai me io he àki. »
42 U peàu âtou : « Aòè à te tama a Ioteve hua Ietu ?
Ua ìte hoì tātou i to Īa motua me to Īa kui.
Pēhea òa ta Īa peàu : ua iho au me io he àki ? »
43 U haahua atu Ietu pēènei :
« Umoì ôtou e kōhumuhumu.
44 E ūtaì te ènana ia ù
me aahiìa e te Motua te i pahi mai ia ù.
Akoè à, u te e ūtaì mai ia ù te ènana e tahi.
E hakatū hakaùa au i hua ènana i te â paoìa o te ao nei.
45 U patuìa hoì io te hāmani o te tau Peroheta :
« E hakakoìa âtou paotū e te Etua. »
Ia hakaòko te ènana i te Motua
me te apuu i ta Īa tekao, e tihe mai hua ènana io ù.
46 U te e peàu au : ua ìte te ènana e tahi i te Etua.
O au te i tihe mai me io te Etua,
o au anaè te i ìte i te Motua.
47 E tekao tiàtohu ta ù nei ia ôtou :
Te ènana e haatià,
u koàka mai ia īa te pohuè ananu.
48 O au te haraoa pohuè.
49 I te henua ataha, ua kai to ôtou tupuna i te Manahū ;
atià à, ua mate nui âtou.
50 He mea kē te haraoa te i iho mai me io he àki :
me kai te ènana i hua haraoa,
aòè īa e mate.
51 O au te haraoa pohuè te i iho mai me io he àki.
Te ènana e kai i hua haraoa,
e koàka ia īa te pohuè ananu.
Tu ù nino te haraoa e tuku nei au
mea haapohuè i to te ao nei. »
TOMINIKA TEKAU
TATAUÌA O TE HĀMANI TOUMAKI 9, 1-6
1 Ua hakatū te Māàma i to īa haè.
U hakatū i nā pou e hitu me te haatiki ia âtou.
2 U kukumi i ta īa tau ànimara.
U kiini i te vino me to īa tāpī i te tapukai.
A tahi a pōpahi atu īa i te tau keèe.
3 U hakaìteìa io he tau tohua o te pāpuahaè
4 pēènei : « A haatata mai te ènana ùmihi aa i te Māàma. »
5 U peàuìa i te ènana pōtako :
« A mai. A kai i te haraoa, a inu i ta ù vino.
6 A titii i ta ôtou tau hana kōea, e pohuè meitaì ôtou.
A taha ôtou ma io he vaanui o te Māàma. »
TARAMO 34 (33), 2-3, 10-11, 12-13, 14-15
A mai, a ìte me ôtou i te meitaì o te Hatu. 34,9
2 E haameitaì au i te Hatu ma te tau â paotū.
E hahi au i te Hatu i te tau vahi ia ôtoa.
3 Io te Hatu anaè to ù haakāìè.
A òko mai e te poì veve, a koakoa me ôtou.
10 E te poì peàto o te Hatu, a atoratio ia Īa.
Aòè he mea e toe i te ènana i pakaihi i te Hatu.
11 Ua mate i te oke tahipito me io te poì tapavaù.
E àva te tau taetae o te ènana ùmihi nei i te Hatu.
12 E tu ù tau tama e, a mai. A hakaòko mai.
E hakako atu au no te pakaihi i te Etua.
13 O ai te ènana e makimaki i te pohuè ?
O ai e kōhoà nei i te vaanui o te koakoa ?
14 Umoì e pohā to èo no te tekao pē.
Umoì e pepeù i to òe kiinutu no te tipaî.
15 A titii i te mea ìno. A hana i te hana meitaì.
A ùmihi mau i te moû ma io he koekoe.
TATAUÌA O TE HĀMANI A PAURO PEÀTO I TO EFETIA
5, 15-20
E tu ù tau tuàne tuehine,
15 no èià, a tiòhi meitaì i to ôtou hakatu pohuè.
A hana me he poì māàma,
umoì ôtou e tūtū me te poì pōtako.
16 A hana i te hana meitaì, i tēia ava, tēia ava e koàka ia ôtou.
I tēnei mou pō hoì, ua pē te hakatu pohuè o te tau ènana.
17 Umoì ôtou e hana me he poì pōtako.
A hano e haavivini e aha te makimaki o te Etua i ùka o ôtou.
18 Umoì ôtou e kona i te inu vino,
oia te mea e haahika ia ôtou.
A avai i te Kuhane Meitaì te haaūo i to ôtou koekoe.
19 Ia putuputuìa ôtou, a hīmene i te tau taramo,
te tau hīmene pure kē e hahi i te Etua.
A hahi me te haameitaì i te Hatu me i òto o te koekoe
me he mea e haatee te Kuhane Meitaì ia ôtou.
20 A haahuaèkaèka ananu i te Etua Motua,
i tēia â, i tēia â, no te tau mea ia ôtoa,
ma te ikoa o to tātou Hatu, Ietu Kirito.
ALLELUIA ALLELUIA
cf. Ta.145,15
U heau io Òe te mēmau pohuè paotū,
E tetaì aa i to âtou oà me io Òe.
Ua tuha to Òe nā îìma i te mea e hei,
I te nino me te toto o te Àrenio te i hēakaìa.
EVANERIO O IETU KIRITO VĀÀNA E IOANE 6, 51-58
I tēia mou pō, u peàu Ietu i te haètoa pēènei :
51 « O au te haraoa pohuè te i iho mai me io he àki.
Te ènana e kai i hua haraoa, e koàka ia īa te pohuè ananu.
O tu ù nino te haraoa e tuku nei au
mea haapohuè i to te ao nei. »
52 U tōtohe atu tōtohe mai te tau ati Iuta, e peàu aa :
« Pēhea òa te tuku mai o hua ènana i to Īa nino no te kai ? »
53 U peàu Ietu ia âtou :
« E tekao tiàtohu ta ù nei ia ôtou :
Me he mea aòè ôtou e kai i te nino o te Tama a te ènana,
me he mea aòè ôtou e inu i to Īa toto,
aòè te pohuè i òto o ôtou.
54 Me kai te ènana i tu ù nino, me inu īa i tu ù toto,
u koàka mai ia īa te pohuè ananu.
E haapohuè hakaùa au ia īa i te â paoìa o te ao nei.
55 He mea oà tiàtohu hoì tu ù nino,
he mea inu tiàtohu tu ù toto.
56 Te ènana i kai i tu ù nino, te i inu i tu ù toto,
ua noho īa i òto o au, ua noho au i òto o īa.
57 Me he mea u pahi mai ia ù te Motua, te tumu o te Pohuè,
me io Īa tu ù pohuèìa,
atii no te ènana te i kai ia ù,
e ìò au te tumu o to īa pohuèìa.
58 O īa hoì te haraoa te i iho mai me io he àki.
Mea kē te haraoa i kaiìa e to ôtou tau tupuna :
u mamate âtou.
Te ènana e kai i tēnei haraoa,
e koàka ia īa te pohuè ananu. »
TOMINIKA TEKAU MA TAHI
TATAUÌA IO TE HĀMANI O IOTUE 24, 1.15-18
1 I Tikemi, u haaputu Iotuē i te tau ati Iraene paotū.
I muì iho, u vavaò īa i te tau kooūa,
te tau hakaìki paotū e haatee i te mataèinaa ;
Ua tū âtou haakātahiìa i te aò o te Etua.
2 U peàu Iotuē i te mataèinaa pēènei :
15 « Me he mea aòè ôtou e makimaki e tāvini i te Hatu Etua,
i tēnei â, a vae i to ôtou ètua :
te tau ètua o to ôtou tau tupuna
i te henua ma tītahi kēkē o te kaavai Efarate,
akoè à te tau ètua o to Amorite,
te mataèinaa o te henua nei.
O au nei me tu ù huaahaè,
u makimaki mātou e tāvini i te Hatu. »
16 U haahua atu te mataèinaa :
« E mate nui tātou ma mua te titii i to tātou Hatu Etua
no te tāvini atu i te tau ètua kē.
O te Hatu to tātou Etua, te i aahi ia tātou
atii me to tātou tau tupuna me i te Henua Ekipito,
te haèhumu no te poì haamōèhuìa.
O te Hatu Etua te i hana i te nuiìa
o te tau hana mahaò ta tātou i ìtemata.
18 O te Hatu Etua te i tiòhi meitaì i ùka o tātou
e taha ana i vāveka o te tau henua kē ananu,
te tau mataèinaa tōtōua me tātou.
U makimaki tātou me he mea ta òe e tāvini atu i te Hatu.
O Īa to tātou Etua. »
TARAMO 34 (33) 2-3, 16-17, 20-21, 22-23
A mai, a ìte me ôtou i te meitaì o te Hatu. 34,9
2 E haameitaì au i te Hatu ma te tau â paotū.
E hahi au i te Hatu i te tau vahi ia ôtoa.
3 Io te Hatu anaè to ù haakāìè.
A òko mai e te poì veve, a koakoa me to ù.
16 U tiòhi te Hatu i te tau ènana toitoi.
U hakaòko i to âtou èo vavaò ia Īa.
17 U titii te Hatu i te tau ènana mākaka,
U haakoè i to âtou ikoa me io te henua.
20 E aha à te nuiìa o te kōhii
Te i haamamae i te ènana toitoi,
21 Paotū te â, u haakoè te Hatu ia âtou.
Aòè e tahi ivi o hua ènana e hatiìa ai.
22 E haahika te hana ìno i te ènana mākaka.
E haapei te Hatu i te umu no te ènana pē
23 Te i haahaa me te kaipipiò i te ènana toitoi.
E haapohuè te Hatu i te ènana haatià.
TATAUÌA O TE HĀMANI A PAURO PEÀTO I TO EFETIA
5, 21-32
E tu ù tau tuàne tuehine,
21 a aotahi atu aotahi mai te hoa i te hoa,
mēìa i to ôtou pakaihi i te Kirito.
22 A aotahi atu te tau vehine i ta âtou vāhana
me he mea i te Hatu.
23 O te vāhana hoì te upoko o ta īa vehine,
me he mea o Ietu Kirito te upoko o te Èkaretia,
hua Èkaretia, te nino o te Kirito, to īa haapohuè.
24 Ohia u aotahi atu te Èkaretia ia Ietu Kirito,
a aotahi hua mea anaiho te vehine i ta īa vāhana.
25 A kāòha te tau vāhana i ta ôtou vehine,
me he mea ta te Kirito, te i kāòha i te Èkaretia
me te haaìò i te mateìa i uē ia īa.
26 U haapeàto te Kirito i te Èkaretia
ma te papatema me te vai me te mana o te tekao.
27 U makimaki hoì Ietu Kirito
e aahi ia Īa i te Èkaretia e keàpa aa i te pootu,
èpo koè, komimo koè, atià à peàto, toitoi noa.
28 Atii anaiho tēnei : a kāòha te vāhana i ta īa vehine,
me he mea u haataetae īa i to īa nino.
Ia kāòha te vāhana i ta īa vehine, u kāòha ia īa anaiho.
29 Aòè e tahi ènana e haahaa i to īa nino.
He mea kē : u hākai ia īa me te tiòhi meitaì
me he mea ta te Kirito i te Èkaretia.
30 O tātou hoì te mēmau o to te Kirito nino.
31 No èià, a titii te vāhana i to īa motua me to īa kui
no te haapii me ta īa vehine.
E ìò âua tokoùa e tahi anaiho.
32 E tekao hōhonu hua miterio,
oia hoì te makimaki hakanā o te Etua.
U maakau ta ù e haavivini mai hua tekao
i te haatahiìa o te Kirito me te Èkaretia.
ALLELUIA ALLELUIA
cf. In.6, 63.68
E te Hatu e, o ta Òe tekao te Kuhane e tuku nei i te pohuè.
Io Òe anaiho te tekao e aahi i te pohuè ananu.
EVANERIO O IETU KIRITO VĀÀNA E IOANE 6, 60-69
I tēia mou pō, u peàu Ietu pēènei :
60 Ia òko te tau kouâ o Ietu i hua tekao,
u peàu te nuiìa o âtou :
« He tekao māàma koè tēnei tekao. O ai te i hakaòko ? »
61 Aòè i peàu tītahi ia Ietu i te mea
u kōhumuhumu to Īa tau kouâ mēìa i hua tekao.
Atià, ua ìte Īa ; no èià, u peàu ia âtou :
« Mēìa i hua tekao, e huìkēìa to ôtou maakau ?
62 Pēhea ôtou ia ìtemata i te Tama a te ènana
e hiti aa i te vahi i èià to Īa noho òmua ?
63 O te Kuhane o te Etua te i tuku i te pohuè.
Aòè he mea e koàka mai me io to te ènana mana.
Te tekao ta ù i peàu ia ôtou,
he tekao Kuhane, he tekao pohuè.
64 Atià, i vāveka o ôtou, enā tahipito te i haatià koè. »
Me i te tumu hoì, ua ìte Ietu
o ai te huaa haatià koè, o ai te kouâ e haaìò ia Īa.
65 U peàu atu Ietu :
« Oia te piò u peàu au ia ôtou pēènei :
E ūtaì te ènana ia ù me he mea u aahiìa e te Motua.
Akoè à, u te e ūtaì mai ia ù te ènana e tahi.
66 Me i hua ava, he mea nui te kouâ i paekē me io Ietu,
ua koè to âtou ūtaì ia Īa.
67 U peàu Ietu i te Tīònohuu ma tokoùa :
« U makimaki me ôtou e taha atu ? »
68 Ua hua atu Timone Petero ia Īa :
« E te Hatu e, e ūtaì mātou ia ai ?
Io Òe anaiho te tekao e aahi i te pohuè ananu.
69 U haatià mātou,
ua ìte mātou o Òe te Peàto nui a te Etua. »
TOMINIKA TEKAU MA ÙA
TATAUÌA O TE HĀMANI TEUTERO 4, 1-2.6-8
1 U peàu Moite i te mataèinaa Iraene pēènei :
« E to Iraene e, a hakaòko mai i te tekao
me te tau ture ta ù e hakako atu ia ôtou.
A aotahi i hua tekao etià e pohupohuè meitaì ôtou
io he henua i tukuìa e te Hatu Etua i to ôtou tau tupuna.
2 Aua e poho pu ôtou i te tekao ta ù e tuku atu ia ôtou.
Aua e haapoto i te tekao ma te taki e tahi pona.
A haamau ma io he koekoe me te aotahi atu
i hua tekao o te Hatu Etua
ta ù i hakaìte ia ôtou i tēnei â.
6 A haamau ma io he koekoe, a aotahi meitaì ôtou i hua tekao.
Ma èià, e pupuà ai ôtou me he poì māàma, papa tuhuka
i mua o te tau ènana paotū
te i òko e haavivini i te hakatu o to ôtou tau ture.
E peàu âtou : « O hua mataèinaa òko nui,
te kātahitia o te poì māàma, poì tuhuka. »
7 O ai hoì te mataèinaa òko nui me te tau ètua
e haatata mai io âtou, hakatu me to mātou Hatu Etua,
i te ava u vavaò mātou ia Īa ?
8 O ai te mataèinaa òko nui
me te tau tekao māàma, me te ture toitoi oko,
hakatu me te tau ture e tuku nei au ia ôtou i tēnei â ? »
TARAMO 15 (14) 1a.2, 3b-4b, 5
E te Hatu e, u haatata mai Òe me mātou,
a haapohuè Òe ia mātou me Òe. cf.Dt.4,1-7
1 E te Hatu e, o ai òa e noho io to Òe haè ?
2 Te ènana e hana vāàna i te toitoi noa.
Te ènana e haki ananu i te tekao tiàtohu.
3 Aòè īa e hao i te mēmau o to īa teina.
Aòè īa e tekao kaipipiò i te hoa.
4 E haamee īa i te ènana ta te Etua e tute.
E pakaihi i te ènana haataetae i te Etua.
5 Aòè īa e kamo i te ènana te i àiê io īa.
U titii īa i te moni utu i te kaipipiò.
O te ènana e hana atii, e haamau i to īa pohuèìa.
TATAUÌA O TE HĀMANI A IAKOPO PEÀTO
1,17-18.21b-22.27
E tu ù tau tuàne tuehine.
17 Te mea kanahau paotū, te kuà o te tau taetae kāòha,
ua iho mai âtou me io he àki.
Ua tukuìa mai âtou e te Etua Motua
te i pēpena i te òumati, te māàma, te tau hetū.
I òto o Īa, aòè te huìkēìa te i haatihe mai i te pōtako.
18 U makimaki te Etua Motua e vaièi mai i te pohuè,
ma te mana o to Īa tekao tiàtohu,
etià e ìò tātou ta Īa tau tama hāmua,
i vāveka o te tau mēmau paotū ta Īa i pēpena.
21 A apuu hoì ôtou me te koekoe haapāpaku
i te Tekao a te Etua, nanuìa i òto o ôtou.
E koàka i hua tekao te haapohuè ia ôtou.
22 Atià, a hana ôtou vāàna i te tekao,
aua e òko pu me he ènana e hakahae ia īa iho.
27 I mua o te Etua, to tātou Motua,
oia nei te hakatu toitoi noa, teka koè,
o te ènana haatià, te ènana pure hae :
te toko atu i te tau tama motua koè, kui koè,
te tau vehine pōpī ma òto o to âtou àì.
A tiòhi meitaì ia ôtou iho, oa teka ôtou io tēnei ao pē. »
ALLELUIA ALLELUIA
cf.1Tam.16,7
« Aòè te Etua e tiòhi i te ènana ma vaho anaè
me ta te ènana e tiòhi nei.
Ua ìte te Hatu i te tiàtohu o te ate me te koekoe. »
EVANERIO O IETU KIRITO VĀÀNA E MAREKO
7, 1-8.14-15.21-23
I tēia mou pō,
7,1 ua putuputu vii pu o Ietu te tau fariteo,
te mou tuhuka tekao te i titihe mai me i Ierutaremi.
2 Ua ìte âtou i tahipito kouâ o Ietu e kai aa
me te îìma èpo, oia hoì aòè i hooiìa me te vai.
3 U aotahi te huaa fariteo me te tau ati Iuta paotū
i te tekao kākiu o to âtou tupuna.
Aòè âtou e kaikai, koè te hooi me te vai
i nā îìma tihe i te tuke îìma.
4 Ia hua mai âtou me i te mākete, aòè âtou e kai
ma mua ta âtou e pihau me te vai i te nino.
Nui oko te hana atii me io to âtou tau tupuna mai,
me he mea e hooi me te vai i te tau ipu,
te tau huekeâ, te tau papa piura.
U aotahi hoì âtou i hua tekao.
5 No èià i ūiūi ai te tau fariteo me te tau tuhuka tekao
ia Ietu pēènei : « No te aha to òe tau kouâ aòè âtou
e taha io he vaanui o te tau tupuna ?
No te aha e kaikai âtou ma te hooi koè i nā îìma ? »
6 U peàu Ietu ia âtou : « E te poì koekoe e ùa.
He mea toitoi te tekao o te peroheta Itaia i ùka o ôtou :
« U haameitaì te mataèinaa nei ia ù ma te haha,
o to âtou koekoe à, u mamao me io ù.
7 He avai noa anaiho to âtou ùtuna.
Na te mea he tekao ènana ta âtou e hakako nei.
8 U pūtuì ôtou i te Tekao a te Etua.
Atià, u aotahi atu i te tekao i peàuìa e te tau ènana. »
14 U vavaò hakaùa Ietu i te haètoa
me to Īa peàu ia âtou :
« A hakaòko mai ôtou paotū, a vivini meitaì.
15 Aòè i hava te ènana
i te mea me i vaho e uu mai i òto o īa.
Atià, e hava te ènana
i te mea i uu atu i vaho me i òto o īa.
Ia pae Ietu me io te haètoa, u peàu i to Īa tau kouâ :
21 Me i òto o te ènana hoì, me i òto o to īa koekoe
te tau maakau pē, te hana mako, te kamo,
22 te kukumi i te ènana, te too i te vehine a te hoa,
te kaikino, te mākaka pu, te hakahae, te kai hauhau,
te keitani, te paha, te kāìè pu me te tau hana tuaave.
23 Me i òto mai o te ènana hua tau mea pē.
Na âtou e tāhava i te ènana. »
TOMINIKA TEKAU MA TOÙ
TATAUÌA O TE PEROHETA ITAIA 35, 4-7
4 A peàu i te tau ènana kuhane koè :
« Oho te ìi. Umoì e haametaù.
Oia nei to ôtou Etua.
O te Etua anaiho no te huke i te umu.
E tihe nei te Etua no te haapohuè mai. »
5 E tāhakahaka te kikomata o te matapō.
E pepeùìa te puaìna pūtuì.
6 E kekeepao te ènana vaekoki me he kaiū menē.
E taaàu i te koakoa te haha o te ènana mutu.
7 E pupuhi mai te vaipuna io te henua ataha.
E tahe te kaavai io te vao paka meô.
E ìò te henua moô he henua me te vaiòto.
E ìò te henua paka meô he henua me te tau vaipuna pupuhi.
TARAMO 146 (145) 7, 8, 9ab.10b
E hīmene au no te hahi i to ù Etua, ma te òa o to ù pohuèìa.
146,2
7 U haavā Īa me te toitoi i te poì mākakaìa.
U vaièi Īa i te oà i te poì mate i te oke.
U vevete atu Īa i te poì me io he haèhumu.
8 O te Hatu te i haatahahaka i te tau matapō,
O te Hatu te i haaūo i te poì kuhane koè.
O te Hatu te i haataetae i te poì toitoi noa.
9 O te Hatu te vavao o te tau manihii.
O te Hatu te toko o te vehine pōpī
me te tama motua kui koè.
10 E Tiona e, a pohuè paona koè to òe Etua.
TATAUÌA O TE HĀMANI A IAKOPO PEÀTO 2, 1-5
1 E tu ù tau tuàne tuehine.
U haatià ôtou i te Hatu Ietu Kirito, te Hatu kāìè nui.
No èià, aòè e hei te haahuìkē to ôtou apuu
i te tau ènana vāàna i to âtou hakatu kē, hakatu kē.
2 A maakau pu ôtou pēènei :
Ia putuputuìa ôtou, e tihe anamai nā ènana tokoùa.
Ua tāpīìa tītahi me te kahu kaèkaè,
te koro moni kiki i to īa ìma.
O te ùa o te ènana, he mātua veve, uhiìa me te kahu pēpē.
3 U tiòhi anamai ôtou i te ènana me te kahu kaèkaè
me to ôtou peàu atu : « A mai.
A too òe i te nohoka meitaì, a noho i mua nei. »
Atià, u peàu ôtou i te ènana veve :
« O òe, a maô pu i èià ! » Akoè à, u peàu ôtou :
« A noho òe io he tohua, pii o to ù nā vaevae. »
4 No to ôtou hana atii, aòè à u haahuìkē
to ôtou apuu i te tau ènana
vāàna i te hakatu kē to tītahi, hakatu kē to tītahi ?
5 E tu ù tau teina tāhia e, a hakaòko ôtou ia ù :
Ua vae te Etua i te poì veve ia tiòhi atu te ao nei.
Ua tuku te Etua ia âtou i te taetae o te haatià.
E ìò ia âtou te koakoa o te Patirēia
ta te Etua i kānea no te poì te i kāòha mai ia Īa.
ALLELUIA ALLELUIA
cf.Mt.4,23
U haamevaha Ietu i te Tekao Meitaì Hou Mai o te Patirēia.
U haapohuè Īa i te mataèinaa me io to âtou mamae paotū.
EVANERIO O IETU KIRITO VĀÀNA E MAREKO 7, 31-37
I tēia mou pō,
31 ua hua Ietu me io te Henua Tiro.
Ua taha Īa ma he Henua Titone,
e hee aa io te tai Karirea
ma vāveka toitoi o te Henua Tekapori.
32 U aahiìa io Īa te ènana pūtuì me te èo patate.
U toutaki âtou ia Ietu
etià e hapai i to Īa nā îìma i ùka o īa.
33 Ua too Ietu ia īa me te aahi i vahi kē,
mamao me io te haètoa.
Ua tuku Ietu to Īa makamaka ìma
i òto o te puaìka o hua ènana,
u haatukia i to īa èo me te vaianu.
34 E heau aa, ua uē me te peàu ia īa : « Efata ! »
O hua mea anaiho : « A pepeù òe ! »
35 U pepeù hatahata anamai to īa puaìka.
Ua pohā to īa èo me to īa haahitipona.
36 U oonaki Ietu ia âtou umoì e haki atu i te ènana e tahi.
Atià, tōtahi atu to Ietu oonaki, tōtahi atu to âtou hakaìte atu.
37 Ua pē âtou i te mahaò nui me to âtou peàpeàu :
« U toitoi noa to Īa tau hana paotū.
U haahatahata i te puaìka o te poì pūtuì,
u haapohā te èo o te poì mutu. »
TOMINIKA TEKAU MA HĀ
TATAUÌA O TE PEROHETA ITAIA 50, 5-9
Oia nei te tekao a te tāvini o te Etua :
5 i tēia pōpōuì, tēia pōpōuì, ua vaa mai te Tekao a te Hatu
etià e haaòko au me he mea te ènana aotahi atu.
6 Na te Etua i kānea i tu ù puaìka.
Aòè au e patitoo, aòè au e pūtuì.
U avai au i te tau ènana e tā i to ù tua.
Ua tuku au i to ù papaìka i te tau ènana
e huhuti i te huu o to ù kumikumi.
Aòè au i pāpua i to ù mata me i te ènana e māio mai,
e tuhā aa i te vaianu i ùka o au.
7 O te Hatu to ù pātoko. Aòè au e hika atu.
U haaheò au i to ù mata me he keâ.
8 Enā e haatata mai te i haavā ia ù
vāàna i te tekao tiàtohu.
O ai te ènana e pōtoho pu mai ?
A maô nātoa māua i mua o te haavā.
O ai te ènana e hakatio mai ?
O ai te ènana e mākaka mai ?
9 O te Hatu to ù Etua, o Īa to ù vavao.
TARAMO 116 A (114-115) 1-2, 3ac-4, 5-6, 8ac-9
E taha au i te aò o te Hatu io he henua o te poì pohupohuè.
115, 9
1 U haataetae au i te Hatu.
U apuu Īa i tu ù pure.
2 U hakaòko te Hatu i to ù èo.
Paotū te â, e vavaò au ia Īa.
3 U hiivekeìa au i te tau kōhii haamate mai.
Ua humuìa au me te tuitui o te mateìa.
4 U vavaò au i te ikoa o te Hatu :
« E te Hatu e, a òko, a haapohuè mai. »
5 U toitoi noa, hakāòha nui te Hatu.
He kāòha, he toitoi anaè to tātou Etua.
6 U tiòhi meitaì te Hatu i te poì iti noa.
U pepae au, u haapohuè mai te Hatu.
8 Na Īa i haapā ia Havaiki, oa iho au i òto.
U tiòhi meitaì Īa, oa vii to ù vaevae.
9 E taha au i te aò o te Hatu,
Io te henua o te poì pohupohuè.
TATAUÌA O TE HĀMANI A IAKOPO PEÀTO 2, 14-18
14 E tu ù tau tuàne tuehine,
A kaituto ôtou i te ènana e peàu aa pēènei :
« U haatià au atià, u te e hana au vāàna i to ù haatià. »
E aha te mea e koàka mai ia īa ?
Aha, e haapohuè te haatià i hua ènana ?
15 A maakau pu tātou pēènei :
Enā tītahi tuàne, akoè à tītahi tuehine,
kahu pēpē to īa, aòè e àva ta īa mea kai no te â nei.
16 Me peàu tītahi me io ôtou :
« E hoa e, a taha atu me te moû.
A noho òe io te vahi māhanahana, a kai haamaòna. »
Atià à, u te e tuku ôtou ia īa i te kahu me te mea kai.
E aha te mea e koàka mai ?
17 Me he haatià mate te haatià hana koè i te hana meitaì.
18 Oia nei te tekao e peàu i hua poì :
« U haatià òe. O au à, ua hana au i te hana meitaì.
A haatiàtohu i to òe haatià hana meitaì koè.
E haatiàtohu au i to ù haatià ma to ù hana. »
ALLELUIA ALLELUIA
cf. Ka.6,14
E tahi kāìè anaè to tātou :
te peka o Ietu Kirito, te Hatu.
I òto o te Kirito, u pāokapekaìa te ao nei no tātou.
Atii me tātou iho no te ao nei.
EVANERIO O IETU KIRITO VĀÀNA E MAREKO 8, 27-35
I tēia mou pō,
27 ua hiti Ietu me to Īa tau kouâ
i te tau pāpuahaè o te Fenua Ketare Firipo.
E taha aa, ua ūi Ietu ia âtou pēènei à :
« Vāàna ta te tau ènana peàu mai : o ai au nei ? »
28 Ua hua atu âtou : « O Ioane Papetita.
Na tahipito, o Eria.
Na tahipito, tītahi o te tau peroheta. »
29 Ua ūi atu Ietu ia âtou : « No ôtou o ai au nei ? »
E pohā aa to Petero èo, u peàu :
« O Òe te Kirito. »
30 U oonaki Ietu ia âtou umoì e tekao
i te ènana e tahi i ùka o Īa.
31 U tīmata Ietu e hakako i to Īa tau kouâ
i te mea e mamae oko te Tama a te ènana,
e titiiìa e te tau kōkooūa, te tau tāuà nui,
me te tau tuhuka tekao. E mate nui Īa,
atià, ma hope o te toù o te pō, e tū hakaùa Īa.
32 U haatāhakahaka Ietu i ta Īa tekao ia âtou.
O Petero à, u aahi ia Ietu i te vahi kē
me te hano oonaki ia Īa.
33 Atià, u hāìu Ietu, e tiòhi aa i to Īa tau kouâ,
u oonaki oko ia Petero, pēènei à :
« A hee atu òe. Ma to ù tua, e Tatane.
Aòè to òe maakau me io te Etua.
He maakau ènana anaè to òe. »
34 I muì iho, u vavaò Ietu i te haètoa me to Īa tau kouâ.
U peàu ia âtou :
« Me makimaki te ènana e ūtaì ia ù,
a titii ia īa anaiho, a amo i to īa peka, a ūtaì mai.
35 Te ènana i makimaki i to īa pohuè e koàka mai,
e haakoè īa i hua pohuè.
Te ènana e haakoè i to īa pohuè
mēìa ia ù nei me te Evanerio,
e koàka mai ia īa te pohuèìa. »
TOMINIKA TEKAU MA ÌMA
TATAUÌA O TE HĀMANI O TE MĀÀMA 2, 12.17-20
U kaituto te poì haatià koè i te maakau pē.
U peàu hoì âtou pēènei à :
12 « A moioè tātou i te ènana koekoe toitoi.
U haapaòpaò mai hoì īa,
e haapākeka nei i to tātou hakatu pohuè.
U oonaki mai īa mēìa u pūtuì tātou i te Ture a te Etua.
U hakatio mai mēìa u titii tātou i te tekao
hakakoìa mai e to tātou tau tupuna.
17 A tiòhi tātou aha he tekao tiàtohu ta īa tekao.
Epō, e ìte tātou e aha te hakatu o to īa mateìa.
Me he mea e tama a te Etua hua ènana toitoi,
e toko hoì te Etua ia īa.
E haapohuè te Etua ia īa
me i te îìma o te tau ènana tōtōua me īa.
19 A haamee oko nui tātou ia īa, a haamāio atu
etià e ìteìa to īa koekoe moû, pekē koè.
20 A haamate tātou ia īa ma òto o te mateìa hauhau.
U peàu hoì īa enā tītahi no te tiòhi meitaì ia īa. »
TARAMO 54 (53) 3-4, 5.7b, 6.8
E te Hatu e, a tiòhi mai.
O Òe tu ù pātoko me tu ù Haapohuè. cf. 70,6
3 E te Hatu e, a toko mai, o Òe tu ù Haapohuè.
Ma to Òe ikoa, a haavā mai me te toitoi.
4 E te Etua e, a apuu i tu ù vavaò ia Òe.
A hakaòko i tu ù èo e uēuē nei.
5 Ua hano tahipito hāoè e haatōtōua me au.
Enā te poì mana e hano e kukumi ia ù.
Aòè he kōava i toe no te Etua i mua o âtou.
E te Etua tiàtohu nui e, a haahika ia âtou.
6 U tiòhi mai te Etua, o Īa tu ù pātoko.
O te Hatu te kuà o tu ù tau toko.
8 E te Hatu e, e ùtuna au ia Òe i te hēaka,
E haahuaèkaèka au ia Òe te kuà o te meitaì.
TATAUÌA O TE HĀMANI A IAKOPO PEÀTO 3, 16-4,3
E tu ù tau tuàne tuehine,
16 o te keitani me te ovi atu ovi mai
te tumu o te tōtōua me te nuiìa o te tau hana pē.
17 O te koekoe toitoi to mua puku o te māàma
ta te Etua i vaièi mai.
I muì iho, e ìò te māàma he koekoe moû,
te koekoe pakaihi te hoa i te hoa,
e avai aa i te ènana na īa ta īa.
Ua pī te koekoe māàma i te hakāòha, nui oko to īa vaièi,
u apuu īa i te tau ènana paotū,
e aha à hakatu kē to tītahi, hakatu kē to tītahi.
Aòè e koekoe e ùa to te ènana māàma.
18 Ia hano te ènana e haaneke i te moû,
u hakatu īa me tītahi i nanu i te kākano.
E haatupu hua kākano i te koekoe toitoi i mua o te Etua.
4,1 Me i hea mai hoì te pipikièe me te tōtōua i vāveka o ôtou ?
Aha, aòè me io te tau hīa pē te i tōtōua nei i òto o to ôtou ?
2 Ua pī ôtou i te nuiìa o te hīa kē, hīa kē.
Aòè he mea e koàka mai ia ôtou.
A tahi a kukumi pu te hoa i te hoa.
E kōhoà keitani ta ôtou.
Aòè e tae to ôtou hīa.
Ua hano hoì ôtou e koàka mai ma te tōtōua me te pipikièe.
3 Aòè he mea ta ôtou e koàka mai mēìa u te e ape ôtou.
Ia pure ôtou, aòè he mea e tukuìa ia ôtou
na te mea aòè i meitaì ta ôtou pure.
E pure nei hoì ôtou no te ape anaiho i te taetae
vāàna i to ôtou hīa haakoakoa i te nino.
ALLELUIA ALLELUIA
cf. .2 Te.2,14
Ma te Tekao Meitaì Hou Mai, u vavaò te Etua ia tātou
no te àva atu i te kāìè nui o Ietu Kirito to tātou Hatu.
EVANERIO O IETU KIRITO VĀÀNA E MAREKO 9, 30-37
I tēia mou pō,
30 ua taha Ietu me to Īa tau kouâ
ma vāveka o te Henua Karirea.
Aòè Ietu i makimaki e ìte te ènana pēhea Īa.
31 Na te mea, u hakako i to Īa tau kouâ me ta Īa peàu :
« Enā e haaìòìa te Tama a te ènana
i te îìma o te tau ènana haamate âtou ia Īa.
Ia mate nui Īa, ma te toù o te pō, e tū hakaùa Īa. »
32 Atià, aòè âtou i vivini i hua tekao
me to âtou haametaù i te ūi atu ia Ietu.
33 Ua tihe âtou i Kafaranaumi.
Io he haè, u peàu Ietu ia âtou :
« Ma io he vaanui, e aha ta ôtou tekatekao ? »
34 Ua mutu âtou na te mea, u tōtohe âtou ma io he vaanui
no te ìte : o ai i vāveka o âtou te tiketike atu.
35 E noho aa Ietu, u vavaò i te Tīònohuu ma tokoùa
me to Īa peàu ia âtou :
« Me makimaki tītahi e tū ai i mua,
a haaìò ia īa iho he ènana i muì òa.
A ìò īa te tueni no ôtou paotū. »
36 Ua too Ietu i te pōìti me te hakatū i vāveka ahau o âtou.
Ua hopu ia īa me te peàu ia âtou :
37 « Te ènana e apuu ma tu ù ikoa
i tītahi tōìki hakatu me īa, u apuu mai ia ù.
Te ènana i apuu mai ia ù,
aòè īa i apuu mai ia ù anaiho :
atià, u apuu i tēia i pahi mai ia ù. »
TOMINIKA TEKAU MA ONO
TATAUÌA O TE HĀMANI A MOITE PEÀUÌA NŪMERA 11, 25-29
25 Ua iho te Hatu Etua ma òto o te ao tapu.
U tekao Īa me Moite.
Atià, ua too Īa i te Kuhane e ihi nei i òto o Moite
me to Īa tuha io te hitu tīònohuu mou ènana,
oia hoì o te tau kōkooūa haatee i te mataèinaa.
Ua iho mai te Kuhane i ùka o âtou.
No te ava poto, u tekao peroheta to âtou.
26 Enā tokoùa ènana i nonoho io te pāpua haèâ.
O Eretate me Metate to âua ikoa.
Ua ihi te kuhane i òto o âua.
E aha à aòè âua i tihe io te haèâ o te tutukiìa,
o âua tokoùa tikitahi i vaeìa me i vāveka o te papa kōkooūa.
Ma òto o te pāpua haèâ ta âua e peroheta atu.
27 U haakoi tītahi māhaì no te kave i te tekao hou ia Moite
e peàu aa : « Enā Eretate atii me Metate
e vii aa i te pāpua me he peroheta âua. »
28 O Iotuē, tama na Nuna, e tāvini aa ia Moite
me i to īa houìa, u tekao mai :
« E Moite, e tu ù hakaìki e, a humu òe ia âua. »
29 Atià, u peàu Moite ia īa : « Aha, u keitani òe mēìa ia ù ?
E too ta ù e pōpahi te Hatu i to Īa Kuhane i ùka o âtou paotū,
vāàna te haaìò to Īa mataèinaa, e mataèinaa peroheta. »
TARAMO 19 (18) 8, 10, 12-13, 14
U toitoi te Tekao a te Hatu, e haakoakoa âtou i te koekoe. 19,9
8 U toitoi noa te ture o te Hatu,
Na Īa e haahou i to tātou ìi.
U tiàtohu te Tekao a te Hatu
Te i haamāàma i te poì avai noa.
10 U taìtaì te pakaihiìa o te Etua,
E noho mau ananu to Īa tau puku.
U toitoi te tekao paotū a te Hatu :
He māàma âtou no te haavā i te ènana.
12 U haamāàmaìa to òe tāvini i hua tekao.
E te Hatu e, ma te aotahi atu, e tapavaù īa.
13 O ai te i ìte i to īa iho tekateka ?
No to ù māhaè i tahipito, a haataìtaì mai.
14 A titii me io ù i te kāìè pu.
Umoì e haateeìa au i te maakau pē.
Aua e hava au i te teka hakanā.
Aua e hemo au i te mikeo nui.
TATAUÌA O TE HĀMANI A IAKOPO 5, 1-6
1 A hakaòko mai ôtou, e te poì tapavaù.
A uēuē, a mateteka ôtou. E nui ai to ôtou ìno.
U tata èka te ava e topa te ìno nui i ùka o ôtou.
2 Ua èhu pē to ôtou taetae.
Ua kai te tau manumanu i to ôtou tau kahu.
3 Ua tupu me he mea te nenie to ôtou moni kiki
me te moni tavaìè.
O hua tupu haanenie te i hakatio ia ôtou,
o īa te i kai me he ahi i to ôtou kiko.
U haapuke ôtou i te moni,
e aha à o īa nei te ava paoìa o te ao nei.
4 Ua kohi te poì hana i te tau puku io to ôtou pāpua,
aòè ôtou i tuku atu nei i to âtou moni utu.
E taaàu hua moni utu e hano huke i te umu.
U tihe io te puaìka o te Hatu o te aomāàma
te takiìa èo o te poì hana e vavaò nei i te tuki.
5 I te ao nei, ua ùmihi ôtou i te koakoa, te èkaèka,
te haakāìè pu, ua tuha ôtou i te kaiìamau,
e aha à, i tēnei ava, u haamākakaìa te nuiìa o te ènana.
6 U haavā haamate ôtou i te ènana koekoe toitoi,
te ènana piò koè. U kukumi haamate ôtou ia īa,
e tōtohe koè, me ôtou, hua ènana.
ALLELUIA ALLELUIA
cf.In.17,17
E te Hatu e, he tiàtohu ta òe Tekao.
A haapeàto mai ia mātou i òto o hua tiàtohu.
EVANERIO O IETU KIRITO VĀÀNA E MAREKO
9, 38-43.45.47-48
38 I tēia mou pō, u peàu Ioane ia Ietu :
« E Tuhuka e, ua ìte mātou i te ènana
e tute aa i te tiaporo ma to òe ikoa.
Ohia aòè īa i kē me mātou, u haapākeka mātou ia īa. »
39 U peàu Ietu : « Umoì ôtou e haapākeka ia īa.
Aòè te ènana e hana i te hana mana ma to ù ikoa,
i muì iho, e kaipipiò ponihoo hua ènana ia ù.
40 Te ènana aòè i tōua mai ia tātou,
ua kē hua ènana me tātou.
41 Te ènana e tuku ia ôtou i te ipu vai maoì,
na te mea ua kē ôtou me te Kirito,
he tekao tiàtohu ta ù nei ia ôtou : aòè e kaò to īa tuki.
42 Te ènana i hakapahi pē
i tītahi me io te poì iti noa te i haatià,
mea meitaì aè no īa e kitiiìa to īa kākī
me te keâ nunui no te titii atu io he tai.
43 Ia hakapahi to òe ìma oko ia òe i te piò, a kokoti.
Mea meitaì aè no òe te tomo ìma motu io he pohuè
i te topa me to òe nā îìma e ùa io he Kehena,
i èià te ahi mate koè.
45 Ia hakapahi to òe vaevae ia òe i te piò, a kokoti.
Mea meitaì aè no òe te tomo vaekoki io he pohuè
i te topa me nā vaevae e ùa io he Kehena.
47 Ia hakapahi to òe kikomata ia òe i te piò, a tīkaò.
Mea meitaì aè no òe te tomo mata koìò
i òto o te Patirēia o te Etua
i te topa me nā kikomata e ùa io he Kehena.
I èià hoì aòè e koè te iko, aòè e mate te ahi.
TOMINIKA TEKAU MA HITU
TATAUÌA O TE HĀMANI TENETE 2, 18-24
18 U peàu te Hatu Etua :
« Aòè he mea meitaì e noho tootahi te ènana.
E kānea au i te toko e hei no īa. »
19 U kānea te Hatu Etua me io he èpo
i te tau puaka e totoo nei io he èitā
me te tau manu e ona nei io he ataàki.
U aahi te Hatu Etua ia âtou paotū i mua o te ènana :
Na īa e apa i to âtou ikoa.
20 Ua apa te ènana i te ikoa o te tau ànimara paotū :
te tau manu e ona nei io he ataàki,
me te tau puaka e totoo nei io he èitā.
Atià, u te e koàka mai i te ènana te mēmau toko e hei no īa.
21 A tahi a haatau te Hatu Etua i te hiamoe èka io he ènana.
E hiamoe aa te ènana,
ua taki te Hatu Etua i te vakavaka me io to īa nino
me te haaoà i te maki.
22 U kānea te Etua i hua vakavaka he vehine,
me te aahi ia īa i mua o te ènana.
23 U peàu te ènana : « Oia nei te ivi o to ù ivi.
Oia nei te kiko o to ù kiko.
E apaìa to īa ikoa : Vehine. Me io te Vāhana hoì īa. »
24 Oia te tumu e pae ai te vāhana
me i to īa motua me te kui,
no te haapii me ta īa vehine.
E ìò âua tokoùa e tahi anaiho.
TARAMO 128 (127) 1-2, 3, 4.5c.6a
A haameitaì te Hatu ia tātou,
ma te tau â paotū o to tātou pohuèìa. cf.128,5
1 Mamau te ènana e pakaihi i te Hatu,
E aotahi aa i ta te Etua tekao.
2 E hākaiìa òe e te hana o to òe îìma :
Mamau òe. A noho te koakoa io òe.
3 Io to òe haè, ua noho ta òe òna vehine
Hakatu me te tumuvino pī i te tau puku.
Ta òe mou tama vii pu o te tapukai,
E tū aa me he maa âkau oriveti.
4 Oia te taetae i vaièiìa i te ènana i pakaihi i te Hatu.
E haameitaì te Etua o Iraene ia òe
Ma te tau â paotū o to òe pohuèìa.
6 E ìtemata ai òe i to òe tau poupuna i ùka aè.
TATAUÌA O TE HĀMANI I TO HEPEREO 2, 9-11
9 Ua ìte meitaì tātou e tahi mea : o Ietu te i haapāpakuìa
no te ava poto, ma àò o te tau anera,
i tēnei, u keàpa Īa me te kāìè me te mana
mēìa i te mamae haamate nui ia Īa.
U mate nui hoì Ietu i uē i te tau ènana paotū,
vāàna i te karatia ta te Etua i vaièi mai.
10 U pēpena te Etua i te tau mēmau paotū
vāàna i to Īa makimaki, no te haakāìè ia Īa iho.
I te ava e kōhoà te Etua e aahi i te kāìè o te àki
i te nuiìa o ta Īa tama,
he mea hei no Īa te haatoitoi noa, mēìa i to Īa mamae,
ia Ietu te tumu o te haapohuèìa.
11 O Ietu hoì te i haakoè i te mikeo
atii me te tau ènana te i hooiìa to âtou mikeo,
e tahi Motua to âtou nātoa.
Oia te piò aòè e hakaìka Ietu e vavaò ia âtou :
e tu ù tau tuàne tuehine e.
ALLELUIA ALLELUIA
cf.1In.4,16
Te ènana i kāòha me te tohe mau i te kāòha,
ua noho hua ènana i òto o te Etua :
he kāòha hoì te hakatu o te Etua.
EVANERIO O IETU KIRITO VĀÀNA E MAREKO 10, 2-16,
akoè à 10, 2-12
I tēia mou pō,
2 u haatata mai io Ietu mou fariteo e ūiūi aa
aha e koàka i te vāhana te titii i ta īa vehine.
Ua hano âtou e haaveke ia Īa.
3 U haahua Ietu me to Īa peàu ia âtou :
« E aha te tekao a Moite no ôtou ? »
4 U peàu âtou : « Ua ao Moite
e tute te vāhana i ta īa vehine,
atià e tuku atu ia īa i te hāmani titiiìa. »
5 U peàu Ietu ia âtou : « Mēìa u koekoe pūtuì to ôtou,
i patu ai Moite i hua ture.
6 Atià, i te tumu, i te pēpenaìa o te aomāàma,
u kānea te Etua i te ènana, he vāhana he vehine.
7 Oia te tumu e titii te vāhana i to īa motua me te kui,
no te haapii me ta īa vehine.
8 E ìò ai âua he nino e tahi.
Ma èià hoì, aòè tokoùa âua, atià, e tahi anaè.
9 Umoì te ènana e haapaekē i ta te Etua i haatūtaì. »
10 Io he haè, ua ūiūi hakaùa to Īa tau kouâ i ùka o hua tekao.
11 U peàu Ietu ia âtou : « Te vāhana
e titii i ta īa vehine me te noho me te vehine kē,
he vāhana haapē i te mātirimonio.
12 Me titii te vehine i ta īa vāhana
me te noho me te vāhana kē,
he vehine haapē i te mātirimonio. »
13 U aahiìa io Ietu mou tōìki etià e haatukia Īa ia âtou.
U oonaki te tau kouâ ia âtou.
14 Atià, ua ìte Ietu. Ua pekē me to Īa peàu i te tau kouâ :
« A avai i te tau tōìki e haatata mai.
Umoì ôtou e haapākeka ia âtou.
No te tau ènana hakatu me âtou hoì te Patirēia o te Etua.
15 E tekao tiàtohu ta ù nei ia ôtou :
me he mea aòè te ènana e apuu i te Patirēia o te Etua
me te koekoe hakatu me to te tōìki,
aòè hua ènana e tomo i òto. »
16 Ua hopu Ietu ia âtou me te haameitaì
ma te hapai i nā îìma i ùka o âtou.
TOMINIKA TEKAU MA VAÙ
TATAUÌA O TE HĀMANI O TE MĀÀMA 7, 7-11
7 Ua pure au. U vaièiìa mai te māàma.
U vavaò toutaki au.
Ua ihi i òto o au nei te Kuhane Māàma.
8 U haataetae au ia īa ma ùka atu o te ikoa haakāìè
me te tokotoko hakaìki.
9 No ù, he mēmau tupepaka te tau taetae paotū.
O te Māàma tu ù taetae anaè.
Aòè e àva me īa te tau keâ pupuà pīàma.
Me he one te moni kiki paotū o te aomāàma nei
ia tiòhiìa te Māàma.
Me he èpokau te moni tea i mua o īa.
10 U haataetae au i te Māàma ma ùka atu
o te nino heòheò me te poèa.
Ua vae au i te Māàma ma ùka atu o te àma òumati.
Aòè hoì to īa pupuà e koè ai.
11 Me te Māàma, u koàka mai ta ù tau taetae paotū.
O te Māàma te tumu o te tau taetae
u te e koàka i te ènana te tatau.
TARAMO 90 (89) 12-13, 14-15, 16-17
I te pōpōuì, a haaèka mai to Òe hakāòha ia mātou :
E pao ai to mātou tau â me he koìka me te hīmene. 90,14
12 A hakaìte mai i te nuiìa o to mātou tau â.
A tahi nei e ùmihi mau mātou i te Māàma.
13 E te Hatu e, a òomi ponihoo i to Òe pekē.
Umoì te haatevee i uē i to Òe tau tāvini.
14 I te pōpōuì, a haaèka mai to Òe hakāòha ia mātou :
E pao ai to mātou tau â me he koìka me te hīmene.
15 Òmua, ua ìte mātou i te uēuē ; i tēnei, a haakoakoa mai.
Òmua, u òomi mai te ìno nui ; i tēnei, a èkaèka mātou.
16 A haavivini i to Òe tau tāvini te tumu o ta Òe hana.
A haapupuà i mua o to âtou tau tama i to Òe kāìè.
17 I ùka o mātou te moû o te Hatu, to mātou Etua.
A haamau te Etua i te hana o to mātou îìma.
A haameitaì te Hatu ia mātou te tau ènana hana.
TATAUÌA O TE HĀMANI I TO HEPEREO 4, 12-13
12 Na te mea e mēmau pohuè te Tekao a te Etua,
he mea ìi oko, tōtahi atu to īa koi
i te koiìa o te kohetā e ùa mata.
U putaèe te Tekao a te Etua i òto òa o te ènana tiàtohu,
tihe i te tumu o te kuhane me te koekoe,
tihe i te pohoìa o te pooviitua, te pūhoo o te ivi.
U haatāhakahaka te Tekao a te Etua i to te ènana tau hīa
atii me to īa tau maakau hakanā.
13 Aòè e tahi mēmau te i pēpenaìa
i haapupuni i mua o te mata o te Etua.
I mua o Īa, u kahu koè te tau mēmau paotū ;
ua ìte meitaì te Etua ia âtou tikitahi.
O te Etua te i haavā ia tātou paotū.
ALLELUIA ALLELUIA
Mt.5,3
Mamau te tau ènana koekoe veve :
no âtou te Patirēia o te àki.
EVANERIO O IETU KIRITO VĀÀNA E MAREKO
10, 17-30 (10,17-27)
I tēia mou pō,
17 ia hano Ietu e hee atu, u tohuti mai te ènana,
ua noho muò i mua o Īa me te ūi atu :
« E Tuhuka meitaì e, e aha te hana e hana atu au
etià e koàka mai ia ù te pohuè ananu ? »
18 U peàu Ietu ia īa : « Umaha to òe peàu mai :
e tuhuka meitaì ? Aòè e tahi ènana meitaì.
O te Etua anaè te i meitaì.
19 Ua ìte òe i te tau tekao a te Etua :
Umoì e kukumi haamate i te ènana.
Umoì e haapē i te mātirimonio.
Umoì e kamo. Umoì e pōtoho pu. Umoì e kaipipiò.
A pakaihi i to òe motua me to òe kui. »
20 U peàu īa : « E Tuhuka e. Me i to ù nino hou,
u aotahi au i hua tau tekao. »
21 O Ietu à, e tiòhi mau aa ia īa, u haataetae.
U peàu Īa : « E tahi mea i toe ia òe.
A hee. A hoko atu i ta òe tau taetae paotū.
A tuku i te poì veve.
E koàka ia òe te puke taetae io he àki.
I muì iho, a mai. A ūtaì mai. ! »
22 Ia òko hua ènana i tēnei tekao, ua maù nui īa,
me to īa hee atu, nui to īa kuhane koè,
mēìa ua nui ta īa tau taetae.
23 E tiòhi aa Ietu vii pu o Īa, u peàu i to Īa tau kouâ :
« He mea hana nui no te tau ènana me te taetae
e tomo i òto o te Patirēia o te Etua. »
24 Te tau kouâ, u emièe oko âtou mēìa i tēnei tekao.
Atià, u peàu hakaùa Ietu ia âtou :
« E tu ù tau tama e, he mea hana nui te tomo
i òto o te Patirēia o te Etua.
25 He mea māeka atu no te kamerō te uu ma he puta o te nira.
He mea hana nui no te ènana me te taetae
te tomo i òto o te Patirēia o te Etua. »
26 Ua nui aè to te tau kouâ emièe
me te peàpeàu te hoa i te hoa :
« O ai òa te ènana e haapohuèìa ? »
27 U tiòhi matiòka Ietu ia âtou me to Īa peàu :
« Aòè e koàka i te tau ènana. Atià, e koàka i te Etua.
Aòè he mea aòè e koàka i te Etua. »
28 A tahi a peàu Petero ia Ietu :
« O mātou à, u titii mātou i te tau mea paotū
me te ūtaì ia òe. »
29 U peàu Ietu : « E tekao tiàtohu ta ù nei.
Me titii te ènana i to īa haè, to īa tau tuàne tuehine,
to īa motua, to īa kui, ta īa tau tama,
akoè à to īa henua i uē ia ù me te Evanerio
30 io te aomāàma nei, e koàka ia īa
te nuiìa o te haè, te huaa tuàne tuehine,
te tau kui, te tau tama, te tau henua,
atià me te tōtōua haamākaka mai.
I te ao a tihe mai, e koàka ia īa te pohuè ananu. »
TOMINIKA TEKAU MA IVA
TATAUÌA O TE PEROHETA ITAIA 53, 10-11
10 U makimaki te Hatu e tukituki atu me te mamae.
Mēìa u ùtuna atu i to Īa pohuè mea hoko mikeo,
e ìte ai i to Īa tupu i ùka aè,
e haaòa aè i to Īa tau â.
Ma io Īa, e tae anamai te hīa o te Hatu.
11 Ma hope o te ûûkina o to Īa kuhane,
e ìteìa te Māàma, e tapavaù nui.
Ma to Īa mamae, u haameitaì tu ù tāvini
i te tini tini ènana, e amo aa i to âtou mikeo.
TARAMO 33 (32) 4-5, 18-19, 20.22
E te Hatu e, a noho mau to Òe kāòha i ùka o mātou
Atii me mātou e tetaì mau i to Òe vaièiìa. 33,22
4 He toitoi noa te Tekao a te Hatu.
U tiàtohu anaè to Īa tau hana paotū.
5 U haataetae Īa i te hakatu toitoi, haakahaè koè.
Ua pī te aomāàma i to Īa tau hana kāòha.
18 Ua toko te Etua i te tau ènana pakaihi ia Īa,
Te poì e tetaì mau i to Īa kāòha mai,
19 U haapohuè ia âtou me io te ìno me te mateìa,
Te haapohuè i te ava o te ìno me te oke nui.
20 O te Hatu te tumu o to tātou pohuè.
O Īa to tātou toko me te vavao.
22 E te Hatu e, a noho mau to Òe Kāòha i ùka o mātou
Atii me mātou e tetaì mau i to Òe Vaièiìa.
TATAUÌA O TE HĀMANI I TO HEPEREO 4, 14-16
E tu ù tau tuàne tuehine,
14 ohia ua ìò Ietu te Tama a te Etua,
to tātou Tāuà nui tiketike, te i tomo i ùka nui o te àki,
a tohe mau tātou e haki atu i te Haatià.
15 Na te mea, u mehea hua Tāuà nui
mēìa i te tau tekateka o to tātou koekoe pepae.
Ua ìte hoì Īa ma te tiàtohu i te nuiìa
o te mea haaveke me te haamōtii mai ia Īa,
atià, aòè i mikeo Īa.
16 No èià, a haatata mai tātou haametaù koè
me te Etua mana nui, te tumu o te Vaièiìa,
vāàna e ìò mai ia tātou to Īa Hakāòha
me te karatia no te toko mai, i te ava e hei.
ALLELUIA ALLELUIA
Mk.10,45
Ua tihe mai te Tama a te ènana no te tāvini atu
me te haaìò i to Īa pohuè me he ùtuna hēaka,
no te hoko mai i te nuiìa o te tau ènana.
EVANERIO O IETU KIRITO VĀÀNA E MAREKO 10, 35-45
akoè à : 10, 42-45
I tēia mou pō,
35 u haatata mai io Ietu Iakopo me Ioane,
nā tama a Ihepetea. U peàu âua ia Īa :
« E Tuhuka e. Ua ape māua :
a hati mai Òe i to māua hīa. »
36 U peàu Ietu ia âua : « E aha te hana e hana au no ôùa ? »
37 U peàu âua : « A ao mai a noho māua i òto o to Òe kāìè,
tītahi i to òe ìma oko, tītahi i to Òe ìma aèaè. »
38 U peàu Ietu ia âua :
« Aòè au i ìte i ta ôùa e ape nei.
Aha òa e koàka ia ôùa te inu i te ipu ta ù e inu ai ?
Aha e koàka ia ôùa te papatema e koàka mai ia ù ? »
39 U peàu âua : « E koàka ia māua. »
U peàu Ietu ia âua :
« Te ipu e inu nei au, e inu ai me ôùa.
Te papatema e koàka nei ia ù,
e papatemaìa ai me ôùa.
40 Atià, no te noho i to ù ìma oko,
akoè à i to ù ìma aèaè, aòè na ù te tuku atu.
E tukuìa i tēia i haapeiìa. »
41 Ua òko te Tīònohuu i hua tekao
me to âtou haahaa ia Iakopo me Ioane.
42 U vavaò Ietu ia âtou io Īa me te peàu :
« Ua ìte ôtou : te tau ènana
peàuìa e hakaìki o te tau êteni,
e haatoko âtou i to âtou viviniìa.
Atii ta te poì hōhonu : ua haatoko i to âtou hakaìkiìa.
43 Umoì atii io ôtou. Me makimaki tītahi
e ìò he ènana tiketike atu i vāveka o ôtou,
a haaìò ia īa anaiho he ènana tāvini ia ôtou.
44 Te ènana me i vāveka o ôtou
i makimaki e vivini ia ôtou,
a ìò īa he ènana tueni ia ôtou paotū.
45 Na te mea, te Tama a te ènana,
aòè Īa i tihe no te haatāvini mai,
atià, no te tāvini atu me te tuku i to Īa pohuèìa
no te hoko mai i te nuiìa o te ènana. »
TOMINIKA E TOÙ ÒNOHUU
TATAUÌA O TE HĀMANI O TE PEROHETA IEREMIA 31, 7-9
U peàu hoì te Hatu : « A taaàu i te koakoa no Iakopo,
a hahi i te kuà o te tau mataèinaa.
A hīmene i te hīmene hahi e peàu ana :
E te Hatu Etua e, a haapohuè i to òe mataèinaa,
i te toeka o Iraene. »
8 Enā, e haahua nei au ia âtou me i te henua i te kēkē tiu.
Enā, e haaputuputu nei au ia âtou
me i te kotina paoìa o te henua.
Enā ma vāveka o âtou te poì matapō, te tau vaekoki,
te tau vehine kōpū tama, te tau vehine hānau hou mai.
E motuhaka nui oko te poì te i hua mai.
9 Ua hee âtou, e uē aa me te mateteka.
E haahuaìa mai âtou ma òto o te koakoa.
E aahi au ia âtou io te tau vaitahe
ma te vaanui meitaì : aòè e tukia to âtou vaevae.
Ua ìò au e motua no te mataèinaa Iraene,
O Efarima tu ù tama hāmua.
He tekao na te Hatu. »
TARAMO 126 (125) 1-2b, 2c-3, 4-5, 6
He hana mahaò hoì to Īa i uē ia mātou,
Ua tihe to mātou ava no te haakoìka koakoa. 126,3
1 Ia haahua mai te Hatu ia mātou,
Ia hua mai i Tiona mātou, poì mōèhu ;
me he ènana moemoeā to mātou hakatu.
2 Ua pī to mātou haha i te katahehe.
U taaàu mātou i te taa koakoa.
A tahi a mevaha te tekao io te poì êteni :
« Auē, te hana mahaò ta te Hatu i hana no âtou. »
3 He hana mahaò hoì to Īa i uē ia mātou,
Ua tihe to mātou ava no te haakoìka koakoa.
4 E te Hatu e, a haahua ia mātou,
Me he mea te vaitahe io he henua ataha.
5 E tūtū te ènana i te kākano e uēuē aa.
Ua kohi īa i te tau puku me te koakoa.
6 E taha īa, taha atu e tūtū i te kākano
Me te uē me te mateteka.
Ua hua īa, hua mai me te koakoa,
E kave aa i te pūpā haraoa.
TATAUÌA O TE HĀMANI I TO HEPEREO 5, 1-6.
1 Ua vaeìa te Tāuà nui me i vāveka o te tau ènana.
To īa hana tumu te tāvini i te Etua,
ma te ikoa o te tau ènana.
E ùtuna īa i te taetae kāòha me te hēaka haatāvaè
no te hooi i te mikeo.
2 Na te mea he koekoe pepae to īa
me he mea to te tau ènana,
e koàka ia īa te hakāòha mai i te poì e mikeo nei,
e hukaka aa mēìa i to âtou koekoe pōtako.
3 No èià, he mea nui to īa ùtuna hēaka,
no to īa iho mikeo, atii no te tau mikeo o te mataèinaa.
4 Aòè e too pu te ènana na īa ta īa anaè
i hua hana haakāìè. E vavaò te Etua i to Īa tāuà,
me he mea ua ìte tātou no Aarone.
5 Hua mea anaiho ta Ietu Kirito :
i te ava ua tū Īa e Tāuà nui,
u te e too Īa i hua ikoa haakāìè na Īa ta Īa anaè.
U vavaò ia Īa te Etua e peàu aa :
« O òe tu ù Tama. I tēnei â, e hānau au ia òe. »
6 Io he vahi kē, u patuìa pēènei : « He Tāuà òe,
vāàna i te hakatu o Meretiteka,
no te tau tai a tihe ananu. »
ALLELUIA ALLELUIA
cf.Rk.1,68.79
A haameitaììa te Hatu, to tātou Etua ;
U haapupuà Īa i te māàma i ùka o te poì
e noho nei io te pō pōtako.
EVANERIO O IETU KIRITO VĀÀNA E MAREKO 10, 46b-52
I tēia mou pō,
46 e hee aa i vaho o Ieriko Ietu,
to Īa tau kouâ me te haètoa nui,
enā io te taì o te vaanui,
ua noho te ènana matapō e kaiape aa.
O Paratimeo to īa ikoa, tama na Timeo.
47 Ua òko hua ènana matapō e taha nei Ietu no Natareti.
U taaàu anamai me te peàu :
« E te tama a Tavite. E Ietu e. A hakāòha mai. »
48 Mea nui te poì i oonaki ia īa etià e mutu īa.
Atià, tōtahi atu to īa taaàu :
« E te tama a Tavite, a hakāòha mai. »
49 U hakaēa Ietu me te peàu : « A vavaò ia īa ! »
U vavaò âtou i hua matapō me te peàu :
« Oho te ìi. A tū ! U vavaò nei Īa ia òe. »
50 Ua taki anamai īa i te kahu uhi pu,
u keepao me te tihe io Ietu.
51 U pohā te èo o Ietu me te peàu :
« E aha to òe makimaki e hana au no òe ? »
U peàu te matapō :
« E Rapuni e. A tāhakahaka to ù mata. »
52 U peàu Ietu ia īa : « A taha atu.
Mēìa i to òe haatià, u pohuè òe. »
U tāhakahaka anamai to īa mata
me te ūtaì ia Ietu, ma io he vaanui.
TOMINIKA E TOÙ ÒNOHUU MA TAHI
TATAUÌA O TE HĀMANI A MOITE PEÀUÌA TEUTERO
6, 2-6
U peàu Moite i te mataèinaa Iraene pēènei à :
2 etià e pakaihi òe i te Hatu, to òe Etua,
o òe me ta òe tau tama me te tau poupuna,
e aotahi ana ma te tau â paotū i to Īa ture, to Īa tekao,
ta ù e hakako i tēnei â, etià e òa to òe pohuèìa.
3 E to Iraene e, a hakaòko ôtou,
a hano ôtou e aotahi atu :
ma èià, e koakoa ôtou, e haanuiìa ôtou
me he mea ta te Hatu Etua i peàu i to ôtou tau motua tupuna,
ôtou e noho aa io te henua tapavaù
i èià e tahe te vaiū me te mānini tikauè.
4 A hakaòko, e to Iraene.
Te Hatu, to tātou Etua, he Hatu e tahi anaè Īa.
5 A kāòha òe i te Hatu, to òe Etua, ma io he koekoe,
ma io he kuhane me to òe ìi pao nātoa.
6 A haamau ma he koekoe i tēnei tekao
ta ù i tuku ia òe i tēnei â.
TARAMO 119 (118) 97.99, 101-102, 103-104, 105-106
A kāòha òe i te Hatu, to Òe Etua, e pohuè ai òe. Tto. 6,2.5
97 U haataetae nui au i to Òe Ture.
E te Hatu e, paotū te â, u kaituto au ia īa.
99 U māàma atu au i te tau tuhuka e hakako ia ù
Mēìa e kaituto hakaēa koè au i to Òe Ture.
101 Aòè au e taha ma io he vaanui hukaka.
Ua tohe au, e pohuè vāàna i ta òe tekao.
102 Aòè au e pūtuì i to Òe makimaki.
O Òe anaiho te tuhuka te i hakako mai.
103 U kōnini to Òe tekao te i haamāàma mai,
U mānini atu i to te tau manumanu tikauè.
104 U haamāàma mai to Òe Ture ia ù.
U haahaa au i te vaanui haahukaka i te ènana.
105 To Òe Ture me he àma o to ù taha vaevae,
Me he àma kohe e tūìka i to ù vaanui.
106 U haatiàtohu au i ta ù tekao voto :
E tohe au e aotahi i to Òe Ture.
TATAUÌA O TE HĀMANI I TO HEPEREO 7, 23-28
23 He mea nui te tau tāuà vāàna i te ati o Revi.
Aòè e koàka hoì ia âtou te hana ananu i te hana tāuà,
na te mea e poì mate vave âtou.
24 O Ietu à, e pohuè Īa no te ava paona koè.
No èià, u Tāuà nui Īa no te ava paona koè.
25 U koàka ia Īa te haapohuè pao ònaòna
i te tau ènana e ùmihi aa i te Etua ma io Īa.
U pohuè hoì Ietu no te vavaò i uē i hua tau ènana.
26 O īa na te Tāuà nui e hei toitoi no tātou :
he Tāuà peàto, taìtaì pē, mikeo koè,
haapaekēìa me i vāveka o te poì mikeo,
haatiketikeìa i ùka nui o te àki.
27 Aòè e hei no Īa, me he mea te tau tāuà kē,
e ùtuna paotū te â i te hēaka no to Īa iho tau mikeo,
ma hope, no te tau mikeo o te mataèinaa.
O Ietu Kirito à, u haapao Īa e tahi ùtuna anaè,
to Īa ùtuna ia Īa iho me he hēaka
te i mau ai no te ava paona koè.
28 Vāàna i te Ture a Moite,
ua vaeìa te tau ènana koekoe pepae no te hana Tāuà nui.
Atià, vāàna i te tekao tiàtohu haamauìa e te Etua,
te i tihe ma hope o te Ture,
u hakatūìa tītahi Tama peàto pao ònaòna
no te tau tai a tihe ananu.
ALLELUIA ALLELUIA
1 In.4,8.7
He kāòha hoì te Etua.
Te ènana i kāòha i te hoa,
he tama īa o te Etua ; ua ìte īa i te Etua.
EVANERIO O IETU KIRITO VĀÀNA E MAREKO 12, 28b-34
I tēia mou pō,
28 u haatata mai io Ietu tītahi o te tau tuhuka tekao
me te ūi atu ia Ietu pēènei :
« Te tekao hea te tekao to mua i vāveka o âtou nui ? »
29 U haahua atu Ietu : « Oia nei te tekao to mua.
A hakaòko mai, e to Iraene e !
Te Hatu, to tātou Etua, o Īa anaè te Hatu.
30
A kāòha òe i te Hatu to òe Etua, me io he koekoe,
me io he kuhane, me io he ènana tiàtohu,
me io to òe ìi paotū.
31 Oia nei te tekao e ùa :
A kāòha òe i te hoa me he mea ia òe anaiho.
Aòè he tekao kē taetae aè i nā tekao nei. »
32 U peàu te tuhuka tekao ia Ietu :
« Meitaì oko, e Tuhuka e !
E tiàtohu nui ta òe tekao nei :
Tootahi te Etua. Aòè he Etua kē.
33 Te kāòha ia Īa me io he koekoe,
me io he ènana tiàtohu, me io he ìi pao ònaòna,
atii te kāòha i te hoa me he mea ia òe anaiho,
he mea taetae atu i te tau ùtuna pūovo i te ahi
me te tau hēaka paotū. »
34 E ìte aa Ietu u toitoi ta īa tekao, u peàu :
« Ua tata òe me te Patirēia o te Etua. »
Aòè te ènana e tahi i vaavō no te ūi atu ia Īa.
TOMINIKA E TOÙ ÒNOHUU MA ÙA
TATAUÌA O TE HĀMANI TO MUA A TE TAU HAKAÌKI
17, 10-16
10 Ua tū Eria me to īa hiti i Tarepa.
Ua tihe īa i te avaputa o te pāpuahaè.
Enā i èià tītahi vehine pōpī e kohi aa i te vehie.
U vavaò Eria ia īa me te peàu atu :
« A kapu òe i te òna vai io he hue. E inu au. »
11 Ua hano te vehine e kapu i te òna vai.
U peàu atu Eria ia īa : « A tuku mai i te haraoa. »
12 Ua hua te vehine :
« Ma te ikoa o te Hatu, to òe Etua, aòè a ù haraoa.
Oia anaè ta ù : te atuàka haraoa tee
i òto o te huekeâ me te iti noa o te kao.
E kohi nei au i te vehie. E hua au io he haè
kānea i te toeka o te kai no ù me ta ù tama.
E kai māua me to māua mamate. »
13 U peàu Eria i te vehine : « Aua e haametaù.
A hee atu. A hana me he mea ta òe i peàu.
Atià, òmua a tao i te poo haraoa iti. A kave mai.
Ma hope iho, a kānea òe i te haraoa na òe me ta òe tama.
14 Oia nei hoì te Tekao a te Hatu, te Etua o Iraene :
« Aòè e pao ai te hue me te haraoa tee.
Aòè e kiko koè te hue me te kao,
tihe i te â e haatopa te Hatu i te ūa i ùka o te henua. »
15 Ua hee te vehine me ta īa hana vāàna i te tekao a Eria.
Ma te nuiìa o te â, ua kai haamaòna
te peroheta, te vehine me ta īa tama.
16 Aòè e pao te hue haraoa tee. Aòè e kiko koè te hue kao,
vāàna i te Tekao a te Hatu, te i hakaìteìa e te peroheta Eria. »
TARAMO 146 (145) 5-6a, 6c-7b, 8b-9a, 9b-10
E hīmene au i te Hatu ma te òa o to ù pohuèìa. cf.146,2
5 Mamau te ènana e ìò te Hatu o Iakopo to īa toko.
Mamau te ènana e tetaì nei i te Hatu, to īa Etua.
6 Na Īa i pēpena i te àki, te henua, te tai.
E hana ananu te Hatu vāàna i ta Īa i hakaìte mai.
7 U haavā Īa me te toitoi i te poì mākakaìa.
U vaièi Īa i te oà i te poì mate i te oke.
8 O te Hatu te i haaūo i te poì kuhane koè.
O te Hatu te i haataetae i te poì toitoi noa.
9 O te Hatu te vavao o te tau manihii.
O te Hatu te toko o te vehine pōpī
Me te tama motua kui koè.
10 E vivini nei te Hatu ma te tau tai ananu.
E Tiona e, a pohuè paona koè to òe Etua.
TATAUÌA O TE HĀMANI I TO HEPEREO 9, 24-28
E tu ù tau tuàne tuehine,
24 aòè Ietu i tomo i òto o te Vahi tapu
hanaìa e te îìma ènana,
he ata anaè hua Vahi o te Ahu tapu tiàtohu.
Ua tomo Ietu i òto o te àki toitoi,
etià e tū Īa i mua o te Etua no te vavaò i uē ia tātou.
25 Aòè Ietu e ùtuna hakaùa i to Īa ùtuna hēaka
me he mea a te tāuà nui te i tomo
i òto o te Vahi tapu, i tēia èhua, i tēia èhua,
no te ùtuna i te toto o te tau ànimara,
aòè o to īa iho toto.
26 Anoa i hana atii Ietu,
he mea nui to Īa mamae me te mateìa
me i te tumu u pēpenaìa te aomāàma nei.
Atià, i tēnei ava paoìa o te ao nei,
e tahi anaè to Ietu hakaìte ia Īa iho
no te haakoè i te mikeo ma to Īa ùtuna hēaka.
27 E mate te tau ènana paotū, atià e tahi mateìa anaè to âtou.
I muì iho, e haavāìa âtou e te Etua.
28 Atii to Ietu Kirito : ua ùtuna ia Īa anaiho,
e tahi ùtuna anaè no te haakoè i te mikeo
no te nuiìa o te poì.
E hakaìte iho ia Īa, aòè mēìa i te mikeo,
atià no te haapohuè i te tau ènana e tetaì nei ia Īa. »
ALLELUIA ALLELUIA
Mt.5,3
Mamau te tau ènana koekoe veve.
No âtou te Patirēia o te Àki.
EVANERIO O IETU KIRITO VĀÀNA E MAREKO 12, 38-44
I tēia mou pō, e hakako ana Ietu, u peàu pēènei :
38 « Umoì ôtou e haakē me te tau tuhuka tekao.
E kōhoà nei âtou e taha atu ma io he vaanui,
uhiìa me te kahu òoa.
Te mea haaèkaèka ia âtou, te òko io he tohua
i te tau ènana e pohā te èo no te pakaihi ia âtou,
39 te i noho io he nohoka to mua i òto o te tau tinakoka,
te moe io he òki haakāìè io te kaiìamau.
40 Ua hao âtou i te taetae o te tau vehine pōpī,
i te ava u haaòa i to âtou pure ma te kāìè pu.
He mea pē atu te tuki haamamae e topa i ùka o âtou. »
41 I òto o te Hiero, e noho aa Ietu i mua o te puho avaiìa moni,
u tiòhi Īa pēhea e tuku te haètoa i te moni hunahuna
io te vahi avaiìa moni. Enā te nuiìa o te poì taetae
te i tuku atu i te puke moni.
42 Ua tihe mai e tahi vehine pōpī, ua veve īa.
Ua tuku īa e ùa pene anaè, he moni hunahuna ti.
43 U vavaò Ietu i to Īa tau kouâ me te peàu ia âtou :
« E tekao tiàtohu ta ù nei ia ôtou.
« O hua vehine pōpī, he vehine veve,
ua tuku īa nui atu i te tau ènana paotū
te i tuku io he puho avaiìa moni. »
44 Ua tuku âtou i te mea i toe o te nuiìa
o to âtou taetae. O īa, me io to īa àì,
ua tuku atu i ta īa taetae paotū.
Ua tuku hoì hua vehine
i te moni utu i te mea kai no te pohuè. »
TOMINIKA E TOÙ ÒNOHUU MA TOÙ
TETAUÌA O TANIERE TE PEROHETA 12, 1-3
1 O au nei o Taniere.
Ua òko au i te tekao ta te Hatu i peàu mai :
« I hua ava a tihe mai nei, e tū ai Mikaere,
te hakaìki o te tau anera, te tiaki meitaì o to òe mataèinaa.
He ava hoì o te àì nui.
I te tai tehito, me i te tumu o te tau mataèinaa paotū,
u te e ìte te tau ènana i te mou â
hakatu me hua ava a tihe mai.
2 Atià, e haapohuèìa to òe mataèinaa
atii me te tau mataèinaa u patuìa to âtou ikoa
i òto o te Hāmani o te Etua.
E vaa te nuiìa o te ènana mamate
e moe aa i òto o te èpo :
E vaa tahipito no te pohuè ananu,
e vaa tahipito no te hakaìka me te mate ananu.
3 Ma te tau tai a tihe ananu,
e pupuà me he òumati te tau ènana kuhane māàma.
Me he mea i te pō, u keàpa te tau hetū,
atii te tau tuhuka tekao te i hakako i te tau ènana
no te pohuè vāàna i te toitoi o te Etua. »
TARAMO 16 (15) 5.8, 9-10, 1b.11
E tu ù Etua e, a tiaki meitaì ia ù.
O to ù hīa io Òe, tu ù vahi maù. 16,1
5 O te Hatu te hope taetae i ìò ia ù.
Io to Òe ìma, e te Hatu e, to ù pohuèìa.
8 I mua o to ù mata ananu te Hatu,
Ma to ù kaokao to Īa noho, u haametaù koè au.
9 Ua û i te koakoa to ù kuhane.
U èkaèka to ù nino, ua moe me te moû.
10 Aòè te Hatu e ao e hika au i te mateìa.
Aòè Īa e avai i to Īa hoa e pē ai io he èpo.
1b E tu ù Etua e, o to ù hīa io Òe, tu ù vahi maù.
11 U aahi mai Òe ma io he vaanui o te pohuè,
I mua o to Òe mata te koakoa, te koakoa nui.
Ma to Òe kaokao te èkaèka paona koè.
TATAUÌA O TE HĀMANI I TO HEPEREO 10, 11-14 18
11 I te ava o te Piimau tehito, i tēia â, tēia â,
ua tomo te tau tāuà io he haèpure
no te haapao i te hana pure
me te ùtuna atu i te tau hēaka,
hua mea anaiho paotū te â.
E mea à, u te e koàka i hua hēaka te hooi i te mikeo.
12 O Ietu Kirito à, he mea kē ananu.
Ia pao to Īa ùtuna atu, e tahi ùtuna anaè,
no te haakoè i te mikeo,
u tānoho Īa i te ìma oko o te Etua no te ava paona koè.
13 U tiaki Īa e tomiìa ma àò o to Īa nā vaevae
te tau mana i tōtōua me Īa, te i haapākeka ia Īa.
14 Mēìa i to te Kirito ùtuna hēaka e tahi anaè,
u haameitaì i te tau ènana ta Īa i haapeàto.
18 Ia koè te tau mikeo,
e koè hoì te ùtuna hēaka no te tau mikeo.
ALLELUIA ALLELUIA
Rk.21,36
A matavaa ôtou. A pure paotū te â
etià e tū ai ôtou i te aò o te Tama a te ènana.
EVANERIO O IETU KIRITO VĀÀNA E MAREKO 13, 24-32
U peàu Ietu i to Īa tau kouâ no to Īa tiheìa.
24 « I tēia mou pō, ma hope o hua ava o te mamae nui,
e haapōtakoìa te òumati, u te e pupuà te meàma.
25 E topa pu te tau hetū me io he àki.
E keukeue te tau mana o te àki.
26 A tahi a ìteìa te Tama a te ènana e iho aa
i òto o te ao me io he àki me te mana me te kāìè.
27 E pahi atu Īa i te tau anera no te haaputuputu
i te tau ènana vaeìa, me io te kēkē o nā metaki e hā,
me io te kotina paoìa o te henua,
tihe atu i te kotina paoìa o te àki.
28 A tiòhi i te tumuâkau fiko,
a vivini ôtou i tēnei tekao haapupuà.
Ia peehū te makamaka, ia tupu te àu,
e vivini ôtou u haatata mai te ava o te mei nui.
29 Atii me ia ôtou : ia ìte ôtou i te tau mea peàuìa,
a māmaakau ôtou, u haatata mai te paoìa.
Enā i te avaputa.
30 E tekao tiàtohu ta ù nei ia ôtou :
oi kaò tēnei tai ènana, enā e tihe mai tēia tau mea.
31 E koè ai te àki, e koè ai me i te henua,
aòè e koè ta ù tau tekao.
32 Atià, a hea e tihe hua pō ? A hea hua ava ?
U te e ìte te ènana e tahi, aòè te tau anera io he àki.
U te e ìte me te Tama anaiho.
O te Motua anaè te i ìte. »
TE KOÌKA O IETU KIRITO TE HAKAÌKI NUI
TATAUÌA O TE PEROHETA TANIERE 7, 13-14
O au nei o Taniere.
13 E tiòhi mau nei au, ua ìte au i te hakatu ènana
e iho ana i òto o te ao me io he àki :
e Tama a te ènana.
Ua tihe Īa io te Kooūa.
U aahiìa me te haatata mai i mua o te nohoka kāìè.
14 Ua tukuìa i hua Tama a te ènana
te mana me te kāìè me te hakaìkiìa.
Na Īa te vivini i te tau mataèinaa ia ôtoa
me te tau henua paotū me te nuiìa o te ènana,
èo kē èo kē to âtou.
E mau paona koè to Īa viviniìa,
to Īa hakaìkiìa no te tau tai a tihe ananu.
TARAMO 93 (92) 1abc, 1d-2, 5
E Ietu Kirito, te Hatu e, ia Òe te Patirēia me te kāìè.
1 He Hakaìki te Hatu.
U vāhīìa me te kāìè.
Ua uhi Īa i te mana.
2 Ua mau te henua, keue koè.
Ua mau to Òe nohoka hakaìki.
Me i òmua naoti, ua tū toitoi Òe.
5 Aòè e huìkē to Òe makimaki.
U haapī to Òe ao tapu i te Hiero.
E te Hatu e, no te tau tai hakatahi.
TATAUÌA O TE HĀMANI APOKARUPO 1, 5-8
O Ietu Kirito te i haatiàtohu i te Etua.
5 O Īa to mua ta te Etua i hakatū hakaùa
me i vāveka o te huaa mamate.
O Īa te Hakaìki nui o te tau hakaìki paotū o te henua vii pu.
Ia Ietu Kirito te i kāòha mai, te i haakoè
i to tātou tau mikeo, ma to Īa ùtuna hēaka io he peka,
6 te i haaìò ia tātou he mataèinaa,
he papatauà no te tāvini i te Etua, to Īa Motua.
Ia Ietu Kirito hoì te kāìè me te mana
ma te tau tai a tihe ananu. Amene.
7 Eīa, me io he àki, ma òto o te ao, e tihe mai te Kirito.
E ìteìa Īa e te tau ènana kōtoa me te poì te i putaèe ia Īa.
I to Īa aò, e unu me te uēuē te tau mataèinaa paotū. Amene.
8 U peàu te Hatu Etua : « O au te Tumu me te Hiku
te i tū nei, te i tū òmua naoti, te i tihe mai ai, te Mana nui. »
ALLELUIA ALLELUIA
cf. Mk.11,10
A meitaììa te hakaìkiìa o Tavite, to tātou Motua,
te Patirēia o te tau tai hou !
A meitaììa te tihe nei ma te ikoa o te Hatu.
EVANERIO O IETU KIRITO VĀÀNA E IOANE 18, 33-37
I tēia mou pō, u peàu Pinato ia Ietu
33 « Aha, o òe te hakaìki nui o te tau ati Iuta ? »
34 U hua atu Ietu : « Na òe ta òe tenā tekao ?
Akoè à na tahipito i peàu mai i ùka o au ? »
35 U peàu Pinato ia Īa : « Aha, he ènana ati Iuta au nei ?
Na to òe mataèinaa me te tau tāuà
i haaìò mai ia òe io ù.
E aha ta òe i hana atu ? »
36 Ua hua atu Ietu ia Īa :
« Aòè me i te ao nei to ù hakaìkiìa.
Me he mea me i te ao nei to ù hakaìkiìa,
e tōtōua hoì to ù huaatautua,
oa haaìòìa au i te poì ati Iuta.
Atià, aòè hakatu to ù hakaìkiìa me to te ao nei. »
37 U peàu Pinato ia Īa :
« No èià, he hakaìki òe ? »
Ua hua atu Ietu ia Īa :
« Na òe i peàu. He hakaìki au.
Oia te tumu o to ù hānauìa
me te tiheìa i te aomāàma nei :
no te hakaìte i te mea tiàtohu.
Te ènana i kē me te tiàtohu,
u hakaòko īa i ta ù tekao. »
Comments