TE TEÀO A TE ETUA NO TE ÈHUA KIRITIANO C - ÈO KĒKĒ ÙNA
TO MUA TOMINIKA O TE AVA TETAÌ
TETAUTINA O TE PEROFETA IEREMIA 33,14-16
14 O īa nei te teào o te Fatu :
« E tihe mai te ava e vaièi atu au i te koakoa
ta ù i peàu atu i te ati Iraene, atii me te ati Iuta.
15 I tēia mou pō, e haatupu au no te huaa o Tavite
E vivini īa i te fenua ma te Tiàtohu me te Toitoi.
16 I tēia mou pō, e haapohoètia te ati Iuta.
I Ierutaremi, e nōnoho te tau ènata me te moû,
O īa nei te inoa e apatia i Ierutaremi :
« O te Fatu to tātou toitoi. »
TARAMO 25 (24) 4-5b, 8-9, 10.14
E te Fatu e, io Òe to ù kāòha. Io Òe tu ù hīa, e tu ù Etua e. 25,1
4 E te Fatu e, a haaìte mai i to Òe maìmaì.
O Òe iho a hakako mai i to Òe tau aanui.
5 A haatee mai to Òe tiàtohu : a haamāàma mai.
O Òe hoì te Etua e haapohoè ia ù.
8 U meitaì, u toitoi anaè te Fatu,
Te i haaìte i te aanui i te poì hukaka.
9 U aahi to Īa toitoi i te poì haapāpaù,
U hakako i to Īa maìmaì i te ènata kāìè koè.
10 He kāòha me te tiàtohu te aanui o te Fatu,
No te ènata e aotahi atu i to Īa Piimau.
14 E haavivini te Fatu i hua ènata
I te tumu o to Īa maìmaì me te Piimau.
TETAUTINA O TO MUA HĀMANI I TO TETARONIKA 3,12-13 ; 4,1-2
12 O ôtou à, koù na te Fatu e haameitaì aè ia ôtou,
e haaūo atu i to ôtou koekoe kāòha te hoa i te hoa,
me he mea to mātou kāòha ia ôtou.
13 Ma èià, e haaoko te Fatu i to ôtou koekoe haatià,
peàto, teka koè, i mua o te Etua, to tātou Motua,
e tiaì ana i te â o te Huatina mai o to tātou Fatu Ietu
me to Īa tau anera.
1 E tu ù tau tunane tuehine, u hakako mātou ia ôtou
e aha te hakatu pohoè te i haaèka i te Etua.
I òto o te Fatu Ietu, u toutaki mātou etià e hee ôtou i mua,
2 Ua ìte ôtou e aha ta mātou i peàu ia ôtou,
ALLELUIA ALLELUIA cf. Ta.85,8
E te Fatu e, a haaìte mai i to Òe hākāòha nui. A vaièi mai i to Òe haapohoètina.
EVANERIO O IETU KIRITO VĀÀNA E RUKA 21, 25-28.34-36
I tēia mou pō, u peàu atu Ietu pēènei :
25 « E ìtetia mai te tau hakatu haametaù
io te òumati me te māhina me te tau fetū.
I ùna o te fenua, e pūpūkina te tau mataèinaa
i te mea òomi menava,
emièe ana i te pooìna o te tai pekē oo.
26 E mate te tau ènata i te haametaù,
e tetaì ana i te mea a tihe mai io te aomāàma.
E neue hoì te tau fetū io he àni.
27 A tahi a ìtetia te Tama a te ènata
e tihe ana i to he ao me te Mana me te Kāìè.
28 I te tīmatatina o hua tau mea mahaò, a tū, a feau.
U tataèka to ôtou haapohoètina.
34 A tiòhi ia ôtou aneiho, oa pē to ôtou koekoe
i te kai oo, te kona hae me te tau kōfii no te tau â paotū.
E tihe pu anamai hoì te â nei.
35 Me he ùpena, e topa anamai īa i ùna o te tau ènata paotū
e noho nei io te aomāàma viipū.
36 A matavaa ôtou, a pure paotū te â,
etià he koekoe oo to ôtou no te tohe mau,
oa hemotia i te ìno e tihe mai,
etià e tū ai ôtou i te aò o te Tama a te ènata. »
TOMINIKA E ÙA O TE AVA TETAÌ
TETAUTINA O TE PEROFETA PARUKO 5, 1-9
1 E Ierutaremi e, a taki i to òe kahu uē, i to òe kahu pēpē.
A tāpī ia òe me te pootu o te kāìè o te Etua,
no te ava paona koè.
A uhi ia òe me te kahu o te toitoi o te Etua ;
ma ùna to òe upoo te paèkuà.
A tokihi òe i te kāìè o te Etua pohoè.
2 E haakeàpa te Etua i to òe poèa ma te tau vahi paotū
i aò o te àni, na te mea e vevaò anatu te Etua ia òe
ma tēnei tau inoa : « Te Moû me te Toitoi »,
« Te Kāìè o te Pakaihi i te Etua. »
3 A tū, e Ierutaremi e. A tū òe ma ùna he tuaivi,
a tiòhi atu i te kēkē o te tihena o te òumati.
Enā ta òe tau tama i putupututia mai
i te mana o te teào o te Etua,
me i te tihena òumati tihe toitoi i to i īa naòna.
4 U koakoa âtou na te mea u haamaakau te Etua ia âtou.
5 U titii âtou ia òe, e taha atu ma he vaevae.
U haamōèhutia e te tau ènata i tōtōua me òe.
6 I tēnei, u haahua mai te Etua ia âtou io òe,
tautuatia âtou me te kāìè,
me he mea i ùna o tītahi nohona hakāìki.
7 O īa hoì te teào o te Etua :
E haapāpaùtia te tau tuaivi tiketike
me te tau pūkei mau ananu. E haapītia te tau kākaavai,
e haapaahaahatia te fenua etià e taha atu te mataèinaa
o Iraene haametaù koè ma òto o te Kāìè o te Etua.
8 U peàu te Etua : Te maaâkau me te tau tumuâkau kekaa nui,
a vaièi atu âtou i te vahi maù no te mataèinaa Iraene.
9 E haatee hoì te Etua ia Iraene ma òto o te koakoa,
io te māàma pupuà o to Īa kāìè.
E aahitia atu me te kāòha me te toitoi noa.
TARAMO 126 (125) 1-2b, 2c-3, 4-5, 6
E haatee hoì te Etua i to Īa mataèinaa ma òto o te koakoa, io te māàma pupuà o to Īa kāìè. cf. Pa.5,9
1 Ia haahua mai te Fatu ia mātou,
Ia hua mai i Tiona mātou poì mōèhu,
Me he ènata moemoeā to mātou hakatu.
2 Ua pī to mātou fafa i te katahehe.
U taaàu mātou i te taa koakoa.
A tahi a mevaha te teào io te poì èteni :
Auē, te hana mahaò ta te Fatu i hana no âtou.
3 He hana mahaò hoì to Īa i uē ia mātou,
Ua tihe to mātou ava no te haakoìna koakoa.
4 E te Fatu e, a haahua ia mātou,
Me he mea te vaitahe io te fenua ataha.
5 E tūtū te ènata i te kākano e uēuē ana.
Ua kohi īa i te tau puku, me te koakoa.
6 E taha īa, taha atu e tūtū i te kākano,
Me te uē me te mateteka.
Ua hua īa, hua mai me te koakoa,
E àve ana i te pūpā faraoa.
TETAUTINA O TE HĀMANI A PAURO PEÀTO I TO FIRIPO 1, 4-6.8-11
E tu ù tau tunane tuehine.
4 I tēia â, tēia â i òto o to ù tau pure paotū,
u vevaò au me te koakoa i uē ia ôtou,
5 e kaituto ana pēhea to ôtou toko mai ia ù
no te haamevaha i te Evanerio,
me i te â to mua o to ù tihena atii tihe i tēnei.
6 Ma te tiàtohu, o te Etua te i tīmata e hana i òto o ôtou
i hua hana meitaì, e haapao Īa vāàna i to Īa maìmaì,
tihe atu i te â o te Tihena o te Kirito Ietu.
8 O te Etua aneiho te i haatiàtohu i to ù haataetae ia ôtou nui,
i òto o to te Kirito Ietu hākāòha mai.
9 O īa nei to ù pure vevaò i uē ia ôtou :
nui aè to ôtou kāòha atu kāòha mai,
etià e hōhonu to ôtou māàma no te ìte i te tiàtohu
10 no te vae i te hana meitaì e hana atu.
Ma èià, i te â o te Tihena o te Kirito,
11 A toitoi noa to ôtou hakatu pohoè,
na Ietu Kirito anaè e vaièi ia ôtou,
etià e hahi me te haakāìètia te Etua.
ALLELUIA ALLELUIA cf. Ruka.3,4.6
A haapei ôtou i te aanui o te Fatu. A haapaahaaha i te tahatina o to Īa tapuvae. E ìte te ènata hakatahi i to te Etua haapohoètina.
EVANERIO O IETU KIRITO VĀÀNA E RUKA 3, 1-6
1 I te èhua ònohuu ma ìma o te hakāìkitina o Tiperio Ketare,
o Ponotio Pinato te kuvenea o te Fenua Iutea,
o Herote te hakāìki o te Fenua Karirea,
o Firipo to īa teina,
te hakāìki o te Fenua Iturea me Tarakonia,
o Ritana te hakāìki o te Fenua Apirena,
2 e tāuà nui ana o Hana me Kaifa,
ua tihe te teào a te Etua io Ioane, te tama na Takaria.
I hua ava, ua èka Ioane i te fenua ataha.
3 Ua vii Ioane i te kaavai Ioritane ia ôtoa,
e haamevaha ana i te teào o te papatema
no te fāìu i te koekoe
etià e haakoètia te tau mikeo.
4 O īa te i patutia io he hāmani o Itaia te perofeta :
« I te fenua ataha ua ònotia te èo e taaàu ana,
pēènei : A haapeipei i te putatina mai o te Fatu.
A haapaahaaha i to Īa aanui.
5 A haapī i te vao, a haapāpaù i te tuaivi me te pūkei,
a haatoitoi i te aanui pikopiko,
a haamenia i te vahi keâkeâ.
6 E ìte te tau ènata paotū i te haapohoètina o te Fatu. »
TOMINIKA E TOÙ O TE AVA TETAÌ
TETAUTINA O TE PEROFETA SOFONIA 3, 14-18a
14 E te moî Tiona e, a taaàu i te koakoa.
E te moî Ierutaremi e, a tatakahiti i te èkaèka.
E te mataèinaa Iraene, a haatani i te hīmene hahi.
15 U haamemao te Fatu me io òe
i te tau ènata kaipipiò pu.
U haahina te Fatu i te tau ènata e tōtōua me òe.
Enā io to òe pāpua te Fatu, te hakāìki o Iraene.
16 I hua ava, u peàpeàu to Ierutaremi pēènei :
Aua e oha i to òe upoo na te hakāìna.
17 Enā io òe te Fatu Etua.
O īa te toa hoka e haapohoè ia òe.
O òe te haakoakoa me te haaèkaèka i te Fatu.
Mēìa i to Īa kāòha mai, e haahou Īa
18 E haka te Fatu iho me to Īa hīmene i te hīmene koakoa
e tahi me òe, me he mea i te â koìna. »
HĪMENE Itaia 12, 2,4b-e. 5b-6
E Tiona e, a èkaèka, a taaàu i te koakoa. Enā te Fatu Etua i vāvena o tātou. cf.It.12,6
2 O te Fatu Etua tu ù Haapohoè.
U haatià nei au, haametaù koè.
O te Fatu Etua tu ù ìi. E hīmene au ia Īa.
Io te Fatu te tumu o to ù pohoè.
4 A haahuaèkaèka i te Fatu ;
A haamevaha i to Īa inoa.
« A faì atu io te poì èteni i to Īa tau hana mana. »
A haaìte atu : he Tiketike to Īa inoa.
5 A haatani i te pū no te hahi i te Fatu.
Ua hana hoì te Fatu i te hana mahaò.
6 E Tiona e, a èkaèka, a taaàu i te koakoa.
U titike te Fatu Etua i vāvena o ôtou,
te Peàto nui o Iraene.
TETAUTINA O TE HĀMANI A PAURO PEÀTO I TO FIRIPO 4, 4-7
E tu ù tau tunane tuehine.
4 A koakoa anatu ôtou i òto o te Fatu ;
u peàu hakaùa : a koakoa ôtou.
5 A ìte te tau ènata paotū i to ôtou koekoe vaièi.
U haatata mai hoì te Fatu.
6 Umoì e haapaòpaò pu ia ôtou iho.
I tēia ava, i tēia ava, a haahuaèkaèka i te Fatu.
Ma òto o te pure vevaò a ùtuna atu i te Etua
i to ôtou tau apetina.
7 Ia noho i òto o ôtou te moû me io te Etua,
he haametaù koè to ôtou koekoe me te kuhane
i òto o Ietu Kirito.
O hua moû te i iho mai me io te Etua,
u te e koàna i te ènata te haavivini mai.
ALLELUIA ALLELUIA. Rk.1,76 ;1,7
Ua tihe Ioane, te perofeta o te Tiketike nui, no te kānea i te aanui i mua o te Fatu, me te haatiàtohu i te Māàma.
EVANERIO O IETU KIRITO VĀÀNA E RUKA 3, 10-18
I tēia mou pō,
10 ua ūi mai te faètoa ia Ioane me te peàu :
« E aha te hana e hana atu mātou ? »
11 U haahua Ioane me te peàu ia âtou :
a tuu atu e tahi i te ènata kahu koè.
O te ènata me te oà, a hana hua mea aneiho. »
12 Ua tihe me te mou pupurikano no te hano mai i te papatema.
U peàu âtou : « E Tuhuna e, e aha ta mātou e hana atu ? »
13 U peàu Ioane ia âtou : « Umoì e hakapahi i te ènata
e tuu nui atu i te moni haaheitia no ôtou. »
14 Enā me te tau kape te i ūiūi ia īa :
« O mātou à, e aha te hana e hana atu ? »
U peàu Ioane ia âtou :
« Umoì ôtou e viitoi i te ènata e tuu mai i ta īa moni,
umoì e haamākaka i te ènata ma te pōtoho pu ia īa.
Umoì e kōhoà i te haanui atu. »
15 Ohia u tetaì te mataèinaa me te kaituto âtou nui
io he koekoe : o Ioane oti te Kirito,
16 u haahua Ioane me to īa peàu ia âtou paotū, pēènei :
« O au nei, u papatema au ia ôtou i to he vai.
Atià, enā a tihe mai tītahi, nui atu to Īa mana i to ù.
Aòè e hei ia ù te vevete i te aho o to Īa aihū.
Na Īa e papatema ia ôtou i to he Kuhane Meitaì me te ahi.
17 Enā i to Īa îìma te haìna no te tūtū i te faraoa
me te haataìtaì i to Īa tohua.
E haapuke Īa i te kākano io he faè avaina kākano.
E haapūovo Īa i te kaù faraoa moô io he ahi uà paona koè. »
18 U toutaki tōtahi atu Ioane i te mataèinaa,
e haaìte ana ia âtou i te Teào Meitaì hou mai.
TOMINIKA E FĀ O TE AVA TETAÌ
TETAUTINA O TE PEROFETA MIKEA 5, 1-4a
1 O īa nei te teào a te Fatu :
« E Petereemi Eferata,
o òe te ati iti noa i vāvena o te tau ati o Iuta ;
me i òto mai o òe, e haatū au i te Hakāìki e vivini ia Iraene.
2 O te tai kākiu te tumu o to īa matatetau,
Ma muì o tītahi ava no te titii atu,
e tihe mai te â e fānau te vehine,
te i haaheitia no te fānau.
3 E haatahi te toena o to īa tau tunane me te tau tama o Iraene.
E tū īa. O īa to âtou tiaì meitaì,
ma te mana o te Fatu, ma te inoa kāìè o to īa Etua.
4 E pohopohoè âtou me te haametaù koè.
E neke hoì te hakāìkitina o hua vivini
tihe atu i te kotina paona o te fenua.
O īa aneiho te tumu o te moû. »
TARAMO 80 (79) 2.3bc, 15-16, 18-19
E te Fatu mana nui e, a haahua ia mātou i te meitaì. A matavaièi mai, e haapohoè ia mātou. 80,4
2 E te Tiaì o Iraene, a hakaòno i to mātou pure,
O Òe te i haatee mai me he mea i te naho muto.
O to Òe nohona kāìè i ùna o nā anera Kerupi.
3 A vaa. A haapohoè ia mātou !
15 E te Etua mana nui e, a matavaièi mai.
A tiòhi Òe me io he àni, a ìte meitaì.
16 A toko i te tumuvino tanutia e to Òe ìma,
I te huì na to Òe mana i haatupu.
18 A toko to Òe ìma i te ènata i vaetia e Òe,
I te tama a te ènata ta Òe i haatū.
19 Koè nui e paekē mātou me io Òe.
A haapohoè mai, e hahi mātou i to Òe inoa.
TETAUTINA O TE HĀMANI I TO HEPEREO 10, 5-10
E tu ù tau tunane tuehine,
5 O īa te piò, i te ava ua tihe te Kirito io te ao nei,
u peàu Īa pēènei : « E te Etua e, aòè Òe i maìmaì
i te ùtuna hēana, akoè à i te tau ùtuna hakatu kē.
Atià, u kānea Òe i te tino no ù.
6 Aòè Òe i āpuu i te hēana pūovo i te ahi,
i te ùtuna haatāvaè no te haakoè i te umu mikeo.
7 U peàu hoì au ia Òe : Eīa au nei.
Ua tihe au no te haatae i to Òe maìmaì, e te Etua e,
vāàna i te mea i patutia io he Hāmani tapu i ùna o au nei. »
8 To mua u peàu te Kirito :
« Aòè Òe i maìmaì i te ùtuna hēana,
u te e āpuu Òe i te ùtuna o te taetae kāòha,
te hēana pūovo i te ahi, te ùtuna haatāvaè i te umu mikeo. »
O âtou paotū te tau ùtuna peàutia e te Ture a Moite.
9 I muì iho, u peàu te Kirito :
« Eīa au nei no te haatae i to Òe maìmaì. »
Ma èià, u haakoè te Kirito i te ùtuna hēana to mua,
no te haamana i te hakatu ùtuna hou.
10 U haapeàtotia tātou, mēìa u aotahi Ietu Kirito
i te maìmaì o te Etua me to Īa ùtuna i to Īa iho tino,
e tahi ùtuna anaè no te tau tai a tihe anatu.
ALLELUIA ALLELUIA cf. Ho.3, 14.17
A hīmene, a tatakahiti i te koakoa. Mamau òe e Maria peàto, enā io òe te Fatu Etua.
EVANERIO O IETU KIRITO VĀÀNA E RUKA 1, 39-45
I tēia mou pō,
39 ua taha atu Maria me te fiti haakoi i uta, io te tuaivi,
io tītahi pāpuafaè o te Fenua Iutea.
40 Ua uu īa i òto o te faè o Takaria
me to īa kāòha atu ia Eritapeta.
41 I te ava ua òno Eritapeta i te kāòha mai o Maria,
ua ù te tama i òto o to īa kōpū,
ua pī Eritapeta i te Kuhane Meitaì.
42 U taaàu īa me te èo oo e peàu ana :
« U kāìètia òe i vāvena o te tau vehine.
U kāìètia me te tama me i òto o to òe kōpū.
43 E pēhea ua tihe io ù nei te kui o to ù Fatu ?
44 Na te mea, ia tani to òe kāòha mai io to ù puaìna,
ua ù i te koakoa te tama i òto o to ù kōpū.
45 Mamau hoì te vehine i haatià e pao ai
te mea i faì atu ia īa ma te inoa o te Fatu. »
NO TE OÌOÌ O TE KOÌKA NOERE
TATAUÌA O TE PEROHETA ITAIA 62, 1-5
1 I uē Ierutaremi, aòè au e mutu.
I uē ia Tiona, aòè e mutu to ù fafa,
tihe e ìtetia to īa toitoi me he pupuà o te atauà,
e keàpa to īa hakatu me he àma pūkohe i te pō.
2 E ìte te tau mataèinaa i to òe toitoi,
e ìte te tau hakāìki i to òe kāìè.
E apa te Fatu ia òe i te inoa hou ta Īa i ìte.
3 E ìò òe me he paèkuà io te ìma o te Etua,
me he heipua kekaa io te ìma o te Fatu.
U te e vevaòtia hakaùa òe « Tāhia titii »,
aòè to òe fenua e vevaòtia « Fenua ataha ».
4 Atià, e apatia to òe inoa « Maùi ».
E apatia to òe fenua « Tu ù hoa mātiri ».
Na te mea, e haataetae te Fatu ia òe.
E ìò te Fatu me he no to òe fenua.
5 Me he mea e noho te mahaì me te vehine hou,
atii e noho me òe te tuhuna i haatū ia òe.
Me he mea o te vehine mātiri hou te koakoa o ta īa āhana,
atii e haaèka òe i to òe Fatu Etua.
TARAMO 89 (88), 20ab.21, 27-28, 29-30
E te Etua e, io Òe aneiho te Teào e aahi atu io te pohoè ètereno.
20 E te Fatu e, òmua u peàu Òe i to Òe tau hoa ;
I to he moemoeā, u haaìte atu òe ia âtou :
21 « U koàna ia ù te tāvini, o Tavite te inoa.
U paù au ia īa me te kao tapu. »
27 E peàu mai īa : « O Òe tu ù Etua, tu ù Motua.
O Òe tu ù motukeâ, tu ù haapohuè. »
28 E haaìò au ia īa he tama hāmua no ù,
Te tiketike nui o te tau hakāìki ia ôtoa.
29 I ùka o īa, e noho mau to ù kāòha, hakahae koè.
Me īa tu ù Piimau no te tau tai hakatahi.
30 E haatū au i to īa vivinitina paona koè.
E mau to īa hakāìkitina ma te tau tai ananu.
TETAUTINA O TE HĀMANI HANA A TE TAU ÀPOTORO 13, 16-17.22-25
16
E tū ana Pauro, u hapai i te ìma me te peàu pēènei à :
« E to Iraene atii me ôtou, e te tau ènata pakaihi i te Etua,
a hakaòko mai.
17 O te Etua o tēnei mataèinaa, te Etua o Iraene,
U haanui aè Īa i te mataèinaa oi noho âtou i te Fenua Ekipito.
Ma te mana o to Īa ìma, u haauu i vaho ia âtou.
22 I muì iho, u titii te Etua ia Tauro
me te vae ia Tavite he hakāìki no âtou.
U haameitaì te Etua ia īa e peàu ana :
« U koàna ia ù Tavite, tama a Iete,
o īa te ènata vāàna i to ù hīa, te i aotahi atu i to ù makimaki. »
23 Me i òto o to īa ati, u haatupu te Etua
ia Ietu, te Haapohoè o Iraene.
24 Òmua atu o to īa tihena,
u haaìte Ioane i te mataèinaa Iraene i te papatema
no te fāìu i te koekoe me te hopo i te mikeo.
25 I te paona o to īa hana perofeta, u peàu Ioane :
« Aòè o au tēia ta ôtou i māmaakau pu nei.
Enā e tihe ai tītahi ma muì o au ;
aòè e hei ia ù te vevete i to īa aihū. »
ALLELUIA ALLELUIA
Oìoì e hinatia te mikeo io te aomāàma nei. Oìoì e vivini te Haapohoè i te fenua.
EVANERIO O IETU KIRITO VĀÀNA E MATEO 1, 1-25
(Tetau poto 1,18-25)
1 Te hāmani matatetau o Ietu Kirito,
te tama a Tavite, te tama a Aparahamo.
2 U fānau ta Aparahamo o Itaako.
U fānau ta Itaako o Iakopo.
U fānau ta Iakopo o Iuta me to īa tau teina.
3 U fānau ta Iuta o Farete me Fara no òto o Tamara.
U fānau ta Farete o Eteroma.
U fānau ta Eteroma o Arama.
4 U fānau ta Arama o Aminatape.
U fānau ta Aminatape o Naatona.
U fānau ta Naatona o Taremone.
5 U fānau ta Taremone o Poaha no òto o Rahapa.
U fānau ta Poaha o Opete no òto o Ruta.
U fānau ta Opete o Iete.
6 U fānau ta Iete o Tavite te hakāìki.
U fānau ta Tavite o Taromona no òto o te vehine a Uria.
7 U fānau ta Taromona o Ropoama.
U fānau ta Ropoama o Apia.
U fānau ta Apia o Ata.
8 U fānau ta Ata o Iehotafa.
U fānau ta Iehotafa o Iorama.
U fānau ta Iorama o Otia.
9 U fānau ta Otia o Iotane.
U fānau ta Iotane o Akata.
U fānau ta Akata o Etekiata.
10 U fānau ta Etekiata o Manate.
U fānau ta Manate o Amona.
U fānau ta Amona o Iotia.
11 U fānau ta Iotia o Iekoniata me to īa tau teina,
i te ava o te mōèhutina io he Fenua Papironia.
12 Ma muì o te ava i te mōèhutina io te Fenua Papironia,
u fānau ta Iekoniata o Taratiere.
U fānau ta Taratiere o Toropapere.
13 U fānau ta Toropapere o Apiuta.
U fānau ta Apiuta o Eriakimi.
U fānau ta Eriakimi o Atore.
14 U fānau ta Atore o Tatoka.
U fānau ta Tatoka o Akimi.
U fānau ta Akimi o Eriuta.
15 U fānau ta Eriuta o Ereatara.
U fānau ta Ereatara o Matana.
U fānau ta Matana o Iakopo.
16 U fānau ta Iakopo o Ioteve te āhana a Maria.
me i òto o īa i fānautia ai o Ietu te i peàutia te Kirito.
17 No èià e tetautia
ònohuu ma fā tai kē me io Aparahamo tihe atu io Tavite,
ònohuu ma fā tai kē me io Tavite
tihe atu i te ava o te mōèhutina i te Fenua Papironia,
ònohuu ma fā tai kē me i te mōèhutina i Papironia
tihe atu i te Kirito.
18 O īa na te hāmani matatetau o Ietu Kirito.
O īa nei te hānauna o Ietu Kirito.
U tuia te kui o Ietu, o Maria to īa inoa,
me tītahi āhana, o Ioteve te inoa.
Ma mua to âua nohotina, u ôpū tama Maria
na te mana o te Kuhane Meitaì.
19 He ènata toitoi noa Ioteve, ta īa āhana.
Aòè īa e makimaki e pōtoho pu ia Maria.
No èià, u kaituto īa e titii ia īa ma te ìte koè.
Ohia e auana atii Ioteve, ua ìte īa i to he moemoeā,
i te anera o te Fatu te i peàu mai :
« E Ioteve e, tama a Tavite, umoì òe e haametaù
no te āpuu io to òe haè ia Maria, ta òe vehine.
U ôpū tama hoì īa na te mana o te Kuhane Meitaì.
21 E fānau īa i te tamaòa. E apa òe i to īa inoa o Ietu.
O īa hoì ‘’ Te i haapohuè i to īa mataèinaa
me i to âtou tau mikeo." »
22 Ua pao tēia tau mea paotū no te haatiàtohu
i te teào o te Fatu i peàuìa e te perofeta, pēènei :
23 « Enā e ôpū tama te virikine. E fānau īa i te tamaòa.
E apa âtou i to īa inoa o Emanuera. »
O īa hoì ma he èo ènata « O te Etua me tātou ».
24 Ua vaa Ioteve. U aotahi īa i ta te anera o te Fatu i peàu atu
me to īa āpuu i ta īa vehine io to īa haè.
25 Atià, aòè Ioteve i too ia Maria tihe atu i te hānauna o te tama.
Ua apa Ioteve i to īa inoa « O Ietu ».
TE KOÌNA NOERE
PUREMETA TŪMOE
TETAUTINA O TE PEROFETA ITAIA 9, 1-6
1 O te mataèinaa e taha ana io te ava pōtano,
ua ìte i te tihena o te māàma pupuà nui.
I ùna o te poì e noho aa io he vao maù nui, u pupuà te àma.
2 Na Òe, e te Etua e, i haanui i te èkaèka :
me he koakoa o te ènata e kohi ana i te puku fenua,
me he koakoa o te tau kape ia tuhatia te tau taetae
o te poì hina ma òto o te tōua.
3 Me he mea ta Òe i haahina i te poì Matiana,
na Òe i fafati te âkau te i òomi i te mataèinaa,
atii te âkau tā a te vivini o te poì hana.
4 Ua èhu nui i te ahi to te tau kape aihū
te i haakeuu i te papafenua,
atii me to âtou kahu pī i te toto.
5 U vaièitia mai tītahi tama hou, e tamaòa i tuutia mai.
O te hakatu hakāìki i ùna o to Īa paufifi.
U apatia to Īa inoa : « Tuhuna mahaò. Etua mana.
Motua paona koè. Hakāìki o te moû. »
6 No èià, e neketia to Īa mana :
Aòè e pao te moû no Tavite me to Īa Patirēia.
E tū mau Īa i òto o te tiàtohu me te toitoi, i tēnei, atii anatu.
O īa na te hana kāòha ta te Fatu o te aomāàma i uē ia mātou.
TARAMO 96 (95), 1-2a, 2b-3, 11-12a, 12b-13a.c
I tēnei pō, ua fānau to tātou Haapohoè. O Īa te Kirito te Fatu. cf. Rk. 2,11
1 A hīmene no te Fatu i te hīmene hou.
A hīmene i te Fatu te fenua viipū.
2 A hīmene no te Fatu, a hahi i to Īa inoa.
Ma tēia â, ma tēia â,
3 A haaòno nui i to Īa haapohoètina,
A hano a faì atu i te tau mataèinaa,
I te tau ènata paotū to Īa tau hana mahaò.
11 A koakoa te àni i ùna nui.
A èkaèka te fenua ia ôtoa.
A taaàu me te pooìna te moana.
12 A haakoìna, a neue te tau tuaivi.
A haka me te koakoa te maa tumuâkau,
I te aò o te Fatu e taha mai.
13 E tihe te Fatu no te haavā i te fenua.
E toitoi, e tiàtohu to Īa haavātina.
TETAUTINA O TE HĀMANI A PAURO PEÀTO IA TITO 2, 11-14
11
U haaìtetia mai hoì te vaièitina o te Etua.
O īa te tumu e koàna i te tau ènata paotū
te pohoè te io he àni.
12 Na hua karatia e hakako mai
no te titii i te mea haapākeka i te Etua,
te òomi i to tātou hīa kāìè ènata, te pohoè io te ao nei
me te koekoe atenoho, koekoe toitoi, koekoe pure hae.
13 U hakapahi hua karatia ia tātou
no te tetaì i te tetaìtina haakoakoa.
O Īa hoì te tihena me te kāìè o Ietu Kirito,
to tātou Etua tiketike me te Haapohoè.
14 U ùtunahēanatia hoì Ietu Kirito i uē ia tātou,
mea hooi i to tātou mikeo me te haataìtaì,
etià e ìò tātou to Īa mataèinaa,
poì koekoe ūo i te hana meitaì.
ALLELUIA ALLELUIA cf. Rk. 2,10-11
Ua faì atu nei au ia ôtou i te Teào Meitaì hou haakoakoa : I tēnei pō, u fānautia te Haapohoè. O Īa te Kirito, te Fatu.
EVANERIO O IETU KIRITO VĀÀNA E RUKA 2, 1-14
1 I tēia mou pō, ua tihe te teào me io Ketare Aukuto.
U hakapahi īa i te tau ènata o te aomāàma viipū
no te patu i to âtou inoa.
2 O īa te patutina inoa to mua,
i te ava ua tū Kirino he kuvenea o te Fenua Ihiria.
3 Ua hee atu te tau ènata paotū no to âtou inoa patu
io to âtou kākaavai me te pāpuafaè tumu.
4 O Ioteve me i Natareti o te Fenua Karirea,
ua fiti i te Fenua Iutea, io te pāpuafaè o Tavite,
o Petereemi te inoa.
Ua tupu hoì Ioteve me io te ati me te huaafaè o Tavite.
5 Ua hano Ioteve i te inoa patu me Maria ta īa vehine,
he ôpū tama ta īa.
6 Ohia i èià âua, ua tihe te ava e fānau ai Maria.
7 U fānau Maria i ta īa tama, he tama hāmua.
Ua fāfī īa me te èpa me te haamoe ia īa i to he fatene,
mēìa aòè he vahi e afi no âtou io he faè āpuu manihii.
8 Enā i te fenua viipū mou ènata tiaì mutō.
Ua noho âtou io he vahi teitā, e matavaa i te pō
no te tiòhi meitaì i to âtou naho mutō.
9 U haatata mai io âtou te anera o te Fatu.
U pupuà viipū o âtou i te kāìè o te Fatu,
10 U peàu te anera ia âtou :
« Umoì ôtou e haametaù,
na te mea u faì atu au ia ôtou
i te Teào Meitaì hou mai
e haakoakoa nui i te mataèinaa ia ôtoa.
11 I tēnei pō, io te pāpuafaè o Tavite, no ôtou,
u fānautia te Haapohoè. O īa te Kirito, te Fatu.
12 Eīa tītahi mea hakatu no ôtou :
e koàna ia ôtou te tama hou,
fāfītia me te èpa, e moe ana i òto o te fatene. »
13 Enā pu anamai me te anera
te nuitina o te faètoa te io he àni, tini tini âtou,
e hahi ana i te Etua me te peàu pēènei :
14 « Te kāìè i te Etua i ùna nui.
Te moû io he fenua i te ènata poì tāhia. »
TE KOÌNA NOERE
PUREMETA PŌPŌUÌ
TETAUTINA O TE PEROFETA ITAIA 62, 11-12
11 O īa nei te teào ta te Fatu
e haamevaha tihe atu i te kotina o te aomāàma, pēènei :
« A peàu i te moî a Tiona :
Enā e tihe mai te Haapohoè, e àve ana me Īa
i te tau taetae o to Īa tuàkitina ;
viipū o Īa te tau taetae haakāìè ia Īa.
12 E apatia ôtou i te inoa hou pēènei :
« Mataèinaa tapu. Poì hokotia e te Fatu. »
E apatia òe iho :
« Vaetia e te Fatu. Pāpuafaè titii koè. »
TARAMO 97 (96) 1.6,11-12
Enā te àma haapupuà i te ènata, ua fānau te Haapohoè.
1 O te Fatu te Hakāìki nui. A koakoa te fenua.
A haaèkaèka te tau motu tini, tini.
6 U haamevaha te papafenua i to Īa toitoi noa.
Ua ìte me te mahaò te tau ènata i to Īa Kāìè.
11 Enā te àma haapupuà i te ènata teka koè.
Enā me te koakoa i vāvena o te poì haatià.
12 A koakoa ôtou, e te poì aotahi i te Fatu.
A haahuaèkaèka i te inoa o te Fatu Etua.
TETAUTINA O TE HĀMANI A PAURO PEÀTO IA TITO 3, 4-7
4
Atià, u haaìte mai te Etua, to tātou Haapohoè
i to Īa vaièitina me to Īa Kāòha nui no te tau ènata.
5 Na Īa i haapohoè ia tātou, mēìa i to Īa Hākāòha mai,
aòè no te vaièi mai i te tuki o to tātou hana meitaì,
i hanatia na tātou ta tātou anaè.
Ma te vai, u haafānau hakaùa te Etua ia tātou nei.
I òto o te Kuhane Meitaì,
u haahou Īa i to tātou hakatu pohoè.
6 Na te Etua i haaneke ma te nuitina o hua Kuhane Meitaì
i òto o tātou, ma te Inoa o Ietu Kirito to tātou Haapohoè,
7 Etià, ma to Īa Karatia, e ìò tātou
he tau ènata toitoi i mua o te Etua,
no te koàna mai te Pohoè ètereno ta tātou e tetaì mau nei.
ALLELUIA ALLELUIA Rk.2,14
Te Kāìè i te Etua i ùna nui. Te moû io he fenua i te ènata poì tāhia
EVANERIO O IETU KIRITO VĀÀNA E RUKA 2, 15-20
15 Ohia ua pae te tau anera me to âtou hua io he àni,
u peàu atu peàu mai te tau ènata tiaì mutō,
te hoa i te hoa :
« A pau. A fīfiti tātou i Petereemi mea ìtemata
i te mea i haapaotia vāàna ta te Fatu i haaìte mai. »
16 U titihe haakoi te tau ènata tiaì mutō.
U koàna mai ia âtou o Maria, o Ioteve
me te Tama hou e moe ana i òto o te fatene.
17 Ia ìte meitaì âtou, ua faì atu i te mea
i peàutia ia âtou i ùna o hua pōìti.
18 Ua pē i te mahaò te tau ènata paotū
te i òno i te teào a te tau ènata tiaì mutō.
19 O Maria à, u haamau io he koekoe i tenā tau mea paotū
me te kaituto hae.
20 Ua hua te tau ènata tiaì mutō.
U haakāìè âtou me te hahi i te Etua
no te tau mea paotū ta âtou i òno me te ìte,
vāàna i te teào i peàutia ia âtou.
PUREMETA OATEA
TETAUTINA O TE PEROFETA ITAIA 52, 7-10
ia tiòhi atu i te keèe e tohuti ana nei ma he tuaivi
no te haaìte atu i te ava o te moû.
ia tiòhi atu i te keèe o te Teào Meitaì hou mai,
e haaìte aa i te pohoè.
E tihe nei īa no te peàu i te pāpuafaè tapu :
« E Hakāìki to òe Fatu Etua.
8 A òno ôtou i te èo o te poì tiaì.
Ua tani to âtou vevaòtina. E tahi taa anaè : e taaàu koakoa.
Ua ìtemata âtou i te Fatu e tihe nei i Tiona. »
9 A tatakahiti i te koakoa ôtou,
e te toena o Ierutaremi te i vāvahitia.
Na te mea, u haakoè te Fatu i te uē o to Īa mataèinaa.
Na Īa i haapohoè ia Ierutaremi.
10 U haaìte mai te Fatu i te Mana Etua o to Īa ìma
i te tau mataèinaa èteni paotū.
Me i tītahi kēkē tihe toitoi i tītahi kēkē o te fenua,
e ìte âtou i te Haapohoètina o to tātou Etua.
TARAMO 98 (97), 1,2-3ab, 3c-4, 5-6
Ua ìte te fenua viipū i te Haapohoè ta te Etua i tuu mai. cf. .98,3
1 A hīmene i te Fatu i te hīmene hou.
U mahaò hoì to Īa tau hana.
U tuàki Īa i te mea haapākeka,
Na te mana o to Īa Ìma peàto nui.
2 U haaìte te Fatu i to Īa Tūàkitina,
U haapupuà i to Īa Toitoi i mua o te poì èteni.
3 U haamaakau te Fatu i to Īa Kāòha hakahae koè
I uē i te ati o Iraene, to Īa Mataèinaa.
Ua ìte te fenua viipū i to te Etua Tūàkitina
4 A hahi i te Fatu, e te fenua viipū,
A hīmene, a haka, a haakoìna.
5 A haatani i te pū, a vānana i te Fatu,
A ùtu te pahu, a òno nui te Fatu Etua.
6 A ònotia te kitā, te pū hakahau, te pūtoka.
A vānana i te Fatu, to ôtou Hakāìki.
TETAUTINA O TE HĀMANI I TO HEPEREO 1, 1-6
1 I te tai kākiu, ma io te tau perofeta,
u teào mai te Etua ma te tau pona kē, te tau pona kē,
te tau hakatu kē, te tau hakatu kē.
2 I tēnei tau â paona o te aomāàma,
u teào mai te Etua ma io tītahi Tama.
U haaìò te Etua i hua Tama te Fatu o te tau mēmau ia ôtoa ;
ma io Īa, u pēpenatia te tau aomāàma.
3 O tēnei Tama te ata tokihi i te Kāìè o te Etua,
te hakatu tiàtohu èka o te Etua Motua,
e haamau ana i te aomāàma viipū ma te mana o to Īa teào.
Ia pao to Īa hooi i te tau mikeo,
u tānoho Īa i te ìma oko o te Etua Tiketike,
i ùna nui o te àni.
4 Ua tū Īa ma ùna aè o te tau anera paotū,
mēìa ua apatia te inoa òno nui atu i te inoa o te tau anera.
5 Aòè hoì i peàu te Etua i tītahi anera :
« O Òe tu ù Tama ; i tēnei â, u haafānau au ia Òe. »
U peàu hakaùa :
« E ìò au e Motua no Īa, o Īa nei tu ù Tama. »
6 U peàu hakaùa te Etua
i te ava u pōpahi Īa i te Hāmua io te ao nei :
« A atoratio ia Īa te tau anera o te Etua paotū. »
ALLELUIA ALLELUIA
I tēnei â, u keàpa nui te Māàma o te Etua. E te tau mataèinaa e, a mai no te atoratio atu i te Fatu !
TE TĪMATATINA O TE EVANERIO O IETU KIRITO VĀÀNA E IOANE 1, 1-18. (1, 1-5.9-14.)
1 I te tumu te Teào. Io te Etua te Teào.
He Etua te Teào.
2 I te tumu anamai io te Etua te Teào.
3 Ma io te Teào te tau mea paotū i pēpenatia.
Umoì Īa, aòè he mea i pēpenatia to te i pēpenatia.
4 I òto o te Teào te Pohoè.
He Māàma no te tau ènata te pohoè.
5 U pupuà te Māàma io he pōtano,
u haapākeka koè ta te pōtano i te Māàma.
6 Ua ìtetia te ènata ta te Etua i pōpahi mai.
O Ioane to īa inoa.
7 Ua tihe īa no te haatiàtohu i te Māàma,
etià e haatià te tau ènata paotū.
8 Aòè o īa te Māàma. U haatiàtohu īa i te Māàma.
9 Enā te Māàma tiàtohu mea tūàka i te tau ènata paotū,
te i tihe mai i te ao nei.
10 Io te aomāàma te Teào, na Īa i pēpena i te aomāàma :
aòè i ìte to te ao nei ia Īa.
11 Ua tihe mai io to Īa Toitoi. Aòè to Īa i āpuu mai.
12 I te poì hakatahi i āpuu ia Īa,
ua tuu atu Īa i te mana no te haaìò he tau tama a te Etua.
O īa te poì i haatià ia Īa.
13 O te poì koè na te toto,
koè na te maìmaì tino, koè na te maìmaì ènata,
atià à, na te maìmaì o te Etua i fānautia ai.
14 U haaènatatia te Teào me to Īa noho i vāvena o tātou.
Ua ìte tātou i to Īa Kāìè,
he Kāìè ta te Motua i vaièi atu i ta Īa Tama tootahi,
pī i te Karatia me te Tiàtohu.
15 U haatiàtohu Ioane ia Īa, e taaàu ana pēènei :
« O īa nei te ènata ta ù i peàu atu :
u meitaì aè ia ù te i tihe ai ma muì o au.
Na te mea, òmua atu Īa, epō au nei.
16 Me io to Īa meitaì nui, u koàna mai ia tātou kōtoa te taetae,
te tau karatia ma hope o te karatia.
17 Ma io Moite, ua tuu mai te Etua i te Ture.
Ma io Ietu Kirito, ua tihe mai te Karatia me te Tiàtohu.
18 Aòè te ènata e tahi i ìte i te Etua.
Na te Tama tootahi, he Etua aneiho Īa, pii me te Motua,
u haaìtetia mai te Etua. »
TE HUAAFAÈ MEITAÌ NO NATARETI
TETAUTINA O TO MUA HĀMANI O TAMUERA 1,20-22.24-28
20 Ua too Erekana i ta īa vehine. U haameitaì te Etua ia īa.
Ia tihe te ava, u fānau Ana i te tamaòa.
Ua apatia te inoa o te tama : Tamuera,
o īa hoì ma he èo ènata : « U hakaòno te Etua. »
na te mea, u peàu Ana :
« Ua ape au io te Fatu Etua i te tamaòa. »
21 Ia tihe e tahi èhua o te tama,
u peàu te motua Erekana te inoa,
e fiti pererina īa e tahi me to īa huaafaè paotū,
no te ùtuna hēana i te Fatu Etua. O īa nei to īa teào voto.
22 U te e fiti Ana. U peàu īa i ta īa āhana :
« Epō e hakaea te tāfai me te ū i te tama.
A tahi a fiti īa. E ùtuna au ia īa i te Etua.
Ma hope, e noho īa anatu i èià. »
Ia haapaetia o Tamuera me io te ū, u aahi Ana,
to īa kui, i te pōìti i te kaavai Tiro, io he faè o te Fatu.
Ua too Ana i te kaiū toro piha, e toù èhua to īa.
Ua too īa me te kaka faraoa tee me te hue uaina.
25 Ua ùtunatia te pifa me he hēana.
I muì iho u aahitia te tama io he tāuà.
O Eria te inoa o te tāuà.
26 A tahi a peàu Ana ia īa : « A hakaòno mai, e te hakāìki e.
Tiàtohu nui, me he mea he ènata pohoè òe,
o au te vehine te i tū i înei, i mua o òe, e pure ana i te Fatu.
27 Ua ape au i te Fatu i te tama : o īa to ù pure.
Ua tuu mai te Fatu i te tamaòa vāàna i to ù hīa.
28 I tēnei, e ùtuna au i te Fatu i hua tama.
Ma te koa o to īa pohoètina,
e mau anatu he taetae ùtunatia i te Fatu. »
Ua moe haatona âtou i te aò o te Fatu.
TARAMO 84 (83) 3, 4, 5-6, 9-10
E te Fatu e, he moû, he koakoa anaè i òto o to Òe faè.
3 E kōhoà nei au me te uēuē
e fiti io te faè o te Fatu.
Me i òto te koekoe me te hōupo
To ù taaàu i te koakoa io Òe, te Etua e.
4 No te manu komako to īa kōhata.
No te tau kiokio kopeà to âtou vahi maù.
No ù to Òe fātaa pure, e te Fatu e,
To ù Etua, to ù Hakāìki nui e.
5 Mamau te tau ènata te i noho io to Òe faè,
Oatea te pō, e hahi ana i to Òe Kāìè.
6 Mamau te tau ènata haaìitia e Òe,
E tohe âtou i te Meitaì me te koekoe oko.
9 E te Etua mana nui e, a hakaòno mai.
A āpuu i to ù pure, e te Etua o Iakopo e.
10 E te Fatu Etua te i pāpua mai,
A tiòhi i te mata o to Òe Kirito.
TETAUTINA O TO MUA HĀMANI A IOANE ÀPOTORO 3, 1-2.21-24
E tu ù tau tunane tuehine,
1 A kaituto me te mahaò i te nuitina
o to te Etua kāòha ia tātou.
Ua ao Īa e apatia tātou he tau tama no Īa.
Ua ìò hoì tātou he tau tama tiàtohu no Īa.
O īa te piò aòè to te ao nei e āpuu ia tātou.
Pēhea te koàna ? Aòè īa i ìte i te Etua.
2 E tu ù tau hoa tāhia e, i tēnei, he tau tama tātou a te Etua.
E aha to tātou hakatu ma tītahi â ? U te e ìte meitaì tātou.
E tahi mea tiàtohu aneiho :
i te ava e haaìte Ietu Kirito ia Īa iho,
e ìò tātou hakatu me Īa,
na te mea he mata he mata e ìte ai tātou ia Īa.
21 E tu ù tau hoa tāhia e,
me hakatio koè to tātou koekoe ia tātou iho,
a noho tātou me te moû i mua o te Etua.
22 E vaièi mai Īa i te mea paotū ta tātou e ape me io Īa,
na te mea u aotahi tātou i to Īa teào,
ua hana tātou i te hana haaèka ia Īa.
23 Pēènei hoì te teào o te Etua :
A haatià tātou ia Ietu Kirito, ta Īa Tama,
a kāòha te hoa i te hoa, vāàna i to Īa maìmaì haaìtetia mai.
24 O te ènata u aotahi i te teào a te Etua,
ua noho īa i òto o te Etua, ua noho te Etua i òto o īa.
Ua ìte tātou i te mea ua noho te Etua i òto o tātou,
na te Kuhane Meitaì te i vaièitia mai.
ALLELUIA ALLELUIA.
U hei nui, he Etua pukanā Òe, he Etua ma vāvena o te tau ènata, Ietu, Haapohoè !
EVANERIO O IETU KIRITO VĀÀNA E RUKA 2, 41-52
41 I tēia èhua, i tēia èhua, i te ava Koìna Pakate,
ua fiti i Ierutaremi te motua me te kui o Ietu.
42 I te ava ua pao toitoi ònohuu ma ùa èhua to Ietu,
ua fiti âtou i te koìna me he mea ua hani âtou.
43 Ia pao te mou â koìna, ua hua âtou.
O te tama Ietu à, ua èka i Ierutaremi,
ìte koè to īa motua me te kui.
44 E auana ta âua enā te tama me te tau hoa,
ua taha atu âtou, e tahi a te tahatina.
A tahi a hano âua e ùmihi ia Ietu
i vāvena o te huaa me te tau hoa.
45 Aòè i koàna mai Ietu ia âua.
I hua atu ai âua i Ierutaremi e ùmihi ana.
46 Ua pao e toù â i te ùmihi, io he Hiero u koàna ia âua Ietu,
e kaapee ana i vāvena o te tau tuhuna teào,
e hakaòno me te ūi atu ia âtou.
47 Ua pē i te mahaò te poì paotū e hakaòno ia Īa,
e ìte ana i to Īa māàma me to Īa haahua atu i te teào.
48 U emièe te motua me te kui i te ìtetina ia Ietu.
U peàu to Īa kui : « E tu ù tama e,
no te aha ta òe atii ia maua ?
Eīa to òe motua me au nei pī i te uē, e ùmihi ia òe. »
49 U peàu Ietu ia âua : " No te aha i ùmihi ai ôùa ia ù ?
Aha u te e ìte ôùa :
o to ù hana tumu te tiòhi i ta to ù Motua ?"
50 Aòè âua i vivini i to Ietu teào ia âua.
51 Ua hee Ietu me âua i Natareti. U aotahi atu Īa ia âua.
U haamau to Īa kui i tēia mea paotū io he koekoe.
52 Ua nui aè, nui aè to Ietu māàma me te koa atu to Īa tino.
U koàna mai ia Īa te karatia io te Etua.
U haataetae te tau ènata ia Īa.
TE KOÌNA O MARIA PEÀTO TE KUI O TE ETUA
A tiòhi i te paka hāmani : 35
TE KOÌNA EPIFANIA
A tiòhi i te paka hāmani 42 o te Tau Koìna.
TE KOÌNA PAPATEMA O IETU KIRITO
TETAUTINA O TE PEROFETA ITAIA 40, 1-5.9-11
1 O īa nei te teào o to ôtou Etua :
« A haamaha i te uē, a haamaha i te uē o to ù mataèinaa.
2 A kōnini to òe teào no te peàu i Ierutaremi :
Ua pao nui to īa ava memae, ua ìò i te hooi to īa tau mikeo.
Na te ìma o te Fatu to īa tuki haamemae,
mēìa i to īa tau hana tekateka. »
3 U taaàu te èo :
« I te fenua ataha, a haapei ôtou no te tihena mai o te Fatu.
I te fenua ataha, a kānea i te aanui no te Etua.
4 A haapī meitaì i te tau kākaavai paotū.
A haapaahaaha i te tau tuaivi me te tau pūkei.
A haamenia i te aanui keâkeâ.
A pepeù i te ava i ùna o te tau kapua tuaivi.
5 A tahi a pupuà te kāìè o te Fatu Etua.
E ìte ai te tau ènata paotū i te mea
me io te fafa o te Etua hua fitipona i te teào.
9 A piki òe i ùna o te tuaivi tiketike,
e te keèe te i àve atu i te teào i Tiona.
A taaàu me te èo oo o òe,
e te keèe e àve i te teào haaìte i Ierutaremi.
A teào me te èo oo : umoì e haametaù.
A faì atu i te tau pāpuafaè o te Fenua Iutea :
« Eīa to ôtou Etua.
10 Eīa te Fatu Etua e tihe nei me te Mana nui.
Ua ìò te vivini ia Īa.
Enā me Īa te tau taetae ta Īa i koàna mai ma òto o te tōua
I mua o Īa te tuki kāìè i koàna mai.
11 U tāfai Īa i to Īa naho, hakatu me te ènata tiaì muto.
Na to Īa ìma e haaputuputu i te tau muto kākaiū,
me to Īa hopu ia âtou. »
TARAMO 104 (103) 1c-3b, 3c-4, 24a.c-25, 27-28, 29-30
O te vai me te Kuhane, te i haatiàtohu ia Òe e te Fatu kāìèa e. cf. 1In.5,7-8
1 Ua tāpītia Òe me te kāìè,
O te àma te kahu te i fāfī ia Òe.
U hohoà Òe i te ataàni hakatu me te faèkā
3 To Òe nohona io te tau vai ma ùna o te papafenua.
To Òe pāriri te tau kohu o te àni maù.
E tohuti mai Òe i ùna te pekeheu o te metani,
4 O te fā metani te tau keèe pahitia e Òe.
U tāvini ia Òe te uià e topa me io he àni.
24 He mea nui to Òe tau hana, e te Fatu e.
Ua pī te fenua i to Òe tau taetae.
25 Eīa te tainui. O ai te i ìte i to īa keî ?
I òto e totoo te nuitina tini tini o te tau ika kē.
27 O âtou paotū e tetaì nei ia Òe,
No te koàna mai to âtou oà, i te ava e hei.
28 U vaièi atu Òe : e kohi mau âtou.
U pepeù i to Òe îìma : e kai haamaòna âtou.
29 Ia naò to Òe mata, u pūpūkina âtou.
Anoa Òe e too i to âtou menava,
E mate nui âtou me te hua io he èpo.
30 Na Òe e puhi i te ao, e pēpena hou âtou.
U haahou Òe i te hakatu o te fenua.
TETAUTINA O TE HĀMANI A PAURO PEÀTO IA TITO 2, 11-14 ; 3, 4-7
E tu ù tau tunane tuehine,
2,11 U haaìtetia mai hoì te vaièitina o te Etua.
O īa te tumu e koàna i te tau ènata paotū
te pohoè te io he àni.
12 Na hua karatia e hakako mai
no te titii i te mea haapākeka i te Etua,
te òomi i to tātou hīa kāìè ènata, te pohoè io te ao nei
me te koekoe ate noho, koekoe toitoi, koekoe pure hae.
13 U hakapahi hua karatia ia tātou
no te tetaì i te tetaìtina haakoakoa.
O īa hoì te Tihena me te Kāìè o Ietu Kirito,
to tātou Etua tiketike me te Haapohoè.
14 U ùtunahēanatia hoì Ietu Kirito i uē ia tātou,
mea hooi i to tātou mikeo me te haataìtaì,
etià e ìò tātou to Īa mataèinaa,
poì koekoe ūo i te hana meitaì.
3,4 Atià, u haaìte mai te Etua, to tātou Haapohoè
i to Īa vaièitina me to Īa kāòha nui no te tau ènata.
5 Na Īa i haapohoè ia tātou, mēìa i to Īa hākāòha mai,
aòè no te vaièi mai i te tuki o to tātou hana meitaì
i hanatia na tātou ta tātou anaè.
Ma te vai, u haafānau hakaùa te Etua ia tātou nei.
I òto o te Kuhane Meitaì,
u haahou Īa i to tātou hakatu pohoè.
6 Na te Etua i haaneke ma te nuitina i hua Kuhane Meitaì
i òto o tātou, ma te inoa o Ietu Kirito to tātou Haapohoè,
7 etià, ma to Īa karatia,
e ìò tātou he tau ènata toitoi i mua o te Etua,
no te koàna mai te pohoè ètereno ta tātou e tetaì mau nei.
ALLELUIA ALLELUIA.
I tēnei â, ua pepeùtia te ataàni, ua iho mai te Kuhane Meitaì i ùna o Ietu. Ua ònotia te èo o te Etua Motua ma ùna atu o te tani o te vai : « O īa nei tu ù Tama Tāhia, te Tiàtohu o to ù Kāòha. »
EVANERIO O IETU KIRITO VĀÀNA E RUKA 3, 15-16.21-22
I tēia mou pō,
15 Ohia u tetaì te mataèinaa me te kaituto o âtou nui
io he koekoe : o Ioane oti te Kirito,
16 u haahua Ioane me to īa peàu ia âtou paotū, pēènei :
« O au nei u papatema au ia ôtou i to he vai.
Atià enā a tihe mai tītahi, nui atu to Īa mana i to ù.
Aòè e hei ia ù te vevete i te aho o to Īa aihū.
Na Īa e papatema ia ôtou
i to he Kuhane Meitaì me te ahi. »
21 I te ava u papatema Ioane i te faètoa paotū
u papatematia me Ietu.
E pure ana Ietu, ua vahitia te àni.
22 Ua iho mai te Kuhane Meitaì i ùna o Ietu
me he hakatu ìtea o te manu māìta.
U pohā te èo me io he àni, pēènei :
« O Òe tu ù Tama tāhia.
Io Òe te Tiàtohu o to ù Kāòha. »
 TAPU E ÙA O TE AVA MA TE ÈHUA
TETAUTINA O TE PEROFETA ITAIA 62, 1-5
1 I uē ia Ierutaremi, aòè au e mutu.
I uē ia Tiona, aòè e pā to ù fafa
tihe e ìtetia to īa toitoi me pupuà te atauà,
e keàpa to īa hakatu me he àma pūkohe i te pō.
2 E ìte te tau mataèinaa i to òe toitoi,
e ìte te tau hakāìki i to òe kāìè.
E apa te Fatu ia òe i te inoa hou, ta Īa i ìte.
3 E ìò òe me he paèkuà io te ìma o te Etua,
me he heipua kekaa io te ìma o te Fatu.
U te e vevaòhakaùatia òe : « Tāhia titii ».
Aòè to òe fenua e vevaòtia « Fenua ataha »
4 atià e apatia to òe inoa : « Maùi ».
E apatia to òe fenua : « Tu ù hoa mātiri »
na te mea e haataetae te Fatu ia òe.
E ìò te Fatu me he āhana no to òe fenua.
5 Me he mea e noho te mahaì me te vehine hou,
atii e noho me òe te tuhuna i haatū ia òe.
Me he mea o te vehine mātiri hou te koakoa o ta īa āhana,
atii e haaèka òe i to òe Fatu Etua.
TARAMO 96 (95) 1-2a, 2b-3, 7-8a, 9a.10ac
A tataha atu ma te aomāàma viipū,
a haaìte i to Īa tau hana mahaò. 96, 3
1 A hīmene no te Fatu i te hīmene hou.
A hīmene i te Fatu te fenua viipū.
2 A hīmene no te Fatu, a hahi i to Īa inoa.
3 Ma tēia â, ma tēia â,
a haaòno nui i to Īa haapohoètina,
A hano a faì atu i te tau mataèinaa,
I te tau ènata paotū to Īa tau hana mahaò.
7 E te tau mataèinaa e, a hua i te Fatu,
A hua i te Fatu i te kāìè me te mana.
8 A haakāìè i te inoa o te Fatu.
9 A atoratio i te Fatu, pōnionio i te peàto nui.
10 A haaìte atu i te tau èteni : o te Fatu te Hakāìki.
E vivini Īa me te toitoi i te tau mataèinaa.
TETAUTINA TO MUA HĀMANI I TO KORINETIA 12, 4-11
E tu ù tau tunane tuehine.
4 E hakatu kē, hakatu kē te tau vaièitina kuhane,
atià, me io te Kuhane e tahi anaè.
5 E hakatu kē, hakatu kē te hana tāvini,
atià, e tāvinitia te Fatu e tahi anaè.
6 E hakatu kē, hakatu kē te tau hana te i haapaotia,
atià, o te Etua e tahi anaè te tumu o te tau hana kōtoa
i òto o te tau ènata paotū.
7 U vaièitia ia ôtou tikitahi te ìi o te Kuhane,
hakatu kē to tītahi, hakatu kē to tītahi
no te meitaì o tātou paotū.
8 Na te Kuhane Meitaì u vaièi i tītahi i te teào māàma.
Na hua Kuhane i vaièi i tītahi
no te haaìte atu i te maakau hōhonu o te Etua.
9 I òto o hua Kuhane e tahi, u vaièitia i tītahi te haatià,
i tītahi te mana no te haameitaì i te poì hopi.
10 U vaièi te Kuhane i tītahi no te hana i te tau hana mana.
He teào perofeta to tītahi.
U māàma tītahi no te tuhi i te kuhane tīkoe
me te haaìte toitoi i te kuhane tiàtohu.
U teào tītahi ma he èo kē, èo kē anatu.
U koàna i tītahi te haavivini mai i hua èo kē.
11 Atià, o te Kuhane e tahi anaè,
te tumu o hua tau hana kē paotū.
Na hua Kuhane e tuha ia tātou tikitahi
i to īa vaièitina, vāàna i to īa maìmaì.
ALLELUIA ALLELUIA. cf.Ap.19,7.9
A koakoa tātou, enā te Piimau Hou :
Mamau te poì i keèetia no te mau o te Arenio
EVANERIO O IETU KIRITO VĀÀNA E IOANE 2, 1-12
I tēia mou pō,
1 ua faitia i te toù o te pō te koìna mātiri i Kana,
i te Fenua Karirea. O te kui o Ietu tītahi i èià.
2 U vevaòtia Ietu, e tahi me to Īa tau kouâ.
3 Aìna pao te uaina, u peàu te kui o Ietu ia Īa :
« Ua pao ta âtou uaina. »
4 U haahua atu Ietu :
« E te vehine, e aha ta òe e ape mai ?
Aòè to ù hora i tēnei. »
5 U peàu te kui o Ietu i te tau tāvini :
« A hana ôtou i te tau mea paotū ta Īa e peàu ia ôtou. »
6 Enā i èià e ono hue keâ nunui no te vai,
ta te tau ati Iuta i too no te haataìtaì,
vāàna i to âtou haaati Iuta.
E hānere rita nehe tītahi, hānere rita nehe tītahi,
ia haapīnuitia te tau hue.
7 U peàu Ietu i te tau tāvini :
« A haapī ôtou i te tau hue me te vai. »
U haapī nui âtou me te vai.
8 U peàu Ietu ia âtou : « I tēnei, a kapu ôtou
me te àve atu i te ènata vivini i te kainamau. »
Ua àve te tau tueni io īa.
9 Aòè i ìte te vivini o te kainamau me i hea mai hua uaina.
O te tau tāvini te i ìte meitaì.
O âtou hoì te i kapu i te vai.
Ia ako te vivini o te kainamau i te vai haauainatia,
u vevaò i te āhana hou me ta īa peàu atu :
10 « Ua tuu òmua ika te tau ènata paotū i te vino mānini.
Ia kū te tau hoa kai, e tuutia te vino māeà.
U avai òe tihe i tēnei i te vino mānini. »
11 O īa na to mua hana mahaò i hanatia e Ietu.
I Kana i te Fenua Karirea, ua hana Ietu i hua hana mahaò.
Ma èià, u haaìte Ietu i to Īa kāìè.
U haatià to Īa tau kouâ ia Īa.
12 I muì iho, ua hee Ietu i Kafaranaumi e tahi me to Īa Kui,
to Īa tau teina, to Īa huaa kouâ.
Ua noho âtou mou pō aneiho i èià.
 TAPU E TOÙ O TE AVA MA TE ÈHUA
TETAUTINA O TE PEROFETA NEHEMIA 8, 1-4a.5-6.8-10
1 I te â koìna o te māhina e fitu,
u putuputu te mataèinaa me he ènata e tahi i Ierutaremi,
io he tohua i mua o te avaputa peàutia O TE VAI.
Ua ape âtou i te tuhuna teào, o Etara to īa inoa,
no te tetau i te hāmani o te Ture a Moite
ta te Etua i tuu ia Iraene.
2 Ua àve mai te tāuà Etara i te hāmani o te Ture
i mua o te motuhana, te tau āhana me te tau vehine
me te tau tōìki paotū te i koàna i te vivini i te teào o te Etua.
3 Fāìu ana io te tohua o te avaputa O Te Vai,
ua tetau mai te tuhuna Etara i te hāmani o te Ture.
Me i te pōpōuì tika tihe atu i te oatea nui,
te tau āhana, te tau vehine
me te tau tōìki e koàna ia âtou te haavivini
e haaòno aa ia Etara e tetau aa i te hāmani o te Ture.
4 Ua maò Etara ma ùna o te tohua
kāneatia no tēia hana aneiho.
Ua ìtemata te mataèinaa paotū.
5 I te ava u pepeù Etara i te hāmani, ua maò te faètoa nui.
6 U haameitaì Etara i te Fatu, te Etua Tiketike.
A tahi a haahua atu te mataèinaa paotū
e hapai aa i te îìma me te taaàu : Amene. Amene.
Ia pao te taaàu, ua oha âtou
me te moe haatona i mua o te Fatu, i aò te aò.
7 (U tetau Etara i te mou kio o te Ture o te Etua.)
Na te tau Revita te vetevete ma he èo o te mataèinaa
me te haatuhuna etià e vivinimeitaìtia te teào.
9 Ua uēuē me te mateteka âtou paotū
i te ònotina i te teào o te Ture o te Etua.
Ia pao te tetautina, u peàu Etara ia âtou :
10 « A taha atu ôtou. A kai i te ìnaì kiko mōmona.
A inu i te inu mānini. A tuha atu me te ènata veve
me te poì io he àì, aòè e ava to âtou.
He â o te Etua tēnei â, he â tapu. Umoì e uēuē.
A koakoa i òto o te Hatu to tātou pātoko. »
TARAMO 19 (18) 8, 9, 10, 15
Te koakoa o te Hatu, o īa na to tātou pātoko. cf. Ne.8, 10
8 U toitoi noa te ture o te Fatu,
Na īa e haahou i to tātou ìi.
U tiàtohu te teào o te Fatu
Te i haamāàma i te poì avai noa.
9 U toitoi te teào o te Fatu,
E haakoakoa âtou i te koekoe.
U hōata te maìmaì o te Fatu,
E haakeàpa i te mata o te ènata.
10 U taìtaì te pakaihitina o te Etua,
E noho mau anatu to īa tau puku.
U toitoi te teào paotū o te Fatu :
He māàma âtou no te haavā i te ènata.
15 E te Fatu e, a āpuu i te pona o to ù fafa,
A haaòno i to ù èo mamaioo io Òe.
A tihe âtou i mua o Òe me he pure vevaò,
O Òe tu ù motukeâ, to ù haapohoè.
TETAUTINA O TO MUA HĀMANI I TO KORINETIA 12, 12-30
akoè à : 12, 12-14.27
E tu ù tau tunane tuehine.
12 E tahi tino anaè to te ènata
e aha à he mea nui to īa tau mēmau.
O hua mēmau paotū hakatu kē tītahi, hakatu kē tītahi,
e ìò âtou nui e tino e tahi anaè. Hua mea aneiho no te Kirito.
13 Atii tātou : he ati Iuta tahipito, he poì Hereni tahipito.
Enā te tau ènata na âtou ta âtou,
enā te tau tueni haamōèhutia.
Atià, u papatematia tātou paotū
na te mana o te Kuhane e tahi,
etià e ìò tātou he tino e tahi.
U fāinutia tātou nui me te Kuhane e tahi.
14 U te e haapaotia te tino o te ènata
i te mēmau e tahi anaè, he mea nui to īa tau mēmau kē.
15 Ia peàu te vaevae pēènei :
« Aòè o au te ìma. Koè nui he mēmau au o te tino. »
Aha ua koè to īa pii me te tino ?
16 Ia peàu te puaìna pēènei :
« Aòè o au te kikomata.
Koè nui he mēmau au o te tino. »
Aha ua koè to īa pii me te tino ?
17 Anoa he kikomata anaè te tino, i hea te puaìna ?
Anoa he puaìna anaè te tino, pēhea te honi atu ?
18 Atià, u haahei te Etua i te tau mēmau paotū i òto o te tino,
vāàna i to Īa maìmaì.
19 Anoa he mēmau e tahi anaè, pēhea te tino ?
20 He mea nui hoì te tau mēmau, atià he tino e tahi anaè.
21 Aòè e koàna te kikomata te peàu i te ìma :
« E aha te mea i koàna mai me io òe ? »
Aòè e koàna te upoo te peàu i nā vaevae :
« E aha te mea i koàna mai me io ôùa ? »
22 Tōtahi atu : Aha he mea pepae tītahi mēmau o te tino ?
O īa nei te mēmau haataetaetia e tātou.
23 Ohia e maakau tātou e hakāìna te haaìte i te mēmau
o te tino, tōtahi atu e pakaihi tātou i hua mēmau.
E tāpī tātou me te kahu i te tau mēmau haahakaìna mai.
24 O te tau mēmau haakāìè, aòè e hei te tomi ia âtou.
U kānea te Etua i te tino ma te haanui atu i te poèa
o te tau mēmau poèa koè.
25 Ma èià, u haakoè i te tōtōua i òto o te tino.
Ua toko atu toko mai te mēmau i te mēmau.
26 U memae te mēmau e tahi ? U memae âtou nui me īa.
U haakāìètia te mēmau e tahi ? U koakoa âtou nui me īa.
27 Ua ìò ôtou te tino o te Kirito,
mēmau kē to tītahi, mēmau kē to tītahi.
28 I òto o te Èkaretia, ua vae te Etua i tahipito
no te tau hana kē : to mua he tau Àpotoro,
te ùa te tau perofeta,
te toù he tau tuhuna teào māàma.
Ma hope mai te poì no te tau hana mana,
tahipito no te haameitaì i te poì hopi,
te poì toko i te tau tunane tuehine,
te tau vivini e haatee i te Èkaretia,
tahipito e teào ana ma he èo kē, èo kē anatu.
29 Aha he àpotoro âtou paotū ? Aha he perofeta âtou ia ôtoa ?
30 Aòè he mana to tātou paotū no te haameitaì i te poì hopi.
Aòè e koàna ia tātou paotū e teào ma he èo kē, èo kē anatu.
Aòè he poì māàma tātou paotū
no te haavivini i hua èo kē, èo kē.
ALLELUIA ALLELUIA cf. Rk.4, 18
U pōpahi te Fatu Etua ia Ietu, to Īa Tāvini
no te haaìte atu i te Teào Meitaì Hou mai i te poì veve,
no te faì atu i te poì humutia to âtou haapohoètina,
TĪMATATINA O TE EVANERIO VĀÀNA E RUKA
1, 1-4 ; 4,14-21
1 Ua hano tahipito e patu i te hāmani
i ùna o te tau mea i haapaotia i vāvena o tātou.
2 U haaìte mai âtou i hua mea i pao nei,
vāàna i te teào i peàutia e te poì
te i ìtemata me i te tumu.
Ua ìò hua poì he tau keèe o te Teào a te Etua.
3 Atii ta ù nei te i ùmihi mamate
i te tau mea paotū me i te tīmata tina,
u maakau e hei nui e patu me au
i te hāmani tāpapatoitoitia
no òe, e Teofiro hakāìki òno nui e,
4 etià e ìte meitaì òe
he mea tiàtohu te teào i hakakotia ia òe.
I tēia mou pō,
4,14 ua hua mai Ietu i te Fenua Karirea,
me te mana o te Kuhane Meitaì.
U mevaha to Īa òno ma te tau fenua viipū.
15 U hakako Ietu i òto o to âtou tau tinakoka.
Ua hahi te tau ènata paotū ia Īa.
16 Ua tihe Ietu i Natareti ; i èià, u tāfaitia.
I te Tāpati, ua tomo Īa i òto o te tinakoka,
me he mea ua hani Īa. Ua maò Īa no te tetau.
17 Ua tuutia ia Īa te hāmani a te perofeta Itaia.
E ùmihi ana, u kāvii Ietu i te hāmani,
me to Īa koàna mai te mou kio patutia pēènei :
18 « I ùna o au nei te Kuhane o te Fatu,
na te mea u haapeàto mai Īa e te paùtina,
etià e haaìte atu au i te Teào Meitaì hou mai i te poì veve.
U pōpahi mai Īa no te haamevaha i te Teào Meitaì hou mai :
e vetevetetia te poì me io he faèhumu,
e ìte tāhakahaka te poì matapō,
e pohoè na âtou ta âtou te poì òomimākakatia.
19 U pōpahitia mai au no te haaìte atu
i te èhua o to te Fatu vaièitina mai. »
20 U kāvii hakaùa Ietu i te hāmani me te tuu atu i te tāvini.
U kaapee Īa. O te poì paotū te i òto o te tinakoka,
u tiòhi matiòka ia Īa.
21 U pohā te èo o Ietu me to Īa peàu ia âtou :
« I tēnei a u haapaotia hua teào o te hāmani tapu
ta ôtou i òno puaìna i kapo nei. »
 TAPU E FĀ O TE AVA MA TE ÈHUA
TETAUTINA O TE PEROFETA IEREMIA 1, 4-5.17-19
4 U teào mai te Fatu me to Īa peàu pēènei :
« Ua ìte au ia òe ma mua to ù kānea ia òe
i òto te kōpū o to òe kui.
5 U haapeàto au ia òe, ma mua u fānautia òe.
Ua vae au ia òe no te hana perofeta
i vāvena o te tau mataèinaa. »
17 U teào mai te Fatu me to Īa peàu pēènei :
« A tū òe ; a oonaì òe i tu ù mataèinaa
ma te tau mea paotū e peàu atu au ia òe.
Umoì òe e ù i te haametaù i mua o to âtou aò
oa haamate au iho ia òe i te haametaù i te aò o âtou.
18 I tēnei â, e haaìò au ia òe he mōunatōua,
he pou paapaa, he pā piura i te aò o te fenua paotū,
i mua o te tau hakāìki o te Fenua Iutea
me to īa tau tāuà me te mataèinaa ia ôtoa.
19 E tōtōua âtou me òe. Atià aòè âtou e kiko me òe.
O au nei me òe no te haapohoè mai. »
TARAMO 71 (70) 5-6b, 7-8, 15ab.17, 19.6c
I tēia â, i tēia â, e haaìte au
I to Òe tuàkitina me to Òe tau hana haapohoè. cf. .71, 15
5 E te Fatu tu ù Etua e, o Òe tu ù tetaìtina,
To ù toko me i te ava o to ù tino hou.
6 U pāpua mai Òe me i te â o to ù fānautina,
Ua vae mai me i òto te ôpū o tu ù kui.
Paotū te â, e hahi au ia Òe.
7 He mea nui te ènata e mahaò ia ù
Mēìa o Òe to ù ìi, to ù pātoko.
8 Paotū te â, u pohā to ù èo
No te haamevaha i to Òe kāìè.
15 I tēia â, i tēia â, u haaìte tu ù fafa
I to Òe tau hana toitoi, hana haapohoè.
17 E te Etua e, i te ava tōìki au, u haamāàma mai Òe.
Tihe i tēnei, u haamevaha au i to Òe hana mahaò.
19 E te Etua e, tiketike me he àni to Òe toitoi,
O Òe te i hana i te tau hana mana nui.
E tu ù Etua e, o ai e hakatu me Òe ?
6c Paotū te â, e hahi au ia Òe.
TETAUTINA O TO MUA HĀMANI I TO KORINETIA
12, 31 ;13, 1-13 ; akoè à : 13, 4-13
E tu ù tau tunane tuehine.
31 A ìmi ôtou i to te kuhane vaièitina taetae atu.
E hakako au ia ôtou i te aanui meitaì atu i tahipito.
1 Anoa e ìte au i te tau èo ia ôtoa, te èo o te tau ènata
me te èo o te tau anera, atià, u kāòha koè àu,
ua tūtū au me te pahu, akoè à te pere e haatani pu.
2 Anoa he teào perofeta to ù, e ìte au i te mea hakanā paotū,
e pī au i te māàma,
e àva to ù haatià no te takitumu i te tau tuaivi,
atià, u kāòha koè àu, he mea tupepaka au nei.
3 Anoa e tuha pu au i to ù tau taetae paotū
no te toko i te poì veve,
e tuu me to ù tino no te pūovo i te ahi,
atià, u kāòha koè àu, aòè e tahi mea i koàna mai ia ù.
4 O te ènata koekoe kāòha,
ua tohe īa me te moû, e aha à te nuitina o te kōfii.
He koekoe vaièi to īa, aòè īa keitani, vaavō, kāìè pu.
5 O te ènata koekoe kāòha, u te e hana īa i te mea e hei koè.
Aòè īa e haamaakau ia īa anaè,
aòè īa e pekē pu, aòè e huke hae i te umu.
6 U te e koakoa īa e ìte ana i te mea ìno.
O te mea tiàtohu te i haakoakoa ia īa.
7 E tohe mau te kāòha, paòpaò koè,
e haatià mau, e tetaì mau, e memae i te tau memae paotū.
8 E noho mau te kāòha no te tau tai anatu.
O te teào perofeta ? Ma tītahi â, e koè ai.
O te teào ma he èo kē, èo kē anatu ?
Ma tītahi â, e mutu ai.
O te teào māàma i ùna o te Etua ? Ma tītahi â, e naò ai.
9 E aha te mea e ìte māàma tātou ? He mea iti noa.
E aha te teào e faì atu te tau perofeta ?
Te mou ponateào aneiho.
10 Ia tihe mai te ava o te toitoi èka,
e koè ai me he tupepaka te hope noa.
11 Oi tōìki au, he teào tōìki to ù, he maakau tōìki,
he kaituto tōìki to ù nei.
Ia ànamotua au, u haakoè àu i te hakatu tōìki.
12 I tēnei hoì, ua ìte tātou me he mea te ènata
tiòhi i te ata èhuèhu i òto o te karahi mata.
I te ava e tihe ai, e ìte tātou mata he mata.
I tēnei, ua iti noa to ù ìte māàma i te Etua.
I te ava e tihe nei, e pī au i te māàma
me he mea ta te Etua e ìte nei ia ù.
13 I tēnei, u avai e toù mea kē : te haatià, te tetaì, te kāòha.
O te kāòha te mea keî aè i vāvena o te toù.
ALLELUIA cf. Ta.67,3
E te Etua e,
me i te tihena òumati me te naòna òumati,
e ìtetia to Òe haapohoètina ma te tau fenua paotū.
EVANERIO O IETU KIRITO VĀÀNA E RUKA 4, 21-30
I tēia mou pō, i Natareti, i òto o te tinakoka,
21 u pohā te èo o Ietu me to Īa peàu ia âtou :
« I tēnei â, u haapaotia hua teào o te hāmani tapu
ta ôtou i òno puaìna kapo nei. »
22 U haameitaì âtou paotū ia Īa e haatiàtohu ana i to Īa teào.
U mahaò âtou nui mēìa u kōnini to Ietu haafitipona.
U peàu âtou : « Aòè à te tama a Ioteve tēnei ènata ? »
23 Atià, u peàu Ietu ia âtou :
« Ma te tiàtohu, e peàu ôtou ia ù i te teào haapupuà :
e te tātihi e, a haapohoè ia òe aneiho !
Ua òno tātou i te tau hana i pao ai i Kafaranaumi.
A hana òe i hua tau hana înei io to òe fenua tumu. »
24 U peàu Ietu : « U tiàtohu to ù teào nei ia ôtou :
aòè te perofeta e tahi i āpuutia io to īa fenua tumu.
25 Ma te tiàtohu, u peàu au ia ôtou :
he mea nui te tau vehine popī i te fenua Iraene,
i te tai o Eria te perofeta,
ia koè te ūa ma te koa e toù èhua me nā māhina e ono,
ia one nui te mataèinaa io te fenua viipū.
26 Atià aòè Eria i pahitia io tītahi o âtou,
u pōpahitia i Tarepa, io te vehine popī o hua fenua Titone.
27 I te tai o Erihea te perofeta,
he mea nui te tau ènata kovi i te fenua Iraene.
Aòè e tahi i haataìtaìtia,
o Naama aneiho me i te fenua Ihiria. »
28 Ia ònotia hua ponateào,
ua oo nui te pekē o âtou paotū i to he tinakoka.
29 Ua maò âtou.
Ua tute âtou ia Ietu i vaho o te pāpuafaè
me te aahi i ùna o te kapua o te tuaivi,
i èià ua haatū i to âtou pāpuafaè,
e hano ia Ietu e ketu io he opata.
30 Atià ua taha Ietu ma vāvena ahau o âtou me te hee atu.
TOMINIKA E ÌMA O TE AVA MA TE ÈHUA
TETAUTINA O TE PEROFETA ITAIA 6, 1-2a.3-8
1 I te èhua ua mate nui te hakaìki Ohiata,
ua ìte au i te Fatu Etua e tū aa
i ùna o te nohona tiketike nui.
Ua pī te Hiero i te taì o to Īa kahu uhi pu.
2 Ua ona mou anera Terafi i ùna o Īa.
3 U taaàu atu tītahi, u taaàu mai tītahi :
« Peàto, Peàto, Peàto te Fatu, te Etua o te aomāàma.
Ua pī nui te àni me te fenua i to Īa kāìè. »
4 Ia tani te èo o te anera Terafi,
u neue na katina e ùa o te avaputa,
u haapī te auahi i te Hiero.
5 U peàu au : « Auē. Auē. E mate nui au.
He ènata kiinutu havatia i te mikeo o au nei,
e noho ana i vāvena o te mataèinaa,
kiinutu havatia i te mikeo.
Ua ìtemata au i te Hakaìki nui, te Fatu o te aomāàma nei. »
6 Ua ona tītahi anera Terafi io ù me te kaahu ahi,
ta īa i too me i ùna o te fātaa.
7 U haatukia i to ù fafa me te peàu :
« U haatukia tēnei ahi i to òe kiinutu.
Ua koè to òe mikeo. U hooitia to òe tau tekateka. »
8 Ua òno au i te èo o te Fatu e peàu ana :
« O ai ta ù e pahi atu ? O ai to tātou keèe ? »
U haahua au : « Eīa au nei. A pōpahi ia ù. »
TARAMO 138 (137) 1-2a, 2b-3,4-5,7c-8
He Peàto te Fatu, to tātou Etua cf. It .6,3
1 E te Fatu e, u haahuaèkaèka au me io he koekoe.
U hakaòno hoì Òe i tu ù pure vevaò.
E hīmene nei au ia Òe i mua o te tau anera,
2 E oha nei au e tiòhi ana i to Òe Hiero tapu.
E hahi nei au mēìa i to Òe kāòha me te tiàtohu.
U tiketike atu i te tau mēmau paotū to Òe inoa.
3 I te â u haahua mai Òe i to ù pure vevaò,
U haaūo to Òe mana i te ìi o tu ù kuhane.
4 U haahuaèkaèka ia Òe te tau hakaìki o te fenua vii pu.
Ia òno âtou i te teào haaìte atu i to Òe hana,
5 U hīmene âtou i to Òe tau hana mahaò,
E hahi ana i te kāìè o te Fatu.
7 U tuàki au ma te mana o te Fatu.
8 I uē ia ù ua hana me he mea ta Īa i peàu mai.
E te Fatu e, paona koè to Òe kāòha.
Umoì e hakaea i to Òe matavaièi mai.
TETAUTINA TO MUA HĀMANI I TO KORINETIA 15, 1-11 ; akoè à ,1-8.11
1 E tu ù tau tunane tuehine.
E too ta ù e haamaakau ia ôtou
i te Evanerio hakakotia e au nei ia ôtou,
ta ôtou i āpuu mai me te haatià mau.
2 E haapohoètia ôtou e hua Evanerio.
anoa u āpuu meitaì ôtou ia īa
me he mea u hakako au ia ôtou, umoì te haahuìkē.
No te koè e aha te mea i koàna mai ia ôtou
ma te aotahi atu i te haatià ?
3 Òmua ana òa, u hakako au ia ôtou i te teào
i tuutia mai ia ù aneiho pēènei :
Ua mate te Kirito no to tātou tau mikeo,
vāàna i te mea patutia io he Hāmani tapu.
4 Ua tomitia, ua tū hakaùa te Kirito ma te toù o te pō,
vāàna i te mea patutia io he Hāmani tapu.
5 U haaìte te Kirito ia Īa iho ia Petero,
ma hope mai i te Tīònohuu ma tokoùa.
6 I muì iho, u haaìte ia Īa iho i te tau tunane tuehine,
tōtahi atu e ìma hānere to âtou nuitina.
E tahi haaìtetina anaè ia âtou nui.
E pohoè nei te nuitina o âtou. Ua mate tahipito.
7 Ma hope mai, u haaìte te Kirito ia Īa iho ia Iakopo,
ma hope mai i te tau Àpotoro paotū.
8 I te hope òa u haaìte te Kirito ia Īa iho,
me he mea i te tama fānau koeà.
9 O au hoì te iti atu i vāvena o te tau Àpotoro.
Aòè e hei e vevaòtia au he Àpotoro,
na te mea òmua, u haamākaka au i te Èkaretia o te Etua.
10 U haaìò mai te karatia o te Etua
me he mea ua ìte ôtou ia ù i tēnei mou â.
Aòè he mea tupepaka te karatia vaièitia mai e te Etua.
Ua nui atu to ù hana i to tahipito tau Àpotoro.
Atià, aòè to ù hana anaè :
me au nei, ua hana te karatia o te Etua.
11 No te haapoto i te teào, u peàu pēènei :
o au nei, akoè à o âtou te tau Àpotoro,
enā to tātou teào i hakakotia,
oianei te teào ta ôtou e haatià.
ALLELUIA ALLELUIA cf. Mt.4, 19
U peàu te Fatu pēènei : A ūtaì mai ôùa ia ù, e haaìò au ia ôùa he àvaika ènata.
EVANERIO O IETU KIRITO VĀÀNA E RUKA 5, 1-11
I tēia mou pō,
1 u haatita te faètoa vii pu o Ietu.
Ua hano âtou e hakaòno i to Īa teào.
Ua tū Ietu i te hiku o te tai Kenetareta.
2 Ua ìte Ietu e ùa vaa kātautia pii he one.
Ua iho mai te tau ènata àvaika
me to âtou hooi i to âtou ùpena.
3 Ua piki Ietu i òto o tītahi, o to Timone vaa.
Ua ape Ietu ia Timone no te hoe me te hee atu
mea iti me io te one.
I muì iho, u kaapee
me to Īa hakako me io te vaa i te faètoa nui.
pao te teào, u peàu Ietu ia Timone :
« A hoe ! A hee i vaho òa me te haatopa i te ùpena
no te haamau i te ià. »
5 U haahua Timone me te peàu : « E Tuhuna e,
u paopao mātou i te haatopatina i te ùpena māàma te pō.
Aòè te ià i mau.
Atià, u peàu òe : e haatopa au i te ùpena. »
6 Ua hana âtou atii. Nui oko te tau ià i mau.
I motumotu ai to âtou nā ùpena.
7 U pekahi âtou i to âtou tau hoa te i òto o te vaa kē
no te tihe mai me te toko ia âtou. Ua tihe âtou.
U haapī nuitia e ùa vaa, mei naò âua.
8 Ia ìte Timone Petero i hua mea,
ua hina pii o nā vaevae o Ietu e peàu ana :
« E te Fatu e, a haamemao Òe me io ù. He ènata mikeo au. »
9 Ua hemo hoì Timone i te haametaù, o īa me to īa tau hoa,
mēìa i te nuitina o te ià i mau.
10 Atii me Iakopo me Ioane, nā tama a Ihepetea,
e hoa âua no Timone. U peàu Ietu ia Timone :
« Umoì òe e haametaù. I tēnei, e ìò òe he àvaika ènata. »
11 Ua ùai âtou i to âtou vaa io he one.
E titii ana i te tau mēmau paotū, ua ūtaì âtou ia Ietu.
TOMINIKA E ONO O TE AVA MA TE ÈHUA
TETAUTINA O TE PEROFETA IEREMIA 17, 5-8
5 Oianei te teào a te Fatu.
« A ìno nui te ènata e haatià i te tau ènata anaè !
U haamee hoì hua ènata i te Etua,
ua vae īa i te hoa e mate vave no te toko ia īa.
6 Ua tūtū īa me te teitā taataa e tupu i te fenua ataha.
Aòè īa e ìte i te koakoa.
Io te vahi viviio to īa nohona, te fenua ataha,
te fenua i èià ua koè te vai me te mea kai.
7 Mamau te ènata haatià i te Fatu Etua !
Mamau te ènata e tetaì nei i to te Etua hakāòha.
8 Ua tūtū hua ènata me te tumuâkau
tanutia pii te vaitahe,
e hohoà ana i to īa tau aka io te vai.
Aòè i puòi to īa àu i te veàveà o te òumati ;
u èreère anatu to īa àu.
Ia moô te fenua, u te e mate īa, aòè e naò to īa puku.
TARAMO 1, 1a.c-2,3,4.6a
Io te Etua to tātou tetaì, io te Etua to tātou koakoa. cf. 40,5
1 Mamau te ènata e haapii koè me te poì tekateka,
E taha koè ma io to âtou aanui hukaka,
2 Mamau te ènata haataetae i te teào a te Etua,
E kaituto ana i hua māàma me i te pō me i te â.
3 E ìò hua ènata me he tumuâkau,
Tanutia i te kaavai io he èpo mōmona.
I te ava e hei, e hua to īa tau puku.
E puòi koe to īa àu, u keekee anatu.
E pao meitaì to īa tau hana paotū.
4 He mea kē to te poì tekateka, mea kē anatu.
Ua ìò te poì tekateka me he kaù moô.
6 Ua ìte hoì te Fatu i te aanui o te ènata toitoi.
E naò ai te aanui hukaka o te poì tekateka.
TETAUTINA O TO MUA HĀMANI I TO KORINETIA 15, 12-20
E tu ù tau tunane tuehine.
12 U hakako tātou i te mea ua tū hakaùa te Kirito
me i vāvena o te huaa mamate.
No èià, pēhea e koàna i tahipito me io ôtou te peàu :
aòè e pohoè hakaùa te huaa mamate ?
13 Anoa he teào tiàtohu to âtou,
aòè hoì i tū hakaùa te Kirito.
14 Anoa u te e tū hakaùa te Kirito
me i vāvena o te huaa mamate,
he mea avai noa to tātou hakakotina.
He mea tupepaka to ôtou haatià.
15 Tōtahi atu, ua ìò tātou he poì pōtoho pu i te Etua.
U peàu hoì tātou, u haatū hakaùa te Etua i te Kirito
me i vāvena o te huaa mamate.
Vāàna e âtou : aòè e pohoè hakaùa te huaa mamate.
No èià, aòè i tū hakaùa te Kirito.
16 Anoa u te e pohoè hakaùa te huaa mamate,
aòè hoì i tū hakaùa te Kirito.
17 No te e tū hakaùa te Kirito, he tupepaka to ôtou haatià ;
tihe i tēnei, u havatia ôtou e te mikeo.
18 Tītahi :
ua naò te poì te i mamate ma òto o te haatià i te Kirito.
19 Me tetaì tātou i te Kirito
no te haameitaì atu i to tātou pohoè to te ao nei,
ua ìò tātou he poì ìno nui i vāvena o te tau ènata paotū.
20 He mea kē : tiàtohu nui, ua tū hakaùa te Kirito
me i vāvena o te huaa mamate. O Īa te ènata to mua
te i pohoè hakaùa me i vāvena o te tau mamate paotū.
ALLELUIA ALLELUIA Rk .6, 23
A koakoa, a tatakahiti ôtou i te koakoa na te mea he nui atu to ôtou tuki io he àni.
EVANERIO O IETU KIRITO VĀÀNA E RUKA 6, 17.20-26
17 I tēia mou pō, e iho ana Ietu
me te tau Àpotoro, u hakaea io te vahi pāàhaàha.
I èià te nuitina o te tau kouâ me te faètoa nui oko
me i te Fenua Iutea mai, me i Ierutaremi,
me i te fenua o te hiku o te tai Tiro me Titone.
20 E tiòhi ana Ietu i to Īa tau kouâ, u peàu pēènei :
« Mamau ôtou, e te poì veve,
na te mea ia ôtou te Patirēia o te Etua.
21 Mamau ôtou, e te poì mate i te one i tēnei,
na te mea e haamaònatia ôtou.
Mamau ôtou, e te poì mateteka ana i tēnei,
na te mea e kakata ôtou.
22 Mamau ôtou i te ava e haahaa te tau ènata ia ôtou,
te tiehi, te paha me te haamee i to ôtou inoa,
mēìa i te Tama a te ènata.
23 I tēia mou pō, a koakoa, a tatakahiti i te koakoa,
he mea nui atu to ôtou tuki io he àni.
Atii hoì ua hana to âtou tau tupuna i ùna o te tau perofeta.
24 Mea ìno ôtou, e te poì me te taetae nui.
na te mea ua tuutia mai to ôtou koakoa.
25 Mea ìno ôtou, e te poì maòna i tēnei,
na te mea e mate ai ôtou i te one.
Mea ìno ôtou, e te poì kakata i tēnei,
na te mea e tihe te ava o te uēuē, te mateteka.
26 Mea ìno ôtou ia hahi te tau ènata paotū ia ôtou,
atii hoì to âtou hana i ùna o te tau perofeta tīkoe. »
TOMINIKA E FITU O TE AVA MA TE ÈHUA
TETAUTINA O TO MUA HĀMANI A TAMUERA 26, 2.7-9.12-13.22-23
2 Ua fiti Tauro te hakaìki i te fenua ataha, o Tiha te inoa.
E tahi hee me īa e toù tautini kape me i te fenua Iraene.
7 I te pō, Tavite me Apihai to īa hoa,
ua uu âua i òto o te pāpua o Tauro.
U hiamoe te hakaìki. Ua tū to īa taa pii te upoo.
Ma to īa kaokao, u hiamoe te hakaìki Apenere
me to īa pūpū kapetiaì.
8 U peàu Apihai ia Tavite :
« I tēnei pō, u haaìò te Etua io to òe îìma
i te ènata tōua ia òe.
Epō me to īa iho taa e patia au ia īa. E tahi tā anaè. »
9 Atià, u haahua Tavite : « Umoì e kukumi ia īa.
No te mākaka òe i te hakaìki paùtia e te Etua,
e topa te tuki pē i ùna o òe. »
12 Ua too Tavite i te taa me te hue vai i pataa te upoo o Tauro.
Ua hee atu âua. Aòè i ìte e tahi, aòè i aa e tahi kapetiaì.
U hiamoe âtou nui.
Na te Etua i haatau i te hiamoe ma ùna o âtou.
13 Ua fiti Tavite ma ùna he tuaivi e tū ana io he kapua,
i te vahi memao me i èià.
22 U vevaò Tavite ia Tauro e taaàu pēènei :
« E te hakaìki e. Înei te taa.
A hano mai tītahi māhaì. A mai.
23 Na te Etua e haahua i te ènata vāàna i to īa koekoe toitoi,
hakahae koè. Na te Etua i haaìò ia òe i tu ù nā îìma.
Aòè au i kukumi i te hakaìki paùtia e te Etua. »
TARAMO 103 (102),1-2, 3-4, 8.10, 12-13
He moû, he kāòha anaè te Fatu 103,8
1 E tu ù kuhane, a haameitaì i te Fatu,
Me io he koekoe, a haameitaì i to Īa inoa peàto.
2 A haameitaì i te Fatu, e tu ù kuhane,
Aua e māhaè e tahi o to Īa vaièitina.
3 U vevete te Fatu i to òe tau mikeo paotū.
U haakoè te Fatu i te memae o to òe tino.
4 Na Īa i taki ia òe me io te ana tūpāpaù.
Na Īa i vahi ia òe i te kāòha me te hinenaò.
8 He moû, he kāòha te hakatu o te Fatu.
U haatevee i to Īa pekē : ua pī i te kāòha.
10 U te e utu mai te Fatu vāàna i to tātou tau piò.
Aòè e huke Īa i te umu ia tātou poì mikeo.
12 Me he memao te tihena o te òumati me i to īa naòna,
U tioà te Etua i te mikeo memao me io tātou.
13 Me he mea u kāòha te motua i to īa tama,
Hua hakatu to te Fatu kāòha i te ènata pakaihi ia Īa.
TETAUTINA O TO MUA HĀMANI I TO KORINETIA 15, 45-49
E tu ù tau tunane tuehine
45 Ua patutia hoì pēènei :
« O Atamo, e ènata to mua i pēpenatia he mēmau pohoè.
Atià, te Atamo paona, he kuhane īa me te tumu o te pohoè. »
46 To mua, ua tihe te mēmau pohoè,
ma hope mai, te taetae atu : te kuhane te i vaièi atu i te pohoè.
47 O Atamo matamua, u kāneatia me te èpo,
he ènata me i te fenua nei.
O Atamo e ùa, me io he àni mai īa.
48 Te tau ènata me i te fenua nei, u hakatu âtou
me te ènata kāneatia me te èpo.
O te tau ènata me io he àni,
e hakatu hoì âtou me hua ènata me io he àni mai.
49 Me he mea u haaìòtia tātou hakatu
me te ènata kāneatia me te èpo,
ma tītahi â, e ìò hoì tātou hakatu
me te ènata me io he àni mai.
ALLELUIA ALLELUIA cf. In. 13,34
U avai te Fatu Ietu ia tātou i te Teào hou mai : « A kāòha atu kāòha mai te hoa i te hoa, me he mea u kāòha au ia ôtou. »
EVANERIO O IETU KIRITO VĀÀNA E RUKA 6, 27-38
I tēia mou pō, u peàu Ietu i te faètoa nui pēènei :
27 « O ôtou, e te poì e hakaòno mai, u peàu au ia ôtou :
a kāòha i te tau ènata e tōtōua me ôtou.
A vaièi atu i te poì e haahaa ia ôtou.
28 A haameitaì i te poì e haaìno ia ôtou.
A pure i uē i te poì e kaipīpiò ia ôtou.
29 Ia papaki te ènata i to òe papaìna,
avai ia īa e pehi i te papaìna kē.
Ia hao te ènata i to òe kahu uhi pu,
umoì e kaikino i to òe kahu òa.
30 Ia kaiape tītahi io òe, a vaièi atu ia īa.
Ia too te ènata i to òe mēmau,
umoì òe e haapākeka i hua mēmau ta te ènata i too pu.
31 A hana ôtou i uē i te ènata hua mea aneiho
e kōhoà ôtou e hana ta âtou i uē ia ôtou iho.
32 Anoa u kāòha atu ôtou i te tau ènata
te i kāòha mai ia ôtou,
e aha te tuki e vaièitia mai e te Etua ?
U kāòha atu hoì me te poì mikeo
i te tau ènata te i kāòha mai ia âtou.
33 Anoa e toko atu ôtou i te tau ènata te i toko mai ia ôtou,
e aha te tuki e vaièitia mai e te Etua ?
Hua mea aneiho hoì ta te poì mikeo.
34 Anoa e ao ôtou i te àiê mai te hoa ia ôtou
na te mea e koàna ia īa te haahua atu,
e aha te tuki e vaièitia mai e te Etua ?
Atii ta te poì mikeo : ua tuu atu âtou i te mēmau,
e tetaì ana e tuutia mai hua mea aneiho.
35 O ôtou à, a kāòha i te tau ènata tōtōua me ôtou.
A vaièi atu, a ao ôtou e àiê mai te hoa ia ôtou,
koè te tetaì ana e haahuatia mai e tahi mea aneiho.
Ma èià, e nui aè to ôtou tuki,
e ìò ôtou he tau tama o te Tiketike nui
te i vaièi atu i te poì kāòha koè me te poì pē.
36 A tūtū to ôtou hakāòha me te hakāòha o to ôtou Motua.
37 Umoì ôtou e haavā i te hoa, aòè ôtou e haavātia.
Umoì ôtou e hakatio atu, aòè ôtou e hakatiotia mai.
A vevete i te tau tekateka, e vevetetia to ôtou tekateka.
38 A tuu atu ôtou, e tuutia mai ia ôtou.
E tuutia ia ôtou i te hope taetae pī nui,
òomimeitaìtia, ûûtia, e meìni ana mēìa i te pī nui.
Na te mea, vāàna i to ôtou vaièi atu i tahipito,
e vaièitia mai ia ôtou.
TOMINIKA E VAÙ O TE AVA MA TE ÈHUA
TETAUTINA O PENETIRA TE TUHUNA TEÀO 27, 4-7
4 E tūtūtia te faraoa no te haapaekē i te kākano me te kaù.
Atii hoì te ènata te i pohā te èo, u pupuà to īa tau tekateka.
5 E tūtūtia te hue keâ i òto o te umu haaveàveàtia e te ahi.
Atii hoì e koàna ia òe e haavā i te ènata ma to īa teào.
6 Na te puku e ìtetia te hakatu o te tumuâkau.
Na te teào o te ènata, ua ìtetia te hakatu o to īa koekoe.
7 Aua òe e haakāìè vave i te ènata,
tiaì epō e ònotia ta īa teào.
E haapuàha te teào i te ènata tiàtohu.
TARAMO 92(91), 2-3, 13-14, 15-16
E te Fatu e, U hei nui te hīmene hahi i to Òe inoa 92,2
2 U hei nui te haahuaèkaèka i te Fatu,
Te hīmene hahi i to Òe inoa, e te Etua tiketike.
3 I te pōpōuì, e haamevaha i te òno o to Òe kāòha,
I te ahiahi te haatiàtohu i to Òe vaièitina.
13 E tupu te ènata toitoi me he tumuèhi,
E hohoà ana i to īa tau manamana,
14 Hakatu me te âkau o te tuaivi Ripano,
Tanutia io te pāpua tapu o to tātou Etua.
15 E hua īa i te puku tihe to īa kooūa pē,
Pī i te èpau hakatu me to te tino hou,
16 No te haamevaha i te teào : « U toitoi te Fatu.
Aòè e hakahae te Etua, to ù motukeâ. »
TETAUTINA O TO MUA HĀMANI I TO KORINETIA 15, 54-58
E tu ù tau tunane, tuehine e,
E huìkētia te mēmau pao vave
me te haaìòtia he mēmau paona koè.
E huìkētia te mēmau mate vave
me te haaìòtia he mēmau mate koè.
54 Ia tihe hua ava o te pohoè mau anatu,
ia haahuìkētia te mēmau mate vave
no te haaìò he mēmau te i mate koè,
u haatoitoitia te teào o te Hāmani tapu te i peàu pēènei :
« U tuàki te pohoè. Ua naò te matena.
55 E te matena e, i hea to òe mana ?
E te matena e, i hea to òe taa tekeo ? »
56 O te mikeo te taa tekeo o te matena ;
O te Ture te ìi o te mikeo.
57 A haahuaèkaèka tātou i te Etua.
Na Īa hoì i vaièi mai no te tuàki i te matena
i òto o to tātou Fatu Ietu Kirito.
58 No èià, e tu ù tau tunane tuehine tāhia e,
a tohe mau paòpaò koè
te haahee i mua i te hana haakāìè i te Fatu.
Ua ìte ôtou io Īa te tuki meitaì o to ôtou hana.
ALLELUIA ALLELUIA cf. Fi. 2,15-16
A tiaì mau i te teào haapohoè : O ôtou te àma a pupuà no te tūìna i to te ao nei.
EVANERIO O IETU KIRITO VĀÀNA E RUKA 6, 39-45
I tēia mou pō,
39 u peàu hakaùa Ietu i to Īa tau kouâ i te teào haapupuà.
« Aha e koàna i te ènata matapō te aahi i te matapō ?
E vivii hoì âua tokoùa i to he opata.
40 Aòè te kouâ ma ùna aè o to īa tuhuna.
O te kouâ poeka, u hakatu toitoi me to īa tuhuna.
41 No te aha e tiòhi òe i te kaù hunahuna
te i òto o te kikomata o to òe teina ?
Aòè òe e ìte i te papapoho te i òto o to òe kikomata ?
42 Pēhea òa e koàna ia òe te peàu i to òe teina :
E tu ù teina e, epō a taki au i te kaù
me i òto o to òe kikomata,
o òe te i ìte koè i te papapoho
te i òto o to òe aneiho kikomata ?
E te ènata koekoe e ùa, a taki òmua i te papapoho
me i òto o to òe kikomata, a tahi a ìte tāhakahaka òe
mea taki i te kaù te i òto o te kikomata o to òe teina.
43 Aòè e hua i te puku pē te tumuâkau meitaì.
Atii hoì aòè e hua i te puku meitaì te tumuâkau pē.
44 O te puku to te i haaìte aè i te hakatu o te tumuâkau.
Aòè e kohitia te pukufiko me io te maateitā taataa.
Aòè e kohitia te pukuvino me io te teitā keoho.
45 O te ènata meitaì, ua too i te mea meitaì
me io te tau taetae meitaì te i òto o to īa koekoe.
O te ènata pē, ua too i te mea pē
me io to īa puke taetae pē.
U pohā te èo o te ènata no te teào
vāàna i te mea haapī nui i to īa koekoe.
PŌ E TOÙ TE KOÌNA ÈHUAHI
TETAUTINA O TE HĀMANI A TE PEROFETA IOERE 2, 12-18
12 Oianei te teào o te Fatu Etua.
A hua mai ôtou io ù me te koekoe tiàtohu,
ma òto o te haaone, te vaimata me te kahu uē.
13 Aua e veti te kahu.
A fāìu i to ôtou koekoe, me te hua io to ôtou Etua.
He moû, he hākāòha nui te Fatu,
u haatevee i te pekē, ua pī nui i te uē,
U haamahaè Īa i te tuki pē.
14 O ai te i ìte ? E hua uanei Īa me te moû
no te haakoè i te umu, me te haapī ia ôtou i to Īa vaièi mai.
E koàna ia ôtou te ùtuna atu i te hēana
io te Fatu to ôtou Etua.
15 A haatani i te pū, e Ierutaremi e.
A haaìte i te ava haaone tapu.
A haapei i te koìna pure. A putuputu te motuhana peàto.
A hakātahi mai i te papa hakāìki me i te tau tuhuna.
A muimui mai te mataèinaa.
A haaputuputu mai te tau tama hou me te tau tōìki.
16 A uu i vaho me io he faè te āhana hou,
i vaho me io to īa pāòto te vehine hou.
A tomo io he faèpure te tau tāuà, tāvini o te Etua.
A pure âtou, a hīmene i te hīmene uē e peàu aa :
« E te Fatu e, a hākāòha mai i to Òe mataèinaa.
17 Aua Òe e ao i te poì èteni
te i haamee me te māio i to òe mataèinaa.
No te aha e peàu âtou : « I hea to âtou Etua ? »
18 A tahi a tāvaè te Fatu me te hākāòha i to Īa mataèinaa.
TARAMO 51 (50), 3-4, 5-6ab, 12-13, 14.17
E te Etua e, a hākāòha mai, mēìa i to mātou mikeo. cf. Ta. 51,3
3 E te Etua e, a hākāòha mai.
Mēìa i te nuitina o to Òe uē,
4 A hooi mai me i to ù mikeo.
A haamā i tu ù koekoe pē.
5 Ua ìte au i to ù mikeo.
U maakau anatu au i to ù piò.
6 Ua teka au io Òe aneiho,
I to Òe aò, ua hana au i te mea pē.
12 A pēpena i òto o au nei i te koekoe taìtaì.
A haahou i to ù kuhane, a haamau i to īa meitaì.
13 Umoì e titii atu ia ù memao me io Òe.
Umoì e taki me i òto o au i to òe Kuhane Meitaì.
14 A haakoakoa ia ù to Òe haapohoè mai.
A haamau i te èkaèka io to ù koekoe.
17 E te Fatu, tu ù Etua e, a pepeù i to ù kiinutu,
A tahi a hahi to ù fafa i to Òe kāìè.
TETAUTINA O TE HĀMANI E ÙA I TO KORINETIA 5, 20-6, 2
E tu ù tau tunane tuehine,
20 Ua ìò mātou he tau keèe no te Kirito.
O te Etua iho te i oonaì ia ôtou ma òto o to mātou fafa.
I te inoa o te Kirito, u toutaki mātou ia ôtou :
a ao ôtou e haaâvei te Etua ia ôtou me Īa.
21 Ua piò koè, mikeo koè te Kirito.
Atià, i uē ia tātou, u haatopa te Etua i ùna o te Kirito
i te tuki pē o te mikeo.
Ma èià, i òto o te Kirito, u toitoi mātou nei i mua o te Etua.
6,1 Ohia ua hana mātou me he mou tautua o te Etua,
u toutaki mātou : « Umoì ôtou e avai pu anaè
i te karatia ta te Etua i vaièi mai.
2 Ua patutia hoì ma òto o te Hāmani tapu :
« I te ava e hei, e fati au i to òe hīa ;
i te â haapohoè, e toko au ia òe.
Oianei te ava e hei, oia hoì te â o te haapohoè. »
TE HĪMENE VĀNANA Mt. 4,17
U peàu te Fatu : « A fāìu i to ôtou koekoe, u tataèka te Patirēia o te Etua. »
EVANERIO O IETU KIRITO VĀÀNA E MATEO 6, 1-6.16-18
I tēia mou pō, ohia u putuputu mai te tau kouâ
i ùna o te tuaivi viipū o Ietu, u peàu ia âtou pēènei :
1 « Umoì e aotahi ôtou i to te Etua maìmaì
i te ava enā te tau ènata
e tiòhi ia ôtou me te haakāìè mai.
Me hana ôtou atii, e koè ai to ôtou tuki
me io to ôtou Motua te io he àni.
2 Ia vaièi atu òe i te taetae kāòha,
umoì e hana òe me he mea ta te poì koekoe e ùa
te i haatani i te pū i òto o te tinakoka, i no he tohua,
etià e haakāìè te tau ènata ia âtou.
Ma te tiàtohu to ù peàu ia ôtou, u koàna mai ia âtou te tuki.
3 Ia vaièi atu òe i te taetae kāòha,
aua e ìte to òe ìma aèaè e aha ta te ìma oko i tuu.
4 Ma èià, e hana hakanā to òe vaièitina.
Na to òe Motua te ìte i te mea hakanā,
e haahua mai ia òe. »
5 I te ava e pure ôtou,
aua e hana hakatu me te poì koekoe e ùa.
U koakoa âtou e pure tū ana i òto o te tau tinakoka,
akoè à, io te tau tohua, etià e ìte te tau ènata ia âtou.
Ma te tiàtohu to ù peàu ia ôtou : u koàna mai ia âtou te tuki.
6 O òe, i te ava e hano òe i te pure,
a uu i òto o te pāòto hakanā o te faè, a pā te avaputa,
a pure io to òe Motua te i noho io he vahi hakanā.
Na to òe Motua te ìte i te mea hakanā,
e haahua mai ia òe.
16 Me haaone ôtou,
umoì e haaìò i to ôtou mata me he mata uē,
hakatu me te tau ènata koekoe e ùa te i haakē i te mata
etià e mata haaone to âtou i mua o te tau ènata.
Ma te tiàtohu to ù peàu ia ôtou : u koàna mai ia âtou te tuki.
17 O òe â, me haaone òe, a paù i to òe upoo
me te kao kekaa, a hooi i to òe mata,
18 etià u te e ìte te tau ènata e haaone nei òe.
E ìte anaè to òe Motua te i noho io he vahi hakanā.
Na to òe Motua te ìte i te mea hakanā,
e haahua mai ia òe. »
TOMINIKA TO MUA O TE AVA HAAONE
TETAUTINA O TE HĀMANI TEUTERO 26, 4-10
4 U peàu Moite i te mataèinaa Iraene pēènei :
Ia ùtuna òe i te Etua i te tau puku
kohitia to mua i te ava mei nui,
e too te tāuà i te kete me i to òe îìma
no te tuu atu i mua o te fātaa pure o te Fatu to òe Etua.
5 O òe, a haafitipona òe me te peàu pēènei :
« Me io te Fenua Aramo tu ù motua.
He ènata pāpāuō īa, ènata hee anatu, hee anatu.
Ua iho īa i te Fenua Ekipito. I èià, ua noho īa me he manihii.
He mou ènata anaè to īa huaafaè.
Èka ana io hua fenua,
ua ìò âtou he mataèinaa mana, nui oko.
6 U haamākaka mai te poì Ekipito me te haaveve nui ia tātou,
u haaìòtia tātou he poì mōèhu.
7 U taaàu tātou io te Fatu, te Etua o to tātou tau tupuna.
Ua òno Īa i to tātou èo, ua ìte Īa e poì io he àì nui tātou,
poì haamākakatia, poì òomitia i te memae.
8 Na te Etua i haauu ia tātou i vaho me io te Fenua Ekipito
ma te mana o to Īa îìma, ma te tau hana haahaametaù,
te tau hakatu mahaò, me te tau hana mana.
9 Na te Fatu i aahi ia tātou io tēnei vahi.
Na Īa i vaièi mai i tēnei fenua,
he fenua i èià e tahe pu te vaiū me te mānini tikauè.
10 E te Fatu e, i tēnei, e ùtuna au
i te puku to mua ta ù i kohi io he fenua ta Òe i vaièi mai. »
TARAMO 91 (90) 1-2, 10-11, 12-13, 14-15
E te Fatu e, i te ava e uēuē ai mātou, a tū Òe ma to mātou kaokao. cf. .91,15
1 Ua noho au io te vahi maù o te Tiketike,
U hakaea au io te maù o te Mana nui,
2 U peàu au i te Fatu : O Òe to ù toko.
To ù motukeâ, te Etua e haatià nei au.
10 Aòè te ìno e haatata me Òe.
Aòè te memae e uu io to Òe faè.
11 Ua pahi te Etua i to Īa tau anera
No te tiaì i te aanui o to Òe tahatina.
12 E amo te tau anera ia Òe i ùna o to âtou îìma,
Oa e tukia to Òe vaevae me te keâ.
13 E haapaìha Òe i te koropio me te puhifenua.
E tekahi Òe i te reone me te tarakone.
14 Ohia u haapii te ènata me au, na ù e haapohoè ia īa.
Ohia u pakaihi i to ù inoa, e toko nei au ia īa.
15 U vevaò mai īa, e āpuu au ia īa.
I te ava e uēuē īa, e tū nei au ma to īa kaokao.
TETAUTINA O TE HĀMANI A PAURO PEÀTO I TO ROMA 10, 8-13
E tu ù tau tunane tuehine,
8 E aha te mea kē i peàutia ? Pēènei :
« Ua tata me òe te teào a te Etua.
Enā hua teào io to òe fafa, i òto to òe koekoe. »
O īa hoì te teào o te haatià ta tātou i hakako nei.
9 No to òe peàu ma te fafa : O Ietu te Fatu.
No to òe haatià me io he koekoe i te mea
u haatū hakaùa te Etua ia Ietu
me i vāvena o te huaa mamate, e haapohoètia òe.
10 U haatià hoì tātou me io he koekoe
etià e haatoitoi te Etua ia tātou i mua o Īa.
Ua faì atu ma he fafa i hua haatià,
etià e haapohoè te Etua ia tātou.
11 U peàu te Hāmani tapu pēènei :
« O te ènata e haatià i te Etua, aòè e hina ai hua ènata. »
12 No èià hua mea aneiho i mua o te Etua te tau ènata,
e aha à ati Iuta tahipito, Hereni tahipito.
E tahi Fatu anaè no tātou paotū,
te i vaièi atu i te nuitina o to Īa tau taetae
i te tau ènata e vevaò ia Īa.
13 Vāàna i te Hāmani tapu :
« E pohoè te ènata e vevaò i te inoa o te Fatu. »
HĪMENE VĀNANA Mt.4,4
Aòè e pohoè te ènata i te faraoa anaè. E pohoè īa i te teào me io te fafa o te Etua.
EVANERIO O IETU KIRITO VĀÀNA E RUKA 4, 1-13
1 I tēia mou pō, me i te kaavai Ioritane,
ua hua mai Ietu pī i te Kuhane Meitaì.
Aahitia e te Kuhane Meitaì, ua vii Īa i te fenua ataha.
2 I èià, ma te òa e fā ònohuu pō,
u haamōtiitia Ietu e te Tiaporo.
I hua tau pō, aòè Īa i kai i tītahi mea.
Ia pao tenā mou pō, ua mate Ietu i te one.
3 U peàu te Tiaporo ia Īa : « Anoa he Tama òe a te Etua,
a peàu i te keâ nei a ìò mea faraoa. »
4 U haahua Ietu ia īa :
« Ua patutia : aòè e pohoè te ènata i te faraoa anaè. »
5 U haafiti te Tiaporo ia Ietu i ùna atu
me to īa haaìte ma te tiòhitina e tahi
i te tau fenua ia ôtoa o te aomāàma vii pu.
6 U peàu te Tiaporo ia Ietu :
« E tuu atu au ia òe i te mana no te vivini
ia âtou paotū atii me te kāìè o âtou kōtoa.
Ua ìò hoì ia ù hua mana me te kāìè.
E koàna ia ù e tuu atu i te ènata vāàna e to ù maìmaì.
7 E ìò ia òe hua mea ia ôtoa,
anoa e moe haatona òe i mua o au nei me te pakaihi mai. »
8 U haahua Ietu me te peàu ia īa :
« U patutia : A moe haatona i mua o te Fatu to òe Etua
me te pakaihi ia Īa anaè. »
9 U aahi te Tiaporo ia Ietu i Ierutaremi.
U haatū ia Īa i ùna o te pūkeo o te Hiero me te peàu :
« Anoa he Tama òe a te Etua, a tufao me i înei i aò nui.
10 U patutia hoì pēènei : E peàu i to Īa tau anera
no tiòhi meitaì ia òe.
11 U patutia hakaùa : E amo âtou ia òe
i ùna o to âtou îìma, oa e tukia to òe vaevae me te keâ.
12 U haahua Ietu i te Tiaporo : « U peàutia pēènei :
Umoì òe e haamōtii i te Fatu to òe Etua. »
13 Ia pao te haamōtiitina ta te Tiaporo
ma te tau hakatu mōtii kē paotū,
ua pae īa me io Ietu tihe te ava i haaheitia.
TOMINIKA E ÙA O TE AVA HAAONE
TETAUTINA O TE HĀMANI A MOITE PEÀUTIA TENETE 15, 5-12.17-18
5 U aahi te Fatu ia Aparahamo i vaho o to īa faèkā
me to Īa peàu pēènei : « A tiòhi i te ataàni.
A tetau i te nuitina o te tau fetū, me koàna ia òe.
Atii te nuitina o to òe ati i ùna aè. »
6 U haatià Aparahamo i te Fatu Etua.
Ma èià, u haaìòtia Aparahamo
he ènata toitoi noa i mua o te Fatu Etua.
7 A tahi a peàu Īa pēènei : « O au te Fatu.
Na ù i haauu ia òe i vaho me i te pāpuafaè Ura,
me te Fenua Karete,
etià e haaìò ia òe te hei o tēnei fenua. »
8 U haahua atu Aparahamo : « E te Fatu, e tu ù Etua e,
pēhea tu ù ìte e ìò au te hei o tēnei fenua ? »
9 U peàu te Etua :
« A too òe i te kōivi pifa hou, e toù èhua to īa,
e tahi keukeu e toù èhua, e tahi koimaa e toù èhua,
e tahi manu kuku, e tahi manu pihō. »
10 Ua too Aparahamo i tēnei tau ânimara paotū,
ua vahi īa âtou ma vāvena ;
ua tuu i tītahi hope i mua o tītahi hope.
Atià, aòè īa i vahi i nā manu.
11 Ua tau te mou manu kai înaì i ùna o tenā tau poo kiko.
U tiehi Aparahamo ia âtou.
12 Ia èva te â, i te naòtina o te òumati,
ua tau te hiamoe oko i ùna o Aparahamo me to īa hiamoe.
Ma òto o te pō keevō, u moemoeā faufau
Aparahamo me te haametaù nui.
17 I te pō, u pōtano nui te fenua.
I vāvena o te tau poopoo kiko ânimara haapāveitia,
ua taha tītahi kaahu ahi e auahi nui me he uàuà tāpupu. »
18 I hua pō, u haatoitoi te Etua i te piimau me Aparahamo
vāàna tēnei teào : « E tuu nei au i to òe ati i ùna aè
i tēnei fenua, me i te vaitahe o te Fenua Ekipito,
tihe atu i te vaitahe Efarata. »
TARAMO 27 (26) 1, 7-8, 9a-d, 13-14
O te Fatu to ù Māàma, to ù Pohoè. 27, 1
1 O te Fatu tu ù māàma, tu ù pātoko.
O ai òa e haametaù mai ?
O te Fatu te i tiaì i tu ù pohoè.
O ai òa e haapūkina mai ?
7 E te Fatu e, a hakaòno mai e vevaò au ia Òe.
A hakāòha mai, a haahua mai i te teào.
8 U maakau au ma he koekoe i to Òe peàu mai :
« A ùmihi ôtou i to ù mata »
9 O to Òe mata hoì e ùmihi nei au.
Umoì e punanā i to Òe mata ia ù.
E te Fatu e, umoì e titii i to Òe tāvini.
O Òe tu ù Etua, tu ù Haapohoè.
13 Tiàtohu nui e ìte au i te Meitaì o te Fatu,
I te ao nei i vāvena o te tau ènata pohopohoè.
14 A tetaì i te Fatu. Oho te ìi.
TETAUTINA O TE HĀMANI A PAURO PEÀTO I TO FIRIPO 3, 17-21 ; 4,1.
E tu ù tau tunane tuehine,
17 A tūtū ôtou nui me au nei. A tiòhi matiòka i te tau ènata
te i pohoè vāàna i te hakatu ta ù i haaìte ia ôtou.
18 Òmua, u peàu au ia ôtou, e too ta ù e peàu hakaùa
atià me te uē, e mateteka ana :
He mea nui te tau ènata te i tute i te peka o Ietu.
19 O te matena to âtou paona.
Me he ètua no âtou te hīa o te tino.
U kāìè pu âtou mēìa i te hana haahakaìna.
U haataetae âtou i te mēmau o te aomāàma nei anaè.
20 No tātou à, o te àni to tātou fenua tumu,
e tetaì ana i te Tihena o Ietu Kirito, te Fatu,
21 te i haapohoè ia tātou me te haahuìkē i to tātou tino pepae
no te haahakatu me to Īa iho tino haakāìètia.
Na te mea, e àva to Īa mana
no te vivini i te tau mēmau o te aomāàma ia ôtoa.
4,1 No èià, e tu ù tau tunane tuehine tāhia e,
o ôtou ta ù e kōhoà nei e ìtemata hakaùa,
ôtou to ù koakoa, o ôtou to ù heipua haakāìè :
oho te ìi anatu i òto o te Fatu,
ôtou tu ù tau teina tāhia nui e.
HĪMENE VĀNANA cf. Mt.17,5
Me i òto o te ao tapu pupuà nui, ua ònotia te èo o te Etua Motua. « O Īa nei tu ù Tama Tahia, a hakaòno ôtou ia Īa. »
EVANERIO O IETU KIRITO VĀÀNA E RUKA 9, 28b-36
I tēia mou pō,
28 ua too Ietu me Īa o Petero, o Ioane, o Iakopo
me to Īa fiti i ùna o te tuaivi no te pure.
29 E pure ana Ietu, ua huìkē te hakatu o to Īa mata ;
ua ìò to Īa kahu he māìta pōnionio.
30 Enā tokoùa ènata e tekatekao me Īa :
o Moite, o Eria âua tokoùa.
31 U haaìtetia âua i òto o te kāìè,
e teào atu teào mai âua me Ietu i ùna o to Īa taha atu
me i te ao nei ta Īa e haapao i Ierutaremi.
32 U matakau Petero atii me to īa mou hoa.
Atià, e matavaa ana âtou, ua ìte i te Kāìè o Ietu.
Ua ìte âtou me i nā ènata tokoùa ma to Īa kaokao.
33 Ohia e hano hua mou ènata e pae me io Ietu,
u peàu Petero ia Ietu : « E Tuhuna e,
he mea kanahau no tātou înei. A ato tātou e toù faèkā :
e tahi no Òe, e tahi no Moite, e tahi no Eria. »
Aòè Petero i ìte e aha ta īa e peàu atu.
34 E teào ana atii, ua tihe mai te ao e fāfī ana ia âtou.
35 Enā me te èo me io he àni mai, e peàu ana pēènei :
« O Īa nei ta ù Tama, te i vaetia e au,
a hakaòno ôtou ia Īa. »
36 I te ava i koè ai te èo, ua tū Ietu tootahi anaè.
O te tau kouâ te i ìte i hua mea nei, ua mutu âtou.
Aòè âtou i faì atu i te ènata e tahi, i te mea ta âtou i ìte.
TOMINIKA E TOÙ O TE AVA HAAONE
TETAUTINA O TE HĀMANI A MOITE PEÀUTIA EHOTO 3, 1-8a.10.13-15
1 I tēia mou pō, u tiaì Moite i te naho muto o to īa motunoai,
o Ietero te inoa, tāuà no te Fenua Matiana.
U aahi Moite i hua naho muto
ma tītahi kēkē o te fenua ataha.
Ua tihe īa i te tuaivi, Horepe te inoa.
O īa te tuaivi o te Etua.
2 U haaìte te anera o te Fatu ia īa iho
i vāvena o te ahi uàuà ana, io tītahi maateitā.
Ua ìte Moite i te maateitā uàuà tāpupu.
U tiòhi mau īa : aòè te teitā e pao ana i te uà.
3 A tahi a maakau Moite : E hee au ma tītahi kēkē
no te tiòhi meitaì i tēnei mea mahaò.
No te aha aòè e pao ai te maateitā i te uà tāpupu ?
4 Ua ìte te Fatu ia Moite e haatata mai no te tiòhi meitaì.
U vevaò te Fatu Etua ia īa me i òto o te maateitā :
« E Moite, Moite e. » U haahua īa : « Eīa au nei. »
5 U peàu te Fatu pēènei :
« Aua òe e haatata mai. A taki i to òe aihū.
He fenua tapu te vahi i aò o to òe nā vaevae. »
6 U peàu hakaùa te Fatu : « O au nei te Etua o to òe motua,
te Etua o Aparahamo, te Etua o Iakopo, te Etua o Itaako. »
Ua tomi Moite i to īa mata, na te mea u haametaù īa
no te tiòhi atu i te Etua.
7 U peàu te Fatu ia Moite :
« Ua ìte au i te àì oko o to ù mataèinaa,
te i haamōèhutia i te Fenua Ekipito.
Ua òno au i to īa èo taaàu me te uēuē
i mua o te tau vivini pē e haamākaka atu ia īa.
8 Ua iho mai nei au no te haapohoè i to ù mataèinaa
me i te ìma o te poì Ekipito, te haafiti ia īa
me io tēnei fenua i te fenua fātea, fenua tapavaù,
fenua i èià e tahe te vaiū me te mānini tikauè ;
te fenua Kanaana,
10 I tēnei, a hee òe. E pahi au ia òe io te hakaìki Faraone.
E haafiti òe me i te Fenua Ekipito i to ù mataèinaa,
te tau tama a Iraene. »
13 U peàu Moite i te Fatu Etua : " E hee hoì au.
E âvei au me te tau tama Iraene e peàu aa ia âtou :
« O te Etua o to ôtou tupuna te i pahi mai ia ù io ôtou.
Anoa e ūiūi mai âtou pēènei : O ai to Īa inoa ?
E aha ta ù e haahua atu ? »
14 U peàu te Etua ia Moite : « O IAVE, tu ù inoa.
O īa hoì : O AU TĒIA TA ÔTOU E ÌTE AI.
Pēènei ta òe peàu atu i te tau tama Iraene :
O AU te i pahi mai ia ù, io ôtou. »
15 U peàu hakaùa te Etua ia Moite :
« A haaìte atu i te tau tama Iraene pēènei :
Te Fatu Etua o to ôtou tau tupuna,
te Etua o Aparahamo, te Etua o Itaako, te Etua o Iakopo.
O AU te i pahi mai ia ù, io ôtou.
Oianei tu ù inoa ma te tau èhua paotū.
Oianei te inoa e apa ôtou ia ù
no te pakaihi mai ma te tau tai a tihe anatu. »
TARAMO 103 (102) 1-2, 3-4, 6-7, 8.11
He moû he kāòha anaè te Fatu. 103, 8
1 E tu ù kuhane, a haameitaì i te Fatu,
Me io he koekoe a haameitaì i to Īa inoa peàto.
2 A haameitaì i te Fatu, e tu ù kuhane,
Aua e māhaè e tahi o to Īa vaièitina.
3 U vevete te Fatu i to òe tau mikeo paotū.
U haakoè te Fatu i te memae o to òe tino.
4 Na Īa i taki ia òe me io te anatupapaù.
Na Īa i vahi ia òe i te kāòha me te hinenaò.
6 E hana te Fatu vāàna i te toitoitina.
O Īa te vevaò o te poì i haamākakatia.
7 Ua faì atu i to Īa maìmaì ia Moite,
U haaìte i to Īa tau hana mana ia Iraene.
8 He moû, he kāòha te hakatu o te Fatu.
U haatevee i to Īa pekē : ua pī i te kāòha.
11 Me he tiketike te àni ma ùna o te fenua,
Ua mana to te Fatu kāòha i uē i te poì haatià.
TETAUTINA O TO MUA HĀMANI I TO KORINETIA 10, 1-6.10-12
E tu ù tau tunane tuehine.
1 E too ta ù e haamaakau ia ôtou i te mea i pao nei
u haauu Moite i to tātou tau tupuna i vaho me io te Fenua Ekipito.
Ua aahitia âtou paotū e te ao tapu.
Ua hee âtou paotū ma vāvena o te Tai pūkiki.
2 U haatahi âtou paotū me Moite ma òto o te papatema
io he ao tapu me te tai.
3 Ua kai âtou paotū i te oà e tahi, he oà kuhane.
4 Ua inu âtou paotū i te inu kuhane,
ua inu hoì âtou me io te punavai
e tahe ana me io he motukeâ
te i ūtaì ia âtou i tēia vahi, tēia vahi.
O te Kirito hua motukeâ.
5 Atià, aòè te nuitina o âtou i haaèka i te Etua,
no èià ua naò âtou,
u tavavā i te fenua ataha to âtou tino tūpāpaù.
6 Ua pao hua mea no te haamāàma ia tātou :
he hakatu hoì no te hakako mai :
umoì tātou e kōhoà pē me he mea to tātou tau tupuna.
10 Aua ôtou e kōhumuhumu i te Etua,
me he mea o tahipito o âtou : U kukumitia âtou.
11 O īa te mea i patutia io he Hāmani tapu
no te haamāàma mai ia tātou,
te i pohoè nei i te ava paona o te aomāàma.
12 No èià, o te ènata e haakāìè mēìa ua tū toitoi īa,
a tiòhi meitaì oa topa pu.
HĪMENE VĀNANA cf.51, 14
E te Fatu e, a haafāìu òe i to mātou koekoe i to Òe vevaò mai. A haakoakoa ia mātou to Òe haapohoè mai.
EVANERIO O IETU KIRITO VĀÀNA E RUKA 13, 1-9
1 I hua ava, ua tihe mai io Ietu te mou ènata te i àve
i te teào hou o to Karirea poì, kukumitia e Pinato.
U haakāvohi īa i to âtou toto
me to te tau hēana i ùtunatia e âtou.
2 U haahua atu Ietu ia âtou pēènei :
o hua poì Karirea te i haamemaetia nei,
e mikeo nui atu to âtou i tahipito poì Karirea kē ?
3 Aòè hoì, ta ù peàu ia ôtou.
Atià, anoa u te e fāìu ôtou i te koekoe,
e hinatia ôtou paotū hua mea aneiho.
4 Akoè à, te tīònohuu ma toovaù ènata i haapaìhatia
ma aò o te mōuna Tiroe i vāvahi haahutararātia,
e auana oti ta ôtou u nui atu to âtou mikeo
i to te tau ènata paotū o Ierutaremi ?
5 Aòè hoì ta ù peàu ia ôtou.
Atià anoa u te e fāìu ôtou i te koekoe,
e hinatia ôtou paotū hua mea aneiho.
6 U peàu Ietu i tēnei teào haapupuà : « Enā te ènata
me te tumu fiko tanutia i òto o to īa pāpua vino.
Ua hano īa i te puku kohi, aòè i koàna mai.
7 U peàu īa i te ènata hana io te pāpua vino :
« A toù èhua i tēnei e hano pu au i te puku
me io hua tumu fiko.
Aòè he puku i koàna mai. A kokoti !
No te aha to īa kai pu i te mōmona o te èpo ? »
8 Atià, u haahua te ènata hana :
« E te hakaìki e, avai i tēnei èhua hakaùa.
O īa te ava no te keì i te èpo vii pu o te tumu,
no te haatapavaù me te tūtae.
9 E hua nehe i te puku. Akoè à, e kokoti òe ! »
TOMINIKA E FĀ O TE AVA HAAONE
TETAUTINA O TE HĀMANI A IOTUE 5, 10-12
10 Ma muì ua taha te mataèinaa Iraene
io tītahi kēkē o te vaitahe Ioritane,
ua noho âtou i te kaavai o Kikara te inoa.
Ma te pō ònohuu ma fā o te māhina, ia èva te â,
pii te pāpuafaè Ieriko, ua fai âtou i te Koìna Pakate.
11 I te oìoì o te Koìna Pakate,
ua kai âtou i te tau puku o hua fenua :
te faraoa haapupuhi koè, te tau kāhui faraoa tunupataatia.
12 Me i tēnei â, aòè te Manahū e iho mai hakaùa me io he àni,
mēìa e kai nei âtou i te tau puku o hua fenua.
I hua èhua ua kai te tau tama a Iraene
i te tau puku kohitia io he fenua Kanaana.
TARAMO 34 (33) 2-3, 4-5, 6-7
A mai. A ìte me ôtou i te vaièitina o te Fatu. 34, 9
E haameitaì au i te Fatu ma te tau a paotū.
E hahi au i te Fatu i te tau vahi ia ôtoa.
Io te Fatu anaè to ù haakāìè.
A òno mai te poì veve, a koakoa me âtou.
A haatiketike ôtou me au nei i te Fatu.
A haakāìè tātou nātoa i to Īa inoa.
Ia ùmihi au i te Fatu, u tiòhi mai Ia.
U haakoè Ia i to ù tau pūpūkina ia ôtoa.
O te ènata e feau io te Fatu, e pupuà īa :
He moû, hakāìna koè to īa mata.
Ia taaàu te ènata veve, u haaòno te Fatu,
Me to Īa haapohoè me i te mea haametaù mai.
TETAUTINA O TE ÙA O TE HĀMANI I TO KORINETIA 5, 17-21
E tu ù tau tunane tuehine,
17 Me haatahi te ènata me te Kirito,
ua ìò hua ènata me he mēmau pēpenahoutia.
Ua koè te hakatu pohoè kākiu.
U tīmata te hakatu pohoè hou.
18 Me io te Etua hua mea paotū i uē ia mātou.
Ua ao te Etua e âvei mātou me Īa, ma io te Kirito.
I tēnei ua vae te Etua ia mātou no te tāvini ia Īa
ma te haamevaha i te haatutukitina
o te tau ènata paotū me te Etua.
19 I òto o te Kirito, o te Etua aneiho te i haaâvei
i te tau ènata paotū me Īa.
U haakoè te Etua i to âtou tau mikeo.
U tuu ia mātou he tau Àpotoro no te haamevaha
i hua teào o te haaâveitina.
20 Ua ìò mātou he tau keèe no te Kirito.
O te Etua iho te i oonaì ia ôtou ma òto to mātou fafa.
I te inoa o te Kirito u toutaki mātou ia ôtou :
a ao ôtou e haaâvei te Etua ia ôtou me Īa.
21 Ua piò koè, mikeo koè te Kirito.
Atià i uē ia mātou, u haatopa te Etua
i te tuki pē o te mikeo i ùna o Īa.
Ma èià i òto o te Kirito,
u toitoi mātou nei i mua o te Etua.
HĪMENE VĀNANA Ta.103, 8.13
He moû he kāòha te hakatu o te Fatu ; me he moû o te motua i ta īa tama.
EVANERIO O IETU KIRITO VĀÀNA E RUKA 15, 1-3.11-32
I tēia mou pō,
1 u haatata mai io Ietu te tau pupurikano
me te poì mikeo paotū no te hakaòno i to Īa teào.
2 U kōhumuhumu te tau Fariteo me te tau tuhuna teào,
e peàu ana :
« U āpuu meitaì te ènata nei i te poì mikeo,
ua kai īa me âtou. »
3 U peàu Ietu ia âtou i tēnei teào haapupuà :
11 « Enā te ènata me na tama tokoùa.
12 U peàu te teina i to īa motua : E to ù motua e,
a tuu mai i te hope taetae e ìò mai ia ù. »
Ua tuha te motua ia âua i to īa taetae.
13 Mou pō i muì iho, u haapuke te teina i to īa taetae paotū,
me to īa hee atu i te fenua memao.
I èià, ua tūtā pu īa i to īa taetae e pohoè ana māàma koè.
14 Ia pao to īa taetae i tūtā pu, ua one nui io hua fenua.
Aòè he mea to īa no te kai.
15 Ua hano īa e tāvini i te ènata o hua fenua,
te i pahi atu ia īa i te vahi teitā no te tiaì i te tau puaa.
16 U maìmaì īa e kai haamaòna i te tau puku e kai nei
te tau puaa, atià u te e tuu atu te ènata e tahi ia īa.
17 E kaituto ana io he koekoe, u peàu īa :
« Toofia ènata hana io tu ù motua te i kai haamaòna.
He mea nui te poofaraoa i toe.
O au à înei, ua mate au i te one.
18 E tū au me te hee atu io to ù motua.
E peàu au ia īa : « E tu ù motua e,
ua teka au io te Etua io he àni. Ua teka au io òe.
19 Aòè e hei ia ù e apatia he tama na òe.
A āpuu mai me he ènata hana e tāvini ia òe. »
20 No èià, ua tū īa, ua hua io to īa motua.
Ia tihe īa i te vahi memao me io he faè,
ua ìte te motua ia īa. E mehea ana te motua,
u tohuti io te tama, ua hopu mau me te honi ia īa.
21 U peàu te tama : « E te motua e,
ua teka au io te Etua io he àni. Ua teka au io òe.
Aòè e hei ia ù e apatia he tama na òe. »
22 Atià, u peàu te motua i to īa tau tāvini :
A àve mai ponihoo i te kuà o te kahu òoa,
a haauhi ia īa. A kokomo te koro io to īa ìma.
A oka i te aihū io to īa nā vaevae.
23 A hano mai i te pifa taùtaù me te kukumi.
A kai tātou, a haaèkaèka.
24 Ua mate hoì tu ù tama nei, enā u pohoè hakaùa.
Ua naò tu ù tama, enā u koàna mai. »
U tīmata âtou i te koìna haaèkaèka.
25 Enā io te vahi teitā te tama hāmua o hua ènata.
I te ava ua hua īa me to īa haatata io he faè,
ua òno īa i te tanitina o te pū me te haka.
26 U vevaò īa i tītahi tāvini.
Ua ūi atu e aha te hakatu o tenā mea.
27 U peàu te tāvini ia īa : « Ua hua mai to òe teina.
U kukumi to òe motua i te piha taùtaù
mēìa i koàna mai, tino feòfeò to īa. "
28 U pekē nui te tama hāmua.
Aòè īa i maìmaì e tomo io he faè.
Ua uu i vaho to īa motua, u vevaò mai e toutaki ana ia īa.
29 Atià, u haahua te tama i to īa motua :
« E fia èhua i tēnei e tāvini au ia òe ?
Aòè au i pūtuì e tahi anaè o to òe tau teào.
Koè nui to òe tuu mai e tahi kaiū keukeu
no te haaèkaèka me to ù tau hoa.
30 Atià, me hua mai ta òe tama nei,
te i tūtā pu i to īa taetae me te tau vehine mako,
u kukumi òe i te pifa taùtaù. »
31 U peàu te motua ia īa :
« E tu ù òna tama e, ua noho òe anatu me au.
Na òe aneiho to ù tau taetae paotū.
32 Atià, he mea hei te tuha i te kainamau me te haaèkaèka,
mēìa i to òe teina : ua mate nui īa, u pohoè nei ;
ua naò īa, u koàna mai nei. »
TOMINIKA E ÌMA O TE AVA HAAONE
TETAUTINA O TE PEROFETA ITAIA 43, 16-21
16 Oianei te teào a te Fatu,
te i kānea i te aanui ma no he tai,
i te avaputa ma vāvena o te vaitahe oko.
O Īa te i hakapahi no te tōua
i te tau ihorave me to âtou pāriri,
i te tau pūpūkape me te nuitina o te tau toa.
17 Eīa âtou u hinatia, moe ana, aòè âtou e tū hakaùa.
Ua mate nui âtou paotū me tītahi àma tīnaìtia,
u kukumitia âtou me tītahi ûiki.
8 Oia nei te teào a te Etua :
« Umoì ôtou e māmaakau i te tau tai kākiu.
Umoì e moemoeā i te tau mea i pao atu nei.
19 Enā e pēpena au i te aomāàma hou.
Aòè ôtou e ìte nei ia īa ? U tata èka.
E kānea au i te aanui ma vāvena o te fenua ataha.
E haatahe au i te vai io te vao moô.
E haakāìètia au e te tau ânimara kaimomoke na te mea,
e haatahe au i te vai io te fenua ataha,
te tau vaiā io te tau taha moô
etià e inu to ù mataèinaa ta ù i vae.
21 E hahi i tu ù kāìè hua mataèinaa vaetia e au. »
TARAMO 126 (125) 1-2b, 2c-3, 4-5, 6
He hana mahaò hoì ta te Fatu i uē ia mātou, Ua tihe to mātou ava no te haakoìna koakoa. 126,3
1 Ia haahua mai te Fatu ia mātou,
Ia hua mai i Tiona mātou poì mōèhu,
Me he ènata moemoeā to mātou hakatu.
2 Ua pī to mātou fafa i te katahehe.
U taaàu mātou i te taa koakoa.
A tahi a mevaha te teào io te poì êteni :
Auē, te hana mahaò ta te Fatu i hana no âtou.
3 He hana mahaò hoì to Īa i uē ia mātou,
Ua tihe to mātou ava no te haakoìna koakoa.
4 E te Fatu e, a haahua ia mātou,
Me he mea te vaitahe io te fenua ataha.
5 E tūtū te ènata i te kākano e uēuē ana.
Ua kohi īa i te tau puku, me te koakoa.
6 E taha īa, taha atu e tūtū i te kākano,
Me te uē me te mateteka.
Ua hua īa, hua mai me te koakoa,
E àve ana i te pūpā faraoa.
TETAUTINA O TE HĀMANI A PAURO PEÀTO I TO FIRIPO 3, 8-14
E tu ù tau tunane tuehine.
8 U haapākeka mai hoì to ù hakatu pohoè òmua,
he mea tupepaka no ù te tau mēmau paotū.
Ma ùna o nā mea hakatahi, u haataetae au
te haapii me te Kirito Ietu, to ù Fatu.
U haahuìkē au i to ù hakatu pohoè.
U titii au i to ù tau hana òmua paotū.
Ua ìò âtou no ù me he kaù, vāàna e haapii au me te Kirito,
9 me te pohoè i òto o te Kirito me he ènata toitoi noa,
aòè te toitoitina ta ù i koàna mai ma te aotahi atu
i te Ture, atià ma to ù haatià i te Kirito,
te toitoitina hoì ta te Etua i vaièi mai,
o te haatià to īa tumu.
10 Ma èià, e haapii au me te Kirito
me te àva atu i te mana o to Īa Tūhakaùatina.
Ma èià, e àva atu au i to Īa memae
e haatūtū ana me Īa i òto o te matena.
11 Ma èià, e tetaì au e pohoè hakaùa
me i vāvena o te huaa mamate.
12 Aòè to ù peàu u koàna mai nei ia ù te meitaì èka,
akoè à he ènata toitoi noa au.
Atià, ua tohe au me he ènata tīkakai
e hano e haakoàna mai te tuki meitaì.
O īa na ta Ietu Kirito iho i hana etià e ūtaì au ia Īa.
13 E tu ù tau tunane tuehine,
aòè au e kaituto ua ìò ia ù te tuki.
O īa anaè te mea e hano au : e avai pu ana i te mea i pao ai,
a tiòhi mau i te mea i mua atu.
14 U tohuti au tihe i te hakahia etià e ìò ia ù te tuki,
o īa hoì te vevaòtina o te Etua no te pohoè io he àni,
vaièitia mai i òto o te Kirito Ietu.
HĪMENE VĀNANA Ta. 130,7
Ohia io te Fatu te Kāòha, te Haapohoètina hou anatu.
EVANERIO O IETU KIRITO VĀÀNA E IOANE 8, 1-11
I tēia mou pō,
1 ua fiti Ietu i ùna o te tuaivi Oriveti.
2 Ma te oìoì tika, ua hua Ietu i òto o te Hiero.
U putuputu te faètoa nui vii pu o Īa.
U kaapee Ietu me to Īa hakako ia âtou.
3 Na te tau tuhuna teào me te tau Fariteo
u aahi io Ietu i te vehine,
te i ìtematatia u haapē i te mātirimonio.
4 U haatū âtou i hua vehine i vāvena ahau o te faètoa.
U peàu âtou pēènei : « E te Tuhuna e,
enā te vehine i ìtetia u haapē i te mātirimonio.
5 U peàu Moite i òto o te Ture,
a pehi me te keâ a haamate i tēia tau vehine.
E aha to òe maakau ? »
6 U peàu âtou i tēnei teào mea haaveke ia Ietu
me te koàna mai ia âtou te piò no te hakatio atu.
Atià, e oha ana Ietu i aò,
ua patu Īa me te manamanaìma i ùna o te tuaèpo.
7 Ohia ua tohe âtou i te ūiūi atu ia Īa,
ua maò Ietu me to Īa peàu :
« O te ènata mikeo koè, a pehi i to mua keâ ! »
8 Ua oha hakaùa Ietu
me to Īa patu iho i ùna o te tuaèpo.
9 Ia òno âtou i hua teào, ua hee âtou ;
ua hee te hoa, ua hee te hoa.
O te tau kōkooūa te i hee òmua ìka.
Ua noho Ietu anaè me te vehine e tū ana io he tohua.
10 A tahi a maò Ietu me te peàu :
« E te vehine, i hea âtou ?
Aòè e tahi i toe no te hakatio ia òe ? »
11 U haahua te vehine : « Aòè e tahi, e te Fatu e. »
U peàu Ietu : « Aòè e hakatio me au ia òe.
A taha atu. Umoì e mikeo hakaùa. »
TOMINIKA MANAMANA TEITĀ
1 - TE TAHATINA PURE ME TE MANAMANA TEITĀ
EVANERIO O IETU KIRITO VĀÀNA E RUKA 19, 28-40
I tēia mou pō,
28 ua taha Ietu me to Īa tau kouâ,
e fiti ana i Ierutaremi, i mua Ietu.
Ohia ua tihe âtou tata èka me Petefahe me Petania,
i pii te tuaivi Oriveti, u pōpahi Ietu i nā kouâ tokoùa,
30 e peàu ana ia âua :
« A hee atu ôùa io te pāpuafaè i mua nei.
Ia tomo ôùa i òto, e koàna mai ia ôùa
te punua pūriki humutia,
aòè i pikitia e te ènata e tahi ma ùna o īa.
A vevete ia īa me te aahi mai.
31 Me ūi mai tītahi : No te aha e vevete ôùa ia īa ?
a peàu ôùa : E hana ta te Fatu me īa. »
32 Ua hee atu nā keèe me te koàna mai ia âua
te mea vāàna ta Ietu i peàu.
33 Ohia u vevete âua i te punua pūriki, u peàu to īa fatu :
« No te aha u vevete ôùa i te pūriki ? »
34 U peàu âua : « E hana ta te Fatu me īa. »
35 U aahi âua i te pūriki io Ietu.
Ua tuu ma ùna o hua pūriki i to âtou kahu ;
ma hope, u haapiki ia Ietu ma ùna iho.
36 Ohia u taha atu Ietu,
u auau te mataèinaa i to âtou kahu i no he aanui.
37 Ia tau tata èka Ietu me te aanui
no te iho me i ùna o te tuaivi Oriveti,
u taaàu me te èo oko te faètoa nui o te tau kouâ,
e hahi ana i te Etua mēìa i te nuitina
o te tau hana mana ta âtou i ìtemata.
U peàu âtou pēènei :
38 « A meitaìtia te tihe nei ma te inoa o te Fatu.
O Īa nei te Hakaìki nui.
Te moû io he àni. Te kāìè i ùna nui. »
39 Enā te mou Fariteo, me i vāvena o te faètoa,
te i peàu ia Ietu : « E tuhuna e, a oonaì i to òe kouâ ! »
40 U haahua Ietu : « U peàu hoì au ia ôtou :
Anoa ua mutu âtou, e taaàu te tau keâ. »
2 - TE PUREMETA
TETAUTINA O TE PEROFETA ITAIA 50, 4-7
4 Ua tuu mai te Etua, to ù Fatu,
i te èo o te ènata aotahi, te èo o te kouâ.
Ma èià, e koàna ia ù te toko i te ènata kuhane koè.
5 I tēia pōpōuì, i tēia pōpōuì, u haaaa mai ia ù
te teào o te Etua,
etià e òno au me he ènata aotahi, me he kouâ.
6 Na te Etua i pepeù mai i to ù puaìna.
Aòè au e patitoo, aòè au e pūtuì.
Ua tuu au i to ù tua i te tau ènata e tā ia ù.
Ua tuu au i tu ù papaìna i te tau ènata
e huhuti i te huu o to ù kumikumi.
Aòè au i pāpua i to ù mata me io te ènata, e haamaio mai,
me te tuha mai i te anuanu io ù.
7 O te Fatu tu ù pātoko. Aòè au e hina.
No èià, u haafeò au i to ù koekoe, me he keâ to ù mata.
Aòè au e hakāìna.
TARAMO 22 (21), 8-9, 17-18a, 19-20, 22c-24a
He ènata toomanu au nei, e te Fatu e, a haapohoè mai.
cf. Itaia.38, 16-17
Akoè à :
Tu ù Etua e, tu ù Etua e, umaha to òe titii mai ia ù. 22, 2
8 He ènata toomanu ia tiòhi mai âtou.
U haameemee te poì paotū e kāùe i te upoo :
9 U haatià īa i te Fatu, na Īa te haapohoè mai.
O te Fatu to ia hoa, a haapohoè hoì ia īa.
17 Nui te tau nuhe i muimui vii pu o au nei.
Ua hano tītahi pūpū ènata pē e tuàki ia ù.
18 U tīputaèe âtou i tu ù îìma me tu ù vaevae,
U koàna ia ù te tetau i tu ù tau ivi hakatahi.
19 U hopehope âtou i to ù kahu no âtou.
U haakai âtou i to ù kahu uhi pu.
20 E te Fatu e, umoì Òe e haamemao me io ù.
O Òe to ù ìi, a haakoi no te toko mai.
22 U haaòno nui au i to Òe inoa
23 I mua o to ù tau tunane tuehine.
U haahuaèkaèka atu au ia Òe,
I vāvena nui ahau o te motuhana.
24 A hahi i te Etua, te poì e haatià ia Īa.
TETAUTINA O TE HĀMANI A PAURO PEÀTO I TO FIRIPO 2, 6-11
E tu ù tau tunane tuehine,
6 O te Kirito Ietu hakatu tiàtohu me te Etua.
Aòè Īa e haamau kaikino i te haatūtaì me te Etua.
7 U haakoè pu ia Īa iho e too ana i te hakatu o te tāvini,
ua ìò Īa hakatu me te tau ènata.
8 E haaènata to Īa, ia tiòhi atu,
u haapāpaù iho ma te aotahi atu,
e aotahi ana tihe i te matena, te matena hoì uo he peka.
9 Oia te tumu i haatiketike anaè ai te Etua ia Īa,
me te apa atu i te inoa ma ùna o te inoa ia ôtoa, ia ôtoa.
10 Etià, ia tani te inoa o Ietu, e noho muò paotū
to te àni, to te fenua, to havaiki.
11 A faì anamai te tau èo paotū :
« He Fatu o Ietu Kirito, no te haakāìè i te Etua Motua. »
HĪMENE VĀNANA Firipo. 2, 8-9
I uē ia tātou, u haapāpaù iho Ietu Kirito, ma te aotahi atu i te hīa o to Īa Motua, tihe i te matena, te matena hoì o te peka. Oia te tumu i haatiketike anaè ai te Etua ia Ietu, me te apa atu i te inoa ma ùna o te tau inoa ia ôtoa.
TE AVA MEMAE O IETU KIRITO VĀÀNA E RUKA
22, 14 -- 23, 56
14 Ia tihe i te hora, ua moe noho Ietu io he tapukai,
enā me te tau Àpotoro me Īa.
U peàu Ietu ia âtou :
+ « U kōhoà nui au e kai i tēnei Pakate me ôtou,
ma mua e memae au.
16 Na te mea, u peàu au ia ôtou,
koè nui au e kai hakaùa i te Pakate
tihe atu e haapaotia i to he Patirēia o te Etua. »
17 I muì iho, ua tuutia te ipu ia Īa.
U haahuaèkaèka Ietu me te peàu :
+ « A too i te ipu, a tuha ia ôtou.
18 U peàu hoì au ia ôtou :
me i tēnei, koè nui au e inu i te puku o te tumu vino
ma mua e tihe mai te Patirēia o te Etua. »
19 I muì iho, e too ana Ietu i te faraoa,
ua vahi me te tuu atu i to Īa tau kouâ, e peàu ana :
+ « O tu ù tino tēnei, haaìòtia no ôtou.
A hana ôtou atii mea haamamaakau mai ia ù. »
20 Me hua hakatu no te ipu, ma hope o te mau, e peàu ana :
+ « O tēnei ipu, he Piimau hou, i òto o tu ù toto,
te i tahe aè no ôtou. »
21 Atià, e noho me au nei io te tapukai,
e ènata te i haaìò ia ù ma to īa iho îìma.
22 E hee hoì te Tama a te ènata,
vāàna i te mea i haaheitia òmua.
Atià, mea ìno te ènata te i haaìò ia Īa. »
23 Ua ūiūi atu ūiūi mai âtou nātoa, te hoa i te hoa :
o ai ò a me i vāvena o âtou te i hana i hua hana.
24 U tōtohe atu tōtohe mai âtou no te ìte
o ai me i vāvena o âtou te ènata tiketike atu.
25 U peàu Ietu ia âtou :
+ « Te tau fatu i haatono i to âtou vivinitina,
o te tau hakaìki i haatee i te tau mataèinaa êteni.
U maìmaì âtou e apatia te inoa Fatuvaièi.
26 Aua atii no ôtou.
A tūtū te tiketike i vāvena o ôtou me te ènata hou atu.
A tūtū te hakaìki me te ènata tāvini.
27 O ai hoì te ènata tiketike atu ?
Te ènata e noho io te tapukai,
akoè à te ènata e tāvini atu ?
Aòè te ènata e noho i te tapukai ?
Atià o au nei, i vāvena o ôtou,
ua tūtū au me te ènata e tāvini atu. »
28 « O ôtou te huaa te i tohe mau anatu me au nei,
e aha à te nuitina o te tau kōfii e haahiiveke mai.
29 Me he mea ua vaièi mai to ù Motua i te Hakāìkitina,
hua mea aneiho e vaièi atu au ia ôtou i te Hakāìkitina,
30 etià e kai, e inu ôtou e noho â io to ù tapukai
i òto o to ù Patirēia.
E kaapee ôtou i ùna o te tau nohona haakāìè
no te vivini i to Iraene ònohuu ma ùa ati. »
31 « E Timone, Timone e ! Enā u vevaò mai Tatane
ia ôtou, e hano hoì e tūtū ia ôtou
me he mea ua tūtūtia te kākano faraoa.
32 Atià, ua pure au i uē ia òe, oa koè to òe haatià.
O òe à, ia hua mai òe io ù,
a haaoko i te koekoe o to òe tau teina. »
33 U peàu Petero ia Ietu :
D « E te Fatu e, e ūtaì au ia Òe
io he faèhumu akoè à tihe i te matena. »
U peàu Ietu :
+ « E Petero e, u peàu au ia òe :
i tēnei pō, ma mua e tani te moa,
e faì atu òe no te ìte koè ia ù.
U titii òe ia ù, e toù titiitina. »
35 U peàu Ietu ia âtou :
+ « I te ava ua pahi atu au ia ôtou moni koè,
kete koè, aihū koè, e aha te mea e toe ia ôtou ? »
U haahua âtou :
D « Aòè he mea. »
36 U peàu Ietu ia âtou :
+ « I tēnei, te ènata me te kete moni, a too mai.
Atii te ènata me te kete avaina taetae, a too ia īa.
Ia koè te kohetā i tītahi, a hoko atu hua ènata
i to īa kahu uhi pu me te hoko mai i te kohetā.
37 U peàu hoì au ia ôtou :
enā e pao ai te mea i patutia i ùna o au nei.
U haatahi âtou ia īa me te poì mākaka.
Ma te tiàtohu, u tata èka te paona o to ù hana tumu. »
38 U peàu âtou :
D « E te Fatu e, eīa înei na kohetā e ùa. »
U haahua Ietu :
+ « Etue ! »
39 Ua uu Ietu i vaho me to Īa fiti atu
io he tuaivi Oriveti me he mea ua hani Īa.
Ua ūtaì te huaa kouâ ia Īa.
40 Ia tihe Ietu io hua vahi, u peàu ia âtou :
+ « A pure, oa hemotia ôtou i te mōtii. »
41 Ua hee Īa memao me io âtou,
me he e tahi pehitina keâ.
Ua noho muò me to Īa pure, e peàu ana :
42 + « E te Motua e, me maìmaì Òe,
a haamemao me io ù i hua ipu.
Atià umoì to ù maìmaì, a tae to Òe. »
43 Ua ìtetia te anera me io he àni mai, te i haaoko ia Īa.
44 Ua hemo Ietu i te haametaù òomi i te menava
me to Īa haanui atu i te pure.
Ua tahe to Īa hānia,
me he patapata toto e topa ana ma ùna o te tuaèpo.
45 E hakaea ana i te pure, ua tū Ietu.
U haatata mai me te tau kouâ.
U koàna ia Īa e hīhiamoe ana âtou mēìa i te kuhane koè.
U peàu Ietu ia âtou :
+ « E aha ? U hiamoe ôtou ?
A aa, a pure, oa hemotia ôtou i te mōtii. »
NO TE HUMUTINA O IETU
47 Aòè i pao èka hua teào, ua tihe te faètoa.
U aahitia âtou e tītahi
me i vāvena o te Tīònohuu ma tokoùa, o Iuta te inoa.
U haatata mai īa me Ietu, e hano honi ia Īa.
U peàu Ietu ia īa :
+ « E Iuta e, ma te honi mai
e haaìò òe i te Tama a te ènata ? »
49 E ìte ana te huaa vii pu o Ietu
i te mea e tihe mai, u peàu âtou :
+ « E te Fatu e, e tā mātou me te kohetā ? »
50 Ua tā tītahi o âtou i te tueni o te tāuà nui,
me te haamotu i to īa puaìna ìma oko.
U pohā te èo Ietu me te peàu :
+ « Avai pu. Ua àva. »
U haapipii Īa i te puaìna u haameitaì ia īa.
52 I muì iho, u peàu Ietu i te faètoa te i tihe mai io Īa,
te mou tāuà nui me te tau vivini
o te pūpū mutoi tiaì o te Hiero me tahipito kōkooūa,
u peàu Ietu pēènei :
+ « He ènata mākaka au ?
No te aha ua hano ôtou ia ù
me te kohetā me te tau pooâkau ?
53 I tēia â, i tēia â, i vāvena o ôtou au nei io he Hiero.
Aòè ôtou i popoki ia ù.
Atià, oianei te ava i haaheitia no ôtou.
Oianei te ava ua mana te kuhane ìno te i hana i te pō."
NO TO PETERO TITIITINA
54 U popoki âtou ia Ietu. U aahi atu
me te haauu i to he faè o te tāuà nui.
Ua ūtaì Petero me i te vahi memao.
55 U haauà âtou i te ahi io te pāpua
me to âtou kaapee nātoa vii pu.
U kaapee me Petero i vāvena ahau o âtou.
56 Ua ìte te vehine tueni ia īa,
e kaapee ana pii o te ahi uà tāpupu.
U tiòhi mau te vehine i to īa mata me te peàu :
A « O īa nei tītahi me hua ènata. »
57 U haakoè Petero, e peàu ana :
D « E te vehine, aòè au i ìte ia Īa. »
58 Ava poto ma hope, u peàu tītahi ènata kē,
e ìte ana ia Petero :
F « O òe tītahi me i vāvena o âtou. »
U peàu Petero :
D « E hoa e, aòè aneiho au. »
59 E tahi hora uanei ma hope,
u tōtohe iho te èo kē e peàu ana :
F « Ma te tiàtohu, ua kē tēnei ènata me Īa.
He ènata Karirea hoì. »
U peàu Petero :
D « E hoa e,
aòè e vivini nei au i ta òe i peàu mai. »
E teào ana Petero pu anamai, ua tani te moa.
61 E fāìu ana te Fatu, u tiòhi mau ia Petero.
A tahi a haamaakau īa i te teào a te Fatu
te i peàu ia īa : « I tēnei pō, ma mua e tani te moa,
u titii òe ia ù : e toù titiitina. »
62 Ua uu Petero i vaho. Ua nui to īa mateteka.
NO TE HAAMEE IA IETU
63 Atià, u haamaio te poì tiaì ia Ietu.
Ua pehipehi âtou ia Īa.
64 E tomi ana âtou i to Īa mata me te tapa,
ua ūiūi atu ia Īa, e peàu ana :
F « A perofeta mai. O ai òa te i pehi ia òe ? »
65 Ma te nuitina o te tau pona kē, ua paha âtou ia Ietu.
NO IETU I MUA O TE TUNETERI
66 I te pōpōuì tika, u putuputu mai te motuhaka
o te tau kōkooūa o te mataèinaa,
te papa tāuà nui, te tau tuhuna teào.
U aahi âtou ia Ietu i mua o to âtou Tuneteri.
U peàu âtou :
F « Anoa o òe te Kirito, a faì mai. »
U haahua atu Ietu :
+ « Me faì atu au ia ôtou, aòè ôtou e haatià.
68 Me ūi atu au ia ôtou, aòè ôtou e haahua mai.
69 Atià à, me i tēnei, e tānoho te Tama a te ènata
i te ìma oko o te Etua mana nui. »
U peàu âtou nātoa :
F « O òe te Tama a te Etua ? »
U haahua Ietu :
+ " O ôtou aneiho te i peàu : o au nei. »
A tahi a peàpeàu âtou :
F « E aha te piò e hano hakaùa i te ènata no te haatiàtohu ?
Ua òno tātou aneiho me io to Īa fafa. »
NO IETU I MUA O PINATO
23,1 Ua maò te motuhana nui me to âtou aahi
ia Ietu i mua o Pinato.
2 Ua hano âtou e hakatio ia Ietu, e peàu ana :
F « U koàna mai ia mātou hua ènata
e hano haatohuì i te mataèinaa.
U haapākeka Īa i te tuu i te moni ia Ketare.
U vevaò mai ia Īa aneiho he Kirito, he Hakaìki. »
3 Ua ūi Pinato ia Ietu :
A « O òe nei te hakaìki o te tau ati Iuta ? »
U peàu Ietu :
+ « Na òe i peàu. »
4 U peàu Pinato i te tau tāuà nui me te faètoa :
A « U maakau ta ù aòè i teka tēnei ènata. »
5 U tōtohe âtou e peàu ana :
F « U haatohuì Īa i te mataèinaa,
ma to Īa hakakotina io he Fenua Iutea vii pu,
ma muì o te Fenua Karirea.
I èià u tīmata Īa, înei te paona. »
6 Ia òno Pinato i hua teào,
ua ūi atu : aha me i Karirea te ènata nei ?
7 Ia ìte Pinato o Ietu tītahi me i te fenua
i vivinitia e te hakaìki Herote,
ua pahi atu ia Īa io Herote.
I hua mou pō, ua noho aneiho Herote i Ierutaremi.
NO IETU I MUA O HEROTE
8 E ìte ana ia Ietu, u koakoa nui Herote.
He mea òa hoì u kōhoà Herote e âvei me Ietu
mēìa i te teào ua òno īa me to īa kaituto
e ìte ai ia Ietu e hana i tītahi hana mana me he hakatu.
9 Ua ūi atu Herote ia Ietu
ma te nuitina o te tau teào kē, teào kē.
O Ietu à, ua mutu : aòè i pohā to Īa èo.
10 Ua tū i eīa te tau tāuà nui me te tau tuhuna teào.
U hakatio âtou ia Ietu me te èo oko, te mata ìi.
11 O Herote kātahi me to īa pūpū kapetiaì,
u haamee, u maio ia Ietu.
Ma hope, u haauhi âtou ia Īa me te kahu naènaè
ma mua o te haahua io Pinato.
12 I hua â aneiho, u âvei Herote me Pinato,
hakatu me nā hoa tokoùa.
Òmua hoì, u tōtōua atu tōtōua mai âua.
NO IETU I MUA O PINATO HAKAÙA
13 U vevaò Pinato i te papa tāuà,
te papa hakaìki me te tiàtohu o te mataèinaa.
14 U peàu Pinato ia âtou :
A « U aahi mai ôtou i mua o au nei i tēnei ènata,
mēìa i haatohuì Īa i te mataèinaa.
O au aneiho, i mua o ôtou, u haatoitoi au i te teào.
Aòè i koàna mai ia ù te piò ta ôtou e hakatio ia Īa.
15 Atii me Herote : u haahua hoì ia Īa i mua o mātou nei.
No èià, aòè e piò to Īa no te kukumi haamate.
16 E tā au ia Īa, ma hope iho e avai au e pohoè Īa. »
17 I te ava o te Koìna Pakate, vāàna i to âtou ture,
u vevete Pinato i tītahi ènata humutia.
U taaàu âtou nātoa :
F « A haamate i te ènata nei.
A vevete mai ia Parapa. »
19 Ua humutia hua Parapa, mēìa i te tōua
te i haatohuì i te mataèinaa io te pāpuafaè.
I hua ava u kukumi Parapa i te ènata.
20 U teào hakaùa Pinato me âtou.
U maìmaì hoì īa e vevete ia Ietu.
21 Atià, u taaàu âtou, e peàu ana :
F « A pāokapeka atu ! A pāokapeka atu ! »
22 U peàu Pinato ia âtou, o te toù i tēnei :
A « E aha òa te hana mākaka o tēnei ènata ?
Aòè i koàna ia ù te piò no te haamate ia Īa.
No èià, e tā au ia Īa me te vevete ma hope mai. »
23 O âtou à, u toutaki e taaàu ana
me te ape no te pāokapeka ia Ietu.
Ua oko aè, oko aè to âtou taaàu.
24 A tahi a peàu Pinato i te teào haavā : a tae to âtou hīa.
25 U vevete īa i te ènata humutia mēìa i to īa piò :
te tōtōua me te kukumi haamate i te ènata.
O īa te i apetia e âtou.
O Ietu à, u haaìò Pinato ia Īa
vāàna i to te tau ati Iuta maìmaì.
NO TE VAANUI O TE PEKA
26 Ohia u aahi atu âtou ia Ietu,
ua toi pu i te ènata no te Fenua Kireneo,
o Timone te inoa, e hua mai ana me io te vahi teitā.
Ua tuu âtou i te peka i ùna o to īa pauhihi,
no te amo, e ūtaì ana ia Ietu.
27 Ua ūtaì ia Ietu te mataèinaa me he faètoa nui.
Enā me te tau vehine e pehipehi ana i te umauma
me te uēuē ia Īa.
28 E fāìu ana Ietu, u tiòhi ia âtou me te peàu :
+ « E te tau moî no Ierutaremi e, umoì e uēuē ia ù.
A uēuē ia ôtou aneiho me ta ôtou tau tama.
29 Enā e tihe ai te tau e peàutia :
Mamau te tau vehine mahoi.
Mamau te tau vehine tama koè,
mamau te ū i omokoètia.
30 A tahi a peàutia i te tau tuaivi : a òomi mai ia tātou.
E te tau pūkei e, a tomi mai ia tātou.
31 Anoa oianei te tuki o te âkau tee,
me he aha òa to te âkau moô ? »
32 U aahi âtou me nā ènata mākaka tokoùa,
no te haamate ia âua e tahi me Ietu.
NO TE PĀOKAPEKATINA O IETU
33 Ia tihe âtou io te vahi peàutia Ipuoo,
te Karavario ma he èo ratino,
u pāokapeka âtou ia Ietu i èià.
U pāokapekatia me nā ènata mākaka tokoùa :
tītahi i te ìma oko, tītahi i te ìma aèaè.
U peàu Ietu :
+ « E te Motua e, a vevete i to âtou piò.
Aòè âtou i ìte e aha ta âtou e hana nei. »
U tuhatuha âtou i to Ietu kahu ma te haakai.
35 Ua tū i èià te mataèinaa e tiòhi ana.
O te tau hakaìki à, u haameemee âtou e peàu ana :
F « U haapohoè Īa i tahipito. A haapohoè ia Īa aneiho
anoa o Īa te Kirito o te Etua, te Vaetia. »
36 U maio me te tau kape ia Ietu.
U haatata mai âtou me Īa no te fāinu i te vineka.
U peàu âtou :
F « O òe te hakaìki nui o te tau ati Iuta,
a haapohoè ia òe aneiho. »
38 Enā ma ùna o Ietu te mēmau i patutia pēènei :
« O īa nei te Hakaìki o te tau ati Iuta. »
NO NĀ ÈNATA MĀKAKA TOKOÙA
39 Ua paha ia Ietu tītahi o na ènata mākaka
i pāokapekatia me Īa, e peàu ana :
A « Aha o òe te Kirito ?
A haapohoè ia òe aneiho me ia maua nei. »
40 U haahua atu me te oonaì ta tītahi, e peàu ana :
A « Aòè òe e hopo i te Etua,
e aha à ua àva òe i te tuki memae e tahi me to Īa ?
41 No taua he mea toitoi :
oianei te tuki o to taua hana mākaka.
He mea kē to Īa : u piò koè Īa. »
42 U peàu me ia :
A « E Ietu e, a haamaakau mai ia ù,
i te ava e tihe mai òe me he Hakaìki. »
43 U peàu Ietu ia īa :
+ « Ma te tiàtohu ta ù peàu ia òe :
i tēnei â, o òe me au i òto o te Pāpua meitaì. »
NO TE MATENA O IETU
44 I te oatea nui, u tū toitoi te òumati,
ua topa te pō pōtano ma ùna o te fenua ia ôtoa,
tihe atu i te hora e toù i te ahiahi.
45 Ua naò te òumati.
I to he Hiero, u nehae ma vāvena te tapa
i te pā i te vahi tapu.
46 U taaàu Ietu me te èo oko.
U peàu Īa :
+ « E te Motua e, io to Òe îìma
e tuu nei au i to ù kuhane. »
Ia pao hua ponateào, ua tuu atu Ietu i te ao paona.
(A noho muò tātou e kaituto ana)
MA HOPE O TE MATENA O IETU
47 E ìte ana te keneturione i te mea paotū,
ua hahi i te Etua me to īa peàu atu :
A « Tiàtohu nui, he ènata toitoi noa tēnei. »
48 O te faètoa nui te i haaputupututia
no te tiòhi i te mea e pao ai,
ia ìtemata âtou i te mea paotū,
ua hua âtou io te faè e pehipehi ana i te umauma.
49 I te vahi memao, ua noho te tau ènata i kē me Ietu,
atii me te mou vehine
te i ūtaì ia Ietu me i te Fenua Karirea,
u tiòhi mau âtou i tēia mea paotū.
NO TE TOMITINA O IETU
50 Enā ua tihe te ènata, o Ioteve te inoa,
tītahi me io te pūpū Tuneteri, he ènata meitaì, toitoi noa.
51 Aòè īa i haakē me to tahipito maìmaì,
aòè īa i ao i to âtou hana.
U fānautia i Arimatea io te pāpuafaè o te Fenua Iutea.
U tetaì īa e tihe ai te Patirēia o te Etua.
52 U haaâvei īa me Pinato no te ape i te tino o Ietu.
53 U haaiho mai Ioteve i hua tino.
Ua tomi i òto o te ana tūpāpaù
taaitia i to he papakeâ.
Òmua, aòè te tino tūpāpaù e tahi i tomitia i òto.
54 Oia nei te â Haapeitina o te Tāpati
te i tīmata i hua ava : u pupuà te tau àma.
55 O te tau vehine
te i tihe mai me Ietu me i te Fenua Karirea,
u tiòhi mau âtou i te ana tūpāpaù
me te kōava i èià i tuutia te tino.
56 I muì iho, u hua atu âtou io he faè,
u kānea âtou i te mēmau kekaa me te mira.
U aotahi âtou i te ture o te Tāpati
ma te hakaea i te hana.
NO TE IUTĪ TAPU
TE PUREMETA AHIAHI
TETAUTINA O TE HĀMANI A MOITE PEÀUTIA EHOTO 12, 1-8.11-14
1 I te Fenua Ekipito, u peàu te Fatu Etua ia Moite
atii me ia Aarone to īa teina :
2 « A ìò te māhina nei e māhina tumu no ôtou.
O īa to mua māhina o to ôtou èhua.
3 A haaìte atu i te motuhana tiàtohu o to Iraene i te mea nei :
Ma te pō ònohuu o te māhina nei, a too ôtou
e tahi kaiū muto ma tēia faè, ma tēia faè.
4 Me he mea ua ìte ôtou aòè e àva te huaafaè no te haapao
i te kai i te muto, a haapii te faè me tītahi faè kē.
Umoì e toe te ìnaì !
5 Te muto à, a kanahau, kaiū toa, e tahi èhua.
E koàna te too i te kaiū menē hakatu me hua muto nei.
6 A haaavai tihe i te pō ònohuu ma fā o te māhinaI hua â, ia topa te pō, a kukumi i hua muto te motuhana nui
o te mataèinaa tiàtohu o Iraene.
7 A tootia i te mea toto no te paù i nā katina e ùa
me te paènutu o te avaputa o te faè i èià te kai.
8 I hua pō, e kaitia te kiko tunu pātaka,
me te faraoa haapupuhi koè me te tau teitā kavakava.
11 Pēènei to ôtou kai :
A taka i te kooi. A oka te vaevae me te aihū
Te tootoo io te ìma, a kai haakoi :
O te Pakate o te Fatu, to te Fatu Etua Tahatina.
12 I hua pō nei, e taha atu au ma vāvena o te Fenua Ekipito ;
e tā au i te tau hāmua hakatahi o te Fenua Ekipito,
me i to te ènata anamai tihe atu i to te tau ânimara. »
13 E haatopa au i te tuki pē ma ùna o te tau ètua Ekipito :
O au hoì te Fatu.
E ìò te toto mea hakatu ma ùna o te faè i èià ua noho ôtou.
E ìte au i te toto, me tu ù taha atu.
14 Aòè ôtou e pē i te mea ìno ta ù e àve i te Fenua Ekipito.
A haamamaakau ôtou i hua â nei.
A ìò he â koìna pererina no te hahi i te Fatu.
A tū mau hua ture no te tau tai hakatahi ! »
TARAMO 116 B (115), 12-13, 15-16a.c, 17-18
U meitaìtia te ipu me te faraoa o te pohoè, te i haatū i te motuhana nui o te Etua.
12 Pēhea tu ù haahuaèkaèka i te Fatu
No te meitaì hakatahi ta Īa i vaièi mai ?
13 E ùtuna au i te ipu o te pohoè
E vevaò ana i te inoa o te Fatu.
15 He taetae io te Fatu te matena o to Īa huaa.
16 E te Fatu e, o au to Òe tāvini,
Te ènata humutia ta Òe i vevete.
17 E ùtuna au i te hēana haahuaèkaèka,
E vevaò au i te inoa o te Etua.
18 E hana au vāàna i tu ù teào voto
I mua o te motuhana nui o to Īa mataèinaa.
TETAUTINA O TO MUA HĀMANI I TO KORINETIA 11, 23-26
E tu ù tau tunane tuehine,
23 O au à, ua tuutia mai e te Fatu i te teào
ta ù i tuu atu ia ôtou, pēènei :
24 I te pō u mākakatia, ua too te Fatu i te faraoa,
u haahuaèkaèka, ua vahi me te peàu :
« O tu ù tino tēnei i haaìòtia no ôtou.
A hana ôtou atii no te haamaakau mai ia ù. »
25 Me hua hakatu, ma hope o te mau,
ua too Īa i te ipu, e peàu ana :
« O te ipu nei he Piimau hou, i òto o to ù toto.
I te ava hakatahi e inu ôtou me io hua ipu,
a hana ôtou no te haamaakau mai ia ù. »
26 Ma èià, i tēia ava, i tēia ava
ua kai ôtou i hua faraoa, ua inu ôtou me io hua ipu,
ua faì atu ôtou i te matena o te Fatu,
e tetaì ana i to Īa hua mai.
HĪMENE VĀNANA cf. In.13,34
« U haaìte au ia ôtou i te Ture hou : A kāòha atu kāòha mai te hoa i te hoa, me he mea u kāòha atu au ia ôtou. »
EVANERIO O IETU KIRITO VĀÀNA IOANE 13, 1-15
1 Ma mua o te Koìna Pakate, ua ìte Ietu ua tihe to Īa hora
no te taha atu me i te aomāàma nei io te Motua.
Ohia u kāòha Ietu i to Īa huaa te io he aomāàma nei,
u kāòha ia âtou tihe i te paona.
2 E kai ana i te kaina ahiahi,
u haatonake te Tiaporo i te koekoe o Iuta,
tama na Timone, no te haaìò ia Ietu.
3 E ìte ana Ietu, ua tuu mai te Motua
i te tau mea paotū ma òto o to Īa îìma ;
ua ìte Īa me io te Etua to Īa ihotia mai,
atii me to Īa hua atu io te Etua,
4 ua tū Īa me io he tapukai.
Ua taki Īa i te kahu uhi pu,
ua too i te tapa me to Īa taka anamai.
5 Ma hope, u kiini Ietu i te vai io he papa
me to Īa hano hooi i nā vaevae o te huaa kouâ ;
u haamoô me te tapa i takatia.
6 Ua tihe Īa io Timone Petero.
U peàu Petero ia Īa :
« E te Fatu e, na Òe e hooi i to ù vaevae ? »
7 U haahua atu Ietu : « E aha te hana e hana nei au,
aòè òe e vivini. Epō iho e vivo ai òe. »
8 U peàu Petero ia Īa : « Koè nui Òe e hooi i to ù vaevae ! »
U haahua Ietu ia īa :
« Anoa e hooi koè au ia òe, u te e pii òe me au nei. »
9 U peàu Petero ia Īa : « E te Fatu e,
umoì nā vaevae anaè, atià me nā îìma atii me te upoo. »
10 U peàu Ietu ia īa : « O te ènata u kaukau i te vai, ua àva.
Umoì e hooi hakaùa.
O ôtou nei, u taìtaì ôtou ; atià aòè paotū. »
11 Ua ìte hoì Ietu i tēia e haamākaka mai ia Īa.
O īa te piò u peàu pēènei : « Aòè i taìtaì ôtou nui. »
12 Ia pao te hooi i to âtou vaevae,
ua too hakaùa Ietu i to Īa kahu uhi pu
me to Īa noho io he tapukai.
U peàu i to Īa tau kouâ :
« Aha u vivini ôtou i te tumu o to ù hana i uē ia ôtou ?
13 U vevaò mai ôtou ia ù : he Tuhuna, he Fatu.
He mea hei to ôtou peàu mai ; o īa hoì au.
14 Anoa u hooi au i to ôtou vaevae,
o au te Fatu me te Tuhuna, a hana atii me ôtou :
a hooi ôtou i nā vaevae te hoa i te hoa.
15 U haaìte atu nei au i te hakatu ia ôtou,
etià e hana ôtou me he mea ta ù i hana i uē ia ôtou. »
NO TE VENINĪ TAPU
TETAUTINA O TE PEROFETA ITAIA 52, 13-15 ; 53,1-12
13 Eīa e tapavaù to ù tāvini,
e oko nui aè, e fiti aè, e tiketike nui.
14 U peàu te Fatu : « U kiiete nui te mataèinaa
ia tiòhi atu i to ù tāvini :
ohia u mata koè īa, aòè e hakatu ènata hakaùa.
15 Atii te tau hakaìki, e haamama i te fafa i mua o to ù tāvini.
E ìte ai âtou i te mea koè anatu i peàutia mai,
e kānino atu i te mea koè anatu i ònotia mai.
53,1 O ai e haatià atu i ta tātou i òno nei ?
Īa ai te ìi o te Fatu i haaìtetia mai ?
2 I te aò o te Etua, ua tupu te tāvini me he kohoe i àò,
me he aka totoo ma he fenua moô.
Ia tiòhi atu, koè īa i poèa, koè īa i kanahau.
3 U haameetia, u titiitia hua tāvini me he matua kai memae.
U haaìno atu tātou ia Īa me te haapaòpaò aneiho,
u tukitukitia e te uē
hakatu me te mea toomanu e haapiko i to mātou mata.
4 Atià, no tātou te memae e amo nei Īa,
no tātou te uē u òomi i to Īa menava.
5 I to tātou maakau, na te Etua i oonaì, i pehi, i haapaìha iho.
Atià, mēìa i to tātou mikeo, u tīputatia Īa ;
mēìa i to tātou mākaka i pehitia Īa.
6 Ma ùna o Īa, u topa mai te tuì haamoû mai ia tātou ;
mēìa i to Īa tau maki i oà ai tātou.
Me he muto papauō tātou, hākātahi ma to Īa iho puta.
Me te haatopa o te Fatu ma ùna o Īa i te mikeo o tātou paotū.
7 U hanapētia, u haapāpaù, aòè e pepeù i te fafa.
Me he arenio aahitia i te kukumi.
Me he kōivi muto i mua o te ènata tinai, pepeù koè i te fafa.
8 Ua humutia, haavātia, haakoètia.
O ai to tē haamaakau atu i to Īa paona ?
U takitia me io te fenua o te poì pohoè.
U pehitia haamate mēìa i te mikeo o to Īa mataèinaa.
9 U tomitia me he poì haatià koè.
O to Īa menema me te poì moni.
Atià o Īa, koè anatu i mākaka i tītahi,
koè to Īa èo i teào tīkoe.
10 U maìmaì te Fatu i te tukituki atu me te memae.
Mēìa u ùtuna atu i to Īa pohoè mea hoko mikeo,
e ìte ai i to Īa tupu i ùna aè, e haaòa aè i to Īa tau â.
Ma io Īa, e tae anamai te hīa o te Fatu.
11 Ma hope o te ûûkina o to Īa kuhane, e ìtetia te māàma,
e tapavaù nui. Ma to Īa memae, e haameitaì tu ù tāvini
i te tini tini ènata a amo ai i to âtou mikeo.
12 No èià, e tuu au io Īa i te tau faètoa,
e àva Īa i te tuhatina taetae me te poì mana.
Ohia à, na Īa ta Īa i ìò atu i te mate,
i tetautia me te poì mikeo.
Mēìa ua amo i te mikeo o te tau tini tini ènata,
u vevaò nei Īa i uē i te poì mikeo.
TARAMO 31 (30), 2.6, 12, 13-14ac, 15-16, 17.25
Io to ìma, e te Fatu e, e tuu nei au i to ù kuhane.
E te Fatu e, io òe to ù vahi maù.
Umoì e haameetia au ma te tau â paotū.
6 Io to Òe îìma e tuu nei au i to ù kuhane,
E te Fatu te Etua tiàtohu e, tu ù Haapohoè.
12 U toomanu au nei no to ù tau hoa noho tata,
Ia ìte mai, u haametaù to ù tau hoa.
Ua hiki memao me io ù,
Te poì i âvei me au ma no he aanui.
13 U haamāhaètia au me he tūpāpaù ìtekoètia.
U haatuhaè âtou ia ù me he kaù tioàtia.
14 Ua òno au i te teào haapōtoho mai
Ta te faètoa e hano ana no te kukumi mai.
15 U haatià au ia Òe, e te Fatu e.
U peàu hakaùa : o Òe tu ù Etua.
16 I òto o to Òe îìma to ù pohoè :
A taki mai me io te îìma i mākaka ia ù.
17 A pupuà to Òe mata no to òe tāvini,
Mēìa i to Òe uē, a haapohoè mai.
25 A oko nui te koekoe. Oho te ìi
Ôtou paotū e tetaì nei i te Fatu !
TETAUTINA O TE HĀMANI I TO HEPEREO 4, 14-16-- 5, 7-9
E tu ù tau tunane tuehine.
4,14 Ohia ua ìò Ietu he Tama a te Etua, to tātou Tāuà nui tiketike,
te i tomo i ùna nui o te àni,
a tohe mau tātou i te faì atu i te haatià.
15 Na te mea, u mehea hua Tāuà nui
mēìa i te tau tekateka o to tātou koekoe pepee.
Ua ìte hoì Īa ma te tiàtohu i te nuitina
o te mea haaveke me te haamōtii mai ia Īa,
atià à, u mikeo koè Īa.
16 No èià, a haatata mai tātou haametaù koè
me te Etua mana nui, te tumu o te vaièitina,
vāàna e ìò mai ia tātou to Īa hakāòha
me te karatia no te toko mai, i te ava e hei.
5,7 O Ietu Kirito e pohoè ana i no he fenua nei,
me he ènata mate vave, ua pure Īa i te pure vevaò,
e uē ana, e taaàu ana io te Etua,
etià e haapohoètia me io te mana o te matena.
U āpuutia ta Ietu Kirito pure
mēìa i to Īa kāòha me te aotahi atu.
8 E aha à he Tama te Kirito,
ma to Īa memae, u hakako Īa i te aotahitina.
9 Ma èià, ua ìò Īa he Toitoi noa i mua o te Etua,
u haatūtia te tumu o te pohoè anatu,
no te tau ènata paotū e aotahi ia Īa.
HĪMENE VĀNANA cf. Fi. 2,8-9
U aotahi te Kirito tihe i te matena, te matena uo he peka. Oia te tumu u haatiketike anaè te Etua ia Īa, me te apa i te inoa, ma ùna o te tau inoa ia ôtoa.
TETAUTINA O TE MEMAE O IETU KIRITO VĀÀNA E IOANE
18, 1-40--19, 1-42
I tēia mou pō,
18.1 ua hee Ietu me to Īa huaa kouâ
i àpai atu o te vaitahe Keterone. Enā i èià e tahi pāpua.
Ua uu Ietu me to Īa huaa kouâ i òto o hua pāpua.
2 O Iuta, te i haaìò ia Ietu, ua ìte meitaì i hua vahi,
mea nui hoì te tihena o Ietu i èià me to Īa huaa kouâ.
3 Ua tihe mai Iuta, e haatee ana
i te fatu kape Roma me te tau mutoi tiaì,
i tuutia mai ia īa e te tau tāuà nui me te tau Fariteo.
Ua àve âtou i te tau àma hue, te àma kohe me te haìna tōua.
4 Ua ìte Ietu i te tau hana paotū ta âtou i haapao ma ùna o Īa.
Ua hee Īa i to âtou aò me te peàu :
+ « O ai ta ôtou e ìmi nei ? »
5 U hua atu âtou ia Īa :
F « O Ietu no Natareti. »
U peàu Ietu ia âtou :
+ « O au. »
O Iuta tītahi me âtou.
6 Ia peàu Ietu i tēnei ponateào, O au,
ua hua âtou i muì me te topa i no he tuaèpo.
7 Ua ūi hakaùa Ietu ia âtou :
+ « O ai ta ôtou e ìmi nei ? »
U peàu âtou ia Īa :
F « O Ietu no Natareti. »
8 U hua atu Ietu ia âtou :
+ « U peàu au ia ôtou kapo nei : O au.
No to ôtou ìmi mai ia ù,
a avai ia âtou a hee atu. »
9 Atii e haatiàtohutia te teào a Ietu, pēènei à :
« Aòè i naò e tahi o te huaa ta òe i tuu mai. »
10 O Timone Petero, ua too i te kohetā ta īa i àve mai.
Ua tā īa i te tueni o te tāuà nui
me to īa haamotu i te puaìna ìma oko o te tueni.
O Marakuto te inoa o hua tueni.
11 U peàu Ietu ia Petero :
+ « A tuu iho i to òe kohetā i to he kato.
Aha aòè e inu au i te ipu memae
i tuutia mai e tu ù Motua ? »
NO IETU I HAAVĀTIA E ANA ME KAIFA
12 O te fatu kape Roma, to âtou vivini,
te tau mutoi i pahitia e te tau ati Iuta,
u popoki âtou ia Ietu me te humu ia Īa.
13 Òmua ìka, u aahi âtou ia Ietu io Ana.
He motuòai īa no Kaifa. I hua ava, he tāuà nui Kaifa.
14 Na hua Kaifa i peàu i te tau ati Iuta :
« E meitaì atu no ôtou e mate nui te ènata e tahi anaè
i uē i te mataèinaa. »
15 Atià, u ūtaì Petero me tītahi kouâ kē ia Ietu.
Ua ìtetia hua kouâ e te tāuà nui.
Ua uu īa me Ietu io he pāpua o te tāuà nui.
16 Ua noho Petero i vaho o te avaputa.
Ia uu i vaho hua kouâ te i ìtetia e te tāuà nui,
u teào īa me te vehine tiaì avaputa.
U haauu īa ia Petero i òto o te pāpua.
17 U peàu hua vehine tiaì avaputa ia Petero :
A « Aòè à o òe tītahi kouâ o tēnei ènata ? »
Ua hua atu Petero ia īa :
D « Aòè au e kouâ no Īa. »
18 Mēìa i te anu, u haauà i te ahi te tau tueni me te tau mutoi tiaì.
Ua noho âtou pii he ahi no te haamāhanahana.
O Petero tītahi me âtou.
19 Ua ūi atu te tāuà nui ia Ietu no to Īa tau kouâ
atii me to Īa hakakotina.
20 U haahua atu Ietu ia īa pēènei :
+ « U teào anatu au etià e vivini ia ù te tau ènata paotū.
U hakako anatu au io he tinakoka me te Hiero,
i èià te putuputu o te tau ati Iuta paotū.
U te e peàu au e tahi teào hakanā.
21 A ape òe i te tau ènata te i haaòno mai
e aha ta ù i peàu ia âtou.
O âtou hoì te i ìte i tu ù hakakotina. »
22 Ia òno i hua ponateào tītahi mutoi tiaì e tū ana nei,
u papaì ia Ietu me te peàu :
A « Atii to òe teào i te tāuà nui ? »
23 U hua atu Ietu ia īa :
+ « Me teka tu ù teào, a haaìte mai.
' Ia meitaì tu ù teào,
e aha te piò o to òe papaì ia ù ?
24 I muì iho, ua pahi atu Ana ia Ietu humutia io Kaifa.
25 Atià i èià, pii he ahi, ua noho Timone Petero,
e haamāhanahana ana ia īa. U peàu mou ènata ia īa :
A « Aòè à o òe tītahi o to īa tau kouâ ? »
U haakoè Petero me te peàu :
D « Aòè au he kouâ no Īa. »
26 U pohā te èo o tītahi tueni o te tāuà nui,
e huaa īa no te ènata i haamotutia te puaìna
e Petero me to īa kohetā. U peàu hua tueni ia Petero :
A « Aha aòè ua ìte au ia òe
io he pāpua me te ènata nei ? »
27 U haakoè hakaùa Petero. Ua tani anamai te moa.
NO IETU HAAVĀTIA E PINATO
28 U aahitia Ietu me io Kaifa io te faè o te hakaìki Roma.
He pōpōuì tika. Atià, aòè i uu te tau ati Iuta
i òto o te faè o te hakaìki Roma, oa havatia âtou i te piò.
E hano hoì âtou i te mau Pakate kai.
29 Ua uu Pinato i vaho no te âvei me âtou. U peàu īa :
A « E aha te piò te hakatio pu ôtou i tēnei ènata ? »
30 Ua peàu âtou ia Pinato :
F « Anoa aòè īa he ènata mākaka,
u te e haaìò mātou ia òe i hua ènata. »
31 U peàu Pinato ia âtou :
A « A too ôtou ia īa me te haavā vāàna i to ôtou ture. »
U haahua atu te tau ati Iuta :
F « Aòè e koàna ia mātou te haamate i te ènata. »
32 O īa hoì te mea e haatiàtohu ai i ta Ietu i peàu
no te haavivini i te hakatu o to Īa matena.
33 Ua uu hakaùa Pinato io to īa faè
me to īa vevaò ia Ietu. U peàu ia Īa :
A « Aha o òe te Hakaìki nui o te tau ati Iuta ? »
34 U hua atu Ietu :
+ « Na òe ta òe tenā teào ?
Akoè à na tahipito i peàu mai i ùna o au ? »
35 U peàu Pinato :
A « Aha he ènata ati Iuta au nei ?
Na to òe mataèinaa me te tau tāuà
i haaìò mai ia òe io ù. E aha ta òe i hana atu ? »
36 Ua hua atu Ietu :
+ « Aòè me i te ao nei to ù hakāìkitina.
Anoa me i te ao nei to ù hakāìkitina,
e tōtōua hoì to ù huaa tautua,
oa haaìòtia au i te poì ati Iuta.
Atià, aòè e hakatu to ù hakāìkitina me to te ao nei. »
37 U peàu Pinato :
A « No èià, he hakaìki òe ? »
Ua hua atu Ietu :
+ « Na òe i peàu. He hakaìki au.
O īa te tumu o to ù fānautina me te tihena
i te aomāàma nei : no te haaìte i te mea tiàtohu.
O te ènata ua kē me te Tiàtohu, u haaòno i ta ù teào. »
38 U peàu Pinato ia Īa :
A « E aha te Tiàtohu ? »
Ia haafitipona Pinato i hua teào, ua uu hakaùa i vaho.
NO IETU E HAKATIOTIA E PINATO
39 Ua taha Pinato io te poì ati Iuta me te peàu :
A « Aòè i koàna ia ù te piò no te hakatio i hua ènata.
Atià no te Koìna Pakate, vāàna i to ôtou haaati Iuta,
e vevete au i tītahi me io he faèhumu.
Aha u maìmaì ôtou e vevete au
i te hakaìki nui o te tau ati Iuta ? »
40 U taaàu oko ki âtou :
F « Umoì tēia. A vevete ia Parapā ! »
O Parapā hoì, he ènata mākaka.
19,1 I muì iho, u peàu Pinato a tootia Ietu no te tā ia Īa.
2 U àana te tau kape i te paè me te teitā taataa.
Ua tuu âtou i hua paè i ùna o te upoo o Ietu.
Ua tomi âtou ia Īa me te kahu uhi pu veàkiki.
3 U haatata mai âtou me Ietu e peàu ana :
F « Kāòha, e te hakaìki o te tau ati Iuta. »
U papaì âtou ia Īa.
4 Ua uu i vaho hakaùa Pinato me te peàu :
A « Eīa. U aahi au ia Īa i vaho nei io ôtou,
etià e ìte ôtou aòè i koàna ia ù
te piò no te hakatio i hua ènata. »
5 Ua uu Ietu i vaho me te paè taataa,
me te kahu uhi pu veàkiki.
U peàu Pinato ia âtou :
A « O īa nei te ènata. »
6 O te tau tāuà nui me te tau mutoi tiaì,
e tiòhi ana ia Ietu, u taaàu oko ki âtou :
F « A pāoka. A pāokapeka atu ! »
U hua atu Pinato ia âtou :
A « A too ôtou ia Īa. A pāokapeka atu !
Aòè i koàna ia ù te piò no te hakatio ia Īa. »
7 U haahua atu te tau ati Iuta :
F « He Ture no mātou. Vāàna i hua Ture, a mate nui Īa
mēìa u peàu e Tama Īa a te Etua. »
8 Ia òno Pinato i hua teào, u nui aè to īa haametaù.
9 Ua uu hakaùa Pinato io to īa faè. Ua ūi atu ia Ietu :
A « Me i hea mai òe ? »
Ua mutu Ietu.
10 A tahi a peàu Pinato :
A « Umaha u te e maìmaì òe e teào mai ?
Aòè òe i ìte e mana to ù no te vevete ia òe,
akoè à e mana to ù no te pāokapeka ia òe ? »
11 U haahua Ietu :
+ « He mana ta òe i ùna o au
mēìa i tuutia ia òe e te Etua.
No èià, nui atu te mikeo o te ènata
te i haaìò ia ù i to òe îìma. »
12 O īa te tumu ua hano Pinato e vevete ia Ietu.
Atià u taaàu te tau ati Iuta me te peàu :
F « Me vevete òe i tēnei ènata, aòè e hoa òe no Ketare.
O te ènata ua hano ia īa haahakāìki nui,
ua hano hua ènata e tōua me Ketare. »
13 Ia òno Pinato i hua teào, u peàu no te aahi ia Ietu i vaho.
U kaapee īa ma ùna o to īa nohona haavā teào,
io he vahi i vevaòtia Tohua keâ,
o Kapata ma he èo hepereo.
14 He â i peàutia no te haapei i te Koìna Pakate,
o hua â nei, i te oatea nui.
U peàu Pinato i te poì ati Iuta :
A « O īa nei to ôtou hakaìki nui. »
15 U taaàu âtou :
F « A mate ! A mate. A pāokapeka atu ! »
U peàu Pinato :
A « E pāokapeka au i to ôtou hakaìki ? »
U haahua atu te tau tāuà nui :
F « O Ketare aneiho to mātou hakaìki. »
16 A tahi a haaìò Pinato ia Ietu, etià e pāokapekatia e âtou.
NO TO IETU PĀOKAPEKATINA
17 Ua too âtou ia Ietu me te aahi atu.
E amo ana Ietu tootahi i to Īa peka,
ua taha Īa io te vahi apatia Karavario,
o Korokota ma he èo hepereo.
18 I èià, u pāokapeka âtou ia Ietu.
U pāokapeka âtou i nā ènata kē tokoùa :
i tēia kēkē tītahi, i tēia kēkē tītahi.
O Ietu i vāvena.
19 U kānea Pinato e tahi mēmau patutia.
U tauèvatia hua mēmau uo he peka.
Oianei te mea i patutia :
« O Ietu no Natareti, te Hakaìki nui o te tau ati Iuta. »
20 He mea nui te tau ati Iuta te i tetau i hua teào haaìte,
na te mea ua tata me te pāpuafaè
te taha i èià u pāokapekatia Ietu.
U patutia ma he èo hepereo, te èo hereni, te èo ratino.
21 U peàu te tau tāuà nui ia Pinato.
F « Umoì e patu : e hakaìki nui o te tau ati Iuta. »
A patu pēènei : u peàu hua ènata :
O au te hakaìki o te tau ati Iuta. »
22 U haahua Pinato :
A « O te mea ta ù i patu, ua pao i te patu. »
23 Ia pāokapekatia Ietu e te tau kape,
ua too âtou i to Īa tau kahu me te hopehope e fā pāio,
pāio kē to te hoa, pāio kē to te hoa.
Ua too âtou me to Īa kahu òa.
Atià, aòè i tuitia hua kahu.
E tahi tapa aneiho me i ùna tihe atu i àò nui.
24 U peàu âtou :
A « Umoì e haatuiva, a tuha tātou ma te haakai. »
Ua pao hua mea etià e toitoi te teào
i patutia io he Hāmani tapu :
« Ua tuha âtou i to ù kahu, u haakai i to ù kahu òa. »
O īa na ta te tau kape i haapao.
NO TO IETU MATENA
25 U maò pii te peka o Ietu to Īa kui me te teina o to Īa kui,
te vehine a Kereopa o Maria te inoa, o Maria Matarena.
26 E tiòhi ana Ietu i to Īa kui
me to Īa kouâ tāhia ma to īa kaokao,
u peàu i to Īa kui :
+ « E te vehine, o īa nei ta òe tama. »
27 I muì iho, u peàu i to Īa kouâ :
+ « O īa nei to òe kui. »
Me i tēia ava aneiho, ua too te kouâ ia Maria io to īa faè.
28 Ua ìte Ietu ua pao te mea ta Īa i haapao,
no te haatoitoi i tītahi ponateào patutia io he Hāmani tapu,
u peàu :
+ « Ua paka au i te vai. »
29 Enā i èià e tahi ipu pī i te vīneka.
U haakutaùtia me te vīneka tītahi mēmau omotai.
U haamautia hua mea omotai ma ùna o te manamana âkau.
U haatatatia me to Ietu fafa.
30 Ia ako Ietu i te vīneka u peàu :
+ « Ua pao ònaòna. »
A tahi, e oha ana Ietu i te upoo, ua tuu atu i te kuhane.
(A noho muò, a kaituto)
NO TE VEÒ I TE KAOKAO O IETU
31 O īa te â no te Haapei i te Koìna Pakate.
He â tapu oko no te tau ati Iuta tēia koìna,
tōtahi atu mēìa e faitia ma te Tāpati.
No èià, ua ape âtou ia Pinato
a fafati i nā vaevae o te tau ènata i pāokapekatia
me te taki iho i to âtou tino
oa èva âtou i hua â uo he peka.
32 Ua tihe mai mou kape te i fafati i te tau pūhāvaevae
o nā ènata i pāokapekatia me Ietu.
33 Ua tihe âtou io Ietu, ua ìte u mate nui,
aòè âtou i fafati i to Īa vaevae.
34 Atià, o tītahi kape, me te taa, ua veò i to Īa kaokao.
Ua tahe anamai te toto me te vai.
35 Na te ènata te i ìtemata te i haatiàtohu i hua mea.
He teào tiàtohu ta īa.
Ua ìte te Fatu : u peàu īa i te mea tiàtohu,
etià e haatià me ôtou.
36 U haapaotia hoì hua mea etià e toitoi
te teào o te Hāmani tapu te i peàu :
« Umoì e fafatitia e tahi o to Īa tau ivi. »
37 U patutia io he vahi kē :
« E tiòhi ai âtou i tēia ta âtou i tīputaèe. »
NO TE TOMINA O IETU
38 I muì iho, ua ape Ioteve no Arimatea ia Pinato,
no te too mai i te tino tūpāpaù o Ietu.
He kouâ Ioteve no Ietu, atià ma te haapupuni
na te haametaù i te tau ati Iuta.
Ua ao Pinato. Ua tihe Ioteve
me to īa taki atu i te tino o Ietu.
39 Ua tihe me Nikotemo.
O īa te i âvei me Ietu, òmua i te pō.
Ua àve mai īa i te mea kekaa, me he e ìma ònohuu kiro,
he mira me te aroe ua pao i te kāvohi.
40 Ua too âtou i te tino o Ietu,
ua fāfī me te tapa me te mēmau kekaa.
Ua hana aneiho âtou vāàna i te haaati Iuta
no te tomina i te tino tūpāpaù.
41 Enā i èià, tataèka me te taha o to Īa pāokapekatina,
e tahi pāpua me te ana tūpāpaù hou.
Òmua, aòè i tomitia tītahi tino tūpāpaù i òto o hua ana.
42 Mēìa i te â Haapei i te Koìna Pakate,
ohia mea tataèka hua ana tūpāpaù,
i èià ua tomi âtou ia Ietu.
TE PŌ PAKATE
1-TETAUTINA O TE HĀMANI A MOITE PEÀUTIA TENETE 1, 1-31--2, 1-2
1 I te tumu, u pēpena te Etua i te àni me te fenua.
2 O te fenua à, e hakatu koè, kiko koè.
Ma ùna o te peteò, he pō keevō,
ma ùna o te tau vai, e ona nei te kuhane o te Etua.
3 U peàu te Etua : « A māàma ! »
Me te māàma anamai.
4 Ua ìte te Etua u meitaì te māàma.
Me te haapae o te Etua i te māàma me io he pō keevō.
5 Ua apa te Etua i te māàma, he â.
Ua apa te Etua i te pōtano, he pō.
Me te ahiahi me te pōpōuì anamai.
Pō a tahi.
6 U peàu te Etua :
« A papafenua ma vāvena o te tau vai,
mea haapae i te tau vai me io he tau vai. »
7 Ua hana te Etua i te papafenua,
me te haapae i te tau vai ma ùna o te papafenua
me io te tau vai ma àò o te papafenua.
Ua pao anamai atii.
8 Ua apa te Etua i te papafenua, he àni.
Me te ahiahi me te pōpōuì anamai.
Pō a ùa.
9 U peàu te Etua :
« A putu mai ma he ava e tahi,
te tau vai ma àò o te àni,
a ìtetia mai te vahi moô. »
Ua pao anamai atii.
10 Ua apa te Etua i te vahi moô, he fenua.
Ua apa i te tau vai, he tai.
Ua ìte te Etua he mea meitaì.
11 U peàu te Etua :
« A tupu te fenua i te mutiē,
i te teitā e hua nei i te kākano,
me te tumuâkau e hua nei i te puku
e avai nei ma òto te kākano ma to īa hakatu. »
Ua pao anamai atii.
12 Ua tupu te fenua i te mutiē,
i te teitā e hua nei i te kākano ma to īa hakatu,
me te tumuâkau e hua nei i te puku
e avai nei ma òto iho o te kākano ma to īa hakatu.
Ua ìte te Etua he mea meitaì.
13 Me te ahiahi me te pōpōuì anamai.
Pō a toù.
14 U peàu te Etua :
« A tauèva mou àma ma àò o te papafenua o te àni,
mea haapae i te â me i te pō.
A ìò âtou he mou hakatu e tuhi i te tau ava koìna,
te tau â me te tau èhua.
15 E ìò hua tau àma ma àò o te papafenua o te àni,
mea tūìna i te fenua. » Ua pao anamai atii.
16 U kānea te Etua i nā àma keîkeî e ùa.
O te àma keî oko mea vivini i te â,
me te àma iti mea vivini i te pō, i muì iho te tau fetū.
17 U tauèva te Etua ia âtou io te papafenua o te àni
mea tūìna i te fenua,
18 mea vivini i te â me i te pō,
mea haapaekē i te māàma me io te pō keevō.
Ua ìte te Etua he mea meitaì.
19 Me te ahiahi me te pōpōuì anamai.
Pō a fā.
20 U peàu te Etua : « A pī nui te tau vai
i te nuitina o te mēmau pohoè.
A ona te manu ma ùna o te fenua,
i àò o te papafenua o te àni. »
21 U pēpena te Etua i te tau ià tai hakaipaipa pē
me te ià pohoè hakatahi e nokenoke nei,
e pī nei ma he tau vai, vāàna i to âtou hakatu,
me te manu pekeheu hakatahi vāàna i to âtou hakatu.
Me te ìte o te Etua he mea meitaì.
22 U haameitaì atu te Etua ia âtou e peàu ana :
« A tuputupu, a nuinui, a haapī i te tau vai me te tai,
a nuinui me te tau manu ona ma he fenua. »
23 Me te ahiahi me te pōpōuì anamai :
Pō a ìma.
24 U peàu te Etua :
« A pī te fenua i nā puaa pohoè vāàna i to âtou hakatu,
te tau puaa kai, te tau puaa totoo,
te tau puaa hae vāàna i to âtou hakatu.
Ua pao anamai atii.
25 U kānea te Etua i te tau manu hae vāàna i to âtou hakatu,
me te tau puaa kai vāàna i to âtou hakatu
me te puaa paotū totoo ma ùna o te fenua
vāàna i to âtou hakatu.
Ua ìte te Etua he mea meitaì.
26 U peàu te Etua : « A kānea tātou i te ènata
he ata no tātou, e haahakatu me tātou aneiho.
A vivini īa i te ià o te tai,
i te puaa kai me te puaa hae paotū,
i te tau puaa paotū e totoo nei ma ùna o te fenua. »
27 U pēpena te Etua i te ènata e ata no Īa.
He ata no te Etua i pēpena atu ai i te ènata.
He āhana, he vehine i pēpena atu ai ia âua.
28 U haameitaì atu te Etua ia âua.
U peàu atu te Etua ia âua :
« A tuputupu, a nuinui, a haapī i te fenua, a tuàki atu :
a vivini i te ià o te tai me te manu o te ataàni
me te puaa hakatahi totoo ma ùna o te fenua. »
29 U peàu te Etua :
« Eīa ua tuu au no ôtou i te teitā paotū e hua nei i te kākano,
e avai nei ma ùna o te fenua tiàtohu me te tumuâkau paotū
e hua nei i te puku me te kākano i òto : a kai ôtou i tēia kai.
30 Atii i te puaka hae paotū me te manu paotū o te ataàni,
i te mēmau paotū e totoo ma ùna o te fenua,
i te mēmau paotū me te menava o te pohoètina,
ua tuu atu au i te teitā hakatu kē no te kai.
Ua pao anamai atii.
31 Ua ìte te Etua i ta Īa mea paotū i hana, èià he mea meitaì nui.
Me te ahiahi me te pōpōuì anamai :
Pō a ono.
2,1 Atii ua pao anamai te àni me te fenua
me to âua mēmau paotū i òto.
I te pō e fitu, ua haapao te Etua i te hana ta Īa i hana.
2 U hakaea ma te pō e fitu me i te hana paotū.
TARAMO 104 (103) 1-2a, 5-6, 10.12, 13-14b, 24.35c
E te Fatu e, a pōpahi i to Òe Kuhane no te haahou i te hakatu o te fenua. cf. 104,30
1 A haameitaì i te Fatu, e tu ù kuhane e.
E te Fatu e, tu ù Etua e, u tiketike Òe.
Ua tāpītia Òe me te kāìè
2 O te àma, te kahu e fāfī ia Òe.
5 E haamau Òe i te tuàka o te fenua,
Etià e neue koè ma te tau tai a tihe nei.
6 Ua uhitia hua fenua me te tau tai.
Òmua, u haanaò te vai i te tau tuaivi.
10 Io te vao nui, e haapihiti Òe i te punavai.
E tahe te vai ma io he kaavai hōhonu o te tuaivi.
12 Ua noho pii o hua vai te nuitina o te tau manu ;
Ua ònotia te tanitina o to âtou èo.
13 Me io to òe nohona, u fāinu Òe i te tau tuaivi,
Ua kai haamaòna te mēmau pohoè i to Òe tau puku.
14 U haatupu Òe i te teitā no te tau naho ânimara,
U haatapavaù i te pāpua o te ènata paòpaò i te hana.
24 He mea nui to Òe tau hana, e te Fatu e.
Na to Òe māàma i pēpenatia te tau mēmau paotū.
Ua pī te fenua i to Òe tau taetae.
A haameitaì i te Fatu, e tu ù kuhane e !
Akoè à
TARAMO 33 (32) 4-5, 6-7, 12-13, 20.22,
Ua pī te aomāàma i to Òe tau hana kāòha, e te Fatu e. 33,5
4 He toitoi noa te teào o te Fatu.
U tiàtohu anaè to Īa tau hana paotū.
5 U haataetae Īa i te hakatu toitoi, hakahae koè.
Ua pī te aomāàma i to Īa tau hana kāòha.
6 U pēpena te Etua i te àni na to Īa teào.
U kānea Īa i te aomāàma na te mana o to Īa ao.
7 U haapuke Īa i te tai me te haapākeka, oa neke īa.
U tāpae Īa i te moana me te tau taetae i òto.
12 Mamau te mataèinaa ia ìò te Etua he Fatu no īa.
Mamau te fenua vaetia me he pāpua no te Fatu.
13 Me io he àni, u tiòhi meitaì te Fatu
E ìte ana i tēia ènata, i tēia ènata.
20 O te Fatu te tumu o to tātou pohoè.
O Īa to tātou toko me te vevaò.
22 E te Fatu e, a noho mau to Òe kāòha i ùna o mātou
Atii me mātou e tetaì mau i to Òe vaièitina.
2. - TETAUTINA O TE HĀMANI A MOITE PEÀUTIA TENETE 22, 1-2.9a.10-13.15 (22, 1-13.15-18)
1 U haahiiveke te Etua ia Aparahamo me te peàu ia īa :
« E Aparahamo e ! » U haahua atu īa : « Eīa au nei. »
2 U peàu te Etua : « A too i ta òe tama, te tamaòa tootahi,
te tama ta òe e haataetae nei, o Itaako.
A hee atu io te Fenua Moria ; i èià, a ùtuna mai ia īa
i ùna o te tuaivi e haaìte atu au ia òe. »
3 I te pōpōuì tika, ua àa Aparahamo
me ta īa haapei i te pūriki.
U vevaò īa i nā pahinaèo e ùa me Itaako ta īa tama.
U haapūpā i te vehie no te ahi tapu.
Ua fiti īa i uta, io te tuaivi ta te Etua i peàu atu.
4 I te â e toù, u feau Aparahamo
me to īa ìte memao i te tuaivi peàutia e te Etua.
5 U peàu Aparahamo i ta īa nā pahinaèo :
« A noho ôùa înei me te pūriki.
O au nei me te tama e fiti maua i èià.
Ia pao to maua moe haatona me te pure, e hua mai maua. »
6 Ua too Aparahamo i te pūpā vehie
me ta īa tuu ma ùna o te paufifi o Itaako, ta īa tama.
Ua tooìma īa i te ahi me te kohe.
U fīfiti âua amana tokoùa.
7 U peàu Itaako ia Aparahamo : « E to ù motua e. »
U haahua atu : « Eīa au nei, e tu ù tama e. »
U peàu Itaako :
« Enā te ahi, enā me te vehie, i hea te hēana ? »
8 U haahua atu Aparahamo :
« Na te Etua e haaìte mai i te hēana, e tu ù tama e. »
U fīfiti âua amana tokoùa.
9 I te ava ua tihe âua i te vahi peàutia e te Etua,
u haatū Aparahamo i te fātaa pure
me te tuu i te vehie ma ùna.
U kitii Aparahamo i ta īa tama, o Itaako,
me te tuu atu ma ùna o te fātaa, uo he puke vehie.
10 U hapai Aparahamo i te ìma,
ua too i te kohe no te kukumi i ta īa tama.
11 A tahi a vevaò te anera o te Fatu Etua me io he àni
me te peàu : « E Aparahamo, Aparahamo e. »
U haahua atu ia : « Eīa au nei. »
12 U peàu te anera : « Umoì òe e tā i te mahaì.
Umoì òe e haamemae ia īa.
Ua ìte au i tēnei i te mea u pakaihi òe i te Etua.
Aòè hoì òe i kaikino mai i te tama, ta òe tama tootahi. »
13 A tahi a feau Aparahamo me to īa ìte i te koimaa menē
te i haaveketia io he maateitā keoho.
Ua hano īa i te menē too,
me to īa ùtuna atu i te hēana io te kōava o ta īa tama.
Ua apa Aparahamo i hua vahi : « Ua ìte te Fatu Etua. »
15 Na te anera o te Fatu Etua me io he àni
i vevaò hakaùa ia Aparahamo me te peàu pēènei :
16 « He teào a te Fatu Etua. E haatiàtohu au ma to ù iho inoa :
mēìa u aotahi mai, aòè i kaikino òe i te tama,
ta òe tama tootahi, e haameitaì me te vaièi nui au ia òe.
17 E haanui au tini, tini i to òe ati i ùna aè,
me he nui o te tau fetū io he ataàni,
me he nui o te one io te hiku o te tai.
E haahina âtou i te pākeâ me te mōuna tōua
o te mataèinaa e ahi me âtou.
18 Mēìa u aotahi mai òe, e haameitaì atu haameitaì mai
te tau mataèinaa paotū ma te vevaò mai i to òe inoa. »
TARAMO 16 (15), 5.8, 9-10, 1b.11
E tu ù Etua e, a tiaki meitaì ia ù ; io Òe anaè tu ù tetaì. cf. 16,1
5 O te Fatu te hope taetae ua ìò ia ù.
Io to Òe ìma, e te Fatu e, to ù pohoètina.
8 I mua o to ù mata anatu te Fatu,
Ma to ù kaokao to Īa noho, u haametaù koè au.
9 Ua ù i te koakoa to ù kuhane.
U èkaèka to ù tino, ua moe me te moû.
10 Aòè te Fatu e ao e hina au i te matena.
Aòè Īa e avai i to Īa hoa e pē ai io he èpo.
1b E tu ù Etua e, o to ù hīa, io Òe tu ù vahi maù.
11 U aahi mai Òe ma no he aanui o te pohoè ;
I mua o to Òe mata, te koakoa, te koakoa nui.
Ma to Òe kaokao, te èkaèka paona koè.
3. - TETAUTINA O TE HĀMANI A MOITE PEÀUTIA EHOTO 14, 15-31 -- 15,1a.
Ia ìte te poì o Iraene u tātai mai te pūpū kape Ekipito,
ua pī âtou i te haametaù.
14,15 U peàu te Fatu Etua ia Moite : « No te aha te taaàu io ù ?
A peàu i te tau tama Iraene a tataha atu.
16 O òe, a too i to òe tokotoko,
a hapai i to ìma ma ùna o te tai, e vahitia ma vāvena.
A taha atu te poì Iraene io he tai,
paìpaì koè na vaevae.
17 O au à, e haafeò i te koekoe o te poì Ekipito.
Ma hope o ôtou, e taha âtou io he tai.
E haakāìètia au e te hakaìki Faraone,
to īa tau pūpū kape, to īa tau pāriri, to īa tau ihovare.
18 E ìte to Ekipito o au te Fatu Etua,
ia pao i te tuàki te hakaìki Faraone me to īa tau pāriri
me to īa tau pūpū kape piki ihovare.
19 Enā ma mua o te pāpua o te tau tama Iraene
te anera o te Etua ; ua hee īa i hope atu.
Hua mea te kohu keekee te i ūtaì i te pūpū tama Iraene ;
ua hee īa i hope atu.
20 Ua tū te kohu keekee i vāvena o te pāpua
o te tau kape Ekipito me te pāpua o to Iraene.
I te tūmoe, e ùa hakatu hua kohu :
he pō keevō i te kēkē Ekipito, he àma pupuà i te kēkē Iraene.
I te pō, u te e haatata mai to Ekipito me to Iraene.
21 U hapai Moite i te ìma ma ùna o te tai.
Ma te tiàtohu o te pō, ua puhi te Etua i te metani oko
me i te kēkē tihena o te òumati.
Ua hee pororō nui te tai, vahitia ma vāvena.
22 Ua taha atu to Iraene paìpaì koè te vaevae.
Ua tū anaè te tai me he pā i te ìma oko,
me he pā i te ìma aèaè.
23 U tātai i to Iraene i te poì Ekipito,
te hakaìki Faraone, me to īa tau ihovare,
to īa tau pāriri, to īa tau pūpū kape.
Ua tihe âtou paotū i vāvena o te tai.
24 I te hāhakateiao, me i vāvena anamai o te kohu,
u tiòhi mai te Fatu i te tau pūpū kape Ekipito.
U haahina te Fatu ia âtou.
25 U haakati Īa i to âtou pāriri, he mea hana nui te aahi atu.
U peàu to Ekipito : « A hīhiki tātou i mua o Iraene.
U tōua te Fatu, e toko ana ia âtou. »
26 U peàu te Fatu Etua ia Moite :
« A hapai i to òe ìma i ùna o te tai.
A hua anamai te tai ma ùna o te tau kape Ekipito,
to âtou pāriri, to âtou poì piki ihovare. »
27 U hapai Moite i te ìma ma ùna o te tai.
I te pōpōuì tika, ua hua te tai i to īa kōava.
U hīhiki to Ekipito.
Ua tomi te Fatu ia âtou i te take o te tai.
28 Ua fiti te tai. U tomitia te tau pāriri,
te poì piki ihovare, te tau pūpū kape o Faraone,
te i tohuti ma hope o te tau tama Iraene.
Aòè e tahi aneiho i toe atu.
29 O te tau tama Iraene,
ua taha atu âtou paìpaì koè nā vaevae,
me he pākeâ te tai i to âtou ìma oko me te ìma aèaè.
30 I hua â, u haapohoè te Fatu ia Iraene
me i te îìma o te tau Ekipito.
I te hiku o te tai, ua ìtemata Iraene
i te puke tino tūpāpaù o te poì Ekipito.
31 A tahi nei, ua ìte Iraene i te hana mana o te Fatu Etua
te i haahina i to Ekipito.
U pakaihi me te haametaù te mataèinaa Iraene i te Fatu.
U haatià âtou i te Fatu Etua, ia Moite ta īa tāvini.
15,1 Ua hahi Moite me te tau tama Iraene i te Fatu Etua,
e hīmene ana pēènei :
HĪMENE A MOITE = Ehoto 15, 2, 3-4, 5-6, 10a-11, 17
A hahi tātou i te Fatu, u pupuà to Īa kāìè ; o te Fatu to tātou ìi. 15,1a
2 O te Fatu tu ù ìi. No Īa tu ù hīmene hahi.
O te Fatu tu ù Etua, te i haapohoè mai.
Ua faì au i to Īa òno nui.
U haatiketike au i te Etua o to ù tupuna.
3 O te Fatu te toa mana io he tōua,
He Fatu Etua to Īa inoa.
4 U tioà Īa io he tai i te pāriri o Faraone,
Io he tai, u haanaò Īa i to Ekipito tau kape.
5 Ua tomitia âtou io he peteò,
Ua naò me he keâ io he take o te tai.
6 E te Fatu e, ua mana to Òe ìma,
U haapaìha i te poì e tōtōua me Òe.
10 Ua puhi te Fatu : ua tomitia âtou io he moana.
11 O ai te ètua e kiko me Òe, e te Fatu e ?
O ai e tūtū me Òe, te Peàto nui,
Te tumu o te mana haahopo i te ènata ?
17 U aahi mai Òe ia âtou me te tanu io he fenua
I ùna o te tuaivi ta Òe i haataetae.
E te Fatu e, o īa na te vahi o to Òe noho,
Te faè tapu ta Òe i haatū, e te Fatu Etua e.
4. - TETAUTINA O TE PEROFETA ITAIA 54, 5-14
Oianei ta te Fatu Etua i peàu ia Ierutaremi :
5 He āhana no òe te Etua te i pēpena ia òe.
O te Fatu o te aomāàma, to Īa inoa.
He Haapohoè no òe te Etua peàto no Iraene.
O te Etua o te fenua ia ôtoa, to Īa inoa.
6 E Ierutaremi e, te vehine titiitia, haameetia,
E vevaò hakaùa te Etua ia òe.
U peàu te Fatu Etua pēènei :
« E aha e titii te hoa mātiri
i ta īa vehine vaetia i te ava hou te tino ? »
7 U haamāhaè au ia òe no te ava poto.
Ma òto o to ù kāòha nui ia òe, e haakātahi mai hakaùa.
8 Mēìa i tu ù pekē, u haapiko i tu ù mata me io òe.
Ma òto o tu ù kāòha paona koè, u matavaièi mai hakaùa.
Oia te teào o to òe Haapohoè, te Fatu Etua.
9 Me he mea i te tai kākiu i mua o Noa,
u haatiàtohu au i tu ù teào pēènei :
umoì e haanaòtia te fenua i te vaiā,
atii tēnei u haamau i tu ù teào :
Aòè e pekē au ia òe.
Aòè e oonaì ma te haametaù ia òe.
10 E aha à e takitumutia te tau tuaivi,
E aha à e feùu te tau pūkei,
U te e huìkē to ù kāòha ia òe.
U te e hakaea tu ù Piimau o te moû me òe.
Oia nei te teào o te Fatu Etua, te i kāòha ia òe.
11 E Ierutaremi e, òmua u haameetia,
u haapupukinatia, u titiitia òe.
Enā e haakeàpa au i to òe pā me te tau keâ menia èreère.
He tau keâ pūkiki te puke keâ o to òe tuàka.
12 E pupuà to òe pā i te tau keâ pīàma pōnionio i te òumati.
He mea karahi to òe tau avaputa.
13 E haamāàma te Etua iho i ta òe tau tama.
E noho anatu to te Etua moû i ùna o âtou.
14 E tohe mau òe i òto o te toitoi.
E haamemaotia me io òe te tau kōfii e òomi mākaka.
Aòè e haametaù hakaùa òe,
e koè ai te mea haahopo.
TARAMO 30 (29) 3-4, 5-6b, 6c.12, 13,
U haatiketike au ia Òe, e te Fatu e, te i haatū ia ù. 30,2
3 I te ava e taaàu to ù èo io Òe,
E te Fatu, tu ù Etua e, u haameitaì mai.
4 Ua taki mai Òe me io he opata,
U haapohoè mai me io te ana o te tūpāpaù.
5 A hahi i te Fatu, ôtou, e te poì haatià e.
A haahuaèkaèka ma te haaòno nui i to Īa inoa.
6 He ava poto to te Etua pekē,
Ma te òa o te pohoè to Īa haameitaì.
I te ahiahi, e tahe te vaimata,
Ma te pōpōuì te taaàu koakoa.
12 U haaìò Òe i tu ù uēuē me he â koìna.
Ua veti i to ù kahu pēpē no te uhi mai me te koakoa.
13 A taaàu i te koakoa, e tu ù kuhane.
Umoì òe e mutu pu, a haakoìna no te Fatu.
E hahi au hakaea koè i te Fatu, tu ù Etua.
U haahuaèkaèka au ia Òe, e te Fatu e.
5. - TETAUTINA O TE PEROFETA ITAIA 55, 1-11
1 Oianei te teào o te Fatu Etua :
E mate ôtou i te paka vai ? A mai. A inu.
Moni koè ôtou ? A hoko pu.
A kai. A inu i te vino, i te vaiū.
2 Umoì e haapao pu i to ôtou moni hana
no te kai i te ìnaì haamaòna koè.
3 A haaòno mai. E maòna ôtou i te ìnaì mōmona.
A haaòno mai. Mave mai. E pohoè meitaì ôtou.
E haatoitoi au me ôtou i te Piimau paona koè.
E ìò hoì ia ôtou te taetae o Tavite.
4 Ua haamau au ia īa he ènata no ù i vāvena o te tau mataèinaa, te aahi, te vivini o te tau ati.
5 O òe à, e vevaò òe i tītahi ati aòè òe i ìte ;
e tihe mai io òe tītahi ati kē mēìa i to òe Fatu Etua,
te Peàto Nui o Iraene te i haakāìè ia òe.
6 A ùmihi ôtou i te Etua, o īa te ava e âvei me Īa.
I te ava nei, a pure ôtou i te Etua,
u tataèka me ôtou.
7 A hua mai te ènata mākaka me io to īa aanui hukaka.
A titii te ènata ìno i to īa maakau pē.
A hua io te Etua, te i hakāòha mai ia īa.
8 He mea kē hoì te maìmaì o te Etua,
mea kē to te tau ènata.
He mea kē te hakatu o te Etua,
mea kē to te tau ènata.
9 Atii te tiketike o te àni ma ùna o te fenua,
atii te hōhonu atu o te maakau o te Etua
ma ùna o te maakau ènata.
10 Ia topa te ūa me te nive me io he àni,
u haakutaù âtou me te haatapavaù i te fenua.
U haatupu âtou i te teitā, haahua i te puku
no te tāfai i te tau ènata me te tau manu e kai aa.
11 Atii hoì te teào ta ù i haaìte atu :
E hana tēia teào i te hana ta ù i maìmaì.
U te e hua io ù to ù teào puku koè.
HĪMENE = ITAIA 12, 2, 4b-e, 5b-6a.c,
O te Fatu Etua te vaipuna o te pohoè ; a èkaèka tātou, a taaàu i te koakoa ! 12,3
2 O te Fatu Etua tu ù haapohoè.
U haatià nei au, haametaù koè.
O te Fatu Etua tu ù ìi. E hīmene au ia Īa.
Io te Fatu te tumu o to ù pohoè.
4 A haahuaèkaèka i te Fatu. A hahi i to Īa inoa,
A faì atu io te poì êteni i to Īa tau hana mana.
A haaìte atu : he Tiketike to Īa inoa.
5 A haatani i te pū no te hahi i te Fatu.
Ua hana hoì te Fatu i te hana mahaò.
U mevaha to Īa òno nui ma nā fenua vii pu.
6 E Tiona e, a èkaèka, a taaàu i te koakoa.
U tiketike te Fatu Etua i vāvena o ôtou.
6. - TETAUTINA O TE PEROFETA PARUKO 3, 9-15.32-38 --4, 4
9 E te mataèinaa Iraene.
A haaòno i te teào haameitaì i te pohoè.
A āpuu i te teào haamāàma ia òe.
10 E to Iraene, no te aha ua noho òe
i te fenua o te tau ènata e tōtōua me òe ?
No te aha ua ìò òe he kooūa i te fenua hāoè ?
11 Ua havatia òe ma te haatukia me te tino tūpāpaù.
U tetautia i vāvena o te huaa mamate i Havaiki.
12 Oianei te piò : u titii òe i te puna o te Māàma.
13 Anoa òe i taha ma no he aanui o te Etua,
ua noho òe me te moû i to òe fenua.
14 A haamaakau òe i hea te Māàma, te ìi, te ìtetina.
Ma èià, e ìte òe i hea te tumu o te pohoè òa,
i hea te àma e haatāhakahaka i to òe kikomata,
i hea te moû.
15 E noho te Māàma i hea ? O ai te i ìte ?
O ai te i uu io te pāòto o to te Māàma taetae ?
32 O te Etua te i tuhi i te aanui o te Māàma.
Ua ìte Īa i te tau mea ia ôtoa.
Ua ìmi Īa i te tau mea paotū.
U kānea Īa i te aomāàma vii pu.
U haapī Īa i te fenua me te tau ânimara kē, ânimara kē.
33 Ua pahi Īa i te àma te i hee atu, hee atu paona koè.
U vevaò Īa i hua àma, ua taha mai,
e aotahi aa me te emièe.
34 U tāmiomio te tau fetū i te pō, me he mea u koakoa âtou.
35 U vevaò te Etua ia âtou,
u haahua âtou e peàu aa : « Eīa au nei. »
U keàpa âtou no te haaèka i te i pēpena ia âtou.
36 O Īa hoì to tātou Etua.
Aòè te Etua kē i mua o Īa.
37 Ua ìmi Īa i te aanui o te Māàma.
Ua tuu Īa i hua aanui ia Iakopo, to Īa tāvini,
ia Iraene ta Īa i haataetae.
38 Ma èià, u haaìte ia Īa iho i te Māàma i no he fenua nei.
Ua noho te Māàma i vāvena o te tau ènata.
4, 1 He Teào o te Etua hua Māàma.
O īa te Ture te i noho mau ma te tau tai anatu.
E pohoè te tau ènata e aotahi i hua Teào.
E mate nui te tau ènata e titii i hua Teào.
2 A hua mai, e Iakopo e.
A āpuu me te aotahi mau i te Teào.
A tūìna te Teào i te aanui e aahi ia òe
io he pohoè kanahau.
3 Aua e too pu te mataèinaa kē i to òe kāìè.
Aua e hao te ati kē i to òe iho taetae.
4 Oho te ìi, e Iraene ! A oko òe !
Ua ìte tātou i te mea te i haaèka i te Etua.
TARAMO 19 (18)8, 9, 10, 11,
E te Etua e, io Òe te teào e aahi atu i te pohoè anatu. cf. In 6,69
8 U toitoi noa te ture o te Fatu,
Na īa e haahou i to tātou ìi.
U tiàtohu te teào o te Fatu,
Te i haamāàma i te poì avai noa.
9 U toitoi te teào o te Fatu,
E haakoakoa âtou i te koekoe.
U hōata te maìmaì o te Fatu,
E haakeàpa i te mata o te ènata.
10 U taìtaì te pakaihitina o te Etua,
E noho mau anatu to īa tau puku.
U toitoi te teào paotū o te Fatu :
He māàma âtou no te haavā i te ènata.
11 U taetae atu te maìmaì o te Fatu
I te puke moni kiki, te kuà o te moni kiki.
He mānini atu te teào o te Etua
I te mānini tikauè e tahe me io he tīpapa
7. - TETAUTINA O TE PEROFETA EHEKIERE 36, 16-28
16 Ua òno au i te teào o te Fatu, pēènei à :
17 « E te ènata e, i nā pō e noho nei te mataèinaa Iraene
io to âtou fenua, u havatia hua fenua e âtou
mēìa i to âtou hakatu faufau me to âtou hana pē.
18 U haatopa au ma ùna o âtou i te tuki pē,
mēìa i te toto ta âtou i kiini nei,
mēìa i te tau ètua tīkoe te i haameìe i hua fenua.
19 I haatavavā ai au ia âtou i vāvena
o te tau mataèinaa êteni,
i haahiki kē ia âtou ma he fenua kē anatu.
U haavā au ia âtou vāàna i to âtou hakatu me te hana.
20 I vāvena o hua tau mataèinaa êteni ta âtou i hee atu,
u haameìe âtou i tu ù inoa tapu.
U peàu te tau ènata pēènei :
« Oia nei te mataèinaa o te Fatu Etua,
te i titiitia me io to Īa fenua. »
21 Atià, u maìmaì au e haakāìè atu i tu ù inoa tapu,
ta te ati Iraene i haameìe
io he tau fenua, i èià u tavavā âtou.
22 A peàu atu òe i te mataèinaa Iraene.
Pēènei te teào o te Fatu Etua :
« E to Iraene, a haaòno mai.
Aòè no ôtou te tau hana e hana atu au,
atià no te haakāìè i tu ù inoa,
ta ôtou i haameìe io te tau fenua i hee atu ai ôtou. »
23 Ua tihe mai te teào a te Fatu Etua, pēènei :
« E haaìte au he mea tapu to ù inoa tiketike
te i haameetia e te tau mataèinaa êteni mēìa ia ôtou.
E vivini te tau mataèinaa i te mea : o au te Fatu Etua.
Na ù aneiho e haatapu i to ù inoa.
24 E vevaò au ia ôtou me i vāvena o te tau mataèinaa
e haaputuputu au ia ôtou,
te i takitia me io te tau fenua paotū.
E haahua au ia ôtou i to ôtou fenua tumu.
25 E kiini au ma ùna o ôtou i te vai mā no te haamā ia ôtou.
E haataìtaì au i to ôtou tau mikeo paotū,
me to ôtou tau hana pakaihi teka i te tau ètua tīkoe.
26 E vaièi atu au ia ôtou i te koekoe hou.
E tuu au ia ôtou i te kuhane hou.
E taki au i to ôtou hōupo keâ no te tuu atu i te hōupo kiko.
27 E haaihi au i òto o ôtou i to ù Kuhane
etià e aotahi ôtou i to ù maìmaì,
me te haamau io he koekoe i to ù tau teào.
28 E nōnoho ôtou io te fenua ta ù i tuu atu i to ôtou tau tupuna.
E ìò ôtou e mataèinaa no ù. He Etua au no ôtou. »
- Anoa e papatematia tau tama hou,
HĪMENE = ITAIA 12,2, 4b-e, 5b-6a.c, (a tiòhi i te tetautina e 5)
Akoè à
TARAMO 51 (50) 12-13, 14-15, 18-19
E te Etua e, a pēpena i òto o au nei i te koekoe hou. cf. 51,12
12 A pēpena i òto o au nei i te koekoe taìtaì.
A haahou i to ù kuhane, a haamau i to īa meitaì.
13 Umoì e titii atu ia ù memao me io Òe.
Umoì e taki me i òto o au i to Òe Kuhane Meitaì.
14 A haakoakoa ia ù to Òe haapohoè mai.
A haamau i te èkaèka io to ù koekoe.
15 E hakako au i to Òe aanui i te poì mikeo.
E hua mai io Òe te poì i hukaka nei.
18 No tu ù ùtuna atu i te hēana, aòè e āpuu mai.
Me kānea au i te hēana pūovo i te ahi, u titii Òe.
19 O te koekoe unu i te uē, o īa te hēana e kākī Òe.
O te koekoe unu i te uē me te hopo mikeo,
Te ùtuna hēana e haatāvaè ia Òe, e te Fatu e.
- Anoa aòè he papatema
TARAMO 42 (41) 2, 5bcd ; 43 (42) 3, 4,
Io te Etua to ù hīa, io te Etua haapohoè. Ahea e koàna ia ù te haatata me te tu i te aò o te Etua ? cf. 42,3
1 Me he mea te menē i paka i te vai pohoè,
2 Atii e ìmi nei au ia Òe, e te Fatu, tu ù Etua e.
5 E taha au i vāvena o te faètoa nui,
No te tomo io te faè o te Etua.
Na ù te haatee ia âtou e fiti ana,
E hahi me te taaàu koakoa i te Etua.
3 A pahi mai i to Òe māàma me te tiàtohu,
Na âua te haatee i to ù tahatina,
Te aahi ia ù i ùna o to Òe tuaivi,
Tihe atu io te vahi tapu i èià e noho ai Òe.
4 E haatata au pii o te hātaa pure o te Etua,
Te Etua, te tumu o to ù koakoa.
E haahuaèkaèka au me te hīmene kitā,
Ia Òe, e te Etua, tu ù Etua e.
TETAUTINA A PAURO PEÀTO I TO ROMA 6, 3b-11
E tu ù tau tunane tuehine,
3 Ua ìte hoì ôtou u papatematia tātou
no te haatahi me te Kirito Ietu,
i òto o to Īa matena to tātou papatema.
4 Ua tomitia tātou kātahi me Ietu Kirito,
mēìa i te papatema te i haatahi ia tātou
me to Ietu Kirito matena.
No èià, me he mea ua tū hakaùa Ietu Kirito
me i vāvena o te huaa mamate ma te mana nui o te Motua,
atii e pohoè ai me tātou no te hakatu pohoè hou.
5 Anoa u haatahi tātou me Ietu ma te matena kātahi me Īa,
e haatahi hoì tātou me Īa
ma te pohoè hakaùa hakatahi me Īa.
6 Ua ìte meitaì tātou i te mea nei :
u pāokapekatia kātahi me Ietu
to mua hakatu pohoè o tātou ènata mikeo,
vāàna e haakoè te Etua i te hīa pē o te tino.
Ma èià, u te e vivini mai hakaùa ia tātou te mana o te mikeo.
7 Me mate nui hoì te ènata, ua koè to īa tāvini atu i te mikeo.
8 Anoa ua mate tātou kātahi me te Kirito,
e haatià mau tātou e pohoè hoì kātahi me Īa.
9 Ua ìte tātou i te mea nei :
ua tū hakaùa te Kirito me i vāvena o te poì mamate,
ua koè te mana o te matena i ùna o Īa.
Koè nui e hina hakaùa te Kirito i te matena.
10 Ua mate nui Ietu, ua koè te mana o te mikeo i ùna o Īa.
Ua àva to Īa matena no te tau tai hakatahi.
I tēnei, o to Ietu pohoè, he pohoè no te Etua.
11 Atii me ia ôtou. A kaituto ia ôtou iho,
me he poì mamate ôtou :
ua koè te mana o te mikeo i ùna o ôtou.
Atià he poì pohopohoè nei ôtou
no te haaèka i te Etua kātahi me Ietu Kirito.
ALLELUIA ALLELUIA
TARAMO 118 (117) 1.4, 16-17, 22-23,
1 A haahuaèkaèka i te Fatu : u matavaièi mai Īa.
Paona koè to Īa kāòha.
4 A peàu te poì pakaihi i te Fatu :
Paona koè to Īa kāòha.
16 U tuàki te ìma oko o te Fatu,
Ua mana nui te pūhāìma o te Fatu.
17 Aòè e mate havaiki, e pohoè meitaì au,
No te haaìte atu i te tau hana a te Fatu.
22 O te keâ i titiitia e te poì ato faè,
O hua keâ avai noa, ua ìò he keâtaa.
23 Oiana te hana o te Fatu,
E hana mahaò haapekahi ia mātou.
No te Èhua A
EVANERIO O IETU KIRITO VĀÀNA E MATEO 28, 1-10
1 Ma muì o te Tāpati, i te pōpōuì mākehukehu
o te â to mua o te âtapu, ua hee Maria Matarena
me tītahi Maria kē io te ana tūpāpaù tiòhi.
2 Enā u feùu oko te fenua,
ua iho mai hoì te anera o te Fatu me io he àni.
E haatata mai ana, ua huì te anera i te keâ
me to īa kaapee ma ùna o hua keâ.
3 U hakatu to īa mata me he uià,
ua māìta me he nive to īa kahu.
4 Mēìa i te haametaù, u pūpūkina te tau kapetiaì,
mei mate nui âtou.
5 Atià, u pohā te èo o te anera me te peàu i nā vehine :
« Umoì ôùa e haametaù.
Ua ìte au e ìmi nei ôùa ia Ietu te i pāokapekatia.
6 Aòè Īa înei. Ua tū hakaùa
me he mea ta Īa i peàu atu.
A mai, a tiòhi ôùa i te vahi o to Īa moe.
7 I tēnei, a hee ponihoo me te peàu i to Īa tau kouâ :
ua tū hakaùa Īa me i vāvena o te huaa mamate.
Enā Īa i te Fenua Karirea i mua o ôtou.
I èià, e ìte ôtou ia Īa.
Enā ua òno ôùa i te teào hou. »
8 U titii ponihoo âua i te ana tūpāpaù
me te haametaù me te koakoa nui.
U kokouō âua no te àve atu
i te teào hou io to Īa tau kouâ.
9 Eīa ua tihe mai Ietu e haaâvei me hua mou vehine
me to Īa peàu : « Kāòha ôùa ! »
U haatata mai âua me Ietu.
Ua too âua i to Ietu mou vaevae, ua moe haatona i to Īa aò.
10 U peàu Ietu ia âua : « Umoì ôùa e haametaù.
A taha atu me te peàu i to ù tau teina :
a hee âtou i te Fenua Karirea. I èià, e ìte âtou ia ù. »
No te Èhua B
EVANERIO O IETU KIRITO VĀÀNA E MAREKO 16, 1-8
1 Ma hope mai o te Tāpati, o Maria Matarena,
o Maria te kui o Iakopo, o Tarome, ua hoko mai âtou
i te mēmau kekaa no te haapaù i te tino tūpāpaù o Ietu.
2 I te pōpōuì tika nui mākehukehu, i te â to mua o te âtapu,
ua tihe âtou io he ana tūpāpaù. U pōpōuì nui.
3 U peàpeàu atu peàpeàu mai âtou :
« Na ai e huì atu i te keâ me i mua o te avaputa o te ana ? »
4 Atià, e feau ana, ua ìte âtou
ua huìtia hua keâ : he keâ keî.
5 Ua uu âtou i òto o te ana tūpāpaù.
Ua ìte âtou e tahi mahaì e noho ana i te kēkē ìma oko,
he kahu òa, he kahu māìta to īa.
U emièe âtou me te haametaù.
6 U peàu hua mahaì ia âtou : « Umoì ôtou e haametaù !
Ua ìmi ôtou ia Ietu no Natareti te i pāokapekatia.
Ua tū hakaùa Īa. Aòè Īa i înei.
Oianei te vahi i tuu âtou ia Īa.
7 A tataha atu.
A peàu i to Īa tau kouâ atii me ia Petero,
enā Īa i te Fenua Karirea ma mua o ôtou.
I èià, e ìte ai ôtou ia Īa,
me he mea ta Īa i peàu atu ia ôtou. »
8 Ua uu âtou i vaho
me te hiki anamai me io he ana tūpāpaù.
U emièe hoì âtou, u pūpūkina to âtou koekoe.
Aòè âtou i faì atu i te ènata e tahi,
mēìa i te nui oko o to âtou haametaù.
No te Èhua C
EVANERIO O IETU KIRITO VĀÀNA E RUKA 24, 1-12
1 I te â to mua o te âtapu, ma te oìoì tika,
ua tihe te mou vehine io he ana tūpāpaù,
e àve ana i te mēmau kekaa kāneatia e âtou.
2 U koàna ia âtou te keâ huìtia
me i mua o te ana tūpāpaù.
3 Ua uu âtou i òto he ana.
Aòè i koàna mai ia âtou te tino o te Fatu Ietu.
4 Ohia ua pē âtou i te mahaò, enā i mua o âtou
nā ènata tokoùa tāpītia me te kahu haapōnionio.
5 Ua hemo âtou i te haametaù me to âtou oha i àò te mata.
U peàu nā ènata ia âtou : « Umaha te ìmi o ôtou
i vāvena o te huaa mamate i tēia i pohoè ?
6 Aòè Īa înei. Ua àa Īa.
A haamamaakau ôtou i to Īa teào
i te ava ua noho Īa i te Fenua Karirea.
7 U peàu Īa e haaìòtia te Tama a te ènata
i te îìma o te poì mikeo pāokapekatia.
Ma te pō toù, e tū hakaùa Īa. »
8 A tahi a haamamaakau âtou i to Ietu tau teào.
9 Ia hua âtou me io he ana tūpāpaù,
ua faì atu i nā mea hakatahi
i te Tīònohuu ma tahi me te tau ènata kē paotū.
10 Oianei te inoa o hua mou vehine :
O Maria Matarena tītahi, o Ioana tītahi,
o Maria, te kui o Iakopo tītahi.
Enā me tahipito vehine kē me âtou,
te i peàu hua mea aneiho i te tau Àpotoro.
11 E auana he teào paèpaèa ta te tau vehine,
aòè i haatià te tau Àpotoro ia âtou.
12 Atià, ua tū Petero me to īa tohuti atu io he ana tūpāpaù.
Ua oha īa. Ua ìte īa i òto, he tau tapa anaè.
Ua hua mai īa io he faè.
U mahaò īa e kaituto ana i te mea i haapaotia.
TE KOÌNA NUI O TE PAKATE
TETAUTINA O TE HĀMANI HANA A TE TAU ÀPOTORO 10, 34a.37-43
Io te faè o te kereturione Korenio,
34 u pohā te èo o Petero me to īa peàu pēènei à :
37 « Ua ìte ôtou i te mea i haapaotia i te Fenua Iutea vii pu,
i te Fenua Karirea te tīmatatina,
ma muì o te papatema te i haaìtetia atu e Ioane.
38 Ua ìte ôtou pēhea u haapaù te Etua ia Ietu no Natareti
me te Kuhane Meitaì me te mana.
Ua taha Ietu e hana i te hana meitaì,
u haapohoè Īa i te tau ènata paotū
te i haamōèhutia e te Tiaporo. O te Etua hoì me Ietu.
39 O mātou te tau ènata haatiàtohu i to Īa tau hana paotū
io he fenua ati Iuta atii me Ierutaremi.
O hua Ietu ta âtou i haamate ma te tauèva ia Īa uo he peka.
40 Atià, na te Etua e haatū hakaùa mai ia Īa,
ma te toù o te pō me te ao no te haaìte atu ia Īa aneiho,
41 aòè i te mataèinaa paotū,
atià i te tau ènata i vaetia e te Etua,
o mātou à te i kai me te inu me Īa,
ma muì o to Īa Tūhakaùatina
me i vāvena o te huaa mamate.
42 U peàu mai no te haaìte atu i te mataèinaa
me te haatiàtohu i tēnei teào : O Īa te i haatūtia e te Etua
no te haavā i te poì pohoè me te huaa mamate.
43 U haatiàtohu te tau perofeta paotū ia Ietu, e peàu ana :
ma to Īa inoa, a vevetetia te tau mikeo
o te ènata u haatià ia Īa. »
TARAMO 118 (117) 1.4, 16-17, 22-23
Oia nei te â haatoitoitia e te Fatu. He â koìna te â o te koakoa, alleluia. cf. 118,24
1 A haahuaèkaèka i te Fatu : u matavaièi mai Īa.
Paona koè to Īa kāòha.
4 A peàu te poì pakaihi i te Fatu :
Paona koè to Īa kāòha.
16 U tuàki te ìma oko o te Fatu,
Ua mana nui te pūhāìma o te Fatu. »
17 Aòè e mate havaiki, e pohoè meitaì au,
No te haaìte atu i te tau hana a te Fatu.
22 O te keâ i titiitia e te poì ato faè,
O hua keâ avai noa, ua ìò he keâtaa.
23 Oiana te hana o te Fatu,
E hana mahaò haapekahi ia mātou.
TETAUTINA O TE HĀMANI A PAURO PEÀTO I TO KOROHA 3, 1-4
E tu ù tau tunane tuehine,
1 Mēìa u pohoè hakaùa ôtou kātahi me te Kirito,
a ìmi i te taetae te io he àni, i èià hoì te Kirito,
e noho ana i te ìma oko o te Etua.
2 A kōhoà aneiho i te mea te io he àni,
umoì i te mea te io he aomāàma nei.
3 Ua mate ôtou kātahi me te Kirito.
To ôtou hakatu pohoè hou, u te e haaìtetia atu nei,
me he mea u te e haaìtetia to te Kirito :
u hakanātia i òto o te Etua.
4 O to ôtou hakatu pohoè hou e tahi me to te Kirito.
No èià, i te â e haaìte te Kirito ia Īa iho,
e tū ai ôtou me Īa i òto o te kāìè Etua.
Akoè à
TETAUTINA O TO MUA HĀMANI A PAURO PEÀTO
I TO KORINETIA 5, 6b-8
E tu ù tau tunane tuehine,
6 Ua ìte ôtou i te teào haapupuà :
A kāvohi i te mana o te mea haapupuhi me te faraoa tee,
e pupuhi te faraoa paotū.
7 A haataìtaì hoì ia ôtou ma te taki me io ôtou
i te mea haapupuhi pē, ma èià he faraoa tee hou ôtou.
Na te mea ôtou he faraoa tee hou haapupuhikoètia.
U utunatia hoì to tātou Pakate e te Kirito.
8 A fai tātou i te Koìna Pakate,
umoì me te mēmau haapupuhi kākiu,
haapupuhi pē, haapupuhi teka.
Atià, a fai ôtou i te koìna me te faraoa tee
o te Toitoi me te Tiàtohu,
ia hoì te faraoa haapupuhikoètia.
ALLELUIA ALLELUIA 1 Ko .5,7-8
U ùtunatia hoì to tātou Pakate, te Kirito. Oianei te kainamau o te Fatu. Mave mai. A haamaòna tātou me te koakoa.
EVANERIO A IETU KIRITO VĀÀNA E IOANE 20, 1-9
1 I te â to mua o te âtapu, i te pōpōuì tika,
hāhakateiao, ua tihe Maria Matarena io he ana tūpāpaù.
Ua ìte i te keâ, takitia me io he ana.
2 A tahi a tohuti īa io Timone Petero
me tēia kouâ i haataetaetia e Ietu.
U peàu ia âtou :
« U tootia te tino o te Fatu me io he ana tūpāpaù.
Aòè mātou i ìte i hea te tuutia. »
3 Ua hee atu Petero me tītahi kouâ
me to âua tihe io te ana tūpāpaù tiòhi.
4 U tohuti nātoa amana tooùa âua.
Atià, ua tihe te kouâ òmua ia Petero
mēìa te koi o to īa vaevae.
5 Ua oha me to īa ìte i òto o te ana
i te tapa fāfī i te tino, tuutia ma ùna o te tohua.
Atià, aòè i uu i òto o te ana tūpāpaù.
6 Ua tihe Timone Petero ma muì o īa.
Ua uu i òto o te ana me to īa ìte,
ma ùna o te tohua, i te tapa fāfī i te tino
7 me te tapa tomi i to Ietu upoo.
Aòè i tāpapatia hua tapa me to mua tapa te i fāfī i te tino.
U pikaotia hoì i vahi kē.
8 A tahi a uu i òto te kouâ kē te i tihe òmua ìka.
Ua ìte īa. U haatià.
9 Aòè âua i vivini hoì i te Hāmani tapu e peàu ana :
e tū hakaùa Ietu me i vāvena o te huaa mamate.
Akoè à, i te pure meta ahiahi Pakate
EVANERIO O IETU KIRITO VĀÀNA E RUKA 24, 13-35
13 I hua â to mua o te âtapu, ua hee nā kouâ tokoùa o Ietu
io he pāpuafaè, o Emau te inoa.
E ùa hora nehe te tahatina vaevae me i Ierutaremi.
14 U tekatekao âua no tenā tau mea paotū i paotia.
15 Ohia u teào atu teào mai âua,
u haatata mai Ietu iho me to Īa taha atu me âua.
16 E aha à u tiòhi âua ia Īa, u haakekehutia to âua mata
oi ìte âua o Īa Ietu.
17 U peàu Ietu ia âua : « E aha te tumu
o to ôùa teào atu teào mai, e taha ana ? »
U hakaea âua, u kekehu nui te mata.
18 U haahua tītahi, o Kereopata te inoa, me te peàu ia Ietu :
« O òe anaè i vāvena o te tau ènata e noho nei i Ierutaremi,
aòè i ìte i te tau mea i hanatia i nā pō i pao atu nei. »
19 U peàu Ietu : « E aha òa ? »
U peàu âua : « Te teào i ùna o Ietu no Natareti.
Ua tū Īa me he perofeta mana ma te hana, me te teào,
i mua o te Etua me te mataèinaa paotū.
20 Pēhea i haaìòtia no te haamate nui me te pāokapeka atu
e to mātou tau tāuà nui me te tau hakaìki.
21 O mātou à, u tetaì mātou
e haapohoè Īa i te mataèinaa Iraene.
Tōtahi atu, oianei te toù o te pō
me i te ava i te paotina i tēia mea.
22 Atià à, u haaemièe mai te mou vehine kē me mātou.
I te pōpōuì tika, ua hee âtou i te ana tūpāpaù.
23 Aòè i koàna ia âtou to Īa tino.
Ua hua me to âtou peàu mai : ua ìte âua i nā anera
te i peàu ia âtou u pohoè Ietu.
24 Ua hee io he ana tūpāpaù tahipito me i vāvena o mātou.
Ua ìte âtou i te mea i peàutia e te tau vehine.
O Ietu à, aòè âtou i ìte ia Īa. »
25 U peàu Ietu ia âua : « E te poì pōtano !
E te koekoe tevee i te haatià i te mea paotū
ta te tau perofeta i peàu atu.
26 Aòè à tēia memae e memae ai te Kirito
no te tomo io to Īa kāìè ? »
27 U haavivini Ietu i te teào i patutia i ùna o Īa,
i òto o te Hāmani tapu, e tīmata ana
ma te haatuhuna i na hāmani vāàna e Moite,
ma hope iho vāàna e te tau Perofeta hakatahi.
28 U haatata âtou me te pāpuafaè i èià to âtou tahatina.
Ua hano Ietu e hee memao atu.
29 Ua ūtaì âua ia Īa e peàu ana : « A noho me maua.
Ua èva te â. E naò ai te òumati. »
Ua uu Ietu no te noho me âua.
30 Ohia io he tapukai me âua,
ua too Ietu i te faraoa, u haahuaèkaèka,
ua vahi me te tuu atu ia âua.
31 U pepeùtia to âua kikomata : ua ìte âua ia Ietu.
Ua naò anamai Ietu me i to âua aò.
32 U peàpeàu atu peàpeàu mai âua :
« Aòè à u veàveà me he ahi to taua koekoe
i te ava u teào Īa me taua ma no he aanui ?
I te ava o to Īa haatuhuna i te Hāmani tapu ? »
33 Ua tū ponihoo âua no te hua i Ierutaremi.
U koàna mai ia âua te Tīònohuu ma tahi
putupututia me te huaa e noho ana me âtou.
34 U peàu âtou ia âua : « Tiàtohu nui.
Ua tū hakaùa te Fatu. U haaìte ia Īa iho ia Petero. »
35 Ua faì atu me âua i te mea i pao ma no he aanui,
pēhea to âua ìte ia Ietu i te ava vahitina o te faraoa.
TOMINIKA E ÙA NO PAKATE
TE ETUA HAKĀÒHA NUI
TETAUTINA O TE HĀMANI HANA A TE TAU ÀPOTORO 5, 12-16
12 I Ierutaremi, he mea nui te tau hana mana
me te hana mahaò haatiàtohu i te teào i hanatia
e te îìma o te tau Àpotoro i vāvena o te mataèinaa.
U haakātahi mai te poì haatià io he Hiero,
i te taha peàutia Pou Pāvei Faè Taromone.
13 Aòè i vaavō pu e tahi ènata e haapii atu me âtou.
Atià, u haameitaì me te hahi te mataèinaa ia âtou.
14 He mea nui, nui aè te tau āhana me te tau vehine
te i haatià i te Fatu.
15 U àvetia te poì hopi ma no he aanui
e moe ana i ùna o te oki akoè à
te tau pateà etià e taha ana Petero ma èià
e tukia to īa ata me tītahi me i vāvena o âtou.
16 U tohuti mai te faètoa me io te tau pāpuafaè
tata èka me Ierutaremi, e àve ana i te poì hopi
me te poì uutia e te kuhane ìno.
U pohopohoè âtou nui.
TARAMO 118 (117) 1.4, 22-23, 24-25, 26ab.27a.29
Paona koè to Īa kāòha ! cf.118,1
1 A haahuaèkaèka i te Fatu : u matavaièi mai Īa.
Paona koè to Īa kāòha.
4 A peàu te poì pūpūkina i te Fatu :
Paona koè to Īa kāòha.
22 O te keâ titiitia e te poì haatū i te faè,
O hua keâ avai noa, ua ìò he keâtaa.
23 Oiana te hana o te Fatu.
E hana mahaò u puàha i mua o to mātou mata.
24 Oianei te a haatoitoitia e te Fatu.
He â koìna, te â o te koakoa no mātou.
25 E te Fatu e, a vaièi mai i te pohoètina.
E te Fatu e, a vaièi mai i te tuàkitina.
26 A meitaìtia te tihe nei ma te inoa o te Fatu.
27 O te Etua, te Fatu, te i haapupuà mai.
29 A haahuaèkaèka i te Fatu. U matavaièi Īa.
Paona koè to Īa kāòha.
TETAUTINA O TE HĀMANI APOKARUPO 1, 9-13.17-19
9 O au nei o Ioane, to ôtou teina,
te i àva atu me ôtou i te tau kōfii haamemae,
e tetaì ana i te Patirēia o te Etua,
me te tohe mau e memae ana
i te mea haaveke, mēìa e tau kouâ tātou no Ietu.
I te motu Patamo, u haamōèhutia au
mēìa i te teào a te Etua, mēìa i to ù haatiàtohu ia Ietu.
10 I te â tapu, te â o te Fatu, ua iho te Kuhane i ùna o au.
Ua òno au ma to ù tua i te èo oko, e taaàu ana me he pū.
11 U peàu hua èo pēènei : « A patu i te mea ua ìte òe.
A àve i te hāmani i te fitu Èkaretia :
to Efetia, to Imira, to Perekama,
to Tiatira, to Tareti, to Firatefira, to Raotikea. »
12 U fāìu au no te tiòhi i te èo te i teào mai.
E fāìu ana, ua ìte au e fitu pou avaina àma
e pōnionio me he moni kiki.
13 I vāvena ahau o hua tau pou avaina àma,
enā me he Tama a te ènata, uhitia me te kahu òa,
to Īa umauma takakooitia me te moni kiki.
17 Ia ìte au ia Īa, ua hina anamai au pii to Īa nā vaevae.
Me he ènata mate nui au.
Atià, ua tuu Īa i to Īa ìma oko i ùna o au, e peàu ana :
« Umoì òe e haametaù. O au te To mua me te Paona.
18 O au nei te Pohoè. U memae au i te matena.
I tēnei, e pohoè au no te tau tai hakatahi e tihe anatu.
Ua mana ta ù i ùna o te Matena me Havaiki.
19 No èià, a patu òe i te mea paotū ta òe i ìte ai,
me te mea ua pao i tēnei, me te mea e tihe ai ma muì mai. »
ALLELUIA ALLELUIA. cf. In.20,29
Ua ìtemata Toma i te Fatu : ua haatià īa. Mamau te ènata haatià, ìte koè īa !
EVANERIO O IETU KIRITO VĀÀNA E IOANE 20, 19-31
19 I te ahiahi o hua â to mua o te hepetoma,
u putuputu te huaa kouâ i òto he pāòto.
Ua pātia te avaputa na te haametaù i te poì ati Iuta.
Ua tihe anamai Ietu.
Ua tū anaè Īa i vāvena ahau o âtou.
U peàu Īa : « Ia ôtou te moû. »
20 E peàu ana i hua ponateào, u haaìte Ietu ia âtou
i to Īa mou îìma me to Īa kaokao.
Ua pē i te koakoa te tau kouâ,
mēìa ua ìtemata âtou i te Fatu.
21 U peàu hakaùa Ietu : « Ia ôtou te moû.
Me he mea ua pahi mai to ù Motua ia ù,
atii me to ù pahi atu ia ôtou. »
22 Ia pao hua ponateào,
ua puhi Ietu i to Īa ao i ùna o âtou me te peàu :
« A haakoàna ia ôtou te Kuhane Meitaì.
23 To te tau ènata mikeo e vevetetia e ôtou, u vevetetia.
To te tau ènata mikeo e tāmautia e ôtou, u tāmautia. »
24 O Toma, te i vevaòtia Mahaka, o Titimo ma he èo hereni,
tītahi o te Tīònohuu ma tokoùa kouâ,
aòè īa me âtou i te â u haaìte Ietu ia Īa iho.
25 U peàu tahipito kouâ ia īa :
« Ua ìte mātou i te Fatu. »
U hua atu Toma ia âtou :
« Anoa u te e ìte au io nā îìma o Īa,
i te maki o te paapaa i te pāoka,
anoa u te e tuu au i tu ù manamanaìma
tu ù ìma i òto o to Īa kaokao, aòè au e haatià. »
26 E vaù pō ma hope iho,
ua noho hakaùa te huaa kouâ io he faè.
O Toma tītahi me âtou.
Ua pātia te avaputa. Ua tihe anamai Ietu.
Ua tū anaè Īa i vāvena ahau o âtou me te peàu :
« Ia ôtou te moû. »
27 I muì iho, u peàu ia Toma :
« A tuu înei i to òe manamanaìma,
a tiòhi i to ù mou îìma. A haatata i to òe ìma,
a tuu i òto o to ù kaokao.
Umoì òe e pūtuì. A haatià. »
28 U hua atu Toma ia Īa me te peàu :
« E tu ù Fatu e, e tu ù Etua e. »
29 U peàu Ietu ia īa :
« U haatià òe, e Toma e, mēìa i to òe ìtemata ia ù.
Mamau te tau ènata u haatià e aha à u te e ìtemata âtou. »
30 Mea nui te hana mana kē haahakatu
ta Ietu i hana i te aò o to Īa tau kouâ.
Aòè âtou i patutia i òto o te hāmani nei.
31 U patutia tēia mea nei etià e haatià ôtou
o Ietu te Kirito, te Tama a te Etua.
Mēìa i to ôtou haatià, e pohoè ai ôtou ma to Īa inoa.
TOMINIKA E TOÙ NO PAKATE
TETAUTINA O TE HĀMANI HANA A TE TAU ÀPOTORO 5, 27-32.40-41
27 U aahitia mai te tau Àpotoro i mua o te Tuneteri.
Ua ūi atu te Tāuà nui ia âtou pēènei :
28 « U haatapu nui mātou ia ôtou no te hakako i tenā inoa.
Atià, u haapī ôtou ia Ierutaremi
me to ôtou teào haatuhuna.
U maìmaì ôtou e haatopa mai i ùna o mātou
i te toto o hua ènata ? »
29 U haahua atu Petero me te tau Àpotoro :
« He mea meitaì aè te aotahi i te Etua
i te aotahi atu i te tau ènata.
30 Na te Etua o to mātou tau tupuna i haatū hakaùa ia Ietu
ta ôtou i haamate ma te pāokapeka ia Īa.
31 Na te mana o to Īa ìma oko, u haatiketike te Etua ia Ietu
me te haaìò ia Īa he Hakaìki nui me te Haapohoè,
etià e koàna mai ia Iraene te fāìutina o te koekoe
me te tuutina o te tau mikeo.
32 O mātou te tau ènata e haatiàtohu i hua tau hana,
o mātou me te Kuhane Meitaì,
ta te Etua i tuu mai i te tau ènata i aotahi ia Īa. »
40 U vevaò mai âtou i te tau Àpotoro, u peàu no te tā ia âtou.
I muì iho, u haatapu âtou no te teào ma te inoa o Ietu,
me te avai e hee atu nā Àpotoro.
41 O âua à, ua paekē me io te Tuneteri,
pī i te koakoa nui mēìa ua vaetia âtou
no te amo i te memae i uē i te inoa o Ietu.
TARAMO 30 (29) 3-4, 5-6b, 6cd.12, 13
E te Fatu e, u haatiketike au ia Òe, te i haatū mai ia ù. 30, 2
3 I te ava e taaàu to ù èo io Òe,
E te Fatu, tu ù Etua e, u haameitaì mai.
4 Ua taki mai Òe me io te opata,
U haapohoè mai me io te ana o te tūpāpaù.
5 A hahi i te Fatu, ôtou, e te poì haatià e.
A haahuaèkaèka ma te haaòno nui i to Īa inoa.
6 He ava poto to te Etua pekē,
Ma te òa o te pohoè to Īa haameitaì.
I te ahiahi, e tahe te vaimata
Ma te pōpōuì te taaàu koakoa.
12 U haaìò Òe i tu ù uēuē me he â koìna.
Ua veti i tu ù kahu pēpē no te uhi mai me te koakoa.
13 A taaàu i te koakoa, e tu ù kuhane.
Umoì e mutu pu au, a haakoìna no te Fatu.
E hahi au hakaea koè i te Fatu, tu ù Etua.
U haahuaèkaèka au ia Òe, e te Fatu e.
TETAUTINA O TE HĀMANI APOKARUPO 5, 11-14
O au nei o Ioane,
11 E tiòhi mau i te mea ua ìte au, ua òno i te èo
o te nuitina o te anera, e tū ana vii pu o te nohona kāìè,
te tau Ânimara me te tau Kōkooūa. Tautini, tini âtou,
aòè e koàna i te ènata te tetau i te nuitina.
12 U taaàu âtou paotū, pēènei : « Ua hei nui e ìò
i te Arenio te i ùtunahēanatia, te māàma, te tapavaù,
te mana, te ìi, te hahi, te kāìè, te haahuaèkaèka ! »
13 Ua òno au i te tau mēmau paotū te i pēpenatia,
to te àni, to te fenua, to te havaiki, to te tainui,
ua òno au ia âtou paotū e hīmene ana, pēènei :
« I Tēia io he nohona kāìè, i te Arenio,
te hahi, te haameitaì, te kāìè, te hakāìkitina,
ma te tau tai hakatahi a tihe anatu ! »
14 U peàu nā Ânimara e fā : Amene !
Ua moe haatona te mou Kōkooūa no te atoratio.
ALLELUIA ALLELUIA.
Ua tū hakaùa te Kirito, te Pēpena o te àni me te fenua, te Haapohoè o te tau ènata paotū.
EVANERIO O IETU KIRITO VĀÀNA E IOANE 21, 1-19
1 I tēia mou pō i muì iho, u haaìte hakaùa Ietu ia Īa aneiho
i to Īa huaa kouâ i te hiku o te tai Tiperiata.
U haapaotia pēènei.
2 U putupututia Timone Petero o Toma te i vevaòtia Titimo,
o Nataere no Kana i te Fenua Karirea,
na tama tokoùa a Ihepetea,
me nā kouâ kē tokoùa : toofitu âtou paotū.
3 U peàu Timone Petero ia âtou : « E hee au i te àvaika. »
Ua haahua atu âtou ia īa : « O mātou tītahi me òe. »
Ua hee âtou me te piki i òto o te vaa.
Atià, i hua pō nei, aòè he ià i koàna mai.
4 I te oìoì tika mākehukehu, e maô aa Ietu io he one,
aòè te tau kouâ i ìte o Ietu hua ènata.
5 U peàu Ietu ia âtou :
« E nā tama e. Enā me ta ôtou mea kai ? »
U haahua atu âtou : « Aòè. »
6 U peàu Ietu ia âtou : « A haatopa i te ùpena
ma te kēkē ìma oko o te vaa. E koàna mai ia ôtou. »
Ua haatopa âtou i te ùpena.
Aòè i koàna ia âtou i te toi mēìa i te nuitina o te ià.
7 U peàu ia Petero te kouâ haataetaetia e Ietu : « O te Fatu. »
Ia òno Petero o te Fatu te io he one, ua taka i to īa kahu,
ua takitia hoì to īa kahu no te hana.
Ua kau anamai Petero io he tai.
8 O te tau kouâ kē e noho ana io he vaa,
ua tihe mai âtou me te toi i te ùpena pī i te ià.
U memao me io he one me he e ìma tekau maò.
9 Ia tau i uta, ua ìte âtou i te ahi e uà ana.
Enā te ià i ùna o te kaahu ahi me nā mou faraoa.
10 U peàu Ietu ia âtou :
« A àve mai i hua mou ià ta ôtou i haamau kapo nei. »
11 Ua piki hakaùa Timone Petero i ùna o te vaa
me to īa toi i uta i te ùpena pī i te tau ià nunui.
Hānere e ìma ònohuu ma toù âtou.
E aha à te nuitina, aòè i motu te ùpena.
12 U peàu Ietu ia âtou : « A mai ôtou. A kai ! »
Aòè i ūi atu tītahi me io âtou : « O ai òe ? »
Na te mea ua ìte meitaì âtou o Īa te Fatu.
13 U haatata mai Ietu, ua too i te faraoa
me ta Īa tuu atu ia âtou. Atii aneiho no te ià.
14 Oianei te toù o to Ietu haaìtetina
i to Īa tau kouâ ma hope o to Īa Tūhakaùatina
me i vāvena o te huaa mamate.
15 Ia pao te kaina, u peàu Ietu ia Timone Petero :
« E Timone e, tama a Iona, aha ua nui atu to òe kāòha ia ù,
i to âtou nei kāòha mai ? »
Ua hua atu Timone ia Ietu :
« E te Fatu e, ua ìte Òe i to ù kāòha ia Òe. »
U peàu Ietu ia īa : « A tāfai òe i to ù tau punua muto. »
16 Ua ūi hakaùa Ietu ia īa :
« E Timone, tama na Iona, aha u kāòha òe ia ù ? »
U hua atu Timone ia Ietu :
« E te Fatu e, ua ìte Òe i to ù kāòha īa Òe. »
U peàu Ietu ia īa : « A tiaì i to ù naho muto. »
17 Ua ūi Ietu ia Timone, o te toù o te ūitina :
« E Timone e, tama a Iona, aha u kāòha òe ia ù ? »
O Petero à, u memae te koekoe mēìa i te toù o te ūitina.
« Aha u kāòha òe ia ù ? »
Ua hua atu īa : « E te Fatu e, aòè he mea e naò atu ia Òe.
Ua ìte Òe i to ù kāòha ia Òe. »
U peàu Ietu ia īa : « A tiaì i to ù naho muto. »
18 He teào tiàtohu ta ù nei ia òe :
I te ava tino hou to òe, ua taka i to òe kooi,
ua hee na òe ta òe vāàna i to òe maìmaì.
Atià, i te ava e kooūa òe, e hapai òe i nā îìma
etià a taka kooi tītahi ènata ia òe
no te aahi i te vahi aòè òe i maìmaì. »
19 U peàu Ietu i hua teào mea haaìte i te hakatu o te matena
e mate ai Petero no te haakāìè i te Etua.
Ia pao hua teào, u peàu Ietu : « A ūtaì mai ! »
TOMINIKA E FĀ NO PAKATE
TETAUTINA O TE HĀMANI HANA A TE TAU ÀPOTORO 13, 14.43-52
14 Ua tihe Pauro me Paranape i Anetiokia o te Fenua Pihitia.
Ma te Tāpati, ua tomo âua i to he tinakoka.
43 Ia pao te pure, tavavātia te faètoa,
he mea nui te poì ati Iuta,
atii me i te tau ènata e tahi haatià me to ati Iuta,
te i ūtaì ia Pauro me Paranape.
O âua tooùa e tekatekao ana me âtou,
u haaūo no te tohe ma òto o te karatia o te Etua.
44 I te Tāpati ma hope mai,
u putuputu te pāpuafaè tata èka paotū
no te hakaòno i te teào o te Fatu.
45 U keitani me te haahaa te tau ati Iuta
ia ìte âtou i tēia putupututina o te faètoa nui.
U haaveke âtou i te teào o Pauro ma te paha atu ia īa.
46 Atià, haametaù koè, u peàu Pauro atii me Paranape :
« U pōpahitia maua no te haaìte i te teào a te Etua
ia ôtou òmua ìka. Ohia e titii ôtou i hua teào,
maakau ana aòè no ôtou te pohoè anatu,
enā a hee maua io te poì êteni.
47 Atii hoì ta te Fatu i peàu mai :
« U haatū au ia òe he àma no te tūìna i te tau êteni,
no te àve atu i te teào o te pohoè
tihe atu i te kotina o te aomāàma. »
48 Ia òno te tau êteni i hua ponateào,
u koakoa nui me to âtou haakāìè i te teào a te Fatu.
U haatià te tau ènata paotū
te i vevaòtia no te pohoè anatu.
49 Ma èià, u mevaha te teào a te Fatu ma hua fenua vii pu.
50 Atià ua hano te tau ati Iuta e haatohuì i te tau vehine hōhonu, poì taetae nui, e pakaihi i te Etua
vāàna i te ture a Moite, atii me te tau vivini o te pāpuafaè.
Na âtou te tumu o te haatōtōua me Pauro atii me Paranape.
U tiehi âtou i nā Àpotoro i vaho o to âtou fenua.
51 O âua hoì, e tūtū aa i te èpo me io te tau vaevae,
ua hee atu i te pāpuafaè Ikonio.
52 Ua pī me te koakoa te tau kouâ i òto o te Kuhane Meitaì.
TARAMO 100 (99) 1-2, 3, 5
E te Fatu e, na Òe e aahi ia mātou i ùna o te aanui o te pohoè, na Òe e pepeù no mātou i te avaputa o to Òe faè.
1 A hahi i te Fatu, e te fenua vii pu.
A pakaihi i te Fatu me te koakoa,
A tihe mai io Īa me te hīmene èkaèka.
3 A faì atu : he Etua te Fatu.
Na Īa i pēpena ia tātou,
No Īa hoì tātou, to Īa naho muto.
5 Tiàtohu nui to Īa vaièitina.
He paona koè to Īa kāòha mai.
E mau to Īa teào ma te tau tai anatu.
TETAUTINA O TE HĀMANI APOKARUPO 7, 9.14b-17
9 O au nei, o Ioane, ua ìte au i tītahi faètoa nui oko,
aòè e koàna i te ènata te tetau toofia âtou
me io te tau mataèinaa kē, te tau ati kē,
te tau fenua kē, te tau èo kē, èo kē.
Ua tū âtou i te aò o te Nohona kāìè me te Arenio.
Ua uhitia âtou me te kahu māìta,
te manamana teitā io to âtou îìma.
14 U hua atu au ia Īa : « E te hakaìki e. O Òe te i ìte. »
U peàu mai :
« Ua tihe mai âtou me i te tōua haamemae nui oko.
U hooi âtou me te haataìtaì i to âtou kahu,
i òto te toto o te Arenio.
15 No èià, ua tū âtou i te aò o te nohona o te Etua
me to âtou tāvini ia Īa me i te â me i te pō,
i òto o to te Etua Hiero.
O Tēia te i tū nei io he Nohona kāìè,
e āpuu ia âtou io to Īa faè.
16 I tēnei, koè nui e mate âtou i te one, te paka i te vai.
Koè nui e haapaòpaòtia âtou te òumati veàveà,
akoè à tītahi metani kena.
17 O te Arenio te tū ana i te aò o te Nohona kāìè,
e ìò to âtou Tiaì meitaì.
Na Īa e aahi ia âtou i te punavai pohoè.
U haamaha te Etua iho i to âtou vaimata.»
ALLELUIA ALLELUIA cf. In.10,14-15
Ietu, te Tiaì Meitaì, ua ìte i to Īa tau muto, ua ìte âtou ia Īa . No âtou, u haaìò Īa i to Īa pohoètina i uē i to Īa tau muto.
EVANERIO O IETU KIRITO VĀÀNA E IOANE 10, 27-30
I tēia mou pō, u peàu Ietu i te tau ati Iuta :
27 « U hakaòno tu ù tau muto i to ù èo,
ua ìte au ia âtou. Ua ūtaì âtou ia ù.
28 E tuu nei au ia âtou i te pohoè anatu.
Aòè âtou e mate anatu.
Aòè e hao tītahi ia âtou me io tu ù îìma.
29 Na tu ù Motua i tuu mai ia âtou.
He mana atu tu ù Motua i te tau mea ia ôtoa.
Aòè e koàna i tītahi e hao mai i te mēmau
me io te ìma o tu ù Motua.
30 O tu ù Motua me au nei e tahi anaè. »
TOMINIKA E ÌMA NO PAKATE
TETAUTINA O TE HĀMANI HANA A TE TAU ÀPOTORO 14, 21-27
21 I te oìoì, ua hee Pauro me Paranape i te pāpuafaè Terepe.
U hakako âua i èià i te Teào Meitaì hou mai.
He mea nui te ènata te i ìò he tau kouâ.
22 Ua hua Pauro me Paranape i Rutera, i Ikonio, i Anetiokia.
E hee atu aa, u haaūo âua i te koekoe o te tau kouâ
me te hakapahi ia âtou no te tohe i te haatià.
U haavivini âua i te mea e tomo tātou
i to he Patirēia o te Etua
ma te amo i te nuitina o te tau kōfii e haamemae.
23 Ua vae âua i te mou kōkooūa no te haatee
i tēia Èkaretia, i tēia Èkaretia.
Ia pao te pure me te ava haaone, u avai ia âtou
i te tiaìtina o te Fatu, i òto o Īa hoì to âtou haatià.
24 E hee ana i tītahi kēkē o te Fenua Pihitia,
ua tihe âua i te Fenua Pamafuria,
25 e hakako ana i te Teào i te pāpuafaè Perete.
I muì iho, ua hee âua i te kaavai Ataria.
26 Me i èià, ua piki i ùna te ihepe
me to âua kātau i Anetiokia, te tumu o to âua koutee.
I hua kaavai, ua puretia te Etua etià e toko
to Īa karatia ia âua no te hana i te hana ta âua i haapao nei.
27 I te ava ua tihe âua i Anetiokia,
u haaputuputu i te Èkaretia me to âua haaìte atu
i te tau mea paotū ta te Etua i hana me âua.
U haavivini atu âua pēhea u pepeù te Etua
i te avaputa o te Haatià i uē o te tau ènata êteni.
TARAMO 145 (144) 8-9, 10-11, 12-13b
A haameitaìtia ma te tau tai anatu te Fatu, te Etua o te aomāàma ! cf. 145, 1
8 He moû, he kāòha te hakatu o te Fatu :
U haatevee i to Īa pekē, ua pī i te uē.
9 U matavaièi anaè te Fatu no tātou paotū.
U haataetae i te tau mēmau ta Īa i pēpena.
10 E te Fatu e, a hahi te tau mēmau paotū,
Me te haahuaèkaèka to mataèinaa ia Òe.
11 E haavivini âtou i te kāìè o to Òe Patirēia,
E vānana âtou i to Òe tau hana mahaò.
12 E haaìte âtou i te tau ènata i to Òe mana,
To kāìè, to Òe hakāìkitina e haapupuà ia Òe.
13 To Òe Patirēia, he Patirēia e noho mau paona koè,
To Òe hakāìkitina e tū ai ma te tau tai anatu.
TETAUTINA O TE HĀMANI APOKARUPO 21, 1-5
1 Ua ìte au i te àni hou me te fenua hou.
Ua koè nui to mua àni me te fenua. Ua koè me te tai.
2 Ua ìte au e iho ana me io he àni, me i te aò o te Etua,
te pāpuafaè tapu, o Ierutaremi hou.
Ua tāpītia me te kahu naènaè,
tūtū me te vehine hou no to īa koìna mātiri.
3 Ua òno au i te èo oko e tihe mai me io he Nohona kāìè.
U peàu īa pēènei :
« Oianei te faè o te Etua i vāvena o te tau ènata.
E noho te Etua i vāvena o âtou.
E ìò âtou e mataèinaa o te Etua.
4 E haamaha te Etua i to âtou vaimata,
e haakoè Īa i te matena, i te uēuē me te memae paotū.
Ua naò hoì te aomāàma pēpenatia òmua. »
5 U peàu Te Etua e tū aa io he Nohona kāìè :
« Enā e haahou au i te tau mēmau paotū. »
U peàu hakaùa Īa : « A patu òe.
He teào tiàtohu hoì, teào hakahae koè hua teào. »
ALLELUIA ALLELUIA. cf. 1In.4, 8.11
He kāòha anaè te Etua : A kāòha atu kāòha mai te hoa i te hoa, me he mea u kāòha te Etua ia tātou.
EVANERIO O IETU KIRITO VĀÀNA E IOANE 13, 31-35
Ua kai Ietu me to Īa tau kouâ i te kainamau paona.
31 Ia uu hoì Iuta i vaho, u peàu Ietu :
« I tēnei, u haaìtetia te kāìè o te Tama a te ènata.
U haaìtetia me te kāìè o te Etua i òto o Īa.
32 Anoa u haakāìètia te Etua i òto o te Tama a te ènata,
e haaìte me te Etua i òto o Īa iho
i te kāìè o te Tama a te ènata.
U tata èka te ava e haakāìè te Motua
i te Tama a te ènata.
33 E tu ù tau hoa tāhia e, e noho au me ôtou
no te ava poto anaè. E ùmihi ôtou ia ù.
Me he mea to ù peàu òmua i te tau ati Iuta,
u peàu ia ôtou : I èià e hee au,
aòè e koàna ia ôtou te hee atu.
34 U haaìte au ia ôtou i te teào
aòè i peàutia òmua atu nei :
A kāòha atu kāòha mai te hoa i te hoa.
Me he mea u kāòha au ia ôtou,
a kāòha atu kāòha mai te hoa i te hoa.
35 Mēìa i to ôtou kāòha atu kāòha mai,
e ìte te tau ènata paotū he kouâ ôtou no ù.
TOMINIKA E ONO NO PAKATE
TETAUTINA O TE HĀMANI HANA A TE TAU ÀPOTORO 15, 1-2.22-29
1 I hua ava, ua hano te mou ènata me i te Fenua Iutea mai
i te hakako i te mea hou i te tau tunane tuehine
o te Èkaretia èka ana i Anetiokia.
U peàu âtou pēènei : Anoa u te e pātehetia te ènata
vāàna i te Ture a Moite, aòè e haapohoètia.
2 O īa te tumu o te tōtōua : u tōtohe atu tōtohe mai tahipito
me to âtou patitoo ia Pauro me Paranape.
No èià, u haatoitoitia e fiti i Ierutaremi o Pauro,
O Paranape atii me nā mou ènata kē,
no te tekatekao me te tau Àpotoro, te tau Kōkooūa,
etià e pao ai te tōtōua.
22 I muì iho, u haatoitoi te tau Àpotoro, te tau Kōkooūa
me te Èkaretia ia ôtoa
no te vae i nā keèe me i vāvena o âtou. U pōpahitia
hua nā keèe me Pauro me Paranape i Anetiokia.
Oianei to âtou inoa :
o Iuta peàutia Paratapa tītahi, o Tira tītahi,
nā ènata òno nui i mua o te tau tunane tuehine.
Ua tukutia ia âtou te hāmani nei :
23 « O mātou, te tau Àpotoro
me te tau Kōkooūa, to ôtou tau tuaana. Kāòha nui ôtou,
e te tau tunane tuehine êteni òmua, noho nei
i te Fenua Anetiokia, te Fenua Tiria me i te Fenua Kirikia.
24 Ua òno mātou nā tahipito tau tunane
i haahuìkē me te haapūpūkina ia ôtou ma to âtou teào.
Atià, koè nui na mātou i pōpahi atu ia âtou.
25 U haatoitoi mātou ma òto o te kuhane e tahi
no te vae i nā keèe me te pōpahi atu io ôtou, kātahi
me to mātou nā teina tāhia nui, o Paranape me Pauro.
26 O âua nā ènata te i haaìò i to âua pohoè
i uē i te inoa o Ietu Kirito to tātou Fatu.
27 U pōpahi hoì mātou
ia Iuta, ia Tira, na âua te haaìte fafa i hua teào.
28 U haatoitoi te Kuhane Meitaì me mātou nei
e tuu ia ôtou i te amona e hei aneiho.
29 Oianei :
Umoì e kai ôtou i te ìnaì kiko ùtunatia i te ètua tīkoe.
Umoì e kai i te toto,
akoè à i te ìnaì kiko tahekoètia te toto.
Umoì te hana mako. Me aotahi ôtou i hua teào,
e toitoi to ôtou hakatu pohoè. Oho te ìi ! »
TARAMO 67 (66) 2b-3, 5abd,7b-8
E te Etua e, a hahi te tau mataèinaa ia Òe ! A haahuaèkaèka âtou kōtoa ia Òe. cf. .67,4
2 A pupuà to Īa mata i ùna o tātou nei.
3 E ìtetia to Òe aanui io te aomāàma vii pu,
To Òe haapohoètina ma te tau fenua paotū.
5 A koakoa te tau mataèinaa, a hīmene âtou.
U vivini hoì Òe i te aomāàma me te toitoi.
U haatee Òe i te tau mataèinaa ma he fenua.
7 U haameitaì mai te Etua ia tātou.
8 A matavaièi mai te Etua ia tātou.
A pakaihi te fenua vii pu i to īa Fatu.
TETAUTINA O TE HĀMANI APOKARUPO 21, 10-14.22-23
10 Ua tau te Kuhane i ùna o au.
U aahitia au e te anera i ùna o te tuaivi tiketike.
Me i èià, u haaìte mai te anera i te pāpuafaè tapu,
o Ierutaremi.
Ua iho īa me io he àni, me io te Etua mai.
11 O te kāìè o te Etua te i haakeàpa i hua pāpuafaè.
U pupuà me he keâ menia pōnionio,
te keâ òutītee hōata nui.
12 Vii pu o īa, enā te pākeâ fātea, tiketike nui.
Enā ònohuu ma ùa avaputa i òto o hua pākeâ.
I mua o tēia avaputa, tēia avaputa,
e maò ana e tahi anera, e tiaì ana.
Ua patutia te inoa i ùna o te tau avaputa tikitahi :
he tau inoa o te ònohuu ma ùa ati o Iraene.
13 Enā e toù avaputa i te kēkē metani tuatoka,
e toù avaputa i te kēkē metani tokoàu,
e toù avaputa i te kēkē metani tiu,
e toù avaputa i te kēkē metani kanauu.
14 Ua tū mau te pākeâ o te pāpuafaè
ma ùna o te tau keâtaa tīònohuu ma ùa.
Ua patutia ma ùna o hua tau keâtaa
te inoa o te tau Àpotoro tīònohuu ma tokoùa o te Arenio.
22 I òto o te pāpuafaè, u te e ìte au i te Hiero.
O to īa Hiero hoì te Fatu, te Etua mana nui me te Arenio.
23 Aòè e haapupuàtia te pāpuafaè e te òumati, e te māhina.
U haakeàpa hoì te kāìè o te Etua i te pāpuafaè.
O te Arenio to īa àma uà tāpupu.
ALLELUIA ALLELUIA cf. In. 14, 25.27
Ua noho te Fatu pohoè i vāvena o tātou, U avai mai Īa i to Īa moû.
EVANERIO O IETU KIRITO VĀÀNA E IOANE 14, 23-29
I tēia mou pō, u peàu Ietu pēènei :
23 « Me kāòha te ènata ia ù, e aotahi īa i to ù teào.
E kāòha to ù Motua i hua ènata.
E tihe mai te Motua me au nei io īa, ua ihi maua i òto o īa.
24 Me kāòha koè te ènata ia ù, u aotahi koè īa i to ù teào.
Aòè na ù te teào e hakako nei au ia ôtou.
He teào o te Motua te i pahi mai ia ù.
25 U peàu ta ù i hua teào i te ava ua noho au pii me ôtou.
26 Atià, e pahi tu ù Motua ma to ù inoa i te Vevaò,
te Kuhane Meitaì.
Na hua Kuhane e hakako ia ôtou i te teào paotū,
e haamaakau i te mea paotū ta ù i peàu ia ôtou.
27 U avai au ia ôtou i te moû.
U vaièi mai au ia ôtou i tu ù moû. Aòè au e tuu nei
i te moû hakatu me te moû tuutia e to te ao nei.
Umoì e pūkina to ôtou koekoe. Umoì e haametaù.
28 Ua òno ôtou i te mea ta ù i peàu ia ôtou :
Enā e hee au me to ù hua mai io ôtou.
No to ôtou kāòha mai ia ù,
e koakoa ôtou mēìa i to ù hee io te Motua,
na te mea he tiketike atu te Motua ia ù.
29 U peàu au ia ôtou i tēnei, ma mua e pao ai,
etià i te ava e tihe mai e haatià ôtou. »
TE KOÌNA O TE FITINA O IETU IO HE ÀNI
TETAUTINA O TE HĀMANI HANA A TE TAU ÀPOTORO 1, 1-11
1 E Teofiro e, i òto to mua hāmani ta ù i patu,
u haaìte atu au i te tau mea paotū ta Ietu i hana,
ta Īa i hakako me i te tīmatatina
tihe atu i te â o to Īa fitina io he àni.
2 Òmua ma te Kuhane Meitaì,
u haamāàma Īa i te tau Àpotoro ta Īa i vae.
3 Ma te òa e fā ònohuu â i muì to Īa memae,
i hua tau Àpotoro, u haaìte Ietu ia Īa iho e pohoè ana.
U haatiàtohu i to Īa pohoètina ma te nuitina
o te tau hakatu kē.
U teào Īa me âtou i ùna o te Patirēia o te Etua.
4 I tītahi â, e teào aa Ietu me to Īa tau Àpotoro,
u peàu ia âtou umoì e titii ia Ierutaremi,
atià e tetaì i èià i te mea peàutia e te Motua.
5 U peàu atu Īa pēènei : « Me io to ù fafa,
ua òno ôtou u papatema Ioane me te vai.
Atià, ua poto te ava i toe
a tahi a papatematia ôtou i òto o te Kuhane Meitaì. »
6 O âtou à, u haaputupututia me Ietu, ua ūiūi atu pēènei :
« E te Fatu e, aha oianei te ava
o to Òe haahou hakaùa i te Hakāìkitina o Iraene ? »
7 U haahua atu Ietu : « Aòè no ôtou te ìte i te ava me i te â
ta te Motua i haatoitoi vāàna i to Īa maìmaì aneiho.
8 Atià, e iho mai te Kuhane Meitaì i ùna o ôtou,
me io Īa e koàna ia ôtou te ìi no te haatiàtohu ia ù,
i Ierutaremi, i te Fenua Tamaria,
tihe atu i te kotina paona o te aomāàma vii pu. »
9 Ia pao hua ponateào, e tiòhi aa te tau Àpotoro,
ua fiti Ietu i te ataàni. Ua naò Īa i òto o te kohu.
10 Ohia i te ava ua paekē Ietu, e maò ana âtou
me te tiòhi i te ataàni, u haatata mai nā ènata tokoùa,
uhitia me te kahu māìta, te i peàu :
11 « E te poì no Karirea, umaha e noho ôtou înei
e tiòhi ana i te ataàni ?
O tēnei Ietu te i hapaitia me i vāvena o ôtou,
e tihe hakaùa mai Īa
me hua hakatu ta ôtou i ìte ia Īa e fiti ana io he àni. »
TARAMO 47 (46) 2-3, 6-7, 8-9
Ua fiti te Etua i vāvena o te hīmene hahi. Ua fiti te Fatu e tani ana te pū. 47, 6
2 E te tau mataèinaa paotū, a papaki i te îìma,
A hahi i te Etua ma to ôtou taaàu koakoa.
3 O te Fatu te Tiketike nui : ia Īa te Kāìè.
O Īa te Hakaìki nui o te fenua ia ôtoa.
6 Ua fiti te Etua i vāvena o te hīmene hahi.
Ua fiti te Fatu e tani ana te pū.
7 A haatani i te pū no to tātou Etua.
A ùtu i te pahu no te hahi i te Hakaìki.
8 O te Etua te Hakaìki nui o te aomāàma.
A haaìte atu ôtou i ia Īa ma òto o te tau hīmene.
9 U vivini te Etua i te tau mataèinaa êteni.
Ua tū te Etua i ùna o to Īa nohona kāìè.
TETAUTINA O TE HĀMANI I TO HEPEREO 9,24-28--10, 19-23
9,24 Aòè Ietu i tomo i òto o te Vahi tapu hanatia e te îìma
ènata, he ata anaè hua Vahi o te Ahu tapu tiàtohu.
Ua tomo Ietu i òto o te àni toitoi,
etià e tū Īa i mua o te Etua no te vevaò i uē ia tātou.
25 Aòè e ùtuna hakaùa Ietu i to Īa ùtuna hēana,
me he mea te tāuà nui te i tomo i tēia èhua, i tēia èhua,
i òto o te Vahi tapu no te ùtuna i te toto o te tau ânimara
aòè to īa iho toto. Anoa ua hana atii Ietu,
26 he mea nui to Īa memae me te matena
me i te tumu u pēpenatia te aomāàma nei.
Atià, i tēnei ava paona o te ao nei,
e tahi anaè to Ietu haaìte ia Īa iho no te haakoè i te mikeo
ma to Īa ùtuna hēana.
27 E mate te tau ènata paotū, atià, e tahi matena anaè to âtou.
I muì iho, e haavātia âtou e te Etua.
28 Atii to Ietu Kirito : ua ùtuna ia Īa aneiho,
e tahi ùtuna anaè no te haakoè i te mikeo o te poì nui.
E haaìte iho ia Īa, aòè mēìa i te mikeo,
atià no te haapohoè i te tau ènata e tetaì nei ia Īa.
10,19 No èià, e tu ù tau tunane tuehine,
e koàna ia tātou te tomo i òto o te Ahu tapu o te àni
mēìa i te toto o Ietu te i mate i uē ia tātou.
20 He aanui hou kāneatia e Ietu no tātou,
o īa hoì to Īa iho tino me he avaputa pohoè
te i taki i te tapa me i mua o te Ahu tapu.
21 Ohia enā no tātou e tahi Tāuà nui
e vivini nei i te faè o te Etua,
22 a tomo tātou i òto o te Vahi tapu, me te koekoe taìtaì,
koekoe haatià, te kuhane hooitia ma te haakoè i te mikeo,
te tino pihautia me te vai mā.
23 A tohe mau tātou teka koè e tetaì ana
i te mea ta tātou i haatià nei.
ALLELUIA ALLELUIA. cf. Ta.47, 6.10
Ua fiti te Etua ma vāvena o te tau hīmene hahi. Ua fiti te Etua ma ùna atu o te ao nei.
EVANERIO O IETU KIRITO VĀÀNA E RUKA 24, 46-53
Ia tū hakaùa Ietu Kirito, u haaìte ia Īa iho i to Īa tau kouâ
me to Īa peàu ia âtou :
46 « Ua patutia : e memae te Kirito, ma te pō toù,
e tū hakaùa Īa me i vāvena o te huaa mamate.
47 Ma to Īa inoa, e haaìtetia atu
i te fāìutina o te koekoe no te haakoè i te mikeo
i te tau mataèinaa paotū, atià to mua i Ierutaremi.
48 O ôtou te tau ènata e haatiàtohu i hua teào.
49 Enā, e haaiho au i ùna o ôtou i te vaièitina
ta tu ù Motua i peàu atu.
A noho ôtou i Ierutaremi,
tihe atu e fāfītia ôtou i te ìi me i ùna mai. »
50 I muì iho, u aahi Ietu ia âtou tihe atu i Petania.
E hapai ana i nā îìma, u haameitaì Īa ia âtou.
51 Ohia u haameitaì Ietu ia âtou,
ua paekē me io âtou me te hapaitia io he àni.
52 O âtou à, ua moe haatona i mua o Īa.
Ua hua âtou i Ierutaremi pī i te koakoa.
53 Paotū te â, enā âtou i òto o te Hiero, e hahi aa i te Etua.
TOMINIKA E FITU NO PAKATE
TETAUTINA O TE HĀMANI HANA A TE TAU ÀPOTORO 7, 55-60
55 Atià o Tepano pī i te Kuhane Meitaì,
e feau ana i te ataàni to īa mata,
ua ìte īa i te kāìè nui o te Etua.
Ua ìte īa me Ietu e tū ana i te ìma oko o te Etua.
56 U peàu Tepano : « Ua ìte au i te àni pepeùtia.
Ua ìte au i te Tama a te ènata,
e tū ana i te ìma oko o te Etua. »
57 O te tau ènata me te Tuneteri,
ua pā i to âtou puaìna me te taaàu.
I muì iho, u tohuti nātoa âtou vii pu o Tepano
me ta âtou viitoi ia īa i vaho o te pāpuafaè.
U pehipehi âtou ia Tepano me te keâ.
58 Ua avai te tau ènata haatiàtohu i to âtou tau kahu
i pii nā vaevae o tītahi mahaì peàutia o Tauro.
59 Ohia u pehi âtou me te keâ i ùna o Tepano,
u haafitipona īa i tēnei pure :
« E te Fatu Ietu e, a āpuu i to ù kuhane. »
60 I muì iho, e noho muò ana, u taaàu me te èo oko :
« E te Fatu e, umoì e haapiò ia âtou i hua mikeo."
Ia pao hua teào,
ua moe Tepano i te moetina o te mate nui.
TARAMO 97 (96) 1-2b, 6.7c,9
O te Kirito te Fatu, te i haatiketiketia io he kāìè.
1 O te Fatu te hakaìki nui. A koakoa te fenua.
A haaèkaèka te tau motu tini, tini.
2 O te Toitoi me te Tiàtohu nā pou o to Īa Nohona.
6 U haamevaha te papafenua i to Īa Toitoi noa.
Ua ìte me te mahaò te tau ènata i to Īa Kāìè.
7 I mua o te Fatu, a noho muò te tau anera paotū.
9 E te Fatu e, o Òe te Tiketike nui.
U vivini Òe i te fenua ia ôtoa.
U tiketike atu Òe i te tau anera paotū.
TETAUTINA O TE HĀMANI APOKARUPO 22, 12-14.16-20
O au nei o Ioane. U peàu mai Ietu :
12 « E tihe au. Aòè te haatevee. E tuu au i te tuki
i te tau ènata tikitahi vāàna i to âtou hana.
13 O au nei te Tumu me te Hiku. Te Hāmua me te Hāmuì.
Te Tīmatatina me te Paona.
14 Mamau te poì i hopatia to âtou kahu,
etià e kai âtou i te puku o te tumuâkau o te Pohoè
me te tomo i òto o te pāpuafaè ma te tau avaputa.
16 « O au nei Ietu. U pōpahi au i tu ù anera
no te haaìte atu i te teào nei i ùna o te tau Èkaretia.
O au te huì me te poupuna o Tavite, te hakaìki.
O au te Fetū o te oatea e pupuà nei i te pōpōuì. »
17 U peàu te Kuhane me te Vehine hou ia Ietu :
« Mave. Mave mai ! »
Ia òno te ènata i te mea nei, a peàu me īa :
« Mave. Mave mai ! »
No te paka i te vai tītahi, a inu īa i te vai o te Pohoè.
A kapu i te vai, e utukoètia.
18 O au Ioane. I mua o te tau ènata hakatahi
te i òno i te teào perofeta o te hāmani nei,
u haatiàtohu au i te mea nei :
Anoa e poho pu tītahi i te teào o tēnei hāmani,
e haatopa te Etua i ùna o īa i te tuki pē
te i patutia i òto o te hāmani.
19 Anoa e taki pu tītahi i te mou pona me io he hāmani nei,
e taki te Etua me io īa i te puku o te tumuâkau o te Pohoè,
e haapākeka te Etua i to īa tomotina
i òto o te Pāpuafaè tapu,
vāàna i te mea patutia i òto o te hāmani nei.
20 O te i haatiàtohu i te teào nei, u peàu :
« E tihe au. U tata èka te ava paona. »
Amene ! Mave mai, e te Fatu Ietu e !
ALLELUIA ALLELUIA. cf. In.14, 18
Aòè e avai te Fatu ia ôtou he tau tama motua koè, kui koè. E hua mai Īa io ôtou. A tahi a pī i te koakoa ôtou nui.
EVANERIO O IETU KIRITO VĀÀNA E IOANE 17, 20-26
I te ava ua taha Ietu me i te ao nei io to Īa Motua,
e feau ana, ua pure Īa pēènei :
20 E te Motua e, aòè au e pure i uē i tu ù tau kouâ anaè,
ua pure au i uē i te tau ènata te i haatià
mēìa i to âtou teào i ùna o au.
21 Ua pure au etià e haatahi âtou nui.
Me he mea o Òe, e te Motua e,
i òto o au, o au nei i òto o Òe,
atii aneiho e tahi âtou i òto o taua,
etià e haatià to te ao nei na Òe i pahi mai ia ù.
22 U vaièi atu au ia âtou i te kāìè ta Òe i tuu mai,
etià e haatahi âtou me he mea e haatahi taua.
23 I òto o âtou au nei. O Òe i òto o au,
etià e toitoi noa to âtou haatahitina.
Ma èià, e ìte to te ao nei na Òe i pahi mai ia ù,
u kāòha Òe ia âtou me he mea ta Òe i kāòha mai ia ù.
24 E te Motua e, u maìmaì au i èià au nei,
i èià me te tau ènata ta Òe i tuu mai,
etià e ìte âtou me te mahaò i te kāìè ta Òe i tuu mai.
U kāòha mai hoì Òe òmua atu,
ma mua te pēpena i te aomāàma.
25 E te Motua toitoi noa e, aòè to te ao nei i ìte ia Òe.
Ua ìte au ia Òe.
Ua ìte me âtou nei na Òe i pahi mai ia ù.
26 U haaìte au ia âtou o ai Òe, e te Motua e.
Tōtahi atu ta ù e haaìte ia âtou i to Òe inoa,
etià me he mea u kāòha mai Òe ia ù,
kāòha atu kāòha mai te hoa i te hoa.
I òto o âtou hoì to Òe kāòha, atii me au i òto o âtou.
TĀMETĪ O TE KOÌNA PENETEKOTE
A vae mai e tahi me io tēnei e fā tetautina
1.- TETAUTINA O TE HĀMANI A MOITE PEÀUTIA TENETE
11, 1-9
1 I te fenua vii pu, u haafitipona te tau ènata paotū
i te èo e tahi me te tau ponateào hua mea aneiho.
2 E titii aa te tau ènata
i te fenua kēkē tihena o te òumati, ua taha atu âtou
io he Fenua Metopotamia, akoè à io he Fenua Hineare,
ua noho âtou io he kaavai tapavaù. I èià to âtou noho.
3 U peàpeàu âtou pēènei :
« A pau ! A kānea tātou i te èpo kaaea taotia. »
O hua èpo taotia, me he keâ keetū no âtou.
O te korotā keekee to âtou himā no te haapipii i te tau keetū.
4 U peàpeàu te tau ènata pēènei : « A pau.
A ato tātou i te pāpuafaè me te mōuna i vāvena ahau.
A haatiketike tihe io te ataàni i te kapua o te mōuna.
A haaoko nui i to tātou inoa
etià aòè e haatavavātia tātou i te tau fenua kē vii pu. »
5 Ua iho mai te Fatu Etua no te tiòhi i te pāpuafaè,
io te mōuna tiketike atotia e te tau ènata.
6 U peàu te Fatu Etua : « He mataèinaa e tahi aneiho âtou nui.
E tahi èo anaè to âtou. Oianei te tīmatatina.
E aha te mea e haapākeka i to âtou tau hīa kē ?
7 Epō. A haahiiveke mātou i to âtou èo
umoì e vivini te ènata hana i te ènata hana. »
8 Ma èià, u haatavavā te Fatu Etua i te tau ènata
io te tau fenua kē vii pu.
U hakaēa âtou i te hana ato i te pāpuafaè.
9 O īa te piò ua apatia te inoa o hua pāpuafaè o Papere ;
o Hikitararā ma he èo ènata.
I èià hoì, u haahiiveke te Fatu Etua i te èo o te tau ènata.
Ma èià, u tavavā te tau ènata ma he tau fenua kē, fenua kē.
2.- TETAUTINA O TE HĀMANI A MOITE PEÀUTIA EHOTO
19, 3-8.16-20
Ua pao e toù māhina me i to âtou uutia
i vaho o te Fenua Ekipito,
ua tihe te tau tama Iraene io te tumu o te tuaivi Tinai.
3 O Moite à, ua fiti i ùna o te tuaivi no te haaâvei me te Etua.
Me i ùna o te tuaivi, u vevaò te Etua ia Moite pēènei :
« Oianei to ù teào i te ati o Iakopo,
ta òe e àve atu io te tau tama Iraene.
4 Ua ìte ôtou pēhea u haahina au i te poì Ekipito.
U aahi au ia ôtou înei, me he mea te manu akuira
te i tautua i to īa tau kiokio ma ùna o to īa pekeheu.
Na ù i aahi mai ia ôtou i taa o au nei.
5 I tēnei, anoa e haaòno ôtou i to ù teào,
anoa e aotahi atu i to ù Piimau,
e ìò ôtou he mataèinaa vaetia e au
me i vāvena o te tau mataèinaa paotū o te aomāàma vii pu.
Na te mea, na ù anaè te tau fenua ia ôtoa.
6 E ìò ôtou no ù he ati tāuà, he mataèinaa peàto.
Oianei te teào ta òe e haaìte atu i to Iraene. »
7 Ua iho Moite me i ùna o te tuaivi.
U âvei īa me te tau kōkooua o te mataèinaa.
Ua faì atu i te teào a te Fatu Etua.
8 U haahua te mataèinaa ia ôtoa ma he èo e tahi :
« E aotahi tātou i te teào paotū a te Fatu Etua. »
Ua àve Moite i hua teào io te Fatu Etua.
16 Ma te toù o te pō, i te pōpōuì tika,
ua tani te hatutii, ua topa te uià,
ua naò te tuaivi i te kohu maù nui,
ua ònotia te tanitina èo òa òa o te pū.
U emièe te mataèinaa i òto o te pāpua.
17 Na Moite i haauu i vaho i te mataèinaa,
no te haaâvei me te Etua.
Ua tū âtou paotū i te tumu o te tuaivi.
18 Ua naò i te auahi te tuaivi Tinai.
Ua iho mai hoì te Fatu Etua i òto o te ahi.
Ua fiti te auahi me he mea to te ahi uà tāpupu.
U feùu te tuaivi.
19 Ua tani te pū, oko atu, oko atu te tanitina.
U pohā te èo o Moite ; me i òto o te hatutii te èo o te Fatu.
20 Ua iho mai te Fatu Etua io he kapua o te tuaivi.
U vevaò te Fatu Etua ia Moite me io te kapua o te tuaivi.
Ua fiti Moite io te Fatu Etua.
3.- TETAUTINA O EHEKIERE PEROFETA 37, 1-14
1 I ùna o au nei te ìma o te Etua.
U aahi mai te Kuhane o te Etua io tītahi kaavai
tāpītia me te tau ivi e tavavā aa uo he tuaèpo.
2 Ua naò te tuaèpo i te nuitina o te tau ivi moô paa.
Ua ape mai te Kuhane no te vii i vāvena o âtou.
3 U peàu mai te Fatu : « E te ènata e,
aha e pohoè hakaùa te tau ivi nei ? »
U haahua : « E te Fatu Etua e, o Òe te i ìte. »
4 U peàu mai te Fatu :
« A haafitipona i te teào perofeta i ùna o tenā tau ivi.
A peàu pēènei :
E te tau ivi moô e, a haaòno i te teào o te Fatu Etua.
5 Enā e haauu au i te ao i òto o ôtou. A tahi e pohoè ôtou.
6 E tāpī au ia ôtou me te uaua me te kiko,
e haauhi au ia ôtou me te kii.
E puhi au i te ao i ùna o ôtou. E pohoè ai ôtou.
E vivini ôtou o au te Fatu Etua. »
7 Ohia u pohā tu ù èo vāàna i te teào peàutia mai,
ua ònotia te tuìtuì, i muì iho te pooìna oko nui.
U haapii te tau ivi : te ivi me te ivi, te ivi me te ivi.
8 Ua tāpītia âtou me te uaua me te kiko, me te kii ma ùna.
Atià, aòè te Kuhane i òto.
9 U peàu mai te Fatu :
« E te ènata e, me he perofeta a vevaò òe i te Kuhane.
A peàu òe : oianei te teào o te Fatu. E te Kuhane e, a mai !
A mai me io nā kēkē e fā o te metani !
A mai ! A puhi i ùna o te tūpāpaù nei ! E pohoè âtou. »
10 U vevaò au i te teào perofeta vāàna te i peàu mai.
A tahi a tau te Kuhane i ùna o te tūpāpaù. U pohoè âtou.
U maô anamai âtou paotū, hakatu me te faètoa nui, nui oko.
11 U peàu mai te Fatu :
« E te ènata e, o te tau ivi nei te mataèinaa Iraene.
U peàu hoì âtou pēènei :
Ua moô to tātou ivi, ua koè te ao, ua naò tātou nui. »
12 A teào perofeta òe ia âtou me te peàu pēènei :
Oianei te teào o te Fatu Etua :
Enā e vāvahi au i to ôtou ana tūpāpaù me te haauu i vaho,
e to ù mataèinaa e.
E haahua au ia ôtou io to ôtou fenua tumu.
13 E ìte ôtou o au te Fatu Etua
i te ava e pepeù au i to ôtou ana tūpāpaù
me te haauu i vaho ia ôtou nui.
14 E haaihi au i to ù Kuhane i òto o ôtou.
E pohoè ôtou. E noho hakaùa ôtou io to ôtou fenua tumu.
Oianei to ù teào, o īa hoì te mea ta ù e hana ai. »
4.- TETAUTINA O TE PEROFETA IOERE 3, 1-5a
1 He teào na te Fatu.
« E kiini au i tu ù kuhane i ùna o te tau mēmau i pēpenatia,
e ìò he perofeta ta ôtou tau tama,
e haamāàmatia te tau ànamotua ma òto o te moemoeā,
atii me te poì hou ma òto o te tau haaìtetina me he moemoeā.
2 I hua ava, e kiini atii au i tu ù kuhane ma ùna o te tau tāvini.
3 E hana au i te tau hana mahaò nui
io he ataàni atii io he fenua :
he toto, he ahi, he tau pūkohe ahi.
4 E ìò te òumati he pō keevō. E ìò te māhina me he toto
oa tihe mai te  o te Fatu o te haavātina.
5 E pohoè ai te tau ènata ia vevaò atu âtou i te Inoa o te Fatu. »
TARAMO 104 (103), 1-2, 1a.24, 27-28, 29b-30
E te Fatu e, a pahi mai i to Òe Kuhane
no te haahou i te hakatu o te fenua. cf.103,30
1 A haameitaì i te Fatu, e tu ù kuhane e.
E te Fatu e, tu ù Etua e, u tiketike Òe.
Ua tāpītia Òe me te kāìè,
2 O te àma te kahu e fāfī ia Òe.
1a A haameitaì i te Fatu, e tu ù kuhane e.
24 He mea nui to Òe tau hana, e te Fatu e.
Na to Òe māàma i pēpenatia te tau mēmau paotū.
Ua pī te fenua i to Òe tau taetae.
27 O âtou paotū e tetaì nei ia Òe
No te koàka mai to âtou oà, i te ava e hei.
28 U vaièi atu Òe : e kohi mau âtou.
U pepeù i to Òe îìma : e kai haamaòna âtou.
29b Anoa e too Òe i to âtou menava,
E mate nui âtou me te hua io he èpo.
30 Na Òe e puhi i te ao, e pēpena hou âtou.
U haahou Òe i te hakatu o te fenua.
TETAUTINA O TE HĀMANI A PAURO PEÀTO I TO ROMA
8, 22-27
22 Ua ìte hoì tātou tihe i tēnei mou â,
u taaàu me te uē hua tau mēmau,
me he uē o te vehine haatotohi ana i te tama.
23 Aòè o te tau mēmau pēpenatia anaè.
O tātou nei tahipito te i koàna mai i te Kuhane Meitaì
me he to mua hope taetae me io te Etua,
e kōhoà nei me te uēuē o tātou e tetaì ana
na te Etua e haaìò ia tātou he tau tama na Īa,
me te haapao ònaòna i to tātou haapohoètina.
24 U haapohoètia tātou, e mea à i òto o te tetaìtina aneiho.
Ia ìte tātou i te hakatu pohoè ta tātou e tetaì nei,
e koè ai te tetaìtina.
O ai hoì te i tetaì i te mea ua ìtemata ?
25 Atià, e tetaì nei tātou i te tau mea u te e ìtemata.
Ua tohe mau tātou e kōhoà ana i hua taetae.
26 Atii ua toko te Kuhane Meitaì i to tātou koekoe pepee.
Aòè tātou i have i te hakatu o te pure.
Atià, u vevaò te Kuhane Meitaì i uē ia tātou
ma he èo mamaioo,
u te e koàna i te ponateào i te haavivini mai.
27 O te Etua te i ìte i te koekoe o te tau ènata ;
u vivini Īa e aha to te Kuhane kōhoà i òto o tātou.
E tahi maìmaì hoì to te Etua me to te Kuhane vevaòtina
i uē ia tātou, te mataèinaa o te Etua.
ALLELUIA ALLELUIA
Mave mai, e te Kuhane Meitaì e.
A iho mai io he koekoe o mātou.
A haahoutia mātou e to Òe kāòha.
EVANERIO O IETU KIRITO VĀÀNA E IOANE 7, 37-39
37 I te â paona o te koìna, he â koìna nui tēia,
ua maô Ietu me to Īa peàu ma he èo oko pēènei :
« Me paka te ènata i te vai, a tihe mai io ù.
38 E fāinu au i te ènata e haatià ia ù.
Me he mea i patutia i òto o te Hāmani tapu :
E tahe te vai pohoè me i òto o Īa. »
39 U peàu Ietu i hua teào no te haavivini
i te Kuhane Meitaì ta te poì haatià ia Ietu e āpuu ai.
Aòè hoì i tuutia atu nei te Kuhane Meitaì
na te mea aòè Ietu i haakāìètia.
TE KOÌNA O TE PENETEKOTE
TETAUTINA O TE HĀMANI HANA A TE TAU ÀPOTORO
2, 1-11
1 I te ava i faitia te Koìna Penetekote,
io he vahi e tahi, u putupututia te poì haatià paotū.
2 Ua ònoputia anamai te pooìna me io he àni mai,
hakatu me he tuaio metani oko nui.
Ua pī i hua pooìna te faè i èià ua noho âtou.
3 Ua ìte âtou i te mēmau hakatu me he èò ahi
te i tuhatia me te tau e tahi i ùna o âtou tikitahi.
4 A tahi a pī âtou paotū i te Kuhane Meitaì,
me to âtou tekatekao ma he èo kē, èo kē,
vāàna ta te Kuhane Meitaì i maìmaì e peàu âtou.
5 Enā ua noho i Ierutaremi te tau ati Iuta, poì pure,
te i titihe mai me i te tau fenua paotū i aò o te àni.
6 Mēìa i te pooìna, u putuputu mai te faètoa.
U pūpūkina âtou na te mea ua òno âtou tikitahi
i te tau Àpotoro e teào ana ma òto to âtou iho èo.
7 U mahaò âtou me te emièe e peàu ana :
« Aòè à me i te Fenua Karirea mai
tēnei poì paotū e teào nei ?
8 Pēhea òa tātou tikitahi e òno ia âtou
e hakako ana nei ma òto o to tātou èo tumu ?
9 To Paratia, to Metai, to Erama, te huaa ènata
e noho nei i te Fenua Metopotamia, Iutea,
Kapatokia, Ponoto, Atia, Ferukia,
10 Pamafuria, Ekipito, Tiripia tata èka me Kirene,
to Roma manihii înei, te poì fānautia ati Iuta,
11 me te poì haaati Iuta mēìa i to âtou haatià,
to Kerete, to Arapia, ua òno tātou paotū ia âtou
e teào ana i to tātou èo
no te haaìte i te hana mahaò o te Etua. »
TARAMO 104 (103) 1.24ac, 29b-30, 31.34
Na Òe e puhi i te ao, e pēpena hou âtou.
U haahou òe i te hakatu o te fenua. cf. 104, 30
1 A haameitaì i te Fatu, e tu ù kuhane e.
E te Fatu e, tu ù Etua e, u tiketike Òe.
24 He mea nui to òe tau hana, e te Fatu e.
Ua pī te fenua i to Òe tau taetae.
29 Anoa e too Òe i to âtou menava,
E mate nui âtou me te hua io he èpo.
30 Na Òe e puhi i te ao, e pēpena hou âtou.
U haahou Òe i te hakatu o te fenua.
31 A kāìè te Fatu no te tau tai e tihe anatu.
A èkaèka te Etua i òto o to Īa tau hana.
34 Koù e haaèkaèka to ù mou hīmene i te Fatu.
O tu ù koakoa te haapii me te Etua anaè.
TETAUTINA O TE HĀMANI A PAURO PEÀTO I TO ROMA
8, 8-17
8 E tu ù tau tunane tuehine,
O te tau ènata e pohoè nei vāàna i te hīa o te tino,
aòè âtou e haaèka i te Etua.
9 O ôtou à, u te e pohoè ôtou vāàna i te hīa o te tino,
atià vāàna i ta te Kuhane i peàu ia ôtou,
me noho te Kuhane o te Etua i òto o ôtou.
Me koè te Kuhane o Ietu Kirito i òto o te ènata,
aòè i haakē hua ènata me te Kirito.
10 Me noho te Kirito i òto o ôtou,
e aha à he tino mate vave to ôtou mēìa i te mikeo,
ua ìò te Kuhane Meitaì te tumu o to ôtou pohoè
mēìa u haatoitoitia ôtou i mua o te Etua.
11 Me noho i òto o ôtou te Kuhane o te Etua
te i haatū hakaùa ia Ietu me i vāvena o te huaa mamate,
na hua Kuhane te i haatū hakaùa ia Ietu,
e haapohoè i to ôtou tino mate vave.
O īa te hana o te Kuhane te i òto o ôtou.
12 No èià, e tu ù tau tunane tuehine,
aua e haatee to te tino ia tātou,
no te pohoè vāàna i te hīa o te tino.
13 Anoa e aotahi ôtou i hua tau hīa, e mate anatu ôtou.
Atià me òomi ôtou, ma te mana o te Kuhane Meitaì
i hua tau hīa pē o te tino, e pohoè ôtou.
14 O te tau ènata paotū haateetia e te Kuhane o te Etua,
ua ìò âtou he tau tama a te Etua.
15 Aòè hoì i koàna ia ôtou te Kuhane
hakatu me to te poì haamōèhutia
no te aotahi atu me te koekoe haametaù.
Na te Kuhane ta ôtou i koàna mai,
i haaìòtia ôtou he tau tama hopu.
I òto o hua Kuhane, u taaàu tātou : « E Apa. E te Motua e. »
16 U haatahi te Kuhane o te Etua me to tātou kuhane
no te faì atu he tau tama tātou a te Etua.
17 Anoa he tau tama tātou, na tātou hoì
te taetae tapaetia e te Etua no to Īa mataèinaa.
E àva tātou i hua tau taetae me te Kirito.
Anoa e memae tātou i te memae kātahi me te Kirito,
etià e haakāìètia tātou kātahi me Īa.
PURE VEVAÒ I TE KUHANE MEITAÌ
E te Kuhane Meitaì e,
A iho mai io he koekoe o mātou.
A pahi mai me i ùna i to Òe māàma.
Mave mai, e te Motua o te poì veve.
O Òe te i vaièi i te taetae kuhane,
E to mātou māàma, a ihi mai io mātou.
E te vevaò meitaì nui.
E te manihii moû oko :
A haakoè i te momoù.
Ma òto o te hana, o Òe te hakaēa.
Ma òto o te veàveà, o Òe te kamaìi.
Ma òto o te uē, o Òe te èkaèka.
E te māàma me io he àni mai,
A mave me te haapī nui,
I te koekoe o to Òe poì haatià.
No te naò to Òe mana Etua,
E koè ai te meitaì i òto o te ènata.
O te ìno nui te i toe i òto o mātou.
A haamā i te mea èpo,
A haatokū i te mea moô,
A haapohoè i te mea takapii.
A nevaì i te mea feò.
A haamāhanahana i te mea anu.
A haatoitoi i te mea pikopiko.
A vaièi mai i te poì haatià
Te i tohe mau i te vevaò ia Òe,
I te fitu o to Òe taetae kāòha.
A toko mai no te hana meitaì.
A haatee mai tihe i te àni,
I èià te koakoa paona koè. Amene
ALLELUIA ALLELUIA.
Mave mai, e te Kuhane Meitaì e :
A ihi mai i òto o mātou.
A haaveàveà i to mātou koekoe i to Òe kāòha.
EVANERIO O IETU KIRITO VĀÀNA E IOANE 14, 15-16 23-26
I te ava ua taha Ietu me i te ao nei io to Īa Motua, u peàu Īa :
15 « Me kāòha ôtou ia ù, e aotahi ôtou i tu ù tau teào.
16 O au à, e pure au i tu ù Motua.
Na Īa e tuu ia ôtou i te Vevaò,
o īa hoì te Toko te i noho anatu me ôtou. »
23 U peàu Ietu :
« Me kāòha te ènata ia ù, e aotahi īa i to ù teào.
E kāòha to ù Motua i hua ènata.
E tihe mai te Motua me au nei io īa, ua ihi maua i òto o īa.
24 Me kāòha koè te ènata ia ù, u aotahi koè īa i to ù teào.
Aòè na ù te teào e hakako nei au ia ôtou.
He teào o te Motua te i pahi mai ia ù.
25 U peàu ta ù i hua teào i te ava ua noho au pii me ôtou.
26 Atià, e pahi tu ù Motua ma to ù inoa
i te Vevaò, te Kuhane Meitaì.
Na hua Kuhane e hakako ia ôtou i te teào paotū,
e haamaakau i te mea paotū ta ù i peàu ia ôtou. »
TE KOÌNA O TE ETUA TOÙTAHI
TETAUTINA O TE HĀMANI TOUMAKI 8, 22-31
22 U taaàu te Māàma o te Etua e peàu ana pēènei :
« U pēpena te Etua ia ù, òmua naoti,
ma mua to Īa haaìte atu i to Īa maìmaì,
ma mua to Īa tau hana tumu.
23 Ua tū mau au nei ma mua o te tau tai hakatahi,
aòè i pēpenatia atu te fenua.
24 U haatuputia au ma mua i te kāneatina
o te take o te tai hōhonu, ma mua ua tahe te vaipuna.
25 U fānautia au ma mua i te haatūtina
o te tau tuaivi me te tau pūkei,
26 ma mua na te Etua i pēpena i te fenua,
te vahi teitā, te papakeâ me te èpo kaaea.
27 I èià au nei, ia haamau te Etua i te ataàni,
me to Īa haaàpoipoi i te kotina o te tainui.
28 I èià au nei
i te ava u haapī te Etua me te ūa i te ao io he ataàni.
I èià au nei
ia haapihiti te Etua i te tau punavai me io he peteò,
29 I èià au nei
i te ava u tāmau te Etua i te kotina o te tai, oa fiti i uta atu.
I te ava u haamau te Etua i te tumu o te fenua,
30 enā au nei me he tuhuna ma te kaokao o te Etua.
I tēia â, i tēia â, u haaèka au ia Īa,
31 e keu ana i mua o Īa, keu ana io he fenua vii pu.
U koakoa hoì au i vāvena o te tau ènata. »
TARAMO 8, 4-5, 6-7, 8-9
E te Fatu, to mātou Etua e, u pupuà te kāìè
o to Òe inoa ma he fenua ia ôtoa, ia ôtoa. 8, 2
4 A tiòhi tātou i te àni pēpenatia e to Òe mana,
Te māhina me te tau fetū ta Òe e haamau.
5 E aha te ènata vāàna e maakau Òe ia īa ?
E aha te ènata vāàna e āpuu meitaì Òe ia īa ?
6 To Òe hīa : a ìò te ènata aìna tūtū me te anera.
Ua fāfī Òe i hua ènata me te kāìè me te òno nui.
7 O īa te vivini o te tau mēmau ta Òe i pēpena.
Ma aò o to īa vaevae hua tau mēmau paotū :
8 Te tau naho pifa me te muto,
Me te tau puaa fio,
9 Te tau manu ona nei io he ataàni,
Te tau ià e totoo nei io he tai.
TETAUTINA O TE HĀMANI A PAURO PEÀTO I TO ROMA
5, 1-5
E tu ù tau tunane tuehine.
1 Ma to tātou haatià ia Ietu Kirito,
u haatoitoitia tātou i mua o te Etua.
Mēìa i to tātou Fatu Ietu Kirito, e koàna ia tātou
te tū me te koekoe moû i te aò o te Etua.
2 Ma io Ietu Kirito, mēìa i to tātou haatià ia Īa,
ua tomo tātou i òto o te karatia a te Etua,
ta tātou i koàna mai nei, atii hoì u tetaì nei tātou
me te koakoa te àva atu i te kāìè o te Etua.
3 Atià, enā me te mea kē pēènei : U koakoa tātou
i òto o te nuitina o te kōfii haamemae.
Ma te tohe mau e aha à te memae o te tau kōfii,
ua haaèka tātou i te Etua.
4 Me io te Etua haaèkatia, ua iho mai
te hakatu koekoe tetaì mau i to Īa kāìè.
5 Aòè e hakahae hua tetaìtina i te ènata.
U vaièitia mai hoì te Kuhane Meitaì.
Na Īa iho e haatiàtohu i òto o tātou i to te Etua kāòha.
ALLELUIA ALLELUIA.
cf. Apo.1, 8
Te kāìè nui i te Motua, me te Tama me te Kuhane Meitaì,
i te Etua te i tū nei, te i tū òmua naoti, a tihe anatu.
EVANERIO O IETU KIRITO VĀÀNA E IOANE 16, 12-15
I te ava ua taha Ietu me i te ao nei io to Īa Motua,
u peàu i to Īa tau kouâ :
12 « He mea nui te teào kē e too ta ù e haaìte atu.
Atià, he teào tono.
I tēnei, u te e koàna ia ôtou te āpuu.
I3 I te ava e tihe te Kuhane
e haaìte i te Tiàtohu i ùna o te Etua,
na Īa e haatee ia ôtou i te Tiàtohu paotū.
Aòè hoì e peàu na Īa ta Īa anaè,
e peàu Īa vāàna i te mea ta Īa i haaòno.
E haaìte atu Īa i te mea e tihe mai ma tītahi â.
14 E òno Īa i tu ù teào no te haaìte ia ôtou.
Ma èià hoì to Īa haakāìè ia ù.
15 To tu ù Motua taetae paotū, ua ìò no ù.
O īa te tumu u peàu au ia ôtou :
e òno te Kuhane i to ù teào me te faì atu ia ôtou. »
TE KOÌNA HAHI I TE EUKARITIA
TETAUTINA O TE HĀMANI A MOITE PEÀUTIA TENETE
14, 18-20
Ua hua mai hoì Aparahamo me io te tōua
e haahina ia Ketoramoere, te mou hakaìki kē me īa.
U âvei me te hakaìki no te pāpuafaè Taremi.
18 O Meretiteka te i ùtuna i te faraoa me te vino.
O īa te hakaìki no Taremi. E tāuà īa no te Etua Tiketike.
19 Ua pure īa pēènei : « A haameitaìtia Aparahamo
ma te inoa o te Etua Tiketike
te i pēpena i te fenua me te àni.
20 A meitaìtia te Etua Tiketike te i haaìò i to òe îìma
i te tau ènata i tōua atu ia òe. »
Ua tuu atu Aparahamo ia Meretiteka
i tītahi hope o te tau taetae paotū ta īa i koàna mai.
TARAMO 110 (109) 1,2,3,4
Te Kirito te Fatu ; he tāuà òe no te ava paona koè.
110, 4
1 Te teào o te Fatu i to ù hakaìki :
« A tānoho òe i to ù ìma oko.
E haaìò au i te tau ènata tōtōua me òe
He moena ma aò o to òe tapuvae. »
2 Me io te tuaivi Tiona, e tuu te Fatu
Ia òe i te tokotoko o te hakāìkitina.
E haaìte Īa i to òe mana i te poì kōtoa,
Tihe atu i te mataèinaa tōtōua me òe.
3 I te ava ua ìtetia to òe mana,
He hakaìki òe, keàpa ana i te peàto nui.
« Me he mea te haupō i te pōpōuì tika,
Atii to òe fānauna me i òto o au nei. »
4 U haatiàtohu te Fatu i to Īa teào :
Aòè e koè to Īa peàu mai :
« He tāuà òe no te ava paona koè,
Vāàna i te hakatu o Meretiteka, te hakaìki. »
TETAUTINA O TO MUA HĀMANI I TO KORINETIA
11, 23-26
E tu ù tau tunane tuehine.
23 O au nei o Pauro. U hakako au ia ôtou
i te teào i tuutia mai e te Fatu, pēènei :
24 I te pō i mākakatia, ua too te Fatu i te faraoa,
u haahuaèkaèka, ua vahi me te peàu :
« O tu ù tino tēnei, haaìòtia no ôtou.
A hana ôtou atii no te haamaakau mai ia ù. »
25 Me hua hakatu, ma hope o te mau,
ua too Īa i te ipu, e peàu ana :
« O te ipu nei he Piimau hou, i òto o to ù toto.
I te ava hakatahi e inu ôtou me io hua ipu,
a hana ôtou no te haamaakau mai ia ù. »
26 Ma èià, i tēia ava, i tēia ava
ua kai ôtou i hua faraoa, ua inu ôtou me io hua ipu,
ua faì atu ôtou i te matena o te Fatu,
e tetaì ana i to Īa huatina mai.
ALLELUIA, ALLELUIA.
cf. In. 6, 51-52
E te Fatu Ietu Kirito e, o Òe te Faraoa pohoè
te i iho mai me io he àni. O te ènata e kai i hua faraoa,
e koàna ia īa te pohoè anatu.
EVANERIO O IETU KIRITO VĀÀNA E RUKA 9, 11-17
I tēia mou pō,
11 u vivini te faètoa me to âtou ūtaì ia Ietu.
Ua mave mai Ietu ia âtou nui.
U teào atu Īa i ùna o te Patirēia o te Etua
me to Īa haameitaì i te poì hopi te i ape mai ia Īa.
12 Ua èva te â. U haatata mai te Tīònohuu ma tokoùa
me to âtou peàu ia Ietu : « A haahua atu Òe i te faètoa.
A hee âtou io he tau pāpuafaè tata nei me te tau faè kē.
I èià, e koàna ia âtou te moe me te kai.
Enā tātou nei i te fenua ataha. »
13 U peàu Ietu ia âtou : « A tāfai ôtou aneiho ia âtou. »
U peàu te tau kouâ :
« E ìma faraoa anaè me nā ià e ùa ta mātou.
Aha e hano mātou e hoko i te oà no tēnei faètoa nui ? »
14 U kātahi mai i èià me he mea e ìma tautini ènata āhana.
U peàu Ietu i to Īa tau kouâ : « A haanoho ôtou ia âtou,
ma he tau pūpū e ìma ònohuu ènata. »
15 Ua hana âtou atii me te haanoho i te tau ènata paotū.
16 Ua too Ietu i te mou faraoa e ìma me nā ià e ùa.
U feau to Īa mata io he àni, u haahuaèkaèka Ietu,
ua vahi me te tuu i te tau kouâ,
na âtou te tuha atu i te faètoa.
Ua kai haamaòna âtou paotū.
Ua kohitia te tau toena : ua pī ònohuu ma ùa kete.
TE KOÌNA O TE HŌUPO TAPU OKO O IETU
TETAUTINA O TE PEROFETA EHEKIERE 34, 11-16
11 Oianei te teào a te Etua, te Fatu :
12 « I tēnei, e ìmi au iho i tu ù tau muto,
me te tiòhi meitaì ma ùna o âtou.
Atii te tiòhi meitaì te ènata tiaì muto i to īa naho i tavavātia,
atii e tiòhi meitaì au ma ùna o to ù tau muto.
E hano au i te haapohoè ia âtou
me io te kōava i èià i naò âtou
i te kohu maù nui me te pō pōtano.
13 E hano au e taki ia âtou me io te fenua kē,
e haatahi au ia âtou me te haahua mai io to âtou fenua ;
e tāfai au ia âtou io te tau tuaivi o Iraene
io te tau vao me te mutiē kutaù oko.
14 E tāfai au ia âtou io te pāpua me te mutiē hou,
i ùna o te tau tuaivi fenua Iraene.
I èià, e hakaēa âtou io te pāpua me te teitā tapavaù,
e kai âtou io te vao me te mutiē kutaù oko
i ùna o te tau tuaivi o Iraene.
15 Na ù aneiho e tāfai i to ù naho muto,
na ù te tiòhi meitaì ia âtou.
16 E ìmi au i te muto te i naò,
e haahua au i te muto te i hukaka nei.
Ua maki tītahi ? Na ù, e àpau ia īa
Ua hemo i te mate tītahi ? Na ù e haaoà.
U taùtaù me te feòfeò tītahi ?
E pāpua au ia īa me te tāfai ma te toitoi noa. »
TARAMO 23 (22) 1-2b, 2c-3, 4, 5, 6
O te Fatu to ù tiaki meitaì, e aha te mea e toe ? 23, 1
1 O te Fatu to ù tiaki meitaì,
E aha te mea e toe ?
2 U aahi mai te Fatu no te hakaēa
Io te pāpua pī i te mutiē hou.
3 U aahi mai te Fatu io te punavai
I èià, u haahoutia to ù pohoè.
U haatee mai Īa ma he aanui toitoi,
No te kāìè o to Īa inoa.
4 No tu ù taha ma he vao maù nui
Aòè au e haametaù i te ìno.
I èià o Òe me au nei, e te Fatu e.
O to Òe tootoo te i aahi mai me te moû.
5 E te Fatu e, ua tuu mai Òe i te oà,
I mua o te tau ènata e tōtōua ia ù.
Ua paù Òe i tu ù upoo me te kao.
U haakoakoa mai te hope taetae tuutia mai.
6 Te koakoa me te èkaèka me au nei,
Ma te òa o to ù pohoètina.
E noho au io he faè o te Fatu
Ma te nuitina o to ù tau â.
TETAUTINA O TE HĀMANI A PAURO PEÀTO I TO ROMA
5, 5-11
E tu ù tau tunane tuehine.
5b U vaièitia mai hoì te Kuhane Meitaì.
Na Īa iho e haatiàtohu i òto o tātou i to te Etua kāòha.
6 I te ava he tau ènata koekoe pepee tātou,
ua mate Ietu Kirito i uē i te poì mikeo,
me he mea i haaheitia e te Etua.
7 Aha e ao tītahi ènata e mate nui
i uē i te ènata koekoe meitaì ?
E fati oti tītahi te tuu i to īa pohoè i uē i te ènata toitoi.
8 O īa na te mea i haatiàtohu
i te nuitina o to te Etua kāòha mai :
ua mate nui te Kirito i uē ia tātou
e aha à he tau ènata mikeo tātou.
9 Tōtahi atu i tēnei, ia haatoitoitia tātou
na te toto o te Kirito,
e haapohoè mai Īa me io te pekē o te Etua.
10 Anoa u haaâvei te Etua ia tātou poì mikeo me Īa,
ma te matena o to Īa Tama,
tōtahi atu, e vaièi mai te Etua i te pohoè o te àni
ma te Tūhakaùatina o hua Tama, te Kirito.
11 Oianei tītahi : U haakāìè mai ia tātou iho
i òto o te Etua mēìa i to tātou Fatu Ietu Kirito.
Ma io Īa hoì, u haaâveitia tātou me te Etua.
ALLELUIA ALLELUIA.
cf.In.10,14-15
Ua ìte te Tiaì Meitaì i to Īa tau muto,
ua ìte me to Īa tau muto ia Īa.
U haaìò te Tiaì Meitaì i to Īa iho pohoè
i uē i to Īa tau muto.
EVANERIO O IETU KIRITO VĀÀNA E RUKA 15, 3-7
I tēia mou pō,
1 u haatata mai io Ietu te tau pupurikano
me te poì mikeo paotū i to Īa teào haaòno.
2 U kōhumuhumu te tau Fariteo me te tau tuhuna teào,
e peàu ana :
« U āpuu meitaì te ènata nei i te poì mikeo,
ua kai īa me âtou. »
3 U peàu Ietu ia âtou i tēnei teào haapupuà :
4 « O ai te ènata i vāvena o ôtou
me te naho muto e ìma tekau.
Anoa ua naò e tahi me io âtou,
aha u te e avai īa io te fenua me te mutiē
i te iva ònohuu ma iva no te ùmihi i tēia i naò
tihe atu e koàna mai ia īa ?
5 Ia koàna mai ia īa, pī i te koakoa, u tautua i hua muto.
6 I te ava ua hua īa io he faè,
u haaputuputu i to īa tau hoa, te tau ènata tata me īa.
U peàu ia âtou : « A koakoa ôtou me au nei.
U koàna hoì iho nei ia ù te muto te i naò. »
7 U peàu au ia ôtou :
mēìa e fāìu i te koekoe te ènata mikeo e tahi,
he mea nui atu te koakoa io he àni
i to te tau ènata e iva ònohuu ma iva e māmaakau aa
aòè e hei no âtou te fāìutina o te koekoe.
TOMINIKA E ÙA
TETAUTINA O TE PEROFETA ITAIA 62, 1-5
1 I uē ia Ierutaremi, aòè au e mutu.
I uē ia Tiona, aòè e pā to ù fafa
tihe e ìtetia to īa toitoi me he pupuà o te atauà,
e keàpa to īa hakatu me he àma pūkohe i te pō.
2 E ìte te tau mataèinaa i to òe toitoi,
e ìte te tau hakaìki i to òe kāìè.
E apa te Fatu ia òe i te inoa hou, ta Īa i ìte.
3 E ìò òe me he paèkuà io te ìma o te Etua,
me he heipua kekaa io te ìma o te Fatu.
U te e vevaòhakaùatia òe : « Tāhia titii ».
Aòè to òe fenua e vevaòtia « Fenua ataha »
4 atià e apatia to òe inoa : « Maùi ».
E apatia to òe fenua : « Tu ù hoa mātiri »
na te mea e haataetae te Fatu ia òe.
E ìò te Fatu me he āhana no to òe fenua.
5 Me he mea e noho te mahaì me te vehine hou,
atii e noho me òe te tuhuna i haatū ia òe.
Me he mea o te vehine mātiri hou te koakoa o ta īa āhana,
atii e haaèka òe i to òe Fatu Etua.
TARAMO 96 (95) 1-2a, 2b-3, 7-8a, 9a.10ac
A tataha atu ma te aomāàma vii pu,
a haaìte i to Īa tau hana mahaò. 96, 3
1 A hīmene no te Fatu i te hīmene hou.
A hīmene i te Fatu te fenua vii pu.
2 A hīmene no te Fatu, a hahi i to Īa inoa.
3 Ma tēia â, ma tēia â,
a haaòno nui i to Īa haapohoètina,
A hano a faì atu i te tau mataèinaa,
I te tau ènata paotū to Īa tau hana mahaò.
7 E te tau mataèinaa e, a hua i te Fatu,
A hua i te Fatu i te kāìè me te mana.
8 A haakāìè i te inoa o te Fatu.
9 A atoratio i te Fatu, pōnionio i te peàto nui.
10 A haaìte atu i te tau êteni : o te Fatu te Hakaìki.
E vivini Īa me te toitoi i te tau mataèinaa.
TETAUTINA O TO MUA HĀMANI I TO KORINETIA 12, 4-11
E tu ù tau tunane tuehine.
4 E hakatu kē, hakatu kē te tau vaièitina kuhane,
atià, me io te Kuhane e tahi anaè.
5 E hakatu kē, hakatu kē te hana tāvini,
atià, e tāvinitia te Fatu e tahi anaè.
6 E hakatu kē, hakatu kē te tau hana te i haapaotia,
atià, o te Etua e tahi anaè te tumu o te tau hana kōtoa
i òto o te tau ènata paotū.
7 U vaièitia ia ôtou tikitahi te ìi o te Kuhane,
hakatu kē to tītahi, hakatu kē to tītahi
no te meitaì o tātou paotū.
8 Na te Kuhane Meitaì u vaièi i tītahi i te teào māàma.
Na hua Kuhane i vaièi i tītahi
no te haaìte atu i te maakau hōhonu o te Etua.
9 I òto o hua Kuhane e tahi, u vaièitia i tītahi te haatià,
i tītahi te mana no te haameitaì i te poì hopi.
10 U vaièi te Kuhane i tītahi no te hana i te tau hana mana.
He teào perofeta to tītahi.
U māàma tītahi no te tuhi i te kuhane tīkoe
me te haaìte toitoi i te kuhane tiàtohu.
U teào tītahi ma he èo kē, èo kē anatu.
U koàna i tītahi te haavivini mai i hua èo kē.
11 Atià, o te Kuhane e tahi anaè,
te tumu o hua tau hana kē paotū.
Na hua Kuhane e tuha ia tātou tikitahi
i to īa vaièitina, vāàna i to īa maìmaì.
ALLELUIA ALLELUIA.
cf.Ap.19,7.9
A koakoa tātou, enā te Piimau Hou :
Mamau te poì i keèetia no te mau o te Arenio
EVANERIO O IETU KIRITO VĀÀNA E IOANE 2, 1-12
I tēia mou pō,
1 ua faitia i te toù o te pō te koìna mātiri i Kana,
i te Fenua Karirea. O te kui o Ietu tītahi i èià.
2 U vevaòtia Ietu, e tahi me to Īa tau kouâ.
3 Aìna pao te uaina, u peàu te kui o Ietu ia Īa :
« Ua pao ta âtou uaina. »
4 U haahua atu Ietu :
« E te vehine, e aha ta òe e ape mai ?
Aòè to ù hora i tēnei. »
5 U peàu te kui o Ietu i te tau tāvini :
« A hana ôtou i te tau mea paotū ta Īa e peàu ia ôtou. »
6 Enā i èià e ono hue keâ nunui no te vai,
ta te tau ati Iuta i too no te haataìtaì,
vāàna i to âtou haa ati Iuta.
E hānere rita nehe tītahi, hānere rita nehe tītahi,
ia haapīnuitia te tau hue.
7 U peàu Ietu i te tau tāvini :
« A haapī ôtou i te tau hue me te vai. »
U haapī nui âtou me te vai.
8 U peàu Ietu ia âtou : « I tēnei, a kapu ôtou
me te àve atu i te ènata vivini i te kainamau. »
Ua àve te tau tueni io īa.
9 Aòè te vivini o te kainamau i ìte me i hea mai hua uaina.
O te tau tāvini te i ìte meitaì.
O âtou hoì te i kapu i te vai.
Ia ako te vivini o te kainamau i te vai haauainatia,
u vevaò i te āhana hou me ta īa peàu atu :
10 « Ua tuu òmua ìka te tau ènata paotū i te vino mānini.
Ia kū te tau hoa kai, e tuutia te vino māeà.
U avai òe tihe i tēnei i te vino mānini. »
11 O īa na to mua hana mahaò i hanatia e Ietu.
I Kana i te Fenua Karirea, ua hana Ietu i hua hana mahaò.
Ma èià, u haaìte Ietu i to Īa kāìè.
U haatià to Īa tau kouâ ia Īa.
12 I muì iho, ua hee Ietu i Kafaranaumi e tahi me to Īa Kui,
to Īa tau teina, to Īa huaa kouâ.
Ua noho âtou mou pō aneiho i èià.
TOMINIKA E TOÙ
TETAUTINA O TE PEROFETA NEHEMIA 8, 1-4a.5-6.8-10
1 I te â koìna o te māhina e fitu,
u putuputu te mataèinaa me he ènata e tahi i Ierutaremi,
io he tohua i mua o te avaputa peàutia O TE VAI.
Ua ape âtou i te tuhuna teào, o Etara to īa inoa,
no te tetau i te hāmani o te Ture a Moite
ta te Etua i tuu ia Iraene.
2 Ua àve mai te tāuà Etara i te hāmani o te Ture
i mua o te motuhana, te tau āhana me te tau vehine
me te tau tōìki paotū te i koàna i te vivini i te teào o te Etua.
3 Fāìu ana io te tohua o te avaputa O Te Vai,
ua tetau mai te tuhuna Etara i te hāmani o te Ture.
Me i te pōpōuì tika tihe atu i te oatea nui,
te tau āhana, te tau vehine
me te tau tōìki e koàna ia âtou te haavivini
e haaòno aa ia Etara e tetau aa i te hāmani o te Ture.
4 Ua maô Etara ma ùna o te tohua
kāneatia no tēia hana aneiho.
Ua ìtemata te mataèinaa paotū.
5 I te ava u pepeù Etara i te hāmani, ua maô te faètoa nui.
6 U haameitaì Etara i te Fatu, te Etua Tiketike.
A tahi a haahua atu te mataèinaa paotū
e hapai aa i te îìma me te taaàu : Amene. Amene.
Ia pao te taaàu, ua oha âtou
me te moe haatona i mua o te Fatu, i aò te aò.
7 (U tetau Etara i te mou kio o te Ture o te Etua.)
Na te tau Revita te vetevete ma he èo o te mataèinaa
me te haatuhuna etià e vivinimeitaìtia te teào.
9 Ua uēuē me te mateteka âtou paotū
i te ònotina i te teào o te Ture o te Etua.
Ia pao te tetautina, u peàu Etara ia âtou :
10 « A taha atu ôtou. A kai i te ìnaì kiko mōmona.
A inu i te inu mānini. A tuha atu me te ènata veve
me te poì io he àì, aòè e ava to âtou.
He â o te Etua tēnei â, he â tapu. Umoì e uēuē.
A koakoa i òto o te Hatu to tātou pātoko. »
TARAMO 19 (18) 8, 9, 10, 15
Te koakoa o te Hatu, o īa na to tātou pātoko. cf. Ne.8, 10
8 U toitoi noa te ture o te Fatu,
Na īa e haahou i to tātou ìi.
U tiàtohu te teào o te Fatu
Te i haamāàma i te poì avai noa.
9 U toitoi te teào o te Fatu,
E haakoakoa âtou i te koekoe.
U hōata te maìmaì o te Fatu,
E haakeàpa i te mata o te ènata.
10 U taìtaì te pakaihitina o te Etua,
E noho mau anatu to īa tau puku.
U toitoi te teào paotū o te Fatu :
He māàma âtou no te haavā i te ènata.
15 E te Fatu e, a āpuu i te pona o to ù fafa,
A haaòno i to ù èo mamaioo io Òe.
A tihe âtou i mua o Òe me he pure vevaò,
O Òe tu ù motukeâ, to ù haapohoè.
TETAUTINA O TO MUA HĀMANI I TO KORINETIA 12, 12-30
akoè à : 12, 12-14.27
E tu ù tau tunane tuehine.
12 E tahi tino anaè to te ènata
e aha à he mea nui to īa tau mēmau.
O hua mēmau paotū hakatu kē tītahi, hakatu kē tītahi,
e ìò âtou nui e tino e tahi anaè. Hua mea aneiho no te Kirito.
13 Atii tātou : he ati Iuta tahipito, he poì Hereni tahipito.
Enā te tau ènata na âtou ta âtou,
enā te tau tueni haamōèhutia.
Atià, u papatematia tātou paotū
na te mana o te Kuhane e tahi,
etià e ìò tātou he tino e tahi.
U fāinutia tātou nui me te Kuhane e tahi.
14 U te e haapaotia te tino o te ènata
i te mēmau e tahi anaè, he mea nui to īa tau mēmau kē.
15 Ia peàu te vaevae pēènei :
« Aòè o au te ìma. Koè nui he mēmau au o te tino. »
Aha ua koè to īa pii me te tino ?
16 Ia peàu te puaìna pēènei :
« Aòè o au te kikomata.
Koè nui he mēmau au o te tino. »
Aha ua koè to īa pii me te tino ?
17 Anoa he kikomata anaè te tino, i hea te puaìna ?
Anoa he puaìna anaè te tino, pēhea te honi atu ?
18 Atià, u haahei te Etua i te tau mēmau paotū i òto o te tino
vāàna i to Īa maìmaì.
19 Anoa he mēmau e tahi anaè, pēhea te tino ?
20 He mea nui hoì te tau mēmau, atià he tino e tahi anaè.
21 Aòè e koàna te kikomata te peàu i te ìma :
« E aha te mea i koàna mai me io òe ? »
Aòè e koàna te upoo te peàu i nā vaevae :
« E aha te mea i koàna mai me io ôùa ? »
22 Tōtahi atu : Aha, he mea pepae tītahi mēmau o te tino ?
Oianei te mēmau haataetaetia e tātou.
23 Ohia e maakau tātou e hakāìna te haaìte i te mēmau
o te tino, tōtahi atu e pakaihi tātou i hua mēmau.
E tāpī tātou me te kahu i te tau mēmau haahakaìna mai.
24 O te tau mēmau haakāìè, aòè e hei te tomi ia âtou.
U kānea te Etua i te tino ma te haanui atu i te poèa
o te tau mēmau poèa koè.
25 Ma èià, u haakoè i te tōtōua i òto o te tino.
Ua toko atu toko mai te mēmau i te mēmau.
26 U memae te mēmau e tahi ? U memae âtou nui me īa.
U haakāìètia te mēmau e tahi ? U koakoa âtou nui me īa.
27 Ua ìò ôtou te tino o te Kirito,
mēmau kē to tītahi, mēmau kē to tītahi.
28 I òto o te Èkaretia, ua vae te Etua i tahipito
no te tau hana kē : to mua, he tau Àpotoro,
te ùa, te tau perofeta,
te toù, he tau tuhuna teào māàma.
Ma hope mai te poì no te tau hana mana,
tahipito no te haameitaì i te poì hopi,
te poì toko i te tau tunane tuehine,
te tau vivini e haatee i te Èkaretia,
tahipito e teào ana ma he èo kē, èo kē anatu.
29 Aha he àpotoro âtou paotū ? Aha he perofeta âtou ia ôtoa ?
30 Aòè he mana to tātou paotū no te haameitaì i te poì hopi.
Aòè e koàna ia tātou paotū e teào ma he èo kē, èo kē anatu.
Aòè he poì māàma tātou paotū
no te haavivini i hua èo kē, èo kē.
ALLELUIA ALLELUIA
cf. Rk.4, 18
U pōpahi te Fatu Etua ia Ietu, to Īa Tāvini
no te haaìte atu i te Teào Meitaì hou mai i te poì veve,
no te faì atu i te poì humutia to âtou haapohoètina.
TĪMATATINA O TE EVANERIO VĀÀNA E RUKA
1, 1-4 ; 4,14-21
1 Ua hano tahipito e patu i te hāmani
i ùna o te tau mea i haapaotia i vāvena o tātou.
2 U haaìte mai âtou i hua mea i pao nei,
vāàna i te teào i peàutia e te poì
te i ìtemata me i te tumu.
Ua ìò hua poì he tau keèe o te Teào a te Etua.
3 Atii ta ù nei te i ùmihi mamate
i te tau mea paotū me i te tīmatatina,
u maakau e hei nui e patu me au
i te hāmani tāpapatoitoitia
no òe, e Teofiro hakaìki òno nui e,
4 etià e ìte meitaì òe
he mea tiàtohu te teào i hakakotia ia òe.
I tēia mou pō,
4,14 ua hua mai Ietu i te Fenua Karirea,
me te mana o te Kuhane Meitaì.
U mevaha to Īa òno ma te tau fenua vii pu.
15 U hakako Ietu i òto o to âtou tau tinakoka.
Ua hahi te tau ènata paotū ia Īa.
16 Ua tihe Ietu i Natareti ; i èià, u tāfaitia.
I te Tāpati, ua tomo Īa i òto o te tinakoka,
me he mea ua hani Īa. Ua maô Īa no te tetau.
17 Ua tuutia ia Īa te hāmani a te perofeta Itaia.
E ùmihi ana, u kāvii Ietu i te hāmani,
me to Īa koàna mai te mou kio patutia pēènei :
18 « I ùna o au nei te Kuhane o te Fatu,
na te mea u haapeàto mai Īa e te paùtina,
etià e haaìte atu au i te Teào Meitaì hou mai i te poì veve.
U pōpahi mai Īa no te haamevaha i te Teào Meitaì hou mai :
e vetevetetia te poì me io he faèhumu,
e ìte tāhakahaka te poì matapō,
e pohoè na âtou ta âtou te poì òomimākakatia.
19 U pōpahitia mai au no te haaìte atu
i te èhua o to te Fatu vaièitina mai. »
20 U kāvii hakaùa Ietu i te hāmani me te tuu atu i te tāvini.
U kaapee Īa. O te poì paotū te i òto o te tinakoka,
u tiòhi matiòka ia Īa.
21 U pohā te èo o Ietu me to Īa peàu ia âtou :
« I tēnei a u haapaotia hua teào o te Hāmani tapu
ta ôtou i òno puaìna i kapo nei. »
TOMINIKA E FĀ
TETAUTINA O TE PEROFETA IEREMIA 1, 4-5.17-19
4 U teào mai te Fatu me to Īa peàu pēènei :
« Ua ìte au ia òe ma mua to ù kānea ia òe
i òto te ôpū o to òe kui.
5 U haapeàto au ia òe, ma mua u fānautia òe.
Ua vae au ia òe no te hana perofeta
i vāvena o te tau mataèinaa. »
17 U teào mai te Fatu me to Īa peàu pēènei :
« A tū òe ; a oonaì òe i tu ù mataèinaa
ma te tau mea paotū e peàu atu au ia òe.
Umoì òe e ù i te haametaù i mua o to âtou aò
oa haamate au iho ia òe i te haametaù i te aò o âtou.
18 I tēnei â, e haaìò au ia òe he mōunatōua,
he pou paapaa, he pā piura i te aò o te fenua paotū,
i mua o te tau hakaìki o te Fenua Iutea
me to īa tau tāuà me te mataèinaa ia ôtoa.
19 E tōtōua âtou me òe. Atià aòè âtou e kiko me òe.
O au nei me òe no te haapohoè mai. »
TARAMO 71 (70) 5-6b, 7-8, 15ab.17, 19.6c
I tēia â, i tēia â, e haaìte au
I to Òe tuàkitina me to Òe tau hana haapohoè. cf. .71, 15
5 E te Fatu tu ù Etua e, o Òe tu ù tetaìtina,
To ù toko me i te ava o to ù tino hou.
6 U pāpua mai Òe me i te â o to ù fānautina,
Ua vae mai me i òto te ôpū o tu ù kui.
Paotū te â, e hahi au ia Òe.
7 He mea nui te ènata e mahaò ia ù
Mēìa o Òe to ù ìi, to ù pātoko.
8 Paotū te â, u pohā to ù èo
No te haamevaha i to Òe kāìè.
15 I tēia â, i tēia â, u haaìte tu ù fafa
I to Òe tau hana toitoi, hana haapohoè.
17 E te Etua e, i te ava tōìki au, u haamāàma mai Òe.
Tihe i tēnei, u haamevaha au i to Òe hana mahaò.
19 E te Etua e, tiketike me he àni to Òe toitoi,
O Òe te i hana i te tau hana mana nui.
E tu ù Etua e, o ai e hakatu me Òe ?
6c Paotū te â, e hahi au ia Òe.
TETAUTINA O TO MUA HĀMANI I TO KORINETIA
12, 31 ;13, 1-13 ; akoè à : 13, 4-13
E tu ù tau tunane tuehine.
31 A ìmi ôtou i to te kuhane vaièitina taetae atu.
E hakako au ia ôtou i te aanui meitaì atu i tahipito.
1 Anoa e ìte au i te tau èo ia ôtoa, te èo o te tau ènata
me te èo o te tau anera, atià, u kāòha koè au,
ua tūtū au me te pahu, akoè à te pere e haatani pu.
2 Anoa he teào perofeta to ù, e ìte au i te mea hakanā paotū,
e pī au i te māàma,
e àva to ù haatià no te takitumu i te tau tuaivi,
atià, u kāòha koè au, he mea tupepaka au nei.
3 Anoa e tuha pu au i to ù tau taetae paotū
no te toko i te poì veve,
e tuu me to ù tino no te pūovo i te ahi,
atià, u kāòha koè au, aòè e tahi mea i koàna mai ia ù.
4 O te ènata koekoe kāòha,
ua tohe īa me te moû, e aha à te nuitina o te kōfii.
He koekoe vaièi to īa, aòè īa keitani, vaavō, kāìè pu.
5 O te ènata koekoe kāòha, u te e hana īa i te mea e hei koè.
Aòè īa e haamaakau ia īa anaè,
aòè īa e pekē pu, aòè e huke hae i te umu.
6 U te e koakoa īa e ìte ana i te mea ìno.
O te mea tiàtohu te i haakoakoa ia īa.
7 E tohe mau te kāòha, paòpaò koè,
e haatià mau, e tetaì mau, e memae i te tau memae paotū.
8 E noho mau te kāòha no te tau tai anatu.
O te teào perofeta ? Ma tītahi â, e koè ai.
O te teào ma he èo kē, èo kē anatu ?
Ma tītahi â, e mutu ai.
O te teào māàma i ùna o te Etua ? Ma tītahi â, e naò ai.
9 E aha te mea e ìte māàma tātou ? He mea iti noa.
E aha te teào e faì atu te tau perofeta ?
Te mou ponateào aneiho.
10 Ia tihe mai te ava o te toitoi èka,
e koè ai me he tupepaka te hope noa.
11 Oi tōìki au, he teào tōìki to ù, he maakau tōìki,
he kaituto tōìki to ù nei.
Ia ànamotua au, u haakoè au i te hakatu tōìki.
12 I tēnei hoì, ua ìte tātou me he mea te ènata
tiòhi i te ata èhuèhu i òto o te karahi mata.
I te ava e tihe ai, e ìte tātou mata he mata.
I tēnei, ua iti noa to ù ìte māàma i te Etua.
I te ava e tihe nei, e pī au i te māàma
me he mea ta te Etua e ìte nei ia ù.
13 I tēnei, u avai e toù mea kē : te haatià, te tetaì, te kāòha.
O te kāòha te mea keî aè i vāvena o te toù.
ALLELUIA
cf. Ta.67,3
E te Etua e,
me i te tihena òumati me te naòna òumati,
e ìtetia to Òe haapohoètina ma te tau fenua paotū.
EVANERIO O IETU KIRITO VĀÀNA E RUKA 4, 21-30
I tēia mou pō, i Natareti, i òto o te tinakoka,
21 u pohā te èo o Ietu me to Īa peàu ia âtou :
« I tēnei â, u haapaotia hua teào o te Hāmani tapu
ta ôtou i òno puaìna kapo nei. »
22 U haameitaì âtou paotū ia Īa e haatiàtohu ana i to Īa teào.
U mahaò âtou nui mēìa u kōnini to Ietu haafitipona.
U peàu âtou : « Aòè à te tama a Ioteve tēnei ènata ? »
23 Atià, u peàu Ietu ia âtou :
« Ma te tiàtohu, e peàu ôtou ia ù i te teào haapupuà :
e te tātihi e, a haapohoè ia òe aneiho !
Ua òno tātou i te tau hana i pao ai i Kafaranaumi.
A hana òe i hua tau hana înei io to òe fenua tumu. »
24 U peàu Ietu : « U tiàtohu to ù teào nei ia ôtou :
aòè te perofeta e tahi i āpuutia io to īa fenua tumu.
25 Ma te tiàtohu, u peàu au ia ôtou :
he mea nui te tau vehine pōpī i te fenua Iraene,
i te tai o Eria te perofeta,
ia koè te ūa ma te òa e toù èhua me nā māhina e ono,
ia one nui te mataèinaa io te fenua vii pu.
26 Atià aòè Eria i pahitia io tītahi o âtou,
u pōpahitia i Tarepa, io te vehine pōpī o hua fenua Titone.
27 I te tai o Erihea te perofeta,
he mea nui te tau ènata kovi i te fenua Iraene.
Aòè e tahi i haataìtaìtia,
o Naama aneiho me i te fenua Ihiria. »
28 Ia ònotia hua ponateào,
ua oko nui te pekē o âtou paotū i to he tinakoka.
29 Ua maô âtou.
Ua tute âtou ia Ietu i vaho o te pāpuafaè
me te aahi i ùna o te kapua o te tuaivi,
i èià ua haatū i to âtou pāpuafaè,
e hano ia Ietu e ketu io he ōpata.
30 Atià ua taha Ietu ma vāvena ahau o âtou me te hee atu.
TOMINIKA E ÌMA
TETAUTINA O TE PEROFETA ITAIA 6, 1-2a.3-8
1 I te èhua ua mate nui te hakaìki Ohiata,
ua ìte au i te Fatu Etua e tū aa
i ùna o te nohona tiketike nui.
Ua pī te Hiero i te taì o to Īa kahu uhi pu.
2 Ua ona mou anera Terafi i ùna o Īa.
3 U taaàu atu tītahi, u taaàu mai tītahi :
« Peàto, Peàto, Peàto te Fatu, te Etua o te aomāàma.
Ua pī nui te àni me te fenua i to Īa kāìè. »
4 Ia tani te èo o te anera Terafi,
u neue na katina e ùa o te avaputa,
u haapī te auahi i te Hiero.
5 U peàu au : « Auē. Auē. E mate nui au.
He ènata kiinutu havatia i te mikeo o au nei,
e noho ana i vāvena o te mataèinaa,
kiinutu havatia i te mikeo.
Ua ìtemata au i te Hakaìki nui, te Fatu o te aomāàma nei. »
6 Ua ona tītahi anera Terafi io ù me te kaahu ahi,
ta īa i too me i ùna o te fātaa.
7 U haatukia i to ù fafa me te peàu :
« U haatukia tēnei ahi i to òe kiinutu.
Ua koè to òe mikeo. U hooitia to òe tau tekateka. »
8 Ua òno au i te èo o te Fatu e peàu ana :
« O ai ta ù e pahi atu ? O ai to tātou keèe ? »
U haahua au : « Eīa au nei. A pōpahi ia ù. »
TARAMO 138 (137) 1-2a, 2b-3,4-5,7c-8
He Peàto te Fatu, to tātou Etua cf. It .6,3
1 E te Fatu e, u haahuaèkaèka au me io he koekoe.
U hakaòno hoì Òe i tu ù pure vevaò.
E hīmene nei au ia Òe i mua o te tau anera,
2 E oha nei au e tiòhi ana i to Òe Hiero tapu.
E hahi nei au mēìa i to Òe kāòha me te tiàtohu.
U tiketike atu i te tau mēmau paotū to Òe inoa.
3 I te â u haahua mai Òe i to ù pure vevaò,
U haaūo to Òe mana i te ìi o tu ù kuhane.
4 U haahuaèkaèka ia Òe te tau hakaìki o te fenua vii pu.
Ia òno âtou i te teào haaìte atu i to Òe hana,
5 U hīmene âtou i to Òe tau hana mahaò,
E hahi ana i te kāìè o te Fatu.
7 U tuàki au ma te mana o te Fatu.
8 I uē ia ù ua hana me he mea ta Īa i peàu mai.
E te Fatu e, paona koè to Òe kāòha.
Umoì e hakaēa i to Òe matavaièi mai.
TETAUTINA TO MUA HĀMANI I TO KORINETIA 15, 1-11 ;
akoè à ,1-8.11
1 E tu ù tau tunane tuehine.
E too ta ù e haamaakau ia ôtou
i te Evanerio hakakotia e au nei ia ôtou,
ta ôtou i āpuu mai me te haatià mau.
2 E haapohoètia ôtou e hua Evanerio.
anoa u āpuu meitaì ôtou ia īa
me he mea u hakako au ia ôtou, umoì te haahuìkē.
No te koè e aha te mea i koàna mai ia ôtou
ma te aotahi atu i te haatià ?
3 Òmua ana òa, u hakako au ia ôtou i te teào
i tuutia mai ia ù aneiho pēènei :
Ua mate te Kirito no to tātou tau mikeo,
vāàna i te mea patutia io he Hāmani tapu.
4 Ua tomitia, ua tū hakaùa te Kirito ma te toù o te pō,
vāàna i te mea patutia io he Hāmani tapu.
5 U haaìte te Kirito ia Īa iho ia Petero,
ma hope mai i te Tīònohuu ma tokoùa.
6 I muì iho, u haaìte ia Īa iho i te tau tunane tuehine,
tōtahi atu e ìma hānere to âtou nuitina.
E tahi haaìtetina anaè ia âtou nui.
E pohoè nei te nuitina o âtou. Ua mate tahipito.
7 Ma hope mai, u haaìte te Kirito ia Īa iho ia Iakopo,
ma hope mai i te tau Àpotoro paotū.
8 I te hope òa u haaìte te Kirito ia Īa iho,
me he mea i te tama fānau koeà.
9 O au hoì te iti atu i vāvena o te tau Àpotoro.
Aòè e hei e vevaòtia au he Àpotoro,
na te mea òmua, u haamākaka au i te Èkaretia o te Etua.
10 U haaìò mai te karatia o te Etua
me he mea ua ìte ôtou ia ù i tēnei mou â.
Aòè he mea tupepaka te karatia vaièitia mai e te Etua.
Ua nui atu to ù hana i to tahipito tau Àpotoro.
Atià, aòè to ù hana anaè :
me au nei, ua hana te karatia o te Etua.
11 No te haapoto i te teào, u peàu pēènei :
o au nei, akoè à o âtou te tau Àpotoro,
enā to tātou teào i hakakotia,
oianei te teào ta ôtou e haatià.
ALLELUIA ALLELUIA
cf. Mt.4, 19
U peàu te Fatu pēènei : A ūtaì mai ôùa ia ù,
e haaìò au ia ôùa he àvaika ènata.
EVANERIO O IETU KIRITO VĀÀNA E RUKA 5, 1-11
I tēia mou pō,
1 u haatita te faètoa vii pu o Ietu.
Ua hano âtou e hakaòno i to Īa teào.
Ua tū Ietu i te hiku o te tai Kenetareta.
2 Ua ìte Ietu e ùa vaa kātautia pii he one.
Ua iho mai te tau ènata àvaika
me to âtou hooi i to âtou ùpena.
3 Ua piki Ietu i òto o tītahi, o to Timone vaa.
Ua ape Ietu ia Timone no te hoe me te hee atu
mea iti me io te one.
I muì iho, u kaapee
me to Īa hakako me io te vaa i te faètoa nui.
pao te teào, u peàu Ietu ia Timone :
« A hoe ! A hee i vaho òa me te haatopa i te ùpena
no te haamau i te ià. »
5 U haahua Timone me te peàu : « E Tuhuna e,
u paopao mātou i te haatopatina i te ùpena māàma te pō.
Aòè te ià i mau.
Atià, u peàu òe : e haatopa au i te ùpena. »
6 Ua hana âtou atii. Nui oko te tau ià i mau.
I motumotu ai to âtou nā ùpena.
7 U pekahi âtou i to âtou tau hoa te i òto o te vaa kē
no te tihe mai me te toko ia âtou. Ua tihe âtou.
U haapī nuitia e ùa vaa, mei naò âua.
8 Ia ìte Timone Petero i hua mea,
ua hina pii o nā vaevae o Ietu e peàu ana :
« E te Fatu e, a haamemao Òe me io ù. He ènata mikeo au. »
9 Ua hemo hoì Timone i te haametaù, o īa me to īa tau hoa,
mēìa i te nuitina o te ià i mau.
10 Atii me Iakopo me Ioane, nā tama a Ihepetea,
e hoa âua no Timone. U peàu Ietu ia Timone :
« Umoì òe e haametaù. I tēnei, e ìò òe he àvaika ènata. »
11 Ua ùai âtou i to âtou vaa io he one.
E titii ana i te tau mēmau paotū, ua ūtaì âtou ia Ietu.
TOMINIKA E ONO
TETAUTINA O TE PEROFETA IEREMIA 17, 5-8
5 Oianei te teào a te Fatu.
« A ìno nui te ènata e haatià i te tau ènata anaè !
U haamee hoì hua ènata i te Etua,
ua vae īa i te hoa e mate vave no te toko ia īa.
6 Ua tūtū īa me te teitā taataa e tupu i te fenua ataha.
Aòè īa e ìte i te koakoa.
Io te vahi viviio to īa nohona, te fenua ataha,
te fenua i èià ua koè te vai me te mea kai.
7 Mamau te ènata haatià i te Fatu Etua !
Mamau te ènata e tetaì nei i to te Etua hakāòha.
8 Ua tūtū hua ènata me te tumuâkau
tanutia pii te vaitahe,
e hohoà ana i to īa tau aka io te vai.
Aòè i puòi to īa àu i te veàveà o te òumati ;
u èreère anatu to īa àu.
Ia moô te fenua, u te e mate īa, aòè e naò to īa puku.
TARAMO 1, 1a.c-2,3,4.6a
Io te Etua to tātou tetaì, io te Etua to tātou koakoa.
cf. 40,5
1 Mamau te ènata e haapii koè me te poì tekateka,
E taha koè ma io to âtou aanui hukaka,
2 Mamau te ènata haataetae i te teào a te Etua,
E kaituto ana i hua māàma me i te pō me i te â.
3 E ìò hua ènata me he tumuâkau,
Tanutia i te kaavai io he èpo mōmona.
I te ava e hei, e hua to īa tau puku.
E puòi koe to īa àu, u keekee anatu.
E pao meitaì to īa tau hana paotū.
4 He mea kē to te poì tekateka, mea kē anatu.
Ua ìò te poì tekateka me he kaù moô.
6 Ua ìte hoì te Fatu i te aanui o te ènata toitoi.
E naò ai te aanui hukaka o te poì tekateka.
TETAUTINA O TO MUA HĀMANI I TO KORINETIA
15, 12-20
E tu ù tau tunane tuehine.
12 U hakako tātou i te mea ua tū hakaùa te Kirito
me i vāvena o te huaa mamate.
No èià, pēhea e koàna i tahipito me io ôtou te peàu :
aòè e pohoè hakaùa te huaa mamate ?
13 Anoa he teào tiàtohu to âtou,
aòè hoì i tū hakaùa te Kirito.
14 Anoa u te e tū hakaùa te Kirito
me i vāvena o te huaa mamate,
he mea avai noa to tātou hakakotina.
He mea tupepaka to ôtou haatià.
15 Tōtahi atu, ua ìò tātou he poì pōtoho pu i te Etua.
U peàu hoì tātou, u haatū hakaùa te Etua i te Kirito
me i vāvena o te huaa mamate.
Vāàna e âtou : aòè e pohoè hakaùa te huaa mamate.
No èià, aòè i tū hakaùa te Kirito.
16 Anoa u te e pohoè hakaùa te huaa mamate,
aòè hoì i tū hakaùa te Kirito.
17 No te e tū hakaùa te Kirito, he tupepaka to ôtou haatià ;
tihe i tēnei, u havatia ôtou e te mikeo.
18 Tītahi :
ua naò te poì te i mamate ma òto o te haatià i te Kirito.
19 Me tetaì tātou i te Kirito
no te haameitaì atu i to tātou pohoè to te ao nei,
ua ìò tātou he poì ìno nui i vāvena o te tau ènata paotū.
20 He mea kē : tiàtohu nui, ua tū hakaùa te Kirito
me i vāvena o te huaa mamate. O Īa te ènata to mua
te i pohoè hakaùa me i vāvena o te tau mamate paotū.
ALLELUIA ALLELUIA
Rk .6, 23
A koakoa, a tatakahiti ôtou i te koakoa
na te mea he nui atu to ôtou tuki io he àni.
EVANERIO O IETU KIRITO VĀÀNA E RUKA 6, 17.20-26
17 I tēia mou pō, e iho ana Ietu
me te tau Àpotoro, u hakaēa io te vahi pāàhaàha.
I èià te nuitina o te tau kouâ me te faètoa nui oko
me i te Fenua Iutea mai, me i Ierutaremi,
me i te fenua o te hiku o te tai Tiro me Titone.
20 E tiòhi ana Ietu i to Īa tau kouâ, u peàu pēènei :
« Mamau ôtou, e te poì veve,
na te mea ia ôtou te Patirēia o te Etua.
21 Mamau ôtou, e te poì mate i te one i tēnei,
na te mea e haamaònatia ôtou.
Mamau ôtou, e te poì mateteka ana i tēnei,
na te mea e kakata ôtou.
22 Mamau ôtou i te ava e haahaa te tau ènata ia ôtou,
te tiehi, te paha me te haamee i to ôtou inoa,
mēìa i te Tama a te ènata.
23 I tēia mou pō, a koakoa, a tatakahiti i te koakoa,
he mea nui atu to ôtou tuki io he àni.
Atii hoì ua hana to âtou tau tupuna i ùna o te tau perofeta.
24 Mea ìno ôtou, e te poì me te taetae nui.
na te mea ua tuutia mai to ôtou koakoa.
25 Mea ìno ôtou, e te poì maòna i tēnei,
na te mea e mate ai ôtou i te one.
Mea ìno ôtou, e te poì kakata i tēnei,
na te mea e tihe te ava o te uēuē, te mateteka.
26 Mea ìno ôtou ia hahi te tau ènata paotū ia ôtou,
atii hoì to âtou hana i ùna o te tau perofeta tīkoe. »
TOMINIKA E FITU
TETAUTINA O TO MUA HĀMANI A TAMUERA
26, 2.7-9.12-13.22-23
2 Ua fiti Tauro te hakaìki i te fenua ataha, o Tiha te inoa.
E tahi hee me īa e toù tautini kape me i te fenua Iraene.
7 I te pō, Tavite me Apihai to īa hoa,
ua uu âua i òto o te pāpua o Tauro.
U hiamoe te hakaìki. Ua tū to īa taa pii te upoo.
Ma to īa kaokao, u hiamoe te hakaìki Apenere
me to īa pūpū kapetiaì.
8 U peàu Apihai ia Tavite :
« I tēnei pō, u haaìò te Etua io to òe îìma
i te ènata tōua ia òe.
Epō me to īa iho taa e patia au ia īa. E tahi tā anaè. »
9 Atià, u haahua Tavite : « Umoì e kukumi ia īa.
No te mākaka òe i te hakaìki paùtia e te Etua,
e topa te tuki pē i ùna o òe. »
12 Ua too Tavite i te taa me te hue vai i pataa te upoo o Tauro.
Ua hee atu âua. Aòè i ìte e tahi, aòè i aa e tahi kapetiaì.
U hiamoe âtou nui.
Na te Etua i haatau i te hiamoe ma ùna o âtou.
13 Ua fiti Tavite ma ùna he tuaivi e tū ana io he kapua,
i te vahi memao me i èià.
22 U vevaò Tavite ia Tauro e taaàu pēènei :
« E te hakaìki e. Înei te taa.
A hano mai tītahi māhaì. A mai.
23 Na te Etua e haahua i te ènata vāàna i to īa koekoe toitoi,
hakahae koè. Na te Etua i haaìò ia òe i tu ù nā îìma.
Aòè au i kukumi i te hakaìki paùtia e te Etua. »
TARAMO 103 (102),1-2, 3-4, 8.10, 12-13
He moû, he kāòha anaè te Fatu 103,8
1 E tu ù kuhane, a haameitaì i te Fatu,
Me io he koekoe, a haameitaì i to Īa inoa peàto.
2 A haameitaì i te Fatu, e tu ù kuhane,
Aua e māhaè e tahi o to Īa vaièitina.
3 U vevete te Fatu i to òe tau mikeo paotū.
U haakoè te Fatu i te memae o to òe tino.
4 Na Īa i taki ia òe me io te ana tūpāpaù.
Na Īa i vahi ia òe i te kāòha me te hinenaò.
8 He moû, he kāòha te hakatu o te Fatu.
U haatevee i to Īa pekē : ua pī i te kāòha.
10 U te e utu mai te Fatu vāàna i to tātou tau piò.
Aòè e huke Īa i te umu ia tātou poì mikeo.
12 Me he memao te tihena o te òumati me i to īa naòna,
U tioà te Etua i te mikeo memao me io tātou.
13 Me he mea u kāòha te motua i to īa tama,
Hua hakatu to te Fatu kāòha i te ènata pakaihi ia Īa.
TETAUTINA O TO MUA HĀMANI I TO KORINETIA 15, 45-49
E tu ù tau tunane tuehine
45 Ua patutia hoì pēènei :
« O Atamo, e ènata to mua i pēpenatia he mēmau pohoè.
Atià, te Atamo paona, he kuhane īa me te tumu o te pohoè. »
46 To mua, ua tihe te mēmau pohoè,
ma hope mai, te taetae atu : te kuhane te i vaièi atu i te pohoè.
47 O Atamo matamua, u kāneatia me te èpo,
he ènata me i te fenua nei.
O Atamo e ùa, me io he àni mai īa.
48 Te tau ènata me i te fenua nei, u hakatu âtou
me te ènata kāneatia me te èpo.
O te tau ènata me io he àni,
e hakatu hoì âtou me hua ènata me io he àni mai.
49 Me he mea u haaìòtia tātou hakatu
me te ènata kāneatia me te èpo,
ma tītahi â, e ìò hoì tātou hakatu
me te ènata me io he àni mai.
ALLELUIA ALLELUIA
cf. In. 13,34
U avai te Fatu Ietu ia tātou i te Teào hou mai :
« A kāòha atu kāòha mai te hoa i te hoa,
me he mea u kāòha au ia ôtou. »
EVANERIO O IETU KIRITO VĀÀNA E RUKA 6, 27-38
I tēia mou pō, u peàu Ietu i te faètoa nui pēènei :
27 « O ôtou, e te poì e hakaòno mai, u peàu au ia ôtou :
a kāòha i te tau ènata e tōtōua me ôtou.
A vaièi atu i te poì e haahaa ia ôtou.
28 A haameitaì i te poì e haaìno ia ôtou.
A pure i uē i te poì e kaipīpiò ia ôtou.
29 Ia papaki te ènata i to òe papaìna,
avai ia īa e pehi i te papaìna kē.
Ia hao te ènata i to òe kahu uhi pu,
umoì e kaikino i to òe kahu òa.
30 Ia kaiape tītahi io òe, a vaièi atu ia īa.
Ia too te ènata i to òe mēmau,
umoì òe e haapākeka i hua mēmau ta te ènata i too pu.
31 A hana ôtou i uē i te ènata hua mea aneiho
e kōhoà ôtou e hana ta âtou i uē ia ôtou iho.
32 Anoa u kāòha atu ôtou i te tau ènata
te i kāòha mai ia ôtou,
e aha te tuki e vaièitia mai e te Etua ?
U kāòha atu hoì me te poì mikeo
i te tau ènata te i kāòha mai ia âtou.
33 Anoa e toko atu ôtou i te tau ènata te i toko mai ia ôtou,
e aha te tuki e vaièitia mai e te Etua ?
Hua mea aneiho hoì ta te poì mikeo.
34 Anoa e ao ôtou i te àiê mai te hoa ia ôtou
na te mea e koàna ia īa te haahua atu,
e aha te tuki e vaièitia mai e te Etua ?
Atii ta te poì mikeo : ua tuu atu âtou i te mēmau,
e tetaì ana e tuutia mai hua mea aneiho.
35 O ôtou à, a kāòha i te tau ènata tōtōua me ôtou.
A vaièi atu, a ao ôtou e àiê mai te hoa ia ôtou,
koè te tetaì ana e haahuatia mai e tahi mea aneiho.
Ma èià, e nui aè to ôtou tuki,
e ìò ôtou he tau tama o te Tiketike nui
te i vaièi atu i te poì kāòha koè me te poì pē.
36 A tūtū to ôtou hakāòha me te hakāòha o to ôtou Motua.
37 Umoì ôtou e haavā i te hoa, aòè ôtou e haavātia.
Umoì ôtou e hakatio atu, aòè ôtou e hakatiotia mai.
A vevete i te tau tekateka, e vevetetia to ôtou tekateka.
38 A tuu atu ôtou, e tuutia mai ia ôtou.
E tuutia ia ôtou i te hope taetae pī nui,
òomimeitaìtia, ûûtia, e meìni ana mēìa i te pī nui.
Na te mea, vāàna i to ôtou vaièi atu i tahipito,
e vaièitia mai ia ôtou.
TOMINIKA E VAÙ
TETAUTINA O PENETIRA TE TUHUNA TEÀO 27, 4-7
4 E tūtūtia te faraoa no te haapaekē i te kākano me te kaù.
Atii hoì te ènata te i pohā te èo, u pupuà to īa tau tekateka.
5 E tūtūtia te hue keâ i òto o te umu haaveàveàtia e te ahi.
Atii hoì e koàna ia òe e haavā i te ènata ma to īa teào.
6 Na te puku e ìtetia te hakatu o te tumuâkau.
Na te teào o te ènata, ua ìtetia te hakatu o to īa koekoe.
7 Aua òe e haakāìè vave i te ènata,
tiaì epō e ònotia ta īa teào.
E haapuàha te teào i te ènata tiàtohu.
TARAMO 92(91), 2-3, 13-14, 15-16
E te Fatu e,
U hei nui te hīmene hahi i to Òe inoa 92,2
2 U hei nui te haahuaèkaèka i te Fatu,
Te hīmene hahi i to Òe inoa, e te Etua tiketike.
3 I te pōpōuì, e haamevaha i te òno o to Òe kāòha,
I te ahiahi te haatiàtohu i to Òe vaièitina.
13 E tupu te ènata toitoi me he tumuèhi,
E hohoà ana i to īa tau manamana,
14 Hakatu me te âkau o te tuaivi Ripano,
Tanutia io te pāpua tapu o to tātou Etua.
15 E hua īa i te puku tihe to īa kooūa pē,
Pī i te èpau hakatu me to te tino hou,
16 No te haamevaha i te teào : « U toitoi te Fatu.
Aòè e hakahae te Etua, to ù motukeâ. »
TETAUTINA O TO MUA HĀMANI I TO KORINETIA 15, 54-58
E tu ù tau tunane, tuehine e,
E huìkētia te mēmau pao vave
me te haaìòtia he mēmau paona koè.
E huìkētia te mēmau mate vave
me te haaìòtia he mēmau mate koè.
54 Ia tihe hua ava o te pohoè mau anatu,
ia haahuìkētia te mēmau mate vave
no te haaìò he mēmau te i mate koè,
u haatoitoitia te teào o te Hāmani tapu te i peàu pēènei :
« U tuàki te pohoè. Ua naò te matena.
55 E te matena e, i hea to òe mana ?
E te matena e, i hea to òe taa tekeo ? »
56 O te mikeo te taa tekeo o te matena ;
O te Ture te ìi o te mikeo.
57 A haahuaèkaèka tātou i te Etua.
Na Īa hoì i vaièi mai no te tuàki i te matena
i òto o to tātou Fatu Ietu Kirito.
58 No èià, e tu ù tau tunane tuehine tāhia e,
a tohe mau paòpaò koè
te haahee i mua i te hana haakāìè i te Fatu.
Ua ìte ôtou io Īa te tuki meitaì o to ôtou hana.
ALLELUIA ALLELUIA
cf. Fi. 2,15-16
A tiaì mau i te teào haapohoè :
O ôtou te àma a pupuà no te tūìna i to te ao nei.
EVANERIO O IETU KIRITO VĀÀNA E RUKA 6, 39-45
I tēia mou pō,
39 u peàu hakaùa Ietu i to Īa tau kouâ i te teào haapupuà.
« Aha e koàna i te ènata matapō te aahi i te matapō ?
E vivii hoì âua tokoùa i to he ōpata.
40 Aòè te kouâ ma ùna aè o to īa tuhuna.
O te kouâ poeka, u hakatu toitoi me to īa tuhuna.
41 No te aha e tiòhi òe i te kaù hunahuna
te i òto o te kikomata o to òe teina ?
Aòè òe e ìte i te papapoho te i òto o to òe kikomata ?
42 Pēhea òa e koàna ia òe te peàu i to òe teina :
E tu ù teina e, epō a taki au i te kaù
me i òto o to òe kikomata,
o òe te i ìte koè i te papapoho
te i òto o to òe aneiho kikomata ?
E te ènata koekoe e ùa, a taki òmua i te papapoho
me i òto o to òe kikomata, a tahi a ìte tāhakahaka òe
mea taki i te kaù te i òto o te kikomata o to òe teina.
43 Aòè e hua i te puku pē te tumuâkau meitaì.
Atii hoì aòè e hua i te puku meitaì te tumuâkau pē.
44 O te puku to te i haaìte aè i te hakatu o te tumuâkau.
Aòè e kohitia te pukufiko me io te maateitā taataa.
Aòè e kohitia te pukuvino me io te teitā keoho.
45 O te ènata meitaì, ua too i te mea meitaì
me io te tau taetae meitaì te i òto o to īa koekoe.
O te ènata pē, ua too i te mea pē
me io to īa puke taetae pē.
U pohā te èo o te ènata no te teào
vāàna i te mea haapī nui i to īa koekoe.
TOMINIKA E IVA
TETAUTINA O TO MUA HĀMANI O TE TAU HAKAÌKI 8,41-43
41 I Ierutaremi, i òto o te faèpure, te Hiero,
ua tū Taromone i mua o te fātaa pure.
E feau ana, u hapai īa i nā îìma me to īa peàu pēènei :
« E te Fatu Etua e, u mevaha te òno nui o to òe inoa,
te mana o to òe ìma, to òe tau hana mahaò.
42 Me tihe mai i òto o te faèpure nei
tītahi manihii me i te fenua memao,
mēìa i to òe òno nui, a āpuu òe ia īa.
Me io he àni, a hakaòno i to īa pure,
a vaièi mai i te mea e apetia.
43 Ma èià, te tau mataèinaa o te aomāàma vii pu
e tahi me to òe mataèinaa Iraene,
e ìte i to òe mana me te pakaihi ia òe.
Te faèpure nei hoì ta ù i haatū,
o īa te vahi no te vevaò i to òe inoa.
TARAMO 117 (116), 1, 2
A tetaha atu ôtou ma te aomāàma vii pu,
a haaìte atu i te Teào Meitaì hou mai. Mk.16,15
1 A hahi i te Fatu, e te tau mataèinaa paotū,
A haakāìè i te Etua, e te tau fenua ia ôtoa.
2 U mana nui to Īa kāòha, i uē ia tātou.
Ua mau te tiàtohu o te Fatu,
Ma te tau tai e tihe anatu. Alleluia.
TETAUTINA O TE HĀMANI I TO KARATA 1, 1-2.6-10
1 O au nei Pauro, Àpotoro vaetia, aòè na te tau ènata,
akoè à vāàna i te maìmaì o tītahi ènata.
Ua vaetia au e Ietu Kirito me te Etua Motua
te i haatū hakaùa ia Ietu Kirito
me i vāvena o te huaa mamate.
2 O te tau tunane me te tau tuehine paotū no înei
e haatahi me au no te kāòha i te tau Èkaretia
èka ana i te Fenua Karata.
6 Ua pē au i te mahaò e kaituto ia ôtou :
aòè ôtou i haatevee no te paekē me io te Etua
te i vae ia ôtou ma te karatia o te Kirito.
U āpuu hoì ôtou i te teào kē peàutia Evanerio.
7 Aha enā te Evanerio kē ? Koè nui.
Enā te mou ènata aneiho e haaveke ia ôtou
me te hano e haahuìkē i te Evanerio o Ietu Kirito.
8 No te tihe mai io ôtou tītahi ènata, e aha à o au aneiho,
akoè à tītahi anera me io he àni,
me to īa haaìte i te Evanerio kē atu
o ta mātou i hakako ia ôtou,
a tioà te Etua ia īa i havaiki pē.
9 Òmua, u peàu au ia ôtou i hua teào ; i tēnei, u peàu hakaùa :
anoa e tihe mai io ôtou tītahi ènata
no te haaìte i te Evanerio kē atu
i ta mātou i hakako ia ôtou,
a tioà te Etua ia īa i havaiki pē.
10 E aha ? I tēnei, e hano au i te kāìè me io te tau ènata ?
Koè nui. O to ù hīa anaè e haaèka i te Etua.
No to ù hano e haaèka i te tau ènata,
aòè au e tāvini i te Kirito.
ALLELUIA ALLELUIA
In 3,16
Mēìa i te nuitina o to Īa kāòha i to te ao nei,
ua tuu mai te Etua i ta Īa Tama Tootahi.
O te ènata e haatià i hua Tama,
u koàna ia īa te pohoè anatu.
EVANERIO O IETU KIRITO VĀÀNA E RUKA 7, 1-10
I tēia mou pō,
1 ia pao te teào ta Ietu i maìmaì e hakako i te mataèinaa,
ua uu Īa i òto o te pāpuafaè Kafaranaumi.
2 Enā i èià tītahi keneturione me to īa tāvini ua hemo i te mate,
mei mate nui hua tāvini.
U haataetae te keneturione i to īa tāvini.
3 Ua tihe te òno nui o Ietu io te keneturione
me to īa pahi atu i te mou kōkooūa ati Iuta
no te ape ia Ietu a hee mai no te haapohoè i to īa tāvini.
4 Ia titihe mai âtou io Ietu, u toutaki ma te tohe mau,
e peàu ana : « He mea hei e fati mai òe i to īa hīa.
5 U kāòha hoì īa i to mātou fenua ;
na īa i haatū i te tinakoka no mātou. »
6 Ua taha Ietu me âtou.
Ohia ua tata Īa me te faè, u pōpahi te keneturione
i nā hoa o īa no te peàu ia Ietu :
« E te Fatu e, umoì e haapaòpaò ia òe.
U hei koè au no to òe uu io to ù faè.
7 O īa te piò o to ù maakau :
u hei koè au no to ù tihe mai io òe.
Atià e tahi aneiho èo na òe, e pohoè to ù tāvini.
8 He kape hoì au e aotahi ana i to ù hakaìki.
Enā me te fatu kape ta ù e vivini.
No ta ù peàu i tītahi : a taha atu, ua taha īa.
I tītahi : a mai. Ua taha mai.
Me ta ù peàu i to ù tāvini :
a hana i tēia hana. Ua hana īa. »
9 Ia òno Ietu i hua teào, ua pī Īa i te mahaò.
E fāìu ana Ietu, u peàu i te faètoa i ūtaì ia Īa :
« E peàu ta ù nei ia ôtou : io te mataèinaa Iraene,
aòè i koàna ia ù te haatià e tūtū me to hua ènata. »
10 Ia hua atu io he faè nā keèe i pahitia,
u koàna mai ia âtou te tāvini u feòfeò te tino.
TOMINIKA ÒNOHUU
TETAUTINA O TO MUA HĀMANI A TE TAU HAKAÌKI
17, 17-24
17 Ua noho te Perofeta Eria io te faè o tītahi vehine.
O te tama o hua vehine, ua hemo i te mate.
Ua oko nui to īa mate me to īa mate nui atu.
18 A tahi a peàu te vehine ia Eria :
« E aha ta òe hana io to ù faè, e te ènata a te Etua ?
Ua tihe òe înei no te haamaakau mai i to ù piò
me te haamate i ta ù tama ? »
19 U haahua Eria : « A tuu mai to tama. »
Ua too īa i te tama me io te pūhā o te kui.
Ua àve Eria i te tama io te pāòto i ùna o te faè
me te haamoe io to īa òki.
20 U vevaò Eria i te Etua e peàu ana :
« E te Fatu, to ù Etua e, aha u pekē òe
i tēnei vehine pōpī te i āpuu mai ia ù io to īa faè ?
Na òe i haamate i ta īa tama ? »
21 Ua moe Eria i ùna o te tama,
e toù moetina, e vevaò ana i te Etua pēènei :
« E te Fatu, to ù Etua e.
A haahua mai te menava o te tama. A haapohoè ia īa. »
22 U āpuu te Etua i te pure o Eria ;
ua hua te menava i òto o te tama ; u pohoè īa.
23 Ua too Eria i te tama me te iho i òto o te faè.
Ua tuu atu i te tama i to īa kui,
e peàu ana : « A tiòhi. U pohoè to tama. »
24 U peàu te vehine : « A tahi nei au a ìte he ènata a te Etua òe.
Ma òto o to òe fafa, u tiàtohu te Teào a te Fatu. »
TARAMO 30 (29), 3-4, 5-6ab, 6cd-12, 13
E te Fatu e, u haatiketike au ia Òe te i haatū mai ia ù.
30,2
3 I te ava e taaàu to ù èo io Òe,
E te Fatu, tu ù Etua e, u haameitaì mai.
4 Ua taki mai Òe me io he ōpata,
U haapohoè mai me i te ana o te tūpāpaù.
5 A hahi i te Fatu, ôtou, e te poì haatià e.
A haahuaèkaèka ma te haaòno nui i to Īa inoa.
6 He ava poto to te Etua pekē,
Ma te òa o te pohoè to Īa haameitaì.
I te ahiahi, e tahe te vaimata :
Ma te pōpōuì te taaàu koakoa
12 U haaìò Òe i tu ù uēuē me he â koìna.
Ua veti i to ù kahu pēpē no te uhi mai me te koakoa.
13 A taaàu i te koakoa, e tu ù kuhane.
Umoì e mutu pu òe, a haakoìna no te Fatu.
E hahi au hakaēa koè i te Fatu, tu ù Etua.
U haahuaèkaèka au ia Òe, e te Fatu e.
TETAUTINA O TE HĀMANI I TO KARATA 1, 11-19
E tu ù tau tunane tuehine.
11 A ìte meitaì ôtou : aòè he maakau ènata
te tumu o te Evanerio ta ù i hakako ia ôtou.
12 Aòè tītahi ènata i tuu mai i hua Evanerio,
akoè à i hakako mai. Koè nui.
O īa te māàma ta Ietu Kirito aneiho i faì mai ia ù.
13 Ua òno ôtou i to ù hakatu pohoè òmua atu,
i te ava u tāvini au i te Etua
vāàna i te haatià o te tau ati Iuta.
Mēìa i to ù haahaa pao i te Èkaretia o te Etua,
u haamākaka au i te poì haatià,
e hano te haahina ia âtou.
14 Ua ūo atu to ù koekoe i to tu ù tau hoa
no te aotahi i te ture ati Iuta,
mēìa i to ù haataetae ma ùna atu i tahipito tau hoa,
i te teào tuutia mai e to mātou tau tupuna.
15 Atià, ma mua u fānautia au, ua vae te Etua ia ù
me to Īa vevaò mai ma to Īa karatia, no te tāvini ia Īa.
16 I te â u vaièi mai te Etua no te ìte i to Īa Tama,
etià e haamevaha au i te Teào meitaì o hua Tama
i vāvena o te tau mataèinaa êteni,
17 aòè au i ape i tītahi ènata e aha te hana e hana au.
U te e fiti au i Ierutaremi no te âvei me te tau Àpotoro.
Na ù ta ù anaè, ua hee au i te Fenua Arapia,
ma hope iho i te pāpuafaè Tamati.
18 E toù èhua i muì iho, ua fiti au i Ierutaremi
no te haaâvei me Petero. E ùa âtapu, ua noho au me īa.
19 Aòè au i ìte i tītahi Àpotoro kē.
O Iakopo aneiho, te teina o te Fatu.
ALLELUIA ALLELUIA
cf. Rk.7,16
Ua tū te Perofeta mana i vāvena o tātou.
U tiòhi me te meitaì te Etua i to Īa mataèinaa.
EVANERIO O IETU KIRITO VĀÀNA E RUKA 7, 11-17
I tēia mou pō,
11 ua fiti Ietu io tītahi pāpuafaè, o Naimi te inoa.
E tahi me Īa, ua taha vaevae to Īa tau kouâ
me te faètoa nui.
12 Ia tata Ietu me te avaputa o te pāpuafaè,
enā ua àvetia te tino tūpāpaù io he tomina :
he tama tootahi te tūpāpaù, he vehine pōpī to īa kui.
Ua hee haatahi me hua vehine
te faètoa nui me io te pāpuafaè.
13 Ia ìte te Fatu i te vehine, u mehea to Īa koekoe
me to Īa peàu ia īa :
« Umoì e mateteka. »
14 I muì iho, u haatata mai Ietu. U haatukia Īa me te paaha.
U hakaēa te tau ènata e amo i te tino tūpāpaù.
U peàu Ietu : « E mahaì e, na ù te peàu : a aa ! »
15 A tahi a kaapee te tūpāpaù me te pohā o to īa èo.
U haahua Ietu ia īa i to īa kui.
16 Ua pē âtou nui i te haametaù
me to âtou haakāìè i te Etua, e peàu ana :
« Ua tū te perofeta mana i vāvena o mātou nei.
U tiòhi me te meitaì te Etua i to Īa mataèinaa. »
17 U mevaha te òno o Ietu ma te tiàtohu
o te fenua o te tau ati Iuta atii me te fenua vii pu.
TOMINIKA ÒNOHUU MA TAHI
TETAUTINA O TE HĀMANI E ÙA O TAMUERA 12, 7-10.13
7 He mikeo nui to Tavite te i kukumi ia Uria.
Ua tihe io ia Natana te perofeta te i peàu pēènei :
« He teào o te Fatu, te Etua o Iraene.
U haatū au ia òe he hakaìki no Iraene.
U haapohoè au ia òe me i te îìma mākaka o Tauro.
8 Ua tuu atu au ia òe i te faè me te tau mēmau o to òe vivini.
Ua ìò ia òe te tau vehine o te hakaìki Tauro.
U haaeke au ia òe e hakaìki o te ati Iuta,
atii me te ati Iraene.
Auana òe aòè i àva hua tau taetae,
a ape mai e hana au vāàna i to òe maìmaì.
9 A faì mai : umaha i haamee ai òe i te Etua
ma te hana ta Īa i haatapu ?
Ua kukumi òe me te kohetā ia Uria te Hitita.
Ua too òe i ta īa vehine.
Ua ta òe ia īa ma te kohetā o te tau tama o Amote.
10 Me i tēnei â, aòè te kohetā e hakaēa te tā
no te kukumi i to òe huaafaè.
O īa te umu o to òe haamee ia ù.
O īa te tuki no te haaìò
i te vehine a Uria Hitita he vehine na òe. »
13 A tahi a peàu Tavite ia Natana te perofeta :
« Mea toitoi. U mikeo au i mua o te Etua. »
Ua hua atu Natana :
« U haakoè te Etua i to òe mikeo. Aòè òe e mate nui. »
TARAMO 32 (31), 1-2, 5abcd, 5ef.7, 10bc-11
E te Fatu e, a haakoè mai Òe i tu ù tau piò,
A haatū mai Òe ia ù ! cf. .32,5
1 Mamau te ènata i tuutia to īa tau mikeo.
Mamau te ènata i haakoètia to īa àiê.
2 Mamau te ènata i vevetetia to īa piò e te Etua.
Mamau te ènata teka koè to īa kuhane.
5 E te Fatu e, u haaìte au i to ù teka ia Òe.
Aòè au e hakanā i to ù tau piò.
U peàu au : e haahuaèkaèka au i te Fatu,
E faì ana i to ù tau mikeo.
Ua tuu Òe i te umu o to ù mikeo.
Ua ìò Òe he vahi maù no ù.
7 Enā vii pu o au nei te pūpū hīmene.
Ua òno au i to âtou tanitina èo.
10 O te tau ènata e haatià i te Fatu,
Na to Īa kāòha e tiaìmeitaìtia âtou.
11 A koakoa ôtou i òto o te Fatu,
Ôtou te poì koekoe toitoi.
A taaàu me te koakoa.
TETAUTINA O TE HĀMANI I TO KARATA 2, 16.19-21
E tu ù tau tunane tuehine.
16 Ua ìte tātou u haatoitoitia te ènata i mua o te Etua
mēìa anaè i to īa haatià ia Ietu Kirito,
aòè ma te aotahi atu i te Ture a Moite.
O īa te tumu u haatià tātou ia Ietu Kirito
vāàna e haatoitoitia tātou i hua haatià,
aòè mēìa i te aotahi atu i te Ture.
I mua o te Etua, u te e haatoitoitia te ènata e tahi,
ma te tau hana vāàna i te Ture a Moite.
19 I tēnei, me he mea he ènata mate nui au,
no èià aòè e mana te Ture a Moite i ùna o au.
O te Ture iho te i haamate ia ù, vāàna e pohoè au no te Etua.
U pāokapekatia au e tahi me te Kirito.
20 No èià, aòè o au anaè te ènata e pohoè nei :
o te Kirito te i pohoè i òto o au iho nei.
Te tumu o to ù hakatu pohoè o te Kirito,
te Tama a te Etua te i kāòha mai, te i mate nui i uē ia ù.
21 Aòè e haamee au i te karatia vaièitia mai e te Etua.
Anoa e haatoitoitia te ènata ma te aotahi atu i te Ture,
ua mate nui te Kirito no te mea tupepaka.
ALLELUIA ALLELUIA
130,7
Io te Fatu, te kāòha, te haapohoètina mau anatu.
EVANERIO O IETU KIRITO VĀÀNA E RUKA 7, 36 -- 8, 3
I tēia mou pō,
36 u vevaò tītahi Fariteo ia Ietu i te kainamau io īa.
Ua uu Ietu io he faè o hua Fariteo
me to Īa noho io te tapukai.
37 Ua tihe tītahi vehine,
he vehine mikeo, noho ana io tēia pāpuafaè.
Ua òno īa enā Ietu e kai ana io he faè o te Fariteo.
Ua àve īa i te hue keâ pī i te kao kekaa.
38 Ua moe haatona ma te tua o Ietu, i pii o to Īa vaevae,
nui oko to īa uē,
ua tahe to īa vaimata i ùna o nā vaevae o Ietu.
U hooi īa me to īa òuoho i nā vaevae
e honi ana, e paù me te kao kekaa.
39 E ìte ana i hua mea, o te Fariteo te i vevaò ia Ietu,
u maakau io he koekoe, pēènei :
« Anoa he perofeta hua ènata,
e ìte Īa o ai te vehine e haatukia me Īa,
e aha to īa hakatu : he vehine mikeo hoì. »
40 U pohā te èo o Ietu me te peàu ia īa :
« E Timone e, e too ta ù e tahi teào ia òe. »
U peàu īa : « A teào, e Tuhuna e. »
41 « Nā hoa tokoùa i àiêtia io tahi te ènata.
U àiê tītahi e ìma hānere moni tenario,
o tītahi u àiê e ìma ònohuu moni tenario.
42 Ohia aòè he mea ta âua no te utu i te àiê,
u haakoè te ènata i te àiê ia âua tokoùa.
O ai à to âua e nui atu te kāòha i hua ènata ? »
43 U haahua Timone : « To ù maakau,
te ènata i àiêtia te nui atu o te moni. »
U peàu Ietu : « Toitoi aneiho ta òe nei. »
44 E fāìu ana io te vehine, u peàu Ietu ia Timone :
« A tiòhi òe i tēnei vehine. Ua uu au io to òe faè :
aòè i kiini òe i te vai i ùna o tu ù mou vaevae.
O īa, u hooi i tu ù mau vaevae me to īa vaimata,
u haamoô me to īa òuoho.
45 O òe, aòè i honi mai.
O īa me i te ava o to īa uutina mai,
ua honi hakaēa koè i tu ù mau vaevae.
46 O òe, u te e paù me te kao i tu ù upoo.
O īa, ua paù me te kao kekaa i tu ù mou vaevae.
47 No èià, u peàu au ia òe : u haakoètia to īa tau mikeo,
te nuitina o te tau mikeo,
na te mea u haaìte atu īa i te nui o to īa kāòha.
Me haakoètia te mea iti i te ènata,
u haaìte hua ènata he mea iti to īa kāòha. »
48 I muì iho, u peàu Ietu i te vehine :
« Ua tuutia to òe tau mikeo. »
49 A tahi a kaituto io he koekoe ta te tau hoa kai :
« O ai òa tēnei ènata te i haakoè i te tau mikeo ? »
50 U peàu Ietu i te vehine :
« Na to òe haatià i haapohoè ia òe.
A taha atu me te moû. »
8,1 I muì iho, ua vii Ietu i te tau pāpuafaè me te tau kākaavai.
U haaìte atu Īa me te haamevaha i te Teào meitaì hou mai
o te Patirēia a te Etua.
2 Enā me te Tīònohuu ma tokoùa me Īa
me te mou vehine i haapohoètia
me io te kuhane ìno me te tau mate kē, mate kē.
O Maria tītahi te i peàutia Matarena,
me i òto o īa e fitu tiaporo i tutetia.
3 O Ioana tītahi te vehine a Kuha,
te ènata vivini i te faè o Herote,
o Tutana me tahipito tau vehine kē,
e toko ana me to âtou taetae ia Ietu me te tau kouâ.
TOMINIKA ÒNOHUU MA ÙA
TETAUTINA TE HĀMANI O TE PEROFETA TAKARIA
12, 10-11 ;13,1
10 Oianei te teào o te Fatu :
I tēnei â, i ùna o te huaafaè o Tavite,
i ùna o te tau ènata noho ana i Ierutaremi,
e haaneke au i te kuhane, te tumu o te moû me te pure vevaò.
E feau âtou, tiòhi ana i tēia i tīputaèetia e âtou.
E mateteka âtou ia Īa
me he mateteka i uē i te tama tootahi i mate,
e uēuē âtou ia Īa me he uēuē i te tama hāmua mate havaiki.
11 I tēnei â, e uē ûûkina to Ierutaremi paotū.
13,1 I tēnei â, e pupuhi te vaipuna no te ati o Tavite,
atii no te tau ènata noho ana i Ierutaremi,
na Īa e haataìtaì i to âtou tau mikeo me to âtou tau mea pē.
TARAMO 66 (62), 2, 3- 4, 5- 6, 8-9
A feau te mata io te Fatu,
mēìa u haapohoètia mātou ma to Īa peka.
2 E te Etua e, o Òe tu ù Etua.
I te pōpōuì tika, e ùmihi nei au ia Òe.
O Òe te hīa o to ù kuhane me i te tino,
Me he mea e paka i te vai te èpo paka meô.
3 Ua ìte au ia Òe i òto o te vahi tapu,
U tiòhi mata au i to Òe mana me te kāìè.
4 Te hinenaò ia Òe, u meitaì atu i te pohoè,
Te hahi ia Òe, to ù tanitina èo anaè.
5 Ma te òa o to ù pohoè, e haameitaì au ia Òe.
U hapai au i to ù îìma e hahi ana i to Òe inoa.
6 U koakoa hoì au me he ènata maòna i te kai mōmona.
Me te mata kata, e hīmene au no te hahi ia Òe.
8 Ua tihe hoì Òe no te toko mai.
I to Òe aò, u hīmene au me te koakoa.
9 Ua haapii to ù kuhane me Òe.
O to Òe ìma oko to ù toko.
TETAUTINA O TE HĀMANI A PAURO PEÀTO I TO KARATA
3, 26-29
E tu ù tau tunane tuehine.
26 Ma te haatià, ua ìò ôtou paotū he tau tama a te Etua,
kātahi me Ietu Kirito.
27 Ohia u papatematia ôtou i òto o te Kirito,
ua tūtū to ôtou hakatu pohoè me to Ietu.
28 Mēìa i to ôtou haatahi me te Kirito,
he mea avai noa te inoa ati Iuta, inoa Hereni,
te hakatu poì haamōèhutia me te hakatu poì na âtou
ta âtou, te ènata āhana me te ènata vehine.
I òto o te Kirito, ua ìò ôtou e tahi tino anaè.
29 Anoa ua kē ôtou me te Kirito,
ua ìò ôtou te ati i ùna aè o Aparahamo.
No ôtou te tau taetae i peàutia e te Etua.
ALLELUIA ALLELUIA
cf. 1Ko.1,23-24
E hahi nei tātou i te Kirito pāokapekatia,
he teào koea no te tau mataèinaa êteni,
atià, he mana, he māàma o te Etua.
EVANERIO O IETU KIRITO VĀÀNA E RUKA 9, 18-24
18 I tēia mou pō, ua pure Ietu io he vahi viviio,
enā te tau kouâ me Īa. Ua ūi atu Ietu ia âtou :
« O ai au nei, vāàna ta te faètoa i peàu atu ? »
19 U haahua atu âtou : « O Ioane Papetita. Ta tahipito : o Eria.
Ta tahipito : Tītahi perofeta tehito te i pohoè hakaùa. »
20 U peàu Ietu ia âtou :
« Atià no ôtou à, o ai au nei ta ôtou i peàu ? »
U pohā te èo o Petero me to īa haahua atu :
« O te Kirito o te Etua. »
21 U oonaì oko Ietu ia âtou me te peàu
umoì e faì atu i te ènata e tahi.
22 U peàu Ietu : « E memae oko te Tama a te Ènata,
e titiitia e te tau kōkooūa, e te tau tāuà nui,
e te tau tuhuna teào. E kukumi haamatetia.
E tū hakaùa Īa ma te toù o te pō. »
23 U peàu Ietu i te tau ènata paotū :
« Ia maìmaì te ènata e ūtaì ia ù, a titii ia īa aneiho.
I tēia â, i tēia â, a amo i to īa peka, a ūtaì mai.
24 O te ènata u maìmaì i to īa pohoè e koàna mai,
e haakoè īa i hua pohoè.
O te ènata e haakoè i to īa pohoè mēìa ia ù,
e koàna mai ia īa te pohoètina. »
TOMINIKA ÒNOHUU MA TOÙ
TETAUTINA O TO MUA HĀMANI O TE TAU HAKAÌKI
19, 16b.19-21
U peàu te Etua i te perofeta Eria :
16 « A paù me te kao tapu ia Erihea, tama a Tafata.
O īa te tū mai me he perofeta ma hope o òe. »
19 Ua iho Eria me io he tuaivi Tinai.
U âvei īa me Erihea, e hana ana io to īa pāpua.
Tekau ma fā tau pifa e hana me īa.
Ua pei īa no te hana keì i te èpo.
U taha Eria i mua, ua tuu atu
i to īa kahu uhi pu i ùna te pauhihi o Erihea.
20 U avai i to īa tau pifa, u tohuti Erihea
ma muì o Eria. U peàu Erihea pēènei :
« Epō. Enā a hee au e haaâvei me te motua me te kui
no te kāòha ia âua. I muì iho, e ūtaì au ia òe. »
U peàu Eria ia īa : « A hee atu. E aha ta ù nei me òe ? »
21 Ua hua atu Erihea.
Ua too īa i nā pifa e ùa no te ùtuna hēana.
U haauà i te ahi me te tau âkau o to īa haìna hana.
Ua tunu īa i nā pifa e ùa, ua tufa atu i te poì hana.
Ua hee Erihea me to īa ūtaì ia Eria.
TARAMO 16 (15), 1.2a.5, 7-8, 9-10, 2b.11
O te Fatu anaè tu ù koakoa me tu ù èkaèka.
1 E tu ù Etua e, a tiaki meitaì ia ù.
O to ù hīa io Òe, tu ù vahi maù.
2 U peàu au i te Fatu : O Òe tu ù Etua.
5 O te Fatu te hope taetae ua ìò ia ù.
Io to Òe ìma, e te Fatu e, to ù pohoètina.
7 U haameitaì au i te Fatu to ù māàma.
Me i te â, me i te pō tu ù vevaò ia Īa.
8 I mua o to ù mata anatu te Fatu,
Ma to ù kaokao to Īa noho, u haametaù koè au.
9 Ua ù i te koakoa to ù kuhane.
U èkaèka to ù tino, ua moe me te moû.
10 Aòè te Fatu e ao e hina au i te matena.
Aòè Īa e avai i to Īa hoa e pē ai io he èpo.
2b Io Òe anaè to ù koakoa.
11 U aahi mai Òe ma no he aanui o te pohoè,
I mua i to Òe mata te koakoa, te koakoa nui.
Ma to Òe kaokao te èkaèka paona koè.
TETAUTINA O TE HĀMANI A PAURO PEÀTO I TO KARATA
5, 1.13-18
1 E tu ù tau tunane tuehine.
U haakoè te Kirito i to tātou hakatu tama tueni,
etià e pohoè nei na tātou ta tātou.
Oho te ìi. Umoì ôtou a amo hakaùa
i te amona o te tau tueni haamōèhutia.
13 Ua vaetia ôtou no te pohoè na ôtou ta ôtou anaè.
Aòè ôtou i hakatu me te tau tama tueni haamōèhutia.
Atià, umoì e avai ôtou i te hīa o te tino te haatee ia ôtou.
Ma òto o te kāòha atu kāòha mai, a tāvini te hoa i te hoa.
14 O te tau teào paotū te i òto o te Ture a Moite,
me he ture e tahi anaè, pēènei :
« A kāòha te hoa i te hoa me he mea ia òe aneiho. »
15 Anoa e tōtōua ôtou me he tau ânimara kaimōmoke
e nanahu atu nanahu mai, e pipikièe atu pipikièe mai,
a tiòhi meitaì oa hina atu hina mai te hoa i te hoa.
16 Oianei to ù teào : a ao i te Kuhane Meitaì e haatee ia ôtou.
Ma èià, e òomi ôtou i te tau hīa pē o te tino.
17 He mea kē hoì te tau hīa o te tino,
mea kē te hīa o te Kuhane Meitaì.
Aòè e haatūtahi te hīa o te tino me to te Kuhane Meitaì.
O īa te piò ia haatee te Kuhane ia ôtou,
u te e hana ôtou vāàna i te hīa o te tino.
18 Anoa e aotahi ôtou i te maìmaì o te Kuhane Meitaì,
ua koè te mana o te Ture i ùna o ôtou.
ALLELUIA ALLELUIA
cf. 1Ta. 3,9 ; In.9,69
I tēnei â, e vevaò nei te Fatu ia tātou.
A ūtaì atu ia Īa ma no he aanui o te Evanerio.
EVANERIO O IETU KIRITO VĀÀNA E RUKA 9, 51-62
51 Ohia u haatata mai te ava o to Īa hapaitina me i te ao nei,
me te koekoe oko, ua fiti Ietu i Ierutaremi.
52 U pōpahi i nā keèe i mua o Īa.
E hee ana âtou, ua tomo io tītahi pāpuafaè
o te Fenua Tamaria mea haapei i to Īa tihetina mai.
53 Atià, u te e āpuu âtou ia Ietu mēìa e fiti Īa i Ierutaremi.
54 Ia ìte nā kouâ Iakopo me Ioane i hua mea nei,
u peàu âua : « E te Fatu e, aha e maìmaì Òe e peàu maua
a iho te ahi me io he àni no te haapūovo ia âtou ? »
55 U fāìu Ietu no te oonaì ia âua.
56 Ua hee âtou io tītahi pāpuafaè kē.
57 E hee ana âtou, u peàu tītahi ènata ia Ietu :
« E ūtaì au ia Òe, io te vahi paotū e hee Òe. »
58 U peàu Ietu ia īa :
« O te tau vurupe, enā me to âtou ana.
O te tau manu e ona nei i te ataàni, enā me to âtou kōhata.
Aòè to te Tama a te ènata, aòè e tahi te keâ
mea tuu ma aò o to īa upoo. »
59 U peàu Ietu i tītahi ènata : « A ūtaì mai òe. »
U haahua atu te ènata :
« A ao Òe e hee òmua au no te tomi i to ù motua. »
60 U peàu Ietu ia īa :
« Avai i te poì mamate te tomi i to âtou tino tūpāpaù.
O òe, a hee me te haaìte atu i te Patirēia o te Etua. »
61 U peàu te ènata kē ia Ietu : « E te Fatu e, e ūtaì au ia Òe.
Atià òmua a ao Òe e hee au no te kāòha i to ù huaafaè. »
62 U peàu Ietu ia īa :
« O te ènata te i keì i te èpo io to īa pāpua,
atià u tiòhi kōmuì, aòè e hei hua ènata
no te Patirēia o te Etua. »
TOMINIKA ÒNOHUU MA FĀ
TETAUTINA O TE PEROFETA ITAIA 66, 10-14c
10 A koakoa ôtou e tahi me Ierutaremi.
A èkaèka ôtou mēìa ia Ierutaremi.
O ôtou paotū e haataetae ia īa.
A koakoa nui ôtou te i uē mēìa i to īa matena.
11 A àva atu ôtou i te kainamau
o to Īa pohoè haaèkaèka.
A haamaòna ôtou, a inu ôtou tihe i te kūtina
me io te nuitina o to Īa kāìè.
12 Oianei ta te Etua i peàu :
« E aahi mai au i Ierutaremi i te moû me he vaitahe.
I Ierutaremi me he taitoko,
e haapuke au i te tau taetae o te tau mataèinaa.
E ìò ôtou me te tau tama hou hoputia,
te tau tama tāhia haataetaetia io he pūhāîìma.
13 Me he mea e haakoè te kui i te uē o to īa tama,
atii tēnei e haakoè au i to ôtou uē i òto o Ierutaremi.
14 E ìtemata ôtou : e pī ôtou i te koakoa.
Mēìa i te koakoa, e haahoutia to ôtou tino
me he teitā tupu hou.
E haapuàha te Fatu i to Īa mana nui i mua o to Īa tau tāvini. »
TARAMO 66 (65), 1-3a, 4-5, 6-7a, 16.20
A hahi i te Etua, e te fenua ia ôtoa. A hīmene no te Fatu.
66, 1
1 A hahi i te Etua, e te fenua ia ôtoa.
A haakoìna no te haakāìè i to Īa inoa.
2 A haahuaèkaèka me te hahi ia Īa.
3 A peàu ôtou i te Etua : « Auē ! To Òe hana mana. »
4 I to Òe aò, e moe haatona te tau mataèinaa paotū,
E hīmene ana ia Òe me te hahi i to Òe inoa.
5 A mai. A ìte ôtou i te hana o te Etua,
To Īa tau hana mahaò i uē i te tau ènata.
6 Na te Fatu i haaìò i te tai me he papakeâ,
U paìpaì koè te vaevae o to Īa mataèinaa.
O hua tau hana mahaò, te tumu o to tātou koakoa.
7 E paona koè to Īa vivini me te mana.
16 A mai, e te poì pakaihi i te Etua,
A haaòno i to te Etua hana i uē ia ù.
20 A haameitaìtia te Etua te i āpuu i to ù pure,
Te i tiòhi mai me te kāòha.
TETAUTINA TE HĀMANI I TO KARATA 6, 14-18
14 E tu ù tau tunane tuehine.
O au à, koù e ìò te matena o te Kirito uo he peka
te tumu o tu ù kāìè, tu ù anaè kāìè.
Ma hua peka hoì o te Kirito, me he mate nui no ù
te tau mēmau paotū o te ao nei.
Atii me au iho, me he ènata mate nui au no te ao nei.
15 He mea tupepaka te haapātehe,
he mea tupepaka te pātehetia koè.
O te mea taetae oko, e ìò tātou he pēpena hou.
16 I te tau ènata e pohoè vāàna i hua māàma,
te moû me te hakāòha mai me io te Etua.
Hua mea aneiho no te mataèinaa o te Etua,
te Iraene tiàtohu.
17 Oianei to ù teào paona :
umoì e tahi ènata e hano haapaòpaò hakaùa mai.
Ua ìtetia i òto o to ù tino
te tau maki i memae au i uē ia Ietu.
18 E tu ù tau tunane tuehine, me to ôtou kuhane
te karatia o to tātou Fatu Ietu Kirito. Amene.
ALLELUIA ALLELUIA
cf. Ta.19,5
U mevaha te Teào, te Teào Meitaì Hou mai
tihe atu io te tau kotina o te fenua.
EVANERIO O IETU KIRITO VĀÀNA E RUKA 10, 1-12.17-20
I tēia mou pō,
1 ua vae te Fatu e fitu ònohuu ma tokoùa kouâ kē.
Ua pahi atu ia âtou tokoùa, tokoùa i mua o Īa,
io te pāpuafaè paotū me te tau kākaavai
i èià u maìmaì Īa e hee atu.
2 U peàu Ietu ia âtou :
« He mea nui te tau puku paa,
he mea iti te poì kohi i te puku.
A pure hoì ôtou i te fatu hei pāpua
etià e pahi īa i te poì hana no te kohi i to īa tau puku.
3 A tataha atu. Enā, e pōpahi atu au ia ôtou
me he arenio muto i vāvena ahau o te tau rupo.
4 Umoì ôtou e too i te moni, te kete, te aihū,
aua e hakaēa ôtou ma io he aanui no te kāòha i te ènata.
5 Ia uu ôtou io tītahi faè, a peàu òmua pēènei :
« I te huaafaè nei te moû ! »
6 Enā i òto o te faè te ènata kōhoà nei i te moû,
e ihi to ôtou moû i òto o īa.
Akoè à, e hua mai te moû i òto o ôtou.
7 A noho ôtou io hua faè, a kai, a inu
i te mea i tuutia ia ôtou.
I te ènata hana hoì to īa tuki.
Umoì ôtou e hee me io tēnei faè i tēia faè.
8 Anoa e tomo ôtou io tītahi pāpuafaè
te i āpuu meitaì ia ôtou, a kai i te mea e tuutia ia ôtou.
9 A haameitaì ôtou i to âtou poì hopi me te peàu ia âtou :
u tata èka me ôtou te Patirēia o te Etua.
10 Anoa e tomo ôtou io tītahi pāpuafaè
aòè i āpuu ia ôtou, avai i to âtou faè,
a hee atu ma no he aanui me te peàu :
11 « O te èpo o to ôtou pāpuafaè te i pipii
ma aò o to mātou vaevae, e tūtū mātou me te avai io ôtou.
Atià, a ìte ôtou : u tata èka te Patirēia o te Etua. »
12 Na ù e peàu ia ôtou : I te â o te haavā paona,
e mea pē atu te tuki o hua pāpuafaè i te tuki pē o Totoma.
17 Ua hua mai te tau kouâ e fitu ònohuu ma tokoùa.
Ua pī âtou i te koakoa me to âtou peàpeàu pēènei :
« E te Fatu e, ma to Òe inoa, u aotahi mai me te tau tiaporo. »
18 U peàu Ietu ia âtou : « E tiòhi ana, ua ìte au ia Tatane,
e haaihotia ana me he uià e pohā io he àni.
19 Eīa, ua tuu atu au ia ôtou i te mana no te tekahi
i te tau puhifenua, i te tau koropio,
me te haahina i tēia e haapākeka ia ôtou.
Aòè he mea e haamākaka mai ia ôtou.
20 Atià, umoì ôtou e koakoa
mēìa u aotahi te tau kuhane ìno ia ôtou.
A koakoa mēìa ua patutia to ôtou inoa io he àni. »
TOMINIKA ÒNOHUU MA ÌMA
TETAUTINA TE HĀMANI A MOITE PEÀUTIA TEUTERO
30, 10-14
10 U peàu Moite i te mataèinaa Iraene pēènei :
« A hakaòno òe i te èo o te Fatu to òe Etua
me te aotahi atu i to Īa maìmaì, to Īa teào
patutia ma òto o te hāmani o te Ture.
11 A hua mai i te Fatu to òe Etua
ma òto o te tiàtohu o to òe koekoe me te kuhane.
E koàna ia òe te aotahi atu i te teào ta ù i peàu i tēnei â.
Umoì òe e maakau : Ua tono hua teào. Na ai e aotahi atu ?
12 Aòè hoì e noho tenā Ture io he ataàni.
Umoì òe e peàu :
O ai te fiti io he àni no te ùmihi i hua Ture
me te haaìte mai etià e aotahi atu mātou ?
13 Aòè hoì e noho tenā Ture ma tītahi kēkē o te tai.
Umoì òe e peàu :
O ai e taha ma tītahi kēkē o te tai no te ùmihi i hua Ture
me te haaìte mai etià e aotahi mātou ?
14 Ua tata èka me òe hua teào.
Enā īa i òto o to òe fafa, i òto o to òe koekoe,
vāàna e aotahi atu òe. »
TARAMO 19 (18), 8, 9, 10, 11
He tiàtohu to Òe teào, e te Fatu e,
na to Òe ture e haapohoè mai. cf.In.17,17
8 U toitoi noa te ture o te Fatu,
Na Īa e haahou i to tātou ìi.
U tiàtohu te teào o te Fatu,
Te i haamāàma i te poì avai noa.
9 U toitoi te teào o te Fatu,
E haakoakoa âtou i te koekoe.
U hōata te maìmaì o te Fatu,
E haakeàpa i te mata o te ènata.
10 U taìtaì te pakaihitina o te Etua,
E noho mau anatu to Īa tau puku.
U toitoi te teào paotū o te Fatu :
He māàma âtou no te haavā i te ènata.
11 U taetae atu te maìmaì o te Fatu
I te puke moni kiki, te kuà o te moni kiki.
He mānini atu te teào o te Etua,
I te mānini tikauè e tahe me io te kaka.
TETAUTINA TE HĀMANI A PAURO PEÀTO I TO KOROHA
1, 15-20
E tu ù tau tunane tuehine.
15 O te Kirito te ata o te Etua ìtematakoètia.
O te Kirito te Tama hāmua, tiketike atu
i te tau mēmau ia ôtoa te i pēpenatia.
16 I òto o te Kirito, u pēpenatia to te àni, to te fenua,
Te tau mēmau ìtea, te mea ìtematakoètia :
Te tau kuhane mana, hakaìki, fatu, vivini.
U pēpenatia âtou nui, ma io Īa, no te haakāìè ia Īa.
17 O te Kirito à, ua tū Īa ma mua atu
o te tau mēmau paotū te i pēpenatia.
I òto o Īa, e tū mau nei âtou paotū.
18 O te Kirito te upoo o te Tino, te Èkaretia.
O te Kirito te Tumu o to te Èkaretia pohoè.
O Īa te Tama hāmua tū hakaùa, haakāìètia e te Etua,
etià e ìò o Īa te vivini o te tau mēmau ia ôtoa.
19 Vāàna i to te Etua maìmaì hakanā :
i òto o te Kirito te paoònaòna o te hakatu Etua.
20 Ma io te Kirito, e haaâvei me te Etua
te tau mēmau paotū, to te àni, to te fenua.
Ma te toto o te Kirito pāokapekatia,
e haaneke i te moû, e haakoè nui i te tōua,
i vāvena o te tau mēmau ia ôtoa.
ALLELUIA ALLELUIA
cf. .1In,21.
Oianei te teào hou ta te Etua i peàu mai :
O te ènata e kāòha i te Etua, a kāòha īa me to īa teina.
EVANERIO O IETU KIRITO VĀÀNA E RUKA 10, 25-37
I tēia mou pō,
25 ua tū tītahi tuhuna teào
me to īa peàu no te haahiiveke ia Ietu :
« E Tuhuna e, e aha te hana e hana atu au
etià e ìò ia ù te pohoè anatu ? »
26 U peàu Ietu ia īa : « E aha te mea i patutia
i to he Hāmani tapu ? Pēhea to òe tetau ? »
27 Ua haahua īa : « A kāòha òe i te Fatu to òe Etua
ma io he koekoe, ma io he ènata tiàtohu,
ma io to òe ìi paotū, ma io he kuhane.
A kāòha i te hoa me he mea ia òe aneiho. »
28 U peàu Ietu ia īa : « He mea toitoi ta òe teào.
A hana òe i hua hana, e pohoè ai. »
29 Atià e maìmaì ana te tuhuna teào te haaìte atu
he mea māàma to īa ūitina,
u peàu hoì ia Ietu : « O ai à to ù hoa ? »
30 U haahua atu Ietu :
« Ua hee te ènata me i Ierutaremi i Ieriko.
Ua âvei īa me te puke poì kamo.
Ua hao âtou ia īa me te kukumi.
Ua hiki âtou e avai ana i hua ènata mei mate nui.
31 Ua tihe pu tītahi tāuà, e hee ana ma io hua aanui.
Ua ìte īa i te ènata me to īa taha atu
ma te taì kē o te aanui.
32 Ua tihe me tītahi Revita i tēia vahi.
Ua ìte īa i te ènata me to īa taha atu
ma te taì kē o te aanui.
33 Atià, o te ènata Tamaria e vii ana i te fenua,
u haatata mai me hua ènata te i haamākakatia.
Ua ìtemata ia īa, u mehea to īa koekoe.
34 Ua oha, ua fāfī i te tau maki o te ènata takapii
e kiini ana i te kao me te uaina.
Ua tuu ia īa ma ùna o to īa pūriki
no te àve io he faè āpuu manihii.
U tiòhi meitaì ia īa.
35 I te oìoì, e too ana e ùa moni tea,
ua tuu atu i te ènata heifaè manihii me te peàu ia īa :
« A tiòhi meitaì i te ènata hopi. Ia nui atu te moni e pao,
na ù e tuu atu ia òe i te ava e hua mai au. »
36 O ai òa me io nā ènata tokoùa ua ìò he hoa
o te ènata i mākakatia e te poì kamo ? To òe maakau ? »
37 U peàu te tuhuna teào : « O tēia te i hakāòha mai i te ènata. »
U peàu Ietu ia īa :
« A taha atu, a hana òe hua mea aneiho. »
TOMINIKA ÒNOHUU MA ONO
TETAUTINA O TE HĀMANI TENETE 18, 1-10
1 Io te maaâkau peàutia Mapere,
u haaìte te Fatu Etua ia Īa iho ia Aparahamo, pēènei à :
I te oatea nui, tū toitoi me veàveà te òumati,
ua noho Aparahamo io te avaputa o to īa faèkā.
2 E feau ana, ua ìte Aparahamo i nā ènata tootoù
e maô ana i mua toitoi o īa.
U maô Aparahamo me to īa tohuti io âtou.
Ua moe haatona io he tuaèpo e peàu ana pēènei :
3 « E te hakaìki e, anoa èkaèka òe e âvei me au,
aua e taha pu. A hakaēa mea iti io to òe tāvini nei.
4 Enā e àvetia mai tītahi mea vai
no te hooi i to ôtou tau vaevae.
A hakaēa ôtou me te moe ma aò o te tumuâkau nei.
5 Enā e hano mai au i te mea faraoa.
A haaea i te menava, a atenoho me te moû,
epō e hee atu ôtou.
Na te mea, ua tihe mai ôtou io ta ôtou tāvini. »
Ua haahua mai âtou : « Meitaì. A hana vāàna i ta òe i peàu. »
6 Ua hano Aparahamo haaâvei me Tara, ta īa vehine,
io te faèkā me to īa peàu atu :
« A too anamai e toù hakatu faraoa tee,
a oi me te tao mai i te faraoa. »
7 A tahi a koi Aparahamo io te naho pifa.
Ua too īa i tītahi kaiū pifa taùtaù, òpio,
me to īa tuu atu i te tāvini no te tunu mai.
8 Ua too īa i tītahi mea vaiū feò, te vaiū tee,
Ua tuu īa i te înaì me te mea kai i mua o nā ènata tootoù.
Ua kai âtou. O Aparahamo à, ua tū īa
i te vahi maù o te tumuâkau, e tiòhi ana ia âtou.
9 Ua ūiūi âtou ia īa : « I hea Tara ta òe vehine ? «
U haahua Aparahamo : « Enā īa i òto o te faèkā. »
10 U peàu hakaùa te Fatu :
« Ma tēnei èhua a tihe mai, e hua mai au io òe.
I tēia ava, ua fānau te tama a Tara, ta òe vehine, e tamaòa. »
TARAMO 15 (14), 1a.2, 3b-4b, 5
U tata mai Òe, e te Fatu e, a haatūtaì Òe ia mātou me Òe.
1 E te Fatu e, o ai òa e noho io to Òe faè ?
2 Te ènata e hana vāàna i te toitoi noa.
Te ènata e faì anatu i te teào tiàtohu.
3 Aòè īa e hao i te mēmau o to īa teina.
Aòè īa e teào kaipīpiò i te hoa.
4 E haamee īa i te ènata ta te Etua e tute.
E pakaihi i te ènata haataetae i te Etua.
5 Aòè īa e kamo i te ènata te i àiê io īa.
U titii īa i te moni utu i te kaipīpiò.
O te ènata e hana atii e haamau i to īa pohoètina.
TETAUTINA TE HĀMANI A PAURO PEÀTO I TO KOROHA
1, 24-28
E tu ù tau tunane tuehine.
24 U koakoa au mēìa i to ù memae i uē ia ôtou.
Ua hano au e haapao i te nuitina o te memae
e memae ai tātou e tahi me te Kirito
no te meitaì o to Īa Tino, te Èkaretia.
25 Ua ìò au te tāvini o hua Èkaretia,
vāàna i te maìmaì o te Etua
te i vae ia ù no te toko ia ôtou,
ma te haavivini mai i te tiàtohu o te teào a te Etua.
26 O īa hoì te maìmaì hakanā o te Etua
te i haaìtekoètia òmua
i te tau tai ènata tehito, i te tau tupuna i aò aè.
I tēnei, u faìtia e te Etua i to Īa mataèinaa peàto.
27 U maìmaì te Etua e haapuàha i mua o to Īa mataèinaa
i te kāìè taetae nui o hua teào hakanā
ia hakakotia i te poì êteni, pēènei :
ua noho i vāvena o ôtou te Kirito,
te tumu o te kāìè ta ôtou e tetaì nei.
28 U hakako mātou i hua Kirito,
e oonaì ana i te tau ènata tikitahi,
e haamāàma atu ia âtou nui,
etià e meitaì aè te hakatu pohoè
o te tau ènata ia ôtoa i òto o te Kirito.
ALLELUIA ALLELUIA
cf.Ap.3,20
Mamau te ènata i òno i te èo o te Fatu
me te pepeù i to īa avaputa :
ua koàna ia īa te koakoa me te èkaèka.
EVANERIO O IETU KIRITO VĀÀNA E RUKA 10, 38-42
I tēia mou pō,
38 e fiti ana i Ierutaremi o Ietu me to Īa tau kouâ,
ua tomo âtou i òto o te pāpuafaè.
U āpuu tītahi vehine ia Ietu io to īa faè.
O Marata te inoa o hua vehine.
39 Enā me to īa teina, o Maria te inoa,
te i kaapee pii o nā vaevae o Ietu
e hakaòno ana i to Īa teào.
40 U kokouō Marata mēìa i te nuitina o te hana tāvini atu.
E tū ana īa, u peàu :
« E te Fatu e, aha he mea tupepaka no Òe,
u avai to ù teina e hana au tootahi i te hana tāvini ?
A peàu ia īa no te toko mai. »
41 U haahua Ietu ia īa :
« E Marata, Marata e,
u haapaòpaò pu òe me te kokouō
no te nuitina o te tau mēmau.
42 E àva te mou mēmau. Ua àva e tahi anaè.
Ua vae Maria i te hope taetae meitaì atu.
Aòè e takitia me io īa. »
TOMINIKA ÒNOHUU MA FITU
TETAUTINA TE HĀMANI A MOITE PEÀUTIA TENETE
18, 20-32
Ua maô nā manihii tokotoù āpuutia e Aparahamo.
Ua hano âtou e hee i te pāpuafaè Totoma me Komora.
20 U peàu te Fatu ia Aparahamo :
« Auē, te oko nui o te pooìna e fiti io ù
me i nā pāpuafaè Totoma me Komora !
Auē, te tono o to âtou mikeo !
21 E too ta ù e hee tiòhi i te hakatu o to âtou hana,
te oko o te pooìna ua fiti i tu ù aò.
No te mea e tīkoe oti, e ìte au. »
22 A tahi a taha nā ènata tokoùa i Totoma.
O Aparahamo à, ua noho i mua o te Fatu.
23 U haatata mai Aparahamo me te ūi atu :
« E te Fatu e, aha e hano Òe e haamate
i te ènata toitoi me te ènata mikeo ?
24 Enā oti e ìma ònohuu ènata toitoi io te pāpuafaè Totoma ?
Aha e hano Òe haamate ia âtou ?
Aòè e koàna ia Òe e vevete i to âtou mikeo
mēìa i hua e ìma ònohuu ènata toitoi
e noho aa i òto o te pāpuafaè ?
25 Auē, te faufau o to Òe hana me hana Òe atii !
E haamate e tahi matena i te ènata toitoi me te ènata mikeo ?
E oonaìtia te poì toitoi hakatu me te poì faufau ?
E aha e hakatio pu, e haavā pu me te toitoi koè
te Hakaìki nui o te aomāàma vii pu ? »
26 U haahua atu te Fatu : « Anoa e koàna ia ù i Totoma
e ìma ònohuu ènata toitoi,
mēìa ia âtou e vevete au i te tau mikeo
o te tau ènata paotū noho ana io he pāpuafaè. »
27 U peàu Aparahamo
« E vaavō au nei oti no te teào hakaùa i tu ù Fatu.
O ai au nei ? E èpo aneiho au, tūtū me te èhuahi anaè.
28 Atià, i òto o tenā tau ènata e ìma ònohuu toitoi noa,
e koè oti tokoìma.
E aha no tenā mou ènata tokoìma
e haamamape Òe i te pāpuafaè ? »
U haahua te Etua :
« Aòè au e haamamape i te pāpuafaè
me koàna ia ù e fā ònohuu ma ìma ènata toitoi. »
29 Ua tohe Aparahamo e peàu ana :
« E fā ònohuu ènata toitoi ta Òe e koàna mai oti. »
U peàu te Fatu :
« Aòè au e haapē i te pāpuafaè
mēìa i tenā tau ènata e fā ònohuu. »
30 U peàu hakaùa Aparahamo :
« Aua e pekē mai, e tu ù Fatu e,
no te mea e vaavō hakaùa au no te teào :
e koàna ia Òe e toù ònohuu ènata toitoi anaè. »
U haahua te Etua : « Aòè au e haapē i te pāpuafaè
mēìa i tenā tau ènata e toù ònohuu. »
31 Ua tohe Aparahamo :
« E vaavō oti au no te peàu hakaùa i tu ù Fatu :
e koàna oti ia Òe tekau ènata toitoi anaè. »
U haahua te Etua : « Aòè au e haapē i te pāpuafaè
mēìa i nā tekau ènata toitoi. »
32 U peàu hakaùa Aparahamo :
« Aua e pekē mai e tu ù Fatu e.
O īa tu ù teào paona :
tīònohuu ènata toitoi anaè oti, ta Òe e koàna mai. »
A tahi a haahua atu te Etua :
« Aòè au e haapē i te pāpuafaè Totoma
mēìa i hua tīònohuu ènata toitoi. »
TARAMO 138 (137), 1-2a, 2b-3, 6-7b, 7c-8
E te Fatu e, u haaòno Òe i tu ù pure vevaò. 138,3
1 E te Fatu e, u haahuaèkaèka au me io he koekoe.
U hakaòno hoì Òe i tu ù pure vevaò.
E hīmene nei au ia Òe i mua o te tau anera,
2 E oha nei au e tiòhi ana i to Òe Hiero tapu.
E haahuaèkaèka nei au mēìa i to Òe kāòha me te tiàtohu.
U tiketike atu i te tau mēmau paotū to Òe inoa.
3 I te â u haahua mai Òe i to ù pure vevaò,
U haaūo to Òe mana i te ìi o tu ù kuhane.
6 Ua ìte te Etua tiketike i te ènata avai noa.
Me i te vahi memao, ua tuhi Īa i te ènata kāìè pu.
7 E te Fatu e, me òomitia au e te ìno haapūkina mai,
U haapohoè mai Òe ma te haahina i te poì hiaki ia ù.
U tuàki au ma te mana o te Fatu.
8 I uē ia ù, ua hana me he mea ta Īa i peàu mai.
E te Fatu e, paona koè to Òe kāòha.
Umoì e hakaēa i to Òe matavaièi mai.
TETAUTINA O TE HĀMANI A PAURO PEÀTO I TO KOROHA
2, 12-14
12 E tu ù tau tunane tuehine.
Ma te papatema, u tomitia ôtou kātahi me te Kirito ;
kātahi me Īa, u pohoè hakaùa ôtou,
na te mea u haatià ôtou i te mana o te Etua
te i haatū hakauà ia Ietu Kirito
me i vāvena o te poì mamate.
13 Òmua, me he poì mamate ôtou mēìa i to ôtou tau mikeo,
he êteni ôtou, ìte koè i te Ture a Moite.
U vaièi te Etua ia ôtou i te pohoè kātahi me te Kirito,
ma te haakoè i to ôtou tau mikeo paotū.
14 Ua veti te Etua i te hāmani àiê te i hakatio ia tātou
ma to īa tau ture.
U haakoè te Etua i hua hāmani àiê,
me he mea u patia te Etua ia uo he peka o te Kirito.
ALLELUIA ALLELUIA c f. Rm.8,15
Haateetia e te Kuhane Meitaì te i haaìò ia tātou
he tau tama a te Etua, ua apa tātou i te Etua :
« To mātou Motua »
EVANERIO O IETU KIRITO VĀÀNA E RUKA 11, 1-13
1 Ohia ua noho Ietu io tītahi vahi, ua pure Īa.
Ia pao to Īa pure,
u peàu tītahi me i vāvena o to Īa tau kouâ :
« E te Fatu e, a hakako mai i te pure
me he mea u hakako Ioane i to īa tau kouâ. »
2 U peàu Ietu ia âtou pēènei :
« I te ava e pure ôtou, a peàu pēènei :
E te Motua e, a tapu to Òe inoa.
A tihe to Òe Patirēia.
3 A tuu mai i te oà no te â nei, paotū te â.
4 A haakoè i to mātou mikeo,
atii me mātou u haakoè i te poì u àiê mai.
Aua e haahemo mai i te mōtii. »
5 U peàu Ietu ia âtou pēènei :
« O ai i vāvena o ôtou me te hoa,
ia hee īa i te tūmoe nui no te peàu :
E te hoa e, a àiê mai e toù faraoa.
6 Ua tihe hoì io ù to ù hoa e vii ana i te fenua.
Aòè he mea kai ta ù no te āpuu ia īa.
7 Atià, me i òto o te faè, u haahua atu te hoa :
« Umoì e haapaòpaò mai. I tēnei, ua pātia te avaputa.
Ua moe au me ta ù tau tama.
Aòè e koàna ia ù te tū no te tuu atu ia òe. »
8 U peàu au ia ôtou : anoa aòè e tū te hoa
no te tuu i te faraoa, e aha à he hoa īa,
e maô hoì me te tuu atu i te mea paotū te i apetia
mēìa u vaavō to īa kaiapetina.
9 U peàu au ia ôtou : a ape ôtou, e tuutia mai.
A ùmihi ôtou, e koàna mai. A paopao, e pepeùtia ia ôtou.
10 Na te mea, me ape tītahi, e ìò ia īa.
Me ùmihi te ènata, e koàna mai.
E pepeùtia te avaputa no te ènata e paopao.
11 O ai te motua me i vāvena o ôtou,
me ape ta īa tama i te ià, e tuu atu i te puhifenua ?
12 Akoè à, me ape te tama i te māmaì moa,
e tuu atu i te koropio ?
13 Me ìte ôtou, e te poì pē,
e tuu atu i te mea meitaì i ta ôtou tau tama,
tōtahi atu ta te Motua te io he àni
e tuu atu i te Kuhane Meitaì i te poì e ape io Īa. »
TOMINIKA ÒNOHUU MA VAÙ
TE HĀMANI O TE TUHUNA TEÀO KOHERETA
1, 2 ; 2,21-23
1,2 Oianei te teào o te tuhuna māàma, o Kohereta te inoa :
« He auahi anaè, auahi puhitia e te metani te tau mea ia ôtoa.
2,21 U haapaòpaò tītahi ènata ia īa iho, ma to īa hana haanui.
He ènata tuhuna īa, ènata māàma.
Ma to īa hana, u tapavaù nui.
Atià, e avai anamai īa i to īa taetae
i te ènata kē, aòè īa i paòpaò i te hana.
Oianei te mea tupe noa me te mea teka nui.
22 E hoì. E aha te mea e koàna mai i te ènata i te ao nei
ma to īa paòpaò te hana haanui i òomi ia īa ?
23 E aha te mea e koàna mai i te ènata,
ma to īa memae i tēia â, tēia â,
te haapao meitaì i te hana tuutia ia īa,
to īa matakā anaè i te pō ?
O īa hoì te mea e auahi puhitia e te metani. »
TARAMO 90 (89), 3-4, 5-6, 12-13, 14.17abc
E te Fatu e, i tēia tai, i tēia tai ènata,
O Òe aneiho to mātou vahi maù. 90,1
3 U haahua Òe i te ènata io he èpo, to īa tumu.
U peàu hoì : « E hua te ènata io he èpo kaaea. »
4 No Òe e aha tautini èhua ? E tahi â anaè.
E tahi â pao vave, me he ava poto i te pō.
5 Ua puhi Òe : ua naò te ènata me he ata moemoeā.
E aha te ènata ? He teitā e huìkē vave.
6 U pupuà īa me he pua i te pōpōuì,
I te ahiahi, ua òì me he teitā moô.
12 A haaìte mai i te nuina o to mātou tau â.
A tahi nei e ùmihi mau mātou i te māàma.
13 E te Fatu e, a òomi ponihoo i to Òe pekē.
Umoì te haatevee i uē i to Òe tau tāvini.
14 I te pōpōuì, a haaèka mai to Òe hakāòha ia mātou :
E pao ai to mātou tau â me he koìna me te hīmene.
17 I ùna o mātou te moû o te Fatu, to mātou Etua.
A haamau te Etua i te hana o to mātou îìma.
TETAUTINA O TE HĀMANI I TO KOROHA 3, 1-5.9-11
E tu ù tau tunane tuehine.
1 Mēìa u pohoè hakaùa ôtou kātahi me te Kirito,
a ìmi i te taetae te io he àni, i èià hoì te Kirito,
e noho aa i te ìma oko o te Etua.
2 A kōhoà aneiho i te mea te io he àni,
umoì i te mea te io he aomāàma nei.
3 Ua mate ôtou kātahi me te Kirito.
To ôtou hakatu pohoè hou, u te e haaìtetia atu nei,
aòè i haaìtetia me to te Kirito.
Atii hoì to tātou mēìa ua pii tātou me te Etua.
4 O to ôtou hakatu pohoè hou e tahi me to te Kirito.
No èià, i te â e haaìte te Kirito ia Īa iho,
e tū ai ôtou me Īa i òto o te kāìè Etua.
5 A haahina hoì ôtou i te tau hīa pē o te tino :
te hana mako, te hana faufau, te hinenaò pu, te maki mikeo,
te kōhoà pu i te taetae me he pakaihi i te ètua tīkoe,
hua kōhoà te haapuke i te taetae.
9 Umoì e hakahae te hoa i te hoa.
Na te mea, u titii ôtou i te hakatu pohoè kākiu
no te too i te hakatu hou.
10 O īa te ènata hou pēpenatia e te Etua he ata no Īa,
etià e ìò to ôtou hakatu pohoè me to te Etua,
tōtahi atu i tēia â, i tēia â, tihe i te pii meitaì me te Etua.
11 Ma èià, e koè ai te paetina o te tau ènata ati kē
me io to te ati kē.
E koè ai te tuhi i te ati Iuta me to Hereni,
te ènata pātehetia me tahipito pātehekoètia,
te hāoè, te ènata kaikaia, te tueni haamōèhutia,
te ènata na īa ta īa.
E tahi anaè e toe : o te Kirito.
A kaituto ia Īa aneiho :
o te Kirito i òto o ôtou tikitahi.
O te Kirito te paoònaòna o te tau mēmau paotū.
ALLELUIA ALLELUIA
Mt. 5, 3
Mamau te poì koekoe veve, no âtou te Patirēia o te àni.
EVANERIO O IETU KIRITO VĀÀNA E RUKA 12, 13-21
13 I tēia mou pō,
me i vāvena o te faètoa, u pohā te èo o tītahi ènata
me te peàu ia Ietu : « E Tuhuna e,
a peàu i to ù tuaana no te tuu mai i te hope taetae
i ìò ia ù me io to maua tau tupuna. »
14 U peàu Ietu ia īa : « E te hoa e,
na ai e haatū ia ù he ènata haavā ia ôtou,
akoè à he ènata mea pāhee i to ôtou taetae ? »
15 U peàu Ietu ia âtou : « A tiòhi meitaì.
Umoì ôtou e kōhoà pu i te taetae.
E aha à u tapavaù nui te ènata,
aòè e haakoa atu hua taetae i to īa pohoè. »
16 U peàu Ietu ia âtou i tēnei teào haapupuà :
« Enā te ènata taetae nui.
U tapavaù to īa fenua : nui te puku i koàna mai.
17 U kaituto īa me te peàu : « Pēhea ta ù nei ?
Aòè e àva te faè avaina taetae
no te haapuke i te tau puku kohitia e au. »
18 I muì iho, u peàu : « Enā te mea e hano atu au.
E vāvahi au i to ù tau faè avaina taetae
me te haatū i nā faè keî aè, no te haapuke i òto
i to ù faraoa atii me to ù tau taetae paotū.
19 Ia pao te hana, e haaèka ia ù aneiho e peàu ana :
E tu ù kuhane, he mea nui to òe tau taetae
i haapuketia no te nuitina o te tau èhua.
A hakaēa òe. A kai, a inu, a haakoìna. »
20 Atià, u peàu te Etua ia īa : « E te ènata tuaave !
I te pō nei, e pao to òe pohoè.
Ia ai òa e ìò hua taetae i haapuketia e òe ?
21 Atii hoì ta te ènata e haapuke i te taetae no īa aneiho.
Atià, i mua o te Etua, he ènata taetae koè. »
TOMINIKA ÒNOHUU MA IVA
TETAUTINA O TE HĀMANI O TE MĀÀMA 18, 6-9
6 Ua ìte to tātou tau tupuna, o te pō Pakate
te pō o te haapohoètina.
Ua ìò ia âtou te koakoa nui mēìa ta âtou i ìte òmua
e aha te teào ta âtou i haatià.
7 E te Fatu e, u tiaì to Òe mataèinaa,
epō e haapohoè Òe i te poì toitoi,
me te haahina i te poì e tōua ia âtou.
8 I hua ava aneiho, u mamape Òe
i te tau ènata e tōua ana ia mātou.
Ua vae Òe ia mātou no te vaièi mai i to Òe kāìè.
9 I te pāòto hakanā o to âtou faè,
te tau moupuna i ùna aè o te poì toitoi,
u ùtuna âtou i te hēana Pakate.
I muì iho, u haahou ma he koekoe e tahi i te Piimau tapu,
e peàu ana pēènei :
« O mātou, poì peàto, a àva atu àva mai mātou
i te mea meitaì me te mea haauē mai. »
Ma hope mai, u kāhua âtou
i te hīmene haahuaèkaèka o to âtou tau tupuna.
TARAMO 33 (32), 1.12, 18-19, 20.22
Mamau te mataèinaa o te Etua 33, 12
1 A hīmene me te koakoa i te Fatu,
U hei nui e hahi ôtou, e te tau ènata toitoi.
12 Mamau te mataèinaa ia ìò te Etua he Fatu no īa.
Mamau te fenua vaetia me he pāpua no te Fatu.
18 Ua toko te Etua i te tau ènata pakaihi ia Īa,
Te poì e tetaì mau i to Īa kāòha mai,
19 U haapohoè ia âtou me io te ìno me te matena
Te haapohoè i te ava o te ìno me te one nui.
20 O te Fatu te tumu o to tātou pohoè.
O Īa to tātou toko me te vevaò.
22 E te Fatu e, a noho mau to Òe kāòha i ùna o mātou
Atii me mātou e tetaì mau i to Òe vaièitina.
TETAUTINA O TE HĀMANI I TO HEPEREO 11, 1-2 8-19
akoè à 11,1-2.8-12
E tu ù tau tunane tuehine.
1 O te haatià te i haatiàtohu e koàna mai ia tātou
te tau taetae ta tātou e tetaì nei.
O te haatià te i peàu mai
he mea tiàtohu te tau mēmau u te e ìtetia.
2 U haameitaì te Etua i to tātou tau tupuna
mēìa i to âtou haatià.
8 Mēìa i te haatià,
u aotahi Aparahamo i te Etua te i vevaò ia īa.
U titii Aparahamo i to īa fenua no te hee i te fenua kē.
O īa te fenua e ìò ia īa ma tītahi â.
Ua hee hoì Aparahamo ìte koè i hea.
9 Mēìa i to īa haatià,
ua tihe Aparahamo i te fenua peàutia e te Etua.
Ua noho īa io hua fenua me he manihii, i òto o te faèkā.
Atii o Itaako, o Iakopo, te i ìte e ìò ia âua hua fenua
vāàna ta te Etua i peàu.
10 U tetaì Aparahamo i te pāpuafaè haatūtia i ùna o te tuàka.
O te Etua te i kānea i te ata o hua pāpuafaè,
na te Etua e haatū ia īa.
11 Mēìa i te haatià,
ua tupu Tara i te tama, e aha à uehine īa.
U maakau hoì Tara e haapao te Etua i te mea ta īa i peàu.
12 Ma èià, me i òto mai o te ènata e tahi anaè, kooūa pē,
ua tupu te ati nui nui atu i te tau fetū o te ataàni,
nui atu i te one io te hiku o te tai.
13 Ma òto o te haatià,
u mamate âtou paotū, ìte koè i te mea i peàutia.
Atià, u tiòhi atu âtou i hua taetae me i te vahi memao.
Ua maakau hoì âtou me he tau manihii
io te ao nei âtou, e hee, hee anatu.
14 I te ava u kaituto atii te tau ènata,
u haatiàtohu hoì ua tūtū âtou
me te tau manihii e ùmihi ana i to âtou fenua tumu.
15 Aòè âtou i haamaakau i te fenua ta âtou i titii i mua atu.
U koàna ia âtou e hua atu i tēia fenua.
16 U kōhoà âtou i te fenua meitaì atu :
o te àni, te havaiki meitaì.
O īa te tumu ua ao te Etua e apatia : to âtou Etua.
Tōtahi atu, na te Etua iho e kānea i te pāpuafaè no âtou.
17 I te ava u haaveke te Etua ia Aparahamo,
mēìa i to īa haatià, u ùtuna Aparahamo ia Itaako.
18 E aha à u peàu te Etua ia Aparahamo
e haanui i to īa ati i ùna aè me i òto o Itaako,
ua ao Aparahamo te ùtuna i ta īa òna tama,
he tama tootahi Itaako.
19 U haatià hoì Aparahamo e koàna i te Etua
te haapohoè hakaùa i te poì mamate.
No èià, me he mea e hua ta īa tama io īa,
atii me te haatū hakaùa i te poì mamate.
ALLELUIA ALLELUIA
Mt .24, 42.44
A matavaa ôtou, a tiaì : na te mea, aòè ôtou e ìte
i te hora e tihe mai ai te Tama a te ènata.
EVANERIO O IETU KIRITO VĀÀNA E RUKA 12, 32-48
I tēia mou pō, u peàu Ietu i to Īa tau kouâ pēènei :
32 Umoì e haametaù, e te naho muto iti noa.
U maìmaì to ôtou Motua
e vaièi atu ia ôtou i te Patirēia.
33 A hoko atu i to ôtou tau mēmau paotū.
O te moni i koàna mai, a vaièi atu i te poì veve.
A kānea i te tiha moni aòè e paotia i te pē.
A haapuke i te tau taetae io he àni.
I èià, aòè te ènata kamo e haatata mai,
aòè e pao i te kai a te piura.
34 O te vahi i èià to ôtou taetae, i èià me to ôtou koekoe.
35 A taka i te kooi me te haauà i to ôtou àma.
36 A tūtū ôtou me te poì e tetaì i to âtou vivini
ia hua mai īa me i te koìna mātiri.
Etià e pepeù anamai âtou ia tihe īa
me to īa paopao i te avaputa,
37 Mamau te mou tāvini ta te vivini i koàna mai
e matavaa ana i te ava o to īa huatina io he faè.
Ma te tiàtohu, u peàu au ia ôtou : e taka kooi te vivini
me te haanoho i hua tau tāvini io he tapukai,
na īa te tuha i te mea kai ia âtou tikitahi.
38 Ia tihe te vivini i te tūmoe nui oti, i te hāhakateiao oti,
mamau te tau tāvini matavaa ana.
39 A vivo meitaì ôtou : anoa i ìte te heifaè
i te hora e tihe ai te ènata kamo,
aòè īa i avai te haaputaèe i te pākeâ o te faè.
40 Atii me ia ôtou, a haapeipei me ia ôtou :
e tihe mai hoì te Tama a te ènata
i te hora aòè ôtou i ìte. »
41 U peàu Petero : « E te Fatu e,
no mātou anaè tēnei teào haapupuà,
akoè à no te tau ènata paotū ? »
42 U peàu te Fatu :
« O ai òa te vivini toitoi, te vivini māàma,
te i vaetia e te heifaè no te haatee i to īa poì hana
me te tuha ia âtou, i te ava e hei, i te hope faraoa tee ?
43 Mamau hua tāvini, to te heifaè e koàna mai
e hana atii, i te ava o to īa hua mai.
44 Ma te tiàtohu, u peàu au ia ôtou :
e vae me te haatū te heifaè
i hua tāvini no te tiòhi i to īa tau taetae paotū.
45 Atià, me kaituto hua tāvini pēènei :
Aòè e tihe vave mai to ù fatu.
No èià, e tīmata īa e pehi i te tau tueni,
me te tau āhana me te tau vehine,
e kai oko īa me te inu haakona.
46 E tihe mai te fatu o hua tāvini
i te â i tetaìkoètia, i te hora ìtekoètia.
E haatopa te fatu i te tuki pē i ùna o hua tāvini
me te haakē ia īa me te tau poì te i titii i te Etua.
47 No te ìte te tāvini i te maìmaì o to īa fatu,
atià aòè he mea ta īa i haapei, ta īa i hana atu,
e pepehitia īa, e tātātia īa.
48 Atià, anoa u te e ìte te tāvini i te maìmaì o to īa fatu,
e mea à ua hana īa i te hana pē, e tātia he mea iti.
Ia nui te mea i vaièitia atu i te ènata,
e apetia me io īa te mea nui.
Ia nui te mea i tuutia i te ènata no te tiòhi meitaì,
he mea nui te taetae e apetia me io īa. »
TOMINIKA TEKAU
TETAUTINA O TE PEROFETA IEREMIA 38, 4-6.8-10
4 I tēia mou pō, i Ierutaremi, u humutia Ieremia te Perofeta.
U peàu te vivini o te pūpū kape i te hakaìki Hetekia :
« A haamate ia Ieremia.
Mēìa i to īa teào, u kuhane koè te mataèinaa,
ìi koè te tau kape no te tōua.
Aòè tēnei ènata e ùmihi nei i to te mataèinaa pohoè,
atià à to īa haahina. »
5 U haahua te hakaìki : « Enā īa i òto o to ôtou îìma.
Aòè e kiko te hakaìki me ôtou. »
6 A tahi a too âtou ia Ieremia me te titii ia īa
i òto o te ùavai io te pāpua o te hakaìki Meratia,
pii i te faèhumu. U haaiho ia īa ma he tōuà.
Aòè he vai i òto o tenā ùavai, e èpokau anaè.
Ua naò Ieremia i òto o hua èpokau.
8 Enā tītahi ènata me i te Fenua Etiopia, o Mereki to īa inoa,
he vivini īa o te faè o te hakaìki.
9 Ua òno īa i te hana pē i hanatia ma ùna o Ieremia.
Ua tihe īa io te hakaìki Hetekia me to īa peàu :
« E te hakaìki e, mea faufau te hana i hanatia
i ùna o te perofeta Ieremia.
Ua titii te tau kape ia īa i òto o te ùavai no te haamate. »
10 A tahi a peàu te hakaìki ia Mereki te Etiopia :
« A too òe tokotoù ènata me òe.
A taki i te perofeta Ieremia me i òto o te ùavai,
oa mate nui īa. »
TARAMO 40 (39), 2, 3, 4, 18
E te Fatu e, a tiòhi mai, a toko mai.
Umoì e haatevee, o Òe tu ù vevaò. 40 ,14
2 U tetaì au, e tohe mau te tetaì i te Fatu.
U tiòhi mai te Etua, ua òno Īa i tu ù vevaò.
3 Ua taki mai Īa me i te peteò pōtano,
Me io te ùavai me te èpokau.
Na te Fatu i haatū ia ù i ùna o te papakeâ.
E taha nei au, feòfeò to ù tino hou.
4 U pepeù te Etua i to ù haha no te hīmene hou,
E tani to ù èo no te hahi i to tātou Etua.
E òno aa te nuitina o te tau ènata,
E emièe âtou me te haatià i te Fatu.
18 He ènata veve au nei, ènata avai noa.
O te Fatu anaè te i haamaakau mai ia ù.
O Īa te i toko me te haapohoè mai.
A mai. Umoì e haatevee, e te Fatu e.
TETAUTINA O TE HĀMANI I TO HEPEREO 12, 1-4.
1 E tu ù tau tunane tuehine, a kaituto tātou
i te nuitina o te ènata haatiàtohu i te haatià,
tini, tini âtou vii pu o tātou nei.
A haakoè me io tātou i te mea e haatono mai ;
tōtahi atu, a titii i te mikeo te i haapākeka mai,
etià e tohuti tātou me te tohe te tīkakai i haaheitia no tātou.
2 A tiòhi matiòka tātou ia Ietu te tumu o te haatià
atii me to īa pao ònaòna.
U titii Ietu i te koakoa haapeitia no Īa
me to Īa amo i te peka, e memae ana e aha à te hakāìna.
I tēnei, u tānoho Īa i te ìma oko o te Etua.
3 A haamaakau ôtou ia Ietu te i mākakatia e te poì mikeo,
etià aòè ôtou e paòpaò, aòè e kuhane koè.
4 Tihe i, tēnei u te e tahe to ôtou toto
e tōtōua ana no te haahina i te mikeo.
ALLELUIA ALLELUIA
cf. In.10,14-15
Ietu, te tiaì meitaì, ua ìte i to Īa tau muto,
atii me to Īa tau muto ua ìte ia Īa :
u haaìò Īa i to Īa pohoè i uē ia âtou.
EVANERIO O IETU KIRITO VĀÀNA E RUKA 12, 49-53
I tēia mou pō, u peàu Ietu i to Īa tau kouâ pēènei :
49 « Ua tihe au no te àve mai i te ahi i no he fenua.
E kōhoà nei au e haauàtia i tēnei.
50 To mua e haanaòtia au i te memae,
me he mea te ènata e ùku i te vai no te papatema.
He mea òomi menava te tiaì epō e pao ai hua papatema.
51 E auana oti ta ôtou ua tihe mai au
no te haaneke i te moû i no he fenua ?
Aòè, ta ù peàu ia ôtou :
umoì te haaneke i te moû, atià à te tōtōua.
52 Me i tēnei mou pō, ia noho tokoìma ènata io tītahi faè,
e paekē âtou : tokotoù, tokoùa.
E tōtōua atu tōtōua mai âtou.
53 E tōtōua te motua me ta īa tama, te tama me to īa motua.
E tōtōua te kui me ta īa moî, te moî me to īa kui.
E tōtōua te motunoai vehine me te hunona,
te hunona me te motunoai. »
TOMINIKA TEKAU MA TAHI
TETAUTINA O TE PEROFETA ITAIA 66, 18-21
18 Oianei te teào a te Fatu.
« E tihe nei au no te haakātahi mai i te tau ènata
me io te tau fenua kē, te èo kē, èo kē ia ôtoa.
E tihe mai âtou no te tiòhi me te haatiàtohu i tu ù kāìè.
19 E tuu au ia âtou i te hana mana me he hakatu.
E pōpahi au i te mou ènata me i te toena o tu ù mataèinaa
i te tau fenua memao, te tau motu memao,
i èià, aòè i ìtetia tu ù kāìè, aòè i ònotia tu ù teào.
E haaìte atu tenā tau keèe i to ù kāìè i te tau mataèinaa.
20 Tītahi : Me io te tau mataèinaa êteni paotū,
e aahi mai tu ù tau keèe i to âtou tau tunane tuehine
no te ùtuna atu i te Etua.
E hua mai âtou ma he ihovare, ma he miura, ma he kamerō,
ma òto o te tau pāriri hakatu kē, hakatu kē.
E aahitia âtou tihe toitoi i tu ù tuaivi tapu, i Ierutaremi,
hakatu me te tau vaetukia àvetia e te mataèinaa Iraene,
ma ùna o te papa taìtaì no te ùtuna atu io he Hiero tapu.
21 Atià tōtahi atu : E vae au ma vāvena o âtou
i tahipito tāuà me te mou revita. »
TARAMO 117 (116), 1, 2
A tataha atu ôtou i te aomāàma vii pu,
a haaìte i te Teào Meitaì Hou mai Mk.16,15
1 A hahi i te Fatu, e te tau mataèinaa paotū.
A haakāìè i te Etua, e te tau fenua ia ôtoa.
2 Ua mana nui to Īa kāòha i uē ia tātou.
Ua mau te tiàtohu o te Fatu ma te tau tai e tihe anatu.
TETAUTINA O TE HĀMANI I TO HEPEREO 12, 5-7.11-13
5 E tu ù tunane tuehine,
Aha u māhaè ôtou i te Hāmani tapu te i peàu ia ôtou
me he mea i te tau tama :
« E tu ù tama e, Aua e haamee i te teào o te Fatu,
Aua e kuhane koè me oonaìtia òe e te Fatu.
6 Me haataetae te Etua i te ènata i oonaì ia Īa,
u oonaì pekē te Etua i ta Īa tau tama. »
7 O te mea ta ôtou e memae nei,
me he teào oonaì hua memae.
He tau tama hoì ôtou no te Etua.
O ai te tama aòè i oonaìtia e to īa motua ?
11 Ia oonaìtia tātou, e uēuē hoì, u mamae te koekoe.
Atià, ia hua mai tātou i te meitaì, ua ìte tātou
o te oonaìtina te tumu o te moû me te toitoitina.
12 No èià, me he mea i patutia :
« A ìi te tau pūhāìma momoû.
A feòfeò te tau muò pepae.
13 A haamenia i te aanui no te haamāeà te taha atu,
umoì te vaekoki e hipa me te tohuì to īa vaevae.
Ia makitia te vaevae, e haameitaìtia ponihoo. »
ALLELUIA ALLELUIA cf. Rk.13,29
E tihe te tau ènata me i te kēkē metani tuatoka,
te kēkē metani tokoàu, te kēkē metani tiu
me te kēkē metani karauu, no te àva atu
i te kainamau io te Patirēia o te Etua.
EVANERIO O IETU KIRITO VĀÀNA E RUKA 13, 22-30
I tēia mou pō,
22 e fiti ana Ietu i Ierutaremi, ua vii Īa i te tau pāpuafaè kē,
te tau faè kē no te hakako i te Teào.
23 U peàu tītahi ènata ia Īa :
« E te Fatu e, aha he mea iti te poì e haapohoètia ? »
24 U peàu Ietu ia âtou :
« A tohe ôtou no te uu ma he puta fāiti.
He mea nui hoì te tau ènata, ta ù e peàu ia ôtou,
e hano e uu i òto, aòè e koàna ia âtou.
25 Ia tū te heifaè me to īa pā i te avaputa,
i nonoho ai ôtou i vaho, u paopao i te avaputa,
e peàu ana : « E te fatu e, a pepeù mai. »
U haahua atu īa :
« Aòè au i ìte me i hea mai ôtou. »
26 A tahi a peàu ôtou :
« Ua kai me te inu mātou i to òe aò.
U hakako òe i te teào io to mātou tohua. »
27 U haahua īa me te peàu :
« Aòè au i ìte me i hea mai ôtou.
A taha atu haamemao me io ù,
O ôtou nui e te poì hana pē hae.
28 I èià te mateteka, te haatetei i te niho,
i te ava e ìte ôtou ia Aparahamo, ia Itaako, ia Iakopo
me i te tau perofeta paotū i to he Patirēia o te Etua.
O ôtou à, e tutetia i vaho.
29 E tihe te tau ènata me i te kēkē metani tuatona,
kēkē metani tokoàu, kēkē metani tiu, kēkē metani kanauu.
E àva atu âtou i te kainamau i to he Patirēia o te Etua.
30 Enā a ìò te vahi to mua i te poì i muì òa,
te vahi i muì i te poì to mua. »
TOMINIKA TEKAU MA ÙA
TETAUTINA O TE TUHUNA TEÀO PENETIRA
3, 17-18.20.28-29
17 E tu ù tama e, a hana òe i to òe tau hana paotū
me te koekoe haapāpaù, koekoe moû.
Ma èià, e haataetaetia òe ma ùna atu o te ènata vaièi
e tuha ana i to īa tau taetae.
18 Anoa he ènata tiketike, ènata mana òe,
tōtahi atu to òe haapāpaù.
Ma èià, e haaèka òe i te Fatu.
20 E aha à to te Etua mana nui,
u haakāìètia te Etua e te poì avai noa haapāpaù.
28 Pēhea te haakoè i te ìno me i òto o te ènata kāìè pu ?
I òto òa o to īa koekoe te aka o te pē.
29 O te ènata koekoe toitoi,
he ènata kaituto hae i te teào māàma.
Oianei ta te tuhuna teào māàma e kōhoà ma ùna atu :
te ènata puaìna hakaòno.
TARAMO 68 (67), 4-5a.c, 6-7ab, 10-11
Haameitaìtia te Fatu te i haatiketike i te poì iti noa.
cf. Rk.1,52
4 He koìna haaèkaèka to te poì koekoe toitoi.
I te aò o te Etua, ua haka âtou i te koakoa.
5 A hahi ôtou i te Etua, a haatani i te pū no Īa,
O te Fatu to Īa inoa. A hīmene me te haka i mua o Īa.
6 He motua te Fatu no te tau tama motua kui koè.
He vevaò te Fatu no te tau vehine pōpī.
7 E tuu Īa i te faè i te ènata pāpāuō.
E vevete Īa i te poì haamōèhutia.
10 U haatopa Òe i te ūa haatapavaù i to Òe mataèinaa,
U haaìi Òe i to Òe mataèinaa kuhane koè.
11 I te fenua e noho aa to Òe naho muto,
U tāfai Òe ia īa, o Òe te vevaò o te poì veve.
TETAUTINA O TE HĀMANI I TO HEPEREO 12, 18-19.22-24a
E tu ù tau tunane tuehine,
18 U te e haatata mai ôtou me te tuaivi Tinai,
te tuaivi tapu umoì e haatukia te ènata.
Aòè ôtou i ìtemata i te ahi uà tāpupu,
te kohu maù, te pōtano, te metani kāviivii,
19 te tanitina o te pū, te èo taaàu me he hatutii
haahopo i te mataèinaa e peàu aa : Etue te teào.
22 O ôtou à, u haatata mai ôtou me te tuaivi Tiona,
te pāpuafaè o te Etua pohoè, Ierutaremi te io he àni,
te nuitina o to īa tau anera tautini, tini âtou.
Ua tū ôtou i te aò o te motuhaka òno nui,
te putupututina o te tau tama hāmua,
o to âtou inoa i patutia io he àni.
23 U haatata mai ôtou me te Etua,
te Haavā o te tau ènata paotū.
U haatata mai ôtou me te tau kuhane o te poì toitoi noa,
meitaì èka to âtou hakatu pohoè.
24 U haatata mai ôtou me Ietu ;
ma io Īa, u haatoitoitia te Piimau hou.
ALLELUIA ALLELUIA
cf. Rk.1,52-53
Mamau te poì keèetia no te mau o te Fatu.
U haatapavaù Īa i te tau ènata mate i te one.
U haatiketike Īa i te poì iti noa.
EVANERIO O IETU KIRITO VĀÀNA E RUKA 14, 1a.7-14
I tēia mou pō,
1 i te Tāpati, ua uu Ietu i to he faè
o tītahi hakaìki Fariteo no te kai i te faraoa.
U tiòhi matiòka âtou ia Īa.
7 U peàu Ietu i te teào haapupuà i te tau hoa kai.
Ua ìte hoì Īa, ua hano âtou e noho i te vahi to mua.
8 « Ia vevaò te ènata ia òe i te kainamau koìna mātiri,
umoì òe e moe i te kōava to mua,
oa vevaòtia tītahi ènata hōhonu atu ia òe.
9 E peàu oti te heifaè te i vevaò i hua ènata e tahi me òe :
« A avai òe i te kōava no to mua ènata. »
O òe à, hemotia i te hakāìna,
e hee òe io te nohona paona i muì òa.
10 I te ava u vevaòtia òe, a moe io te kōava paona
etià me tihe mai te heifaè, e peàu ia òe :
« E to ù hoa e, i mua atu òe ! »
Ma èià, e haakāìètia òe i mua o te tau hoa kai paotū.
11 No te haatiketike te ènata, e haapāpaùtia.
No te haapāpaù tītahi, e haatiketiketia hua ènata. »
12 U peàu Ietu me i te ènata i vevaò ia Īa :
« Me hano òe e tuha i te kai iti, akoè à i te kainamau,
Aua e vevaò i to òe tau hoa, te tau teina,
to òe huaa, akoè à te poì pī i te taetae,
noho tata io òe, oa vevaò me âtou ia òe
no te vaièi mai i ta òe i vaièi atu ia âtou.
13 Atià, me tuha òe i te kainamau, a vevaò i te poì veve,
te poì takapii, te tau vaekoki me te tau matapō.
14 Mamau òe, na te mea aòè e koàna ia âtou
te vaièi mai ia òe. E vaièitia hoì ia òe
i te â e tū hakaùa te tau ènata toitoi vāàna e te Etua. »
TOMINIKA TEKAU MA TOÙ
TETAUTINA O TE HĀMANI O TE MĀÀMA 9, 13-18
13 O ai te ènata te i ìte i te tau maakau o te Etua ?
O ai te ènata te i vivini i te maìmaì o te Etua ?
14 He maakau poto te kaituto o te tau ènata ;
he koekoe pepee to tātou.
15 U haaveketia hoì to tātou kuhane e te tino mate vave.
U haaveke tēnei kahu èpo kaaea i te koekoe māàma.
16 He mea hana nui no te haavivini i te tau mēmau o te fenua nei
no te ìte meitaì i te tau mea tata èka po me tātou.
O ai òa te i ìte i te tau mea te io he àni ?
17 E te Fatu e, anoa u te e pōpahi mai i to Òe Kuhane Meitaì,
o ai òa te i ìte i to Òe maìmaì ?
Me io Òe aneiho te māàma, e te Fatu e.
18 Ma èià, u haatoitoitia te aanui
o te tau ènata noho ana io te ao nei.
Ma èià, ua ìte te tau ènata i te hakatu e haaèka ia Òe.
Ma io to òe māàma, u pohopohoè âtou.
TARAMO 90(89), 3-4, 5-6, 12-13, 14.17abc
E te Fatu e, i tēia tai, i tēia tai ènata,
O Òe aneiho to mātou vahi maù. 90, 1
3 U haahua Òe i te ènata io he èpo, to īa tumu.
U peàu hoì : « E hua te ènata io he èpo kaaea. »
4 No Òe e aha tautini èhua ? E tahi â anaè.
E tahi â pao vave, me he ava poto i te pō.
5 Ua puhi Òe : ua naò te ènata me he ata moemoeā.
E aha te ènata ? He teitā e huìkē vave.
6 U pupuà īa me he pua i te pōpōuì,
I te ahiahi, ua òì me he teitā moô.
12 A haaìte mai i te nuitina o to mātou tau â.
A tahi nei a ùmihi mau mātou i te māàma.
13 E te Fatu e, a òomi ponihoo i to Òe pekē.
Umoì te haatevee i uē i to Òe tau tāvini.
14 I te pōpōuì, a haaèka mai to Òe hakāòha ia mātou :
E pao ai to mātou tau â me he koìna me te hīmene.
17 I ùna o mātou te moû o te Fatu, to mātou Etua.
A haamau te Etua i te hana o to mātou îìma.
TETAUTINA O TE HĀMANI IA FIREMONE 9-17
9 O au nei o Pauro, te kooūa Pauro ;
i tēnei, io he faèhumu au nei mēìa ia Ietu Kirito.
10 E ape nei au ia òe i uē i tu ù tama,
te tama ta ù i fānau i òto o te faèhumu, Onehimo te inoa.
11 Òmua, he ènata avai noa no òe, aòè hoì e hana īa.
I tēnei, he ènata tohe i te hana no te toko mai.
E toko hoì īa me ia òe.
12 Io òe e pōpahi nei au ia īa
e aha à ua ìò īa me to ù iho hōupo.
13 O to ù hīa, e noho īa ma to ù kaokao ;
etià, ma to òe inoa, e tāvini mai ia ù,
te io he faèhumu mēìa i te Evanerio.
14 Atià, aòè au i maìmaì e hana i tītahi hana
aòè e haakoakoa oti ia òe.
Na òe ta òe hoì te vaièitina. Aòè e viitoi tītahi ia òe.
15 Ua hee uanei Onehimo memao me io òe no te ava poto,
etià e âvei hakaùa òe me īa, no te ava paona koè.
16 A āpuu ia īa, aòè me tītahi tueni haamōèhutia,
atià me he teina tāhia nui no òe.
Ua ìò īa e teina toitoi no au nei.
Tōtahi atu, a ìò he teina tiàtohu no òe
i mua o te Etua, i mua o to te ao nei.
17 No èià, anoa u maakau òe he hoa taua,
a āpuu mai ia Onehimo me he mea ia ù aneiho.
ALLELUIA ALLELUIA
cf.Ta.119,135
E te Fatu e, a matavaièi mai ia ù to Òe tāvini.
A hakako mai i to Òe maìmaì.
EVANERIO O IETU KIRITO VĀÀNA E RUKA 14, 25-33
I tēia mou pō,
25 ua ūtaì te faètoa nui ia Ietu. E fāìu ana, u peàu ia âtou :
26 « Anoa e tihe te ènata io ù, atià aòè īa e haataetae ia ù
ma ùna atu o to īa motua me to īa kui,
ta īa vehine, ta īa tau tama,
to īa tau teina, to īa tau tuehine,
to īa pohoètina aneiho,
aòè e koàna ia īa e ìò he kouâ no ù.
27 O te ènata u te e amo i to īa peka, e ūtaì koè ia ù,
aòè e koàna i hua ènata e ìò he kouâ no ù.
28 O ai hoì me i vāvena o ôtou, te i hano e haatū i te faè mōuna,
aha u te e kaapee īa òmua no te tetau
e fia moni e hei no te haapao meitaì i te hana ?
29 Anoa u te e kaapee hua ènata no te tetau i te moni,
e kānea īa i te tuàka me tītahi hope,
atià aòè e koàna ia īa te haapao i te hana.
E kakata hoì te poì te i ìte, e peàpeàu ana :
30 « Eīa te ènata te i tīmata e haatū i te faè.
Aòè e koàna ia īa te haapao i te hana. »
31 O ai òa te hakaìki e hano e nahu i te tōua me te hakaìki kē,
aha aòè īa e kaapee òmua no te kaituto pēhea
me to īa ònohuu tautini kape e tōtōua atu īa
me te hakaìki kē e tihe tōtōua mai me te tekau tautini kape.
32 Anoa u te e koàna ia īa, i te ava u memao te hakaìki kē,
ua pahi īa i te keèe no te haakoè i te tōua.
33 Hua mea aneiho i vāvena o ôtou nui,
anoa u te e paekē te ènata me io to īa tau taetae paotū,
aòè e koàna ia īa e ìò he kouâ no ù. »
TOMINIKA TEKAU MA FĀ
TETAUTINA O TE HĀMANI A MOITE PEÀUTIA EHOTO
32, 7-11.13-14
Ua noho Moite ma ùna o te tuaivi Tinai.
7 U peàu te Etua ia Moite : « A iho atu.
Ua teka nui to òe mataèinaa,
te poì ta òe i haafiti mai me io te Fenua Ekipito.
8 Aòè e haatevee âtou no te hukaka
me io te aanui ta ù i haahei no âtou.
U kānea âtou i te ata o te punua pifa me te puke moni kiki
haatahetia io he ahi.
Ua moe haatona âtou i mua o tēia ata
me te ùtuna atu i te hēana.
9 U peàu âtou pēènei : E te mataèinaa Iraene,
o īa nei to òe ètua te i haafiti ia òe me io te Fenua Ekipito.
Ua ìte au e mataèinaa koekoe pūtuì âtou.
I tēnei, e haaìte au ia âtou i to ù pekē ;
e haahina au ia âtou nui.
Atià, me io òe, e haafānau au i te mataèinaa òno nui. »
11 Ua hano Moite te haatāvaè i te Fatu, to īa Etua.
U peàu īa pēènei : « E te Fatu e, umaha Òe e pekē
i te mataèinaa ta Òe i aahi mai me i te Fenua Ekipito,
ma te mana o ta Òe hana mahaò,
me te ìi o to Òe pūhāîìma.
13 A maakau Òe i ta Òe tau tāvini
o Aparahamo, o Itaako, o Iakopo.
U peàu Òe ia âtou ma te haamau i ta Òe teào :
E haanui atu au i to ôtou ati i ùna aè
me he mea te nuitina tini, tini,
o te tau fetū io he ataàni. E tuu atu au
i to ôtou ati i ùna aè i te fenua ta ù i peàu.
O īa te hope taetae e ìò ia âtou
me he fenua me io te tupuna no te tau tai anatu. »
14 Ua huìkē te Etua. U haamāhaè i te tuki pē
ta Īa i peàu e haatopa i ùna o to Īa mataèinaa.
TARAMO 51 (50), 3-4, 12-13, 17.19
E tū au me te hee atu io tu ù motua. Rk.15,18
3 E te Etua e, a hakāòha mai.
Mēìa i te nuitina o to Òe uē,
4 A hooi mai me i to ù mikeo.
A haamā i tu ù koekoe pē.
12 A pēpena i òto o au nei i te koekoe taìtaì.
A haahou i to ù kuhane, a haamau i to īa meitaì.
13 Umoì e titii atu ia ù memao me io Òe.
Umoì e taki me i òto o au i to Òe Kuhane Meitaì.
17 E te Fatu, tu ù Etua e, a pepeù i tu ù kiinutu,
A tahi a hahi to ù fafa i to Òe kāìè.
19 O te koekoe unu i te uē, o īa te hēana e kākī Òe.
Te hēana e haatāvaè ia Òe, e te Fatu e.
TETAUTINA O TO MUA HĀMANI IA TIMOTEO 1, 12-17
12 U haahuaèkaèka au ia Ietu Kirito, to tātou Fatu,
te i haaoko ia ù no te tāvini ia Īa.
Ua vae Īa ia ù me he ènata e hei no te hana ta Īa i tuu mai.
13 E aha à òmua he ènata paha au,
ènata vaavō, haamākaka i te Èkaretia.
U hakāòha mai te Kirito,
mēìa ua hana au me te koekoe pōtano.
U te e haatià hoì au.
14 U vaièi mai to tātou Fatu
i te nuitina o te karatia me te haatià te i òto o te Kirito Ietu.
15 Oianei te teào tiàtohu, te teào hakahae koè :
Ua tihe te Kirito i te aomāàma nei
no te haapohoè i te tau ènata mikeo.
O au tītahi, te pē atu i vāvena o tahipito.
16 U hakāòha mai Ietu Kirito ia ù nei to mua,
etià e haapuàhatia i òto o au iho to Īa vaièitina.
O īa te hakatu no te poì e haatià ia Īa
vāàna e ìò ia âtou te pohoè anatu.
17 I te Hakaìki nui o te tau tai hakatahi,
i te Etua no te ava paona koè, ìtekoètia,
Etua e tahi anaè,
te hahi me te kāìè ma te tau tai a tihe anatu. Amene.
ALLELUIA ALLELUIA
cf.Ta.86,5 ; Rk.15,4 ; Ta.51,14
O Òe te Fatu meitaì nui e haakoè i te mikeo ;
O Òe te i ùmihi i te muto i naò,
A haakoakoa ia ù to Òe haapohoè mai.
EVANERIO O IETU KIRITO VĀÀNA E RUKA 15, 1-32
I tēia mou pō,
1 u haatata mai io Ietu te tau pupurikano
me te poì mikeo paotū i to Īa teào hakaòno.
2 U kōhumuhumu te tau Fariteo
me te tau tuhuna teào, e peàu ana :
« U āpuu meitaì te ènata nei i te poì mikeo,
ua kai īa me âtou. »
3 U peàu Ietu ia âtou i tēnei teào haapupuà :
4 « O ai te ènata i vāvena o ôtou
me te naho muto e ìma tekau,
anoa ua naò e tahi me io âtou,
aha u te e avai īa io te fenua me te mutiē
i te iva ònohuu ma iva no te ùmihi i tēia i naò,
tihe atu e koàna mai ia īa ?
5 Ia koàna mai ia īa, pī i te koakoa, u tautua i hua muto.
6 I te ava ua hua īa io he faè,
u haaputuputu i to īa tau hoa, te tau ènata tata me īa.
U peàu ia âtou : « A koakoa ôtou me au nei.
U koàna hoì iho nei ia ù te muto te i naò. »
7 U peàu au ia ôtou :
mēìa e tahi aneiho ènata mikeo te i fāìu i te koekoe,
he mea nui atu te koakoa io he àni
i to te tau ènata e iva ònohuu ma iva e māmaakau ana
aòè e hei no âtou te fāìutina o te koekoe.
8 O ai te vehine me ònohuu moni tarama ta īa,
anoa ua naò e tahi, aha u te e haauà īa i te àma
me te purumi i te faè, e ùmihi mau
tihe atu e koàna mai ia īa hua moni te i naò ?
9 Ia koàna mai, u haaputuputu i to īa tau hoa,
te tau vehine tata o īa, me te peàu :
« A koakoa ôtou me au nei.
U koàna iho nei ia ù te moni tarama i naò. »
10 Atii hoì ta ù peàu ia ôtou :
U koakoa te tau anera a te Etua,
mēìa e tahi aneiho ènata mikeo te i fāìu i te koekoe. »
11 U peàu hakaùa Ietu :
« Enā te ènata me nā tama tokoùa.
12 U peàu te teina i to īa motua : E to ù motua e,
a tuu mai i te hope taetae e ìò mai ia ù. »
Ua tuha te motua ia âua i to īa taetae.
13 Mou pō i muì iho, u haapuke te teina i to īa taetae paotū,
me to īa hee atu i te fenua memao.
I èià, ua tūtā pu īa i to īa taetae e pohoè ana māàma koè.
Ia pao to īa taetae i te tūtā pu,
ua mate nui īa i te one io hua fenua.
Aòè he mea to īa no te kai.
15 Ua hano īa e tāvini i te ènata o hua fenua,
te i pahi atu ia īa i te vahi teitā no te tiaì i te tau puaa.
16 U maìmaì īa e kai haamaòna i te tau puku
e kai nei te tau puaa.
Atià, u te e tuu atu te ènata e tahi ia īa.
17 E kaituto ana io he koekoe, u peàu īa :
« Toofia ènata hana io tu ù motua te i kai haamaòna.
He mea nui te poo faraoa e toe.
O au à, i înei, ua mate au i te one.
18 E hua au io to ù motua.
E peàu au ia īa : « E tu ù motua e,
ua teka au io te Etua io he àni. Ua teka au io òe.
19 Aòè e hei ia ù e apatia he tama na òe.
A āpuu mai me he ènata hana e tāvini ia òe. »
20 No èià, ua tū īa, ua hua io to īa motua.
Ia tihe īa i te vahi memao me io he faè,
ua ìte te motua ia īa. U mehea te motua,
u tohuti io te tama, ua hopu mau me te honi ia īa.
21 U peàu te tama : « E te motua e,
ua teka au io te Etua io he àni. Ua teka au io òe.
Aòè e hei ia ù e apatia he tama na òe. »
22 Atià, u peàu te motua i to īa tau tāvini :
« A àve mai ponihoo i te kuà o te kahu òoa,
a haauhi ia īa. A kokomo te koro io to īa ìma.
A haaoka i te aihū no to īa mou vaevae.
23 A hano i te pifa taùtaù me te kukumi.
A kai tātou, a haaèkaèka.
24 Ua mate hoì tu ù tama nei, enā u pohoè hakaùa.
Ua naò tu ù tama, enā u koàna mai. »
U tīmata âtou i te koìna haaèkaèka.
25 Enā io te vahi teitā te tama hāmua o hua ènata.
I te ava ua hua īa me to īa haatata io he faè,
ua òno īa i te tanitina o te pū me te haka.
26 U vevaò īa i tītahi tāvini.
Ua ūi atu e aha te hakatu o tenā mea.
27 U peàu te tāvini ia īa : « Ua hua mai to òe teina.
U kukumi to òe motua i te piha taùtaù
mēìa i koàna mai, tino feòfeò to īa. »
28 U pekē nui te tama hāmua.
Aòè īa e maìmaì e tomo io he faè.
Ua uu i vaho to īa motua,
u vevaò mai e toutaki ana ia īa.
29 Atià, u haahua te tama i to īa motua :
« E fia èhua i tēnei u tāvini au ia òe ?
Aòè au i pūtuì e tahi anaè o to òe tau teào.
Koè nui to òe tuu mai e tahi kaiū keukeu
no te haaèkaèka me to ù tau hoa.
30 Atià, me hua mai ta òe tama nei,
te i tūtā pu i to īa taetae me te tau vehine mako,
u kukumi òe i te pifa taùtaù. »
31 U peàu te motua ia īa :
« E tu ù òna tama e, ua noho òe anatu me au.
Na òe aneiho to ù tau taetae paotū.
32 Atià, he mea hei te tuha i te kainamau me te haaèkaèka
mēìa i to òe teina : ua mate nui īa, u pohoè mai nei ;
ua naò īa, u koàna mai nei. »
TOMINIKA TEKAU MA ÌMA
TETAUTINA O TE PEROFETA AMOTE 8, 4-7
4 A hakaòno mai i tēnei teào,
o ôtou e te tau ènata òomi haamemae i te poì veve
no te haakoè i te tau ènata avai noa o te fenua nei.
5 U peàu hoì ôtou :
« Aha aòè e pao vave te koìna o te māhina hou
etià e koàna ia mātou te hoko atu i te faraoa ?
Aha aòè e pao vave te Tāpati,
etià e koàna ia mātou e hoko atu i te faraoa tee ?
6 E hano mātou haaiti i te tau hakatu o te haìna,
te haapiki i te moni hoko, te haatekateka i te paona.
Ma èià, e koàna ia mātou te hoko mai
i te ènata kaikino me te moni iti po.
Atii te hoko mai i te poì veve me nā aihū aneiho.
E hoko atu mātou me te kaùkaù faraoa. »
7 U haatiàtohu te Fatu ma te vevaò i te kāìè o Iakopo :
« Koè nui e māhaè ia ù e tahi o to âtou tau tekateka. »
TARAMO 113 (112),1-2, 5-6,7-8
Haameitaìtia te Fatu te i haatū i te ènata pepae cf113 ;2.7
1 A hahi i te Fatu, ôtou e to Īa tau tāvini e.
A hahi ôtou nātoa i to Īa inoa peàto.
2 A meitaìtia te inoa o te Fatu,
I tēnei, ma te tau tai e tihe anatu.
5 O ai òa e tūtū me te Fatu, to tātou Etua ?
U vivini to Īa mana i te ataàni ia ôtoa.
6 Ua iho aè te mata o te Fatu,
E tiòhi Īa i te àni me te fenua.
7 Me io he èpo, u haatū te Fatu i te ènata pepae.
Me io he èhuahi, ua taki Īa i te ènata veve,
8 Me te haanoho ia īa i vāvena o te papa hakaìki,
Te tau hakaìki o to Īa mataèinaa.
TETAUTINA O TO MUA HĀMANI IA TIMOTEO 2, 1-8
1 Oianei to ù maìmaì to mua :
a pure tātou i te pure ape, te pure vevaò,
te pure haahuaèkaèka i uē i te tau ènata paotū,
2 no te tau Hakaìki o te mataèinaa,
te poì e haatee nei i te fenua
etià e koàna ia tātou te pohoè me te moû, haametaù koè,
e pakaihi i te Etua me te koekoe toitoi.
3 O īa na te pure e hei no tātou,
te pure haaèka i te Etua, to tātou Haapohoè.
4 U maìmaì hoì te Etua e pohoè ai io he àni
te tau ènata paotū me to âtou ìte i te teào tiàtohu.
5 Na te mea, he Etua e tahi anaè, he vevaò e tahi anaè,
i vāvena o te Etua me te tau ènata,
o te Kirito Ietu, ènata tiàtohu hoì Īa.
6 U haaìò ia Īa iho no te hoko mai i te tau ènata paotū.
I te ava i haaheitia e te Etua,
o īa te hana ta te Kirito i haapao.
7 Ua vae te Etua ia ù he keèe, he Àpotoro,
no te haamevaha i hua teào.
Aòè au e tīkoe, aòè e hakahae :
e tuhuna teào au no te hakako i te tau ènata êteni,
i te haatià me te tiàtohu.
8 No èià, o to ù hīa tēia : i te tau vahi hakatahi,
a pure te tau ènata e hapai ana i to âtou îìma,
me te koekoe taìtaì, koekoe moû, maakau pure aneiho.
ALLELUIA ALLELUIA
2Ko .8,9
O Ietu Kirito u haaìò ia Īa me he ènata veve oko,
e aha à na Īa te tau taetae ia ôtoa,
etià e tapavaù nui ôtou mēìa i to Īa haavevetina.
EVANERIO O IETU KIRITO VĀÀNA E RUKA 16, 1-13
akoè à 16,10-13
I tēia mou pō, u peàu Ietu i to Īa tau kouâ :
1 « Enā te ènata taetae nui
me te pahinaèo no te tiòhi atu i to īa tau mēmau.
U hakatiotia te pahinaèo
me he ènata tūtā pu i te taetae.
2 U vevaò hua ènata i te pahinaèo me te peàu ia īa :
« E aha te teào ua òno au i ùna o òe ?
A haaìte mai i te hakatu
o to òe hana tetau i to ù mēmau.
I tēnei, u haakoè hoì au i to òe hana tiòhi i to ù taetae. »
3 U kaituto te pahinaèo pēènei :
« Ohia u haapākeka tu ù vivini i te tiòhi i to īa taetae,
e aha òa ta ù hana i tēnei ?
E keì i te èpo ? Aòè e ava to ù ìi.
E kaiape ? U hakāìna au.
4 Aia. Ua ìte au e aha ta ù e hana atu
etià e āpuu mai tahipito i òto o to âtou faè,
ohia u haapākeka tu ù vivini e tiòhi au i to īa taetae.
5 U vevaò atu te pahinaèo i te poì u àiê i to īa vivini,
tītahi ma hope o tītahi.
U peàu īa i to mua te i tihe io īa :
« E fia to òe àiê io to ù vivini ? »
6 U haahua īa : « Hānere kati kao. »
U peàu te pahinaèo ia īa : « A too i ta òe hāmani.
A kaapee, a patu ponihoo : e ìma ònohuu. »
7 I muì iho, u peàu i tītahi : « O òe, e fia to òe àiê ? »
U haahua tēnei : « Hānere kete faraoa. »
U peàu te pahinaèo ia īa :
« A too i ta òe hāmani. A patu iho e vaù ònohuu. »
8 Ua hahi te vivini i te pahinaèo toitoi koè,
na te mea ua hana īa me he ènata māàma.
O te poì e hano i te taetae o te ao nei,
ua hana hoì i vāvena o to âtou tau hoa
me te koekoe māàma atu
i to te poì te i peàutia tama o te Māàma,
mēìa u tūìna te àma a te Etua ia âtou.
9 Oianei ta ù i peàu ia ôtou :
me te moni toitoi koè, a haakoàna mai ia ôtou te tau hoa.
I te ava e naò ai hua moni,
e āpuu hua tau hoa ia ôtou io he pāpuafaè ètereno.
10 Anoa e toitoi to te ènata hana no te mea iti noa,
e toitoi hoì to īa hana no te mea taetae nui.
Ia teka to te ènata hana no te mea avai noa,
e teka hoì to īa hana no te mea taetae nui.
11 Anoa u tiòhi teka ôtou i ùna o te moni toitoi koè,
o ai e tuu ia ôtou i te taetae tiàtohu ?
12 Anoa u tiòhi teka ôtou i ùna o te taetae o te tau ènata kē,
o ai e tuu ia ôtou i to ôtou aneiho taetae ?
13 Aòè e koàna i te tueni e tahi te tāvini i nā fatu tokoùa.
E haahaa hua tueni i tītahi fatu me te kāòha i tītahi,
akoè à e haataetae i tītahi fatu me te haamee i tītahi.
Aòè e koàna ia ôtou te tāvini atu i te Etua
atii me te tāvini ia Mamona, te ètua o te moni.
TOMINIKA TEKAU MA ONO
TETAUTINA O TE PEROFETA AMOTE 6, 1.4-7
1 He mea ìno te tau ènata e atenoho me te moû
i ùna o te tuaivi Tiona.
He mea ìno te tau ènata e māmaakau nei
e vahi haametaù koè te tuaivi Tamaria i èià e noho âtou.
4 U hiamoe âtou i ùna o te òki tāpītia me te èi paaoa.
Ua moe pu âtou i ùna o te tau moena kanahau oko.
Ua kai âtou i te punua muto mōmona, te kaiū pifa taùtaù.
5 U hīmene pu âtou me te kitā.
U haatani âtou i te pū me he mea ta te hakaìki Tavite.
6 Ua inu âtou i te uaina me io he tau hue nunui anamai.
Ua paùtia âtou me te pani kekaa taetae oko.
Atià aòè âtou e paòpaò i te àì nui
e topa anamai i ùna o te mataèinaa Iraene.
No èià, enā âtou e haamōèhutia me te aahi atu
io he fenua kē.
E ìò âtou te poì to mua e aahitia io he fenua memao.
E koè pu anamai te puke ènata moe ana
i ùna o te tau òki naènaè.
TARAMO 146 (145), 5a.6c.7ab, 7c-8, 9-10a
A hahi i te Fatu, u vaièi Īa i te poì veve.
5 Mamau te ènata e ìò te Fatu o Iakopo to īa toko.
6 E hana anatu te Fatu vāàna i ta Īa i haaìte mai.
7 U haavā Īa me te toitoi i te poì mākakatia.
U vaièi Īa i te oà i te poì mate i te one.
U vevete atu Īa i te poì me io he faèhumu.
8 O te Fatu te i haatāhahaka i te tau matapō,
O te Fatu te i haaūo i te poì kuhane koè.
O te Fatu te i haataetae i te poì toitoi noa.
9 O te Fatu te vevaò o te tau manihii.
O te Fatu te toko o te tama motua kui koè.
O te Fatu te motua o te tau vehine pōpī.
10 E vivini nei te Fatu ma te tau tai anatu.
E Tiona e, a pohoè paona koè to òe Etua.
TETAUTINA O TO MUA HĀMANI IA TIMOTEO 6, 11-16
11 O òe, e te ènata a te Etua, a titii pao i tēia mea.
A kōhoà òe i te koekoe toitoi, i te hana pure,
te haatià i te Etua, te kāòha,
te tohe mau i te meitaì, te koekoe moû.
12 Umoì e hakaēa i te tōua no te haaneke i te haatià.
A nui to òe hana meitaì etià e ìò ia òe te pohoè paona koè.
Ua vaetia òe no hua pohoè anatu,
vāàna te kanahau o to òe teào haatiàtohu
i mua o te nuitina o te ènata.
13 I te aò o te Etua, te tumu o te pohoè no te tau mēmau ia ôtoa,
i te aò o te Kirito Ietu te i faì atu me te mahaò
i to Īa teào haatiàtohu i mua o Ponotio Pinato,
14 u toutaki mamate au ia òe :
A aotahi meitaì i te teào o te Fatu
teka koè, piò koè, tihe atu i te Tihena
o to tātou Fatu Ietu Kirito.
15 I te ava e hei hoì, e haaìte ia Īa te Etua.
O Īa anaè te Tiketike nui, peàto,
te Hakaìki o te tau hakaìki, te Fatu o te tau fatu.
O Īa anaè te i pohoè mau anatu.
16 O Īa te i noho io te māàma ìtekoètia.
Aòè e tahi ènata i ìte ia Īa,
aòè e koàna i tītahi ènata e ìte atu.
Ia Īa te hahi, te mana nui paona koè. Amene.
ALLELUIA ALLELUIA
2 Ko .8, 9
U haaìò Ietu Kirito ia Īa me he ènata veve oko,
e aha à na Īa te tau taetae ia ôtoa,
etià e tapavaù nui ôtou mēìa i to Īa haavevetina.
EVANERIO O IETU KIRITO VĀÀNA E RUKA 16, 19-31
I tēia mou pō, u peàu Ietu i tēnei teào haapupuà :
19 « Enā te ènata taetae nui.
Ua uhitia me te kahu naènaè oko nui.
Paotū te â, ua kai īa i te kainamau.
20 Enā i pataa he avaputa o to īa faè,
ua moe te ènata veve kikino,
to īa tino naò i te tau maki, o Rataro te inoa.
21 U kōhoà īa i te kai haamaòna i te tau ota
e topa me io te tapukai o te ènata taetae nui.
Tōtahi atu, ua miti te tau nuhe i to īa tau maki.
22 I tītahi â, ua mate te ènata veve.
Ua too te tau anera ia īa
me to âtou àve i pii o Aparahamo.
Ua mate nui me te ènata taetae : ua tomitia.
23 I Havaiki, ua nui oko te memae o hua ènata.
E feau ana, ua ìte īa me i te vahi mamao
ia Aparahamo me Rataro ma to īa kaokao.
24 U taaàu hua ènata taetae me to īa peàu pēènei :
« E te motua Aparahamo e, a hakāòha mai.
A pahi mai ia Rataro,
a haatokū i te muamua o to īa manamanaìma i to he vai,
no te haamoû i to ù èo.
He mea oko to ù memae înei i òto o te ahi uà tāpupu. »
25 U haahua atu Aparahamo ia īa :
« E to ù tama e, a haamaakau òe : e pohoè ana,
ua tuutia ia òe te tau taetae haakoakoa.
Ua tuutia ia Rataro te mea haamemae ia īa.
I tēnei hoì, i te vahi nei, u èkaèka īa ; o òe à, u memae òe.
26 Eīa tītahi : e ōpata hōhonu i vāvena o ôtou me mātou nei.
Ia maìmaì tahipito me i înei e hee atu io ôtou,
aòè e koàna ia âtou. Atii hoì, aòè e koàna
i tītahi me io ôtou e tihe mai io mātou. »
27 U peàu te ènata taetae :
« A fati mai òe, e te motua e,
a pahi atu ia Rataro io he faè o to ù motua.
28 Na te mea tokoìma to ù mou teina.
A oonaì Rataro ia âtou,
oa topa me âtou i Havaiki nei o te memae. »
29 U peàu Aparahamo ia īa : « Enā Moite me te tau Perofeta.
A hakaòno atu to òe tau teina i to âtou teào. »
30 U peàu īa : « Umoì, e te motua Aparahamo e.
E fāìu i te koekoe to ù tau teina, anoa e tihe io âtou
tītahi me i vāvena o te poì mamate i Havaiki. »
31 U peàu Aparahamo ia īa :
« No to âtou pūtuì ia Moite me te tau perofeta,
aòè e fati to âtou koekoe,
e aha à e tū hakaùa tītahi me i vāvena o te huaa mamate. »
TOMINIKA TEKAU MA FITU
TETAUTINA O TE PEROFETA HAPAKUKO 1, 2-3 ; 2, 2-4
2 E te Fatu e, e aha te òa o to ù vevaò ia òe ?
U te e hakaòno mai òe.
E aha te òa o to ù oonaì me te pekē
i te tau ènata mākaka mai ?
U te e haapohoè mai òe.
3 E aha te tumu ua ao òe e ìtemata au i te mākaka nui ?
O òe iho e tiòhi pu anaè i to mātou ìno ?
I mua o to ù mata te hao pu i te mēmau,
te kamo, te pipikièe, te tōtōua.
No èià, ua koè te ture, ua koè me te toitoi.
E tiaì aneiho au e aha ta te Fatu e peàu mai.
2,2 A tahi a peàu mai te Fatu : « A patu òe i te mea ta òe i ìte.
A patu toitoi. A haapuàha i ùna o te keâ patu hāmani,
etià e koàna i te tetau.
3 I te ava u haaheitia, e pao meitaì hua mea paotū ta òe
i ìte atu. E hano hua mea ta òe i ìte i to īa haapao meitaì.
Aòè hua teào he teào hakahae.
U haatevee oti, e tihe to īa ava, epō anaè.
4 Enā e haahinatia te ènata tekateka.
Atià, e pohoè te ènata toitoi mēìa i to īa haatià.
TARAMO 95 (94), 1-2, 6-7b, 7d-8a.9
I tēnei â, umoì tātou e taha kē te koekoe,
a hakaòko i te èo o te Fatu. 94, 8
1 A mai ! A hahi me te koakoa i te Fatu,
A haakāìè i to mātou motukeâ, te Haapohoè.
2 A haatata mai io Īa, e haahuaèkaèka,
E hīmene haakoìna no te hahi i te Fatu.
6 A tomo. A oha. A atoratio ia Īa.
A moe haatona i mua o te Fatu,
7 Na Īa hoì i pēpena ia mātou.
O Īa te Etua, o mātou à te mataèinaa
I tēnei â, aha e āpuu ôtou i to Īa teào ?
8 Umoì ôtou e pūtuì me he mea i te fenua ataha.
9 U haamōtii mai hoì to ôtou tau tupuna me te hakaki.
E aha à ua ìtemata âtou i to ù hana mana.
TETAUTINA O TE HĀMANI E ÙA IA TIMOTEO
1, 6-8.13-14
6 E tu ù tama tāhia e, u haamaakau au ia òe i te mea nei :
a haaūo òe i te karatia o te Etua, vaièitia e au ia òe,
ma te hapai i to ù nā îìma i ùna o òe.
7 Aòè i vaièi mai te Etua i te kuhane haametaù hae.
U maìmaì te Etua e ìò tātou he tau ènata koekoe toa,
koekoe hakāòha, koekoe atenoho.
8 Umoì òe e hakāìna i te haatiàtohu i to tātou Fatu.
Atii hoì, umoì e hakāìna mēìa io he faèhumu au,
te tāvini o te Fatu. A àva òe i te memae e tahi me au nei
no te haatiàtohu i te Evanerio,
e toko ana te mana o te Etua ia òe.
13 O te hakatu tumu no to òe hana, te teào u hakako au ia òe,
i òto o te haatià me te kāòha,
te i ìò ia tātou me io Ietu Kirito.
14 A tiòhi meitaì me te haamau i te teào tiàtohu tuutia ia òe.
E toko ia òe te Kuhane Meitaì e ihi nei i òto o tātou.
ALLELUIA ALLELUIA
cf. 1 P.1,23
U fānauhoutia ôtou e te Etua no te pohoè anatu,
E noho mau te Teào Meitaì hou mai no te ava paona koè.
EVANERIO O IETU KIRITO VĀÀNA E RUKA 17, 5-10
5 I tēia mou pō, u peàu te tau Àpotoro i te Fatu :
« A haanui aè i to mātou haatià. »
6 U haahua te Fatu : « Anoa e tūtū to ôtou haatià
me te kākano terepota, e koàna ia ôtou
e peàu i te tumuâkau tiketike nei :
A taki tumu òe, a tanu iho ia òe io he tai.
E aotahi atu te tumuâkau ia ôtou. »
7 « O ai i vāvena o ôtou me te tueni keì i te èpo,
io to īa pāpua, akoè à e tiaì i to īa naho ânimara.
Ia hua mai te tueni me io he vahi teitā,
aha u peàu ôtou ia īa : « A mai ponihoo,
a noho òe io te tapukai ? «
8 He mea kē. U peàu ôtou ia īa :
« A tunu òe i te mea kai no ù. A taka i te kooi.
A tāvini mai etià e kai, e inu haamaòna au.
I muì iho, e kai, e inu me ia òe aneiho. »
9 Aha e haaèkaèka te vivini i hua tueni,
mēìa u aotahi īa i te mea ta īa i peàu atu ?
10 Atii me ôtou, ia hana ôtou i te hana paotū te i peàutia,
a kaituto : « He tau tāvini aneiho tātou nei.
Ua hana anaè i to tātou hana tumu. »
TOMINIKA TEKAU MA VAÙ
TETAUTINA O TE ÙA O TE HĀMANI A TE TAU HAKAÌKI
5, 14-17
14 Enā tītahi hakaìki vivini kape o te Fenua Tiria,
o Naama to īa inoa, he ènata kovi.
U peàu te perofeta Erihea ia īa no te kaukau i te vai Ioritane.
U kaukau Naama i te vai Ioritane, e fitu kaukautina.
U haataìtaìtia to īa kii, hakatu me te kii o te tama hou.
15 Ua tihe mai Naama io te perofeta Erihea,
o īa me to īa pūpū kapetiaì.
Ua uu īa io he pāpua o Erihea.
E tū ana i mua o te perofeta u peàu :
« I tēnei ua ìte au : aòè he Etua kē i te aomāàma vii pu.
O te Etua o Iraene anaè.
No èià, e ape nei au ia òe.
A haatià mai no te āpuu e tahi mēmau kāòha
ta to òe tāvini e tuu atu ia òe. »
16 Atià, u peàu te perofeta Erihea :
« Tiàtohu nui, ma te inoa o te Etua pohoè e tāvini nei au,
koè nui au e too e tahi mēmau. »
U toutaki Naama ia Erihea no te too mai.
Atià, ua tohe īa : koè nui i haatià i te too.
17 A tahi a peàu Naama pēènei :
« Te mea atii, a haatià mai e àve to òe tāvini
i te èpo me io tēnei fenua, te nuitina èpo
e koàna i nā miura e ùa te amo atu.
Na te mea, i tēnei anatu, e tahi ùtuna hēana anaè e ùtuna au :
te hēana no te pakaihi i te Fatu Etua o Iraene. »
TARAMO 98 (97), 1, 2-3ab, 3c-4a.6b
I to Īa mataèinaa, u haaìte te Fatu i to Īa mana nui.
cf. .98, 2
1 A hīmene i te Fatu i te hīmene hou.
U mahaò hoì to Īa tau hana.
U tuàki Īa i te mea haapākeka,
Na te mana o to Īa ìma peàto nui.
2 U haaìte te Fatu i to Īa tuàkitina,
U haapupuà i to Īa toitoi i mua o te poì êteni.
3 U haamaakau te Fatu i to Īa kāòha hakahae koè
I uē i te ati o Iraene, to Īa mataèinaa.
Ua ìte te fenua vii pu i to te Etua tuàkitina.
4 A hahi i te Fatu, e te fenua vii pu,
6 A vānana i te Fatu, to ôtou Hakaìki.
TETAUTINA O TE ÙA O TE HĀMANI IA TIMOTEO 2, 8-13
8 E tu ù tama e, a haamaakau òe ia Ietu Kirito,
te i tū hakaùa me i vāvena o te huaa mamate,
te i fānautia me io te ati o Tavite.
Oianei te Evanerio e haamevaha au.
9 I uē i hua Evanerio, u memae au nei,
ua humutia au me te tuitui, hakatu me te ènata mākaka.
Atià, aòè te teào a te Etua e humutia me te tuitui.
10 No èià, ua too au i te memae paotū
i uē i te mataèinaa a te Etua,
etià, me koàna mai ia âtou te pohoè haakāìè mau anatu
te i òto o te Kirito Ietu.
11 He teào tiàtohu nui tēnei :
Me mate nui tātou kātahi me Ietu Kirito,
e pohoè tātou kātahi me Īa.
12 Me tohe mau tātou, e vivini tātou kātahi me Ietu Kirito.
Me titii tātou ia Īa, e titii me Ietu Kirito ia tātou.
13 Me haamāhaè tātou ia Īa,
aòè e haamāhaè Ietu Kirito ia tātou.
Aòè e koàna hoì ia Ietu te haakoè i to Īa kāòha.
ALLELUIA ALLELUIA
Ta. 107,8
A haahuaèkaèka i te Fatu mēìa i to Īa kāòha,
me to Īa tau hana mahaò paotū i uē i te tau ènata.
EVANERIO O IETU KIRITO VĀÀNA E RUKA 17, 11-19
11 I tēia mou pō, ohia ua fiti Ietu i Ierutaremi,
ua taha Īa ma te kotina
o te Fenua Tamaria me te Fenua Karirea.
12 Ia tata èka Īa me tītahi pāpuafaè,
ua hano tīònohuu ènata kovi e haaâvei me Īa.
13 Ua tū âtou i te vahi mamao
me to âtou taaàu, e peàu ana :
« E Ietu e ! E te Tuhuna e ! A hakāòha mai. »
14 E ìte ana Ietu ia âtou u peàu :
« A hee atu me te haaìte ia ôtou iho i te tau tāuà. »
Oi te hee atu, u haataìtaìtia âtou.
15 E tahi me i vāvena o âtou, e ìte ana u pohoè meitaì īa,
ua hua mai, e haakāìè ana i te Etua ma he èo oko.
16 Ua moe haatona īa i aò te aò, pii o nā vaevae o Ietu,
u haahuaèkaèka ia Īa. O īa à he ènata Tamaria.
17 U haahua Ietu me te peàu :
« Aòè à i haataìtaìtia te tīònohuu ?
I hea te tooiva ?
18 Me i vāvena o âtou, ua hua mai no te haakāìè i te Etua
e tahi anaè, te hāoè nei ? »
19 U peàu Ietu ia īa : « A maô. A taha atu.
Mēìa i to òe haatià, u haapohoètia òe. »
TOMINIKA TEKAU MA IVA
TETAUTINA O TE HĀMANI A MOITE PEÀUTIA EHOTO
17, 8-13
I tēia mou pō, ua noho te mataèinaa Iraene
i te fenua ataha,
8 io te kaavai peàutia Rafitimi.
Ua tihe anamai te poì Amarekita
me to âtou hano pu e hao i to Iraene.
9 U peàu Moite ia Iotua : « A vae mai òe i te tau ènata toa
no te hano atu e tōtōua me to Amarekita.
Oìoì e tū au i ùna o te tuaivi
me te tootoo o te Etua io te ìma. »
10 Ua hana Iotua vāàna ta Moite i peàu atu ia īa,
me to īa tōua atu i te poì Amarekita.
Ua piki ma ùna o te kapua tuaivi o Moite,
o Aarone me Huri.
11 Ia hapai Moite i to īa nā îìma, ua ìi te tau toa Iraene.
E mea à, ia topa i aò to Moite nā îìma, ua ìi to Amarekita.
12 Ua tihe te ava u momoû nā pūhāìma o Moite.
Ua tootia tītahi keâ me te tuu atu ma te tua o īa.
U kaapee Moite ma ùna o hua keâ.
U hapai Aarone me Huri i nā pūhāîìma o Moite,
tītahi i te ìma aèaè, tītahi i te ìma oko.
Ma èià, u hapai to Moite nā îìma
tihe te naòtina o te òumati.
13 Ua hina to Amarekita ia Iotua me te kohetā o to īa tau toa.
TARAMO 121 (120), 1-2, 3-4, 5-6, 7-8
Me io te Fatu te tokotina mai,
O Īa te i pēpena i te àni me te fenua. cf.121,2
1 U feau me te tiòhi au i te tuaivi.
Me i hea mai te mana e toko mai ?
2 Me io te Fatu te tokotina mai.
O Īa te i pēpena i te àni me te fenua.
3 E haamau Īa i to òe vaevae, oi vii.
E matavaa te Fatu, to òe Tiaki meitaì.
4 Aòè e hiamoe, aòè e matakau i te hiamoe,
Te tiaì o te mataèinaa Iraene.
5 O te Fatu to òe tiaì meitaì, to òe vahi maù.
Ua tū ana nei te Fatu ma to òe kaokao.
6 I te oatea, u te e haaveàveà te òumati ia òe.
I te pō, aòè e haahina te māhina ia òe.
7 E haapāpua te Fatu ia òe me i te ìno,
E tiòhi meitaì Īa i to òe pohoètina.
8 E aahi te Fatu i to òe hee atu me te hua mai,
I tēnei atii ma te tau tai a tihe anatu.
TETAUTINA E ÙA O TE HĀMANI IA TIMOTEO
3,14-17 ; 4,1-2
E Timoteo, tu ù tama e.
14 Umoì òe e māhaè i te teào ta òe i hakako,
ta òe i āpuu io he koekoe haatià.
Ua ìte hoì o ai te tau tuhuna te i haamāàma ia òe.
15 Me i te ava tino hou, ua òno òe
i te tetautina o te Hāmani tapu.
Na hua Hāmani e koàna mai ia òe te māàma,
e aahi ia òe tihe io te pohoè o te àni,
mēìa i te haatià, te i òto o te Kirito Ietu.
16 O te tau Hāmani tapu ia ôtoa, ua patutia e te tau ènata
ta te karatia o te Etua i haamāàma. E toko hua tau
Hāmani tapu i te hana haaìte atu i te teào, te oonaì,
te hakapahi i te hana meitaì, te haaìte i te aanui toitoi.
17 Ma èià, e àva to īa māàma me te ìi o te ènata tāvini
i te Etua, no te hana i te tau hana meitaì ia ôtoa.
4,1 I mua o te Etua me te Kirito Ietu te i haavā
i te tau ènata pohopohoè me i te tau ènata mamate,
ma te inoa o to Īa Tihena me to Īa Hakāìkitina,
u toutaki mamate au ia òe.
2 A haamevaha i te Teào.
I te ava e hei me te ava hei koè, a tohe te hakako.
A oonaì. A hakapahi i te meitaì.
A peàu me te mata ìi, a haatuhuna,
atià me te koekoe moû, e hano anatu e hakako i te Teào.
ALLELUIA ALLELUIA
Ta .145, 17.19.
U toitoi noa to te Fatu maìmaì paotū.
U tata èka me te poì i vevaò ia Īa.
U hakaòno Īa i to âtou èo me te haapohoè ia âtou
EVANERIO O IETU KIRITO VĀÀNA E RUKA 18, 1-8
I tēia mou pō,
1 u peàu Ietu i to Īa tau kouâ i te teào haapupuà
no te hakako ia âtou e tohe mau i te pure,
umoì e kuhane koè.
2 U peàu Ietu pēènei : « Enā io tītahi pāpuafaè
te ènata haavā te i pakaihi koè i te Etua,
e haamee ana i te tau ènata.
3 Io hua pāpuafaè, enā me te vehine pōpī
te i tihe io hua ènata haavā me te peàu :
« A haatoitoi òe i te teào i ùna o au nei
me te ènata e tōtōua mai. »
4 Aòè i ao vave te haavā i te haatoitoi i te teào,
u haatevee, haatevee īa. I muì iho, e kaituto ana,
u peàu īa pēènei : « E aha à e pakaihi koè au i te Etua,
e haamee i te tau ènata,
5 mēìa u haapaòpaò mai hua vehine pōpī,
e haatoitoi au i te teào vāàna i to īa ape mai,
oa tihe anatu īa e haaveveì mai. »
6 U peàu te Fatu : « A hakaòno meitaì ôtou
i te teào o te ènata haavā toitoi koè.
7 Aha u te e haatoitoi te Etua i te teào
i uē i to Īa huaa vaetia, te i vevaò ia Īa â te pō ?
Aha e haatevee te Etua i te toko ia âtou ?
8 U peàu au ia ôtou :
« E haatoitoi ponihoo te Etua i te teào i uē ia âtou.
Atià à, me tihe mai te Tama a te ènata,
aha e koàna ia Īa te poì haatià io he fenua ? »
TOMINIKA E TOÙ ÒNOHUU
TETAUTINA O TE TUHUNA TEÀO O PENETIRA
35, 12-14.16-18
12 U haatoitoi te Fatu Etua i te teào vāàna i te tiàtohu.
I mua o te Fatu Etua, u tūtaìtia te tau ènata paotū.
U hakaòno te Fatu i te pure vevaò
o te ènata òomimākakatia.
14 Aòè te Fatu e titii i te pure vevaò
o te tama motua koè, kui koè.
Aòè te Fatu e haamee i te vehine pōpī, e faì ana i to īa uē.
16 E āpuumeitaìtia e te Etua
te ènata tāvini ia Īa ma te tiàtohu o to īa koekoe.
E fiti io he àni to īa pure.
17 Epō e āpuutia to īa pure io te Etua,
aòè e hakaēa te uē o te ènata haapāpaù.
18 Aòè e hakaēa te pure o hua ènata haapāpaù,
e tohe ana tihe te tiòhitia mai e Etua Tiketike ia īa,
tihe ia haavā te Etua i uē i te ènata piò koè
ma te haatoitoi i te teào.
TARAMO 34 (33), 2-3, 16.18, 19.23
Ua òko te Etua me te haapohoè atu.
2 E haameitaì au i te Fatu ma te tau â paotū.
E hahi au i te Fatu i te tau vahi ia ôtoa.
3 Io te Fatu anaè to ù haakāìè.
A òno mai te poì veve, a koakoa me âtou.
16 U tiòhi te Fatu i te tau ènata toitoi.
U hakaòno i to âtou èo vevaò ia Īa.
18 U hakaòno te Fatu i te ènata e vevaò ia Īa,
Me to Īa haapohoè me io to âtou pūpūkina.
19 U tata èka te Fatu me te ènata koekoe uē.
Ua toko Īa i te ènata kuhane koè.
23 Te i haahaa me te hiiaki i te ènata toitoi.
E haapohoè te Fatu i te ènata haatià.
TETAUTINA E ÙA O TE HĀMANI IA TIMOTEO
4, 6-8.16-18
6 E tu ù tama tāhia e,
U ùtunatia au me he hēana.
Ua tihe mai te ava o to ù paekē.
7 Tihe i te paona, u tōua au no te teào tiàtohu.
U tohuti au, pao meitaì to ù tīkakai.
Ua tohe mau i te faì atu i te haatià.
8 Oianei te mea e toe : te koàna mai i te hei paè kāìè
ta te Fatu e tuu mai i te â o to Īa Tihena,
o Īa hoì te Haavā toitoi noa.
Aòè e tuutia ia ù aneiho, atii me te tau ènata paotū
te i tetaì me te kāòha i te â o to Īa Tihena.
16 Ia tū au to mua i mua o te haavā,
u titii te tau ènata paotū ia ù :
aòè e toko mai tītahi. Umoì e havatia âtou i hua teka.
17 Ua toko mai te Fatu. U vaièi mai i te ìi hou
etià e koàna ia ù te haaìte atu i te Teào
me te haamevaha i mua o te tau êteni ia ôtoa.
U haapohoè hoì te Fatu ia ù me io te niho o te reone.
18 E haapohoè mai te Fatu me io te tau ìno paotū
me to Īa aahi mai ia ù tihe io to Īa Patirēia o te àni.
Te kāìè ia Īa no te tau tai a tihe anatu. Amene !
ALLELUIA ALLELUIA
. cf. 1Tam.16,7
Aòè te Etua e tiòhi te hakatu o te ènata,
u tiòhi te ènata i te hakatu ma vaho anaè.
Ua ìte te Fatu i te tiàtohu o te koekoe.
EVANERIO O IETU KIRITO VĀÀNA E RUKA 18, 9-14
I tēia mou pō,
9 u peàu hakaùa Ietu i tēnei teào haapupuà
no tahipito e kaituto ana o âtou aneiho te poì toitoi.
O te tau ènata kē me he poì avai noa âtou.
10 « Ua fiti io te Hiero, hano i te pure, nā ènata tokoùa.
He Fariteo tītahi, he pupurikano tītahi.
11 Ua maô te Fariteo, e feau ana ua pure īa io he koekoe :
« E te Etua e, u haahuaèkaèka au ia òe,
mēìa aòè au hakatu me te tau ènata kē, he poì kamo âtou,
hana i te hana pē, haateka i te mātirimonio,
akoè à hakatu me tēnei ènata pupurikano.
12 O au à, u haaone au e ùa â
ma tēia hepetoma, tēia hepetoma.
U ùtuna au e tahi hope o te pāio ònohuu,
o te tau taetae paotū ta ù e koàna mai. »
13 O te pupurikano à, ua noho īa io te vahi memao.
Aòè īa e vaavō e feau io he àni.
Ua moto īa i te umauma e peàu ana :
« E tu ù Etua e, a hakāòha mai ia ù,
he ènata mikeo au nei. »
14 U peàu au ia ôtou : Ua hua io to īa faè te pupurikano
me te koekoe toitoi. Aòè i haatoitoitia to mua ènata.
Ia haatiketike hoì te ènata, e haapāpaùtia.
Ia haapāpaù te ènata ia īa aneiho, e haatiketiketia. »
TOMINIKA TOÙ ÒNOHUU MA TAHI
TETAUTINA O TE HĀMANI O TE MĀÀMA 11, 23-26 ; 12,1-2
23 E te Fatu e, aòè he mea aòè e koàna ia Òe.
O īa te tumu u hakāòha mai Òe i te tau ènata.
U haapiko Òe i te mata, oa ìte i to te tau ènata mikeo
epō to âtou hua i te meitaì.
24 U haaèka ia Òe te tau mēmau ia ôtoa e tū ana nei.
U te e haahaa Òe i te mēmau e tahi.
25 Na te mea, u te e pēpena Òe i te mēmau toomanu.
No to Òe haahaa i te mēmau, pēhea to īa tū ana nei ?
E pohoè te mēmau aòè i vaetia e Òe ?
26 Ua toko Òe i te mēmau ia ôtoa, mēìa na Òe âtou paotū.
12,1 O Òe te Fatu te i haataetae i te pohoè.
2 U oonaì Òe me te moû i te tau ènata tekateka
ma te haamāàma ia âtou me te haaìte i te tumu
o to âtou mikeo, etià e titii âtou i te ìno
no te haatià io Òe, e te Fatu e.
TARAMO 145 (144), 1-2, 8-9, 10-11, 13c-14
Oia nei te kāìè o te Etua, ia pohoè te ènata.
1 E haatiketike au ia Òe, e to ù Etua, to ù Hakaìki e.
E haameitaì au i to Òe inoa ma te tau tai anatu.
2 O to ù hīa e haakāìè ia Òe paotū te â,
E hahi i to Òe inoa ma te tau tai hakatahi.
8 He moû, he kāòha te hakatu o te Fatu :
U haatevee i to Īa pekē, ua pī i te uē.
9 U matavaièi anaè te Fatu no tātou paotū.
U haataetae i te tau mēmau ta Īa i pēpena.
10 E te Fatu e, a hahi te tau mēmau paotū
Me te haahuaèkaèka to mataèinaa ia Òe.
11 E haavivini âtou i te kāìè o to Òe Patirēia,
E vānana âtou i to Òe tau hana mahaò.
13 E tiàtohu anaè te tau teào o te Fatu,
E kāòha anatu to Īa tau hana paotū.
14 Ua toko te Fatu i te poì hinatia e te ìno.
U haaūo Īa i te ìi o te poì kuhane koè.
TETAUTINA E ÙA O TE HĀMANI I TO TETARONIKA
1, 11-12 ; 2, 1-2
E tu ù tau tunane tuehine.
11 E tiaì ana i hua â, ua tohe mātou i te pure i uē ia ôtou :
na to tātou Etua te i vevaò ia ôtou no te pohoè peàto,
e haahei ia ôtou me hua hakatu pohoè.
A toko te Etua ia ôtou no te hana i te hana meitaì
ta ôtou e kōhoà nei me te haapao i te mea paotū
ta ôtou i hana ma he koekoe haatià.
12 Ma èià, i òto o ôtou, e haakāìètia
te inoa o to tātou Fatu Ietu Kirito.
E haakāìètia me ôtou i òto o te Kirito Ietu.
E pao meitaì tenā hana vāàna i te karatia
o to tātou Etua, to te Fatu Ietu Kirito.
2,1 E tu ù tau tunane tuehine,
e too ta ù e peàu ia ôtou e tahi teào
i ùna o te Tihena o to tātou Fatu Ietu Kirito
me to tātou haaputuputu me Īa.
2 Oianei te mea ua ape au ia ôtou :
Umoì ôtou e pūpūkina, umoì e haametaù
ia òno ôtou i te teào perofeta,
akoè à i te teào ta ù iho i peàu,
ta ù i patu oti io he hāmani,
vāàna ta te tau ènata tīkoe i peàu,
no te haaìte e haatata mai te â o te Fatu.
ALLELUIA ALLELUIA
Mēìa i te nuitina o to Īa kāòha i to te ao nei,
ua tuu te Etua i to Īa Tama tootahi.
O te ènata u haatià ia Īa, e pohoè anatu.
EVANERIO O IETU KIRITO VĀÀNA E RUKA 19, 1-10
I tēia mou pō,
1 ua tomo Ietu i Ieriko
me to Īa taha atu i vāvena o te pāpuafaè.
2 Enā te ènata, o Takei te inoa.
O īa te vivini o te tau pupurikano. He ènata taetae nui.
3 Ua hano īa e tiòhi matiòka ia Ietu no te ìte o ai Īa.
Atià aòè e koàna ia īa mēìa i te faètoa.
He ènata poto hoì īa.
4 U tohuti īa i te vahi i mua
me te piki i ùna o te tumu hikomoro
no te ìte ia Ietu : e taha hoì Īa ma èià.
5 Ia tihe Ietu i hua vahi, e feau ana, u peàu ia Takei :
« E Takei e. Ponihoo. A iho mai.
I te â nei, he mea hei no ù te noho io to òe faè. »
6 Ua iho ponihoo Takei. U āpuu ia Ietu me te koakoa.
7 E ìte ana i tēia mea,
u kōhumuhumu âtou paotū me te peàpeàu :
« Ua noho Īa io he faè o te ènata mikeo. »
8 O Takei à, e maô ana, u peàu i te Fatu :
« E te Fatu e, e tuu atu au i te poì veve
i te hope toitoi o to ù tau taetae.
Me kamo au i te mēmau me io tītahi,
e haahua au e fā mēmau no te mea e tahi.
9 U peàu Ietu ia īa :
I tēnei â, u vaièitia te pohoè i te huaafaè nei.
Na te mea ua ìò me īa he tama a Aparahamo.
10 Ua tihe hoì te Tama a te ènata
no te ùmihi me te haapohoè i te mea naò. »
TOMINIKA E TOÙ ÒNOHUU MA ÙA
TETAUTINA O TE ÙA O TE HĀMANI MAKAPI 7, 1-2.9-14
1 I tēia mou pō, ua humutia te tau tunane toofitu.
O to âtou òna kui me âtou.
U hakapahi te hakaìki o Atiokia te inoa,
no te kai i te kiko puaa.
O īa te înaì i haataputia e te Ture a Moite.
U viitoi pu te hakaìki ia âtou.
Ua tātia âtou me te âkau me te touà.
2 U peàu tītahi tunane ma te inoa o âtou toofitu :
« E aha ta òe e hano nei ? Ua ìte te Etua ia tātou.
Aòè mātou e haahiiveke i te Ture o to mātou tau tupuna.
Meitaì atu e mate nui mātou. »
9 I te ava e mate nui te teina o nā tunane toofitu,
u peàu i te hakaìki pēènei :
« He ènata mākaka òe
no te haakoè i to mātou pohoè io te ao nei.
Ia mate nui mātou no te aotahi atu i te maìmaì
o te hakaìki o te aomāàma ia ôtoa,
na Īa e haapohoè hakaùa mai no te pohoè hou anatu. »
10 I muì iho, u mākakatia te toù o nā teina.
Ua nape ponihoo īa i te èò me te hohoà i nā îìma.
11 U peàu īa haametaù koè :
« Ua tuu mai te Etua i to ù tino me to ù tau mēmau.
No te pakaihi i to Īa ture, u titii au i tēia mēmau.
Na te Etua e haahua mai ia âtou. »
12 Ua pē i te mahaò te hakaìki me to īa pūpū tāvini,
e ìte ana i te koekoe oko o hua mahaì
e amo ana me he mea avai noa to īa memae.
13 Ia mate nui tēia, u mākakatia te fā o nā teina.
I te ava o to īa matena, u peàu pēènei :
14 « He mea meitaì te matena mēìa i te hiiaki o te tau ènata.
U tetaì mātou i te pohoè hakaùa vāàna i te teào o te Etua.
O òe à, u te e ava atu i te pohoè anatu. »
TARAMO 17 (16), 1.3ab, 5-6, 8.15
A tihe mai te â e aa au no te ìtemata i te Fatu. cf. 17,15
1 E te Fatu e, a haaòno ia ù e taaàu ana,
E ùmihi mau i te toitoitina.
U te e hakahae te teào o tu ù fafa.
3 U tiòhi Òe i tu ù koekoe. I te pō, o Òe me au.
No to Òe tiòhi mau ia ù, piò koè au.
5 Ua ūtaì au i to Òe tapuvae.
Aòè e pāpāuō tu ù nā vaevae.
6 U vevaò atu au ia Òe, e te Etua vaièi nui.
A haaòno mai. A āpuu i to ù teào.
8 A pāpua mai me he mea o au nei to Òe kikomata.
A haapupuni mai i te ava maù o to Òe pekeheu,
15 I to Òe aò, e tū nei au haatoitoitia e Òe.
Ia aa au, o to ù èkaèka e ìtemata ia Òe.
TETAUTINA TE ÙA O TE HĀMANI I TO TETARONIKA
2, 16-17 ; 3, 1-5
16 E tu ù tau tunane tuehine.
A haaokotia ôtou e to ôtou iho Fatu Ietu Kirito.
A haafeòtia to ôtou koekoe e te Etua, to tātou Motua.
U kāòha mai hoì te Etua. O īa te tumu ma to Īa karatia
e haaoko anatu i to mātou koekoe,
e tetaì ana i te tetaìtina haakoakoa.
17 A haamau Īa i to ôtou maìmaì e kōhoà nei
i te tau hana me te tau teào meitaì.
3,1 E tu ù tau tunane tuehine, a tohe i te pure i uē ia mātou
etià e mevaha te teào a te Etua,
e haakāìètia i te fenua vii pu, hakatu me io ôtou.
2 Tītahi : a pure ôtou etià e pohoè mātou
me io te tau ènata mākaka
e haahaa me te hiiaki ia mātou.
Aòè hoì e haatià te tau ènata paotū.
O te Fatu à, e hana Īa vāàna i to Īa peàu mai :
na Īa e pātoko ia ôtou me te haapohoè mai me io te ìno.
4 Ma òto o te Fatu i tēnei, a hana ôtou vāàna i to ù peàu atu,
atii oìoì aè, e aotahi mau ôtou i to mātou teào.
5 A aahi te Fatu ia ôtou ma he aanui o te kāòha i te Etua
me te tohe mau i te teào o te huatina mai o Ietu Kirito.
ALLELUIA ALLELUIA
cf.Ap.1,5-6
O Ietu Kirito te hāmua te i tū hakaùa me i vāvena o te poì mamate. Ia Īa te kāìè me te mana ma te tau tai a tihe anatu.
EVANERIO O IETU KIRITO VĀÀNA E RUKA 20, 27-38
I tēia mou pō,
27 u haatata mai io Ietu te mou ènata Tatuteo.
U haatià koè âtou i te tūhakaùatina o te huaa mamate.
Ua ūiūi atu âtou ia Ietu, pēènei :
28 « E Tuhuna e, ua patu Moite no mātou i tēnei teào :
Me mate nui te ènata i noho me te vehine, tama koè ta âua,
a too to īa teina i te vehine pōpī
me te haatupu i te tama
no te haapohoè i te inoa o te tuaana.
29 Eīa te ènata me to īa tau teina tokoono :
toofitu âtou paotū.
Ua noho te tuaana me te vehine.
Ua mate nui īa : aòè a īa tama.
30 Atii me te teina : ua too i te vehine. Aòè a īa tama.
31 Ua noho te toù o te tau teina me te vehine.
Ua noho me âtou toofitu me te vehine.
Atià, ua mate nui âtou paotū, tama koè.
32 I muì iho, ua mate me te vehine.
33 O hua vehine à,
i te ava o te tūhakaùatina o te huaa mamate,
o ai òa ta īa āhana ? Ua noho hoì īa me âtou toofitu. »
34 U peàu Ietu ia âtou : « Te tau tama o te ao nei,
ua noho te āhana me te vehine, te vehine me te āhana.
35 Atià, o te poì i vaetia no te àva atu i te ao a tihe mai,
no te tū hakaùa me i vāvena o te huaa mamate,
aòè âtou e noho te āhana me te vehine,
te vehine me te āhana.
36 Aòè e koàna ia âtou e mate iho.
E ìò âtou hua mea aneiho me te tau anera.
He tama âtou a te Etua, mēìa ua tū pohoè âtou hakaùa.
37 O te tūhakaùatina o te poì mamate,
u hakakotia e Moite i te ava o te Maateitā i uà tāpupu.
U vevaò hoì īa i te Fatu : te Etua o Aparahamo,
te Etua o Itaako, te Etua o Iakopo.
38 Aòè Īa te Etua o te huaa mamate atu,
atià, he Etua Īa o te poì pohopohoè.
No Īa hoì, u pohopohoè te tau ènata paotū. »
TOMINIKA E TOÙ ÒNOHUU MA TOÙ
TETAUTINA O TE PEROFETA MARAKIA 3, 19-20
19 Enā e tihe te â o te Fatu.
U veàveà oko īa me he ahi uà tāpupu.
Paotū te poì hākāìè pu me te poì e titii nei i te Etua,
e ìò âtou me he teitā moô. I te â a tihe nei,
e haapūovotia âtou io he ahi,
vāàna ta te Fatu o te aomāàma i peàu mai.
Aòè e aka, aòè e manamana e avai atu no âtou.
20 Atià, no ôtou te i pakaihi nei i tu ù inoa,
e tū ai te òumati o te toitoi.
Na īa e àve mai i te pohoè meitaì ma òto o to īa àma pupuà.
TARAMO 98 (97), 5-6, 7-8, 9-10
Enā e puta mai te Fatu no te vivini me te toitoi i to te ao nei.
cf. .98,9
5 A haatani i te pū, a vānana i te Fatu,
A ùtu te pahu, a òno nui te Fatu Etua.
6 A ònotia te kitā, te pū hakahau, te pūtoka.
A vānana i te Fatu, to ôtou Hakaìki.
7 A pooìna te tai me to īa mēmau pohoè.
A taaàu te aomāàma me te tau ènata paotū.
8 A papaki te vaiā io he tau kākaavai.
A neue i te koakoa te tau tuaivi.
9 Enā e puta mai te Fatu,
O Īa te hakaìki o te fenua.
10 E vivini te Fatu me te Toitoi
I to te ao nei me te tau mataèinaa.
TETAUTINA E ÙA O TE HĀMANI I TO TETARONIKA
3, 7-12
7 E tu ù tau tunane tuehine,
Ua ìte meitaì ôtou e aha te hana e hana atu
no te pohoè haahakatu me mātou nei.
Aòè mātou e pohoè i vāvena o ôtou
ma òto o te noho pu e haakoè i te hana.
8 O te faraoa ta mātou i kai,
aòè hoì mātou i ape i tītahi no te tuu pu mai.
Atià, me i te â me i te pō,
ma òto o te momokū me te memae,
ua hana mātou, oa haapaòpaò pu i tītahi i vāvena o ôtou.
9 E koàna hoì ia mātou te noho pu, hana koè.
Atià, u maìmaì mātou e ìò me he hakatu o ôtou.
10 I te ava i noho mātou io ôtou, pēènei to mātou oonaì atu :
Te mea aòè tītahi e maìmaì e hana atu,
aua aneiho e kai īa i te kai.
11 Atià, e òno nei mātou i te mea
e avai ma vāvena o ôtou tahipito e noho pu, hana koè,
e aha à e nui to âtou teka i te haaveke i te hoa.
12 I òto o te Fatu Ietu Kirito,
pēènei tu ù vevaò me te oonaì i hua poì :
a hana âtou ma òto o te moû no te kai i te oà
i koàna ia âtou ma to âtou hana.
ALLELUIA ALLELUIA
Rk. 21,28
A maô. A feau.
U tata èka to ôtou haapohoètina.
EVANERIO O IETU KIRITO VĀÀNA E RUKA 21, 5-19
I tēia mou pō,
5 ohia ua tuhi tahipito kouâ o Ietu i te Hiero tāpītia
me te tau keâ kanahau me te tau mēmau haamamaakautina,
6 u peàu Ietu :
« Me io te mea u tiòhi ôtou me te mahaò, e tihe te mou â
aòè e avaitia te keâ i ùna o te keâ.
E vāvahitia pao ònaòna paotū. »
7 Ua ūiūi âtou ia Īa e peàu ana :
« E Tuhuna e, afea e tihe mai tēia mea ?
E aha te hakatu e haaìte mai u tata èka to âtou tihena ? »
8 U peàu Ietu : « A tiòhi meitaì, oa haahukakatia ôtou.
He mea nui hoì te ènata e tihe mai ma to ù inoa.
U peàu âtou : « O au nei. Ua tihe te ava. »
Umoì ôtou e ūtaì ia âtou.
9 Ia òno ôtou i te teào o te tōtōua atu tōtōua mai
me te pooìna io te mataèinaa, umoì ôtou e hopohopo.
E tihe hoì òmua tēia mea.
Atià, aòè e tata èka te paona.
10 U peàu Ietu ia âtou pēènei :
« E tōua atu tōua mai te mataèinaa me te mataèinaa,
te fenua me te fenua kē.
11 E feùu nui oko te fenua.
I tēia vahi, tēia vahi, e hemotia te tau ènata
i te mate hautete faufau me te one nui.
E tihe mai te mea haametaù nui
me te tau hakatu mahaò io he ataàni.
12 Atià, òmua atu e popokitia ôtou, e mākakatia.
E haaìòtia ôtou i te tau tinakoka,
e àvetia ôtou io he faèhumu.
Mēìa i to ù inoa, e viitoitia ôtou
i mua o te tau hakaìki, te tau kuvenea.
13 Oia te ava e hei ia ôtou
no te haaìte atu i te teào tiàtohu.
14 A haamau ma he koekoe :
umoì ôtou e haapeipei i te teào no te peàu atu.
15 O au hoì e tuu atu ia ôtou i te teào māàma.
Me i vāvena o te tau ènata e tōtōua me ôtou,
aòè e koàna i tītahi e patitoo, e haapākeka i hua teào.
16 E haaìòtia ôtou e to ôtou huaa,
to ôtou motua me te kui, te tau tunane tuehine,
te tau hoa pii me ôtou.
E haamate âtou i tahipito me i vāvena o ôtou.
17 Mēìa i to ù inoa, e haahaa ia ôtou te nuitina o te tau ènata.
18 Atià, u te e koè te òuoho e tahi me i ùna o to ôtou upoo.
19 E koàna mai ia ôtou te pohoè ma to ôtou tohe mau. »
TE KOÌNA O IETU KIRITO TE HAKAÌKI NUI
TETAUTINA O TE HĀMANI E ÙA O TAMUERA 5, 1-3
1 U kātahi mai te tau ati paotū o te mataèinaa Iraene
vii pu o Tavite, i te kaavai Heperone.
U peàu âtou ia īa :
2 « O tātou nui nei e tahi toto me òe.
I te ava o Tauro te hakaìki,
ua tū òe he vivini o te tau pūpū kape o Iraene.
U peàu te Fatu Etua ia òe :
« O òe te tiaì meitaì o to ù mataèinaa :
na òe te haatee ia Iraene. »
3 I te kaavai Heperone, ua tihe mai io Tavite
te tau kōkooūa o Iraene paotū.
I te aò o te Fatu Etua, u haatoitoi Tavite i te Piimau me âtou.
Ua paù âtou ia Tavite me te kao tapu
e haatū ia īa he hakaìki no to Iraene paotū.
TARAMO 122 (121), 1-2, 3-4, 5-6a.7a
He moû, he moû anatu to Òe Patirēia, e te Fatu e.
1 U koakoa au ia peàutia mai :
« E fiti tātou io te faè o te Fatu. »
2 I tēnei, u hakaēa to tātou tapuvae
I mua o to òe avaputa, e Ierutaremi e.
3 E Ierutaremi e, pāpuafaè haatūmeitaìtia.
O īa te pāpuafaè o te tūtahitina.
4 Înei e fiti te tau ati o Iraene, te tau ati o te Fatu.
Înei e haahuaèkaèka to Iraene i te inoa o te Fatu.
5 Ua tū înei te tau vivini haatoitoi i te teào,
Te tau hakaìki o te mataèinaa Iraene.
6 A pure ôtou no te haatihe i te moû io Ierutaremi.
7 A noho mau te moû i òto o to òe pāpua.
TETAUTINA TE HĀMANI A PAURO PEÀTO I TO KOROHA
1, 12-20
12 E tu ù tau tunane tuehine.
A haahuaèkaèka ôtou me te koakoa i te Etua Motua
te i tuu ia ôtou no te àva atu
i te taetae tapaetia no to Īa mataèinaa peàto
i òto o te Patirēia o te māàma.
13 Ua taki mai hoì te Etua Motua ia tātou
me i te mana o te pō pōtano
me te haatomo i òto o te Patirēia o ta Īa Tama tāhia.
14 I òto o Īa, u koàna ia tātou te pohoè hou,
me te tukutina o to tātou tau mikeo.
15 O te Kirito te ata ìtea o te Etua ìtekoètia.
O te Kirito te Tama hāmua, tiketike atu
i te tau mēmau ia ôtoa te i pēpenatia.
16 I òto o te Kirito hoì, u pēpenatia te tau mēmau ia ôtoa,
te io he àni atii me to te io he fenua,
te tau mēmau ìtea me te tau mēmau ìtekoètia :
te tau àitua, kuhane mana e òna nei i te ataàni.
Na Īa, atii no te haakāìè ia Īa,
u pēpenatia te tau mēmau ia ôtoa.
17 O te Kirito à, ua tū Īa
ma mua atu te pēpenatina o te tau mēmau paotū.
I òto o Īa, e mau nei âtou paotū.
18 O te Kirito te upoo o te Èkaretia, te Èkaretia hoì to Īa tino.
O te Kirito te Tumu o to te Èkaretia pohoè.
O Īa te Tama hāmua. U haatū hakaùa te Etua ia Īa
me i vāvena o te huaa mamate,
etià e ìò Īa he vivini o te tau mēmau ia ôtoa.
19 I òto o te Kirito te pao ònaòna o te hakatu Etua :
o īa te maìmaì o te Etua.
20 Ma io te Kirito, u haaâvei hakaùa te Etua me Īa
i te tau mēmau paotū, to te àni me to te fenua,
e haamau ana i te moû
ma te toto o te Kirito pāokapekatia.
ALLELUIA ALLELUIA
cf. Mk.11,10
A meitaìtia te hakāìkitina o Tavite to tātou motua,
te Patirēia o te tai hou.
EVANERIO O IETU KIRITO VĀÀNA E RUKA 23, 35-43
I tēia mou pō,
35 ua tū i èià te mataèinaa e tiòhi ana.
O te tau hakaìki à, u haameemee âtou e peàu ana :
« U haapohoè Īa i tahipito. A haapohoè ia Īa aneiho
anoa o Īa te Kirito o te Etua, te Vaetia. »
36 U maio me te tau kape ia Ietu.
U haatata mai âtou me Īa no te fāinu i te vineka.
37 U peàu âtou : « O òe te hakaìki nui o te tau ati Iuta,
a haapohoè ia òe aneiho ! »
38 Enā i ùna o Ietu te mēmau i patutia pēènei :
« O īa nei te Hakaìki o te tau ati Iuta. »
39 Ua paha ia Ietu tītahi o nā ènata mākaka
pāokapekatia me Īa, e peàu ana :
« Aha o òe te Kirito ?
A haapohoè ia òe aneiho me ia maua nei. »
40 U haahua atu me te oonaì ta tītahi, e peàu ana :
« Aòè òe e hopo i te Etua,
e aha à ua àva òe i te tuki mamae e tahi me to Īa ?
41 No taua he mea toitoi :
oianei te tuki o to taua hana mākaka.
He mea kē to Īa : aòè o Īa piò. »
42 U peàu me īa : « E Ietu e, a haamaakau mai ia ù
i te ava e tihe mai òe me he Hakaìki. »
43 U peàu Ietu ia īa : « Ma te tiàtohu ta ù peàu ia òe :
i tēnei â, o òe me au i òto o te Pāpua meitaì. »
Comments